رواية انكسار الياسمين الفصل الثاني 2 - بقلم أمل مهدي
**********
جرأة الـ بالكلب لو تنتقل للفم
جا كلمة احبك جزت ذاك الصوب
والاطرش سمعها واجه كلك تم
**********
سيد علي _
اني الولد الوحيد لأبوي وعندي بعد خوات اربعه
احنه أمنه الزوجه الثانيه غريبه عن ابوي
مرت ابويه الأولى بنت عمه بالنجف
عدها اربع بنات
وابويه قبل أكثر من عشرين سنه اجه يسوك قماش من بغداد ولتقه بأمي وتزوجها
اشترى هذا البيت الكاعدين بي
من عرفت مرت ابويه
مزوج عليها صارت مشاكل بينها وبينه
رادت تطلك بس احنه ساده ومعروفين أهلها الهمه عمامي ما قبلو
حاول يصالحها ويعيش وياها لان هو يستحرم
ما رضت...
كالتله طابت نفسي منك وما دام اجاك الولد التريده روح ويا بس لا تكطع ابناتك
فظلت بالنجف وابويه نتقل البغدادي و يدزلها مصرف كل شهر
كبرنا واحنه نشوف ابويه كل شهر يروح للنجف يشوف خواتي وينطي مصرف ويرجع
يمكن مرتين ثلاثه اخذني ويا
ومره اخذ خواتي بس من شاف مرته وخواتي رافضين حتى يتعرفون علينه
بعد ما اخذنا الهم..
احوالنه جيده جدا بيتنه جبير وعدنه بيت لاخ اباب الشيخ
ابويه مسوي مخزن للقماش
لان فتح محل جمله بالشورجه
واني تركني ادير هذا المحل خواتي اربعه ازغر مني ورغم دراستي اني ما عفت ابويه اعاونه هنا وهناك
هاي السنه انقبلت بالكليه ادرس قانون
حولت مسائي الغايه بنفسي
محد يصدك السر حتى لو اكوله
بكلبي ضامه
كله حتى اشوف ياسمين
اخاف عليها الا اشوفها من تطلع من المدرسه تمر من يم المحل يالله اعوف العامل بمكاني واروح للكليه مالتي
ما ادري هاي البنيه مزروعه بكلبي
السيد _ واكف اباب المحل واباوع الساعتي شو تأخرت اليوم
كل الطلاب طلعو المفروض هيه اولهم... التفت واشوفه
تمسح بعيونها وصدريته متربه
السيد _ اشبيج ليش تبجين
ياسمين _ من طلعت ولد وكعني
شوف ورفعت صدريته طلعت اركبها مدمايات
السيد _ لا يانذل الا اكسر راسه...تعرفي وين بيتهم
_ بالمدرسه ويانه بصف الخامس
_ اخذته بالمحل غسلت اركبه وكعدته على الكرسي وجبت ديتول وكطن وعقمت الجروح ولفيتهن بشاش
تبجي واسكت بيها ومقهور بودي الزمه للولد الا اطيح حظه
صحت للعامل...
سالم دير بالك على المحل اني رايح للدوام
اخذت كتبي وأخذتها بايدي ووديتها للبيت
دكيت الباب
طلعت ام رافع
_ يمه بنيتي شبيه رجليج
ياسمين بجت
السيد _ اشلونج خاله
_ هله يوم هله بالسيد
السيد_ لا تخافين خاله واكعه
ومتعوره ركبتها
_ ولج منو وكعج....
السيد_ لا تبجين ياسمينه اني باجر اجي للمدير الا اخلي يعاقبه
_ يمه انته هم عندك شغل شيوديك للمدرسه مالتها
اني اكول الرافع يروحلها
السيد _ خاله هيانها المدرسه
لا تكلفين رافع عوفي بشغله
احنه شكم ياسمينه عدنه
ورحت ثاني يوم اني اعرف المدير جان جيرانه
جابو ياسمين وأخذتها اني والمدير للصفوف ندور الولد
ولكينا من أشرت عليه وكالت
هذا الوكعني
طلعه المدير كدام الصف وضربه عودتين
وكله دير بالك تاذي ياسمين
ممنوع تحجي وياها بعد
السيد _ كايده بيدي وواكفين يم الصبوره احسها فرحانه
وهيه تباوعلي
رجعتها للصف ورجعت المحلي
مرتاح احس نفسي مسؤل عنها
ابتسام _ اليوم مابينت راجحه اشعجب....
