رواية موضوع عائلي الجزء(3) الفصل التاسع 9 - بقلم رحاب القاضي
الرافعيّ:
«وتبسّمت للدّموع كأنّها تريد أن تقول لها أيضا؛ لا تبكِ»
ــــــــــــــــــــــــــــــــــ
حامد
انتي بتعملي ايه هنا يا يارا؟..
بصتله يارا بخوف ورد عليه زين وقال
قاعده معايا، انت مين؟..
بصله حامد بجمود وقال
حامد الصاوي ابن عمها، انت مين بقي يا حلو؟..
قامت يارا وقالت بسرعه
دد ده قريب ياسمين صاحبتي هي في الحمام وجايه عشان هيمشو مع بعض اا انا ما اعرفوش يعني…
بصلها زين بحده وغضب وحامد قاله بهدوء
اممممم يعني انتي جايه هنا مع صحبتك طيب يلا حبيبتي اروحك..
يارا بقلق من نظرات زين ليها
انا هستني ياسمين…
حامد بحده
هو انتي مش قولتي ياسمين هتمشي مع قريبها، يلا تعالي معايا….
_قال كلامه ومسك ايدها بكل تملك واخدها ومشي من قدام زين اللي غضبه زاد اضعااف بس وقف عاجز عن انه يتكلم او يرد عليه بعد ما هي انكرت معرفتها بيه خالص، وجات ياسمين وقالتله بقلق..
ياسمين
اوعي تقولي انها سابتك ومشيت؟..
رد عليها زين بضيق
ابن عمها كان هنا واخدها معاه ومشيو..
ياسمين بقلق
ايه ابن عمها شافك معاها، وابن عمها مين فيهم حامد ولا مازن؟..
زين بضيق
انتي هتروحي اوصلك ولا قاعده؟..
ياسمين
لا هروح مش هقعد من غير يارا، بس معايا العربيه والسواق بتاع بابي بره….
زين بجمود
اوكي… سلام..
_قال كلامه وسابها ومشي وهو متعصب جدا، وياسمين قعدت علي الترابيزه وكلمت يارا اللي كنسلت المكالمه وما ردتش عليها، فبعتتلها ياسمين رساله صوتيه وقالت بقلق..
ياسمين
ردي عليا وقوليلي ايه اللي حصل زين كان شايط اووي ومشي وهو متعصب، وابن عمك مين اللي شافك معاه واخدك ومشي ده؟..
_شافت يارا في الوقت الرساله بتاعت ياسمين بس ما رضيتش تسمعها بسبب قلقها من حامد اللي كان بيسوق العربيه بملامح جامده وشكله مدايق منها جداً..
حامد
مين الولد اللي كان قاعد معاكي ده؟..
يارا بتوتر
زي ما قولتلك يا حامد ده قريب ياسمين..
حامد
اول واخر مره يا يارا تقعدي مع حد. غريب بالشكل ده، ده انا اللي ابن عمك ولا مره قعدت معاكي في كافي لوحدنا ولا اقظر اعمل كده من ابوكي واخواتك..
يارا بضيق
انا ما كنتش قااعده معاه لوحدنا، ياسمين كانت جايه….
حامد
انا شوفتك معاه لوحدك وكان معايا صحابي وهما كمان شافوكي وعارفينك انك بنت عني تخيلي شكلي بقي قدامهم ازاي، وانا قولت ما تتكررش يا يارا وياريت تسمعي الكلام….
يارا بغيظ
حاضر يا حامد انت برضو زي يزن ويوسف ولازم اسمت كلامك..
بصلها حامد بطرف عينه وقال بخبث
مش زيهم أووي يعني..
يارا بضيق
يعني أيه؟..
حامد
في وقتها هتعرفي، عايزه تروحي اي مكان تجيبي حاجه قبل ما نروح البيت؟..
ردت عليه بجمود وقالت
لا..
_تجاهل ردودها الجامده عليه ووصلها البيت وفي الوقت ده كان يزن هو كمان طالع من البيت وهو بيتكلم في الفون ولما شاف يارا في عربية حامد ادايق وقال لسدره اللي بتكلمه في الفون..
يزن
طيب اقفلي يا سدره دلوقتي وبكره ترجعي البيت ما فيش حوار اني هبات يومين ده، يلا سلام…
_قفل معاها وقرب من يارا اللي نزلت من عربية حامد وقال بحده..
يزن
كنتي فين كل ده؟..
يارا
كل ده ايه ده لسه الساعه 9،وكنت مع ياسمين وحامد شافني وجابني..
يزن بضيق
طيب اطلعي فوق يلااا..
سمعت يارا كلامه ونزل حامد من العربيه وقاله
في ايه يا يزن ايه المقابله البطاله دي؟..
يزن
توصل اختي بتاع ايه انت يالا..
حامد ببرود
خطيبتي المستقبليه وقبلها بنت عمي..
يزن
بنت عمك علي عيني وعلي راسي بس مدام فيها موضوع خطوبه يبقي مالكش دعوه بيها ده لو الخطوبه دي تمت اصلا..
حامد
لا جو الغيره ده مش عليا انا حامد حبيبك..
يزن بحده
حامد الا يارا هي صغيره ااه بس برضو ما ينفعش تروح وتيجي معاها كده ولا ناخد رأي ابوك وابويا احسن..
حامد
يا عم انت كبرت الموضوع ليه اصلا كله صدفه، وانا مش عارف الخطوبه دي هتم ازاي اصلا بوشك انت واخوك..
يزن
لا من الناحيه دي اطمن..
حامد
طيب انت رايح فين دلوقتي؟..
يزن
طالع اغير جو الواحد من لما اتجوز ما غيرش جو والدنيا كمكمت خالص..
حامد
والمدام عارفه بالموضوع ده؟..
يزن
لا ما المدام عند ابوها..
حامد
بحيث كده بقي اطلع ونروح سوا ونشوف الواد يوسف فين ونسهر سوا النهارده..
يزن
لا يوسف بينام بدري عشان عنده شغل مهم الصبح..
حامد بعدم فهم
يوسف اخوك بينام بدري وعشان عنده شغل،انت بتتريق عليه صح؟!..
يزن
زي ما سمعت كده هو يومين وهترجع ريما لعادتها القديمه..
حامد
علي رئيك طيب اطلع ولا انت كمان مش هتركب معايا العربيه غير لما تبقي بينا حاجه رسمي..
يزن
خفة دم اهلك دي هتجيبلي جلطه يالا ما تخفهااش تاني..
_وطلع معاه يزن العربيه ومشيو سوا هما الاتنين..
ــــــــــ #بقلم_الكاتبه_رحاب_القاضي ــــــــ
_في بيت الاستاذ حسن من اول ما عرف ان طارق هيسافر خلاص راح وقعد في اوضته وهو مدايق جداً، دخلت عنده ليلي وقعدت قدامه وقالت بدموع وحزن..
ليلي
وكأن مش مكتوب لينا نفرح يا حسن، ما صدقت رضوي خفت وقلبي اطمن عليها، جه طارق ووجعني بقراره الزفت ده..
حسن بجمود
استغر الله العظيم، خير ربنا يجعله خير..
ليلي بحزن
طيب. ما تروح تكلمه قوله اننا هنساعده يعمل المشروع لوحده واننا هنبقي مكان صحابه واحسن منهم، قوله انك مش زعلان منه يا حسن ما تخليهوش يسافر وغلاوتي عندك…
حسن بحده
هو مش بيقول واخد قراره ومن غير ما يقول لحد فينا، هو عارف اننا كلنا محتاجينه وعارف انتا هنزعل عليه لو مشي وعارف انه وقت ما يحتاجنا هيلاقينا جنه بس هو قرر يا ليلي يمشي وما يسألش في حد ولا يفرق معاه حد فسبيه براحته..
قامت ليلي وقالت بدموع
لا مش هسيبه براحته يا حسن وابني مش هيسافر ويسيبني..
قالت كلامها وطلعت من عند حسن اللي قال بدموع
الله يسامحك يا طارق علي اللي بتعمله في امك وفيا ده….
