رواية احفاد الطوبجي(1) الفصل السادس و الثلاثون 36 - بقلم اميرة اسامه
سامر...وانت يا علي؟
علي...زي ما عصام قال لحضرتك أتقدمت للشغل مع صلاح المعداوي بعد عصام ب3 شهور وعرفت عن الشغل بالصدفه عن طريق طارق ابنه ونفس الكلام اللي عصام قاله مكانش عندي سبب للرفض عشان اقدم في مجموعه الطوبجي لانه كده كده كان هيقفل مقر الشركه وانا وقتها كنت محتاج للشغل جداً عشان جواز اختي ابويا راجل كبير صرف عليا كل اللي حيلته عشان اقدر اخلص تعليمي وبعدها تعب وخرج معاش مكانش في حد يساعد في جواز اختي غيري وافقت على كل طلبات صلاح المعداوي وقدمت بعد عصام بشهر.
سامر....ومقدمتش ليه مع عصام وقتها ليه يعني استنيت شهر ده كان جزء من اللعبه؟
علي...لأ خالص بس في الفتره دي كان ليا اتنين صحابي ودفعتي لما عرفوا اللي حصل وان الشركه هتقفل عرضوا عليا اننا نشتغل مع بعض ونحاول احنا نعمل شركه تسويق ودعايه وإعلان مع بعض عجبتني الفكره جداً وبصراحه اتحمست خصوصاً اننا هنبقى مع بعض وهتبقى خطوه كويسه اننا نأسس شركه خاصه بينا
سامر...وايه اللي حصل ؟
علي...لما قعدنا وحاولنا نعمل ميزانيه طلع المبلغ مش صغير كل واحد فيهم اهله كانوا هيساعدوا ويقفوا معاه بالمبلغ بس انا وقتها مكانش معايا لا حد يساعدني ولا معايا حتى حاجه ابيعها فا قررت اخرج ودخل وقتها بالنصيب اللي كان مفروض ادخل بيه أخوا واحد صاحبنا تالت.
ورجعت تاني لصلاح وقولتله اني موافق وروحت قدمت و أتقبلت على طول.
سامر : تمام يعني في النهايه اتجمعتوا تاني انت وعصام طيب ايه بقى الطلبات اللي طلبها منكم
في البدايه قولتوا انه كان محتاج حاجه تدين شغلهم عشان يوقعهم ايه اللي وصل الأمور لسرقه خمسه وعشرين مليون جنيه؟
عصام : حاولنا نكتشف أي ثغره توقعهم اي شغل شمال اي ارقام غريبه اختلاسات اي حاجه لكن ملقيناش الشغل كله كان سليم
لما صلاح المعداوي عرف كان هيتجنن وبما اننا بقينا المسؤولين عن ملايين داخله وخارجه طلب مننا نختلس مبالغ من الطلبيات اللي بتدخل المجموعه.
علي: في البدايه رفضنا بس هو ليه طريقه تخليك تقتنع بيها ومتخليش حد فينا يحس بالذنب.
سامر: مش فاهم طريقه ايه؟
عصام: يعني يا باشا أستعطاف وكلام كتير عن ان الناس دي آذوه جدا دمروا حياة ولاده واقنعنا انهم فعلاً عصابه مش مجرد رجال اعمال ناجح قالنا ان ابنهم كان شغال معاهم واكتشف شغلهم الشمال ولما قرر يفضحهم فضلوا مراقبينه وفي يوم فضلوا يلحقوا على الطريق هو وبنته لحد ما العربيه اتقلبت بيهم ومـ ـاتت صدقنا يا باشا محدش فينا كان يعرف القصه الحقيقيه خلانا نتعاطف معاه و بدأنا نساعده بالفعل وبقينا ناخد في البدايه ارقام بسيطه.
علي: لما حسينا ان مفيش حد حاسس بينا اصلاً بقينا نزود المبالغ الطلبيات وقتها كانت كتير جداً تقريبا اليوم الواحد بيخرج حوالي 50 طلبيه سيراميك الشغل كتير لدرجه ان محدش حس بالفلوس اللي بتنقص قدرنا نلعب في الورق باحترافيه ونسجل ارقام غير الارقام وطلبيات غير الطلبيات حتى الفرز بتاع السيراميك كنا بنخرج الفرز الاول على انه فرز تالت والفرق كنا بناخده.
زيد كان قاعد بيسمع كلامهم وهيتجنن.
سامر: طيب الفلوس دي كلها كانت بتروح لصلاح
عصام: تقريباً جزء كبير منها في البدايه كانت الفلوس بتتقسم على اربعه هما نص الفلوس و النص التاني ليا انا وعلي بعد كده لما بقينا ناخد اكتر وقتها قال انه جاتله فكره تانيه وهي ان المبلغ اللي يجي يتشال منه جزء كبير على جنب وبعد ما نوصل للهدف المطلوب نأسس مجموعه كبيره ونعمل حاجه ننافسهم بيها
سامر...وايه هو الهدف من وجهه نظره؟
علي...اننا نوصل لتارجت 100 مليون.
رفع سامر حاجبه بإندهاش 100 مليون جنيه ده جبار.
عصام: هو ده كان هدفه يا باشا قال نفضل زي ما نفضل المهم نجمع المبلغ بس المهم يكون بعقل ومن غير ما حد يلاحظ
زيد: معلش يا سامر باشا هقاطعك بس في سؤال مش عارف مسألوش.
سامر : اتفضل يا باشا
زيد: في الفتره دي محستوش بالندم مصعبناش عليكم وانتوا بتمدوا أيدكم على شقانا بلاش كل ده ضميركم موجـ ـعكوش لما اديناكم الثقه دي كلها انا عارف ان يمكن دي غلطه كبير في الإداره عندنا والمفروض مكناش نثق في حد بس الفتره دي الشغل كان كتير في المجموعه كلها مش بس مصانع السيراميك والسفر كان اكتر يمكن ده مش مبرر لسوء إدارتنا بس انتوا ايه الجحود اللي كان فيكم ده.
عصام: صدقني يا باشا زي ما قولت لحضرتك كان معمولنا غسيل مخ ومش هكدب عليك يا باشا ظروفنا اللي كنا فيها والفلوس اللي كانت بتدخلنا طمعتنا اكتر ويمكن مـ ـوتت ضميرنا الفلوس عمت عيننا وبقينا زي صلاح وابنه كل همنا نجمع المبلغ و معلش يا باشا انا اسف المال السايب مش بس يعلم السرقه ده يمـ ـوت الضمير و يزغلل العين واحنا كل حاجه كانت متاحه قدامنا.
