رواية احتواء قلب الفصل السادس عشر 16 - بقلم عبير سليم
بعد مرور عدة أيام يجتمعون جميعهم على مائدة الطعام ويتحدثون : الشقه بقت تحفه يا جنه
جنه : بفضل نجلا يا طنط والله هي اللي حطت لمساتها الأخيرة وخلتها بالجمال ده
فهد : نجلاء معقوله دي
نجلاء وهي ترفع 🔪 في وجهه : ومش معقوله ليه أن شاء الله منفعش واللا منفعش
فهد وهو يبعد وجهه : لا تنفعي وتنفعي اوي كمان بهزر يخرببيتك ويخرببيت معرفتك السوده
نجلاء وهي تق.. طع اللحم وتنظر له وتغير نبرة صوتها : آه بحسب
فهد : يااما
يضحكوا كلهم ضحكات نابعه من القلب
ناديه وهي تضحك : إيه يا ولاد مالكم انتوا على طول ناقر ونقير كده
اسماء : مش المثل بيقول القط مبيحبش غير خن”” اقه
نجلاء : خلاص الحمد لله اديني مسافره بعد يومين وحريحه مني يبقى يشوف مين بقى اللي حيعللي صوته
فهد وهو بيسيب المعلقه من ايده : انتي حتسافري بجد
جنه والدموع بتجري فعنيها : أيوة يا فهد نجلاء حتسافر خلاص وحتسيبني
تاخدها نجلاء فحضنها و جنه بتعيط جامد كأنها طفل صغير بيبكي فحضن أمه اللي حتسيبه و تمشي : كده بردو يا جنه هو احنا مش اتكلمنا وفهمتك
حبيبتي مينفعش والله أفضل هنا لازم ارجع ياروحي وانا والله حجيلك يا حبيبتي
وقتها هادي قلبه وجعه اوي على جنه وهو شايفها بتبكي بالشكل ده كان نفسه يمسح دموعها بايده نفسه يقولها انا اهوه معاكي وجمبك وعمري ما حسيبك لحظه انتي فعيوني ياجنه
جنه : المشوار بعيد يا نجلاء ومتقنعنيش انك حتعرفي تيجي
نجلاء : وانتي مش عارفه صاحبتك يعني انا مفيش حاجه تمنعني عن أي شئ انا عاوزه اعمله
اطمني بقى والله حاجي مش عاوزة اشوف دموعك دي تاني عشان مزعلش بقى
فهد متضايق ان نجلاء خلاص ماشيه لكن هو مش عارف يقول ايه ساب الأكل وقال انه شبع وكلهم قاموا من عالأكل
وقعدوا مع بعض و هو تايه مش عارف هو ليه زعلان اوي كده وليه بيغير عليها لما بتضحك مع جاسر يبصلها كل شويه ويركز معاها ويبص لعيونها اللي بتلمع من الشقاوة ويسأل نفسه معقوله اكون بحب المجنونه دي واللا عشان اتعودت عليها وعلى جنانها متضايق انها حتمشي و مش حيشوفها وانه هو كده خلاص فعلا مش حيشوفها تاني متضايق لكن ساكت مبيعملش حاجه
يونس : وانت حتسافر امتى ياجاسر
جاسر : بعد يومين ان شاء الله يا بشمهندس
يونس : طب مالك انت حتعيط انت كمان واللا ايه
جاسر : مش هاين علية ولا قلبي مطاوعني اني اسافر واسيب ماما وجنه هنا
ناديه : تاني يا جاسر مش احنا اتكلمنا في الموضوع ده قبل كده وانا قلتلك لاء يا حبيبي
جاسر : طب عشان خاطري ياماما وحياتي عندك تعالي معايا انتي وجنه احنا لسه فيها وانا اقدر اعملكم إجراءات السفر بسرعه ونسافر كلنا سوى وتعيشوا معايا انا وولادي ونتلم كلنا سوى واذا كان عالشقه دي حنقفلها مفيش مشكله هاه يا أمي ريحي قلبي الله يخليكي
ناديه : ريح قلبي انت يا جاسر وسبني اعيش اللي فاضلي جمب ابوك الله يرحمه انا بيني وبينه ساعتين زمن حقدر اروح له و اقعد اتكلم معاه واقراله الفاتحه كل ما اعوز لكن لو رحت معاك حبل الود اللي بيننا حينقطع نفسي ادفن جمبه يا جاسر انا خلاص يا حبيبي مش عاوزة حاجه من الدنيا اكتر من اللي اخدته وانت كلمتني في الموضوع ده كتير وانا قلتلك
