رواية احتواء قلب الفصل الخامس عشر 15 - بقلم عبير سليم

     

 رواية احتواء قلب الفصل الخامس عشر 15 - بقلم عبير سليم

ما أجمل أن يشعر المرء بأن الجميع حوله و أنه ليس وحده بهذا الكون يشاركونه أحزانه قبل أفراحه آلامه قبل راحته يشعر بقيمة حياته بينهم و ان وجوده يعني الكثير لهم

وها هي أصوات الضحكات النابعه من القلوب تملاء المكان بهجه وسعاده تعلن عن زوال الهموم والأحزان واحلال السعاده والأفراح

يجلس كل منهم و يرحبون بهم وبمجيئهم إليهم للتهنئه بينما هما كانا في عالم آخر فكلاهما يختلسان النظر لبعضهما بين الحين والأخر دون أن ينتبه كل منهما للثاني ودون ان يعلم كل منهما ان الاخر ينظر له فقط هي تظن وهو يظن انه من طرف واحد

فهي تشعر بالراحه بمجرد وقوع بصرها عليه ملامحه تبعث في نفسها الأمان والطمأنينه ولا تعلم انه هو الآخر يرفع عينه تجاهها وكأنه يقتبس نورا من نجوم السماء

ولكنه يخفضها سريعا خوفا من ان يكون يرتكب خطئا في حق من يحترمون وجوده بينهم ويعتبرونه واحدا منهم

ولكن ليس بيده فهو يريد أن يسعد قلبه برؤياها امامه بعد أن كان يراها من وراء القضبان

ينظر لها تاره ويسرح بخاطره تارة أخرى فقد كان هائما بها وبين الحين والآخر يشرد عنهم للتفكير بها حتى أنه كان يشعر للحظات أنهما وحدهما بهذا الكون في قلبه الكثير من الكلمات التي تحمل الكثير والكثير بداخله ولكن ليست لديه المقدرة على البوح بها او الإفصاح عنها فقط يجد نفسه ينطق بأقل الكلمات او قول مااستطاع لسانه نطقها : الف مبروك يا جنه

جنه : الله يبارك فيك

انا متشكرة على كل اللي عملته معايا و مع ماما

هادي : ليه بتقولي كده انا ربنا يعلم غلاوتكم عندي واني بعتبركم أهلى واللا انتم بتعتبروني غريب عنكم

ناديه : ماغريب الا الشيطان يا حبيبي ده ربنا يعلم غلاوتك من غلاوة جاسر ربنا يريح قلبك يا حبيبي يارب ده انت وقفتك معانا الأهل مبيقفوهاش ربنا ميحرمناش منك ابدا يا رب

هادي : حبيبتي يا طنط ربنا يديكي الصحة يارب

وفجأة تعالت ضحكات اسماء :

والله يا آلاء انتي دمك زي العسل

آلاء : ربنا يخليكي يا مامت جيلان و بيسان يارب

ناديه : آلاء دي العسل كله متشبعيش من القعده معاها بس هما البنات مش حينزلوا يعيشوا فبلدهم و اللا هما حيفضلوا علطول برة

اسماء : لا يفضلوا برة ايه هما خلاص الحمد لله قربوا يخلصوا دراستهم و حينزلوا يستقروا فمصر

فهد : هو ده فعلا اللي المفروض يحصل كمان عشان يساعدوا باباهم في الشركه و يبدءوا يتعلموا الشغل و يطبقوا اللي درسوه على أرض الواقع

يونس : أيوة طبعا ان شاء الله انا اصلا تعبت ونفسي ارتاح بقى نفسي اخد اجازة وارتاح شويه من الشغل و تعبه

هادي : ربنا يريح قلبك يا رب يا بشمهندس ويديم عليك الصحه والعافيه يارب

يونس : حبيبي يا هادي ربنا يطمن قلبي من ناحيتك يارب

ناديه : يارب هادي ابن حلال مصفي ويستاهل كل خير

فهد : هادي بس يا طنط

ناديه : لاء ازاي وانت طبعا يا حبيبي كفايه اللي عملته عشان جنه ده جميلك ده فرقبتنا العمر كله

فهد : متقوليش كده يا طنط انا معملتش حاجه وبعدين ما المجنونه دي ساعدتني كتير و كانت اوقات بتعرف تفكر