سامر: طيب صلاح المعداوي كان حالف يحرق قلب العيله دي تقدر تقولي كان المقصود بكلامه ده ايه ؟ يعني الهدف الوحيد كان السرقه ولا في حاجه تاني
علي: صدقني ياباشا بعد الكلام اللي عرفته من حضرتك وحقيقه اللي حصل انا مقدرش اقول ايه هو كان هدفه.
عصام: بالظبط يا باشا ويمكن الجمله اللي اتقالت كان يقصد بيها الفلوس عموما يا باشا صدقني احنا قولنا كل حاجه نعرفها وربنا عالم اننا مخبيناش اي تفصيله وانا عن نفسي عارف اني غلطت ومستعد لأي حاجه.
سامر: تمام يا عصام المهم الوقت عندكم استعداد تقولوا كل الكلام ده تاني قدام صلاح وابنه وتواجهوهم باللي اعترفتوا بيه.
علي: اه يا باشا انا مستعد
عصام: وانا معنديش مانع بس اخر كلمه ياباشا لو توقعي كان صح في الفتره الأخيره يبقى زمان صلاح المعداوي وطارق هربوا.
سامر: توقع ايه مش فاهم؟
عصام: لما بدأنا ناخد مبالغ اكتر حسيت بحاجه مريبه كنت بلمح ديماً شخص ورايا في كل مكان ولما اتكرر الموضوع قولت لعلي انا حاسس ان صلاح بيخوني و مخلي راجل يراقبني وحكيتله اللي حصل بدأ هو كمان يركز إذا كان في حد بيراقبه ولا لأ وفعلاً بقى يلمح واحد وراه في كل مكان وعرفنا اننا متراقبين 24 ساعه وقتها علي اضايق وقاللي نواجهه قولتله لأ سيبه احنا كده كده مش بنعمل حاجه تخليه يشك فينا سيبه يطمن وفنفس الوقت منحسسوش ان ده مضايقنا ومن يومها وهما ورانا ديماً وبيتهيألي لو توقعي صح وصلاح مخوننا فا زمان الرجاله بلغوه واكيد هرب .
سامر: تمام عموما احنا هنتصرف.
زيد: بغضب بسيط سامر باشا حاول كمان تطلع امر بمنعهم من السفر عشان انا واثق ان دي اول خطوه هيعملوها
سامر: اطمن متقلقش كل ده احنا هنعمله بس لحد ما ده يحصل تفضلوا محافظين على هدوئكم
زيد: تمام يا باشا
بعد وقت بسيط خرج زيد بعد ما اتحبس علي وعصام 4ايام على ذمه التحقيق وطلع قرار بالقبض على صلاح وطارق المعداوي وقرار بمنعهم من السفر.
خرج زيد وحكى لنادر ويوسف كل حاجه وبعدها مشيوا وفضل زيد حاسس بالقلق اكتر واللي حصل مريحهوش.
.........
في ڤيلا الباشا.
رغم النار و الصدمه اللي كانت حاسه بيهم فيروز ورغم الوجـ ـع اللي كان في قلبها إلا أنها كانت هاديه هدوء مريب جداً ولأول مره تكون في الحاله دي وقررت انها متواجهش وتركز معاهم أكتر مهما كان اللي شافته من نظرات وهما بياكلوا لمسه حسام ليها في الجنينه تغيير حسام في الفتره الأخيره إلا ان كل ده بالنسبالها مكانش دليل ويمكن تصرفها ده مكانش تبرير للي شافته على قد ما كانت حابه تتأكد اكتر وقررت تركز مع حسام وسما وتدور وراهم
قررت متبوظش حياتها وتظـ ـلم بنتها اللي جايه في الدنيا و تحرمها من ابوها يمكن فيروز حبت حسام لدرجه كبيره كانت ضعيفه قدامه اتنازلت عن كرامتها كتير اوي عدت حجات اكتر لكاريمان عشان خاطره في عز الوقت اللي عمره ما وقف معاها فيه بالعكس كان ديماً واخد صف امه في الغلط كان بيخـ ـاف على شعور امه وعمره ما ردلها كرامتها أتعايرت كتير بعدم الخلفه سمعت كلام يدمر نفسية أي ست وكانت بتعدي مكانتش بتحكي لاي حد من اخواتها ويوم ما كانت بتحس انها مش قادره كانت بتحكي لروح
والوحيد اللي كان بيقف في ضهرها هو منذر وبس عشان كده قررت تكون دي آخر فرصه وتبطل ضعف وتحاول تشوف اللي بيحصل حواليها .
نزلت فيروز عشان تتعشى بعد ما الشغاله قالتلها ان العشاء جهز ومنذر وحسام تحت.
وفقت على درج السلام من فوق ونزلت بهدوء وهي عينها بتدور على حسام لمحته واقف بيكلم سما و معاهم كاريمان وبيضحكوا سابتهم كاريمان وبعدت وفضلوا واقفين وقريبين لبعض بشكل غريب يكاد يكون مفيش غير اتنين سم بينهم خدت نفس طويل ونزلت بهدوء مريب وعلى وشها ابتسامه حاولت على قد ما تقدر تكون هاديه ومتعكسش اللي جواها من نار.
اما حسام وسما مكانوش مركزين خالص وواقفين يتكلموا ومنسجمين على الأخر قربت فيروز منهم واول ما لمحها حسام تلقائياً خد خطوتين لوراء وكان باين عليه الارتباك رغم أبتسامته ليها ووقفوا الكلام مره واحده
فيروز...بإبتسامه قربت منه وباسته حمدالله على السلامه.
حسام...بإبتسامه مرتبكه الله يسلمك يا حبيبتي عامله ايه
فيروز...الحمد لله.
حسام...ايه كنتي نايمه ؟
فيروز...لا خالص بس طلعت من شويه خدت شاور و قولت اريح شويه لحد ما ترجع.
حسام....طيب طمنيني على القمر الصغير.
فيروز...بابتسامه حطت ايدها على بطنها الحمد لله بخير.
سما....بابتسامه صفراء هروح اشوف ماما وطنط.
أبتسمتلها فيروز وهزت راسها من غير كلام.
دخل منذر كان معاه تليفون مع زيد بيحكيله اللي حصل.
منذر...بإبتسامه فيروز عامله ايه.
