رواية قدر و وصال الفصل الثالث عشر 13
الفصل الثالث عشر
رواية قدر ووصال
بقلمي هدير ممدوح
عندما تغمرنا الفرحة تنسينا كل لحظة حزن، ولكن هل تستمر للأبد؟!
ام ستكون فترة وتنتهي...
بلى إنها فترة ثم سيعود الحزن ليملأ الفؤاد غمرًا.
في الصباح استيقظت قدر على صوت صادر من بطنها فمسدت عليها قائلة:
_أنا جعانة أوي، هقوم أشوف إيه اللي فالتلاجة دي، بس أما أغير الأول.
أزاحت الغطاء من عليها واستقامت واقفة، وتوجهت إلى خزانة الملابس واخذت تبحث بينهم عن عباءة ساترة فلم تجد غير بجايم، انتقت واحدة منهم ذات أكمام طويلة، وتوجهت للمرحاض، خرجت بعد قليل ومشطت شعرها وعقصته على هيئة كعكة وذهبت للمطبخ، فتحت الثلاجة ونظرت بين الأطعمة لتخرج طبق به قطع من اللانشون واخر به أحد أنواع الجبن و اخرجت معهم البيض الذي قامت بقليه، تقدم علاء منها ببطء ووقف خلفها مد يده واخذ قطعة من الجبن وقال:
_صباح الجمال
شهقت هي بفزع حتى كادت ان تسقط للوراء فأمسك بيدها قائلاً بمرواغة:
_أوعي تقعي، وسلامتك من الخضة ياجميل.
أفلتت يده عنها وقالت:
_الأكل ده ليا متمدش ايدك عليه.
داعب علاء أنفها بأصبعه وقال:
_عشان تصدقي لما اقول عليكي عيلة، ده أنتي جواكِ طفلة عندها تلت سنين.
كلماته وملطفته لمس جزء بقلبها حتى كادت ان تخرج منها إبتسامة، ولكن سرعان ما عادت ملامحها الجامدة وقالت وهي تحمل طبقين:
_هات البيض وتعالى ورايا.
اجاب هو قائلاً:
_من عيوني.
قاموا برص الأطباق أعلى الطاولة وعاد هو مرة أخرى للمطبخ، فجلست هي ولم تبالي بأمره، جاء بعد قليل وهو يحمل كأس من الحليب وبيضتان جلس بمقابلها وقام بكسر البيض على الحليب وتقليبه وقال:
_مش بعرف أبدأ يومي من غير مشروبي المفضل.
رمقته قائلة:
_يا أخي إيه القرف، ده انا قربت ارجع، هو أنت بجد هتشرب ده.
رد علاء قائلاً:
_أنتي هبلة ده كالسيوم يعني مفيد جداً، وأمسك الكأس ورفعه لفمه وشربه على مرةً واحدة وترك الكوب من يده قائلاً:
_صحة ياواد يا علاء.
ونظر لها وهو يقول:
_مالك قرفانة كده ليه ما تاكلي.
غمغمت قدر بإشمئزاز:
_هو حد دلوقتي ليه نفس ياكل، بعد العملة دي.
رد علاء ساخراً:
كُلي ياقدر، كُلي ياحبيبتي.
اجابته هي بغيظ:
_انا مش حبيبة حد.
اجابها بعند قائلاً:
_لا، حبيبتي، ومراتي وام أولادي.
امسكت هي بالخبز وقطمته وهي ترمقه بغيظ، فأبتسم هو بنصر.
لا حول ولاقوة إلا بالله العلي العظيم 🌺
"بمنزل سامح "
كان جالس بصالون منزله واضعًا ساق فوق الأخرى، وجاء عماد وهو يسحب وداد من يدها وألقاها بجانب قدمه وقال:
_أهي يباشا.
رد سامح قائلاً:
_برافو عليك يا عماد، تقدر تروح أنت دلوقتي وليك عندي مكافأة.
أومأ عماد برأسه وانسحب مغادراً، بينما شرعت وداد في البكاء وقالت برجاء وهي تتمسك بقدمه:
_أنا مش عارفة أنت جايبني هنا ليه، أنا عملت إيه بس يباشا.
