رواية غوي بعصيانه قلبي الفصل الثامن والخمسون 58- بقلم نهال مصطفي
أتساءلُ دومًا …!!
هل هذا الفيلم القصير المسمّى “بالحياة” يستحقُّ منّا كلّ هذا العناء؟ وكلّ تلك التّضحيات؟وهذا الكم الهائل من البكاء ؟!
هل يستحق أن نخلع الحقيقة عن أنفسنا لنرتدي وهمًا قاسيًا ؟!
أن نكذِب؟
أن نكسر القوانين ونحرّف القواعد لنعيش .. لنعيش بمشاعر مزيفة ، وضحكات مزورة ؟!
~خُلق القلب عصيًا 💥
••••••••
” بالسيـارة ”
-عاصي ، أحنا متفقنـاش لحد دلوقتي هنسمي البيبي أيه ؟!
بثغرٍ بسـام هبت عاصفـة حماسها بوجهه لتلقي على أذنيـه سؤالها الأخيـر ، ليرتسم على محياه ضحكة خفيفـة ويجيب :
-أنا واثق في ذوقك .. اختاري الاسم اللي يعجبـك .
ألقت نظرة على الصورة التلفزيونية بيدها وقالت بحنـو :
-لو ولد ناويه اسميه ريان .. لأن باباه روى قلبي بعد عطش سنين ..
ثم غمغمت مع نفسها لسماع إيقاع الاسم :
-ريـان عاصي دويدار .. حلو ؟!
ثم عادت إلى نبرة صوتها المفعمـة بالحماس :
-ولو بنوتة هسميها سلسبيـل .. بمعنى المـاء العذب زي اسم رسيل .. وعين من عيون الجنـة ..
ثم فزعت من مكانهـا بعفوية :
-أيه رأيك ؟!
صارت النظرات تتعانق وتقبل بعضهـا:
-قُلت لك واثق في ذوقك ..
ردت بتغطرس يملأها الدلال :
-طبعا لازم تثق ، كفايـة إني اخترتك ..
ضم كفها ورفعه لمستوى ثغره ليعطره بالقُبل ثم قال :
-بس أنا ليـا طلب ؟!
-طلب أيه !! قول ..
دار بمقود السيارة حتى اعتدلت مرة أخرى ثم قال :
-لو مش مكتوب لي أشوفه ، خليه يعرف أني بحبـه وو
وضعت كفها المرتجف فوق فمـه ليكف عن سرد قدر لا تتحمله بصوتٍ رافض :
-عاصي بس ، أنت بتقول كده ليـه لو سمحت متقولش كده ..
ثم انبثقت من طرف عينيها دمعة حارة وأكملت :
-أنت عايز تسيبني لوحدي بعد ما لقيتك ؟!!
مد ذراعه ليضم رأسها إلى صدره وأخذ يداعب كتفها بحنان زاخر وقال :
-بطلي جنـان …
كادت أن تعارضه بعد ما كفكفت عبراتها ولكن صوت رنين هاتفـه جعلها تبتلع كلماتها وتواصل نحيبها المكتوم ، وضع السماعة بأذنه وقال باختصار :
-في أيه ؟!
فأخبره حارس الأمن :
-عاصي باشـا ، عبلة هانم وجوزها هنـا وكريم بيه سمح لهم بالدخول على مسئوليتـه ..
فجر غضبه الدفين بمقود السيارة وهو يضربه بقوة ثم قال بحدة قبل أن ينهى المكالمة معه :
-طيب بس أجيلك …
برر الحارس قائلًا :
-والله ياباشـا أنا ماليش ذنب ..
نهره بعنفوان وهي يصف سيارته جنبًا ثم لف مقود السيارة لاخره وغيـر مسار اتجاهه مما جعلهـا تتفوه صارخة :
-عاصي !! على مهلك ..
ثم تفقدت مساره :
-أحنـا رايحين فين ؟!
رد بجمود وهو يجري مكالمـة أخرى :
-شوية وهتعرفي ..
ثم ألقى أوامره بالهاتف قائلًا :
-تعالى على العنـوان اللي هبعتهولك ..
انتظرت حتى فرغ من مكالمتـه وقالت متحيرة :
-عاصي ، فهمني .. !!
-حياة !! قولت شوية وهتعرفي ..
كان رده جافيـًا خشنًا جعلها تطوى الآسى بداخلها وتنكمش بباب السيارة وتتجاهل النظر إليـه قائلة بعناد :
-مش عايزة أعرف…
اكتفى بإلقاء نظرة عليها ثم عاد ليفرغ غضبه بالطريق وبسباق السيارات حذاه وهو يقود بسرعة جنونيـة مُحكمـة ..
••••••••
بعد مرور سـاعـة بمتجر الملابس الاسلاميـة خرجت عاليـة وهي تحمل العديد من الحقائب بيدها والحال لم يختلف كثيرًا بالنسبة لمراد الذي يحمل ضعفهم .. خرج الاثنان في أجواء يملأها المرح والضحكات لحياة جديدة تجمعهم .. فاقترح مراد قائلًا وهو يفتح السيارة:
-أيه رأيـك نروح نوديهم على شقتنـا على طول ؟!
وقفت مترددة :
-بس كده هتأخر على شمـس ..
ترك الحقائب بداخل السيارة وقال :
-وهي شمس صغيرة !! هنوديهم وارجعك بسرعة.
أعطته بقية الشنط المعلقة بيدها وقال بتوجس :
-خليهم في عربيتك ، ولما تروح حطهم في الشقة براحتك .. ولا أيه ؟!
-على فكرة أنتِ كده بتضيعي وقت ، البيت مسافة نص ساعـة من هنـا ، هنروح نوصلهم ونرجع ..
أجابتـه على مضض :
-طيب ، بس منتأخرش ..
راقت له فكرة اصطيادها وقال :
-طبعًا طبعًا .. مسافة الطريق.. اركبي …
صعد الثنائي سيارتـه ، تأففت عالية بصوت مسموع حين مطالعة هاتفهـا :
-مش وقتك خالص ..
ثم نظرت إلى مراد متسائلة :
-معاك USB هنـا ، موبايلي هيفصـل !
فتح صندوق السـيارة وأخرج منه الناقل الكهربي ووصله بهاتفها ثم سألهـا وهو يعيد النظر إلى الطريق أمامه :
-خالتي محاولتش تطمن عليكي ؟!
خيم فطر الحزن على وجههـا وقالت :
-ممكن تكون اتصلت على رقمي التاني ..
ثم احتبست العبرات بحلقها وأكملت :
-بس لا .. هي محاولتش حتى تطمن عليـا .. ومعرفش هي فين كل ده ..
تكدرت صفوة أجواءهم ثم قالت بحرقة :
-هي بعيدة أوي كده ليـه ؟! طيب ما بيخطرش على بالها اني محتاجها ؟! أنت تعبت من شعور الوحدة .
انهارت فلسفة الكلمات أمام مواساتهـا ، ضم كفها بحب وقال ملطفًا :
-و أنا روحت فين !! سايب شغلي ولغيت كل الميتنج اللي عندي وبلف معاك في الشـارع زي المراهقين !! وفي الآخر مفيش حتى شكرًا ..
لمعت عينيها بنجوم الامتنان وقالت :
-بجد شكرًا يا مراد ، شكرًا على وجودك وعلى وقفتك جمبي وعلى كل المشاعر الجميلة اللي بحسها وأنا جمبـك ..
-أيوة كده ، أنا كراجل بحب اسمع كلام حلو كتيـر .. على أد ما تقدري حبي فيـا عشان أحنا كرجالة بنتلكك ..
