رواية صوت من المجهول الفصل الثاني 2 - بقلم زينب ماجد

 

رواية صوت من المجهول الفصل الثاني 2 - بقلم زينب ماجد

فزيت من فراشي بسرعة على صياح احمد وضربه للباب

بعدني ما مستوعبة كوماي وما احس الا كامشني من راسي ويعت بيه

امي نايمة فزت خطية وركضت تجر بيه وهو يجر ويكلي : شعندج البارحة ويا رضاوي واكفة وياه ..

امي : هد البنية من ايدك

– يا رضاوي والله مواكفة ويا احد

– اخذتج وياي كلت خطية تضل وحدها تالي تسربتين هنا وتوكفييين ويا الووووووولد

امي تجر بيه : دوخر عن يالجلب ولك يتيمة الله لا ينطيك ليش تسوي بيها هيج

– بتج ما متربية يمه خليني اربيهاااااا

جرتني منه حيل ودفعتني ورا ظهرها وتفلت عليه : ولك بتي اني الما رباية يالنذل طايح الحظ تروح سبع فدوات لتراب رجليها ولك خواتك مربيتهن بيدي ما بيهن وحدة بيوم سودت وجهي لو خشنت كلبي الا انت .. اسمع ولك جزع كلبي منك تمشي عدل وياي ولك حميد خير على خير ما تمشي والله وعزة الله اطردك انت ومرتك هالحية ذيج وانعل سلفا سلفاكم

– اني اتطرديني من بيت ابوك

– لا تجيب طاري ابوك على السانك يالنذل ابوك لو داري بعمايلك تنزل امك بالدرب لخاطر مرتك يالاغم وتطرد بخواتك خاف مرتك تتعب وهسه لاحك هاليتيمة هاي .. عمت عين التراب الطمت عصام وخلت الجربان تلعب عليه

– سهلة سهلة يا حليمة

– انا امك اتسميني باسمي يالنذذذذل

– لا انت بس ام بناتج وخيرج بس لبناتج بس والله سهلة لا ما اندمج

– امدا الدنيا اذا انت تندمني

عافها وطلع يصيح وامي تدعي عليه من كل كلبها وتصيح

وراحت فتحت الباب على مرته وكالتلها : يمتى شفتي غفران واكفة ويا اخيج … احجييي من توزين براسه اعلى خيته واتسلين بيناتهم مثل الحية ارد اشوف يمتى شفتيها

هيفاء : اني شعليه ما كدرتي لابنج ترجعين عليه اني .. ذاك ابنج ورحيله

– وابني ياهو الكاله اختك واكفة ويا رضاوي ؟

– شمدريني اني لا كلة اتذبين براسي بليتيني بلوة فوك ما متحملتج ومتحملة خيسة بناتج وجهالج انوب ترزليني والله ما ابقى بهذا البيت ساعة

– درب الصد لا رد عساج بروحة ما بيها جية

طكت الباب وراها

واني واكفة اباب غرفة امي ورادة الباب حتى لا يطلعون جهال خواتي اللي كلهم كعدوا على صوت الصياح .

تقربت مني امي : يمتى هالجلب واكف وياج

– يمه اني مو حجيتلج دزتني اوكل جهالها بالمطبخ اجا وكف يكلي اريد احجي وياج عفته ورحت للهول يمج من رحت اتوضى بالحمام هم لزك اريد احجي وياج وسديت الباب بوجه وضليت محبوسة بالربع ساعة بالحمام علما راح .. وشفتيها شسوت لان ما بقيت بالمطبخ اوكل جهالها ما رضت اوكلهم يمج

– الظاهر الكو*** دة بيها وبين اخيها متفقة وياه وذاك الجلب الاغم على عمى عينه يسمع ويمشي وراه وتدفع العربانة ويجي يمنه يطربك

– اني لو ما رايحة احسن مو كتلج هسه شوفي شراح يسويله من مصيبة

– يركع راسه بيا حايط يعجبه

امشي كدامي لشوف ريكي جهال خواتج ذول اخترعوا من الصوت

فتحي الباب عليش حابستهم الجهال فزعت

فتحت الباب هجوا من الغرفة بين اليصيح ويصفك فرحان بالعركة

وبين المخترع ويبجي كعدت امي بالهول اتسكت بابن اسيل واني شلت بت نورة رحت للحمام غسلتلها وخليتها يم امي ، كالتلي جري الهيتر وشغلي لا تستبرد البت واخذي هذا ابن اسيل هم غسليله وياج وجيبلي جنطة نورة

شلته على ايدي ورحت جبتلها جنطة نورة واسيل ورحت اغسل لحمودي

ورجعت امي كاعد تبدل للبنية واني كمت ابدل لابن اسيل … طبت هديل من برا باوعتلها امي : وين جنتي

– ها خير شصاير شو كابين

– شعدنا غير الخير انت وين جنتي مو كلتي ما اروح ويا نور واسيل

– لا ما رحت وياهن بس رحت اجيب ريوك كلت اجيب كيمر وكاهي نتريك ريوك هني … كاعد تحجي

