رواية صرخات انثى الفصل الرابع والستون 64 - بقلم ايه محمد رفعت

12 أكتوبر 2024 الصفحة الرئيسية روايات مصرية

رواية صرخات انثى الفصل الرابع والستون 64 - بقلم ايه محمد رفعت

أخترق أذنيه صوت زقزقة عصفورًا قريبًا، يزقزق باعلان سطوع يومًا جديد، أفرجت أهدابه عن رماديته، ففتحها وأغلقها مجددًا في محاولةٍ للاعتياد على الضوء النافذ بعينيه.
نهض عن ساق أخيه يتفاجئ ببقائهما هنا حتى طلوع النهار، وما ألم قلبه أن أخيه لم يزعج منامته وبقى محله حتى غفى مستندًا برأسه على السيارة من خلفه وذراعه يحيط بجسد عُمران كالذي يضم صغيره!
ابتسامة مشرقة شقت طريقها لوجهه، فناداه بخقوتٍ:
_علـي.

تسلل مسمعه إليه ففتح عينيه يهتف بعدم وعي وهو يتفقد ساقه:
_عُمران!!
هدأت انفعالاته حينما وجده يجلس جواره، ويطالعه باهتمامٍ، عاد يستند برقبته على السيارة من جديدٍ، تفحص ساعته قائلًا بدهشةٍ:
_معقول نمنا هنا لدلوقتي؟!
قطع عُمران صمته هادرًا:
_مفوقتنيش ليه يا علي؟!
رد عليه بابتسامته الجذابة:
_مصدقت إنك تنام شوية فمستحيل كنت هقومك.
وسأله وهو يتفحصه بعناية:
_إنت كويس؟
اتسعت ابتسامته ونهض ينفض ثيابه:
_أكيد هكون كويس وأنا عندي أخ طيب وحنين زيك يا دوك.
استند “علي” على مقدمة سيارته ونهض ينفض ملابسه هو الاخر:
_تعالى نروح مكان هادي نفطر ونتكلم شوية قبل ما نرجع البيت.
أومأ برأسه وأشار له:
_اركب.
أجابه علي وهو يهم بالتحرك لمحل سيارته:
_راكن عربيتي قدام شوية، اطلع وأنا وراك.
اجتاحته السعادة لتتبع أخيه إليه، ليس بكل الاحوال ما نقوله نقصد معناه، ربما يطالب لسانك من أمامك بالرحيل ولكنك من الداخل تتمنى أن يعارض حديثك ويتبعك رغمًا عن أنفك!
فتح عُمران باب سيارته باستخدام الريموت الالكتروني وقبل أن ينجرف علي للطريق قال بامتنان:
_شكرًا إنك متخلتش عني حتى بعد ما طلبت منك تكون بعيد.
مرر يده إليه ومازال يتابع طريقه كأنه لم يستمع له من الاساس:

_اركب وبطل عبط.
ضحك بملئ ما فيه وصعد لسيارته يتحرك للطريق الرئيسي ومن خلفه يتبعه علي.
****
تربع الألم بحدقتيه كالسهم النافذ، يواجهها بصدمته التي أعربت عن مدى حزنه، بينما الأخيرة عينيها ساهمة بالهاتف الموضوع من أمامها.
شعرت وكأن هناك فوم من النيران عالق بحلقها، لم تتمكن من ابتلاعها أو حتى طردها خارج جوفها، فرددت بهمسٍ باكي:
_كدب يا سيف، والله العظيم بيكدب .
مازال يقف أمام الفراش الذي تعتليه، صامتًا، حزينًا، يجلي صوته البائس:
_يعني الورقة دي مزورة؟
أعتصرت جفنيها من فرط بكائها وهزت رأسها بالنفي، قائلة بنحبٍ:
_لا مش مزورة، أنا فعلًا مضيت عليها بعد ما أقنعني إننا مينفعش نتقابل كتير بدون ما يكون بينا عقد جواز، ولإني كنت لسه بدرس فمستحيل أخواتي يوافقوا عليه عشان كده اقترح عليا العقد العرفي ده، احنا اساسًا معندناش الكلام ده بالمغرب بس هو أقنعني.
اهتز بوقفته قبالتها ومازال يحرك رأسه بصدمة ألا تسترسل حديثها، ولكنها استطردت موضحة:
_لما اكتشفت حقيقته سرقت العقد اللي عنده وقطعته ولما سألت شيخ قالي إنه مش جواز أصلًا، يعني هو كداب لا عمره كان ولا هيكون جوزي.
ما له يشعر بعظمه يسحق بقوةٍ حتى خرت قواه ولجئ بجلوسه لطرف الفراش، يحتضن رأسه بين يديه، بينما تلك القابعة من خلفه تراقبه بدموعها المنهمرة، فإذا بها تقترب إليه، تضع كفها على ظهره وهي تستجديه متوسلة:
_مسمحتلوش يقربلي يا سيف، والله العظيم بيكدب عليك محصلش بينا حاجة.
رعشة يدها انتقلت لضروعه، فطرق باب قلبه تنبهه بحالتها المؤلمة، اعتدلت بجلسته المحنية، وإلتف بجسده إليها حتى بات يجلس قبالتها، فوجدها تفرك يدها وهي تستكمل الجزء الاخر من حديثها:
_ولو عايز تتأكد من كلامي أنا مش همنعك ده حقـ…..
ابتلعت جملتها فور أن ضمها إليه، يحيط رقبتها بيد والأخرى يلفها حول خصرها بحمايةٍ، قائلًا بضيقٍ:
_يوم ما أشك في أخلاقك هتكون نهاية علاقتنا اللي مبتدتش يا زينب، أنا مصدقك يا حبيبتي وواثق فيكِ.
واستطرد يوضح سبب حزنه الصريح:
_أنا اتفاجئت بالورقة دي، لإنك مسبقش وحكتيلي عليها.

