رواية انكسار الياسمين الفصل الخامس و العشرون 25 - بقلم أمل مهدي
____________________
بحظرة جمالك ازهد العشاك
مطرف بحبك قافل البيبان
من تكبل علية سجادة اسوي الروح
وتوضى بعطر لو شوف وكتك حان
____________________
رافع _
خير ياساتر شيريد مني الضابط
الشرطي _ اضن بخصوص سيارتكم المفقوده
رافع _ ياالله بلكت لكوها
تمام اني جاي وراك....
الشرطي _ يله فيمالله
دخلت البيت والكل يدعي بلكت لكوها ويرجعوها النه
ياسمين _ ما مصدكه يعني معقوله ترجعلي السياره وابيعها
وافتح محل القماش
صافنه وين اخذتني أحلامي....
راجحه _ لو صدگ ترجعنه هاي يرادله بخت
إيمان _ اي والله حتى حسن يفتك من الملامه هج الولد مايلفي للبيت من وراكم
ياسمين _ انتي تدرين بي ما يراوي وجها ليش
مصايبه وحده انگس من الثانيه وانتي تتستريله
ترديني احجي لو اظل ساكته
راجحه _ اي والله ورافع ابو .....!!!! ياحيف النار خلف عار
سكتت إيمان ونلصمت بعد
رافع _
اخذت ابو زين ورحت المركز الشرطه
دخلنه للضابط
كان عندي امل جبير من گالي الضابط لگيناها سيارتكم
فرحت...
بس خاب أملي من گالي لاغميها ومفجريها بسوگ
ابو زين _ سيدي لعد اشلون عرفتوها
الضابط _ طابقنه رقم الشاصي وشكلها وموديلها
رافع _ يعني راحت السياره
الضابط _ مع الأسف جنت اتمنه ابشرك بس هذا الصار وتره هواي سيارات يسلبوها من أصحابها حتى يفجروها على الناس. وعلى الجيش
رافع_ تشكرنه من الضابط وطلعنه
رجعت للبيت
تلگتني ياسمين ها بشر
رافع _ عوضج على الله احنه اصلا نسيناها صار سنه
فلا تنقهرين
خابت كل آمالي ونقهرت بس يله هيه ظلت على السياره تعودت على الخسارات
امير _
واجبنه اني وظافر بالصيطره
كل اشويه اشوف ظافر عينه على شارع المدرسه يشوفها اجت
حوالي ساعه ١٠ بينت شايله أكياس الخبز وگوه تمشي
_ هاي اجت هسه ارتاحيت وربتت على كتفه كان مشخص نظره عليها
گال شوفها.....
لعد اشگد الدنيا داگتها بحيث تتحمل كل هذا التعب
أمير _ ظافر صديقي من سنين خلوق وشهم بس حياته ما كانت مثل ما يحب ويريد......
حجالي كلشي عن حياته
آني منتسب اداوم بالصيطره
قبل كم سنه حبيت بنيه بنفس منطقته اسمها مهجه سنتين اني اتواصل وياها
كلام واتصال
مشيت عليها مرتين ما نطوها
بحجة محجوزه لابن عمها
رغم ارفضت مرتيت تحملت حجي اهلي وأهلها
ما عفتها
ولا يوم فقدت الأمل ان تكون اليه
كنت مستعد كلشي اسوي بس ينطوها
ثالث مره اخذت شيوخ وساده وجبرت أهلها ينطوها الي
من بعد ما ابن عمها گال اني ما رايدها
طلب ابوها مهر غالي ما گلت لا
انطيت كلشي حتى لا يعرقلون زواجي منها
