رواية صوت من المجهول الفصل السادس 6 - بقلم زينب ماجد

  

رواية صوت من المجهول الفصل السادس 6 - بقلم زينب ماجد

اخذت الكلادة بيدي .. اباوعها اگلبها

بس احس عيوني صاروا گلوب حب وكلبي فراشة وطار

شلت راسي .. لگيت امي تباوعني ومبتسمة

ضحكتلها ..

سديت العلبة وانطيتها هي والتليفون لاسيل

خواتي فرحاناتلي يصورن والعيون تتلامع .. واني كلبي طاير من الفرحة

صاح رجال عمهم .. والنسوان كلها انسحبت

امهم سلمت ومشت .. واقاربنا ويا طلعت العريس هم طشوا كلها تصيح ( بيتنا مناك تايه ) بقوا بيت خالي ومرته .. وعمي وابنه رجل اسيل وخواتي وجهالهن .

من طلعوا الكل الزلم دخلوا للاستقبال

اني كمت لغرفة امي تزعت الفستان وغيرته لبست دشداشة

عيب من اخواني ما البس كدامهم هيج ..

كاموا يصيحون عليه خالي ومرته

كتلهم بس خل امسح المكياج خواتي ما رضن كال : عوفي يمكن نروح استوديو وناخذلج صور لا تمسحين

– لا ما اكدر اطلع كدام كدام رجل اختي وهيج مكياج على وجهي ما احب

مسحت المكياج كله .. وشلت البروش من راسي ولميته وحطيتله قراصة .. ولبست حجاب .. وحطيت عباية على جسمي عيب اطب كدامهم بدشداشتي مال البيت .. فخليت العباية بس على جسمي ما خليتها على راسي ورحت كعدت يمهم .. ديسولفون بالخطبة ..

من شافني خالي كام باس راسي وكال : بالمبارك عليج خالي شايفة الف خير وياربي يتمم عليكم بالخير

– مشكور خالو الله يحفظك

حجت امي : تعاي هنا يمة

كعدت بسد امي وهم يحجون بتفاصيل الخطبة والاحداث .. جلسة تفصيخية ما بعد الحدث .. متعجبين بالناس بالاوادم اللي اجت ناس كبار وحيل فرحانين بطبة ابو مهدي وكعدته وياهم .. قائد جبير وبهالتواضع والبساطة ..

حجه علي : رفعت راس والله كدام الفرع وكدام الناس

حجه عمي : صيري زينة وياهم عمي اكسبيهم .. خوش اوادم مبينين

خالي : اي والله خالي ورجلج بالخصوص زلمة كلف .. ما رضى يكعد والناس الشياب واكفة وذاك الحجي وذيج الهيبة الله يحفظة لشباب عجبني والله

حجه علي : ابو عرب بعد اصيل

حجه عمي : صدك عم الولد انطاني مليون .. بياض البنية

طلع المليون من جيبه وانطاه لامي وكاللها : ترا عمه كال ما تطول الخطبة بشهر نفضها فشدوا حيلكم اذا عدكم مشترات وهاي مالت النسوان استعجلوا مو غاد من يقررون تفشلونه ويا الوادم وتصيحون ما نلحك .. الناس خوش اوادم كون اذا يخابرون يكولون عكب باجر العرس نكلهم لبيه ما عدنا شي .. خوش

امي : ان شاءالله ، خواتها موجودات ياخذنها ويكملن جهازها .

حجه عمي : اكلكم ابو عرب ما يكدر يحط اسم سلام بلكت اكو تعيين بس كون مو ع الساتر وبالحرب لا يعني ع المديريات شلون ما حطوا اسم احمد وعلي بعد استشهاد ابوهم وعينوهم .. غفران حاجي .

حجه خالي : هسه هاي الامور عيب نحجي بيها هسه .. ما صاله ساعتين من اخذ من عدتا مرة ونكهد نتطلب تعال عين وبهيج مكان حط ..

عمي : لا مو هسه بس انا جاي احاجي غفران كون ما تنسى ولد عمها

امي دارت وجها ممتعضة ، حجه علي : الخطبة يمجن شلونها

هديل : والله صارت حصرة نسوانهم هم هواي وجهال اتفشلنا بالببسي ما كفى الكل .. دزيت على صناديك من الاسواق على ما وصلن طابين العرسان يعقدون وهن كلهن واكفات بالباب تيهنا منو الاخذ ومنو الما اخذ

اسيل : بس حلوة جانت الخطبة والايفون هم حلو

علي : يا ايفون

اسيل : غير انطاها هدية الخطبة ايفون سفن وردي يموت .. وجابلها كلادة ذهب على شكل سيف الامام علي عليه السلام .

علي: وين الايفون بالله اشوفه

حجت مرت علي : ولج صدك امبخته طلع حظج هاكبره كبل اسبوعين جابتج عمتي شاردة بيج يمنا

حجت امي : شاردة شني بيت ابوها دوم موجود واجيناكم خطار يوم وردينا والاخوان يتكاتلون وكلشي يصير بينهم بس كون ما يدخل بينهم الغرب

ردت : لا عمة يعني قصدي شوفي حظها البنية الله يحبها

حجيت : مو قضية حظ بس كبل شهر يمكن صارت هوسة هنا امي واحمد تعاركوا من ورايا واحمد طلع وبنص الهوسة خواتي شافوني ساكتة كالوا ليش ساكتة ما كأنج مهتمة كلتلهم ليش اهتم واني مؤمنة إيمان تام انو اموري بيد ربي يا بشر يكدر لامر بيد رب الارباب ؟ خوفك من اللي ما عنده شي يحامي لنفسه بيه غير يدعي الله .. هو ديخليك بموجهه مع رب العالمين .. تشوفون هاي الناس الأجت والخطبة المهيبة والامور الصارت وحتى الهدايا وكلشي .. هو جواب من رب العالمين ان الله بالغ امره .. ابدا ما يخذل انسان وكل امره لربه

بس القضية ما تنتهي هنا …

اني الكتب اللي حركها احمد جنت اقرا بيها عن الذات الالهية وافتهم معنى الحياة شلون يسيرها رب العالمين .. اني احب اعبده بعقل لإن كل كلام القران كان بهذه الصيغة .. ايات لقوم يعقلون ايات لقوم يتفكرون ايات لقوم يعلمون .. ليش ما كال ايات لقوم يتبعون ؟ شنو اللي يريده ربنا من هو ديشير للعلم .. هو يريد الإيمان يكون بعلم .. مو بجهل خلص اني مؤمن اني اصلي اني اصوم والسلام ..