نجلاء : جن لما يركبك بقى انا مجنونه واوقات كمان بعرف افكر والله انت اللي مابتفهم حاجه انا مش عارفه مين اللي شغلك محامي يابني ده انا كنت بشتغل معاك شفقه وعطف على حالك

جاسر : لاء الصراحه انتي مجنونه يا نجلا بس احلى مجنونه في الدنيا كلها

فهد : استغفر الله العظيم ياربي

هادي : إيه متضايق ليه مش كفايه انه بيلم وراك

فهد : لا معلش هو اللي المفروض يلم نفسه مش يلم ورايا هو مش متجوز بردو هو ايه اللي احلى مجنونه دي

هادي : أعصابك يا برنس حيجرالك حاجه

نجلاء لجاسر : قلله يا جاسر عرفه قيمتي في المجتمع

جاسر : قيمتك دي كلنا عارفينها يا نجلا ومتأكدين منها

فهد : أنا شكلي حرتكب جنايه وربنا

هادي :لا وعلى ايه قلبك ابيض

جاسر : جنه حبيبتي ماتيجي معايا نعملهم قهوة

جنه : ماشي

ياخدها جاسر وهو يحتضنها من كتفها ويدخلوا المطبخ وعيون هادي عليهم

نجلاء : على الله بس بعد ما كسبت القضيه حد يعبرك ويجيلك بدل ما المكتب بينش

فهد : شايفين جر الشكل ولما اتكلم بتزعل

نجلاء : وهو انا قلت حاجه انا بتكلم عادي انت اللي خلقك ضيق وسعه شويه يا عمنا و اللا اقولك اعمله استك عشان يتمط براحته

فهد : ده انا اللي حجيب استك عشان اربطلك بيه لسانك اللي أطول منك ده

نجلاء : طب بزمتك انا بتبللى عليك هو كان في حد في المكتب غيرنا احنا و السكرتيره الغلبانه اللي انا مش عارفه هي بتعمل ايه اساسا

وعالعموم خلاص يا سيدي انا الحمد لله كلها يومين وافك الجبس واقول يافكيك وارجع على اسكندريه واريحك مني

فهد : ترجعي اسكندريه هو انتي مش حتفضلي قاعده هنا

نجلاء : اقعد فين يا عمنا دي اسكندريه وحشتني اوي وبعدين ده بابا وماما منتظرين رجوعي على أحر من الجمر

فهد : طيب ماتخليكي معانا هنا واشتغلي معايا في المكتب

ناديه : هههههههه يا ربي ده مش حيبقى مكتب ده حيبقى السيرك القومي والزباين حتطفش من عمايلكم في بعض

الكل يضحك بصوت عالي

ناديه : وبعدين نجلا ايه اللي حيقعدها هنا لوحدها

اسماء : يقعدها هنا لوحدها ازاي يا ناديه مش هي حتكون قاعده معاكم

ناديه : لا يا اسماء واحنا ايه اللي حيقعدنا هنا احنا كمان حنمشي معاها احنا كنا قاعدين هنا لما كانت جنه متجوزه لكن دلوقتي خلاص معدش في سبب لوجودنا هنا نرجع بقى شقتنا في اسكندريه ونرجع لحياتنا اللي كنا عايشينها

يخرج جاسر وجنه من المطبخ وهو شايل صينيه عليها فناجين القهوه : وسعوا بقى للقهوة اللي جنه عملتهالكم بنفسها بصوا بقى حتدوقوا احلى واطعم قهوه ممكن تشربوها فحياتكم

يقدمان القهوه للجميع وأثناء تقديم القهوه لهادي تتلامس اصابعهما فيشعر وكأنما عزفت باصابعها على أوتار قلبه يصاب برعشه أعلنت عن نسمة صيف جميله في يوم شديد الحراره فبدون قصد منها جعلت قلبه يهفو لها ويتطلع لها وهي الأخرى لم تكن بأقل منه فلقد أصابها ما أصابه من طوفان بداخلها لا تدري كيف ومتى اجتاح قلبها فيضان غمرها بينابيع ملأت حياتها سعاده بمجرد رؤياه

يجدان اعينهما تتلاقى لثوان يشعران فيها بأنه ليس في هذا الكون سواهما

تنتبه لما هي فيه : اتفضل القهوة

هادي : متشكر اوي تعبتي نفسك

جنه : مفيش تعب ولا حاجة

تجلس جنه بجوار اخيها الذي يأخذها باحضانه ويشدد من احتضانها ويقبلها من راسها : ياااه اللهم لك الحمد اخيرا فقنا من الكابوس ده

