رواية جميلة (كاملة جميع الفصول) حصريا عبر دليل الروايات بقلم الشيماء محمد
رواية جميلة الفصل الاول 1
راجع من مكتبه تعبان .. جعان نوم مصدع وعايز بس ياخد مراته في حضنه وينام مش اكتر
رجع كعادته سلم علي مامته ولقي مراته قاعده معاها والاتنين شكلهم يدل علي خطه في دماغهم
وليد: خير في ايه مالكم ؟؟ قاعدين كده ليه ؟؟
امه نبيله : احنا الاتنين قررنا انك لازم تتجوز
وليد : يا الله من ام السيره اللي مش هنخلص منها ابدا وبعدين ارحموني ... ميس قولي حاجه
نبيله : ميس موافقه
وليد اتصدم وبص لمراته : انتي موافقه علي التخاريف دي ؟؟
ميس : موافقه
سابهم من غير ولا كلمه وطالع علي اوضته ومراته وراه بتجري
تعالو نتعرف علي ابطال روايتنا
وليد نصار : شاب في العشرينات متجوز واخلاقه عاليه جدا وماسك مجموعه للاجهزه الطبيه العالميه
ميس : زوجه وليد وشغاله معاه وعندها عيب خلقي في الرحم مانعها من الخلفه
جميله : بنت بسيطه فلاحه ما وصلتش العشرين سنه بس كبيره بعقلها
نبيله : ام وليد وست عقلانيه جدا
شريف المحلاوي : والد ميس وصاحب اكبر سهم في المجموعه بعد وليد
وليد بيعامل مراته باحترام جدا وبيحبها ويقدرها وهيا كمان .. من اصحاب المجتمع الراقي وصاحب شركه من اكبر الشركات .. عنده اخت واحده بتتعلم في جامعه بره ...
متجوز ميس بعد ما اتخرجوا من كليه اداره اعمال كانوا اصحاب واتجوزوا .. وعلاقتهم مستقره حلوه بس مش بينهم الحب العنيف وللاسف ميس عندها عيب خلقي في الرحم وما بتخلفش وطبعا ده منغص حياه الكل ولان وليد بيحبها مش عايز يتجوز غيرها ..ورافض اي فكره امه بتعرضها عليه ومتمسك بمراته لاقصي حد ..
ميس : وبعدين معاك يا وليد ؟؟ لحد امتي ؟؟
وليد : انتي اللي لحد امتي بقي تخاريفك دي انتي وامي ؟؟ وبعدين معاكم بقي ؟
ميس : انت لازم تخلف
وليد : وانا مش عايز يا ستي .. طالما مش هخلف منك يبقي مش عايز لامتي بقي هتفضل حياتنا كلها بتلف علي ام الموضوع ده ؟؟
ميس : فكر في اختك .. مستقبلها .. والدتك .. شركتك اللي تعبت فيها انت وباباك .. اعمامك وبقيه عيلتك اللي هيتجننوا ويحطوا ايدهم علي الشركه .. انت لازم يبقي عندك وريث يا وليد
وليد : وربك مش رايد .. وبعدين هعمل بيه ايه العيل ده ؟؟ يورثني لما اموت .. استفدت انا ايه ؟؟ ماهو بعد ما اموت ما تولع الدنيا انا مش عارف ايه المنطق الغريب ده ... قال واحد يخلف علشان بعد ما يموت حد يشيل اسمه .. ما ان شاله ما اسمه اتشال !!!