أراد أن يبعدها ليستكمل حديثه فإذا بها تتعلق بالتيشرت الخاص به وتناشده بتوسلٍ:
_متبعدش يا سيف!
ابتسم بفرحةٍ لرغبتها ببقائها بين حصاره بقلعته التي شيدها بعشقٍ لها، مسد عليها يحيطها بحبٍ بينما عقله شارد بذلك الحقير الذي لم يستسلم بعد، وبوصول تلك الرسالة يؤكد له بأنهما مازال تحت أعينه، ومن المؤكد بأنه سيفعل المُحال ليصل لها.
حبيبته وزوجته هي، إن فرط بنفسه لن يفرط بها، فليت ذلك المختل يعلم ذلك، مال “سيف” برأسه فوق رأسها وهمس لها ومازالت أصابعه تتغلغل خصلات شعرها الناعم:
_أول مرة أشوفك بشعرك..وشكلي كده مش هصمد كتير قدام الجمال ده كله.
وتايع مازحًا:
_زينب هو أنا ينفع أتحرش بيكِ؟
ضحكت بقوةٍ بينما يتابع هو بمرحه:
_بأدب والله العظيم هكون محترم قدر ما تمكنت!!
لكزته بقوة وهي تهدر بالمغربي:
_سيف احترم راسك،ولا غادي نهبط نشكيك و ندير ليك محضر تعدي و يضيع مستقبلك المهني يا دكتووور
رمش بعدم استيعاب لما نطقت به، وكأنها ألقت إليه تعويذة مخيفة، تابعته تنتظر سماع ما سيقول، متحفزة لمشاجرة عنيفة بينهما، ولكنه اهدر اعدادها فور أن نطق ببلاهةٍ:
_الترجمة هتنزل أمته؟!
تحررت ضحكاتها بصوتٍ أطربه، حتى أن عينيها أدمعت من فرط نوبة الضحك التي أعتلتها وقالت من بينها:
_نوضحلك بالمصري مفيش مشكلة، بقولك إحترم نفسك، بدل ما أنزل اعمل فيك محضر تعدي، ومستقبلك المهني هيضيع بعدها يا دكتور!!.
أشار على ذاته متصنعًا البراءة:
_محضر تعدي فيا أنا يا زينب!! عايزة تسجني جوزك عشان حلمه البريء إنه يدخل بيكِ دنيا!!
طرقت بكفها على كتفه العريض:
_متقلقش يا حبيبي هيدخلوك في الحبس دنيا وأخرة مع بعض!
تصنع الحزن بمهارةٍ:

_مكنتش أعرف إن قلبك قاسي كده! ليه تجرحي مشاعري بالشكل ده يا زينب؟!
أمسكت يده تمنعه من الرحيل قائلة بحزنٍ:
_أنا بهزر معاك يا سيف، أنا مقدرش أعملها لإني بحبك وآ..
ابتلعت باقي كلماتها فور أن تبدلت ملامحه، فأحاطها بيديه هاتفًا بمكرٍ:
_سامع يا قلبي نطقتها قدامي أنا وأنت ومن غير ما نضغط عليها.
وتمعن بمُقلتيها المنفرجة صدمة منه:
_اشجي جوزك حبيبك باللي جوه قلبك يا دكتورة!
أمال جسدها بين يديه، يده أسفل ظهرها وقدميها منعرجة خلف حركته، بينما خصلات شعرها الطويل يلامس الأرض، رفع كفه الأخر يحيط وجهها، ويقترب إليها ومازال يمنع سقوطها عن الأرض بمسكته القوية، فما أن اخترق مسافتهما حتى همس بافتتانٍ:
_حبك ليا ميتقارنش بحبي ليكِ يا نور عيني، أنا دايب في حبك يا زينب!
أسبلت تجابه تلك الرجفة التي دغدغت عذرية قلبها ومشاعرها، من قال إنها اختبرت الحب يومًا كان مغفلًا لا يفقه بفنون الحب، فها هي تكتشفه من جديد على يد زوجها الحبيب.
وجدته ينساق خلف نداء عينيها فأتاها ملبيًا، وما كان منها الا الاستسلام، وتلك المرة تمنحه من الثقة ما جعله لينًا متفهمًا حتى باتت زوجته قولًا وفعلًا.
أدمى محاولة ذلك السفيه لهدم حياتهما وبدأها هو مستعينًا بفروض عشقه، ليجعلها سكنة له ويكون هو مرساها!

ثبت دريكسيون السيارة جيدًا حتى تمكن من فتح هاتفه، فرفع السماعة الخارجية يجيبها:
_أيوه يا حبيبتي.
أتاه صوتها يجيب:
_يوسف طمني الوضع عندك أيه؟
أجابها والحزن والخوف يلتصقان به:
_جمال اختفى من المستشفى مش عارف راح فين، روحتله شقته مش هناك ودلوقتي طالع على الشركة، خايف عليه من اللي بيفكر يعمله يا ليلى.
تنهدت بوجع وقالت:
_هو معذور يا يوسف ومن حقه ينتقم لمراته، إنت مش متخيل هي حالتها هتكون عاملة ازاي لما هتفتكر اللي عمله فيها، حتى لو عرفت إنه كان مغيب عن الوعي.

