رواية انكسار الياسمين الفصل السابع عشر 17 - بقلم أمل مهدي
الجزأ السابع عشر
انكسار الياسمين
بقلم امل مهدي
الجزأ السابع عشر
============
روحي عقلت واختلف قانونها
العشرة التـعب بلاها ودونها
وياك كلش صار باهت لونها
ماتقدر ؟.. غيرك ايقدرونها
منك آنه شحصلت غير المرار؟
ودمعة عيوني وسواد اجفونها
وحرگ اعصاب وسهر شذكر
طلعتـها اوياي من ماعونها
============
ياسمين _
نظراته قريتها ملامه وعتب كأنه يگولي....
بسرعه نسيتي
صدكتيي وسامحتي شفت بعيونه عدم رضى رافع اخويه واعرفه كلش زين
وگفت مرتبكه هلا رافع تفضل .......!!!!
إيمان فزت ولتفتت خافت تترزل لان محذرها تتعارك وياي او تسمعني حجي
رافع _ حركت عجلات الكرسي ودخلت قريب على ياسمين توقفت
بدون ما اباوع لايمان گلتلها...
روحي سويلي جاي
إيمان _ طفرت للمطبخ
ياسمين _ واكفه گدامه اتحاشه نظراته
اريده يحجي
رافع _ شوفي ياسمين.... انتي موبس اختي أنتي بنتي وحبيبتي وبقية اهلي واعز شخص قريب على گلبي .... سكت شويه وكمل
حتى اعز من ولدي
اني ما اعارضج لو رجعتي لمحمد يبقى هوه ابو ابنج
ياسمين _ انته فاهم غ.........
رافع _ رفعت أيدي بمعنى ما اريد تبرير
اني لليوم ما حاس هوه متغير والايام راح تثبتلج
اتمنه اطلع غلطان بحدسي ويجوز من حبي وخوفي عليج اجاني هذا الاحساس
اني ما اريد اكسر فرحتج روحي عيشي ويا بس نصيحه لا
لا تامنيله محمد من النوع الي من تصير بظافره طحين
ينگلب على الوجه الثاني واني مو بس خايف عليج خايف على علاوي هم ينظلم وياج
فهمتيني شنو اقصد..........؟؟؟
ياسمين _ نزلت راسي خجلانه اي فهمت
رافع _ اني ما اللومج انتي بنيه ابداية حياتج ومن حقج تعيشين
بس ما ريد اشوفج مكسوره مثل قبل
واني مثل ماتشوفيني محتاج عنايتج وبالمقابل ما أكدر اعينج
وزمنه اغبر
الناس واحدهم في سبيل غايه بنفسه مستعد يدوس على غيره ويحققها
لازم تكونين قويه صامده بوجه الزمن
لان اليوم اني وياج باجر يجوز الوحدج ما ريدج تنصدمين بالناس
محمد _
علاقتي بياسمين احلى شي وابني علاوي سعاده ما جنت احلم بيها...
شي واحد منغص عليه الشغل التكسي المن أسد المعيشه لو للدين لو لتصليح لان بدت تتعب
گمت انطي يوم لأمي ويوم لا وامي متحجي
جزا من شغلي اسدد الدين والباقي كله مصاريف
البيت كله برگبتي
طلعت مثل كل يوم على باب الله اشتغلت ساعه وصار حادث وياي
اندعمت السياره بعد انكسر واهسي رجعت للبيت ضايج
راجحه _ خير يمه اشوفك ضايج
محمد _ صار وياي حادث
ياسمين_ اسم الله وين اصار بيك.... وتقدمت اتلمسه
محمد _ مشوفيني ما بيه شي مو گدامج واگف
بس السياره تأذت
ياسمين _فدوه الك السياره
الحمد لله من طلعت سلامات
ليش ضايج.....!!!!!