قال جملته الأخيـرة بكبرياء الطاووس .. فاستقبلتهـا مترنحة :
-أيه ؟!! تعالى هنـا .. أنت ممكن تخوني ؟!
رد بغطرسـة :
-جايـز ، كله في أيدك يا لولا ..
ردت بانفعال طفولي :
-يعني أيه بقا ان شاء الله ؟!
-يعني عاصي أخوكي مثلا لو فضل مصمم على موقفـه اللي زي الزفت ده .. اممم يوم رجعت بيتي ولقيتك أقل حلاوة من اليوم اللي قبله .. يوم نسيتي تقوليلي كلام حلو .. وكده يعني !!
رفعت حاجبه معترضة :
-والله ، بقى كده ؟!! طيب أنت تعرف أني عندي وش تاني بيخوف ، فخاف مني بقا ؟!
انفجر ضاحكًا على براءتها وقال :
-سوبر حماس أني أشوفه ..
حدجته بتأنٍ :
-مراد ، اتظبط …
أجاب بطاعـة :
-اتظبطت ..
-أيوة كده ..
ثم صمتت لحظات وأكملت بشكٍ :
-هي المهندسة بتول عاملة أيـه ؟!
شبح ابتسامة خفيفة استقر على ثغره وقال :
-بتول زي القمر ..
نهرته بحدة مبطنة بالغيرة :
-مراد …
فصحح مغرى جملته قائلًا :
-قصدي أنها كويسة … في أيـه يا عاليـة !!
-أنا اللي في أيه يا مراد ؟!!!
ألقى نظرة على ملامحـها الملطخة بحمرة الغيرة ، فغمز بطرف عينـه قائلًا :
-ملامحك تجنن وهي غيرانه ..
-أف ، انت جبت الرخامة دي كلها منين !
رد بتفاخر :
-لا دي موهبـة .
-مش هرد عليك .. وبطل بقا .
-أنتِ الخسرانة ..
صف سيارته جنبًا أمام البناية التي تقع بهـا شقتـه وقال :
-وصلنـا .. يلا انزلي ..
-طيب اطلع أنتَ ، وأنا هستناك هنـا .
شد مفتاح سيارته وقال بجدية :
-عاليـة آكيد بتهزري ، وفيها أيه ؟! عشان تحطيهم بنفسك جوة الدولاب ..
-يامراد عشان متأخرش على شمس ..
غمغم :
-يادي شمس !! شمس دي مش عندها جوز !!
-اي دخل دي في دي ؟!! يلا بقا خلينـا نكسب وقت .
-هي الشقـة مش وحشتك !
ابتسمت وهي تتنهد بحنين :
-لا طبعـًا وحشتني ..
-خلاص ، يلا انزلي يا عاليـة .
دلف من سيارته وتحرك إليها وفتح الباب من عندها موشيرًا بعينيـه أن تهبط من مكانها .. وأكمل هو في إخراج الحقائب من داخل السيارة حيث همت لمساعدته في حملهم .. قفل سيارته بالريموت عن بعد ثم دخل الاثنان معًا لدهليـز البنايـة ..
وصلا إلى الطابق المعني لشقتهم .. فتح مُراد الباب فدخلت عاليـة بأنفاسهـا المضطربة وهي تتأمل زواية الشقة بحنين ولحظات من التفاصيل التي عاشتها بداخلها .. قطعها مراد معترضًا :
-هتفضلي واقفة عندك كده كتيـر ؟!
-هااه ، لا بس سرحت شويـة !
ثم وبختـه بعينيها :
-مراد الشقـة مكركبـة كده ليه !!
ترك الحقائب على السفرة ثم قال ممازحًا :
-رجل أعزب وعايش لوحده ، مستنيـة شقتـه يكون شكلها أيه !! بس أوعدك يوم ما تنوريهـا هخليها حاجة تانية ..
اكتفت بابتسامة خفيفة وقالت له :
-طيب هدخل دول جوه ..
-هعمل مكالمـة واحصلك ..
-براحتك ..
دخلت إلى غرفتـه المنقلبة رأسًا على عقب ، لا يوجد بها شيئًا بمكانه .. ملابسـه مبعثرة في كل صوب وحدب .. الوسائد مُلقاه بعشوائية هنا وهناك .. خزانتـه مفتوحة على مصرعيهـا .. أخذت تجوب بالمكان بصدمة كبيرة:
-يانهار يا مراد ؟!! أيـه ده !! دي ما بقيتش أوضة نوم !!
تركت ما بيدها وشرعت في إعادة ترتيب الغُرفـة بسـرعة .. لملمت ملابسه المتسخة ووضعتها بالغسالة .. بدلت مفارش السرير ووضعت الوسائد بمكانهـا .. وقفت أمام الخزانة حائرة لا تعلم من أين ستبدأ ، فزفرت بضيق :
-والله حرام عليك ؟! هيحصل أيه لو اتعلمت النظام يعني ..
نزعت سترتها الخضراء مكتفيـة بالـ “تي شيرت” الداخلي والبنطال الفضفاض من خامة ” الجينز ” .. سكبت محتويات الخزانة على السرير وأخذت تعيد تنظيمها من جديد وهي تغمغم مع نفسها بكلمـات متنوعة تدل على إعتراضها على حالته :
-هو لما كمل على الحال ده أنا هعيش معاه أزاي ؟! هو في كده طيب !! حقيقي هيجنني ، لازم يشوف حل في العبث ده !!
قطع صوت همهماتهـا وحنقها من عنه يداها المُلتفة حول خصرهـا وهو يضمها إليـه بشوقٍ ليذوق طعم الشجرة المحللة متفوهًا :
-بتكلمي نفسك ؟!!
ظهرت رجفـة جسدها بتبرتها المهزوزة وقالت :
-أنت ازاي عايش في الأوضـة بالشـكل ده !
دفن أنفاسها بجدار عنقها مُقبلًا على تذوق شفافهُ من شهدها فأردف :
-وحشتيني ..
توقف عقلها عن ترجمة الكلمات فأكملت وهي تحت مظلة عشقـة :
-مراد بجد إحنـا لازم نحط قوانين لحياتنـا ، أنا مش بعرف أعيش في مكان مش مترتب ..
استولى على صوته همهمات اللهفـة :
-وحشتـك !!
ما زالت ملابسه مستقرة بين راحتي كفيها فقالت :
-اوعدني تكون شخص مهندم .. وتحط كل حاجة بمكانها بعد كده ..
-عالية ، بقولك وحشتيني ..
-هااه !!
تقدم درجات في سلم حبهـا فهوت بحفرة العشق كما هوت الملابس من يدها .. فتسلطن عليهمـا الحب والحنين كبلبل يتنقل هنا وهناك .. وهي نائمـة على كتفـه متكلفة الاسترخاء تستمتع بألحان العشق المعزوفـة على أوتار مشاعرها بصمت لم يقطعه إلا صوت أنفاسهما الحارقـة ..
في زاوية ما بهذا العالم الواسع القاسي ستقابل شخصًا واحدًا ليكون هو أحن خطواتك المؤجلة حينها ستقف بجواره ولن تتحرك وإن فاتك العالم أنه الشخص المناسب.
•••••••
”لا تَستطيع أيّ ضوضَاء أن تخلقَ فزعًا مُساويًا لمَا يخلقهُ الصَمت المُمتَدّ بينَ مُتحابَّين.”
