رواية موضوع عائلي الجزء الثاني 2 الفصل الرابع عشر 14 - بقلم رحاب القاضي

  

   رواية موضوع عائلي الجزء الثاني 2 الفصل الرابع عشر 14 -  بقلم رحاب القاضي

 

#موضوع_عائلي

“الجميله والشعر الابيض”

_البااارت الـ 14

ــــــــــــــــــــــــــــــــ

“فأنِستُ بِها أُنس الغَريب بالغَريِب”.

_ قدام مدرسة ولاد يونس..

نزل من عربيته بسرعه وقرب من شهد اللي كانت قاعده علي كنبه خشب صغيره قدام المدرسه وحاضنه يوسف وبتعيط وقالها بقلق وخوف..

يونس

في ايه، وايه اللي حصل وازاي يعني يتخطف من قدامك؟….

شهد ببكاء

مش عارفه والله كتن واقف بعيد عني شويه وانا اتلهيت في يوسف وببص عليه شوفت اللي حصل واللي قولتهولك..

يونس بعصبيه

وانتي دماغك فين تسبيه بعيد عنك ليه، مش عارفه تاخدي بالك منهم اتنيلي قوليلي وانا اتصرف..

شهد ببكاء وخوف

قول كل اللي عايزه بس رجعهولي، وو وهو مين اللي ممكن يخطفه اصلا وليه، انا خايفه اووي عليه يا يونس؟..

_قبل ما يرد عليها موبيله رن، واول ما مسكه وشاف اسم اللي بيرن عليه زاد خوفه اكتر، ورد وقال..

يونس

عايز ايه؟..

زكريا بسخريه

ما بلاش التناكه دي يا شبح، انت ممكن تكون بلطجي ومتربي في الشارع بس مش قتال قتله واسمك ما بيتذكرش في جرايم زي العبد لله..

يونس بحده

عايز ايه؟…

زكريا بجمود

ما تدورش علي ابنك هو معايا..

يونس بغضب

وحياة امك لو ابني حصله حاجه لامحيك من علي وش الارض….

زكريا بهدوء

بس من غير رغي وكلام كتير، ابنك معايا وانت مش هتعرف تاخده مني غير لما تسمع كلامي وتعملي اللي عايزه والا ورحمة امي اللي انت لسه جايب سيرتها ما هتشوفه تاني في عمرك كله..

_مسح يونس بأيده علي وشه وكان عيتجنن من فكرة ان ابنه دلوقتي مع مجرم زي ده، وكانت حالة شهد اصعب منه وهي مش فاهمه ايه اللي بيحصل، وسألت يونس وقالتله..

شهد

في ايه؟ يزن فين يا يونس؟..

بصلها بقلة حيله ورد علي زكريا وقال بهدوء

هعملك كل اللي عايزه مهما كان بس ابني يرجع النهارده قبل بكره..

زكريا ببرود

اممم نسيت انا عايز ايه، اقفل ولما افتكر هكلمك واقولك..

يونس بغضب

انت هتستهبل يااااه والله ااا..

_ قفل زكريا في وشه بعد ما اشعل غضبه وهو مستغل اقوي نقطة ضعف عنده وهي عائلته..

شهد بخوف

في ايه يا يونس، ابني فين؟..

يونس بهدوء

هرجعه يا شهد مشكله في الشغل وو..

زعقت فيه وقالت

انا مالي بشغلك انا وولادي مالنا بيك..

يونس بحده

علي فكره ده ابني زي ما هو ابنك برضو…

شهد بعصبيه ودموع

بالاسم وبس انت مش بتحبهم ولا ليك فيهم حاجه انا وولادي ما شوفنااش منك اي خير، كل حياتنا معاك تعب وبس واسمك ده كمان لسه بيتعبنا، اما بجد زهقت منك وتعبت…

_بان وجعه من كلامه في دموعه اللي لمعت في عينيه، ورد عليها بهدوء وقال..

يونس

برضو ولادي يا شهد، ودلوقتي تيجي انتي ويوشف معايا لحد ما اخلص المشكله دي ونشوف هنعمل ايه..

شهد بحده

انا هروح لصبري وهبلغ ان ابني اتخطف..

يونس بجمود

ما ينفعش انا هرجعه النهارده قبل بكره يا شهد، لو بلغتي الموضوع هيروح في حته وحشه..

_فضلت تعيط بحزن وخوف، وهو قرب منها ومسك ايدها وقالها بهدوء…

يونس

ما تخافيش والله هيرجع يا شهد انا مش هخلي ابني تحصله حاجه حتي لو كان التمن عمري كله..

سحبت ايدها منه وشالت يوسف وقالتله

انا هرجع البيت عند اخويا وانت كلم المدرسه الاول قولهم ان ما فيش حاجه لانهم مستنين نقدم بلاغ رسمي عشان اللي حصل ده حصل قدام المدرسه..

يونس بجمود

اركبي العربيه يا شهد انتي هتيجي معايا ما اضمنش وانتو بعيد عني ممكن يحصل ايه،استنيني في العربيه وانا هشوف الموضوع في المدرسه واجيلك..

_سمعت كلامه وكانت مرعوبه علي ابنها اللي مش عارفه هو فين وبيعملو فيه ايه دلوقتي..

ــــــ #بقلم_الكاتبه_رحاب_القاضي ـــــــ

_في بيت جميله..

كانت قاعده خايفه قدام فريده اللي واقفه قدامها، وقالت بغضب..

