رواية تربية حواري الفصل الثالث والاربعون 43 - بقلم ولاء حامد
تربية حواري
البارت الثالث والأربعون
ياسر استوعب صدمه يونس: متتصدمش اوي كده الدنيا ياما شايله في جوفها بلاوي المهم قرارك ايه
يونس بحسم :انا سبق وقولتله انا مش راجل صغير ولا أما عيل في كلمتي وانا لسه عند كلمتي خالي ميعاد من والدتها ووالدك
ياسر بفرحه وابتسامه مقدرش يخبيها بانت على وشه على طول: يبقى على بركة الله بكره وحور في الشغل انا هاعدي على مرات عمي في البيت واديها خبر الأول قبل ابويا لأنها الاحق
يونس بتفكير : تمام يبقى على بركة الله انا منتظرك ومنتظر ردك
ياسر :طيب ممكن رقمك علشان نبقى على تواصل
يونس بتأكيد: اكيد طبعا اديني تليفونك اسيفلك الرقم
نازله ياسر التليفون وكتب الرقم وسجله بنفسه
يونس رجع التليفون لياسر :يبقى كده مع بعض على تليفون وعلى تواصل مع بعض
ياسر :ان شاء الله خير وشكلك كده فعلا ابن ناس وراجل بجد يا بشمهندس
يونس بإبتسامه :يونس بس احنا هانبقى نسايب واخوات ان شاء الله
ياسر بتأكيد على كلامه: اكيد طبعا يزيدني شرف ان يبقى ليا اخ زيك
يونس: الشرف ليا بجد لأنك فعلا اخ جدع كفايه وقفتك مع حور وخوفك عليها في عز محنتها
ياسر بتوضيح: داه فرض مش مجرد واجب حور تبقى اختي قبل ما تكون بنت عمي اتولد واتربت على أيدي وانا اتربيت على ايد الاسطي عامر
يونس بفضول: شكل عمك داه حكايه زي حكايات الأساطير الكبير والصغير دايما يتباهي بإسم عامر
ياسر ريح ضهره على الكنبه وابتسم: عامر داه اسم على مسمى كان دايما عامر بالخير والحب وعلى فكره هو كان مهندس بردوا
يونس بصدمه: نعم داه بجد ولا بتهزر
ياسر بضحكه: لا بجد والله كان مهندس ميكانيكا خريج كلية هندسه الميكانيكا عنده عشق هوس او بالمعنى الأصح كل ما هو مقفول كان لازم يفتحه ويعرفه مسمار مسمار يفكه ويرجعه زي ما كان تمام كان عقله سابق سنه كان حكيم في رأيه وقرراته وحور ورثت منه العقل والحكمه ربى حور على الأصول طلعها بنت بلد جدعه مش بقول كده علشان بنت عمي لا خالص علشان هي فعلا تربيه ابوها وابتسم وعنيه لمعت بفخر بس عليها دماغ يالهووووي سم مصفي يا ويله يا سواد ليله وايامه اللي يفكر يحط عليها ويأذيها دماغ شغاله مبتقفش
يونس بحيره: طيب لما هي كده ليه مجابتش حقها من طليقها على اللي عمله فيها
ياسر بسخريه: ومين قالك انها محابتش حقها اولا حور سكتت علشان الفضايح لان الموضوع مش هين بس حور فيها ميزه بتنتقم بالعقل وببرود دي خربت بيت ابوه ومن غير ما حد يمسك عليها غلطه
يونس بفضول رهيب: إزاي مع اني اعرف انها متعرضتش ليهم أصلا
ياسر بسخريه: يا بني حور لو زعقت ترتاح وتطمن انها فشت غلها انما اللي يرعبك بجد سكاتها اعرف انه وراه مصيبه متدبره ومتكلفه
يونس بتوضيح: ((( الرجل الصامت شخص يفكر والمرآه الصامته ابليس يدبر)))