فيروز ...بخير يا منذر.
منذر...وفيروز الصغيره🤨
ضحك حسام وبص لفيروز بقولك ايه المجنون ده عايز يسمي البت فيروز أتصرفي معاه بقى انتي😂
فيروز...بإبتسامه وانا موافقه على أي حاجه يقول عليها منذر.
حس منذر بقلبه بيدق واترسمت على ملامحه ابتسامه جميله.
حسام....🤨🤨يعني انتي موافقه على الجنان ده؟
فيروز....وانت معترض ايه مش عاجبك اسمي ولا ايه؟
حسام....لا مقولتش كده انتي عايزه توديني في داهيه ولا ايه🙈 بس ليه يعني اللغبطه ما نخلي في اسم جديد في العيله وبعدين بقى انا مش عايز غير فيروز واحده في حياتي😉❣️
أختفت ابتسامه منذر بالتدريج وبقى مرتبك
فيروز....امممم انت بتحاول تخلي الكلام احلى بعد العك اللي عكيته صح يا منذر🤨
منذر...بإبتسامه صراحه انا شايف كده وبعدين انت تطول يبقى عندك نسخه مصغره من فيروز في الشكل والاسم🥺
فيروز...قوله عشان شكله كده مش عارف قيمتي.
حسام...انت بتهدى النفوس ولا ايه ياعم منذر😏
منذر: انا 😎محصلش😉
فيروز: مشيت خطوتين وراحت وقفت جمب منذر بصلها منذر وهو تايهه ريحتها وقربها منه حسسته انه طاير😇❣️
عموماً يا حسام باشا انا ومنذر بقينا فريق واحد و موافقين على اسم فيروز.
حسام...بضحك الله هي أتقسمت فرق بقى كده🙈 طيب عموما انا مستسلم وموافق طبعاً
فيروز بإبتسامه لمنذر غمزتله بشقاوه مقدرش يقف قدامنا😉
منذر....🤨مين ده اللي يقف قدامنا وانتي فاكره لو كان رفض كنت عبرته انا عمها وكنت هكتب اسمها بنفسي🔪
فيروز...خلاص بقى الطيب احسن هو عرف غلطته🙈
كاريمان....يلا يا ولاد الاكل جهز بترغوا في ايه ده كله.
حسام....ابداً ابنك و مراتي عملوا عليا فريق ضدي
كاريمان....بضحك ليه عملتلهم ايه بس.
حسام....ابداً كل الحكايه اني بقول رأيي ابنك العاقل واخد قرار يسمي بنتي بنفسه.
كاميليا...مش اخوك الكبير وعمها يسمي براحته.
كاريمان...وعايز يسميها ايه بقى
حسام...ناوي يلغبطنا ويجبلنا جنان وعايز يسميها فيروز ويبقى عندنا فيروز الكبيره وفيروز الصغيره.
كاريمان..على فكره في ناس كتير بقت بتعمل كده.
سما...بإبتسامه خبيثه اه كتير بس يعني هو من قلة الاسامي مافي اسامي كتير حلوه صراحه حسام عنده حق يعترض.
منذر....هو مش من قلة الاسامي فعلاً بس بردوا اسم فيروز احلى.
فيروز....بإبتسامه قربت من حسام وحبت تشوف ملامح سما ايه عندك اعتراض😍
حسام...بأرتباك ابتسم لا ياستي خلاص انا رفعت الرايه ليكي انتي والمفتري سموها زي ما انتوا عايزين.🤨
قعدوا كلوا وفضل منذر وفيروز يناقروا في حسام ويضحكوا لاول مره فيروز تكون بتضحك وبتتكلم كتير يمكن منذر استغربها بس محبش يركز كان مبسوط بالتغيير ده اوي.
بص حسام على سما كانت باصه في طبقها وقالبه وشها حب يخليها تبتسم وتفك مد رجله من تحت تربيزه السفره لمس حرف رجلها بصتله بسرعه سما بصدمه
اول ما عينها جات في عينه أبتسمت بدلع وبعدت عينها عنه
الكل كان بيتكلموا ويضحكوا وهما في حته تانيه خالص في الوقت ده ضـ ـربت فكره شيطانيه في راس سما فضلت تمد رجلها لحد ما لمست رجل فيروز وعينها على حسام ومبتسمه
اتصدمت فيروز اول ما رجل سما لمستها وبسرعه بصت ناحيه سما لقتها باصه لحسام و كأنها في دنيا تانيه بقت تبصلها وتبص لحسام الأتين مبتسمين وبيبصوا لبعض بنظرات غريبه وفي حاجه غلط بتحصل بينهم.
حاولت تكون هاديه وكأن مفيش حاجه حصلت وكملت اكلها عادي
بصتلها سما بطرف عينها وهي مبتسمه😈
بعد وقت بسيط طلعوا كل واحد على اوضته عملت فيروز نفسها نامت واول ما حسام أطمن انها نامت قام بهدوء مسك موبايله وفتح الواتس لقاها باعته رساله.
قبل ما يفتحها بص على فيروز كان باين انها غرقانه في النوم.
فتح حسام رسالتها وأبتسم.
سما: ينفع الجنان اللي عملته ده افرض كنت أتخضيت وصوت كنت هقولهم ايه.
بعتلها حسام..
حسام : كنتي قولتلهم قطه لمست رجلي
سما: قطه😂😂 ولا قط شقي وقليل الادب
حسام: ده على اساس ان القطه اللي كانت قدامي كانت مؤدبه😉
سما: طيب اعمل ايه كنت واحشني🥺
حسام: انتي وحشاني اكتر
سما: عارف نفسي في ايه الوقت
حسام: ايه؟
سما: نفسي تيجي تحضني🥺
حسام: وانا كمان ياقلبي بس ازاي بس مش هعرف الوقت
سما: خلاص نخليها بعدين وهحاول أستحمل❣️
حسام: طب يلا روحي نامي بقى احسن خلاص انا فاضلي شويه واتجنن واجيلك انا مش على بعضي ومش مسؤول عن اي جنان
سما: بدلع لا وعلى ايه الطيب احسن تصبح على خير يا حبيبي.
حسام: وانتي من اهل الخير يا قلبي❣️
قفل حسام التليفون و هو مبتسم و قام دخل على الحمام.
