كيف لا اعشقك وانت عمري (كاملة جميع الفصول) حصريا عبر دليل الروايات بقلم موني محمد
رواية كيف لا اعشقك وانت عمري الفصل السادس 6
6
_صباح الخير ي أدهومتي..
=رد بغيظ:أدهومتي تاني؟عارف لو سمعت الأسم ده تاني هعمل فيك إيه؟
_هتعمل إيه يعني؟
=رد بخبث:حاجة بسيطة خالص همدح فيك قدام علا..
_وأنا مالي بعلا ي عم؟
=ليه هو مش الباشا برضوا بيحبها وعايز يتجوزها ولا أنا بيتهيألي؟
_أنا!!إطلاقا ديه كلها إشاعات واللي وصلك الكلام ده حد مش جدع..
=طب ما تغلطش فى نفسك علشان إنت اللي قايلي.. من الواضح كدة إن المحشي كبس على نفسك وخلاك تخرف..فضلت تقول طول الليل علا..أنا بحبك..ما أقدرش أعيش من غيرك..وتقريبا كدة كان حد عايز يتجوزها مكانك وإنت شتمته والشتيمة خرمت ودني..
_مين ده اللي يآخدها ده أنا أقتله لو فكر يعمل كدة.. إنت ما تعرفش أنا بحب.......
=ههههههههههههه..
_ي أبن القردة فضلت تجرجرني فى الكلام لحد ما وقعتني..
=مبدأيا إنت اللي عبيط أنا مالي..ثانيا بقي حد قالك إن أدهم المنياوي عبيط وبريالة تحب أقولك كنت بتحبها من أمتي؟
_أكيد مش هتعرف يعني..
=بتحبها من3 سنين وبالظبط يوم ما تعبت وإتحجزت فى المستشفى...
_إنت مش طبيعي بجد..عرفت إزاي؟
=مش بقولك اللي عملك ظابط ظلمك..ي بيه أولا إنت مفضوح أوي ومش بعيد تكون علا عارفة أصلا بسبب طريقتك ديه وثانيا شغلي وصحوبيتنا ساعدتني إني أفهمك...
_ربنا ما يحرمني منك ي صاحبي..بقولك إيه مفيش فوار معاك؟
=فوار؟؟إنت ليه مصمم تقفلني منك وتخليني أتصرف معاك تصرف يزعلك؟
_ي عم فى إيه تعبان والمحشي كابس على مراوحي وسألت سؤال برئ..
=تستاهل..ما هو مفيش إنسان طبيعي وعاقل يآكل محشي وفراخ وبتنجان مخلل الفجر..وي ريته بيبان عليك
_الله بلاش آكل يعني.
=لأ كل ي أخويا..المهم هتروح الشغل ولا لأ؟
_لأ مكسل ومش قادر أقوم..لأ أنا هقولك الصراحة أم نيفين عملتلي فطار الصبح وجابته وأنا بصراحة متشوق إني أدوقه وكمان عملتلي فراولة باللبن..أنا شاكك إن الولية ديه يإما عندها لبن فاسد يإما بقرة وبتحلبها كل يوم اصل مش معقولة كمية اللبن اللي بتجيبها لينا ديه..يعني إمبارح شفشق والنهاردة 2..مالك ي أدهم؟إنت بتتحول ولا إيه؟طب خلاص إهدي طيب هرجع لها الفطار وهسيب البسطرمة بس..
=أكل تاني من عندهم؟
_طب خلاص بلاش البسطرمة إحنا نرجع الفطار كله بس نسيب الفراولة..مش طافح ولا شارب أنا أصلا عامل دايت..بس البسطرمة شكلها حلو أوي
=هههههههه ي أبن الجزمة مش عارف أهزقك ولا أضحك على كلامك..إنت للدرجة ديه بتحب الأكل؟
_أنا بحب 4 حاجات فى حياتي إنت والنوم والأكل والنسوان..
=طب إيه رأيك أروح لعلا وأقول لها زين باشا زينة شباب الصعيد بيعشق النسوان وكل يوم مع بنت شكل ومش بيرجع البيت غير الفجر..ولا بلاها أكل ونحترم نفسنا؟
_لأ هنحترم نفسنا ووو..لأ ي عم كله إلا الأكل..
=الأكل ولا علا؟
_إنت إزاي تسأل سؤال زي ده..الأكل طبعا..قصدي علا
إنت هتقول لها صحيح؟
=ههههههههههههه..ي بني بطل جبن ثم إنك خايف من إيه هو إنت بتعمل حاجة من اللي قولتها أصلا؟
_لأ طبعا بس كلامك خوفني وشككني فى نفسي لدرجة إني صدقت..
