رواية احتواء قلب الفصل الحادي و العشرون 21 - بقلم عبير سليم

     

 رواية احتواء قلب الفصل الحادي و العشرون 21 - بقلم عبير سليم

مايهمناش اسمك واهلك موطنك

مايهمناش

مايهمناش مادام خطاوى الناس مصاحبة خطوتك

ما يهمناش

طول ما القلوب الصدق جواها

طول ما العيون الطيبة ساكناها

وطول ما نور الخير فى قلبك ما انتهاش

ما يهمناش

قوللى انت مين

قوللى فعلك

اصل فعلك هو اسمك

هو اصلك هو فصلك

مستحيل ابدا يفارقك

مستحيل ابدا يضلك

اللى عاش للناس

والخير سكته هو اللى عاش

مايهمناش انت ابن مين

ولا فين مكانك فى السنين

وكفاية انك حضن واسع

ضم كل المحتاجين

انسان حقيقى غير كده مايهمناش

يالها من سعاده و فرحه غامرة احتلت قلوب الجميع جعلت الضحكات تخرج من افواههم و كأنها تعزف أعذب الألحان

البيت منور يا حبيبتي

جنه بفرحه : منور بيكم يا ماما

يبصوا كلهم لبعض ومبسوطين من كلمة ماما

مرزوقه : ماما الله الكلمه طالعه من بؤك زي السكر يا جنه

جنه : حضرتك مامت هادي تبقي مامتي انا كمان

مرزوقه : يا حبيبتي يا جنه ربنا يهنيكم و يفرح قلوبكم يا بنتي يارب

تلاقي رقيه بتحط ادامها الحلويات والفواكه : ميرسي يا رقيه ربنا يخليكي يارب بس متتعبيش نفسك عشان خاطري

فاطمه : متتعبش نفسها ده ايه ده احنا النهارده عندنا عيد ده انتي حبيبة الغالي

ده الود ودي اقوم ازغرد

خديجه : والود ودك ليه ازغرد انا يا ماما لوووووولي لوووووولي

هو احنا في ديك الساعه لما هادي يجيلنا وفي ايده حبيبة قلبه اللي حتنور دنيته

تبص جنه لهادي و الضحكه ماليه وشها : معلش انا جيتلكم فجأة كده بس بصراحه من كتر كلام هادي عنكم خلاني نفسي اشوفكم اوي

مسعد : القلوب عند بعضها و الله يا بنتي احنا كمان كان نفسنا نشوفك اوي من كتر ما هادي مكنش في على لسانه غير جنه جنه

جنه : ميرسي يا اونكل ربنا يخليك

تمد جنه ايدها لابن خديجه : انت هادي صح

خديجه : أيوة هادي معنديش أغلى منه عشان اسمي ابني على اسمه

تمد له ايدها فيمشي ناحيتها و تشيله جنه و تحضنه و تبوسه : أمور اوي ما شاء الله ربنا يخليهولك يارب

خديجه : يارب و عقبال ما نفرح بيكم و نشوف ولادكم يارب

مرزوقه : ياااه ده يوم السعد و الهنا لما اشيل ولاد هادي على أيدي

خديجه : ياااه وابقى انا عمتو خديجه

فاطمه : هو انتي بس اللي حتبقي عمة و اللا إيه يا ست خديجه مانا كمان واختك رقيه

هادي وجنه : ههههههه

و يبصوا لبعض و يبتسموا

تقعد جنه تلاعب هادي الصغير و تضحك مع ولاد فاطمه و رقيه و هادي مبسوط باندماجها معاهم و البنات بيبصوا لبعض و فرحانين اوي بأنها بتتعامل مع ولادهم بالتواضع ده

و بعد شويه تدخل رقيه و فاطمه المطبخ و يخرجوا بالأكل و يحطوه عالسفره : ياللا يا جنه يا حبيبتي

جنه : لاء انا مش حقدر و الله انا لازم امشي انا اتاخرت اوي على ماما

مسعد : انتي مش عاوزة تاكلي معانا و اللا إيه

جنه : لا و الله يا اونكل بس

مسعد : مفيش بس و لا حاجه ياللا قومي

جنه تبص لهادي اللي يقوللها : أنا مليش دعوة هنا اللي يدخل لازم ياكل معندهمش تفاهم ده فهد مبيجيش هنا غير عشان ياكل

