رواية قلبي بينادي باسمك الفصل الثالث 3 - بقلم ياسمين
part 3 بدايه الغيث قطره
فضلت سوار بصه لمامتها ومش عارفه تقول أيه نزلت دمعه سريعه على خدها و
مسحتها بسرعه بعد ما لقت مامتها بتعيط
رضوى: انا ربنا بيعاقبني علي كل مره قهرت قلب ابوكي فيها و على كل دمعه نزلت من امه و على كل مره قهرتك فيها
سوار: ماما هو انت لسه بتاخدي فلوس من بابا
رضوى: كل شهر بيبعت مصاريفك
سوار: وكنتي بتصرفي عليا منها ؟
رضوى: أوقات
سوار: يعني أيه ؟
رضوى: كنت بحوشهم و ....
سوار قاطعت امها في عصبيه أول مره تشوفها
سوار: ليه ليه..حرام عليكي ليه بتعمل كدا
رضوى: انا اتعذبت في الفقر طول عمرى و مصدقت اشوف العز
سوار: ماما يا ريت تعرفني حساب البنك الي بابا بيبعت عليه
رضوى: ليه
مشيت سوار من جنب مامتها و راحت تكمل الي وراها و بطلت تتكلم حفاظا على مقام مامتها. خلصت سوار الي وراها و قررت تكلم د.وليد عشان تأكد على معاد الدكتور
سوار: السلام عليكم د.وليد اخبار حضرتك أيه
د وليد: وعليكم السلام الحمد لله انسه سوار
سوار: مفيش خبر عن الدكتور السعودي ؟
د وليد: لسه جايلي ايميل من شويه ان شاء الله بكرا تقدرى تيجي المستشفي عشان الدكتور يشوف والدتك
سوار: طب كويس الحمد لله .. طب يا دكتور متعرفش هيبقى طالب قد أيه
د.وليد: لا دي حاجه خاصه بينكم وبين بعض
سوار: تمام يا دكتور شكرا لحضرتك
قفلت سوار و راحت لمامتها الي وشها باين عليه شيل الهم و قعدت جنبها بتحاول تخفي توترها
سوار: ماما بكرا الدكتور السعودي هيشوفك
رضوى: ماشي
سوار: ماما انت معاكي رقم بابا ؟
رضوى: لا غير رقمه من ١٠ سنين معرفش غير حساب البنك بس
سوار: طيب يلا قومي ريحي بكرا يومنا طويل
رضوى: سوار انت ليه بتعملي كدا
سوار: ماما الفلوس الي كنت بسحب منها لسالي من بابا بردو
رضوى بصت على الارض في خجل و نفسها الارض تنشأ و تبلعها مقدرتش تتكلم وقتها سوار فهمت وغمضت عنيها وصلت مامتها سريرها و اتوضت و صلت وفضلت تبكي لحد ما نامت على سجادتها
________________________________
ابراهيم: اه فعلا مستر مهند يستاهل الترقيه
داليا: فعلا مستر مهند يستاهل .. كنت سمعت ان مس سوار ليها ترقيه هي كمان
ابراهيم: لا دا كان مجرد تفكير مش اكتر
داليا: بس يا مستر انت عارف ان شغلها يستاهل الترقيه
ابراهيم: لا يا مس داليا انا مديرها و عارف حاجات انت متعرفيهاش
عدت سوار من جنبهم بالصدفه عشان تسمع كلام ابراهيم
ابراهيم: مس سوار متستحقش الترقيه عشان كدا سحبتها منها
داليا: ليه يا مستر دي ممتازه محدش بيشتكي منها
ابراهيم: ياما ورا السواهي دواهي يا مس داليا .. المهم خلينا دلوقتي نقوم خلينا نبلغهم بالترقيات
..
خرج ابراهيم و مخدش باله من سوار الي كانت مصدومه من كلامه و معرفتش ازاي ممكن ترد اعتبارها في المدرسه خصوصا ان داليا عصفوره المدرسه و سيرتها هتكوت على كل لسان و كل واحد هيزود من عنده ، وقف تفكيرها اتصال أختها سالي بصت على الموبيل بضيق
سوار: ايوا يا سالي
سالي: انا تعبانه يا سوار
سوار: مالك يا سالي في ايه
سالي: انا هرجع البيت النهارده و احكيلك على كل حاجه
سوار: ايوا انت تعبانه مالك
سالي: لما ارجع يا سوار هركب دلوقتي هكون في البيت على ٤ العصر
سوار: ماشي يا حبيبتي هخلص الشغل و اجيلك
قفلت الموبايل واخدت نفس كبير حياتها كل شويه بتصعب اكتر من الاول و بتتفاجئ بحاجات عمرها ما كانت في بالها
__________________________________
سالي: انا مروحه البيت أهو
عمر: أوعى حد يعرف يا سالي
سالي: انت عبيط يا عمر لو عرفو في البيت هيدبحوني
عمر: اوعدك اول ما نخلص كليه هتجوزك
سالي: عمر احنا بقالنا ٤ سنين مع بعض مش هتخطبني حتى!