=ده علشان إنت عبيط وبعدين علا عاقلة ومش عبيطة ولو أنا عندي شك 1٪ إنك هتأذيها مش هخليك تقرب منها لمجرد الأخوية حتى..
_حبيب قلبي إنت والله..أستني هقوم ألبس وأنزل معاك..
=والبسطرمة؟
_هبقي أتعشي بيها بقي..
=مفيش فايدة فيك خاااالص..
___________________
_توتاااااا إلحقي البيت بيقع..توتااااا..
=إيه فى إيه؟
_إلحقيني ي توتاااااا...آآآآه..
*علا كانت واقفة بره الأوضة وكانت بتنادي عليها والجدة كانت واقفة قدام باب الأوضة وماسكة جردل مايه فى إيدها وأول ما تقى خرجت الجدة غرقتها بالمايه..
_إتكلمت بصدمة:ناناه!!حرام عليكي..
=مش كان نفسك تروحي البحر أهي ناناه جابتهولك لحد عندك..
_ناناه برضوا ولا إنتي اللي قولتلها تعمل كدة؟
=أنا قولتلك حاجة ي ناناه؟
_ردت بخبث:أنا كنت نايمة فى حالي هي اللي جات وقالتلي تعالي نروح ناخد تقى من أوضتها ونشيلها ونحدفها فى البيسين بس أنا قولت حرام نعمل كدة فيكي وقولت كفاية نخضك بس هي اللي أصرت إنها تغرقك...
=ردت بصدمة:أنا ي ناناه؟
_أيوة وكمان كنتي عايزة تكتفيها قبل ما ترميها..
=بقي كدة ي ناناه بتسلميني؟ماااااشي..شوفي مين هيساعدك فى المصايب بقي وشوفي مين هيرجعك أوضتك ي ناناه..
_ردت بغيظ:توتاااااا حبيبة قلبي هتساعدني وهترجعني أوضتي وهتبات فى حضني كمان..صح ي توتا؟
=صح ي قلب توتا من جوا..ده إنتي حتى حضنك حنين أوووي..
_ردت بغيظ:محدش هيبات في حضنها غيري أبدا..
يلا ي ناناه أرجعك أوضتك..وما تزعليش هساعدك فى المصايب..
=ما هو كان من الأول ي باردة لازم أغيظك..
_إنتي تسكتي خالص ي توتا حسابك معايا هيبقي بعدين ي بنت ريم هانم ومراد أفندي..
=الجدة وتقى:ههههههههههه..
_إنتم لسه هتضحكوا أنا جعانة يلا ننزل نفطر..
=أنا مش عايزة أفطر رجعيني أوضتي وبعدين أنزلي أفطري..
_إنتي تؤمري ي سهام هانم..
__________________
*فى مكتب أدهم..
_أدهم..ي باشا..إنت ياااااض..
=هه؟بتقول حاجة؟
_هو إنت هتفضل سرحان كدة على طول بسبب أم القضية ديه لأ بقولك إيه أنا عايز أشوف أدهم القديم اللي كان بيخرج معايا وبنخربها...
=أدهم القديم مات من ساعة ما تعبت ي زين..
_إتكلم بحدة:ي بني هو فى إيه ما تفوق لنفسك بقي كانت فترة وعدت خلاص..ليه مصمم تفضل واقف عندها..فوق لنفسك ولشغلك ولحياتك بقي وبطل تفكر فى اللي فات..
=إنت بتعلي صوتك ليه ي زين؟
_إتكلم بحدة:علشان إنت أناني ومش بتحب غير نفسك..بتفكر فى نفسك وبس..بتفكر فى الماضي ومش عايز تشوف الحاضر اللي إنت عايش فيه..إنت ما تعرفش أبوك وأمك قلبهم واجعهم عليك إزاي..
_مكملا بحزن:لما بروح أبات هناك بسمع أمك وهي بتصلي وبتدعي إن ربنا يهديك ويصلح حالك ويفرحها بيك..بسمع أبوك وهو بيحكي إن أبن صاحبه إتجوز وخلف وبقي عنده حفيد..بشوف الحزن في عينهم عليك لما سيرتك تتجاب..يوم ما ريم عرفت إن أنا عايز أتجوز علا كانت فرحة الدنيا باينة فى عينها بس أنا كنت حاسس بوجعها وحاسس بكلامها اللي مش قادرة تعبر عنه كله وبتقول بس جزء قليل أوي منه..
أهلك بيحبوك وخايفين عليك ونفسهم يفرحوا بيك
أخرج من القوقعة اللي إنت فيها ديه بقي..