جنه : هو فهد بييجي هنا

هادي : قصدك مقيم هنا

جنه : هههههه فهد ده ملوش حل

مرزوقه : فهد ده عسل شربات مكرر

جنه لهادي : ياريت اونكل صلاح يسمع عشان يغير وجهة نظره عنه عشان هو مش طايقه خالص

هادي : هههههه بكرة لما يعاشره حيعرف لوحده

رقيه : ياللا يا هادي يا للا يا جنه و يارب بقى الاكل يعجبكم كله عمايل ايدينا احنا مبنحبش اكل برة

جنه : وانا كمان و الله بحب اكل البيت اكتر

يشدلها هادي الكرسي و تقعد و هو يقعد جمبها و تحطلها مرزوقه اكل كتير ادامها : ده كتير اوي يا ماما

مرزوقه : بالف هنا و شفا مطرح ما يسري يمري يارب ده انا و الله لو كنت اعرف بمجيتكم الغاليه دي كنت خليت الحاج دبح عجل وفرش الأرض ورد

جنه بفرحه : ميرسي يا ماما ربنا يخليكي

الله الاكل حلو اوي تسلم ايديكم يا حبايبي

هادي : تعرفي يا جنه انا مهما اكلت مبلاقيش اطعم من اكل أمي و اخواتي

جنه : عشان بيعملوه بحب فبيطلع طعمه جميل

فاطمه : بؤك بينقط شهد يا جنه شايفه يا ماما الكلام الحلو

مرزوقه : ماهو الحلو ميقلش غير الحلو

ياكلوا كلهم مع بعض و هما بيتكلموا و بيضحكوا ضحكات نابعه من قلوب بتعرف معنى الحب و قيمة العشره

و بعد شويه تسلم عليهم جنه كلهم و تبوسهم و تحضنها مرزوقه بكل حب و حنيه

جنه : حضنك حلو اوي يا ماما

هادي : مفيش حضن في الدنيا كلها أحن من حضن أمي

مرزوقه : انت اللي مفيش فحنيتك يا حبيبي ربنا يهنيكم و يسعدكم و يجعل الفرح من نصيبكم يارب

يخرجوا من عندهم و كلهم يروحوا يقفوا في البلكونه و جنه تشاورلهم من تحت و تركب مع هادي و يطلع بالعربيه اما هما فيدخلوا و سعادة الدنيا كلها مالية قلبهم : ياااه الحمد لله اخيرا قلبي حيطمن من ناحية هادي

مسعد : مش قلتلك يا مرزوقه هادي معدنه أصيل و قلبه ابيض و نيته صافيه و اكيد ربنا شايلله الخير

فاطمه : بصراحه يا بابا جنه حلوة اوي و طيبه و بنت حلال و ربنا عوض هادي صبره خير بيها

رقيه : دي اتعاملت معانا كأنها تعرفنا من سنين

خديجه : لاء و كلت و شربت معانا و لعبت مع الولاد كانت زي ما تكون واحده مننا مش المخفيه اللي إلهي ربنا ينتقم منها اللي يوم ما جت حسستنا اننا مش بني ادمين

رقيه : ليه أن شاء الله و على ايه ايش حال لو مكنوش كانوا عايشين تحت السلم وهادي هو اللي نضفهم و خلاهم بني ادمين

مرزوقه : الحكايه ملهاش دعوة لا بفلوس و لابعز يا بنتي ده بيرجع لأصل البني آدم و يا للا اهي راحت لحالها الحمد لله ان ربنا خلصه منها على خير و ربنا يكمل فرحته مع جنه يارب

فاطمه : الصراحه يا ماما تحسيها اسم على مسمى جنه و هي جنه رقيقه كده و جميله شبه حتة البسكوته

خديجه : لاء و قمر شبه الممثلات

فاطمه : ممثلات مين دي جنه احلى من الممثلات دول كلهم نفخ و شفط و عمليات تجميل لكن جنه ماشاء الله عليها جمال رباني دي مش حطه فوشها الهوا و زي البدر المنور في ليلة تمامه و الطرحه على رأسها تحسيها زي الملايكه