يونس : حمد الله على سلامة جنه يا جاسر

جاسر : الله يسلمك يا بشمهندس انا والله ما عارف اشكركم ازاي على كل اللي عملتوه معانا لولا وقفتكم كلكم جمبنا مش عارف كان وضعنا حيبقى ازاي دلوقتى

يونس : متقلش كده يا جاسر واللي لازم تكون متأكد منه أن وجودنا معاكم مكنش صدفه ولا جدعنه مننا بقدر ما كان ترتيب من ربنا سبحانه وتعالى ويمكن كل ده كان سبب عشان نعرف بعض بشكل اكبر وأوضح ونبقى زي عيله واحده

جاسر : وليه زي يا بشمهندس انتم فعلا بقيتوا عيلتنا واهلنا وكل ناسنا ربنا يديمكم فحياتنا يارب

يونس : طب ولو زي ما انت بتقول ينفع بردو حد يسيب اهله وعيلته ويمشي

جاسر : يمشي مش فاهم

ناديه : البشمهندس يقصد يا جاسر اننا يعني حنسيبهم و نرجع اسكندريه

جاسر : ترجعوا اسكندريه مين اللي قال كده

ناديه : أنا اللي قلت يا جاسر مش هو ده الوضع الطبيعي يابني

جاسر :الوضع الطبيعي انكم تكونوا بين الناس اللي محسيناش بالأمان غير بينهم و محسناش بالحب و الدفا غير وسطهم يا ماما

عاوزه ترجعي اسكندريه لمين هو احنا كان عندنا مين في اسكندريه ده مفيش غير خالي عبدالله اللي هو اصلا مهاجر امريكا من سنين هو وأولاده حتى ولاده اتجوزوا واستقروا هناك

يبقى انا مش عاوز اسمع عن رجوعك اسكندريه مرة تانيه انا لا يمكن حقدر اسافر غير وانا مطمن عليكم وانا مش حكون مطمن عليكي غير وانتم موجودين وسط الناس دي

يونس : ربنا يخليك ياجاسر ده شرف يابني انك تكون واثق فينا كده

جاسر : الشرف لينا احنا يا بشمهندس سبحان الله رب ضاره نافعه واذا كان اللي حصل سبب لينا الضرر لكن فوايده كانت اكتر بكتير

ناديه : خلاص ياجاسر اللي تشوفه ياحبيبي بس احنا مش عاوزين نقعد هنا اللي كان جايب الشقه دي شهاب واحنا مش عاوزين حاجه منه داهيه تاخده وتاخد اليوم اللي شفنا وشه فيه كان عامل نفسه الحمل الوديع و هو شيطان حسبي الله ونعم الوكيل فيه ربنا ينتقم منه ويجيب حق بنتي منه يارب

جاسر : خلاص ياماما اهو راح لحاله والحمد لله ان ربنا نجا جنه منه

ناديه :بعد ايه اللي منه لله مش هو السبب في كل اللي حصل لاختك ده كان مالنا احنا بالمحاكم و القواضي

جاسر :يا ماما قولي الحمد لله المهم ان جنه بيننا ووسطنا اي حاجه تانيه مش مهم

واكيد طبعا انا مش حسيبكم هنا وان شاء الله حدورلكم على شقه كويسه تنقلوا فيها بأمر الله

هادي بسرعه : العماره اللي انا ساكن فيها لسه جديده وفيها اكتر من شقه معروضه للبيع

يونس : طب ياريت والله المنطقه اللي واخد فيها هادي منطقه جميله وهاديه وكلها عائلات محترمه و العماره لسه جديده وتحفه الصراحه

جاسر : طيب تمام لو كده كلملنا المسئول عن العماره ونتفق معاه نروح نشوف المعروض عنده

هادي : لو حابين اكلمه دلوقتي

جاسر : ياريت والله

يتصل هادي على صاحب العماره ويفتح الاسبيكر

ويتكلم مع صاحب العماره اللي يرحب بمكالمته جدا ويرحب بأي حد ممكن ييجي من طرفه وان في اكتر من شقه بمساحات مختلفه وأنهم يقدروا يروحوا ويختاروا اللي يعجبهم

