رواية رونز وادهم الفصل الخامس 5
Part (5)
الجدة: اعمل حسابك هنروح زيارة لعمتك وبالمرة نفتح معاها موضوع رونز
تميم بصدمة: لا مستحيل انت بتقولي ايه
الجدة بصرامة: زي ما سمعت أتمنى تنفذ اللي بقول عليه
تميم بغضب: لحد امتى هفضل أراضيك كدا وانت كل اللي بتعمليه غلط
الجدة بغضب: ازاي تتكلم كدا يا ولد
تميم: مش قصدي بس رونز أختي وهي مخطوبة من أدهم صاحب عمري فاكرة!
الجدة بغضب: صاحب عمرك اللي أخوه جرح قلب حفيدتي ولا اللي كان السبب إنها تسافر ولحد دلوقت مش قادرة ترجع لـ حضن أهلها ولا أقولك ابن الشرقاوي اللي فضحنا وسيرتنا على كل لسان قولي!
تميم: وأدهم سببه ايه بس يا تيتة انت ناسية إنه ليه فضل علينا
الجدة: مش ناسية بس برضو مش هنسى اللي حصل في بنتي وبنت ابني بسببهم
تميم: طب ما عمتو سهير سامحت واتكلموا وحبايب مع بعض انسي بقى انت كمان
الجدة: اذا كانت بنتي اتهبلت أنا لا واتفضل يلا علشان قدامنا سفر طويل
تميم طلع أوضته واتنهد ودخل ياخد شور علشان ينام ويرتاح من الضغط اللي عليه
في مكان تاني
أدهم بعد ما خلصو أكل أخد رونز وماما سهير ووفاء وطلعوا يشوفو الشقة
أدهم: ايه رأيك يحبيبي محتاجة فيها أي تغيير
رونز: لا جميلة أوي بس يعني..
أدهم بحنية: قولي اللي نفسك فيه
رونز: عاوزة تبقى البلكونة مليانة ورد ونعناع ونعملها قعدة مريحة لينا نتكلم فيها
أدهم بفرحة: بس كدا من عيوني وأهو بالمرة البت شروق تعملها على زوقها
رونز ظهر عليها الحزن: وانت تفتكر شروق هترجع يا أدهم؟
أدهم بزعل: والله هترجع هي بس مجروحة من اللي عمله سليم فيها بس أوعدك كل دا هيتصلح
رونز والدموع في عينيها: بس أختي شكلها مش هترجع شروق زي ما كانت يا أدهم
أدهم: والله يا رونز سليم بيحبها بس عمل كدا ليه مش عارف ولسة لحد دلوقت مش فاهم هو مش بيدافع عن نفسه ليه دا روحه فيها والله
رونز بسخرية: بعد اللي عمله دا أعتقد سليم عمره ما حب شروق يا أدهم
أدهم بإصرار: لا بيحبها وبيعشقها كمان وبكرا الأيام تثبت ليك وأنا واثق إنه عنده سبب لكل دا
رونز بخوف: انت ممكن تعمل زيه
أدهم بحنية: عمري دا انت الحاجة الوحيدة يا رونز اللي بعمل كل دا علشانها ، أنا روحي موجودة بيكِ انت يا حبيبتي
رونز بتمسح دموعها: وأنا مقدرش أستغنى عنك يا أدهومي
أدهم بيحاول يضحكها: الله يرحم أيام مستر وحضرتك
رونز بخجل: أنا غلطانة نرجع لـ احترامنا تاني
أدهم: لا بالله عليك زي ما انت كدا ، بقولك ايه ما تيجي نحاول معاهم تاني ايه رأيك
رونز بعدم فهم: نحاول مع مين؟
أدهم: مع شروق وسليم
أصل افهم سليم مش هيتحرك غير لما يشوف شروق بتضيع من ايديه بجد احنا بقى لازم نصورله الموضوع دا
رونز بغباء: بس ازاي وشروق مسافرة ورافضة تنزل
أدهم بخبث: يبقى نتفق انا وانت وعمر ولازم ينزلو يا حبيبتي
عند سهير ووفاء
الأم وفاء وهي نازلة قدام شقة سليم عيطت
الأم سهير بحزن: اهدي بلاش تعمل في نفسك كدا هيرجع بإذن الله
وفاء: امتى بس ابني بيضيع مني انا تعبانة علشانه والله يعني ايه بيكلمني مرة في الأسبوع وأدهم أخوه محتاجه وفوق كل دا شروق..
