رواية قسوة احفاد ال هتان الفصل العاشر 10 - بقلم هاجر النعيمي
part 10
قلمي( هاجر محمد)
...............
هاجر : مكياجج روعه والله من وين متعلمه
رسل : اطمش على اليوتيوب
كملنا صارت بل 3:45 كالو راح نطلع ناخذهم ونروح للقاعه عبالك عرس مو حنه جنت مختنكه بشكل وماريد اروح ماريد اشوفهم على الكوشه سوه اخذت حلمي بس علمود تكسرني ولسبب تافه حطمت احلامي وكلشي وبسببهم رافضه الحب
ورافضه اثق باحد جان عندي نت مجاني ومن البارحه العصر ماشفت حساباتي منو راسل او شي دخلت اشوف اذا احد مراسلني شفت مسجات من تميم وزهراء دخلت على زهراء جانت تسئل على اخباري جاوبتها بس تميم ماكدرت اجاوب لان يمي جانت لارا وما عندي ثقه بيها أبداً
رغم هيا حبابه وماشفت شي عليها بس ابقه مااثق بيها بعدها اجت رساله من زهراء جانت
💬 زهراء : هاجر عندي موضوع اريد احجي بي معاج
💬 هاجر : احجي
💬 زهراء : ماعرف ليش ماتريدين تحجين عن ماضيج الي بس ثقي انو مالي نيه أذيج وثقي اني وياج اتمنى تثقين بيه وتحجيلي كلشي مثل مااني احجيلج
💬 هاجر : هو موضوع اغلب كرايبي يعرفو ومايتخبه بس اني مااحب احجي بي بس الج احجي ميخالف
حجيت الها كلشي بس مختصر وبعدها وصلنا بيت عمي نزلو واني كلت انو ماراح انزل انتظر بل سياره نزلو تقريباً نص ساعه وطلعو واني كل هذا الوقت جنت احجي ويا زهراء احس رتحت شويه وكتلها
💬 هاجر : عادي تسمعيني هسه
💬 زهراء : اي اسمعج
💬 هاجر : تدرين مخنوكه كلش ومالي خلك اضحك واريد بس ابجي ودموعي مااكدر اسيطر عليها تعبت من كلشي احس كل هذا فوق طاقتي
💬 زهراء : هذا اختبار من الله الج بس انتي حاولي لا تفكرين بيهم خليهم يعيشون حياتهم وانتي هم عيشي حياتج
💬 هاجر : مااكدر صعبه والله خربو حياتي وهسه تريدين اعوفهم لا والله غير اله اخذ حقي بيدي
💬 زهراء : اني وياج بهاي بس انتي هم عيشي حياتج مو معقول تخليها انتقام حاولي تحبين مره ثانيه
💬 هاجر : مستحيل ارجع احب
...............
« زهراء»
بعد معناة طويله واني اقنعها انو ترجع تجرب الحب ماكو رافضه نهائي وهسه شنو اكول ل تميم واني اعرف تميم مستحيل يعوفها بحالها حاله حال امير وباقي ولد عشيرتهم كلهم نفس الشي
عدهم حب التملك واذا المره ماتسمع كلام زوجها يضربها كلش عادي وهاي المعانه اني جاي اعيشها وباقي الجناين لازم ماناقش وكلامهم دائما صح ولازم ماترفعين صوتج بوجه زوجج لان ساعتها يموتج ومحد يدخل وبيهم هواي صفات تلعب النفس والمشكله كلهم بس اطلع احمد منهم هذا العاقل الوحيد
الكل تربه على هذا النمط من جدهم وبعدها جدهم ربه اولاده وهسه جاي يعلمون الاحفاد الي هما زوجي وتميم وغيرهم راح احاول اقنع تميم يشيلها من راسه خابرته علمود يجينه ويجيب امير هم وبل فعل ساعه وهم يمي
كلت
زهراء : شوف تميم هاجر عاشت قصة حب بشعه بشكل
تميم : شلون يعني