=رد بحدة:إنت اللي بتنصحني وبتتكلم أومال لو مكونتش عارف اللي فيها..أنا بتعذب أكتر منهم ي زين
=مكملا بحزن:صعب عليا ي زين..أنا واحد كان عايش مبسوط فى حياته أو زي ما إنت دايما بتقول لأني أصلا مش فاكر أنا كنت إيه..أنا واحد فى يوم وليلة حياته إتشقلبت..حادثة وبعدها فقد فى الذاكرة لدرجة إني مكونتش عارف أنا مين ولا حتى عارف حد فيكم..مش هنكر إن محدش فيكم إتخلي عني وكنتوا حقيقي سند ليا بس دايما كنت بحس إن ناقصني وجود حد تاني مش موجود بينكم..أنا هحكيلك حاجات كانت بتحصل معايا وكنت رافض أحكيها لحد حتى إنت بس لازم تعرفها النهاردة..أنا المواقف المشوشة كنت بشوفها كل أسبوع مرة والفترة اللي فاتت اللي هي من حوالي سنة كنت بشوفها كل يوم حرفيا ومش مرة واحدة لأ ده ممكن مرتين تلاتة..كنت بتوجع لوحدي فى الأوضة علشان ما تحسش بيا..كنت بتحجج إني عايز أنام مع إني مش بنام بدري أصلا بس ده علشان ما أحسش بالوجع قدامك وتخاف وتقلق عليا..أنا ببعد عن أهلي وحبايبي بحجة الشغل علشان مش عايزهم يعرفوا إني بتعب بالشكل ده..أنا نفسي أتجوز وأفرحهم بس أنا إترفضت من بنتين وده بسبب إني تعبت قدامهم وللأسف أفتكروني مش طبيعي وده كان رد واحدة منهم والتانية كانت فاكراني مدمن وبتعافي..ومع ذلك رجعت لهم وحبيت أبرر موقفي ليهم مع إني كنت حاسس إن الخطوة ديه غلط وإن قلبي متعلق بحد تاني مع إني ما أعرفش الإحساس ده صح ولا غلط..عارف إحساس إنك بتحب حد وروحت خونته..أنا كنت بحس كدة بس جيت على نفسي علشان أفرحهم...كل سنة مرت عليا كانت بتمر بصعوبة..كل سنة كنت بكبر فيها كنت بحس بوجع لأن كل اللي فى سني حبوا وخطبوا وإتجوزوا وأنا للأسف مكاني مش قادر أعمل حاجة وفشلت فى كل حاجة..حب وجواز وإني أبقى بار بأهلي..بس نجحت فى شغلي بس جايز أكون فى نظرك فاشل فيه هو كمان..كل الوجع اللي حسيت بيه ده بقاله 10 سنين..10 سنين بحاول أعيش مع وجعي لوحدي علشان ما تحسوش بحاجة..علشان ما أصعبش على حد..علشان ما أبانش ضعيف..لسه أناني برضوا وبحب نفسي وبس ي زين؟
_رد بزعل:ياااااه ي أدهم..كل ده كنت مخبيه جواك؟
أنا آسف ي صاحبي..آسف ي حبيبي بس أنا والله عملت كدة علشان تفوق لنفسك..عملت كدة علشان بحبك وخايف عليك..
=عارف ومش زعلان بس أنا موجوع وبحاول أعيش وأتغير بس مش عارف بسبب المشاهد اللي بتظهرلي..
_فى حاجة تانية حصلت؟؟
=آه..النهاردة ظهر ولد صغير مع البنت والبنت كانت واقفة بتلعب معاه وأنا خرجت ضربته وبعدتها عنه وقولتلها ما تلعبيش معاه تاني ولما عيطت أخدتها فى حضني وطبطبت عليها والولد سابنا ومشي بس ده كانت ملامحه واضحة..وإمبارح شوفت البنت اللي بتظهر كل يوم فى أحلامي..بس للأسف مكانش ليها ملامح بس لما ربطت الأحداث اللي بشوفها ببعض حسيت إنها كانت أقرب حد ليا..هو أنا كنت بحب زمان؟
_بص أنا مش هقدر أتكلم ولا أقولك حاجة لأن كلامي ممكن يتعبك ويدهور حالتك بس اللي أقدر أقوله دلوقتي إن طالما بتشوف مواقف وكل مرة بشكل مختلف وكل مرة بتعرف فيها لغز جديد يبقى خليك مركز فيها وقريب هتوصل للي إنت عايزه..
=بس أنا عايز أعرف منك..أرجوك لو عارف حاجة قولها وريحني..طب بلاش تفاصيل رد على سؤالي وبس..أنا كان عندي حبيبة..