فريده

قولي ان اللي سمعته ده اي كلام وانك بتهزري يلا؟..

جميله بهدوء

لا يا ماما مش بهزر وانا بتكلم جد دلوقتي عمار بيحبني وانا كمان بحبه وعايز يجي يقابلك ويخطبني..

فريده بحده

خبطوكي في عمود نور يا جميله عشان ارتاح منك، مين ده اللي بتحبيه من همك بتحبي واحد يخلفك..

جميله وقفت وقالت

بلاش افوره يا ماما الفرق بيني وبينه في العمر مش كبير والله..

فريده بحده

هو ايييه اللي مش كبير، ده ابنه طولك يا جميله ده راجل احنا مش قده ولا ننفع ندخل حياته اصلا..

جميله بضيق

لييه يا ماما ما انتي كنتي لسه هتخليه يقف جنبنا لو كنت هتجوز غيره..

فريده بحده

يقف جنبينا حاجه واني اجوزه بنتي حاجه تانيه، انتي عايزه الناس تقول علينا ايه؟..

جميله

واحنا مالنا ومال الناس وبعدين هو عمار في ايه هيخلي الناس تتكلم ده اسمه يشرف اي حد…

فريده

في اي حاجه الا انه يتجوزك، بالعقل كده الناس هتقول فريده جوزت بنتها لواحد قد ابوها عشان الفلوس، وهيقولو اتجوزك عشان يتسلي بيكي ان ما كانش كده فعلا الموضوع..

جميله بدموع

يا ماما واحنا مش محتاجين فلوس، احنا ورثنا اللي عند عمي بغرقنا فلوس، وعمار مش قد ابويا ومش بيتسلي بيا هو عايز يتجوزني قدام الناس كلها..

فريده بحده

بطلي غباااء وهبل بقي، واحد زي ده هيبصلك انتي ليه وعلي ايه. هيسيب الستات اللي حواليه دول كلهم مال وجمال ويتجوزك انتي ليه. ما تبقيش عبيطه وفكري كويس هو اللي زي عمار ده لو كان بتاع جواز كان اتجوز من زمان ايه اللي كان معطله…

جميله دموعها نزلت وقالت

بس هو قالي انه اا..

قربت منهة فريده ومسحتلها دموعها وقالت

هو يقول براحته بس انتي اوعي تصدقيه، انا امك واعرف اكتر منك ده راجل لو محترم ما يبصش لوحده في سنك ولا زيك يتجوزها هيختار المناسبه ليه، انما اللي زي دول بيبصو للبنات اللي في سنك بطريقه مش كويسه….

جميله ببكاء

انا فاهمه كلامك ده وكنت خايفه منه بس هو هيتجوزني يا ماما…

فريده بحده

انتي مش فاهمه حاجه يا جميله ودماغك صغيره. والمشاعر دي جديده عليكي وممكن تاخدك لسكه غلط، هو ممكن يتجوزك يومين ويطلقك هتبقي مبسوطه وانتي مطلقه..

جميله بحزن

لا طبعاً..

فريده

يبقي تسمعي كلامي وتقطعي علاقتك بالراجل ده خالص..

جميله بدموع

حاضر يا ماما بعد اذنك..

_ قالت كلامها وسابتها ودخلت اوضتها، وراحت وراها ايتن اللي كانت سامعه كل حاجه وقالتلها..

ايتن

انتي تبقي غبيه اووي لو صدقتي كلام ماما، انا بجد مصدومه فيها ازاي تفكر كده..

جميله وقفت قدام المرايا وقالت بدموع

ماما معاها حق واحده زيي مش حلوه اووي ولا فيا اي ميزه وشخصيتي زي العيال الصغيره عمار المنشاوي هيبصلها ليه الا لو كان عايز يتسلي…

ايتن بحزن

لا الله انتي حلوه اووي و..

جميله بنبره متألمه

ما تكذبيش يا ايتن انا عارفه اني مش حلوه واني مش شبه البنات اللي في سني خالص واني مهمه عملت مش هكون زي بنات خالنا او قرايبنا عموماً…

ايتن بضيق

لا والله انتي احلي منهم كلهم كفايه قلبك الطيب.

جميله ببكاء

لا مش احلي منهم انا فاهمه كويس ليه ماما دينا بتاخدك معاها مناسبات قرايبنا عشان انتي احلي مني وبتلبسي وبتتكلمي احسن مني…

ايتن بدموع

لا ماما ما تقصدش يا جميله بلاش تفكري كده..

ذقتها جميله بهدوء وقالت

اطلعي بره يا ايتن انا عايزه افضل لوحدي..

ـ وقفلت باب اوضتها وراحت قعدت علي سريرها وهي بتعيط، افتكرت كلامه ليها اللي حسسها انها مميزه وحلوه ورجعت تاني زي الاول شايفه نفسها مش حلوه بالمره..

_ مسكت موبيلها وعملت بلوك لرقم عمار ورجعته تاني مكانه ونامت وهي حاضنه العروسه بتاعته اللي جبهالها لما كانو في شرم الشيخ.

«شئ مؤلم أن يفقد المرء ثقتهُ في نفسهِ»

ـــــــــ #بقلم_الكاتبه_رحاب_القاضي ــــــــ

_ وفي شركة عمار المنشاوي….

كان بيكلم يونس اللي قاعد قدامه وهو مدايق جداً وقاله..

عمار

طيب اهدي وانا..