محمد _ ما يراد لها تصليح
منين اجيب
راجحه _ الفلوس الجمعتهن عندي بعدهن گلتها وباوعت الياسمين
محمد _ يا فلوس مو دتوفين بيهن
ياسمين _ هذا وكتهن انطيهيا خاله يصلح بيهن
محمد _ متفهموني شنو وحده تباع للثانويه وتحجي بالالغاز
راجحه _ گوليله بعد المن ضامين عليه
ياسمين _ خفت يگول تريدهن مني ودور فلوسي كلت
خاله انتي گوليله
محمد _ متحجون شكو
راجحه _ فلوس السياره هن بالأصل مال ياسمين اني ما مداينتهن
محمد _ التفت عليه ونظرات الاستغراب بعيونه
منين جبتيهن
ياسمين _ ساعدتني بيهن ام رغد
ومكلتلك لان ما صارت مناسبه لا تصور اريدهن منك أو غير شي
محمد _ ظل واكف وعيونه عليه ساكت
راجحه _ تره هيه من انطتنياهن كان وضعكم غير شكل
وهسه لا الحمد لله حبايب
محمد _ يبقن فلوسج وانتي صاحبة فضل عليه بالوقت الابويه ما نطاني حتى كلتله دين اسددهن... وهم ما نطاني
واني حاير شمسوي وياج وساعدتيني......!!!!
تقربت لزمت وجها بديه وطبعت بوسه على جبينها
السياره مالتج هاي الكل يسمعني....
ياسمين _ ابتسمت ما بيناتنا فلوس يله اخذهن وصلح السياره بيهن
محمد _ نذر عليه ازوركم بس اكمل تصليح
ياسمين _
احلى ايامي عشتها هاي الفتره ويه محمد اهتمامه بيه
ولهفته وكلامه الحلو نساني كل تعبي وهمي
نساني حتى البدايات الجمعتنه سويه
كان يشتغل طول النهار وبنفس الوقت مهتم بيه بين فتره والثانيه يجيبلي دشداشة لو ثوب نوم ويگول تخيلتج بي
لو ياخذني نطلع نفرفر بالسياره
كل مره ياخذني المكان رواني الدنيا الما شايفتها
حسسني اني اهم شي بحياته
وفعلا اني وعلي اهم اثنين بحياته
شيصير عنده زايد يضمه يمي
جمع مبلغ لابأس بي
باع السياره وشتره أحدث واحسن منها حياتنه هادئه وحلوه
إيمان ابتعدت عني لان محمد واگفلها على الكلمه
وهي تخاف من محمد أكثر من رافع
بالبدايه ما جنت امفكره اخلف مره ثانيه بس اطمئناني انو كل شي طبيعي بحياتي خلاني اشتاق الطفل ثاني وخصوصا محمد كان عاجبه اجيبله بعد
الفجر نايمه وحسيت نفسي تكلب بسرعه ركضت للحمام اتقيأت
محمد اجه ورايه
_ شبيج مريضه
_ لا بس يمكن حامل
_ متأكده.....!!!!
_ جنت شاكه هسه تأكدت والأفضل اروح للدكتوره
محمد _ كانت واكفه على المغسله تغسل وتباوعلى بالمرايه يعني ظهرها عليه
فتحت اديه ثنينهن وحضنته
درته عليه وبوستها باجر اخذج للدكتوره ا
خذتها للفراش اتمددت وغطيتها لا تعبين روحج
ياسمين _ تصور انصيطر على وضعه راح يصيرون اثنين
محمد _ كل طفل يجي رزقه ويا لا تفكرين
سيد علي _
ما أكدر انساها احس نفسي قصرت وياها وويه رافع صاحب عمري
كاعد بالمحل
مالتي هواي ناس من كل المناطق بغداد يجون ياخذون قماش مني
ام حسين _ شفت هذا التاجر عنده خوش اقمشه
سيد علي _ تفضلي حجيه
ام حسين _ زاد فضلك يابه اني عندي محل مال قماش بمنطقة
++++++ واريد منك كم طول من هذا القماش
سيد علي _ المحل كله گدامج امريني
ام حسين _ ما يأمر عليك ظالم سيد ميهم تبقى فلوس على التصريف
سيد علي _ ميهم عادي بس انطيني عنو انج مظبوط
وشيلي المحل كله
ام حسين _ تسلم سيد اني بالسوگ اي واحد تساله يعرفني من زمان معروفه
سيد علي _ سوگ ال++++ اعرفه
ام حسين _ لا اني بالسوك الثاني....
