رواية موضوع عائلي الجزء(3) الفصل الاول 1 - بقلم رحاب القاضي
#موضوع_عائلي
“بيت الهنا”
_الحلقه الاولي
ــــــــــــــــــــــــــــــــــــــــ
اسرار السعاده هي الاشخاص اللي حوالينا، واسرار الحزن برضو الاشخاص اللي حوالينا، فأختار ناس تكمل سعادتك مش تزيد حزنك♥🌺
♡♡♡♡♡♡♡♡♡♡♡♡♡♡♡
_وقبل ما نبدأ حكايتنا اعرفكم علي بطل روايتنا الجديده واللي اسمه الاستاذ حسن وعنده 50 سنه ومراته مدام ليلي عندها 50سنه برضو اتجوزها وهما صغيرين في السن شويه وخلفو عيال كتير…
الكبيره اسمها ريناد وعندها 30سنه والتوأم ليها رضوي اللي شبهها جداً، وبعدها طارق اللي عنده 27سنه، وبعدهم روان اللي عندها 20 سنه و، واخر العنقود روفان وروز التوأم اللي عندهم 10 سنين..
_وفي يوم صحي حسن من النوم علي صوت دوشه جنبيه، واول ما فتح عينيه لقي روفان بنته بتاخد فلوس من المحفظه..
حسن
انتي بتعملي ايه يااا بت انتي؟..
روفان
باخد فلوس عشان مراتك مش راضيه تديني اجيب اندومي..
حسن
مراتك.. اسمها ماما يا قليلة الادب وهاتي الفلوس دي..
روفان
طيب اقولك اسم البنت اللي بيكلمها طارق وما تاخدش مني الفلوس..
حسن
لا عيب تفتني علي اخواتك..
روان
طيب اقولك خالتو قالت لماما ايه لما كانت عندنا عليك؟..
حسن
قولنا عيب تنقلي كلام يا سوسه وهاتي الفلوس..
روفان
طيب اقولك روان بتتأخر ليه وهي جايه من الكليه..
حسن
هو انتي ظابط مخابرات متنكر في طفله ولا حكايتك ايه، هاتي الفلوس دي واطلعي عند امك يلا..
روفان بغيظ
خد الفلوس بس لما اكبر هبلغ عنك انك كنت بتفتري عليا بس..
_قالت كلامها وطلعت بره الاوضه وحسن كان مصدوم من كلامها وقال لنفسه..
حسن
عوض عليا عوض الصابرين ياارب فيها الوليه الصغيره دي..
_ وقام وطلع بره اوضته ولقي ليلي مراته بتزعق مع طارق ابنه اللي ماسك موبيله..
حسن
هو انت لو سيبت الموبية وسمعت كلام امك الدنيا هتطير، الشركه اللي بتديرها هتخرب يا فاشل.
ليلي
وانت ايه اللي دخلك بيني وبين ابني، روح شوف بناتك خلي واحده تهز طولها وتيجي تجهز معايا الفطار..
حسن
انا غلطان يا ليلي اقفي في الشباك بقي وكملي خنااق معاه، في شوية جيران لسه ما سمعوش..
طارق
مالك يا بابا صاحي متعصب ليه كده؟..
حسن
عشان شوفتك لا بتروح جامعه ولا حتي بتشتغل، يا غلطه..
ضحكت روفان اخته وقالت
هههههه معاك حق يا بابا جيبتنا كلنا بنات وعند طارق البرمجه باظت..
ضحكو كلهم وطارق قالها
والله ما هديكي الموبيل تلعبي عليه تاني..
روفان
ده انت الخير والبركه ربنا يديك ما ياخد منك..
حسن
انتي جيبتي الكلام ده منين يا بت انتي..
ليلي
من التلفزيون هو في غيره اللي بوظهم..
_سابهم حسن ودخل عند بناته رضوي وروان لقاهم نايمين، قرب منهم بهدوء وقال..
حسن
رضوي يا رضوي قومي يا حبيبتي..
رضوي
نعم يا بابا في ايه؟..
حسن
قومي يا حبيبتي عشان تجهزي الفطار مع ماما لان اخواتك تعبوها بره..
رضوي
انا جهزت امبارح يا بابا النهارده اليوم علي روان..
راح حسن ناحية روان وقال
روان قومي يا حبيبة بابا..
روان
ايه يا بابا بتصحيني بدري كده ليه، لتكون ناوي تخليني ابيع لبن..
حسن
لا يا لمضه بس قومي جهزي فطار مع امك لان اخواتك تعبوها اووي بره..
روان وهي بتنام
لا لا قول لرضوي انا جهزت امبارح..
زعق حسين وقال
جرا ايه يا بت انتي وهي هو انا كنت بتحايل عليكم، طيب قومو انتو الاتنين جهزو الفطار يلااا..
_قامو الاتنين بسرعه وراح حسن الحمام لقي روز دخلت قدامه وقفلت الباب بسرعه..
حسن
يلا يا روز عشان بابا عنده شغل..
روز بحده
هو في ايه حتي في الحمام مش عارفه اخد راحتي..
حسن
اه يا ام لسان عشره متر انتي براحتك انا داخل الحمام اللي جوه..
_ ودخل الحمام اللي في اوضة نومه لقي الباب مقفول من جوه..
حسن
مين جوه..
طارق
انا يا بابا في حاجه ولا ايه؟..
حسن
يا ابني ما في حمام بره بتيجي هنا ليه؟.
طارق
بناتك مش بيدوني فرصه ادخل بره..
حسن
طيب انجز عندي شغل وهتأخر..
طارق
علي فكره انا لسه داخل وعايز احلق دقني واخد شاور..
حسن بحده
الله يخربيتك اعملكم ايه اروح اعملها في الشارع، اطلع يااه بدل ما اكسر عليك الباب..
طلع طارق وقاله
ما هي لو واحده من بناتك مش هتعمل معاها كده..
حسن
ايوه اوعي من وشي بقي…
_ وبعد شويه قعدو كلهم بيفطرو وروفان فضلت تعيط..
حسن
مالك بس في ايه؟..
روفان
طارق اخد البيضه بتاعتي…
حسن
يا ابني انت مش ناوي تكبر بقي وتعقل، بتاخد منها البيضه ليه يا غلطه..
طارق
ما هو البيض كتير قدامها اهو..
ليلي
اسكتي يا بنت وانا هقشرلك غيرها سيبي اخوكي يفطر براحته..
حسن
عاملين ايه في المدرسه يا روفان انتي وروز
روز ردت عليه وقالت
انا نجحت بس سقطت في الانجلش وروفان سقطت في كله..
حسن
يا نهار اسود ومخبين عني..