حجيت لتميم الي كالته هاجر بل حرف شفت ملامحا تغيرت لعصبه وضوجه كال
تميم : هذول صاحيين لو شنو
زهراء : مااعتقد وكتلها انو تجرب تحب مره ثانيه وتشوف حياتها
تميم : وشنو كالت
زهراء : ليش تقاطعني خليني اكمل ورفضت حاولت وياها هواي لكن أبداً ولا نفع يعني تميم شيلها من بالك ماراح تقبل
تميم : مو اني الي انرفض وتقبل اذا مو برضاتها ف غصب عنها
زهراء : ماكو شي بل غصب
امير : تميم اذا انت تريدها ف اخذها واني وراك ولا تخاف من شي
زهراء : انت ليش جاي تشجعه البنيه ماتريد كوه
تميم : اي كوه وهيا بنت ابوها ترفضني وشوفي شنو اسوي مو تميم الي ينرفض
عفتهم وطلعت لان مستحيل يقتنع وخاصه انو امير واكف بصفه وباجر احمد هم يوكف ويا وهنا هاجر تعيش نفس معاناتي حتى لو جان حب هاي اني وامير حب 5 سنوات ويضربني ومن اكول لهلي يرجعوني اله وكأنو مو بنتهم
ابد ماشفت اهلي واكفيني وياي دائما يوكفون ويا امير واطلع اني الغلطانه ورغم العنف والذله لازم اسكت واكيد هاجر تعيش نفس هذا الشي يمكن اذا اكللها ترفض بس تميم مايعوفها بحاله يخرب حياتها اكثر من ماهيا خربانه
............
« هاجر »
طلعو من بيت عمو وتوجهنا للقاعه طول الطريق احس بخنكه وصافنه على الشارع الكل يصفك ويرقص بل سياره واني الغصه بداخلي اريد امنع عرسهم بس مو بيدي هما يحبون بعض واكيد يزوجون واني مجرد لعبه تسله بيه وعافني وبطلب منها
كل يوم يزيد حقدي عليهم وكل يوم اكرهم اكثر من اليوم الي قبله كل يوم يمر اتمنى اشوفهم بأسوء حالتهم ساعتها ارتاح واكدر اكمل حياتي معقول اني غلطانه بشي ولهذا السبب ربي يعاقبني ولافد يوم تعديت على احد ممكن اجذب
علمود اطلع نفسي من مشكله بس ماعمري عصيت ربي بشي وشخصيتي القويه لان من جنت صغيره مع الاولاد ماجنت مع البنات يوم الي كبرت صرت مع البنات طفولتي عباره عن طوبه وكرة سله وعن لعب مع الاولاد ولهذا السبب شخصيتي قويه وثقتي بنفسي بسبب اهلي
الي كل يوم يسمعوني كلام حلو وكل يوم اسمع مدح بشكلي وجسمي وتصرفاتي وكلشي اجاني صوت إيلا وطلعني من صفنتي كالت
إيلا : يلا انزلي اشبيج
هاجر : ها اي
نزلت من السياره وامشي واتعثر بل عبايه ماعرف امشي بيها اجه تيم مسك ايدي وكال
تيم : ثوله خوما ثوله حتى بل عبايه ماتعرفين تمشين فشلتينه كدام امة محمد
هاجر : كعب بطولك لابسه وفستان وعبايه
تيم : كعب بطولي الله يثولج فوك ثولج هذا هم حجي
هاجر : غلس يمعود
فتت للقاعه وفوراً نزعت العبايه وكالت المصوره الكل يكعد علمود الدخوليه مال عرسان عشتو الكل جان كاعدين وجان اكو طفله ماعرفها يمي كلت
هاجر : حبيبتي روحي غادي يصيحوج
... منو يصيحني ماعرف احد
هاجر : العروس تصيحج ماشفتيها
راحت وكفت كبال اسيل وخربت الدخوليه واني فرحت كثير واشوف اسيل ضايجه جان إلياس شكله عادي مو مبين فرحان المفروض هسه الضحكه شاكه حلكو بس عادي يعني مو فرحان ولا ضايج بين الثنين
