رواية النصيب الفصل السادس عشر 16 - بقلم رحاب القاضي

    

رواية النصيب الفصل السادس عشر 16 - بقلم رحاب القاضي

   #النصيب

_الحلقه الـ16

ــــــــــــــــــــــــــــــــــــــــــــــــــــــــــــــــ

تُراه يدري بأن القلب مسكنه؟

ولستُ أبصر بالعينين إلاهُ

فالقلب يسأل عيني حين أذكرهُ

يا عين قولي متى بالله نلقاهُ؟

ـــــــــــــــــــــــــــــــــــــــــ

_صحيت شهد علي أذان الفجر وهي حاسه بألم كبير في جسمها بسبب انها كانت نايمه علي الجروح اللي في ضهرها، قعدت بهدوء وبصت لـ أسر اللي نايم جنبيها وفي سابع نومه….

_قامت من جنبيه خالص بهدوء وراحت قعدت علي الكرسي الصغير اللي جنب الشباااك بعد ما اخدت الكريم اللي جابته ليها رحمه، وفكت جزء من الفستان بتاعها ناحية ضهرها وحاولت تحط الكريم لنفسها بصعوبه ومكانتش عارفه، في الوقت ده فتح أسر عيونه بأنزعاج من حركتها في الاوضه واول ما شافها اتنهد بضيق فجروح جسمها صعبه جداً وقال بضيق..

أسر

انتي بتعملي ايه؟..

رفعت الفستان بسرعه وقالت بتوتر

مم مفيش حاجه بس كنت بحط الكريم عشان مش عارفه انام….

قام بهدوء وقال

مش هتعرفي تحطيه لنفسك انا هساعدك..

شهد بخجل شديد

لا لا خلاص خفيت، والصبح ابقي اخلي رحمه تساعدني..

قرب منها أسر وقال بهدوء

عشان تعرفي تناامي..

قامت شهد بسرعه وقالت بتوتر

بجد مش هينفع انا هتكسف لا يعني لا خلاص..

ابتسم بهدوء ورد عليها

هتتكسفي من ايه اعتبريني دكتور وبعدين ده انتي جسمك كله جروح ايه اللي هبصله يخليكي تتكسفي..

شهد بأحراج

خلاص سيبني براحتي واتفضل ناام..

أسر

نفسي تسمعي الكلام من اول مره وتفهمي اني لما بقول اني هعمل حاجه هعملها حتي لو فضلتي تتناقشي معايا للصبح..

شهد بتوتر

لا لا مش عايزه اخف انا مرتاحه كده..

_مسك ايدها وخلاها قعدت علي السرير غصب عنها وقرب منها وقال بعند وحده..

أسر

فكي الفستان…

شهد بخوف وتوتر

لا وابعد عني…

أسر بغيظ

انتي غبيه انا بعمل كده عشان ما تتعبيش..

رجعت شهد لورا بعيد عنه وقالت

لا شكرا لمساعدتك انا مرتاحه كده..

أسر بخبث

خلاص افكه انا…

مسكت شهد ايده وقالت بسرعه

لا علي فكره كده عيب ابعد عني..

قبل ما يرد عليها قالت مرات عمها من بره

وطي صوتك يا اختي انتي وهو البيت فيه نااس انتو مش لوحدكم اختشو شويه..

قلب وش شهد احمر وأسر ضحك بهدوء وقال

عجبك كده اهو اتشبهنا علي الفاضي، اتلمي بقي بدل ما اخلي الموضوع بجد…

_وقعد جنبيها علي السرير وبكل هدوء فك الفستان بتاعها واول ما شاف الجروح اللي في ضهرها ادايق وقال..

أسر

ده ابن عمك ده حيوان حد يعمل كده..

شهد بتوتر

اخلص طيب..

ابتسم بتسليه وقال

بالراحه عليا و هاتي الكريم..

_اديته علبة الكريم وبدأ هو يحطه علي جروحه بهدوء، فحين كتمت هي المها، واول ما خلص أسر قفلها الفستان تاني وقرب منها اووي وقال بهدوء..

أسر

خلصت اهو ما نقصتش منك حته..

بعدت عنه شهد وقالت بكسوف

شكراً..

أسر بخبث

لا علي ايه ده الواجب يا مدام شهد..

بصتله بضيق وهو تابع كلامه وقال

بس طلعتي حلوه مع اني كنت فاكرك فلاات..

برقت بكسوف شديد وقالت بغيظ

انت قليل الادب علي فكره..

أسر ضحك بصوت عالي وقال

ههههههههه مش بقول الحقيقه..

قلدت ضحكته بسخريه وقالت

هههههههه ديك رومي بيضحك، اتنيل نام يلاا..

أسر بسخريه

نفسيي تتعاملي مع الناس كلها زي ما بتعامليني كده، بس ازاي بتبقي مع الكل قطه مغمضه ومعايا انا اسد..

وقام وقف وقال

علي العموم حصل خير، هننام بقي ولا ايه؟..

راحت قعدت علي الكرسي تاني وقالت

ما تنام هو انا مسكاك انا مش جايلي نوم خلاص…

أسر

براحتك تصبحي علي خير…

شهد

هو احنا هنمشي من هنا امتي؟..

أسر

لما اصحي..

ــــــــــ #بقلم_الكاتبه_رحاب_القاضي ــــــــ

_بعد شويه في شقة محمد اخو سعيد، كان الباب بيخبط وراحت نعمه فتحت الباب ولقيت ام محمد قدامها..

نعمه

صباح الخير يا حماتي خير علي الصبح؟..

دخلت ام محمد وقالت

خير يا اختي ان شاء الله، المحروس جوزك فين؟..

نعمه

نايم انتي عارفه ما بيصحااش دلوقتي، قدامه يجي ساعه كده اكون جهزتله الفطار متخليكي افطري معانا..

ام محمد

لا معلش ادخلي صحيه قوليلو امك عايزاك.، ولا اقولك انا هحكيلك اللي حصل وانتي وصليه الكلمتين اللي انا عايزه اقولهم بمعرفتك..