هادي :متشكر جدا يا حاج عبد الرحمن

عبد الرحمن :أنا اللي متشكر لوجودك معانا في العماره يا هادي يابني ده انت خيرة الناس والله كفايه ادبك واحترامك وأخلاقك العاليه ربنا يبارك فيك ويحميك لشبابك يارب

يقفل معاه السكه و يكلم جاسر : إيه رأيك يا جاسر تيجي بكرة ان شاء الله ومعاك طنط وجنه وتشوفوا الشقه

جاسر : خلاص تمام وبعد ما نتفق معاه أن شاء الله حنزل اشتري فرش للشقه و كل احتياجات ماما وجنه

ناديه : وانا ححتاج ايه يا جاسر انا معايا حاجتي يابني

جنه : وانا كمان يا جاسر شهاب بعتلي كل متعلقاتي الشخصيه ومش محتاجه حاجه تانيه احنا بس حنحتاج فرش للشقه

جاسر :احلى فرش يا حبيبتي

وبعد اذنك يا فهد بعد ما ربنا ييسر ونخلص الشقه ونفرشها وماما وجنه ينتقلوا فيها عاوزك تاخد مفاتيح الشقه وتوصلها للزفت اللي اسمه شهاب ده عشان انا مش طايق اشوف وشه

فهد : حاضر يا جاسر من عينيه

ياخذهم الحديث و يتحدثون جميعهم في عدة موضوعات حتى يوجه يونس سؤالا لجنه : وانتي يابنتي ناويه على ايه ان شاء الله

جنه : مش عارفه يا بشمهندس والله بس انا حاليا محتاجه اكون لوحدي

اسماء :ليه لوحدك يا حبيبتي احنا كلنا جمبك وحواليكي

جنه :ربنا يخليكي يا طنط بس انا تعبت اوي الفتره اللي فاتت محتاجه اعيد حساباتي في حاجات كتير اوي وجعاني هو انا ليه حصل لي كل ده وانا عمري ما عملت حاجه غلط ليه اتظلم وانا عمري ما ظلمت

هادي : وهما الأطفال الصغيرين اللي ربنا بيبتليهم بالمرض ايه الذنب اللي بيكونوا ارتكبوه

الأنبياء و الرسل الاذى اللي اتئذوه والعذ.. اب اللي اتعذبوه ايه الغلط اللي عملوه

سيدنا محمد اشرف الخلق وحبيب الله

كلهم يردوا : عليه افضل الصلاة والسلام

هادي : مين اتع.. ذ.. ب اده دول بعد ما كانوا بينادوه الصادق الأمين بقوا بيتهموه بالج.. نون والس.. حر و ده مين ده محمد اللي اسمه مكتوب على عرش الرحمن يبقى مين احنا عشان نعترض او نقول ليه ربنا ميتقالهوش ليه ياجنه ربنا ارحم بينا من الأم بوليدها

وعنيه تدمع و هو بيكمل كلامه : الأم اللي ممكن يهون عليها ضناها وترميه وقلبها ميوجعهاش

ناديه : اللي تعمل كده متبقاش ام متستاهلش انها يتقال عليها ام

وقتها هادي الدموع كانت متجمعه فعيونه وأسماء ويونس بصوا لبعض بحسرة عليه فيحاول يونس يغير الموضوع : جنه سيبك من كل ده ارمي كل اللي فات ورا ضهرك وافتحي قلبك للدنيا من تاني عارفه يا جنه انتي المفروض تعملي ايه تشتغلي يا جنه

جنه : اشتغل

يونس : أيوة طبعا انتي لازم تشتغلي

جاسر : بس جنه عمرها ما اشتغلت يا بشمهندس جنه خلصت الجامعه اتجوزت على طول ما اتعلمتش اي حاجه فمجال العمل

يونس : متعلمتش تتعلم يا جاسر جنه مفيش حاجه حتخرجها من اللي هيا فيه ولا تنسيها اللي مرت بيه غير الشغل

جنه : وانا فعلا نفسي اشتغل والله يا بشمهندس نفسي اوي اني اهلك نفسي في أي حاجه لكن حشتغل ايه وفين بعد اللي حصل وبعد ما كل الناس عرفت القضيه اللي اتهمت فيها

هادي بسرعه : معايا

يونس وأسماء يبصوا لبعضهم ويبتسموا ويكمل هادي كلامه : تشتغلي معايا فشركتي ايه رايك يا جنه

