رواية موضوع عائلي الجزء(2) الفصل السابع و العشرون 27 - بقلم رحاب القاضي
موضوع عائلي
"الجميله والشعر الابيض"
_الحلقه الـ27
ــــــــــــــــــــــــــــ ــــــــــــــــــــــــــــ
دعهُ يبكي..
فذو الهمومِ جديرٌ أنَّ ما في فؤادهِ يبكيهِ!
- الرافعي.
♡♥♡♡♥♡♡♥♡♡♥♡
_الكل مشي من كتب كتااب عمار وجميله اللي اتقلب من السعاده والهدوء والبهجهه للحزن والغضب والعصبيه، ما كانش موجود غير عمار وابنه وفريده وجميله وايتن والمنشاوي وزكريا وجهاد وايهاب اللي كان وشه بينزف من لكمة مروان ليه وسميره قااعده جنبيه بتحاول تهديه، وبصت لمروان وقالت بعصبيه..
سميره
انت ايه الهمجيه اللي انت فيها دي يا ولد، ازاي تعمل فيه كده؟..
مروان بعصبيه
انتي اللي ازاي تعملي كده ايه البجاحه اللي بقيتي فيها دي؟..
عمار بحده
مروااان ولا كلمه كمان وخد مدام فريده وجميله وايتن ووصلهم..
مروان بغضب
انا مش همشي من هنا غير لما الحيوان ده يطلقها..
ايهاب بنبره استفزازيه رد عليه وقال
هو انت مش باباك قالك تسكت، ما تسكت يالا..
_كان لسه مروان هيهجم عليه ويطلع كل غضبه فيه عمار مسكه من دراعه جامد وبص لايهاب بنظره مميته وقاله بجمود...
عمار
اخرس يالااا ما اسمعش صوتك..
وقال لمروان
اعمل اللي قولتلك عليه يلااا...
وقرب من سميره ومسك ايدها جامد وقال
تعالي معايا لازم نتكلم..
مسك ايهاب ايده وقاله
في ايه بس يا باشا هي مش قاعده جنب راجل..
_زق عمار ايده ومسكه من شعره جامد بطريقه مهينه وقال بنبره غاضبه..
عمار
وانت شايف نفسك راجل يالاا ده انت حتت عيل ادوسك عليك بجزمتي لو ما سمعتش كلامي...
وشد سميره جامد خلاها وقفت وقال
وانتي اخلصي يلااا...
_بصت سميره بشماته لجميله اللي كانت واقفه مدايقه وقالت بأستفزاز....
سميره
بليييز اهدي يا عمار وانا هعملك كل اللي انت عايزه ، يلا بينا..
_ اخدها عمار ومشي والمنشاوي قام وقف وقال لفريده بضيق..
المنشاوي
حصل خير يا مدام فريده، يعني كويس والموضوع اتلم..
فريده بحده
هو فين ده اللي اتلم يا حج، بقي ابنك يسيب بني ويمشي مع طليقته اللي جات وخربت فرحة بنتي وفضحتنا قدام معارفنا وتقولي كويس والموضوع اتلم..
زكريا بصوت واطي لجهاد اللي كانت واقفه جنبه
الحمد لله وامك ميته انا لو كانت عندي حما زي الحيزبونه دي كنت دخلت فيها السجن..
جهاد
هو احنا ايه اللي مقعدنا لحد دلوقتي؟..
زكريا
محسوبين من العيله للاسف وادينا بنتفرج، وبعدين انتي لسه شوفتي حاجه خليني ساكت ده العيله كلها مواهب وهتتفرجي لحد ما تشبعي..
ايتن قربت من مامتها وقالت بقلق
ارجوكي يا ماما خلينا نمشي دلوقتي وبعدين نتكلم..
مروان
يلا يا طنط فريده، ويلا يا جميله انتي كمان واقفه عندك. كده ليه؟..
جميله بدموع
طيب..
قرب منه ايهاب في الوقت ده وقال
واحده بواحده يا ماروو انت اخدت ايتن مني وانا اخدت امك..
وقف زكريا جنب مروان ورد علي ايهاب وقاله
اخدتها فين لامؤخذه اصلها اتخدت ومشيت من قدامك وانت قااعد تسف كهربا علي الفاضي..
مروان بغضب
ما خلصتش يا ايهاب واللي عدي كله كوم واللي ببني وبينك كوم تاني..
المنشاوي
يلا يا مروان اعمل زي ما ابوك قالك، وانت يا زكريا هات مراتك ويلا بينا...
وبص لايهاب وقال
وانت يا ابني خليك هنا مستني مراتك او اللي بتقول عليها مراتك اصل عيب تدخل بيها وتطلع من غيرها...
_ ومسك مروان ايد ايتن ومشي وكلهم خرجو ورااه، وفضل ايهاب قااعد متدايق جداً..
ــــــــــ بقلم_الكاتبه_رحاب_القاضي ــــــــ
_ وفي بيت حامد الصاوي كانت بطه قااعده في الصاله بعد ما عظيمه اخدت علاجها ونامت، وكانت ماسكه موبيلها وبتتفرج علي صور يوسف مع دارين في فرحه اللي كدب عليها فيه وقالها انه مش هيعمل فرح، مسحت دموعها اتنهدت بألم وهي بتقري رسايل صحابها اللي بعتولها الصور وبيتأكدو منها اذا كان ده جوزها ولا حد شبهو وبرغم ان اسمه موجود بس كانت فاهمه انهم قاصدين يعملو كده عشان يشمتو فيها..
_ قفلت موبيلها ورمته علي الكنبه وحضنت نفسها وانهارت من العياط وفي الوقت ده الباب خبط، قامت بسرعه عشان تفتح وهي فاكره ان هو جه وما هانش عليه يسيبها زعلانه زي عادته، بس اتفاجئت ان اللي كان بيخبط يونس..
بطه بضيق
ايه اللي جايبك هنا دلوقتي؟..
دخل يونس وقفل الباب وقالها
جاي عشانك يا اغبي حد شوفته في حياتي..
بطه بسخريه
ما روحتش ليه تقف جنب صاحبك في فرحه..
يونس بجمود
ليه عملتي كده ليه قولتيلو يتجوز..
بطه بدموع
عشان هو كان عايز كده، المهم تشرب ايه؟..
يونس بحده
ما كانش هيتجوز لو انتي كنتي قولتي لا يا بطه، ليه وافقتي وفي الاخر دلوقتي زعلانه مش من حقك..
بطه بحزن
انت عايز ايه يا يونس حرام عليك انا بجد فيا اللي مكفيني ومش طايقه اي كلام يتقال..
يونس بحده
لا هتكلم عشان تفوقي لنفسك اللي انتي فيه ده بسببك انتي، ليه تعرضي نفسك للخطر وانتي لسه سنك صغير كده عشان الخلفه واهو بقيتي في حاله ما يعلم بيها غير ربنا، ولما جه جوزك وقالك هتجوز كنتي بقيتي جامده وتقوليلو لو هتتجوز تطلقني ولو امه اتكلمت معاكي نص كلمه ليكي اهل هما اللي يردو عليها، انما دور البنت المكسوره ده مش دورك ومش لايق عليكي عشان تعيشيه..
بطه ببكاء
ده مش دور يا يونس دي الحقيقه انت فاكر اني لو ما كنتش عملت العمليه كان يوسف مش هيتجوز لا كان هيتجوز مدام اتجوز دلوقتي يبقي كان كان هيتجوز في كل الحالات..