مسعد : مرزوقه انتي سرحانه و اللا إيه

مرزوقه : لا معاكم يا مسعد بس اتهيالي ان هادي داخل علية هو وجنه و ولادهم في ايدهم و بيقولولي يا تيته

خديجه : ان شاء الله يا ماما ربنا حيفرحهم و يعوض عليهم

مرزوقه : يارب فرح قلبه و أجبر بخاطره يا قادر يا كريم يارب

في العربيه جنه و هادي بيتكلموا مع بعض : إيه رأيك بقى فأهلى يا جنه

جنه : طيبين اوي يا هادي و بيحبوك اوي انا مشكتش للحظه انك مش ابنهم و خديجه و رقيه و فاطمه مش اخواتك و ولادهم بيقولولك خالو الله حلوة اوي من بؤهم

هادي : ما هما اهلي فعلا يا جنه اهلي اللي فتحت عيني عليهم و على وجودهم فحياتي

جنه : بس هو في سؤال نفسي اعرف اجابته عشان محيرني اوي

هادي : اسألي يا حبيبتي

جنه : هما ليه ما ودوك الملجأ ليه مفضلتش معاهم

هادي : عيشتهم كانت ضيقه يا جنه و زي ما نتي شفتي اخواتي ربنا يحميهم تلت بنات ده غير محمد اخوهم اللي مسافر و خافوا يحكموا علية بالعيشه اللي هما عايشينها لأنهم لا كانوا حيقدروا يعلموني و لا حيعرفوا يصرفوا علية مرضوش يظلموني لكن ما سابونيش خالص طول الوقت كانوا معايا و ولادهم كبروا و هما عارفين اني اخوهم و انهم اخواتي ده غير ان في اوقات كتير كانوا بياخدوا اذن من الملجأ واقعد عندهم بالأسبوع خصوصا في الاجازة و يمكن ربنا اوحى لهم بده عشان لو مكنوش ودوني الملجأ لا كنت حشوف البشمهندس و مدام اسماء ولا كنت حعرفهم و لا حعرف فهد يعني سبحان الله تحسي ان كل ده مكنش صدفه ده كان ترتيب من ربنا سبحانه وتعالى

جنه : ونعم بالله و هما فعلا ناس طيبين اوي و انا قاعده وسطهم كنت حسه كأنهم اهلي

هادي : و هما بقوا اهلك فعلا يا جنه حتلاقي معاهم الحب و الحنان و تحسي معاهم بالدفا و الأمان هههههههه

جنه : بتضحك على ايه

هادي : بضحك على فهد اصل اوقات يكون معايا فلما يلاقيني حطيت راسي على رجل امي يقوللي وانا كمان اشمعنى انت

اقولله انت عندك مامتك روح حط راسك على رجلها لكن دي امي يقوللي وهو بابا بيدي فرصه لحد يحط راسه على رجلها غيره دول حيشلوني

جنه : هههههههه تحفه وربنا بس واضح انكم مرتبطين ببعض اوي

هادي : فهد ده مش بس صاحبي ده اخويا وصاحبي وحبيبي وعشرة عمري كله

جنه : ربنا يخليكم لبعض يارب

هادي : يارب يا جنه

جنه : مالك في حاجه

هادي : خايف اوي يا جنه

جنه : من ايه

هادي : تفتكري طنط ناديه وجاسر حيوافقوا علية

جنه : أكيد يا هادي طبعا ايه اللي حيخليهم ميوافقوش

هادي : وضعي مش اي حد ممكن يقبله يا جنه حبهم لية حاجه ووقت ما يعرفوا حقيقتي حاجه تانيه يا جنه

تحط ايدها على ايده : اطمن ان شاء الله حيوافقوا ماما و جاسر عقلهم كبير وان شاء الله يوافقوا

هادي : يا رب يا جنه

يدخلوا مع بعض العماره و يطلعوا الدور بتاعهم و هادي يسلم عليها و يبص عليها لحد ما تدخل و تقفل الباب وراها و يتنهد و يروح على شقته