_اللي حصل كان صعب، أنا عاجز ومش عارف أساند عُمران ولا جمال!! ، بس اللي متأكد منه آن دكتور علي مستحيل يسيب عُمران، لكن جمال اللي فعلًا لوحده!
_منه لله اللي عمل فيهم كده، أنا مش قادرة أستوعب ولا أصدق إن في ناس بالبشاعة دي يا يوسف، إزاي هان عليه يعمل كده في ابن أخته!! واللي يوجع إنه عارف إن حمل مايا صعب وإنها تشوف جوزها بوضع زي ده ممكن لا قدر الله تجهض الجنين وبالرغم من كده وصلها الخبر ومهموش!!
انجرف للطريق الجانبي يجيبها ببسمة ساخرة:
_اللي زي نعمان هما اللي بقوا بكترة يا ليلى.
واستطرد يغير الحديث:
_المهم إنتِ صاحية بدري ليه كده، انتِ راجعه البيت متأخر!
ابتسمت وأخبرته بتفاخر:
_أنا منمتش أصلًا، هنام ازاي وعندنا عريس وعروسة يا دكتور.
تقوس جبينه مستغربًا:
_وانتِ مالك بيهم مش فاهم!
فتحت الكاميرا تطالبه باتصالًا، فأبعد الهاتف عن أذنيه ووجهه لعينيه، فوجدها قبالته بابتسامتها التي يعشقها، تدير الهاتف للصينية الموضوعة على رخامة المطبخ خاصتها، تحمل الكثير من أصناف الطعام الفاخرة.
اتسعت ابتسامته سعادة بزوجته التي لم تقصر مع أخيه بالرغم مما تعرضوا له من ضغط الأمس بالعمل بالمركز، وازداد بما حدث مع جمال وصبا، فظلوا بالمركز لساعاتٍ إضافية، وبدلًا من أن تستريح ظلت بالمطبخ الساعات المنصرمة ترتب الاطعمة الشهية لهما.
عاتبها يوسف بحنان:
_ليلى إنتِ ليه ضغطي على نفسك وانتِ تعبانه، كنتِ لفتي نظري للموضوع ده وأنا كنت هطلب ليهم أكل جاهز.
اتجهت للمقعد الخاص بالرخامة ومالت تخبره بضيقٍ:
_أكل جاهز أيه!! والله ما هتعرف تجيبله الحمام اللي أنا عملاه ولا طاجن ورق العنب ده!
ضحك بصوته كله وقال يشاكسها:
_حمام ومحشي ورق عنب!! طب وأخو العريس مش هينوبه من الحب جانب ولا أيه؟
ارتكنت على معصمه تمنحه نظرة محتقنة:
_لا مفيش.

ابتسم وقال:
_خايف عليكي يا ليلى، ومش عايز أتقل عليكي، يومنا مكنش سهل النهاردة.
اهتمامه وخوفه عليها أرضى ضيقها، فقالت بحبٍ:
_متقلقش عليا يا حبيبي أنا كويسة، خلي بالك انت من نفسك، أنا عملت أكل زيادة ليك وللبشمهندس جمال عشان عارفة إنك مش هتسيبه، ابقى عدي عليا خده قبل ما تروح بيه شقة سيف.
انتفض بمحله حتى سقط الهاتف أسفل قدميه حينما ذكرته برفيقه:
_فكرتيني بجمال، اقفلي لازم أروح الشركة بسرعة قبل ما يتهور.
صرخت به قبل أن يغلق:
_ما تنساش البقسماط يا يــــــــوسف.
توقف عن لف مفتاح السيارة وعاد يسلط نظره للهاتف بعدم استيعاب، هدأ قليلًا حينما تذكر بأن المرأة ما هو الا متاهة مغلقة يصعب على أي رجل الخلاص من توابعها، لذا قال بايجاز ينهي مكالمته:
_أحل الكوارث اللي ورايا وهجبلك الخباز بالفرن لعندك حاضر.
وأغلق الهاتف بهدوءٍ يفتخر بأنه تحلى به لتلك اللحظة، وعاد لقيادته المتعجلة ليلحق به.

توقف الزمان من حوله، وكأنه لم يخوض حياته بطولها وعرضها ليُوضع بتلك اللحظة، اللحظة الحاسمة التي جمعته بذلك الصديق.
تحجر الحديث على شفتيه، فسابق الشيخ مهران بحديثه حينما قال ساخرًا من صمته وصدمته:
_المفروض إنك تتوقع الزيارة دي بعد ما رجعت تقلب في اللي فات!
انقبض الألم بين حدقتيه، وبصعوبة هدر:
_أنا آآ…
انتظر سماع ما سيقول ولكنه وللعجب لم يجد ما سيقول، بل اختذل عينيه عنه وأخفاها بحرجٍ منه، دنى إليه الشيخ مهران وجلس على مقعدٍ كان يجاور لمقعد مصطفى المتحرك، انشغل بسبحته قليلًا ومع كل حركة يلامس حباتها كان يمنع غضبه، يسيطر على شيطانه الا ينطق بالسوء وبما سيحمله ذنوبًا هو بغنى عنها، فارتفع صوته بعض الشيء وهو يصيح
«لا حول ولاقوة الابالله العلي العظيم»

