رواية انكسار الياسمين الفصل السادس 6 - بقلم أمل مهدي
**********
شضايعلك وتلتفت
اشمأخوذ من كلبك
جنك ولا جربت من تخسر بحربك
من ترجع بلا حلم لا صوت لا ذكرى
من تلكه منك اثربس جرحك وعطره
*********
رافع _
رجعت ايمان ما تحجي وياي
اني اعرفه شكد راسها كوي تدري شكد احب ياسمين ومحذرها تندك بيها وهم تأذيها
ثاني يوم رجعنه طبيعي واني من يمي سديت موضوع الفلوس النباكن
رجعت الوالده هيه تحافظ على فلوسي احسن اضمهن يمها
محمد بعد ما شفته فص ملح وذاب ومن سألت عنه كالو رايح يم ابو يشتغل ويا
بعدين عرفت خالتي متعاركه ويا وطاردته من البيت واكيد هو الماخذ فلوسي
بديت اكبر شغلي واطوره
اخذ بيوت كامله ابنيها واسلم
المفتاح الصاحبها مثل ما يريد
واحسن
يعني اشتغل مقاول بيوت
لزمت بيتين وسلمتها وربحت خير من الله
اموري ماشيه تمام سمعتي بين العالم اجيبلي الرزق
هلمره ردت استثمر فلوسي بشكل اكبر اشتريت قطعه وقسمته بيتين وبديت ابنيها
شغل صب السكف كله بايدي
دكيت القالب وجنت كلش متحمس بشغلي
صعدت اتفقد القالب حتى نمد الشيش جان اكو خشبه مكسوره اني ما منتبه عليها
وجواها ما مخلي دعامه تسندها
دست عليها كامت اطكطك
ما اهتميت مشيت خطوتين
وينفتح الخشب جوايه واوكع
بلحظه ما شفت نفسي غير
متمدد على الطابوك
واحس شي مغروس بظهري
حاولت اكوم
بس ماكو اي حركه
كلشي بيه
مات.......!!!!
لحظات مرت رغم الوجع
ما استسلمت اديه تتحرك بس رجليه ماكو
التمو عليه العمال شالوني من فوك الطابوك
طلعوني بره كمت اصرخ من الوجع إلى درجه مخليت احد يحركني بعد
اجتي الإسعاف نقلتني واني
صارت أبالي امي وياسمين لو سمعو شيصير بيهم
لا عندي اخ ولا ابن عم بس خالي المايذكرنه
الا بالمناسبات والرجال محتار بعيشته
الوجع كتلني ربطوني على السديه انشلت حركتي ما ادري ظهري لو رجليه التكسرت لان ما احس بيهن
وكل جسمي يوجعني
بس وصلت الإسعاف للمستشفى دخلوني عمليات
الاطباء من وصف الوجع والوكعه عرفو شنو بيه
هو نفس واحد وبعد فقدت
ما حسيت غير بغرفه وصوت امي تبجي وتندعيلي هيه وخالتي
بديت اوعه وافتح عيني بس شنو من كل مكان صونده
مركبيلي امي تحاجيني واني بس أشر بعيوني مخدر كل جسمي
شي مثل الحلم احس هذا الصار كله
من بعد ثلاث ايام وعيت وعي كامل لكيت جيرانه رجال جبير واحمد
واكفين على راسي
وامي باوعتلها مو هاي امي معقوله بهاي الايام الثلاثه هيج صارت
ابتسام _ الحمد لله يمه أيست تفتح عينك وتحاجيني
رافع _ حجيت والعبره بصدري
ليش هيج حالج يمه
اريدج قويه تحافظيلي على جهالي وياسمين
احمد _ راح تشفى وتكوم على رجليك
كل احنه نريدك مو بس بيتك
رافع _ الله كريم
ظليت بالمستشفى اسبوعين
هواي ناس زارتني
حتى عباس ومحمد اجوني
ومره وحده اجتني ياسمين وايمان
وخلصنها بجي يم راسي من هاي
وبعد منعتهم يجون ماريدهن
رايحات جايات ويتبهذلن
احمد بين يوم ويوم يمي وامي نامت ويايه
خالي اجه يومين وراح معذور اذا يكعد يوم واحد ما عنده مصرف لعياله
بالأسبوع الثالث اجاني الطبيب رفع كل الصوندات
من جسمي ووراها بكم يوم طلعت للبيت
جنت قلق على رجليه احاول احركهن ما يتحركن كال الطبيب من طلعني الفقره المكسوره شديناها ببلاتين
واكو فقرات بعد متحركه من مكانها وضاغطه على الاعصاب
بس إصابتك واصله الحبل الشوكي وعينك بعين الله
رافع _ يعني بعد ما امشي....!!!