امشي ياسمين انشوف خالتج اشو ماكو
لبست عباتي وسديت الباب وطلعنه اني وياسمين
بيت راحجه إيجار بنفس
الشارع مالتنه
دكيت الباب
فتحتها امونه
_ شنو ما رايحه للمدرسه اليوم.....!!!!
_ خاله فوتي شوفي امي بياحال اشلون اعوفها واروح
_ ياستار اشبيها ولج
دخلت اشوفها
كاعده وتبجي وحال الضيم حالها
_ لطمت على صدري
ولج اشصار ليش تبجين....!!!
راجحه _ من الخير غير
ليش اني اشوكت فرحت
جبت حياتي ضيم وقهر
_ شكو ما تحجين عباس مات
_ ياريته ميت ولا داك بيه هاي الدكه
_ شمسوي هنوب
_ ولج ابتسام طلع مزوج عليه....!!!
_ شنو ووو
_ اليوم صدك ايست تحملت ضيم وضلايم منه واكول يجي يوم يبطل ويحس ويكابلني
تالي يطلع مزوج ومطلكني وما ادري
_ انقهرت عليها اني ادري بيها تحبه رغم شالع كلبها مهما يكون راعي بيتها
اشبيج راجحه اموته روحج هو شوكت شفتي خيره حنيته اشو يجي اسبوع ويغيب شهر
لا داري بعيشه ولا داري بجهاله
انتي دومج شايله الحمل
_ اسمه رجال فوك راسي
بس يطلكني هاي الما جانت أبالي...
_ گومي خيه عجينج فايح بالكاع وسلمي بيد الله هاي قسمتج وحظج شسوين
_ صدك كلامج هاذا حضي وهاي قسمتي
كمت شعلت التنور اشنك بالعجين ودموعي تنزل ..اي يراجحه اخبزي وكدي على جهالي منو بحالج ...
رافع_
رجعت للبيت من الشغل العصريه تلكتني ياسمين
_ الله يساعدك
_ هله بياسمينتي
_ شوف الشهاده كلها عشرات
_ أي والله سبعه
شوفي اريدج اطلعين دكتوره
اسمعيني ما طولني موجود
انه ما عوفج بس انتي ادرسي ونجحي
وطلعت من جيبي فلوس
هاج هاي الج على نجاحج
ابتسام _ يله اشو بوسي اخوج ودعيله دعوه حلوه
_ شكرا الله يرفعك فوكككك
رافع _ وين فوك ولج نزليني
ابتسام _ ههههه كولي الله يوفقك ويرزقك
رافع_ شراح تسوين بالفلوس...؟؟
_ اضمهن بالقاصه وتشتريلي امي كلاده بيهن
رافع _ ما طول هيج هاج يمه
هاي هم فلوس حطيه بالقاصه
وبعد يوميه انطيج المقسوم من ارجع من الشغل ضميهن الها اشتريلها ذهب
ابتسام _ يمه الله يحفظك النه
ما دريت بخالتك اليوم
رافع _ شبيها يا ستار
_ غير طلع عباس مزوج عليها ومطلكها الناقص
_ صدك والله ...!!!