ليلي
المدرسه كلموني وانا هبقي اخلي بالي معاها اكتر.
روفان
ما حصلش يا بابا انا نجحت في ماده واحده..
حسن.
والباقي يا اختي ما نجحتيش فيه ليه؟
روفان
هما ما نجحونيش اروح اطلب منهم واجرح كرامتي يا سي بابا..
كلهم ضحكو وحسن قال
بطلو تضحكو كده علي كلامها، ليلي البنت دي ما تاخدش مصروف لحد ما تنجح..
روفان
هي العشره جنيه اللي باخذها دي مصروف اصلا..
طارق
اسكتي مش انا بطولي ده باخد عشره جنيه برضو..
حسن
كل واحد وظروفه وانا مش شغال في بنك عشان ادي كل واحد فيكم اللي عايزه..
روان
بابا انا كنت عايزه 500 جنيه عشان عندي كورس مهم..
حسن
بالليل يكونو عندك، طارق توصل اخواتك كلهم المدرسه قبل ما تروح الشغل..
طارق
حاضر يا بابا من عينيا، بس كنت عايز 10 الاف جنيه اللي قولتلك عليهم..
حسن
والله حاولت اتصرف فيهم بس ما عرفتش اجمعلك غير سبعه..
طارق
يا بابا المشروع خلاص بيكمل اهو وما فيش حاجه معطلاني غير الفلوس، صحابي دفعو وانا لسه..
حسن بحده
وانا اعملك ايه يعني ما انت اخدت كل اللي معايا حتي رضوي اختك اخدتت منها الفلوس اللي محوشاهم من شغلها ومبقاش معايا غير فلوس جهاز اخواتك ودول مستحيل امد ايدي عليهم..
طارق بضيق
خلاص مش عايز حاجه من حد..
_ الباب خبط في الوقت ده فقامت روفان بسرعه وقالت وهي بتجري علي الباب..
روفاان
ده اكيد. زيزو..
حسن بصوت واطي
طارق اوعي تجيب سيرة الفلوس اللي محتاجها دي قدام عمك فاهم ولا لا..
طارق بضيق
طيب..
_ دخل عندهم عزالدين اللي بقي عنده 57 سنه وبرغم شكله اللي بان عليه الكبر الا انه لسه وسيم ورياضي، وقعد معاهم وقال لليلي..
عزالدين
انتي يا وليه مش قولتلك تصحيني افطر معاكم.
ليلي بغيظ
ايدي ورمت وانت بخبطلك علي الباب وانت مش سامع..
عزالدين
خلاص هبقي اسيبلكم المفتاح وحد من الولاد يدخل يصحيني…
رضوي
بقولك ايه يا عمي هنروح امتي عشان اقدم في شركة الصاوي انا مش طايقه قعدت البيت..
عزالدين
انا كلمت يونس صاحبي وهو قال بعد فرح ابنه نروح واطمني شغلك مضمون هناك..
_وطلع ظرف فيه فلوس من جيبه وحطه قدام حسن وقال..
عزالدين
امسك الفلوس اللي كنت عايز تستلفها من توفيق صاحبك يا حسن، وعيب تبقي محتاج حاجه مع اخوك وتروح تاخدها من الغريب..
اخد. منه طارق الفلوس وقال
تسلم يا احسن عمو في الدنيا الفلوس دي انا اللي كنت محتاجها مش بابا..
حسن بحده
طارق رجع الفلوس لعمك، وانت يا عز انا ما قولتلكش عشان مش بترضي تاخدهم لما اجي ارجعهم..
عزالدين
مالكش دعوه هو مش طارق اللي عايزهم انا وطارق مننا لبعض بقي..
طارق
وانا موافق يا عمي..
وبص لاخواته وقال
يلا بينا عشان ما نتأخرش..
حضنت روفان عز وقالت
مش هتاخر عليك يا زيزو هروح المدرسه وجايه علي طول عشان نلعب سوا..
عز بأبتسامه واسعه
وانا هفضل مستنيكي لحد ما تيجي يا حبيبة عمك..
_مشيت روفان هي وروز مع روان وطارق عشان يوصلهم، وليلي قالت لعزالدين بضيق..
ليلي
عز البت روفان سقطت وانا مش قادره عليها وهي بتحبك وبتسمع كلامك اكتر مني ومن ابوها فخليها تذاكر..
حسن بسخريه
انتي بتقولي لمين ده كان ابويا الله يرحمه بيعلقه من رجليه عشان يذاكر..
ضحكت رضوي وعز قاله بغيظ
كده قدام البت يا حسن طيب ما انت كنت بتعمل بلاوي ومش عايز اتكلم عليها..
حسن قام وقال
لا وعلي ايه انا رايح الشغل السلام عليكم..
ليلي
وعليكم السلام يا حبيبي، لما اكلمك ترد عليا يا حسن عشان ما انشغلش عليك..
حسن باس راسها وقال
من عينيا يا حبيبي..
مشي حسن وليلي قالت لعز بهدوء
عز مش انا لقيتلك حتت عروسه انما ايه ادب وجمال ومن عيله كويسه ومتعلمه و..
مسك عز الطعمبه وحطها في بوزها وقال بحده
وتكملي فطارك وانتي ساكته يا ليلي انا مش هتجوز تمام..
ليلي بغيظ
وليه يعني مش هتتجوز ما انت عندك شقتك قدامنا اهي واحلي واكبر من شقتنا وعندك فلوس كتير وربنا موسعها عليك وكبير ايوه بس مش عجوز يعني ليه ما تتجوزش وتجيب واحده تونسك في وحدتك..
ردت عليها رضوي وقالت
يا ماما يعني هما اللي اتجوزو عملو ايه بس، هو كده احسن..
عزالدين
حبيبت عمك يا رضوي والله..
ليلي بحده
ما طبعا الاستاذه رضوي الشربيني البايره اللي عندها 30 سنه لازم تقول كده، بس اقسم بالله يا رضوي لو العريس اللي جاي النهارده طفش منك لاكون مقطعه الشباشب والجزم اللي في البيت كلها عليكي،اللي انتي موقفه حياتك عليه مش سائل فيكي فووقي بقي..
_اتنهدت رضوي بغيظ وحزن وسكتت وليلي قالت لعز بنفس عصبيتها..
ليلي
وانت تشوفلك حل وتتجوز انا مش بعمل فيك مصيبه ده انا عايزاك تبقي سعيد ومبسوط..
عزالدين
انتي يا ليلي بطلي تجيبلي في عرايس عشان انا مش هتجوز وانا مش واحيد ولا حاسس بوحده لان ولادك انتي وحسن اخويا ولادي انا كمان وماليين عليا الدنيا اسكتي بقي..