ياسر بنفس السخريه: يا ابني حور في الإنتقام ابليس يبقى حاطط صورتها في الصاله وبيصبح ويمسي عليها
يونس بلهفه: لا بجد شوقتني اعرف عملت ايه
ياسر بضحكه: اتفقت مع تاجر من تجار السوق الكبار كان حبيب ابوها الله يرحمه وبدل ما كان مجرد تاجر بقى ملك السوق وطبعا حور شريكته النص بالنص
يونس بذهول :ازاي
ياسر: ولا حاجه بدل ما كان مجرد تاجر فاتح محل أدوات منزليه خلته مستورد رئيسي من الشركه الأم والتعامل مع المصنع مباشر بعد ما عملت بطاقه استيراد وعملت اعتماد بنكي علشان يوفرولها دولار بحكم انها مستورد
يونس بعيون مبرقه: يا الله ايه الدماغ دي
ياسر بضحك هيستيري: اومال لو عرفت انها بيتتني انا وابويا وامي على البورش ليليه كامله
يونس بصدمه: نععععععععم
ياسر بهزه راس كتأكيد: اينعم
يونس وفضوله وحيرته زادت أضعاف مضاعفه: لاء إزاي داه شكل حور دي حكايه وقصه وروايه ومجلدات شامله
ياسر بإبتسامه ورجع بدماغه لورا واتنهد تنهيده طويله: بعد وفات عمي امي ملت دماغ ابويا ان لينا حق ومستحق وورث في عمي الله يرحمه واقنعت ابويا انه يتجوز مرات عمي كيف وازاي معرفش وعرفت كمان تقنعني اني اتجوز حور وقد كان وطبينا على بيت عمي زي القضا المستعجل وامي وابويا فتحوا الموضوع على طول مع ان عمي مكانش ليه كتير ميت داه كان يادوب اسبوع وتحت ضغط ابويا قعدنا في بيت عمي اسبوع وامي مبهدله حور وأمها وممرمطاهم والاغرب كان سكات حور وهدوئها وبرودها لحد ما بعتتلي رساله من تليفون امي انها عايزاني روحت اشوف امي عايزه إيه لقيت حور بتقولي أمك في الاوضه جوه ودخلت لقيت امي مغمي عليها وقبل ما اتكلم لقيتها بتسلم بالزهريه على رأسي وحط ايده على أثر التعويره اللي في راسه ومفوقتش الا وانا في المستشفي وبعدها على القسم قالت اني اتحرشت بيها وحاولت اعتدي عليها والجيران شهدوا وفوجئت انها مبصماني انا وابويا وامي على كميه وصولات امانه تخلينا نقضي الباقي من عمرنا في السجن منطلعش الا على القبر
يونس وبوقه مفتوح من الصدمه: لا داه بجد ولا خيال
ياسر بسخريه: لا بجد الجد كمان اصبر على رزقك دي مطلعتناش كده لا دي اخدت ورث ابوها اللي ابويا كان حاطط ايده عليه ودهب امي وحسرتها عليه وعملتلنا محضر عدم تعرض ولما ابويا حب يعمل فهلوي عليها وبعتت سمسار يتمن البيت والمحلات وابويا عطاه قرشين علشان يقول ان سعرهم ميجبش عُشر حقهم فضلت تبعتله في سمساره وكععته دم قلبه لحد ما تعب وقال إن الله حق وسابهم في الاخر يتمنوه بما يرضى الله
يونس بضحك: يا نهاااار ابيض يا جدع هو في كده بجد طيب وازاي رجعتوا تاني سمن على عسل
ياسر بندم بأن في صوته: الغافل بيجيله يوم ويفوق وانا فوقت لما عرفت انها طبت ساكته وراحت المستشفى وقتها شوفت عمي وافتكرت حور اللي اتربت على أيدي افتكرت عمي اللي كان دايما ينصحني اللي كان دايما ياخدني معاه الجامع محستش الا وانا قدام قبره وببكي بحرقه كأني اتيتمت دلوقتي كان ابويا بجد مكانش عمي وبعدها حلفت ميت يمين ارجع اخوها وضهرها وسندها وابويا كمان فاق وعرف ان الله حق