اليمان بعقل بالضبط نفس الإمام علي لما كال ..

الهي ما عبدتك خوفا من نارك ولا طمعا في جنتك ولكن وجدتك اهلا للعبادة فعبدتك .. ايات الترهيب والتخويف واللي توصف جهنم ما زرعت الخوف بقلب الإمام علي وايات الترغيب ووصف الجنة والحور وكل الكنوز اللي يوعد بيها الله المؤمنين ما غرت الإمام .. امير المؤمنين راح يبحث بذات الاله هل يستحق العبادة ؟ الإمام وجد الذات اللهي وامن بالله بعقله مو بعمى قلبه .. وهذا الإيمام الاقوى لهذا الرسول محمد صلى الله عليه وآله في معركة الخندق وصف الإمام علي بـ ( الإيمان كله ) ليش ؟ لإنه بحث عن الوجود اللهي وعثر عليه وأمن بعقل .. وهذا قمة الإيمان والإيمان كله.

إستجابة الدعاء بعد شوط من المعاناة .. اشبه بصعود جبل وتحمل الريح الباردة والجو القاسي وقوة الصخور والهبطات اللي ياكلها وهو يصعد لحد ما يوصل القمة .. القمة هي الإستجابة .. لكن ما بعد القمة والإستجابة شنو ؟ اكو احد يكدر يعيش بالقمة ! ولا الاستجابة تعني انتهت انت بالنظيف وبعد محد يمسك الجزاء بيوم الجزاء الاستجابة والراحة بالدنيا كلها مؤقتة .. ولازم كل مؤمن يدرك ان بعد كل استجابة وكل قمة راح تركض رجليك بسرعة رهيبة بدون ما تسيطر حتى تاخذك للمنحدر وهنا امتحان اخر واصعب يختبرك بيه رب العالمين انو الأستجابة شسوتلك ؟ زادتك ايمان وصبر ويقين لو زادتك عزة وغرور وربي يحبني وربي انطاني ؟ الله يحب الجميع لكن اكثر اللي يحبهم رب العالمين يكونون مبتلين بأصعب انواع المصايب بالحياة اذا ما جانت بحياتك مصيبة معناها الله باعدك عن طريقة المبتلى هو المحبوب عند الله واجمل مثال نبينا محمد اللي ابتلى بشتى مصائب الحياة وهو حبيب الله !

الخلاصة .. انو اني جنت مؤمنة ايمان تام الله يصلح اموري

لكن بنفس الوكت اني خايفة ما بعد الاستجابة شلون راح تكون ؟ وبشنو رب العالمين راح يختبر صبري وايماني حتى يقيمني تزيد مرتبتي عنده لو اجزع بسرعة واريد استجابة بسرعة مثل كبل واضوج وتنزل مرتبتي عنده! ..

من بعد المغرب الكل تقريبا طش وراح لبيته خواتي خوالي عمامي

بقى بس مرت علي لان احمد وعلي طلعوا بشغلة .. وكال لمرته ورا العشا اجيج .. كعدن هيفاء ونسرين بالمطبخ يسولفن على كيف بيناتهن

وامي صلت المغرب خطية واتمددت تنام حيل تعبوا بالخطبة

اما اني .. فمديت سجادتي صليت وكعدت اقرا قرأن .. قريت صفحتين وتوقفت على غير عادة .. لإن مرت صفحتين ما اتذكر شقريت بيهم لساني يرتل بس ولا حرف وصل لعقلي .. عقلي طاير ومشغول بتفاصيل الخطبة .

اتذكرت نوره اختي جانت طول الخطبة تصور بموبايل امي

سديت المصحف .. بسته وخليته على كصاي وحطيته ع الميز .. لميت سجادتي واخذت تليفون امي وكعدت على صفحة اباوع ..

فتحت الصور وكمت اكلب بيهم .. كلهن نسوان ولا صورة مصورتني اني وياه .. رحت للفيديوهات .. لكيتها من بعد ما طالع الشيخ هي فاتحة فيديو ومصورة اللحظات كلها من اصيح على اسيل تجيب شال وهو يخزر بامه مستحي يريد يطلع من النسوان ..

عيوني غايرة وحلكي مشروك بضحكته واني اباوعه بالفيديو هيئه وجوده يمي وبصفي ينطيني شعور كلش دافي يملي كلبي .. متغير عن اول مرة شفته بيها .. جان لحية وشعر اعلى من هيج بالخطبة مزين لحيته مبقي بس شواربه ومخفف شعره حيل .. اوكف الفيديو على شكله واكعد اتامل بيه ..

ما كاعد اسيطر على براغي وجهي فالتات حيل

اضحك بالهوى لا يطب احد ويشوفني هسه يكول ما معونة متزوجة

صعدت فوك ..

كعدت بالسطح .. الجو حيل حلو بيه نسمة برودة

كعدت اتذكر تفاصيل الخطبة وسرحانة واداور بالحلقة بايدي ..

وابني جبال يابو جبال من الاحلام بمخيلتي .. هيج اعيش وياه وهيج احاجي وهيج يحاجيني واسوي قصص واحداث حب وغرام وعركات وهوسات كلها براسي .. لحد ما صارت الساعة ب٣ بالليل صعدتلي امي واني كاعدة بالظلمة فوك

: غفران

فزيت : ها يمه

– بيج شي بتي ؟

– لا يمه ما بيه شي بيش

– ييمه من يمتى صعدتي كلت البنية صار بيها شي دنزلي يمه انزلي لا تتمرضين

– حلو الجو

– ميخالف بتي برد اذار ياذي الاعظام .. انزلي يلا يمه ..