ادايقت ليلي وسابتهم وقامت ورضوي قالتله
سيبك من ماما يا عمو وتعالي ننزل سوا نجيب طلبات البيت..
عزالدين
تمام يلا بس استني اعمل سندوتش عشان لسه ما اكلتش..
ــــــــــ #بقلم_الكاتبه_رحاب_القاضي ــــــــ
_ وفي بيت يونس الصاوي اللي بقي احدث من الاول بتصميمات راقيه جدا، كانت واقفه شهد قدام السفره وجنبيها الشغاله..
شهد
كملي تجهيز الفطار يا نعمه لحد ما اروح اصحي الولاد..
نعمه
تحت امرك يا هانم..
_سابتها شهد وطلعت فوق وراحت لاوضة يزن اللي بقي شكلياً قريب اووي من يونس وخصوصا تصرفاته، ابتسمت شهد لما لقيته بيصلي واستنته خلص وقالتله..
شهد
حرماً يا حبيبي..
يزن بابتسامه بسيطه
جمعاً يا ست الكل..
شهد
غير هدومك يلا بسرعه وانزل عشان نفطر يا احلي عريس.
يزن
حاضر يا ماما، المهم ابقي كلمي سدره النهارده وحاولي تكوني جنبها كتير..
شهد
ليه مالها سدره هي كويسه صح؟..
يزن
ايوه كويسه بس علاقتها مع بطه مش احسن حاجه فخليكي انتي معاها او يارا،وكمان النهارده ذكري وفاة طنط دارين ونفسيتها وحشه..
شهد بضيق
يعني حبكت تبقي ذكري انتحار امها يوم فرحكم ، استغفر الله العظيم ياارب خلاص هكلمها ما تقلقش وهكون معاها وهي في الاوتيل كمان…
يزن
ماشي يا ماما ربنا ما يحرمني منك ابداً يا حبيبتي..
_ ابتسمت وطلعت من عنده وراحت لاوضة بنتها اللي عندها 16 سنه وكانت طالعه من الحمام وهي واخده شاور وبتنشف في شعرها..
شهد
ده ايه النضافه دي بقالي كتير ما شوفتكيش بتستحمي ولا عشان فرح اخوكي النهارده..
يارا
اسمها اخدتي شاور يا ماما، وبعدين انا باخد شاور كل يوم علي فكره وفرح يزن مش فارق معايا عادي انا اصلا رايحه المدرسه..
شهد
يونس علي شكل عيله صغيره، نشفي شعرك كويس عشان ما يجيش ليكي برد، واجهزي وانزلي عشان نفطر سوا…
يارا
اوكي يا مامي ممكن تخرجي بقي عشان اكمل لبس..
اتنهدت شهد بضيق وقالت
حاضر يا بنت يونس طالعه..
_ طلعت شهد من عندها ويارا مسكت موبيلها وبعتت رساله صوتيه لحد وقالتله..
يارا
انا صحيت يا زين واخدت شاور وهجهز وهنزل افطر وبعدين اروح المدرسه لما تصحي كلمني عشان احكيلك تفاصيل فرح اخويا النهارده..
_ وسابت موبيلها وبدأت تجهز لمدرستها، وفي الوقت ده وقفت شهد قدام اوضة يوسف وقالت قبل ما تدخل..
شهد
يارب صبرني واديني صبر فوق صبري لما ادخل عند الحيوان البري اللي عايش معانا ده..
_ وخبطت علي الباب بهدوء ودخلت لقيته مضلم الاوضه كلها ونايم علي في سابع نومه بهدومه من امبارح حتي مش قالع الكوتشي بتاعه..
شهد بغيظ
انت يا نيله قوم يالااا..
يوسف بنوم
بكره بكره سيبوني انام..
شهد بحده
نامت علي راسك حيطه قووم فز ايه المنظر ده..
يوسف
في ايه يا ماما هو كل يوم تصحيني بالطريقه دي…
شهد
ما هو من عمايلك عارف لو ابوك شم خبر علي انك رجعت بعد نص الليل امبارح هينفخك…
يوسف
طيب لما اصحي ابقو انفخوني بقي..
راحت شهد وقعدت جنبيه وقالت
يا ابني يا حبيبي هو انت لو بقيت ملتزم تنام بدري وتصحي بدري وبطلت سهر في اماكن مش كويسه هتحصل حاجه لا بالعكس هتلاقي نفسك بقيت تروح الجامعه اللي عملت فيها اقامه دي وتتخرج وتشتغل..
يوسف
ششش بس بقي عايز انام…
قلعت شهد الجزمه اللي لابساها وقالت بعصبيه
انا تقولي هش يا ابن الواطي شايفني دبااانه قووم فز..
قام يوسف بسرعه وقال بغيظ
الله يرحمك يا امومه بقي في ام تصحي ابنها كده..
شهد بحده
متبريه منك يا اخويا ومن اليوم اللي شوفت وش ابوك فيه وانجز يلا وقوم ابوك عايزك تروح معاه الشغل النهارده..
نام يوسف تاني علي السرير وقال
قوليلو ناايم ومش راضي يقوم..
شهد
طيب والله يا يوسف ورحمة ابويا وامي لو ما سمعتش الكلام وقومت لاكون قايله لابوك علي رجعوك متأخر بالليل وهكلم عائشه حبيبت القلب واقولها ياللي مفهما انك الشيخ يوسف..
يوسف بغيظ
قايم يا شهد قايم يا مرااات ابويا..
شهد وهي بتلبس الجزمه
جاتك الهم تعبتني معاك والله ايه ما تبقاش عاقل زي اخواتك ليه…
_ وسابته وطلعت راحت لاوضتها هي ويونس ولقيته واقف قدام المرايا وبيلبس جاكيت البدله بتاعته، فقربت منه وبقيت تساعده وقالت..
شهد
ما تكلمش يوسف انا كلمته واتفقت معاه مش هيسهر تاني وكمان هينزل معاك الشغل النهارده عشان يزن هيروح يوصل عروسته الاوتيل..
يونس بضيق
اما نشوف بس والله لو كررها لاكون انا اللي مربيه يا شهد..
شهد
خلاص بقي يا يونس هو شاب وطايش شويه ولازم ناخد بالنا في التعامل معاه عشان ما نوصلش لنقطه صعبه..
يونس بخبث
طيب سيبك منه ايه الحلاوه اللي علي الصبح دي، ولا اكمنك هتبقي ام العريس فجو النفسنه هيبدأ من دلوقتي..
ضحكت بهدوء وقالتله
لا يا حبيبي انا علي طول حلوه، بس انت اللي ما بقيتش مهتم..
يونس قرب منها وقال
نخلص من فرح يزن وافضالك و…
_ قبل ما يكمل كلامه الباب اتفتح ودخلت يارا وهي ماسكه المشط وقالت..
