رواية احتواء قلب الفصل الرابع و الثلاثون 34 - بقلم عبير سليم
انا بشكر كل اللي دعا لبنتي بالشفا ربنا يخليكم لية و منحرمش منكم يا رب
طبعا انا كنت مخلصه الحلقه و للأسف اتحذفت كلها و دلوقتي حرجع اكتبها من الاول
و مش عارفه إذا كان اللي حكتبه تاني حيبقى كويس زي اللي كتبته اول مرة و اللا لاء لأني لقطت منها الدور و تعبانه اوي و الله ربنا يستر بقى و الحلقه تعجبكم
و نقول بسم الله الرحمن الرحيم
يوم جديد و لكنه ليس كأي يوم بل يوم غير كل الأيام السابقه هو يوم ميلاده الحقيقي يستيقظ من نومه و يفتح عينيه ليجدها تنظر إليه و هي تتأمله فيبتسم لها و يلقي بنفسه في داخل احضانها و يشدد من احتضانها و كأنه يخشى فقدانها ثانية و هي الأخرى تحتضنه بحب الدنيا كله و تقبل راسه
هادي : حضرتك صاحيه من بدري يا ماما
جميله : انا منمتش يا حبيبي
هادي : منمتيش ليه يا ماما
جميله : انت عاوزني انام و امنع نفسي من اني اشوفك ادام عيوني لا انا مش عاوزة اضيع ثانيه واحده و انت بعيد عني يا نور عينيه انا لحد دلوقتي لسه مش مصدقه و الله و بقول ليكون حلم بقى معقوله يا ربي االي انا فيه ده لحد امبارح و انا بدعي ربنا ترجعلي و النهارده تبقى فحضني معقوله
هادي : ربنا كريم أوي يا ماما و الحمد لله انه مطولهاش عليكي يا حبيبتي
جميله : لكن طالت عليك يا حبيبي انت متعرفش يابني من وقت ما انحكالي اللي حصل و انا حالتي عامله ازاي كل ما اتخيلك و اتخيل اللي مريت بيه السنين اللي فاتت كلها
هادي : خلاص يا أمي بلاش نجيب سيرة اللي فات خلينا فدلوقتي دلوقتي و بس الله حضنك حلو اوي يا أمي عارفه يا أمي نفس حضن امي مرزوقه هما كل أحضان الأمهات واحده و اللا إيه
جميله : ربنا زرع الحنيه في قلب كل أم يا ضنايا دي حاجه من عند ربنا
ياااه يابني انا مش عارفه اشكر الناس دي ازاي عاللي عملوه معاك معقوله ياربي الاغراب يبقوا احن عليك من اللي من لحمك
هادي : و الله يا أمي انا مهما قلت لحضرتك سواء امي مرزوقه و اللا ابويا مسعد و سواء الباشمهندس يونس و اللا البشمهندسه اسماء عملوا معايا ايه مش حتصدقي
جميله : لا مصدقه و الله يا بني الحمد لله ان ربنا حطهم فطريقك يا حبيبي
هادي : صحيح يا أمي أنا في حاجه اخدت بالي منها و عاوزة أسألك فيها
جميله : خير يا حبيبي
هادي : هي مراة خالي فاروق مالها و ايه اللي مخليها قاعده على كرسي متحرك
جميله : ياااه دي حكايه طويلة أوي يابني بص ياحبيبي غاليه قريبتنا بس من بعيد امها اتوفت و هي صغيره اوي و ابوها طبعا اتجوز و مراة ابوها كانت ممرمطاها و مشقياها فخدمة البيت و بعد ما خلفت بقت بتعاملها معامله ما يعلم بيها الا ربنا وابوها كان لا بيصد و لا بيرد وخالك كان على علم باللي بيحصل معاها و كانت صعبانه عليه اوي اول ما شدت حيلها و كملت الستاشر سنه خالك اتقدملها و اتجوزها عشان يرحمها من بهدلة مراة ابوها ليها بس ايه بقى مش عاوزة اقولك بعد ما اتجوزها حبها حب يا لهوي و دلعها دلع و لا كأنهم عبله و عنتر في زمانهم
هادي : هههههههه عسل يا ماما و ربنا
جميله : ده انت العسل كله يا نور عين ماما المهم بقى بقت غاليه دي دنيته كلها و هو نور عينيها غيبت شويه في الخلفه و بعدها ربنا كرمها و جابت سليم الله يرحمه و قعدت عليه كام سنه و بعدها ربنا رزقها بادهم و مراد و الكل ما بقاش على لسانهم غير ان غاليه ربنا كرمها و طاقة القدر اتفتحتلها و بعد التعب و الشقا بقت هانم و خلفتها كلها صبيان و فجأة متعرفش يابني ايه اللي حصلها مرة واحده اللي جالها جالها بين يوم و ليله اتبدل حالها و بقت واحده تانيه منعرفوهاش