ميس : يا حبيبي فكر بعقلك
وليد : وعقلي بيقولي لأ .. جواز مش هتجوز ريحي دماغك ... لو انتي عايزه طفل والموضوع ده فارق معاكي قوي نتبني بيبي وده اقصي شيء اقدر عليه غير كده معنديش
ميس : يا حبيبي افهم
قاطعها : مش هفهم وبطلي ترمي ودانك لامي سامعاني ؟؟ كلمه زياده في الموضوع ده مش عايز .. بعد اذنك انا عايز انام
سابته ونزلت لحماتها قعدت معاها
ميس : مفيش فايده راكب دماغه
نبيله : انا مش عارفه الواد ده عنيد لمين .. كده مقدمناش غير اننا ننفذ الخطه ٢
ميس : بس وليد هيتجنن لما يعرف
نبيله : سيبيه عليا انا .. انا هعرف اتصرف معاه .. ده ابني ولازم يسمع كلامي بغض النظر هو عايز ايه وطالما مش جاي بالذوق يبقي يجي بالعافيه ...
بعد كام يوم من اخر خناقه راجع من شغله بعد يوم طويل مرهق ونفس القعده لامه ومراته
وليد : ربنا يستر من قعدتكم دي .. ما بقتش بتفاءل بيها ...
نبيله : تعال اقعد واسكت
وليد قعد : هاه تخاريف ايه عندكم النهارده ؟؟؟
ميس : اسمع اذا سمحت
نبيله بتنادي علي علية مدبره البيت ودراعها اليمين
علية : افندم يا هانم
نبيله : هاتيها
وليد : ايه دي اللي تجيبها ؟؟
نبيله : لحظه وهتفهم كل حاجه
علية جت وجابت معاها واحده لابسه جلبيه سودا وعلي راسها طرحه وضفرتين طوال نازلين من تحت الطرحه .. فلاحه بكل معني الكلمه .. حاطه وشها في الارض ومش باين اي ملامح ليها
وليد : مين دي ؟؟ ايه دي ؟؟
نبيله : روحي انتي يا علية ...
ميس : وليد خليك هادي واسمع ماما للاخر
وليد : انا هادي اهو لما اشوف دماغكم المجنونه فيها ايه تاني ؟؟
نبيله : دي يا سيدي جميله جبتها من البلد ..
وليد : يا اهلا وبعدين ؟؟
نبيله : عملتلها كشف وتحاليل وباذن الله هتخلف علي طول من غير اي مشاكل
وليد قام وقف : لا ده انتو اتهبلتو بقي .. انتو اتجننتو ولا ايه ؟؟
نبيله : اهدي واقعد
وليد : ولا ههدي ولا هقعد .. انتي سامعه نفسك بتقولي ايه ؟؟ علي اخر الزمن جايبالي واحده ؟؟
نبيله : اسمع للاخر يا وليد ... انا مش جيبالك واحده .. وبعدين مش هيتم الموضوع بالطريقه المقززه اللي في دماغك
وليد : امال ايه ؟؟ هما اخترعوا طرق جديده للحمل من غير ما انا اسمع عنها ؟؟
نبيله : ممكن تبطل تريقه ؟
وليد : لما حضرتك تبطلي الهبل ده
نبيله : يا ابني اسمع .. اولا انت هتتجوزها شرعا علشان ما يكونش في حرمانيه في الموضوع و
قاطعها : لا والنبي ؟؟ كده مفيش حرمانيه ؟؟
نبيله : ممكن تسكت ؟؟ البنت موافقه وهتقبض كتير قوي .. وبعدين ده هيكون جواز شرعي
وليد : وانتي يا ست ميس موافقه ؟؟ صح ؟؟ وانتي يا بنتي ( البنت بصتله ) ارفعي وشك ده وريني خلقتك شكلها ايه ؟؟
البنت بصتله وحزن كبير باين في عنيها ومانطقتش ولا حرف
وليد : غريبه
ميس : ايه اللي غريب ؟؟
وليد : انكم مختارين بنت حلوه !! مخوفتيش يا ميس منها
ميس ما ردتش بس والدته اللي ردت
نبيله : لازم تكون حلوه لانها هتشيل ابنك فلنفترض ان العيل طلع شبهها ؟؟ لازم تكون حلوه .. وده سبب اختياري انها لازم تكون حلوه دي هتشيل عيل لينا احنا لازم يكون عيل سليم وحلو ومقبول
وليد : انتي عامله حساب كل حاجه .. ولنفترض انها عجبتني بقي ؟؟
ميس : انت مش فاهم حاجه
وليد : مش فاهم ايه ؟؟مش مطلوب مني اتجوزها وافضل معاها لحد ما تحمل ؟؟
ميس : لا طبعا انت مش هتلمسها
وليد :نعم يا اختي ؟؟ امال هتحمل ازاي ؟؟
نبيله : بالطب حبيبي .. ما سمعتش عن التلقيح الصناعي ؟؟ طفل انابيب .. انت مش هتلمسها ....
