رواية جوازة صالونات الفصل الثاني عشر 12 - بقلم ندى علي
” نهال بصت علي شكل نوال اللي دموعها نازله منها وشايله بنتها النايمه ، نهال اخدتها ودخلتها علي جوا وقفلت الباب ”
نهال حضنتها بخضه : مالك بتعيطي ليه كدا في ايه ؟
نوال عيطت في حضنها بقوه : انا تعبت يا نهال والله تعبت وفاض بيا لو متكلمتش معاكي هموت من الكتمان والله
نهال اخدتها وقعدو في الصالون : احكي انا سمعاكي ؟
” نوال بصتلها وكل ما تتكلم تعيط اكتر نهال سابتها تعيط وتطلع كل اللي جواها ”
نهال ضمتها لصدرها : طيب انتي كدا عيطي كتير ممكن بقا تحكيلي ايه اللي مزعلك اوي كدا ؟
نوال بخنقه : قولي ايه اللي مش مزعلني انا كل حاجه في حياتي مزعلاني يا نهال نفسي اسمع كلمه حلوه من جوزي بس زي ما يكون متحرم عليا حماتي متدخله في حياتي كأنها هي اللي متجوزاني مفكره ان كدا بتحافظ علي ابنها متعرفش انها بتدمر حياتي وحياته بإيدها
نهال بشفقه : سمعاكي كملي كل اللي جواكي طلعيه يحبيبتي
نوال بشهقات : احكيلك ايه ولا ايه انا نفسي زهقت من نفسي لدرجة ان من كتر ما بحاول معاه انه يتغير بقيت بزهق اجي اتكلم معاه كويس زعلان اخد جنب ومتكلمش خالص زعلان طيب قوليلي اعمل ايه اكلم امي علشان احكيلها تقولي عيشي علشان خاطر بنتك حماتي محسساني ان عبده عندها مينفعش اتعب ولا اقول هبطانه طيب انا هستحمل لحد امتي قوليلي
نهال بتفكير : طب ما تتقسمي يا نوال عيشي انتي وجوزك وبنتك في شقتك وتتفضي من كلامها وحوارتها
نوال بسخريه : انا اصلا متجوزه وقالو هتروحي مقسومه كنت فرحانه من تاني يوم والله العظيم ينهال لقيت صلاح بيقولي يلا هننزل ناكل تحت قولت ماشي يمكن هناكل النهارده بس لكن النهارده جاب بكرا جاب بعده لحد دلوقتي كل ما اقوله يا صلاح عايزه اتقسم يزعق ويكسر في الشقه انزلي كدا شقتي والله ولا فيها حتت ازاز سليمه
” نهال استغربت ازاي ادهم الحنين المتفهم يبقي اخوه صلاح الهمجي القاسي ، نهال فضلت تسمع نوال لحد ما طلعت كل اللي عندها ”
نوال مسحت دموعها براحه : ربنا شاهد عليا ان لما اتكلمت معاكي ارتحت
نهال ببتسامه : انا سمعاكي في اي وقت لما تحسي نفسك مضايقه تعالي ونقعد نحكي ونفضفض لبعض
نوال : لما لقيت ادهم نزل قولت اطلع اقعد معاكي بدل ما انا قاعده انا والوليه تحت في وش بعض المهم انتي عامله ايه ؟
نهال ببتسامه : انا الحمدالله بخير والله الوضع غريب بنسبالي من كله بس ادهم بيحاول يخليني اتعود علي الوضع
نوال ابتسمت : ادهم ابن حلال وطيب وحنين اوي عكس صلاح كل ما نقوله يا ادهم عايزين نفرح بيك يقولنا لسه بدري ومرداش يروح ولا لعروسه لحد ما فجأه قالك موافق نروح نشوف الباب دا
نهال بضحكه خفيفه : اهو نصيب بس الجواز دا طلع عكس ما كنا فاكرين خالص يا بت يا نوال الواحده بتفكر في الفستان وفرحة الفرح مبتبقاش عامله حساب كل اللي بعد الفرح