نزلت وياها ..

تمددت بفراشي عود نمت ؟

لا اجاني نوم ولا شفت النوم .. كل شوية اباوع التليفون والكلادة وارجعهن لمكانهن .. لحد ما طلعت الشمس يلا غفيت بلا ما ادري واني افكر

كعدت ثاني يوم اول ما كعدت رحت للتليفون اتفقدته

ما بيه بس رقمه بس ما اتصل ولا خابر .. اخذت الكلادة لبستها حطيتها على صدري كلت بعد ما انزعها ابد .. اخليها ذكرى منه

وانتظرت اليوم كله بلكي يخابر بس ما خابر ابد

ثالث يوم .. هم ما خابر شنو نسى هو خطب !؟ اذا ميريد يخابر ويتواصل ليش جابلي تليفون شسوي بيه ؟

رابع يوم كلت ارمش عليه واذا اتصل اكول بالغلط

شو اتصلت .. يكولي الخط خارج نطاق الخدمة .. لو خطه ما يشتغل لو هو بمكان ما بيه شبكة .. يمكن هو ملتحق .. بس حتى لو ملتحق ليش ما يرن قابل هناك ماكو شبكة !؟

يجوز خطه عطلان

بس لا لو عطلان خطه جان ما حط رقمه هنا

واهلي و اخواني يخابرون على هذا رقمه .. بس يمكن عنده رقم ثاني

ردت اكول لاحمد بس استحيت .. كلت لامي : عندج رقم ايوب

كالتلي : اي بتليفوني ليش ما عندج

– لا عندي بس مسحته بالغلط

رحت اخذت الرقم اللي عد امي .. طلع نفسه اللي عندي !

يعني ما عطلان ولا شي بس هو مشغول .. لعد ليش ميخابر !

ثاني يوم اجتني هديل اختي اخذتني للسوك

من الصبح رجعنا ب١ اشترينا كومة غراض تجهيز للعرس

من رجعت كبل فتحت التليفون اباوع بلكي متصل

لكيت رسالة ركض فتحتها طلعت من الشركة مكتوب بيها ( هذا الرقم متاح حاليا) .. اكلج هديل اذا الرقم متاح حاليا يعني شنو

– اتصلتي باحد وجان مغلق وهسه انفتح الخط

– زين يطلع عند الشخص انو هو اتصل لو لا ؟

– اي هم تجيه رسالة هذا الرقم اتصل بيه ليش ؟

– لا هيج اسال

ضل بالي مشغول .. كلت ارجع ارمش مرة لخ بس خاف شايف الرسالة

واحد يغلط مرة مو مخابرته مرة وما محصلته ومن انفتح الخط اخابر مرة لخ بالغلط لا تفشل السالفة .. اعوفها هو من يفرغ يتصل .

ضل بالي ياخذ وينطي

كلت اخابر عليه واكول خابرت ردت اسأل عليك !

بس لا عيب شنو هالخفية حتى لو عقدنا بس بعده غريب لا اني اعرف ولا اعرف اطباعه ولا هو يمكن يطلع عقده يمكن يطلع شكاك وعباله اني عادي عندي اخابر الولد .. بس هو زوجي صار

لا يا زوجي دخل اعوفها عيب كلش عيب .. يتصل هو ارد ما يتصل لا اخابر ولا هاي .. غير الزلمة هو اليتقرب من المرة خو ما اني الاتنحنح واخالر واتقرب .. يريد هو يخابر اني معليه .

ياربي شغلني حيل

احس اخذ حيز من عقلي اكثر من اللازم

لا كاعد اركز بقراية لا بتلاوة .. حايرة افكر ليش ما خابر !؟

اي لا يخابر يضربه وجع

لا اسم الله عليه يعني مو يضربه وجع خطية هو بساحة معركة

بس يعني معليه .. لا ما ادعي عليه ما اعود الساني ادعي عليه هو زوجي بعد صار حتى حرام ادعي عليه .

مر ما يقارب ١٥ يوم على نفس الحطة

لا خابر لا اتصل واني ما اتأقلمت .. بس استسلمت لانو ما بيدي شي اسوي ما يصير اروح اذب نفسي

لحد ما امي حجت .. جانت خواتي ملتمات

كالت : غفران يمه هم يخابرج يحاجيج

-لا

اسيل : يعني ما خابرج ابد لو قاطع

– من يوم الخطبة من راح بعد لا اتصل ولا هاي

هديل : شنو السالفة لعد المن جايب تليفون

نور : شنو من بشر هذا .. اني بخطبتي طلع من باب الخطبة منا اتصل منا يكلي طار عقلي بجمالج وطاير من الفرحة

اسيل : حتى اني .. بخطبتي خابرني بسرعة بيوم الخطبة فرحااان

حجت امي : يمه الزلمة مو صغير ولا هو فارغ .. الرجال امر ومشغول وعنده جنود وكومة امور فوك راسه ومعارك حرب دموم يمكن مشغول يمكن عنده ظرف .

– زين هم جان يزوركم

هديل : اوي الله يلا يذكرني باول زيارة لمحمد تتذكرين يمه من ابوي طرده من البيت يكله شنو كو—- د اني جاي تريد تكعد ويا بتي ابيتي من تاخذها عروس عود اكعد وياها

– بيومها اتعاركا وياه كتله رجال جاي على مرته وعاقد عليها شنو تمنعه يشوفها غير يكعد وياها يتعرف عليها ..

– والله ابوي جان صعب

– ايييه ما ينحمل بعصبيته .. خاصة لو الموضوع يخص بناته يتسودن

وبقن يحجن بسوالف خطوبتهن وشلون اجوا بعد الخطبة اول مرة وشلون كعدوا ، استمع لخواتي وتجاربهن .. يعني وضعه مو عادي

كل اليخطبن يخابروهن ويتواصلون وياهن ويجي .. بس اني الوضعي مو عادي .. يعني معقولة متكبر !؟

لا هو ما مبين عليه متكبر صح ثكيل اكثر من اللازم

ما يضحك ولا يجامل .. بس ما متكبر ..