_راحت ليلي اوضة طارق اللي كان قاعد علي اللابتوب بتاعه وقالت بدموع وحزن ونبره خائفه….
ليلي
عشان خاطري ما تسافرش، انت مش بتعرف تعمل كوباية شاي لنفسك هتروح تعيش لوحدك ازاي بس هناك…
طارق بهدوء
اهدي طيب وبلاش العصبيه دي، وانا لسه ما سافرتش انا قاعد معاكي اهو…
ليلي
يعني مش هتسافر؟!..
طارق
لا طبعا هسافر بس مش دلوقتي….
ليلي بحده
انت بتاخدني علي قد عقلي يا واد انت، وبعدين انت عايز تسافر ليه وتبعد عننا، لو احنا زعلاناك في حاجه انا اسفه نيابه عن الكل واللي هتقولك نص كلمه من اخواتك بعد كده هديها بالجزمه بس ما تمشيش…
ابتسم طارق غصب عنه وقال
طول عمرك انتي وبابا هو يدلع البنات بزياده وانا واخد الدلع بتاعك كله ليا….
ليلي
ولسه انت شوفت حاجه، بص احنا هنقف جنبك نخلص بس من جهاز اختك وفرحها واللي عايزه هنعملهولك بس خليك معانك كلنا والله من اول ابوك لحد روفان وروز عايزينك معانا..
طارق
والله يا ماما انا عندي احسن عيله في الدنيا، بس انا محتاج ابعد واحقق حلمي بعيد عن هنا، انا مش عارف انجح هنا فهحاول بعيد عن البلد دي اللي كل حاجه فيها غلط…
ليلي ببكاء
طيب وانا احللك مشاكل البلد ازاي دلوقتي عشان ما تمشيش….
ضحك طارق بهدوء ومسك ايدها وباسها وقال
انا هسافر يا ماما بس كل يوم هكلمك، وكمان هاجي اجازات وكل حاجه انا مش رايح اخر الدنيا يعني..
ليلي ببكاء
طيب استني طيب احضر فرخ اختك معانا…
طارق
معلش يا ماما بس عشان لازم الحق الشغل اللي خالي جبهولي فلازم امشي يوم الخميس وانا حجزت خلاص….
ليلي
شغل ايه ده، وانت سيبت الجامعه وشغلك هناك؟.
طارق
واحد صاحبي هيخلصلي ورق الاستقالة والحاجات دي بعد ما اسافر كل حاجه محلوله يا ماما…
ليلي بحزن
من وجهة نظرك انها محلوله، انما احنا شايفنها بتتعقد اكتر..
_وسابته وقامت رجعت اوضتها ولقيت حسن نام او عمل نفسه نايم، وقام طارق وقف في الشبااك بتاع اوضته وهو مدايق جدا بسبب حزن اهله انه هيسافر، ولفت انتباهه هنا اللي طلعت في البلكونه الصغيره اللي في الدور الارضي وكانت لابسه حجابها كالعاده علي بجامه واسعه وماسكه موبياها وبتحاول تشغله..
_ابتسم بتلقائيه وفضل مركز معاها بهدوء، بس اتخض فجأه لما مسكت الموبيل وخبطته في الحيطه قدامها وبعدين مسكته تاني وكسرته علي سور البلكونه ورمته في الشارع وقالت بغيظ..
هنا
اتفو عليك يا عرة الموبيلات ده انا امسك موبيل لعبه احسن منك..
ضحك طارق بعدم تصديق وقال لنفسه
والله العظيم مش طبيعيه…
_في الوقت سمع صوت حد بيندهله من فوق، واول ما بص لفوق لقي هند بنت خالته اللي لابسه هدوم خفيفه جدا وواقفه بشعرها وقالتله….
هند
انا كمان زيك مش جايلي نوم ايه رئيك ننزل نتمشي بالعربيه بتاعت ماما شويه….
طارق بابتسامه صفراء
ومين قالك بقي ان مش جايلي نوم يا هند ده انا كنت جاي اقفل الشبااك عشان هموت وانام تصبحي علي خير….
_وقفل فعلا الشبااك ودخل قفل النور وراح علي سريره عشان ينام، وابتسم باتساع اول ما افتكر هنا وقال لنفسه….
طارق
وماله اجيبلك موبيل جديد يا ام لسان طويل..
ــــــــــ #بقلم_الكاتبه_رحاب_القاضي ــــــــــ
_وفي بيت يوسف ابو سدره..
كانت بطه قاعده لوحدها في اوضتها مدايقه من اول ما جات سدره، وفجأه الباب اتفتح ودخلت سدره من غير ما تخبط حتي علي الباب وبصتلها بشماته وخبث وقالت..
سدره
يا حرام قاعده لوحدك ليه كده يا طنط….
بطه ببرود
عشان مش عايزه اشوف وشك..
سدره راحت قعدت قدامها وقالت
والله ولا انا طايقه اشوف وشك، بس معلش عشان عيون بابا لازم ادخل واعمل نفسي بطمن عليكي..
بطه بغيظ
انتي عايزه مني ايه، ما انا اختصرتك ولا بقيت بتدخل في حياتك ولا ليا دعوه بيكي انتي بقي عايزه مني ايه؟..
سدره
ما بقتيش تدخلي في حياتي بعد ما كنتي سبب اني ابقي يتيمه للنهارده، بعد ما دمرتيني انا ما بكرهش في حياتي قدك..
بطه بحده
اطلعي بره يا بت انتي احسنلك..
سدره
تؤ انتي اللي هتطلعي بره يا طنط بطه، انا جايه هنا عشان اطردك من البيت ده، وبابي يا حرام بقي متعلق بيا اوي وكرهك انتي ومش طايقك فانتي لو عندك دم اصلا تمشي بكرامتك قبل ما تزعلي من اللي هعمله فيكي…
مسكتها بطه من شعرها وقالت بغضب
كرامة مين يا بنت معدومة الكرامه خليني ساكته احسن عشان مش انا اللي عيله زيك هتيجي تعمل نمره عليا، ولو كنت ساكته الاول فكان عشان خاطر يوسف وانه بيقدرني وبيوفقك عند. حدك، بس مدام ما بقاش ليكي كبير ولا حد. عارف يلمك فانا اقوم بالواجب يا تربية واطيه…
سدره بغيظ وهي بتحاول تبعد عنها
انتي اتجننتي بتمدي ايدك عليا يا تربية الحواري يا بيئه..
بطه وهي بتشد شعرها اكتر
ما الحواري دي اصلك برضو اصل ابوكي ما كانش متربي في الزمالك ياروح امك، وانا هوريكي تربية الحواري علمتني اتصرف ازاي اللي يقل ادبه عليا..
_وميلت علي الارض ومسكت الشبشب وفضلت تضرب بيه سدره اللي فضلت تصوت، ودخل عندهم يوسف واتصدم من اللي بتعمله بطه وبعدها عنها بصعوبه وزعق فيها وقال بعصبيه..
يوسف
انتي اتجننتي يا بطه ايه اللي عملتيه في البنت ده؟..
بطه بحده
لقيتك مش عارف تلمها وتخليها تحترمني وتحترم اني في سن امها، قولت اربيها انا..
سدره ببكاء وتمثيل
كداابه يا بابا والله انا دخلت اندهلها عشان تيجي تتعشي معانا فرفضت وطردتني من عندها، جيت وقعدت جنبيها عشان اعرف زعلانه مني ليه قامت ضربتني زي ما انت شايف..
بطه بسخريه
يا سكر وانت بقي مصدقها يا يوسف؟..
يوسف بحده
ما هو ده اللي شوفته بعيني يا بطه…
بطه بجمود
تمام. بنتك بقي يا حبيبي دخلت وقلة ادبها عليا زي ما كانت بتعمل الاول وزياده كمان وانت عارفني ما بعرفش اسكت علي قلة الادب..
سدره ببكاء
كدابه والله انا لو عايزه اغلط فيها انت عارا انا كنت بعمل كده الاول قدامك وكنت برضو برجع وبعتذرلها عشان خاطرك انما المره دي انا والله ما غلطت فيها بالعكس ده انا داخله اقولها يا ماما بطه لاني بجد محتاجه عيله مش هيبقي اخوها مطلع عيني ومدخل نفسه بيني وبين جوزي في كل حاجه وهي عندها بتحاول تبعدك عني طيب اروح فين بس واروح لمين..