سيد علي _ ليش اشكم سوگ عدكم.اني الاعرفه سوگ واحد
ام حسين _ لا سيد سوگنه غير ذاك جبير وكلشي بي
سيد علي _ انتي متأكده
ام حسين _ جا اشلون ما متأكده غير منطقتي وصار سنين ساكنه بيها
سيد علي _ زين اسالج عن ناس ولد بعمري اسمه رافع وعنده ولد واحد اسمه حسن
وعنده اخت طالبه بالاعداديه او هسه يجوز بالجامعه
اسمها ياسمين
ام حسين _ والله تعذرني ما اعرفهم شنو ذوله گرايبك.......؟؟؟
سيد علي _ خاب ضني من گالت ما اعرفهم
أقرب عليه من گرايبي .......
ام حسين _ راح اسألك عليهم بلكن احد يعرفهم
سيد علي والله ياريت
راحت ام حسين
واني گلبي اشتعل نار ورجعت الوم بنفسي
يعني اكو سوگ ثاني اشلون محد كلي
اني هالمره متفائل انشالله الكاهم
رجعت للبيت اول ما دخلت صارت شجرة الياسمين بوجهي صار فتره تاركها عوزها تقليم كبرت وتسلقت على السياج
مزهره بوردها الأبيض
شميت عطرها غمضت عيوني براحه مبتسم
فزيت......... على صوت امي
_ هلا بالسيد اليوم فرحان تشمشم بالورد
_ ادعيلي يمه بلكت الكاهم
_ شنو سامع شي احد جايبلك خبر.....؟؟؟
_عرفت اكو سوگ ثاني باجر اروح اسال عليهم بلكت اندلهم
حيل مشتاق الرافع
_ رافع لو ياسمين......؟؟؟
_ فاجأتني امي بسؤلها باوعتلها بخجل
_ لا تباوعلى هيج اني مو امك اذا ما اعرف شكو براسك
_ احبه ربيته من هيه زغيره صرت ولي أمرها
لو احتاجت شي اني ثاني يوم بمدرستها
_ وهيه.............!!!!!
_ دنگت راسي ندمان
من كبرت وتعلقت بيه خذلتها ونطيته ظهري اجبنت وهربت
عبالي اگدر انسى....
ما كان لازم اتركها يوم اني عايش هنا بس جسد وروحي يمها
_ لا تتأمل هواي يجوز هسه ازوجت صار سنين من فارگتها
_ وجعني گلبي من گالت امي يجوز ازوجت
ليش لا شنو تبقى تنتظرني واني عفتها باتعس ضرف المفروض اوكف وياها
بكل الاحوال لازم الكاها
اروح واسأل عسى رب العالمين يعثرني بيهم...
صائب _ تروح اجره
محمد _ اي يابه اصعد
صائب _ اني ما اندل المناطق بس اريد مطعم راقي
محمد _ ادلل يعني على ذوقي اختارلك......!!!!
صائب _ اختار ولا تهمك الفلوس
محمد _ تأمر أمر...
باوعتله بالمرايه لان كعد بالكرسي الورى امبين واحد مرتاح وفايخ كلش ما تهمه الفلوس
وصلته المطعم فوانيس راقي بالكراده
تفضل هذا المطعم.....
صائب _ سحبت ٢٥ الف تفضل هاي كروتك
محمد _ شدعوه ٥ آلاف كافي
صائب _ ميهم أخذها كلها ونزلت مشيت خطوتين وذكرت...
ممكن تنتظرني اكمل عشاء وتوديني المكان
محمد _ بعدها ال٢٥ بيدي وعلى وجهي علامات الدهشه رجع أجرني من جديد باوعت للساعه عشره هذا وقت رجوعي للبيت...
وفكرت اني زوج اذا اعوف هيج واحد سخي ويدفع
أضعاف كروتي
تدلل انتظرك...
دخل هو جوه واني كعدت بالسياره انتظر
ساعه أكثر وطلع ويا وحده متكاودين ايد ابأيد يضحك ومرتاح
وصعدو السياره
صائب _ احب اعرفك صديقتي رمانه
محمد _ باوعتله بالمرايه شنو من شكل شنو من طول شنو من لبس
شنو من عطر.....
ابتسمتلها عاشت الاسامي
صائب _ اطلع بينه للشيراتون
محمد _ تأمر أمر يابه
حركت ومشيت واسمع بس المباوس والضحك
صائب _ انته شنو اسمك.......؟؟؟
محمد _ اني محمد
صائب _ محمد اريدك باجر الساعه وحده اباب الشيراتون
وهاك تستاهل هاي الخمسين
محمد _ باوعت ٢ ام ال٢٥.... كلتله
ماعندي ارجعلك يابه
صائب _ نزل من السياره حاضن رمانه تحت كتفه منو طلب منك
ترجعله ذني كلهن الك
لا تنسه باجر...... يله جاو
محمد _ تدلل باوعت الساعه وحده بليل
رجعت للبيت فرحان بساعتين ٧٥ لعد لو ابقى ويا النهار كله شكد ينطيني......!!!!