تجلس”حياة ” على أريكة شقتها التي جاءت إليها بشكلٍ مُفاجيء ولسببٍ مجهولٍ ، بصمت مريب بين الطرفين ، هي لم تسأل وهو لم يتكفل ويجيب ليروي فضولهـا .. بل اكتفى بالجلوس في صالون الشقة وإجراء الكثير من المكالمات ..
ضاءت شاشة هاتفهـا برسـالة نصية من جليسـة الصغار وهي تُخبرها :
-حياة هانم ، جبت البنات من المدرسة ورايحين التمرين ..
ردت حياة باهتمام :
-تمام يا رشـا ، خلي بالك منهم .. وقولي للسواق يسوق براحة عشان تاليـا بتعب من السرعة ..
-حاضـر ..
قفلت حياة شاشـة هاتفها ثم تركته بجانبها ووثبت قائمـة نحوه بملامح منكمشـة :
-هتفضل سايبني وقاعد هنا كتيـر ..
كتب أخر رسالة نصيـة لمن يراسله ثم ترك ما بيده ونهض إليها بقامته المهيبة .. وضع يديه على كتفيها بهدوء :
-مالك بس ؟! وأيه البوز ده كمان !! مش متعود منك على كده .
تخشبت معالم وجهها بضيق :
-عاصي أحنا جينـا هنا ليه ؟!
ما زال محافظًا على هدوئه :
-فلنفترض حابب أقعد معاكِ لوحدنا ، دي حاجة تزعلك ؟!
تحاشت النظر إلى عينيها وأطرقت بعيدًا :
-طيب ..
مسك ذقنها ورفع وجهها إليه :
-حياة بصي لي ..
أطرقت أرضًا بعيونها المُحملة بالدموع :
-لا ..
أصر أن يرفع عينيها إليه لتلتقي بعينيـه ثم سألها متحيراً:
-مالك ؟! أنتِ معيطة ؟!
سؤاله كان بمثابة شرارة النار التي سقطت على حقل أحزانها ، فانفجرت باكيـة وهي تتمرد وتعاند :
-لا ..
عقد حاجبيـه متعجبًا :
-والدموع دي ؟!
-مفيش يا عاصي .. عادي ..
شرع بمداعبـة خصلات شعرها المبعثرة بأنامله وهو يسألها بطريقة أكثر حنانًا :
-أيه مزعلك ؟!
ابتعدت عنه بانفعال غير مبرر ، وهتفتت ببكاء غزيـر :
-قلت مفيش ومش حابة اتكلم وكمان متقربش مني ..
– كيف لمجرد فكرة رحيل شخصٍ واحدٍ أن يُخلِّف هذا الألم الكبير والمرهق في قلبك، وكأن الأرض خاليةٌ من كل البشر واكتفيت به عما سواه من البشر؟!
جذبها عنوة إلى صدره وحاوطها بكلتا ذراعيـه ، ارتجفت في هدأة حضنه من فرط خوفها مثل محمومٍ بدون حمّى .. أخذ يربت على ظهرها بحنيـة تتساقط في حديثه :
-أشش .. ليـه ده كله ؟! بس بس روقي واهدي ..
عانقتـه بغتة متعلقة برقبته كطفلة صغيرة تخشى مغادرة أبيها وهي تضربه بقبضـة يدها كعقاب يستحقه عمـا قاله :
-أول وأخر مرة كلامك معايا يكون في مجرد احتمال أن بكرة يجي وأحنـا مش سوا ..
ثم انتفضت مذعورة بين يديه بنيرة مغلفة ببحة طائر مدْبوح :
-من وقت ما قولت كده وأنا عاملة زي اللي اضرب على دماغـه .. عاصي أنتَ مخبي عليـا أيه ؟!
ضحك بصوت مسموع على سذاجتها وقال :
-يعني ده اللي مزعلك !! مكنتش متخيل أن عقلك صُغير كده ..
دفنت وجهها الباكي في صدره وهي تضـربه بقبضتها مرة أخرى برفق :
-أنا مش هقدر أعيش يوم واحد من غيرك ..
تدلى ليحملها بين يديه بحنو ويجلس على أقرب أريكة وهي متخذة من جسده مأوى .. جلس وشرع بمداعب خصلات شعرها :
-طيب بصي لي ..
هزت رأسها نافيةً هي تندس بضلوعـه وتقول بتمرد :
-لا .. عشان لسـه زعلانة ..
هَل تعلم ما معنى أن تبنيَ عالمًا زاهيًا لك داخِل عينَي ؟! فلا تطفئه بغيابك .. كن لي حبيبًا لآخر عُمري ..
واصل مغازلـة تفاصيلها الذى وقع ضحيتهم .. أمرأة قوامُها لطيف حَتى أبتسامتهَا قادرة على ترميم روحك ، أخذ يسـرد شجن قلبـه :
-منكتش متصـور أن هيجي اليوم وأحب فيـه واحدة زي ما حبيتك ، تعرفي .. اليـوم الـ كنتِ نايمة فيه جمب البنات ، معرفتش أنام في الأوضـة ، حاولت كتيـر بس قلبي مقدرش .
“في كل مرّةٍ أكون فيها بجوارك، يخجل القلب أن يفكر في الغد وما يحمِله من هموم، لقد اجتمعت فيك معاني الرفقة الحقيقيّة، وكنت أرى شعوري الخائف، يزول باطمئنانٍ وهو يتآلف مع خدشٍ سبّبته له الحياة، يزول سريعًا لأنك برفقته .”
محى حزنها باعترافه فطالعته بعيونها الذابلة من كثـرة البكاء وأخذت تمرر كفيها على وجنتـه حتى أقرت منتشيـة لقُربه :
-وقلبي وقتها كان مراهنني عليـك .. وكسب الرهان..
بدأ في كفكفة عبراتها بلوم :
-بقا العيون الحلوة دي تعيط ؟!
ثم نهض وشدها خلفها ناحيـة المرحاض وشرع في غسل وجهها بالماء الفاتر حتى هدأت حُمرة عينيهـا .. تناول المنشفة وجفف ملامحها المبللة وهو يقول :
-نسيت أقولك أن في مفاجأة كمان خمس دقايق ..
سطع وجهها ببهجة طفولية :
-مفاجأة أيه ؟!
-قولت بعد خمس دقايق .. ومتحاوليش ..
وقفت على أطراف أصابعها لتُقبله سريعًا بوجنته :
-طيب وكده ؟!
-تؤ ، وبعدين أيه دي ؟! دي تضحكي بيها على تاليا وداليـا .
-عاصي !! عشان خاطري قول بقا ..
-طيب ادفعي عربون يستاهل الأول ..
زامت فاهها بدلالٍ :
-لو مفاجأة حلوة هعملك اللي أنت تطلبه .. يلا ..
في تلك اللحظة رن جرس الباب مُقاطعًا لحديثهم ، فقال :
-روحي افتحي ..
-اشمعنـا ؟!
-عشان تعرفي المفاجأة…
•••••••••
خرجت شمس من صالون التجميـل وهي تكرر اتصالها بعاليـة التي اختفت فجأة .. على مراجل من قلق أخذت تجوب حائرة وهي تهذى مع نفسها حتى يائست أن تجد حلًا فهاتفت تميم لتستغيث به .. ما أن أتاها صوته قائلًا :
-خيـر يا شمس ؟!
جاءه صوتها مضطربًا :
-تميم .. أنت فين ؟!
-في الشُغل .. في حاجة؟!
زفرت بحيرةٍ :
-ايوة ..
-قولي ..
ردت بصخب يملأها :
-عاليـة ، قصدي أنها راحت تزور واحدة صحبتها ، ومش عارفة أوصلها .