_اتصدمت بطه من كلامها ومن يوسف اللي حضنها وفضل يسكت فيها وبص لبطه بغضب وعصبيه وقال..
يوسف
البيت ده بيت بنتي وانا مش هسمح لاي حد. يزعلها واياكي تفكري تمدي ايدك عليها تاني انتي فاهمه..
_خلص كلامه وضرب بطه بالقلم قدام بنته ولاول مره في حياته يمد. ايده عليها…
بطه بدموع
انت بتمد. ايدك عليا يا يوسف..
مسكها من دراعها جامد. وقال بحده
اقسم بالله يا بطه لو ايدك اترفعت علي بنتي تاني لاكسرهالك، وهي هنا الكل في الكل عاجبك اهلا وسهلا مش عاجبك غوري في ستين داهيه..
_وذقها جامد وسابهم وطلع وسدره قربت منها وقالت بشماته..
سدره
الخطه مشيت زي ما رتبتلها بالظبط، فاضل بقي اخليكي تطردي من الجامعه وبفضيحه وقريب اووي، واخوكي بقي انا هخليه يندم علي اليوم اللي فكر يجوزني فيه ابنه وافتكر انه كده عرف يخليني ابقي ماشيه بمزاجه يا مرات باباه..
_قالت كلامها وسابتها هي كمان ومشيت، وبطه كانت في عالم تاني وكلام سدره ما أثرش فيها قد اللي عمله يوسف اللي وقفت زمان قدام امها وجوز امها واهل ابوها عشانه واختارته، اللي عرضت نفسها للموت اكتر من مره عشان خاطره، واللي اتحملت انه اتجوز عليها وفضلت معاه عشان ما تزعلوش، وهو بقي دلوقتي اكتر شخص بيهون عليه زعلها ووجعها💔..
_وقامت ولمت هدومها ومشيت واللي صدمها امتر انها طلعت قدامه وحتي ما سألهاش رايحه فين ولا حتي حاول يوقفها،ورجعت لبيت اهلها في حارة الصاوي وقعدت فيه لوحدها..
ــــــــــ #بقلم_الكاتبه_رحاب_القاضي ــــــــ
_وتاني يوم الصبح كانت يارا قاعده في اوضتها وبتحاول تكلم زين بس مش بيرد. عليها خالص، ودخلت عندها شهد وقالت..
شهد
يارا يلا عشان تفطري..
يارا بضيق
ماليش نفس..
شهد
في ايه مالك؟..
يارا بحده
ماليش نفس انا حره مش عايزه اكل..
شهد
يا بنتي لو ما نزلتيش ابوكي هيعملها حكايه ويفضل يقولي البت مالها ومش عارف ايه انزلي اقعدي وما تاكليش..
يارا بضيق
يا ماما انا مش عايزه اتجوز حامد..
شهد
ومين جابلك سيرة انك هتتجوزي حامد، انتي لسه صغيره علي الكلام ده اصلا..
يارا
ايوه انا لسه صغيره وصغيره علي طول علي الجواز من حامد افهمو ده بقي..
شهد
طيب اهدي وقوليلي ايه اللي فتح الموضوع ده دلوقتي ده كلام بين عمك وابوكي وخلاص..
يارا بدموع
لا مش كلام امبارح كنت مع ياسمين وزين وحامد. شافني واخدني غصب عني جابني البيت ولما قولتله انت زي يزن ويوسف قالي لا مش زيهم وبعدين تعرفي يبقي قصده ايه بقي؟..
شهد بضيق
وانتي بتقابلي ولاد من ورايا يا يارا؟..
يارا بقلق
لا والله بس زين هو اللي كان هناك واتقابلنا صدفه وو..
شهد بحده
ما تكررش وانا قولتلك تخفي كلام معاه، البنت المحترمه ما تكلمش شباب من ورا اهلها..
يارا بقلق
ما انا قولتلك وانتي تعرفي يا ماما..
شهد بجديه
وانا قولت لا ما تتكلميش معاه وانك كبرتي وتصرفاتك محسوبه، وكلامك معاه غلط جدا وحرام واخواتك او ابوكي لو عرفو مش هيحصل كويس..
يارا بدموع
حاضر بس ما تخليش بابا يجوزني حامد ويسيبني اختار اللي انا عايزااه..
شهد بهدوء
حاضر ولسه بدري اوي علي الكلام ده، ركزي في مذاكرتك ودراستك ومستقبلك ده المهم واهم من اي حاجه وموضوع الجواز ده لسه بدري عليه ما تخليهوش يشغل دماغك، اتفقنا..
يارا
حاضر اتفقنا..
شهد
يلا طيب عشان نفطر سوا..
يارا بضيق
معلش والله مش قادره يا ماما، قولي لبابا كانت سهرانه بتذاكر ونايمه..
شهد
حاضر يا يارا بس كمان شويه هخلي نعمه تطلعلك الفطار هنا لازم تاكلي وتفطري قبل ما تبدأي مذاكره..
يارا بهدوء
حاضر يا ماما..
_وقامت شهد من عندها وطلعت، ويارا مسكت موبيلها تاني وحاولت تكلم زين لقيته عملها بلوك..
يارا بغيظ
ماشي يا زين براحتك ماااشي..
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن كانت قاعده رضوي بتفطر وطلع طارق من اوضته وقعد. جنبيها وقال..
طارق
انا فكرتكم خلصتو فطار، بس كويس انك بتاكلي انا جعان..
رضوي بحده
شيل ايدك يلااا خلي امك تجهزلك. ده فطاري انا…
طارق بغيظ
عشر بيضات ولتر لبن وعلبة نوتيلا والعيش اللي في البيت كله وتقوليلي افطارك لوحدك والغريب انك في الاخر ما بتدخنيش..
رضوي
الله واكبر وبعدين انا تعبانه ونزفت كتير ومحتاجه اتغذي..
طارق بغيظ
اديكي قولتي تتغذي مش تتعلفي يا ماما..
رضوي بحده
طيب غور قوم من جنبي يلااا..
طارق بخبث
بهزر معاكي يا قلب اخوكي افطري يا حبيبتي بالهنا والشفا..
رضوي
مش هتاخد العربيه يا طارق فبطل تلزيق..
طارق
ما انتي تعبانه يا رضوي ومش بتروحي الشغل واخوكي عنده مشوار مهم عشان بخلص اوراق السفر بتاعي والحاجات دي..
رضوي بحزن
انت لسه ناوي تسيبنا وتمشي..
طارق بضيق
بالله عليكي يا رضوي بلاش انتي كمان كفايه ابوكي وامك..
رضوي
كلهم زعلانين ده حتي روفان مش راضيه تكلم حد ولا حتي فطرت وراحت المدرسه وقالت انها مش عايزه تكلمك عشان هتسيبنا..
طارق بضيق
وانا هستفاد ايه وانا قاعد جنبك افشل وازعلكم وبس، لما اسافر وانجح وقتها هتفرحو وتقولو كويس انه مشي، هاتي بقي مفتاح عربيتك..
مسكت رضوي ايده وقالت بدموع
فكر تاني احنا كلنا هنا محتاجينلك جنبنا..
باس طارق علي ايدها وقال
ان شاء الله يا رضوي هاتي بقي مفتاح العربيه وبطلي زول فيا..
رضوي
عندك جوه في الشنطه بتاعتي بس ادخل بشويش عشان روان نايمه..
طارق بخبث
بس كده من عينيا..
_ ودخل طارق يجيب المفتاح بتاع عربية رضوي وبعد شويه طلع يجري من الاوضه وروان طالعه ورااه ووشها وشعرها غرقانين مايه وقالت بزعيق وعصبيه..
روان
والله لوريك يا طارق يا ماما يا ماما…
طلعت ليلي من المطبخ وقالت
في ايه يخربيت امك..
روان بغيظ
ابنك الحيله دلق عليا مايه ساقعه وانا نايمه..