نعمه بقلق

في ايه يا ام محمد، قلقتيني؟…

ام محمد بخبث

قوليلي يا بت يا نعمه مال جوزك بالبت حنان اللي ساكنه قدام الورشه بتاعته؟..

نعمه بغيظ

ايه الكلام ده يعني ايه ماله بيها، هو عمل ايه بالظبط؟..

ام محمد

يا اختي بتقول انه في الرايحه والجايه عمال يرمي عليها كلام وجات وقالتلي اخليه يتلم عنها والا هتقول لابوها وتبقي حكايه…

نعمه بغيظ

البت دي كدااابه محمد ما يعملش كده، ما بقاش غير حنان اللي ترمي بلاها علينا..

ام محمد

وايه اللي هيخلي بنت تقول حاجه زي دي، دي سمعه والبت خايفه علي نفسها فجات وقالتلي بيني وبينها ومش عايزه حد. يمسك سيرتها بحاجه وحشه لو شافه بيكلمها، علي العموم انا عملت اللي عليا هو بقي لو ملمش نفسه البت هتقول لابوها، وقتها سمعتنا كلنا هتبقي زي الطين..

سكتت نعمه وبانت عليها العصبيه وقامت ام محمد وقالت

يلا بقي صباحك زي الفل يا مرات ابني وابقي ابعتي العيال يقعدو عندي تحت شويه بلاش يشفوكي وانتي بتتخانقي مع ابوهم.

نعمه بغيظ

ومين قالك اني هتخانق يا حماتي، رينا ما يجيب خنااق ابدا نورتيني مع السلامه..

مشيت ام محمد وقال احمد ابنها اللي عنده 8 سنين

ماما هي تيته جايه عندنا ليه؟..

نعمه بدموع

جايه تنكد عليا منها لله دنيا واخره، وانت ايه اللي مصحيك ادخل ناام..

احمد

مش عايز اناام انا نازل العب تحت..

نعمه بحده

ما بتزهقش من الشارع، ادخل جوه اتخمد يلاا..

_خاف منها الولد ودخل اوضته بسرعه وراحت هي اوضتها وقربت من محمد اللي كان في سابع نومه ومسكت المخده وخبطتها في وشه وقالت بعصبيه..

نعمه

انت لسه نااايم اتنيل قوم..

قام محمد بفزع وقال

في ايه يا بت المجنونه، حد يصحي حد. كده؟..

نعمه بحده

هو انت لسه شوفت جنان، هو انا قصرت معاك في ايه عشان تروح تبص لحنان اللي ما تسواش في سوق النسوان بصله رد عليا..

محمد بعدم فهم

حنان مين وبصل ايه علي الصبح في ايه يا وليه؟..

نعمه بدموع

روح اسأل امك اللي جايه تشمت فيا بسبب عمايلك، بس انا استاهل اكتر من كده لو قعدتلك فيها دقيقه واحده..

محمد

امي؟! قالتلك ايه عملي الاسود في الدنيا دي، وبعدين انتي بتصدقي امي يا بت ما انتي عارفه اللي فيها..

نعمه ببكاء

لا ما هي اللي قالته ده ما فيهوش افتري عليك، دي البت بنفسها راحت اشتكتلها…

محمد

بت مين وتشتكيلها من ايه؟..

نعمه

حنان بنت بيومي اللي ساكنه قدام الورشه بتاعتك، الورشه اللي ابويا مشارك معاك فيها واخرتها تروح وتبص لوحده غيري..

محمد بحده

طيب اصطبحي يا نعمه وروحي جهزيلي الفطار وسيبك من كلام امي خالص.

نعمه بدموع

لا مش هسيبني كله الا كده يا محمد وهمشي يعني همشي واللي يحصل يحصل بقي وروح اشبع بحنان بتاعتك واقولك حاجه كمان انا هسيبلك عيالك هاتها تربيهم بقي..

محمد بنفاذ صبر

ما تخربيش علي نفسك يا نعمه وتعملي زي ما امي عايزه، وحنان مين دي اللي ابصلها ما تعقلي كده..

نعمه بعصبيه

انا ست العاقلين هو انت كنت تحلم تتجوزني اصلا، بس انا اللي غلطانه كنت وافقت بأبن خالتي اللي كان يتمنالي الرضا ارضي..

محمد بغضب

ولما اقوم اديكي بالجزمه دلوقتي عشان تخرسي هتبقي مبسوطه….

نعمه ببكاء

بقولك ايه انا مش هقعد هنا بعد اللي سمعته ده..

محمد بحده

ولو رجلك عتبت بره البيت هكسرهالك يا نعمه وغوري جهزي الفطار عشان اروح اشوف اللي ورايا..

قعدت نعمه اللي قدامه وقالت بغيظ

مش قايمه يا محمد ومش مجهزه حاجه، روح لحنان تفطرك…

_ما ردش عليها محمد وراح جهز فطار لنفسه وبعدين غير هدومه وسابها ونزل وراح لامه اللي كانت قاعده بتفطر ومشغله التلفزيون وبتضحك وهي مبسوطه جدا..

محمد بغيظ

الفيلم حزين يا اما بتضحكي علي ايه، اه صح نسيت انتي بتموتي في الشر..

ام محمد بشماته

نكدت عليك بنت ناديه مش كده..

محمد

البركه فيكي، انا عايز افهم انتي ليه بتعملي كده، ليه صعب عليكي تشوفيني انا وسعيد مرتاحين…

ام محمد

تبقو مرتاحين وانتو بعيد عني لا، تبقي تحت طوع مراتك وانا لا تبقي مش ابني والغلطه اللي عملتها معاك لما سيبتك تتجوز اللي علي مزاجك مش هكررها مع اخوك..

محمد

هو انا قصرت معاكي في ايه، ده انا بجيبلك اللي تحتاجيه قبل ما اجيب لعيالي، باجي كل يوم بسأل عليكي وسعيد بيعمل اكتر مني،مخلي واحده تجيلك كل اسبوع تروقلك وتطبخلك عشان ما تتعبيش في ايه بقي؟..