فزع تميم من مجلسها بلهفـة وهي يطرحة عريضة من الاسئلة لم تجب عليها شمس حتى ختم تساؤلاته قائلًا :
-أنتِ فين ؟!
وصفت له العنوان بتخبط في تفاصيله حتى قطعها :
-ابعتي اللوكيشن يا شمس ، جايلك .
توسلت إليه :
-بسـرعة يا تميـم ..
••••••••
فُتح الباب وفتح معه عينيها وفاهها ، أزفت لحظة اللقاء المنتظر أخذت تَتلعثم مكذبة ما تراه .. تجمدت الدماء بعروقها من هول الصدمة فخانها التعبيـر مكتفيـة بتوزيع نظرات تحمل الكثير من الدهشة .. فهمهمت باسمي أخوتها :
-رشيـد .. يونس .. !!
ناظر الإخوة بعضهم البعض في استفهامات متشتتة ختى تفوه يونس بحماس وهو يبادر بمعانقـة أخته الكُبرى :
-رسيـل !!!
تعلقت بحضن أخيها بشوق مدججٍ وهي تهتف باسمه :
-يونس !! معقولة !!
فأخذت تبتهل بشكر :
-الحمد لله ، الف حمد وشكر ليك يارب .. وحشتني وحشتني أوي يا حبيبي ..
أمطرت سُحب شوقها على كتفي أخيها وهي تستنشق به رائحة والدها :
-قلبي كان حاسس والله ..
فارقت جسد أخيها بعناء لتطوق رشيد ، توأمها وتقول ببكاء :
-رشيـد ، تعالى تعالى في حضني .. وحشتني يابن الأيه ..
ضم أخته بلهفة اللقاء وهو يخبرها :
-انا مش مصدق ، مش مصدق أنك قدامي ، انا كنت يأست خلاص وقلت البحر غدر بينـا .. زي ما غدر بقنديل المصـري ..
هتفت بنحيب دفين :
-الله يرحمه .. هو آكيد فرحان بلمتنـا دلوقتِ ، أنا حاسس ببابا ..
من الخلف أشار عاصي لرجاله أن ينتظروا بالأسفل .. انسحبوا بهدوء فتدخل عاصي قائلًا :
-طيب ادخلوا جوة ..
رمقه يونس بحيرة حول هويته :
-مين ده يا رسيل ؟!
ابتعدت عن حضن أخيها وهي تجفف دموعها السائلة ، طالعته بتفاجر وهي تُجيب أخيها :
-عاصي دويدار ، جوزي..
قفل رشيـد الباب وعاد إليـه ليفحصه بعنايـة :
-ده أمتى وأزاي ..
أجابهم عاصي :
-هتعرفـوا كل حاجة ، بس الأول اتفضلوا ارتاحوا من السفـر ..
تغلغلت أصابعـها بفراغ كفه لتسير بمحاذاته نحو الأريكة .. اتبع اخوتها الخُطى حتى وصلوا إلى غرفة الجلوس .. جلس عاصي على مقعد منفرد .. وأقبلت حياة إلى يونس وأخذته بحضنها مرة أخرى وهي تُقبله بقبلات مدججة بالشوق والهفة أثارت غيرة عاصي .. فقال مقترحًا :
-حبيبتي ، أخواتك أكيد جعانين .. شوفي ياكلوا أيه ؟!
طوق يونس أخته الكبرى بحب ثم قبل كفها :
-أنا النهاردة أسعد واحد في الدنيـا .. وحشتيني ووحشتني رواياتك وكلامك يا رسيـل .. أنا كنت تايه من غيرك..
ردت القبلة بقُبلتين وقالت بفرحة :
-عاصي معاه حق ، تاكلو أيه ؟! هعملكم كل الأكل اللي تحبوه ، وحشكم أكلي مش كده !
تحمس يونس :
-أنا وحشتني الصياديـة بتاعتك ..
-بس كده ، حالًا أقوم أعملك أحلى صيادية ..
تدخل عاصي باسمًا :
-استني بس .. ارتاحي هنطلب الأكل من بره .
عارضته :
-عاصي …
فبرر قائلًا :
-أكيد يونس مش هيوافق يتعبك وأنتِ حامل!! ولا أيه يا يونس ..
هتف يونس بفرحة وهي يضمها :
-الله ؟!! ده بجد ؟! يعني هابقى خالو .. لا جوزك معاه حق ارتاحي خالص ..
طالع عاصي رشيـد بملامحه الصاخبة حيث سأله :
-واضح أن رشيد مش مبسوط أنه هيبقى خال هو كمان ..!!
تفوه بحنق واضح :
-أنتَ عرفت أختي ازاي ؟!
عارضه يونس :
-رشيد ، ده وقته ..
عاصي متفهمـًا :
-سيبه يا يونس .. هاا عايز تعرف أيه يا رشيد ؟!
••••••••
-أحنا ليـنا نص سـاعة بنلف ولحد دلوقتى ماقولتيش معلومة واحدة مفيدة يا شمس ..!!
بنبرة أجشة هتف تميم قائلًا جُملته الأخيرة ثم أتبع :
-يعني هتكون راحت فين ؟! وأنتوا أيه خرجكم أصلًا ؟!!
انتفضت شمس من مكانها :
-طيب ممكن تهدى ؟!
-اهدى أيه في الظروف دي ؟!! أنتـوا عارفيـن الظروف ومش عارفين مين بيعادينـا وكمان خرجتوا و أدي النتيجة !!
ثم أمسـك هاتفـه بعجـل فسألته :
-هتكلم مين ؟! بلاش عاصي ، هيتخانق معايـا وهتحصل مـشـ ..
فقاطعهـا مزمجرًا :
-مش هكلم عاصي ، ده مراد ..
باندفاع أجابته :
-هـو كمان مش بيرد ..
-كلمتيـه ؟!
-ااه كلمته كتير ، مابيردش ..؟!
زفر بضيق وهو يفكـر ثم تراجع إليها :
-وأنتِ كلمتي مراد ليـه؟!
بدأ الاضطراب يتراكم فوق معالم وجهها وهي تتراجع للوراء حتى ارتطم ظهرها بباب السيـارة :
-أصل … عاليـة .
اخفض تميم سرعة السيارة بعدما أدرك أنها تخفي شيئا:
-اتكلمي على طـول يا شمس ..
-أصلها خرجت عشان تقابل مراد .. وقالت ساعة وهترجع .
-وماقولتيش كده ليـه من الصبح؟!
كان سؤاله مغلف بالتوبيخ حتى بررت :
-أصل ده سـر ..
ثم اندفعت محذرة :
-بص قُدامك ..
عض تميم على شفته السُفليـة وهو يراقب الطريق أمامه ويهمهم مع نفسه بكلمـات غير مفهومة حتى قطعتها حائرة :
-تمـيم ، أنا مش فاهمة حاجة من اللي أنت بتقوله !!
جهر بجزع فاض في نبرته الغاضبة :
-بكلم نفسي يا شمس، اتجننت فبقيت بكلم نفسي ..
-طيب براحة ، وأنا مالي بتزعق فيـا ليـه ؟!
-عشان تكذبي تاني !!
-انا مكذبتش …
اكتفى بإرسال نظرة حادة إليها ثم أكمل تجوله بالطرقات متجنبـًا الحوار معها وهو يتوعد في نفسه لمراد وعاليـة وشمس التي كذبت عليـه ، وصل الاثنان تحت البناية التي تقع بها شقة مُراد فهتف تميـم بضيق فاض :
-اهي عربيـة البيه اهي ..
شمس بحرج :
-يعني همـا فوق !!
-اكيد ..