وليد هنا تنح : طفل انابيب !! وبكده تحمل من غير ما المسها !! وبعدين ؟؟
ميس : هتفضل هنا لحد ما تولد او هناخدها ونسافر وبعدها هنرجع انا وانتي والبيبي معانا
وليد : وهيا ؟؟ لو رجعت في كلامها !! لو رفضت تتخلي عن ابنها ؟؟
نبيله : ده عقد هيتكتب ملزم من الطرفين .. هيا باعت واحنا اشترينا ومالهاش اي حقوق
وليد : محسساني انك بتشتري فستان ولا اوضه نوم .. ده عيل يا امي عيل
نبيله : عارفه حبيبي .. ومش عيزاك تتحرم من الخلفه.. ايوه عارفه انك بتحب مراتك ومش عايز تبعد عنها وعلشان كده لقيت الحل ده انسب حل يرضي كل الاطراف ... عيل منك ومش هتبعد عن مراتك او تلمس غيرها .. فين المشكله ؟؟
وليد : مش عايز .. مش عايز ... مش عايز
نبيله اتنرفزت : ماهو انا مش بعد تعب سنين عمرنا انا وابوك الله يرحمه هقدم ثروتي لاعمامك اللي مستنين ينهشوك في اي وقت ولا نسيت انهم حاولي يقتلوك قبل كده ؟؟
وليد : دي كانت مجرد حادثه
نبيله : لا طبعا .. فرامل عربيتك كان مقطوع بفعل فاعل .. انا مش هستني واكتف ايديا واقول نصيبي كده
وليد : طيب لو فعلا خلفت وبعدها قتلوني عادي عندك؟؟ المهم الثروه وبس؟؟
نبيله : يا حبيبي افهم .. لما يكون ليك عيل هيكون سند ليك وظهر وعكاز ليك في المستقبل زي ما انا كده واقفه علي رجليا وسانده عليك .. انت اللي بتحميني انا وبنتي
وليد : سوري مش مقتنع
سايبهم وطالع
نبيله :الكلام بالذوق معاك انتهي ..انت هتتجوزها وده اخر كلام عندي ومش هقبل منك حرف زياده وهتسمع الكلام غصب عنك يا اما قسما بالله يا وليد لا انت ابني ولااعرفك وغضبانه عليك وده اخر كلام عندي
وليد وقف واتنرفز هو كمان
وليد : ما تلويش دراعي يا امي وما تستغليش حبي ليكي بالشكل ده
نبيله : يبقي تسمع كلامي وتحققلي رغبتي
وليد سكت شويه : اوكي موافق بس انا كمان عندي شرط لما اشوف بقي هتعملو ايه ؟؟
نبيله : ايه هو شرطك بقي ؟؟
وليد : ان الحمل هيتم بالطريقه التقليديه او سوري الطريقه المقززه زي ما سميتيها من شويه !! وده اللي عندي
ميس : انت بتقول ايه يا وليد ؟؟
وليد : مش انتي موافقه اتجوز عليكي !! يبقي جواز بجواز بقي !!! ده اللي عندي !! الكوره بقت في ملعبكم .. اختاروا يا حلوات ... انا مش هروح لدكاتره ولا هعمل طفل انابيب .. عايزينها تحمل يبقي بالطريقه التقليديه
ميس : انت عايز تقرب من واحده غيري ؟؟؟
وليد : معترضه ليه دلوقتي ؟؟ مش عايزاني اتجوز غيرك ؟؟ هو ده الجواز
ميس : لا طبعا
وليد : اللي عندي قولته بعد اذنكم
سابهم وطلع وهما الاتنين قعدوا قصاد بعض
نبيله : ادخلي يا جميله جوه وسيبينا لوحدنا ..