لعد اشكد نذل
_ اي والله لكيتها تبجي وحالتها حاله هم مسكينه محتاره بعيشه جهالها
_ يمه منا وغاد اني اشيل اجارها كوليلها لا اشيل هم ما طول الله رازقني ما اعوفها
_ روح يا رافع كون الله يحفظك يا ابن بطني
_ تسلميلي ياطيبه
_ يمه اني رايح للسيد شويه وارجع
_ روح الله وياك
سيد علي _ العصر وبليل المحل تصير عليه رجل معاميل هوايه عدنه ومعروفين
رافع _ يابه الله يساعدهم
السيد _ رفعت راسي هله هله
لحظات وجاييك
رافع _ على راحتك يابه
_ سحبت الكرسي وكعدت اباوع على الرايح والجاي ظليت اشويه واجاني
_ هله برافع اشلونك
_ هاي شنو صاير ولي أمرها الياسمين وماخذ حقها
_ اي ليش لا غير اخت الغالي
_ صاير ما توكع من حلكه اشحجه السيد وشكال السيد
_ يمعود قابل شمسوي اهم شي محد يحجي وياها بعد
_ تكول كام الولد من يشوفني ينهزم بعيد يخاف
_ ههههه اي غير أكله عودتين من المدير شلوطن ايده
_ انته شخبارك ما تبين
_ والله يا رافع تعبان افتح المحل وابقى ساعتين واروح للكليه وارجع للمحل
ركضه حياتي كلها شغل اني وحيد ابوي شسوي
_ الله يمد بعمر ابوك الابو خيمه وانته سبع كدها
راجحه _
ايمان تعاي شيلي الخبز مال العالم
_ هسه اني شعليه بالخبز
يمه صار يومين ما رايحه للمدرسه اشلون
_ وشسوين بالمدرسه اكعدي ساعديني شوفي ظهري مكسور عليج وعلى واخوج
ايمان _ والله حرامات
_ عليمن حرامات راح تطلعين دكتوره احنه المثلنه اذا دبر يومه هذا الله حابه
من عساها بحضه وبخته الابوج هو السبب بحالج وحالي
اكلج محمد رجع....؟؟؟
ايمان _ اي رجع وكاعد يتفرج تلفزيون
_ صخام بوجهي يعني ما يقره
شلون اني بابن عباس الا يجلطني
ايمان _ يمه عوفي هو كسلان الويا بالمتوسط وهو بعده سادس
_ واني عليمن محروك دمي واشتغل غير حتى يصير براسه خير
ياوالحظ لا حظي كعد برجال ولا ولد
ابتسام _
رافع اريد ازوجك وافرح بيك
رافع _ ههههه ازوج ....!!!
_ اي ليش لا اشو عبرت العشرين وشغل وتشتغل وفلوس عدنه خير من الله
رافع _ ما ادري انتي كيفج
_ ما طول كلت كيفج
اني أبالي وحده تناسبك
_ يا الله اهم شي تناسبج انتي وياسمين
_ اطمن تناسبنه وتحبنه بعد
شتكول بأيمان بنت خالتك
رافع _ ايمان.؟؟
_ اي ايمان امونه بنت خالتك
_ ما ادري بس مو لسان ووكحه
ابتسام _ منيله المسكينه بنت بيت وشاطره وتحبنه
وهاي الها سنه من بطلت من المدرسه وتساعد امها
رافع _ مو ذاك اليوم سمعت خالتي تشكي منه تكول ما تساعدني بالخبز
ابتسام _ بعدهه زغيره ومثل كل البنات اشوف حال امهه وابوهه وتنقهر المثلهه هسه مدلله
مو حسره عليه الدشداشه
رافع _ انت ادره اذا اشوفيه
مناسبه اني موافق
ابتسام _ الله يرضى عليك مثل ما راضيني
_ يمه اني عندي راحتج انت وياسمين كبل راحتي
_ امونه من عدنه وبينه وشابعه ضيم وفكر راح ترتاح من اشوفك مدللها وهيه وين رايحه اشو يمي اني خالتها
_ كيفج يمه اني اخليها وراج
_ الله يرفعك ويعليك بين خلق الله وليدي
اكوم اشوف راجحه واحجي وياها يكلك خير البر عاجله
ياسمين _ تعلمت واني راجعه من المدرسه الا امر على السيد
اكعد اشويه بالمحل مالته
_ هلو عموالسيد
_ هله بياسمين اشلونج
_ زينه اليوم المعلمه كومتني على الصبوره ...
