رواية موضوع عائلي الجزء(3) الفصل السادس 6 - بقلم رحاب القاضي
#موضوع_عائلي
“بيت الهنا”
_الحلقه السادسه
ـــــــــــــــــــــــــــــــــ
وما كان حبي لكَ شيئاً عادياً، إنما كان مرضاً أصابني ولا يفرقني عنهُ سوا الموت🥹
عبدالله بعدم تصديق
نعم… اا هي وافقت بجد يا خالي؟!..
حسن بهدوء
ايوه زي ما سمعت فهات معاك امك وانت جاي عشان يبقي الكلام رسمي ده لو لسه انت عند. كلامك…
عبدالله بنبره سعيده
طبعاً يا خالي عند كلامي ان شاء الله بكره هكون انو والحجه عندكم..
حسن
ماشي يا ابني تيجو بالسلامه وتصبح علي خير..
قفل معاه حسن وران قالت
ايه ده بقي يا بابا؟..
حسن بحده
اوعي تقولي بابا دي تاني لما تبقي تسمعي كلامي وتبقي زي اخواتك بنت ناس ومتربيه ابقي قوليها…
روان ببكاء
طيب ماشي عاقبني بأي حاجه غير اني اتجوز عبدالله واروح اعيش عنده..
حسن بعصبيه
لا هتتجوزيه وغصب عنك وفي اسرع وقت كمان، عادتنا في البلد اللي هتعيشي فيها عمرك الجاي ان البنت لما بتغلط يا بنقتلها يا بنجوزها لحد. يحافظ عليها، انا عمري ما كنت هخلي عبدالله يتجوزك غصب عنك حتي لو كنت هخسر اختي فيها.، بس مدام ما عرفتش اربيكي واحافظ. عليكي يبقي جوزك يعرف وعبدالله انا متأكد انه هيمشيكي علي عجين ما تلخبطيهوش..
روان بحده
وانا مش هوافق واللي يحصل يحصل…
ضربها حسن بالقلم جامد علي وشها ومسكها من دراعها جامد وقال بعصبيه تحت صدمتها من اللي عملو وانه اول مره يمد ايده عليها حتي وهي صغيره عمره ما عملها..
حسن
والله العظيم لو كلمة مش هوافق دي اتقالت تاني هدفنك وانتي عايشه، وامك واخواتك ما يعرفوش حاجه عن اللي حصل ده تقولي انك موافقه بعبدالله وخلاص والجامعه مش هتروحبها تاني غير في البلد تحت عين عبدالله اللي لو غلطتي في حقه زي ما عملتي معايا هو مش هيتردد لحظه انه يشرب من دمك ووقتها ما حدش هيلومه حتي انا، فاهمه ولا لا؟..
نزلت دموعها وردت عليه ببكاء وخوف
حاضر بس سيب ايدي يا باا…
زعق فيها وقال بحده
ما تنطقيهاش قولتلك لما تبقي بنتي بجد وتحترميني وتصوني كرامة ابوكي ابقي قوليها..
_وساب ايدها ومشي بعربيته للبيت، واول ما وصلو وشاف طارق قاعد مع البواب ومستنيهم، قالها حسن بتحذير…
حسن
اوعي تقولي حاجه لامك ولا لاخواتك والا هكسر عضمك وخصوصا امك بلاش تصدميها فيكي مش هتتحمل وهتتعب فاهمه..
مسحت دموعها وردت عليه وقالت
حاضر يا ب.. حاضر..
_ونزلو من العربيه واول ما شافهم طارق راح وقف جنب روان وقال بقلق..
طارق
مالك يا روان في ايه شكلك كنتي بتعيطي..
ما ردتش عليه ورد عليه حسن وقال
ما فيش انت عارف اختك تافهه وكانت عايزه حاجه كده والله ما فاكر وفضلت تعيط عليها زي العيال..
طارق بهدوء
بس كده قوليلي هي ايه وانا وجاي من الجامعه بكره اجيبهالك بس ما تعيطيش تاني…
حسن
طيب يلا بينا نطلع بدل وقفتنا دي..
وبص لسيد وقال
تصبح علي خير يا عم سيد..
سيد
وانت من اهل الخير يا استاذ حسن..
_وطلعو كلهم فوق، وبعد شويه كانو كلهم قاعدين بيتعشو معادا روان اللي كانت بتقلب في الطبق قدامها وهي ساكته وكل شويه تبص بحزن لحسن اللي متجالها خالص..
ليلي
لا لا انا مش مصدقه برضو انك وافقتي علي عبدالله يا روان ؟..
روان بجمود
عادي يا ماما..
ريناد بسخريه
عادي ازاي ده انتي كنتي رافضه حتي نتكلم معاكي في الموضوع..
اتملت عيونها دموع وقالت
اا انا شبعت وداخله انام..
حسن بهدوء
اقعدي يا روان الاول وقوليلهم ليه موافقه بعبدالله..
بصتله روان بقلق وردت عليه وقالت
عشان هو كويس وهكون مرتاحه هناك..
رضوي
ده اللي هيحصل علي فكره بلدنا جميله اووي وانتي كمان هتبقي هناك مش اي واحده هتبقي مرات كبير البلد وسيادة النائب عبدالله القاضي..
روفان بحقد
يا بختها..
_ضحكو كلهم معادا روان وحسن وليلي اللي كانت بتبصلهم بقلق ومستغربه من موافقة روان بالجواز المفجأه ليها وكمان شكلها انها مدايقه مش مبسوطه، وبعد شويه كان حسن قاعد في اوضته عند الشباك مدايق ودخلت ليلي وقالتله بحده..
ليلي
هو انت غصبت روان انها توافق بعبدالله؟..
حسن بجمود
انتي شايفه اني ممكن اعمل حاجه تضر بنتي يا ليلي؟..
ليلي بعصبيه
ما تردش علي سؤالي بسؤال يا حسن، انت غصبتها توافق؟!..
_سكت حسن وما ردش عليها، وهي راحت قعدت قدامه وقالت بدموع وقلق..
ليلي
انت ما بتعرفش تكدب عليا يا حسن، مالها روان حصل ايه يخليها توافق علي عبدالله فجأه كده بعد ما كانت رافضه الموضوع خالص..
حسن بدموع
انا بعمل الصح معاها يا ليلي، دلعناها وسكتنا علي غلطها كتير واختيارتها كلها غلط فنختار احنا الصح بقي..
ليلي
بس هي صعبانه عليا يا حسن انا مش هاين عليا اشوفها حزينه كده، ان شاءالله حتي ما تتجوز خالص بس ما تتجوزش غصب عنها..
حسن مسك ايدها
بعد الشر البنت هتتجوز وهتبقي احسن واحده بس سبيني اشد عليها شويه..
سحبت ليلي ايدها منه وقالت بحده
طيب اوعي كده ما تمسكش ايدي انا اصلا زعلانه منك ومش بكلمك، بقي انا يا حسن تتعامل معايا بالطريقه دي..
قام وقعد جنبيها وباس راسها بهدوء وقال
حقك عليا يا حبيبتي بس والله كنت مخنوق شويه بسبب مشكلة طارق وروان وهمها وريناد كمان اللي مش عارف اصلح الوضع بينها وبين جوزها ورضوي اللي بتميل بختها بأيدها الاختبار اللي احنا فيه ده صعب اووي يا ليلي عليا..
ليلي بهدوء
لو ربنا شايفك ضعيف ما كانش ابتلاك بالحاجات دي عشان يختبر صبرك ، اصبر وربنا هيعوضنا عن صبرنا ده خير في ولادنا مش ده كلامك اللي علي طول بتقولي عليه..
ابتسم حسن ورد عليها وقال
الحمد لله علي كل حال يا رب..
دخلت عندهم روز في الوقت ده وهو بتعيط وقالت
يا بابا روفان سرقت الواجب بتاعي تاني..
حسن
تاني ايه قولي مليون، سبيه ليها وخليه ينفعها في الامتحانات وهاتي الكتاب بتاعك وتعالي نعمله انا وانتي سوا من الاول..
روز بدموع
بس انا تعبت وعايزه انام..
_دخلت روفان في الوقت ده وهي ماسكه الكتب وقالت بطريقه شعبيه..
روفان
سمعليكوووو يا جماعه..
واديت روز الواجب بتاعها وقالت
خدي يا اختي الواجب بتاعك اهو اقفلي بقي الحنفيات اللي فتحاها دي..
وقربت من حسن وقالت
وانت بقي يا ابو علي امسك اعملي الواجب بتاعي عشان الميس حالفه عليا لو الواجب ما طلعش صح هتعملي بتاع كده ايوه استدعاء ولي امر، فبدل الشحطته عليك وانت راجل كبير اعملي الواجب..
حسن بص ليلي وقال
بنت مين الوليه القرشانه دي..
_ضحكت ليلي وحسن اخد روفان وفضل يذاكرلها لحد ما نامت واخدها جنبيه هي وروز ونام علي السرير وقال لـ ليلي..
حسن
تفتكري هنعيش لحد ما نشوف عيال الاتنين دول يا ليلي؟..
ليلي
الله واعلم بس انا نفسي وامنيتي من ربنا ما ارحلوش غير وانا مطمنه عليهم كلهم..
حسن اتنهد وقال
ربنا يقدرنا ونربيهم صح ونطمن عليهم..
ــــــــــ #بقلم_الكاتبه_رحاب_القاضي ــــــــ
_وفي شقة عزالدين دخل زين البيت بعد ما رجع من عند مامته اللي راح يطمن عليها، واول ما دخل لقي عزالدين قاعد وباصصله بحده..