استمد نفسًا طويلًا بعدها وقال بحزن:
_أنا مقدرش أعترض على حكمة ربنا ومشيئته، بس بعد ما عرفت الحقيقة من حضرة الظابط وأنا متقفليش جفن، وكل اللي بيترددلي ليه؟
رفع مصطفى وجهه المبتل بدموعه إليه، فتابع الشيخ مهران بحزن:
_ليه تعمل فيا كده؟ صحيح احنا مجمعتناش صداقة متينة بس الكام ساعة اللي كنا بنقعد فيهم كل ١٥ يوم عشان ندخل للكشف كانت بالنسبالي عشرة طيبة، سمعتك وعرفت عنك كل شيء ونصحتك وقتها تعرف زوجتك الاولى بجوازك وآنك تعترف باللي في بطنها، وقولتلي انك هتعمل كده فعلًا.
واستطرد يعاتبه بألم:
_صحيح علاقتنا اتقطعت بعدها ومعرفتش عملت أيه مع زوجتك التانية ولا الاولى بس أخر ما توقعته إنك تعمل فيا كده!!
تدفق الدمع على وجه الشيخ مهران، وبصوته الباكي قال:
_ليه تخليني ارتكب وزر بدون ما أعرف وأكتب آيوب باسمي!! عارف يا مصطفى لو كنت عرفتني الحقيقة وقتها وقولتلي ان ابني مات وإنك مش عايز الولد كنت هخليك تكتبه باسمك وكنت هربيه بردو بس على الأقل مكنتش هتحط في الوضع اللي إنت حطتني فيه ده!
وتابع وهو يشير بكفيه:
_أنا مش عارف هواجه الحاجة ازاي!! ولا آيوب نفسه لما يعرف هيعمل أيه؟!!
مال مصطفى على يد الشيخ مهران يقبلها:
_سامحني يا شيخ أبوس ايدك سامحني.
سحب كفه بدهشةٍ من فعلته التي توضح مدى عجزه:
_استغفر الله العظيم، مصمم تركبني ذنوب ليه!
بكى باختناق حجر على رئتيه وهو يخبره:
_كنت غبي محسبتش حساب للحظة دي، كل اللي كنت بفكر فيه هو عمر ابني ومراتي اللي بين الحيا والموت، والله العظيم لو كانت عرفت بحاجة زي دي كانت راحت فيها ومكنش ابني هيسامحني ولا كنت هسامح نفسي.
وتطلع له يستعطفه ليسامحه:
_كان ممكن أوديه ملجأ أو أشوف حد يعتني بيه فملقتش غيرك تكون أمين على ابني، بس خوفت أقولك فترفض كل اللي فكرت فيه وقتها إنك انسان خلوق، وهتربي ابني التربية اللي مش هعرف أربيهاله، وفي نفس الوقت كنت حزين لما عرفت إن ابنك اتولد ميت، صعب عليا كسرتك كل ما بفتكر فرحتك وكلامك عن الحمل اللي حصل بعد كل السنين دي، فكنت واثق انك هتحبه وهتديله اللي فشلت أديهوله.

وطرق بيديه معًا على أذرع المقعد المتحرك:
_أنا ظلمت ابني وظلمتك وظلمت مرتاتي الاتنين وربنا انتقملكم كلكم مني يا عم الشيخ، بقيت زي مانت شايف عاجز، وخلاص أيامي معدودة في الدنيا بسبب مرضي الخبيث (كانسر) ،عشان كده كشفت الحقيقة لابني، مش عايز اموت وأنا حامل ذنب زي ده يا شيخ مهران.
تغضنت معالمه بالشفقة تجاهه، فعاد يجلس محله وهو يهمس:
_لا حول ولا قوة الا بالله العلي العظيم، أسأل الله العلي العظيم أن يشفيك.
رفع عينيه الغائرة له حينما قبض مصطفى على كفه بقوةٍ، وبرجاء وتوسل قال:
_سامحني يا شيخ، سامحني وخلي آيوب يسامحني بالله عليك!
صوت شهقة مكبوتة جذبت انتباههما، فاستدار، الشيخ للباب حيث محل وقوف “آدهم” الباكي، يعز على قلبه رؤية أبيه بتلك الحالة ومع يعجز تدخله هو ترك فرصة عسى أن يسامحه الشيخ مهران فيرتاح والده.
تغلف قلب الشيخ مهران بضمادة طبية فور رؤيته وجه ذلك الشاب، شرد بكل لحظة مضت عليه منذ أن دلف لحياته وحياة عائلته.
أخبره مصطفى منذ قليل بأنه كان سيفشل بتربية آيوب!! لا والله لقد سبق له رؤية نبل أخلاق ذلك الشاب، سبق له ان رأى رجولته ومروءته، ما دفعه للتفكير باتجاه معاكس، أن ما حدث كانت ارادة الله سبحانه وتعالى ليحظى بابنًا كآيوب يكون عمله الصالح في الحياة من بعده!
الابن البار الذي لم ينجبه، ولم يقدر له بإنجابه، أزاح الشيخ بقايا دموعه ورسم ابتسامة هادئة هادرًا ومازالت عينيه تحتضن عين آدهم:
_اللي ابنك عمله معايا ومع عيلتي يشفعلي بأن أسامحك يا مصطفى.
وأخفض عينيه له يخبره:
_أنا مسامحك.. بس صدقني صعب ابني يسامحك انا عارفه أكتر من أي حد.
وبفخر قال:
_آيوب ابني وهيفضل ابني، أنا لو كلفت ابنك يغير نسبه فده عشان خوفي من ربنا عز وجل لكن ابني مش هيفارقني طول ما فيا النفس وحي، إنت اتخليت عنه فأنا مش هتخلى عنه ولو طالبت تقاسمني فيه اعذرني أنا هكون هنا أناني وهقولك لأ.
وببسمة شملت معنى الألم قال:
_أنا مش نبي من الانبياء أستغفر الله، أنا بشر فهكون أناني وهقولك ابني لأ يا مصطفى.
انهمرت دموعه رغمًا عنه واستكمل:
_أنا عشان محملش ذنوب أكتر من اللي هشيلها هخليك تغير اسمه وهخلي ابنك يصارحه بالحقيقة لكن يفارق بيتي ويفارق أمه ويفارقني ده عمره ما هيحصل ابدا، بس اطمن مش همنعه عنك أبدًا.