هادي : ليه يا ماما ايه اللي حصل
جميله : معرفش يا بني مبقتش طايقه حد و لا عاوزة تشوف حد و لا حد يكلمها و اتغيرت خالص و أدهم و مراد يا حبايبي و لا كانت بتبص لهم رمياهم و بقت لوحدها فعالم تاني و الشيوخ بقوا داخلين طالعين عليها و اللي يقول محسوده و اللي يقول معمولها عمل و محدش عارف فيها ايه لحد ما خالك قرر يوديها لدكتور أمراض نفسيه و شافها و كتبلها على علاج و بقت تاخده و الحمد لله بقت احسن شويه و بدأت يادوب ترضى تقعد معانا و تكلمنا لحد ما فيوم قالت عاوزة تروح لابوها وحشها بلا خيبه امال لو كان عدل المهم خالك قاللها حاضر يومين و حوديكي لكن هي لا لزمن و لا بد اروح دلوقتي يعني حروح دلوقتي زي ما يكون قضاها كان بيناديها راحتلهم و هي راجعه العربيه دخلت فيها ترله و مش عاوزة اقولك بقى مستشفيات و عمليات ما ليها اول من آخر و بعد سنين تعب و شحططه و خالك خادها و سافروا بلاد برة و بردو مفيش فايده و بقت زي ما نت شايف لكن هي سبحانك يا ربي ربنا منزل على قلبها رضا و هدوء و طمأنينة راضيه و متقلش غير الحمد لله و كفايه عليها خالك و حنيته عليها و حبه ليها ربنا يبارك فعمره يارب
هادي : انا فعلا لاحظت ان خالي مهتم بيها اوي
جميله : هو مهتم بيها بعقل دي نور عينيه ده ميدعيش غير بربنا يجعل يومي قبل يومها
ده لما الناس كانت تقولله مراتك تعبانه و من حقك تتجوز كان يقوللهم مفيش ست تملى عيني غير غاليه دي ضوفرها برقبة الستات كلهم سبحان الله غاليه و هي غاليه
هادي : ماشاء الله عليكم يا ماما بتعرفوا تحبوا
جميله : و هو في احلى من الحب ما شاء الله عيله ماشيه تحب على نفسها ما عدا الواد مراد حساه مش زينا تقيل كده فنفسه متعرفش جواه ايه لكن اللي ماشي يدلدق حب و حنيه الواد أدهم لو بقره من اللي بيعالجهم غمزتله تجيبه سكه
هادي : هههههههه هههههههه
جميله : طب حقولك بقى بنات البشمهندس يونس
هادي : مالهم يا ماما
بيلعبوا برة في الجنينه يا حبيبي
يونس : بيلعبوا في الجنينه انتي بتقولي ايه يا اسماء
أسماء : اه و الله زي ما بقولك كده لما صحيت من شويه رحت الأوضة اطمن عليهم ملقيتهمش قلقت قلت راحوا فين دول نزلت تحت لقيت البنات اللي بيشتغلوا هنا سألتهم عنهم قالولي برة في الجنينه خرجت ادور عليهم لقتهم هما و أدهم و مراد و ولاد البنات بيلعبوا كلهم سوا و صوت ضحكهم عالي اوي سيبتهم ينبسطوا و دخلت تاني لقيت مراة خال هادي قاعده قعدت معاها شويه و اتكلمنا مع بعض ست زي العسل شربات ربنا يشفيها يارب و طلعت بقى اصحيك عشان صلاة الجمعه
يونس : ياه يا اسماء معقوله اللي حصل ده انا لحد دلوقتي و الله ما مصدق اللي حصل ده معقوله هادي يطلع ليه اهل و هما اللي يدوروا عليه كمان سبحانك يارب
اسماء : أكيد ربنا كان ليه حكمه فكل ده
يونس : و نعمه بالله بس انتي عارفه يا اسماء في حاجه انا مستغربها اوي
اسماء : حاجة ايه يا حبيبي
يونس : قوليلي الأول انتي عرفتي تنامي بعد ما خلصنا كلام
اسماء : ده انا غمضت عيوني رحت فسابع نومه
يونس : اهوه ده بقى نفس اللي حصل معايا عشان كده انا مستغرب اوي مانتي عارفه اني استحاله اعرف انام بره البيت لكن انا بجد محستش بنفسي غير و انتي بتصحيني دلوقتي يا ترى ايه السر
اسماء : السر فدفا البيت هنا سبحان الله يا يونس البيت ده فيه دفا غريب محستهوش فأي مكان دخلته قبل كده تحس فيه بريحة جميله كده تحسسك بالأمان و الهدوء تحس فيه بالراحه تحس كانك في بيتك مش فبيت حد غريب متعرفهوش انا نفسي لما خرجت دلوقتي ادور عالبنات و نزلت و خرجت الجنينه محستش للحظه اني مثلا محرجه او متاخده او حسه حتى اني فمكان غريب بالعكس تماما حسيت اني فبيتنا بتحرك فيه بحريه الناس دي طيبه بجد يا يونس و هادي ماجبش حاجه من برة