زين
مساء الخير..
عز
مساء النور يا زين جمال احمد حسين..
زين بتوتر
هو حضرتك عرفت اسمي منين؟..
وقف عز قدامه وقال بجمود
كنت بدور علي مفاتيح عربيتي ولقيت كشكول المحاضرات بتاعك هنا ومكتوب عليه اسمك كامل..
زين بهدوء
والمطلوب؟..
عز بحده
انت اخو فيروز؟..
ابتسم بسخريه ورد عليه
انت عارف كويس انا هرد عليك بأيه دلوقتي واقولك انا مين، بس انت عايزني اكدب ومش عايز تصدق الحقيقه عشان تهرب زي ما هربت من امي زمان بعد ما ضحكت عليها مش كده..
اتملت عيون عز دموع وقال
يعني انت ااانت…
زين بأبتسامه حزينه رد عليه وقال
اسمي زين جمال بس المفروض انه كان يبقي زين عزالدين الهواري هو مش. عيلتكم اسمها الهواره برضو..
زعق فيه عزالدين وقال بحده وانكار
انت كداااب انا ما عنديش عيال وانت مش ابني..
زبن بحده اكبر
لا ابنك اللي عاش طول عمره في نظر الناس يتيم وفي نظر ناس تانيه ابن حرام بسببك، وانت عايش مش هامك غير نفسك ولا علي بالك حد، ما كنتش فاكر ان المواجهه بينا هتكون كده بسرعه..
عزالدين بجمود
اقعد واحكيلي كل حاجه يلااا..
قعد زين قدامه وقال
تمام ما عنديش مانع بس انت مستعد تسمع بقي الحقيقه، هتتحملها يا بابا هتتحمل تسمع اللي ابنك عاشه في غيابك؟….
قعد عز قدامه ورد عليه وقال
هتحمل ما تشغلش بالك، اتكلم…
ــــــــــ #بقلم_الكاتبه_رحاب_القاضي ــــــــ
_وفي الوقت ده في الصعيد كان واقف عبدالله عند. الشباك بتاع مكتبه في المصنع بتاعه وهو مبتسم بهدوء من اول ما كلمه خاله حسن وقاله ان من امتلكت قلبه وتفكيره وافقت علي الجواز منه..
دخل عنده عمر وقال
عبدالله انا خلصت الشغل اللي قولت عليه بكره عايزين شركة الشحن اا.. عبدالله بتحدت وياك انا..
“هحاول اكتب شويه باللهجه الصعيدي في كلام عمر واهله لان عبدالله بيتكلم عادي زينا شويه”
بصله عبدالله وقال
ايوه يا عمر معاك خير ان شاء الله..
عمر بخبث
لا لا مش هقولك اي حاجه غير لما تقولي ايه الحكايه معاك؟..
عبدالله بهدوء
خالي حسن كلمني وقالي ان روان وافقت علي الجواز وبكره هاخد امي ونسافر ونشوف الموضوع ده..
ابتسم عمر وقال
طيب الف مبروك يا ولد عمي، مش قولتلك انا اللي ربنا علق قلبك بيه هيبقي ليك، عقبالي عاد انا التاني..
عبدالله قعد علي مكتبه وقال
اممم قصدك ايه بالكلام ده بقي يا عمر؟..
عمر بحماس
انت عارف قصدي كويس تخلص موضوعك مع خالك وتفاتحه في موضوع البشمهندسه رضوي..
اتنهد عبدالله بضيق وقال
بص ما تفهمش كلامي غلط يا عمر انت وكمال اخوي عندي واحد ويمكن انت اكتر كمان، بس انك تتجوز البت اللي كانت خطيبته هتخلي كمال يشيل منك وكمان امي اللي لسه لحد النهارده متعشمه انه هيرجع وهيتجوزها..
عمر بضيق
الجواز قسمه ونصيب واخوك هو اللي هملمها وفات الكل ومشي، اتكلم انت بس في الوضوع ومن لوقتها انا هعرف اتحدت زين مع مرت عمي وهي بتحبني ومش هتزعل مني..
عبدالله
اللي فيه الخير يقدمه ربنا، المهم كنت جاي تقول ايه خلينا نشوف اكل عيشنا..
_ وفضل يتكلم في الشغل هو وعبدالله وبعد ما الشغل خلص راح البيت ولقي امه واخته اسرار قاعدين ومعاهم خاله خلف…
عمر
اهلا وسهلا يا خالي منور..
خلف بحده
بقالي ياما مستنيك يا ولد اختي ولا اقزل يا كلب سيدك عبدالله…
فتحيه
بالراحه يا خلف الكلام بالعقل مش بالطريقه دي..
عمر بحده
لاه يا امي سبيه يتحدت براحته هو كيف ابوي برضك…
خلف
بدل ما تقف مع خالك رايح تاخد صف ولد القاضي…
عمر
عبدالله ولد عمي وزي اخويا وانا لو شوفته بيعمل حاجه غلط كنت اول واحد هاجي واخد صفك بس عبدالله ما غلطش في حد..
فتحيه
انت المفروض تقف جار خالك يا عمر عشان تكبر ويااه مش تبقي واقف قصاده مع الغريب..
عمر بغيظ
تاني هتقوليلي غريب يا امي، عبدالله. مش غريب ده ولد عمي، عمي اللي لما ابويا مات ما حدش غيره وقف معانا ومخلناش محتاجين حاجه وقبل ما كان بيجيب حاجه لعياله كان بيجيبلي انا واختي الاول في وقت ما كنت انت يا خالي مقاطع امي عشان طلبت ورثها منك فاكر ولا نسيت..
قام خلف وقال بغضب
انا اكده عملت اللي عليا عشان لما ابقي احط ولدك في كفه واحده مع ولد القاضي يا فتحيه ما ترجعيش تبكي..
عمر بحده
انا لسه لحد دلوقتي محترمك لانك خالي وانا اعرف الاصول زين، انما هتهدد امي قدامي يبقي مالكش عندي غير انك تطلع بره وكتر الف خيرك لحد اكده..
مشي خلف وهو متعصب جدا وفتحيه قلت لعمر بقلق
ليه يا ولدي اكده تكسب عدواة خالك وانت عارفه شراني..
عمر
ما تقلقيش يا امي هو ما يقدرش يعمل حاجه لعبدالله ولا ليا..
وبص لاسرار وقال
بالمناسبه عبدالله ومرت عمي مسافرين مصر بكره…
اسرار بضيق
ليه في ايه هناك هيسافرو عشانه؟..
عمر
عبدالله هيخطب بت خاله حسن..
اتملت عيون اسرار دموع وفتحيه قالت بصدمه
كيف ده هو مش هيخطب اختك؟..
عمر
ومين اللي قال انه هيخطب اختي، انتي اللي قولتي يا امي وعشمتي اسرار بعبدالله وهو مش ليها وعايز واحده تانيه..
قامت اساس وقالت بصوت مخنوق
انا رايحه انام تصبحو علي خير..
قالت كلامها ودخلت اوضتها وفتحيه قالت بغيظ
انا عرفت ليه حسن جاب عياله وجه هو ومرته، طبعا راسمين علي كبير ما عرفوش ياخدو كمال للكبيره قالو ياخدو عبدالله للصغيره..
عمر بحده
انا رايح انام يا امي تصبحي علي خير….
سابها عمر وراح نام وفتحيت قالت لنفسها بغيظ
برضو عملتي اللي في دماغك يا عمياء وخدتي لولدك بت اخوكي بس والله ما هخليه يتهني بيها يوم واحد..
ــــــــــ #بقلم_الكاتبه_رحاب_القاضي ــــــــ
_وتاني يوم الصبح في بيت عزالدين، كان زين قاعد في الصاله من امبارح اول ما قاله الحقيقه كلها وسابه عزالدين ودخل اوضته من غير ما يرد عليه بأي حاجه..
وفي الوقت ده مسك زين موبيله وكلم يارا اللي ردت عليه بعد شويه وقالتله..
يارا
ايوه يا زين في حاجه ولا ايه؟..
زين
هو لازم يكون في حاجه يا يارا عشان اكلمك، وبعدين لو مكالمتي هتدايقك خلاص هقفل
يارا بهدوء
لا طبعا بالعكس ده انا كنت مستنياك تصالحني من امبارح برغم ان انا اللي كنت غلطانه بس انت اللي تصالحني برضو..
زين بدموع
انا مخنوق اووي، ابو… عزالدين عرف اني ابنه وعرف كل حاجه حتي ان ابوكي عارف الحقيقه وماقالوش..
يارا بقلق
طيب انت كويس؟..
زين بحزن
لا مش كويس وموجوع اووي، تعرفي كنت متوقع بعد ما اقوله الحقيقه ياخدني في حضنه يقولي انه مستعد يعمل اي حاجه عشان افضل جنبيه بس ده ما حصلش، ده بكل برود سابني ودخل نااام…
يارا بحزن
طيب ممكن تهدي شويه هو ممكن اتصدم او اتفاجئ وردت فعله كانت غريبه شويه…
زين بسخريه
اانا ابنه يا يارا وكنت بحكيله اد ايه كنت بعاني من غيره وفي الاخر تبقي ردت فعله كده،دلوقتي بس اقتنعت ان ماما كان معاها حق في كل كلمه قالتها عنه..
يارا
طيب انت هتعمل ايه دلوقتي؟..
زين بجمود
همشي طبعا و…
طلع في الوقت ده عزالدين من اوضته وقال
كويس انك صاحي…
زين لريارا بضيق
هكلمك وقت تاني يا يارا معلش..
يارا
لا عادي ولا يهمك بس ابقي طمني عليك…
زين
حاضر سلام..