جنه : اطمن علينا يا جاسر احنا حنبقى كويسين وبعدين مش انت بنفسك اللي قلتلنا نفضل هنا بين الناس اللي بتحبنا
جاسر : وانا قلت كده ليه مش من بعد تعبي في اقناعكم انكم تسافروا معايا فلما لقيت خلاص مفيش فايده وعرفت انكم كمان عاوزين ترجعوا اسكندريه قلت لاء خليكم هنا احسن لكن الأحسن من كل ده اننا نبقى مع بعض صح واللا انا غلطان يا جماعه
انا والله العظيم عارف مشاعركم ناحيتهم وعارف انهم وسط ناس بالنسبه لنا اكتر من الأهل لكن انا مش قادر والله اه طاوعتهم في اللي هما عاوزينه بس دلوقتى مش قادر ولا هاين علية امشي من غيرهم
يونس :جاسر يابني انا والله مقدر كل كلمه بتقولها و كل يوم بتكبر فعنيه اكتر من اليوم اللي قبله لكن انا عاوزك تطمن عليهم بيننا والله حيكونوا بخير وبعدين هو النت خللى حاجه بعيده ياسيدي كلمهم كل يوم فيديو واطمن عليهم وبعدين هو انتوا مش عندكم إجازات كل اجازة هات مراتك وولادك وانزلوا قضوها هنا فبلدهم عشان ولادك يعرفوا بلدهم يابني يعرفوا انهم ولاد الأرض دي ومهما بعدوا لازم يرجعوا لبلدهم
كلهم يتكلموا معاه لحد ما يهدى ويرضخ للأمر الواقع و يمر اليومين وجاسر يستعد للسفر ويسلم عليهم كلهم و يرحل وقلبه مش مطاوعه ولكن مفيش بايده حاجه ويصر هادي انه يوصله وفي الطريق للمطار يتكلموا سوا : هادي انا عاوزك تحاول على اد ما تقدر تلطف الجو بين فهد ونجلاء وتقرب بينهم الاتنين كويسين و يستاهلوا بعض وانا والله مستخسرهم يبعدوا عن بعض وكل واحد فيهم يمشي فطريق غير التاني
هادي : انت بتقول ايه يا جاسر هو انت حاسس باللي انا حاسس بيه من ناحيتهم لبعض
جاسر : ايوة طبعا يا هادي ده صاحبك مفضوح اوي
هادي : هههههه
جاسر : بس دمه خفيف وعسل تصدق اني بحب اشوف مشاكستهم لبعض والله بستمتع بيها بحس اني بتفرج على توم وجيري
وانا بتعمد اتكلم مع نجلاء براحتي عشان استمتع بغيرته اللي بتكون واضحه اوي عليه ده انا اوقات بخاف يقوم يمسك فية وربنا
هادي : ومع كل ده مش عاوز يعترف انه بيحبها ولا هي فاهمه انه بيحبها هي فاكره انه عاوز يضايقها وخلاص
جاسر : المشكله يا هادي اني زي ما حكتلك وقلتلك قبل كده نجلاء لما رفضتني زمان مكنش عشان مبتحبنيش او كارهاني لكن تقريبا لنفس اسباب تعامل فهد معاها او شئ قريب منها لأني والله لا عمري استفزيتها وجيت ناحيتها انا كنت بزعق بس صوتي دايما كان عالي
حاول تفهمه يا هادي انه كده مش حيكسبها لأنها للأسف مش فاهمه هيا كمان انه بيناغشها وبيحب يشوفها وهيا متعصبه و متنرفزة لكن هيا بتفكر فيها بشكل تاني خالص
هادي : للدرجه دي انت فاهمها يا جاسر
جاسر : طبعا يا هادي نجلا متربيه فبيتنا مع جنه طول عمرهم صحاب صحيح هما بيتهم كان في بحري لكن مدرستهم كانت في الشارع اللي ورانا وهما كانوا اخدين شقه جمبنا وكانوا طول شهور الدراسه قاعدين فيها بيروحوا بحري في الاجازة بس و جنه بقى كانت بتروحلها على طول في الصيف ويقعدوا طول اليوم عالبحر عارفها وعارف أخلاقها وأهلها كويس اوي امال انا فكرت فيها ليه ما عشان انا عارف مين نجلاء واخلاقها ايه لكن انا بعصبيتي و صوتي العالي خسرتها و مش عاوز فهد يخسرها هو كمان اتمنى اني اسمع عنهم كل خير واعرف انهم بقوا مع بعض صدقني حفرح عشانهم اوي