كان ينطق اسمها بعذوبه و رقه وكأنه بيتذوق حروف اسمها بشغف كان بينطقه وكأنه بيتوسل ليها انها توافق و مترفضش عيونه وهي بتكلمها فيها كلام كتير نفسه يقولله و أحاسيس كتير حاسس بيها ناحيتها

جنه وعيونها فعيونه محستش بنفسها غير وهي بتقول : موافقه اشتغل معاك يا هادي

اتنفس هادي وكأنه كان تايه ولقى الطريق

الضحكه ارتسمت على وشه وهو سعيد ان جنه حتكون معاه في العماره وفي الشغل

يمر الوقت ويمشوا كلهم على أمل اللقاء في اليوم التالي في العماره عنده يرجع هادي شقته وسعادة الدنيا كلها مالية قلبه ولأول مرة من فترة ينام وهو فرحان بالشكل ده

ييجي اليوم التالي و يشوفوا كل الشقق المتاحه للبيع ولحسن الحظ ان الشقه المناسبه ليهم تكون في نفس الدور اللي فيه هادي صحيح هما بعيد عن بعض لكن هما في دور واحد واتفقوا على كل حاجه مع صاحب العماره وجاسر دفع تمنها بالكامل لصاحب العماره وكتبها باسم جنه

واشترى فرش للشقه و بدأت جنه تفرشها هي والاء و نجلاء كانت بتساعدهم على خفيف عشان رجلها

جنه : نجلا الله يخليكي متتعبيش نفسك انا و آلاء بنعمل كل حاجه

نجلاء : ياستي وانا بعمل ايه بس مانا قاعده اهوه

جنه : يا حبيبتي يانجلا حتوحشيني اوي لما تمشي حتيجي تاني يانجلا صح

نجلاء : طب لزمتها ايه بقى الدموع دي دلوقتي

جنه : طب خليكي معايا وحياتك متمشيش يا نجلا

نجلاء : مينفعش حبيبتي لازم ارجع اسكندريه ده سبحان اللي صبر ماما و بابا

على غيابي لحد دلوقتي

جنه : وانا حتسيبيني يا نجلا

نجلاء : أنا عمري ما اقدر اسيبك ابدا يا جنه بس حعمل ايه غصب عني والله وبعدين انا الحمد لله اطمنت عليكي انتي خلاص بقيتي فأمان

جنه : طب وافقي على عرض فهد مش هو عاوزك تشتغلي معاه في المكتب متوافقي و حياتك و عمو وطنط مش حيقولوا حاجه لو عرفوا ان شغلك بقى هنا

نجلاء : انتي عاوزاني اشتغل مع المج.. نون ده يا جنه دي طايرة منه عالآخر انا مفيش حاجه كانت مصبراني عليه غير موضوعك انتي وبس لولا كده كنت طبقت فزمارة رقبته

جنه : عشان كده بس يا نوجه مش عشان حاجه تانيه

نجلاء : حاجه تانيه ايه لا طبعا لا تانيه و لا تالته

جنه : طب عيني فعينك كده

نجلاء : اهيه يا ستي شايفه ايه

جنه : شايفه انك وقعتي و بتعاندي يا صاحبتي عاوزة تهربي ليه من اول احساس تحسي بيه تجاه حد يا نجلا

نجلاء : حتى لو في جوايا حاجه يا جنه فده مينفعش و انا لازم امشي و مخليهوش، يسيطر علية اكتر من كده

جنه : ليه يا نجلاء ليه

نجلاء : عشان انتي عارفاني يا جنه عارفه صاحبتك انا مبستحملش حد يزعق في وشي مبستحملش العصبيه مبستحملش اني احس اني مش ماليه عين اللي قدامي مبستحملش إني اشوف حد بيعاملني بطريقه و بيتعامل مع اللي حوالية بطريقه تانيه خالص

جنه : بس فهد مش كده يا نجلاء

نجلاء : لأ كده يا جنه انا بشوفه بيتعامل مع الكل بأدب واحترام وييجي عندي يزعق ويتنرفز و ميقبليش كلمه