وقفل معاها وقال لعزالدين بهدوء
نعم؟…
عز بجمود
هي كلمه واحده ومش هكررها تاني والاختيار ليك…
زين بقلق
الاختيار في أيه؟..
عز بحده
يا تقعد معايا وتنسي الست اللي اسمها فيروز دي، يا تاخد حاجتك وتمشي وكأنك ما ظهرتش في حياتي اصلاً فاهم ولا لا؟….
_قال كلامه ومشي وزين كان مصدوم من كلامه وازاي يطلب منه اصلا يبعد عن امه حتي لو كانت غلطت من وجهة نظره زين كان شايف ان مش من حق عزالدين يطلب منه حاجه زي دي..
ــــــــــ #بقلم_الكاتبه_رحاب_القاضي ــــــــ
_وبعد شويه في بيت فيروز كانت نايمه وصحيت علي صوت جرس بيتها، قامت بملل ولبست روب طويل علي البجامه الفضفاضه بتاعتها وراحت فتحت الباب واتفاجئت اول ما شافت قدامها عزالدين اللي ما اتغيرش كتير عن زمان، اللي سابها من عشرين سنه وطلقها وهرب، اول راجل دخل حياتها وقلبها واكتر راجل كرها في جميع الرجاله…
خبت كل المشاعر اللي جواها وقالت بجمود
نعممم عايز ايه؟…
عزالدين بهدوء
هنتكلم علي الباب كده، والله انا ما عنديش مشكله الفضايح عندي ما فيش اسهل منها…
فيروز بسخريه
من غير ما تقول عارفه..
وبعدت شويه عن الباب وقالت
اتفضل…
_دخل عزالدين وقفل الباب وبص لفيروز بغضب وقال..
عز
انتي عايزه مني ايه؟
فيروز ببرود
وانت عندك. ايه عشان اعوزه منك، انت اللي عايز يا عز..
عز بحده
اومال بعتالي ابنك ليه دلوقتي عايزه مني ايييه، ما كنت خلصت منك…
فيروز بلوم
ومدام انا تقيله اووي كده عليك كنت اتجوزتني ليه وجريت ورايا زي الكلب عشان اتجوزك زمان..
عز بحده
لمي نفسك يا ام زين، زين ابني اللي حرمتيني منه سنين وجايه دلوقتي تباني الملاك اللي بجنحات اللي عايزه تجمع الاب بأبنه..
فيروز بدموع
انا لا عايزه اجمعك بيه ولا كنت عايزااه يشوفك اصلا، المشكله فيه هو اللي عايز يوجع نفسه ويقرب من واحد واطي زيك…
عزالدين بسخريه
اممم وايه كمان يا مدام، بس لو انا واطي فانتي ست كدابه ومفتريه واكتر حاجه صح عملتها في حياتي هي اني سيبتك يا مريضه…
اتعصبت فيروز وردت عليه
انت اللي مريض واناني زين اصلا خساره فيك والغلطه الوحيده في حياته انك انت ابوه..
عز بخبث
لا هيبقي العكس علي فكره زين هيجي وهيقول انك انتي الغلطه الوحيده اللي في حياته هيفتخر بيا انا وهيرميكي عشان انتي ما ينفعش معاكي غير تتسابي يا فيروز، وابني هوفرله كل حاجه نفسه فيها وهخليه يتعالج وهحرمك منه باقي عمرك زي ما عملتي معايا في العمر اللي عدي…
ومسكها من دراعها جامد وقال
انا كنت ندمان عليكي كنت بتمني العمر يرجع بيا عشان اصلح كل الغلط اللي عملتو معاكي، بس كويس وعملتي كده عشان ما اتعبش نفسي بالندم تاني علي واحده ما تستاهلش..
فيروز بدموع
يا بجاحتك يا عز ده انت قلبك قاسي اووي فوق ما اتخيل عشان بعد كل اللي عملتو راجع دلوقتي تلوم عليا انا، امشي ولو ابنك وافق انه يبعد عني ويكمل معاك ما عنديش مشكله عشان انا مش انانيه زيك بالعكس انا هختار راحته حتي لو كانت معاك…
_ما ردش عليها او بالاخص مالقيش رد يرد بيه عليها وسابها ومشي. وهي قفلت الباب ورجعت اوضتها بسرعه ومسكت موبيلها وكلمت زين بس ما ردش عليها، ففضلت تعيط وقالت..
فيروز
رد عليا يا زين والنبي…
ــــــــــ #بقلم_الكاتبه_رحاب_القاضي ــــــــ
_وفي الوقت ده في شركة اولاد يونس الصاوي، كانت عائشه قاعده في مكتب يزن وقالتله بهدوء…
عائشه
امسك يا عم ادي الملف بتاعي اهو..
يزن
امسك يا عم علي الفكره انا هنا المدير فتقوليلي يا يزن بيه وبعد اذنك والكلام المحترم ده..
عائشه
لا من اولها اهو هتشوف نفسك عليا والله اقوم امشي وانا نفسي اصلا امشي فمتخلنيش اتلكك…
يزن بأبتسامه هادئه
يا ستي بهزر معاكي الشركه كلها بتاعتك وتحت امرك، هو احنا نطول انك تشتغلي عندنا وامسكي الملف بتاعك مالوش لازمه انتي اصلا اتوظفتي من لما عمي كلمني..
عائشه
لا معلش انا ما بحبش الوسايط فشوف بقي هنفع ولا لا…
يزن
يا ربنا علي الغباء يا بنتي ما انا اللي جيبتلك الملف ده بعد ما اتخرجتي ولا نسيتي اننا متخرجين من جامعه واحده انا وانتي وطبعا يوسف عجبته القعده هناك وعمل عقد اقاامه فبعيد عننا….
عائشه بتوتر
ما هو بص بصراحه انا خايفه من يوسف لانه مش عايزني اشتغل..
يزن بأهتمام
ليه يعني هو الشغل عيب ولا انتي هتشتغلي مع حد غريب ده انتي هتبقي معايا هو في مكان تاني بعيد عن هنا اصلا…
عائشه
مش عارفه بس هو رافض الفكره جدا وبابا مصمم اني اشتغل..
وتابعت بغيظ
واصلا هو الغلطان لاني بقالي كام يوم بحاول اكلمه واقوله علي موضوع الشغل ده ومش بيرد عليا ولو رد بيقولي مش فاضي ويقفل يبقي مين الغطان بالامانه..
يزن
هو طبعا وحتي لو كان بيرد هيبقي غلطان احنا بنتنا ما بتغلطش..
_ضحكت عائشه بهدوء وقبل ما ترد عليه دخلت سدرا من غير ما تخبط واول ما شافت عائشه بصتلها بقرف وقالت..
سدرا
هو انا جيت في وقت مش مناسب ولا ايه؟..
عائشه
لا ابداً احنا اا..
قاطعتها سدرا وقالت ببرود
انا بكلم جوزي علي فكره ما كلمتكيش انتي..
_اتوترت عائشه وبصت للارض بأحراج، ويزن رد عليها وقال بنبره شبه حاده..
يزن
في ايه يا سدره اهدي شويه..
قربت منه سدره وقعدت علي طرف الكرسي جنبيه وقالت
عايزه اتكلم معاك لوحدنا يا بيبي شويه ممكن؟…
قامت عائشه وقالت بتوتر
طيب انا هروح اكتشف المكان بره يا يزن..
يزن بهدوء
اوكي يا شوشو وانا هكلم الاستاذ علي رئيس قسم الحسابات هيكون معاكي لحد ما تتعودي علي الشغل، وانا كمان هتابعك من بعيد..
عائشه
حاضر يا يزن بعد اذنك..
قالت كلامها وطلعت وسدره بصتلها بقرف وقالت
شايف لبسها ولا طريقتها بيئه اووي…
يزن بضيق
ايه الطريقه دي يا سدره دي بنت عمي علي فكره وانتي احرجتيها قدامي..
سدره بهدوء
ما انت اللي سيبتني وجيت هنا عندها وانا لما صحيت ولقيتك مش جنبي ادايقت..
يزن
عند مين يا غبيه دي بنت عمي وخطيبت اخويا وزيها زي يارا بالظبط بالنسبالي، المهم بس ايه الحلاوه دي…
سدره قامت ومسكت ايده وقالت
ده العادي بتاعي وقوم يلا نروح نفطر سوا وبعدين ارجع شغلك..
يزن
لا لا استني انا فطرت وعندي شغل مهم، لو هتروحي الجامعه هخلي السواق يوصلك وقريب اووي هجيبلك عربيه..
سدره
لا لا مش عايزه عربيه انت اللي هتوصلني وبعدين انا ما عنديش صحاب غير سمر يعني الحاجه الوحيده اللي هخرج عشانها الجامعه ولو بعد كده خرجت هيكون معاك انت او سمر وسمر بتيجي تاخدني بعربيتها..
يزن بهدوء
وانا تحت امرك في اي وقت، واقولك علي حاجه طظ في الشغل تعالي نفطر واوصلك الجامعه…
سدره بحماس
ايوه بقي يلااا بينا…
_واخدها يزن وطلعو بره الشركه، وفي الوقت ده شافتهم عائشه وهما خارجين واتنهدت بحزن علي قلة اهتمام يوسف بيها، وطلعت موبيلها ورنت عليه وكالعاده تجاهل اتصالها.
ــــــــــ #بقلم_الكاتبه_رحاب_القاضي ــــــــ
_وبعد شويه في بيت عزالدين اول ما رجع قابله حسن كان هو كمان راجع من شغله وقاله..