بعد شويه تقعد جنه مع مامتها وهي خايفه و قلقانه اوي من رد فعلها خوف هادي من رفضهم انتقل ليها بتحاول تمهد لمامتها عشان تتقبل الموضوع : مالك يا جنه في ايه يا حبيبتي ولزمتها ايه المقدمات دي كلها ايوة عارفه ان محدش بيختار باباه و لا مامته و محدش بيحدد هو مين و لا ابن مين قولي في ايه يا جنه وعاوزة تقولي ايه من ورا الكلام ده كله انتي قلقتيني اتكلمي بقى يا بنتي

جنه : حاضر يا ماما بس بالراحه الله يخليكي وفكري الأول كويس قبل ما تردي

ناديه : اتكلمي يا جنه انا سمعاكي يا حبيبتي

في شقة هادي بيتكلم مع يونس في التليفون : اطمن يا هادي ان شاء الله خير

هادي : خايف اوي يا بشمهندس لو مامتها واخوها موافقوش علية انا حعمل ايه انا حاسس ان دي حتكون نهايتي

يونس : الف بعد الشر عنك يا هادي بشروا و لا تنفروا

الناس دي ولاد أصول و بيقدروا معدن البني آدم اللي قدامهم و هما شافوك و عرفوك و عاشروك و عرفوا انت ايه كويس وحبك لجنه كان باين فعيونك ومن تصرفاتك وان شاء الله خير يا حبيبي

هادي : يارب يارب بس هما ممكن يرفضوني تفتكر يا بشمهندس مامتها و اخوها جاسر هو ممكن يرفضني

اه طبعا حرفضه و اخوكي كمان حيرفضه استحاله نوافق على حاجه زي دي انتي اتهبلتي بتقولي ايه بقى انتي جنه بنت الأصول عاوزة تربطي اسمك بواحد زي ده واحد من الشارع معندهوش اصل و لا فصل و لا عارفين هو مين و لا اهله مين تربية ملاجئ ده انتي تبقي اتجننتي يا جنه وقال بتحبيه قال حب ايه و زفت ايه

بس دي مش غلطتك انا اللي غلطانه اني سمعت كلام اخوكي وفضلنا هنا احنا من بكرة حننزل اسكندريه ومش حنقعد هنا ولا يوم واحد بعد النهارده و لو حكمت حاخدك و نسافر لاخوكي اهوه ده اللي كان ناقص كمان تتجوزيلي واحد لقيط

😢لاء يا ماما لاء الله يخليكي وحياة غلاوتي عندك انا بحبه انا بحب هادي ياماما

_ وانا قلت حنمشي يعني حنمشي

جنه : وانا مش حمشي من هنا يا ماما ولا حروح اي مكان هادي مش فيه استحاله ابعد عنه بعد ما لقيته ومفيش قوة عالارض حتفرق بيننا 😢

تهزها من كتفيها : جنه يا جنه

تقوم جنه مفزوعه : ماما

ناديه وهي بتطبط عليها : مالك يا حبيبتي انتي كنتي بتحلمي يا جنه في ايه يا حبيبتي

جنه هي غير مستوعبه انه كان حلم : هو انا نمت امتى

ناديه : نمتي وانا برد على السمسار في التليفون يا حبيبتي معلش اتاخرت عليكي أصله فضل يرغي و عمال يقوللي الشقه جاي ليها زبون كويس و بالعافيه قفلت معاه

مالك يا حبيبتي و ايه الحلم اللي خلاكي كنتي بتتنفضي كده وانتي نايمه انا اتفجعت عليكي يا حبيبتي

جنه تعيط و ترمي نفسها فحضن مامتها : أنا بحبك اوي يا ماما و مش عاوزة اعمل اي حاجه تزعلك مني

ناديه : وانا ايه اللي حيزعلني بس يا حبيبتي

جنه : ماحضرتك سمعتيني و مرديتيش علية

ناديه : و هو انا لحقت يا جنه انتي يادوب اتكلمتي و السمسار بتاع اسكندريه فضل يرن رديت عليه و بعد ما قفلت معاه رجعتلك لقيتك نمتي يا حبيبتي مردتش اصحيكي لكن لما سمعتك بتتكلمي وبتتنفضي قلقت عليكي