طلعت هيفاء من غرفتها وتگل لامي : خلي البيت الج والبناتج اشبعي بيه

– كلعة مردي والهوى شرجي

فزت هديل وراها : شصاير هيفاء وين رايحة

– عوفيني خل اهج طكت روحي شنو ع الكايمة والكاعدة ترزلني وتغلط عليه شنو فصليتكم اني تايهالكم

– عيب هالحجي امي مثل امج

– لا عيني امج بس الج اني امي ذيج ابيت اهلي اروحلها

– اكصي الشر واكعدي هيفاء الجهال كاعد تتباحى يا خيتي صلى على محمد وكولي الله

– عوفيني هديل اريد اطلع

– ولج وين اتطلعين وماخذه هالجهال وياج دكعدي

– عويفني اكلج

– يا شجاج ولج طبي اقلها انتظري احمد يجي وياخذج

– اسالي امج احمد مو طردته منه

– ام وابنها انت مالج غرض بينتهم عوفي الباب واكعدي

– لا والله ما اكعد وغصبا ما على الكل اطلع

– انت عليمن تشمرين وغصبا على منو شو ما تعرفين تحجين

– اكلج انت خطار اتكتري ولا تدخلين

– ما دامني خطار وانت ام البيت جا استحي تعوفين خطارج وتروحين ؟

– لا علويش ذيج امج موجودة

– ميخالف احبيبة ددخلي خية وكرلي يا الله واتهدى ترى والله ما تسوى المشاكل وهاي رحت جبت كيمر عرب وذاك الكاهي الزين وخلينا نكعد ونتريك بهنى عليش هالهوسة المامنها فايدة

– كتلج اطلع يعني اطلع انت ما تمنعيني

– لا اني ما امنعج اذا انت مصرة بس متطلعين لوحدج

– وشنو انت تحكميني

– اذا استوجب الامر احكمج واحكم الاكبر منج ، هم تروحين لاهلج وتكولين طردوني وتصفطين حجين مالج طلعة لو واحد من اهلج يجي ياخذج لو رجلج ما عدنا مرة توكب وتطلع عيب .

– يا فدوة تالي عمري انت اتعلميني العيب

– اعلمج والباب ما تطلعينه يعجبج يعجبج ما يعجبج بكيفج

قفلت باب الحوش وخذت المفتاح

كامت تصيح هيفاء وتضرب بالباب وتبجي

امي ضاجت حيل كامت تصيح : دخلناها اشتهرنا بالفرع شيكولون علينا بيت شهيد ونسوانهم صواتهن واصل لسابع جار

ما هدت ولا انردت بقت تصيح وتضرب برا وجهالها اخترعوا

رحت حتى اجر الاطفال خطية نطوا من البجي شو هاي لزمني وتعاركي وياي من راسي وتكلي : كله من تحت راسج ام الوووولد

هنا امي تخبلت ..لزمتهاوضربتها راشدي ودفعتها جوا ولزمتلها العودة كالتلها : من انغل ابوج لابو اهلج تصيحين على بتي ام الولد بنص الحوش والناس تسمع حسج ولج اني بتي ام الولد ؟

دفعتها بالاسقبال وسدت عليها الباب وخابرت على اهلها كالتلهم : هسه تجون لبتكم اذا ما تربوها لا الوموني اذا اني ربيتها

كالوها : خير شصاير

كالتلهم : هسه تجوها

وسدت الخط واني وهديل اثنينه شايلين الجهال ونباوع لا تهنينه بصباح لا بكعدة لا بريوك من ورا احمد ومرته .. هديل : اطيني ابن اسيل من ايدج وطلعي لملمي الطرمة سوتها كلها وصخ لا يجون اهلها عيب

انطيتها وطلعت غسلت الكراج ولملمته ودخلت انظف البيت ع السريع

اندكت الباب واجو اهلها ، لفيت ربطتها امي وطلعت الهم وهم يتسألون : خير شصاير

– هلا بيكم استريحوا وتعرفون الصاير

فتحت الباب مال الاستقبال ولكوا عود هيفاء متخربطة

كامت تصيح امها : يمه شمسوين ابتي يمه بتي ميته

ركضت هديل تجيب مي وعود تصحيها ما تصحى لزمتها هديل من خشمها وفركته فزت بسرعة كالتلها هديل : هيفاء عيب هاي السوالف احنه مو جهال

كامت تصيح امها : اموتين بتي وتعيبونها تمثل يمه الله لا يطيكم

كالتلها امي : محد اموت بتج ولا احد كاربها بس من توكف بالكراج وتصيح واتعيط واحنا ناس معروفين والناس تحترمنا شتسموها

من بعلو صوتها تصيح على بتي ام الولد

اريد اكاعدكم واعرف يا ولد ذولة الوكفت وياهم بتي وشافتهم بتكم

حجه ابوها : شصاير ام احمد ليش كل هالهوسة هاي

– والله يا خوية احنا المفتهمين

فز الولد من الصبح يجر براس اخيته يكللها شلون توكفين ويا رضاوي

احجي ضمير ام هيفاء بتي يمتى وكفت ويا ابنكم

مو هيفاء الرادت تستخليها بالمطبخ بحجة توكل الجهال وغران ما رضت ؟

جا يمتى بتي وكفت تروح توز اخوها وتهيضه من الصبح مو عيب

حجه ابوها : لا عيب احنه اهل وما يصير هذا الحجي واليمس بتكم يمسنا وانت جنتم ضيوفنا وخطارنا