حسن
علياء اختك فوق وعبدالله زين فتحلهم واستقبلهم وليلي فهمتهم كل حاجه..
عز بحده
مش لما افهم انا الاول يا حسن، جايب ابني وتقعده معايا وتقولي ابن واحد صاحبي وتعرف من امتي بقي انت كمان ان عندي ابن ومخبي عليا..
حسن
من لما جيبته البيت، والغلط منك من زمان اتحمل نتيجة غلطك بقي..
عز بنبره حزينه
مهما كنت عملت ما استاهلش اني اتحرم من ابني عشرين سنه، لدرجة اني لما اشوفه ما احسش بيه ولا عارف اتقبله حتي..
حسن بهدوء
مع الوقت كل حاجه هتكون ساهله وبسيطه، بس اتصرف بعقل لو لمره واحده في حياتك ابنك مريض ومحتاجلك يا عز…
عز بجمود
طيب يا حسن، المهم اختك جات ليه ومن امتي علياء بتسيب البلد وتيجي هنا؟..
حسن بضيق
عبدالله جاي عشان المشكله بتاعت طارق اللي قولتلك عليها وجايب امه معاه عشان قبل ما يمشي نقرا قراية فاتحته هو وروان…
عز
روان وافقت بعبدالله؟..
حسن
بعدين نتكلم في الموضوع ده، المهم دلوقتي روح خد ابنك في حضنك وحس بيه وبلاش تفكر في اللي فات ده انت ربنا بيحبك عشان ابنك ولد هادي ومؤدب ومحترم وجالك في وقت انت كانت الوحده هتموتك فيه فبلاش تعمل حاجه تخسره بيها…
عز
ان شاء الله يا حسن بعد اذنك..
_ودخل كل واحد فيهم شقته، اول ما دخل حسن لقي روفان وروز قاعدين بيلعبو مع تيا بنت ريناد اختهم اللي عندها سنتين…
حسن
ربنا يهديكي يا روفان بس عارفه لو بعد دقيقتين عملتي مصيبه وخلتيهم بعيطو هحبسك في اوضتك..
قامت روفان ووقفت جنبيه وقالت
بس يا ابو علي عشان انا مكتئبه..
حسن
انتي ايه يا اختي؟..
روفان
مكتئبه يعني زعلانه اوي اوي..
حسن
وايه اللي مزعلك اوي اوي يا شبر ونص ومخليكي مكتئبه..
روفان بغيظ
عبدالله هيتجوز روان…
حسن
ودي حاجه تزعلك في ايه المفروض تفرحي عشان اختك هتتجوز..
روفان بغيظ
ما هي هتتجوز عبدالله وانا بحب عبدالله وعايزه اتجوزو انا، ولما روحت قولت كده لبنتك البومه زعقت فيا…
حسن
عيب تقولي علي اختك بومه وبعدين عبدالله كبير عليكي لما تكبري نبقي هنجوزك واحد قدك…
روفان
يالهوي هو انا لسه هستني لحد ما اكبر عشان اتجوز..
طلعت ليلي من المطبخ وقالتلها بحده
سيبي ابوكي في حاله يا ام لسان ونص وروحي ذاكري عشان ورحمة امي لو سقطي يا روفان السنه دي كمان والله لاكون مقعداكي في البيت واخليكي تمسحي وتنكسي وتغسلي وما فيش اي فسح ولا خروجات
روفان ببرود
انا بتكلم مع بابا ومش بتكلم معاكي، بعد اذنك يا بابا هروح اقعد مع تيا عشان ريناد تعبانه وعايزه تنام…
مشيت روفان وليلي قالت
شايف الوليه بتكلمني ازاي….
ضحك حسن وقالها
هههههههه معلش سيبك منها المهم روان سلمت علي عمتها هي وطارق وريناد ولا لا؟..
ليلي
طارق وريناد راحو سلمو عليها وطارق اخد زين ونزلو وعبدالله نام عشان جه بدري بيقول مطبق من امبارح وو..
حسن قاطعها وقال
روان فين ما سلمتش عليهم ليه؟..
ليلي
اهدي يا حسن كانت نايمه وبصراحه كده حالها مش عاجبني…
حسن
معلش هتتعود روحي بس قوليلها ابوكي بيقولك شويه وتروح تسلم علي عمتها وتطلع من اوضتها وتقعد مع اخواتها…
ليلي
حاضر يا حسن ادخل غير هدومك لحد ما اجهز الغدا،زين هيجي ياكل معانا وعلياء لو كانت صاحيه..
حسن
ماشي يا ام الغالين..
_دخل حسن اوضته وليلي راحت اوضة روان اللي كانت قاعده علي سريرها ودموعها مغرقه وشها وهي بتقرا في الشات بتاعها هي وامير وعلي وشها ابتسامه ساخره علي كدبه عليها والاحلام اللي رسمتها في خيالها معاه وطلعت كلها اوهام….
_دخلت عندها ليلي فمسحت روان دموعها بسرعه وليلي بصت لريناد اللي نايمه وقالت..
ليلي
طيب اختك ونايمه انتي قاعده عندك ليه ما تقومي كده تاخدي شاور وتجهزي عشان عبدالله وعمتك اللي جايين كمان شويه ولا هتقابيلهم وانتي مكمكمه كده…
روان بضيق
وانا مالي بعبدالله يعني لو سمحتي يا ماما سبيني في حالي…
ليلي
يا بنتي هو ده منظر عروسه بس، قومي الله يسترك انا مش ناقصه مشاكل مع ابوكي وهو بيقولك تروحي تسلمي علي عمتك كمان شويه وتطلعي من اوضتك وتقعدي مع اخواتك..
روان بدموع
حاضر يا ماما قوليلو بتقولك حاضر..
ليلي
ابوكي بيحبك يا روان وعارف مصلحتك فين وبيختارلك الصح فاسمعي كلامه ومش هتندمي..
قالت ليلي كلامها وطلعت وريناد قامت وقالت لروان
انا نسيت اسألك يا روان هو الواد اللي وصلك قبل كده لحد. هنا بعربيته فين؟..
روان ببكاء
طلع كداب طلع بيتسلي يا ريناد…
قامت ريناد وحضنتها وقالتلها
اهدي طيب وقوليلي في ايه، وليه دلوقتي وافقتي بعبدالله وانتي اصلا مش عايزااه..
روان ببكاء
بس بابا عايزاني اوافق وانا قليت من بابا اووي وظلمته اووي ولازم اوافق عشان يسامحني..
ريناد
انا مش فاهمه حاجه اهدي كده وفهميني ايه اللي حصل…
روان
ما فيش حاجه انا هقوم بس عشان اخد شاور واطلع اتغدي معاكم..
_وقامت روان ودخلت الحمام من غير ما ترد علي ريناد بأي حاجه ولا تقولها حاجه من اللي حصلت بينها وبين حسن..
ـــــــــــــــــــ
_وبعد شويه من الغدا كان قاعد حسن وبيصلح المبرد في الصاله وجات ليلي قعدت جنبيه وقالت…
ليلي
ما كنا بعتناه للصيانه وريحت دماغك يا حسن..
حسن
وهو الاستاذ طارق هيتحمل يبات ليله من غير المبرد…
طلع طارق من الحمام وهو بينشف شعره وقال
خلاص هاتلي تكييف ومش عايز المكيف ده خالص….
حسن
وانت اتشليت ما تجيب لنفسك بدل ما بتبعزق مرتبك يمين وشمال..
_ما ردش عليت طارق ودخل المطبخ وليلي قربت منه وقالت بصوت واطي…
ليلي
مش ناوي تكلم سيف يجي يرجع مراته..
حسن
لا بجد مصدوم فيكي كان علينا ايه من الاول ما الراجل كان هيصالحها وياخدها ويمشي انتي اللي اتقمصتي علي زعلها واهي قعدت جنبك…
ليلي
اتحمقت علي بنتي يا حسن، يعني انت مش عارفني ياا راجل..
حسن قرب منها وقال
لا عارفك طبعا يا ام العيال، بقولك ايه ما العيال كل واحد في حاله تعالي ندخل اوضتنا وو..
روفان من وراهم
انا عايزه ادخل معاكم….
ضحك طارق اللي طلع من المطبخ وقال
هههههههههه ما تبطل شقاوه بقي يا حج..
ليلي
حج في عينك يا واد طيب ده ابوك يبان اصغر منك…
حسن بهدوء
طارق عبدالله هيقعد معاك بالليل وتقوله اللي حصل معاك بالتفصيل وهو هيساعدك..
ليلي
بقي ده اسمه كلام يا حسن الراجل جاي يخطب ولا جاي يحل مشاكلنا..
حسن
الاتنين يا ليلي وبعدين ما فيش غير عبدالله يقدر يحل المشكله دي ولا ايه يا طارق..
طارق وهو بيقعد قدامهم
ان شاء الله يا بابا اللي فيه الخير يقدمه ربنا، بس انا مش عايز عبدالله يتدخل لحد ما اخد حقي بأيدي منهم ولا نسيت انهم علمو عليا..
حسن بحده
ما فيش الكلام ده احنا ناس محترمين وهناخد حقنا بالقانون مش بالبلطجه يا دكتور طارق..
طارق
عارف يا بابا انت نستغفلك احسن منقولك الحقيقه..
ضحكو روان وريناد اللي طلعو وقتدو معاهم وحسن قال
يلا يا حيوان منك ليها، وانتي يا ست ريناد مش ناويه تصالحي جوزك
ريناد
مين اللي يصالح مين يا بابا، ده كان بيخوني..