يارا
ماما تعالي اعمليلي شعري و… ايه ده انا دخلت في وقت غلط ولا ايه؟..
اتكسفت شهد ويونس قال
ايوه اطلعي بره يلاا..
يارا بعند
لا هتأخر علي المدرسه يا بابا وعايزه ماما تعملي شعري..
شهد
تعالي يا حبيبتي هعملهولك..
يونس
يارا دي اخر سنه هتخرجي فيها بشعرك وبعد كده تلبسي الحجاب زي امك كده..
يارا بضيق
اوكي يا بابي ان شاء الله..
_دخل يوسف هو كمان وهو مش لابس التيشرت بتاعه وقال بملل..
يوسف
ماما تعالي طلعيلي هدوم عشان البس..
يونس بغيظ.
انت ما عندش اللي جابك دم اللي قدك فاتح بيوت ومعاه عيال وانت مش عارف تطلع هدومك من الدولاب لنفسك..
شهد بقلق
خلاص يا يونس انا اللي معودااه علي كده…
يونس بحده
وايه المنظره ده مش عيب تطلع كده قدام امك واختك، اسمع يالا تحترم نفسك كلها كام يوم ومرات اخوك هتكون هنا معانا في البيت..
يوسف ببرود
هتبقي فوق يا بابا مش انت عامل دور كامل زياده لـ يزن وبعدين انا بحب ابقي براحتي في البيت..
يارا
يوسف ممكن توصلني المدرسه النهارده.
يوسف
مش فاضي..
يونس
ومشغول في ايه يا حيلتها ما توصل اختك زي ما طلبت منك والا يارا اللي تقوله يتعملها…
يارا
حبيبي يا بابي ربنا يخليك ليا..
يوسف
وانا قولت مش فاضي يا بت اكتمي بقي…
ضربه يونس علي كتفه وقال
اكتم انت واللي جابك، وايه اللي مخليك مش فاضي..
يوسف
انت يا بابا يا قمر انت مش رايح معاك الشغل النهارده..
يونس بغيظ
يا بااارد يا مستفز اوعي من وشي..
مشي يونس وشهد قالتله بلوم
عيب يا يوسف اللي بتعمله ده البس اي حاجه لحد ما اجي اطلعلك هدومك..
جه عندهم يزن وقال بغيظ
انت اخدت الشربات بتاعتي يا يوسف؟..
يوسف
ايوه مالقتش شرابات واخدت بتوعك..
يزن بحده
طيب شايفه يا ماما انا مش بحب حد. يلبس من هدومي..
يوسف
قولتلك تجيبلي شربات معاك وانت مش بتجيب..
يزن
هو انت يعني اتشليت ما تجيب لنفسك..
يوسف
خلاص روح خد. من بتوعي..
يزن بحده
انت عايزني انا يزن الصاوي اطلع من البيت وانا لابس شراب طويل ولونه اصفر..
يوسف
خلاص البس اللي كنت لابسه امبارح هو اينعم مكمكم بس ماشي حاله..
شهد
سيبك منه يا يزن مش هتاخد. منه لا حق ولا باطل ووانا هاجي ادورلك. علي شراب من بتوعك..
يزن بغيظ
اديني اهو رايح اتجوز وهسيبهالك..
_مشي يزن ويارا قامت من قدام شهد بعد. ما سرحت شعرها وكانت طالعه بس يوسف بوظلها شعرها بسرعه وطلع وهو بيضحك، ويارا فضلت تزعق فيه وكانت خلاص هتعيط..
يارا بدموع
شايفه يا ماما بوظلي شعري تاني…
شهد بعصبيه
تلاقيه في عيالك يا بعيد ربنا ينتقم منك يا يونس ويتحرق دمك زي ما عامل فيا، تعالي انتي كمان اترزعي قدامي اعملهولك من الاول..
ــــــــــ #بقلم_الكاتبه_رحاب_القاضي ــــــــ
_ وفي مكان تاني كانت واقفه بنت جميله اوووي بعيون بني وشعرها طويل وقامتها القصيره بعض الشئ قدام قبر والدتها ودموعها ماليه عيونها، جه يوسف وقف جنبيها وحط ايده علي كتفها بهدوء وحنان وقال..
يوسف
كفايه كده يا حبيبتي يلا بينا..
شالت ايده من عليها بهدوء وقالت
يزن جه ولا لسه؟..
يوسف
لا لسه ما جاش وايه اللي هيجيب يزن دلوقتي هنا يا سدره، اصلا المفروض انتي تكوني في الاوتيل عشان تجهزي لفرحك..
سدره بسخريه
عارفه وعارفه برضو ان لو عليك ما افتكرهاش خالص مش كده..
يوسف بضيق
لا طبعا مش قصدي كده تعيشي وتفتكري يا ستي يلا بينا بقي..
سدره بجمود
هستني يزن يجي ياخدني اصلا ماكنش ليه داعي تيجي معايا..
يوسف
انا هروح ازور جدتك وجاي ولو يزن ما جاش هنمشي مش هنبات هنا..
_ قال كلامه وسابها ومشي وهي قعدت علي الارض قدام قبر دارين وقالت بدموع..
سدره
كان نفسي اشوفك علي الاقل لما اجي وازورك اتخيل شكلك افتكر كلامك بس انا مش فاكره اي حاجه ليكي خالص، ازاي اصلا هان عليكي تعملي في نفسك كده و تسبيني لوحدي معاهم..
_ نزلت دموعها بحزن كبير واتردد في ودنها صوت جدتها ام يوسف لما كانت بتقولها..
“امك ماتت بسببهم ما حدش كان بيحبها وابوكي ظلمها عشان يرضي مراته وما اتحملتش وانتحرت وهي لوحدها ووصتني انا اللي اربيكي وما اخليش بطه تاخدك”..
_مسحت دموعها وفضلت قاعده وهي ساكته وبتبص للقبر بحزن، لحد ما جه يزن وقعد جنبيها وقال..
يزن
يعني ده ينفع نبدأ اليوم في المقابر..
ابتسمت بهدوء وقالت
عشان نبقي مختلفين، انا كنت مستنياك اصلا..
مسك ايدها وقال
طيب يلا بينا انا خليت عمو يوسف يمشي واحنا هنفطر سوا وبعدين هوصلك الاوتيل..
بصتله بهدوء وقالت
بتحبني يا يزن؟..
باس ايدها بهدوء ورد عليها بأبتسامه بسيطه
طبعاً بحبك والا ما كنتش هتجوزك النهارده، وما كنتش هبقي حاسس اني اسعد واحد في الدنيا عشان هنكون مع بعض تحت سقف واحد النهارده..