فتحت فيروز عينها بسرعه وفضلت باصه على باب الحمام بترقب وقلبها بيدق بطريقه فظيعه مسكت موبايله بسرعه
وهي ايدها بتترعش فتحت الواتس اخر محادثه كانت من سما زي ما توقعت فتحتها وفضلت تجيب الكلام من فوق وبقت تقرأ بسرعه وهي مصدومه ودموعها بتنزل من غير اي كلام💔🥺
كانت حاسه ان قلبها هيقف وبسرعه خدت اسكرين شوت للكلام وبعتته عليها وبعدين مسحت المحادثه ومسحت الصور وسابت من ايدها موبايله بسرعه وحضنت موبايلها وهي متغطيه
بتحاول تهدي دقات قلبها اللي بيتصارع مع نفسها بتحاول تسيطر على دموعها وتسيطر على رعشه جسمها قبل ما يخرج💔
خرج حسام في الوقت ده كان باين عليه انه خد دش سريع وراح نام جمبها حس ان فيروز بتترعش وبتتقلب كتير.
حسام : فيروز فيروز
حاولت فيروز تجمع صوتها اللي وقف في حلقها وحاولت يبان طبيعي عشان ميحسش
فيروز...ايوه
حسام: انتي بردانه ولا ايه حاسس انك بتترعشي.
فيروز: لا انا كويسه كنت نايمه عادي.
قرب منها حسام واول ما حط ايده على كتفها حست كأن جمره نار لمست جسمها ومن غير ما تحس بعدت ايده عنها بسرعه😡
فيروز: ايدك ساقعه يا حسام
حسام: كنت باخد شاور معلش المهم انتي كويسه
فيروز: اه يلا نام بقى
حسام: تصبحي على خير يا حبيبي
فيروز: وانت من اهله🥺💔💔
الخيانه شعور مميت ممكن تحس بيه أي ست ووقت ما الست تشوف بعينها وتتأكد بنفسها ان شكوكها في محلها وانه مش مجرد سوء ظن منها وقتها بس بتحس انها حتى لو كانت جبل بتنهار في لحظه وبتحس ان في حد مد ايده في قلبها عصره يمكن ردود الفعل بتختلف من ست لست إلا رد فعل واحد وهو أول لحظه بتتأكد فيها من خيانه اللي بتحبه
وقتها بتكون صدمه الموقف أقوى من اي رد فعل او كلام وبيكون الصمت هو سيد الموقف
إلا حين إشعار آخر 💔🥺
.............
في النيابه استمر التحقيق لحد طلوع النهار تاني يوم على التوالي التحقيق مستمر.
محمد كان بيحاول يلاقي ثغره واحده في القضيه تقوي موقف خلود رغم ان بصماتها مكانتش موجود ورغم الشهاده الخاصه بالشهود كانت في صالحها إلا انه كان عايز دليل أقوى.
وصل حسين وبدأ محمد ياخد أقواله زي ما عمل مع الباقي
وواجهه بكلام حسين فضل يقوله كداب ومكانش راضي ابداً يعترف
قرر يوقعهم تاني في بعض خصوصاً لما اتأكد ان حسين دماغه مش ساهله زي حماده.
حماده وقع بسهوله في الكلام
دخل مره تانيه سميره.
محمد....تعالي يا سميره
سميره...تحت امرك يا باشا
محمد....انتي قولتي ان مفيش حد فيكم ليه دعوه بقـ ـتل تسنيم
سمير...حصل يا باشا خلود اللي قتـ ـلت بنتي.
محمد..بس في اقوال جدت يا سميره من امبارح.
سميره....بلعت ريقها بصعوبه اقوال ايه ياباشا.
محمد...احنا قبضنا على حماده وحسين ابنك
بصتله سميره بصدمه😳
محمد....والغريب بقى يا سميره ان انتي وامك اقوالهم كانت مختلفه عن بعض انتي قولتي سافروا من اسبوع هي قالت سافروا امبارح
قولتي شغالين مع بعض هي قالت كل واحد لوحده قولتي متصلوش من يومين هي قالت اتصلوا امبارح وحسين طمنكم على حماده
بس مش هي دي المشكله يا سميره
سميره😳😳😳🥺
محمد...لما قبضنا على حسين كان في نزله السمان وقال انه لسه خارج من البيت رايح يزور واحد صاحبه يعني مكانش مسافر ولا حاجه ولما قبضنا على حسين قال انه لسه واصل الفيوم انهارده عشان شغل.
سميره...ااا يا باشا اانا
محمد..عاااارف عااارف ياسميره انك متلغبطه وخايـ ـفه ومتوتره كل ده انا عارفه بس صراحه ليكي حق مش عشان اللي حصل لبنتك مش سهل لا خالص اصل بردوا مش سهل على واحده يتقبض عليها ويتلف حوالين رقبتها المشنقه.
سميره....ايه تقصد مين يا باشا تقصدني انا😳
محمد...طبعا لما تقـ ـتلي بنتك وتلعبي اللعبه الكبيره دي يبقى لازم تتعدمي خصوصا الوقت يا سميره لما الكل أعترف عليكي وأولهم امك وابنك وقالوا ان انتي اللي قتـ ـلتي.
سميره...بانهيار كدابين كداااابين ورحمه بنتي ما عملت كده ده حسين حسين يا باشا هو اللي قتـ ـلها لما طلع وشاف الحاجه مسروقه وعرف انها هربت خلود والله يا باشا معملتش حاجه هما اكيد اتفقوا عليا عشان يخلصوا مني امي اهم حاجه عندها فلوس
وعشان حسين هو اللي على الحجر وهو اللي بيعرف يسد بوئها بالفلوس مش عايزه تعترف عليه حبت تضحي بيا عشان يفضل معاها الرجاله وانا مش مهم حسين ياباشا والله هو اللي قتـ ـل.
ابتسم محمد وفضلت سميره تعترف بكل حاجه زي ما قال حمادة بالظبط.
خرجها محمد وخلاها تروح مكان غير اللي امها فيه مكانش حابب يجمعهم ببعض عشان ميتفقوش على كلام واحد.
دخلت بعدها صباح وعمل معاها نفس اللي عمله.
صباح.....لا يا باشا والله ماعملت حاجه طب قولي ازاي هقدر على البت واعمل فيها كل ده انا مهما كان قدام جنابك انا ست كبيره صدقني يا باشا هما اكيد اتفقوا عليا انا روحت ولا جيت قدامهم ست كبيره هيعملوا بيا ايه هما قالوا نخلص منها ونتهنى احنا بكل حاجه بس لا صدقني ياباشا حسين اللي قتـ ـل اه كلنا كنا معاه وشوفناه ومحدش فينا دافع عن البت ومـ ـاتت قدامنا بس اللي قتـ ـل حسين والله يا باشا اللي قتـ ـل حسين.