وفاء سكتت علشان عرفت انها بتجرح كدا سهير
سهير عيونها دمعت لما سمعت اسم بنتها اللي وحشتها ورافضة تنزل
سهير بدموع: تفتكر شروق هترجع تاني يا وفاء تفتكري الحب اللي كان بينهم لسة موجود؟
وفاء بسرعة أخدتها في حضنها: والله كل حاجة هتتصلح مجرد وقت زي ما سليم قالنا والله هترجع وهنفرح بيهم يحبيبتي
سهير بدموع وبتشدد على حضنها: يارب يوفاء يارب انا تعبت بجد وكل اللي مصبرني على سليم إني عارفة سليم عمل كدا ليه خصوصاً وأنا واثقة إنه روحه في شهد
وفاء: كله هيبقى بخير يا حبيبتي وقريب أوي بإذن الله
خلص اليوم على أبطالنا
وكله روح بيته
الصبح
أدهم صحى وأخد شاور واتصل على رونز قالها اجهزي هاخدك معايا في الطريق مادام عندك عند عمر
رونز جهزت نفسها ونزلت لـ أدهم متحمسة
رونز بحماسة: صباح الخير يا معلم هه الخطة ايه؟
أدهم بيضحك: معلم!..خاطب بتاع قهوة بس المهم مستعدة لـ المعركة
رونز بحماس أكتر : لنبدأ المعركة
أدهم بيضحك: نبدأ ايه اصبري الأول لما نروح لـ عمر وهنحتاج برضو مساعدة فوفا وسوسو حبايبنا برضو
رونز: بس ايه دخلهم في الموضوع
أدهم وهو بيستعد انه يتحرك: ازاي بس دول أساس الموضوع كله
واتحرك لـ مكان الدرس
أدهم وصل لـ الدرس هو ورونز
أدهم لـ رونز: ادخلي دلوقت الدرس وبعد الدرس نبقى نتجمع انا وانت وعمر
رونز: حاضر
أدهم بتحذير: رونز ضحك بصوت عالي أو كلام بصوت عالي لا
رونز بطاعة: حاضر والله
أدهم: أشطر كتكوت يلا يحبيبي ادخل
عمر طلع ليهم: ما لسة بدري عاوزين عصير ايه بقى بالمرة مع شجرة الليمون
أدهم: لا خفيف ياض يلا يخويا قوم شوف هتعمل ايه
رونز لسة هتدخل
عمر بقلق: رونز هي شهد فين؟
رونز بإستغراب: مش عارفة بس المفروض قالتلي هكلمك امبارح ونسيت أنا حتى أكلمها
عمر: طيب ادخلي واحجزي ليها في الصف الأول معاك
رونز بخبث: بس هي قالتلي من آخر مرة اننا هنقعد في الآخر
عمر بإبتسامة ساذجة: لا معلش هتقعد في الأول
أدهم كل دا بيكتم ضحكته على الغبي دا وبيضربه على قفاه وبيقوله: اتكلم مع رونز حلو ياض ومادام يخويا حنين كدا روح شوف غابت ليه
عمر: اه يعم ايدك تقيلة وبعدين أختي يعم
رونز بتضحك: ولا يهمك يا عمور
ادهم: عـ ايه يبابا..رونز ادخلي الدرس بدل ما أفتح دماغك انت وهو واستنى يا عمر عاوزك
رونز بتكتم ضحكتها وتدخل
عمر: ايه يعم فيه ايه اخلص عاوز أشوف البت دي فين لحد دلوقت
أدهم: عاوزين نعمل حاجة علشان سليم وشروق
عمر بتهكم: لا يراجل وهنعمل ايه بقى ما سليم خربها على دماغ الكل
أدهم: بس انت عارف إنه بيحبها واحنا عاوزين سليم يتواجه معاها ويحس إنها بتضيع منه علشان يحكي السبب اللي مخبيه عننا
عمر: نفس إحساسي واللي مخليني صابر عليه انه عمل كدا في أختي إنه متأكد فيه سبب وقوي كمان علشان يعمل فيها كدا..بس والله يا أدهم لـ أندمه حتى لو سامحته مش هيطولها بالساهل برضو
أدهم: خلص الدرس وانا عرفت رونز وهنقعد نشوف الموضوع دا
عمر: تمام على خير بإذن الله
عمر خلص مع أدهم وراح يتصل على شهد علشان لسة م جات ليه
عند شهد
الفون كان بيرن وشهد لسة نايمة مسكت الفون وفتحت من غير ما تبص على الإسم
شهد: ألو
عمر بسخرية: لا صباح الخير أوي ست الحسن لسة نايمة نيجي نشرح ليك في البيت بقى