رضوي
مشي خلاص لما يجي ابقي اتخانقي معاه..
ليلي
معلش هو وحش ادخلي كملي نوم يا بروطه يلااا..
روان
داخله بس علي الله حد يصحيني تاني..
_ضحكت رضوي بهدوء عليهم ودخلت ليلي المطبخ وباين عليها الزعل من اول ما قال طارق انه مسافر، وبعدين موبيلها رن برقم يوسف فردت عليه وقالت بهدوء..
رضوي
خير علي الصبح؟..
يوسف
صباح الخير الاول..
رضوي
صباح النور عايز ايه؟..
يوسف
افتحي الوتساب كده بعتلك حاجه مهمه في المساحات اللي هنبدا فيها شوفيها هي 6 سنتي ولا خمسه..
رضوي
طيب…
_وقفلت في وشه وفتحت الوتساب وهي بتاكل واول ما شافت المساحه اللي باعتها برقت بصدمه ورجعت كلمته تاني وهو رد عليها وقال….
يوسف
عارفه يا بت انتي لو قفلتي في وشي تاني هاجي اخنقك، وها خمسه ولا سته..
رضوي
جاتك خمسه او سته يقعدو عليك يفطسوك انت ماسك في الخمسه والسته وسايب المساحه اللي فوق اللي هي اربعه وانت عاملها 12 انت عايز تخرب المشروع يالااا..
يوسف بخبث
ده بجد ما انتي عارفه يا رضوي اني لسه بتدرب وانتي مش موجوده وما فيش حد زيك..
رضوي
خلاص انا كده كده جايه بكره بس اوعي تنفذ حاجه من اللي انت هامله ده..
يوسف ابتسم بأتساع وقال
يا بنتي انتي لسه تعباانه هتيجي فين؟..
رضوي بحده
انت مالك انت، وروح اشتغل علي المساحات القديمه اجي بكره الاقيها خلصانه..
_قالت كلامها وكالعاده قفلت في وشه، وهو بص للموبيل بغيظ وقال…
يوسف
دم ياخدك بقلة ذوقك دي، بس المهم اني هرجع اشوفك كل يوم تاني….
دخل عنده سعيد الريس بتاع العمال وقال
يا بشمهندس في واحده بره اسمها عائشه بتسأل عليك..
اتنهد يوسف بضيق وقال
طيب يا عم سعيد انا طالع حالا اهوو..
_وراحلها فعلاً يوسف لقاها واقفه بتتفرج علي العمال اللي بيشتغلو بهدوء ، وقف جنبيها وقال بجمود..
يوسف
نعم؟..
عائشه بهدوء
انا اسفه ما كانش قصدي ادايقك والله بس انت عارف بابا هيزعل لو كنا خرجنا مع بعض يا يوسف وو..
يوسف بضيق قاطعها وقال
خلاص يا عائشه حصل ايه؟..
عائشه بحزن
في ايه يا يوسف انت بقالك فتره متغير اووي معايا لا بقيت بتكلمني ولا مهتم بيا زي الاول، لو زعلان مني في حاجه قولي وانا والله مش هعملها تاني..
يوسف بضيق
ما فيش حاجه بس انا زهقت او مش زهقت ما بقتش عايز اكمل..
عائشه بدموع
يعني ايه؟..
يوسف
مش وقته الكلام هنا يا عائشه اول ما افضي هبقي اجيلكم البيت ونتكلم وافهمك كل حاجه..
عايشه بانفعال وقلق
لا ما انت ما ترميش كلامك الرخم ده وتقولي بعدين، انت تقصد ايه يا يوسف بكلامك انت عايز تسيبني؟..
بص لدموعها بحزن وقال بضيق
لا بس قصدي نبعد شويه عشان نعرف نتفاهم..
دموعها نزلت بألم وحزن وقالت
انت هتسيبني با يوسف انا كنت حاسه بكده اصلا انت زهقت مني ومن تحكمات بابا والجو ده انت مش عايز تتجوزني صح؟..
اتنهد يوسف بضيق وسكت وهي قالت بنبره مهزوزه
خلاص عادي اصلا معلش ازعجتك..
يوسف بضيق
استني يا عائشه انتي فاهمه غلط وبعدين انتي شايفه المكان اللي احنا فيه، اهدي ونتكلم وقت تاني بس بلاش كلامك ده انا مش عايز ازعلك..
حاولت تبتسم بصعوبه وردت عليه
لا لا ما تقلقش انا مش زعلانه اصلا عادي، وو وفي اي وقت عايز تتكلم نبقي نتكلم وما تخافش مش هضغط عليك ولا هقول حاجه لاهلي ولا.. ولا هجبرك عليا..
_قالت كلامها وسابته واخدت عربيتها ومشيت وهو بصلها بحزن لانه متأكد من حبها ليه بس متأكد برضو انه ما حبهاش ومش هيقدر يحبها زي ما هي بتحبه، ومش هيقدر يتجوزها ومشاعره مع واحده تانيه وفي نفس الوقت هو مش عايز يجرحها..
ــــــــــ #بقلم_الكاتبه_رحاب_القاضي ــــــــ
_وفي الوقت ده عند رضوي كانت قااعده بتتفرج علي التلفزيون بس مركزه في موبيلها اكتر وخصوصا لما جاتلها رساله صوتيه من كمال، فضلت ماسكه الفون ومتردده تسمعها ولا تطنشه وما تهتمش بيه زي ما هو بيعمل معاها، ولكن في الاخر القلب هزم العقل كالعاده وفتحت الرساله واتملت عيونها دموع اول ما سمعت صوته وهو بيقولها..
كمال
عامله ايه يا رضوي عرفت من عبدالله وامي انك عملتي حادثه وتعبانه، طمنيني عليكي..
اتنهدت بهدوء وردت عليه وقالت
كويسه الحمد لله الموضوع بسيط اصلا..
_استنت رده وفكرت انه مش هيرد عليها في وقتها بس لقيته شاف الرساله ورد عليها بسرعه برساله تانيه، قعدت بأهتمام وفتحت رسالته وابتسمت باتساع لما قال..
كمال
طيب الحمد لله عشان حتي لما ارجع قريب الاقيكي كويسه..
ردت عليه بسرعه وقالت
انت بتتكلم جد يا كمال انت هترجع؟..
استنت رده بلهفه كبيره ورد عليها فعلا وقال
ايوه والله راجع هظبط اموري هنا يعني شهر او شهرين بالكتير وراجع مصر وراجعلك يا رضوي..
ابتسمت بسعاده وقالت بخبث
ترجع بالسلامه لاهلك بس ترجعلي انا ليه هو انت بعد ما سبتني فاكر اني ممكن ارجعلك اصلا..
رد عليها بايموشن بيضحك وكتبلها
“لما ابقي ارجع نبقي نشوف الموضوع ده المهم خلي بالك من نفسك وانا هقفل دلوقتي عشان عندي شغل، سلام مؤقت يا بيبي”..
_ضحكت بصوت عالي وطلتت من الشات بتاعه وكلمت عبدالله اللي رد عليها وقال..
عبدالله
الو..
رضوي
عبدالله قولي بصراحه هو كمال راجع بجد؟.
عبدالله
طيب قولي ازيك الاول عامل ايه؟..
رضوي بلعفه وقلق
رد عليا يا عبدالله بالله عليك، كمال راجع بجد هو قالك انه راجع؟..
عبدالله
ايوه قالي وقال لماما كمان..
رضوي بقلق
طيب انت شايف. انه بيتكلم. جد يعني هو ممكن يرجع بجد ولا بيقول كلام وخلاص؟..
عبدالله
مش عارف والله يا رضوي، بس انتي عارفه كمال واكتر مني كمان هو بيقول كلام وممكن جدا يغيره في اي وقت..
رضوي بقلق
بس هو لو ما كانش هيرجع ما كانش قال..
عبدالله
اكيد… المهم هي اختك فين؟..
رضوي
مين فيهم؟..
عبدالله بأبتسامه هاديه
اللي تخصني..
رضوي بخبث
قصدك روفان ولا روان..
ضحك بهدوء وقال
ههههه لو روفان جنبك اديهالي طبعا بدل ما تقلب علية، مش جنبك فروان اكيد اللي تخصني..