_أيوة كان عندك حبيبة..وكان عندك صديق غيري كمان..
=نعمممممم!!إنت بتتكلم جد ولا بتهزر يا زين شكلك بتهزر..يعني أنا كان عندي حبيبة وكمان صديق غيرك
طب هو أنا ليه مش فاكرهم..الحادثة السبب؟
_أيون..
=طب هما فين دلوقتي؟
_معنديش خلفية وحتى لو عندي مش هتكلم ي أدهم كل اللي هقدر أساعدك بيه ي صاحبي إن خليك مركز فى المواقف اللي بتفتكرها..وبعدين كفاية رغي بقي أنا جعان وعايز آكل..
=لأ إنت حرفيا No دم Noمشاعر..
_لا حرام عليك أنا مش كدة خالص ده أنا كلي مواهب
=مواهب زي إيه إن شاء الله؟
_أكتب ي سيدي عندك..بجح..رغاي..سر البهجة فى أي مكان..تصدق تنفع مطلع أغنية المهم مش موضوعنا
جدع..مفيش مني إتنين لأن لو فى إتنين الدنيا هتخرب..راجل..مز أوووي أوووي..بعشق النوم..
الأكل..النسوان..
=ههههههههههه والله إنت كارثة..
_عارف عارف..المهم أنا فعلا جعان يلا نروح نآكل..
=أنا مليش نفس..
_ي عم بقي ما تقرفناش مش كفاية سيبت البسطرمة في البيت كمان مش عاوزني أروح آكل؟إيه ي جدع الأفترا والظلم ده
=خلاص خلاص إنت هتعمل حوار..يلا بينا..أدخل
_العسكري أدى التحية وقال:ي باشا فى شاب برا وعايز يقابل حضرتك..
=مقالش مين؟
_لأ خالص..
=طب دخله..
_إزيكم ي حلوين..
=سماسيمو حبيبي..
_ما بلاش أم الأسم ده ي زين..وبعدين في ظابط محترم يقول كدة؟
=ومين قالك إن أنا محترم ي عم ده أنا تربية أخوك هبقي محترم إزاي؟
_لأ ما أسمحلكش بقي أنا أخويا طول عمره مؤدب على فكرة..
=آه طبعا أومال..
_عندك إعتراض ي زين باشا؟
=إطلاقا ي أدهم باشا..
_واحشني أوي ي سليم أخبارك إيه ي حبيبي؟
=إنت أكتر ي قلب أخوك وأنا زي الفل وبخير الحمد لله طول ما إنت كويس..أنا أول ما رجعت من السفر قولت آجي هنا الأول وأقعد معاكوا..
_أحلى حاجة عملتها إحنا كنا خارجين أصلا علشان نآكل..هنروح سوا..
=يلا بينا ي باشا..
*راحوا المطعم وكانوا قاعدين بيهزروا مع بعض فجأة أدهم حس بتعب وإستئذن ودخل الحمام علشان سليم ما ياخدش باله بس زين آخد باله وحاول يلهي سليم
_بقي أخوك مؤدب أوووي..طب بالنسبة للبت اللي كانت كل ما تزعل وتعيط يآخدها في حضنه ده إيه؟
=كان حضن برئ ي زيزو وهي كانت طفلة...
_حضن برئ وطفلة؟طب وبالنسبة إنه كان عنده 16 سنة وزي البغل ما شاء الله إيه ظروفها معاك؟
=حضن أخوي عادي..
_يعجبني فيك برودك وتناحتك وأخدك للمواضيع ببساطة..
=تربيتك ي زيزو..
_تربية ****..
*زين محدثا نفسه:إتأخرت ليه ي أدهم بس..طب أروح أشوفك ولا سليم هيحس؟لأ أنا هقوم أشوفه واللي يحصل يحصل بقي..
_بقولك إيه أنا هروح الحمام فى السريع وهرجع..
=خدني معاك..
_هو أنا رايح رحلة ي عم..إترزع هنا لحد ما أرجع وأحرص الحاجة علشان فى حرامية كتير اليومين دول وآه خلي بالك من الفلوس اللي فى محفظتي أنا عاددهم جنيه جنيه..
=هو سليم المنياوي هيبص لفلوسك إنت ي معفن أمشي ياض من هنا..
_لولا إني عايز أدخل الحمام كنت رديت عليك..
*زين محدثا نفسه:الحمد لله عدت على خير عيل رغاي رغي..تربيتي برضوا..ي رب تكون بخير ي أدهم
•تابع الفصل التالي "رواية كيف لا اعشقك وانت عمري" اضغط على اسم الرواية