هادي : اوعدك والله يا جاسر ان شاء الله ححاول معاهم ويارب خير
يوصلوا المطار وجاسر يأمنه على مامته وجنه ويحضنوا بعض ويدخل جاسر وهادي يرجع
وبعدها بيومين تكون نجلاء حضرت شنطها وجه باباها من اسكندريه وتسلم عليهم وتمشي مع باباها
ومن هنا يبدأ كل واحد فيهم رحلة حياته نجلاء ترجع شغلها وجنه يتفق معاها هادي انها حتكون سكرتيره ليه وتبدأ شغلها معاه وتكلم نجلاء كل يوم تديها التقرير
وفهد يرجع عمله ويونس مهتم بشركته و اسماء وناديه تقريبا معظم الوقت بيقضوه سوا وبعد ما ناديه بدأت تمشي بشكل أفضل بكتير بقت اسماء تاخدها ويقعدوا في النادي اوقات كتير
اما بقى احساس هادي بدخوله الشركه كل يوم وهو عارف ان جنه في انتظاره مسبب له سعاده لا توصف بيبقى طاير وهو رايح الشركه وعارف انها سبقته ووصلت قبله عشان تجهز الأوراق وترجم الفاكسات وتستعد لاستقباله وكانت سعادتها بانتظاره متقلش عنه لحظه لكن هي خايفه مش عاوزة تخوض تجربه و هي لسه خارجه من تجربه فاشله فنفس الوقت خايفه ميكونش جواه ليها غير احساس بالشفقه او المسئوليه تجاهها وان الاحساس اللي اتولد جواها من طرف واحد فكانت بتحاول دايما تسيطر على مشاعرها قدامه وتتعامل معاه بشكل طبيعي
هي وهمسه العلاقه بينهم كانت حلوة جدا اما ميار مكانتش طايقه وجود جنه في المكان ودايما بتحاول تضايقها بكل الطرق : ممكن ادخل لأستاذ هادي واللا سيادتك عندك مشكله
جنه : استغفر الله العظيم ياربي استاذ هادي لسه موصلش ممكن تسيبي الأوراق هنا ولما ييجي انا ادخلهاله
ميار : لا ياحبيبتي انا اللي لازم ادخلله الأوراق بنفسي مش حد تاني
جنه :خلاص يبقى تقدري تروحي تشوفي شغلك وتعدي علينا كمان شويه
ميار بصوت عال : ايه اعدي عليكي دي ان شاء الله هو انا بشحت منك و اللا إيه
ييجي هادي على الصوت :في إيه ممكن افهم ايه اللي بيحصل بالظبط
ميار بد.. موع التماثيل: في ان حضرتها بتتعامل معايا و كأني شغاله عندها يرضيك كده يا استاذ هادي ينفع اني اتهان بالشكل ده وانا موظفه زيي زيها و شغاله من قبلها ولية وضعي في الشركه
هادي : ميار مدام جنه مبتتعاملش مع حد بأسلوب مش كويس وده شئ انا متاكد منه
ميار :يعني انا بكدب يا استاذ هادي
هادي : مقلتش انك بتكدبي لكن جايز اوي تكوني فهمتي كلامها غلط او فسرتيه بطريقه تانيه فمن فضلك صوت عالي تاني عندي مسمعش واللا حيكون رد فعلي مش كويس
ميار : حاضر يا استاذ هادي طب بعد اذنك كنت عاوزة حضرتك تمضيلي على الأوراق دي
هادي : اتفضلي قدامي
يرجع بعينه لجنه اللي كانت خايفه يكون هادي زعل منها لكن هو يبتسم لها ابتسامه هاديه جميله : ولايهمك كملي شغلك يا جنه
جنه بابتسامه هاديه : حاضر
في مكتبه
يمضي الأوراق وهي واقفه ادامه عاوزة تتكلم معاه في اي حاجه واي كلام تقرب بيه منه : عامل ايه يا استاذ هادي.