دفعها سامح بقدمه بازدراء وقال:
_مش عارفة عملتي إيه ياروح أمك، كل اللي حصل ده كان لعبة من علاء، صح ولا لأ.
ردت وداد قائلة:
_محصلش يباشا انا إيه اللي عرفني إن الشرطة كانت هتيجي يعني.
اجابها سامح بغضب:
_أهو أنا دلوقتي اتأكدت، بقولك علاء، تقوليلي شرطة، كده اللعب بقا على المكشوف، هتحكي كل حاجه عندك، ولا أخلي رجالتي يرموكي لكلاب السكك تنهش في جتتك دا بعد ما اخلص عليكي .
دب الرعب بـ ثنايا قلبها وهزت رأسها عدة مرات قائلة:
هقول يباشا هقول، بس بلاش تسلمني لرجالتك.
غمغم سامح بجمود:
ها سامعك.
اجابت وداد قائلة:
_جه عندي وسألني الأول عن ان كانت واحدة هنا أسمها سامية، وقولتله أيوة، وبعدين سألني عن قدر ووصال، قولتله معرفهمش بس لما وراني بطاقته وعرفت أنه ظابط وتحت إصراره قولتله كل حاجة حتى عنك.
صمتت قليلاً تلتقط أنفاسها واسترسلت قائلة:
_وبعدين اتفق معايا نعمل خطة.
تعجب سامح وقال بغلظة:
_خطة إيه دي؟!
ابتلعت ريقها خوفاً منه وخرجت الكلمات دفعة واحدة من جوفها قائلة:
_هو اللي جاب البنت، وقالي اتصل بيك وكان حاطط كاميرا في الأوضة عشان يبين ان الموضوع كأنه أغتصاب.
قبض سامح على خصلات شعرها وصاح بغضب قائلاً:
_بقا بتستغفلوني أنا، سامح مدكور يتغفل، ماشي والله لأوريكم.
ونادى بصوتٍ عال:
_عماد، يا عماد.
بوجهاً احتله الخوف أصبحت تتوسله قائلة:
_أرجوك يباشا أبوس إيدك سيبني، والله خُفت منه يابيه أرجوك.
جاء عماد، فالقاها سامح عليه قائلاً:
_خدها على المخزن خلي الرجالة يعلموها الأدب، وبعدين أبقا ارميها قدام أي مستشفى.
رد عماد وهو يسحبها خلفه قائلاً:
_اوامرك ياسامح بيه.
ولم يلبث صراخها أن رج أركان القصر رجًا.
...................
جالس وائل أمام مكتب مجدي وأعلى الطاولة الفاصلة بينهم حقيبة سوداء تحدث وائل قائلاً:
_أنا واثقت فيك يامجدي بيه وده مبلغ خمس ملايين،رغم أنه الفلوس دي مش ليا لوحدي دي بتاعتي أنا واحد صاحبي.
هز مجدي رأسه وقال وهو يجذب الحقيبة أمامه:
_متقلقش يا وائل حقك مضمون، وكمان كام يوم نكلمك ونبلغك بربحك.
استقام وائل واقفاً وهو يقول:
_ماشي يباشا وأنا هستنى أتصالك.
انتظر مجدي خروج وائل من مكتبه ليقوم بالاتصال بـ أيمن.
اتاه صوت ايمن قائلاً بلهفة:
_قولي بسرعة، وائل وافق.
رد مجدي قائلاً:
_كله تمام ياصاحبي وفلوسك فالحفظ والصون، تقدر تيجي تاخدها.
شقت السعادة وجه أيمن وقال:
_مخبيتش ظني يامجدي، لما طلبت منك تساعدني معروفك ده عمري ما هنساه.
ابتسم مجدي قائلاً:
_الصحاب لبعضها يا أيمن، ويلا بقا هستناك تيجي تشرب القهوة في مكتبي.
رد ايمن:
_مسافة السكة ياصاحبي وأكون عندك.
صلي على محمد 🌺
"عند قدر "
كانت واقفة أمام الحوض تجلي الأطباق، فتقدم علام منها واخذ يشطف طبق تلو الأخر فقالت هي عندما رأته:
_ممكن تروح تقعد، وانا هعمل حاجتي بأيدي.