قاطعه يونس

ما تقوليش اهدي لو سمحت انا ابني مخطوف ومن اخوك اللي انت وانا عارفين هو ايه كويس اووي..

عمار بنفاذ صبر

طيب انا اعمل ايه دلوقتي، لما يكلمك تاني نشوف عايز ايه..

يونس وقف وقال بعصبيه

هو انا جاي اشحت منك، انت اللي دخلتني بينك انت والزفت اخوك وتتصرف وتطلع ابني بره الموضوع ده وبرضو مش هعديها معاه علي خير لان عيلتي خط احمر..

قدر عمار عصبيته وخوفه علي ابنه وقاله

انا مش قصدي اللي انت فهمته، بس زكريا حوراته كتيره وما اعرفش هو ممكن يكون مخبي ابنك فين..

دخل عندهم عز الدين في الوقت ده وقال

في ايه يا جماعه صوتكم جايب اخر الدنيا ليه؟..

عمار بضيق

زكريا اخويا خطف ابن يونس…

عزالدين بجديه

طيب بالراحه والموضوع يتحل، شوفو بس هو عايز ايه وايه غرضه من انه يخطف الواد؟….

عمار بضيق

ما هو ده اللي انا بتكلم فيه وهو مش فاهمني..

عز الدين

معلش يا عمار ده ابنه برضو واخوك مش سبونج بوب عشان الراجل يطمن ان ابنه كويس انت اخوك مجرم..

_في الوقت ده رن موبيل يونس برقم زكريا فرد بسرعه وقال..

يونس

ايوه انا معاك اهو…

زكريا بسخريه

ابنك ده بيحبك اووي حتي انه مش راضي يكلمك وبيقول عايز ماما بس ومش عايزك خالص، انت عامل ايه للولد؟…

_مسك عمار الفون من ايد يونس اللي كان متعصب جداً بس خوفه كان اكبر علي ابنه، وقال عمار بحده لزكريا…

عمار

الولد فين يا زكريا؟..

زكريا بجمود

اهلا اهللا، طيب بما انكم مع بعض يبقي تنفذو اللي هقوله بالحرف الواحد…

_كان يقصد بكلامه يونس وعمار، بس التلاته بصو للموبيل بأهتمام وقلق وهو قال…

زكريا

الساعه ٧ بالليل تيجي يا ابو يزن ومعاك اخويا ومعاه العقد اللي بيتنطط بيه ده، وهبعتلكم العنون ولو بقي عملتو فيها ناصحين عليا انا هعرف اخلص نفسي بس الولد الصغير الامور ده هيروح في الرجلين تمام..

يونس بجديه

ما حدش هيعملك حاجه وكل اللي عايزه هنعمله، بس ابني ما تحصلوش حاجه..

زكريا ببرود

بالليل هبعتلكم العنوان…

_قفل في وشهم كالعاده ويونس بص لعمار بغضب وقاله…

يونس

انت السبب وانت اللي تحل الموضوع مع اخوك..

عمار بضيق

حاضر..

وبص لعز الدين وقاله

خليك انت هنا وانا همشي ووقت ما يكلمك يا يونس كلمني وانا هجيلك..

طلع يونس وهو مدايق وقال عز لعمار

معلش يا عمار ده ابنه برضو وبعدين هو منفصل عن مراته وبيحاول يرجعلها واكيد اللي حصل ده هيبوظله الدنيا اكتر…

عمار اتنهد بضيق وقال

ماشي يا عز، خليك انت هنا بقي ولو في حاجه كلمني..

_قال كلامه ومشي وعز الدين رجع مكتبه وكانت فيروز بتتكلم في الفون وهي مدايقه ولما شافته قالت لمامتها…

فيروز

خلاص يا ماما اكلمك وقت تاني..

_قفلت الفون وكان باين عليها انها مدايقه جداً، وقالتله بكل هدوء…

فيروز

خير يا عز بيه حضرتك تؤمر بحاجه؟..

عزالدين

هو انتي عندك مشكله لو طلبت من عمار انه يدور علي سكرتيره تانيه وانتي تفضلي معايا هنا؟..

فيروز بتوتر

ااا اللي يشوفه عمار بيه انا موافقه بيه…

عز الدين

خلاص تمام يبقي هنكمل سوا، كنتي بتكلمي مين بقي؟..

فيروز بعدم فهم

نعم؟..

عزالدين

كنتي بتكلمي مين وشكلك مدايق كده؟..

فيروز بجديه

لو حضرتك اخدت بالك انا كنت بقول يا ماما فأكيد كنت بكلم ماما يعني..

عز الدين

اممم انتي ليه بومه كده يا فايزه!..

فيروز بضيق

اولا اسمي فيروز ثانياً ازاي يعني بوومه مش فاهمه..

_فتح كاميرة موبيله ووقف جنبيها وحط الموبيل قدامها وقال..

عز

بزمتك دي خلقه اصطبح بيها كل يوم، في الابتسامه الرقيقه اللي تفتح النفس..

بعدت عنه بتوتر من قربه وقالت

والله انا جايه هنا اشتغل مش جايه اوزع ابتسامات ولو حضرتك مش عجباك خلقتي امشي انا واختار انت سكرتيره علي مزاجك..

عز بجديه

لا هو انا لسه هدور، وبعدين بهزر معاكي احنا بنشتغل سوا ولازم تكون علاقتنا حلوه، مش علي طول قالبه خلقتك عليا كده…

فيروز بسخريه

ده مالوش علاقه بالشغل انا شكلي كده، وقولت لحضرتك لو مش عاجبك شوف غيري..