هادي : بخير الحمد لله
ميار : بس انا قلقانه عليك اوي
هادي : قلقانه علية انا ليه
ميار : من اي حد ممكن يضايقك او يزعلك
هادي : اتفضلي الأوراق اهيه تقدري تتفضلي تكملي شغلك
ميار : طب ايه رايك نتغدى سوا بعد الشغل انا نفسي اتكلم معاك في حاجات كتير اوي عاوزة اقولهالك
هادي : بخصوص ايه يا ميار لو بخصوص الشغل اتفضلي اتكلمي انا سامعك
ميار : لا مش بخصوص الشغل خالص دي بخصوص حياتنا الشخصيه في حاجات كتيرة عاوز اخد رايك فيها لاني مش بثق في حد ولا برتاح لحد غيرك
هادي : بعتذرلك يا ميار انا للأسف معنديش وقت خالص انتي لو في حاجه ممكن تتكلمي مع مامتك او حد قريب منك ودلوقتي معلش عندي شغل وكده انتي معطلاني
ميار :اسفه لحضرتك
تخرج من المكتب وهي بتنفخ من الغيظ تلاقي جنه بتتكلم مع همسه وبيضحكوا سوا فتضايق اكتر و تيصلهم بغيظ همسه وهي بتبص ناحيتها : يا باي مبقبلهاش
جنه : هي مالها دي حساها شايفه نفسها اوي
همسه : هي كده طول عمرها فاكرة نفسها فوق الكل وهي اصلا انسانه تافهه فاضيه و لا عندها هدف في الحياه
المهم سيبك انتي لفة الطرحه دي حلوه اوي عليكي حتاكل منك حته
جنه : بجد ده انا قلت اجربها وكنت خايفه متكنش حلوة علية او متلقش على وشي
همسه: هو ايه ده اللي ميلقش عليكي ده انتي اي لفة حجاب تليق عليكي يا جوجو
جنه : متعرفيش فرحتي أد إيه وانا لابسه الحجاب حسه اني كنت عريانه وربنا سترني
همسه : ربنا يسترنا جميعا يارب وبعدين ده انتي كأنك لابسه الحجاب من زمان كل يوم بشوفك لفاها بطريقه احلى من اليوم اللي قبله بتفنني فيها
جنه :مانا طول عمري كنت افضل واقفه ادام المرايا بالساعات وأفضل اتخيل نفسي بلفات كتير وكنت بصور نفسي وانا لابساها اصل الحاجه لما تكوني بتحبيها بتحاولي تخليها احسن ما يكون لحد ما الحمد لله لبستها اخيرا
همسه :هو احلى حاجه فحجابك كمان انه بسيط مش مبهرج حتى الوانه جميله راقيه هاديه ورقيقه زيك انا الصراحه مش بعرف ألفها حلو اوي كده زيك
جنه : ده انتي قمر يا همسه
همسه : حبيبتي ربنا يخليكي تعرفي ان في بنات هنا في الشركه قرروا يتحجبوا من جمال لفة الطرح عليكي
جنه :بجد مش معقوله
همسه : آه والله
يخرج لهم هادي : ياسلام يا سلام انا قاعد مستني الاستاذه وهي بترغي هنا حضرتها
همسه :معلش والله يااستاذ هادي انا اسفه بجد بس اصل الكلام مع جنه ميتشبعش منه
هادي : خلاص ياستي ابقوا اتكلموا مع بعض بعد ما اليوم يخلص عندكم بقية اليوم كله اتكلموا فيه مع بعض براحتكم وعيشوا حياتكم سوا
همسه :صح معاك حق وقت الشغل شغل ووقت الراحه راحه صح الكلام يا جوجو
جنه :صح يا هموسه
تدخل معاه المكتب يسالها هادي عن أخبارها : أنا بخير الحمد لله و الله يا ابيه
هادي : وتيته عامله ايه وصحتها عامله ايه دلوقتي