ياسمين _
الكل نام واني رايحه راده بهلغرفه وعيني على الساعه
تأخر هوايه محمد مو عوايده
اني لليوم ماعندي مبايل ولا مفكره اشتري ماعندي احد اتصل عليه واذا احتاج اتصل بمحمد اخذ مبايل خالتي عدها الف وميه جانت يتصلون عليها من يحجزون خبز قبل ما تبطل
عيني على الساعه وبطني شكبرها گدامي عبرت الثنعش
گلت لا هذا حدي انزل واتصل عليه من خالتي
نزلت لاكيت إيمان طالعه من غرفته
إيمان _ ها اشو كاعده
ياسمين _ محمد تأخر واريد اخابره من خالتي
إيمان _ وانتي ليش ما عندج مبايل
ياسمين _ منا وهيج لازم يجيبلي واحد شنو اظل كل ما احتاجه انزل الخالتي
إيمان _ هاي اذا قبل يجيبلج
ياسمين _ وليش ما يقبل......!!!!
إيمان _ اسألي نفسج ليش لليوم ما يحطلج مبايل
گالته بطريقه استفزتني بيها
ورجعت دخلت للغرفه....
ياسمين _ صفنت افكر صدك ليش ما يجيبلي مبايل شنو ما عنده ثقه بيه.....
فزيت من صفنتي الله لا ينطيج يا ايمان لازم تغثيني وكأنه عوزي مغثه
استغفر الله
دخلت على خالتي اخذت الموبايل وطلعت
لكيته متصل على خالتي بس هيه ضامته بالكنتور اشلون تسمعه
اتصلت
الو... محمد
محمد _ هلو ياسمين
_ وينك ظل بالي عليك...
_ اني جاي بالطريق
سديت الخط ردت ارجع الموبايل المكانه بعدين فكرت خالتي مالها حاجه بي
أخذته ورجعت الغرفتي
اجه محمد كلش متأخر
ياسمين _ ظل بالي ليش تأخرت
محمد _ طلعت من جيبي ٧٥ هاج ذني الأخرني
وحجيت كل الصار وياي
ياسمين _ معقوله اكو ناس ما تهتم للفلوس
محمد _ اي..... اكو ناس حتى مايعرفون أشكد عدهم فلوس
باجر لا تكعديني اريد اشبع نوم
حتى اروحله بالوحده متواعد ويا
ياسمين _ وحده لو رمانه ويا
محمد _ التفتت عليها ليش واذا هيه ويا
ياسمين _ سويت حركه شفايفي.... ماعاجبني
ما ادري مجرد سؤال
محمد _ باوعتله وابتسمت صايره بطه وبطنه گدامها
تعالي سحبتها من ايدها وطفيت الضوه
تمددت على السرير وحضنتها...
شعليه منو ويا رمانه برتقاله المهم اوصله وهو يورقلي بالحمر
ياسمين _ لحظات وسمعته يشخر التفتت اباو عله امبين تعبات
صار سنه حياتنه مستقره وماشي عدل بس اكو خوفه بداخلي
كلام رافع يدك براسي لا تأمنيله محمد بس اصير بأضافيره طحين يگلب على الوجه الثاني
واني ما صدگت استقرت حياتي هالفتره وعايشه مثل أي زوجه
ما اگول سعيده مية بالمية
بس ماعندي مشاكل ومحمد اليه ولبيته وبس
بداخلي خوف من المستقبل يمكن نتيجة الشفه من انقلابات الزمن
عليه
وذكرت امي وخوفها عليه
والعراف الأعمى التنبأ الحياتي.....
