رواية العرافة العجوز الفصل الحادي والثلاثون 31
الحلقة الحادية و الثلاثون
هند هتروح فين
فريد ملكيش دعوة .
خرج فريد سريعا وخرجت وراؤه هند وسألته تعالي هنا قولي أنت رايح فين
فريد نظر لها بتحدي ثم ذهب ودق باب زوجته الأخري سمية !!!!!
فتحت سمية الباب وفوجئت بفريد أمامها فسألته نعم يا فريد فيه حاجة
فريد هتسبيني واقف علي الباب كده
سمية معلش مش هينفع اقولك أتفضل .
فريد لكن ده بيتي مينفعش اقف أستني كده !!!
سمية وبردو مينفعش تدخل وأنا هنا لوحدي .
فريد أنا جوزك !!!
سمية ده علي الورق بس وأنت عارف كده كويس .
فريد طيب وسعي كده خليني ادخل .
سمية وأنا قولتلك مينفعش .
فريد وأنا مش هستني اخد الاذن منك .
وهم فريد بالدخول الي الشقة فخرجت سمية سريعا وقالت مش همنعك تدخل لكن انا هنزل عند ماما طول ما أنت هنا .
وقال لها لأ مش هتنزلي ادخلي جوه انا عايزك .
سمية أنت اټجننت ولا ايه !! سيب ايدي .
فربد لأ مش هسيبك يلا ادخلي ومتخليش حد يسمعنا .
سمية لأ أنت كده اكيد اټجننت الظاهر اني غلطت لما وافقت علي فكرة الجواز دي !!
خرجت الأم علي صوتهم وسألتهم فيه ايه يا ولاد
ردت هند تعالي يا ماما شوفي ابنك عايز ايه !!!!
نظر لها فريد بأستنكار وقال محدش له دخل بيني وبين مراتي !!!
سمية شايفة يا ماما !!! هو ده اللي احنا اتفقنا عليه !!!
الأم مش كده يا فريد ايه اللي انت بتعمله ده !!!
فريد فيه ايه يا أمي ! دي مراتي !!!
الأم مراتك علي الورق زي ما اتفقتوا ولو انت عايز حاجة تانية ميبقاش بالاسلوب ده !!! كده غلط !!!
فريد يعني انتوا كلوا صح وانا اللي غلط !!! طيب أنا هسيبلكم البيت كله وأمشي !!
الام أنت باين عليك اعصابك تعبانة يا فريد تعالي أقعد معايا شوية .
فريد لأ انا همشي خالص .
وتركهم فريد ونزل من المنزل واتصل بصديقه احمد المحامي وقاله انا عايزك يا احمد دلوقتي حالا .
المحامي مالك يا فريد فيه ايه
فريد عايز
أتكلم معاك شوية .
المحامي طيب تعالي المكتب نقعد ونتكلم علي راحتنا .
ذهب فريد يحمل همومه الي مكتب صديقه المحامي !!!
سأله المحامي مالك يا فريد حزين كده ليه
فريد أعصابي تعبانة أوي و حاسس اني متلخبط وافكاري كلها مشوشة !!!
المحامي ليه كده المفروض تفرح انك هتبقي أب !!! ولا أنت خاېف من المسئولية ولا خاېف علي الشقة
فريد مش موضوع الشقة !! لكن انا كنت متاكد اني عمري ما هخلف ابدا وفجأة عرفت أني هخلف !!! يا تري دي حقيقة ولا كدب واذا كان حقيقة أزاي يحصل كده والعرافة قالتلي اني عمري ما هخلف ابدا !!!!
المحامي عرافة !!! أنت بتصدق كلام الناس دي !!
فريد ايوه كل كلامها اتحقق !!!
المحامي كڈب المنجمون ولو صدفوا يا صديقي .
فريد ونعم بالله لكن دي قالت ان اخويا شريف ھيموت وهتجوز مراته وحصل وكمان أخويا اسامة ھيموت وهتجوز مراته وحصل بردو !!! وقالت ان عمري ما هخلف وفعلا كنت بتعالج علشان موضوع الخلفة ده !!!
المحامي يعني أنت دلوقتي متجوز تلاته
فريد أيوه .
المحامي يضحك ربنا معاك يا صحبي ده اللي متجوز واحدة مجنناه فما بالك باللي متجوز تلاته !!!!
فريد انا مش عارف افكر ولا أخد اي قرار !!!
المحامي خلي بالك ان تغريد مراتك لو المحكمة حكمت لها بالطلاق يبقي هتاخد الشقة بعد الولادة علشان هتبقي حاضنة للمولود !!!
فريد دي كمان مشكلة مكنتش عامل حسابها !!! هي هتعيش معانا في البيت ازاي واحنا متطلقين !! دي هتبقي حياة كلها مشاكل !!!
المحامي بلاش نسبق الأحداث دلوقتي وممكن قبل جلسة القضية الجاية نعمل محاولة تانية للصلح أو الحل الودي معاها .
فريد طيب يا أحمد شوف الصح وأعمله .
المحامي المهم دلوقتي عايزك تروق كده وافرح يا عم انك هتبقي اب وانسي كلام الخرافات والدجالين ده .
مشهد اخر
بعد خروج فريد من المنزل قالت سمية والدموع علي وجهها بعد اللي حصل ده أنا مليش مكان هنا في البيت وهرجع بيت أهلي .