ضحكت رضوي وقالت
لا اطمن روفان في المدرسه وروان نايمه..
عبدالله
طيب صحيها انا بكلمها من امبارح مش بترد عليا..
رضوي
ااه ما هي نايمه من امبارح، ما الحقيقه انك هتتجوز غيبوبه علي شكل بني ادمه..
عبدالله
زي العسل علي قلبي روحي صحيها بقي..
رضوي
براحتك دقيقه خليك معايا داخله اصحيها اهو..
_وقامت رضوي ودخلت الاوضه بتاعتها هي وروان ووقفت جنبيها وهي نايمه وقالت..
رضوي
رواان.. روااااان..
قامت روان وزعقت فيها وقالت بعصبيه
في ايييييه ما اعرفش انام في ام البيت ده يعني..
رضوي كتمت ضحكتها وقالت
عبدالله اا..
قاطعتها روان وقالت بحده
ماله زفت الطين ده كمان..
ضحكت رضوي بصوت عالي وقالت
ههههههه علي الفون اهو عايزك..
رروان بصدمه واحراج
بتهزري علي الفون ده؟..
رضوي بشماته
اينعم خدي بقي كلميه وهروح انا اكمل المسلسل بتاعي بره..
_وسابتلها رضوي الموبيل وخرجت وهي مسكته وردت علي عبدالله باحراج وصوت هادي جدا وقالت..
روان
ايوه يا عبدالله..
عبدالله
زفت الطين كان قصدك انا؟…
روان بتوتر
ااا لا لا لا بص انا فكرتها بتقول طارق فف فانا صاحيه من النوم ومش مركزه ومتعصبه وبس..
عبدالله بهدوء
ما علينا انا بكلمك من امبارح علي فكره..
روان
ما انا كنت نايمه وعامله الفون صامت..
عبدالله
طيب المهم انا تقريبا جاي عندكم بكره..
روان بقلق
جاي ليه؟..
عبدالله
ايه السؤال قليل الذوق ده حد يقول كده؟..
روان
مش قصدي بس انت جاي ليه برضو؟..
عبدالله بخبث
منها لله بقي اللي لما بقيت توحشني بقيت احسن ان القاهره الشارع اللي ورايا وما فيش مشكله اني اسيب اللي ورايا كله واروحلها..
روان بتوتر
مم ما رديتش عليا برضو جاي ليه؟..
ضحك عبدالله بهدوء وقال
جاي عشان اتفق مع خالي حسن علي معاد كتب الكتاب..
روان بقلق
كتب كتاب مين؟..
عبدالله بغيظ
كتب كتاب امي يا روان..
روان
نعم؟..
عبدالله
كتب كتابنا يا روان ركزي معايا شويه..
روان بقلق
طيب وليه بسرعه كده. ده فاضل تلات اسابيع علي الفرح..
عبدالله
اولا عشان عايز طارق يكون معانا في اي مناسبه لينا قبل ما يسافر، وثانياً والاهم عشان الايام الجايه هنفرش شقتنا اللي في القاهره وهنبقي مع بعض علي طول وعايز ابقي واخد راحتي معاكي..
روان بتوتر وخوف
واخد راحتك ازاي ما ينفعش علي فكره..
عبدالله بهدوء
ما انا عشان كده عايز اكتب الكتاب بسرعه عشان يبقي ينفع يا روان..
روان بخوف شديد
لا لا برضو ما ينفعش يعني تبقي براحتك اصلا ما حدش هيوافق..
عبدالله بخبث
لا هيوافقو وما تخافيش انا عارف حدودي كويس لحد. يوم الفرح…
برقت بكسوف وخوف ووشها قلب احمر وقالت بتوتر
اا مم ماما بتنادي عليا لازم اقفل بااي..
_وقفلت معاه ورمت الفون قدامها وفضلت قاعده متنحه ومره واحده فضلت تطلم علي وشها وقالت بخوف..
روان
يالهوي يالهوي يالهوي انا وعبدالله وجواز وفرح احيييي كان مستخبيلك فين كل ده يا روان….
فتحت عليها روفان الباب وقالت بصوت عالي
الحقييي يا ماما روان ملبوسه..
قامت روان وقالت بغيظ
بقي انا ملبوسه والله لربيكي يا حيوانه..
ــــــــــ #بقلم_الكاتبه_رحاب_القاضي ــــــــ
_وبالليل قدام العماره بتاعت الاستاذ حسن كان واقف طارق مع عم سيد وقاله بضيق..
طارق
ده موبيل يا عم سيد هو انا بديلك خاتم الماظ، وبعدين هنا زي اخواتي البنات فبلاش تكسفني وتقول لا..
سيد بأحراج
يا ابني والله انا كنت هجيبلها واحد بس اقبض، وده غالي اوي اصلا وانا مش هعرف اردلك تمن حاجه زي دي وما ينفعش اخده كده واسكت..
طارق
هو انا كنت قولتلك عايزك ترده وينفع اووي تاخده وتسكت..
سيد بضيق
بؤضو انا مش هينفع اخده واكدب عليها واقولها ان انا اللي جايبه، وبنتي وعارفها لو عرفت انه منك مش هترضي تاخده..
طارق
دي كل المشكله انت اتفرج بس وانا هتصرف وانا اللي هكدب..
_ورااح ناحية الشقه البسيطه اللي قاعد فيها عم سيد ووقف جنب الباب وقال بصوت عالي…
طارق
بت يا هنا انتي يا بت…
سيد بقلق
انت اللي جيلته لنفسك..
_طلعت هنا من جوه وهي لابسه اسدال الصلاخ والحجااب وقالت بحده..
هنا
هي مين دي اللي بت يااااه…
سيد بلوم
عيب كده يا هنا، بس هي كده مع الكل، دي امبارح الاستاذ احمد اللي ساكن في الدور التالت بيهزر معاها خشبتله كده..
طارق
جدعه انا مش بحبه احمد ده..
هنا بضيق
عايز ايه انت برضو؟..
طارق بغيظ
مش انا اللي عايز ابوكي هو اللي عايزك، اصله بعتني اجيبلك موبيل جديد عشان موبيلك اللي باظ..
ابتسمت باتساع وقالت
احلف بابا انت جيبتلي الموبيل ده ليا انا بجد؟..
طارق
ايوه اومال يعني هكون انا اللي جايبه..
هنا اخدت منه الموبيل وقالت بسخريه
وانت هتجيبه منين ده انت شكلك شحات اصلا..
كتم سيد ضحكته وقال
عيب كده يا هنا واشكري طارق عشان تعب وجبهولك..
هنا بهدوء
شكرا يا عم..
وقربت. من باباها وحضنته بهدوء وقالت
انت احسن اب في الدنيا، ربنا يخليك ليا..
سيد بسعاده
ويخليكي ليا يا حبيبة بابا..
وقال بتذكر
اااخ ده انا نسيت ان الاستاذ حسن قالي اطلع اجيب الايجار من السكان، جهزي العشا يا هنا لحد ما اجيب الايجار واوديه للاستاذ حسن واجي..
هنا
حاضر بس ما تتأخرش عشان جعانه..
طلع سيد فوق وطارق قالها
حلو الموبيل، عجبك يعني؟..
هنا
عينك فيه خده بدل ما يفرقع في وشي..
طارق بغيظ
قولي حلو واسكتي لازم تدبشي في اللي قدامك..
هنا
عايز ايه انت دلوقت؟..
طارق
دلوقت؟! مش عايز حاجه بس تعبت وانا بنقيلك الموبيل وسيبت شغل مهم وفضلت اختار فيه وفي لونه وكده..
هنا
لون يقرف وحريمي اووي…
طارق بغيظ
هو انتي اسمك صبحي ما انا جيبته حريمي عشان ليكي..
هنا بخبث
ولا حتي جيبت سماعه معاه حتي من ام عشره جنيه اللي بتبوظ بسرعه دي..
طارق بغيظ
غوري من وشي يا بت انتي ده انتي رخمه..
ضحكت بهدوء وقالت
خلاص ما تزعلش.. طارق..