يونس
وانتي ايه اللي مخليكي قاعده علي زمته لحد دلوقتي، مدام اتجوز عليكي وانتي عارفه انه كده كده هيتجوز ليه تقبلي علي نفسك التعب...
بطه ببكاء
عشان بحبه عشان نفسي اشوفه مبسوط، ولو كنت سيبته يوسف عنيد ما كانش هيتجوز وبرضو كان هيجيب اللوم عليا،و ان انا السبب وانا اللي بحرمه من حقه، بس اهو اتجوز وهصبر معاه الفتره دي لحد ما مراته تخلف وبعد كده والله ورحمة ابويا وابوك ما هقعد معاه يوم واحد..
قعد يونس جنبيها ومسك ايدها وقال
لو طلقها ورجعلك حاولي تسامحي يا بطه ولا اقولك بلاش تفكري في اي حاجه دلوقتي اهدي بس وركزي الكليه بتاعتك انتي مش كنتي عايزه تبقي دكتوره هناك كملي في حلمك وسيبك منه خالص واخوكي معاكي وهو لو فكر في يوم يدايقك في حاجه قوليلي عشان انا جيبت اخري منه وعايز اربيه بصراحه..
ابتسمت بهدوء وقالت
ربنا ما يحرمنيش منك يا يونس، المهم ابقي هاتلي الولاد هنا يقعدو معايا شويه..
يونس
طيب ما تيجي انتي عندي واهو تغيري جو..
بطه
اجي عندك في وش هنااء هو انا ناقصه، وبعدين هما الولاد عندك ولا في بيت خالهم؟..
يونس بضيق
مع امهم عند بيت خالهم بس هبقي ابعتهملك...
بطه بقلق
في حاجه ولا ايه انت وشهد كويسين..
ابتسم بهدوء ورد عليها وقال
لا ما فيش حاجه ما تشغليش بالك انتي وابقي سلميلي علي امك ومن بكره هبعتلها الشغاله هنا وانتي ارجعي بيتك يا بطه ما تخليش حد يشمت فيكي وخصوصاً الناس اللي هنا، ولو حصل واتطلقتي مش هتقعدي غير عندي لحد ما اجوزك سيد سيده...
بطه بحزن
ان شاء الله يا يونس، اللي فيه الخير يقدمه ربنا..
_وقدام بيت فيروز وصل عزالدين بعربيته هو وفيروز اللي جات تنزل بس هو مسك ايدها وقال..
عز
طيب حتي قولي شكراً تعبتك معايا تعالي اتفضل..
فيروز
يا عم اوعي عايزه اروح اطمن علي جميله تلاقيها شايطه دلوقتي..
عز بغيظ
والله ما حد شايط غيري منك ومن ابوكي ما تتظبطي يا بت حسسيني انك مهتميه بيا..
فيروز بحده
واعملك ايه يا عم الشايط اقولك هوف يعني..
عزالدين
بايخه مش حلوه ما ضحكتنيش..
فيروز بغيظ
سيب ايدي يا عز عايزه انزل..
عز ببرود
لا انا عجباني قعدتي كده..
_ابتسمت بخبث وهي بترفع ايده اللي ماسكه ايدها وقالت بهدوء.
فيروز
ده ولسه هتعجبك اكتر..
_قطمت في ايده بسنانها فسابها بسرعه ومسك ايدها بألم وهي نزلت من العربيه وهي بتضحك وهو كمان نزل وقالها بغيظ..
عز
يا بت العضاضه طيب جعانه قولي انما تاكلي ايدي كده..
قربت منه وقالت وهي بتضحك
اسكت يا عم هتفضحني..
ابتسم وقالها بهدوء
طيب بصي هسألك سؤال واسمع رده وهمشي علي طول ومش هعمل فضايح بس تردي بصراحه..
فيروز بهدوء
خير؟...
عزالدين
انتي الفتره اللي عرفنا فيها بعض دي من قبل الخطوبه يعني مبسوطه بوجودي فيها معاكي ولا لا؟..
_ابتسمت بهدوء وقبل ما ترد عليه عدت بنت من جيرانها وقالت لعز وهي بتشاورله..
البنت
هااي زيزو..
عز بقلق
يلا ياا بت من هنا ..
فيروز بصدمه
حتي جيراني يا عز، هو انت كمان وصلت لاسماء بنت طنط ام اسماء..
عز
والله العظيم ما اعرفها او ممكن بس نسيت بس لا القطعيه دي ما عدتش عليا...
فيروز ضربته بالشنطه في وشه وقالت بغضب
وانت جربت كام قطعيه بقي..
عز بقلق
يا حجه اهدي والله العظيم ما اعرفها، استني انا هثبتلك يا بت طنط ام اسماء انتي استني..
اسماء وقفت وقالتله
نعم؟..
عز
تعالي هنا قوليلي انتي تعرفيني منين ولا انا اعرفك منين؟..
اسماء بابتسامه واسعه
مش انت الواد خطيب فيروز اللي كنت عامل جو رومانسي تحت البيت امبارح وخليت الحته كلها تهيص، وربنا انا حلفت لامي وقولتلها لو خطيبي ما عمليش زيك كده مش هتجوز..
عز
امان كده انا يا فيروو طلعت اهو لا اعرفها ولا تعرفني.
ابتسمت اسماء وقالت
طيب بعد اذنكم انا..
عز بحده
ها يا ست هانم مش سامعلك صوت..
فيروز بغيظ
ما هو كله بسببك وبسبب حوراتك اللي زي الزفت..
عزالدين
خلاص اتجوزيني واشكميني..
فيروز
هو مين فينا اللي هيشكم التاني، بس معاك حق انت صنف عايز فعلاً اللي تشكمك..
عزالدين
طيب استني ردي علي سؤالي ويسرعه قبل ما تطلع مصيبه جديده..
فيروز بهدوء
بص هو انا مبسوطه لان اول مره في حياتي اشوف اهتمام من حد بالطريقه دي..
عزالدين
طيب انا بحبك ومعجب بيكي وهموت علي اليوم اللي تبقي مراتي فيه انتي ايه بقي؟..
فيروز بخبث
امم بعد السنه ما تخلص هبقي اقولك يا عزالدين..
عز بغيظ
بوومه بوووووومه والله..
فيروز
ايه قولت ايه؟..
عزالدين
ما قولتش قولت روحي نامي يا فيروز..
فيروز
طيل استني هتمشي كده علي طول..
عز بصلها وقال
لو هتحضنيني او هتبوسي بسرعه قبل ما حد يشوفنا..
فيروز بحده
ايه قلة الادب دي لا طبعا اما مش هعمل كده، انا بقولك بس تصبح علي خير..
عزالدين بغيظ
وانتي من اهل الخير يا اختي..
_ طلعت فيروز فوق وهي مبسوطه من مناكفتهم سوا، ولقيت باباها قاعد مستنيها..
فيروز
ايه يا بابا اللي مصحيك لحد دلوقتي؟..
جمال
مستنيكي وكلمتك اكتر من مره مش بتردي عليا..
فيروز
معلش يا بابا الفون كان في الشنطه وما سمعتهوش..
جمال وقف قدامها وقال بحزن
ممكن بعد كده لما تبقي مع الولد اللي اسمه خطيبك ده تكلميني علي طول وتردي عليا..
فيروز بقلق
ليه يا بابا هو يعني عز هيعملي ايه؟..
جمال بضيق
اسمعي اللي بقولهولك يا فيروز، انا مش مرتاحله مهما عمل عشان خاطري اسمعي كلامي وريحيني يا بنتي..
فيروز
حاضر يا بابا، بعد اذنك انا داخله اناام..