هبطت شمس من سيارته وتحركت كالمخبرين حول سيارة مراد ثم عادت إلى تحت نظرات التعجب من فعلها :
-أنت نزلتي ليه ؟!
-عاليـة موبايلها جوة العربية .. يبقى فعلًا هي فوق ..
ثم تنهدت بارتيـاح :
-الحمد لله أنهـا بخير ..
فتح تميم نوافـذ سيارته ثم ولى تجاهها ليبدأ في فقرة استجوابها :
-هااه بقا خرجتوا ليـه ؟!
ردت بخجـل مشحون بالتوتـر :
-شويينج يا تميـم ..
لم ترق عليـه كذبتها :
-شمس هناك مفيش ولا محل تشتري منه ..
-لا طبعا في !
رد بتخابث :
-طيب فين اللي جبتيـه بقا ؟!
-هااه ؟! ااه مفيش حاجة عجبتني ..
شبح ابتسامة خفيفة ظهرت على وجهه وسألها بمكـر :
-شمس .. أنتِ كُنتِ في بيوتي سنتر ؟!
لُطخ وجهها بحُمرة الحياء :
-أيه !! لا طبعًا .. أنا هروح الأماكن ده ليـه .. لالا مفيش الكلام ده خالص .
-طيب أهدي .. عادي ده مجرد سؤال .. مش مستاهل التوتر ده كله .
هزت كتفيها باضطراب :
-أنا مش متوترة .. أنا عادي .
ثم غيرت مجرى الحوار بينهـم :
-طيب أيه ؛ أحنا مش هنطلع لهم ولا هنستنى هنـا ؟!
مط شفته السفليـة متحيرًا :
-والله شايف نستنى …
أيدته قائلة :
-كده أحسن ..
ثم ترنحت بتخابث ممزوج بالفكاهة :
-براڤو طلعت بتفهـم ..
رد مندفعًا :
-عشان لو طلعت فوق هكسر الشقة على دماغهم .
انفرج فاهها :
-أيــه !!
~ بشـقة مراد ~
جلست عاليـة على المقعد لتنتعل حذائها بتوتـرٍ ساطع من ملامحها وهي تطلب منه :
-مراد معلش كلم شمس ، قولها نص ساعة ونكون عندها .. أحنا اتأخرنا أوي ..
-مش معايا رقمها .
-أنا أزاي سمعت كلامك بس .. انت السبب يا مراد في كل ده .
رد وهو يرتدي ساعته :
-يا سلام ! أنا السبب دلوقتِ ؟!
ثم وثبت لتتهمـه مُشيرة بسبابتها :
-على فكرة أنت من أول ما كُنا تحت وأنت ناوي على حاجات مش تمام .. هاه تنكر ؟!
-بصـراحة أه ..
ثم ضحك بصوت مسموع وهو يقترب منها :
-أنت متوترة كده ليه !!
جهرت باضطراب وهي تخرج راكضـة من غرفتهم التي هبت بداخلها عواصف العشق فانقلبت مجددًا رأسًا على عقبٍ :
-مش متوترة يا مراد وبلاش تأخير أكتر من كده.
~ بسيارة تمـيم ~
شمس محاولة خلق لغة حوار بينهم :
-مبروك ، على فك الرُباط .. بقيت أحسن !
-احسن ..
ثم نظر إليها بكامل وجهه :
-أخبار البونيـة اللي في وشي أيه ؟!
تمدد محياها بهدوء وهي تمرر سبابتها فوق الكدمة المستقرة تحت عينه :
-شايفة أنها بقيت أحسن كتير .. أنت مش حاسس بتحسن ؟!
في روضـة حُسنها وجمالها الخلاب غرق بسحر تعامد أشعة الشمس على مُقلتيها ، فتبلور قلب تميم عندمـا سطعت شمسها :
-عينيكِ حلوة أوي ..
لم تستطع الـرد بسبب تراجعه فجأة عن قربها بعد رؤيته لعاليـة ومراد يتراكضان نحو السيارة :
-أهو الباشا ظهر ..
هبطت شمس بسرعة لتهرب من أسر مغازلته التي رجت فؤادها من مكانه واندفعت إليها معاتبة :
-كده ياعاليـة !! قلقتيني عليكي ..
عالية باعتذار شديد :
-بجد أسفة يا شمس ، اشتريت حاجات كتير ومراد صمم نجيبها فـوق ، والأستاذ شقتـه خرابة هو ده اللي عطلني .. متزعليش مني بجد ..
تقدم تميـم إليهم بوجهه المكفهر :
-طلع عاصي عنده حق لمـا قال أنك بتلوي دراعنا !! أنت محدش مالي عينك يعني ؟!
-أيـه الدخلة دي يا تميـم !!
-كمان مش عاجبك !! لما تكسر كلام أخوها الكبير وتقابله من وراها مش ده اسمه شغل حرامية ؟!
وقفت عاليـة بينهم :
-أنتَ معاك حق يا تميم .. وأنا غلطانة بس متزعلش مني ..
شدها مراد ورائه ، ووقف في مواجهة تميم :
-متكبرش الموضوع يا تميم ..
-لا هو كبير فعلًا ..
رد ببرود :
-ولا كبير ولا حاجة ، مراتي وحشتني .. فيهـا حاجة دي !
عض تميم على شفته السُفلية كاظمًا غضبـه :
-شكلك مش هترتاح غير لما اختم على وشك زي البونية دي ..
تدخلت شمس بهدوء :
-خلاص يا تميم عشان الشارع والناس بدأت تاخد بالهـا ..
هتف بغضب مزعوم :
-مفيش خلاص .. لازم يعرف يحترم كلام أهل مراته ، وعشان ترحم اتفضل بقا اعزمنـا على الغدا في المكان اللي اختاره ..
تنفس الجميع الصعداء خاصة عند تحول نبرة تميم من الجديـة للمرح ، فرفع مراد قبضته ليلكمه بالعين الأخرى ممازحًا :
-حرام أعورك في التانية ..
-اتكلم على أدك يا لاه .
•••••••••
خرجت من المطبخ حاملة بيدها طبقًا كبيـرًا من الفـواكه ، فطافت عينيهـا باحثة عنه .. حتى سألت أخوتها :
-عاصي فين .. ؟!
وثب يونس ليحمل عنها الطبق وقال :
-جاله تليفـون ونزل ..
لف انتباهها جلوس رشيـد بعيدًا عنهم :
-رشيد أنت قاعد بعيـد ليـه ؟!
دنى منها متأففًا :
-مش مرتاح يا رسيـل .. بحاول استوعب كل اللي حصلنا ده ..
ثم جلس بجوارها :
-يعني في يوم واحد اتفرقنا ، أبونا مات ، انتِ اختفيتي ، فريد استولى على حقنـا وحاول يقتلنـا ؟!!! وكمان لما نتجمع تاني تطلعي متجوزة وحامل !!
ثم أطال النظر بعينيها :
-وبعدين الراجل ده مش مرتاحله .. سر الغناء الفاحش اللي هو فيـه !! الحرس ورجالته .. هدوئه ، كلامه ؛ رسيل أنتِ واثقة أنك تعرفيه !!
أجابته مشدوهة :
-رشيد أنت عايز توصلي أيه ؟!
-أنتِ ازاي تسلمي نفسك لراجل غامض زي ده ، وشه كله أسرار ؟!
تناولت ثمرة التفاح وشقتها لنصفين وقالت :
-بردو مش هتتغيـر يا رشيد ، زي ما بابا بيقول عنك .. ما بتبصش تحت وجليك قبل ما ترمي صنارتك بعيد ..