بس كأنما ثكله اقرب للتكبر .. ما اعرف بعد دخت

اصلا ما انطي اكثر من قيمته يريد يجي ميريد ليجي قابل ميته عليه !؟

كشت نفسي واحس اللهفة البداخلي بردت عليه لإن اللهفة بس عندي هو لو عنده لهفة عليه ومخليني اباله جان اتواصل لو اجا ..

ماما من حست الوضع غريب

متصلة بأمه كالتلها : شلونكم شخباركم كلت اسال عنكم

امه : تسال عنكم العافية غفران شلونها

– زينة غفران ايوب شلونه

– والله ما جاي صارله ١٤ يوم من التحق ولليوم ما نزل هالايام ينزل ان شاءالله ويمركم .

– خير ان شاءالله لا على راحته اني بس ردت اسال عرسكم قريب بعيد لان احمد اخوها رايد يرمم كم شغلة بالبيت وهالخابرت استفسر

– والله يا خية ما ادري يوم الخطبة كال احتمال بنزلتي الجاية اسوي العرس واحتمال بالنزلة الوراها .

– نزلته يعني يمتى

– هو المفروض من كبل ٤ ايام نازل بس اتاخر ومتعودين هيج يتاخر هواي تصير لان ما يكدر يعوف وحدته ..

– ها الله كريم الله يحفظه ويرجعه بالسلامه سلمينا عليه

– يوصل ان شاءالله واني بس يخابرنا راح اكله يخابركم يسلم عليكم

– إن شاءالله يلا مع السلامة

– الله وياج خية سلمينا

– يوصل ان شاءالله.

سدته وصاحتلي .. كتلها : يعني يخابر اهله ويتوصل وياهم ميعرف يخابر

– بعده يمه الزلمة ما متزوج كبل وجبير ما متعود على سالفة الزواج ورجال مسؤل وعنده كومة امور براسه اذا نبقى نعد بهاي وهاي ونحط ارواحنا ما نفلح .. من تصيرين عده يتغير الحال

– الله كريم

يومين .. وخابر على احمد اخوي

كاله : باجر غدانا ان شءالله يمكم اني والاهل جايين نشوفكم

احمد كاله : كل الهلا بيك حجي على راسنا

احمد خابر على علي اخوية

اجا علي وراحو هو واحمد لا خلو لحم لا دجاج لا سمج ما جابوا .. لا فاكهة ومخضر وبقوليات وعصاير وحلويات .. وعلي دز على هديل تجي تطبخ خاف مرته وهيفاء طبخهن مو هلكد وامي ظهرها مريضة ما تكدر توكف على جدر

اجت هديل من الصبح .. اللحم المثروم سوته كبة جريش

وسوت برياني تمن وفوكاه حشو شعرية والحبشكلات .. ووالدجاج تكلي وتحطه فوكه .. وسوت مركة فاصولية .. وشوت السمج بالتنور .. وخبز حار خبزت هيفاء .. ومرت علي سوت محلبي بالشعرية

واني سويت مقبلات بيذنجانية .. ومعكرونة وخيار وجزر وطماطة .. وسويت زلاطة ناعمة .

ل١١ كالتلي هديل : امشي روحي اسبحي وكملي روحج بسرعة كبل لا يجون .. صدك عفت الشغل عليهم وسبحت وطلعت لبست ثوب جديد لونه اصفر خردلي وكلش نازك وحلو ولبست وياه ذهبي .. وكعدت اسرح بشعري .. وحطيت حمرة سحرية قليل على شفايفي وشوية على خدودي وفركتهم .. طلعت حيل حلوة

اباوع بالمرايا وفرحانة هسه راح يجي واشوفه واسولف وياه

وكعد عقلي يجرخ وحده شسولف وياه وشكله وشفتح مواضيع .. ما اعرف اني ما عندي خبرة بالتواصل الاجتماعي تواصلي ويا المحيط صفر .. اعرف انطي رأيي اذا احد سألني بس لا اعرف افتح موضوع ولا اشارك بالسوالف اللي تتسولف كدامي .. متقوقعة على نفسي وشلون راح احجي وياه .. يمكن يحس اني جامدة وما عندي سوالف واذا حجه وياي شلون راح احجي وياه احس اخجل اني صح احب يجي ويخابر بس كلش اخجل من عنده

ضليت اودي واجيب بعقلي ..

صارت الصلاة كلت مدامهم مجايين خل اصلي ..

صليت الظهر والعصر بنهاية الفرض صاحوا اجو .. خلصت صلاتي وكمت بس كلبي يدك احس صابني مغص .. شلون راح اطلع كدامه ؟ بحجاب اكيد بس خوما بهذا ثوبي الاصفر احس كلش عيب .. ابدله ؟

صاحت هديل رحت اركض

طبت امه وخواته اثنين علياء وسرى

سلموا عليه وكعدوا بالهول .. واسمع صوت رجال يحجي ويا اخواني

بس ما اتصور صوت ابو عرب .. الصوت كإنما رجال جبير صوت ايوب نوعا ما كمت اميزه .

بس بقيت ساكته كلت اكيد جاي وساكت ..

حجت امي : جا ابو عرب وين ؟

امه : والله بدل وعلى اساس يجي ويانا ومتحضرين صدك ويخابرون عليه من الوحدة صاير طارئ ولازم يلتحق .. خابر على عمه كاله عيب الناس منتظرين ياريت تاخذهم بدالي .. وهو التحق .

– يا خطية الله يرجعه بالسلامة

– الله يسلمج عروستنا شلونها شو مبين عليها ضايجة

ابتسمت من غير رغبة

لان صدك ضجت يعني لا مخابر ولا واصل والتحق بيوم جيته النا !