همسه :ماشيه عالعلاج والحمد لله بتتحسن
هادي : مالك ياهمسه في حاجه
همسه : مفيش ياابيه
هادي: لاء فيه يا همسه واللا حتخبي على ابيه هادي
همسه : اهئ اهئ اهئ
هادي : في ايه يا همسه حصل ايه اتكلمي
همسه وهي بتمسح د. موعها :عمرو
هادي : عمرو بتاعنا
همسه: ايوة
هادي : ماله عمرو يا همسه
همسه : بيحبني
هادي: بجد وانتي يا همسه بتحبيه
همسه : بحبه اوي من اول يوم شفته فيه وانا قلبي اتعلق بيه ومصدقت انه هو كمان حبني واعترفلي بحبه
هادي : بعدين طيب حصل ايه خلتك تعيطي كده انخانقتوا مثلا
همسه : لاء هو أصله عاوز يتقدملي.
هادي : بجد طب الف مبروك تقومي تعيطي بردو يا همسه
همسه :حيتقدم لمين عشان يطلبني انا مش عاوزاه يتقدم لبابا ولا عاوزه ادخلهم حياتي تاني انا مش عاوزة اشوف وشهم تاني ياابيه ومش عارفه اعمل ايه
هادي :بصي حبيبتي اولا الف الف مبروك يا ست البنات وثانيا بقى الأصول محدش يقدر يتعداها يا همسه ومهما كان اللي حصل الا انهم في الاول وفالاخر اهلك ولازم يكونوا معاكي مينفعش ياحبيبتي
ده انتي ست العاقلين لازم يتقدموا لباباكي ومامتك يا همسه وبعدبن اطمني هما حيشرفوكي انا عارف هما ازاي بيقنعوا اللي قدامهم بيهم كويس و يضحك بسخريه ضحكه تفهم همسه مغزاها و انهم عباقره في التمثيل
ويكمل كلامه وعاوزك تطمني انا معاكي و مش حسيبك و لو احتاجتيني في اي وقت حكون جمبك بس و هما مش موجودين واعتبري جهازك كله علية
همسه: لا ربنا يخليك تيته عملالي شهادة استثمار في البنك حتجهزني منها
هادي :تيته تعملك اللي هيا عاوزاه لكن انتي اختي الصغيره يا همسه ومحدش حيجهزك غيري افرحي يا همسه عاوزك تفرحي من قلبك وان شاء الله تعيشي احلى حياة مع عمرو عمرو طيب وابن حلال ويستاهل كل خير
تخرج همسه من عنده وقلبها مرتاح لحد ما وتقرر انها تتصل على عمرو عشان تشوف حيعملوا ايه
اما جنه فتاخد فاكسات ترجمتها وتدخل ليه وتقدمهاله : برافو يا جنه برافو عليكي
مبسوطه معانا يا جنه
جنه : اوي اوي فوق ما تتخيل اول مره احس اني بعمل حاجه ليها حلوة ولها قيمه
هادي : انتي وجودك حياتنا احلى حاجه يا جنه
تحس جنه بالخجل ووشها يحمر وهو يحس انه استعجل بكلامه ده : على فكرة الحجاب عليكي حلو اوي ما شاء الله ربنا يثبتك يارب
جنه : ربنا يخليك دي كانت اعز امنيه لقلبي والحمد لله ان ربنا حققهالي
عن اذنك
هادي : اتفضلي يا جنه
تخرج جنه وهو قلبه حيخرج من مكانه من كتر لهفته عليها وهيا واقفه ادامه وبعد انتهاء عملها تخرج وتركب عربيتها و تروح اما هو فيكمل شغله لحد ما الوقت يجري بيه يخرج من الشركه ويسلم عالأمن : عامل ايه يا محمد
محمد : الحمد لله بخير والله يا باشا
هادي : والنونو الصغير عامل ايه
محمد : زي الفل والله عقبال ما ربنا يديك يارب
هادي : يارب يا محمد خد يامحمد