ولا غلطه كله صح وصفكولي
_ عفيه بالشاطره
_ والمعلمة كالت اريدكم تقرون مثل ياسمين
_ عفيه انشالله اصيرين دكتوره..
_ اني اريد ابيع قماش مثلك
_ عوفج من القماش الدراسه احسن
_ هسه هذا شنو شيسمو
_ هذا جرجيت
_ وهذا
_ هذا همايون مال فرشات
_ وهذا
_ عوفج من القماش ولتهي بدروسج
شوفيني اني ادرس بالكليه وابيع القماش
ياسمين _ اني مثلك اريد هم ادرس وابيع قماش
_ تعالي اكعدي
_ كعدت واستمعله باهتمام
_ شوفي ياسمينه اني رجال ادرس اشتغل اتعب ميهم
بس انتي بنيه تتعبين ماتكدرين تشتغلين شغلتين
ولهذا اوصيج بدراستج ابد لا تهونين بيها مفهوم....!!!
_ صفنت بوجها شكد احبه السيد مثل رافع يحجي
باوعتلها وركزت بملامحها
هسه عمره ثمانيه واني ٢٣
زين ماكو فرق هواي احجي بكلبي ونتبهت.....
اشو صافنه بوجهي
_ ابتسمت انته ورافع احبكم
_ ههههه تعالي كدتها وأخذتها اشتريتله بطل ببسي وبسكت وحلقوم
يله حبيبتي كبل للبيت اخاف امج يظل باله عليج
_ شالت ايدها وضحكت
شكرا عمو...
_ من ضحكت احس كلبي انشرح
الوجه ابيض يلمع والعيون
نرجسي فاتحه تلمع والكصيبه
شكره ومفتوله
اشلون بيج يا ياسمين اشوكت تكبرين
رجعت دخلت محلي وافكر معقوله الاني بي احب طفله
هاي البنات اشكد رأيحه جايه للمحل لو بالكليه وحده احله من الثانيه وكلهن يتقربن مني على شنو ابن تاجر القماش
ولا وحده دخلت راسي ....!!!
لو ياسمين لو ما اريد
اي انتظرها بعدها زغيره
اووووو والله اني مدري اشلوني
منا علما تكبر مدري تنكلب الدنيه
سالم _ خير استادي اشو صافن وتضحك
_ والله يا سالم العقل يحجي بكيفه واني اضحك عليه
ابتسام _
لبست عباتي واخذت ياسمين وتمشيت على راجحه بيوم الماتجيني اني اروحلها
دفعت الباب ودخلت
_ وينج ام محمد فتحت باب الهول محمد كمز...
يا شبيك كمزت
محمد _ ها خالتي امي أخذت
ايمان وراحت للطبيب
ابتسام _ اني ما سألتك على امك سالتك ليش كمزت تشرب جكاير حمودي
_ لا خاله منيلي جكاير
_ لعد هاي شنو الدخان والريحه ولك يمه امك تعبانه
لو درت بيك اتموت
_ شنو تردين تبليني ماعندي جكاير
_ ها تصيح بوجهي ولك ياحيف امك راجحه بس عليمن تطلع
خل اروح امشي ياسمين امشي يمه....طلعنه
ياسمين _ محمد ليش يشرب جكاير
ابتسام _ خلي يولي هذا معذرب مثل ابو بالج ابيوم تحجين ويا ابد...
_ اي يمه
تلاكينه ويه راجحه وهي راجعه
_ جنتي يمنه ....؟؟؟
_ اي محمد كال ماشيات للطبيب شعدجن
_ دتعالي اكعدي شويه
دخلنه
والله عيوني يوجعني رحت للطبيب اطاني عصاره وقطره
يكول بسبب حرارة التنور
اجه محمد يباوعلي
عباله كلت الامه
راجحه _ ها يمه قريت...؟؟؟
محمد _ اي قريت هسه رايح يم اصدقائي
_ روح يمه الله يهديك
ابتسام _ اباوعله واحجي بكلبي عيني عينك يجذب الله يعين كلبج يراجحه
راجحه _ وين صفنتي خيه
ابتسام _ جايتج بالحجي خيه ام محمد
اكلج رايده أيمان مره الرافع
_ بسرعه تغير وجهي وبتشرت
فرحانه
امونه ترديها مره الرافع.....!!!!