بالسنه الثالثه تتوج حبنه بالزواج ونورت بيتي مهجتي
الي بس امي عايشه ويانه بي
اول سنه جنه بقمت السعاده اني وياها ودللتها دلال الكل يحسدوها
على عيشتها وياي
بدت مشاكلنه من تأخر الحمل عدها واحنه بوضعنه محتاجين بس
ضحكته طفل تزين حياتنه
بدت سلسلةمراجعة للاطباء وكل شهر يخيب ضني وضنها لان مابيها اي سبب
اجتني بيوم وگالت الدكتوره تگول انته حلل اني ما بيه شي
وحللت مطمئن اني كلشي مبيه لان اخواني وخواتي كلهم مخلفين خير من الله
هنا انصدمت صدمة عمري من طلع التحليل صفر وما ممكن اخلف بيوم
يومها ما رجعت للبيت خلصتها بره اكذب اذا اگول ما تأثرت
بالعكس تعذبت واني اشوف املي انقطع بأحلى مخلوقات الله
والشي الاذاني أكثر محتار بوضع مهجه اشلون راح اصارحها وهيه ميته على اسم طفل
ما اجرئت اگول لها جنت خايف من ردت فعلها
رجعت للبيت متاخر
وثاني يوم التحقت ما اريد تسالني
مرت ايام وتحت ضغط اسألتها صارحتها
ظافر _ اذا طلعت ما اخلف شسوين
مهجه _ ليش شنو طلع بالتحليل.....؟؟؟
ظافر _ اني اسأل جاوبيني
مهجه _ صفنت شويه افكر.... يعني شسوي هذا أمر رب العالمين
ظافر _ مهجه اني ما اخلف.... التحليل يگول هييج
واني صح انقهرت بس بتالي هذا أمر رب العالمين ما يريد يرزقني
وانتي بكيفج...
مهجه _ يعني شنو بكيفي
ظافر _ اني ما اجبرج تكملين وياي اذا تردين اطفالل
مهجه _ نزلت دموعي
صح اني احب الأطفال بس احبك انته أكثر مستحيل اتركك
هاي قسمتنه شنسوي
كلامها هذا ما طول شهر وبده الانقلاب الحقيقي
كل الحب والدلال انسه....
مشاكل على اتفه الأسباب حجي وتجريح
إلى درجه الاجازه عشر أيام ابقه ثلاثه والباقي ارجع للصيطره
من بعد سنه خلص تعبت..... وديتها لأهلها وورقة الطلاق وياها
ما شفت منها اي ردة فعل وكأنه كانت منتظره مني انهي البينه
رجعت الحياتي غصه بگلبي الصار بس الما يضحي ويوگف وياي
الله ويا
كل هذا مر عليه ورجعتلي ذاكرتي من شفت هاي البنيه شكد حلوه ونازگه ما تستاهل وگفتها بالشارع هيه وخوانها
بس الحروب غيرت وضع هواي ناس يجوز يتيمه وما عدها احد
زفرت آخرحسراتي واني اتمشه عليهم
_ الله يساعدكم
رضى _ ويساعدك.... ياسمين _ اجاهلته... لان هواي يركز بنظره
ظافر _ باوعتلها مغطيه نص وجها بس العيون طالعه
صفر والرمش والحاجب اصفر تحسها شمسين مو عيون
من التفتتلي ازحلكن الأكياس ووگعن بالگاع
ياسمين _ لاااا
ظافر _ الله الله يله ما صار شي رادت ادنگ عليهن
لا خيتي لا دنگين اني اشيلهن واصفطهن الج
ياسمين _ رجعت وگفت انطاني الأكياس واني رجعتهن على الصبه
مال حاجز
ظافر _ ذوله اخوانج
ياسمين _ هذا ابني وهذا ابن اخويه...