طارق
انتي عبيطه يا ريناد بيخونك ايه، هو سيف لو عايز يخونك انتي ممكن تعرفي اصلا..
حسن
يا ريناد يا حبيبتي ممكن تكون ريحة البيرفيوم دي واحده خبطت فيه وهو ماشي واحده قعدت جنبه في الشغل ما تركزيش في الحاجات اللي تخرب البيوت دي..
ليلي
اسمعي كلام ابوكي يا ريناد انتو مهما كان بينكم طفله اهي وفي ابنكم اللي جاي في السكه…
ريناد بضيق
خلاص ماشي بس بشرط مش انا اللي اروح اصالحه هو اللي يجي ويصالحني..
حسن
ماشي انا بكره هعزمه هو وعمتك يتعشو معانا واحنا بنقرا فاتحة اختك وهيصالحك..
ليلي
وبالمره اعزم اختي ولاء وولادها وفاروق اخويا يتعشو معانا.
حسن
طيب كويس اهو من زمان ما اتجمعناااش..
ليلي
طيب اعمل حسابك بقي الصبح بدري وانت رايح الشغل تبعتلي من عند الفرارجي دكرين بط..
حسن
ليه اتنين يا ليلي ما واحد كفايه..
ليلي
ما هو واحد يتحط قدام اخواتك وواحد قدام اخواتي ولا عايز حد منهم يزعل..
حسن
لا ازاي دكرين بط بسيطه..
ليلي
وفرختين واربع تجواز حمام..
حسن بصدمه
وليه كل ده بس، علي العموم ماشي عشان الولاد برضو..
ليلي
وتلاته كيلو لحمه مفرومه هعمل بشاميل وجلاش بالحمه وكفته..
حسن
اللهم طولك يا روح حاضر يا ليلي..
ليلي
وابقي برضو سيبلي 800 جنيه اجيب الخضار وانا هعمل محشي كوسه وبدنجان وفلفل وورق عنب وكرنب وحمام محشي فريك ورز. ..
حسن بغيظ
ليه كل ده هو فرح يا وليه ده يا يدوب قراية فاتحه..
ليلي
جرا ايه يا حسن انت عايزهم ياكلو وشنا ولا ايه؟..
حسن
لا يتخرب بيتي انا عشان الناس ما تاكلش وشنا…
روفان
ونسيتي الحلو يا مامو..
حسن بعصبيه
بتفكريها لسه ياللي تنشكي اللهي يااارب تتوهي مني في الشارع واخلص منك..
روفان
ياريت اهو علي الاقل الاقي حريتي اللي ضاعت في البيت ده..
ضحكو كلهم وحسن قال
بنت مين الست دي..
ــــــــــ #بقلم_الكاتبه_رحاب_القاضي ــــــــ
_وفي شركة الصاوي…
كانت رضوي واقفه علي جنب وبتتكلم في الفون وقالت بصوت واطي عشان ما حدش يسمعها من المهندسين والعمال…
رضوي
خلاص يا ماما جايه محسسني اني شغاله في سوبر ماركت انا موظفه في شركه كبيره وفي مواعيد لازم التزم بيها..
ليلي
شالله تكوني شغاله في الوزاره نص ساعه وتكوني عندي عشان نجهز الاكل سوا..
رضوي
ما عندك ريناد وروان وانا مش بلعب هنا انا بشتغل..
ليلي
اخلصي يا بنت الجزمه ويلا نص ساعه وتكوني عندي..
قفلت رضوي معاها ولفت لقيت العمال كلهم مشيو ويوسف بس اللي واقف قدامها وقال..
يوسف
حسيت انك مستعجله وعندك معاد مهم فقولت للعمال يمشو عشان ما يبقاش في احراج من ناحيتك..
رضوي بحده
انت بتهزر يا يوسف في شغل لازم يخلص النهارده احنا الاسبوع الجاي لازم نوصل لمرحلة الانشاء..
يوسف
الحق عليا يعني ان شوفتك مستعجله وقولت اتصرف،وبعدين احنا كده كده هنبدأ الانشاء الاسبوع الجاي وعدد العمال زاد والشغل شغال علي قدم وساق زي ما بتؤمري كبري دماغك بقي من الكام ساعه دول وروحي لاهلك شكلهم محتاجينلك اوي..
ابتسمت رضوي وردت عليه وقالت
شكرا يا بشمهندس تتردلك وقت ما تحتاجني ان شاء الله..
_ابتسملها بخبث وهي مشيت ولسه هتركب العربيه بتاعتها بس اتفاجئت بالاربع عجلات بتوع العربيه علي الارض، وقبل ما تقول اي حاجه جه يوسف تاني ووقف جنبيها وقال..
يوسف بخبث
يا حرام ده. مين اللي عمل كده في عرببتك، هتروحي ازاي دلوقتي، ما فيش حل غير اني اوصلك علي فكره…
رضوي بغيظ
هو انت ما فيش فيك فايده ده انا لسه كنت هغير وجهة نظري عنك بس طلعت زي ما انت..
يوسف
هو انا عملت ايه الحق عليا اني جاي اساعدك عشان اوصلك..
رضوي بغيظ
ما هي الحركات القرعه دي انا عرفاها كويس، الاول تمشي العمال وكل الناس اللي هنا عشان لما تبوظ عربيتي واحنا في مكان ما فيش فيه موصلات اوافق انك توصلني..
يوسف
انتي متخيله بقي انا تعبت ازاي بس عشان اوصلك اومال لوو..
وعقت فيه بعصبيه وقالت
ما فيش لو دي ولا في هتوصلني ولا انا هبقي معاك في اي مكان لوحدنا حتي لو كانت العربيه..
وطلعت مفتاح عربيتها من الشنطه وقالت
وامسك وبكره الصبح الاقي العربيه قدام بيتي متصلحه وهبعتلك عنوان بيتي علي الواتس والا والله هطلع من هنا لابوك واقوله هو يصلح العربيه اللي ابنه المحترم بوظهالي..
يوسف بهدوء
اوكي هصلحهالك بس تعالي اوصلك كده كده ما فيش موصلات هنا وانتي مستعجله..
رضوي بجمود
لا في عم خليفه اللي بيجيب طلبيات الرمل والزلط لسه موجود هروح معاه..
ضحك بسخريه ورد عليها وقال
عم خليفه ايه ده معاه عربيه نص نقل، انتي بقي هتسيبي عربية يوسف الصاوي وهتركبي عربيه نص نقل اصلا مش هتعرفي تركبيها…
رضوي بجمود
خليك في حالك..
_وسابته واقف مصدوم وراحت ركبت جنب سواق العربيه نص نقل بكل هدوء ومشيت، وفي الوقت ده موبيل يوسف رن فرد عليه وقال…
يوسف
ايوه يا امير خطتك فشلت يا ابن البومه..
امير
ايه ما عرفتش توصلها وتلطف الجو؟..
يوسف
لا سابتني وطلعت عربيه نص نقل..
ضحك امير وقال
هههههههههه ايه البنت دي، بس بجد شابو ليها انها قدرت ترفض يوسف الصاوي اللي شايف انه قادر يوقع كل البنات..
يوسف بهدوء
هي غير كل البنات اصلا، وهتروح مني فين انا وهي والزمن طويل، قولي بقي انت عملت ايه مع البنت اللي كنت ماشي معاها…
امير
جيبتها البيت وابوها طب علينا..
ضحك يوسف وهو بيركب عربيته وقالها
يخربيت فقرك المهم اقفل ونتقايل بالليل يلا بااي…
ــــــــــ #بقلم_الكاتبه_رحاب_القاضي ــــــــ
_وفي بيت يونس الصاوي…
كانت قاعده شهد هي وواحده من اللي شغالين عندها في الشركه بتاعتها…
شهد
برافو عليكي اووي يا نادين التصميمات المره دي احسن من المره اللي عدت، انا بجد ما غلطتش لما خليتك تمسكي الاشراف علي المصممين الجداد..
نادين
هما فيهم مواهب كتر اووي علي فكره، بس هما كان ناقصهم التاتش بتاعنا..
شهد
البركه فيكي بقي انا عايزه في خلال شهر نختار احسن عشره فيهم عشان نبدأ التصميمات الجديده بتاعت السنه دي..
نادين
ان شاء الله يا مدام شهد، همشي انا بقي ونتقتبل بكره في الشركه..
شهد
ماشي يا نادين وانا بكره هتابع معاكي بنفسي…
في الوقت ده دخل يونس وقال
شهد هو يوسف في…
_سكت اول ما شاف نادين وبصلها بقلق هي وشهد، علي عكس نادين اللي بصتله بخبث..
شهد بأبتسامه بسيطه
حمدلله علي سلامتك يا حبيبي..
ومسكت ايده وقالت بحماس
اعرفك علي نادين المصممه اللي قولتلك عليها قبل كده انها شاطره ومتفوقه جدا…
وقالت لنادين
وده بقي غني عن التعريف يا نادين..
_نادين وهي ما نزلتش عيونها من علي يونس وردت عليها وقالت..
نادين
طبعا يا مدام شهد يونس بيه الصاوي غني عن التعريف ومبسوطه جدا اني شوقته النهارده..
اتجاهل يونس كلامها وقال لشهد
يوسف فين؟..
شهد بقلق
جه من شويه وخرج تاني ما اعرفش راح فين، في حاجه ولا ايه؟..
نادين
طيب هستأذن انا يا مدام شهد بعد اذنك..
شهد
اتفضلي يا حبيبتي معلش تعبتك معايا..
نادين
لا تعب ولا حاجه ده واجبنا…
مشيت نادين ويونس قال لشهد بضيق
تعرفيها منين دي واشتغلت امتي عندك؟..