_ودخلت فيروز اوضتها وكانت مدايقه جداً من كلام باباها، اتنهدت بضيق ومسكت موبيلها وبعتت رساله لعز وقالتله..
فيروز
عارف ايه الرد علي كلامك، هو اني خايفه منك ومهما حاولت اقنع نفسي انك كويس في حاجه جوايا بتقولي اوعي تقربي منه او تثقي فيه، لما ابقي ابطل احس بالاحساس ده وقتها انا اللي هقولك يلا نتجوز يا عز...
_ قفلت الموبيل وراحت غيرت هدومها وقبل ما تنام مسكت موبيلها لقيته شااف الرساله وما ردش عليها، فقفلته ونامت وهي قلقانه فعلا من علاقتهم...
_ وفي بيت سميره اول ما وصلت هي وعمار قعدت قدامه علي الكنبه وحطت رجل علي رجل وقالت..
سميره
خير هنتكلم في ايه يا عمار؟..
عمار بغضب
هي وصلت بيكي القذاره انك تتجوزي صاحب ابنك، لا صاحبه ايه العيل اللي انتي اتجوزتيه ده ما كانش بيسيب فرصه غير لما يعاير ابنك بيكي وباللي بتعمليه...
سميره
هو ايه اللي انا بعمله انا بتجوز يا حبيبي ولا هو حلال ليك وحرام عليا، وبعدين هي البنت اللي انت كنت بتتجوزها من شويه دي اكبر من ابنك بكام سنه ده لو ما كانتش قده..
قرب منها عمار وقال بحده
اوعي تقارني مراتي بالاشكال اللي انتي بتتجوزيها، جميله اشرف وانضف من ان واحده زيك تتكلم عنها اصلا..
ابتسمت بخبث وقربت منه وقالت
هو انت عايز تفهمني انك بتحب العيله دي، انا فاهمه كويس انك هتتجوزها فتره وهتسيبها، بس تعرف لما سمعت انك هتتجوز كنت هتجنن لدرجة اني قبلت الجواز من العيل صاحب ابنك ده وقولتله يمثل انه جوزي النهارده وبكره نتجوز عشان اخليك تغير عليا وتسيبها وتيجي معايا وخطتي نجحت..
_قالت كلامها وحضنته بس هو بسرعه بعدها عنه وزعق فيها وقال بحده..
عمار
ما تتلمي بقي انتي ايه عايزه ترخصي في نظري لاكتر من كده ايه تاني، انا اكبر غلطه في عمري ان واحده زيك انتي ام ابني..
سميره
انت عايز ايه اديك بتتجوز وانا كمان حره وهتجوز اللي عايزااه..
عمار بغضب
سيبك مني انا خالص عشان انا متجوز استقر ومتجوز البنت الوحيده اللي حبيتها في حياتي، وانتي لو كنتي اتجوزتي راجل محترم وبقيتي ست كويسه انا اول واحد كنت هخليكي تدخلي حياتي انا ومروان ونبقي علي الاقل اصدقااء بس بعد اللي بتعمليه ده ورحمة امي يا سميره لو ما اخدتي بعضك ومشيتي من هنا ومن مصر كلها لادفنك حيه، والواد الصايع اللي كنتي بتقولي عليه جوزك تبعديه عنك خااالص وبلاش اهددك تاني عشان انتي عارفه كويس من هو عمار المنشاوي ويقدر يعمل ايه..
_ قال كلامه وسابها ونزل وهي فضلت قااعده متعصبه ومتدايقه من كلامه وتهديده ليها، وتحت بيتها اول ما نزل عمار لقي مروان واقف مستنيه..
عمار
انت ايه اللي جايبك هنا؟..
مروان بغضب
مش عارف هي ليه امي كده، ليه امي واحده رخ...
قاطعه عمار وقال بجديه
اوعي تغلط فيها حتي بينك وبين نفسك اوعي تعمل كده، مهما عملت هتفضل امك وما تشيلش ذنب بسبب غلطها هي، واطمن هي هتمشي من هنا ولا هنسمع عنها حاجه ولا هي كمان هتسمع عننا حاجه بعد كده..
مروان بنبره حزينه
هتخليها تطلق من الحيوان اللي اتجوزتو مش كده؟ ..
عمار
مش لما تكون اتجوزتو الاول..
مروان
مش فاهم؟..
عمار
عملت كده عشان تستفزني وتبوظ اليوم وخلاص انما ما اتجوزهاش، بس الولد ده بيقرب منها اصلا عشان يستفزك انت، واوعي تتعصب ولل تعمل حاجه تدمر مستقبلك وتبقي خليت خطته تنجح، سيبلي انا الموضوع ده وانا هعرف اتصرف معاه ومع اهله كويس..
مروان بجمود
تمام يا بابا المهم ابقي كلم جميله، كانت مدايقه اووي وانا مروحها وكمان طنط فريده ما اتوصتش..
اتنهد عمار بضيق وقال
طيب روح انت وانا هروحلها..
مروان بص في ساعته وقال
هتروحلها دلوقتي دي الساعه عدت 12...
عمار
مالكش فيه روح يللا...
_ وبعد شويه في بيت جميله كانت قاعده في اوضتها بتعيط ودخلت عندها ايتن وقالتلها..
ايتن
عمو عمار عايز يكلمك بيقول انك مش بتردي عليه..
جميله بحزن
مش عايزه اكلم حد، سيبيني يا ايتن..
ايتن
انتي ليه مكبره الموضوع كده، الموقف كان وحش اووي عليه هو ومروان..
جميله بضيق
انتي اخدتي بالك هو عمل ايه، سابني واقفه زي خيال المآته وراح مسك ايدها واخدها ومشي وكان باين اووي انه غيران عليها..
ايتن
المفروض تكوني واثقه فيه اكتر من كده، وبلاش تخلي كلام ماما يأثر عليكي انتي عارفه هي لما بتدايق بتقول ايه..
جميله بسخريه
حقها هو اللي حصل شويه، ويمسك ايدها ليه واخدها وراحو فين اصلا وفي الوقت اللي بدل ما يبقي معايا انا فيه كان معاها هي..
ايتن
طيب ردي عليه ما تبقيش رخمه..
ناكت جميله وقالت
لا مش هرد انتي ردي وقوليلو نامت اصلا عندي شغل الصبح مش فضياله، واطلعي بره يلااا..
_ طلعت ايتن وجميله فضلت صاحيه وهي مدايقه جداً، وفجأه باب اوضتها اتفتح وافتكرتها ايتن وقالت بعصبيه...
جميله
يووه بقي يا ايتن سبيني عايزه انااام..
عمار
هتنامي وانتي زعلانه مني..
_قامت بسرعه وهي مصدومه من وجوده في اوضتها في الوقت ده وقالت...
جميله
انت جيت هنا ازاي؟..
عمار
وطي صوتك ايتن دخلتني ما انتي مش راضيه تردي عليا وبقالي ساعه ملطوع تحت..
جميله بضيق
اممم وانت افتكرتني دلوقتي بعد ما خلصت مع حبيبة القلب..
قرب منها بهدوء وقال
والله ما في حبيبه للقلب غيرك يا جميله❤
جميله بحزن
لا لا مش هاكل من كلامك المره دي عشان بجد. زعلانه منك..
عمار
مالكيش حق تزعلي عشان انا ما عملتش حاجه تزعلك، كنت لازم اتصرف عشان الموضوع ما يكبرش..
جميله بحده
بأي طريقه غير انك تمسك ايدها وتاخدها وتمشي وتسيبني انا، وبعدين انت اخدتها وروحت فين؟...