الأم أوعي تعملي كده !! ده بيتك وبيت ابنك .
سمية
انتي مشوفتيش هو عمل معايا ايه !!!!
الأم معلش فريد حاسس أنه مرتبك ومش قادر يصدق أنه هيبقي اب مش قادر يصدق أن كلام العرافة اللي مسيطر علي تفكيره كله كدب في كدب !!!
سمية وأنا ذنبي ايه
الأم معلش يا حبيبتي أنا عارفه فريد كويس كل اللي عمله ده كان عايز مكان يقعد فيه بهدوء بعيد عن ضغط هند عليه .
سمية أنتي شوفتي مسكني من دراعي ازاي !!
الأم خلاص بقي حقك عليا انا .
سمية متقوليش كده يا ماما .
الأم يا بت يا سمية ده انتي بنتي اللي مخلفتهاش عارفة لو مشيتي من البيت همشي انا كمان وهروح معاكي مطرح ما تروحي .
سمية تبتسم ومازالت الدموع علي وجهها أنتي تشرفينا يا ماما .
الأم خلاص بقي أوعي تقولي كده تاني .
سمية حاضر يا ماما .
وبعد قليل دقت هند باب شقة حماتها ودخلت عندها تبكي .....
هند شوفتي يا ماما فريد عمل ايه
الأم اسكتي أنتي بالذات علشان ضغطك عليه هو سبب اللي عمله ده .
هند أنا
الأم ايوه فريد ابني لما بيتوتر مبيعرفش هو بيعمل ايه .
هند وانا مالي !! هو أنا اللي وترته !!!
الأم يا هند انتي ضغطي عليه وهو في قمة توتره !!!
خرج فريد من عند صديقه المحامي بعد ان هدأت اعصابه وفي طريق عودته شعر فريد بخطأه الفادح مع سمية وأسلوبه الھمجي معها !!!
عاد فريد الي المنزل وكانوا جميعا في شقة والدته فقال لهم كويس أوي انكم كلكوا موجودين هنا .
نظرت له سمية ثم أدارت وجهها غاضبة في الأتجاه الأخر !!!
فريد أنا أسف يا جماعة كنت متوتر ومش عارف انا بعمل ايه ولا بقول ايه .
الأم مش أنا قولتلك كده يا سوسو !!
سمية وأنا ذنبي ايه يا ماما
فريد أنا اسف يا سمية حقك عليا .
نظرت له سمية والدموع في عينيها وقالت خلاص محصلش حاجة .
هند خلاص بقي يا سمية بطلي تمثيل بقي .
سمية أنا بمثل !!
هند أيوه بلاش أفورة بقي فريد اعتذرلك وخلصنا .
سمية بعصبية أنتي مالك أنتي !!
هند
يعني ايه انتي مالك !!!
فريد خلاص بقي ارجوكوا مش عايز مشاكل بعد أذنكم أنا عندي مشكلة كبيرة ومحتاج جو هادي علشان أشوف هعمل فيها ايه .
الأم يا ابني انسي همومك وافرح بأنك هتبقي أب حتي لو كان فيه مشاكل حتي لو كانوا هيتربوا مع امهم ومش معاك لكن عيش فرحتك واتمني الخير وبأذن الله ربنا يصلح حالك وتتحل كل مشاكلك .
فريد يارب يا ماما ربنا يسمع منك .
الأم طيب خد مراتك يا فريد واطلع أرتاح .
فريد بسخرية مراتي مين فيهم
الأم قصدي هند خد هند وأطلع وأنتي يا هند بلاش كلام ومناقشات كتير علشان جوزك مشغول وربنا يعينه علي مشاكله .
هند حاضر يا ماما .
صعدت هند مع فريد لشقتهم بينما ظلت سمية مع الأم .
الأم وانتي يا سوسو عايزاكي تكلميني بصراحة .
سمية نعم يا ماما .
الأم أنتي ليه مش عايزة علاقتك بفريد جوزك تبقي علاقة طبيعية
سمية زي ما قولتلك قبل كده يا ماما أنا حبيت أسامة ومش هقدر انساه ولا اعيش مع زوج تاني أنا وافقت بس علشان أنتو قولتو أنها وصية اسامة وأن الجواز هيكون صوري بس قدام الناس .
الأم اعملي اللي انتي شايفاه صح دي حياتك وأنتي حره فيها .
مرت عدة أيام بينما فريد مازال مهموم بمشكلته مع تغريد ولا يستطيع تصديق أنه بالفعل سيصبح أب !!!
حتي اتصل به صديقه المحامي وقاله أنت عامل ايه دلوقتي يا فريد
فريد الحمد لله .
المحامي أنت كنت متوتر اوي اخر مرة كنت فيها عندي !!
فريد الحمد لله دلوقتي أحسن .
المحامي أنا حبيت افكرك بميعاد قضية الطلاق فاضلها أسبوعين !!
فريد أيوه انا فاكر الميعاد .
المحامي طيب تحب اكلم خالها علشان نحاول نصلح بينكم ولا ناوي تكمل في طريقنا القانوني
فريد كلمه انت يا أحمد أنما أنا الأفضل أني أكون بعيد دلوقتي .
المحامي ماشي يا فريد هعمل محاولة اخيرة قبل ميعاد جلسة المحكمة .
- يتبع الفصل التالي اضغط على (رواية العرافة العجوز) اسم الرواية