راحو وكعدو على الكوشه واسيل تحجي ويا إلياس وهو مبين شارد ومو وياها بعدها شغلو اغاني والبنات يركصن واني واكفه وحدي اجت إيلا وكالت
إيلا : تعالي اركصي
هاجر : ماريد مالي خلك
إيلا : شبيج ضايجه ترا مبين عليج من بعد سنه
هاجر........ لا رد
إيلا : لاتخلين احد يشمت بيج انسي عوفيهم
هاجر : انتو ليش ماتحسون مااكدر انسى مو بيدي اتمنى انسى بس مااكدر
إيلا : هاجر كافي شبيج اروح احسن
عافتني وراحت اشوف الكل يركص وفرحان واني وحدي الي ضايجه وماطايقه احد من الموجودين شفت رسل كاعده رحت يمها وكلت
هاجر : ليش كاعده ماتكومين تركصين نفس الباقي
رسل : ماعرف اركص
هاجر : وين اكو احد مايعرف يركص
رسل : اني ماعرف اركص عادي وانتي ليش ماتركصين
هاجر : ما جاي على بالي شسمه تعالي اعلمج ونركص سوه
كمنا علمود نركص صرنا بل نص وبدينه نركص واكتلها شنو اسوي سوي نفسي وشويه واجت إيلا كالت
إيلا : فعلاً ماتستحين اني كتولج تعالي ماتقبلين رسل من تكلج تقبلين والله فلا تستحين
هاجر : هسه جا على بالي قبل شويه مجان علي بالي يلا تعالي معانه ركصي
بقينه نركص وطولنا بعدها صار وكت الاكل وفاتو كم واحد من كرايب إلياس حتى يقدمون الاكل وشفت من بينهم محمود الي خطبني ومن اجه يمنه جان تيم يقدم ويا وهو بقه صافن عليه واني نزلت راسي لان بل بدايه وافقت بعدين رفضت استحيت منو
رفعت راسي وهم جان يدحك عليه اجه من يمي علمود ينطي لل ورايه وكال بصوت ناصي ممكن تجين للغرفة الي بيها الماء ولاكل وعافني وراح كلت اشوف شنو يريد لان صار عندي فضول
رحت للغرفه الي كال عليها تقريباً ربع ساعه واجه فات وكال بدون مقدمات
محمود : ليش جنتي موافقه بل بداية وبعدين رفضتي اش شفتي مني مااستاهلج مثلاً
هاجر : لا مو هيج بس انت فاهم الموضوع غلط
محمود : اشون فاهم الموضوع غلط فهميني
هاجر : شوف اني واهلي موافقين
قاطعني وكال
محمود : عجل ليش رفضتم
هاجر : بس خليني اكمل لا تقاطعني
محمود : كملي
هاجر : المهم الكل جان موافق ومحد رافض بعدها إلياس حجه براس جدو علمود يرفض بحجة انت مو خوش ولد وان اعرف انت خوش بس هذا الي صار
محمود : دقيقه إلياس ابن عمي
هاجر : اي هو بنفسو
محمود : ليش اني اش سويتلو
هاجر : مو انت هو بل مختصر يريد يخرب حياتي
محمود : السبب
هاجر : ماعرف والمشكله جدي يسمع منو لان اول حفيد ويحبو كثير
محمود : هسه انتي موافقه
هاجر : انت تعرف مابيدي شي
محمود : اريد اعرف انتي شنو رأيج
خجلت ودنكت راسي معرف شنو احجي احس لساني انربط رجع وكرر سؤاله معرف شنو اكول وكلت بسرعه وبدون وعي
هاجر : اي موافقه
ابتسم وكال
محمود : هسه احجي مع امي تكول لامج وراح اتواصل وياج عن طريق لارا