– راعت ضيف بتك يا خوية راعت خطار تفتح درب لاخوها حتى يحاجي بتي ومن ما رضت تتبلى عليها مو عيب

– لا لا مو تتبلى بس صاير سوء فهم

– سوء الفهم يمكم العلينا خويا ما رضينالها تطلع خاف تكولون طاردين بتكم جريناها ردنا ما قبلت تضل بعلوا صوتها تصيح اطلع وغصبا ما عليكم هاي ما دامكم جيتوا خلها تطلع وياكم .. اتريد اتظل خو البيت بيتها ومحد ينطرد من بيته

– لا بيكم البركة ان شاءالله ناخذها ويانا جم يوم تستراح نفسيتها وترد

– كل الهلا

خذوها هيفاء وامها يدعن ويتحسبن

وابوهن رجال فقير يسكت بيهن ويجر بيهن لحد ما طلعهن

سدينا الباب وراه اندارت امي : الفروخ ماتت جوع سون الريوك عاد وخابرن نوره واسيل كللهن كافي دياحة خل يجن جهالهن منا لعبوا بينا طوبة

رحت للمطبخ اجت هديل وراي

ابتسمت .. صفنت بوجهي : انت من صدكج لو تضحكين عليه

– ليش

– كل هالمصايب الصارت والهوسة وانت انكتلي كون هسة دمعتج ما تنشف

– سوء فهم احمد فاهم غلط

– يا يمة يا برودة دمج خرب بيومج

– اي يعني شسوي ، كافي الله موجود ويعرف الحق وهو كفيل انو ينصره لو شما جان الظالم قوي

– شهالسوالف شكاعد تحجين تصفطين كلام مال كتب وفيسبوك

– ما اعرف اني هيج افسر الامور ..

– وله اكلج احسن والله لان اليعيش ويا احمد ومرته وما يكون ابرودج ينجلط ويموت كثري بهالبرود

– مو برود ايمان

– الله يقوي ايمانج خية انداري خلي نكمل الريوك لا تمي تثرمنا واطك فوكانا بيض تريك بينا الجهال يلا خية .

ابتسمت .. وكمت اسوي الريوك اني وياها

واجني خواتي من السوك مثل نعمة البطران لا يدرن بالسالفة طشت رشت طلعن البيت كله نايم رجعن احمد مطرود واهل هيفاء جااين وهيفاء طلعت زعلان حجت نورة : مو بيت تكول وادي الذئاب عفناكم ساعتين كل هالمصيب صايرة شصار

رزلتهن امي – فوك مصايبنا جهالجن الما سكتو لا خيلنا مميلت لا ملهيات نترس بهالحلوك وما يسكتون برى ..

اسيل : ها يمه انوب انداريت على جهالنا ؟

– يا يمه اني الخايفة من احمد لا مثل ما غصبوج ع الزواج يكض بهالسالفة حجة يم عمامج ويروح يغصبون غفران ع الزواج .. شلع كلبي حميد من ساعة السودة الشلته ابطني وجبته

– تكولين يصدك مرته ويجذبها

– اكول شنو جا هو ما صدكها واجا يجر براسها .. هو يدري غلط وما صاير بس هو حاب يسيطر رايد يطلعجن من البيت كلجن خاطر يفضى لبيت المرتة ، من وحدة بيجن باقية يحس كاعدة توزني على مرته .. فميريد وحدة من خواته والسبب زن مرته .

– والحل

– الحل يم ربج شسوي انا يمه شبيدي بيمن اتوچى واكض ظهري وادافع عنجن اذا هم بزري الطلعته من بطني جلاب شحال الغرب ؟

غفران : لا تشيلين همي يمة .. امري بيد رب رحيم هو كافلني مو بيد بشر اذا هم يكيدون كيد الله اعظم .

– الله ينطيج بنيتي على كد ايمانج وثقتج بالله وان شاءالله يا يمة يكسر عيونهم والا شني هذا رضاوي خلقة اخلاق هالمسلوع الدايح .. انت الوردة اطيج اله .. عمت عين الدنيا

– الله يكتب اللي بيه الخير

اسيل : تدرون احلى شي بغفران ؟ اطمئنانها مطمئنة اطمئنات تام انو محد يكدرلها والله موجود تحسسنا رب العالمين ملزم الملائكة ارماح يدافعون عنها

غفران : خو هذا الصيح الله يكول ( ومن يتوكل على الله فهو حسبه إن الله بالغ امره ) انت اليوم تنتخين بامي توكفلج بكل ما عدها قوة وهي ام انسان عادي من طين وبشر شلون وانت تتوكلين برب عظيم وتطلبين منه يساعدج تعتقدين يخذلج ؟ معقوله الله يخذل انسان ضعيف طلب مساعدته .. واذا هو ساعدج ووكف وياج منو يكدرلج وهو كافلج ؟ فلهذا فكرة انو الله موجود فكرة تدعو للإطمئنان ..