عمار بهدوء
روحنا بيتها وقولتلها تمشي وتسيب البلد ومشيت من عندها...
_جميله وهي بتمسك مقدمة قميصه وقالت بنبره غاضبه..
جميله
ده روج مش كده؟..
اتوتر عمار وقالها
ده لما حضنتك بعد كتب الكتااب..
ضربته علي كتفه جامد وقالت
ده ما كانش اللون بتاعي يا خاين..
عمار
لا ما توصلش للخيانه، هي حاولت تقرب مني بس بعدتها والله..
زقته جامد وقالت
امشي يا عمار انا مش عايزه اتكلم معاك...
عمار
انتي قد الزقه دي؟..
جميله بحده
قدها ونص كمان..
شدها وقربها ليه وقال بخبث
طيب مش عيب تمدي ايدك علي جوزك..
جميله بتوتر
وو وهو مش عيب يعني اللي انت عملته ده..
عمار
هو ايه اني بقرب منك ده عادي يعني بقيتي مراتي خلاص؟..
اتكسفت جميله وحاولت تبعد عنه وقالت
لا لا مش كده انا علي اللي حصل بينك وبين طليقتك..
عمار
والله العظيم ما حصل حاجه ولا في واحده في الدنيا دي هسمح لنفسي اني اقربلها او اخليها تقرب مني غيرك انتي..
جميله ابتسمت وقالت
طيب خلاص اتصالحت اوعي بقي..
عمار قربها ليه اكتر وقال
ليه ما احنا حلوين اهووو..
_دخلت في الوقت ده فريده ووراها ايتن اللي كانت يتبصلهم بقلق وخوف وبعدت جميله عن عمار بسرعه...
فريده بحده
ايه ده بقي؟...
عمار
بنتك اللي قالتلي اجي وانا قولتلها لا بس هي اللي صممت...
جميله بصدمه
بقي انا اللي قولتلك؟!...
عمار
طبعاً.. علي العموم بعد اذنكم عشان اتأخرت وعندي شغل الصبح..
فريده بجمود
اتفضل مع جوز اختك يا ايتن وصليه لحد الباب..
ايتن
حاضر يا ماما...
مشي عمار وفريده قالت لجميله
امم اتكلمي..
جميله بقلق
والله هو اللي جه عشان يصالحني..
ابتسمت فريده وقالت
وصالحك ولا لسه زعلانه منه؟..
جميله
صص صالحني هو انتي مش زعلانه ومش هتتخانقي معايا..
حضنتها فريده وقالت
لا يا حبيبتي مش هتخانق معاكي هو مش بقي جوزك خلاص، وبعدين انا واثقه فيكي انك كبيره وعاقله وهتعرفي تتصرفي في الموضوع بالطريقه المناسبه..
ابتسمت جميله وحضنتها اكتر وقالت
انا بحبك اوووي يا ماما...
_وتاني يوم الصبح في بيت المنشاوي، كان زكريا قااعد بيفطر وهو بيقلب في موبيله..
المنشاوي بصوت واطي لجهاد
هو جوزك سرحان في ايه كده وهو مبحلق في الموبيل؟..
جهاد
مش عارفه يمكن الشغل..
المنشاوي
اسحبي منه الموبيل كده بسرعه وشوفيه بيكلم مين؟..
جهاد
لا طبعا عيب يقول عليا ايه لو عملت كده؟..
المنشاوي
يا عبيطه لاحسن يكون رجع للسكه القديمه او للبت سماح..
جهاد بغيظ
معقول بيكلم سماح او واحده من اللي كان بيعرفهم زمان..
المنشاوي
الله واعلم اسحبي الموبيل خلينا نشوف وقوليلو بشوف الساعه كام..
_ بصت جهاد لزكريا بغيظ وبحركه سريعه سحبت الموبيل من ايده وقالت..
جهاد
دقيقه هشوف الساعه كام و... دارين؟!..
بص المنشاوي معاها للموبيل وقال
هي دارين اتجوزت ومين ده اللي اتجوزتو..
زكريا بجمود
هاتي الموبيل يا جهاد..
جهاد بحده
عشان. كده بقي قالب وشك عليا من الصبح، امسك موبيلك اهو اصلا ما يفرقش معايا..
المنشاوي
يا بت تلاقيه بس زعل عشان ما عزمتوش بلاش سوء الظن..
زكريا بحده
انتي بتعلي صوتك ليه الصوره جات قدامي وشوفتها، بلاش حركات العيال دي انا اكبر من جو المراهقه ده..
وقفت جهاد وزعقت فيه
اهو انا بقي عيله ومراهقه وما حدش ضربك علي ايدك وقالك تتجوزني ده ايه القرف ده..
_ ودخلت اوضتها ورزعت الباب وراها وهو اتصدم من ردت فعلها لانه ما كانش يقصد يدايقها، والمنشاوي كمل اكله وهو كاتم ضحكته بالعافيه..
زكريا
والنبي ما انت كاتمها اضحك يا منشاوي..
المنشاوي
ههههههههههه شكلك مسخره وانت بتتهزأ، بس ابنك هيطلع زيك علي فكره..
زكريا
وايه العلاقه مال ابني بعصبيتها؟..
المنشاوي وهو يشير لاثر جرح بسيط في راسه وقال
زمان لما امك كانت حامل فيك كان عمار صغير شويه وكان شقي اووي ومطاع عينها وهي كان خلقها دايق اووي في فترة الحمل، وكانت مره واقفه في المطبخ وعمار عمال يزن عليها تعمله فشار وهي بتجهز الغدا لانها ما كانتش بتحب اكل الشغالين، وانا داخل عندها بكل حسن نيه بقولها عامله ايه يا حبيبتي قامت حدفتني بالمعلقه في راسي وقالتلي يعني انت عميت مش شاايف عامله ايه..
ضحك زكريا اوي وقال
ههههههه عشان كده بتقول ان ابني هيطلع زيي عشان جهاد متعصبه زي امي الله يرحمها..
المنشاوي
نصيحه مني خدها علي قد عقلها بلاش تعند قصادها..
زكريا
ده انت يا منشاوي اللي تاخدها علي قد عقلها..
وعلي صوته وقال
انما انا هتعلي صوتها تاني عليا هديها بالجزمه وما فيش نزول معاك المطعم النهارده وتترزع هنا في البيت.
المنشاوي
مش مستاهله العصبيه دي كلها..
قام زكريا وقاله
همشي انا بقي سلام...
مشي زكريا وطلعت هي من اوضتها وقالت
يلا بينا يا بابا عشان ننزل..
المنشاوي
ما بلاش انتي عارفه هو ما بيحبش تقوليلو لا علي حاجه..
جهاد
انا حره وهنزل يعني هنزل، وكمان هكلم اسلام ابن خالي يجي يقعد معايا شويه في المطعم تحت..
المنشاوي
اسلام مين ده؟..
جهاد
هعرفك عليه وكمان هخلي الواد عماد يجي عشان اتكلم معاه تاني في موضوع العلاج بتاعه..
_ وفي الاوتيل صحيت دارين علي صوت موبيلها اللي كان بيرن، قامت ومسكت الموبيل ولقيت اللي بيرن عليها يوسف.. بصت جنبيها بسرعه ولقيته مش موجود، فردت عليه وقالت بقلق..
دارين
ايوه يا يوسف انت فين؟..
يوسف بجمود وهو سايق عربيته
صحيت من شويه ومعلش يعني لازم اروح لبطه دلوقتي، ابقي لما افضي اكلمك ونتقابل..
