رواية سر البيت القديم الفصل التاسع 9
البارت التاسع كامل بدون لينكات
سر البيت القديم
أدهم: قصدك طليقتى يا مدام وأكبر دليل على انك حالياً شخص عادى انى قبلت اعينك عشان كفاءتك في الانترفيو وكمان الأستاذه ليلى هى ايدت على اختيارك فاتمنى ان التعامل فى المستقبل يكون من المنطلق ده اننا أشخاص اغراب ومافيش بينا أى صله
يا مدام جميله وبما أننا في لقاء عمل أتمنى اننا منشلش الألقاب
جميله حست بإحراج إنه قدر يحرجها قدام حد غريب
جميله: أكيد طبعا يا استاذ ادهم وأنا فعلاً جايه هنا عشان الشغل فقط بدليل انى قدمت زى اللى قدموا وخضعت لنفس الاختبارات
وبصت لليلى : اتشرفت بمعرفتك يا استاذه ليلى عن اذنكم
خرجت جميله من الغرفه وهى مصممه على إرجاع ادهم ليها مره اخرى وأن تجعله يسامحها
داخل المكتب عند ليلى وادهم
ليلى : مكنتش اعرف إنك متجوز
أدهم : كنت زى ماقولك ومش حابب اسمى يرتبط باسمها
ليلى : شكلها جرحكتك جامد
أدهم حب يغير الموضوع فسبق بالكلام على موضوع اختها مع انس
تستاهل بقى مراته اللى عملوا عشانها
ليلى : اه لو شفتها عارف الناس اللى ضاربين اكسجين على شعرهم وراسمين حواجبهم بألوان فلوماستر دول وكله كوم وخدودها كوم غالبا فاهمه البلاشر غلط ومفضيه العلبه على خدودها والروج بقى فواتشيح عبارة عن فوشيا فاقع
أدهم: فى رجاله بتحب الزوق ده من الستات
ليلى : زى مايكون كان بيشوف كل حاجه عكس ليل ومختارها
صدق اللى قال وللرجال في النساء مذاهب 😂😂
أدهم لا انا كده بقى جالى فضول ولازم اعرف عملتى ايه
ليلى : عملت شريره
ادهم : لأ بجد مش بهزر احكيلى
ليلى حكتله على كل اللى حصل بداية من دخولها الشقه لحد ماروحت
أدهم: طيب افرضى طلقها
ليلى: مافتكرش لانه خاف من حته انها تسبله العيال
أدهم : الناس اللى زى أنس دول لازم تبقى سابقه تفكيرهم بخطوه عشان ما يفاجئكيش بفعل مايكونش انتى عامله حسابه او خطتى ليه
ليلى : ماتقلقش كلها أسبوعين اسبوعين وهبدا الجزء التانى من الخطه
اصل انا عامله الخطه اجزاء وكل جزء ليه حلقات زى المسلسل كده
أدهم : طيب الجزء الاول وعرفناه انك عايزاه يثق فيكى و يبعد عن مراته وانك تدخلى بيته وتشوفي عيشتهم
الجزء التانى ايه
ليلى : حاليا عايزاه يصرف كل فلوسه كلها مايبقاش معاه جنيه فى جيبه
أدهم : وهتستفادى ايه بقى ماهو بيشتغل وبيقبض
ليلى : لأ بقى دى المفاجأة بتاعت الجزء الثالث
أدهم : طيب قوليها
ليلى غمزتله : لأ من حقى احتفظ بيها لنفسى زى ماتوهت سؤالى وماردتش عليه
أدهم : واحده بواحده يعني
ليلى : البادى أظلم بالعكس انا اللى عماله احكى
ادهم: مش يمكن عشان محتجانى
ليلى : مش يمكن انت كمان هتحتاجنى في المستقبل القريب
ادهم : تقصدى ايه
ليلى : لا انت فاهم وعارف ان مجيه طليقتك هنا مش عشان شغل واكيد ليها هدف تانى وده باين اوى من طريقة كلامها والثقه اللى بتتكلم بيها
ادهم : هنشوف إذا كنت هحتاجك او لأ بس نادرا لما بحتاج حد
ليلى : تمام هنشوف همشى انا بقى عشان الحق اشوف شغلى
أدهم: هتخرجى مع أنس انهارده
ليلى : أكيد امال مين اللى هيخليه يصرف 😉
خرجت ليلى من مكتب أدهم وذهبت إلى مكتبها وقامت بانهاء جميع اعمالها
انتهى اليوم وقابلت ليلى أنس فى إحدى المولات الكبيرة
أنس : ايه رايك اعزمك على الغدا او على الأقل حاجه
ليلى : منا قلتلك قبل كده مابكلش او اوشرب بره البيت وبعدين وفر فلوسك هاتلك بيها حاجه تنفعك
أنس : ماشى ياستى طيب لما احب اعزمك على حاجه اعمل ايه
ليلى : مش لازم تعزمنى ويلا بقى عشان منتاخرش عشان نلحق نشوف هتجيب ايه تحب نبدأ من البدل ولا من الكاجول ولا من الكلاسيك
أنس : كل ده
