رواية ابيض و اسود الفصل الرابع عشر 14 - بقلم منى محمود
ابيض واسود
مني محمود بركات
الفصل الرابع عشر
احيانا كتير كل ظالم في حكايه مظلوم هو مظلوم عند ظالم تاني
كل حكايه ليها كزا مرايه وكل مرايه ليها كزا زوايه
دنيا عامله زي المتاهه صعب تفهمها
ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ--ـ-ـ-ـ-ـ-ـ-ـ-ــ-ـ-ـ-
وشها بهت والرعب ظهر عليها ورجعت خطوتين ل ورا ضحك بانتصار لما شاف حالتها وكمل
ــ عبيطة اوي انتي يا شهد ... فاكرة انك كدة كنتي بتحميه من مرض عمر ... احنا كنا عارفين من زمان بس بصراحة اللعبه عجبتنا لأن مش ع اخر الزمن حفيد اللواء عبد الرحمن يبقي من بنت حرام متربيه في ملاجئ وجاي عن جواز عرفي وقدرتي تحوليه ل رسمي عشان شهادة الميلاد مش كدة
اتكلمت بصعوبه من وسط دموعها
ــ أنا مش عايزة اي حاجة غير اني ابعد بيه ... والله ما عايزة حاجة يا نصر بيه
ـــ دلوقتي مش عايزة حاجة وهو حته لحمة حمراء لكن لما يكبر وعوده يشد نبص نلاقيه جاي بقا وعايز حقه مش كدا ؟
ــ لا لا والله ما هيحصل طب اقولك غير شهادة ميلاده خليها باسم ابويا وانا هتنازل رسمي عن نصيبي ف ورث عمر كدة احنا هنبعد وحضرتك مطمن اني مش هظهر لا أنا ولا ابني تاني ابدا والله ما هتشوفني ابدا بس سيبهولي الله يخليك ابوس ايديك يا باشا سيبلي ابني متأذهوش
ــ عرض حلو ... بس لو
قاطعته
ــ مفيش لو والله ما هظهر تاني ابدا هاخدة ونختفي و
قاطعها هو المرة دي
ــ استني بس مش سلق بيض هو ابوكي ميت من سنه ونص هنسجله باسمه ازاي متعرفيش يا شهد أن أهم من الشغل تظبيط الشغل ولا اي بص يا حلوة شهادة الميلاد الاصليه هتختفي من السجل المدني كله هو وقيسمة جوازك من عمر كان لم تكن هي كمان وهنعمل عقد جواز بتاريخ من سنه مثلا باسمك انتي وعبد الفتاح الراجل بتاعي وبعدها نعمل شهادة ميلاد للمحروس ما الصغير لو كل دا تم علي خير هخلي عبد الفتاح يطلقك وتروحي مكان ما تروحي في ستين داهيه أما بقا لو حبيتي تعملي اي حركة كدة ولا كدة هخليه يوريكي النجوم في عز الظهر ويلبسك قضيه زنا وياخد الواد ويحسرك عليه تمام يا حلوة ؟؟
برعب شديد هزت رأسها كزا مرة ورا بعض ودموعها نازله مش قادرة تنطق ... زعق نصر لما لاقاها ساكته
ــ ما تردي يا روح امك اي القطا كلت لسانك دلوقتي
ـــ حاضر حاضر والله حاضر موافقه علي كل حاجة موافقه والله
ــ غوري دلوقتي لحد ما ايام العزاء تخلص وبعدين هيبقي اكلمك وننفذ غوري يلاااا
طلعت تجري من قدامة برا الاوضه وبرا الفيلا كلها كلمة مرعوبه حاجة بسيطة اوي علي اللي هي حاسه بيه دموعها كانت نازله وبتردد جملة واحدة بهمس لنفسها
ــ سامحني يا بني سامحني بس لازم أحافظ علي حياتك حقك عليا أنا حقك عليا
ـ-ــ-ـ-ـ-ـ-ـ-ـ-ــ-ـ-ـ-ـ-ـ-ـ-ـ-ــ-ـ-ـ-ـ-ـ-ـ-ـ-ـ-ـ-ـ-ـ-ـ
بكر خرج من عند بهاء كان مفروض يروح علي البيت بس حس أنه مخنوق مش قادر يشوف بدور دلوقتي خايف يأذيها بكلامة اكتر من كدة راح علي الكورنيش وقعد سرح في اللي حصل وكل ما يفتكر كلام بركات وبدور يحس أنه دمه بيغلي من تاني
قاطع سرحانه تلفونه اللي رن برقم الراجل اللي مكلفه يراقب بركات رد بسرعه
ــ ايه الاخبار طمني ؟
ــ في العنايه المركزه بس حالته مستقرة عشان اتلحق بسرعه هيفضل ف العنايه ليله ولو الدنيا تمام هيطلع ع اوضه عادي بكرة
نفخ بضيق
ـــ زي القطط ... طيب خليك متابع عشان مش عايز أظهر في الصورة وقولي لو في جديد
ــ ازاي يا باشا مش هتظهر ف الصورة ما هما هنا من البطاقه عرفو بياناته والناس هتقول أنه ابو حضرتك يعني كدة أو كدة سواء البوليس أو المستشفى الاتنين هيكلموك