_ اي ليش اروح بعيد احنه خوات وإيمان مثل ياسمين بنتي ادللها
_ لا تكملين الرافع اكبعه ونطيها هذا ابني عزيز كلبي
المعدل
_ باوعت على ايمان...شوفي رأيها اساليها اريد اسمعها منه
ايمان _ كاعده يمهم واسمع
رافع طول عمري اشوفه كبالي بس ولا يوم فكرت اصير مره
اله وهو ولا مره حسيته رايدني تفاجأت
ما انكر من بطلت من المدرسه وكمت اساعد امي بالخبز كرهت بيتنه وعيشتنه ودايما ادعي الله يجيبلي واحد يزوجني ويخلصني من العازه
والخبز
راجحه _ وليش ما ترضه تلكه احسن من رافع
حجيت واباوعله لا تروح تكول ما اقبل
ابتسام _ ها شتكولين امونه
راضيه لو لا
ايمان _ ها ما ادري بكيفكم
راجحه _ سمعتي ....؟؟؟
ابتسام _ كمت بوستها
مبروك حبيبتي
ياسمين _ جنت كاعده يم ايمان
وكفت وهلهلت كلللللللوش
راجحه _ ههههه شوف ياسمين فرحانه
ابتسام _ لعد ليش ما تفرح هم رافع وهم امونه
هسه شنو اشلون نتصل بعباس
راجحه _ عباس شنو ليش نتصل عليه
_ غير نطلبه منه
_ ليش يمه هو سائل عنها يعرفه خله يولي ما اكبر راسه
_ لا ام محمد الأصول تبقى أصول نبلغه يجي ساعه نقره الفاتحه والله ويا
_ والله يابتسام مايستاهل
أمرها بيدي انه الربيت وكبرت
خلي بعيد لا يسويلي شغله ويخربها
_ اكول الرافع وبعد ابكيفه
_ ولج هو احنه منو عدنه لا عمام ولا خوال اخ واحد
وما يسال
_ اشبيج راجحه خطيه بنتج غير نفرحها
ورافع هم عنده أصدقاء ومعارف شنو يزوج سكتاوي ابني اريد افرح بي
_ كيفكم بس اني ما احجي ويه عباس
رافع اخذ محمد وراح العباس بمكان شغله طلب ايمان منه
ما عارض عباس وكاله انته زلمه وانه اتشرف بيك
اني منطيها بس تفاهم ويه خالتك
وانه اجيكم من تردون اتعقدون واقرأ الفاتحه ويا كم
رافع _ يمه اخذيها اشتريتها ذهب حتى نعقد والبسها النيشان وصير الخطوبه رسمي
ابتسام _ ماشي شايف كل الخير
رافع _ يمه ما وصيج شتريد اشتريلها لا تخلين شي بنفسها
ابتسام _ يمه يمه من هسه يخاف عليها
رافع _ هههه لا اني اخاف من الله ماريد اقصر عليها
ابتسام _ حشاك من التقصير بعد كلبي
رحت للسيد
- سيد اريدك ويايه مشايه رايح اخطب
- مو تدلل رافع يخطب وآني مو ويا ماتصير
- هههه اشكرك ادري بيك متقصر
- منين بلخير الراح تناسبهم
- والله يا سيد بنت خالتي اني ما ريد اجيب غريبه للبيت اريد وحده تداري امي وياسمين
ولهذا امي اختارتها
- بيها الخير اعتبرني يمك اليوم واذا محتاج فلوس قماش اني والمحل كدامك
ما يردك غير لسانك
- متقصر طول عمرك ابن اصول اني اترخص
ابتسام - أخذت إيمان اليوم اشتريتله ذهب
ورجعت اخذتلها ثوب حلو مال مهر
واخذتها الصالون حفولها وسرحو شعرها
ياسمين - وآني هم اريد مثلها
- مو تدللين
عيني هاي بنتي سولها تسريحه مثل مرت اخوها
- مو تدلل الحلوه تعالي اكعدي على الكرسي
- كملتهن اثنينهن من الصالون واجرت تكسي ورجعتهن للبيت
عزمنه الجيران وخابرت اخوي خضر اجه هو ومرته وجهاله هم لو مو مناسبه جان ما شفنا
صارت الكعده مال النسوان بالهول والرياجيل
اجرت كراسي وترست الطرمه
عباس وخضر ومحمد كعدو بره يستقبلون المشيه
رافع جاب جيرانه اربع زلم والسيد واحمد واخوانه اثنين
عباس _ محمد صيحلي امك احجي وياها
محمد _ رحت لأمي ويه النسوان كاعده
يمه ابوي يريدج....