رد عليه مصطفى بلهفة:
_مش عايز أكتر من مسامحته يا شيخ، ولو فضل معاك أنا مطمن عليه بس بالله عليك متحرمنيش منه، خليه يزورني ولو مرة واحدة كل اسبوع وآ…
ابتلع باقي كلماته بمرارة الألم حينما أفاق على حقيقة صادمة، ابنه ليس طفلًا صغيرًا ليتلاقى أمر الشيخ مهران، فور علمه بالحقيقة لن يستمع لأحدٍ ولن يأتي لزيارته.
هز مصطفى رأسه بجنون وصرخ:
_لأاااا متقولوش الحقيقة يا شيخ مهران، معتش هشوفه تاني لو عرف… أرجوك متقولوش.
غامت عين آدهم بالدموع، فولج للداخل ينحني على مقعد ابيه يحاوطه بقوة ويترجاه:
_اهدى يا بابا… صحتك عشان خاطري.
استنجد به بفرحة لوجوده:
_عمر، تعالى يا عمر، الشيخ مهران لو قال لاخوك الحقيقة هيبطل يجي معاك هنا، قوله ميقولهوش حاجة، عشان خاطري يابني قوله.
قبل يديه معًا وبصوتٍ مبحوح قال:
_هعملك كل اللي انت عايزه بس اهدى.
بكى كالصغير على ذراع آدهم، فضمه إليه ومازال الشيخ يتابعهما، فابتسم وقال:
_من شخصية ابنك وطريقة تعامله معاك بيأكدلي انك كنت أب له عظيم يا مصطفى، فأكيد اللي حصل ده كان خير ليا.
ونصب عوده يخبره قبل رحيله بابتسامته البشوشة:
_اطمن أنا هخليه يسامحك، ومش هيبطل يجيلك متخافش، حتى لو عارض هجيبه بنفسي وأجيلك كل جمعة بإذن الله.
واستطرد بعدما خطى خطوتين لباب الغرفة:
_هستناك تنورني في الدكانة يا حضرة الظابط.. السلام عليكم ورحمة الله.
قالها ورحل على الفور تاركًا آدهم يضم أبيه باحتواءٍ وحبًا، فعاد به لغرفته ومدده على فراشه، ثم قدم له أدويته خشية من أن تتعثر حالته.

صف يوسف سيارته أسفل الشقة القابع بها محل عمل جمال البسيط، صعد للاعلى فتفاجئ بخلو المكان من الموظفين، ولج للداخل يتجه لمكتب جمال، فتخشبت يده على مقبض الباب فور سماعه صوت تأوهات خافتة تأتي من الداخل.
دفع الباب بجسده وولج للداخل يبحث عنه بذعرٍ، فصعق حينما وجده يلف يده حول عنق السكرتير الذي ينزف وجهه وجسده بغزارةٍ.
لوهلة فقد السيطرة على جسده وبات يردد كالصنم:

_عملت أيه تاني يا جمال؟ أنا مش ملاحق ألم بلاويك يا أخي!!!
مشطه جمال بنظرة شاملة ثم عاد لما يفعله وكأن حديث الأخير كجناح فراشة أزعجت خديه، رمش يوسف في محاولته لاستيعاب كتلة البرود التي أحاطت رفيقه، فهرع إليه يدفعه عنه صارخًا به:
_إنت فقدت عقلك ولا أيه؟؟ ذنبه أيه المسكين ده؟
حاول جمال إبعاده عن مرمى بصره الناري ولكنه لم يستطيع، فصاح منفعلًا:
_وسع يا يوسف، وأقسم بالله لأقتله، الكلب اللي بتدافع عنه ده بعني وقبض تمنى من نعمان الحقير، هو اللي، بعت الرسايل لصبا ولعمران من موبيلي وكلمهم على أنه ضربني بعربيته، ومسح الرسايل ورجع التليفون كأن لم يكن.
اندهش مما استمع إليه، ما بال هؤلاء بأصدقائه!! كأن العالم اتحد بأجمعه ليفرقونهما عن بعضهما!!
استغل جمال تصلب جسده واندفع لذلك الذي يسترخي باهمالٍ على أحد المقاعد الخشبية بعد أن تلقى عقابه، لكمه جمال بشراسةٍ تتصاعد منه كالبركان:
_هقتلك إنت واللي بعتني ليه يا *، هدفعكم التمن غالي، ايدكم القذرة اللي، اترفعت ولمست مراتي لو متقطعتش مبقاش راجل.
بالرغم من عدم فهم السكرتير للغته العربية الا أنه كان يعلم السبب وراء موجة غضبه، فمن المؤكد بأن ما فعله قد كُشف، وهو الآن يتجرع أشد أنواع الخيبات والندم لما فعله.
عاد الوعي لذلك الغائب، فجذبه من تلباب قميصه الملطخ بالدماء:
_فوق يا جمال لو قتلته هتلبس نفسك بلوة!! اينك محتاجك بلاش تعمل كده.
منحه نظرة من جحيم أخافت يوسف وجعلته يخشى ما سيفعله جمال بنعمان إن كان هذا عقاب ذلك السفيه:
_ابعد يا يوسف، محدش هيقف قدامي ولا هيوقفني عن اللي هعمله سمعت!!
كتف يديه وصرخ بمن خلفه:
_اغرب عن وجهي قبل أن أتركه ينحر عنقك الرخيص هذا!!
هرول للخارج متعثرًا بخطواته فور سماعه إنذار النجاة، بينما دفع يوسف جمال للمقعد وانحنى يصرخ بوجهه:
_إنت عايز تضيع نفسك!! محدش قالك تتنازل عن حقك بس مش بالشكل ده يا جمال.
_قولي بأي شكل أخد حق مراتي اللي استباحوها يا دكتور يا محترم؟
قالها بهدوء قد يجعلك تخمن عقلانيته ولكنه من الاساس كان يصدر من اعماق شخصًا ذُبح دون رحمة، وبقانونه من لا يرحم لا يُرحم.
خرج يوسف عن صمته يخبره برزانته الحكيمة:

_جمال أنا معاك مش ضدك صدقني، ولو عايزني أساندك هساندك وأفديك بروحي وإنت عارف، بس أنا خايف عليك من نوبة الغضب اللي إنت عايشها دي، آنت محتاج تصلح اللي بوزته باللي بتعمله ده هتعك الدنيا لانك هتبعد عن صبا وابنك اجباريًا لما يحاكموك، فبلاش ترتكب اللي يخليك تخسر نفسك.
وتابع وهو يجلس قبالته:
_أنا كنت راجع بيتي اريح بعد ورديتي بس بما إنك فقدت عقلك فللأسف مضطر ألازمك عشان أطمن إنك مش هتأذي نفسك.
انتصب بوقفته يتجه للحمام الخاص بمكتبه، لحق به يوسف فاستدار إليه يقول بتهكمٍ:
_أيه هتدخل معايا الحمام كمان؟!
مال يستند على الحائط واضعًا يده بجيب بنطاله:
_هو مفيش فرق بينا بس مش للدرجادي يعني!! اتفضل أنا مبسوط هنا ومش ناقصني حاجة فخد راحتك!
أغلق الباب بوجهه فاغلق يوسف عينيه بفزعٍ وقال:
_بني آدم همجي أقسم بالله هيعش غبي وهيموت متخلف!!
وجلس على مقعد مكتبه يلف المقعد وهو يتابع:
_Zero عقل
******
خرج من المرحاض يلف منشفته من حوله، تاركًا المياه تعبر فوق وجهه كالشلال، فجذب منشفة قصيرة يمسح وجهه ويديه ليتمكن من التقاط هاتفه الذي يعلن تمرده للمرة الثانية.
مال يجلس على السراحه وفتح سماعة هاتفه يجيب بصوته الشجي:
_شمس هانم بنفسها بتتصل!
وصلت إليه صوت ضحكاتها، وبرقتها المهلكة قالت:
_بتتريق يا كابتن والامتحانات سحلاني!
وتابعت بدلال:
_انت المفروض تستخدم مركزك ده وتخليهم ينجحوني من غير فرهدة!
أو على الأقل تديني أي جهاز أو تعلمني كام حركة أقدر أغش بيها الامتحان وأطلع زي البرنسس.
ضم منخاره يفركه بضحك:

_ده أنا كده بشجعك للفساد رسمي! وبعدين ميرضنيش يقولوا حرم عمر الرشيدي غشاشة تيجي ازاي دي يا شمسي!!
تحلت بصمتها لتتمكن من سماع صوت ضحكاته، وفجأته حينما قالت:
_وحشتني أوي.
ابتسم وهو يخبرها بعاطفة:
_مش أكتر مني يا شمس، بس خلاص هانت إسبوعين وامتحاناتك تخلص وهتنوروني كلكم هنا عشان فرحنا.
بلهفة قالت:
_طيب ما تيجي يوم تقضيه معايا وترجع.
_ازاي ده؟!
_زي الناس، مش إنت ظابط مخابرات!
_بيقولوا! وفضولي بيقولك وراها أيه الجملة دي؟
_وراها إن ظباط المخابرات بيقدروا يعملوا أي حاجة في أي وقت.
ابتسم بسخرية وقال:
_شكلك بتشوفي أفلام هندي كتير يا شمس هانم.
ضحكت وقالت:
_الصراحة شوفت أفلام كتيرة بس اللي شوفته لما قابلتك خلاني أتصدم إن الهندي الأوفر حقيقي وموجود.
ابتسم وحبها يسكن وجع يومه، فقال:
_ازاي؟
تنحنحت بخجل وهي تخبره:
_يعني كنت بشوفك كده زي الراجل الخارق، وفعلًا من أول ما شوفتك وإنت كنت بطلي الخارق.
_وأيه كمان يا شمس؟
_آآ…. ها؟
_ما كنتي ماشية كويس، كملي أنا أيه بالنسبالك يا شمس؟
بخوفٍ مضحك قالت:

_معنديش تصريحات أقول أكتر من كده، عُمران هيقتلني!!
زفر بضجرٍ وهمس لها:
_يادي عُمران اللي لاعب عليا دور حماتي العقربة وحمايا الكشري مش مقصر نهائي!!!
كبتت ضحكاتها وقالت:
_متزعلش يا حبيبي.
بعشق ردد يتذوق جمال كلمتها:
_حبيبك!!
بخجل قالت:
_جوزي حبيبي ها يا كابتن عايز أحلى من كده كلام.
ضحك بصوته الرجولي وقال ساخرًا:
_لا ده أنا كده هبقى طماع وجشع، كفايا عليا كلمة جوزي دي هتديني الأمل إني مش هرجع أشوفك بالملحفة السودة تاني، ممكن نوصل لمرحلة النقاب أو الخمار أنا وحظي النحس بقى!
وتابع يشاكسها:
_بقولك أيه يا شمس؟
_أممم
_هو عُمران أخوكي ده بيشرف على شنطك اللي بتحضريها لجوازنا، أكيد بيشرف مهو حاشر مناخيره في كل كبيرة وصغيرة خاصة بينا!
_أيوه بيختار معايا أون لاين، إنت أصلك متعرفش ذوق عُمران باللبس عامل ازاي، وبالأخص فساتين السهرة اللي اختارهالي، بالعكس ده فدني جدًا باختيار فستانيني بعد الحجاب.
قضم شفتيه معًا بأسنانه ناطقًا من بين اصطكاك أسنانه:
_طمنتيني!
وهمس بصوت ظنه غير مسموع:
_كده هعمل حسابك معايا وأنا بشتري حاجتي.
_هتعمل حسابي في أيه؟