_اتملت عيونها دموع من طريقة كلامه معاها وكأنها واحده عارفها علي مراته مش هي كمان مراته وردت عليه بنبره عاديه وقالت..
دارين
ماشي سلام...
_ قفلت في وشه من غير ما تسمع رده وعلي عكس ما كان بيتعامل معاها امبارح بقي مستفز وقاسي في كلامه وده خلاها تعيط بحزن علي الوضع اللي بقيت فيه، اما هو وصل بعربيته قدام العماره اللي فيها شقته هو وبطه ونزل من عربيته وطلع فوق واول ما دخل لقاها قاعده بتفطر..
يوسف
موبيلك فين بكلمك من الصبح..
بطه بهدوء
معلش يا يوسف عملاه صامت وما اخدتش بالي منه..
يوسف
روحتلك بيت امك وقالتلي انك جيتي من الصبح هنا..
بطه
ايوه عادي هتفطر ولا فطرت..
قعد قدامها وقال
لا هفطر طبعاً، انتي هترجعي امتي لدراستك؟..
بطه
من بكره ان شاء الله والنهارده هحاول الم الحاجات اللي فاتتني..
يوسف
طيب وانا معاكي اهو في اللي تحتاجيه..
بطه
لا عادى ممكن تروح لعروستك انا هعرف اعتمد علي نفسي..
اتنهد بضيق وقال
مالكيش دعوه يا بطه واروح او ما اروحش دي حاجه ترجعلي...
بطه
ليه هو مش المفروض ابقي عارفه جوزي هيكون عندي امتي وهيبات عند ضرتي امتي؟..
يوسف
مش هبات عندها تاني وهفضل معاكي علي طول والحاجه التانيه اللي بيني وبينها ما تفكريش فيها يا بطه انا هعرف امشي الدنيا تمام..
سكتت بطه وهو قعد جنبيها وقال بحزن
حقك عليا انا اسف عارف انك مدايقه وان مهما قولت انا حاسس بيكي مش هعرف اهون عليكي، بس هو وضع مؤقت ودارين ولا حاجه عندي ومهما كانت حلوه او معايا انا مش هحب غيرك انتي..
بطه بدموع
عادي يا يوسف هي دلوقتي مراتك وانا فعلا ماليش حق اتدخل في حاجه بينكم، دقيقه هعملك شاي...
يوسف بهدوء
طيب هنعمله سوا والنهارده اليوم اجازه وهنقضيه سوا وهنخرج وهعملك كل اللي انتي عايزااه وانسي موضوع دارين ده خالص ممكن..
ابتسمت بهدوء وقالت
ماشي..
ـ وفي مكتب عمار كان بيتكلم في الموبيل وفيروز واقفه قدامه، وقال بعصبيه..
عمار
بقولك ايه من غير لف ودوران كتير في الكلام لو ما لميتش ابنك وخليته يطلع ابني وعيلتي كلها من دماغه والله هخليك انت وشركتك وكل حاجه تخصك تراب علي الارض والمكالمه دي مش هتتكرر تاني انا اهو كلمتك بكل ادب واحترام بس لو حصل غير اللي قولته مش هتلاقي قلة ادب من نوع خااص..
قفل معاه وقال لفيروز
هاتي يا فيروز الملف..
فيروز
اتفضل.. هي جميله كويسه؟..
عمار
ايوه كويسه في حاجه ولا ايه؟..
فيروز
لا بس كلمتني من شويه وكانت عايزه تعرف حضرتك بتعمل ايه وكده هي ممكن تكون زعلانه من امبارح يعني..
ابتسم عمار وقالها
لا هي عايزه تعرف اخباري منك قوليلها اللي هي عايزااه..
دخل عز عندهم في الوقت ده وقال لعمار
المندوب جه في الفرع الجديد انا هروح اظبط الدنيا..
عمار
ماشي وانا نص ساعه وهاجي وراااك..
_ومشي عز من غير ما يوجه اي كلام ولا حتي نظره لفيروز اللي كانت مدايقه من تجاهله ليها من لما بعتتله الرساله امبارح..
عمار بصلها بأهتمام وقال
اقعدي يا فيروز عايز اتكلم معاكي شويه..
فيروز بقلق
خير يا عمار بيه في حاجه ولا ايه؟..
عمار
يا بنتي اقعدي ما تقلقيش..
قعدت فيروز قدامه وهو قال
انتي طبعا عارفه غلاوتك عندي قد ايه، وانا بتعامل معاكي وبثق فيكي وكأنك اختي مش موظفه عندي..
فيروز
اقسم بالله العظيم انا لما كنت بقول لجميله ما تتكلمش معاك وتتقل كان غرضي تتصالحو مش المشكله تكبر هي اكيد قالتلك وانت هتمشيني..
عمار بخبث
اااه يا جزمه والحيوانه التانيه كانت بتمشي بنصايحك..
فيروز
لا لا مش نصايحي لوحدي انا وشهد وشهد كانت بتسخنها اكتر مني..
عمار ابتسم وقالت
بس اتجوزها وانا هقطع علاقتها بيكم اصلا، المهم ده مش موضوعنا اصلا..
فيروز
يعني جميله ما قالتلكش حاجه؟..
عمار بضحكه هادئه
لا ما قالتش حاجه انا عايز اكلمك بخصوص عزالدين..
فيروز بغيظ
طبعا كان لازم افضح نفسي مش الموضوع يخص عز الدين..
عمار بجديه
بصي يا فيروز هو صاحبي ومعرفه قديمه وجدع بس انا نفسي ما عنديش فيه ثقه كامله ولو تفتكري في بداية شغله هنا كنت بقولك يا فيروز خليكي معاه وعينك علي كل حاجه بيعملها..
فيروز بقلق
قصد حضرتك ايه يعني؟..
عمار
انتي لو كنتي جيتي وسالتيني عن رأي في موضوع ارتباطكم انا كنت قولتلك لا طبعا، بس دلوقتي انا شايف انه بيتغير..
فيروز
هو اللي قال لحضرتك تكلمني عشان تقنعني بموضوع الجواز صح؟.
عمار
هو قال كده بس انا مش هقنعك بيه واقولك يلا اتجوزي وانتي ونصيبك، لا يا فيروز انا لما قولتلك انتي زي اختي انا كنت قد الكلمه دي وهنصحك كأخ مش وانا المدير بتاعك ولا صاحبه هو..
فيروز بضيق
حضرتك عايز تقول ايه يا عمار بيه..
عمار بجديه
انتي لو قعدتي عمرك كله مخطوبه لعز عمرك ما هتقدري تفهمي ولا تثقي فيه، وممكن توافقي تتجوزيه دلوقتي ويطلع كويس ويخليكي تثقي فيه اكتر من اهلك نفسهم..
اتنهد بهدوء وقال
معني كلامي انك مش هتفهمي عز غير وانتي مراته وفي بيته، قادره تتجوزيه وتتحملي نتيجة اختيارك سواء هو هيتغير اولا يبقي اتجوزيه، مش قادره يبقي بدل ما تتعبيه وتتعبي نفسك بفترة خطوبه كبيره وتضيعي سنه من عمرك علي الفاضي يبقي لا ارفضي من دلوقتي..
اتملت عيون فيروز دموع وعمار قال بنبره هاديه
فكري علي مهلك واطمني لو اتجوزتي وهو داسلك علي طرف انا جنبك ومعاكي وهقفله وسيبك من اهلك خالص، دي حياتك انتي ما حدش هيعيشها غيرك..