اقلها خابر اتصل … هنا حسيته صدك متكبر

واذا قائد بوحته وجبير الجبير الله الواحد ليش ماخذ الاوادم بعين الصغيرة ؟ احترم واعتذر .. دازهم يعتذرون بالنيابة عنه .. اشايف روحه

مكدرت اجامل ولا اضحك بوجه اهله ووجهي مفضوح ميعرف ينطي وجه يختلف عن الاحس بيه اذا ضايجة ما اعرف اضحك واذا مرتاحة ما اعرف اسوي روحي ضايجة .

كمت للمطبخ حجت هيفاء : ميخالف احبيبة مشغول انطي عذر .. رايد يجي ومحضر روحه بس بعد د١عش وعمايله شيسوي الزلمة خوما يخلي د١عش تلعب شاطي باطي ويجي يكابلنا

هيفاء : شنو وماكو غير داعش منتظره خطيب غفران شوكت ينزل حتى تهد

– لا مو منتظرته على وجه الخصوص بس اذا كل قائد عاف وحدته ونزل رحنا بيها واندمرت بيوتنا

– اي غير اكو الينوب عنه خوما يعيش بالساتر !؟

– لا ما يعيش بس بعد شغله هاي معركة مو دوام ووظيفة ونكول يطلب اجازة ويجي حرب الطايح رايح والرايح ميت واكيد همه حاطين خارطة وحدات كل واحد يلزم منطقة خاطر داعش لا تتعدا

– اوي هديل شكثر ادافعيله شنو شمنطيج شايب خضرة معجونية وهيج مشتغلتله محامي

– والله لا منطيني ولا شي بس احمل اخاك سبعين محمل خوما نروح نلوم .. امشن خل نصب الغدا عيب .. غفران لا تبقين هيج مدلغمة .. فكيها عيب منا اهله

رحت ساعدتهم وكعدت

حجت امه : سمنانه زايد لو الاصفر يسمن

حجت هديل : يا خالة جسمها يخبل لا سمنانة ولا ضعيفة البنية اذا ما بيها لحمة شوية مو حلوة جلد وعظم وغفورة فدوة لكلبها تجنن

سرى : لا حلوة حتى احنا ذاك اليوم كناله لايوب مرتك كلش حلوة وشعرها حلو

– وشكال ايوب شو ايوب هم مسويها ظلمة

حجت امه : غير زلمة مسوول شني ما عده شغلة وعمله فارغ للنسوان احنا عدنا عادة لا نسأل الزلمة وين رايح ولا وين جاي ولا ليش ولا بيش .. الزلمة زلمة ما يتحاسب

– يا خالة وياهو المحاسبه بس من يوم الخطبة ما شفناه

حجت اخته علياء : حتى احنه منشوفه .. هو مو جندي وعنده ١٥ ب ١٥ .. هو اكثر ايامه هناك .. عود هسه يكول اريد اغير وضعي ع الزواج ما ابقى هناك .. اكمل شغلي وارجع حتى لو بالليل الاهل يصبرون بس المرة ما تصبر

حجت امي : هسه بس كون الله يحفظه ويحفظ كل ولدنا عمي ما نريد شي بس الله يخليهم سالمين وتخلص هالحرب على خير وينتصرون

حجت امه : اي والله لاعب حلكج خية كلوبنا خلصت الله لا يشوفج يوم السمعت بابو انصاب اني كلت رجلي راح شهيد بس ما يكلولي .. بعدين عرفت متصاوب بس اصابته خطرة

– ووينه هسه الحجي

– بالبيت خطية نجلاء يمه

– انت ما عندج بس ايوب

– جان عندي ولد اصغر من ايوب .. بس ما تسمعين غير العافية تمرض ومات

– الله يرحمه خطية .. هم الله يساعد ايوب طلع فوك همه همين هم شغله وهم بيت اهله مالهم احد غيره .. الحجي راتبه مستمر لو قطعوه

– لا مستمر وهم عنده محلات بالشورجة مال ملابس

– هاي عني ما ضال على فلوس الراتب .. اي زين العيشة خية ما تلحك

– لا يخية شتلحك .. ايوب وعمامه وولد عمه لازمين المحلات اللي بشورجة

امه تحجي بس فد كارهة الوضع احس مطايقتهم لا هو ولا اهله ولا سوالفهم ولا عاجبني اسمع عنه لو عنه وضعهم .

كوة خلصت الكعدت وبالف يا الله طلعوا وافتكيت بس ضجت كلش

امي وهديل يحاولن يحجن وياي وقدري واعذري .. واني كل المسويته بس ساكتة .. بس اكو نار براسي وبكلبي تفور .

اهله اجوا يوم سبت ..

الأثنين هو خابر على احمد كاله : احسبوا احسابكم هاي الجمعة العرس والحنة الخميس

ما حجاها جابها ضربة على راس اهلي ..

شيلحكون نكمل الجهاز لو يشترون ملابس لو تفاصيل الحنة لو البيت

كومة تفاصيل

خواتي جابن غراضهن وجهالهن .. وكعدت

وهن محتارت بالتفاصيل واني حايرة بجهالهن

اجت اسيل كالت : امشي كومي نروح ع الصالون يصبغون شعرج

– ما اريد

– ما تريدين شنو مو حلو شعرج اسود لابد كم خصلة تصبغها حتى التسريحة بالعرس تصير حلوة

– اسيل مالي خلك والله

– غفران شو خلكج مو مال وحدة تريد تتزوج شبيج يعني واذا ما اجا رجال مشغول شنو يعوف كلشي ويكابلج ؟

– وليش يخابر احمد ليش كله يبلغ احمد المن جايب التليفون اذا ميريد يخابرني ويتواصل ويايا

– اي خابري استفسري منه كوليله ليش

– واني اخابر وانزل روحي ليش مو هو

على صياحنه طبن خواتي .. كلهم يدافعون عنه صايريله سيف

خو احمد كام يدك على راسه يكلي : انت شنو خوية مفلفلة تريد يخابر ويتملحس ترا هذا حجي مو واحد مهتلف وفارغلج