كل هذا زرع بداخلي حدس ان ما دوم الراحه اليه
اليوم الثاني
ما طلعت للشغل كعدت بالعشره بحيث كلها سالتني ليش ما طالع
عبالهم مريض
حضرت السياره وطلعت للشيراتون انتظره
مواعيده مضبوطه
اشوفه اجاني وحده بيده جنطه زغيره
صائب _ مرحبامحمد
محمد _ اهلا استاذ
صائب _ صعدت..... اطلع يابه
اخذني لأكثر من مكان هو ينزل واني انتظره بالسياره شنو شغله ما ادري
صار اليل وراد يتعشى وديته نفس المطعم فوانيس
صائب _ أقفل السياره وانزل اتعشى وياي
محمد _ جنت كلش جوعان ولهذا نزلت ويا كعدنه على طاوله
نزلو أشكال الاكل يكفي الخمس نفرات
كان صائب مقابيلي كاعد ونزل ويه الاكل قواطي اول مره اشوفهن
بس عرفت هذني مشروبات كحوليه لان اني هم جنت اشرب بس محلي مو مستورد
اني شعليه بي المهم ا استلم تعبي وارجع البيتي
من خلال الكلام الدار بيناتنه عرفت هو جاي يصفي املاك اهله ويرجع إلى امريكا
وراح يبقى إلى أن يبيعهن
خلصنه اكل صارت بالعشره عبالي اوصله للفندق وارجع البيتي
فاجأني من طلب مني اوصله النادي ليلي
وصلنه النادي هو دخل واني ظليت انتظره بالسياره
ماطلع الا بالثلاثه نصف الليل ايده بأيد رمانه ويترنح من السكر
رمانه _ هلو محمد
محمد _ هلو بيج
رمانه _ وصلنه للأوتيل
محمد _ صار.... اباوعلها شبه عاريه ولابسه عبايه مفتوحه من گدام
جمالها وجسمها يغري أكبر رجال
اتضحلي هيه راقصه بالنادي ومصاحبه صائب
موبايلي كل اشويه يرن ياسمين تتصل
وصائب و رمانه عالگيها بالسياره غنه وضحك خفت افتح خط تسمعهم وهيه من البارحه عرفته تغار
ظليت أرفض إلى أن قفلت المبايل
وصلتهم للشيراتون صارت ٤ الفجر طلع من جيبه صائب ٢٥٠ انطاني وگال
باجر اريدك توديني لاربيل
تفاجأت ما جنت محسب أخذه بعيد بس يله اذا رزقي عليه شسوي
رجعت للبيت الفجر
نسيت حتى افتح الموبايل تعبان ونعسان
دخلت لكيت ياسمين بوجهي گاعده واعصابها تغلي
ياسمين _ ليش ما ترد عليه
ليش تخليني بقلق
ووين جنت تدري بيش الساعه
محمد _ ممكن اجاوب من اكعد تره تعبان ونعسان
ياسمين _ متنام اذا متحجيلي وين جنت
محمد _ جنت ويه صائب افتر بي عنده شغل ونطاني ذني شوفيهن
ياسمين _ وين اكو شغل للفجر أنت تضحك عليه
محمد _اضطريت احجيلها كل التفاصيل ما عدى كلشي يخص رمانه
ياله تركتني انام
ثاني يوم طلعت لاربيل كنت اصور رايحين شغل بس طلع صائب أفندي طالع سياحه ثلاث ايام من شفت رمانه ويا جايه
كانت السفره عباره عن سياحه حجزلي غرفه بصف غرفته
اخذتهم لعدت مكانات سياحيه واكيد حسب رغبته ومن يرجعون للفندق اني احجي ويه ياسمين
اكلت گلبي وكل اشويه تحلفني رمانه وياكم لو صحيح انته بأربيل
خلصت الثلاث ايام ورجعنه البغداد وصلتهم للأوتيل على گولتهم
ورجعت للبيت كان صائب سخي جدا ويايه ينطيني حقي أضعاف
وهذا المخليني ما اعوفه اعتبرتها فرصه ولازم استغلها
قوت علاقتي بي إلى درجه رافقته حتى من يقابل ناس او يراجع دائره
طبكت اباب النادي
صائب _ تعال محمد ادخل ويايه معزوم اليوم على حسابي
محمد _ بالبدايه ترددت اقبل بس والله مشتاق الهاي الكعدات
.... اخاف اثگل عليك
صائب _ دنزل يمعود فوت تسويلي واهس
محمد _ ليش تحتاج واهس ورمانه موجوده......!!!!!