يونس بتفهم: ودلوقتي كمان بقى ليك اخ تاني اسمه يونس
ياسر بإبتسامه :شرف ليا يلا اسيبك انا بقى عطلتك كتير
يونس: عيب متقولش كده احنا الكلام خدنا وحتى مجبتلكش حاجه تشربها
ياسر: الجايات كتير يلا اسيبك ترتاح بكره إجازه الورشه
يونس بتفهم: تمام ربنا معاك
مشي ياسر ويونس في حيره والف حاجه جات في دماغه شخصيه حور اللي اخيرا قدر يفهم ويفك شفراتها اتنهد بتعب ودخل الحمام خد شاور وغير هدومه واتوضى صلى العشاء وصلى صلاه استخاره وحس براحه عجيبه
**********************
مرت الأيام على وضعها ويوم السبت حور نزلت الورشه وياسر استني لما اتأكد انها وصلت الورشه وراح بيت عمه وبعادته المعتاده ايده على الجرس مشلهاش
هدي من جوه بعصبيه من صوت الجرس اللي مش عايز يقف: يووووه اصطبر ياللي على الباب يوه هو انا قاعده مقطوعه وراه
ياسر من بره بضحك وهو سامع زعيق هدي وبردوا مشالش ايده
فتحت هدي بعصبيه لقيت ياسر في وشها: ياض مش ناوي تبطل عوايدك المأندله دي إلهي يشندلك يا ابن نعيمه
ياسر بضحك: بعينك يا ام حور
هدي بصتله بإستغراب: خير جاي على وش الصبح ليه وعينك بتلمع والضحكه في حنكك من الودن للودن
ياسر بضحك: طيب ينفع من على الباب
هدي وسعتله ودخل وسابت باب المدخل مفتوح قعد ياسر واستريح
هدي بأمل : عينك بتلمع ليه وسكتت شويه : لاء اوعي تقول حور وافقت صح
ياسر بنفي هز رأسه : لاء بس تقدري تقولي العوض جه لحور وربنا بيحبها ودعاكي استجاب في ساعه اجابه كان مفتوحله أبواب السما السبعه
هدي قعدت على الكنبه اللي قدامه بلهفه: كيف يعني ياض
ياسر بعبوث طفولي: كل الشحط داه تقوليه ياض في دينك ينفع
هدي بزعيق: هاتكبر عليا ولا إيه اكمن شنبك خط في وشك
ياسر بصدمه: شنبي بقى خليه النحل اللي في وشي دي كلها تقوليلي خط الله سامحك طيب والله عيب على الشنب اللي يقف عليه الصقر داه والدقن دي كلها
هدي بشخطه: اخلص بقى وقول وفرحني اللا الواحد بيتنشق على فرحه
ياسر بإبتسامه: في عريس متقدم لحور وحاجه كده ايه اللهم بارك
هدي بفرحه: يعني عريس كده ملو هدومه وقيمه وسيما ياض يا ياسر
ياسر: مهندس وابن ناس ومن عيله وشاريها وانتي كمان شوفته
هدي : انا شوفته فين يا حسره وهو انا بطلع من باب البيت منا على حطت ايدك وحور الله يسترها هي اللي بتستقضي حوايج البيت
ياسر :فاكر لما بنتك تعبت ورجعت الشغل على طول انتي جيبتيلها الاكل هناك
هدي بتذكر: افتكرلها العافيه ايوه
فاكره الراجل اللي قعد كل معانا صاحب العربيه اللي كانت بتتصلح هو داه العريس
هدي بفرحه: اللهم صلي على النبي داه شاب طول بعرض يشرح القلب ويطلع من القلب الحزين شوكه
ياسر: طالب ايد حور وطلب مني اخدله ميعاد منك انتي وابويا
هدي فرحتها مكانتش ساعه الدنيا وفي لحظه انطفت