طلع واني صفنت ليش كلت موافقه معقول بس علمود اغث إلياس واني ليش حتى اوافق اريد احقق حلمي مو مستعده للزواج وبعدين مااثق بمحمود اشون راح ازوجو وغير هيج ماعندي مشاعر تجاهو
طلعت وهاي الافكار كلها براسي كعدت واجت يمي رسل وإيلا كالت إيلا
إيلا : هاجر اشبيج
هاجر : جفصت
رسل : مع منو
حجيت الموضوع الهن بصوت ناصي ماريد احد يسمع كالت رسل
رسل : اذا الولد خوش ليش لا
هاجر : مااعرف ليش كلت موافقه اني ماريد ازوج لا صاحبة مسؤوليه واريد اكمل دراسه واحقق حلمي
رسل : عادي سهله هسه إلياس يحجي براس جدو حتى يرفض مو فد شغله
هاجر : اي صح بس يمكن مراح يوصلون خبر لعمه اميرة وإلياس
إيلا : ولا يهمج يمي اني اكلهم
رسل : يعني عاجبج هسه فوتي نفسج بمصيبه من كلج موافقه كليلو ماريد ازوج مامفكره
هاجر : اش اعرف
إيلا : هسه سالفه وصارت واني كتلكم اروح اكول لعمه وإلياس
هاجر : هسه إلياس يكول تريدني اخربها لان ترديني
إيلا : لا راح اكلو هاجر فرحانه لان محمود رجع خطبها مره ثانيه واكيد راح يقبلون وانت خطيه تضل ويا اسيل الجايفه
هاجر : اذا هيج خوش
بعدها رحت يم ماما وشويه واجت ام محمود وكالت
ام محمود : انتو رفضتو اول مره مانعرف السبب وهسه ابني عرف السبب والبنت والولد يريدون بعض ليش تحرموهم من بعض
مروة : والله ياختي ما بيدي عمي رفض ما نحنا اصلا نحنا نتشرف بيكم وين نلكي مثل اخلاق ابنج وخاصه انو اميرة وتيم حمدو بابنج
ام محمود : عجل ليش رفضتو ابني مايقبل يكول ليش
مروة : عود ابنج يكلج
راحت وماما دحك عليه بمعنى حجيتي شي هزيت راسي ب لا وافتهمت وكمت من يمها وجان يشغلون اغاني مره ثانيه حيل مخنوكه والدمعه بعيني معرف ليش صح هو عافني وراح الها بس مااكدر اشوفهم فرحانين
يمكن تكون عندي مشاعر تجاه إلياس واني انكر واني صافنه اجه مسج لتلفوني وجان من زهراء تطمن عليه وشنو حالتي عبالك حاسه بيه حجيت الها شنو صار وشلون كلت لمحمود مواقفه حسيتها ضاجت من موافقتي ومعرف السبب
سئلتها تكلي بعدج صغيره ماقتنعت بحجيها صراحه حسيت اكو شي ثاني كملت الحنه والكل رجع للبيت واني رحت لبيت عمه اميرة علمود اجيب اغراضي الي بقو عدهم
ثاني يوم العصر اجو تهل محمود وطلبوني وجدي رد الهم خبر بنفس اليوم برفض ماهتميت لان اني ماجنت اريده ومعرف ليش كلت موافقه كاعده بغرفتي ساعه 9 اجاني مسج فتحت تلفوني وشفته من تميم وجان كاتب
💬 تميم : صدك انخطبتي
💬 هاجر : اي بس جدي رفض
💬 تميم : وانتي شنو
💬 هاجر : شنو اني شنو مافهمت
💬 تميم : اقصد انتي موافقه
💬 هاجر : بصراحه لا
💬 تميم : تعالي بوبجي نلعب
💬 هاجر : شويه واجي
دخلت على اليوتيوب اطمش شويه بقيت اتابع لل 1 ماحسيت جنت مندمجه لحد ماجتني رساله من زهراء وهيج كملت حياتي وكم شهر راح وبلش الدوام وجنت حيل متحمسه وخايفه بنفس الوقت