يونس : بس انا مش حرتاح غير لما ياخد حقه و يرجعله اسمه و كل الي عمل فيه كده لازم ياخد جزاؤه
اسماء : ان شاء الله يا حبيبي
يونس : بس انا بردو عاوز اعرف ايه اللي خللى البنات يلعبوا مع الشباب مع انهم ميعرفهومش حاجه غريبه اوي
😂انا يا حبيبي اللي خليتهم يخرجوا يلعبوا معاهم و صوت ضحكهم يبقى ملعلع زي ما نت سامع كده
فاروق : اه منك يا لئيمه عملتيها ازاي دي
غاليه : اعمل ايه مش بيقولوا الحاجه ام الاختراع لقيتلك الواد أدهم يا حبة عيني رايح جاي زي اللي واقع منه حاجه بيدور عليها سألته عرفت انه هو و بيسان اتمشوا شويه و مرجحها
فاروق : مرجحها
غاليه : أيوة يا اخويا الا ما فكر يمرجح امه الأهبل ده
فاروق : و لا يهمك يا ست الستات امرجحك انا يا حبيبة قلبي
غاليه : يسلملي قلبك و يطولي فعمرك يا رب المهم بقى يا سيدي صعب علية الواد متشحتف عليها اوي يا لهوي ابنك حالته صعبه اوي يا فاروق
فاروق : و الله اللي انا شايفه ان ابنك حالته صعبه من يوم ما اتولد مش من دلوقتي ماشي يحب على نفسه
غاليه : لا ده ابني و انا عارفاه المره دي هو وقع على بوزه المهم انا بقى لقيت البنتين نازلين و حستهم زهقانين قمت قلتلهم ما تخرجوا مع الشباب دول في الجنينه اتفرجوا عليها دي حتعجبكم اوي طبعا ابنك ما صدق و شبط ده حتى العاقل اللي بتقول عليه تقيل هو كمان يا اخويا ما صدق صراحه معاهم حق البنتين قمر الله أكبر عليهم ببص لقيت ولاد اخوات هادي صحيوا راحوا واخدينهم و خدوا الكورة و المضارب و خرجوا و الكلام ده ييجي من تلت ساعات و لحد دلوقتي مظهروش تاني
فاروق : طب اروح ابص عليهم و اناديهم ييجوا يفطروا و انتي يا حبيبتي خللي البنات يشهلوا شويه عاوزين نفطرهم قبل صلاة الجمعه
غاليه : حاضر يا حبيبي
يخرج فاروق و يلاقيهم بيحدفوا الكورة لبعض و الولاد الصغيرين بيجروا و البنات فرحانين و مراد و أدهم منسجمين معاهم فينادي عليهم : ياللا يا ولاد عشان تفطروا
أدهم : فطار ايه بس ايه اللي جاب ابوك ده دلوقتي
مراد : أخرس يا بني آدم انت حاضر يا بابا احنا جايين
جيلان : صباح الخير يا اونكل
فاروق : صباح الورد والياسمين على عيونك يا حبيبتي
أدهم : الحق يا مراد ابوك بيعاكس المزة بتاعتك
مراد : إيه المزة دي الفاظ بيئه
أدهم : تصدق اني غلطان تعالى يا واد يا مقطقط انت اشيلك
شال أدهم هادي الصغير على كتفه عشان يدخلوا الفيلا لقوا بوبي صغير بيجري على أدهم
بيسان : ايه ده هو البوبي عارفك يا أدهم
ادهم : ايوة طبعا ده شكَل مولود على ايديا
بيسان : شكَل اسمه غريب اوي
أدهم : أصله على طول بيعمل مشاكل و شقي عشان كده سميته شكل
بيسان : بس واضح انه عارفك و بيحبك اوي
مراد : بصي يا بيسان كل الحيوانات في المنطقه عارفه أدهم كلابها بقططها بحميرها بجواميسها بخرفانها بمعيزها كلهم عارفينه زي ما عارفين نفسهم
بيسان : معقوله يا مراد
مراد : ايوة طبعا مش هو اللي مولدهم و بيعالجهم ده يعتبر واحد منهم تحسيهم عيله واحده
بيسان : ههههههه هههههه بجد يا أدهم
أدهم : هه هه ظريف يا ولا اسم عليك يا بشمهندز الري بقى كده يا مراد بدل ما ترفع من شان اخوك ادامهم بتضحكهم علية طب ماشي بقيالك يا اخويا
مراد : هههههه هههههه بحبك يا واد
أدهم : ماشي عالعموم روح بقى شوف مين اللي حيجوزهالك يا عم يا تقيل
يدخلوا الفيلا كلهم و هما بيضحكوا و يلاقوا البنات بيبدءوا يحطوا الاكل على السفره