– حجي على روحه ما اريد

– ما تريدين شنو بكيفج غير الزمج بالعباس ادفنـ چ بصف ابوي والله

امي : على كيفك يمه بهداي وياها

– يا بهداي يمه ما تشوفيها تريد تفشلنا كدام الناس والله ما يخابرني

– اي متضايقة شتسوي على كيفك وياها

– متضايقة تصم حلكها وتسكت واللاه يا غفران اذا سمعت مخابرته لو كايلتله اريد افصخ هالسوالف مو رضاوي .. اشوفلي واحد زايعته الكاع بالشارع انطيج اله بلاش واخلص منح ادرس ابطنج والله ساعة ما تظلين بهالبيت اذا فشلتينا ويا الحجي

اني واروح كدام الناس واكلهم والله اختي فصخت وما صار نصيب لان ما يخابر خاب والعباس غير الزم اخبزج خبز بالقران .. اني وعلي نتعاون عليج خاف ذيج المرة هو اليدافعلج من تصخمين وجهه ويا الحجي والله دفن ند فنج

كام يصيح ويضرب البيبان ويغلط

اني فوك الكره طلعت روحي لو ما حرام اكتل روحي ولا اروح اتزوج هذا المتكبر الشايف روحه شوفه .. ما اكدر استمر بهذا الزواج لو مو اخواني .. لو مو الدنيا

اهلي صاروا وناس تصيح عليه وناس تقنع بيه

واني اذا الحايط حجه اني حجيت .. اخر شي شردت منهم وصعدت فوك قفلت الباب مال الغرفة وكعدت بس التليفون بيدي

كتبت رسالة بساعة عصبية ( السلام عليكم اخي اني ما اكدر استمر بهاي الخطبة ولا اريد اتزوج بس اذا كلت لاهلي ما يقبلون اتمنى تنهي السالفة من عندك لان اني ما اريدك )

دست ارسال .. وصلت

دقيقة وشافها .. ما جاوب

ردت ادز رسالة اكتب .. وارجع امسح

ليش ما رد !؟ ياربي بس لا يكول لاخواني

اذا كاللهم واتفشلوا يسوون شده يا ورد ويكطعوني تكطع ..

رجعت كتبتله .. بس لا تكول لاخواني اني راسلتك وكتلك انهي

دزيت .. هالمرة بسرعة شاف الرسالة انتظرت يكتب .. او يرد كلشي ماكو

كتبتله عليك الله لا تكلهم هذا قراري هم ميقبلون كللهم انت الما تريد لا تكول اني .

ما يرد .. كتبتله كل الناس من طين الواحد مو حلو يتكبر هاي عود انت مجاهد بس بعد مو كل انسان الله موفقه .

دزيتها هم شافها

انوب رزلته هسه يكول لاخواني رزلتني يا بويه انوب يدرون مرزله الحجي مالتهم اليوم كتلي ثواب لليدورله ثواب .. يربي شسويت بروحي اني

يا الله عيشني ويا واحد فكر يخون يسوي ما يسوي من مصايب بس ما اعايش المتكبر شلون بالله والله ما اطيق اعيش ويا واحد مثله ما كتب ولا سال ولا اجا اباله ..

بقيت اكل بروحي

عيوني نار اريد ابجي ما تنزل دموعي بس احس صدري حيل ضاق

رحت توضيت ومديت سجادتي وصليت ركعتين حتى اطمئن بس ما اطمئنيت بقت النار بداخلي

بقيت اشكي لربي يخلصني منه اني ما اكدر اعيش ويا المتكبر ربي انت ابليس طردته من رحمتك لان متكبر .. التكبر راس كل حرام ما اكدر اعايشه خلصني منه ربي دخيلك

بقيت ادعي واشكل لصلاة المغرب

كملت صلاة المغرب وكعدت اسبح تسبيح الزهراء .. طبت اسيل : رجلج اجا

باوعتلها يا رجلي ؟

– ابو عرب كومي بسرعة

– ما اريد اشوفه

– يا شنو ولج متردين تشوفي غير جاي عليج عيب

– ما اريده ولا اريد اشوفه

راحت اجت نوره وهيفاء : كومي يمعودة لا تسويها مصيبة طلعله احمد يكوله جاي اريد اطلع غفران شوية عندي موضوع وياها

– ومن كل عقله هذا اطلع ويا منو هو واطلع ويا اني

– يا ولج غير رجلج

– لا رجلي ولا اعرفه ما اروح

كامن يحجن يكرصن يجرن كتلهم : لا اتعبون نفسكم ما طلع وياه وشبر خارج البيت ولا حتى اطلعله تكدرون تغصبوني عليه بس ما تكدرون تغصبوني على تعاملي وياه .

شوية واجت امي كالت : الزلمة طب بالاستقبال رايد يحجي وياج كومي

ساكتة ما ارد ..

ولج بت الاوادم شنهي العنادة هاي كومي الرجال بالاسقبال لا تفشلينا

يماااي لا ترد ولا تحجي ولجن ما تطني النعال ابرد كلبي بيها .. مخابرته انت محاجيته كولي الرجال اجا فجأة شمحاجيته شمصخمه ؟

اجا احمد يحجي بصوت ناصي وهو يصك على سنونة : بالقران اذا كمتيلا هسه اجرج اسحلج سحل ..

ضربني على راسي وهو صام ايدي خواتي دفعنه ويحجن بصوت ناصي : هسه تكوم والله بس روح .. هسه احنا نجيبها

كومني يجرجرن بيه بس اني الدموع تتجمع بعيني وما تنزل

كتلهن : ما اطب هيج تنطوني حجابي وعبايتي

– يا عباية ولج بت الاوادم غير رجلج طبي اتفاهمي وياه

امي : دطنها فضنها عسى ما تطب منكبه بس خلي اتطب اتفشلنا ويا الرجال عيب .