قامت فيروز وقالت
حاضر يا عمار بيه انا هفكر في الموضوع واللي فيه الخير يقدمه ربنا، بعد اذنك..
ــــــــــ بقلم_الكاتبه_رحاب_القاضي ــــــــ
_ وبعد شويه كان عمار قاعد هو وعز الدين في الفرع التاني لشركته الجديده ومعاه ناس مهمه وفجأه دخلت عنده جميله وقالت بسرعه...
جميله
عموري تعالي عايزاك اا يا نهار اسود مين دول؟..
ابتسم عمار بهدوء وعز قال بسخريه
كلم يا عموري..
جميله بأحراج
خلاص انا هستناك بره لحد ما تخلص...
عمار قام وقالها
لا لا عز معاكم اهو يا جماعه وانا شويه وهاجي..
_ وسابهم ومسك ايد جميله قدام الكل وخرجو هما الاتنين وراح لمكتبه وقالها...
عمار
بقي ينفع كده عموري قدام الناس..
جميله
بردلك اللي عملتو امبارح قدام ماما، بس والله ما كنت اقصد انا فكرتك لوحدك عشان الشركه هنا لسه جديده..
عمار
يا باشا انت براحتك تعمل اللي انت عايزه، جايه ليه بقي؟..
جميله بتوتر
بص هو انا الفكره اللي هقولهالك دلوقتي مش بتاعتي خالص دي فكرة اخوك...
عمار
قصدك علي فكرة الديكور بتاع البيت وانه هيبقي من الشركه بتاعتك..
جميله
بص هو انت براحتك لو مش عايز خلاص بس اخوك الرخم صمم ان انا اللي اجي اقولك وحطني في موقف محرج..
عمار
انتي عبيطه يا جميله هو البيت مش هنعيش فيه انا وانتي؟..
جميله
مالهاش علاقه برضو انا مش هصلح مشاكلي علي قفااك...
عمار
اومال هنجيب حد غريب تصلحي مشاكلك علي قفااه، هي لما الشركه بتاعتك دي تكبر وتبقي سيدة اعمال قد الدنيا هو ده مش هيبقي نجاح ليا انا كمان..
جميله
هو انت مش هتدايق من حاجه زي دي..
عمار
بالعكس مدام هتبقي ناجحه وديما محافظه علي هيبتي وكرامتي ده اتفشخر بيكي كمان..
جميله ابتسمت باتساع وقالت
طيب يعني انا اعمل ايه اكتر من اني احبك، عارف يا عمار انا اكتر حد بيدعمني بابا الله يرحمه ويمكن قلة ثقتي في نفسي والحاله اللي كنت فيها دي كانت بسبب غيابه وبدأت ارجع زي الاول تاني معاك انت وعوضتلي جزء كبير من حنان بابا..
عمار
المفروض بعد الكلام ده اقولك شكراً او احضنك بس دلوقتي احنا متجوزين يعني..
جميله بقلق
يعني تلم نفسك وتدخل الاجتماع بتاعك وانا همشي..
عمار
لا استني عشان نروح البيت وتشوفيه انتي ما دخلتيهوش ولا مره ولازم تشوفيه..
جميله
هبقي اجيب ماما واجيلك بكره..
عمار
لا عشان بكره الحفله بتاعت مروان وايتن ومش هتكوني فاضيه واحنا فرحنا بعد. اسبوع يعني من النهارده هنبدأ في التجهيزات..
وبص في ساعة ايده وقالت
بصي دي الشركه اللي هيبقي الديكور بتاعها من عندك اتفرجي عليها لحد ما اخلص الاجتماع ونروح البيت..
جميله بقلق
ما بص حاسه كده انك بتشقطني...
عمار بضحكه هادئه رد. عليها وقال
هههههه ايوه بشقط مراتي عندك مانع..
_ وسابها وراح لمكتبه وهي فضلت قاعده مستنيااه وبعدين كلمت زكريا وقالتله انها هتروح تشوف البيت، وهو رد عليها وقال..
زكريا
هو انتي مش في الشركه صوريها بقي كويس عشان نشوف هنبعت مين مهندسين ينفعو للنظام بتاعها ويطلعو شغل حلو..
جميله
لا انا تعبانه من المشوار ومش عايزه اقوم الف واصور ابقي تعالي شوفها..
زكريا بحده
قومي يا مكسحه اعملي اللي قولتلك عليه والا والله هسيبهالك وامشي ده ايه القرف ده..
جميله
اهو انت القرف، وهقوم عشان شغلي وبس مش عشان بسمع كلامك يعني قولي بقي هي مراتك ردت عليك ولا لسه مطنشاااك..
زكريا بغيظ
مالكيش دعوه خليكي في خيبتك..
جميله بثقه
هه قال خيبه قال ده عموري ساب الاجتماع واهتم بيا وناقص يشيلني اوبح من فرحته اني جيتله هنا..
زكريا بسخريه
اوبح وعمار ضيعتي هيبة الراجل منك لله، وبعدين يا روحي دي عادة عمار انتي ما شوفتيش كان بيستقبل العملا الاجانب وخصوصاً الروسيين دول كانو بيبقو في الاوتيل والجناح الخاص وحاجات بقي استغفر الله..
جميله بغيظ
انت بتكدب صح قول انك بتكدب بدل ما اروح اولعلك في اخوك..
زكريا وهو يكتم ضحكاته
اهو عندك اسأليه ويلا مستني الصور..
قال كده وقفل وجميله قالت بغضب
صوروك وانت جثه وشهرو بيك يا بعيد..
_ وقامت تعمل زي ما هو قالها زكريا...
ــــــــــ بقلم_الكاتبه_رحاب_القاضي ــــــــ
_ وبالليل رجع زكريا من شغله وقبل ما يطلع البيت اخد باله من عماد اللي واقف بره المطعم بيتكلم في الموبيل..
زكريا
انت هنا يعني؟..
عماد
خلاص يا رضا اكلمك بعدين..
قفل معاه وقال لزكريا
عزيز وزيدان وواحد تاني من اللي اتقبض عليهم قبل ما يتحكم عليهم هربو...
زكريا بضيق
عارف بس ما اظونش هيبقي في خطر عليا هما دلوقتي هيبقي كل همهم يهربو بره البلد..
زكريا بضيق
واللي ما تعرفوش بقي انهم هربو مجدي اخويا كمان من السجن تفتكر ايه مصلحتهم من كده..
مسح زكريا علي وشه بقلق وقال
مش عارف بقولك ايه ما تقولش حاجه لجهاد وانا هتصرف هجيب الرجاله هنا ياخدو بالهم منها هي وابويا لما انا ما ابقاش موجود...
عماد
طيب ما تقول لاخوك هو ليه معارفه برضو..
زكريا
هشوف يا عماد تعالي نطلع فوق..
عماد
لا انا ماشي انا كنت جاي اقعد مع جهاد شويه بس اعمل ايه بقي هي مشغوله مع اسلام ابن خالها ده وكمان زعلانه مني عشان موضوع المصحه..
زكريا بجمود
استني اسلام مين هي جهاد فين؟..
عماد
جوه وابن خالها اللي جاي من امريكا ده قاعد معاها ومع ابوك جوه مش سامع صوت ضحكهم..
زكريا بغضب
طيب روح امشي يا عماد عشان ليلة اختك هتبقي سودا النهارده..
دخل زكريا المطعم ولقاها فعلا قااعده مع اسلام والمنشاوي معاهم وبيتكلمو وبيضحكو، فراحووقف ورا اسلام ولما جهاد شافته قالت بخبث..