طارق بابتسامه بسيطه
نعمين؟..
هنا
مايه عشان شرقت هههههههههه..
طارق بغيظ
والله انا ما اتربتش اني واقف معاكي…
جات في الوقت ده هند من بره وقالت
ايه ده تارق انت بتعمل ايه هنا؟..
طارق
والنبي يا هند انطقي اسمي كويس اسمي طااارق..
هنا بصوت واطي
مايه عشان شرقت..
بصلها بغيظ وقال
سمعتك يا رخمه..
هنا كتمت ضحكتها وقالت
هو انا قولت حاجه؟..
هند
انت بتتكلم معاها كده ازاي؟..
بصتلها هنا بضيق وطارق رد عليها بضيق وقال
عادي بتكلم معاها زي الناس في ايه يا هند؟..
هند بغيظ لهنا
امسكي طلعي الشنط دي فوق يا اسمك ايه انتي..
بصتلها هنا من فوق لتحت وقالت
وانتي اتشليتي ما تطلعي بيهم..
هند بحده
انتي ازاي تكلميني كده يا بت انتي؟..
طارق بحده
انتي اللي ليه بتتكلمي كده يا هند، عم سيد وهنا ما بيطلعوش حاجه لحد هنا ومش بياخدو اوامر من حد وهنا مش شغاله هنا هي قاعده مع عم سيد بس، وعم سيد ما حدش بيقوله يعمل ايه وما يعملش ايه غير بابا..
وبص لهنا اللي كانت واقفه هاديه جدا وقالها
معلش يا هنا بس هند جديده هنا وما تعرفش النظام..
هنا
حصل خير بعد اذنكم..
_وسابتهم ودخلت شقتهم البسيطه وقفلت الباب وهند قربت من طارق وقالت بهدوء..
هند
انت زعلت ولا ايه انا بس ادايقت عشان بتهزر معاها..
بعد عنها وقال
وانتي مالك يا بنت خالتي، وابعدي كده احنا في مدخل العماره وحتي لو لوحدنا اوعي تعملي كده عشان الشيطان عمره ما هيكون تالتنا..
هند ضحكت بهدوء وقالت
ههههه اشمعنا يعني؟..
طارق بسخريه
هيجي يعمل الشيطان في وجودك اومال انتي لازمتك ايه؟..
_بصتله بغيظ وطلعت شقتهم، وهو ضحك بشماته وطلع شقة اهله هو كمان..
ــــــــــ #بقلم_الكاتبه_رحاب_القاضي ــــــــ
_وتاني يوم الصبح قدام شقة عز الدين وقف عبدالله ورن الجرس وبعد شويه فتحله زين الباب وابتسم بهدوء وقاله..
زين
ازيك يا عبدالله اتفضل..
دخل عبدالله وقاله
الحمد لله هما امي وحالي فين اومال؟..
زين
طنط علياء نايمه وبابا كمان نايم بس قالي انك جاي فأنا جهزتلك الاوضه اللي جنب اوضة بابا عشان ترتاح من المشوار..
عبدالله
تعبت نفسك والله انا بنام في اي حته هنا..
زين بمرح
خلاص بعد كده هسببهالك تروقها لوحدك او نام في اي حته..
عبدالله بابتسامه بسيطه
مقبوله يا عم زين..
زين
طيب قبل ما تدخل تنام انا مجهز فطار عشان هفطر ورايح الجامعه..
عبدالله
الفطار في وقته انا جاي جعان اصلا، هدخل اغسل ايدي واجيلك..
_وراح عبدالله يغسل ايده وزين بص لموبيله اللي بيرن برقم ياسمين صاحبة يارا، فقفل في وشها وبعدين راح فتح الباب اللي بيخبط وكانت روان وهي ماسكه صنية الفطار وقالت بغيظ..
روان
امسك ماما بتقولك افطر قبل ما تغور الجامعه..
اخد. منها زين صنية الفطار وقال
اغور… هو في ايه يا روان؟..
روان بغيظ
ما هو عشان انت تتنيل تفطر انا ماما تصحيني من النوم عشان اجهز الفطار، وبعدين ما تسمع الكلام وتيجي تفطر عندنا وخلاص لازم تتأنعر..
زين بعدم فهم
اعمل ايه؟..
روان بسخريه
عاملي فيها جاي من باربس ولا لندن مش فاهم. كلامنا..
دخل زين حط صنية الاكل علي الترابيزه ورجع قالها
عايزه ايه يا روان؟..
روان ببرود
موبيلي علي الصنيه اللي دخلتها هاته..
_كان هيدخل يجيبه بس شاف عبدالله طلع من الحمام فقاله بخبث..
زين
والنبي يا عبدالله هات الموبيل اللي علي الصنيه عندك…
روان بسخريه
هخاف انا لما تقول كده، بطل هزار وادخل هات الموبيل يالااا…
طلع عبدالله في الوقت ده وقال
الموبيل اهوو..
برقت روان بصدمه وقالت
لا كده كتير والله..
ابتسم عبدالله وزين ضحك وقال
طلع بحق وحقيقي اهو، هدخل انا اكمل الفطار..
دخل زين وعبدالله قالها بهدوء
طيب ما انتي صاحيه اهو كنتي كلميني اطمني عليا..
روان بتوتر
واطمن عليك ليه ما انت كويس اهو هات الموبيل..
اداها عبدالله الموبيل وقال بغيظ
ابقي اسألي روفان هتطمني عليا ليه…
روان ببرود
حاضر هبقي اسألها بعد اذنك…
_وسابتهم ودخلت شقتهم وقفلت الباب وراها، ومن جواها توتر وخوف كبير من حياتها اللي جايه مع عبدالله اللي كل علاقتها بيه كلام خفيف وبس لا تعرف طبعه ولا اي حاجه عنه غير اللي الكل يعرفها، بس طبعا ما كانتش هتقدر ترفض ولا حتي تطلب انها تأجل الجواز…
ــــــــــ #بقلم_الكاتبه_رحاب_القاضي ــــــــ
_وفي الشركه بتاعت شهد كانت قاعده مع موظف عندها في المكتب بيتكلمو في وفجأه دخل عندهم يونس وقال..
يونس
شهد عايزك..
شهد بقلق
في حاجه يا يونس ولا ايه؟..
بص يونس للولد اللي قاعد جنبيها وقال بحده
هتقعد تتفرج علينا واحنا بنتكلم ولا ايه؟..
الولد بأحراج
لا طبعا بعتذر، بعد اءنك يا مدام شهد..
وطلع بسرعه وشهد قالت ليونس بضيق
في ايه احرجت الولد يا يونس..
قرب منها ومسكها من دراعها جامد وقال
ده انتي تحمدي ربنا اني ما كسرتس عليكم المكتب كله، قاعده معاه لوحدك وقافله الباب عليكم يتروح امك..
ضحكت شهد بعدم تصديق وقالتله
انت بتتكلم جد، علي فكره ده من سن يزن ويوسف يعني قد ولادي..
يونس بغيظ
ما تتكررش تاني يا شهد ده لو عايزاني اسيبك تشتغلي..
شهد بهدوء
حاضر سيب ايدي بقي وقولي في ايه قلقتني..
يونس قعد علي مكتبها وقال
الحربايه مرات ابنك..
قعدت شهد قدامه وقالت
ما كفايه بقي يا يونس وسيب البنت في حالها..
يونس
والنبي البت تخرب الدنيا لو سيبتها في حالها تاني، انتي تعرفي انها عملت مشكله مع بطه وخلتها سابت البيت وقاعده دلوقتي في بيت ابويا في حارة الصاوي..
شهد بضيق
استغفر الله العظيم يارب طيب ليه كده هو حد كان عملها حاجه، وبطه والله ما في احن ولا اطيب منها..
يونس
المهم دلوقتي سيبي اللي في ايدك ونروحلها نطيب خاطرها بكلمتين..
شهد
حاضر دقيفه واحده بس اخلي حد يجي مكاني هنا….
ومسكت تليفون المكتب وقالت
ايوه يا نادين تعالي مكاني يا حبيبتي عشان انا عندي ظروف خاصه ومش هكمل اليوم النهارده وفي حاجات لازم تخلص..