ظافر _ اباوع للزغير ونعصر گلبي سبحانك الهي شنو الغايه بعدم مساوات الناس
هسه اني اتمنه ريحة الطفل ولو عندي اشيلهم بماي عيوني
وهذا الطفل محروم من الراحه يطلع ويه امه بالحر والبرد حتى يعيشون
كانت بجيبي كيكه سحبته ونطيتهيا
انت شسمك..... ختل ورى امه
رضى _ اسمه علي
ظافر _ تعال بابا لاتخاف هاك هاي الكيكه
ياسمين _ اني بطبعي ما أخذ وانطي ويه الرجال بالخصوص
اخاف
بس شي طمني ويه هذا الولد احسه شهم وغيور ورجل من تصرفاته
أخذها علاوي من عمو
تقدم واخذ من ايده الكيكه
ظافر _ رفعت راسي اباوعلها وكع الشال من وجها وهيه ملتهيه ترتب بيهن سبحان الخالق شنو من وجه والله لو عندي ما اخليها تعتب الباب
اخذت الخبز ورجعت
التفتت طبگت كيه خط مال معلمات واخذو كل الخبز
الحمد لله ما طولو ربع ساعه وباعوهن
ما اعرف ليش شغلت تفكيري ما اتمنه تبقى بالشارع خطيه ابنها وهيه وابن اخوها
ياسمين _
رجعت للبيت كلش مرتاحه ولو رافع على عينه اطلع بس خوش شغله
المهم ما احتاج وإيمان تفك مني
مريت بمحل تسوگت للبيت ونطيت الرضى گبل راح اشترا لي طحين
وصلت البيت لكيت رافع بالباب عيونه على الشارع
حبيبي صاير ضعيف كلش بسبب السكر شگد اأتألم وگلبي يوجعني عليه
نفسه عزيزه لاقرب ناس ما يرخص روحه بس الدنيا حاربته وأخذت كلشي منه ورغم كل الضروف المرت بي وهو ما فقد إيمانه بالله ولا تهاون ابواجباته بالعكس زاده الصبر ثقه بالله
يگولون المؤمن مبتلى
رافع _ ما تأخرتو زين
رضى _ وگفت سياره مال خط وكله اشترو
ياسمين _ لو عندي احد يوصلني كان أكثر خبزت لان على الشارع
بسرعه يخلص
ثاني يوم كعدت من الصبح اخبز الكل نايمين
اشوف خالتي راجحه طلعت تتلمس الحايط إلى أن وصلتني وكعدت يم الخبز تصفط بي
راجحه _ سوده عليه الوحدج آخخخخ يا أمونه ما عندج احساس كلش
عاد اكعدي گولي اساعدها اشويه
ياسمين _ خاله هيه بيتنه مايوم خبزتلنه جانت امي الله يرحمها لو انتي
ترديها هسه تخبز
هاي آني وحدي ولا احد ينگ براسي
راجحه _ من يومج معدله انتي واخوج
إيمان _ شكو من الصبح تگصين بيه
راجحه _ تحسب بالخبز وتجيسه وتشده كلها لو نگصه حرام الا انتي لو اگص من لحمج هم حلال
روحي گعدي رضى حتى يرحون يودون الخبز
ياسمين _ خاله تذكرين اني الوحيده الجنت اگابلج واكعد احسب الگرص واجيسهن
وهسه انتي صرتي تجيسين بالخبز اليه شلون الدنيا ادور
راجحه _ اي وجنتي كل ما تجين يمي اطردج
ياسمين _ تخافين عليه من التنور غير.....
راجحه _ لا والله جنت اخاف من حظي يعديج وتالي انعديتن انتي وامج سوده عليه
ابتسام ماتهنت بتالي عمرها القهر خلص گلبها
إيمان _ همزين ما جنت اجي يمج جان هم عديتيني
ولو ورثتيني الفگر
راجحه _ امداج دگو لي الحمد لله والشكر دومج عيونج ما شبعانه
خلصت الخبز وجمعته صار ٤ علاليك كبار
لبست عباتي ودگمتها وطلعت ثنين شايلهن رضى وثنين آني
وعلاوي يركض منا ومنا واني كل اشويه اوكف والزمه
هو بطبعه حرك بس تعودت الا ويايه ما اگدر افاركه
وصلت الشارع بقيت علاكتين يم رضى واني رحت الست هاله
بالمدرسه يعرفوني حتى الفراش يجيني ياخذهن مني
انطيتها الخبز وهيه خطيه محضره الفلوس ما اخرتني
رجعت لازمه علاوي بأيدي كعدته فوگ الصبه حتى لا يتحرك
طبگت سيارة نفس الدكتور الاجه اول مره
د. أمجد _ مرحبا سلم وهو يتبسم
ياسمين _ هلا
د. امجد _ ماشاء الله انطيني بابا كم كيس هذا انتي تخبزي.....؟؟
رضى _ اي لعد منو
د. أمجد _ عاشت ايدج بابا بالمناسبه اني أخوها الست هاله
ياسمين _ ست هاله البهاي المدرسه
وأشرت بيدي ورايه
د. أمجد _ اي هيه
ياسمين _ اهلا وسهلا
أمير _ ظافر صار واهسه كله يم البنيه ام الخبز حتى وهو واگف
يفتش تلقائيا كل اشويه التفت على المكان موجوده او لا كل جماعتنه انتبهو عليه
_ هذا اشعده لزگ يمها
ظافر _ منو..... سويت روحي ما مهتم
أمير _ أي علساس ما شفته مو عيونك تراقبه من الصبح
روح اتحرك شنو اليوم ما تجيبلنه خبز
ظافر _ تمشيت بخطوات تراقب
اشو هذا واگف وماخذ راحته وياها.... وصلت
السلام عليكم.....