جهاد
نسيت اقولك يا بابا مش اسلام كان قاري فاتحتي قبل ما يسافر يعني يعتبر كنا مخطوبين..
المنشاوي بص لزكريا اللي واقف وقال
ده بجد؟..
اسلام من غير ما ياخد باله من زكريا
ايوه والله وكنت راجع اصلا عشان اتمم الموضوع بس للاسف لقيت جوز عمتي الله يرحمه وهي اتجوزت..
مسكه زكربا من قفاه وقال
ايه رئيك بقي ابعتك لجوز عمتك وتتفاهم معاه بعيد عننا..
اسلام بقلق
والله العظيم هي اللي اتكلمت وفتحت الموضوع انما انا بعتبرها زي اختي والله..
جهاد بقلق
سيبه يا زكريا ايه اللي انت بتعمله ده؟..
زكريا بنبره غاضبه
ما اسمعش صوتك واطلعي فوق يلااا..
جات تعترض بس المنشاوي مسك ايدها وقالها
اسمعي كلام جوزك يلاا يا بنتي..
طلعت جهاد فوق واسلام قال بقلق
هه هي كلمتني والله وقالتلي اجي وانا كنت حابب اعتذر لحضرتك عن سوء التفاهم اللي حصل يعني احنا اهو بقينا نسايب..
زكريا بجمود
لو كلمتك تاني ما تردش عليها وعايز تيجي تطمن عليها تاخد اذني انا الاول فااهم..
اسلام
حاضر والله من عينيا ممكن اجري بقي اقصد امشي.
المنشاوي
لا لا والله ما ينفع سيبك من زكريا وخليك نتعشي سوا..
اسلام
لا لا انا مش بتعشي عامل دايت اصلا..
_سابه زكريا وهو مشي بسرعه والمنشاوي فضل يضحك وقال لزكريا..
المنشاوي
اوعي تزعل جهاد انت فااهم...
_ما ردش عليه زكريا وطلع فوق وهو متعصب جداً وعماد كان هيروح وراه وهو قلقان ليعمل حاجه في جهاد، بس المنشاوي قاله بجديه..
المنشاوي
سيبه هو مش. هيزعلها وهيعرفو يحلو مشاكلهم...
عماد بضيق
طيب ممكن تخلي بالك. من جهاد يعني هي بتحبك والله وانسي انها اختي انا عارف انك مش بتحبني..
المنشاوي
اقعد يا عماد نتعشي سوا بدل ما هتعشي لوحدي..
عماد بعدم. تصديق
انت بتقولي انا اتعشي معاك، ده انت بتزعل لما باجي هنا اصلا..
المنشاوي بهدوء
اقعد يا عماد احنا خلاص بقينا نسايب وجهاد غيرت نظرتي ليك من كلامها عليك..
قعد عماد وقال بحماس
هي جهاد قالتلك ايه عليا؟..
المنشاوي
قالتلي عماد كويس ونفسي يبقي احسن واحد في الدنيا وانها بتحبك حتي بعد اللي عملته فيها..
اتملت عيونه دموع وقال بحزن
جهاد احسن بنت في الدنيا ومن سوء حظها ان انا ومجدي وشيماء اخواتها، لو يرجع بيا الزمن انا مستعد اموت ولا اني اذيها..
المنشاوي
صلح اللي عملته زمان بأنك تتعالج وخليها تتباهي بيك انك كويس زي ما انت بتتباهي بيها وبطيبتها اهو..
عماد بدموع
انا هقولك اللي ما قولتوش لجهاد انا اخدت حاجات كتير وحشه خلايا جسمي اتدمرت انا لو روحت اتعالج من اول جرعة علاج هموت جسمي مش هيقبل العلاج خلاص، فخليني كده بقي لحد ما ربنا ياخدني وخلاص، بس مش عايز جهاد تزعل من دلوقتي..
المنشاوي بدموع
انت ليه وصلت نفسك لكده بس ده انت شاب وزي الفل ليه دمرت نفسك وانتحرت بالبطئ؟..
عماد بدموع
هما اللي عملو فيا كده مش انا، هما اللي وصلوني كده..
المنشاوي
هما مين الانسان بنفسه مش بحد، ما حدش وصلك للي انت فيه ده غيرك..
عماد بدموع
اللي حبيتهم اللي كنت فاكرهم سند وضهر ليا هما اللي خزلوني وخلوني ادور علي الحنان والحب والدعم من ناس تانيه وللاسف لقيته في سكه غلط كلها وهم...
المنشاوي
هما فينهم مهما كان اللي عملوه ما حدش خسر غيرك، ما حدش حققلهم هدفهم غيرك انت لما وصلت للحاله دي، عارف انت لما هتموت هيحصل ايه هيقولو من يومه كده صايع ومش نافع عشان كده بعدناه عننا، لو كنت اثبت ليهم العكس كانو هيتكسفو يجيبو سيرة اللي عملوه فيك وهيجو يتمنو رضاااك...
عماد بحزن وندم
ما بقاش ليه لازمه الكلام ده اهو اللي حصل..
المنشاوي
روحك بين ايد ربنا مش في ايدك ولا في ايد الدكاتره، بس انت روح للطب والدوا اللي خلقه ربنا ويمكن تكون المعجزه فيهم وتبدأ من جديد، وحتي لو حصلك حاجه وقتها هتقابل ربنا وانت بتحاول ترجع عن الغلط مش هتقابله وانت بتعصيه، فكر في كلامي كويس وبسرعه قبل الوقت ما يفوت..
عماد مسح دموعه وقال
حاضر يا حج، انا عايز اكل سمك ممكن؟..
ابتسم المنشاوي وقاله
حاضر نطلب سمك يا ابني..
_ ابتسم عماد بهدوء اول ما المنشاوي قال كلمة "ابني" ليه وقال بحزن..
عماد
حلوه كلمة ابني دي ما سمعتهاش قبل كده بالطريقه اللي انت قولتها دي، حسيت انك بتقولها بحنيه..
المنشاوي
ولو اتعالجت وسمعت كلامي هتبقي زي زكريا وعمار بالنسبالي هاا مستعد يا بطل؟..
عماد بأبتسامه واسعه
حاضر والله هحاول بجد اروح اتعالج...
_ وفوق اول ما طلع زكريا ودخل اوضته لقاها نايمه ومغمضه عنيها...
زكريا بحده
لا والله لحقتي تغيري وتنامي كمان..
حطت الغطا علي وشها وقالت
انا مش هرد عليك عشان نايمه..
قرب منها وشال الغطا من علي وشها وقال بعصبيه
قومي يا بت انتي اتكلمي معايا كويس..
جهاد بقلق
عايز ايه؟..
زكريا
ايه اللي عملتيه ده؟..
جهاد
انا ما عملتش حاجه..
زكريا
ايه اللي جاب الواد الملزق قريبك هنا؟..
جهاد
اديك قولت قريبي وانا كنت حابه اعتذرله عن اللي حصل..
زكريا بحده
جهاااااد الا النقطه دي عندي، مش عشان تستفزيني تتكلمي مع راجل تاني والله ادفنك مكانك فاهمه..
جهاد بغيظ
طبعاً قادر وتعملها هي جديده عليك يعني..
زكريا بحده
لا مش جديده هاتي ام الموبيل ده يلاا...
جهاد بقلق
خلاص مش هكلمه تاني..
زكريا بغضب
هاتي الموبيل يا جهاد..
جهاد بقلق
طيب انا هعمله بلوك خلاص بقي..
_ مد ايده ومسك الموبيل وحدفه علي الحيطه ونزل متكسر خالص وقال وهو بيقوم من جنبيها..