جنه : بيناغشك يا حبيبتي وبعدين مانتي كمان مبتسكتيش و بتردي عليه الكلمه عشره

نجلاء : امال اسكتله

جنه : طب و الله انا بشوفه وعيونه عليكي طب انتي عارفه وقت ما كنتي امبارح بتهزري مع جاسر كنت حساه متضايق جدا عارفه ده معناه ايه انه بيغير عليكي يا نجلا بيغير عليكي يعني بيحبك

نجلاء : لاء يا جنه لاء انا مش مقتنعه انه ممكن يكون بيحبني و هو بيتعامل معايا بالطريقه دي امال لو كان بيكرهني كان حيعمل معايا ايه

جنه : وهو لو مبيحبكيش ايه اللي حيضايقه لما يعرف انك مسافره وايه اللي يخليه يعرض عليكي تفضلي هنا وتشتغلي معاه

نجلاء : معرفش جنه انا حرجع اسكندريه يا جنه خليني امشي وارجع لشغلي و ان شاء الله ححاول اجيلك في أقرب وقت حبيبتي

……………………………………….

في المساء تنام باحضانه وتعبث باصابعها على صدره العاري و هو ينفث الدخان : حبيبي

شهاب : نعم يا ذكرى

ذكرى : هو احنا مش حنتجوز بقى

شهاب : أكيد طبعا حنتجوز بس مش وقته

ذكرى : امال وقته امتى بس احنا مع بعض بقالنا كتير وانا خلصت شهور العده من فتره

شهاب : انا عاوز افهم انتي حتعملي ايه بالجواز ماحنا مع بعض اهوه واللي بتحتاجيه بديهولك

ذكرى : أيوة بس احنا بنتقابل في السر ومحدش يعرف حاجه عن علاقتنا ببعض انا عاوزه علاقتي بيك تكون في العلن ادام الناس كلها عاوزة افتخر بيك ادام الناس واني مراة شهاب عز العرب انا بحلم باليوم اللي حنعيش فيه مع بعض و نعمل حفلات زي الحفله اللي جتلكم فيها و اتعرفت فيها عليك فاكر يا شهاب فاكر اول مره شفتني فيها و اللا ما اخدتش بالك مني

شهاب : و هو معقوله بردو حد مياخدش باله من الجمال ده كله ده لولا اللي حصل يومها و المشكله اللي عملتهالي الغبيه جنه مكنتش سبتك يومها غير لما اخد رقم تليفونك واكلمك

ذكرى : انت لسه بتحبها يا شهاب

شهاب : أنا لا خالص

ذكرى : بس انا خايفه أوي احسن تجري وراك تاني وتحاول ترجعلك خصوصا بعد ما طلعت براءه

شهاب : لاء اطمني عمر ده ما حيحصل جنه مش كده و بعدين انا لا يمكن افكر فيها تاني حرجعلها اعمل بيها ايه دي واحده غبيه يوم ما قلت خلاص حتساعدني بوظت الدنيا جنه بالنسبه لي بقت كارت محر.. وق ملوش اي لازمه

يرفع وشها ليه باصابعه : أنا محتاج كارت جديد حصان قوي العب عليه و ميخسرش يقف في ضهري مش ضدي و اللا إيه رأيك و على فكرة كمان اللي مقلتلكيش عليه انها هي وامها سابوا الشقه اللي هنا و المحامي بتاعهم جابلي المفاتيح الشركه و مشوا خلاص

ذكرى : بجد يا حبيبي

شهاب : أيوة طبعا وانا حكدب ليه

ذكرى : ومتعرفش راحوا فين

شهاب : لا معرفش يروحوا مكان ما يروحوا ده شئ ميهمنيش تلاقيهم رجعوا اسكندريه تاني

ذكرى : ياااه انا فرحانه اوي انها خلاص بعدت عنك

شهاب بقولك ايه انا لية عندك طلب بس خايفه تكسفني

شهاب : قولي وانتي وحظك

ذكرى : هو ينفع يعني اني اعيش انا في الشقه اللي كانت فيها جنه وامها دي اصل الصراحه بابا وماما خنقوني اوي وبقوا كل شويه رايحه فين وجايه منين فانا عاوزة اسيبلهم المكان كله و امشي بس مكنتش عارفه اروح فين

شهاب : عاوزة تقعدي في الشقه يا ذكرى

ذكرى : كتير علية يا شهاب اهي عالاقل حاجه تصبرني على بعادك لحد ما تحن علية و نتجوز

شهاب : وانا موافق و تقدري تقعدي فيها من بكرة و يمد ايده في الدرج اللي جمبه : و المفاتيح اهيه