وقربت من مكتبها ومسكت ملف في ايدها وقالت

ده الملف اللي حضرتك هتبعته للحسابات فيه خمس غلطات كانو هيعملو مشكله كبيره، ياريت حضرتك تاخد بالك او تقولي اراجع وراك ديماً..

عز بغيظ

وربنا هي..

فيروز

هي مين؟..

عز بخبث

ابله فايزه مديرة المدرسه بتاعتي زمان نفس البوز اعوذ بالله..

_قال كلامه وهو بيضحك ودخل مكتبه، وهي ابتسمت بهدوء وقعدت علي مكتبها تكمل شغلها..

ــــــــ #بقلم_الكاتبه_رحاب_القاضي ــــــــ

_في بيت المنشاوي..

كان عمار قاعد مع ابوه هناك وهو مدايق جداً بعد ما قاله علي اللي عملو زكريا..

عمار

ايه يا بابا ساكت ليه؟…

المنشاوي بضيق

واقول ايه يا عمار، انت السبب في كل اللي بيحصل ده..

عمار بصدمه

ايه انا،ليه هو انا اللي كنت قولتله يخطف عيل صغير ويوجع قلب ابوه وامه عليه؟..

المنشاوي بحده

ايوه انت بحاول احلي في صورتك قدام اخوك بس الحقيقه لا، انت اللي غلطان ياما كنت بقول كتير عشان ما تكرهوش بعض اكتر من كده، وبرضو كنت بقولك خاف علي اخوك يا عمار انت الكبير وانت ولا سمعت كلامي وضيعته..

عمار بدموع

هو الكبير ده مش من حقه يتعب او طاقته تخلص، ليه ديما هو اللي لازم يضحي، انت نفسك لما هو زعل سيبتني وجيت ورااه هنا ونسيت ان انا كمان ابنك…

المنشاوي بحده

هو كان موجوع منك ما كنتش اقدر اسيبه..

عمار بلوم

وانا كنت هتجنن من خوفي ان كل تعبي يضيع بسبب غلطه عملها ابنك، كنت محتاجلك جنبي بس انت زعلت علي زعله وقتها وسيبتني لوحدي انا وابني وانا اتحملت وجيت اصالحكم واعتذرتله بدل المره عشره اعمل ايه تاني..

المنشاوي

بس اعتذارك ده جه متأخر يا عمار، جه بعد ما اخوك راح في سكه ضلمه..

عمار بسخريه

برضو انا اللي هتحمل غلطه، طيب يا بابا اطمن انا هتصرف واحل الموضوع ده ارتاح انت..

_ قال كلامه وطلع وهو مدايق جداً، وفي الوقت ده في شركة يونس..

كان قااعد مع يوسف اللي بيحاول يواسيه علي ابنه اللي لحد دلوقتي مخطوف ومش عارف يرجعه..

يوسف

هو مش وحش لدرجة انه يأذي طفل يا يونس فاطمن..

يونس بضيق

اطمن ازاي بس ده مجرم، واللي عنده ده يزن اللي اصلا العلاقه بينا متنيله لوحدها…

يوسف بحزن

والله مش عارف اقولك ايه، بس يمكن ده حصل عشان بعد ما يزن ان شاء الله يرجع تحاول تصلح كل حاجه بينك وبينه، لان هو بيدفع تمن غلطك يا يونس مع البت اللي اسمها مايا دي…

_ رن موبيل يونس بوصول رساله، مسك موبيله بسرعه ولقاها من رقم زكريا وفيها العنوان اللي هو فيه، وبعدها بعتله رساله صوتيه بيقولو فيها..

زكريا

تجيب عمار معاك وتيجي لوحدكم وانا متابع كويس كل حركه بتتحركوها فبلاش تغلط ده لو عايز تشوف ابنك تاني.

يوسف

انا هاجي معاك يا يونس..

يونس بجمود

لا انت تروح عند شهد في بيتي وتخليك معاهم وتقولهم اني جايب يزن وجاي،عشان ما اكونش قلقان عليهن..

يوسف بقلق

طيب خلي بالك من نفسك يا صاحبي..

_ابتسمله يونس بهدوء واخد بعضه ومشي راح لعمار ورااح للمكان اللي قاله عليه زكريا وكانت شقه في مكان مقطوع وفي دور ارضي، دخل هناك عمار ومعاه يونس وكان المكان فاضي وما فيش حد..

يونس بغضب

هو اخوك بيلعب بينا ولا ايه؟..

عمار بقلق

مش عارف بس ااا..

_ قبل ما يكمل كلامه لقي في اربع شباب دخلو عندهم كل واحد منهم قد الحيطه وقفلو باب البيت عليهم وقال واحد منهم..

الولد

زكريا موصينا عليكم اوووي وطالب انكم تتروقو علي الاخر..

ضحك عمار بهدوء ويونس قال بغيظ

انت بتضحك علي ايييييه، ده احنا هنتروق.

_قلع عمار جاكيت بدلته وقلع الساعه بتاعته وحطهم علي جنب في الارض وقال ليونس..

عمار

نصيحه ليك شيل اي حاجه مهمه علي جنب زي ما انا عملت كده مس هتبقي خساره من كل ناحيه..

