رواية داليدا الفصل الثاني 2 - بقلم حبيبة ابراهيم
أسيل رايحة تجيب الكشاف وفجأة تسمع صوت صريخ عالي
ٱسيل بتاخد الكشاف وتجري ع الأوضة: ايه ايه في ايه
بتبص بتلاقي العروسة اتحركت من مكانها واختها بتعيط وبتقول مشيت مشيت كانت هنا مشيت
(النور يرجع وٱسيل بتلبس الاسدال وبتاخد اختها وبتنزل بتروح عن جارتهم)
جارتهم: ايوه ايوه مين
ٱنا أسيل يا طنط
جارتهم: اي يا حبيبتي اتفضلي فيه ايه وشك مخضوض ليه كده واختك ليه شكلها معيط
أسيل: طنط ريهام هو النور قطع عند حضرتك
ريهام: اه يا حبيبتي قطع ولسه جاي في اي مالك؟
أسيل: لا يا طنط اصل انا كنت انا وقمر كنا قاعدين وسمعنا صوت خرابيش وقمر عيطت ف جيت عند حضرتك معلش انا أسفة لو ازعجتك
ريهام: لا يا حبيبتي متقوليش كده انتي زي بنتي
أسيل: طب ممكن معلش تتصلي بماما انا مخدتش معايا التليفون من الخضة
ريهام: ماشي يا حبيبتي
ريهام تشربوا ايه عقبال ما ماما تيجي؟
أسيل: ربنا يكرمك يا طنط احنا يدوب هنمشي على طول
ريهام: لا ميصحش انا هقوم احطلكوا عصير
(بعد تلت ساعة)
صوت جرس الباب
أسيل: خليكي يا طنط انا هفتح
أسيل: ماما انتي كنتي فين كل ده يا ماما
ام أسيل: ما انتي عارفة انا كنت بشتري حاجات ايه اللي حصل بس
أسيل: احكيلك بعدين
ام أسيل: حبيبتي يا ريهام شكرًا يا حبيبتي
ريهام: على ايه بس دول زي ولادي
أم أسيل: يلا عشان نروح شقتنا
أسيل: يا ماما قمر صوتت وانا بجيب الكشاف ويدوب لسه جيباه كنت مخلياها ف الاوضة قولت اجيب الكشاف بسرعة لقيتها بتعيط وبتصوت وبتقول كانت هنا كانت هنا
أم أسيل: هي ايه ديه؟
أسيل: مش عارفة يا ماما انا لقيتها بتقول كده
أم أسيل: تلاقيها شافتك وانتي بتعدي برة وخافت يا أسيل منا قولتلك خليكي معاها
أسيل: يا ماما ازاي يعني انا كنت عند الكنبة
أم أسيل: ايه يا قمر في ايه يا حبيبتي؟
قمر بنبرة خوف وعين مدمعة: يا ماما انا شوفت واحدة كانت شعرها وحش
أم أسيل: لأ يا حبيبتي متخافيش (وبتحضنها)
أم أسيل: أسيل انا مش قولتلكوا انتي وداليدا متفرجيش قمر معاكو على أفلام الرعب اللي بتشوفوها
أسيل: يا ماما انا قولت ل داليدا وقالتلي عادي الفيلم مش رعب اوي
أم أسيل: طب من انهاردة مفيش أفلام رعب تاني
أسيل: ماشي يا ماما
(صوت جرس الباب)
أم أسيل: كنتي فين كل ده يا داليدا(بصوت عالي)
داليدا: في ايه يا ماما ما انتي عارفة إني كنت في مشوار
أم أسيل: بعد كده مفيش نزول تاني غير لما تقوليلي هترجعي امتى
داليدا: في إيه يا أسيل هو انتوا اتخانقتوا؟
أسيل: لأ تعالي أحكيلك
داليدا بعد ما سمعت الحكاية: في حاجة بتحصل غريبة وانا مش فهماها دي تاني مرة قمر تعيط وتصوت مش عارفة في إيه
أسيل: صح انا نسيت أقولك ونسيت أقول لماما كمان
داليدا: إيه؟
أسيل: بصي يا داليدا انا حاسة ان العروسة فيها حاجة عشان انا دخلت لقيتها متحركة من مكانها
داليدا: ما يمكن قمر اللي حركتها بس يا أسيل إيه شغل الأفلام اللي انتي عايشة فيه ده
أسيل: شغل أفلام إيه يا داليدا طب هي مين اللي جابتهالك؟
داليدا: مش عارفة كانوا جايبين نفس الشنط اكيد مش هسألهم يعني بعدين ليه يعني؟
أسيل: عادي يا داليدا بسأل عادي
داليدا: شوفي يا أسيل رايحة فين
أسيل: إنتي حرة انا هروح اغسل المواعين
______
(اليوم التالي)
تليفون داليدا بيرن
داليدا: الو ايه يا ريم
ريم: ايه يا بنتي عاملة إيه؟
داليدا: الحمد للَّه بخير إنتي عاملة إيه؟
ريم: الحمد للَّه يا قلبي
ريم؛: فينك كده من يوم ما جينالك انا وتاليا مشوفتكيش وحتى مبتفتحيش لايڤات
داليدا: اه منا كنت قايلة هكمل اللايڤ بس كنت في مشوار امبارح وكان في مشكلة كده في البيت ف نمت بقى