زكريا
فكري تكرريها تاني وتتوصلي مع اي راجل عشان هتبقي دماغك اللي بتتكسر بعد كده..
جهاد بدموع
علي فكره انت رخممم وانا لو بعمل زيك كان زماني مكسره موبيلك اول ما شوفت صورة دارين عندك...
زكريا بحده
ما اسمعش صوتك يا جهاد..
_ سكتت بس قامت من علي السرير واخدت المخده واللحاف وحطتهم علي الارض ونامت..
زكريا بنفااذ صبر
يا رب صبرني يااارب انتي بتعملي ايه يا جهاد؟..
_ ما ردتش عليه ودموعها نزلت بحزن، وهو غير هدومه واخد المخده من علي السرير ونام جنبيها علي الارض وقال..
زكريا
ما تزعليش..
قامت وقالت
ما تتكلمش معايا وما تنامش جنبي..
زكريا
يبقي مش هعرف انام النهارده..
جهاد
احسن قوم يلاا..
زكريا
ما تبقيش غلطانه وكمان تعندي يا جهاد..
جهاد
ليه هو انا اللي كسرتلك موبيلك وبزعق فيك..
زكريا
لا بس انا عملت كده عشان انتي غلطانه..
جهاد
لا مش غلطانه...
زكريا
بصي يا جهاد عشان ما تبقاش في بينا مشاكل انا بغير وبغير جداً ومعاكي انتي بالذات الموضوع بزياده تصدقي لو قولتلك اني بغير عليكي من عماد اخوكي وابويا كمان..
جهاد بتوتر
لا كده اوفر بجد...
زكريا
لا مش اوفر لو تعرفي انا بشوفك ازاي وعامله ايه فيا مش هتقولي كده بالعكس هتخافي ان حد تاني يشوفك بنفس الطريقه..
جهاد بتوتر
يعني هو من حقك انت تغير وانا لا؟..
زكريا
هو انا عملت حاجه تخليكي تغيري، كل الحكايه ان دارين دي غبيه جدا راحت اتجوزت واحد اغبي منها فكنت بستعجب علي اللي بيحصل مش اكتر..
حطت ايدها علي بطنها وابتسمت وقالت
خلاص بس ما تتكررش..
زكريا
قولي لنفسك كده احسنلك، وبعدين بتضحكي علي ايه؟..
جهاد بنبره سعيده
بدأ يتحرك اصله كان طول اليوم مش بيتحرك فكنت قلقانه عليه..
زكريا اخدها في حضنه بهدوء وقال
كان مستني ابوه يجي عشان ياخد راحته..
جهاد بسخريه
الله يرحم انا مش عايزه نزليه وطلعت عيني معاك..
زكريا
اممم طالبه معاكي نكد انتي صح، اقوم ارنك علقه يعني عشان تسكتي..
ضحكت بهدوء وقالتله
لو اهون عليك اعملها..
زكريا
طبعا لا مش هتهوني وتعالي ننام زي البني ادمين علي السرير..
جهاد
طيب هتجيبلي موبيل جديد صح؟..
زكريا بخبث
طبعا وانا اللي هسجلك الارقام كمان انا وابويا وعماد وايتن عشان هي اللي هتكون معاكي في الجامعه وجميله ولا اقولك بلاش جميله مش ناقصين خليكي بعقلك احسن..
قامت جهاد بهدوء من جنبيه وقالت
انا عايزه افهم مالها جميله مش طايقها كده ليه؟..
_زكريا وهو مركز علي حركتها وهي حاطه ايدها علي بطنها وبأيدها التانيه بتظبط شعرها وقالها..
زكريا
90في الميه من الستات في فترة الحمل بتبقي شكلها وحش، بس انتي واخده الجمال كله في فترة حملك ليكي لوحدك..
بصت للارض بكسوف وقالت
طيب انت هتنام ولا اجهزلك العشا..
غمزلها وقال بمشكاسه
لا طبعا هنام ونتعشي بعدين..
_ وفي بيت عمار كانت ايتن قااعده مع مروان في الجنينه وقالتله..
ايتن
طيب انت زعلان مني ليه دلوقتي؟..
مروان
شوفي انتي عملتي ايه وبعدين اتكلمي..
ايتن
تعدمني ما عملت حاجه انت بتفتري عليا..
ابتسم غصب عنه وقال
اعدمك ايه الكلام ده، علي العموم كنت مستني امبارح تكوني جنبي وتواسيني زي ما بتعملي في العادي بس ازاي ارن علي الهانم الاقيها نايمه..
ايتن
ما انت مشاكلك كتير وانا صحتي تعبت..
مروان
في ايه يا ايتن انتي اتحولتي ليه كده يا بنتي؟..
ايتن
لا ما خلاص انا ضمنتك واتجوزتك فمفيش داعي للمحن بتاع زمان..
مروان سحب ايده من ايدها وقال
لا وعلي ايه انا بنسحب من اولها، انا عايز ايتن بتاعت بيبي وحبيبي وميرو الكيوت اللي كانت قبل ما ادايق تكون جنبي مش الحلوفه اللي قدامي دي..
ضحكت ايتن وردت عليه وقالت
خلاص صعبت عليا هرجع زي زمان وامري لله..
مروان
ااه يا كداابه يا خدااعه، المهم تعالي اوريكي تجهيزات القاعه بتاعت بكره خلصت علي ايه لحد ما جميله تيجي...
_ وجوه البيت كانت جميله ماشيه وبتتفرج عليه وقالت بصوت عالي لعمار اللي كان في اوضته..
جميله
عمار هو انت بتدفع فاتورة الكهربا كام في الشهر؟..
رد عليها عمار وهو بيطلع من اوضته
ايه السؤال ده؟..
جميله
ما هو انت تقريباً واخد الاحمال كلها عندك كل دي نجفات واباجورات في البيت..
عمار
نجفات يا جميله يخربيت اللي دخلك مدارس، علي العموم بدفع تقريباً 6 او 7 الاف جنيه ده في القليل يعني..
جميله
ده تقريباً نفس الرقم اللي بندفعه احنا كمان بس في السنه..
ابتسم عمار وقال
يعني هو ده اللي لفت نظرك في البيت بس؟..
جميله
لا طبعاً حلو اووي كله وكبير، ممكن نخلي ايتن ومروان يقعدو معانا بعد ما بتجوزو..
عمار بجديه
اممم لا مش هينفع مروان هيقعد معانا لحد ما يتجوز وبعد ما يتجوز يعتمد علي نفسه هو ومراته لازم يتحملو المسؤليه..
جميله
ماشي ممكن اشوف اوضتك بقي..
عمار
قصدك اوضتنا يا حرم عمار المنشاوي..
جميله بتوتر
لا اوضتك لحد الخميس الجاي وبعدين نقول اوضتنا وخليك هنا انا هشوفها لوحدي..
عمار
هنشوفها سوا يا جميله في ايه؟..
جميله
وانا قولت لوحدي وخليك مكانك ولو اتحركت هصوت وافضحك..
عمار بغيظ
ماشي هانت كلهم 6ايااام يا جميله ادخلي..
_ دخلت اوضته وهو فضل واقف مستنيها من بره، وطلعت بعد شويه وهي بتقفل شنطتها...
عمار بنبره مرحه
قلبتي ايه من جوه وحطاه في شنطتك..
جميله
بشيل الموبيل والله وبعدين هاخد ايه يعني؟..
عما?
•تابع الفصل التالي "رواية موضوع عائلي" اضغط على اسم الرواية