د. أمجد _ عليكم السلام
ظافر _ ظليت واگف ما حجيت اگلب بالخبز إلى أن سلم وراح
شنو تعرفي للأخ......!!!!
ياسمين _ صفنت اشويه بسؤاله..... وسكتت ما جاوبته
مو دا اسال تعرفي الهذا الجان واگف هنا
ياسمين _ ليش تسال يعني شي ما يخصك
حتاريت بيش اجاوب فعلا ما يخصني....
گلت
لا شلون ما يخصني غير انتي قريبه على الصيطره
واحنه هذا المكان كله يخصنه
رضى _ يعني. بعد ما نبيع هنا......؟؟؟؟
ظافر _ لا بابا قصدي اني عيني عليكم هنا أو انتو بأمان لان قريبين علينه
ياسمين _ ما فهمته شيريد سكتت وسويت روحي احجي ويه علاوي
ظافر _ اخذت. كيسين خبز وتقدمت قريب عليها وهمست لان ابن أخوها عينه عليه
اني قصدي لا سولفين ويه الرايح والجاي انتي ما تعرفين الناس
ياسمين _ حجه الكلمتين
ورمقني بنظره ابد مو طبيعيه .....
بعنه كل الأكياس ورجعنه الصيطره بعد حوالي ثلاثين متر
واني امشي باوعت شفت نفس الولد واگف يباعلنه ومنتجي على السياره العسكريه
طول الطريق افكر شيريد مني
اني شفت بنظراته شي بس شنو ما فهمت خوفني.... أيدي بأيد علاوي وباوعتله
حتى من عرفه ابني ما اهتم....
بس اني شعرف عنه زين موزين....
وصلت البيت اليوم شويه تاخرنه لان اخذت خبز أكثر يله كلشي بحسابه
إيمان _ لعد وين المسواگ....
ياسمين _ اهوووو والله نسيت هاج هاي فلوس وانتي تسوگي
إيمان _ بعد احسن....
رافع _ كاعد يسمع الاخبار وكلها انفجرت سياره مفخخه بفلان مكان
وانفجرت سياره ملغومه في سوق فلان
الله لا ينطي كلمن يزهق أرواح هاي الناس
گال...
ياسمين انتو توگفون يم الصيطره......؟؟؟
ياسمين _ جاوب رضى قبلي
رضى _ اي بابا يم الصيطره حتى واحد منهم ياخذ خبز من عدنه
باوعلي رافع كانه راد مني أوضح اكثر
ياسمين _ يعني تقريبا ابعد راس الشارع مالتنه
رافع _ باوعت بوجها وهيه تجاوب ....
اي احسن لا تقتربون من الصيطره اخاف عليكم من الانفجارات
كل يوم صار عادي هو يشوفنه نوصل يجي ياخذ خبز ويروح
مرات يلاعب علاوي ومرات يسولف ويه رضى
واشوف منه نظرات واتحاشاها اني جايه. اشتغل واعيش
ما اريد اشغل راسي بسوالف ما منها فايده
وخصوصا اني ما اعرفه ولا أكدر امنعه لان ياخذ خبز مني
اليوم وصلت المكان كعدت علاوي وخليت أكياس الخبز على الصبه
ودزيت رضى للمدرسه يودي الخبز
بسرعه شفته اجه يتمشه بمجرد ما شافني اجيت
گال _ اليوم رضى مو وياج
ياسمين _ التفتت هو نفسه.... هسه يجي
_ انتي ليش تغطين وجهج
ياسمين _ لان اخويه ما يقبل
_ ها يعني عندج اخ...