ــ ياساتر يارب عليك امشي امشي تابع من بعيد ب بعيد وخلاص اقفل يلا
ــ حاضر يا باشا مع السلامة
ــ سلام
قفل معاه وخنقته ذادت اكتر كان عنده امل الأمور تمشي زي ما خطط لها ويخلص من بركات من غير ما يلوث ايديها بدمه
اتنهد وحاول يهدي نفسه وتلفونه رن للمرة الثانيه بس المرة دي برقم بدور كنسل عليها ولكنها اتصلت تاني وتالت ورابع مرة قلق ل تكون تعبت تاني ورد عليها سمع صوتها وهي بتعيط
ــ ارجع يا بكر ... أنا تعبانة ارجع متسبنيش لوحدي كدة انا مقدرش اعيش من غير ولا ابعد عنك ابدا ... رد عليا يا بكر والنبي ... يا بكر
اخيرا صوته طلع
ــ انا مسافر في شغل خروج من البيت ممنوع اي رقم غريب يكلمك مترديش و هبعتلك بكرة واحدة اسمها ام اسلام دي حد ثقه هتقعد معاكي من ١١ الصبح لحد ١١ بالليل
ــ أنا مش عايزة حد انا
قاطعها بصوت حازم
ــ أنا قلت اللي عندي وابقي متسمعيش الكلام يا بدور عشان تبقي الناهيه بينا سلام
وقفل قبل ما ترد باي كلمة .. كلم العسكري اللي شغال تحت منه واللي الست دي تبقي أمه وأكد عليه أنها تراعي بدور وهو هيبقي تطمن عليها منها وقفل واتحرك علي بانسيون جمب القسم وسعره حنين حجز اوضه وطلع رمي نفسه علي السرير وهرب من كل حاجة بالنوم
ــ--ـ-ـ-ـ-ـ-ـ-ـ-ــ-ـ-ـ-ـ-ـ-ـ-ـ
الليل عدي ببطء علي الناس اللي عقلها شغال والفكر خلي النوم جفا عيونهم وجه نهار جديد شايل معاه مفاجات كتير
في شقه مؤمن صحي بدري جدا كان بيجهز بهدوء عشان ميقلقش علا وينزل من غير ما حد يحس بيه بس قبل ما يخرج من الاوضه قلقت علا وحست بيه
ــ صباح الخير يا حبيبي
ــ صباح النور يا قلبي آسف قلقتك معلش
ـــ انت نازل بدري اوي ولا أنا بيتهيالي ؟
ــ لا نازل بدري فعلا عندي مشاوير كتير وشغل مهم لازم يخلص انهاردة أن شاء الله
ــ طيب استني خمس دقائق بس هقوم اعمل فطار سريع متنزلش كدة
ــ يا بنتي خليكي مرتاحة أنا هجيب اي لما انزل
قامت علا من علي السرير
ـ لا طبعا الفطار اللي هتاكله دلوقتي أنا عارفه انك هتفضل عليه اليوم كله اوعي كدة علي ما تكمل لبسك وتلملم ورقك اللي في كل حته هكون جهزتلك احلي فطار
وقفها قبل ما تخرج ومسك ايديها باسها
ــ ربنا يخليكي ليا يا حبيبي وميحرمنيش منك ابدا
ابتسمتله بحب
ــ ويخليك ليا حبيبي يلا مش هتاخر عليك
خرجت وهو لم ورقه وجهز وفعلا علي ما خلص وخرج كانت علا بتحط الاطباق علي تربيزة صغيره في المطبخ
ــ الله الله اي الشطارة دي كلها
ــ اي خدمة يا دكتور
ــ قلب الدكتور ... كملي جميلك بقا واقعدي افطري معايا وافتحي نفسي
ــ مش هينفع يا روحي أنا هشرب معاك شاي بلبن بس عشان لما ماما تصحي نفطر سوا ميصحش تفطر لوحدها يعني
ــ ماشي يا ستي عفونا عنك
خلص فطاره ونزل وهي قامت تعمل تروق في البيت شويه عشان ميادة متعملش حاجة وتتعب نفسها وبعد شويه وقت صحيت ميادة ونيجار وبدء يوم جديد ليهم
علي بعد العصر كانو سوا في المطبخ بيجهزو للغدا لما تلفون علا رن برقم ماماتها سابت اللي في ايديها واستاذنت من ميادة وراحت تتكلم في اوضتها
ــ السلام عليكم ازيك يا ماما
ــ الحمد لله يا حبيبتي انتي عامله ايه دلوقتي طمنيني عليكي ؟
ــ الحمد لله احسن كتير والله
ــ ومؤمن بقا قاعد معاكي زي ما اتفق مع ابوكي ولا سابك تعبانه وراح شغله ؟
ــ لا والله قعد معايا ولما نزل ماماته جت وقاعدة معايا
ــ قاعدة معاكي !! انتي وجوزك هتشلوني والله العظيم بقا يا بنت الموكوسه تروحي من بيت ابوكي عشان حماتك تخدمك ؟ انتي عايزة اي بالظبط عايزاها تقول أننا كلينا منك ومقدرناش نخدمك ف مشيتي وجت هي تراعيكي عايزة تطلعينا قلايل الأصل يا بنت بطني دي اخرتها ؟