لبست ربطتي وحطيت عباتي على راسي

دا اريد اطب للاستقبال .. هديل نزلت العباية من راسي

مديت ايدي اريد ارجعه .. صد بوجهي كاعد ع القنفة .. كعدت على القنفة اليم الباب ابتسم كال : اشدعوة ترا السلام لله يابه

ما رديت حجه : ها هسه ياهو الطلع متكبر

حجه احمد : يخسى اليكول عليك متكبر حجي ياهو الكايل عليك

رده : سالفة انا ومرتي انت ياهو مالتك ؟

ضحك : العفو حجي على راسي

حجت امي : نخليهم وحدهم ما طول رجال ومرته يمكن يريدون يسولفون

حجه هو : اي والله

كاموا كلهم وسدو الباب .. حجه هو : اني متكبر والله ما موفقني !؟

تعاي هنا ابويه ترا ما نعض ولا ناكل بشر بالعباس

– مرتاحة هنا

– ما طول مرتاحة هاهية اللي يريحج ..

اي سولفي

ما حجيت .. حجه : اني ما فارغ والشغل ليفوك راسي واهلي وعمامي كلهم ما يعرفون يسوون شغلة ابيتنا اذا مو اني فوك روسهم وشفت الرسالة واجيت حتى اعرف منج الاسباب خو اني ما ارضى اتزوج بنية اهلها غاصبينها عليّ .. بس غير اعرف الاسباب !

اذا الأسباب تخصج احترم خصوصيتج وهسه احجي ويا اهلج واكلهم قسمة وما صارت وما تراهما ومثل ما دخلنا بالمعروف نطلع بالمعروف .. بس اذا السبب مني انطيني اسبابي

ما رديت .. حجه : يعني راح تبقين ساكته

اكو بداخلي كومة حجي بس غير كون حرف يطلع مني انعقد الساني استحيت انطق ، كام كال : هاهية ما طول ما تردين ما بلازم نفضها هسه والله يوفق الجميع

كام وراد يفوت مني علمود يدك الباب علمود يصيح اهلي

كمت من مكاني : لا تصيحهم راح ياذوني اذا فسخت

– جا شلون نضل هيج ؟ انت اذا ما تريديني ما اريد العرس

– اني اللي ما اريد !

باوعتله وهن صبن دموعي ما اعرف ادير الموضوع واسولف البكلبي دموعي تسبقني وتخرسني ..

– ليش ليش كل هالدموع

لزم اديه ورجع كعدني بمكاني ع القنفة ونزل وكمبص كدامي : ليش تبجين ابويه كليلي شنو المضايقج احجي ؟ ترا والله اني ما اعرف اتعامل ويا النسوان كلبي ميت كبال عدري احز نحره بلا ما يرف جفن بس يم دموع المرة والله كلبي رجيج ما اتحملهن ليش تبجين

– ما بيه شي

– هاي الما بيه شي عليج العباس عوفيها لان والله اني ما اعرف للنسوان حتى اكعد اترجم الما بيه شي هاي مالتجن

هو يحجي هيج لو كأنما يسويلي واهس بالبيج

دموعي تصب زروگ ..

لزم راسي وباصابيعه الابهام مسح دموعي ورفع روحه عن الكاع وباسني بكصتي : ليش هالدموع والله تكتلني احجيلي .. ترا والله اني مشغول ولا تسمعين عني امر وقائد وحدة .. ترا والقران احنا اكثر ناس امرنا مو بدينا ولا وقتنا بادينا حالنا ومالنا ووقتنا كله بالمعركة ..

ادري يمكن متضايقة لان ما اجيت وهاي حقج بس والله ردت اجي ..

بس هم التحقت والتحقت هم ثاني يوم الخطبة وصلت هناك والله نسيت روحي خاطب ١٤ يوم الله وكيلج بسيارتي انام مكان ما النا ونحط وانام .. واني بحرب لا بوظيفة وكاعد على ميزي واتذكر واخابر .. هناك لازم مو بس عقلي عقلي وحواسي كلها افتحها لان مسؤل عن امن منطقة وجنود اذا سهيت لو التهب اعمارهم ولا امنهم لعبة .. والله حالنا يبجي الكافر لا اكل مثل الاوادم ولا نومة مثل الاوادم .. ليلنا تخطيط واجتماعات ونهارنا مداهمات وفك مفخخات .. ماعندي وقت اذكر امي هاي امي غير العايفها هي والبنات وابوي جريح والله ما عندي وقت اخابر ولو صار وقت ما اتذكر لا وكتنا ولا عقولنا النا ..

هسه هذا مو تبرير انت مرة وما تعرفين امور الحرب وحقج هالامور اوسع من تفكيرج واني غلطان وحقج عليه وشتريدين مني هسه اني حاضر … بعد

– ما اريد شي بس الله يحفظك

– وج مساعة تكليلي متكبر والله ما موفقني شيحفظ مني بعد

– ما ادري يعني اني احس ما اهتميتلي

– حقج وكلب ابن كلب اللي يكول مو حقج واني اكلج اني غلطان بس يبنت الناس هذا اني وهذا وضعي خاف بعد يومين تتزوجيني وهم يرجع هالموضوع بساحة المعركة روحي ما افكر بيها اذا جوعان لو شبعان مو غيري ومن ارجع للبيت مشاهد المعركة كلها براسي والله شيبت روسنا بس محد يحس بينا .. صاحبي الروح بالروح راسه ينمرد كبالي ولازم ما اضعف ولا اهتز بساحة المعركة لازم ابقى بكل حيلي واكف واوجه واواجه مالنا وكت حتى نحزن هالامور من حقنا نعيشها من نرجع لبيوتنا نرجع اجساد بلا ارواح بس شنكول ما ضل شي ونحرر هالكاع ..

بعد لو ماني وغير وتعبنا هذا جا هسه انت وعباتج يمسه الداعشي طمني بالساتر ولا وصخ يوصل عباية عراقية وحدة ..

ابتسم وهو يكول انت شايفة الشاب اللي انكطمت ايده ورجله شكال

الجف والساگ انطيهن .. حتى تنامن مستورات ..

سترجن مكلفنا ارواح بالعباس .

هو يحجي هالحجي شكد حسيت روحي سخيفة وفد وحدة فارغة وما عندي سالفة

حجه : تعبن رجليه من الكمبصة هذا الزواج طلع ينرادله حيل

ابتسمت ..