ذكرى و هي بتمد ايدها عشان تاخدها : بجد ياشهاب يا حبيبي يا شهاب ربنا يخليك لية

شهاب يبعد المفاتيح عنها : مش لما تعرفي المقابل الأول

ذكرى : المقابل و هوانا كل ده و مكنتش لسه اديتك المقابل يا شهاب امال كل اللي اديتهولك ده ايه

شهاب : انتي ايديتيني جسمك لكن انا عاوز ده عقلك وذكائك اللي خلوني اتعلق بيكي محتاجهم اوي و محتاج بردو ان غيري وغيري يتعلقوا بيكي ويبقوا زي الخاتم في صوباعك وقتها مش حتاخدي الشقه دي بس لا ده انتي حتبقي حرم شهاب عز العرب و حديكي اللي عمرك ما حلمتي بيه و لا خطر على بالك

ذكرى : وانا معاك في اي حاجه بس زي ما نت شرطت علية انا كمان عندي شرط و بعد كده حعملك اي طلب تطلبه مني في الدنيا نتجوز حالا يا شهاب و دلوقتي اثبتلي حسن نيتك لية

شهاب : موافق و حنتجوز دلوقتي

ذكرى : بجد يعني اقوم البس

شهاب : وتلبسي ليه هو الجواز محتاج لبس طب ده حلاوته و احنا كده زي ما امك ولدتك

ذكرى : أنا مش فاهمه حاجه

شهاب : حتفهمي حالا

يطلع من الدرج ورقه وقلم

ذكرى : هو انت حتتجوزني عرفي يا شهاب

شهاب :وضع مؤقت لحد ما اظبط اموري

ذكرى : طب ليه فهمني

شهاب :عشان مينفعش اتجوزك رسمي دلوقتي شغلي حيبوظ انتي ناسيه انك كنتي مراة هادي اللي بدا يتعرف في السوق وان لو اتعرف اننا اتجوزنا ده حيخللي شكلي في السوق مش كويس ده غير كمان اني محتاج منك حاجه الأول نبدأ بيها الشغل قبل ما اي حد يعرف انك مراتي وبعد كده حنتجوزك رسمي يا ستي وحعملك الحفلات اللي انتي عاوزاها امال حعرفك على رجال الاعمال و ارميكي فسكتهم ازاي انتي لازم دخلتك عليهم تبقى في النور عشان يبلعوا الطعم بسرعه محدش غبي دلوقتي وأي واحده ممكن تدخل حياتهم بيقلقوا منها اوي وممكن يرفضوا كمان لكن لما تكون مراة شهاب البيبان كلها حتتفتح لك و هما اللي حيتمنوا الرضا يا باشا بس على الله بقى اعرف استنفع منك حاجه

ذكرى :وانا قلتلك حاضر حعملك اللي انت عاوزه و زياده كمان بس نتجوز رسمي بلاش عرفي ده و بعدين فين الشهود مش العرفي ده بيكون فيه شهود ايه حتة الورقه دي انا عاوزة افهم

شهاب: مش لازم تفهمي يا ذكرى وهو ده إللي عندي ومعنديش كلام غيره واحمدي ربنا اني وافقت اصلا اتجوزك وقلتلك حعملك اللي يريحك لكن الظاهر انك غب. يه اوي ومش عاوزه تفهمي ووش فقر بقولك ايه ماتعطلنيش عاوزة تمضي وتاخدي الشقه وتنفذي كل طلباتي ماشي عاوزه ترفضي ارفضي براحتك في غيرك الف يتمنوا يبقوا فمكانك ده دلوقتي وانتي شفتي اهوه مراتي اللي كانت ست الستات انا بعتها فلحظه وولا همني انا محدش بيكسر عيني و لا بيدوسلي على طرف يا ذكرى وصدقيني انتي اللي حتخسري مش انا هاه قلتي ايه

حتمضي واللا تقومي توريني جمال خطوتك

ذكرى : بسهوله كده تستغنى عني يا شهاب

شهاب : ذكرى انا مبحبش الكلام الكتير انا قلت اللي عندي والكورة فملعبك دلوقتي قلتي ايه

ذكرى : قلت حاضر حمضي ياشهاب حمضي

• يتبع الفصل التالي اضغط على ( رواية احتواء قلب ) اسم الرواية