نادين
حاضر يا مدام شهد جايه حالا..
يونس بقلق
هي البنت دي شاطره في شغلها؟..
شهد بجمود
فوق ما تتخيل، ومش بس كده دي انا وهي بقينا صحاب برغم فرق السن اللي بينا بس هي لطيفه ..
يونس بتوتر
طيب يلا بينا عشان انا مش فاضي عندي شغل..
_وقبل ما تيجي نادين ويشوفها اخد شهد ومشي من الشركه كلها…
ــــــــــ #بقلم_الكاتبه_رحاب_القاضي ــــــــ
_وفي مكان شغل رضوي ويوسف، كانو قاعدين هما الاتنين مع بعض ورضوي قالت بانبهار…
رضوي
بجد. برافر عليك اوووي يا يوسف. طيب ما انت مظبط الدنيا اهو ومرحلة الانشاء بدات والدنيا تمام قلقتني معاك ليه امبارح وجيبتني النهارده علي ملي وشي..
يوسف
عشان عايزك تكوني هنا معايا..
رضوي بحده
نعم يا اخويا؟!..
يوسف بخبث
فهمتيني غلط انا اقصد معايا في الشغل لاني وارد جدا اغلط انتي ناسيه اني لسه ما اتخرجتش من الجامعه..
رضوي
طيب حاول تفضي وقت عندك وتذاكر وتتخرج، لان بصراحه باين عليك شاطر بس محتاج شوية وركيز، وكمان نورا قالتلي انك كنت الفتره اللي فاتت بتتعامل معاهم بعمليه وطريقه لطيفه، وكمان قالولي انك بتيجي اول واحد وبتمشي اخر واحد
يوسف
عشان عايز ابقي زيك مهندس شاطر…
رضوي
انت بتحلم انا ما حدش بيبقي زيي يا سكر..
يوسف
ما علينا المهم انا عملتلك انتي ونورا ومحمود واسلام وميلاد اشتراك في الجيم بتاعنا..
رضوي بعدم فهم
ليه يعني؟..
يوسف
حاجه تحفيذيه كده وبعدين كل اللي شغالين في الشركه بيبقي عندهم اشتراك في الجيم والنادي اللي ابويا مساهم فيه وكده..
رضوي
اممم وده ازاي يعني وليه تعملو كده؟..
يوسف
فكرة يزن عشان يخلي الموظفين بتوعنا مميزين..
رضوي
هو اخوك بصراحه بيفكر كويس، وانت اهو بدأنا نشوف منك حاجات كويسه..
يوسف بثقه
ولسه هبهرك والله، المهم خليكي قااعده هنا ما تتحركيش كتير عشان ما تتعبيش وانا هشوف الشغل وكل حاجه وهاجي اخد رئيك برضو في المهم..
رضوي بتعجب
ايه ده مين اللي بيتكلم؟..
يوسف بأبتسامه بسيطه
مش قولتلك هبهرك…
_ضحكت بهدوء وهو راح وقف وسط العمال مع المهندسين وكان بيتكلم بكل جديه، مسكت هي موبيلها وصورته من غير ما ياخد باله وبعتت الصور ليونس الصاوي وبعتتله رساله صوتيه وقالت فيها..
رضوي
ازاي حضرتك يا يونس بيه، اظن كده المهمه قربت تتم بنجااح، قولت لحضرتك ما فيش حاجه صعبه عليا..
ـــــــــــــــــــــ
_في الوقت ده في بيت حامد الصاوي كان يونس واقف في البلكونه بتاعت البيت وهو بيسمع الرساله بتاعت رضوي وابتسم باتساع وجات عنده شهد وقالت..
شهد
بتكلم مين ومبسوط كده؟..
يونس
تعالي بصي شوفي يوسف وهو بيشتغل..
_وقفت شهد جنبيه ومسكت الموبيل وابتسمت بأتساع وقالت..
شهد
هو بقاله كام يوم لا بيسهر ولا بيتأخر علي شغله وده ملتزم اكتر من يزن..
يونس
البنت دي شاطره وعندها شخصيه وحضور عرفت تسيطر عليه وتخليه يحب الشغل ويحبها هي كمان..
شهد بعدم فهم
يحبها هي كمان؟..
يونس
فاكره يوم الحادثه بتاعتها لما يوسف راحلها وانا روحت وراه، اللي كان عامل فيها كده ابنك لانها رفضااه ورافضه تديله ريق حلو، المهم اليوم ده ابنك قالي انه مش عايز يكمل مع عيشه بنت محمد لانه اكتشف انه بيحب رضوي، بس المناسبه ليه عيشه طبعا وهي اللي هتسعده لانها بتحبه..
شهد بهدوء
المناسبه ليه اللي هو عايزها يا يونس مش اللي احنا عايزينه، انا زيك اتمني انه يتجوز عائشه بس لو هو قال انه ما بيحبهاش مش هفرض عليه يتجوزها، ده جواز يعني مش هنجامل حد. فيه ولا هنغصب حد. علي التاني..
يونس بضيق
طيب تعالي نشوف موضوع البت بطه وبعدين نبقي نتكلم في الموضوع ده، يمكن ابنك. يعقل ويغير رأيه..
_ودخلو وقعدو مع بطه اللي كانت بتعملهم شاي وقالت بحمااس..
بطه
والله الواحد مهما راح ولف مش هيلاقي راحه غير في بيته وسط ذكرياته القديمه ولا احلي برضو من الطعميه اللي بتتعمل في حارة الصاوي..
يونس
انتي هتقوليلي كنا بنصحيكي بيها زمان..
بطه
ااه زي ما كنت بتتلكك وتروح تجيب عشان تشوف نور وتقفو ساعه ترغو سوا…
ضربها برجله في رجلها فقالت هي بتوتر
يالهوي عليا وعلي لسااني، طيب نفطر بقي نفطر..
شهد بضيق
انا ماليش نفس المهم سيبك من شدره خالص ويوسف ما يستاهلش انك تسبيه يا بطه..
سابت بطه الاكل وقالت بضيق
لا يستاهل وان ما اطلقت منه ما ابقاش انا..
يونس بحده
بطلي هبل هو انتو عيال صغيرين ده جوزك كمان شويه هيبقي جد ان شاء الله..
بطه بدموع
معاك حق بس هو برضو ما ينفعش يمد ايده عليا بعد العمر ده كله واسكت او اقبل ارجعله تاني..
شهد بصدمه
لا لا مش معقول هو يوسف اتجنن ولا ايه؟..
يونس بجمود
مد ايده عليكي فعلا؟..
مسحت بطه دموعها وقالت
ايوه عشان خاطر بنته اللي ما شافتش تربيه..
يونس بجديه
طيب قومي لمي هدومك وتعالي هتيجي عندي..
بطه
لا انا مرتاحه هنا..
يونس بحده
وهو يقعد. مع بنته وانتي تقعدي هنا لوحدك ليه مالكيش اهل، قومي هتقعدي في بيت اخوكي..
بطه بقلق
بس سدره عندك. يا يونس برضو وو..
ردت عليها شهد وقالت
ما هو قالك انتي هتيجي بيت اخوكي واللي مش عاجبه يخبط دماغه في الحيط، انا هقوم اجيبلك حاجتك لحد. ما تخلصي انتي فطار عشان نمشي سوا..
قامت شهد دخلت جوه ويونس مسك ايد بطه وقالها بهدوء ونبره حنونه..
يونس
طول ما اخوكي عايش مش هيسيبك لوحدك واقسم بالله لاندمه واعلمه الادب علي اللي عملو ده..
بطه ابتسمت بهدوء وقالتله
ربنا يخليك ليا يا يونس وما يحرمنيش منك ابداً..
ــــــــــ #بقلم_الكاتبه_رحاب_القاضي ــــــــ
_بالليل في بيت ريناد وسيف، الباب خبط وراحت هي فتحت وكان العامل بتاع المغسله..
ريناد
ايه جبتلي العنوان؟..