عمر: سالي هخطبك ازاي و احنا لسه في الجامعه
سالي: باقي سنتين يا عمر تعالي نشد حيلنا فيهم و نتخرج و حتى مش لازم خطوبه نتجوز علطول
عمر: حاضر يا سالي حاضر روحي انت بس و اتصرفي في أي فلوس خلي الدنيا تفرج بقا
___________________________________
انتشر خبر ترقيات المدرسين و الكل استغرب عدم ترقيه سوار و بدأت داليا في توزيع الكلام يمين و شمال
هند: انت بتقولى أيه يا داليا عادي يعني ملهاش نصيب في الترقيه
داليا: بقولك اتقالي من مكان موثوق
هند: انت مصدقه الي بيتقال بذمتك ؟
آيه: و الله كل شئ ممكن يا هند انت متأكده أوي كدا ليه
محمود: لا يا مس آيه مس سوار مش من النوع دا
آيه: وانت شايفها نوع أيه بقا
هند: هو في أيه من امتى واحنا بنتكلم على زمايلنا كدا
داليا: في أيه يا جماعه دي مجرد دردشه عادي يعني مش أول مره ندردش مع بعض
دخلت سوار و الكل فجأه سكت و قامت داليا تطلع وقفتها سوار بإيديها
سوار: انت عارفه يا مس داليا انت قد أيه قيمه و قامه في المكان و فعلا الكلام الي بيطلع منك مبيكنش غلط ولكن للاسف المرادي انت غلطتي
بصت للكل ورجعت تتكلم بكل ثقه و ثبات
سوار: انا اعتذرت عن الترقيه لظروف البيت عندي بسبب عمليه مامتي والترقيه الجديده محتاجه مني وقت زياده وانا مش متفرغه ليها حاليا .. عموما انا مش هعايب على الي صدق ولا هعايب على الي قال احنا كلنا كبار الحمد لله و كل واحد بيتعامل بتربيته
خرجت سوار و راحت لمكتب ابراهيم و هي بترتيب الكلام الي هيطلع منها بكل هدوء خبطت على الباب ودخلت لما سمعت
" أتفضل"
ابراهيم: مس سوار اتفضلي
سوار: مستر ابراهيم .. قبل اي حاجه حضرتك مديري وليك كل الاحترام ولكن احفظ الكلمتين دول كويس .. مش انا الي يتلعب بسمعتي و يتقال عليا كلام محصلش ياريت زي ما عملت بلبله في المدرسه وقفها
ابراهيم: انت ازاي تتكلمي معايا كدا
سوار: مستر ابراهيم كاميرات الميتنج رووم مسجله صوت و صوره وانت بتتكلم مع مس داليا عني فأرجوك بلاش تخبيط في بعض اكتر من كدا
خرجت سوار و قفلت الباب عليها و هي مش عارفه الي عملته دا فعلا صح ولا هتخسر شغلها بسببه .. رجعت سوار البيت استقبلت سالي و رضوى بالحضن و بدأت تتكلم مع سالي تفهم أيه المشكله عندها
سوار: ممكن بقا تعرفيني انت تعبانه مالك
سالي: امبارح وانا في الجامعه اغمى عليا و ودوني المستشفى قالو ان عندي التهاب في المعده و دكتور المستشفى قالي اني اقدر اتعالج تبع تأمين الجامعه بس لازم يكون معايا مبلغ معين كدا
سوار: مبلغ معين يعني أيه
سالي: عشان لو حصل حاجه و كدا
سوار: لا احنا رايحين المستشفى النهارده عشان ماما هتيجي معانا نكشف بالمره واهو تتعالجي قدام عيني
سالي: لا يا سوار ليه المصاريف ما التأمين موجود
سوار: مفيش نقاش يا سالي طالما وصل للاغماء يبقى الموضوع كبير ولازم اخد بالي منك .. قومي اجهزي يلا عشان نتغدى و نروح المستشفى
قامت سالي وهي مش عارفه هتتصرف ازاي اتدبست في الكشف وهتطلع كدابه ومش هتعرف تعمل أيه مع سوار واكيد هتسألها على كل المصاريف الي كانت بتطلبها .. التلاته جهزو و راحو المستشفى استقبلهم د.وليد
د.وليد: اهلا بيكي انسه سوار الدكتور هيكون عندك حالا
دخلت سوار مامتها اوضه الكشف و بدأت تجهزها عشان الكشف ودخلت سالي متهكمه على الوضع الي هي فيه لحد ما دخل الدكتور
د.تركي: السلام عليكم
سوار: وعليكم السلام اهلا بيك يا دكتور
د.تركي: هلا فيك اختي الكريمه د.وليد عطاني خبر عن حاله الوالده الله يشفيها فيني اشوف التحاليل!
سوار: اه طبعا أتفضل .. دي كل التحاليل و الاشعات الي عملتها خلال الشهور الي فاتت
د.تركي: حلو .. بشوف الوالده و اعطيكي خبر ان شاء الله فيكي تنتظري برا
خرجت سوار وهي بتدعي ان يكون أمل الشفا على ايد الدكتور شكله فاهم هو بيعمل أيه قررت تروح تصلي ركعتين تستعين بيهم بربنا يقويها عشان شكل الي جاي تقيل
سوار: سالي انا هروح أصلي اذا الدكتور خلص خليه يستنى انا مش هتأخر
سالي: ماشي متتأخريش انت بس
بعد ربع ساعه رجعت سوار و الدكتور كان خلص و دخل سوار عشان ياخد شويه بيانات
د.تركي: ان شاء الله خير و بتصير العمليه قريبا
سوار: ان شاء الله
د.تركي: محتاج بعض بيانات المسؤول عن الحاله
سوار: تمام انا المسؤولة .. اسمي سوار عبد الله طلال الازهرى
بص د.تركي لها بصدمه و ساب القلم ومقدرش يفهم
د.تركي: ايش قلتي ؟
سوار: اسمي!
د.تركي: فيكي تعيديه!
سوار: سوار عبد الله طلال الازهرى
- يتبع الفصل التالي اضغط على (رواية قلبي بينادي باسمك) اسم الرواية