يونس عمل زيه وقال بقلق

الله يخربيت معرفتكم…

_ وفي مكان تاني قريب منهم كان زكريا قااعد هناك ومعاه عماد اللي قاله..

عماد

ما تشوف يا عم الواد اللي قاعد جوه في الضلمه ده لا صوت ولا خبر…

زكريا

خليه يخااف اكتر عشان ابوه يفكر مليون مره قبل ما يلعب معايا تاني…

عماد بضيق

بس ده عيل صغير..

زكريا بحده

واختك كانت صغيره برضو علي اللي انا وانت عملنااه فيها فـ ما تعملش فيها حنين دلوقتي..

عماد بضيق

صح افتكرت مش انا عرفت ان ابويا قبل ما يموت قسم الورث بينا بالتساوي وطلع ما كانش افلس وكمان في شرط في الوصيه ان لو انا ومجدي اذينا جهاد الورث كله هيروح لجهاد وشيماء بس،بس مجدي وشيماء خدو هما الجمل بما حمل لوحدهم..

_بصله زكريا بأهتمام، بس في الوقت ده دخلو رجالته ورمو عمار ويونس علي الارض والاتنين كان وشهم كله كدمات وقام زكريا ووقف قدامهم وقال..

زكريا

ايه يا رجاله المنظر ده، مش حرام الكيوت دول يحصل فيهم كدا..

قام يونس وهو بيمسح وشه من الدم وقاله

ابني فين؟.

بص زكريا لعمار وقال

العقد فين؟..

_طلع عمار العقد ورمااه علي الارض قدامه، مال زكريا علي الارض ومسكه فتحه وابتسم بأنتصار وفطعه ورمااه علي الارض تاني، وراااح قعد جنب عماد وحط رجل علي رجل وقال.

زكريا

بعد كده اللي هيقف في سكتي مالوش عندي علقه او خطف، لا انا بخلص علي طول.

يونس بحده

ابنيييي فين؟..

عماد

في الاوضه دي اللحقه احسن من لما جه قااعد في الضلمه يا حرام..

يونس بغضب

انتو اييييه شياطين، ده عيل صغير…

_جري يونس علي الاوضه اللي فيها ابنه، واول ما فتح الباب ودخل اتنفض قلبه بخوف لما لقي يزن قااعد في زاويه اخر الاوضه وبيعيط وبيتنفض بطريقه صعبه… فتح نور الاوضه من بره ودخل وقرب منه وقعد قدامه وقال بدموع..

يونس

ما تخافش يا حبيبي انا جيت..

يزن ببكاء

انا عع عايز مم ماما..

_قومه يونس وخده في حضنه ودموعه نزلت بحزن علي الحاله اللي وصل ليها ابنه بسببه هو، وشاله علي ايده وقام وقف وقاله بهدوء..

يونس

ما تخافش طيب وانا معاك اهو وهوديك لماما وهعملك كل اللي انت عايزه…

يزن بدموع

مم مش هتخليني اا اقعد في الضلمه تت تاني؟…

يونس بحزن

لا والله مش هسيبك لوحدك ولا هخليك تخاف تاني….

_ وخده وطلع بره ولقي عمار لسه مستنيه، فقرب منه وادااه يزن وراح بكل غضب مسك زكريا من هدومه فجات رجالتله تقرب منهم عشان يبعدو عنه يونس بس زكريا شاورلهم ما يتدخلوش وقال يونس بغضب…

يونس

اقسم بالله لاندمك بدل المره الف علي كل لحظه ابني خاف فيها يا ابن المنشاوي..

_ وزقه جامد ووقعه علي الكنبه، وبعدين راح اخد ابنه من عمار ويزن لاول مره حضنه بهدوء وهو خايف من الكل معادا ابوه اللي جه واخده ودافع عنه…

جه يونس يركب العربيه بس عمار قاله

استني هات المفتاح انت خليك مع ابنك وانا هسوق..

يونس

طيب جيبت حاجتنا من جوه ولا لا؟..

عمار

عندك في العربيه، الناس دول محترمين اووي جابو الحاجه بنفسهم في العربيه…

_حط يونس ايده علي وشه اللي كان فيه كدمات وقال بألم….

يونس

امم واضح يلا بينا..

ـ وبعد شويه وصل يونس البيت وكان يوسف وهناء مستنينه..

_قربت منه هناء واخدت يزن اللي كان نايم وقالت بقلق….

هناء

بسم الله الرحمن الرحيم ماله الواد يا يونس؟..

يونس

مالوش بس نام مني في الطريق…

يوسف بهدوء

حمدلله علي سلامته، بس انت مال وشك هو ايه اللي حصل..

يونس

بعدين يا يوسف، فين شهد؟..

هناء

يوسف نايم فوق فلما عرفت انك قربت من البيت قالت تطلع تجيبه عشان تمشي علي طول لانها اتأخرت وما قالتش لاخوها حاجه..

يونس اخد منها يزن تاني وقال

هاتيه انا هطلعه انيمه جنب اخوه، هي عايزه تمشي تمشي لوحدها..

هناء بقلق

قصدك ايه يا واد انت؟..

يونس وهو طالع فوق

اللي سمعتيه يا ماما هناء…

هناء بغيظ

الله يخربيت امك يا شيخ لازم يعمل مصيبه ما يقعدش هادي خالص..

يوسف

شهد هتعرف تتصرف معاه ما تقلقيش، انا همشي بقي محتاجه مني حاجه يا طنط هناء..