ياسر بإستغراب : مالك يا مرات عم وشك قلب ليه بعد ما كان منور
هدي بتردد: هو جاي لحور وهو عارف انها بت بنوت مش يعني اقصد
ياسر بسرعه: فاهم قصدك ومتعتليش هم
هدي بحوف: قصدك إيه
ياسر اخد نفس طويل وهو بيستعد للي جاي: يعني العريس عارف وقابل
هدي بشهقه وخبطه على صدها: يالهووووي يا فضيحتي يا جرستي عرف منين يا ابني انطق الله يسترك
ياسر :اهدي يا مرات عم مش كده اولا اسمعيني للأخر وبعدين ابقي عددي براحتك
هدي بخوف : قول قول يا جلاب المصايب
ياسر بهزه راس: مفيش فايده مشاء الله لسانك انتي وبنتك نفس النوعيه
هدي بشهقه: وماله لساني بقى يا نعمه اسم الله
ياسر بسرعه: خلاص خلاص الله يسترك متفتحيش خليني اقول اللي عندي انا من فتره كده عربيتي عطلت وروحت الورشه عند حور عشان اصلحها وهناك شوفته عينه على حور وعينه بتلمع الله وكيلك انا اتوغوشت مين داه وبيعمل ايه وحاسس انه وشه مهواش غريب عليا فضلت مركز معاه عينه على طول على حور سألت حور عليه قالتلي انه جاي يتعلم وكلام مدخلش ذمتي ببصله روحتله وسألته اذا كان شوفته قبل كده وفكرني بروحه فضلت لابد في الورشه كل يوم اروحلها بس شكله ابن ناس حتى اللبس اللي لابسه برند
هدي بعدم فهم: ايه
ياسر بكشه وش: اقصد يعني انه غالي
هدي بشخطه: متقول غالي يا اخويا وبلاش عوجت لسان الله يمسي ابوك بالخير كان بيربط الكلسون تحت الجلبيه بحبل اللا يسقط منه
ياسر بضحك: خلاص يا هدي شردتي البيت كله الله يعينه اللي يقع تحت ايدك تجرسيه اموت واعرف عارفه تاريخ البلد كلها بيت بيت وانتي اصلا مبتطلعيش من البيت
هدي برفعه حاجب: يبقى تتعدل يا اخويا وبلاش تعوج لسانك وبلدك يا ابن عابد اوضتين وصاله ومنفدين على بعض المهم يا اخويا ما علينا كمل
ياسر بهدوء: لما لقيته كده شكيت وخفت تكون نيته السوء مع حور فضلت لابدله في الدره لحد ما قطرته من قيمه كام يوم وسألته دوغري عايز ايه من حور والراجل شهاده حق راجل بجد قعدنا واتكلمنا قالي عايز اتجوزها كنت عارف رد حور قولتله مينفعش وحور مهترضاش قالي ليه قولتله هي حره بس بيني وبينك حسيت ان حور كمان مياله ليه اصل شوفت في عينها لمعه ليه بجد وغصب عنها عينها بتخطف النظره سرقه قولت ليه لاء أصر على طلبه حلفته على كتاب الله أن اللي هيتقال يندفن في حيطان المكان ووافق وحكيتله اللي حصل ووافق ولا فرق معاه وطلع جدع ابن حلال
هدي بخوف: ما يمكن يا ابني طمعان فيها ولا ياخدها يبهدلها
ياسر بإطمئنان: متخافيش الجدع راجل وابن حلال وكمان هو مرتاح داه عنده شقه في المسله اللهم بارك تخشلها في 4 ولا 5 مليون ومهندس وعنده شغله وشهادة حق يا مرات عم الواد عشقان ومش هايطلع حور من ضلمتها الا عشقه داه ساب شغله وحاله وماله وراح وراها عشان بس يملي عينه منها هااا قولتي إيه