ميس : اوعي تتخيلي اني هوافق
نبيله : انتي لازم توافقي .. كده كده انتي من زمان بتقوليله يتجوز معترضه علي ايه دلوقتي ؟؟ حبيبتي بصي للصوره الكبيره ،، بصي للفايده العامه .. وليد بيعمل كده علشان يضايقك بس وترفضي
ميس : وانا فعلا رافضه
نبيله : خليكي ناصحه بقي طول عمرك ذكيه
ميس : مش لدرجه اني اجيب واحده اخليها تفضل مع جوزي
نبيله : ميس .. احنا اتفقنا ومستعدين لاي حاجه وبعدين بمجرد ما هتحمل خلاص .. ممكن تحمل اصلا من اول مره
ميس بتعيط : هو حضرتك للدرجه دي معندكيش مشاعر
نبيله : عندي مشاعر بس كمان عندي التزامات .. لبيتي ولجوزي الله يرحمه ولبنتي ... بطلي تفكري بعواطفك
ميس : يبقي تغيري جميله دي .. هاتي واحده غيرها .. واحده ما تبقاش حلوه
نبيله : لا طبعا .. ولو العيل طلع شبهها .. لازم تكون حلوه
ميس وقفت وزعقت : انا مش هوافق ان جوزي يفضل مع واحده بالشكل ده وبالجمال ده اسفه
إذا اتممت القراءه علق بلايك و10 ملصقات علشان اكمل
الحلقه الثانيه
جميله
ميس وقفت وزعقت : انا مش هوافق ان جوزي يفضل مع واحده بالشكل ده وبالجمال ده اسفه
سابتها وخرجت وراحت عند ابوها الشركه
شريف المحلاوي : يا فتاح يا عليم مالك ؟ خير ؟
ميس : وليد بيغير قواعد اللعبه
شريف : ليه ؟؟ موافقش ولا ايه ؟؟
ميس : عنده شرط
شريف : يعني موافق ؟
ميس : بقولك عنده شرط
شريف : بغض النظر عن الشرط ايه المهم ان هو موافق
ميس : لا طبعا لان انا مش موافقه علي شرطه
شريف : ليه ؟؟ هو شرطه ايه ؟؟
ميس : سيادته رافض فكره طفل الانابيب وبيشرط انه لو هيعمل كده يبقي هيتجوزها بجد ويقرب منها بجد لحد ما تحمل .. تخيل يا بابي
شريف بكل هدوء : وانتي معترضه علي ايه ؟؟
ميس هتتجنن: انت بتقول ايه ؟؟ انا مش عايزه جوزي يكون مع غيري!!!