هناء

لا يا ابني عايزااك طيب خلي بالك وانت ماشي وسوق براحه وسلملي علي بنت عظيمه..

يوسف بهدوء

حاضر…

_ مشي يوسف وطلع يونس فوق ودخل اوضة ولاده لقي شهد بتحاول تصحي يوسف فقالها وهو بينيم يزن علي سريره.

يونس

سبيه هيباتو هنا النهارده..

_قامت شهد وقعدت جنب يزن وباسته بدموع وقالت…

شهد

هو كان فين بالضبط؟..

يونس بهدوء

سبيه طيب نايم وهو كويس ولما يصحي هيقولك كل حاجه…

شهد

انا لازم اخدهم وامشي، صبري كلمني اكتر من مره ومتعصب جداً وانا ما قولتلوش حاجه وو..

يونس بجديه

ولادي هيباتو هنا النهارده، مش هصحيهم واخليهم يروحو دلوقتي..

شهد بحده

هو ايه اللي بتقولو ده انا ما اعرفش انام من غير ما يكونو ولادي جنبي.

يونس بخبث

خلاص باتي معاهم هنا..

شهد بعصبيه

هو انت بتصطاد في الميه العكره، ابات فين انت نسيت اني ما بقتش مراتك يا يونس..

_ مسك يونس ايدها وسحبها ورااه وطلعو من اوضة ولادهم واخدها اوضتهم القديمه ودخل وقفل الباب وقرب منها وقالها…

يونس

وحشتيني اووي يا شهد..

بعدت عنه بسرعه وقالت بتوتر

انت اتجننت ما ينفعش اللي انت بتعمله ده…

يونس بهدوء

نكلم المأذون دلوقتي ونرجع يا شهد، انا بجد. محتاجلك ومش عارف ابقي كويس من غيرك…

شهد بسخريه

بس انا بقيت كويسه واحسن من غيرك ارجعلك ليه بقي؟..

يونس بحده

كداابه انا متأكد انك لسه بتحبيني يا شهد..

شهد بدموع

صح مش هكدب عليك انا لسه بحبك وعشان كده انا مستحيل ارجعلك لاني ديما فاكره خيانتك ليا ومش عارفه في كل مره ما اتوجعش منها..

يونس

اللي بيحب بيسامح علي فكره..

شهد

في اي حاجه الا الخيانه، انا زي ما قدرت اعيش من غيرك هقدر ابطل احبك.

يونس بحزن

ماشي يا شهد..

وقرب من دولابه وطلع هدوم ليه وقال

انا هروح ابات في اوضه تانيه، تقدري تاخدي راحتك وفي هدوم ليكي لسه هنا…

شهد بجمود

مش هينفع انا لازم امشي..

يونس بحده

يبقي لوحدك ولادي مش هيمشو النهارده..

شهد بعِند

ماشي خليهم وابقي الصبح هاتهملي، بعد اذنك..

يونس

استني هوصلك الشوارع زحمه، “الاهلي فاز النهارده والشوارع كلها احتفالات❤”..

شهد بهدوء

ماشي يلا بينا..

_ وفعلا اخدها يونس بعربيته عشان يوصلها وقالها بخبث..

يونس

يعني ما سألتنيش مالي ولا ايه اللي حصلي، ده انتي زمان كنتي بتخافي عليا من شكة الدبوس.

شهد بلامبلاه

وانا مالي ما بقتش تخصني عشان اخاف عليك..

يونس بهدوء

اتغيرتي اووي يا شهد وبقيتي قاسيه..

شهد

فوق ما تتخيل واي حد بعد. كده هيأذيني لو حتي بكلمه هردهاله عشره..

_ وقف فجأه العربيه وقرب منها بسرعه وباسها في خدها وقال وهو لسه مقرب منها…

يونس

رديها يلا عشره…

_اتوترت جداً من قربه منها ومن تصرفاته اللي ديما بتخليها تضعف قدامه، وقالت بخجل..

شهد

انت مش متربي اصلا اوعي يا يونس واصلا هنزل وهروح لوحدي..

ضحك يونس ورجع ساق العربيه وقالها

ههههه اتنيلي يا شهد عشان انتي لا اتغيرتي ولا حاجه ولسه زي ما انتي وهتفضلي بتاعتي وليا لوحدي حتي لو عملتي ايه…

ادايقت من نبرته الواثقه وقالت بتحدي

مااشي يا يونس هنشوف..

_ وجات الظروف في صالحها لما رن عليها عدي جوز هاجر، فابتسمت بخبث وردت عليم وقالت..

شهد

الو ازيك يا عدي عامل ايه؟..

_بصلها يونس بغضب وهو سايق العربيه، وهي ضحكت وقالت…

شهد

ههههه والله وانتو كمان كلكم وحشتوني اووي..

وقف يونس العربيه للمره التانيه وحط ايده علي خده وبصلها بغضب وعصبيه، وهي حاولت تداري قلقها منه وقالت..

شهد

ماشي تمام الاسبوع الجاي هكون عنده ان شاء الله، ماشي مع السلامه وسلملي علي هاجر وحامد..

_ قفلت معاه وبصت ليونس ببرود علي عكس خوفها وقالت..

شهد

في حاجه؟.

يونس

من امتي بتكلمي الزفت ده؟..

شهد

من اا… وانت مالك هو انا كنت بسألك بتكلم مين ولا ما بتكلمش مين، وبعدين قولي هنا انا ابني كان فين ومين اللي خطفه..