هدي بفرحه مخلوطه بخوف وقلق: طيب وحور انتا ادرى الناس بيها دي لا هتوافق ولا هاتسمع من حد وهي متعرفش انه عارف وقابل ومش هاتنطق ولا تحكي لو على رقبتها
ياسر اتنقل ليه نفس خوف وقلق هدي: طيب والعمل داه عريس ميترفضش
هدي بحيره: والله منا عارفه يا ابني شور عليا طيب اعمل ايه مهو على يدك يوم ما ضغت عليها ترجع للي الله يسامحه بقى جبل طبت ساكته وسكنت المستشفى
ياسر بتنهيده وتفكير: بصي احنا نحدد الميعاد وانتي بلغيها في يومها ومتعرفيهاش مين العريس لحد ما ييجي ويتكلموا ونشوف
هدي بطاعه: ماشي يا ابني حدد معاه ميعاد وقول لابوك وبلغني
ياسر: ماشي انا هحاول اخليه يوم إجازتها يعني الجمعه الجايه على طول عشان تبقى حور في البيت ومتتحججش
هدي بقله حيله: ماشي يا ابني
ياسر :يبقى على بركه الله يلا اسيبك انا بقى وأرواح اشوف شغلي انا قولت اعدي عليكي قبل ما اروح عشان تبقى راسيه معايا على الفوله
هدي :ماشي يا ابني روح ربنا ينور طريقك
مشي ياسر وهدي قاعده في حيره
مرت الأيام ويونس بيعامل حور معامله مختلفه خصوصا بعد ما ياسر اتصل بيه وبلغه بالميعاد واتفقوا على كل حاجه وبلغه الحوار اللي دار بينه وبين مرات عمه وحور مستغربه من النظره الجديده اللي بتشوفها في عنين يونس
وصلنا لليوم المنشود هدي قامت من النجمه وحور نايمه نضفت البيت كله وجابته عاليه واطيه ومسحته وخلته فله وشغلت التلفزيون على قناه المجد للقرآن الكريم
وفرشت البيت وبدئت تجهز ضيافه الناس اللي جايه كل داه وحور نايمه في بحور العسل
مر الوقت بسرعه وصحيت حور على خطبة الجمعه لأنها صحيت صلت الفجر في اوضتها ونامت تاني ومن تعبها محستش باللي أمها بتعمله بره الاوضه طلعت وهي بتتاوب وحاطه ايدها على بوقها وخلصت نادت على أمها بصوت عالي : يا هدي انتي يا ولسه روحتي فين
طلعت من المطبخ وهي بتنشف ايديها في فوطه :يصباح الفل يا ضنايا
حور بخضه ورفعه حاجب ونزلت التاني : يصباح الفل ويا ضنايا في جمله واحده مالك يا وليه فيكي ايه دانا بقوم من النوم مسروعه من صريخك في سرسور ودني ولما اقوم ايه كدش اللي شبه طبق المش طسي وشك اللي العماص مسفسف عليه وفي الاخر انزلي يا معدوله هاتي وهاتي وهاتي وهاتي فين امي يا وليه انتي عملتي في هدي إيه
هدي بشخطه: مالك يا بت في ايه بياره طافحه فتحت مسدت
حور بضحكه: ايوه كده وهزت رأسها بهبل وهي مغمضه عنيها كده حمد الله على السلامة رجعت هدهد الجناين
هدي بقلبه وش : يادي النيله في ام الإسم المعقرب داه
حور بمناغشه: يصباح الورد على عيونك يا قمر ومسكت هدي من خدودها وباستها
هدي وهي بتزق ايديها: يابت سيبي وشي
حور قعدت على الكنبه وربعت رجليها: مالك يا هدي سمعاني من ساعه عماله تكركبي
هدي بخوف وعنيها بتزوغ في كل مكان: ها ابدا اصل حسيت البيت مترب كده ومعفر قولت اقوم انفض الفرش واهويه وكنست البيت وسيقته وفرشته
حور وهي بتتلفت حواليها: امممم دي ولا تنضيفه العيد ماعلينا اومال بقالك ساعه بتكربي في الحلل ليه الفطار مش محتاج داه كله