العامل بصوت واطي
ايوه ده العنوان اللي طول الشهر اللي عدي كانت بتجيلنا منه هدوم جوزك واخر مره جات الست اللي جابتهم وقالت نجيبهم بعد ما يخلصو علي العنوان ده..
ريناد
طيب فين العنوان بتاعها بقي؟..
العامل
لا اخد اللي اتفقنا عليه الاول..
ريناد
طيب خليك هنا دقيقه وجايه..
_ودخلت جابتله فلوس وهو اخدها منها، واداها هو ورقه فيها العنوان بتاع الست اللي بتكون عندها هدوم جوزها.. قفلت الباب ومسكت الورقه وفتحتها وقالت بدموع..
ريناد
المعادي ماشي يا سيف اما نشوف مين دي بقي اللي هدومك عندها..
طلع سيف في الوقت ده من اوضته وقال
مين كان بيخبط يا حبيبتي؟..
ريناد بجمود
حد غلطان في العنوان..
سيف
طيب يلا عشان ما نتأخرش علي اهلك..
ريناد بخبث
سيف كان في تيشرت ازرق بتاعك مش لاقياه وكمان كام قميص اختفو فين دول؟..
سيف
ممكن يكونو ضاعو في المغسله هبقي اروح اسأل عليهم، او ممكن يبقو عند ماما..
ريناد
طيب ياريت بعد كده لما ابقي اسيب البيت واروح عند اهلي ما تبعتش هدومك المغسله تاني وانا هبقي اجي اغسلهم..
سيف بأبتسامه صفراء
اللي تشوفيه حاضر، يلا بينا..
ريناد
هجيب تيا من جوه وجايه..
_وبعد شويه كانو كلهم متجمعين في بيت الاستاذ حسن ومعاهم عبدالله وعلياء وعز وزين اللي اول مره يتجمع معاهم…
عزالدين
اكبري بقي يا روفان عشان هجوزك الواد الحلو ابني ده..
روفان
لا يا زيزو ده احلي مني جوزوني عبدالله وادي ده لروان..
ضحكو كلهم عز حضنها وقال
ما فيش احلي منك يا حبيبة عمك وهجوزك لابني برضو بس اكبري بسرعه..
علياء
والله يا جماعه القعده دي مش ناقصه غير لمياء..
عزالدين
لا والنبي خلينا قاعدين براحتنا دي اختي بتيجي تقعد علي الكلمه لكل واحد..
عبدالله
المهم يا خالي حسن اتفق مع مأذون بقي علي بكره؟..
حسن
ان شاء الله يا عبدالله واسبوع كده برضو وهنكون جيبنا الجهاز كله بتاع روان وتبدأ تفرش شقتها بقي..
عبدالله
تمام يا خالي، هستاذنك بس اخد روان نتمشي شويه بالعربيه ونتفق بقي هنعمل ايه بكره وكده..
رد عليه طارق وقال
لا طبعا ما ينفعش..
تجاهل حسن كلام. طارق وقال
ماشي يا عبدالله بس ما تتاخروش..
_سكتو كلهم وهما بيبصو لحسن وطارق اللي ادايق من تصرف باباه جدا، وخسن قال لعبدالله بجديه..
حسن
ايه يا عبدالله غيرت رأيك ولا ايه؟..
قام عبدالله وقال
لا طبعا يلا يا روان..
_قامت روان معاه ومشيو مع بعض، وطارق بص لباباه وقال بحده..
طارق
هو في ايه يا بابا ازاي تسيبهم يخرجو كده..
علياء
ما فيهاش حاجه يا طارق دول مخطوبين وبكره كتب كتابهم يا ابني..
حسن بحده
استني يا علياء انتي، وانت مالك يا استاذ طارق بتدخل في حياتنا ليه؟..
ليلي بقلق
في ايه يا حسن؟..
حسن بعصبيه
هو مش هيسافر ويسيب كل حاجه ومش هامه حد غير نفسه يبقي من دلوقتي مالوش دعوه بينا وكل واحد. حر في حياته..
طارق بحده
ما هو انا همشي عشان طريقتك دي علي اساس يعني لو قعدت انت هتدخلني في حاجه انا ديما في نظرك فاشل وهمشي من البلد كلها بسببك اصلاً….
حسن بغضب
ومستني ايه امشي من دلوقتي وريحني منك..
عزالدين بحده
في ايه يا حسن بلاش كلامك ده وانت يا طارق اهدي عيب تكلم ابوك كده..
طارق بحزن
معاك حق يا بابا هو انا مستني ايه، انا همشي ودلوقتي كمان..
_قال كلامه ودخل اوضته وليلي راحت وراه بسرعه هي ورضوي وريناد وروفان وروز قاعدين خايفين من خناقة ابوهم واخوهم..
ـــــــــــــــــــــ
_وفي كافي هادي وراقي جدا كان قااعد عبدالله مع روان هناك وهي باصه الناحيه التانيه وساكته وعبدالله قالها بهدوء..
عبدالله
هو انتي ما بتروحيش ليه الجامعه؟..
روان
ما فيش حاجه مهمه، وبعدين ما هو كده كده هروح علي الامتحانات بس بعد كده؟..
عبدالله
انتي متوقعه ايه لحياتنا سوا، شايفه انك هتكوني مبسوطه معايا ولا لا؟..
روان بسخريه
لسه ما جربتش بصراحه عشان اعرف..
عبدالله بجديه
واحنا مش هنتجوز نجرب هننفع ولا لا، انا لو اتجوزت مش هطلق ولا هاخدك تجربه وانتي كمان تحطي الكلام ده في دماغك…
روان
انا مش قصدي اني هاخدها تجربه، بس الموضوع جه بسرعه..
عبدالله
انا شايف ان كده افضل، يعني ناخد علي بعض واحنا متجوزين احسن…
روان
هو انت ليه ما اتجوزتش واحده من بلدكم ترضي بطبعكم وشروطك، ليه انا اللي اختارتني مع انك ممكن تلاقي صعوبه في الحياه معايا..
رد عليها بثبات وثقه وقال
هتحمل وهمشي معاكي علي مهلي عشان بحبك والكل شاف كده علي فكره انتي اللي كنتي مش واخده بالك بس..
_اتوترت روان جدا وقبل ما ترد عليه اتصدمت من امير اللي جه ووقف جنبيهم وبصلها بخبث وقال..
امير
والله وحشتيني اوووي يا رواان..
_اتحولت ملامح عبدالله للغضب وروان بصتله بخوف وحصل؟…
_تفتكرو هيحصل ايه؟.. 👀😁😁
ــــــــــ #بقلم_الكاتبه_رحاب_القاضي ــــــــ
_وقدام عماره راقيه شويه وقفت نادين بالعربيه بتاعتها واول ما نزلت وجات تطلع شقتها وقف يونس وراها وقال بجمود..
يونس
نادين..
بصتله بسرعه وقالت
انت بتعمل ايه هنا؟..
يونس
انتي اللي بتعملي ايه هنا، وايه اللي بيخليكي تقربي من مراتي..
ردت عليه بهدوء وقالت
بشتغل يا يونس ولا اقول يا اونكل يونس..
يونس بغيظ
مش هنتكلم هنا تعالي نطلع فوق..
بعدت عنه وقالت بحده
ما فيش كلام بينا ولا في مكان هيجمعني بيك لوحدي..
يونس بحده
براحتك بس تبعدي عني وعن مراتي وايااكي تعرفيها حاجه عن اللي كانت بينا..
ضحكت بسخريه وقالت
هههههه لا ما هي يا حرام. طلعت عارفه كل حاجه، ده انا حتي كنت لسه بحبك ومتعلقه بيك بس بعد اللي عرفته منها عنك كرهتك اووي يا يونس.
يونس بقلق
انتي بتخرفي تقولي ايه؟..
نادين
اسألها وهي تقولك تعرف ايه بعد اذنك..
_سابته وطلعت وهو وقف مصدوم من كلامها، وازاي شهد تعرف كل حاجه، وركب عربيته بسرعه اللي بيسوقها السواق وراح البيت وهو مقرر انه يواجه شهد..
_تفتكرو هيحصل ايه؟..
•تابع الفصل التالي "رواية موضوع عائلي" اضغط على اسم الرواية