رد هو قائلاً:
_واحد وبيساعد مراته مالك أنتي.
اجابت قائلة:
_اصلًا خلاص، خلصت.
قرص وجنتها وقال:
_تسلم ايدك ياجميل على قهوة بعد الفطار، مش هتقوليلي عملاها إزاي.
مرت من أمامه سريعاً وقالت:
_لا، مش هقول.
فجذب رسغها وقال:
_طيب استني تعالي، تعالي نتوضا
اجابت هي بحنق:
_لسة فاضل ساعة على الضهر.
اجابها علاء مبتسمًا :
'ياستي هنتوضا ونفضل نقرا قرآن شوية وبعدين أنا محتاج حد يسمعلي إيه رأيك.
ردت قدر قائلة :
_انت بتحفظ قرآن
قال علاء:
_ايوة وخلاص فاضل جزئين وهختم.
فاجابت قائلة:
_تمام يلا.
جلسوا مقابل بعضهم بعد الوضوء
_وأخذ علاء يرتل آيات الذكر الحكيم بصوت عذب.
وسرحت هي قليلاً، فهذا ما كانت تتمناه دائماً شخص قوي تجد معه الأمان حافظ لكتاب الله، فهل تتحقق أحلامها رويداً رويداً، أم ان كل ما تعيشه الآن مجرد فترة من حياتها وستنتهي.
افاقت على صوته عندما قال:
_إيه يابنتي روحتي فين أنا نسيت باقي الآيه.
ردت هي قائلة:
_كنت بفكر، ياترى هيجي يوم وهفرح و أعيش الحياه اللي بتمناها.
جذب يدها وقبلها برفق وقال:
_أوعدك كل اللي جاي هيكون سعادة وبس، بس في كام عقبة في طريقنا وهنتخطاهم مع بعض.
جذبت يدها وغمغت بخجل اكتسى ملامحها:
تمام، تمام.
ابتسم ضاحكاً على مظهرها وهو يقول:
_طيب يلا نكمل،واه صحيح نسيت اقولك بكرة رهف هتنزل المدرسة أنا ظبط كل الأمور.
شكرته براحة وصدرٍ رحب:
_متشكرة ياعلاء، أنا فعلاً كنت خايفة السنة تضيع عليها.
رد علاء بصدق نابع من قلبه:
_أنا جوزك ياقدر، مفيش بينا شكر، ومن بعد النهاردة أنا سندك وقوتك وعكازك، ميلي بكل همومك ومشاكلك عليا، واوعدك إني هكون في ضهرك...
اسبوع، مر أسبوع كاملاً مع بعضهم أصبحت تعرف عنه الكثير ما يحب، ما يكره أشيائه المفضلة، وكام راق لها سعيه لمراضاتها،كلماته الحنونة الدافئة كانت تغمرها من كل جانب،يجعلها تشعر بأنها طفلة صغيرة يدللها والدها، وكأنها ولدت من جديد.
سبحان الله وبحمده، سبحان الله العظيم 🌺
واقفة بالشرفة تنتظر مجيئه تتلوى بنيران الشوق والهوى، النوم جفى أُعينها والفؤاد بات خالياً من كل شيء إلا هو.
زفرت بعمق قائلة وهي تنظر للسماء:
_يارب رجعه ليا بخير وسلامة.
وتذكرت مغادرته قبل ساعات وهو يقف أمامها وقال وكأنه يودعها "أدعيلي ياقدر عندي مهمة، ولو مرجعتش ابقي سامحيني، وأسف على كل دمعة نزلت من عينك بسببي، وقبل جبينها وغادر"
سقطت دمعة دون أن تشعر فأزاحتها بطرف حجاب أسدالها فمنذ قليل كانت تصلي و تتضرع لله بأن يكون بخير....
رأته يهبط من سيارته السوداء فشقت البسمة طريقاً لوجهها، كانت تود ان تركض وتعانقه، رفع هو نظره للأعلى وابتسم عندما رأها، وعلى حين غفلة منهم تقدم منه شبان "بموتوسيكل"
على وجوههم قناع أخرج واحد منهم سلاحه ورأته قدر من الأعلى وصرخت بأسم "علاء"
فأستدار هو إلى الوراء ،وبسرعة البرق خرجت رصاصة من سلاح الأخر واصابته.