كل شويه علامات النصر والفرحه تترسم على وش محمد رجع من تاني دخل حسين وواجهه بكل حاجه اتقالت واعتراف الكل عليه وقاله اللي حصل بالنص من بعد ما طلعوا من الفرح كأنه كان واقف معاهم مسابش تفصيله إلا وفكره بيها كان حسين واقف ساكت ومش بينطق.
محمد...اعترف يا حسين اعترف وقول كل اللي حصل كلهم اعترفوا عنك يعني انت كده هتلبسها هتلبسها لو في حاجه حابب تزودها تخفف عنك الحكم قولها
حسين....بضياع ايوه يا باشا انا اللي عملت كده انا اللي ضـ ـربت خلود وكانت هتمـ ـوت في ايدي مكانتش اول مره خلود تقريبا مكانش بيعدي يوم ولا اتنين وتاخد نفس العلقه انا اللي عملت كده في اختها ووصلتها للأنتحار انا اللي فضحت خلود واكتر من مره كنت هغتصبها عشان توافق تتجوزني وانا اللي قتـ ـلت اختي يا باشا مكانش قصدي والله كنت بضـ ـربها وانا متعصب ومش شايف
قدامي لما قالتلي ايوه هربتها اتجننت بقيت اضـ ـرب فيها وانا مش حاسس بنفسي خبطت راسها في الحيطه وبعدها وقعت فضلت مكمل عليها وانا معرفش انها بتمـ ـوت خلاص بس والله مكنتش لوحدي في الاول كلهم ضـ ـربوا معايا حماده وستي وامي كلهم يا باشا هما اللي كانوا بيقوني اعمل كده مفيش واحده فيهم جات في يوم وقالتلي حرام اللي بتعمله في خلود عمري ما شوفت نفسي غلطان لان كل مره كنت اضـ ـربها فيها يقولولي اضـ ـرب اكتر كـ ـسرها ستي ياباشا اول واحده قالتلي اكـ ـسر عينها و أغتصبها هتقبل بيك وتبقى زي الخاتم في صباعنا امي عمرها ما صعب عليها تسنيم وانا بضـ ـرب فيها عشان بتدافع عن خلود عايزني أبقى كويس ازاي يا باشا وهما مموتين ضميري ومحسسني اني صح انا معترف بكل حاجه يا باشا بس صدقني لو في حد غلطان من البدايه هيبقى ستي وامي ستي اللي عمرها ماكانت حنينه على ولادها شافت خالتي الله يرحمها ضعيفه كانت بتيجي عليها وتفضل امي وخالي عنها لحد ما مـ ـاتت بقهرتها من كتر الظـ ـلم كانت بتعامل خالي على انه مش موجود و مفيش على الحجر غيري ولولا اني كنت على طول اعمل اللي هي عيزاه واجيبلها الفلوس كان زمانها بتعاملني زي ما بتعاملهم هما ياباشا السبب في كل اللي انا وخلود وتسنيم فيه💔
صدقني يا باشا كلنا كنا ضحيه ليهم بس انا كنت شيطان ومعترف بكل حاجه
قفل محمد التحقيق بعد ما حسين خرج وخد نفس طويل اوي وهو حاسس بأرتياح بعد حوالي 48 ساعه من التحقيقات اخيراً براءه خلود ظهرت في الوقت ده كان يوسف وزيد ومراد والمحامي وحتى امجد معاه حكالهم كل حاجه كانوا طايرين من الفرحه وخصوصاً يوسف.
كان مصدقها بس كان خايـ ـف تكون بتكدب عليه بعد ما ساعدها كان خايـ ـف يكون بيتستر عليها وهي مذنبه حس بأرتياح وفضلوا قاعدين لحد ما راح العسكري جابها ورجع.
دخلت خلود بهدوء كعادتها لكن حزينه وعلى قد الحزن على قد الرضا اللي كان مرسوم على وشها.
ابتسمت خلود بهدوء ليهم لما شافتهم
محمد....تعالي يا خلود.
خلود....سلام عليكم
الجميع...عليكم السلام.
محمد....مكنتش اعرف يا خلود ان وراكي ناس بتحبك اوي كده ده انا قربت احسدك🤨
ابتسمت خلود بهدوء...دول رزق ربنا ليا يا باشا ربنا سخرهم ليا عشان عارف اني مليش حد غيرهم .
محمد...ونعم بالله المهم انتي عارفه انتي هنا ليه يا خلود.
خلود....لا بس يمكن يكون في حاجه جديده
محمد....بابتسامه هو فعلاً في مش حاجه واحده يمكن حجات أهمهم يا خلود انا ربنا ظهر برائتك مبروك يا خلود خالتك وستك وخالك وحتى حسين اعترفوا باللي حصل واعترفوا ان حسين اللي قتـ ـل تسنيم..
بصتله خلود بصدمه ودموعها بقت تنزل مش عارفه تفرح ولا تحزن بقت نظراتها تتوزع بين محمد وبينهم وهي مش مصدقه.
خلود....يعني حسين حسين اللي قتـ ـل صح انا كنت متأكده والله كنت متأكده🥺🥺💔
ابتسموا كلهم بحزن وفرحه في نفس الوقت.
مسك مراد ايدها مبروك يا خلود مبروك يا حبيبتي ربنا جابلك انتي وتسنيم حقكم.
خلود...الحمد لله يارب الحمد لله🤲🤲🥺💔
فضلوا يباركوا ليها كلهم.
زيد...طيب قولي يا محمد باشا بما ان خلود بريئه بيتهيألي كده وجودها هنا ملهوش لازمه ولا ايه
محمد...طبعاً ملوش اي لازمه مجرد إجراءات بسيطه وهتخرج معاكم على طول.
خلود...يعني انا همشي🥺
محمد....والله لو حابه تفضلي معانا معنديش مانع😂
بس انا عن نفسي همـ ـوت واروح انام بقالي يومين مشوفتش فيهم النوم
مراد....الله يكون في عونك مش عارفين نشكرك ازاي بجد مهما قولنا مش هنوفيك حقك
محمد...انا معملتش اي حاجه ده شغلي وبعدين هي ربنا بيحبها ظهر برائتها على طول وأعترفوا
مراد....ازاي بس من البدايه حضرتك مقدر الموقف ومتعاطف مع خلود.