الطبيب _ احتمال بسيط كلش
بعمليه تكدر تمشي بس مو عدنه لازم بره
اعرف طبيب يسويها
ابتسام _ اودي حتى لو بآخر الدنيه
الطبيب _ وتكلف هم
ابتسام _ ميهم بس وصلنه اله
الطبيب _ بفرنسا دكتور صديقي اختصاصه الفقرات
حجيه راح اتصل عليه وأرسله كل المعلومات وصور الاشعه
واشوف شكد تكلف العمليه
وانطيكم خبر
_ والله تسويلي فضل ابني وحيد وما عدنه بس الله وهو
طلعت للبيت وبدت الصعوبات
اتبين بوضعي
حتى الحاجتين جوايه ما اصيطر عليهن
سريري جان بالاستقبال لان هواي ناس تجيني بالبدايه
بس من بعد شهر حتى احمد بعد ما شفته
اجه سلم عليه وكال لازم هو وإخوانه شغل بالحله
وعدني كل ما يجي لأهله راح يزورني
امي وايمان وياسمين يمشوني بالكرسي
مال معاقين للحمام يكعدوني وايمان وياي تغسلي وتبدل ملابسي ويرجعون يحولوني على السرير خسرت من وزني هواي
التفكير كتلني ونفسيتي ادمرت صعبه من حتى بالحمام تحتاج شخص ثاني يساعدك ابحاجاتك الاساسيه
حتى لو كان هذا الشخص أقرب شي الك تحسها
ثگيله
من رجال مسؤل عن عايلتين إلى مقعد لا حول ولا قوه
بعد لا اشتغل ولا عندي راتب
وبركبتي امي واختي وايمان وولدي وحتى خالتي خطيه
ابتسام _
من بعد شهرين اتصل بينه الطبيب وكال نسبة نجاح العمليه ٢٠ بالميه
وانتو بكيفكم اذا تردون ترحون حتى ابدي أسهل أمركم بالتقارير والسفر
ما كان كدامي غير هذا الامل
البسيط عسى ولعل الله يجبر بخاطرنه
فتحت الكنتور ولميت شكو فلوس اشتغلهن رافع هذا وكتهن المن اريدهن لكيتهن ما يكفن
جمعت ذهبي وذهب ياسمين وذهب ايمان لازم الملي فلوس العمليه
ايمان سكتت بس حسيت كوه انطتني ذهبها
_ لا اضوجين انشالله يطيب رافع ويجيبلج الاحسن منه
من عرف رافع گال _
_ لا يمه عساني لا مشيت هاذه ذهبجن ضمنه الايام الضيق
ابتسام _ وليش اكو ضيق اكثر من هذا النمر بي خلينه انسوي العمليه وتوكف على رجليك وترجع تشتريلنه
رافع _ ما اضن ارجع الظهر لو انكسر محد يجبره
ابتسام _ الله قادر يجبره لا تيأس كل احنه نروحلك فدوه خلي امللك بالله
رافع _ ونعم بالله
جان يائس ومتكأب واني حايره بي اشلون يرجع مثل قبل يوكف كبالي
جمعت كلشي عدنه وهم بعد احتاج ما ظل عدنه غير البيت
رحت للدلال ما يدري رافع
وعرضته للبيع
يومين والدلال هو نفسه اشترى مني عرف محتاجه الفلوس بسرعه جابلياهن...
اخذت الاحتاجهن فوك فلوس العمليه والباقي
وصيته يلكالي بيت على كد البقن حتى لو بغير منطقه
واشتريت بيت يكفينه بس مو جديد والمنطقه مو هلكد
كل هذا مو مهم المهن رافع يكوم ويمشي على رجليه
مشيت بالجوازات والطبيب
لكالي طالب يدرس على نفقت الدوله هناك بفرنسا
يتلكاني من المطار ياخذني
للطبيب ويظل ويانه علما تخلص العمليه ونرجع مقابل مبلغ يرافقنه ويترجمنه
واني اتفقت ويه راجحه
تشيلهم باثناء سفرنه البيتنه الجديد
من نرجع عادي يعرف رافع بس هسه اخاف يأثر على نفسيته
واتفقت وياها بعد تعوف بيتها علويش وحدها كاعده تجي ويانه تسكن اشو الوحده حتى محمد راح لابو
اليوم موعد طيارتنه الفرنسا
اخذت رافع ادفع بي بالكرسي مال معاقين
بنص المطار نزلت دمعتي واني اشوفه وحيد الناس الغربه تساعدني
رفعت راسي غاصت عيوني وعبرتي بالسماء الوسيعه
يابو خيمة الزرگه
تدري ما عندي غير هلولد وكلتك بامري وامره
ماريد غير يرجع يمشي على رجله وانته بس تكدر تشافي
وصلنه فرنسا نزلنه من الطياره
وكعدت بالصالة ويمي رافع
اباوع بالوجوه
ناس اشكال لا أعرف لغتهم ولا دينهم اباوع الرافع كاعد على الكرسي وعيونه محتاره فاقد الحيله
لا حول ولا قوه الرحله تعبته صار كم ساعه ما نايم
اتقدم علينه شاب ...