وقتها هادي كان لسه عند جميله و بيتكلموا سوا : مراتك شكلها بنت حلال اوي يا حبيبي
هادي : جنه و هي جنه يا ماما هي مش مراتي و بس هي مراتي وحبيبتي و صاحبتي و كل دنيتي
جميله : يا حبيبي يا بني ربنا يخليكم لبعض يا حبيبي يارب و يكملها غلى خير يارب يا مانت كريم يارب بقى معقوله يا ربي الكرم ده كله ترجع لحضني و كمان اشوف ولادك نفسي اوي يا حبيبي ربنا يطول فعمري لحد ما اشيل ولادك على ايدي أحفاد عبد الرحمن
هادي :ان شاء الله يا ماما ان شاء الله يا حبيبتي حتشيليهم و تربيهم و تفرحي بيهم
بقولك ايه يا ماما
جميله : لا انت قلت كتير انا اللي حقول بقى قوم يا واد من هنا ادخل لمراتك وخدها و انزلوا سوا كفايه اني اخدتك منها طول الليل
هادي : ما هي يا حبيبتي اللي صممت اني انام معاكي
جميله : عشان هي بنت اصل و بتفهم في الواجب بس كفايه كده بقى مراتك متنمش ليله واحده بعيد عن حضنها اه متتعودش انها تبعد عنك و لا انت تتعود على بعدها و لا هي تتعود على بعادك رينا يخليكم لبعض يارب
هادي : و يخليكي لينا يا ست الحبايب
يبوسها هادي من حبينهاو من ايدها و يروح لجنته عشان ينزلوا سوا
اما نجلاء فنازله جري تدور على فهد : فين فهد محدش شافه
أدهم : لا و الله مشوفناهوش
نجلاء : امال راح فين ده
اسماء و يونس نازلين عالسلم صبحوا عليهم و نجلاء سألتهم عنه
يونس : و الله ما اعرف يا نجلا احنا لسه نازلين ادامك اهوه
نجلاء : حد ييجي معايا ادور عليه البني آدم ده
في نزلة جنه و هادي و سمعوها
هادي : اصبري حاجي معاكي
جنه : و انا عاوزه اجي معاكم
مراد : طب تعالوا انا حوديكم عنده انا عارف هو تقريبا حيكون فين
ياخدهم و يمشوا ناحية البوابه و يسمعوا صوته بيغني يروحوا ناحية اوضة البواب يتفاجئوا بيه و باللي بيعمله
فهد : يا حبيبي وحشتني و عليك وغوشتني
نجلاء : انت بتهبب ايه يا فهد
فهد : نجلاء و العائله كلها انها مؤامرة يا لها من خدعه
مراد : هههههههه هادي هو ايه اللي بيحصل ده
هادي : اعرفك فهد صاحبي
نجلاء : رد عليه يا فهد ايه اللي انت بتهببه ده
فهد : اللي انتي شايفاه يا قلب فهد
نجلاء : الحقوني يا ناس انا حنجلط هو مش انت قلتلي حد الله بيني و بينها تاني
فهد و هو بيمسكها و ييبوسها أدامهم : اعمل ايه بس يا نوجه مانتي عارفه غلاوتها عندي و اني مهما بعدت عنها لازم ارجع ليها دي نقطة ضعفي في الحياه خدوا قلبي خدوا عمري و ماتخدوهاش مني و على رأي عبد الحليم حافظ بحبك حب محدش قبلنا عرفه و لا صادفه بحبك حب و مش قادر على وصفه و انا شايفه
مراد : هههههههه هههههههه أدهم هو ده بجد و اللا تمثيل
نجلاء : لا ده بجد و حق و حقيقي
فهد انت عاوز تجلطني يا حبيبي
فهد : ليه بس كده يا حبيبة قلب فهد سلامتك يا مزتي
هادي : فهد انت وصلت لهنا ازاي
فهد : حقولك يا صاحبي حط حجر الله يخليك يا عبده ايوة برافو عليك
بص يا سيدي انا خرجت اتمشى في الجنينه قوم ايه شميت الريحه و لقتها دخلت في نغاشيشي خلتني اعيش وياك الحب الف حب
قمت مشيت ورا مناخيري لحد ما لقيت نفسي جيت هنا قام الراجل الجدع ده ظبطلي حجرين انما ايه يكيفوا بلد و قعدت اهوه زي مانتوا شايفين بس الشهاده لله الأخ ده عليه رصة حجر و لا اجدعها قهوجي و الشيشه دي اصلي أصلي الصراحه انا شكلي كده حبقى زبون عندك يا عبده
عبده : ده انت تشرفني من غير اي حاجه يا باشا وربنا
مراد : هههههه هههههه لا وربنا انا مش مصدق معقوله انت استاذ فهد الراجل العاقل اللي امبارح كان عايش في دور المصلح الاجتماعي و رجل القانون اللي لازم يرجع الحق لأصحابه
نجلا : معلش يا مراد اصل جوزي عنده انفصام في الشخصيه