الرسول جان بنص الموت بالغار وصاحبه يرتجف من الخوف الرسول جاوبه بكل اطمئنان ( لا تحزن ان الله معنا) والله كان بالغ امره خلص نبيه ووصله لبر الأمان بدون ما احد يمسه .. الرسول لو ما كان يعرف انو الله بالغ امر ما اطمئن .. لهذا لابد نطمئن مو لكم في رسول الله اسوة حسنة ؟

هم ياكلون واني اندمجت اسولف شفت خواتي مو ذاك الاقتناع والتركيز بكلامي بس امي مركزة باللي اكوله وكالتلي : الله يبارك بيج بنيتي

ابتسمت بس حسيت بحرج

اللي يسولف بالدين والايمان بين الناس يحس نفسه مهزلة

مو كل الناس تدرك اللي انت تؤمن بيه .. اني من كد ما تعلقت بالكتب والاقراه عن الذات الالهي احس سوالفي صارت كلها هيج فمن احجيها يم اخ او صديق يحسني بطرانة .. محد يفهمني واو يفهم منطقي .

خلصنا الروك وخواتي كعدن يعرضن شجايبات من السوك

وكمنا سوينا الدولمة كلنا وحطيناها ع النار .. غسلت اديه وركضت .. صاحت : تعاي تعاي وين شاردة

– يمه بعد ربع ساعة ويأذن الظهر بس خلي الحك على غسل الجمعة

– اي تعاي شيلي الزولية ويا خواتج وروحي

– ماما هن هن يشيلنها

عفتها وركضت للكنتور اخذت ملابس وركضت للحمام غسلت غسل الجمعة لإن الرسول محمد صلى الله عليه واله يكول غسل الجمعة تغسل الذنوب السابقة من الجمعة الى الجمعة لهذا احرص على غسل الجمعة حتى ما تبقى بيني وبين رب العالمين ذنوب تبعدني عنه الوصول للذات الالهية .

غسلت وطلعت لگيت امي مستغلة لمة خواتي وجهالهن ابشع استغلال مخليتهن يطلعن الزولية وجايبتلها كرسي وكعدت بالحوش ترش بيها .. وتصيح … اسيل جيبي التايت.. شافتني هلا لازم البنكلاديشي مالتها حاضر عند الطلب بسرعة صاحت : همزين خلصتي غفران جيبي القصار مال الالوان

كتلها يمه : ما يصير للزوالي هذا للهدوم

صاحت : معلييج جيبيييي

رحت جبتلها سوت خلطة بالسطل وكالت لهديل رشي بهداي بالتساوي

ولزمت حتى الجهال فرچ يغسلون واحنا نغسل ومنكعين بالبرد .. والتمينا عليها اربعتنا لفيتاه وحطيناها ع الحايط توشل وطبينا ..

اني رحت اصلي الظهر والعصر ..

وخواتي سون زلاطة ومقبلات للغدا .. ردت اقرا قرأن بس ما قبلن ضلن يصيحن .. عاد لميت السجادة ورحنا كلبنا الدولمة واتغدينا ولمة سوالف وضحك لحد ما صارت ب٤ طشن كل وحدة اجا رجلها واخذها وامي كالت : راح اناملي شوية وكعديني من تصير صلاة المغرب .

نامت والبيت صار هدووووووء تشمر الأبرة ينسمع صوتها

فرشت سجادتي وكعدت الحك على اعمال يوم الجمعة قبل لا تصير صلاة المغرب …

كاعد اقرا قران .. سمعت الباب البرة تندك

صدقت وكمت فتحت الباب طلع علي اخوي سلم عليه : ها غفران شلونج وين امي

– هلا علي ، هستوها نامت

– شكو شصاير بينها وبين احمد

– والله يا علي ما اعرف احمد شجاريله مغشي عقله وديمشي ورا كلام هيفاء بدون فهم

– شكو .. سولفيلي على ما تكعد امي

سولفتله .. كال : وهم اهل هيفاء من شوكت يعزمون وبعدين انت تعرفين بيت بيه ولد ما اروح .. شعندج رايحة ؟

– والله هسه تكعد امي واسالها كتله ما اروح ما اريد اصلا كام يدمغ على راسي طلعت بسرعة بسرعة جرجرني بحجة ما تبقين بالبيت وحدج

– وشنو قابل احمد ك.. اد مثلا ياخذج حتى اخو مرتى يشوفج ؟ انت شو ما تعرفين تحجين ؟

– لا مو هيج بس هيفاء قنعته انو ما اضل بالبيت وحدي وامي ويايا فكال ميصير تبقى وحدها مع انو دائما ابقى وحدي من يطلع هو وامي وعائلته بس يكلي اقفلي الباب

– اي وهيفاء شتريد يعني من هالتصرف حتى توز براسه كافي هاي السوالف ترا والله ملينا حجت براسه حشته عليه انتم وين عايشن

– علي اذا انت بعيد ومتعرف باللي يصير بالبيت وشدا تسوي مرت احمد واشون يندفع بحجيها خو ميصير الواحد يحجي بدون ما يعيش ويفهم الموضوع ؟

– اي غير افتهم شرايدة

– من زمان رادتني لرضاوي اخوها ..