كرار _ رافع مو
رافع _ باوعتله اي
ام رافع _ انته كرار
_ اي خاله اعذريني تاخرت
اشويه عليكم
_ ما تدري يا ابني هلشويه اسوت بينه اخوك ما يتحمل تدري بحالته والغربه....
كرار _ ولا يهمج اني اعتبريني ابنج انشالله من اليوم ما فارككم
اسمحيلي اني ادفعه
اخذ الكرسي مني يدفع بي لبوابه الخروج
واني اسحب بالجنطه ورى امشي
طلعنه وكفنه بره
كرار _ خاله راح اوديكم كبل للمستشفى الطبيب منتظركم حاجزين الكم غرفه
ابتسام _ والله يا ابني وياك شتكول
وكف تكسي حضن رافع وصعده واني صعدت يمه
وطبك الكرسي وصعده هم اباوع صعد الجنطه
و كعد بالصدر يم السايق
وحجه ويا فرنسي
وصلنه للمستشفى
دخلنه
بالبدايه رحنه للطبيب الراح يسوي العمليه
كعدنه بالصالة مال الانتظار
كرار راح حجه وياهم ورجع كعد
_ اكو حجز باسم رافع شويه وندخل
دكت نغمه مال جرص التفت كرار على الشاشه باوع
كال يله خاله هذا سرانه ندخل للطبيب ينتظرنه
دخلنه وكعدنه على كراسي كدامه
رجال ستيني احمر ابرش وعيونه زرك ولابس نظارات
رحب بينه وبعدين بده يفحص رافع وويا ممرضه تساعده كلامه كله بالفرنسي يحجي وكرار يترجم كمل رجع كعد وره المكتب مالته
وبده يشرح
من كمل كال الرافع وكرار يترجم
راح يجون ياخذوك الممرضين الغرفتك حتى نكمل التحاليل
و بعد يومين العمليه
كرار _ خاله اني راح ارافق رافع للطابق الثالث هناك غرفته وانتي بعد ظلي هنا
ما يرضون تصعدين ويانه
واني ارجعلج
ابتسام _ انته صدك تحجي اني لعد المن جايه غير ابقى ويه ابني
كرار _ هنا بس المريض ياخذو
ماكو مرافق ويا ولا تخافين
عدهم ممرضين همه يهتمون بي
اني بحكم دراستي راح يوميه اكون ويا ما افاركه
ابتسام _ تعال اتصلي على الدكتور مالتنه هسه
كرار _ رحت دكيت الرقم عدهم كابينات بيه تلفونات بفلوس نخلي العمله وندك الرقم رد عليه الدكتور بالعراق
الطبيب _ هلو كرار وصلو الجماعه
كرار _ وصلو وقابلنه الطبيب
وبعد يومين العمليه ..
ابتسام _شو انطيني احجي ويا
اشلونك دكتور
الطبيب _ هله حجيه
ابتسام _ احلفك بعزيز كلبك تكل الصاحبك الدكتور الفرنسي ابقى ويه ابني لعد المن جايه
الطبيب _ يوميه اصبح انتي ويا اني متفق ويا الطبيب بس ما تباتين يمه
النظام هناك هشكل
ولا تخافين همه يعرفون اشلون يعتنون بي...
ابتسام _ حاولت توسلت ما فاد هذا قانونهم
اخذني كرار وكال مراح اوديج للفندق اخذج الطالبات عراقيات يدرسن هنا منحه ويانه وحده مسيحيه اسمها رغد
والثانيه من ربعنه اسمها ازهار حبابات ومثل خواتنه
وصلنه البنايه دخلنه هوايه شقق
كرار _ هنا كلهم طلبه عراقيين يدرسون مراح اضوجين خالتي
وعتبرينه كلنه ولدج
ابتسام _ تسلم يا ابني
اني كلبي نار على رافع اخاف يحتاج شي ومحد يمه
كرار _ هسه نخابره واخليج تحجين ويا
ابتسام _ صدك احجي ويا.....!!!