ام محمد بخبث

طيب مش عايزه البت اللي تيجي تروق دي وخلي مراتك تنزل تروقلي الشقه وتسمع كلامي في اي حاجه بقولها وما ترجعش تدافع عنها وتقف معاها ضدي..

محمد بغيظ

يعني هو انتي لازم تزليها وتكسري عينها قدامك عشان تبقي مرضيه، طيب اسمعي يا اما اللي عملتيه النهارده وانك عايزه توقعي بيني وبين مراتي لو اتكرر تاني ورحمة ابويا لاخد مراتي وعيالي والواد سعيد ونجيب شقتين بعيد عنك ونرتاح بقي.

ام محمد بحده

ما تغور انت في داهيه واخد اخوك معاك ليه؟..

محمد بخبث

مانا مش هسيبهولك تعقديه يا ام محمد، صباااحك زي الفل وافتكري كلامي كويس..

مشي محمد وهي سابت الاكل وقالت بغيظ

غور يا داهيه تحرقك، وبرضو مش هسيب بنات ناديه ياخدو عيالي مني..

ــــــــــ #بقلم_الكاتبه_رحاب_القاضي ــــــــ

_وبعد شويه في عربية أسر كان سايق العربيه وطالع من بلد اهل شهد وجنبيه اكرم وقاعده من ورا شهد وجنبيها رحمه..

رحمه

هو انتي مالك زعلانه اووي كده ليه؟..

شهد بحزن

عشان ملك واخواتي، انا مش عايزاهم يقعدو هنا..

بصلها اكرم لورا وقال

ما تقلقيش يا شهد ابوكي قال انه هياخدهم ويرجع تاني القاهره..

شهد

انت بتتكلم جد؟..

اكرم

ايوه والله حتي اسألي أسر بيه…

شهد بصتله وقالت

هو بابا قال كده بجد؟..

أسر بهدوء

ايوه وكمان طلب انك تروحي تزوريهم كل فتره..

شهد بحماس

ده اكيد طبعا، انا مش مصدقه اصلا ان كل حاجه اتحلت او يعتبر اتحلت..

بصلها أسر بجمود واكرم قال بهدوء

انتي تستاهلي كل خير يا شهد، ورحمه قالتلي انك كمان هتكملي دراستك دي جاجه كويسه اووي، وانا معاكي في اي وقت ورحمه كمان مش هنسيبك..

ابتسمت شهد وردت عليه

شكرا يا اكرم…

رحمه

بقولك ايه يا أسر نزلني انا اول ما نوصل القاهره وانا هروح البيت بأي مواصله..

شهد

لا هو هيوصلك انتي واكرم عادي..

رحمه

لا لا عشان الجيران بس وكده ما يقولوش بايته بره البيت وكمان راجعه بعربيه فيها شحطين..

أسر وقف العربيه وقال بغيظ

انزلي من دلوقتي ومش عايز اشوفك تاني ممكن..

رحمه بحده

ما شالله عن اهلك ما شوفتني، هو انا ايه اللي جابرني عليك غير صحبتي اصلا يالااا..

أسر بعصبيه

انتي ازاي تكلميني كده يا بت انتي؟..

رحمه بحده

اومال اكلمك ازاي بصوابع رجليا عشان ترضي..

شهد بقلق

خلاص يا رحمه ومعلش يا أسر مش هينفع تنزل هنا.

رحمه

لا بقي انا نازله هنا، وبعد كده لما ابقي جايه اشوفك ما تخلنيش اشوف خلقته اللي تقطع الخميره من البيت دي..

أسر بغيظ

احسن علي فكره وهخليها تقطع علاقتها بيكي وهتشوفي يا شرشوحه..

رحمه بحده

تقطع علاقتها بمين ده انا اقطع راسك دي والعب بيها كوره لو فكرت تبعد صحبتي عني يالاااا…

اكرم

خلاص يا جماعه يلا يا رحمه انا هنزل معاكي..

شهد بضيق

ما تزعليش يا رحمه…

رحمه

وانا ايه اللي يزعلني هو حد بياخد علي الاشكال دي..

أسر بنفاذ صبر

استغفر الله العظيم ياااارب..

_نزلت رحمه ومعاها اكرم اللي وقفلهم تاكسي ومشيو وأسر بص لشهد بحده وقال..

أسر

اتفضلي جنبي هنا..

شهد

انا مرتاحه هنا..

أسر

وانا مش السواق بتاعك، تعالي جنبي يا شهد ولاخر مره بقولك تسمعي الكلام من اول مره اقوله بلاش عند وخلاص معايا..

_نزلت شهد من العربيه وركبت جنبيه، وهو ساق العربيه بسرعه وبصلها بغيظ وقال..

أسر

بتشكري اكرم يعني، لا والواد مستعد يعمل اي حاجه عشانك..

شهد بقلق من سواقته بسرعه

قصدك ايه؟..

أسر بسخريه

علي فكره انا اللي جيبته هو وصحبتك معايا عشان يبان ان معايا اهلي وكده وانا جاي اخدك انما اللي خلصك من المشكله دي انا مش هما..

شهد بحده

طيب شكراً ما هو برضو انت ما بتعملش كده ببلاش،انما هما مالهمش مصلحه انهم يساعدوني…

أسر بجمود

شهد بلاش الطريقه دي معايا ، وبعد كده الواد اللي اسمه اكرم ده ما تقبليهوش ولا تتكلمي معاه..

شهد بسخريه

هو انا هتصدق انك جوزي بجد ولا ايه؟..

أسر ببرود

لا هو انا جوزك بجد وطول ما انتي مراتي كلامي يتسمع وبس…

_سكتت وما ردتش عليه وهو كمل في طريقه لحد ما وصلو بيت الفيومي وكانت هاله مستنيااهم، واول ما شافتهم قامت بسرعه وقالت..

هاله

واخيرا ده انا فكرتكم مش هترجعو خلاص..

أسر

عيب عليكي ما ابقاش أسر الفيومي لو سيبت حد. ياخدها مني..