ياسمين _ لعد احد گلك طالعه من فطر الحايط
_ اذا يخاف عليج ليش مخليج تبيعين بالشارع
ياسمين _ التفتت عليه خزرته حسيت كلامه وجعني
انت متعرف منو اخويه وشنو ضروفنه فلا تحجي بكيفك
رجاءا اخذ الخبز وروح والاحسن بعد لاتجي تشتري مني
أمير _ رجع ظافر بيده الخبز مو على بعضه
سألته شبيك...
گال _ جفصت ويه ام الخبز وخجلت من نفسي
اني اتسرعت بكلامي صدك اني شعرفني شنو الضروف التخليها توگف بشارع وتبيع خبز...
وظل يلوم بنفسي...
ساعه وشافهم خلصو وتمشو راجعين مثل كل مره
گال أمير الزم بمكاني فد اشويه هسه ارجع
أمير _ وين رايح يمعود...... مشه بسرعه ما سمعني دوهنته الخباز ه
نعلعلا بليسك
ظافر _ تمشيت وراهم
تقريبا ثلاث شوارع وكفو تسوگو مخضر من محل ومشو واني وراهم
إلى أن دخلو بشارع ثالث بيت دخلو بي أگيد بيتهم
باوعت اكو محل أسواق دخلت عليه بحجة اشتري جگاير
وبدون ما اسال جرجرته بالحجي وعرفت عنها كلشي
أمير _ رجع ظافر يتأسف هوايه من عرف أخوها مقعد وخالته ضريره .... تندم لان جرحها بالحجي
ثاني يوم انتظرهم يجون
وتمشه عليهم اخذ عصير وحلويات العلاوي
ظافر_ مرحبا
ياسمين _ ما رديت عليه سويت روحي مسمعت
گال _ هلو علاوي هاي الك اخذها
ضحك علاوي واخذ العلاكه من ايدي
ياسمين _ لا رجاءا لا تنطي
واخذتها من ايد علاوي ورجعته اله
ظافر _ فتهمت ردت فعلها ضايجه من حجي البارحه
اني اسف ما كان قصدي.......
ياسمين _ قبل ما يكمل...
ماكو داعي تتأسف لا اعرفك ولا تعرفني
_ لا اني غثيتج البارحه ما جنت ادري اخوج من ذوي الاحتياجات
حقج على راسي واني محقوق الج
ياسمين _ باوعتله شلون عرفت.....؟؟؟
ظافر _ عرفت وخلص هسه تسمحين انطي العلاوي الحلويات
ياسمين _ سكتت....
ظافر _ انطيته العلاكه ومسحت على راسه ضحكلي وهي تباوع
واخذت الخبز ورجعت
ياسمين _ ظل أبالي منين عرف علاوي يتيم ورافع مقعد
رجعت للبيت كلش متضايقه نزلت علاگة المسواك
من ايدي
شفت حسن يتغده كلت بكلبي سم وزقنبوت
لوما ضيعلي السياره جان هسه ابيع قماش شغله محترمه ولا وگفتي بنص الشارع متحمله سخافت هذا وذاك
حسن جسر ولسانه قذر يعني نسخه من محمد وهذا احسن ابتلاء الله بله بي إيمان
كانت تتعارك ويا حتى ينطيها مصرف ومتحمله جسارته وسوء أخلاقه و أفعاله اما رافع
مل من الحجي ويا وتركه......
راجحه _ سمعت حركه بالغرفه...
ياسمين اجيتي...
ياسمين _ اي خاله اجيت گولي محتاجه شي
راجحه _ اشبيج جن ضايجه من صوتج حسيت...