ليلى : البدل والكلاسيك دوا للشغل والسهرات والكاجول للخروجات
أنس اتحمس اوى لكلام ليلى ودخلوا المول واشترى ملابس كتيره جدا بيتى وبدل وكاجوال وكلاسيك
انس : اتارى الواحد كان ميت بالحيا
ليلى : شوفت بقى انك كنت مهمل جداً فى نفسك
أنس : عندك حق
ليلى : شربت من البن اللى اديتهولك
أنس : اه بصراحه يا ليلى بن مظبوط درجه اولى عمرى ماشربت زيه قبل كده
ليلى : أى خدمه لما يخلص هجبلك تانى انا دايما بشترى منه كميات
انتهى اليوم بين انس وليلى وليلى اطمنت ان انس عجبه البن وبيشرب منه
وصل انس البيت قابل قدامه نجوى واول ماشفها وشه قلب
نجوى : إيه شوفت عفريت
أنس : اه طالما شفتك يبقى شفت عفريت
نجوى : من امته النغمه الجديدة دى يا انس انت ناسى انا مين انا نوجه اللى جفيت عشان تتجوزها نسيت اوام
أنس : يارتنى انسى يا شيخه بصى لنفسك فى المرايه وشوفى بقيتى عامله ازاى ايه المنظر ده
نجوى : طب يا خويا ادينى فلوس وشوف هيبقى شكلى عامل ازاى
أنس : منا اديتك كتير وشكلك هو هو مافيش تغيير ايه تعمل الماشطه فى الوش العكر انا لو مشيت معاكى هيفتكروكى امى
نجوى : للدرجادى يا أنس
أنس : اه للدرجادى بصى الفرق اللى بينك وبين ليلى عامل ازاى واعملى حسابك ان انا وليلى هنتجوز
نجوى : وهى ليلى هتبص لواحد زيك ليه
أنس : اللى خلى اختها تبصلى وتحبنى ابه يمنع انها تحبنى هى كمان
نجوى : افترضت انها فعلا حبتك هتتجوزك ياترا هتفضل كده حتى لما تعرف انك انت اللى قت*لت اختها وعشان تخلص منها قفلت عليها الشقه بالمفتاح وخرجت عشان محدش ينقذها وتخلص منها
انس عروق وشه برزت لبره ومسكها من رقبتها وضغط عليها لو فتحتى السيره دى تانى هخليكى تحصليها سمعانى واللى خلانى اق*تل مره يخلينى اعملها تانى وتالت وبعدين لما عملت كده عملت كده عشان مين مش عشانك وعشان الاحق على طلباتك وجبتلك كل اللى انتى عايزاه ايه مستخسره فيا اصرف على نفسى قرشين
نجوى : طيب وانا وعيالك هتصرف علينا شايفاك مجبتلناش باكو بسكوت
أنس : مش دلوقتي كفايه اللى صرفته عليكوا سبينى اعيشلى يومين حلوين
نجوى : لكن ليلى تصرف عليها حلو وتلبس عشان خاطرها صح بس انا عايزه اعرف ايه الفرق بينها وبين اختها
أنس : عشان اريحك ليلى انا حبيتها يا نجوى وليل لو كانت سليمه ومكنتش انا حبيتك زمان قبلها كان زمانى عايش معاها انما خلاص انتى راحت عليكى وليل كمان راحت من زمان ايه المشكلة لما اتجوز بقى واحده زى ليلى أاقب معاها على وش الدنيا
نجوى : وياترا بقى هتتجوزها فين يا انس فى الشقه اللى قت*لت اختها فيها ولا هتجبها هنا
أنس : هتجوزها في المكان اللى تشاور عليه ولو حبت تعيش هنا هجبها هنا محدش ليه عندى حاجه ولاخر مره بحذرك يا نجوى سيره ليل ماتجيش تانى على لسانك لا بطيب ولا بشر عشان وقتها مش هتلومى غير نفسك سمعانى
نجوى : بس انا مش موافقه على كده وهجيب سيرتها يا انس لو متعدلتش معايا
أنس يبقى انتى وقتها اللى هتكونى جبتيه لنفسك واعملى حسابك انك كنتى شريكه معايا يا حلوه وبلاش تلعبى معايا انا بذات وغورى بقى اعمليلى فنجان قهوه من اللى ليلى حبيبه قلبى جيباهولى يلا غورى اتحركى
دخلت نجوى تعمل لانس القهوه وهى بتتوعدله من جواها
نجوى : مش انا يا انس مش انا مش اللى عملته فيها هتعمله فيا مش هسمحلك بكده أبدا
هتشوف يا انس بكره هعمل فيك ايه وابقى ورينى بقى هتعمل ايه وقتها وهتتصرف ازاى
ياترا نجوى ايه اللى ناويه تعمله وياترا ليلى هتقابل تصرفها ازاى
نجماتى الجمال الايام الوتريه هوقف النشر فيها
وكل عام وانتم الى الله اقرب
•تابع الفصل التالي "رواية سر البيت القديم" اضغط على اسم الرواية