محمد : لا ياباشا ده كتير ده كفايه اللي عملته معانا وقت مراتي ماكانت بتولد ده لولا وقفتك معانا كان زمانها هي وهادي راحوا مني
هادي : الف بعد الشر عنهم ربنا يخليهملك وبعدين ده كفايه انه على اسمي
محمد :ده شرف لينا والله ياباشا
هادي :طب امسك بقى ومتتعبنيش هاتله اللي محتاجه
محمد: من يد ما نعدمها ربنا يديك مايحرمك ابدا يارب ربنا يعللي مراتبك كمان وكمان ويزيدك من نعيمه يارب
يلاقي نفسه زهقان مش عاوز يروح يقرر يروح لفهد مكتبه يدخل العماره ويسمع صوت اغاني يطلب الاسانسير ويركبه
يفتح باب الاسانسير ويتجه إلى مكتبه وأصوات الاغاني عاليه في المكان فيعرف انه من مكتب فهد يتعجب يدفع الباب الزجاجي ويسمع الاغنيه : من بحري وبنحبوه عالقمه بنستنوه شبك الجمالات وشبكني و ازاي نقدروا ننسوه من بحري و بنحبوه ايوه ايوووووه
سلمت عليه بالايد والعين بصيت للعين صدفة ومن غير مواعيد
زادوا العشاق اتنين شغلتنا عينيه من نظرتها يا خوفي عليه
من حلاوتها لا يروح مني وياخدوه و الفكر ف حبه يتوه
شب الجملات وشابكني وازاي نقدروا ننسوه
من بحري وبنحبوه ايوووووووووووه ايووووووووووه
يلاقي بسمه قاعده فيسلم عليها : مساء الخير يا بسمه
بسمه : مساء النور يا استاذ هادي
هادي : هو في ايه يا بسمه ده مين اللي مشغل فيلم رصيف نمرة خمسه ده
بسمه : و غلاوتك ما هو فيلم يا استاذ هادي ولا اهو تمثيل لا ده بجد وبحق وحقيقي
هادي : مالك يا بسمه في ايه
بسمه : أنا اللي فية واللا صاحبك اللي فيه يا استاذ هادي ده حيجنني اقسم بالله
هادي : ههههههه ليه بس يا بسومه
بسمه : يالهوي الصوت ده كله ومش سامع
هادي : ازاي مش سامع ده انا من دخلة العماره وانا بقول مين اللي رجع لزمن الفن الجميل ده بيسمع هدى سلطان وبعدين قلت يمكن حد مشغل روتانا زمان بيسمع الفيلم
بسمه : ده صاحبك يا استاذ هادي هو اللي عايشلنا فجو روتانا زمان ومن وقت ما جه وهو شغال على اغاني اسكندريه كلها ماسابش اغنيه عن اسكندريه اللا وشغلها بس كله كوم و من بحري و بنحبوه دي كوم تاني تخلص يعيدها لما طهقني
وياريتها جت على كده اللا زي ما حضرتك سامع الصوت ضارب في العماره كلها تقولش فاتحين قهوه عالكورنيش و بنوزع الشيشه على الزباين وواحده بتلف عليهم وتقوللهم منورين يامعلمين اي خدمه يا بهوات تشرب ازوزة يا برنس و اللا احطلك حجرين شيشه
هادي : هههههه هههههه
بسمه : يااستاذ هادي دي الجاره اللي في الوش جت قالت هو في ايه وايه اللي بيحصل ده مكتب محامي ده و اللا متعهد أفراح وادخل اقولله يقوللي ده مكتبي وانا حر واللي مش عاجبه يعمل اللي هو عاوزه
ده من شويه جه زبون واول ما سمع فرقة حسب الله دي قاللي انا جيت عنوان غلط وطلع جري معذور وربنا والمص.. يبه انه ولا على باله لا ده حيشللني وربنا ادخل شوفه الله يخليك يا استاذ هادي شوف حكايته إيه ده فضحنا في العماره