ريم: حصل ايه بس؟
داليدا: النور قطع وقمر صوتت وكلام كده وماما قالت ان ده عشان قمر خوافة وقبليها اتفرجت معانا على فيلم رعب ف طبعًا ماما قعدت تزعق بقى وكده وزعقتلي عشان اتأخرت وكده
ريم: اه طب قمر صوتت ليه؟
داليدا: بتقول شافت بنت شكلها وحش وكده
ريم: اممم
داليدا: ريم معلش انا عاوزة اسألك سؤال
ريم: ايه قولي
داليدا: هو انتي اللي جيبتي العروسة؟
ريم: اه معجبتكيش ولا إيه
داليدا: لأ طبعًا عجبتني انا كنت عاوزة اجيب واحدة زيها لقريبتي
ريم: اه بصي جيبتها من محل لو كده ننزل انا وانتي ونجيب
داليدا: ماشي بس مش الكام يوم دول عشان بس ماما شادّة علينا شويتين
ريم: ماشي شوفي امتى إن شاء اللّٰه وانا هاجي معاكي
داليدا: ماشي يا قلبي عاوزة حاجة؟
ريم: لأ يا حبيبتي عاوزة سلامتك
داليدا: تسلمي يا قلبي سلام
ريم: سلام
———
أسيل: داليدااااااا
داليدا: ايه يا أسيل في ايه؟
أسيل: إيه رأيك نجيب قمر ونشوف إيه حصلها؟
داليدا: أسيل بقولك إيه ماما هتقعد تزعق وتقولك أنتوا فكرتوها تاني
أسيل: هو انتي لسه مش مقتنعة إن العروسة فيها حاجة طب قوليلي قمر عيطت ليه قبل كده
داليدا: يا أسيل عروسة إيه اللي فيها حاجة وبعدين قمر عيطت عشان البنسة عورتها
أسيل: داليدا انا قمر لما روحتي المشوار ونزلتي انتي وماما قبل ما النور يقطع قالتلي إن في واحدة خربشتها وكانت خايفة من العروسة هو في ايه يا داليدا انتي ليه مش عاوزة تصدقي؟
داليدا: وانتي متقوليش ليه كده من وقتها؟
أسيل: لأن حصل اللي حصل وملحقتش اقول حاجة لماما من كتر الزعيق والعصبية
داليدا: بصي انا اتصلت ب ريم وعرفت انها جابت العروسة من محل وقولتلها اني عاوزة اعرف عشان اجيب واحدة لقريبتنا
أسيل: حلو يعني اقتنعتي اهو!
داليدا: بصراحة انا مقتنعة من بدري بس كنت بكذب نفسي واول يوم قالولي ان العروسة بتتحرك وانا مصدقتش وقولت يمكن قمر البنسة عورتها وانهاردة قومت من النوم لقيتها على الترابيزة وهي كانت برة قولت يمكن قمر جابتها واكتشفت ان قمر اساسا نايمة مع ماما وماما خدتها ونزلت اول لما صحيوا
ف خوفت وقولت مش هينفع ارميها عشان محدش ياخدها قولت هرجعها المحل تاني
أسيل: طيب اجي معاكي؟
داليدا: لأ خليكي هنا هروح انا وريم وهحكيلك
أسيل: ماشي امتى
داليدا: انا قولتلها مش الكام يوم دول ف ممكن بعد بكرة إن شاء اللّٰه
أسيل: إن شاء اللّٰه
أسيل: طب احنا ازاي هنخلي العروسة معانا يومين زيادة وبعدين كده ريم هتشوفك وانتي بترجعيها
داليدا: هنعمل ايه ماما مش هتوافق ان هي تنزلنا من البيت عشان خناقة امبارح وانا مش عاوزة اقولها عشان الموضوع ميزيدش و بصي انا هروح واشتري عروسة واعرف مكان المحل وبعد ما تمشي نروح انا وانتي مش كده كده كنتي عاوزة تيجي؟
أسيل: طب بصي روحوا وانا هلبس واجهز وانتي قوليلها انك رايحة مشوار وكده وانا هجيلك بدل ما تروحي وترجعي مرتين
داليدا: ماشي
(جرس الباب)
أسيل: هقوم أفتح
أسيل: ماما ايه روحتي فين كده انتي وقمر
ام اسيل: كنت بجيب حاجات وخدتها فسحتها شوية عشان تنسى
أسيل: اممم ماشي
ام اسيل: قوموا روقوا الشقة وروقوا اوضتكوا
أسيل: ماشي
_______
(بعد ساعتين)
ام اسيل: قمورتييي
قمر: نعم يا ماما
خدي هنا عملتلك حاجة بتحبيها
قمر وفي ايديها العروسة: انا جيت يا ماما
ام اسيل: بصي عملتلك ايه اجمل كوكيز لأجمل قمر
أسيل: طب إيه انا عاوزة حته
داليدا: وأنا كمان
ام اسيل: انتوا لأ اعملوا لنفسكوا
وفجأة…..
#داليدا
يتبع…..
- يتبع الفصل التالي اضغط على (رواية داليدا) اسم الرواية