فهد : لا و انتي الصادقه انا عندي شعره ساعه تروح و ساعه تيجي
نجلاء : ماكنا فبيتنا و مستورين لازم يعني لازم تفضحنا ادام الناس كده يقولوا علينا ايه دلوقتي
فهد : تصدقي اني غلطان الحق علية اني فرطت فيها دي حب العمر كله عشان خاطرك انتي و الواد اللي جوة ده كمان مستكتره عليه اعيش معاها دقيقتين من عمري
نجلاء : قوووم يا فهد متعصبنيش و الا حتصل على بابا
فهد : لا و النبي بلاش ابوكي
نجلاء : قوووم
فهد : حاضر يخرببيتك على بيت معرفتك فجعتيني
يقوم فهد من الأرض : شكرا يا عبده حقيقي رجل و الرجال قليل و يمسك الشيشه في ايده : يا فرحه كانت مالية عنيه و استكترها نجلاء الزفته دي علية سلام يا غاليه خد يا عبده خللي بالك منها انا راجعلها تاني
عبده : هههههههه حاضر يا باشا
تشده نجلاء من هدومه : امشي ادامي
فهد : متزقيش يا بت بدل ما اديكي فوشك و اعمل وشك بوفتيك الله يرحم لما كنتي انتي اللي بترصيلي الحجر و اللا نسيتي يا ام فهد
نجلاء : في بيتنا يا تحفه الناس تقول علينا ايه
فهد : حيقولوا علية راجل صاحب مزاج نجلاء : ايه اللي انت لابسه ده يا فهد
فهد و هو بيعدل هدومه : ايه رايك بقى في البنش ده بزمتك مش معلم
نجلاء : اه من ناحية معلم معلم شبه اللي قاعدين في وكالة البلح
فهد : دي هي دي الوجاهه يا هبله ياللي مبتفهميش
مراد بقولك ايه انا جعان اوي
مراد : هههههههه الفظار جاهز من بدري
فهد : انا عاوز فطير مشلتت بقى و جبنه قديمه عاوز خير الفلاحين ده
مراد : هههههه كله موجود متقلقش
فهد : ايوة بقى هو ده الكلام يا مزتي
فهد و نجلاء ماشيين يضربوا فبعض و بعد كده ياخدها فحضنه و يبوسها
و مراد مش قادر يمسك نفسه من كتر الضحك : هههههههه هههههههه هادي بجد لاء انا مش قادر اصدق هما بجد كده حقيقي و اللا إيه انا اول مرة اشوف كده
هادي : هههههه لا اطمن هو ده فهد صاحبي و هي دي نجلاء صاحبة جنه هو ده الطبيعي بتاعهم
مراد : ده انا امبارح مكنتش شايف غير العقل و الرزانه اللي يوزنوا بلد و دلوقتي مش شايف غير واحد هلس و مدي الدنيا طناش
جنه : هو كده يا مراد فهد عنده الشغل شغل و الهزار هزار بس بيعرف يفصل و الله و محامي شاطر جدا
مراد و عينه عليهم و شايف اللي بيعملوه : هههههههه لاء بجد مش قادر و ربنا
يدخلوا الفيلا و هما بيضحكوا يلاقي هادي مسعد و مرزوقه قاعدين يدخل يسلم عليهم و يبوس ايدهم و راسهم زي ما هو متعود و يتلموا كلهم عالسفره و يبدءوا ياكلوا و هما بيتكلموا و بيضحكوا و غاليه بتحط الأكل ادام بيسان وجيلان عشان ياكلوا و جميله عماله تأكل جنه و تحطلها الأكل فبؤها
و الكل بيضحك و مبسوط
نجلاء : حبيبي انت مالك بتاكل زي المفاجيع كده ليه
فهد : اصلي باكل لية و ليكي يا حبيبتي بصي فطبقك و ملكيش دعوة بيه يابت
نجلاء : فهد
فهد : عيون فهد
غاليه : هههههه و ربنا انت عسل يا فهد
اسماء: فهد ده العسل بتاعنا
جميله : و احنا بردو عندنا أدهم عسل و سكر
أدهم : واد يا مراد اتكلم و اللا لسه شويه
مراد : تتكلم ايه يا تحفه انت كل و انت ساكت
أدهم : لا ما العالم دي مش حيمشوا من هنا غير و انا قاري فاتحه
مراد : و لا فاتحه و لا آخره اتكتم دلوقتي و كل و انت ساكت
يخلصوا الفطار و يقوم الرجاله كلهم يروحوا الجامع عشان يصللوا الجمعه و الستات كلهم قاعدين مع بعض جميله واخده جنه فحضنها و عمالين يتكلموا سوا و اسماء و ناديه بيتكلموا مع غاليه و نجلاء بتتكلم مع رقيه و فاطمه و الاء بتتكلم مع خديجه كلهم عمالين يتكلموا و يضحكوا و هما مبسوطين
…………………………………………