شهد
اشتغلت عندي من كام شهر بس عشان شاطره اترقت بسرعه، هو انت تعرفها؟..
يونس
لا طبعا هو انا اعرفها منين؟..
شهد
لقيتك بتسأل عليها كده وبتبصلها بطريقه غريبه..
يونس بتوتر
اا لا عادي الموضوع بس اني ما ارتحتلهاش، يزن ويارا فين؟..
شهد
يزن في شقته ويارا بتذاكر في اوضتها لسه راجعه من السنتر من شويه، شويه كلما هنتعشي سوا معادا يوسف لانه قالي هيتأخر..
يونس بضيق
هيتأخر راح فين يعني؟..
شهد
مش عارفه والله انا ما صدقت ان كان بقاله كام يوم بيرجع بدري ويصحي بدري وبيروح شغله بسزشكله هيرجع تاني زي الاول..
يونس
طيب انا هطلع اغير هدومي وابقي انزل علي العشا..
_وطلع فوق وبسرعة مسك موبيله وكلم يوسف صاحبه، واول ما رد عليه قاله..
يونس
مصيبه ونزلت علي دماغي يا يوسف..
يوسف
في ايه سدره كويسه..
يونس
بنتك زي القرد، انت عارف مين شغاله عند شهد؟..
يوسف
مين؟..
يونس
نادين البنت عرفتها في ايطاليا لما سافرنا لشغل انا وانت وجات ورايا مصر..
يوسف
يخربيتك طيب وشهد طلبت الطلاق ولا لسه؟..
يونس بحده
مش ناقص استظراف ورحمة امك، شهد ما تعرفش حاجه بس البنت دي اكيد هتقولها اللي حصل..
يوسف
انا من رأيي تحكي انت لشهد قبل ما البنت دي تحكي هي الموضوع من عندها ووقتها شهد هتقطعك وترميك فأوسخ خرابه..
يونس
قال وانا مكلمك عشان تشوفلي حل، انا ما ينفعش اقول لشهد دي دماغها جزمه واللي حصل زمان ممكن يخليها ما تصدقنيش..
يوسف
طيب وانت هتعمل ايه دلوقتي؟..
يونس
هشوف اي طريقه تبعد شهد عن البنت دي والباقي ساهل..
يوسف
طيب اقفل عشان بطه جايه عندي ونتقابل بكره في الشغل..
قفل معاه يونس وبطه قالت ليوسف بحده
بقولك ايه انت تشوفلك حل في بنتك دي..
يوسف بقلق
مالها سدره في ايه؟..
بطه بعصبيه
بنتك مطلعه في الجامعه كلها اني مرات ابوها الحربايه اللي مطلعه عينها والكلام ده بقي بيتقال وسط الطلاب بتوعي يرضيك يا يوسف..
يوسف
ما يمكن مش سدره اللي عملت كده اهدي يا بطه..
بطه بحده
يا سلام هو مين يعني اللي بيقول الكلام ده غيرها مين بيدخل البيت وبيعرف تفاصيله غيرها، وبعدين حتي لو حد دخل البيت مش هيلاقيني بعذبها هيلاقي العكس وانا اللي شايله في قلبي وساكته..
يوسف
طيب اهدي وانا هكلمها..
بطه
مش هتسمعلك…
يوسف بحده
يعني اعملها ايه اروح اقتلها عشان ترتاحي، وبعدين كبري دماغك من الكلام اهم كلمتين بيتقالو النهارده وبكره بيتنسو..
بطه بضيق
مش بيتنسو انا بقيت اسمع الكلام بيتقال بودني ناقص يقولوه في وشي، كان يوم اسود يوم ما قولتلك تخليها تدخل الكليه اللي انا بدرس فيها..
يوسف بغضب
بطه مالكيش دعوه بسدرا خالص، كفايه اللي حصاها بسببك..
بطه بدموع
وحصلها ايه بسببي؟!..
يوسف بلوم
انتي عارفه كويس حصلها اي،البنت اتحرمت من امها واتعقدت وبقيت تكرهني كل ده حصل بسبب مين،مش بسببك انتي اللي خلتيني اطلق امها وهي حامل فيها..
بطه بحزن
لا مش بسببي ومش هتقلب عليا الترابيزه انت وبنتك يا يوسف، وافتكر اتفاقك مع دارين الاول قبل ما تيجي وتلوم عليا، وانت اللي اختارت تكمل معايا وتطلقها انا وقتها ما غصبتكش علي حاجه..
يوسف بحده
خلصنا يا بطه لو مدايقه من الكلام اللي في الجامعه ما تروحيش تاني انما انا مش هكلم سدرا ومش هزعل بنتي مني تاني انا ما صدقت انها بقيت تتعامل معايا كويس..
_ سابته بطه ودخلت اوضتها وهي مدايقه جداً من اتهام يوسف ليها وانه شايف تصرفات بنته عاديه…
ــــــــــ #بقلم_الكاتبه_رحاب_القاضي ــــــــ
_ وبالليل في بيت عزالدين..
كان قاعد في صالة بيته ورفض يروح مع عبدالله وعلياء بيت حسن، وكان كل تفكيره في ابنه وازاي هيتصرف ويتعامل معاه دلوقتي، طلع في الوقت ده زين من اوضته وهو ماسك شنطة هدومه اللي جه بيها..
عز بحده
ايه ده؟..
زين
رايح لماما..
عز
امك اللي خبتك عني سنين، امك اللي خلتك تكبر عشرين سنه وانت ابن حرام وابوك عايش وما يعرفش عنك.حاجه..
زين بجمود
وانت كنت بتعمل ايه في العشرين سنه دول، كنت مع مين؟..
عز بعصبيه
انت هتحاسبني ولا هتطلعني انا غلطان وامك اللي عملته كان صح..
زين
موضوع مين فيكم الغلطان في حق التاني دي انتو الاتنين تشفوها مع بعض انما الحقيقه ان انتو الاتنين غلطو في حقي انا..
عز بحده
يعني انت برضو اختارت امك..
زين
ما اقدرش اسيبها بعد ما سابت هي كل حاجه عشاني…
عز بغضب
يبقي كأنك ما ظهرتش في حياتي وعنوان البيت ده تنسااه وتنسي ان ليك اب اصلا..
زين بدموع
حاضر بسيطه اووي اصلا وجودك زي عدمه..
عز بجمود
اطلع بره يلااااا…
_ اخد زين شنطته وطلع من عند عز اللي قعد مكانه تاني وحط راسه بين ايديه وبص لاثر ابنه بدموع، بس فضل قاعد مكانه ورفض تماماً انه يخليه ما يمشيش..
ــــــــــــــــ
_وفي الوقت ده في بيت الاستاذ حسن، كانت رضوي وريناد وروان واقفين في المطبخ وقامت ريناد وقالت..
ريناد
انا هروح اقعد بره..
رضوي
بعد ما خلصتي علي الاخضر واليابس هنا طالعه تكملي بره..
ريناد
انتي هتبصيلي في اللقمه يا رضوي والله اندهلك ماما..
رضوي بصت لروان اللي كانت واقفه سرحانه وقالت
المهم مين فيكم هتطلع العصير..
ريناد
العروسه طبعاً..
روان بضيق
اووف ما تقوليش عروسه بس..
رضوي
معاها حق ما تقوليش عروسه يا ريناد قولي بومه هيبقي لايق عليها اكتر…
روان بدموع
خلصتي سخافه هاتي العصير..
ريناد
يا روان لو مش موافقه قولي ما فيش حد يغصبك علي حاجه..
روان بجمود
موافقه يا بنات انا موافقه هو في احسن من عبدالله عشان اوافق بيه…
واخدت العصير وطلعت ورضوي قالت
البت دي في حاجه معاها ومش موافقه بعبدالله والله..
ريناد
تقريبا كده الواد اللي قالت هيتجوزها خزوقها فعشان تنتقم هتوافق بعبدالله..
رضوي
بس عبدالله بيحبها ومش هتندم علي اختيارها ليه علي الله هي بس تكون قد اختيارها ده..
_وبره اول ما طلعت روان وهي ماسكه صنية العير وباصه للارض، ابتسم عبدالله بهدوء وهو قاعد جنب طارق اللي مال عليه وقال..
طارق
وتقولي ما تفهمش غلط لما شوفتها ماسكه ايدك واحنا في البلد يا عم عبدالله..
وادت ابتسامة عبدالله ورد عليه
طيب والله كنت فاهم غلط وكانت حركه غير مقصوده، وبعدين انا جيت اصلح غلطتي اهوو..
في الوقت ده قامت علياء وحضنتها جامد وقالت
وحشتيني يا قلب عمتك يا احلي عروسه..
روان بهدوء
وانتي كمان يا عمتو..
علياء
طيب سلمي علي عريسك يلا…
_في الوقت ده. بصتله روان وبسرعه بصت للارض وسلمت عليه بهدوء وراحت قعدت. جنب ليلي وحسن اللي كان بيبصلها بجمود. وتحذير انها تعمل اي تصرف مش كويس…
علياء
ان شاء الله يا حسن مش هنختلف في حاجه روان بنتك وعبدالله كمان ابنك..
حسن
طبعا يا علياء عبدالله وطارق وسيف وكمال ولادي وما فيش فرق بينهم..
عبدالله بهدوء
وانا تحت امرك في اللي تطلبه يا خالي، واللي تطلبه روان كمان..
روفان
وانا؟…
عبدالله بابتسامه واسعه
وروفان طبعا يا خالي قبل الكل..
ليلي
ادخلي اقعدي مع اختك يا روفان يلا..