هدي بتردد: يوه لاهو انا مقولتلكيش
حور ببرود وهي مبرقه عنيها وبتهز راسها: لا مقولتليش في ايه
هدي بهدوء: اصل ايه ياسر ابن عمك كلمني وقالي ايه بقى يا مرات عم انا جاي انا وابويا نتغدا معاكم اصل اكلك وحشني اوووي وعازم ناس صحابه وكملت بصُعبانيه وانتي عارفه ياسر كان حبيب المرحوم الله يرحمه دغالي عليا داه متربي على أيدي محبتش اكسفه
حور بعدم اقتناع: ليه وبيت عمي صغير ولا مرات عمي مبتعرفش تطبخ
هدي : لا داه ولا داه ربنا يجعل بيتهم عامر بس الراجل استقصدني ارده خايب يعني
حور برفعه حاجب ومغمضه نص عين: أما الحوار داه آخره ايه اصل من أمته عابد بييجي هنا ومن اكتهوياسر هايجيب رجاله في بيت في حريم معهومش راجل
هدي بخوف من ذكاء بنتها : يووووه في ايه يابت انا قولتلك اللي حصل وانا ايش دراني يعني يا اختي أما اقوم اكمل اللي ورايا بلا خوتت دماغ وسابتها ودخلت المطبخ جري قبل ما حور تمسكها وتقررها
حور فضلت قاعده على الكنبه شويه وهي محتاره ومش مقتنعه دخلت المطبخ وهي بتبص لأمها بجمب عينها اللي مرفعتش عينها فيها وكملت اللي بتعمله وهي خايفه من حور ورد فعلها بس هي نفسها تفرح بيها ااااه بس لو مكانتش عنديه ودماغه جزمه قالتها هدي بحرقه جواها من سكات
حور عملت فنجان قهوه على السبرتايه لان البوتاجاز كل عيونه مشغوله وطلعت على اوضتها خدت التليفون وفتحت شباك الصاله وشدت الستاره وقعدت تشرب القهوه بمزاج ورنت على ياسر اللي شاف الموبايل وعمله صامت ومردش عليها كررت المكالمه كذا مره وبردوا مفيش رد
حور بملل : امممم شكل الموضوع فيه إنا يا تري ايه حكايتك يا ابن عابد انتا وهدي شكلكم كده مطبخينها سوا عليا وانا اللي هاكلها في الاخر الصبر الصبر
خلصت القهوه وهدي حطت الفطار لحور
حور: مش هتاكلي معايا ولا إيه
هدي: بالهنا انتي سبقتك وكمان بنقنق كده في المطبخ عشان اللي على النار ميتحرقش
حور بغموض: ماشي
دخلت هدي جري المطبخ وهي حاطه ايدها على قلبها: عديها على خير يارب ويهديكي يا حور يا بنت بطني ومتلقبيش الدنيا
مر الوقت بسرعه وأذن صلاة المغرب ومر بعدها نص ساعه والباب خبط
هدي بصت على حور بغيظ: قومي يا بنتي غيري هدومك كده واللبسي
حور بشك: ليه هو اللي جاي حد غريب عمي وابن عمي ولنا لابسه عبايه بكم وطرحه
هدي بكزه سنان: حوووور اسمعي الكمله
حور بشك زاد عن حده: امااا إيه العباره
قبل ما ترد هدي رن الجرس تاني: قومي غيري عقبال ما افتح الباب يلا يا بت
حور فضلت قاعده مكانها متحركتش
عابد من المدخل اتحمحم: يارب يا ساتر
دخل عابد وسلم على حور بحب صادق وحراره وحور سلمت ببرود ودخل ياسر وراه واللي بص لحور بصدمه من لبسها وبص لمرات عمه وبلع ريقه بصعوبه وهدي رفعت كتافها بقله حيله
قعدوا كلهم بيصوا لبعض وحور مرقباهم بعنين ولا عنين الصقر