_لا يا حبيبتي متخديش في بالك، ركزيلي إنتِ بس في مذكرتك وامتحاناتك عشان مش ناقصة تلكيكة من سي عُمران أخوكي اللي مش مفهوم ده!!!
انفجرت ضاحكة وقالت:
_وفيها أيه يعني لو جبت ملحق يا كابتن!!
ردد ساخرًا:
_أهو ده اللي ناقص! أنا أترقى وانتِ تشيلي الكحك!!
ضحكت بملء ما فيها وقالت:
_اطمن مفيش هنا الكلام ده، أنا كده كده ناجحة وبعدين أنا كمان عايزة أمتحن وأخلص عشان أكون معاك يا آدهم.
_يااه معقول!! شكل كده أخر شخص شوفتيه النهاردة كان دكتور علي، خليكي جنبه اليومين دول هينفعك قبل الجواز وبعده.
_هحتاجه بعد الجواز في أيه مش فاهمه؟
ضحك وهو يخبره بمرح:
_أي ست بعد الجواز بتحتاج لدكتور نفسي يا حبيبي!!
_وليه الرجالة مش بتحتاج؟!
بنفس وتيرة ضحكاته قال:
_بعد الدراسات اللي اتعاملت على إيد بعض الستات أكدوا إن الرجالة تنحصر لدِبَبَةٌ القطب الشمالي حيث الثلج والبرق والرعد فبالتالي مفيش تقصير عكسي علينا.
احنا كائنات بنجلط ومبننجلطش!!!
_يعني إنت عايز تجلطني وتزهق نفسيتي وتخلي أخويا يعالجني نفسيًا يا آدهم؟
_مش أنا يا عيون آدهم دول كارم وكرم بإذن الله.
_مين دول؟
_دول أولادنا بإذن الله هنجيب تؤام يا شمسي.
_ومالك واثق أوي كده؟!
_مش عارف بس حاسس إن كرم ربنا كبير بعد صبري على الابتلاء فهيجبر بخاطري بإذن الله.
_ابتلاء!!
_أيوه وهو أخوكِ أي ابتلاء بردو!! ده عمل أسود من الدرجة اللي يصعب فكها بالملح ولا بالتعويذات!!

حبيبتي انا صبري عليكي وعلى أخوكِ بمثابة الجهاد في سبيل الله! هاتيلي واحد كاتب كتابه ومش عارف يطول نظرة بريئة!!
وتنهد يخبرها:
_أنا خايف يوم فرحنا يبلغ عني إني مرتشي يا شمس!!!
*
غمس كفيه بالمياه ونثره على وجهه، يحاول أن يزيل عنه رواسب تلك الليلة القاتلة، فوجد المرآة ترتعش من أمامه وترسم له ملامح وجه زوجته المرتعشة، نظراتها التي تترجاه أن يصدقها بينما لسانها يعجز حتى عن الدفاع عن نفسها في موقف لا حديثًا بعده.
أدمعت عين جمال ومد يده بالمرآة كأنه يحاول لمس شبح زوجته الظاهر على سطحها، فوجد أنه يطالع ذاته، انقلبت نظراته للاستحقار ، ونظرات كارهة، فكور يده ولكم المرآة بكل قوته وهو يحرر آهة تضيق شريانه.
فسقط أرضًا يجلس بين الزجاج وهو يضع يديه معـًا فوق رأسه يمنع وصول صوت يوسف الذي يطرق الباب لمسمعه، بينما تنسدل الدماء من فوق رأسه وهو غير عابئ بها.
نجح يوسف بكسر الباب بعد أن دفع أحد المقاعد المعدنية بالباب عدة مرات حتى إنصاع إليه، وهرع يبحث عنه بفزعٍ.
انحنى إليه يبعد يديه عن رأسه ويشمله بنظرة قلقة:
_جمال!!
هدأت وتيرة أنفاسه فور أن اطمئن لسلامته، اتبع سير الدماء ليصل لاصابة يده فمنحه نظرة حزينة وقال:
_ليه كده يا جمال؟ عايز توصل لأيه باللي بتعمله في نفسك ده!
رفع عينيه الدامعتان له وقال:
_أنا شوهتها يا يوسف!! يارتني ضمتها وسمعتها، عمرها ما هتنسى ولا أنا هنسى، عمرها ما هتسامحني.
وبانكسارٍ استطرد:
_أنا خسرت صبا خلاص يا يوسف.
منحه نظرة حزينة ونهض يبحث بالادراج عن صندوق الاسعافات الاولية، وما أن وجده حتى عاد يضمد جرحه قائلًا وهو يباشر تعقيمه:
_صبا اللي استحملت كل ده معاك بتحبك يا جمال، يمكن تكونوا غلطوا انتوا الاتنين بس ممكن ابنكم يقرب ما بينكم ويدلكم الفرصة دي.
هز رأسه رغم عدم اقتناعه، ونهض فجأة يردد:
_خدني المستشفى عايز أشوفها قبل ما أروح مشوار مهم.

_مشوار فين؟
لم يجيبه الا بكلمات مختصرة:
_خدني ليها يا يوسف!
*
انتفضت بنومتها فور أن انفتح باب الجناح، فهرولت إليه تصيح ببحة صوتها المفقود:
_عُمــــــــراان!
ضمها إليه بيده وربت عليها باحتواءٍ، فعاتبته ومازالت تتشبث به باكية:
_كده تسبني طول الليل قلقانه عليك!! موبيلك اتقفل ومرجعتش البيت! لولا علي كلم فاطمة وجت قالتلي انك معاه وفضلت معايا طول الليل أنا كان هيجرالي حاجة.
أبعد وجهها عنه يقبل عينيها الباكية:
_بعد الشر يا حبيب قلبي.. أنا كويس والله.. بس كنت محتاج أكون لوحدي شوية وآ..
بتر حديثه ببعض الارتباك، فسألته مايا بخوف:
_وأيه يا عُمران؟
جذبها للفراش وانحنى قبالتها يتمسك بيديها ويطالع عينيها بنظرة عاشقة:
_مايا أنا عارف إنك بتحبيني، وبسبب الحب ده حاربتي الكل وأولهم أنا، خلتيني في النهاية أخضعلك وأنهزم قدامك، أنا عارف إنك قوية وصعب حد يهزمك فمش عايزك تخسري قوة شخصيتك دي دلوقتي، حافظي على اللي في بطنك يا مايا، واجهي اللي بنمر وهنمر بيه بقوة، مش عايز أحس بالقلق والخوف عليكي طول الوقت.
سكن الخوف أضلعها فسألته بشكٍ:
_ليه بتقول كده يا عُمران؟
نهض عن الأرض وجلس جوارها بحزنٍ شبع ملامحه وهو يرفع هاتفه نصب أعينهما:
_بمكالمة تليفون واحدة هعملها همحي بيها إسم شركات نعمان وللأبد، هيخسر كل اللي بناه وبيمتلكه.
واستدار بوجهه لها يخبرها بعجزٍ:
_مش قادر أعملها، حاسس إني ضعيف!! مش قادر انتقم لكسرتي ولوجعك ولا لجمال ومراته.
وببسمةٍ ساخرة تعقبها دمعة من عينيه أضاف:
_مش قادر أنتقم من اللي عراني وعرى مرات أخويا يا مايا؟