– وشنو راضوي وننطي مر وجه مال فر’ و خ مسلوع وكذلته لخشمه وكله وصخ هو زلم وننطي مرة ، خلقة اخلاق

– شحدك تكول هالحجي كدام احمد مرته واهلها خط احمر

– عاد لا تسووها كلش على احمد اخونا هو مو عدو

– ومنو كايل عدو بس مال يغلط على امي وينزلها من السيارة بتص الطريق والدنيا ليل علمود مرته هذا شتكول عنه

– شوكت هاي

– البارحة شلون تحاجت ويا مرته غلط عليها كالتله نزلني لا اعتذر لا كاللها يمه ما اقصد نزلها وحول مرته بالصدر وراح يوكلها موطة خاف ضوجتها امي .. علي انت بعيد معايش القهر العايشين منه احمد وهيفاء بس شنكول الله موجود

– من طاح حظه اذا صدك مسويها

صاحت امي : غفران هذا صوت علي.

اجا دخل للغرف باس راسها : ها شلونج يمه

– هلا بيك يمه شلونك فريخك شلونه مرتك

– بخير الحمدلله يبوسون ايدج ، شنو شصاير ؟

بقت امي تسولف وياه اني رحت اسوي جاي واجيت حطيت كبال امي وخليت الصينية كبال علي واخذت كوبي مال الجاي وكعدت على صفحة وهم يسولفون .

علي شاف امي مقهورة حيل من احمد كاللها كومي خل اخذج اشممج هوى ومعليج باحمد اني اكل لعمامي عليه يفركون حلكه شنو علمود مرته يغلط عليج .

كالتله : لا ما اكدر اعرف غفران وحدها وامشي

كالي : اي خل تروح ويانا

– تاخذني لموسى بن جعفر ؟

– دخيل موسى بن جعفر شياخذني هسه غروب منا اما نوصل دنيا الليل شوكت ارجعكم وشوكت ارجع للبيت

– جا خليها ما اريد اطلع كلت اذا تاخذني اروح شچاية لابو الجوادين

– غير يوم اخذج والله اجيج من وكت واخذج

– يطيك العافية يمة خليني

حاول ما قبلت تطلع مالها خلك ،بقى يسولف

شوية واندك تليفون على علي رد.. اني وامي نباوع بوجهه

يكول .. ماشي .. ديلا هلا بيكم .. لا منتظر وين اروح بس استعجل

يلا ماشي ماشي منتظركم .. سد الخط اندار علي امي

احمد وعمي حسين جايين بالطريق

– تلكاه مهيض عمك وجايبة

– خل نسمعه

اندار عليه : غفران كومي حضري الجاي بس كون چاي زين ولا اطبين من يجون دكي الباب اني اجي اخذه منج .

– صار

كمت للمطبخ الغروب نازل والجامع يمجد

اخذت نفس عميق وكلت : الهي وجاهي وباب رجائي أسألك بكرمك أن تمن علي من عطاياك ما تقر به عيني ، ومن رجائك ما تطمئن به نفسي ومن اليقين ما تهون به عليه مصيبات الدنيا.. برحمتك يا ارحم الراحمين .

باوعت للقوري بدا يفور حطيت هيل وتركته يفور فورتين وخليت مچيالتين جاي وطفيته .. انداريت شفت احمد وعمي طبوا للبيت وفاتوا للاستقبال ..ما اعرف للحظة ليش اتذكرت بابا جنت من اسمع صوت الباب انفتح اندار الكاه هو بضحكته وتجاعيده يتلكانا بالهلا وشايل علاليك المحبة من اللي نشتهي ونحبه .. راح وبقينا بحسرته ..هيج احس للحظة كل الحنين لابوية تجمع بصدري تمنيته موجود ويشك كل حلك يجيبني على السانه وياخذني بحضنه مثل ما جان ويكلي غفو

اشتاق لصوته لريحته

حتى لسجادة صلاته وكت الغروب

وصوته وهو يكبر ويملي كلوبنة حنية وامان محد يمسنا وهو موجود

دمعت عيني واني احضر استكانات الجاي الهم

طبت امي كالت : حضرتي الجاي يمه ترا اجو

كلت اي بس طلعت بخنگة

جرتني : شبيج عليمن تبجين ولج من وورا هالچلاب ذولة

شبيج يمه وهاي اني الاتباها بيج واكول مؤمنة وما تخاف احد ولا تنقهر

-مدا ابجي بسببهم بس يمه اشتاقيت لابوية

كلكم مو بحاجته مثلي ..