تعبانه اوي و مش قادره تتحمل اكتر من كده و النهارده الجمعه و الدكاترة قافلين فضلت ماسكه التليفون بتدور على اي مستشفى او اي عياده فاتحه لحد ما لقت دكتورة رئيسة قسم و التعليقات عليها انها دكتورة ممتازه و بتجيب من الاخر كانت موجوده في احدى المستشفيات الكبرى لبست و هي مش قادره و راحت لقت في ناس كتير و الممرضه رفضت تستقبلها و قالتلها لازم حجز قبلها لكنها اتحايلت عليها و اديتها فلوس زياده عشان تدخلها و قالتلها انها تعبانه اوي و مش قادره
بعد شويه دخلتها و كشفت عليها الدكتورة و بدأت تسالها : انتي تعبانه بالشكل ده بقالك اد ايه
ذكرى : انا بقالي فتره تعبانه اوي لكن من وقت ما عملت الإجهاض و التعب زاد اكتر بكتير لدرجة اني مش قادره اقف على رجلي ده غير النز.. يف اللي مش راضي يقف
الدكتورة : بقالك اد ايه عامله العمليه دي
ذكرى : من كام يوم كده
الدكتورة بعد ما كشفت عليها كويس طلبت منها تلبس ملابسها و تخرج لها
الدكتورة : هو ممكن ده يكون بسبب الإجهاض لكن انتي بتقولي انك تعبانه من قبل كده عشان كده احنا محتاجين اشعه مقطعيه و اشعه تانيه كمان لازم تعمليهم عشان نعرف السبب ورا كل ده
ذكرى : أعملهم امتى
الدكتورة : دلوقتي حالا الاشعه موجوده حتعمليهم و حتنتظري ساعتين اول ما النتيجه تطلع تدخليلي بيهم تاني
تخرج ذكرى من عندها و تدخل الاشعه و تلاقي نفسها مش قادره تقعد تطلب من الممرضه تفتحلها اوضه ترتاح فيها و تديها فلوس
تنام على ضهرها و تلاقي شهاب بيتصل بيها : انتي فين تعالي دلوقتي عاوزك
ذكرى : مينفعش انا تعبانه
شهاب : تعبانه اه مانا عارف الضغط عليكي كبير الله يكون في العون تيجي دلوقتي بقولك استئذني من اللي انتي نايمه فحضنه قوليله معلش أوعى تقوم شويه و راجعالك
ذكرى : ايه اللي انت بتقوله ده انت ايه يا اخي انت فاكر نفسك اشترتني انا تعبانه بقولك تعبانه انا في المستشفى
شهاب : مستشفى مع مين يا ترى
ذكرى :انا لا مع حد و لا حد معايا انا متنيله لوحدي هو انا في حد بيعبرني اصلا
شهاب : مالك فيكي ايه ما نتي كنتي زي القرده
ذكرى : تعبانه بلاش اتعب
شهاب : لا طبعا اتعبي براحتك بس اول ما تفوقي كده تجيلي انتي فاهمه سلام
تغمض عنيها شويه لحد ما تلاقي الممرضه بتصحيها وبتقولها ان نتيجة الاشعه بتاعتها ظهرت تاخد ذكرى الاسعه و التقارير و تدخل تاني للدكتورة و الدكتوره تفضل تبص فيهم كتير لحد ما تقرر انها تقول لذكرى عن اللي فيها
ذكرى : خير يا دكتوره في ايه طمنيني
الدكتوره : كان بودي اني اطمنك و الله بس
ذكرى : بس ايه يا دكتورة في ايه قوليلي الله يخليكي
الدكتوره : مدام ذكرى انتي طبعا متجوزه
ذكرى : ايوة
الدكتوره : أنا اسفه بس هو جوزك ليه علاقات نسائيه او انتي كان ليكي علاقات متعدده
ذكرى : إيه الكلام ده يا دكتورة هو في ايه بالظبط
الدكتورة : أنا اسفه اني بقولك كده بس اللي انا شايفاه ادامي في الأشعه ان عندك و.. رم في عنق الرحم وده في الأغلب بيحصل نتيجة تعدد العلاقات
ذكرى : و.. رم
الدكتوره : ايوة للأسف
ذكرى : طب و ده يعني و.. رم حميد و اللا إيه يا دكتورة
الدكتوره : مقدرش أحدد حاجه زي دي غير لما نعمل عمليه و ناخد عينه من الو.. رم و نحللها و بعد كده حنعرف اذا كان حميد و اللا إيه
ذكرى : لا مش ممكن يعني ممكن يكون عندي كانسر لا طبعا استحاله
قوليلي و النبي يا دكتورة انا ممكن يكون عندي سرطان
.
الدكتور : مانا قلتلك احنا مش حنقدر نعرف غير لما ناخد عينه ونحللها
ذكرى : طب و لو حصل و طلع حنعمل ايه
الدكتوره : وقتها حنضطر نستئصل الرحم
ذكرى : ايه الرحم
الدكتوره : أيوة للأسف
ذكرى : يعني انا حتحرم من اني اكون أم طول حياتي.