انهمرت دموعها، فسحبت هاتفه وألقته بعيدًا عنهما، ثم أمسكت لائحته تخبره بحماسٍ:
_لانك مش زيه يا عُمران، ولا عمرك هتكون زيه، وبالرغم اللي عشته لسه قلبك صافي ومتقصرش.
هز رأسه ينفي ما تقول، مرددًا بوخزٍ يطحن قلبه:
_عايز أنتقم يا مايا، عايز أتشفى فيه، بس مش قادر، خايف من لحظة الندم اللي ممكن أعيشها بعد ما أفوق! خايف أكون سبب في حسرة أمي لو جراله حاجة، نعمان هيموت لو خسر ثروته وفلوسه يا مايا.
غمست أصابعها بين أصابعه وهتفت:
_بلاش تعمل كده، فكر فيا وفي ابنك وانسى اللي عشناه يا عُمران.
رفع وجهه لها وبابتسامته المؤلمة قال:
_وجمال وصبا هينسوا! وأنا هنسى اللي جمال عمله وقاله!!
سحب نفسًا طويلًا وزفره يخفف عن ذاته:
_يوسف بعتلي من شوية نتيجة تحليل جمال، كان أخد مخدر قوي.
تهللت أساريرها وتمسكت بالحجة المقنعة:
_طيب الحمد لله، يعني اللي عمله ميتحسبش عليه يا عُمران.
مال لها برقبته وابتسم يخبرها:
_سمعي قلبي اللي بينزف كلامك وقوليله ينساه ويعالج نفسه!
ولفظ ما داخله مستطردًا:
_جمال قال اللي مينفعش بعده تبرير ولا شفاعة… نهى كل اللي بينا حتى لو كان مش واعي، أنا مدرك إنه غصب عنه ومش بارادته بس مش هقدر أتعامل معاه لإني صعب أكون زي الاول.
وتعمق بعينيها وهو يستطرد الجزء الهام:
_عشان كده يا مايا أنا محتاج أبعد.. وبترجاكِ متعارضنيش.
أزاحت دموعها وسألته باهتمامٍ:
_تبعد فين؟
رد عليها بنفس هدوئه:

_مصر… هنزل مصر كام يوم أريح فيهم أعصابي.
بلهفة قالت:
_لو ده اللي هيريحك خلاص هنسافر من بكره.
ربت على كفها المسنود لصدره وقال:
_لوحدي يا مايا.. حابب أكون لوحدي.
سحبت كفها بحزنٍ، وصاحت بعصبية:
_ليه مصمم توجع قلبي عليك يا عُمران!!
جذبها لاحضانه مجددًا يخبرها:
_بعد الشر عليكي من أي وجع… أنا خايف عليكي يا مايا حملك صعب مينفعش تركبي طيارة بحالتك دي.. ممكن متقلقنيش عليكي وتكوني كويسة إنتِ والبيبي لحد رجوعي؟
ضمت شفتيها معًا بحيرة:
_طيب هترجع أمته؟
أجابها بحب:
_معرفش يمكن اسبوعين أو تلاتة مش أكتر من كده.
ونهض يتجه لخزانته يبدل ثيابه:
_هنزل دلوقتي عشان فاطمة كلمتني من الشركة، في كام حاجة ضرورية لازم أنجزها قبل ما أحجز التذكرة.. عايزك ترتاحي لحد ما أرجع.
أومأت برأسها بخفة وتابعته وهو يصفف شعره ويستعد للخروج ومازال يخادعها بأنه على ما يرام!
**
استردت جزء ضئيل من عافيتها، فرفعت لها الممرضة السرير لتتمكن من حمل صغيرها الباكي، تحاول أن تقوم باطعامه لمرتها الاولى.
ابتسمت وهي تتأمل ملامحه للمرة الاولى، ولكن بسمتها البسيطة سُلبت منها وصرخت ألمًا من شدة تورم شفتيها التي نزفت فور ان ابتسمت، قبض حياتها وألقاها بالظلام فحتى الابتسامة حرمت منها.
مالت صبا على جسد الصغير تضمه بقوة وقد انهالت دموعها، تمرر يدها على شعره الناعم وتهمس بصوتٍ قد جف صداه:
_زي القمر يا حبيبي، ربنا يحميك ويباركلي فيك.

وضمته لصدرها ثم مالت على الوسادة تتذكر كل ما فعله بها وتنهمر دموعها على عينيها، تتمنى من صمام قلبها الا تراه بحياتها قط، فأتاها القدر بما تبغضه حينما انفتح بابها وولج من خلفه يناديها بلهفة فور أن رآها قد استعادت وعيها:
_صبــــــا!

•تابع الفصل التالي "رواية صرخات انثى" اضغط على اسم الرواية