صائب _ هههههه لك هاي قنبله مو رمانه ما ادري اشلون راح اسافر وافارگها
محمد _ ليش شنو راح تسافر.....؟؟؟؟ شوكت
صائب _ عن قريب صفيت كلشي وحولتهن للأبويه باقي كم شغله وانشالله ارجع
جان حاجز طاوله نزل عليها الاكل أشكال ومشروبات كحوليه
طلعت رمانه ترگص افترت الصاله كلها وقتربت من صائب
اتمايلت تهز جسمه وتميل على صائب اشوفه فقد كأنه سحرته
ورجعت يمي تتمايل وتهز جسمها المنحوت وتلوي خصرها
مثل الافعى
ابتسمتلها...... وهي ابتعدت تغمزلي بعينها
بين اجواء الموسيقى وأصوات المعجبين وريحة الدخان والمشروبات انقضيت مثل العطشان اشرب إلى أن سكرت
وسيطرت عليه فكره وحده.... رمانه
خلصت السهره ومثل كل مره طلعت ويانه رمانه صعدو السيارة صائب كان مثگل إلى درجه محاس بكلشي
صعدته بالكرسي الخلفي ورمانه صعدت يمي وعينها وكلامها
اليه
وصلنه الأوتيل
نزلت اني ونزلت صائب اسحل بي گوه يمشي فاقد
وصلت هيه قبلي وترخصت من السكرتاريه رادتني اصعده الغرفته
دخلنه المصعد وصلنه الطابق الثالث للغرفه
رمانه فتحت الباب
واني دخلت شايل صائب على كتفي كان نايم وصلته للسرير
نيمته
ج
محمد _ وگفت اباوع الطوله الفارع وجمالها الأخذ عقلي
بدون ما أشعر سحبته من ايدها للصاله وأخذته ابين اديه
وهيه ما ابدت اي ممانعه بالعكس كانت مستمتعه ان تشاركني
الرذيله الانحطاط
وعيت على نفسي شعاع الشمس بعيني كعدت مرعوب واني اذكر كل الصار بليل
گمت لبست ملابسي مريت من غرفة نومهم اشوف الاثنين
ابسابع نومه
طلعت گبل وتذكرت اليوم ما أخذت كروتي يله من ارجع له العصر
صعدت بالسياره باوعت الساعه تسعه صبح سحبت الموبايل لگيت
فوگ العشرين مكالمه من ياسمين
اهوووو اليوم اشيقنعه وشيسكتها
وصلت البيت واني محتار بأي عذر أواجه ياسمين
طبگت السياره ونزلت تلگتني امي
راجحه _ ليش يمه نايم بره ما تگول على ساعه مرتي تحصرها
الولاده وين ننطي وجهنه
محمد _ غير بشغل طالع
راجحه _ ولك هذا يا شغل بالليل
محمد_ عفتها وردت اصعد الغرفتي لكيت رافع گدامي مارتاحيت النظرته
سلمت وصعدت .... فتحت الباب
صارت بوجهي ياسمي
_ ها خير واگفتلي شكو.......!!!!!
_ انته تگلي شكو
_ اذا على الليله جنت ويه صائب يعني شغل وتعبان واريد انام
ممكن.....
حجيت واني انزع تيشرتي
_ وشنو هذا الشغل اليمنعك تتصل بينه وتطمنه
_ الموبايل نسيته بالسياره
_احجي وصارت عيني على نهاية رگبته بيها طگعه حمره مال بوسه
اتقدمت خطوتين واشرتله باصبعي وعلى وجهي ملامح الاستهزاء
هذا الشغل مو......
محمد _ باوعت بالمرايه ودمدمت ويه نفسي .... الله يلعنج
اي شنو هاي وين راح فكرج
_ تخوني محمد.........!!!!!
_ انتي ليش ما عندج ثقه بيه
_ والله گالي رافع بس الله ينطيك تكلب عليه
_ شوفي كلمه زايده ما اسمع ماكو احرگج انتي واخوج
_ فوگ خيانتك تحرگني
سافل ما تنعدل طول عمرك
والله الا افضحك
طلعت من الغرفه......
الدرج جان قريب على باب الغرفه
محمد _ طلعت وراها اريد اللزمها مااريدها تنزل لزمت ايدها
ياسمين _ التفتت عليه اريد اخلص أيديي منه
سحبتها حيل ورجعت ليوره
ووكعت.......
- يتبع الفصل التالي اضغط على (انكسار الياسمين) اسم الرواية