هاله بسخريه

يا راجل قول كده قدام حد تاني، بس علي فكره فؤاد ولا أثر فيه بأي حاجه الجو اللي انت عملته ده..

شهد

يعني جه وانقذني علي الفاضي…

بصلها أسر بجمود وقال

انا مش بعمل حاجه علي الفاضي، حتي لو مش هستافد حاجه بعرف اطلع كسبان..

هاله بهدوء

طيب انا رتبتلك هدومك وحاجتك في اوضة أسر يا شهد وغيرت كام حاجه كده في الديكور عشان تباان انها اوضة عريس وعروسه..

أسر بضيق

ما كانش ليه لزوم…

هاله بخبث

لا طبعا لفؤاد يشك فيكم..

اتنهد أسر بضيق وطلع فوق وقال

تعالي يا شهد ورايا عايزك..

هاله

لا شهد هتقعد معايا شويه عشان بعد كده هاخدها معايا الندوات بتاعتي اعرف الناس علي مرات اخويا فعايزه اعلمها كام حاجه كده..

_ما ردش عليها أسر وطلع فوق وهاله قالت لشهد بقلق…

هاله

هو في ايه مالكم وايه اللي حصل مع اهلك..

شهد

هو حل كل حاجه، ما كنتش احلم ان الوضع بيني وبين اهلي يتصلح بالشكل ده والفضل لأسر بعد ربنا بس انا مش فاهمه اخوكي بجد سعات بحس ان لو الدنيا كلها ضدي هو هيكون معايا وسعات احس انه اوحش واحد في الدنيا واكتر حد هيأذيني في اللي جاي..

هاله

لا لا علي فكره ده كان هيتجنن عليكي لما عرف انك اتخطفتي، تعالي بس احكيلي الاول حصل ايه بالتفصيل..

ــــــــــ #بقلم_الكاتبه_رحاب_القاضي ــــــــ

_وتحت بيت رحمه وقف التاكسي اللي كانت فيه هي واكرم وقالها اكرم بهدوء..

اكرم

مستنيه ايه ما تنزلي..

رحمه

بحاول اتأكد في حد شايفني وانا نازله من التاكسي

اكرم

يا عمه انزلي انا عايز اروح لصاحب الشغل اللي زمانه رفدني..

رحمه بسخريه

الواد محسسني انه شغال في البرلمان، ياد ده انت شغال طيار بيتزا..

اكرم بغيظ.

كفايه انه شغل حلال اتنيلي ازلي وابقي طمنيني عليكي..

.

رحمه بجمود

بص يا اكرم انا مش هكلمك تاني مشكلة شهد اتحلت واظن اصلا ما بقاش ليه لازمه نتكلم وانا بشكرك جدا علي مساعدتك ليا بس كلامك معايا غلط..

اكرم بحزن

فهمتك علي العموم فرصه سعيده..

بصتله رحمه بحزن وقالت

انا اسعد وشكرا مره تانيه وهفضل طول عمري مُم مُمتننه ليك علي اللي عملته..

ابتسم اكرم غصب عنه وقال

اسمها مُمتنه، وده الواجب انا كمان بشكرك انك ريحتيني من تأنيب الضمير اللي كان جوايا بعد ما رفضت اساعد شهد في الاول..

رحمه

اديك صلحت كل حاجه وكنت بالنسبه ليها زي اخ قدام اهل جوزها..

اكرم

وتحت امرك انتي او هي في اي وقت يا رحمه..

رحمه بهدوء

مع السلامه..

_نزلت من التاكسي وهو بصلهة بدموع وهي ماشيه بس قبل ما تدخل البيت رجعت بسرعه عنده ووقفت جنب الشباك وقالت بقلق….

رحمه

اكرم معاك اجرة التاكسي اصله هياخد كتير ده جابنا من مكان بعيد…

اكريم بغيظ

ايوه معايا….

قربت منه اكتر وقالت

طيب خلي بالك بقي احسن يضحك عليك برضو تحب افاصلك معاه هنا الاول..

شال ايدها من علي الشباك وقال بنفاذ صبر

انا مش عايز اشوف وشك تاني يا رحمه، ابقي حمار لو فكرت بس اجي اشوفك.. اطلع يا اسطا…

مشي السواق ورحمه بصتله بحزن وقالت

فهمني غلط انا كنت خايفه السواق يضحك عليه، غبي حتي ما فهمش اني بقوله يبعد عشان يتلحلح وينطق بس هو شكله حب من طرف واحد انا بووومه عارفه حظي..

طلعت امها في البلكونه ولما شافتها قالت بحده

انتي جيتي يا مقصوفة الرقبه اطلعيلي ده انتي يوم اهلك مش معدي النهارده..

رحمه بغيظ

هششش صوتك يا ست الحبايب، سمعتي واقفه علي حافة الهاويه مش ناقصه…

عفاف

اطلعيلي..

رحمه

والله طالعه يعني هبات هنا اصبري عليا..

ــــــــــ #بقلم_الكاتبه_رحاب_القاضي ــــــــ

_وبالليل في بيت الفيومي رجع فؤاد من شغله ولقي شهد قااعده مع تياام علي الارض ومعاهم حاجات كتير تخص الرسم ومركزين فيها بأهتمام كبير..

فؤاد

ازيك يا شهد عامله ايه؟..

بصتله شهد وقالت بأبتسامه بسيطه

تمام الحمد لله، هاله عندها حاجه مهمه في النادي وقالت مش هتتأخر..

فؤاد

ايوه ما هي قالتلي..

تيام بأنزعاج

سيبك منه يا شهد وخليكي معايا عشان نخلص الرسمه..

فؤاد

اممم سيبك منه انت قعدت مع خالك النهارده مش كده؟..

تيام

ايوه وخلاني عملت تيك توك وقالي ما اقولش لماما..

فؤاد بغيظ

والله ما حد هيخربك غيره، هتعبك يا شهد بس تصحيلي أسر..

شهد

حاضر هطلع اصحيه..

جات تالا في الوقت ده اللي كانت واقفه تتجسس عليهم وقالت

خليكي يا شهد هنا مع تيام وانا هروح اصحي أسر بيه..