-قصدك أيه ؟!
-قصدي أنك ركنت اللي عمله فريد ، ومحاولة أنه يخلص منكم .. وياعالم عمل أي كمان ، وبقيت شغال محلل نفسي لعاصي !!
أيد يونس حديث أخته :
-على فكرة رسيل بتتكلم صح .. وبعدين ماله الراجل !! هيبته ونفوذه يسدوا عين الشمس !! وواضح أنه بيحب أختك وشاريها .. أنت مزعل نفسك ليه ؟!
رشيد بسخط :
-بردو أنا اللي طلعت غلط في الأخر !! عمومًا خليكم فاكرين كلامي ، وان الراجل ده هيطلع وراه حوار كبير.
أعطت أخيها ثمرة فاكهة:
-رشيد .. طلع عاصي من دماغك وخليك في ابن عمك اللي معملش حساب لصلة الدم ..
تأفف رشيد بحنق :
-يامين يناولني زُمارة رقبتـه … بس هيروح مني فين .
••••••••
~بسيارة عاصي~
أشعل سيجارتـه وهي يُكرر سؤاله بصيغة مغايرة على أذان ” حماد ” الجالس أمامـه يرتجف ..
-تحب تحكي أنتَ .. ولا أحكي أنا ..
قطعت سيوف الخوف الكلمات على طرف لسانه :
-اللي تشوفه معاليك .. اللي أنت عايـزو انا خدامك .
-يبقى احكي لي كده من الأول كُل اللي تعرفه ..
طافت عينيه حول السيارة المحيطة بالرجال الذين يحرسونه فدب الرعب إلى أوصاله وسأله :
-بخصوص أيه ياباشـا ..
كظم غيظه بصعوبة وقال
-أي علاقتك بنفادي ..
-كـ كانت مصلحـة هاخد منها قرشين حلوين .. بس هو غدر بالاتفاق ..
عاصي بثبات :
-وأيـه هي المصلحة ..
-نبعدك القصر ورجالته يأخدوا الهانـم ويوديها للباشا ..
زفر باختناق :
-جميل .. مين الباشا بتاعكم .. وياريت بسرعة عشان معنديش وقت ..
-اللي كان بيتواصل معايا واحد من الغردقـة شغال في المينا تبع واحد اسمـه فريد المصـري .. هو اللي كان عارض نص مليون على اللي هيجيب له بنت عمه ..
احتدت نظرة عاصي فهب الرعب بصدر حماد :
-خدت أنا نص الـ 300 ألف ونفادي ورجالته الـ 200 الباقيين .. ومن وقتها ورجالة فريد بتدور عليـا لأن نفادي خلف الاتفاق واداني عنوان غلط اللي استلم فيه الهانم .. بس مجاش ..
أغمض عينيه متحكمًا في غضبه :
-فريد المصري !! حفرت قبرك بأيدك يا *** .
ثم نزل من سيارتـه فجأة وهو يُشير لرجاله :
-خدوه من هنـا ..
عاد عاصي إلى شقته محاولًا طي عبوث وجهه محافظًا على هدوئه وثباته ، في اللحظة التي أحست حيـاة فيها بصوت مفاتيحه ، أثناء جلوسها بحضن يونس ، حدجت أخيها رشيد آمرة :
-افرد التكشيرة دي ..
أتاهم صوت عاصي وهو يلقي مفاتيحه على الطاولـة :
-مش هترتاحوا شوية يا شباب ولا أيه ؟!
قَبل يونس رأس أخته :
-ومين هيجيلوا نـوم الليلة دي ..
-أنا مقدر والله .. بس رسيل قاعدة أهي ، قوموا ارتاحوا شويـة عشان عايزكم فايقين بالليل ..
تحمست حياة وهي تنهض بسرعة وتُشير إلى أحد الغرف :
-قوم يا رشيد ، وأنت كمان يا يونس ..
نهض رشيد على مضض نحو الغرفة المقصودة وأما عن يونس فهتف قائلًا :
-طيب بعد اذنكم بقى ..
مع صوت قفل باب غرفتهم ألتفت حياة إلى عاصٍ :
-وأنت مش هترتاح شوية ؟!
مد ذراعه إليها ليتمسك بها مستعينًا بقوتها للوقوف ثم تحرك الاثنان نحو غرفتهم التي عند قفل بابها ارتمت بحضنه بعرفان :
-عاصي أنت النهاردة رديت لي روحي .. كل كلام الشُكـر مش هيوفي حقك .
طوق زوجته بحب :
-كفاية عليـا فرحتك دي ..
-حاسة إني في حلم جميـل أوي .. أنت وأخواتي واطمننا على صحة ابننا .. حقيقي قلبي بيطير من الفرحة ..
ثم ابتعدت عنه متدللة وهي تعبث بأزرار قميصـه :
-أطلب مني أي حاجة وأنا هنفذها فورًا ..
أخذ يفكر قليلًا فاستعجلتـه :
-يلا قبل ما أرجع في كلامي ..
أمسك بذقنها مداعبـًا :
-متحرمنيش من ضحكتك الحلوة دي أبدًا .. ممكن !
عادت مرة آخرى لحضنه وهي تطوق خصره معترفـة بشوق يفيض من جسدها :
-بحبـگ .
••••••••
على طاولة منفردة بعيدًا عن عاليـة وشمس وتهامسهم ، جلس مراد وتميـم في الجانب الآخر من ” الكافيه ” المتخصص بالتدخين .. فوبخه تميم بتهامس :
-جبتنا هنـا ليه !! وبعدين أنا مش بدخن ؟
زفر مراد بحذر :
-وأنا كمان بطلتها .. بس معلش لازم نتكلم ..
تميم باهتمام:
-انجز قبل ما تلاقيهم فوق دماغنـا ..
-تميم .. الكلام ده كبير وأنا بسألك عشان تساعدني ونشوف حل ، وفي الأول والأخر لمصلحة عالية .
نفذ صبر تميم :
-ما تنجز !! مكنتش عزومـة للذل ده كُله !!
ألقى مراد نظرة سريعة إلى عاليـة ثم قال :
-أنت تعرف أن عالية مش بنت خالتي عبلة !
طاحت يد تميم بالكوب الزجاجي الذي ارتطم بالأرض متهامسًا تحت سحابة الصدمة :
-انت مستوعب بتقول أيه ؟! مراد أيه الهبل ده ؟!
انكمشت ملامح مُراد إثر الضجة التي أحدثها تميم لحظة تلقيـه الخبر ثم قال بحذرٍ :
-اهدي يا تميـم متخليش حد ياخد بالـه ..
جاء النادل ليقطع تهامسهم وينظف الأرض من حُطام فتات الزجاج الذي لا يختلف كثيـرًا عن قلب تميم المهشـم .. انتظر إلى أن رحل النادل ثم عاد متسائلًا :
-مراد مين قالك كده ؟! ولا ده استنتاج !! فهمني ؟!
-هحكي لك يا تميم بس أهدى واسمعني ..
•••••••
في تمـام التاسعة مساءً .. تتهامس نوران في الهاتف مع كريم الذي تحجج بأمر فريد وتحكماته المبالغـة بالقصـر .. فأردفت نوران بعتب :
-مكنش لازم تكسر كلام عاصي .. اكيد عارف أن ورا الجدع ده مصيبة عشان كده منعـه من دخول البيت ..
خرج كريم إلى شرفة غرفتـه ليتنفس القليل من الهواء :
-أهـو اللي حصـل بقى يا نوران .. مش حلوة خالتي تبقى واقفة على البوابة قدام اللي رايح واللي جاي .. وبعدين غيري الموضوع أحسن ما انزل اكسر صف سنان الأراجوز اللي تحت ..