كرار _ لعد اشلون عادي بأي وقت تكدرين تحاجي
ياسمين _
ويه متحاناتي صار حادث رافع تدمرت نفسيتي امي
ويه رافع بالمستشفى ما اشوفها
اجت للبيت مرتين سبحت وبدلت ملابسه مو هاي امي القويه الحلوه
كبرت سنين فوك عمرها
الوكعه الوكعها رافع حطمتها
ما كدرت اقره وخصوصا من رحت زرته بالمستشفى حسيت انكسرت
بي
دموعي ما نشفت
ما مصدكه رافع بعد ما يكوم ويمشي
جنت احسه الرجل الخارق المستحيل يتمرض لو يتكسر مثل ما شفته امدد وحالته حاله
فكرت بالسيد ليش اختفى يعني معقوله ما يشتاقلي ما يفكر بيه
اقلها رافع صاحبه ما يسأل عنه
معقوله ما سمع بالحادث الصارله
الناس كلها سمعت واجتنه
اخذته امي وسافرت وكلنه تعلقنه بأمل بسيط يرجعلنه يمشي على رجليه
من سافرت امي بدينه انشد غراضنه
ونتهيأ للانتقال البيتنه الجديد
اخذتنه خالتي راجحه اني وايمان وأولاد رافع حتى نغسل البيت ونظفه قبل ما ننقل اثاثنه
انصدمت وحزنت واني اتنقل بالبيت من غرفه الغرفه
البيت قديم بناءه ومحتاج تصليح
والمنطقه هوسه قريبه على السوك
يعني نطلع من الفرع مالتنه نمشي خمسين متر وندخل بالسوك
اباوع ساكته المهم عندي رافع يسوي العمليه
ايمان _ هو هذا بيت لو خرابه اشلون خالتي جابتنه هنا
راجحه _ المهم رافع فدوه اله البيت وكل شي
ايمان _ المهم رافع واحنه شنو اشلون انعيش وذوله ولده منهو الهم اشلون اكبرهم بهاي الخرابه
راجحه _ عمت عينج ولج محتاره بنفسج
انتي وولدج من غيره ما تسون شي بس ياحيف على الوكت
الطلع السانج وصرتي تحجين عليه
ايمان _شترديني اعيش بهاي الخرابه واسكت خل يجي رافع واعرف شكله من هاي ما كالتله
راجحه _ تعيشين وتحمدين ربج
ونجبي ونظفي
احنه بياحال ونتي ادورين بيوت
ليش رافع مو رجلج وابو بيتج....؟؟
واحنه ملتهين انظف وايمان ادردم دخل علينه محمد
تفاجئت بي سلم
اني ما رديت عليه السلام
محمد _ شنو بنت خالتي شدعواج عاد ردي السلام
ياسمين _ هله بيك
راجحه _ دزيت عليه يشيلني لازم رجال ويانه
ياسمين عادي خاله واذا اجه
لاحظت مسوي روحه يتفقد بالبيت
وهو يباوعلي من جوه الجوه
ما هتميت اله اني اصلا اكرها ولا احب احجي ويا
ثاني يوم راح هو وخالتي أجروا لوري وحملنه كل غراضنه وغراض خالتي
هم فراش عدها وغراض كلهن حملوهن
محمد صعد بالوري وطلع كدامنه وخالتي أجرت تكسي اخذتنه بي
استقرينا ابيتنه الجديد بالنسبه انه جديد
بس هو طراز قديم وتعبان اسمه بيت بس هو جبير وبي حديقه
زغيره
ظل يمنه محمد هاي الفتره يرتب ويانه صلح البوريات وبدكل كم نقطه بالكهرباء
خالتي اجيبله وهو يبدل
ضايقني حيل بنظراته
وايمان استغلت الوضع وسوتني خدامه تعاي منا وروحي منا
رتبنه البيت وفرشنا طلع غير شكل بس شنو حيل تعبنه
كملت تنظيف ودخلت ارتاح
تمددت على سريري بغرفة امي وراده الباب
ايمان بغرفتها هيه وولدها
وخالتي طالعه للسوگ
مغمضه بس ما نايمه افكر بوضعنه برافع تخيلته يدخل علينه البيت وهو يمشي...