ابتسمت بهدوء وقالتله
طيب يلا بينا بقي مش هنقضي اليوم كله هنا في المقابر يعني..
_ قام يزن وهو ماسك ايدها ومشيو مع بعض ونظراته ليها كانت كلها حب علي عكسها هي كانت سرحانه اغلب الوقت وملامحها غامضه جداً..
_تفتكرو بقي سدره ناويه علي ايه؟
ــــــــــ #بقلم_الكاتبه_رحاب_القاضي ــــــــ
_ وفي بيت تاني بسيط شويه كانت فيروز طالعه من اوضتها وهي لابسه هدوم رسميه وشكلها ما اتغيرش كتير رغم سنها الكبير، ودخلت المطبخ لقيت زين ابنها اللي عنده 19 سنه واقف وبيتكلم في الموبيل وبيقول..
زين
وانا صحيت من شويه يا يارا وبجهز الفطار اهو عشان اساعد ماما، اول ما تخلصي كلميني مستني اشاركك تفتصيل فرح اخوكي..
فيروز
احمم مين يارا دي بقي؟..
زين بتوتر
ماما انتي هنا من امتي؟..
فيروز
مش هكرر سؤالي تاني مين يارا دي وتعرفها من امتي وليه ما قولتليش..
زين بخجل
عادي يعني دي صديقه مش اكتر عرفتها من علي الفيس من فتره وما اعرفش حاجه عنها اصلا غير ان اسمها يارا وبصراحه مبسوط من الكلام معاها..
فيروز
طيب عندها كام سنه ومن مصر ولا منين؟..
زين
عندها 16 سنه وايوه من مصر من القاهره بس منين بالظبط بنت مين والحاجات دي ما اعرفش بس شكلها بنت ناس مرتاحين يعني، وعلي فكره يا فيرو هي صديقه وبس..
فيروز بخبث
تمام صديقه وبس هو انا قولت حاجه، اوعي بقي عشان اجهز انا الفطار..
زين بضيق
انا بتكلم بجد يا ماما، اصلا ما ينفعش تبقي غير صديقه وبس..
فيروز بضيق
ليه يا حبيبي ما يبقاش غير كده، هو انت وحش يعني بالعكس انت شاب زي الفل شكلك حلو وبتدرس في كلية الطب وبكره هتبقي دكتور قد الدنيا..
زين بسخريه
بس مالوش اب ومتسجل بأسم امه، وعنده القلب واحتمال في اي وقت يموت..
قاطعته فيروز وقالت بدموع
بعد الشر عليك انت هتخف وقريب اووي، هنعمل العمليه وهتبقي كويس، انما ابوك فلو كان يستاهلك كنت هسجلك بأسمه انما هو واحد. كداب واناني ما يستاهلش حتي يبص في وشك..
زين بحزن
ما علينا انا هعمل عصير مانجا اعملك معايا..
فيروز بنبره حزينه
ماشي يا حبيبي..
_ واسابته ووقفت تجهز الفطار، وذاكرتها رجعت لورا 20 سنه اول ما عزالدين سابها وتاني يوم بعتلها ورقة طلاقها..
_ فلاااااش بااااك…
كانت قاعده في اوضتها بتعيط ولحد اللحظه اللي هي فيها ما كانتش مصدقه انه سابها واتخلي عنها وخدعها بالشكل ده، دخل عندها جمال وقال..
جمال
امسحي دموعك هو اللي خسرك مش انتي..
فيروز ببكاء
ده اي كلام انت بتقوله يا بابا عشان تهون عليا، بس انا اللي خسرت وبس، واستاهل كل ده عشان انا سمحتله يلعب بمشاعري اديته الفرصه انه يوجعني، انت كنت صح اللي فيه دااء مش بيتغير وهو الخيانه والكدب طبع فيه…
جمال بحزن
المهم دلوقتي احنا لازم نوصله عشان نقوله انك حامل ويجي لابنه..
فيروز ببكاء
لا لا انا مش عايزه اشوفه تاني ابداً، والله لو شوفته لاقتله علي الوجع اللي خلامي احس بيه بسببه…
جمال
طيب اهدي وفكري كويس، يا تنزلي اللي في بطنك وتتحملي ذنبه لوحدك يا تخلي عزالدين يرجع عشان تقررو هتعملو ايه..
فيروز بحقد
انا مش هنزله ولا عزالدين هيعرف اني حامل وابني هيبقي ابني لوحدي وخليه هو يلف ويتصرمح لحد ما يرجع مكسور وندمان ووقتها هكسره قدامي بأبني لوحدي اللي هيبقي ناكر وجوده اصلا..
جمال بحده
اللي بتقوليه ده ما ينفعش وحرام..
فيروز
واللي عملو فيا مش حرام، والله يا بابا لو ما سيبتني اعمل كده لهموت نفسي واريحكم مني خالص..
_ رجعت من ذكرياتها في الماضي وبصت لزين اللي شبه عزالدين بشكل كبير بس الفرق ان ابنها طيب وصادق عكس عزالدين اللي خدعها وقالت لنفسها بحزن..
فيروز
يمكن جه الوقت اللي ابوك يعرف بوجودك بس ياتارا هيقبلك ولا هيهرب من مسؤليتك زي ما عمل زمان معايا؟….
ــــــــــ #بقلم_الكاتبه_رحاب_القاضي ــــــــ
_وفي الوقت ده كان عز الدين قاعد علي النيل وجنبيه رضوي بنت اخوه اللي قالتله..
رضوي بعدم تصديق
يعني انت بجد ندمان انك سيبت طليقتك زمان يعمو؟
عزالدين بجمود
ايوه بس متأخر اووي تلاقيها اتجوزت ومعاها تلات اربع عيال دلوقتي، وانا قاعد زي ما انا ما اخدتش اي حاجه من الدنيا غير الندم علي كل حاجه غلط عملتها..
رضوي
طيب ما تسمع كلام ماما وتتجوز..
عزالدين
اتجوز مين ومين هتوافق تتجوز واحد زيي بسمعته دي وسني الكبير الا لو كانت طمعانه في القرشين اللي حيلتي..
ابتسمت رضوي وقالت
معاك حق خليك كده احسن..
عزالدين
المهم بقي ابوكي قالي اقنعك توافقي بالعريس اللي جاي النهارده لو كان مناسب، وشيلي كمال من دماغك لانه وارد جدا ما يرجعش..
اتنهدت رضوي بحزن وقالت
مش هقدر انا حاسه انه هيرجع كمال واول واخر حب في حياتي يا عمو، وبعدين انا حتي لو كنت ارتحت لحد ماشي كنت ممكن ادي لنفسي فرصه بس ما فيش..