صرخت قدر بذعر وركضت للخارج نظرت للمصعد، فظهر بأنه يتواجد أحد به، فركضت تهبط على درجات السلم، حتي توقفت أسفل العمارة، هبطت لمستواه ووضعت رأسه أعلى قدمها وقالت بصوت ممزوج بالبكاء:
_علاء، علاء أنت كويس.
اجاب هو بصوت ضعيف:
_كويس إزاي بس ياقدروانا واخد طلقة في كتفي.
ازاحت دموعها وقالت:
_استنى هوقف عربية، ونروح المستشفى، هز رأسه وقبل ان تقف، جذب يدها قائلاً:
-قدر مسمحاني.
هزت رأسها عدة مرات وأردفت:
_أيوة ياعلاء.
استقامت واقفة، حتى مرت سيارة أجرة أمامها فأوقفتها، وهبط السائق لمساعدتها ودلف علاء داخل السيارة وهو يأن بصوتٍ ضعيف ورأسه على كتف قدر، وانطلقت بهم السيارة.
•••••••••••••••
"بالمكان المتواجد به سيد"
صرخ أحد الحراس بأصدقائه وهي و يقول:
_إزاي قدر يهرب ده علاء بيه هيطين عشتنا
رد الاخر قائلاً:
_قالي عاوز أدخل الحمام فكيته، وفضلت مستنيه لما يخرج، ولما طول دخلت ولاقيته هرب من الشباك.
سبه الرجل وقال:
_هنعمل إيه دلوقتي أحنا لازم نبلغ علاء بيه.
رد الآخر قائلاً:
_كلمه أنت ياعم أنا ماليش فالموضوع ده.
هز رأسه وأخرج هاتفه من جيب بنطاله، وجاء برقمه، انتظر قليلاً فلم يرد، عاود الإتصال عدة مرات وايضا لم يأتيه رد فقال الرجل:
_مش بيرد.
رد الاخر:
'إيه العمل دلوقتي.
اجابه قائلاً:
_مفيش حل غير، أننا نستنى لـ بكرة، وأكيد سيد ده بِعد عن هنا.
أماء الرجل برأسه وصمت.
"عند سامح "
رن هاتفه فأجاب وقال بلهفة:
_أيوة ياعدلي عملت إيه.
رد عدلي قائلاً:
_كله تمام يباشا، الإصابة في كتفه.
رد سامح ببسمة انتصار:
_كويس جداً هبعتلك حسابك.
لا إله إلا أنت سبحانك إني كنت من الظالمين 🌺
"في المستشفى "
تم إسعاف علاء وقدر بالخارج تتنظره، مر ما يقارب الساعة حتى وجدت الطبيب يخرج فتوجهت قائلة بلهفة:
_هو كويس يادكتور طمني.
اجاب الطبيب بعملية:
_الإصابة كانت فالكتف، وتم استخرج الرصاصة، وحالته دلوقتي مستقرة.
اجابت بلهفة تجلت في نبرتها:
_عاوزة أشوفه.
اجاب الطبيب:
_هيتنقل لأوضة عادية تقدري تشوفيه.
قال جملته ومر من أمامها.
بعد قليل كانت جالسة قدر أمام فراشه، ونائم هو أثر البنج، مضى الكثير من الوقت حتى استيقظ هو ونظر بجانبه ليجدها جالسة على كرسي نائمة فابتسم بسعادة، سقط كف يدها من أسفل رأسها فأستيقظت نظرت له وقالت:
_علاء انت صحيت، أنت كويس صح.
رد هو قائلاً:
_أنا بخير ياحبيبتي.
اجابته هي:
_طيب اندهلك الدكتور، وكمان كنت عاوزة أبلغ مامتك بس استنيتك لما تصحى.
غمغم علاء بخفوت:
_لا أنا كويس ياقدر، ومفيش داعي نبلغهم بكرة أما نخرج هنرجع البيت.
ودلفت بعد قليل الممرضة، قاست ضغطه وحرارته، وقامت بتحريك يده لتطمئن على صحته أكثر.