شريف وقف : احمدي ربنا انه متمسك بيكي .. يا بنتي واحد غيره بمستواه كان اتجوز من بدري عليكي لكن هو بيحبك
ميس : خلاص يبقي الموضوع ده كله مالوش لازمه وانا وجوزي مع بعض بنحب بعض
شريف : لا طبعا ... المجموعه دي هتضيع من غير وريث .. ده شقانا وتعبنا وجوزك اعمامه حاولوا قبل كده يخلصوا منه ولو نجحوا وهو معندوش وريث كله هيضيع حتي احنا .. انا معنديش غيرك .. لكن بشراكتنا انا وجوزك وبوجود عيل من لحمه ودمه وانتي ام ليه هتفضل المجموعه بتاعتنا علي طول انتي لازم تبصي للصوره العامه مش لنفسك وبس
ميس : انت بتتكلم بنفس اسلوب حماتي
شريف : لان ده الصح واحمدي ربنا انها بتحبك ومقلبتش عليكي وواقفه جنبك ... بطلي تفكري بعواطفك وفكري بعقلك وبعدين ما انتي سبق وقولتيله يتجوز بترجعي في كلامك ليه ؟؟وبعدين ده مش جواز بالمعني المعروف ده مجرد واحده فلاحه جاهله هتقضي مهمه وتمشي قلقانه منها ليه ؟؟ حاسه بالتهديد من فلاحه ؟؟
ميس : طبعا لأ.. وليد عمره ما هيبصلها بس فكره انه يكون مع واحده تانيه مضيقاني
شريف : خلاص ما تفكريش .. اعتبريها مجرد خدامه جديده في البيت وهو اكيد هيحترم مشاعرك .. ميس ده الصح ما تتردديش .. حماتك في صفك ما تخسريهاش والا هتجيبله زوجه تانيه .. زوجه تنافسك وممكن تاخده منك .. حماتك حليف ليكي اوعي تخسريها .. علي الاقل دي مجرد خدامه لا راحت ولا جت وبعدين لو قرب منها مره هتبقي عند فيكي مش اكتر وبعدها مش هيحب يلمسها تاني احسن ما حماتك تجيبله زوجه وساعتها انتي هتتركني علي الرف يا حلوه فكري بعقلك .....يالا بقي علي مكتبك شوفي شغلك .. يالا حبيبتي
ميس راحت مكتبها تفكر بعقلها زي ما باباها نصحهاوتحاول تستقر علي رأي ..
اخر النهار وليد روح وامه طلعتله اوضته
نبيله : واخرتها يا وليد ؟؟
وليد : اخرتها زي اولها .. خير يا ماما ؟؟
نبيله : وفين الخير وانت واقف قصادي كده
وليد : انا واقف قصادك ؟؟ ازاي ؟؟
نبيله : لازمته ايه الشرط ده هاه ؟؟
وليد : نوع من انواع العقاب لميس وبعدين انا مش عارف هيا ازاي بتفكر اصلا اتجوز عليها ؟ في واحده عاقله تفكر كده ؟؟
نبيله : ده مفيش غير العاقله اللي تفكر كده وبعدين ده الصح يا ابني ده حقك .. وبعدين انت رافض تتجوز يبقي ليه بقي حاطط الشرط ده ؟ ليه بتناقض نفسك.. منين مش عايز تتجوز ومنين شارط تقرب من البنت ؟؟؟
وليد : قربي من البنت عند في ميس مش اكتر انا مش عايز ولا اتجوز ولا اقرب منها بس طالما هيا موافقه علي الجواز يبقي تدوق طعم الغيره بجد .. خليها تشوف هيا موافقه علي ايه ؟؟ وبعدين انا مش مستغرب غير موقفك انتي ؟؟ انتي ليه مسنداها علي طول الخط ؟؟
نبيله : لانها يا فصيح بنت شريف المحلاوي وشريف اساسي في المجموعه وصاحب اكبر نصيب بعدك وانتو الاتنين مع بعض اقويا ومحدش يقدر يقف قصادكم والكل بيعملكم حساب وعلشان كده مش عايزاك تخسره كحليف فهمت ؟؟ اعقل بقي وفكر بعقلك
وليد : حياتي الخاصه خليها بره الشغل والشركه واللي عندي قولته يا امي ومش هغير رأيي مهما تقولي حتي لو هخسر شريف كحليف .. وبعدين ما تقلقيش شريف بيفكر بنفس طريقتك وهو كمان مش عايز يخسرني كحليف .. الدور والباقي علي ميس بتفكر ازاي ؟؟ كزوجه ولا شغلها اهم !!