كعدت الصبح ومثل كل يوم مدرسه الكل يكعد ياكل ونسمع محاضره من جدو قبل منطلع وتيم نجح وجاب معدل 95.87 جان يريد صيدله بس معدلو مايسمح وعمو محمد اشتر كم درجه ودخل صيدله ودائما يغيرني عود فات للقسم الي احبه غلست وكتله راح اجيك انتظرني
كملت اكل وطلعت ابدل كملت تبدلين ونزلت جان بابا وجدو طالعين بست ماما وطلعت ومثل كل يوم تبقه تدعيلي جاي البس الحذاء ( تكرمون) جا ابو الخط لبسته شلون ماجان وطلعت وشفت البنات وشكد مشتاقتلهن بقينه احضن وبوس لحد مااجت رزان وكالت
رزان : لا ياخونه بدوني
جرينها وكعدنا نحجي رزان انخطبت وعن قريب حفل خطوبتها من ابن عمتها مدري عمها جانت الفرحه مبينه على وجها كالت
رزان : هاجر شصار على سالفة تميم
هاجر : صوتج فضحتينه
رزان : دحجي هسه
هاجر : ماصار شي
رزان : يعني ماعترف بحبو
هاجر : منو كال يحبني كافي تلوصين
ساره : كافي بلا سالفة فلان وعلان خلونه متونسين وين قضيتو العطله
الكل كال بنفس الوقت
البنات : بل بيت وين يعني
وصرنا نضحك حرفياً جنت مشاقته الهن بكد رحمة الله وصلنا فرع المدرسه ونزلنا نكمل مشي كالت ريماس
ريماس : خلي نروح نشتري
طلعنا نتوجه لمحل الحجي بس كالت ريماس
ريماس : ماريد على الحجي ماعندو شي طيب خلي نروح لهذاك المحل
جانت تأشر بيدها اول مره اشوف هذا المحل الضاهر فتح جديد
هاجر : اول مره اشوفو ايمتا عرفتي بي
ريماس : من اجينه استلمنا كتب
هاجر : تدرين مالحضت
رزان : اي عيني وين تلاحضين بالج يم إلياس الخره
هاجر : بلا سخافه ايمتا بالي يمو تعرفين اكرهو
ساره : كافي وسيرة نعل لا عاد تجيبوها كافي
الكل سكت ومشينه للمحل الجديد نشتري فتنه وجان اكو ثلاث شباب بوسط المحل وجان اكو بنات كثير يشترون انصدمت من كمية البنات يعني محل الحجي بي كم بنيه وهل محل ماشاء الله يزوع بنات كلت
هاجر بهمس : ريماس شهل لعبان النفس جايبتنه على المحل الي بولد هسه صار مايعجب محل الحجي
ريماس تعض شفتها بمعنى اسكتي سكتت وبعدها اجه ولد اهل وسهل بيها وكال
.. شلونج رموسه شخبارج
ريماس : زينه انت شلونج الاهل شلونهم
.. زينين يسلمون عليج
بقيت صافنه اني وساره ورزان مانعرف منو هذا ولا ليش جاي يحجي معاها بعدها كال
.. هذول صديقاتج
ريماس : مو بس صديقاتي خواتي هم
ابتسم وكال
.. هلا بيكم تنورون المحل اشترو الي يعجبكم راح من يمنه رزان كرصت ريماس وكالت
رزان : منو هذا ولج
ريماس : ابن خالتي والكراش مالتي
هاجر : جذب
ساره : ايعع هذا كرايبكم وين اخوانج شكد حلوين وين هذا
ريماس : انجبي ماعندج ذوق
ساره : بلا لغوه اشترو خلي نرجع للمدرسه قبل لا يدك الجرس
اشترينه ورحنا نحاسب الولد رفض بزعني وكلت
هاجر : انت مو مفتح المحل على روح الميتين تفضل هاي لفلوس لان نحنا مستعجلات
حطيت لفلوس على الطاوله الي كدامه وطلعت وطلعن البنات وراي ريماس ضاجت من تصرفي وساره ايدتني ورزان بس تحجي بي وتاخذ معلموت عنو من ريماس