جر ايدي تعاي اكعدي هنا يمي

جر ايي كمت امشي ورا والعباية تخوط وراي واجر بيها بايد وحدة

حجه : اني ما رايد اظلمج انت مستعدة تتحملين وضعي !

هزيت راسي .. ما اريد هز احجيلي ضمي الهز لبعدين الحكين تهزين

احجيلي مستعدة لو لا .. سكتت .. : يعني ما تريديني ؟

– لا

– لا يعني ما تريدين

– لا اريد

– شتريدين

– اني بس اعتقدت انت ما تريدني يعني ما عجبتك لهذا ما خابرت ولا اجيت

– ادري عقل بشة انت يا بوية ؟ ما رايد المن اخطب ؟ المن اشتريلج تليفون واشتريلج الشي الظل بنفسج ؟ جا اتدفع دم كلبي عليج واني ما رايدج عقلج عقل البشة هذا شلون يفكر

– ما ادري

– ما تدرين شلون اني مو اجيت وشفتج وجنت والله حاسب احساب ٥ ملايين للذهب كلش بالزايد ٧ كلت لان امي كالتلي خمسة .. بس يوم الشفتج وكل الذهب ما عجبج غير التخم ابو ال١٥ حجيت فتحت حلكي لو حطيته الج بدون تردد اذا ما رايدج جان ما كلت ختولي شنو هاي واذب عليها تعب سنيني ؟ اني ما اعرفج ولا اعرف اطباعج اني شاري مرة من هالبيت اعرف صاحبه واعرف اخوتج خوش ولد واعرف امج طيبة واصيلة وجاي مشتري مرة بت اصور خو النسوان هوايوما اكعد اتحمدلج بروحي واكلج رايداتني عمي املح اجلح محد تباوعني بس يبنت الناس اني مشتريج ومشتريج بتعبي وبتعب سنيني والصرف الجاي اصرفه هذا منين مو شغل عمري .. ليش مو حتى احصلج جا كل هذا وما اريدج يم عقل بشة !

لازم ايدي وكاعد حط عكرس اديه على عكوس رجليه ولازم بايدي ومدنك .. تحسر وحجه : وهسه راضية يابه

ابتسمت ، حجه : الله يعني اذا كل مشكلة لازم هالكثر اصرف حجي والله لا يضل السان ولا يضل عقل ..

– اني مو صعبة اني بس لان ما اعرفك اعتقدت متريدين يمكن استحيت من عمك لما طلبني كلت يمكن ميريد يفشل عمه واخذني هيج من لا جارة

– خو اني اني مو صغير واعرف اليناسبني من الما يناسبني باعتقادح لو عمي خاطبلي وحدة ما ارضاها انجبر !؟ لا راح الكى طريقة ارفض باحترام بس اني اجيت وشفتج بنية حلوة ومستورة ومرباية طول الطلعة عينج لا اجت يمنه ولا يسرى ولا عندج حركات مو حلوة وسمعت تفكيرج وعرفت شكد انت قنوعة ومؤمنة وبنت اصول .. وانعجبت بيج وقبلتج زوجة .. وبعدني انعجب بيج غير هسه اني رجلج وطابتلي بحجاب وعباية بس حاب حيائج ومستحاج واني شاريج

هزيت راسي حجه : وهسه احجي اني وازعل لو ما احجي !؟

– اي

– اني مو اجيت بالخطبة مو صار بناتنا حجي وهديتلج تليفون وكلادة ورقمي حاطلجياه بالتليفون ما تعرفين تخابرين وتشكريني

– ما اجا على بالي كلت خاف عيب

– واجا على بالج بس تزعلين يم عقل بشة !؟ لا شو اريد ازعل واكلج انت هم متكبرة لا شكرتين لا حجيتي حجي حلو اني بصراحة مليت تعبت انت ما تهتمين بيااااا .. طلكيني .. اقصد فصخيني انت متكبرة والله مموفقح

ضحكت وحطيت ايدي على وجهي اغطي بروحي من المستحى

اخذ حنجي واتقرب باسني بخدي .. صخنت من المسحى

ما اعرف شنطي ردة فعل لو شسوي جريت ايدي من عنده وكمت افرك ايد بايد ..

جر علاكه وحجه : عمي الواحد يضله بدون مرة اصرفله بالقران شنو جاي اكت ملايين وما ترضن لازم نصالح ونقدم فروض الطاعة هنوب حتى حلويات لازم نجيب حتى ترضن علينا .. العزوبية طلعت اسهل والعباس بس الما رايد روحه يتزوج

بس يلا عمي تستاهلن المن نجاهد والمن نتعب والمن نكد غير علمودجن .. بس كون ترضن امهات عقول بشة اكولها شبيج .. ما بيه شي

حتى ما تتكرم وتكول شبيها لازم نكعد نجيب مترجم وكتاب مفسر حتى نفهم هاي الما بيه شي شنو معناها

حجه وحط العلاكة بيدي : هاي حلويات الج

ذيج المرة جبت للعائلة بس هالمرة .. بس الج مو تنطين

اريد منا للعرس كون فول مواصفات

– مو اخاف اسمن

– اي اسمني شعليج اني احب السمينة

– مو امك كالت اضعفي

– امي اتكلج اضعفي !؟ ليش

– تكول السمينة تصير عجوزية ما تشتغل

– بعد كل واحد يدور مصلحته امي تريد مصلحتها واني رايد مصلحتي

ما افتهمت شيقصد بس ابتسمت بوجهه، وهسه : تسمحيلي اروح لان وراي كومة امور لازم اخلصها

– لا عادي بس اجيبلك مي

– رحمة من تعرفين يبستي حلكي .. جيبي

كمت طلعت من الاستقبال ..

ذولة اهلي داخلين بازمة ووجوهم سود عبالهم راح اتعارك وياه وافصخ وافشلهم وكلهم ملتمين باوعو بوجهي لكوا الضحكة شاكة حلكي .. كلهم صفنوا بوجهي ….

 

• يتبع الفصل التالي اضغط على (رواية صوت من المجهول) اسم الرواية