ميس رجعت بعد وليد بفتره وقعدت هيا وجوزها
ميس : وبعدين يا وليد معاك
وليد : وبعدين في ايه ؟؟
ميس : بلاش شرطك ده ؟؟
وليد : خلاص نصرف نظر عن الفكره كلها .. تعالي نتبني عيل ومحدش يعرف
ميس : لازم يبقي ابنك يا حبيبي والا هيطعنوا في احقيته .. لازم يبقي من دمك
وليد : يبقي مقدامكيش غير انك توافقي
ميس : ليه هاه ليه ؟؟ بتعمل كده ليه ؟؟
وليد : علشان انتي طالما بتبيني انك قويه قوي كده يبقي خليكي قويه للاخر .. انتي مش متخيله قد ايه الموضوع صعب اني اتغصب اتجوز واحده غير مراتي وكمان اخلف منها وبتخططي من بعيد لبعيد لا يا حبيبتي هتخططي يبقي تمدي ايدك وتشاركي .. انا هتجوز واحده فلاحه جاهله وده غصب عني وانتي هتتوجعي معايا بقربي منها .. علي الحلوه والمره مش ده اتفاقنا .. مش هتعذب لوحدي انا وانتي شركا في الفرح وفي الحزن .. ده شرطي وده اخر كلام عندي ...
ميس سابته ومردتش عليه ومش عارفه تعمل ايه ؟
النهار طلع وقعدوا كلهم يفطروا في صمت
نبيله : قررتوا ايه ؟؟
وليد : كلامي قولته وما اتغيرش
نبيله : ميس !! وصلتي لايه ؟؟
ميس خايفه ترد ونظره حماتها ليها غريبه وكأنها متحفزالها وافتكرت ابوها بيقولها ما تخسريش حماتك لا تجيبلك زوجه تنافسك بجد
نبيله : ميس قولتي ايه ؟؟
ميس بتردد : موافقه علي شرطه
وليد جمد وبصلها بصدمه : موافقه ؟؟
رمي الشوكه من ايده وسابلهم الاكل ونزل علي شغله وهو ماشي
نبيله : هكلمك بعد ما اجهز كل حاجه علشان نخلص من القصه دي !!
وليد ما ردش ونزل علي شغله ومستغرب ازاي مراته موافقه علي كده ؟؟
اخر النهار مروح تعبان لقي المحامي معاهم في البيت وحماه كمان موجود وراحد لابس جلابيه ما يعرفوش
نبيله : كويس انك جيت كنت لسه هكلمك
وليد : خير يا امي ؟؟ اهلا حمايا
شريف : يا اهلا يا وليد تعال
نبيله : ده المحامي هيجوزكم اقعد
وليد : المحامي ؟ محامي ليه مش المفروض مأذون ؟؟
شريف : المأذون لازم يوثق القسيمه في المحكمه ومن السهل جدا يتعرف فعلشان كده المحامي موجود ..
وليد : يعني ايه مش فاهم ؟؟
المحامي : يعني انا عملت عقد زواج عرفي بينكم واحنا اهو شهود علي العقد وبكده مفيش اي حرمانيه في الموضوع
وليد : اممم عقد عرفي ؟؟ انتو عاملين حساب كل حاجه .... ومين حضرته كمان ؟
نبيله : حضرته عم جميله علشان يكون شاهد علي العقد .. هو ولي امرها
وليد : حضرتك موافق ان جميله تتجوزني بالشروط دي
عمها : اللي فيه الخير ربنا يقدمه
وليد : يعني حضراتكم عاملين حساب كل حاجه !
شريف : ايوه اتفضل اقعد علشان تمضوا
وليد : بالسرعه دي ؟ ميس فين ؟
نبيله : في اوضتها
وليد طلعلها وهيا اول ما شافته مسحت دموعها قبل ما يشوفها ووقفت قويه قدامه
وليد : انتي موافقه بجد علي اللي بيحصل تحت ده ؟؟
ميس : ايوه مش ده شرطك ؟؟
وليد : ميس انتي مش مضطره توافقي واوعي تخافي من حد او من امي او تخافي مثلا اني اتجوز من وراكي علشان اخلف انا بجد الموضوع ده مش في بالي .. انتي مش مضطره توافقي ..