ــ يا ماما اديني فرصه افهمك الموضوع مش كدة والله
ــ تفهيني اي هه أنا تعبت منك معرفش طالعه غبيه وبرويه كدة لمين محدش في عليتنا كان كدة .. لا نافعه في بيت ولا مطبخ ولا حته عيله واحدة عارفه تراعيها لوحدك وفي الاخر تطلعي من بيت ابوكي عشان حماتك تخدمك يا بنت الاصول يا متربيه بتجبيلنا الكلام من اللي يسوي واللي ميسواش منك لله
صوتها اتخنق بالدموع واتكلمت ب حدة مقدرتش تدرايها
ــ أنا اللي مني لله حرام عليكي بقا حرام والله مفيش حاجة بتعجبك ابدا مهما حاولت ومهما عملت مبيعجبكش عمرك ما رضيتي عني عمرك ما حسسيتني انك خايفه عليا عشاني مش عشان الناس هتقول اي والناس هتعيد اي حرام عليكي عقدتني في حياتي وخلتيني إنسانة مهزوزة معندهاش ثقه في نفسها ولا شايفه في نفسها ميزة عشان حد يحبها ولما ربنا رزقني ب راجل حبني وخدني بيته بردو مش سيباني في حالي عايزة مني اني بقا حرام عليكي
ردت بغضب
ــ حرمت عليكي عيشتك يا قليله الادب بتكلمي امك كدة يا علا دي آخرة تربيتي ليكي دا آخره عمري اللي ضيعته عليكي أنا عقدتك في حياتك ؟ أنا ؟ جوزك دا ياختي اللي فرحانه بيه بكرة يزهق منك ويطلقك وقتها مش هيبقي ليكي غير بيت ابوكي بس الله في سماه يا علا لو ابوكي دخلك بيته تاني ل يحرم عليا البيت وابوكي نفسه ارمي نفسك في حضن حماتك يختي اوي خليها تنفعك بكرة تعرف انك خايبه ولا نافعه وترميكي غوري ربنا ياخدك
قفلت السكة وعلا من الصدمة والوجع اللي جواها فضلت تصرخ وتصرخ كان دا اخر صوت فيها ومع اخر صرخة طلعت منها كانت بتقع علي الارض وتغيب عن الوعي
ـ-ـ-ـ-ـ-ــ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ
بكر من اول ما النهار طلع وهو ملازم بهاء مش بيفارقه طلعو الدفاتر القديمة علي اكتر هاكر في مصر شاطرين وتتبعهم مش سهل ابدا وبدءو يشوفون مين لسه شغال وينفع يساعدهم ومين لا
ومؤمن كمان كان بيحاول يوصل للدكتور اللي كتب تقرير جثه عصام لكن الدكتور كان مختفي وكل ما يسأل عليه في مكان يسمع اجابه شكل ودا اكدله أن موت عصام مكنش طبيعي ابدا ف البيت والد الدكتور قال انه خد إجازة اسبوع وسافر يغير جو مع صحابه في المشرحة زمايلة قالو أنه بيحضر مؤتمر في اسكندريه كان مصمم يوصله ويقف جمب بهاء لحد ما الحقيقه تظهر عشان كدة حس ان الحل عند أهله مش زمايله ف رجع ليهم تاني
ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ
عند بكر وبهاء كانو قاعدين في مكتب الظابط وتلفون بهاء ك العادة مبطلش رن
ـــ مش هترد بردو يا باشا ؟
ــ لو رديت يا بكر هيتقلي اقفل المحضر وارجع مكتبك
ـــ وفيها اي ؟! ما احنا عارفين هنعمل اي ايه لازم عدم ردك عليهم ؟
ــ حاسس اني هبقي مقصر لأول مرة في حياتي يا بكر ... حاسس أني اول ما امرك يا افندم في حته جوايا من الوجع هتموت ف بحاول ااجل الاحساس دا علي قد ما اقدر
ــ تاجيلك ليه مش هيمنعه بالعكس تاجيلك دا هيخليهم يشكو فيك لما الحاجة. تنزل لكن لو رديت واتعاملت طبيعي جدا وقلت امرك يا فندم العين مش هتبقي عليك لما الاخبار تنزل
ــ أنا فاهم كل دا بس
ــ مبسش يا باشا اتكل علي الله ورد وخلينا نطمنهم علي الاخر ونركز احنا في اللي ناويين عليه
ــ حاضر يا بكر حاضر
ابتسمله بكر وفجأة اقتحم المكتب نصر وهو الغضب ماليه وبص ل بهاء و
يتبع
متنسوش اللايك بليييييز
و رأيكم
•تابع الفصل التالي "رواية ابيض و اسود" اضغط على اسم الرواية