الدكتوره : والله انتي كان ادامك فرصه إنك تكوني ام و انتي اللي حرمتي نفسك منها و دي كانت فرصتك الأخيره
ذكرى و هي بتعيط : و بعدها حاخد طبعا كيماوي و شعري حيقع و يبقى شكلي بشع مش كده
الدكتوره : مدام ذكرى حضرتك ليه متشائمه كده احنا حنعمل العمليه و ممكن يكون حميد و مفيش منه ضرر و وقتها مش حتحتاج اننا نستئصل الرحم و لا حاجه
بس لازم بسرعه فاقرب وقت كل ما تتاخري كل ما الخطورة حتزيد
تخرج ذكرى من عندها و هي مش شايفه ادامها
تلاقي اشرف بيتصل عليها عشان يطمن على أخبارها فتحكيله و هي بتعيط جامد
اشرف : طب اهدي اهدي يا ذكرى عشان خاطري
ذكرى : اهدى اهدى ازاي يا اشرف و انا ممكن يكون عندي كانسر عارف ده معناه ايه معناه اني خلاص حنتهي أخر كنت اتوقعها
يحاول اشرف انه يهديها و يطمنها و يقوللها انه حيكون معاها وقت العمليه و مش حيسيبها لوحدها تقفل معاه و تلاقي احمد لاشين بيتصل عليها تحاول ترد عليه من غير ما تبين له حاجه : ايوة يا باشا ازي حضرتك انا بس تعبانه شويه و مش حقدر اجي لحضرتك اليومين دول
ربنا يخليك حضرتك جمايلك علية كتير منحرمش منك حاضر اكيد طبعا لو احتاجت اي حاجه حكلمك
تقفل معاه السكه و تروح البيت و عقلها فيه مليون فكره و فكره
و تلاقي نفسها بتتصل على امها : ازيك يا ماما
اه كويسه انتوا عاملين ايه و ازي همسه سلميلي عليها يا ماما
……………………………
يمر اليوم بسرعه و يبدا الكل يحضروا نفسهم انهم يمشوا كلهم مشيوا ما عدا جنه و هادي وناديه و ألاء فضلوا قاعدين معاهم سلموا كلهم على بعض
اسماء : عاوزين نشوفكم المره الجايه ان شاء الله عندنا تيجوا و تشرفونا
أدهم : متقلقيش خالص من الناحيه دي يا بشمهندسه من ناحية حنيجي حنيجي و حنشرفكم ان شاء الله
اسماء : تنورونا يا حبيبي
يسلموا على بعض كلهم و هادي يحضن مرزوقه و مسعد و يوصي فهد يوصلهم لحد باب العماره ويمشوا
نجلاء: جنه متتاخريش هنا مش حقدر اقعد لوحدي
جنه : مش حتروحي لطنط و اونكل
نجلاء : يالهوي ده انا لو قلت لفهد حيروح فيها
جنه : هههههههه اقولك خديه و روحوا
نجلاء : عنده قضية
فهد : ياللا يا بطتي
هادي اشوفك بقى في الشركه يا معلم
هادي : تمام يا صاحبي فهد امي و ابويا
فهد : و ربنا حوصلهم لحد باب العماره لو عاوزني اشيلهم و اطلعهم حطلعهم متقلقش و ربنا
يونس : مع السلامه يا حبيبي اشوفك على خير ان شاء الله
هادي : الله يسلمك منحرمش منك يا باشمهندس يارب
يونس : و لا يحرمني منك يا حبيبي
يمشوا كلهم وهادي يحضن جميله و جنه و يدخلوا
أدهم : يعني بزمتك ده ينفع
انا غلطان اني سمعت كلامك
مراد : مينفعش يا بني ادم انت الأصول اننا نروح عندهم مش نقوللهم و هما هنا انت كده تحرجهم ياللي مبتفهمش
ادهم : سبتلك الفهم يا فالح ماشي ماشي وغلاوتك هما يومين و حاخد ابوك و نروحلهم اه مانا مش حستنى لحد ما الاقيهم بيعزموني على خطوبتهم
مراد : الصبر من عندك يارب
أدهم : ربنا يصبرنا جميعا و بعدين يعني انت بزمتك مش البنت عجبتك
مراد : بصراحه هي فعلا عجبتني برغم انها لعبت معانا و هزرت بس بردو فيها حتة تقل كده جميله اوي عاجبتني و انا بحب اوي النوع ده مش زي اختها الصراحه
أدهم : سيبتلك التقل يا سيدي انا بقى مبحبش التقل انا بحب البنت اللي تدوبني فحبها و تهبلني اكتر مانا
مراد : هههههههه كويس انك عارف نفسك بس انتوا كده حتبقوا مسخره
أدهم : وهو في احلى من المسخره حاخد ايه انا من الجد لا يا عمنا سيبنالك التقل انا بقى بحب اللي بيدلدق حب و الحمد لله البت بيسان من النوع ده يااه ده احنا حنعمل عمايل
مراد : شكلكم حتبقوا زي فهد و نجلاء اللي طول ما هما قاعدين نازلين بهدله فبعض و فنفس الثانيه يحبوا فبعض بيقولوا الكلمه و عكسها فنفس اللحظه لكن بص بقى على جنه و هادي ماشاء الله عليهم حبهم راقي كده و كلامهم موزون تحسهم عصافير كناريا
أدهم : اه نظام صو صو ده لا يا اخويا انا مرارتي بتنفقع من الحب الافلاطوني ده و ميجيش معايا سكه
هو يقوللها يا صفيه هانم و هي تقولله يا سعد باشا زغلول لا يا عمنا انا مليش في الجو ده
مراد : هانم و باشا ايه يا تحفه انت ده طول الوقت يقوللها حبيبتي و هي تقولله حبيبي بينادوا بعض بأحلى الأسماء
أدهم : حلو مقلناش حاجه بس الأحلى بقى انا اقولها يا زفته و هي تقوللي يا منيل انا عاوز اتهزأ اتهزا
مراد : ربنا ميحرمك منه يارب
ادهم : هو ايه ده يا اخويا
مراد : العبط يا حبيب اخوك
. …………………………………….