تحدثت قدر بقلق تجلى في نبرتها قائلة:
_في أي مشكله، هو بخير صح.
الممرضة بجدية :
بخير جداً اطمنى حضرتك.
واستأذنت للخروج وذهبت.
مر اليوم دون اي أحداث وفي الصباح، استيقظ علاء أولاً واعتدل في جلسته ونادى بأسم قدر عدة مرات فاستيقظت وردت بنعاس قائلة:
_أيوة ياعلاء في حاجة وجعاك.
أجاب علاء قائلا:
_أنا بخير، بس قومي أنتي يلا روحي، غيري هدومك متقعديش كده.
ردت هي بعند قائلة:
_لا طبعا مش هسيبك هنروح سوا.
قال علاء:
_الممرضة جت وانتي نايمة وقالت هطلع النهاردة على المغرب، فانتي غيري وارتاحي شوية وجهزيلنا فطار وتعالى.
استقامت واقفة تحت إصراره وقالت:
_تمام ماشي.
فقال علاء قبل رحيلها:
_هو تليفوني فين.
كان الهاتف أعلى الطاولة ومعه محفظته، فأخذتهم وقالت وهي تعطيهم له:
_أهوم عطوهم ليا لما كنت فالعملية.
اخذه من يدها وقال:
_تليفونك معاكي.
نفت قائلة:
_لا أول ما شوفتك نزلت على طول.
اخرج النقود من محفظته وناولها لها وقال:
_تمام خدي الفلوس دي عشان تركبي منها.
أخذتهم على مضض وغادرت الغرفة والمشفى بأكملها.
"بعد قليل "
دلف شاب لغرفة علاء وقال مازحاً وهو يصافحه:
_ألف سلامة عليك ياوحش، قولي مين علم عليك.
رد علاء بحنق:
_وانا مين يقدر يعلم عليا يالا.
رد صديقه قائلاً وهو يسحب الكرسي ويجلس أمامه:
_مقدرتش تعرف مين اللي عمل كده.
ضيق علاء عينيه قائلاً:
_مشوفتش اللي ضرب، بس عارف مين اللي باعتهم ياشهاب.
رد شهاب قائلاً:
_مين؟
اجاب علاء قائلاً:
_سامح المدكور هو الوحيد اللي يقدر يعمل كده.
لا إله إلا الله 🌹
وصلت قدر إلى العمارة التي كانت بالقرب من المشفى، صعدت للأعلى ودلفت لشقتها
_قامت بتبديل الملابس، ودلفت للمطبخ وشرعت بإعداد الفطور.
قامت بسلق البيض واخذت زجاجة من الحليب ووضعت الأطعمة داخل أحد العلب، وتوجهت لخزانة ملابس علاء واخرجت له ملابس وضعتهم بكيس، وتركتهم جانباً وتوجهت لغرفتها امسكت بهاتفها، وكانت ستغادر لولا رنين هاتفها معلنًا عن وصول رسالة على تطبيق الواتساب، ضغطت على شاشته واتسعت عينيها وهي ترى شقيقتها الصغرة مقيدة على كرسيّ من الخشب مغمضة العينين ويبدو بأنها مخدرة، هبطت دموعها وارتجفت أوصالها، فرن هاتفها بنفس الرقم المرسل منه الرسالة فأستقبلت المكالمة سريعاً وقالت بلهفة:
_ألو..
جائها صوته الذي تبغضه بشدة وهو يقول:
_ياه صوتك جميل بشكل، بس إيه شكلك معيطة.
ردت بخفوت:
_سيد.
اجاب سيد قائلاً بحدة:
_أسمعي بقا ياحلوة هبعتلك عنوان تيجي عليه، وأوعي تبلغي جوزك، وإلا هتلاقي أختك الحلوة دي مقتولة بأبشع طرق، لأن اللي معرفتش أخده منك هخده منها.