عزالدين
كمال قبل ما يسافر قدامنا كلنا قلع دبلته وقالك عيشي حياتك وما تستنيهوش لانه ممكن يتأخر ومش عايز يظلمك معاه، انتي بقي بتظلمي نفسك ليه؟..
رضوي بصوت واطي
بص يا عمو انا في واحد بحلم بيه كتير بشوفه واقف ومديني ضهره وفي حاجه جوايا بتقولي ان ده جوزي بس ولا مره شوفت شكله يعني مش هقولك ان ده كمال لا ما اعرفش فأوعدك لما اشوف شكله هدور عليه واتجوزو..
عزالدين
يعني يا بايره هتطفشي العريس النهارده برضو؟..
رضوي بابتسامه صفرااء
احمم ده اقل واجب يتعمل مع مرات اخوك، المهم يلا بينا عشان نجيب الطلبات ونروح..
عزالدين قام وقال
قومي يا اختي انتي اصلا كل ما اتكلم معاكي تفكريني بيها..
رضوي
والله شوقتني اشوفها طنط فيروز طليقتك دي..
عزالدين
لا مش عايز ربنا ما يجمعني بيها ابداً انا حاسس انها ممكن تغزني بسكينه لو شافتني..
_ ضحكت رضوي ومشيت معاه وراحو يجيبو طلبات البيت…
ــــــــــ #بقلم_الكاتبه_رحاب_القاضي ــــــــ
_ وفي كافي لسه بيتشطب كان واقف طارق مع عمرو وسندس صحابه وقالهم..
طارق
انا كده جيبت اخر جزء من الفلوس..
عمرو
تمام يا طاروقه كده يا شباب بالمبلغ اللي معانا ده اللي جمعناه احنا التلاته الكافي هيكون جاهز علي اخر الاسبوع..
سندس
انا بجد مش مصدقه ان المشروع بتاعنا هينجح واخيراً..
طارق
لسه النجاح بعد ما نعمل الترويج للمكان والدعايا ونشوف بقي الناس هتحب المكان ولا لا..
سندس
اكيد طبعا هيحبو يا حبيبي المهم انت رايح فين دلوقتي؟..
طارق
عندي محاضره في الجامعه هروح اخلصها واروح ونتقابل بالليل…
عمرو
حد. قدك يا عم دكتور جامعي وكمان بتحضر لمشروع كبير معانا اهوو..
طارق
بطل قر وحياة ابوك انا متداين بالفلوس دي وهفضل سنين ادفع فيهم، يلا بااي..
مشي طارق وعمرو قال لسندس بخبث
والله صعبان عليا..
سندس
ما يصعبش عليك غالي احنا لو ما عملنااش كده الكافي مش هيبقي بتاعنا لوحدنا وكمان مش هنعرف نتجوز..
عمرو
علي رئيك يلا نشوف اللي ورانا..
ــــــــــ #بقلم_الكاتبه_رحاب_القاضي ــــــــ
_ في بيت حسن بعد ما رجع من شغله كان عمال يدور علي موبيله، ودخل طارق من بره وقاله…
طارق
بابا هو عم سيد فين ما شفتوش الصبح قدام العماره ودلوقتي روحتلو الاوضه بتاغته اطمن عليه مالقيتوش..
حسن
مراته ماتت ونزل البلد وهيجي كمان يومين.
طارق بحزن
إن لله وإن اليه راجعون ، طيب كنت قولي كنت روحت معاه انت عارف انا بحبه اووي الراجل ده..
حسن
بقولك ايه ما شوفتش الموبيل بتاعي..
طارق
يا بابا انا لسه راجع من بره ايه اللي هيعرفني موبيلك فين..
روفان
بتدور علي حاجه يا ابو علي..
حسن
ايوه يا روفان موبيلي مش لاقيه؟..
روفان
كنت عايزه اصور السمكه اللي في الحوض بيه بس وقع مني في المايه..
حسن بصدمه
الله يخربيتك ده لسه عليه قساااط…
_ وجري طلعه وفضل ينضف فيه، وجات ليلي من المطبخ وقعدت جنبيه وقالت..
ليلي
ايه اللي عمل كده في موبيلك يا حبيبي؟..
حسن بغيظ
اللي ما تتسمي ام لسان طويل اللي قااعده هناك دي.
ليلي
خلاص ما تزعلش انا كنت قريت علي النت لو الموبيل وقع في المايه وحطيته في الرز المايه بتمشي وهيشتغل.
حسن
بجد؟! طيب فين الرز وانا تحطه فيه..
ليلي
استني انت خليك مرتاح يا حبيبي،بت يا روان قومي هنا تعالي..
روان وهي ماسكه موبيلها
نعم يا ماما ما فيش غير روان اصلا اللي عايشه في البيت ده..
ليلي
خدي موبيل بابا حطيه في الرز عشان يشفط المايه ومش هقولك علي حاجه تاني..
روان اخدت الفون
حاضر يا ماما…. ودخلت روان المطبخ..
حسن
كلمتي رضوي انها تبقي هاديه النهارده وهي بتتعامل مع العريس النهارده وبلاش حركات كل مره..
ليلي
خليت اخوك اللي يكلمها هي بتسمع منه واهو ربنا يستر، صح نسيت اقولك علياء اختك كلمتني وقالتلي ان عبدالله هينزل انتخابات مجلس الشعب..
ابتسم حسن وقال
بسم الله مشاء الله الولد ده انا فخور بيه اووي كله زي ابوه نفس هيبته وشخصيته واهو عمل لنفسه ولعيلته مستقبل حلو جداً ولسه كمان..
ليلي
ربنا يوفقه ما قدرش هو اللي يخطب رضوي بدل اخوه كمال اللي علقها بيه وسابها..
حسن
ليلي بلاش منه الكلام ده وجهزي الولاد علي يوم الخميس ننزل كلنا البلد نقعد يومين هناك وناخد معانا زياره حلوه من هنا..
طلعت روان من المطبخ وقالت
اووف هنروح ليه البلد انا مش بطيق المكان هناك..
ليلي
طيب بالعكس دي بتبقي احلي ايام وناخد معانا ريناد اختك تشم هوا نضيف عشان البيبي اللي في بطنها..
روان
الناس ترتقي وتنضف وتروح باريس وتروح لندن لا احنا ندور علي القرف ونروحله..
حسن بغيظ
بقي يا جزمه بتقولي علي بلدي وبلد ابويا قرف، طيب يااارب ما تتجوزي غير فيها يا روان وتقعدي هناك عمرك كله..
روان بسخريه
هه مستحيل ده استنو بس واتفرجو علي الجوازه اللي هتجوزها..
وجات تمشي بس رجعت وقالت بانتباه
ماما هو انتي قولتليلي احط الفون في الرز صح..