ترفع جنه رأسها و عيونها مليانه دموع

ناديه : بتحبيه اوي كده

جنه : أيوة ياماما بحبه اوي

ناديه : وانا كمان بحبه اوي بس

جنه : بس ايه يا ماما

ناديه : بس لازم اقول لجاسر الأول

جنه : يعني حضرتك موافقه على هادي يا ماما

ناديه : وانا ايه اللي حيخليني موافقش عليه يا جنه

جنه : اللي حكيتهولك عنه و عن حياته

ناديه : دي حاجه احنا ملناش دعوة بيها و لا هو ليه يد فيها ده قدره اللي انكتب عليه من غير ما يختاره وهو لا س.. رق و لا اخد حق حد هو شاب مكافح بنى نفسه بنفسه و قدر يثبت وجوده في الدنيا و ماشاء الله عليه محترم و متربي و فوق كل ده بيحبك و حبقى مطمنه عليكي وانتي معاه حعوز ايه اكتر من كده وحتمنالك ايه احسن من كده و بعدين على رأي سعاد حسني ما عرفنا البيه المتعايق ابو دم خفيف و بقينا معاه اخوه شقايق فاكرينه شريف اتاريه مش كده على طول الخط و الطبع الرضي من جواه نط

قطيعه تقطعه و تقطع سيرته شهاب الزفت ماخدناش منه غير الهم و الغم لكن هادي إلهي ربنا يكرمه و اشوفه اسعد واحد في الدنيا كلها يارب

جنه تفضل تبوس فيها و تضحك : يا حبيبتي ياماما انا بحبك اوي

ناديه : وانا بحبك اوي يا نور عينيه انا اهم حاجه عندي في الدنيا سعادتك يا جنتي وانا متأكده ان هادي حيسعدك لاني عارفه و متأكده من حبه ليكي

تلاقي جنه بتبص لها باستعجاب

ناديه : انتي بتبصيلي و مستغربه انا ام يا جنه وهادي حسيت معاه باحساس الام تجاه ابنها ايوة متستغربيش وقفته معانا من اول يوم حصللنا فيه اللي حصل و لحد اللحظه دي خلاني احس انه ابني عارفه يا جنه لما كان بيجيب لي دكتور العلاج الطبيعي كان فاكر انه ابني و لما كان بيروح معايا المستشفى كانوا بيفكروا اني امه و انا ربنا العالم غلاوته عندي من غلاوة جاسر يبقى بعد كل ده لما يكون عينه منك انا مش حعرف و لما يحبك انا مش ححس انا كنت مستنيه اللحظه اللي حييجي يطلبك مني بفارغ الصبر لاني عمري ما كنت حبقى مطمنه عليكي غير وانتي معاه

جنه : يا حبيبتي يا ماما ربنا يخليكي لية يارب ده انا كنت خايفه أوي لدرجة اني نمت و حلمت انك رفضتيه

ناديه : هادي ميترفضش يا جنه ده شرف لأي بيت يدخله يا حبيبتي و اللي انا مش مصدقاه بقى انه يكون استغفر الله العظيم زي ما بيقولوا لا يا جنه ده العرق دساس يا جنه و العرق يمد لسابع جد و هادي أصله طيب يعني اكيد اهله ناس طيبين و استحاله أصدق انه والله لساني ما قادر ينطقها و الله لو جبتيلي الف عقل على عقلي ما صدق الكلام الفارغ ده

جنه : بس يا ماما ده هادي بنفسه اللي حكالي

ناديه : الله اعلم اللي يعيش ياما يشوف مش يمكن يكون اتخ**طف من اهله مثلا دي الدنيا ياما فيها يا جنه

جنه : الله اعلم يا ماما بس جاسر ياماما تفتكري ممكن ميوافقش

ناديه : تبقي متعرفيش اخوكي يا جنه جاسر ميهمهوش الكلام الفارغ ده جنه اللي لازم تكوني متأكده منه كويس اني انا و اخوكي مش عاوزين حاجه من الدنيا دي كلها غير سعادتك يا حبيبتي انا حقولله عشان تسمعي منه كلمة مبروك يا قلب امك

جنه : بجد يا ماما

تمسك ناديه تليفونها وتتصل على هادي و تحكيله الحكايه كلها و جنه قاعده جمبها و قلبها بيدق جامد من خو.. فها من رد فعل جاسر