بعد مرور يومين
تفوق من البنج تلاقيه قاعد جمبها : الف حمدلله على السلامه يا ذكرى
ذكرى بتعب : الله يسلمك يا اشرف
اشرف : حسه بإيه
ذكرى : تعبانه اوي مش قادره
اشرف : معلش أن شاء الله يومين و تبقي كويسه
ذكرى : يارب يا اشرف بس تفتكر النتيجه حتطلع كويسه انا قلبي حاسس انه حيطلع مش حميد
اشرف : بشروا و لا تنفروا
تدخل الدكتورة : حمدالله على السلامه
ذكرى : الله يسلمك يا دكتورة
أشرف : هي النتيجه حتطلع امتى
الدكتورة : كام يوم و ان شاء الله تطلع هو حضرتك تقربلها
اشرف : حاجه زي كده
الدكتورة : ااه طيب ماشي عالعموم انتي حتباتي النهارده معانا عشان في محاليل حيعلقوهالك و بكرة تقدري تخرجي و نتابع مع بعض النتيجه ان شاء الله
ذكرى : ماشي يا دكتورة
تخرج الدكتورة من عندهم
ذكرى : خدت بالك بتعاملني ازاي
حساها زي ما تكون فاكراني بس هو انا مضايقه ليه ما هي فعلا معاها حق
اشرف : ذكرى من فضلك بلاش دلوقتي تفكري في أي حاجه اهم حاجه دلوقتي نطمن عليكي و بس
ذكرى : انا اللي عملت فنفسي كده صح يا اشرف
اشرف : احمدي ربنا انها جت على اد كده يا ذكرى في امراض اكبر بكتير بتيجي نتيجة تعدد العلاقات و ملهاش علاج ربنا رحيم اوي بالناس يا ذكرى و مبيظلمناش احنا اللي بنظ.. لم نفسنا
ربنا سبحانه وتعالى جعل للست فترة عدة بعد الانفصال او بعد وفاة زوجها اولا عشان لو في حمل تتأكد منه فتنتظر انتهاء الحمل عشان تقدر تتجوز تاني لأن مينفعش ان راجل يروي زرعة راجل تاني و ثانيا عشان الرحم يتبرا من اي ماء للرجل داخل رحم الست لأن تعدد ماء الرجل في الرحم جوة رحم الست بيسبب لها الأمراض
افتكر ان جه الأوان انك تفوقي بقى يا ذكرى من كل اللي انتي فيه ده و تمشي في الطريق الصح لأن كل اللي انتي فيه ده مش حيوصلك غير للضياع
ذكرى : تفتكر اني ينفع بعد كل اللي عملته ده اني ارجع عنه
اشرف : و مفتكرش ليه يا ذكرى ربنا رحمته واسعه و بيقول في كتابه الكريم قل يا عبادي الذين اسرفوا على أنفسهم لا تقنطوا من رحمة الله ان الله يغفر الذنوب جميعا انه هو الغفور الرحيم
صدق الله العظيم
ذكرى : صدق الله العظيم
طب انت يا اشرف ممكن لو انا اتغيرت تفضل معايا و جمبي و متسيبنيش
اشرف : و هو انا سيبتك امتى يا ذكرى مانا معاكي اهوه و جمبك و اوعدك يا ستي اني مش حسيبك ابدا
ذكرى : انا بشكر الظروف اللي جمعتني بيك يا اشرف
اشرف : اللقا نصيب يا ذكرى و كل حاجه مقدره عند ربنا اهم حاجه دلوقتي نطمن عليكي و ربنا يعديها على خير
ذكرى : أنا قلبي بيقوللي انها مش حتعدي يا اشرف
- يتبع الفصل التالي اضغط على ( رواية احتواء قلب ) اسم الرواية