ليلي
ايوه صح يا مدهوله انتي عملتي ايه؟..
روان بقلق
هو انتي طيب كنتي تقصدي الرز الني ولا الرز اللي بيستوي علي البوتجاز في الحله..
حسن حط ايده علي قلبه وقال
مش مهم هي كان قصدها ايه المهم انتي عملتي ايه الموبيل اتحط فين؟..
روان بخوف
فف في الحله علي البوتجاز..
حسن بصدمه
لااااااااااااااااااااااااااااا…
ــــــــــ #بقلم_الكاتبه_رحاب_القاضي ــــــــ
_ وبالليل في الاوتيل اللي فيه فرح يزن ابن يونس، اتجمعت الضيوف والناس اللي عزموهم، ويونس وشهد ويوسف وبطه كانو الاسعد بين الجميع…
ومن بين الكل كانت واقفه عائشه بنت محمد في مكان منعزل مع يوسف وهي بتضحك ومبسوطه وقرب منهم محمد وقال بحده..
محمد.
عائشه روحي اقعدي جنب امك..
مسك يوسف ايدها وقال بضيق
في ايه يا عمي ما هي واقفه معايا..
محمد بحده
سيب ايدها يا ولد وما تنسااش انك لسه خطيبها،..
ساب يوسف ايدها وقال بجمود
اديني سيبت ايدها ممكن تخليها واقفه جنبي بقي مش هاخد منها حته..
بص محمد لبنته بحده اللي قالت بسرعه
خلاص يا يوسف انا لازم اروح اقعد مع ماما..
ومشيت بسرعه من قدامهم ويوسف قال لمحمد بغيظ
انا نفسي افهم انت بتعمل معايا كده ليه؟..
محمد
هي غلطه بس امسكها عليك وغصب عنك وعنها هنفضها سيره ومش هخليك تطول شعره واحده من بنتي..
يوسف ببرود
عشم ابليس في الجنه ونفسي بقي تقتنع يا عمي ان مهما حصل عائشه هتبقي ليوسف الصاوي ومش هتبقي لغيره عشان تريح دماغك اللي تعباك دي..
قرب منهم يزن وقال بقلق
مش يوم فرحي بالله عليكم هتبقي في خناقه كمان..
يوسف
ازاي بس هو في حد يتخانق مع حماه حبيبه..
محمد بغيظ
حبك ديب صعران وخلصني منك يا شيخ..
_ قال محمد كلامه ومشي ويوسف فضل يضحك بطريقه مستفزه..
يزن
خف برود بقي والا هيركب دماغه ومش هيجوزهالك..
يوسف
والله ما يقدر وانا اهو بقولك، هو انا اي حد ده انا يوسف الصاوي..
يزن
طيب اتلم بقي واعقل شويه بدل ما انت معلقها جنبك علي الفاضي واعمل حاجه جد.في مستقبلك واتجوزها وما حدش هيقولك حاجه..
يوسف
يا اسطا سيبك مني انا الليله ليلتك يا عريس ناوي علي ايه بقي؟..
يزن
ناوي اقطع علاقتي بيك يا يوسف، تعالي نشوف ابوك وامك مالهم ليكونو بيتخانقو هما كمان..
_ وراحو وقفو جنب يونس وشهد اللي شكلهم مدايق جداً، وقال يزن بقلق..
يزن
في ايه يا جماعه مالكم؟..
يونس
سدره هربت..
يوسف بصدمه
احيييه…
يزن بعدم تصديق
هربت ازاي يعني هو ده وقت هزار، هو مش عمو يوسف طلع يجيبها من فوق ويارا معاها..
جات يارا في الوقت ده وقالت بقلق
يزن سدره بعتالك رساله معايا..
_مسك يزن منها الموبيل بسرعه وفتح الرساله الصوتيه اللي بعتاها لاخته الصغيره واتحولت ملامحه للغضب لما سمعها بتقول..
سدره
سوري يا يزن انا حاولت بس مش هقدر اكمل معاك الفيلم السخيف ده، انا مش عايزه اتجوزك..
شهد بغضب
دي قلة ادب وبنت مش متربيه…
جه يوسف في الوقت ده وقال بحده
انتي بتقولي علي مين كده يا. شهد؟.
رد عليه يونس بعصبيه وقال
هتكون علي مين اكيد علي صاحبة الصون والعفاف اللي سابت فرحها وهربت يا يوسف..
قال يوسف ابنه بقلق
يا جماعه وطو صوتكم الناس بتتفرج علينا..
بطه. بخوف
طيب انت زعلتها في حاجه يا يزن عشان تعمل كده؟..
يزن بجمود
ابداً كانت كويسه معايا ومبسوطه، بس هي خلصت كده واقسم بالله لاربيها علي الحركه دي…
يوسف بحده
تربي مين يا ولد انت مالكش دعوه بيها انت فاهم..
يزن بحده وصوت عالي
ما يشرفنيش اصلا اني ارتبط بيها بعد كده، ولما تلاقي بنتك قولها انها ما تلزمنيش..
قال كلامه ومشي وهو متعصب ويونس قال
يوسف روح ورا اخوك اوعي تسيبه لوحده وهو في الحاله دي..
يوسف
حاضر يا بابا..
مشي يوسف ورا يزن ويونس قال بجمود
من غير رغي كتير من اي حد نعقل ونتصرف زي ناس كبيره عشان نلم ام اليوم ده، ولما بنتك تبقي تظهر يبقالنا كلام تاني يا يوسف..
يوسف بضيق
ماشي حقكم تقولو اكتر من كده..
بطه بقلق
اهدو يا جماعه اكيد. في سبب، سدره روحها في يزن اكيد مش هتسيب الفرح كده بسهوله..
_ تفتكرو يزن هيعمل ايه وسدره سابت الفرح ليه؟
ــــــــــ #بقلم_الكاتبه_رحاب_القاضي ــــــــ
_ وفي الوقت ده في بيت الاستاذ حسن، دخل عندهم عز وهو ماسك علب حلويات وقال..
عز
يا ليلي اهو جيبتلك اللي طلبتيه.
ليلي.
يا نهار اسود. ايه كل ده؟..
عزالدين
عشان الولاد ولا انتي هتأكلي الضيوف بس..
ليلي بغيظ
ما هو الغلط مني اني قولتلك تجيب حااجه، ادخل يا عز منك لله ما شالله ما عنهم طفحو..
راح عز قعد جنب طارق اللي قاله
بتتعب نفسها علي الفاضي رضوي هتطفش العريس زي كل مره..
عزالدين
سيبك منهم وقولي عملتلي ايه في الموضوع بتاعي..