شهد بهدوء

ماشي..

فؤاد بجمود

وانتي تصحيه بصفتك ايه يا تالا..

وبص لشهد وقال بنبره آمره

ما تقومي تصحي جوزك يا بنتي انتي كمان..

شهد بتوتر

حاضر..

وقالت لتياام

معلش يا تيام دقيقه وهجيلك تاني..

تيام

طيب هستناكي في اوضتي عشان نبقي براحتنا يا شوشو..

شهد

ماشي يا حبيبي…

_وطلعت هي وتياام فوق وبصت تالا بغيظ لفؤاد وجات تمشي بس هو وقفها لما قال بحده..

فؤاد

تالاا استني عندك…

وقفت تالا وقالت

نعم يا فؤاد بيه حضرتك تؤمر بحاجه؟..

فؤاد بجمود

ايوه مرات أسر بيه يتقالها يا هانم زي ما بتكلمي هاله كده، ومش عايز مشاكل بين أسر ومراته بسببك عشان ما ازعلش منك، واول واخر مره تقفي وتسمعي حوار بين اي حد هنا وتقعدي في المطبخ ولما هنحتاجلك هنندهلك..

تالا بغيظ مكتوم

حاضر يا فؤاد بيه تحت امرك..

فؤاد

اتفضلي علي المطبخ..

_راحت تالا المطبخ وهي متعصبه جداً، وفوق في اوضة أسر دخلت شهد لاول مره هناك، وكانت طول الوقت بتتهرب انها تيجي هنا بسبب توترها وقلقها من أسر وتعامله معاها لما يبقو لوحدهم في بيته وبالاخص في اوضته..

_بصت للاوضه بأعجاب فبرغم كل المشاكل اللي في البيت معاه الا ان اجمل اوضه في البيت كله هي اوضة أسر..

شهد بسخريه

قال اوضه قال دي اكبر من بيتنا..

_وكانت الاوضه كبيره فعلا وفيها صاله صغيره فيها تلفزيون كبير واجهزه رياضيه وكنبه كبيره وكرسي جنبيها من نفس اللون، وقدامها اوضة النوم نفسها اللي فيها سرير كبير وكلها فيها صور لأسر ولاهله حتي فؤاد ليه صور في اوضة أسر وصوره تانيه كبيره لأسر مع بنت وولد اول مره تشوفهم..

_قربت شهد من أسر اللي كان نايم بس بسرعه وقفت مكانها لما لقيته نايم من غير التيشرت بتاعه، اتوترت جدا وبصت للارض وقالت بأحراج..

شهد

أسر… أســــــــــر…

فتح عيونه بنوم وقال

ايه؟..

شهد من غير ما تبصله

فؤاد عايزك تحت….

أسر بضيق

قوليلو نااايم..

شهد بتوتر

ما هو قالي اصحيك عشان عايزك..

كان لسه هعترض بس لما شافها باصه للارض قال

انتي في حاجه ضايعه منك في الارض؟..

شهد بغيظ

بص لنفسك وانت تعرف..

ابتسم أسر بخبث وقال

لا اتعودي دي اوضتي وانا حر فيها..

شهد بحده

ده قبل ما ابقي قاعده معاك فيها..

أسر بهدوء

اوكي يا شهد هبقي اخد بالي من وجودك بعد كده، شايفه التليفون اللي هناك ده؟..

بصت شهد وراها علي التليفون اللي علي الترابيزه وقالت

ايوه ماله؟.

أسر

امسكي السماعه ودوسي علي الزرار الاحمر اللي فيه هترد عليكي تالا قوليلها تعملي قهوه مظبوط وتجيبهالي..

شهد

انا هنزل اقولها..

أسر قعد وقال

لا خليكي ما تنزليش تاني النهارده..

_شهد بصتله بتلقائيه وبسرعه بصت للارض ووشها قلب احمر بكسوف وقالت بتوتر..

شهد

يعني اقعد اعمل ايه هنا يعني؟..

ابتسم أسر علي كسوفها وقال بهدوء

احنا المفروض عرسان جداد يعني المفروض انك تبقي قااعده هنا معايا مش تحت مع تياام..

راحت شهد ومسكت سماعة التلفون وقالت

اعملي قهوه مظبوط لـ أسر بيه يا تالا وهاتيهاله هنا..

تالا بحده

طيب..

_وقفلت معاها تالا وشهد من غير ما تقوله حاجه راحت قعدت علي الكنبه اللي في الصاله الصغيره اللي في الاوضه، ومسكت موبيلها اللي اديتهولها هاله لما رجعت وفضلت تقلب فيه لحد ما جات تالا بالقهوه اللي بصتلها بقرف ودخلت عند أسر..

شهد بغيظ

قليلة ذووق دي حتي ما خبطتش علي الباب..

_وفضلت شهد قااعده زي ما هي، وجات تالا وقفت وراها وبصتلها بخبث وراحت فكت اول كام زرار في بلوزتها وطلعت قدام شهد وعملت نفسها بتقفل فيها وبصتلها من فوق لتحت وقالت بسخريه….

تالا

حتي لو عملتي ايه مش هتقدري تملي عينه او تخليه يبعد عني..

فهمت شهد قصدها وردت عليها ببرود وقالت

هو مين ده انتي قصدك ايه؟..

تالا بغيظ قربت منها وقالت بحقد

أسر انا كنت هنا قبلك الاوضه دي شافت ليالي كتير بيني وبينه، ولولا انك ظهرتي في حياته كان زماني مكانك…

شهد بعصبيه

ما هو ما ينفعش يشوفني ويرجع يختار بنت زيك كانت معاه كتير..

اتعصبت تالا وقبل ما ترد قال أسر من جوه

شهد خدي عايزك..

بصت شهد بحده لتالا وقالت بحده

اطلعي بره وما تدخليش الاوضه دي تاني طول ما انا في البيت ده….

ضحكت تالا بسخريه وقالت

أسر بيه ما يستغناااش عني، ولو فكرتي تبعديني عنه انتي اللي هتخسري..