لو نفسه يروح البحر ياخدله غطسين
وديه يمكن اعصابه تهدى ويرتاح ويريحنا
هادي : هههههه هههههه طب بس اهدي خلاص انا داخلله
يفتح عليه هادي الباب يلاقيه ممدد رجله عالكنبه ومشغل جمبه اللاب وعمال يغني
هادي : مااحنا قلنا كده قلتوا اطلعوا من البلد
فهد : هادي
هادي : أيوة هادي يا فالح من بحري و بنحبوه مش كده ما هي فعلا من بحري و لما بتحبوه سبتوه ليه يا ذكي و بعدين فين القمه دي اللي بتستنوه عندها انا عاوز افهم
يقفل فهد اللاب ويقعد ادام هادي : في إيه يا عمنا مالك داخل علية حامي كده ليه
هادي : انت اللي مالك يا صاحبي ايه جو القهاوي اللي انت عايش فيه ده طب كان لازمته ايه ده كله ما كنا فيها
فهد : مش عارف يا هادي مش عارف
هادي : هو ايه اللي مش عارف يا فهد كل الفرح اللي انت قارف بيه المنطقه كلها ده و مش عارف امال لو عارف كنت عملت ايه
ولما هيا وحشتك اوي كده سبتها تمشي ليه و كنت بتغتت عليها كل شويه ليه عاوز افهم
فهد : من ناحية وحشتني فهي فعلا وحشتني اوي ياهادي كل حاجه فيها وحشاني جنانها و هبلها و عبطها و ضحكتها اللي تجيب بوليس الآداب وحشني حبها لصاحبتها و جدعنتها و أخلاقها وحشني الخناق معاها وحشتني وحشتني اوي ياهادي بت الايه دي كل ركن في المكتب ده بيفكرني بخناقه من خناقتها حتى السلمه المكسورة اللي اتزحلقت عليها ورجلها انكسرت كل ما اشوفها افتكر اللي حصل يومها
هادي : ما هو الخناق معاها ده هو اللي طفشها منك ياما قلتلك خف عليها شويه قلتك هيا رفضت جاسر اخو جنه ليه قلتلك البنت كويسه متضيعهاش من ايدك اتمسك بيها و بوجودها فحيانك قلتلي لا مفيش حاجه انت بيتهيالك انا مبحبهاش ده انت مش بتحبها ده انت واقع لشوشتك يا باشا
فهد : مكنتش عاوز اقنع نفسي اني بحبها اوي كده
وبعدين انا والله ما كنت اقصد انا كنت ببقى عاوز اناغشها اهزر معاها كانت بتبقى قمر اوي يخرببيتها. وهي متعصبه يالهوي على عسلها و خفة دمها لا انا حتجنن يا صاحبي مش قادر انا لازم اروحلها اسكندريه
هادي : روح وخلصنا الله يهديك يا صاحبي
……………………….
يسهر في احد الأماكن مع رفاقه فيجد هاتفه يعلن عن اتصال فيفتح الخط : الو مين معايا
_خمن كده وفكر انا مين
_معلش مش مركز والله
_معقوله بردو نسيت صوتي امال لو مكنتش بتحبني وكنت عاوز تتجوزني
_عالعموم حسهلهالك انا ذكرى يا عدي
عدي : مين ذكرى لا مش معقول
ذكرى : ومش معقوله ليه
عدي : اصلك عمرك ما عملتيها ولا اتصلتي بية قبل كده
ذكرى : أنا محتاجاك اوي يا عدي وعارفه انك بتحبني ومش حيهون عليك تعرف اني محتاجالك و تتخللى عني
عدي : وانا عيوني ليكي يا ذكرى
- يتبع الفصل التالي اضغط على ( رواية احتواء قلب ) اسم الرواية