ناديه : رايك ايه يا جاسر اختك قاعده جمبي مستنيه تسمع ردك

جاسر : إيه يا جنتي عامله ايه يا حبيبتي

جنه : الحمد لله بخير يا حبيبي

جاسر : يارب دايما قوليلي يا جنه انتي بتحبيه اوي كده

جنه :………

جاسر : امممم حتسمعي كلامي يا جنه مهما كان ردي

جنه بحزن : عمري ما حقدر ازعلك مني يا جاسر و لا اكسرلك كلمه

جاسر : خلاص يبقى الموضوع منتهي

جنه بدموع : منتهي يعني خلاص انت

جاسر : أنا حطمن على جنه الصغيره عشان خلاص قربت تشرف و اطمن على مامتها و اول ما يبقوا تمام حجيبهم و ننزل مصر علطول

جنه : انا مش فاهمه حاجه

جاسر : هههههه متفهميها يا ماما بنتك مخها بقى تخين اوي

ناديه : ربنا يخليك ليها يا حبيبي يارب و تجيلنا جنه الصغيره بالف سلامه و مامتها تبقى بالف عافيه بس ازاي ده المفروض لسه شويه عليها

جاسر : الدكتور هو اللي بيقول كده يا ماما اصل الانسه كبرت في بطن مامتها و مامتها خلاص تعبانه ومش مستحمله

جنه : انتوا بتتكلموا بالالغاز كده ليه ماما فهميني انا مش فاهمه حاجه

ناديه : هههههه جاسر وافق على هادي يا حبيبتي مش قلتلك انتي مش عارفه جاسر

جاسر : مش عارفاني ازاي يعني

ناديه : كانت خايفه انك ترفض هادي

جاسر : مج.. نونه دي و اللا ايه و هو هادي ينفع يترفض بردو الف مبروك يا حبيبتي ربنا يهنيكي و يسعدك يارب

تقف جنه و تفضل تتنطط وتقعد تصقف بايديها و تضحك و مش مصدقه نفسها من الفرحه و جاسر و مامتها بيضحكوا عليها

جنه : يعني خلاص اكلمه واقولله انكم موافقين

جاسر : لاء انتي حتكلمي هادي و تقوليله ماما و جاسر بيقولولك خير البر عاجله و حضرتك تيجي بكرة عشان تطلبني رسمي و يكون معاه اهله اللي ربوه و البشمهندس يونس و المج.. نون اللي جنن عمي صلاح و انا حكون معاكم فيديو عشان اقرا معاكم الفاتحه لكن كتب الكتاب لما انزل اه ماهو محدش حيكون وكيلك غيري

جنه بفرحه : يا حبيبي يا جاسر ربنا يخليك لية يا حبيبي يارب

تجري جنه على التليفون و تبلغ هادي اللي يطير من الفرحه و تقولله كل اللي جاسر قاله

ويمر الليل عليهم و قلبهم طاير من السعاده و من كتر الفرحه ميناموش الليل تعد جنه الوقت بالدقايق لحد ما الساعه سبعه تدق و يدق معاها أبواب الفرح و الهنا أصوات الزغاريد تملا العماره زغاريد نجلاء اللي عندها من الضهر طبعا ماهي استحاله تسيب جنه فلحظه زي دي وآلاء و فاطمه و رقيه و خديجه اللي كانوا حاسين انهم فبيتهم و شاركوا آلاء في تحضير الحلويات و اتعاملوا كأنهم أهلهم

و ناديه حضنت مرزوقه بكل حب وفضلت تشكرها على تربيتها لهادي

ويونس وأسماء كانت سعادتهم ملهاش حدود

اما هادي وجنه دول كانوا فعالم تاني لوحديهم تايهين فعيون بعض عيون مفيهاش غير كل حب و امان واحتواء

فرحه اتجمع فيها كل الاهل و الأحباب و جنه فتحت الشاشه على تليفونها عشان جاسر و مراته و ولاده يحضروا معاهم أجمل لحظه فحياتها و سلم عليهم كلهم و قروا كلهم الفاتحه