يونس بضيق

غلطه في الشغل ومش هتتكرر وبعد كده السواق هيكون معاه وتنين حراس هيوصلو الولاد المدرسه ويرجعوهم..

شهد

طيب يا يونس وصلني بقي ولا انزل اخد تاكسي..

_ ما ردش عليها وساق العربيه ونار الغيره كانت بتاكله من لما شافها بتكلم عدي ومش عارف بتكلمه ليه…

ــــــــ #بقلم_الكاتبه_رحاب_القاضي ـــــــ

_ وعدي كل يوم علي ابطالنا..

كان الحال الاصعب لعمار اللي مش عارف ليه جميله بعدت عنه وعملت بلوك وبطلت تروح الشغل حتي، وهي كانت اسوأ منه وهي علي طول قااعده لوحدها لان شهد مشغوله في ولادها وشغلها الجديد اللي بترتب نفسها عشان تقدمله، وايتن مشغوله في امتحانتها، وفيروز ما فيش بينهم العلاقه القويه انها تحكيلها مشاكلها…

_ وكانت قااعده بتتفرج علي التلفزيون مع مامتها اللي قالتلها….

فريده

قوليلي يا جميله ايه رئيك في حسين ابن عمك..

جميله بحزن

كويس بس ليه بتسألي؟..

فريده بهدوء

ابداً اتقدملك من فتره وانا اا..

جميله بحده

لا طبعا حسين ده اخويا يا ماما، وانا مش عايزه اتجوز اصلا..

فريده بحده

انا بقول خلينا نتكلم في الموضوع ده وقت تاني..

_وبعد شويه الباب خبط وجميله كانت سرحانه في موبيلها وهي بتتفرج علي صورها مع عمار لما كانو في شرم والفيديو اللي اعترفلها فيه بحبه هو احتفظ بيه رغم ان اخره بااظ، وكانت عيونها كلها دموع…

فريده بحده

جميله انتي اطرشتي؟..

جميله

نعمم في ايه هو انا مش هعرف حتي احزن مع نفسي..

فريده

روحي شوفي مين بيخبط وابقي ادخلي احزني في اوضتك يا تافهه..

_ قامت جميله وفتحت الباب وهي مدايقه. واتصدمت لما لقيت عمار واقف قدامها وهو مدايق جداً..

جميله بخوف

انت ايه اللي جابك هنا وجاي تعمل ايه؟..

عمار بغضب

ليه بعدتي عني كده انا عملتلك ايه؟…

فريده من جوه

مين عندك يا جميله…

بصت جميله لعمار بخوف وهو قال؟؟….

_ تفتكرو هيحصل ايه؟…

ــــــــ #بقلم_الكاتبه_رحاب_القاضي ــــــــ

ـ عند جهاد..

كانت قااعده في صالة بيت نورا اللي كانت نايمه في اوضتها، وهي قاعده لوحدها قدام التلفزيون وماسكه في ايدها اول صوره لجنينها اللي لسه عمره اقل من شهرين..

ابتسمت بدموع وقالت

انا مش عارفه انا هربيك لوحدي ازاي، ومش عارفه اني اجيبك للدنيا دي هكون بظلمك ولا لا، بس اما مبسوطه انك معايا دلوقتي واننا روح واحده…

_ وفضلت باصه للصوره بدموع من اول ما رجعت من عند الدكتور وهي مش عارفه تبطل عياط، وجواها مليون احساس بس اكترهم الخوف اللي بقي مالي حياتها مؤخراً…

_وفجأه قامت وراحت اوضتها وغيرت هدومها، وطلعت بره البيت وراحت لبيت زكريا اللي شافته فيه اول مره، وقفت قدام الباب وندمت انها جات لحد هنا وجات ليه مش عارفه..

_وكانت لسه هتمشي بس زكريا فتح الباب وهو خارج عشان يعمل جريمه من جرايمه زي عادته، بس لما شافها اتوتر وقال..

زكريا

انتي ايه اللي جابك هنا دلوقتي؟..

جهاد حاولت تستجمع شجاعتها وردت عليه

عايزه اتكلم معاك…

زكريا بجمود

انا مش فاضي انا عندي شغل دلوقتي..

جهاد بحزن

معلش مش هعطلك..

زكريا بهدوء

طيب ادخلي..

جهاد بسرعه قالت

لا مش هينفع…

زكريا قفل الباب وقالها

تعالي ننزل تحت…

_ وطلعو الاسانسير مع بعض واول ما اتقفل عليهم الباب سوا، لعنت نفسها مليون مره انها جات لحد هنا وهو بصلها بهدوء وابتسم بتلقائيه علي خوفها منه وقال..

زكريا

انا مش هاكلك ما تخافيش.

جهاد بتوتر

انا مش خايفه اصلا..

_ ولما اتفتح الاسانسير طلعت بسرعه وهو كمان، وطلعو بره العماره وشاورلها هو علي مكان هادي قدام بيته علي النيل، وقالها..

زكريا

المكان هناك مناسب اننا نتكلم ولا نقف في نص الشارع ونتكلم عشان ما تخافيش…

جهاد بضيق

قولتلك مش خايفه..

زكريا بهدوء

طيب تعالي…

_ ومشي قدامها وهي ورااه وراحو المكان اللي شاورلها عليه وكان عباره عن كنب خشب متهالك شويه وقدامهم النيل اللي فيه مراكب مزينه، راحو وقعدو بعيد عنهم شويه وهو قالها..