محمد...في شغلنا مفيش تعاطف خالص بس ربنا عالم خلود كانت من الناس القليله اللي اتعاطفت معاها اوي والكلام ده قولته لامجد اول ما كلمني وحكالي.
امجد...ده حقيقي لما كلمته عشان افهم منه كل حاجه قاللي انه واثق ان اختفائها مش هروب لدرجه انه قبل ما يعرف اللي حصل مني كان شاكك انها ممكن تكون مقتـ ـوله هي كمان.
محمد...من الاول محستش انهم صادقين يمكن مكانش في دليل عليهم بس مشاعرهم بالنسبالي مكانتش مشاعر واحده بنتها اتقتـ ـلت او واحد اخته اتقتـ ـلت كنت شاكك فيهم والحمد لله ربنا ظهر الحق.
زيد...شكراً ليك بجد على كل حاجه.
محمد....الشكر لله.
خلصوا الإجراءات كلها وبعد كده خرجوا من النيابه مراد معرفش تقى اي حاجه وقرر يفاجئها
وصلوا تحت البيت وطلعوا مع بعض
خبط مراد واستنى شويه فتحت تقى واول ما لمحت خلود وراهم صـ ـرخت من فرحتها وجريت خدتها في حضنها والأتنين بقوا يعيطوا
تقى....والله كنت حاسه انك هتخرجي قريب كنت عارفه ان ربنا مش هيسيبك.
مراد...بضحك يابنت سيبي رقبتها هتخنـ ـقيها😂😂😂
خلود....حبيبتي يا تقى وحشتيني اوي والله
تقى....وانتي كمان يا قلبي قولولي خرجت ازاي وحصل ايه اعترفوا صح.
مراد...هنحكيلك بس دخلينا الاول🤨🤨
تقى...بضحك من بين دموعها انا اسفه والله فرحتي بيها نستني اقولكم اتفضلوا.
يوسف....تقى انا عايز اشرب بسرعه همـ ـوت من العطش.
تقى...تشرب بس ده انت تشرب وتاكل وتعمل كل حاجه حلاوة خروج خلود بالسلامه😍
جريت تقى تجيبلهم مايه ودخلوا كلهم قعدوا وقعد زيد جمبهم بهدوء.
يوسف...طبعاً محتاجه تنامي وترتاحي.
خلود...لا خالص والله الفرحه طيرت النوم من عيني وبعدين متقلقش كنت بنام هناك.
مراد...الحمد لله قولتلك هتعدي على خير.
تقى....اتفضلوا اشربوا.
خلود....الحمد لله ربنا كريم اوي❣️
بصت خلود لزيد...تعبتك معايا يا استاذ زيد.
زيد...بابتسامه اولاً انا زيد وبس من غير ألقاب ثانياً صدقيني انا معملتش اي حاجه لو حابه تشكري حد بجد يبقى يوسف ومراد هما اللي كانوا واثقين فيكي وعارفين انك مظلـ ـومه.
خلود....ربنا ما يحرمني منكم ابداً كلكم أنتوا رجعتولي حياتي اللي اتحرمت منها ورجعتوا لتسنيم حقها
تقى...الحمد لله يا حبيبتي المهم انك وسطنا الوقت بس هما كده هيتحكم عليهم امته.
مراد....بيتهيألي ان القضيه بتتبعت على المحكمه وبيتحدد جلسه اول ما نعرف معادها هنروح وهنشوف بقى هيتحكم فيها من اول مره ولا لا.
زيد....لا هيتحكم فيها خصوصا انهم اعترفوا كلهم.
يوسف...سيبكم منهم بقى الوقت خلونا في المهم ناويه على ايه يا خلود.
خلود....مش عارفه لسه يا يوسف مفيش حاجه في دماغي الوقت
تقى....انتي هتفضلي معايا على فكره ومش هنسيب بعض.
خلود...بإبتسامه هاديه اسيبك ازاي انا مبقاش ليا غيرك خلاص انا يمكن الحاجه اللي فكرت فيها اني ابيع كل حاجه املكها ونشتري شقه بالفلوس في اي مكان ونفضل مع بعض.
مراد...اولاً الشقه دي بقت بتاعتكم قولتلكم قبل كده الف مره اني مش محتاجها ومش قاعد فيها ولو احتاجت ابعد عن العيال الرخمه دي واريح دماغي شويه هروح اي شقه تانيه غيرها حابه تبيعي كل حاجه بيعي واعملي اللي يريحك بس شقه لا.
خلود....انا مش عايزه اي حاجه تربطني بالمكان ده معنديش اي ذكرى كويسه فيه كان نفسي اسيب محل بابا وافضل في بيتنا بس مش عايزه حاجه تفكرني بيهم مش عايزه لو اتحكم عليهم بالسجن بعد كام سنه يرجعوا من تاني ليا حتى لو بقوا ملايكه بس خلاص مش عايزه حاجه تجمعني بيهم ولا حتى المـ ـوت.
يوسف....يبقى اعملي اللي يريحك بيعي كل حاجه وشغلي الفلوس اعملي مشروع ابدأي من جديد يا خلود
خلود.... هعمل كده بس مش الوقت تتقفل القضيه خالص وبعدين افكر في اللي جاي.
زيد....انا رأيي كده بردوا خدي وقتك و ارتاحي خالص الفتره دي
مراد....وقتها احنا هنبقى معاكي متقلقيش.
خلود....مش قلقانه صدقني وجودكم جمبي مطمني جدا❣️
تقى...بقول ايه سيبكم من كل ده بقى احنا هناكل مع بعض كلنا 😍😍
مراد...لا اكل ايه با دوب نروح نرتاح شويه وبعدين هناكل وهنشرب ونحتفل كمان بس لما يتحكم عليهم ان شاء الله والوقت بقى هنسيب خلود ترتاح وانتي افرحي بيها براحتك.
تقى...افرح بس ده انا هنام في حضنها كمان😍😍
ضحكوا كلهم على تقى وبعدين سلموا عليهم ومشيوا.
..................
في صباح يوم جديد
الكل راح على شغله وبعد كام ساعه من الشغل دخل سالم على زيد في مكتبه.
زيد...خير جايلي في مصيبه ولا ايه
سالم...في ايه يا جدع ما تهدأ على نفسك كده.
زيد....بقالي كام يوم مشغول عنك ومش مركز معاك في اكيد في مصيبه .