دخلنا المدرسه وجان داك الجرس واكو بنات واكفات ونحنا مانعرف وين جماعت السادس كالت رزان
رزان : تعالو هينه هاي البنت اعرفها جانت هذيج السنه سادس مبين راسبه
رحنا وساره سئلت الي بصفها وكلتلها اي هذول سادس صارت المدرسه تقره اسماء شعبه ألف ماطلع ولا اسم من اسماء البنات ارتحت لان اكو امل نصير نفس الصف وصلو باء وصاحت اسماء البنات وكلنا ندعي انو يطلع اسمي معاهم وبعدها صاحت اسمي فزيت وصرنا نصيح مثل المخبلات كالت المدرسه
.. منو هاي الي ما تستحي تصيح
سكتنه مانريد رزاله رحنا لصفنه وكعدنا اني وساره قبل الاخير ورزان وريماس يدورون مكان جان مكان فارغ بساف النص وهن يردن يمنه فه اجت رزان وكالت للبنيه الي ورانا
رزان : حبيبتي ممكن تنطينه مكانج وانتي تكعدين مكانه
البنيه ماردت على رزان جان راسها بل كتاب وتصفح بي بكل هدوء عصبت رزان وكالت
رزان : انتي طرشه ماتسمعين عدحجي معاج بأدب ليش ماتردين تريدين اطيح حضج
دحكت البنيه على رزان وكالت
.. اني مااكوم وهذا المكان مكاني انتي روحي اكعدي بساف النص واذا وحده منكم تريد تكعد يمي هلا بيها شفت رزان تنرفزت وراحت للبنيه الي مقابيلنه وبل فعل الي كبالنه قبلو وراحو اخر رحله بل نص وهن كعدن كدامنه واندارن علينه سولفنه شويه وفاتت المدرسه
عرفتنه عليها وبدت تتعرف علينه جانت لطيفه بشكل وجان شكلها مبين صغيره وصلت يم رزان كالت رزان
رزان : اني اسمي رزان
ست مرام : عاشت الاسامي عيني
ريماس : اسمي ريماس
وصلت الي كلت
هاجر : اسمي هاجر
ابتسمت وكالت
ست مرام : عاشت الاسامي بس اشنو اسم ابوكي وجدكي لان اعرف بنت بنفس الاسم
هاجر : هاجر علي............
ست مرام : اي والله اقول وين اعغفكي انتي عدكي عمه اسمها اميرة
صفنت وكتلها اي كالت
ست مرام : انتي بنت اخوها اعغفتوكي من حنة إلياس غشعتوكي وهسه من غشعتوكي قلتو وين شايفته
هاجر : بس الي اعرفو بنت احمه عمه مايحجون مصلاوي
ست مرام : اي لان انا متزوجه مصلاوي ف اخذ لسيني
هاجر : اي تشرفت بيج
بعدها كالت للبنيه الي ورانه
ست مرام : مريانه ليش قيعدي بل اخير
التفتت واشوف البنيه صافنه واني معرف منو هاي واشون المدرسه عرفت اسمها اكيد تعرفها
مريانه : احسن ماريد بل بدايه
بعدها تعرفت على كل الصف وبدت بل درس وصار درس وره درس بعدها صارت فرصه كالت رزان
رزان : هاجر بربج عود النه هم
هاجر : مافهمت
رزان : هسه انتي صار عندج واسطه عود خلي النه واسطه هم مو تنسينه
هاجر : دروحي هيا مال واسطه شبيج غير حتى ماعرفها
ساره : بنات اني صار عندي فضول مريانه شصير من ست مرام
هاجر : تصدكين حتى اني
رزان : تخيلي تطلع كرايب إلياس هم
هاجر : ايع ايع
ساره : ريماس ليش ساكته
ريماس : شحجي مثلاً
ساره : اي شي بس لا ضلين ساكته
ريماس : اني اروح للصف