زكريا

خير يا جهاد؟..

جهاد بجديه

هو انت بتشتغل ايه؟..

زكريا بقلق

احمم يفرق معاكي في ايه؟…

جهاد بهدوء

عشان لما ابننا يسألني انت شغال ايه اعرف ارد عليه..

زكريا بسخريه

والله؟! مش كنتي هتنزليه عشان هو من واحد زيي..

جهاد بضيق

ايوه بس مش هنزله ربنا هو اللي جابه وانا ماليش حق انزله واموته قبل ما اشوفه..

زكريا

وعايزه مني ايه؟..

جهاد بتوتر

نن نتجوز عشانه، عشان يتكتب بأسمك وبعد كده طلقني انا كده كده مش هعيش معاك لحظه واحده بس مش عايزااه يتعب في حياته ويبقي من غير اب..

زكريا بهدوء

فاهمك بس انتي افهمي مجرد ان اسمه هيرتبط بأسمي خطر عليه، عايزه تعرفي انا شغال ايه يا جهاد انا م…

قاطعته وقالت بدموع

ارجوك ما تهربش انا مش هعرف اتحمل كلام الناس عليا وعليه لو انت ما عملتش كده…

زكريا وقف وقال بحده

مدام مش هتقدري يبقي بلاش تخليه يجي اصلا، وبلاش تستني مني حاجه ما اقدرش انا كمان اعملها..

جهاد ببكاء

بس انا ماليش حد هو اللي هيكون معايا، انا اخواتي رموني ودمروني ومش عايزه اعيش مع عماد وابقي وحشه كفايه اللي حصلي ومش عايزه ابقي لوحدي عشان بعد اللي حصل بينا انا مش هعرف اكمل حياتي مع حد، ربنا بعته ليا عشان اطمن اني مش هكون لوحدي…

مسحت دموعها وقالت

ارجوك وافق هو ابنك برضو ومحتاجلك وو وانا كمان محتجالك…

_بص لدموعها بحزن وبعدين مسك موبيله اللي كان بيرن برقم منعم اللي وصل تحت البيت ومعاه اتنين تاني من رجالة زكريا عشان ينفذو جريمتهم الجديده، وقالها بضيق…

زكريا بحزن

مش هقدر يا جهاد ومش هينفع..

_ قال كلامه وسابها ومشي، وهي فضلت قااعده مكانها وهي بتعيط.. وبعد شويه رجعت البيت ولقيت مجدي قااعد مع نورا وفي بودي جارد معاه شكلهم يخوف..

جهاد بقلق

ااا انت بتعمل ايه هنا؟…

مجدي قام وقال

بتتفقي عليا انتي والشمام اخوكي لا يا روح امك ده انا اللي يقرب مني ومن حياتي ادفنه حي..

جهاد بخوف

انت بتتكلم عن ايه انا مش فاهمه حاجه..

مجدي ضربها بالقلم وقاال

انتي هتستهبلي يا بت انتي….

قامت نورا ومسكته من هدومه وقالت

جاتك كسر ايدك يا عرة الرجاله يا زباله..

زقها مجدي جامد وقال

اوعي يا وليه انتي..

_ وقعت نورا وراسها اتخبطت في رجل الكنبه وفقدت الوعي وبدأت تنزف، واول ما جهاد شافت المنظر جريت عليها، بس مسكها مجدي من دراعها وقال..

مجدي

علي فين بس يا اختي، انتي مش هتغيبي عن عيني لحظه واحده، وهديكي حقك بس وانتي قدام عيني وتحت جزمتي يا بنت مرات ابويا…

_ واخدها غصب عنها لتحت ووراه رجالته وسابو نورا سايحه في دمها، وفي الوقت ده تحت البيت كان عماد واقف خايف جداً، وبعد ما مشيو كلم زكريا اللي رد عليه وقاله…

زكريا

اقفل يا عماد دلوقتي مش فاضي..

عماد بخوف

الحق جهاد يا زكريا انا ورطتها في مصيبه مع مجدي اخويا..

وقف زكريا فجأه بعربيته وقاله بخوف

مالها جهاد في ايه؟…

عماد

انا روحت لمجدي وقالتله ان جهاد هترفع معايا قضيه وهناخد حقنا وهو خطفها دلوقتي من المكان اللي هي فيه، وهي اصلا ما تعرفش حاجه والله انا قولت كده عشان اخليه يخاف ويديني فلوسي..

زكريا بغضب

والله العظيم ما لاقي شتيمه تليق بيك، اتنيل ابعتلي عنوان اخوك يلاا..

وقفل معاه وبص لرجالته وقال بحده.

انزلو العمليه هتتلغي النهارده.

منعم

بس احنا وصلنا يا زكريا وعزيز هيزعل وو..

. زكريا بحده

قولت انزل منك ليه يلااا..

_ نزلو فعلا وهو بص لموبيله ولقي فعلا عماد بعتله عنوان بيت مجدي، فساق العربيه بسرعه وافتكر كلامها معاه من شويه وخصوصاً لما قالتله..

«ارجوك وافق هو ابنك برضو ومحتاجلك وو وانا كمان محتجالك»…

_ تفتكرو زكريا هيلحقها ولا لا، وايه اللي حصل لنورا؟

ـــــــــــــــــــــــــــــــ

  •تابع الفصل التالي "رواية موضوع عائلي" اضغط على اسم الرواية