حسيت اكو نفس يمي
فتحت عيوني .....!!!
واشوف محمد مدنك عليه الا شويه
يصير فوكايه....
كمزت من السرير. وصحت
ياسمين _ هاي شعدك اهنا
اطلع بره
محمد _ على كيفج شسويتلج
ياسمين _ جسمي كله رجف وصرخت بدون شعور
اطلع بره....بره
اجتي ايمان على صوتي
شكو ليش اصيحين
ياسمين _ شافتني ارجف وعصبيه
طلعي اخوج من غرفتي
ايمان _ انته اجابك هنا وشسويتلها
محمد _ كل شي ما مسوي اجيت
أكلها صبيلي اكل
اشو صرخت وكلبت الدنيه
ياسمين _ لا انته ما كلتلي رايد اكل
محمد _ هو اني لحكت احجي
كمزتي بوجهي عبالك شفتي جني شبيج بابا.....!!!
ايمان _ على كيفج يمعوده عبالي مسوي شي
ياسمين _ والله جان .....
ايمان _ اش اش فكينه من تهايمج
تعال نطلع مو جديده عليها ليش مو تهمتك اتبوك فلوس رافع
اخذته وطلعت ....
واني قفلت الباب بسرعه ظليت بمكاني ابجي
اشلون فروها عليه هيه واخوها
شويه وسمعت خالتي رجعت
فتحت الباب وطلعت
خالتي حنينه وطيبه وحقانيه ما تقبل بالباطل
بس لو كلتلها راح اصير مشكله ويمكن ما تصدكني
ويجوز صدك جاي يريدني اصبله غده
خلوني حتى اني اشك بنفسي
راجحه _ استغربت ..شبيج ياسمين
يمه ليش واكفه وصافنه بوجهي
شنو باجيه
ايمان _ اهو بدت بحركاتها
ياسمين _ باوعت على ايمان
وكلت اذكرت امي ورافع وبجيت
راجحه _ سوده عليه حبيبتي تعالي يمي ...وحضنتني
انشالله تنجح العمليه ويجون لا تفكرين يجون
ولتفتت على ايمان
شنو محمد ما اجه....؟؟؟
ايمان _ اجه وغديته وصعد ابغرفتج نام
راجحه _ اي خطيه خلي نايم
اجه تعبان لازم شغل حماله بجميله
ويه واحد يكول يوميتي زينه
راجحه _ يعني ما يرجع يشتغل ويه عباس
ايمان _ شنو ما كلج صار أشكد من عايف ابويه ويشتغل وحده
راجحه _ اي مو اكول عباس يصير حنين على ابنه مو بالحيف
المهم يشتغل وماشي عدل احنه شريد...
ايمان _ يمه محمد متغير مو ذاك محمد الضارب الدنيا عرض الحايط
راجحه _ النفسه يمه علوى شريد منه
ايمان _
اخذت محمد وطلعت من غرفة ياسمين
اسويتلها ولك البنيه مثل السعفه ترجف
لا عبالك دافعتلك يعني صدكتك
ادري بمصايبك
محمد _ والله كلشي ما مسوي بس جنت اباوع عليها
ايمان _ وليش يابه تباوعلها نصيحه محمد تره رافع متحلف بيك
لا اسوي مصيبه تخلي يندمك
محمد _ ههههه والله ضحكتيني يندم منو لج بابا رافع خل يحتار بحاله انتي اصدكين يطيب خلص انتهى
حتى انتي من هسه اكلج دوريلج على رجال غيره
كاله وهو يضحك
ايمان _ عزه بعينك شلون هيج تحجي ولك
وضربته... هههه
صفنت يعني مراح يصير زين
محمد _ وين صفنتي....!!!!
ايمان _ برافع تدري خالتي لمت العدها والماعدها حتى تسويله عمليه
محمد _ ......!!!!!
معلينه هسه من رافع اريد احجي وياج بموضوع
ايمان _ خير اللهم خير شعندك
محمد _ ياسمين عاجبتني مدا اصدك عفتها سنه ارجع الكاها مره شحلاتها
ايمان _ امممم وتكول دخلت غرفتها أكلها تصبلي اكل... مو
عرفتك تكذب ....
محمد _ هسه اكذب ما اكذب عوفينه اني دا اشتغل ويوميتي زينه شلون اقنع امج تخطبها اليه
ايمان _ تقنع امي لو رافع لو خالتي لو صاحبة الشأن ياسمين خانم
المدلله...
- يتبع الفصل التالي اضغط على (انكسار الياسمين) اسم الرواية