طارق بصوت واطي
والله يا عمو حاولت اعرفلك حاجات عنها بس مالهاش اي اثر من لما سابت المكان اللي كانت ساكنه فيه هي واهلها، وبعدين انت بتسأل ليه هو انت ناوي ترجعلها بعد العمر ده كله؟..
عز بضيق
لا طبعاً انا بس يعني عايز اطمن هي عاشت حياتها بعدي ولا دي كمان دمرتهالها وما عرفتش تتخطي غيابي..
طارق
ما انت كنت بتقول ان بينكم صحاب مشتركين ما تسألهم عليها..
عزالدين
الكل قطع علاقته بيا بسبب اللي عملتوو، معادا يونس وماليش عين افتح معاه الموضوع.. وخلاص غير الموضوع عشان ابوك جه..
قعد حسن جنبيهم وقال
جهزو نفسكم عشان كمان يومين هنروح البلد عند علياء..
عز
مالها علياء؟..
حسن بأبتسامه واسعه
عبدالله ابنها اترشح لمجلس الشعب..
طارق بسخريه
ما هي ناقصه خراااب واحد زي عبدالله القاضي ايه اللي هيفهمو في الحاجات دي هو بيشتري شهره وخلاص…
عزالدين
طيب بالعكس يا طارق عبدالله دماغه حلوه اووي وانا متأكد انه هيوصل لمكانه اكبر من دي كمان..
جات روفان وقالت لعز
زيزو خد حطلي روج زي رضوي..
حسن
حطوكي في شوال ورموكي في الشارع عيب يا بت..
طارق بحده
العيب علي الكبيره اللي بتحط قدامها،وبعدين انا اخواتي ما يحطوش الحاجات دي…
حسن
طااارق ايه بتغير علي اخواتك ولا ايه جديده عليا الغيره دي؟..
طارق بسخريه
لا اغير ايه بس يا حج ده انا اللي مدايقني ان مليون مره اقولهم التشبه بالنساء حرام ما بيسمعوش كلامي…
ضحكو كلهم وروفان قالت
بس يا بتاع سندس احنا زي القمر…
حسن
ايوه بقي مين سندس دي…
طارق بتوتر
هاا ااا انت هتصدق الساقطه دي يا بابا، وبعدين ابنك متربي مش بتاع الكلام ده..
حسن بحده
هي كلمه يا طارق افتكر ان عندك اخوات بنات واللي هتعمله في بنات الناس هيترد فيهم..
طارق
ايه الاوفر ده يا بابا، بس كله من العرسه دي..
جريت روفان وهو قام وراها وقال
خدي يا بت والله لعضك..
طلعت ليلي من المطبخ وقالت
بس يا ولد منك ليها النااس جاات مش عايزه اسمع صوت حد..
عز بسرعه
امسك الروج بتاع بنتك..
حسن
انا هعمل بيه ايه ارميه بسرعه الناس دخلت..
_ وبعد شويه كانت رضوي قااعده مع العريس لوحدهم وطارق قاعد علي مسافه قريبه منهم..
طارق
منور يا بهاء…
العريس
علاء يا دكتور طارق مش بهاء..
طارق
طيب ما انا قولت اسلام انت اللي مش مركز..
كتمت رضوي ضحكتها وعلاء قال لرضوي
ظريف اخوكي ده..
رضوي
اممممم فعلاً..
علاء
قوليلي بقي يا رضروضه انتي اا..
طارق بحده
ايه يا نجم انت بتغلط فيها قدامي ولا ايه؟..
علاء
لا خالص انا بدلعها
طارق
ما ده انيل اسمها الانسه رضوي لحد. ما نشوف اخرتها ايه المعرفه دي..
علاء بضيق
تمام قوليلي يا انسه رضوي انتي ارتبطي قبل كده؟..
رضوي
ايوه..
علاء
جواز ولا خطوبه.؟…
رضوي
خطوبه..
علاء
انا ارتبطت كتير بصراحه بتاع عشرين تلاتين مره..
طارق وهو بيقلب في موبيله
بدأنا نفتي بقي..
رضوي
معقول كل ده وياتارا بقي خطوبه ولا جواز ولا مشكلهم؟…
علاء بنبره حزينه
لا ده ولا ده للاسف انا كنت برتبط بيهم في خيالي..
ضحك طارق ورضوي بصوت عالي وطارق قام وقال
لا لا انا مش هقدر اكمل القعده اللطيفه دي، هدخل الحمام وجاي..
_ مشي وغمزتله رضوي بهدوء وعلاء ابتسم بخجل وقال لرضوي..
علاء
انا بحب اكل ايسكريم في الشتا علي فكره..
رضوي بغيظ
امم يا سكر وماما مش بتخاف عليك يجيلك برد..
علاء ضحك وقال
ههههه لا لا دي حاجه خاصه بيا انا، بحسها حاجه رومانسيه..
رضوي اتنهدت وقالت
امممم..
علاء
هو انتي عندك صحاب ولاد؟..
رضوي
نعممم؟!..
علاء
قصدي يعني ان لو في حاجه زي كده مش مشكله المهم بس اكون علي معرفه بيهم..
رضوي بغيظ
اممم ممكن نغير الموضوع..
علاء
معاكي حق ممكن تتكلمي انتي عن نفسك وانا اسمعك..
رضوي
لا..
علاء بتوتر
عشان نتعرف يعني وكده..
رضوي بحده
قولت لا..
_ وفي الوقت ده طلعت روان من اوضتها وهي بتعيط وقالت بصويت..
روااان
الحقوني في برص في الاوضه الحقوووني..
روفان طلعت من المطبخ وقالت
مامااااااع الحقي العصير اللي قدمتي منه للضيوف كان واقع فيه فار..
علاء مسك بطنه وقال
ايه انا شربت عصير فااار..
رضوي
ايوه ومش بعيد يكون جالك تسمم اجري بسرعه من هنا..
طلعت ام العريس من البلكونه وقالت
اخص عليكي يا ليلي مش تنضفي بيتك كويس ينفع كده يلا يا علاء بينا..
ليلي بقلق
يا راويه استني ده الولاد بيهزرو..
ما سمعتش منها ومشيت وليلي قلعت الشبشب وقالت بعصبيه..
ليلي
يوم اللي جابكم اسود يا ولادي الكلب..
جريو كلهم وحسن مسك في عز وقال
خدني معاك بسرعه من وشها مش هتطولهم وهتطلعهم عليا انا…
_ تفتكرو ايه اللي هيحصل بقي؟..
“احممم دي لسه البدايه الروايه مليانه احدااث كتيره”
ــــــــــــــــــــــــــــــــــــــ
•تابع الفصل التالي "رواية موضوع عائلي" اضغط على اسم الرواية