روفان
لا انا قاعده اتفرج..
علياء
سبيها يا ليلي ما تزعليهاش…
حسن
المهم يا عبدالله انت جاهز امتي؟..
عبدالله
الوقت اللي تحدده يا خالي حتي لو بكره انا جاهز..
طارق
بتفكرني بسيف كان نفس استعجالك كده ودلوقتي بيضرب نفسه بالجزمه..
ريناد من جوه المطبخ
طيب لم نفسك بدل ما اطلعلك انا بالجزمه…
_ضحكو كلهم بهدوء معادا روان اللي كانت متوتره وقلقانه جداً وهما بيتفقو وبيحددو معاد جوازها..
حسن
المهم يا عبدالله احنا هنكون جاهزين علي بعد. شهر من دلوقتي تكون انت خلصت الانتخابات بتاعتك..
عبدالله
تمام يا خالي وانا موافق..
ليلي
مش شهر بدري شويه يا حسن طيب حتي نستني شويه لحد ما هي تخلص امتحانات..
حسن بجديه
تبقي تخلص وهي في بيت جوزها يا ليلي احنا مش اغراب..
علياء
هنا بيتها يا ليلي وهناك في البلد بيتها وكل حاجه تحت امرها، نقرا الفاتحه بقي..
حسن.
بكره يا علياء ان شاء الله نجمع العيله كلها ونقرا الفاتحه كلنا سوا..
عبدالله بجديه
انتي ايه رئيك يا روان؟..
اتملت عيونها دموع وبصت لحسن بحزن وقالت
اللي يشوفه بابا انا موافقه بيه..
قام عبدالله وقال
علي بركة الله، تعالي يا طارق معايا عايزك في موضوع مهم..
حسن
انا هاجي معاكم…
عبدالله
ارتاح انت يا خالي وانا هحل الموضوع كله مع طارق ما تقلقش..
_وقام طارق وطلعو هما الاتنين في وقت ما حسن كان قلقان علي طارق من اللي ممكن يعمله بسبب غضبه من اللي حصل بينه وبين صحابه..
ــــــــــ #بقلم_الكاتبه_رحاب_القاضي ــــــــ
_في الوقت ده في بيت فيروز كانت قاعده بتعيط ومدايقه جداً، وفجأه دخل زين بالمفتاح بتاعه وهو ماسك. شنطه..
ابتسمت فيروز من بين دموعها وقالت
انت رجعتلي مش هتسيبني صح..
رد. عليها بهدوء وقال
انا ايوه ابنه بس انا مش زيه او يمكن انا بحبك اكتر فعشان كده عمري ما هسيبك. يا ماما…
قامت فيروز وحضنته وقالت
انا متأكده انك مش زيه ولا هتبقي زيه، هو جه هنا وخوفني وقالي انك انت كمان هتسيبني بس انا كنت حاسه انك هترجع واحساسي طلع صح ورجعتلي..
بعد عنها زين وقال بدموع
انتي كان معاكي حق هو ما يستاهلش اني ابقي موجود في حياته، انا كنت غلط لما كنت بلومك علي انك مش مخلياني اعرفه، انا ندمان جدا اني روحتله وفكرت انه ممكن يكون اتغير او حتي ممكن يتغير لما يشوفني..
فيروز
احنا عملنا اللي علينا ولو هو رجع ليك وحس بغلطه تقوله يا اهلا وسهلا لانه ابوك ما رجعش احنا مش هنخسر من غيره..
زين حط ايده علي مكان قلبه وقال
معاكي حق يا ماما احنا مش هنخسر من غيره..
فيروز بقلق
انت تعبت ولا ايه؟..
زين بألم
شويه ممكن نروح للدكتور..
فيروز بخوف
حاضر دقيقه هجيب شنطي من جوه ونروح بسرعه..
_وفعلا اخدت شنطتها وراحت معاه للدكتور بسررعه..
ــــــــــ #بقلم_الكاتبه_رحاب_القاضي ــــــــ
_وعند عبدالله وطارق كانو قاعدين هماوالاتنين في شقة سيف جوز ريناد…
سيف
بصو اللي عايز حاجه يشربها يقوم يعملها انا مش عارف اعمل حاجه لنفسي اصلاً…
طارق
اطمن يا اسطا ابويا بكره هيظبطلك الدنيا مع ريناد وهيخليها ترجع معاك كمان..
سيف
ياريت لا والباشا شايف الخيبه التقيله اللي انا فيها ورايح يتجوز..
طارق
هما مش اخواتي بس الجواز بهدله انا كنت لسه بقوله كده وبرضو كمل في الموضوع وما سمعش كلامي…
سيف
عارف اللي بيتكلم ده عبدالله اول ما اتجوزت ريناد خد اسبوع نقاطعني عشان اخدت اخته منهم..
ضحك طلرق وقاله
اومال يا جدع مش اختي..
عبدالله
طيب المهم انا خالي قالي علي اللي حصل معاك يا طارق وده برضو سبب من الاسباب اني اجي القاهره..
سيف
وقالي انا كمان بس بصراجه انت مغفل اووي ده انا وعبدالله اللي قرايب اهو واكتر من الاخوات بنحاسب بعض علي القرش في الشغل…
عبدالله
مش وقته. الكلام. ده يا سيف المهم يشوف هيرجع حقه ازاي…
طارق بسخريه
لا الموضوع عندكم ما انا لو بعرف اتصرف ابويا ما كانش كلمكم وقالكم تيجو تلحقوني..
سيف
وهو عيب في ايه اننا نقف جنبك..
طارق
انا مش محتاج حد بقف جنبي وبالذوق بالعافيه هعرف ارجع اللي اتضحك عليا فيه..
عبدالله
قولي يا طارق هو انا لما بتحصل معايا في مشكله في البلد وابعت لابوك وخالي عز عشان يقفو جنبي انا كده بقلل من نفسي ولا ضعيف ومش هعرف احل المشكله لوحدي..
سكت طارق وعبدالله كمل كلامه وقال
الواحد بيتسند باللي ليه بعد.ربنا، بيقوي بأهله وناسه يا طارق، لما تبقي لوحدك وبتواجه غير لما تبقي وسط اهلك وحبايبك..
سيف
وحتت برضو انه عايز يبلطج عليهم ويعمل حاجه غير قانونيه كده انت بتساعدهم فاللي هما بيعملوه لانهم اكيد متوقعين منك حاجه زي دي..
طارق
الموضوع كله مع عمرو، كل دي خطته هو ده اللي فهمته من كلامه وانا ده كان عشرة عمري وصاحبي وهعرف اتصرف معاه ومش مهم عندي الكافي ولا الفلوس اد ما مهم اني اعلمه درس عمره ما ينساه..
عبدالله
المثل بيقولك اخد الحق حرفه، انت هتنتقم منه بس مش دلوقتي لما تبقي تاخد منه فلوسك والمافي اللي انت يعتبر دافع فيه كل حاجه ابقي وقتها اعمل فيه اللي عايزه..
طارق
وانا هرجع الكافي ازاي وانا اتنازلت عن الملكيه ليه وفي شرط جزائي في العقد عليا اني لو رجعت في كلامي ادفعه..
سيف
البند ده غلط لان الشرط الجزائي في العقد لازم يبقي علي الطرفين مش طرف واحد..
طارق
طيب وهنثبت الكلام ده ازاي؟..
عبدالله بثقه
المحامي الشاطر يقدر يعمل اي حاجه، والمحامي بتاعي في الطريق والموضوع محلول المهم طلع صورة العقد اللي معاك وعقد الملكيه اللي كان بأسمك…
_تفتكرو بقي هيحصل ايه؟…
ــــــــــ #بقلم_الكاتبه_رحاب_القاضي ــــــــ
_وتاني يوم الصبح طلعت روان من اوضتها ولقيت حسن بيفطر لوحده فراحن قعدت جنبيه وقالت..
روان
صباح الخير يا بابا..
_ما ردش عليها وعمل نفسه مشغول في موبيله وهي قالت بحزن..
روان
ماما قالتلي ان حضرتك عايزني..
حسن
عبدالله عايز يتكلم معاكي فطلب مني يوصلك النهارده للجامعه لو هتروحي وانا قولتله انك رايحه..
روان بضيق
بس انا ما عنديش محاضرات النهارده..
حسن بحده
علي اساس لما كانت عندك المحاضرات كنتي بتحضريها..
بصت للارض بدموع وهو تابع كلامه
هتروحي معاه وانا هرجع اخدك بعدها بساعتين تلاته كده تكلميني تقوليلي خلصت واكلمك في اي وقت فيديو تردي عليا واشوفك قاعده فين ومع مين وبتعملي ايه، وده اخر يوم هتروحي فيه الجامعه وابقي لما تتجوزي كملي براحتك وقتها عبدالله مش هيسمحلك تتنفسي من غير ما يكون عارف اصلا..
مسحت دموعها وقالت
حاضر اللي تشوفه حضرتك صح انا هعمله..
قالت كلامها وقامت دخلت اوضتها وطلعت ليلي من المطبخ وقعدت جنب حسن وقالت بحده..
ليلي
هو في ايه وايه اللي انت مخبيه عليا من ناحية روان، انا كنت حاسه ان في حاجه غلط في الموضوع ما هو ده مش شكل عروسه النهارده قراية فاتحتها..
حسن بضيق
ربنا سترها معانا يا ليلي، الهانم لولا ان ربنا بيحبنا كانت هتضيع وتضيعنا معاها بس ربك سترها..
ليلي
ايه اللي عملتو روان يا حسن فهمني..