_قالت كلامها وسابتها وخرجت بره الاوضه، اتنهدت شهد بضيق وقالت لنفسها بسخريه..

شهد

معاها حق واللهما انتي سيباله كل حاجه مباحه،بنت قليلة ادب…

طلع أسر وهو ماسك هدومه وقالها

مش بندهلك انا..

بصت شهد للناحيه التانيه بأحراج وقالت

نعم عايز ايه؟..

أسر

بصيلي الاول وقوليلي البس ده ولا ده؟..

شهد بغيظ

وانا مالي انا تلبس ايه..

أسر بخبث

عشان تحت نقولهم انتي اللي بتختاري لبسي…

شهد بغيظ

اختار اي حاجه وهبقي اقولهم ان انا اللي اختارتها..

أسر قرب منها وقال

لا عشان المصدقيه..

مسكت المخده اللي جنبيها وضربته بيها وقالت بحده

جاتك ستين نيله انت والمصدقيه بتاعتك، قال وانت صادق اووي يعني..

تصنع الخوف منها وقال وهو بيضحك

خلاص والله بهزر معاكي اصلا…

_وبعد شويه نزل تحت وكانت هاله قااعده مع فؤاد وبيتكلمو بصوت واطي وهما بيضحكو..

أسر بخبث

طيب اطلع تاني يعني ولا ايه؟..

هاله بسخريه

ايه ده يا عريس عاش من شااافك…

فؤاد

كفايه دلع بقي وتعالي ورايا علي المكتب عشان نشوف شغلنا..

هاله

وانا هخلي داده صباح تجهزلنا العشا…

أسر

هتعشي فوق انا وشهد…

هاله بسخريه

تصدق نسيت انكم لسه عرسان، خلاص هخلي تالا تطلعلكم الاكل فوق..

فؤاد

تعالي يا أسر يلااا..

وراح فؤاد مكتبه وأسر سأل هاله

هو جوزك عايزني في ايه معقوله يكون هيرجعلي ورثي؟..

هاله بسخريه

ليه هو فؤاد مغفل للدرجه دي، روح بس ده انت اياامك اللي جايه ما يعلم بيها الا ربنا..

_بصلها بغيظ وراح المكتب عند فؤاد اللي بدأ يتكلم معاه في الشغل..

ــــــــــ #بقلم_الكاتبه_رحاب_القاضي ــــــــ

_وعلي القهوه في الحاره اللي ساكن فيها سعيد ومحمد اخوه وكانو قاعدين هناك علي القهوه…

محمد

في ايه يا سعيد امك مزعلاك في حاجه؟..

سعيد بضيق

انا مش عايز نسمه..

محمد ساب كوباية الشاي علي الترابيزه وقاله بحده

نعممم يا روح امك انت بتقول ايه يالا…

سعيد

وطي صوتك الناس بتتفرج علينا، وبعدين انا زهقت وخلاص مش عارف اتحمل..

محمد بغيظ

يا نوغه مش عارف تتحمل ايه، هو ايه اللي حصل اومال لما يبقي عندك عيل واتنين، طيب سيبك من ده يا ابني ده انت فاضل علي فرحك ايااام وجاي تقولي مش عايز نسمه انت غبي..

سعيد بحزن

البت مش طيقاااني، مش مبسوطه انها هتتجوزني هكرر اللي حصل في شهد تاني في نسمه..

محمد بسخريه

هو انت لو كنت عاملت بت صابر بما يرضي الله كان زمانها طفشت منك، وبعدين نسمه مش طيقااك شوف ايه اللي مزعلها وبطل تعمله..

سعيد بغيظ

بقولك مش طيقااني البت شكلها مغصوبه عليا اتجوزها ازاي..

محمد

لو مغصوبه عليك تقول، لان ما ينفعش انت تقول سمعتك هتبوظ اكتر ما هي بايظه، بص اياً كانت الست رافضه بتيجي بالحنيه والهداوه ويمكن بعد الجواز الموضوع يتغير اكيد هيتغير لما تبقي مراتك مش زي وهي خطيبتك..

سعيد

انا بفكر اقول لابوها علي اللي بتعمله ده وتدهو بقي يشول حل وانا ما ابقاش غلطان..

محمد

بس لو قولت لابوها هتبقي غلطان، انت تعرف انا ونعمه بنتخانق واوقات بقعد بالاسبوع مش بكلمها بس حد. بره بيتي يعرف حاجه زي دي لا طبعا ولو حتي اهلها عرفو بعرف اخليها المره اللي بعدها ما تقولش، اتعلم تحل اللي بينك وبينها لوحدكم اتعودو ان اللي بينكم ما يطلعش بره عنكم..

سعيد

طيب وامك..

محمد بنفاذ صبر

لا انا تعبت منك ومن امك، اعقل يا سعيد وخد امك علي قد عقلها وارضي خطيبتك وبلاش حركات العيال دي، بقولك كلم حمااك واستأذن منه انك تاخد خطيبتك وتخرجو مع بعض وحاول تلطف الدنيا..

سعيد اتنهد بضيق وقال

حاااضر يا محمد..

_سابه محمد ومشي وهو متعصب جدا من تصرفااته، واول ما وصل البيت دخل شقة امه لقاها كالعاده قااعده بتتفرج علي التلفزيون….

محمد

عايزه حاجه يا اما انا طالع اناام..

ام محمد بجمود

سيبلي فلوس رجلي منمله عليا عايزه اروح اكشف..

محمد

منمله من القعده يا اما اتحركي شويه ده انا بدأت اشك انك لسقتي في الكنبه..

ام محمد بغيظ

انت هتسيبلي الفلوس ولا لا؟..

طلع محمد فلوس من محفظته وحطها علي الترابيزه وقال

اتفضلي يا اما كفايه دول ولا عايزه تاني..

ام محمد ببرود

خد الباب في ايدك وانت طالع..