فاتحة سعادتهم و هناهم

وهادي لبس جنه خاتم الخطوبه و قلب جنه حيقف من فرحته

جاسر : أول ما جنه توصل بالسلامه حنحدد الفرح على طول

فهد : وانا مليش دعوه عاوز اتجوز معاكم

هادي : الله يخليك يا فهد اطلع انت من الليله دي بدل ما تقلب غم علينا كلنا

نجلاء : بلاش يا فهد الله يخليك

فهد : اخرسي يابت بقى انت عاوز تفرح و تنبسط و تعيش حياتك مع حبيبتك و انا افضل متشحطط كل شويه عشان اتهزا و يتمسح بكرامتي بحر اسكندريه يا خسارة الصحوبيه و الاخوه لا بقى انا مليش دعوة فيها يا اخفيها انا حتجوز معاكم يعني حتجوز

يونس : بص يا فهد انا المرة اللي فاتت عملت اللي علية المرة دي بقى استاذنا الكبير يعمل اللي عليه و يروح معاك

فهد : بابا اه معاك حق هو ادلع بما فيه الكفايه يدلعني انا كمان شويه بقى بس تصدقوا اناخايف يقول ان هو كمان عاوز يعمل شهر عسل معانا أصله حالته بقت صعبه اوي انا مش عارف الراجل ده بيبلبع ايه من ورانا ما هو مش ممكن اللي بيحصل ده يكون طبيعي

نجلاء : انت حتنق على باباك يا فهد

فهد : لا فشر ده ابويا حبيبي ده انا خايف على صحته و الله عمال يستهلك يستهلك لما البنزين حيخلص

قولي بقى لعمي صلاح اني جاي و ربنا معانا

كلهم يضحكوا من قلبهم و يقولوا ربنا يستر من اللي حيعمل فيهم صلاح

………………………………….. . .

في مكان عام يجلسان سويا و يتحدثان : إيه يا حبيبي فكرت في اللي قلتلك عليه

عدي : اللي انتي عاوزاه مني حاجه مش بالسهوله دي يا ذكرى

ذكرى : عارفه بس النتيجه بتاعتها حيكون

عدي : حيكون تمنها غالي لو انكشفت يا ذكرى

ذكرى : و لو عدت على خير حنكسب من وراها كتير اوي و وقتها نقدر نتجوز و نعيش حياتنا مع بعض

عدي : طب وايه المانع لو اتجوزنا دلوقتي مانا وضعي كويس مش وحش

ذكرى : وضع ايه بس اللي بتتكلم عنه يا عدي لا يا عدي متزعلش مني انت حيلتك ايه غير الكام الف اللي بتقبضهم كل شهر دول مايمشوناش اسبوع على بعضه و انا عاوزة اعيش وانبسط يا عدي

عدي : بس مش كل مرة حتعدي يا ذكرى و لو عدت المره دي

ذكرى : حتعدي تاني وتالت ورابع متخافش بقى انا معاك

عدي : طب عرفيني لصالح مين عشان أبقى فاهم

ذكرى : مش لازم تفهم يا عدي انا مش مسموحلي اني اقولك

عدي انا كل اللي عاوزاه منك انك تثق فية و صدقني مش حتندم

عدي : وانا ايه اللي يضمن لي انك بعد ما اعملك كل اللي انتي عاوزاه حتوفي بوعدك معايا و نتجوز

ذكرى : اللي يضمنلك هو قلبي يا عدي قلبي اللي مهانش عليه يفرط فيك اكتر من كده وانا عارفه و متأكده اد ايه انت كنت بتحبني ولولا هادي و لفه و دورانه حوالية انا مكنتش حفرط فيك ابدا عدي انا مفيش حاجه تجبرني اني اطلب منك حاجه زي دي غير رغبتي الحقيقيه اننا نكون مع بعض وحبي ليك يا عدي

عدي : معقوله يا ذكرى تكوني بتحبيني الحب ده كله و هنت عليكي تسيبيني و تروحي لغيري

ذكرى : متوجعش قلبي بقى يا عدي كفايه وجعه السنين اللي فاتت دي كلها و انا بعيده عنك

عدي : يا حبيبتي يا ذكرى خلاص ماشي وانا حعملك كل اللي انتي عاوزاه و زياده كمان لكن عارفه لو طلعتي بتلعبي بية زعلي منك حيكون كبير اوي يا ذكرى

ووقتها انا مش عارف انا ممكن اعمل ايه

ذكرى بدلع عليه : حتعمل ايه بقى

عدي : حق** تلك يا ذكرى

• يتبع الفصل التالي اضغط على ( رواية احتواء قلب ) اسم الرواية