التوى ثغر نـوران بحنق :
-أهي خالتك دي علامة الاستفهام الكبيرة في البيت ..؟! كريم من رأيك مادام مش هي أم عاليـة ، يا ترى مين تبقى مامتهـا ؟!
رفع أنظاره للسماء متنهدًا بحيرة :
-اجابة السؤال ده عند خالتي وبس !
-طيب تفتكر لما قالت لعاصي أنها مش أختـه ، معنى كده أنهم مشتركين في الجريمـة ؟! وياعالم أيه تاني وراهم .. !!
زام ثغر كريم بجزع :
-هو مفيش مواضيع تانية عندك تفك الواحد !! كله نكد في نكد كده ؟!
عقدت حاجبيها بذهول :
-أصلًا أنتَ بتكلمني ليـه ؟! ماينفعش نتكلم تاني بعد اللي حصل النهاردة !
-ليـه يعني ؟! وأنا كُنت عملت ايه؟؟
-شوف أنت بقا .. وياريت متحاولش تكلمني تاني عشان عندي مذاكرة ومن غير سلام ..
فوجئ كريم من قفلها للمكالمة بهذه السرعة ثم تفوه مندهشًا :
-مالها بنت المجانين دي ؟!!!!
~بالأسفـل ~
يجهر فريد بنبرة فظة غليظـة بأحدى الخادمات الاتي تُقدم له القهوة :
-دي من غير وش ؟! أنتِ ازاي تجيبي القهوة بالمنظر ده ؟!
-سوري هعملك غيرها ؟!
طاحت يده بالمائدة التي تحملها الفتاة بتغطرس لتتهاوى أرضًا :
-مش عايز حاجة من وشك …
فتدخلت عبلة بكبرياء:
-أوامر فريد بيه تتنفذ بالحرف .. فاهمة !
أخذت الخادمة تنظف مكان القهوة المسكوبـة بضيق يملأها هي وبقية الخدم .. انتقل فريد من مكانه ليجلس لجوار عبلة حيث جهر آمرًا وعينيه تقتنص الفتاة بوقاحة :
-انجزي يا بتاعة أنتِ ..
ثم مال على أذن عبلة :
-مخلصنـاش كلامنـا .
تركت الهاتف من يدها :
-أي كلام ؟!
-عاصي …
تحولت ملامحه الهادئة إلى آخرى يملأها الانتقام :
-أنا هدفعه التمن غالي أوي .. هعرفه يعني أيه يلعب مع عبلة المحلاوي ..
شرع فريد ببخ سمه برأسها :
-بس أنا شايف غير كده ..
-ازاي ؟!
-شايف أن كيان عاصي دويدار أنتِ اللي عملتيـه ، وزي ما عملتيه في أيدك تهديه ..
-يعني ؟!
تجولت أنظاره الشريرة بالمكان ليتأكد من خلوه ثم قال بحذر :
-عاصي عض الأيد اللي اتمدت له ، يعني خان .. والخاين جزاته رصاصـة تخلصنـا منه .. هو اللي كتب نهايتـه بنفسـه ..
اتسعت أعين عبلة بذهول :
-قصدك اقتل ابني ؟!
ابتسم بمكر :
-مش ابنك يا عبلة ، ده كان الطُعم لصيد أحلام عبلة هانم .. بس غدر .. والصبي اتمرد على معلمه يبقى ……
في تلك اللحظـة اقتحـم عاصي القصر بزعابيب غضبه بخطوات سريعة ركضت حياة لتواكبهـا .. وثب فريد والخوف يملأ عينيه خاصة عند رؤيته لأبناء عمومته وكل منهما ينوي أن يرد له الصاع صاعين ..
جهر عاصي بصوته المُرعـد :
-أنا لما أمنع دخول حد بيتي .. ويدخل يبقى يستاهل كُل اللي يجراله ..
مع ختام جملته فُتحت أبواب الغرف وخرج منها سُكانها .. تبادل كلًا من نوران وكريم النظرات ثم تقلصت المسافة بينهم حتى استقرا في نقطة واحدة وهي تتهامس :
-عاصي مش هيعديها … اتفرج اتفرج .
حدجها بدهشة :
-أيه السعادة دي يابت ؟!!!
-بس بقا ..
اقتربت عبلة من عاصي وهي تحمي فريد ورائهـا :
-وأنت لما تمنعني أدخل بيتي المفروض أقف من بعيد اسقف لك وأقول براڤو طردت أمك !
بغطرسة :
-أنا حر .. أقول مين يقعد هنا ومين لا وأنتِ مش عليكي غير تنفيذ أوامري وبس ..
عارضته بحرقة :
-لا يا عاصي ألا أنك تبعدني عن القصر اللي بنيته بسنين عمري .. أنا مش هخرج من البيت ده غير جثـة ..
رد بقسوة :
-وده المصير المتوقع لأي حد يكسر كلامي ..
كادت حياة أن تتقدم إلى زوجها لتهدئه ولكنها توقفت إثر منع يونس لها .. تدخل فريد في حوارهم قائلًا وهو يخفي صدمته بلقاء أخوة رسيل :
-عين وصابتكم يا جماعة مش كده !! وبعدين ده النهاردة يوم عيد .. ولاد عمي بخير يا جدعان وواقفين قدامي .. تعالو تعالو في حضن ابن عمكم ..
تقدم رشيد ببطء وهو يحضنه ثم قال :
-ولادك قنديل المصري بسبعة أرواح .. مايتخافش عليهم ..
كتم عاصي غضبـه بصدره وهو يقاوم مشـاعره الثائرة نحو فريد .. اتسع بؤبؤ عيني حياة بذهول :
-أيه اللي أخوك بيعمله ده !! يونس ألحقني !!
-استنى يا رسيل ..
هبطت نوران درجتين من أعلى بحماس وهي تقول لكريم :
-مش قولت لك هتولع ..
-مفيش دم خالص !!! اللي بيجري في عروقك ده ميه ساقعة !!
تركت حياة كف يونس وتقدمت ناحية عاصي وضمت ذراعه هامسـة :
-عاصي أنا مش فاهمـة حاجة ..
ارتفع صوت رشيد قائلًا :
-فريد ابن عمي وأخويا الكبيـر اللي اتعلمت منه الصنعة ، وخطيب رسيـل أختى ..
خرج عاصي عن صمته :
-ما تفوق لنفسك يا رشيد وتعرف أنت بتقول أيه ؟!
فريد بشماتة :
-سيبوا يا رشيد .. هي كدة كلمة الحق بتزعل ..
-كلمة كمان وهدفنك حي مكانك …
تقدم يونس معترضًا على موقف أخيه :
-رشيد أنت بتعمل أيه ؟!
قهقهت عبلة وهي ترمق حياة بسخريـة :
-كُنتِ مخطوبة لجوزي !! وأول ما شوفتي ابني بعتيه !! يعني خطافة رجالة !
صرخت حياة بوجهها :
-أنا مش خطيبة حد ، والموت عندي أهون من جوازي من فريد .
عارضها رشيد :
-والفاتحة اللي قراها قنديل المصري !! اتنست !
-اه اتمسحت من دماغي .. لأن عمري ما كنت هتجوزه أصلا ..
تقدم فريد ليرد كرامته قائلًا بخبث :
-أنتِ عمرك ما كُنتِ هتتجوزي أصلًا يا رسيل .. عارفة ليـه ؟! عشان مين المُغفل اللي هيحاسب على مشاريب غيـره ..