حجيتها ومتحملت حطيت اديه على وجهي وكمت ابجي

– لا تبجين يمة لا تبجين يبعد كلبي

اجت حظنتني : غفورة يمه يمن كون دموعج غسلني

-اسم الله عليج يمة بس ما بيه شي بس مشتاقة لبابا جان هيج وكت دائما يصيح العنده صلاة يكوم يصلي ويرفع صوت الاذان بالبيت ويملي البيت بصوته مدا انساه ولا دا اقتنع انو هو مات وهاهية لازم اتعود بعدني اريده وبعدني كلما ينفتح الباب اكول اتخيله جاي واتخيل ملامحه وطوله من يطب من باب المطبخ

احجي وابجي .. علي صاح

جاي جاي وين الجاي .. اجا شنو السالفة مو كتلج حضري الجاي غفران

هاي شبيها ليش تبجي

– اتذكرت ابوك وتكول مشتاقتله

– الله يرحمه شنسوي بعد هذا قدر الله .. بس كملوا الجاي يمه حتى نكعد بعد نسمع لحجيهم

غفران : جاهز بس اصبه

علكت النار جوا وامي كامت تحط شكر

فتحت المجر طلعت المشخالة .. وانتظرت ثواني بس الجاي يخذ فورة وحدة طفيته وصبيت .. امي اخذت الجاي وراحت واني رحت توضيت وصليت المغرب ورجعت كعدت ع الدرج يصير مقابيل الباب الثانية مال الاستقبال بس الباب مسدودة متنفتح دوم .. كعدت استمعلهم

اسمع عمي يكللها الحل يا حليمة ينباع البيت وكل واحد ياخذ حصته وكلمن يروح لحال سبيله ، نز علي ورده : نبيع البيت وامي موجودة صدك تحجي عمي ؟

.. عمي هذا يصير اخو ابوي وبنفس الوكت ابو رجل اسيل من بعد ما مات ابوي غصبها تتزوج ابنه ، ومن زمان طرح موضوع بيعة البيت بس كلما رفضنا وكتها لان ابونا جان هستوة ميت ومحد متقبل ينباع بيتنا .. اما بعد موتت ابوي فاختي اسيل اخذها وعلي اتزوج وطلع ما بقى بالبيت بس اني وامي وهسه من احمد زعل شافها حجة يفتح موضوع البيت

رد عليه عمي : اي شني قابل من ينباع راح تذبوها بالشارع تكعد عد واحد من ولدها

علي : خو تضل بالبيت وااحد من عدنا يضل وياها ليش تتهجول من هذا لذاك ، اذا احمد ما مستعد يكعد ويا امي ويكول تعبت .. اي خل يطلع اني اسد الشقة واجيب مرتي واجي اكعد يم امي

احمد : ومنين اجيب ابوك

– مثل ما اني متعين وقدمت على شقة انت هم متعين بالعكس انت راتبك اكثر مني اني ادفع اقساط شقة انت كاعد وراتبك كله بجيبك حتى سحب ونت امي جاي تدفعه من راتب ابوي بعد شنو اللي منيلك احمد ترا هذا الحجي عيب

– لا اني ما اعوف بيت ابوي وانت وعائلتك قليلين اني وعائلتي ٥ نفرات اروح اتهجول بالاجارات والصدك اني ما متعاجز من امي ولا اني ما رايدها بس خواتي تعبت منهن كل ما يجن تصير مصيبة

حجت امي : ولك نذل هن يمك كربك اساس المشكلة خواتك لو انت الكعدت الصبح تجر براس اخيتك عدوتك ولك مو يتيمة وهاي مدللة ابوك والكعدة مالته ما جان يجبركم بالظهرية الحمرة تشترولها ما جان بالاربعين يخليك انت وعلي تتناوبون اتدفعون العربانة حتى هي لا تتعب مات ابوك يالنذلك واستثگلت امانته

حجه عمي : عظم ابنادم ثكيل جا شيسوي الولد خوما يعوف عايلته ويبتلي باخته

حجت امي : هوية انت شنهي جاي تعمر لو تخرب

– حليمة هالحجي مردود عليج

– لا مردود ولا عنه جان انت تفرق بين الاخوة بدال ما تكله هاي اختك وعرضك وامانة بركبتك .. تريده يذبها وين يوديها

– يزوجها ويخلص من المشاكل

– هذا مو حجي البنية جاي تدرس

– بطلها .. هي الدراسة للبت شنهي المرة مكانها بيت زوجها

علي : عمي كول يا الله اختنا احنا ما متعاجزين منها بس خوما نحطها بالدرب بلكت احد يتزوجها

– لا شوفلها زلمة واطيها شني خلصت الزلم

– لا ما خلصت بس خوما ننطيها لياهو الجان

– الياهو الجان شنهي الحجي مضموم هي عليمن صايرة المشكلة مو لازمها هي واخو مرتة مترايدين زوجوهم واستروا عليها وفكوا المشاكل

حجت امي : ياهي هاي اللزمه ويا اخو مرته احمد انت شمصفط على اختك يم عمامك

– لا عمي شلازمهم اني ما لزمتها بس سمعت هي واكفة وياه

– اخو مرتك واحد فاسد البنية كيال عينك ما رضت تروح للعزيمة ولما انت تلح على روحتها ما تروح بس الصوج صوج مرتك هي التصيح عليها علمود تكعد تغدي ابنك بمطبخ اهلها وتسوي درب لاخو يحاجي اختك ويوم العافته وركضت يمي مرتك احت تصيح عليها لان ما بقت بالمطبخ توكل جهالك تالي من ما لكت عليها لزمة اجت تكلك لكيتها وي اخوي .. مرتك النقلتلك الحجي وكالتلك لكيتهم لو غيرها .. انكر

– تسمع عمي هاي المشاكل مرتك ومرتك .. هاي اني مبتلي

– يالاغم بدال ما تلط مرتك على حلكها تطعن باختك تضوج لان نجيب سيرتها صدك لو كالوا النار تخلف رماد يا حيف انت جبير عصام ذاك الشهيد اللي الدنيا كلها تحلف براسه .