سالم...بضحك ولا مصيبه ولا نيله انا خارج شويه وراجع.
زيد...على فين.
سالم...🙄🙄🙄 هحكيلك بس من غير تقطيم.
زيد...بابتسامه يبقى مصيبه قول قول انا خلاص اتعودت.
سالم حكاله كل اللي حصل ومرواحه لشمس ومساعدته لجيرانها وان الحاجه جهزت وراح مع الرجاله يودوها ليهم.
بس هي دي كل الحكايه قول بقى اني غلطان.
زيد....لا ياسيدي مش غلطان كويس انك بتحاول انا من البدايه قولتلك خلي نفسك طويل معاها وحاول على قد ما تقدر وعشان بس تبقى عارف متفكرش انها ممكن تشوفك سوبر مان وتغير فكرتها عنك بعد اللي هتعمله ده هي مش بعيد كمان تشوفك واحد واطي ووصولي
سالم...الله يكرم اصلك🤨
زيد....هي كلمه الحق بتزعل انا بعرفك بس عشان متتفاجئش او تزعل من رد فعلها شمس مش هتسامحك بسهوله ولا اللي بتعمله ده هياكل معاها ممكن تبقى خطوه او بدايه طريق كويس من خطوات كتير المفروض تعملها
سالم...مش فاهم تقصد ايه؟
زيد....يعني لازم يا سالم تحاول على قد ما تقدر تزود رصيدك عندها تخلي الحلو اللي هتعمله عشان تفكر تسامحك يتقل ميزانك شويه اللي حصل خلي الميزان مش بس طب ده مستحيل يترفع او يتوزن بسهوله فاهمني انت هدفك الوقت تخلي الحلو اللي هتعمله يساوي الوحش اللي عملته وبعد كده تحاول تخلي ميزان الحلو هو اللي يطب وبعدها انا واثق انها هتسامحك صدقني.
ابتسم سالم وانا هعمل كل حاجه اقدر عليها يا زيد❣️
وعلى فكره صدقني انا مش وصولي ولا حتى أستغليت الموقف عشان مبقاش كداب يمكن طلب جارتها كان مجرد وسيله بس انا بجد عملت كده عشان حابب اعمل كده حابب ربنا يسامحني.
زيد...بحب انا عارف يا سالم و واثق فيك يا حبيبي انا بقولك عاللي ممكن تسمعه منها عشان متبقاش مضايق عشان متبقاش حاسس ان مفيش أمل
هتتعب معاها بس صدقني النتيجه هتكون كويسه البدايه كانت غلط يا سالم من الاول وعشان تصلح الغلط لازم تبدأ بدايه جديده.
سالم...معاك يا زيد و عموما انا عارف ان اي رد فعل منها حقها وهفضل وراها لحد ما اخليها تسامحني وهعوضها عن كل حاجه.
زيد...لازم تعوضها مش بس عشان شعورك بالذنب يا سالم عوضها لانها مبقاش ليها حد عوضها وانت حاسس من جواك انك حابب تكون معاها والاهم يا سالم لازم تعرف من جواك ان برضاك او غصب عنك شمس بقت في رقبتك عشان كده نصيحه من اخوك الصغير يا سالم حبها ❣️ حاول تحبها من قلبك وكأن مفيش ست غيرها في الوجود.
سالم...بإبتسامه جزء كبير مني يازيد عايز يعوضها عشان الذنب اللي قولت عليه و عشان هي مبقاش ليها حد وجزء تاني عايزها بس تعويض ليا انا مش ليها هي انا عايز يا شمس يا زيد صدقني عايزها في حياتي اوي❣️
زيد...بحب ربنا يقرب ما بينكم يا حبيبي و أتأكد اني ديماً هكون في ضهرك ووقت ما تحتاجني هكون قدامك انا مش حابب اكون وسيط عايزك انت اللي تتعب قدامها وتعمل كل حاجه عشان تغير نظرتها فيك فهمت
سالم...فهمت يا حبيبي فهمت،❣️
ربنا ما يرحمني منك يلا هقوم عشان متأخرش ماشي.
زيد...ابقى طمني 🤨
سالم...اكيد يلا سلاااام
.............
عدى حوالي ساعتين كلم سالم صفيه جارت شمس وبلغها انه في الطريق.
فضلت صفيه مستنياه هي وامهات البنات وفجأه لمحوا عربيتين كبار داخلين الشارع عندهم المكان كان هادي إلا حد كبير مش مكان شعبي
اتصل سالم تاني عليها.
سالم...ايوه يا ست صفيه انا وصلت
صفيه...شوفت حضرتك خلاص احنا واقفين اهو.
سالم....طيب بصي عشان المنظر ميبقاش مش ظريف العربيه اللي ورايا على طول فيها حاجه البنت اللي قولتي اسمها منه خلي مامتها تشاور للسواق يروح وراها والعربيه التانيه بتاعت البنت التانيه خلي والدتها تعمل نفس الكلام والسواق هيروح معاها وكمان معاهم عمال هيطلعوا كل حاجه بسرعه.
صفيه....يا حبيبي ربنا يكرمك مش عارفه اقولك ايه بس
سالم...ولا اي حاجه انا تحت امركم واه الحاجه كلها جات خلاص متشيلوش هم.
صفيه....ربنا يوسع رزقك والله الكلام رايح مني من فرحتي.
سالم...بإبتسامه يارب يلا قوليلهم انا هفضل في العربيه لحد ما اطمن ان كل حاجه تمام.
صفيه...والله ما يحصل لازم تطلع تشرب حاجه.
سالم...لا لا والله ما هقدر انا مستعجل اوي بس هطمن وهمشي على طول.
قفل معاها سالم وبلغت صفيه الامهات بكلامه وراحت كل واحده فيهم جمب بيتها وبدأ العمال بسرعه يطلعوا كل حاجه
وقفت صفيه معاه تتكلم وتشرحله حالتهم عشان يبقى مطمن كان ساند على العربيه وهو بيسمعها باحترام بس عينه كل شويه تترفع فوق يبص على شمس وينزلها.
كان عايز يسألها عن شمس بس محبش انها تاخد بالها.