_بصلها محمد بحزن علي معاملتها ليه من طفولته وهي ديما بتتعامل معاه بالجفا ده، علي عكس معاملتها لسعيد اللي كانت بتخاف عليه من الهوا الطاير وديما بتميزه عنه، سابها وطلع شقته واول ما دخل اوضته مالقاااش نعمه، فراح لاوضة ولاده ولقاها نايمه هنااك..

محمد بغيظ

نعمه.. انتي يا بت…

ردت عليه بحده وقالت

عايز ايه؟..

محمد

تعالي جهزيلي العشا…

نعمه بحده

جهز لنفسك. انا نايمه..

محمد بغيظ.

اومال امك اللي بترد عليا دي، اتنيلي قومي يا نعمه العيال نايمين ومش عايز اعلي صوتي.

ردت عليه بعصبيه وقالت

مش قايمه يا محمد وعدي الليله دي علي خير والا والله هسيبلك البيت بالعيال واروح لابويا…

محمد بغضب

ماشي يا نعمه خليكي مصدقه كلام امي، بس ما تزعليش بقي لما اخليه يبقي حقيقي بدل ما انا بتعامل كده علي حاجه ما عملتهاش نخليها بجد بقي..

_قال كلامه وسابها وطلع ودخل المطبخ وكان لسه هيطلع الاكل لقي نعمه جات وقالتله وهي مدايقه جدا..

نعمه

اوعي انا هجهزلك..

ابتسم بهدوء وقال

طيب وكان علينا ايه من الاول، جهزيلنا احنا الاتنين هنتعشي سوا..

نعمه بدموع

ايه اللي بينك وبين البت اللي اسمها حنان دي يا محمد؟..

محمد

والله العظيم ما اعرفها غير شكلاً كده لان بيتهم قدام الورشه وما كنتش بركز اسمها ايه غير لما انتو قولتو عليه انتي وامي..

نعمه بضيق

ماااشي يا محمد روح غير هدومك لحد ما تجيبلك الاكل..

باس راسها بهدوء وقال

وحياة عيالي عمري ما هبص لوحده غيرك فاتهدي شويه، مخبطه من كل ناحيه معايا ومش ناقص نكد..

ردت عليه بهدوء وقالت

مااشي مش هنكد عليك، بس والله لو طلع كلام. امك. صح ما هقعد علي زمتك دقيقه واحده..

_ماردش عليها وطلت من المطبخ، وهي وقفت تجهز الاكل وكلام ام محمد لسه بيلعب في دماغها..

ــــــــــ #بقلم_الكاتبه_رحاب_القاضي ــــــــ

_وفي بيت الفيومي في مكتب فؤاد كان أسر قااعد متعصب وقال لفؤاد بحده..

أسر

انت بتهزر صح، صفقه زي دي ازاي انا امسكها لوحدي؟..

فؤاد

اومال انت عايز تاخد ورثك ازاي، مش لازم تتعلم الشغل وتفهم السوق عشان تعرف تحافظ علي فلوسك وفلوس اختك، وبعدين انت اشتغلت سنه مع ابوك وكنت بتخلص معاه حاجات زي دي وكمان انت متعلم في أكبر جامعه بره مصر يعني الموضوع مش هيبقي صعب عليك..

أسر

طيب لو فشلت فيها او ما عرفتش اظبط. مع العملا؟..

فؤاد ببرود

يبقي انسي انك تدخل الشركه تاني، احنا مش هنجرب انت كل صفقه هتاخدها لو فشلت في واحده فيها انسي انك. تاخد مني قرش واحد…

أسر بغيظ

بس انا وارد اغلط وما انجحش في كل حاجه..

فؤاد

الصفقات دي ساهله وكلها انا متأكد من مكسبها عايزه بس مدير شاطر ولما تغلب ابقي قولي وانا هساعدك..

أسر بضيق

طيب انا لسه عريس جديد والصفقه دي هتطلب مني اسافر اسبوع شرم وشهد مش هتكون مرتاحه هناك لوحدها لما ابقي انا مشغول وسايبها..

فؤاد بخبث

لا يا حبيبي انت رايح تخلص شغل وراجع شهد هتفضل معانا هنا في البيت ولما ترجع ابقي خدلك يوم اجازه..

أسر بغيظ

مااشي يا فؤاد اي اوامر تانيه..

ابتسم فؤاد بهدوء وقاله

لا ابو نسب بالتوفيق..

_وطلع أسر من عنده ولقي هاله وتيام ابنها قاعدين بيتعشو وقالتله بهدوء..

هاله

العشا بتاعك انت وشهد طلعته داده صباح فوق، فؤاد فين؟..

أسر بخبث

بيكلم واحده جوه اسمها مريم او نور مش فاكر الحقيقه..

هاله بهدوء

اقولك دول يبقو مين وما تزعلش..

ضحك أسر بهدوء وقال

الثقه الزياده دي هتلبسك في حيطه يا اوختي..

هاله ببرود

الثقه اللي بيني وبين فؤاد انت عمرك ما هتفهما..

وقالت بصوت واطي

واوعي تدايق شهد عشان ما اقلبش انا عليك فاهم..

_رد عليها بأبتسامه صفراااء وطلع اوضته لقي شهد قااعده بتتفرج علي التلفزيون وهي لابسه بجامه طويله وواسعه جداً وشعرها الطويل مفرود بشكل حلو جدا، وكانت بتاكل بهدوء..

أسر

طيب استنيني اتعشي معاكي..

شهد

لا كل لوحدك..

قعد أسر جنبيها وقال

ده فيلم ايه ده؟..

شهد

ايامنا الحلوه بتاع عبد الحليم..

أسر

هو لسه في حد بيتفرج علي الافلام دي؟..

شهد

دي افلام حلوه اوووي، انا مش بحب الافلام الجديده خااالص مش بتفرج غير علي ابيض واسود..

_قالتله كده وفضلت مركزه في الفيلم وهو بصلها بهدوء وابتسم وبدأ ياكل معاها وعيونه عليها هي، لحد ما بصتله وقالت بتوتر..

شهد

انت بتبصلي كده ليه؟..

أسر ابتسم ورد عليها

شكلك حلو اوي، وعيونك كمان لونهم حلو اللي هو لا تعرفيه اخضر ولا بني..