حجه عمي : هسه من الاخير ما طول اخو المرة رايد اختك وراغبها لا تكفون بقسمتها اطي البنية واستر عليها

علي : يا ننطي عمي شنو هو اخوها خلقة اخلاق احنا اناسب هيج واحد مهتلف

احمد : علي انت مالك حجاية مو كاعد بتلفات الدنيا ببسماية واني مبتلي وكل الضيم على راسي وتجي حضرتك هنا تثني رجلي وتكعد تامر عليك ابيتك وبس

– والله لو تطلع نخلة ما اناسب هيج خلقة ولا انطي اختي

– ياهو التطلع نخله براسه شو تعال هنا

كام احمد يتهجم على علي وعمي يصيح ويغلط عليه وامي تفاكك بيناتهم وتهدي بيهم .. انتهت علي طلع من البيت يصيح وهو يحلف : دسويها يا احمد وانطي غفران لا ما افشلك ويا نسابتك والله والا اكبرها

– انطيها وغصبا ما عليك ومن عين باجر اخابرهم واكلاهم تعالو كبعوا واخذوا الجلب كاعد مرتاح راسه وراس مرته وذاب الحمل براسي ويريد بكيفه نمشي والله بالقندره اسحكك والله

كاموا يتصايحون وعمي مأيد احمد

امي غمته وطبت جوا لكتني كاعدة ع الدرج حجت : مالج غرض بهالسخيف ما تصيرين لنسيبه الا على جثتي اذا زوجوا اسيل غصب لابن عمها وسكتت ما ارضى بنسابته المهتلفين عزيمة لا قدروا ولا استحو حاطين نتف كبالنا شنهي جوعية ما شايفين دجاج بس ما يقدروك ولا يحترمونك وانت مثل الاعمى وراهم يالاغم اخو مريتك ريت الكاع طمتك بدال ابوك يالجلب .

جريتها ودخلتها بغرفتها حتى لا يصعد ضغطها

وانطيتها حباية وكعدت يمها وهي تحجي البكلبها وتصيح وتدعي على

على عمي واحمد .

انوب هدت اني رحت سويت عشى طماطة تكلا وجبن وجاي واجيت يمها نتعشى بس هي ما رضت تاكل .. بقت صافنة خطية وشايلة همي اندارتلي : الاحد دوام انت مو ؟

– اي

– جان اخذتج ورحنا لكربلا مقبوضة روحي منها نزور ابوج واشكيله اخيج الجلب

– يا ريت كلش مشتاقة ازور الامام الحسين وبابا

– ومدرستج ؟

– نطلع الفجر ونرجع العصر هيج وكت احنا بالبيت

– اي دين لعد حضري عباتي اغسليها وحضري روحج وحطي المنبه يكعدنا خاف يدك وما ندري

– هو موقت على صلاة الصبح نصلي ونطلع

– خوش

كمت اخذت عبايتها وجواريبها .. انداريت : ماما

– ها

– عندج عباية ثانية ؟

– شتسوين بيها

– اني مو كتلج اريد البس عباية اريد البسها واول خطوة اخطي بيها العباية اتوجه بيها للامام الحسين وهم ابشر بابا بيها

– اي يمه الله يرضى عليج عباتي الثاني بالملحق فوك اخذيها .

غسلت وشريتهم وفرشت يم امي ونمنا من وكت ..

ثاني يوم من الصبح كعدنا قبل الصلاة احمد جان جاي نايم بغرفته بلا ما ندري .. بدلنا وكملنا بس اذن صلينا وطلعنا … جانت اول مرة اليه البس العباية .. عادة من اروح للامام اخذ ملف مال صلاة ملابستها ابد .. بس من لبستها ومشيت بيها ابد مستثقلتها ولا ضجت منها .. حسيت ربي ديشوفني وفرحان بيه .. اني دامشي بالطريق اللي هو يحبه وهو اللي هداني وطلب من البس عباية بالحلم واني لبستها ما احس العباية محاوطتني كد ما احس ربي ورحمته هي اللي حاوطتني من يومها اخذت عهد على نفسي ما انزعها ابد لحد ما اموت .. وراح ابقى مثل ما يحب ربي يشوفني للابد .

صعدنا كيا

امي كعدتني يم الجامة وكعدت ييمي وانتظرنا الكية تقبط بعدها الشمس مطالعة .. قبطت الكية وانطلقت وجان صوت القران بالكية هادئ وكلش مريح للاعصاب كمت استمع للايات بتمعن واني صافنة ع الجامة .. كلها بخار .. مرة اكتب بابا .. مرة اكتب ماما مرة اكتب الله .. مرة اسوي قلب الحب .