ثم نظر لعبلة وأكمل :
-بس شكل ابنك اللي طلع المغفل ده وقبل بواحدة نامت في حضن حد قبله … قاسم فاكراه ؟!!!
في تلك اللحظة انفجر بركان عاصي المدفون بوجه فريد الذي التهمه بجنون ليسدد لوجهه العديد والعديذ من اللكمات القوية والمصحوبة باللعنات الخارجة حتى رقد فريد تحت قدميه لا حول له ولا قوة … تقطرت الدماء من وجهه الذي كان ساحة لتفريغ غضب عاصي .. هنا جاء تميم ومراد يركضون من الخلف على أصوات الصرخات والاستغاثات المنبعثة من الأفواه ..
بصعوبة استطاع كل من مراد وتميم ورشيد أن ينقذوا فريد من قبضة يـده الحديدية ، أخذ يسبه بأبشع المصطلحات :
-مبقاش عاصي دويدار لو خرجت من هنا على رجليك ..
ركضت حياة لتثبط من نيران زوجها صارخة بحرقة :
-عاصي بس خلاص كفاية .. كفاية عشان خاطري ..
-وديني نهايتك هتكون على أيدي ..
جاءت عبلة صارخة بوجهه :
-ده بدل ما تدفنها جاي تتشطر على فريد !! روح شوف ماضي الهانم اللي أنت اتجوزتها ..
-اللي هيقول حرف في حق مراتي هقتله بأيدي ..
-وأنا مايشرفنيش واحدة شمال زيها تربي بناتك وتتكتب على اسمك ..
تدخل رشيد بغضبه المنثور :
-وأحنا مايشرفناش نسب ابنك .. وأختي هاخدها معايـا وأمشي ..
حياة بذهول من موقف اخيها السلبي :
-رشيد أنت بتقول أيه !! بس بس بقا ..
عارضها رشيد بحزم :
-فاتحة قنديل المصري عهد ..
ثم جهـر مُعلنـًا :
-فريد .. لسـه عند كلمتك وعايز تتجوز أختى ؟!
وثب فريد بمعاناة تحت أنظار الجميـع وهي يستند على المقعد ، طالعته عبلة بفضول منتظرة رده .. وضعت عاليـة كفيها على فمها من هول الصدمات المتدلية فوقهم .. أما عن شمس فكان همها هو أمر حياة وسلامة حملها .. أعلنها فريد بأنانيـة :
-محدش غيري يستر عار بنت عمي ..
نهره رشيد بصوته القوي :
-عايز تتجوزها ولا لا ؟!
اتسعت ابتسامة فريد وهو يلهث :
-ااه .. رسيل أنا لسه بحبك ..
توقف مراد كالسد المنيع أمام جيوش عاصي التي تريد أن تغتال فريد في الحال .. جهر تميم موبخًا :
-أنت ضارب أيه يابني آدم على آخر الليل !! ما تخاف على عُمرك ..
بنفس النبرة القوية قال رشيد :
-بس أنا ليا شرط ، أختي ما تتجوزش على ضُرة ، تطلق مراتك هسلمك أختى ..
اقترب فريد مت عبلة بقلب يتراقص على أوتار الفرحة وهى يقول بحماس وحماقة معًا :
-وأنا موافق .. عبلة أنت طالق ..
شهقات متتاليـة من الجميع اندلعت من أفواههم حتى ختمها رشيد بحزمه وهو يشد حياة من يد عاصي لتقف خلفه عنوة :
-بالتلاتة ..
دنى فريد من رسيل ذات الوجه الشاحب والمشدوه من هول الحدث الصادم لعقلها .. تقف امام سيفين سيف تجبر أخيها وسيف الحُب حاولت التملص من قبضة يد رشيد ونظرات فريد المُرعبـة حتى نطق كلمته بسعادة :
-عبلة أنتِ طالق بالتلاتة …..
استولى على صوتها الأسى والجوى:
-رشيـد أنت رجعت عشان تدمرلي حياتي ؟!! أنا عملت لك أيه ! ليه القسوة دي !! مش كفاية عمري اللي ضيعته على تربيتكم .. بقيت لكم أم في الوقت اللي كانوا في سني بيلعبوا بالعرايس ؟! أنت مين أداك الحق في كل ده ؟!
ثم دارت في اللحظة التي همّ فيها على احتضانها بين ذراعيه وهو يقبل رأسها وجسدها المرتجف :
-محدش هياخدك مني يا حياة .. اهدي اهدي دي لعبـة !! مفيش حاجة هتحصل ..
كاد يونس أن ينفجر بأخيه ولكن أوقفته كلمة عاصي الأخيرة ، وإقبال رشيد على ضم أخته كاعتذار على قسوته معها ولكن هذا كان اتفاقه مع عاصي .. بات فريد يتضور حوله كالمجنون ، فجأة خسر كل شيء ، أصبح ورقة محرقة يُطاير الهواء رمادها ..
وقفت عبلة أمامه وهي ترمقه بسهام الخسه :
-أنتَ حقير .. وأنا غلطانة إني وثقت في واحد خسيس زيك ..
أخذ يتفقد الوجوه الشامتة ونظرات الحقد التي تنهال فوق رأسه .. أصبح يهذى كمن فقد عقله وهو يقول :
-أنتوا اتفقتوا عليـا ؟!!! لا ده أنا فريد المصري ، حوت البحر الأحمر .. ومش أنا اللي يتلعب بيـا ..
ثم أشار بسبابته نحو عاصي ورسيل التي تنتفض في حضن أخيها :
-طيب اسمعوني كلكم .. عشان أنا ناوي أهد البيت ده على اللي فيـه ..
أخرسه عاصي قائلًا :
-اظبط ساعتك على دقايق عمرك ، أنت خلاص في عداد الأموات …
ثم اقترب منه خطوة :
-سؤال عايز أسمع اجابته منك .. عايز أيه من مراتي !! عايز أيه يخليك عشانه تأجر بلطجيـة عشان يخطفوها ..
انفجر فريد بضحكات هسترية تحت تأثير الصدمة والوجع المُنصب على جسده وبلهجة المُتعربد قال :
-ما بلاش فردة الصدر دي .. وما دام كده ميت وكده ميت .. عايزكم تسمعوا كلكم التسجيـل ده .. عشان تعرفوا حقيقة عاصي بيه المُزيف .. وعبلة هانم المحلاوي ..
توسلت عبلة إلى عاصي بخوف :
-عاصي نادي رجالتك يجوا يرموا الحيوان ده بره .. عاصي عشان خاطري انا اسفة .. انا ماليش غيرك وو
قاطعها فريد بسخرية وهو يضغط على زر التشغيل :
-باقي أخر لقطة من الفيلم ..
لقد دانت المصائر وتعرت الحقائق بتسلل صوت اعتراف عبلة لفريد بحقيقة بنوتها لعاصي وعاليـة واعترافها الصريحة والواضح بأنها سيدة عقيم لا تُنجب …
أول من فكر فيه مراد كانت عالية التي هرول لضمها وترميم ضعفها وهي ترتعش فاقدة النطق من شدة الصدمة .. ما بين الصواعق النازلة على الحشد العظيم تسللت عالية من بينهم بعد ما فارقت حضن مراد بصعوبة ووقفت أمام عبلة بثبات يعقبه جبال من الانهيار .. تكلفت الهدوء بمعجزة إلهية .. بصوت مشج متهدج :
-أنا كُنت حاسـة على فكرة ..
قوليلي مين تبقى أمي !!
- يتبع الفصل التالي اضغط على ( رواية غوي بعصيانه قلبي ) اسم الرواية