ميس ابتسمت : عارفه حبيبي بس انا ببص للصوره العامه مش ليا انا وانت .. انا موافقه
وليد بأسف : نفس عقلانيه امي .. طالما موافقه يبقي بعد اذنك علشان المحامي تحت
سابها ونزل تحت وخلصوا كل حاجه وخلاص تم جوازه هو وجميله وشريف وعمها كان شاهدين علي العقد ..
فاق وليد علي المحامي بيقول :
بالرفاء والبنين زواج مبارك ان شاء الله
وليد رنت في دماغه كلمه البنين ... كل ده علشان الخلفه .. محدش بيرضي بنصيبه .. كله بيتحايل علي قدره ... هو راضي بنصيبه وراضي بحكم ربنا ليه امه وشريف مش زيه ؟؟ ليه مراته بتفكر بنفس طريقتهم !! ليه قدروا يقنوعها ؟؟
شريف طلع لبنته شويه ومشي ووليد مكانه
نبيله : نويت علي ايه ؟؟
وليد بص لامه : عروستي فين ؟؟
نبيله : في اوضتها
وليد : وفين اوضتها ؟؟
نبيله : هتكون فين يعني ؟؟ اوضه من اوض الخدم
وليد : وانتي متخيله اني هروحلها اوض الخدم ؟
نبيله : وليد !! ملوش لازمه بكره نروح لدكتور وهو
قاطعها : امي ... ناديها وطلعيها اوضه من اوض الضيوف .. انقليها لاحسن اوضه عندك اتفضلي
نبيله : وليد
وليد : بسرعه يا امي .. انا مش هروحلها في اي اوضه اتفضلي
نبيله نادت علي علية وجتلها بسرعه
علية: ايوه يا هانم
نبيله : طلعي جميله فوق لاوضه الضيوف اللي بتطل علي البيسين علي طول
علية : نعم ؟؟ اطلعها ليه ؟ تنضفها يعني ؟ هيا نضيفه!!
نبيله : طلعيها وبطلي رغي .. ده هتبقي اوضتها
علية : نعم
نبيله : مالك يا عليه في ايه ؟؟
وليد : مالك يا علية مستغربه ليه ؟ طبيعي انها لما تبقي مراتي تطلع فوق ولا انا هنزلها تحت ؟ الموضوع طبيعي
علية : انا كنت فاهمه ان الجواز ده صوري
وليد : لا مش صوري ده جواز بجد طلعيها يالا
علية مشيت مش فاهمه حاجه وطلعت جميله اللي هتموت من الخوف للاوضه فوق
جميله عامله زي اللعبه اللي كل واحد بيلعب بيها شويه لا ليها رأي ولا لها اي كلمه في حياتها ..
دخلت الاوضه الكبيره وخوفها بيكبر شويه شويه
قلبها بيدق وهيقف من الخوف مع سمعها لصوت خطواته بتقرب ...
بتتمني لو ابوها كان عايش كان عمره ما يوافق ان يجرالها كده .. عمها بيتحكم فيها وكأنها في زمن العبيد بس هيا مضطره علشان اخوها بدال ما يبقي نصيبه زيها .. علي الاقل كده هتضمن انها تعلمه وتحققله احلامه.. كفايا هيا ضاعت...حتي عمها كمان رباها هيا واخوها واهتم بيهم ايوه مش بحنيه الاب بس فتح بيته ليهم .. هو كمان يربي عياله كويس .. الجوازه فيه خير للكل
اخيرا الباب اتفتح ودخل وليد اللي حساه وحش هينقض عليها ويفترسها .......يتابع
قد تكون صورة شخصين، وأستوما وجيبسوفيلا
تعديل المنشور
•تابع الفصل التالي "رواية جميلة" اضغط على اسم الرواية