بدا الفجر يطلع جان الجو بارد ومنعش والكيا دافية

فد اجواء حيل حبيتها .. وصلنا الامام الحسين تقريبا ب٧ ونص الصبح .. الطيور اللي بالكاع والاجواء الصباحية الباردة اللي تحيط الإمام .. تطمن الكلب وتنشر السكينة بنفس الواحد

دخلنا زرنا ويمكن لاول مرة نلكى الإمام فارغ كل مرة نروحله الخميس ع الجمعة مالك محط رجل بس من رحنا السبت زين الامام مو ازدحام تكدر تزور براحة .. زرنا الإمام وصلينا وقرينا صورة الصافات وطلعنا اتوجهنا للإمام العباس .. هم زرنا وخلصنا ..

حجت وياي امي .. نطلع لابوج لو ورا الصلاة ..

– بيش الساعة هسه

باوعنا ب١٠ ودقيقتين

احنا مقبرتنا بكربلاء ما ندفن بالنجف .. كتلها لا خلي نبقى هنا بالامام العباس نقرا قران ونرتاح .. ومن نكمل نصلي ونطلع حتى نتغدا ونطلع للمقبرة مناك بوجهنا للبيت

.. صدك كملنا صلاة الظهر وطلعنا لمطعم تغدينا

باوعتلي ماما ابتسمت : ناخية الحسين الشهيد ييمه يوكفلج ويفشل كلمن راد الشر الج

– الله موجود ماما لا تشيلين همي

– الله يحفطج ييمه

وبقت تباوعلي ابتسمت الها : ليش تضحكين

– العباية زايدتج جمال الله يحفظج لشبابج يبنيتي

– ويحفظج ان شاءالله

– يلا يمه كملي خاطر نمشي هم ياله نزور الكبور ونرد

– عادي اسويها لفة لان احس شبعت .. سويها لفة وضميها بجنطتج واذا جعتي بالسيارة اكليها .. كمنا وطلعنا بالطريق اخذتلي كرزات وزبيب وشامية واخذت العاب ٣ .. كتلها : المن ؟

– لجهال حميد خطية

ابتسمت : كلبج يمهم

– مالي غرض بامهم وابوهم غير احفادي ذوله

ومشت ليغاد وهم اخذت جكليت الهم متعودة تخلي الجكليت بجنطتها حتى بس واحد منهم يبجي تصيحه تنطي جكليته وتسكته .

لحد ما طلعنا شارع الامام اخذنا تكسي للمكبرة

من دخلت المكبرة هنا انقبض كلبي .. شكد احب ازور ابويه بس ينقبض كلبي من اجي اريد ازوره ما مستوعبة ابويه نايم جوا هالتراب وبعد ما نشوفه للابد ولا اكدر اطلعه ولا اشم ريحته ولا اكدر الزمه

وصلت لكبره بمجرد ما شفت كبره من بعيد عيوني هامت عليه والدموع جرن بلا توقف احس كلبي طار عليه .. نزلت من السيارة ورحتله ركض حطيت راسي على كبره ودكت ظهري عليه ابجي من كل كلبي

بابا احد يقنعني انت بعد ما ترد

بابا والله ما تعودت

٣ سنين وفاتك ما نستني زيدت الاشتياق بيه الك

حيل مشتاقتلك ارجع صيحلي باسمي كل لاخواني هاي غفورتي محد يلزمها .. بابا اشتاقيتلك حيل

ابجي واحجي وياه

مسحت على كبره واكوله الله يكول الشهداء احياء مو اموات بس احنا منشعر بيهم .. اكيد هسه انت دا تشوفني اجيت ابشرك اني بعد راح البس عباية .. ومقتنعة بيها كلش وان شاءالله .. اني دوم رافعة راسي بيك واكول اني بنت الشهيد اتمنى ارفع راسك بيه وترضى عليه .

صوت البجي مال امي على وهي تشكيله عمي واحمد وتحجيله كانما كاعد كبالها وتصرخ بكل صوتها وبجاها .. خطية شايلة همي اكثر مني وحيل مقهورة عليه

طلعت القران الصغير من جنطتي وكعدت اقرا الفاتحة و يس على كبره والزلزلة ودعاء الاموات .. لحد ما كملت وسكتت كالت امي: ها خلصتي

– اي خلصت

– كومي خاطر نغسله

غسلناه بمي الورد ومسحنا صورته وغيرنا العلم اللي على كبره

وقرينا الفاتحة للمرة الاخيرة .. ورجعنا التكسي منتظرنا

رجعت من عدنا بس مكسورة

حرارته بكلبي ما تطفى .. مشتاقة احضنه وابجي بحظنه مو الزم حجار واحاجي كبره مدا يطفى نار اشتياقي اله

رجعنا ركبنا سيارة وطلعنا لبيتنا وصلنا ورا صلاة المغرب

اول ما دخلنا باب البيت .. لكينا هيفاء واحمد بالمطبخ .. صوت الضحك مالتهم عالي .. من شافنا احمد دخل جوا فتحنا الباب هيفاء لابسة ملابس نوم فضيحة اني دنكت وعبرتها وهي تگل لامي

– يا اجيييتو عبالنا ما تجووون ….

 

• يتبع الفصل التالي اضغط على (رواية صوت من المجهول) اسم الرواية