نوال بضحك : انتي هتقوليلي دا كفايه انك متجوزه في بيت عيله هده طول النهار وبليل اللي المفروض هترتاحي فيه يجي جوزك يقولك مش ناويين نخاوي العيال وحزن من كل مكان
نهال ضحكت علي كلامها وقامت واقفت : قومي تعالي نعمل كيكه بشكولاته الحاجه الوحيده اللي بعرف اعملها ونعمل شاي ونشرب ادهم كدا كدا هيتأخر برا فَ نقعد براحتنا
نوال ببتسامه : لو غزل صاحيه وعرفت انك هتعنلي كيكه بشكولاته كانت فرحت اوي ” وراحت وراها للمطبخ ” بسم الله مشاء الله الشقه جميله اووي مبروكه عليكي يحبيبتي
نهال ابتسمت لها بحب : عقبالك شقة غزل ونعملها الحلو كله المهم بفكر اعمل صنيتين نسيب واحده لينا هنا وانزل ليهم واحده تحت ايه رأيك ؟
نوال شمرت كمامها :والله اللي يريحك بس انا معاكي اعمليلي اتنين واحده هنا ونزلي واحده ليهم تحت فين الصواني وانا اجيبها
نهال وهي بطلع البيض والدقيق : هتلاقيهم في الضلفه اللي جنب البوتجاز ادهنيهم زيت علي ما اجهز الكيكه
” نهال ونوال فضلو يعملمو في الكيكه وهما بيتكلمو مع بعض ، نهال فهمت من كلام نوال انها تلقائيه جدا ومصدقت لقت حد تطلع اللي جواها معاه ويسمعها ، نهال معرفتش تصبرها علي اللي هي فيه بس اكتفت انها تخليها تطلع كل اللي جواها ”
نهال بصت علي الكيكه بعد ما خرجت من الفرن بفرحه : ينهاااار جمال الكيكه مستويه ومش محروقه بخريني يا نوال بسرعه
نوال اخدت حته داقتها وقالت ببتسامه : حقيقي طعمها تحفه اووي بس مسكره سيكا
نهال ضحكت : ياستي احمدي ربنا انها جت علي قد مسكره بس بصي احنا هنشوف الصنيه اللي نحس طعمها حلو ننزلها وخلاص والتانيه نقسمها سوا
نوال : طيب انا هنزل الشقه اغير هدوم غزل وانتي انزلي نزلي الكيكه
” وفعلا نهال شافت الصنيه المستويه والمظبوطه واخدتها علي صنيه ولبست اسدال ونزلت علي تحت مع نوال ”
نهال بصت علي سلوي كانت قاعده في الصاله قدام التلفزيون قالت ببتسامه : مساء الخير
سلوي بصتلها : مساء النور تعالي يا نهال يعني انتي متنزليش الا لو ادهم سابك ونزل
نهال ضحكت وقعدت جنبها : الموضوع مش كدا والله كل الحكايه ان كان عندي هدوم عايزه تتغسل غسلتها ونشرتها وعملتلك حاجه حلوه ” وفتحت الصنيه واخدت منها حته ” دوقي كدا وقولي رأيك
سلوي اكلتها وقالت : حلوه يما تسلم ايدك ادخلي دخليها المطبخ وغطيها علي ما ابوكي سالم يصحي الصبح يفطر منها
نهال قامت وقفت : طيب حاضر عايزه حاجه تانيه من المطبخ ؟
سلوي : شوفي كدا لو عندك حاجه علي الحوض اشطفيها بالمره
” نهال دخلت المطبخ وبصت علي الحوض بدهشه من كمية المواعين اللي محتاجه غسيل ”
نهال بضيق : الدنيااا تلج والمايه سقعه يارررربي انا ايه اللي نزلني بس ” وشمرت اكمامها بضيق وبدأت تغسل ”
” في حدود الساعه ١٢ بليل وصل ادهم العزبه ، نهال كانت واقفه في البرنده في عز التلج مستنياه والقلق هيموتها من شدة خوفها عليه ”
ادهم نزل من عربيته وفي ايده كيس كبير وطلع البرنده اتفاجئ بنهال قال ببتسامه : ايه اللي مطلعك في البرد واقفه في البرنده كدا ؟