حور بمكر: ايه يا أما مش هاتحطي الغدا اللي واقفه من صباحيه ربنا تعملي فيه
ياسر ببرود: اصبري يا بنت عمي مالك كده مسروعه على الأكل الواحد ياخد نفسه
حور بخبث: وماله خد نفسك على أقل اقل اقل من مهلك اصل الطريق هنا يقطع النفس
دقايق مرت على أحر من الجمر وخبط الباب مره تانيه
واللي قام ياسر نزل سلالم المدخل و فتح الباب الحديد ودخل بالضيف اوضه الصالون وكانت هدي خدت بنتها لاوضتها علشان مينفعش يقعدوا وسط رجاله اغراب
هدي بمحايله: علشان خاطري يا حور ورحمه ابوكي وغلاوته في قلبك غيري هدومك دي
حور بحده :أما في إيه
هدي بمحايله واستعطاف: بصي غيري ووالله هاتفهمي ورحمه ابوكي لو كان غالي عليكي
حور اتنهدت وسكتت على مضض
هدي طلعت وهي بتحط ايدها على قلبها وبتاخد نفسها : يارب يهديكي يا حور يا بنت بطني قادر يا كريم
استقبل ياسر يونس وعرفه بابوه ورحب بيه ترحال حار
يونس وهو بيميل على ياسر: اومال فين أهل البيت مشفتش لا حور ولا مامتها
ياسر وهو بيكتم ضحكته: ربنا يستر شكل ليلتك عنب
يونس بحيره: ليه
ياسر: اصل حور لحد هذه اللحظه متعرفش ان في عريس متقدم ولا تعرف انه انتا من الأساس انا جيت لقيتها لابسه عبايه ومتظيره بطرحه ولا أجده بياعه اوطه في الشادر
يونس بإستغراب: بتهزر ولا بتتكلم جد
ياسر بضحكه مكتومه: وحياتك جد الجد ادعي معايا ربنا يستر
يونس بصله بإستغراب وسكت
لحظات مرت ودخلت هدي سملت وهي شايله صنيه عصير : اتفضل يا ابني
يونس بإحترام: تسلم ايدين حضرتك
دقايق وطلعت ودخلت اوضه حور اللي كانت خلصت لبس: ها يا ضنايا خلصتي
حور بهدوء مقلق: اه خلصت
هدي سحبتها من ايدها ودخلت اوضه الصالون
عابد : ادخلي يا بنتي مفيش حد غريب
حور رفعت رأسها وكانت الصدمه
يونس قاعد على كنبه الصالون جمب ياسر لابس بنطلون جينز هافان وقميص كابتشينو وعليه بليزر جراي فاتح
حور كانت لابسه دريس كافيه في ورد كشمير وليه حزام اسود من الوسط ولابسه بندانه سودا وطرحه بني غامق
حور قعدت بهدوء وبتبص للكل بترقب
قطع نظراتها هدي: يلا يا جماعه نأكل لقمه علشان يبقى عيش وملح
حور بهدوء وبرود خوف ياسر لانه اكتر واحد عارف سكات حور يعني كارثه جايه في الطريق
اتحركوا وقعدوا والكل بياكل في صمت تام مفيش غير صوت المعالق وخلص الكل وغسلوا ايديهم ورجعوا على اوضه الصالون تاني
هدي من القلق مشالتش السفره ولا باقي الأكل ودخلت معاهم بصنيه الشاي اللي كانت مجهزاها على النار من قبل الأكل : هنا وشفا
يونس بود: تسلم ايدكي
قعد الكل ويونس رفع رأسه بشموخ وبص لعابد: يا حاج عابد انا جاي ويشرفني اني اطلب ايد بنت اخوك حور وكل طلباتكم أوامر لو حصل نصيب هاجيب اهلي ونتفق علشان دي الأصول
حور :....
يا تري حور هتوافق ولا هاترفض ورد فعلها إيه
يا تري جبل هايعرف ولا لاء
يا تري اللي جاي مخبي إيه
يتبع........
•تابع الفصل التالي "رواية تربية حواري" اضغط على اسم الرواية