سالم...صدقيني انا مش فارق معايا اعرف حالتهم كفايه ان انتوا عارفين انهم فعلا يستحقوا
صفيه....بس ده حقك عشان تبقى عارف فلوسك راحت فين وعشان تفرح بالخير اللي عملته
في الوقت ده دخلت شمس الشارع وبقت تقرب منهم وهي بتبص على العربيات والحاجه اللي بتنزل منها احدث اجهزه واحدث فرش الوان شيك كل حاجه تجنن
بقت راسها راحه جايه وهي بتشوف الحاجه.
صفيه...اهي شمس وصلت اهي.
ابتسم سالم وبصلها.
قربت منهم مساء الخير يا طنط صفيه.
قربت منها صفيه و باستها مساء الورد يا ست البنات شوفتي الجمال شوفتي الحاجه اللي جابها استاذ سالم تعالي يلا سلمي عليه.
ابتسمت شمس ابتسامه بسيطه اهلا بيك يا سالم باشا تعبت نفسك
مد سالم ايده ليها وهو مبتسم مفيش تعب يا شمس انا معملتش حاجه.
بصت شمس على ايده بأرتباك ومدت ايدها بهدوء يادوب لمست ايده وسحبتها علي طول من غير ما صفيه تلاحظ.
صفيه...شوفتي يا شمس بقالي ساعه بحاول اخليه يطلع مش راضي.
سالم...مره تانيه بأمر الله انا قولتلك اني مستعجل والله.
صفيه....طيب حتى اجبلك كوبايه شاي ولا قهوه.
سالم....ليا عندك فنجان قهوه بس يوم تاني وعد.
صفيه...خلاص وانا هستنى بقول ايه هروح ابص عليهم كده وارجعلكم
سالم...اتفضلي.
ابتسمت شمس لحد ما مشيت صفيه وبعدين رجعت بصتله بغضب😡😡
شمس...مبسوط انت الوقت من النمره اللي عملتها دي صح😡
سكت سالم وفضل باصص قدامه على العربيات.
شمس....فاكر ان اللي بتعمله ده هيخليني اشوفك بشكل تاني تبقى بتحلم ولو فاكر انك بتحاول تشتريني للمره التانيه بردوا تبقى بتحلم.😡
فضل سالم على نفس وضعه ساكت وسايبها تتكلم ومش سأل فيها.
شمس بغضب اكبر لكن وهي بتحاول صوتها ميعلاش😡😡 هو انت مش سامعني مش بترد ليه.
سالم...انتي عايزه ايه😒 انتي مالك ومالي اصلا🤨
شمس....😳😳نعم يعني ايه مالي ومالك.
سالم....يعني انا واحد حابب اعمل خير وربنا قدرني وعملته لا جيت جمبك ولا ضايقتك مالك ومالي بقى هااا🤨
شمس...والله على اساس انك مش بتعمله عشان اشوفك كويس😡
سالم...لا مش عشانك وبعدين انا مهما عملت هفضل اسمع نفس الكلام واطي وحقير وقذر وناقص وزباله وحيوان هاا في حاجه تاني ولا نسيت كم الألقاب اللي لقبتيني بيها🤨
شمس....وانت كمان مش عاجبك طب انت كده فعلاً
سالم...طيب ياستي شكراً عايزه ايه الوقت.
شمس....وانا هعوز منك انت ايه انت اللي واقف عند بيتي😡 وقولتلك مش عايزه اشوف خلقتك تاني
سالم...حاضر يا ستي وعموما انا جاي هنا عشان ست صفيه مش عشانك واحد بيعمل خير مالك انتي 😏
شمس...لا وانت الشهاده لله في اعمال الخير شيخ كبير😡
وقبل ما تكمل كلامها اتزلحقت رجلها من على الرصيف وهي متعصبه وقبل ما تقع مسكها بسرعه من وسطها
شمس....😳 بصتله بصدمه وبعدت ايده بسرعه.
سالم...انتي كويسه رجلك حصلها حاجه
شمس...ااا انت مالك ملكش دعوه بيا 😡
سالم...انا غلطان يارتني سبتك ورجلك اتكـ ـسرت😏
شمس...بص لو شوفت رقبتي بتتكـ ـسر متدخلش انت فاهم😡 ويلا امشي من هنا بشوفك كأني شوفت شيطان يا اخي ابقى وفر فلوسك وبلاش تفتح صدرك اوي كده عشان مش هشوفك ياسالم مهما حصل انت فاهم مش هشوفك😡😡
سابته شمس وراحت على مدخل البيت.
سالم.....هتجوزك يا شمس وهتحبيني زي ما حبيتك😉❣️
بصتله شمس بغضب وطلعت بسرعه على بيتها وهي مش طايقه نفسها واول ما دخلت حدفت شنطتها ووقعت التربيزه 😡
وراحت بسرعه تبص عليه من وراء الشباك وابتسمت مره واحده لما جاتلها فكره شيطانيه 😈
جريت بسرعه على المطبخ جابت طبق غويط حطت فيه مايه وخليته واقف دلقتها عليه 😈💪
غمض سالم عينه وقربوا الجارد منه بسرعه.
عض سالم على شفايفه بغيظ وبص فوق لقاها بصاله بإبتسامه نصر ابتسم سالم ورجع بأيده الجارد وراء
قلع الچاكت وظبط شعره ومسح وشه بالمناديل وكان مبسوط جداً
عشان حست انها انتصرت عليه.
سالم...بوجـ ـع في سره والله يا شمس لو غرقتيني وسط بحر مش بس حدفتيني بشويه مايه ما هيعوض اللي عملته فيكي 💔
بس لو ده هيريحك انا موافق بص تاني فوق لقاها دخلت ابتسم
شويه وكل حاجه خلصت جات صفيه معاها الامين والبنات شكروا جدا ووقفوا يتكلموا معاه شويه وبعدين مشي
وهو ماشي اتصل عليها.
فتحت شمس وهي مبسوطه.
شمس....ايه يا باشا المايه كانت ساقعه عليك
سالم....متبقيش تزعلي بقى من رد فعلي🤨
شمس...اعلى مافي خيلك اركبه المره الجايه لو جيت او لو شوفتك تحت او لو نطقت الكلام العبيط اللي قولته ده تاني مش هحدفك بمايه ياسالم هحدفك بجاز وهولع فيك.
سالم....وانا موافق هتشوفيني كتير يا شمس 😉
شمس....بكرهك يا سالم ولو خايـ ـف على نفسك بجد مشوفش وشك تاني😡😡
قفلت في وشه بغضب وفضل سالم يضحك ومبسوط❣️
- يتبع الفصل التالي اضغط على (رواية احفاد الطوبجي) اسم الرواية