عافتنه وراحت وركضت وراها رزان تشوف شبيها اني وساره بقينه مصدومات شنو السالفه وشنو السبب من كل هذا كالت ساره
ساره : معقول بعدها زعلانه منج علمود سالفه ابن خالتها
هاجر : ترا ماحجيت شي والله شفتي هو انكله شكد الحساب يكول عليه شنو مخلفنه وناسينه وهو شعلي ياخذ الفلوس وينجب لا يهوبز براسنه
ساره : تدرين ريماس حساسه وهيا مبين تحبه واصلا كالت كراشي جانت تحجين ويا بأدب مو مثل الثوله
وبعدين ليش هلكد عصبتي
هاجر : اكره جنس ادم
ساره : إلياس سوه سوايته وجنس ادم ياكلوها وبعدين جنس ادم شعليهم انتي عتلوصين عيني
انتبهنه رزان جايه النه وتركض كالت
رزان : ريماس زعلانه من هاجر لان حجيتي ويا ابن خالتها هيج
هاجر : اهو قابل شحجيت والله يالله
رزان : روحي صالحيها تدرين كامت تبجي بل صف
هاجر : جذب
رزان : وداعت علاوي
رحنا نركض فتنه الصف وبل فعل جانت تبجي من شافتنه مسحت دموعها ودنكت راسها اجينه يمها وكلت بسرعه
هاجر : والله ماجان قصدي احجي هشكل مع ابن خالتج بس والله ضايجه وانتي تعرفين من منو وليش اسفه والله
حضنتها وبست راسها وخدها وضحكت وكالت
ريماس : ماتتواخذين ثوله
هاجر : شوفو شكد عار صاح حضج وحض الي يعتذر منج
باست جذي وكالت
ريماس : عيني شبيج نهز الورد حتى نشمو
ضحكنه كلنا وبعدها قاطع صوت ضحكنه مريانه وهيا تكول
مريانه : هاجر عادي احجي وياج بشي
هاجر : احجي عادي ماكو احد غريب والبنات ماخبي عليهن شي كلشي يعرفن
مريانه : تمام مثل ماسمعت انتي بنت خال إلياس
انصدمت شعرفها بإلياس كلت
هاجر : اي بس انتي منو واشون تعرفين إلياس
مريانه : اني بنت عمه واخويه محمود
انصدمت صدمة عمري هاي شسوي بمدرستنه كلت
هاجر : بس على حد علمي انتو ما هينه بيتكم بيتكم ب..
مريانه : اي صح بس قبل كم شهر انتقلنا لهذي المنطقه
هاجر : نورتو بس ماعرفت ليش سئلتي
مريانه : الي فهمته انو انتي رفضتي اخويه
هاجر : لا مو اني
مريانه : بعدج تريدي
نطت رزان من يمها وكالت
رزان : هاجر ماحاطه هيج موضوع بالها وماتريد تزوج وانتي اكيد تعرفين السبب
مريانه : إلياس السبب هو الي يمنع زواجج ما صح
هاجر : صح
مريانه : طيب ليش
هاجر : علمي علمج
ترخصت وعافتنه وطلعت من الصف كالت ساره
ساره : رزان انتي ليش جاوبتي بمكان هاجر
رزان : لان اعرف هاجر راح تجفص حجيت بمكانها قبل لا تجفص
دك الجرس وفاتن البنات اجت المدرسه نفس الحال تعرفت علينه وعرفتنه على نفسها ومو بس هيا كل المدرسات نفسها خلص الدوام ورجعنا للبيت فات ابو الخط بفرعنا كالت رزان
رزان : شسالفه عمامج كل يوم يمكم
هاجر : بيت جدهم بعد مانكدر نحجي
نزلت ودكيت الباب طلع للباب تيم ضحك وكال
تيم...........
.....................
انتهى البارت عجبكم وشنو رأيكم بل صدفه الي صارت ويا هاجر
- يتبع الفصل التالي اضغط على (رواية قسوة احفاد ال هتان) اسم الرواية