شهد قامت مفزوعة: ع عمر قصدي مستر عمر
عمر بيضحك وفي سره: ايه الصوت اللي بيشقلب كياني دا بس
عمر بيحمحم: صباح الخير يا أبلة ايه ناوية تيجي الدرس بعدها بساعة ولا ايه؟
شهد بتوتر: ل لا أصل مكنتش مكنتش جاية النهاردة
عمر بغضب: ليه بقى إن شاء الله
شهد بغضب من كلامه: كدا مش هعرف آجي يا مستر وياريت حضرتك تركز مع اللي موجودين وإن شاء الله هعمل اللي عليا لـ حصة المرة الجاية
عمر بهدوء مخيف: هقفل معاك وعشر دقايق عشر دقايق يا شهد والله لو ما لقيتك قدامي هاجي البيت ومش هتعرف هعمل ايه بقى
شهد بتوتر أكتر: تيجي بيت ايه وبعدين مينفعش كدا حضرتك
عمر: سمعت انا قولت ايه أظن كلامي مفهوم العشر دقايق بدأوا يخلصوا وانت وراحتك بقى وقفل السكة
شهد: عااا غبية بترد ليه يغبية وقامت بسرعة تلبس علشان تلحق الوقت
قامت بسرعة ولبست وجهزت نفسها وهي طالعة
الأم بإستغراب وضحك: ايه يبنتي انت مش قولتي مش هروح النهاردة عناد فيه
شهد: اتصل عليا هددني عشر دقايق وهيجي هو هنا ويعرفني يعني ايه العناد بصحيح
الأم بتكتم ضحكتها: طب يدوبك الحقؤ بقا ألا ينفجر فيك
شهد طلعت بسرعة: ادعيلي بالله عليك ألا يعمل مني شاورما
الأم بضحك وهي بتقفل الباب: ربنا يهديه يبنتي ويحنن قلبه عليك
شهد وصلت الدرس ودخلت كان بدأ شرح
شهد: السلام عليكم
عمر: وعليكم السلام ورحمة الله وبركاته ، اتفضلي وبعد الحصة تستني
شهد بصيت في الأرض ودخلت وبتدور على رونز لقيتها في أول صف
شهد برقت ليها إنها قعدت في الصف الأول وحاجزة ليها بحيث تكون قدامه بالظبط
شهد بعد ما قعدت: هو دا اللي قولتلك هنقعد بعد كدا برا هه لما نطلع
رونز بتكتم ضحكتها:مليش دعوة أنا بريئة يا عفاف
عمر بص ليهم: نبطل كلام شوية ونركز
خلص شرح وشهد لميت حاجتها بسرعة علشان تمشي مع رونز ولسة هتطلع بسرعة معاها
عمر وقفها: أظن قولت تستني بعد الحصة حصل ولا لا؟
بص لـ رونز:اسبقيها انت يا رونز
شهد بتبلع ريقها: عندي درس تاني وهتأخر ولسة هتطلع عمر وقف قصاد الباب
عمر: امم طيب زي الشاطرة بقى كدا تقف قدامي وتقوليلي غلطت قد ايه النهاردة وتقوليلي غلطت في ايه
شهد بغضب: ايه الشغل دا انا مش ملزمة أعمل كدا يا مستر
عمر بيقرب منها: يبقى نتعاقب يقلب المستر
شهد بتبعد: م مستر عيب كدا لو سمحت ثم إنك ملكش الحق تدخل كدا في حياتي وتتحكم فيا بالطريقة دي
عمر بإستفزاز : انت كلك على بعضك كدا تخصيني يا شهودي وبكرا هنعرف مليش حق فيكي ازاي وبدأ يقرب تاني يلا ابدأي غلطت في ايه علشان صدقيني هتتعاقب وجامد
شهد بدموع: انت عاوز ايه مني بجد انا تعبت مرة تطلعني سابع سما وفجأة تنزلني سابع أرض انا تعبت من تفكيري بسببك
عمر بيقرب ويمسح دموعها: هشش اهدي شهدي مينفعش تعيط
شهد بتبص في عينيه: شهدك؟!
عمر: احم يلا غلطاتك؟
شهد نزلت وشها في الأرض: مغلطتش
عمر بإبتسامة وتهديد: يبقى نتعاقب وبدأ يقرب منها لحد ما حاوطها بإيديه في الحيطة وبتهديد جاهزة؟
شهد بدموع: عمر أ..أنا بـ...
يتبع..
•رأيكم وعاوزة تفاعل يفرحني وادعولي تعدي الفترة عليا بخير🤎
توقعاتكم هو سليم عمل ايه في شروق صحيح؟ 🤔
بقلم: رُونز مراد
•تابع الفصل التالي "رواية رونز وادهم" اضغط على اسم الرواية