قامت شهد وقالت بتوتر

انت هتنام فين؟..

غمزلها وقال

انتي عايزاني انااام فين؟..

شهد بضيق

مكان ما انت عايز بسم الله مشاء الله اوضتك كبيره مش هنغلب يعني..

أسر بخبث

بس ما فيهاش غير سرير واحد..

شهد بهدوء

خليهولك وانا هنام هنا علي الكنبه دي..

أسر

لا وهي طولك فعلا يا خمسه سنتي..

شهد بغيظ

ما تتريقش عليا واتفضل قوم انا عايزه اناام..

رد عليها بهدوء وقال

ادخلي نامي جوه انا عندي شغل ومش هنام دلوقتي ولنا هنام هبقي انام هنا؟..

شهد

هو انت بتشتغل اصلا؟..

أسر

بدأت شغل مع فؤاد لازم يتأكد اني جاهز استلم الورث بتاعي، فلازم اشتغل علي الصفقه دي كويس وبالمناسبه مسافر بكره وهقعد اسبوع شرم الشيخ..

شهد ابتسمت بأتساع وقالت

احلف انا هقعد اسبوع مش هشوف وشك؟..

أسر

ايوه.. شايفك مبسوطه..

شهد بسعاده

طبعا مبسوطه اني هرتاح منك، ده يا احلي اسبوع في حياتي..

أسر بغيظ مسك المخده وضربها بيها وقال

طيب غوري من وشي بقي يا رخمه..

_ضحكت بقوه ودخلت جوه ونامت علي السرير بهدوء، وبعدين مسكت موبيلها وفضلت تكلم في رحمه اللي قالتلها..

رحمه

نسيت اقولك صح دكتور ادهم كلمني وعايز يطمن عليكي وطلب ياخد رقمك..

شهد بضيق

هو عايز مني ايه بقي، هو مش عارف اني اتجوزت..

رحمه بقلق

بصي هو فضل يقولي ان أسر جوزك وحش وبتاع نسوان وسمعته وحشه وهو خايف عليكي..

شهد بدموع

علي اساس انه يفرق معاه، الراجل ده انا مش فاهمه هو عايز مني ايه، عشمني بحاجات حلوه اووي وفي الاخر خزلني ولما بعدت عنه بيقرب تاني ليه..

رحمه

طيب اهدي خلاص اصلا انا قولتله انك مبسوطه ومرتاحه مع أسر وهو سكت شويه وقالي ده اللي اتمناه ليها وقفل..

شهد بضيق

بقولك أسر مسافر في شغل بكره ما تيجي تقعدي معايا شويه….

رحمه

لااااه انا الحجه ماما حالفه ما اخرج تاني من البيت غير لما اروح الجامعه الاسبوع الجاي، بقولك ايه ما تيجي انتي وننزل نشتري حاجات الجامعه وكده مع بعض…

شهد

حاضر هبقي اشوف واقولك، يلا بقي تصبحي علي خير….

رحمه

وانتي من اهل الخير..

_قفلت معاها شهد ومسكت موبيلها وفتحت حساب ادهم علي الانستجراام، واول ما شافت صورته ابتسمت بهدوء وفضلت تقلب لحد ما شافت صوره ليه منزلها من شهر مع بنته ومراته، وفي اللحظه دي افتكرت انها هي كمان متجوزه حتي لو الجواز مش حقيقي بس هي متجوزه..

_قفلت الفون بسرعه وحطته جنبيها ونامت علي طول وهي مقرره مش هتفكر في ادهم تاني، وبعد كام ساعه خلص أسر شغله ودخل نااام جنب شهد بهدوء عشان ما تصحااش وبصلها بهدوء وهي نايمه ورفع ايده علي وشها وحركها بهدوء علي ملامحها اللي كانت عجبااه اوووي..

أسر

من غير ميكأب او اي اضافات انتي اجمل بنت شوفتها، لو البراءه اللي فيكي اتوزعت علي الدنيا كلها هيزيد منها..

_اتملمت في نومها بهدوء ومسك هو ايدها بهدوء ونام وصحي قبلها الصبح وجهز واخد حاجته ومشي لشرم الشيخ..

ــــــــــ #بقلم_الكاتبه_رحاب_القاضي ـــــــــ

_وعدي اليوم هادي جدا وبالليل في كافي حلو جدا كانت قاعده هناك نسمه مع سعيد اللي قالها..

سعيد

عجبك المكان هنا؟..

نسمه

مش مهم المهم معاك فلوس تحاسب ولا هنغسل اطباق هنا؟..

ابتسم سعيد وقال

لا معايا ما تقلقيش تشربي ايه؟.

نسمه بجمود

اي حاجه يا سعيد، انت اصلا جايبني هنا ليه؟..

سعيد

عشان نتكلم ونتفق ونشوف هنعمل ايه في اللي جاي مع بعض..

نسمه

مش فاهمه هنتفق علي ايه يعني؟..

سعيد

هو انت ناويه نتجوز وانتي بأسلوبك ده معايا..

نسمه ببرود

لو مش عاجبك عندك ابويا قوله بنتك مش عجباني يا عم فتحي..

سعيد

واسيبك قبل الفرح بحاجات بسيطه الناس هتقول ايه عليكي وقتها؟..

نسمه بضيق

اللي يقولوه مش فارقه..

سعيد بحده

بصي يا نسمه انا مش هقول حاجه ابوكي عندك لو مش عايزاني قوليلو، ولو هنتجوز علي حالتك دي يبقي ما تلوميش نفسك علي اللي هعملو فيكي ويلا عشان اروحك..

نسمه بغيظ

انت بتزعقلي انا ما بحبش حد يعلي صوته عليا..

سعيد بحده

يبقي اعدلي طريقتك معايا ومش هزعقلك وقومي مش هنطفح حاجه..

_قامت نسمه ومشيت معاه وهي متعصبه من ومن كلامه معاها..

_تفتكرو بقي ايه اللي هيحصل؟

• يتبع الفصل التالي اضغط على (رواية النصيب) اسم الرواية