ياسمين _ تعبانه اشويه مابيه شي
راجحه _ حقج والله من فجرية الله كاعده ولهسه ترگضين
سوده عليه مشلوعة گلب على خالتج وامج
ياسمين _ كله يهون بس شوفة حسن وهو كاعد يزقنب من المسواك الاني الاجيبه بتعبي يأذيني
لو السياره الضيعها جان هسه بفلوسها فتحت شغل وكعدت معززه ولا وگفتي بنص الشارع والرايح والجاي يباوعلي اني وهذا اليتيم المسكين
راجحه _ كلشي يجي من الله مابدينه غير نگول الحمد لله عليه
ياسمين_ الف الحمد لله...
راجحه _اگول ام رغد ما خابرت.......
ياسمين _ لا خاله المره كفت ووفت خلفله عليها من انطتني الفلوس الشتريت بيهن السياره من عدها
غير هي سدت المنظمه من سافرت
ساعدتنه بما فيه الكفايه...
راجحه _ ما تتصلين انتي عليها.....؟؟
ياسمين _ شنو اطلب منها من جديد لو اموت
راجحه _ يعني إلا تطلبين....
تستاهل تسألين عليها مو.......
ياسمين _ والله استحي راح تسالني شنو شغلج شگول خبازه
راجحه _ هاااا عفيه عليج تستعرين من الخبز شو خلصت عمري اخبز
واجد على بيتي .......
ياسمين _ بست راسها لا تزعلين مو قصدي بس
والله ما هاينه عليه روحي ويوم بعد يوم دينفذ صبري
ليش مدتفرج
اشوف البنات رايحات للمدرسه اشلون مرتاحات البس اشكال
وجوهن تضحك مرتاحه
ليش اني عكست حياتي اخذتني الغير درب
تعبت خاله ما ادري افكر بروحي لو برافع لو بعلاوي
راجحه _ سوده عليه اشو تعالي ومدت اديها اليگدام...
ياسمين _ ابتسمت ودنيت بين اديها سحبتني بحضنها
راجحه _ اووووف شگد شايله بگللبج قهر يايمه
ياسمين _ خليت راسي بحضنها ودموعي نزلت
راجحه _ احجيلي البگلبج فرغي همج لا اظلين ساكته
ياسمين _ حجيتلها فرغت كل البگلبي
راجحه _ تگولين صار شهر يحوم رايح جاي عليج وماتعرفين شيريد
ياسمين _ اي... يشاقه ويه علاوي هوايه ويجيبله حلويات
راجحه _ ولج يسويها الحظ ويخطفه
ياسمين _ صفنت شويه
لا خاله يخطفه شيسوي بي لا تخوفيني
راجحه _ ولج هاي الاخبار اسمعي وشوفي ناس تنخطف وناس تنكتل بعد لا تاخذي عوفي يمي
ياسمين _ لا وين اعوفه ابني بيدي ما افارگه
خالتي خلتها براسي اشو خفت من هذا العسكري ثاني يوم
كعدت من الغبشه خبزت الخبز
جيسته وحضرته وطلعنه اني ورضى النفس مكانه كعدت علاوي على الصبه
ووديت الخبز مال ست هاله
ورجعت اعدل بلاكياس وكل شويه اباوع على الصيطره
ما كو اليوم ما شفته....
وكفت كيه خط موظفات مدري معلمات أخذن كل وحده كم كيس
التهيت وياهم انطيهم واخذ فلوس وقسم اصرفلهم
والبنات يسولفن ويايه
خلصو وحركت الكيه
سديت الجز دان فرحانه اخذو تقريبا كل الخبز
التفتت على مكان علاوي ماكو
ياسمين _ رضى وين على....
رضى _ التفتت ادوره ماكو..... ماادري جان هنا
ياسمين _ ولك اني التهيت ويه البنات غير انته عفتك يمه
رضى _ هو هسه عفته هنا واگف
ياسمين _ اباوع منا ومنا وارجف مو عوايده يبتعد عني
بديت افقد اعصابي
بلحظه تذكرت حجي خالتي كله اجه براسي وتخيلت ما الگا
بعد...............!!!!
معقوله انخطف
علاوييييي...
- يتبع الفصل التالي اضغط على (انكسار الياسمين) اسم الرواية