حسن
بعدين هقولك بس ما تحنيش اووي وتضعفي قدامها لو جات وقالتلك مش عايزه تخرج مع عبدالله او عايزه تعمل حاجه من ورايا اوعي توافقي يا ليلي انا بحذرك اهو..
ليلي
ماشي يا حسن بس انا برضو لازم ابقي فاهمه كل حاجه..
حسن
ان شاء الله، ابقي اعملي فطار وابعتيه لعز هو من امبارح تقريبا ما اكلش حاجه..
ليلي
من غير ما تقول شويه والفطار هيجهز وهخلي حد من الولاد يوديه ليه..
قام حسن وباس راسها وقال
ربنا يخليكي ليا يا ام العيال، هروح الشغل انا ادعيلي..
ليلي
تروح وترجع بااسلامه يا حسن..
ــــــــــ #بقلم_الكاتبه_رحاب_القاضي ــــــــ
_في بيت يونس الصاوي..
كان يوسف واقف في اوضته بيلبس هدومه وهو بيتكلم في الفون وقال..
يوسف
سنه عشان تردي..
رضوي
عايز ايه علي الصبح انت؟..
يوسف
بعتلك العربيه تحت البيت وهي متصلحه والمفتاح مع البواب بتاع بيتكم ما فيش بعد كده سرعه ولا ايه؟..
رضوي
شوفتها واديني جايه بيها علي الشغل اقفل..
يوسف
ايه يا قليلة الذوق طنط وعمو ما علموكيش تقولي شكراً…
رضوي بحده
لا علموني اعمل كده يا خفيف..
_خلصت كلامها وقفلت في وشه وهو ضحك بهدوء وكمل لبسه وبعد شويه موبيله رن برقم عائشه فأتنهد بضيق ورد عليها وقال..
يوسف
صاحيه بدري يعني..
عائشه
لازم اصحي بدري عشان شغلي..
يوسف بعدم فهم
شغل ايه ده؟..
عائشه
ما انت لو كنت بترد عليا كنت عرفت اني بدأت شغل عند يزن في الشركه بتاعتكم..
يوسف بحده
لا والله هو انتي مش قولتيلي قبل كده وقولتلك لا ما فيش شغل..
عائشه
وانا اقعد في البيت اعمل ايه يا يوسف، ما انا لازم اشتغل اومال يعني كنت بتعلم ليه؟…
يوسف
ده. كلام ابوكي ده، وخليكي ماشيه ورااه براحتك..
عائشه بقلق
يعني ايه؟..
يوسف
يعني يا انا يا الشغل ويا تروحي تقولي لابوكي مش عايزه تشتغلي يا تقوليلو مش عايزه يوسف.
عائشه بدموع
يعني هو ايه الغلط في شغلي يا يوسف وكمان هكون مع يزن مش حد غريب..
يوسف بحده
وانا مشكلتي مش في يزن، بس ابوكي ما يمشيش كلامه عليا هو مش عايزك تشتغلي هو عايز يعمل بينا مشكله وخلاص..
عائشه
طيب ما انا لو سيبت الشغل من تاني يوم بابا هيزعل.
يوسف
خلاص زعليني انا بقي سلام..
عائشه بسرعه وخوف
خلاص خلاص انا هقوله مش عايزه اروح الشغل تاني بس لو رفض وصمم اني اروح..
يوسف
قوليلي وانا هتصرف، سلام بقي عشان مش فاضي..
قفل معاها وقال لنفسه بضيق
ما تشتغل اهو علي الاقل تبطل زن شويه عليا..
وكلمها تاني وهي ردت عليه وسكتت، فقالها بمشاكسه…
يوسف
طيب قولي الو طيب..
عائشه
نسيت تزعقلي علي حاجه تانيه ولا ايه؟..
يوسف بهدوء
لا يا ستي بس ما هانش عليا زعلك فأشتغلي وانا هتحمل المره دي وهاجي علي نفسي..
عائشه بسعاده
بجد يا يوسف يعني انت موافق..
يوسف
ايوه يا شوشو موافق يلا بقي سيبيني البس عشان ما اتأخرش علي شغلي..
عائشه
ماشي خلاص انا بحبك اووي يا يوسف..
يوسف بهدوء
وانا كمان يلا بااي..
وقفل معاها وبص للدبله اللي في ايده وقال
الموضوع بدا يبقي ممل يا شوشو، ما انا لو كنت بحبك ما كنت اعجبت بغيرك…
_تفتكرو يوسف كان يقصد مين بالكلام ده ايه الغباء ده اكيد رضوي يعني👀😁؟..
ــــــــــ #بقلم_الكاتبه_رحاب_القاضي ــــــــ
_وفي شقة يزن كانت سدره واقفه في المطبخ وبتتكلم في الفون بصوت واطي وقالت..
سدره
ايوه يا عصام هاا حصل ايه؟..
عصام
يا خلاثي عليها دي اول ما شافت صورتها مع الواد اللي جالها قدام السنتر وقولتلها هوريها لباباها صوتها اتغير وفضلت تعيط…
سدره بسعاده
ما هو ده المطلوب انت تفضل وراها بقي واعمل فيها كل اللي انت عايزه..
عصام
تمام بس افرض راحت قالت لابوها، انا مش قدهم الناس دي..
سدره
لا لا اطمن دي عيله صغيره وبتخاف من ابوها ومستحيل تقوله…
عصام
تمام انا هكمل اللي اتفقنا عليه، وهبلغك بكل جديد..
_قفلت معاه وطلعت من المطبخ وقالت ليزن اللي كان بيفطر..
سدره
احنا هنفطر من بكره معاهم تحت..
يزن
ما بلاش هتدايقي من كلام بابا معاكي..
مسكت ايده وقالت
طول ما انت جنبي انا متأكده انك مش هتخلي حد يدايقني ولا ايه؟..
يزن
طبعا المهم نخف شويه كلام عن طنط بطه في الجامعه..
سدره بخبث
والله مش انا اللي قولت الكلام ده، بص كانت في بنت صاحبتي انا وسمر كنت بحكيلها عن مشاكلي مع طنط بطه واتخانقنا من فتره فعشان توقعني في مشكله فضلت بقي تقول الكلام ده علي لساني..
يزن
خلاص انا هكلم طنط بطه وهفهمها الموضوع..
بطه
لا لا سيبهالي انا هعرف اتكلم معاها واحل الموضوع..
ــــــــــــــــ
_وفي اوضة يارا كانت بتحاول تكلم زين وهي بتعيط بس ما كانش بيرد عليها، فكلمت ياسمين صاحبتها وقالتلها وهي بتعيط..
يارا
مش بيرد عليا برضو..
ياسمين
طيب ما تقولي انتي لباباكي. .
يارا
لا طبعا ازاي اقوله ده يموتني فيها، انتي ما تعرفيش بابا عصبي ازاي في المواضيع دي..
ياسمين
طيب يوسف اخوكي او يزن او مامتك ما هو الزفت ده. مش هيبطل يستفز فيكي….
يارا بخوف
مش عارفه بس هو الحل الوحيد اني اقول ليزن هو اللي ممكن يكون متفاهم شويه..
_تفتكرو يزن هيكتشف اللي بتعملو سدره في اخته ولا لا؟….
ــــــــــ #بقلم_الكاتبه_رحاب_القاضي ــــــــ
_وفي الوقت ده كان طارق نازل رايح شغله في الجامعه وقال لسيد اللي قاعد مدايق..
طارق
صباحو يا عم سيد…
سيد بحزن
صباح النور يا ابني..
طارق
خير يا عم سيد مالك في حاجه ولا ايه؟..
سيد بدموع
بنتي خالتها طردتها من البيت وجايه في الطريق وهتشوف حالي وكل حاجه ده انا حتي مش قادر اروح اجيبها من المحطه..
طارق
هي جايه امتي بالظبط؟..
سيد
كمان تلات سعات هتوصل..
طارق
طيب انا هروح اجيبهالك وهقولها كل حاجه..
سيد
لا لا مش هينفع انت عندك. شغلك يا طارق و..
طارق
ما عنديش غير محاضره واحده وهروح استناها واجيبهالك لحد هنا هو انت مش واثق فيا يا عم سيد؟..
سيد
طبعا واثق فيك ده انت ربنا يعلم غلاوتك عندي اد ايه..
طارق
يبقي اطمن انا هحل الموضوع ومش هخليها تيجي وتتصدم وجو الافلام العربي ده، بس هي اسمها ايه وشكلها ايه عشان اكون عارفها بس..
سيد
هي قصيره شويه وبتلبس خمار وعيونها خضره واسمها هنا…
طارق
اقسم بالله هلاقي مليون واحده بنفس الموصفات، مش معاك صوره ليها يا عم سيد..
طلع سيد موبيله وقال
ايوه صح. عندي صوره ليها متصورها انا وهي وامها قبل ما المرحومه تموت…
_وطلع الصوره علي موبيله الصغير شويه وشاشته مكسوره وقاله وهو بيوريه الموبيل….
سيد
اهي يا ابني اللي في النص..
بصلها طارق بهدوء وابتسم وقال
بقي دي بنتك يا عم سيد، ما تزعلش مني انا كنت فاكرها شبهك..
ضحك سيد وقال
ربنا يسامحك يا ابني، بس بالله عليك ما تخليها تزعل مني عشان كدبت عليها..
طارق
اطمن يا عم سيد والله هتبقي كل حاجه تمام..
_تفتكرو ايه حكاية هنا مع بيت الاستاذ حسن،وهل حكايه سعيده ولا حزينه؟…
•تابع الفصل التالي "رواية موضوع عائلي" اضغط على اسم الرواية