نهال بغضب : والله … يعني سيادتك مش عارف انا ايه مطلعني في عز البرد واقفه في البرنده لوحدي والكل نايم
ادهم بستغراب من نبرة صوتها العاليه : اولا صوتك عالي ودا مش عاجبني ثانيا فعلا مش عارف ايه مطلعك البرنده دلوقتي
نهال عيونها دمعت وقالت بضيق : انت خارج من بعد المغرب ولسه راجع دلوقتي كنت فين كل داا يا ادهم ؟
ادهم مسح دقنته وقال بهدوء : قولتلك ان كان عندي شوية شغل بخلصهم وقعدت مع ناس صحابي شويه ورجعت ايه اللي حصل بقا
نهال اضايقت من كلامه وقالت : لاء ولا اي حاجه انا طالعه الشقه علشان بردانه وعايزه انام الكل متسخن ومتغطي علي البوتجاز جوا لو جعان علشان مفيش اكل فوق ” وسابته وطلعت علي الشقه ”
ادهم مضايق انه زعلها بس هو برضو مبحبش حد يتحكم فيه ولا في خطواته ، رجع تاني لعقله وقال انها مراته ومن حقها تقلق عليه يعني هي مغلطش ”
اتنهد جامد وقال : استغفر الله العلي العظيم واتوب اليه ” وبص علي الكيس اللي في ايده ” انا طول عُمري بقول الكشري مش بشرة خير محدش صدقني ” وطلع علي شقته علطول ”
……………………………..
” في شقة صلاح ”
” نوال قاعده في الصاله وجنبها غزل اللي بتاكل كيكه وشاي ”
غزل مسكت الكيكه في ايدها : بصي يا ماما امسكيها كدا بعدين تغطسيها كدا جوا الشاي ” وغطستها جوا الشاي لحد ما الشاي نزل علي الصنيه ”
نوال بصويت : لااااااء متغطسيش كُلي حته من الكيكه واشربي شوية شاي انما حوار التغطيس دا مش حلو
صلاح طلع من الاوضه بضيق من صويت نوال : بتصوتي لييه ؟
نوال بصتله : ردة فعل طبيعيه لما شوفت الشاي كان هيقع علي السجاده معلش ازعجنا نومك يا ابو غزل
صلاح بص لغزل ورجع بص لنوال : غزل صاحيه لدلوقتي ليه وانتي ايه اللي مصحيكي لخد الوقتي ؟
نوال اتنهدت اوي وقالت : عادي مش جايلنا نوم ف قولنا نسهر شويه ولا ممنوع يا صلاح
صلاح بصلها شويه : نيمي غزل وتعالي عايزك في موضوع في الاوضه ومتتأخريش ” ودخل الاوضه وقفل الباب ”
غزل : ماما هو بابا مبيجيش يقعد معانا ليه ويتفكر علي الكرتون وياكل من الكيكه
نوال ابتسمتلها وقالت وهي بتعدل شعرها : علشان بابا عنده كل يوم شغل بدري ولازم ينام بدري علشان يقدر يصحي ويجيب لغزل كل الحجات الحلوه اللي هي بتحبها
” غزل اتاوبت ونامت علي رجل نوال اللي حطت ايده علي شعرها علشان تنيمها ، نوال جزء منها اصبح بيكره صلاح بيكره كلامه وصوته وصمته بتكره وجوده معاها في نفس الاوضه او في نفس البيت اللي مقعدها معاه انها نوعا ما مطمنه انه مش هيأذيها ، بتكره اهلها علشان هما السبب في اللي هي فيه ”
نوال اتنهدت بتمني وغمصت عيونها وقالت : يارب ادخل الاوضه يكون نام يارب يكون نام انا مش عيزاه ” وشالت بنتها نيمتها في اوضتها ودخلت اوضتها وهي حسه انها داخله مقبره بصت عليه وكان نام فعلا ابتسمت اوي ودخلت نامت جنبه بهدوء وهي فرحانه ”
………………………………….