راجحه _ شيريد اني ما احجي ويا
ابتسام _ دكومي بلكت يريد يسالج على شي
راجحه _ اهووو مو كلت ما اريد اشوفه
محمد _ اشلون اظل واكف
امشي خلصيني
راجحه _ خزرته بسيطه حميد
تصيح ابوجهي
كمت مجبوره ...
خير اشرايد...
عباس _ شبيج كالبه وجهج
راجحه _ لان مارايده اشوفك اشرايد.....؟؟؟
لو ما مخطوبه بنتك حتى ما تذكرها
عباس _ عوفج مني امونه موافقه....؟؟؟؟
راجحه _ ليش شايفني اجبرها
عباس _ اني اسأل بس
وأهم شي اتفقت على الغايب والحاضر
راجحه _ اتفقنه والولد ما قصر
عباس _ اي لعد اني شريد
بيها الخير
رافع _
قرو الفاتحه وعقدلنه السيد
تعالت الهلاهل والهوسه
ابتسام تلكيته الرافع دخلته بوسط النسوان والهلاهل الجكليت
رافع - باوعت لامونه طالعه حلوه أول مره اركز بوجها
إيمان - ابتسمتله حتى لو معاجبني المهم أتزوج وأخلص
رافع - لبستها الذهب وكصينه الكيكه وواحد وكل الثاني وشربنه عصير
ردت اطلع....
إيمان - ابقى اشويه...
رافع - بعدين عيب من الجماعه ظلو بره ينتظروني
ايمان _ ضجت وبين بوجهي
رافع _ باوعتله شنو زعلتي
ايمان _ اول مره اطلب منك ورديتني كلتها بزعل
رافع _ لعد اجيكم بليل وراضيج
لا تبدلين ظلي هيج وبتسمتلها
ترخصنه واخذت الزلم وطلعت
سيد علي حضني
ألف مبروك
- يوم الك ونفرح بيك
- اني بعد هوايه
- وليش هوايه المفروض هسه تزوج
- والله يا رافع ما مفكر بالزواج خل أتخرج والله كريم
_ يمعود انوي واذا بعدك تدرس تره احمد خلف واحنه بعدنه...
احمد _ لعد اني مثلكم ههههه
السيد _ طلعت ياسمين تركض
بتجاهي
شنو من ثوب لابسه وتسريحة
مسوين شعرها
ياسمين _ اشلونك عمو
السيد _ فاتت بنص الزلم تسلم عليه وتضحك
والكل عيونهم صارت عليها
شتعلت بنار
_ فوتي ياسمين جوه
رافع _ عوفها هيه طفله
السيد _ يمعود يا طفله شوف العيون راح ياكلوها
كلتها بنتر.....!!!!
رافع _ باوعلي وحسيته
مستغرب تصرفي...
- يتبع الفصل التالي اضغط على (انكسار الياسمين) اسم الرواية