أغلق الهاتف بوجهها وانهارت هي على الأريكة خلفها وخوف عظيم دب ثنايا قلبها، رن هاتفها بوصول رسالة والتي كان مضمونها العنوان المرسل من سيد، فاستقامت هي واقفة وازاحت دموعها، أخرجت رقم علاء واتصلت به عدة مرات ولكن بكل مرة يأتيها مغلقًا، فعزمت على كتابة رسالة له كان مضمونها
"علاء سيد خطف رهف وقالي أنه لازم أروحله وحذرني أقولك، وده العنوان، أنا مجبرة أروح عشان أختي"
سبحان الله وبحمده عدد خلقه ورضا نفسه وزنة عرشه ومداد كلماته 🌼
عند علاء غادر صديقه فنظر لهاتفه فوجده فاصل شحن، استمع لطرقات على الباب، فسمح للطارق بالدخول، وكانت الممرضة التي قالت بإبتسامة:
_صباح الخير، إيه أخبار حضرتك النهاردة.
رد علاء قائلاً:
_بخير الحمدلله، مالقيش معاكي شاحن للتليفون ده.
نظرت الممرضة للهاتف وقالت:
تمام عندي هجيبه لحضرتك دلوقتي، بس الأول خليني اقيس ضغطك.
اومأ علاء برأسه دون التفوه بشئ، وأدت الممرضة عملها وعادت بعد قليل أعطته الشاحن وغادرت مرة أخرى.
مر ما يقارب الساعة والنصف، ومازالت قدر في سيارة الأطرة فقالت للسائق:
_قربنا نوصل على العنوان.
رد عليها الرجل المسن قائلاً:
_أيوة يابنتي خلاص أهو، بس عاوز اقولك صعب تلاقي مواصلات وأنتي راجعة.
ردت قدر قائلة:
_مش مشكله المهم أوصل.
صف الرجل السيارة بالقرب من مبنى لم يكتمل بنائه وقال:
_ده يابنتي المكان.
هزت وصال رأسها واعطته الأجر المتفق عليه وركضت، توقفت قليلاً أمام ذاك المبنى تتفحصه، له ثلاث أدوار جميعهم لم يكتمل بنائهم فقط غطتهم طبقة من المحارة حتى السلم ليس له سور،لم تكترث للأمر وصعدت للأعلى بحثت بالطابق الأول ولم تجد أحد، صعدت للثاني فوجدت بساحته شقيقتها مقيدة ، توجهت لها سريعاً وقامت بفك اللاصق من أعلى فمها فبكت رهف وهي تقول:
_قدر عمو سيد حط منديل على بقي واغمي عليا وجابني هنا، أنا خايفة.
عانقت قدر بكفيها وجهها وقالت متخفيش، هنمشي ياروحي.
واسرعت لفك وثاق أختها فأتاها صوت سيد قائلاً:
_جدعة وبتسمعي الكلام.
..........
عند علاء
قام بفتح هاتفه ليجد عديد من المكالمات الفائتة من قبل قدر ورجاله وشقيقته، كاد ان يتحدث مع قدر اولاً فأتاه الإتصال من رجاله، تلقى المكالمة ليأتيه صوت الرجل قائلاً:
_علاء بيه سيد هرب ، وانا بحاول اتواصل معاك وتليفونك مغلق.
انتفض علاء من مجلسه وهو يقول:
_من أمتى الكلام ده ياسعد.
سعد:
_من امبارح ياعلاء بيه.
أغلق علاء المكالمة، وعاود الإتصال على قدر ولم يأتيه الرد.
فأسرع للإتصال بشقيقته، ليأتيه صوتها القلق قائلة:
_ايوة ياعلاء هي رهف عندكم.
رد علاء بدهشة:
_عندنا إزاي يا أميرة مش زمانها رجعت من المدرسة.
قالت أميرة بنبرة تجلى بها القلق:
'جوري رجعت بس هي لا ولما سألنا فالمدرسة قالوا مجتش.
دب الرعب بقلب علاء وعلم ان هناك شيئا خطيرًا قادم،فتح بيانات هاتفه وعزم على إرسال رسالة لـ قدر،فتفاجئ هو برسالته.
يتبع...
اللهم_نستودعك_اخوتنا_في_غزة يارب ياكريم ياحي يا قيوم ندعوك باسمك الأعظم ان تحفظ شعبها و ارضها وجوها وبحرها "للا تنسوا الدعوات لاخواتكم"
دمتم بخير
•تابع الفصل التالي "رواية قدر و وصال" اضغط على اسم الرواية