” في شقة ادهم ”
” ادهم اخد شور في حمام اوضة نومه وخرج لابس بجامه تقيله وهو بيتشف شعره وعينه علي نهال اللي نايمه علي السرير بتلعب في الفون بتاعها ”
ادهم ببتسامه : علي فكره جبتلك الكُشري ؟
نهال من غير ما تبص ليه : متشكره تعبتك معايا بس سوري مش جايلي نفس اكل اي حاجه دلوقتي لو عايزه ممكن تاكله انت
ادهم نشف شعره بالفوطه وهو باصصلها كتير : طيب انا جعان
نهال بصتله بستغراب : تقريبا انا قولتلك كُل تحت علشان مفيش اكل هنا في الشقه
ادهم بلا مبالاه : تمام مفيش اكل قومي اعملي
نهال بعدم فهم : الساعه ١ بليل اقوم اعمل اكل ايه دلوقتي ؟
ادهم ربع ايده وبصلها : معرفش انا دلوقتي جعان اتصرفي وهاتيلي اكل ” وقعد جنبها وقال ببتسامه ” بس ممكن يعني تصالحيني واكون شبعت ومتعبكيش
نهال بضيق : انت اللي مزعلني و انا اللي اصالحك ؟
ادهم مسك ايدها باسها برقه : حقك عليا انا عارف ان اتأخرت بس والله الوقت اخدني و مطعم الكُشري كان زحمه جدا علي ما عرفت اجيبلك
نهال بصتله وقالت : انا بخاف افضل لوحدي وانا استنيتك كتير ومفيش معايا رصيد ارنلك وانت قافل نت القلق موتني عليك
ادهم قرب من خدها وباسها بحنان : والله اوعدك ان هحاول لو خرجت متأخرش تاني بس افردي وشك كدا واضحكي
نهال ابتسمت وقالت : علي فكره انا عملت كيكة بالشكولاته وسبتلك حته جوا اعملك كوباية شاي واحيبلك الكيكه ؟
ادهم ببتسامه : بتهزري عملتي كيكه ايه الروعه والتحفه والشطاره دي متأكد انها هتكون خطيره قومي تعالي معايا هنعمل شاي وناكل سوا
نهال ضحكت : ايه التشجيع القمر دا يولاد ” وقامت معاه ” بالله هتاكل صوابعك وراها من جمالها هتقولي كل يوم اعمليلي كيكه بالشكولاته
” ادهم ضحك وراحو علي المطبخ ، نهال شغلت الكاتل علي الشاي وادهم داق الكيكه ”
ادهم ببتسامه : لاء بجد والله مش اڤوره الكيكه تحفه تسلم ايدك
نهال : اول ما انت مشيت جت نوال قعدت معايا وعملنا كيكه نزلت لمامتك وسبتلنا دي
ادهم قوب من راسها وباسها : جميله وتحفه تسلم ايدك نزلتي قعدتي تحت بعد ما انا مشيت ؟
نهال سندت علي الحوض بضهرها : ايوا نزلت ومعايا الكيكه غسلت المواعين وفضلت قاعده لحد ما مامتك نامت طلعت البرنده استناك
ادهم بصلها وهو مبتسم : شوفتي الكيس اللي فيه الكُشري ولا لاء ؟
نهال هزت راسها : لسه مشوفتوش بس اشمعنا
ادهم : جايبلك حجات حلوه كمان روحي شوفيها علي ما اجيب الشاي واجيلك بس تعالي نقعد في الركنه هنا
” نهال هزت راسها بالموافقه وراحت علي الاوضه تشوف ايه الموجود في الكيس بصت علي للحاجه بصمت كبير واخدت الكيس وراحت علي المطبخ ”
ادهم ببتسامه : عجبتك ؟
نهال : ايه معني الهديه دي يا ادهم
ادهم بتنهيده :…………
- يتبع الفصل التالي اضغط على (رواية جوازة صالونات) اسم الرواية