رواية حبيبي المدير الفصل السادس 6 - بقلم شيماء صبحي
وصل ماهر علي صوت حمزه العالي فبص عليه لقاه واقف يبص للبنت اللي قدامه بخوف واضح في عينيه فقال بتساؤل وهو بيقرب منهم:خير يا انسه بتتخانقي معاه ليه؟
احلام انتبهت للصوت اللي جاي من وراها فقالت بصوت واضح:بما انك خاله ابق قول للست والدته انها معرفتش تربي.. لفت بجسمها علشان تشوفه ولاكنها اتصدمت لما اكتشفت انه يبق ماهر الصياد؟
ماهر اول ما شافها استغرب لان ملامحها مش غريبه عليه فقرب منها وعلي ملامحه الجديه وقال:تقدري تقوليلي ايه اللي حصل بالظبط؟
احلام اول ما شافته بيقرب منها سكتت لانها كانت مركزه مع ملامحه اللي مش قادره تصدق انها حقيقيه ؟
اتكلم ماهر تاني ووجه كلامه لحمزه وقال:ايه اللي حصل يا حمزه وليه بتتخانق مع الاستاذه؟
حمزه بص لأحلام بغضب وقال:انا كنت ماشي وهيا خبطت فيا وبقولها تاخد بالها لقيتها بتكلمني بالاسلوب دا هيا باين عليها كدا يا خالي مجنونه؟
احلام فاقت من شرودها علي كلمه مجنونه اللي قالها حمزه بصوت واضح وكأنه يقصد انها تسمعها كويس؟
احلام بصت لحمزه بغضب ورجعت بصت لماهر وقالت :حضرتك بقى خاله؟
ماهر بصلها وقال :ايوا انا ؟
احلام بصت لحمزة من فوق لتحت وقالت بضيق:الاستاذ ابن اختك دا مش محترم وتقريبا كده نسي يتربي؟
ماهر اتضايق من كلامها وبص لحمزه بغضب لانه دايما بيعمل مشاكل ومش بيتعلم من اخطائه فقرب منه وكان لسا هيتكلم لقي اتصال من مدير حسابات الشركه بص علي الاسم باهتمام و فتح المكالمه وبص لحمزه بضيق وقال: بقولك ايه انت تحل مشكلتك دي معاها بعيد عني انا مش فاضي للكلام دا واقسم بالله يا حمزه لو ملقيتك ورايا خلال خمس دقايق اعتبر نفسك في دبي من بكرا ومش هتشوف مصر تاني ؟
حمزه فتح عينيه من الصدمه وقال:انت هتسيبني هنا معاها بجد يا خالي ؟
ماهر هز راسه ورجع بص لاحلام وقال:للاسف انا مش خاله ولا اعرفه يا استاذه وهو عندك اهو حلوا مشكلتكم مع بعض!
احلام استغربت كلامه وفكرت انه بيهزر ولاكن اللي صدمها انه اتحرك من قدامهم وخرج من المكان .
حمزه بلع ريقه وهو بيبصلها وبعدها قال:هو انتي مش هتمشي بق ؟
احلام بصتله وقالت بغيظ:بق انا مجنونه!
حمزه حرك راسه بالرفض وقال:مين قال كده !
قربت منه وهيا بتمسكه من هدومه وبتقول:انت هتستعبط يلا انا سمعاك وانت بتقولها بصوت قد كده !
حمزه حرك راسه بالرفض وبلع ريقه بتوتر وقال:انا…اكيد مش قصدي عليكي انتي انا كنت اقصد واحده كده وهيا في الحقيقه مجنونه..شبهك؟
احلام رفعت حاجبها وهوا غمض عينه وقال:والله اسف؟
احلام زقته بعيد عنها لدرجة انه وقع علي الارض وقالت بضيق:انت باين عليك لسا عيل صغير وانا مش هضيع من وقتي معاك كفايه عليك اللي حاصل فيك انا اصلا مش ناقصه.
حمزه اتوجع من اثار الخبطه وحاول انه يقوم ولاكنه مقدرش…. احلام مشيت من قدامه و قربت منه بنت من اللي في المكان ومدت ايديها ليه وقالت بتساؤل :انت كويس؟
حمزه رفع عينيه بص للبنت لقاها منقبه فهز راسه وقال:لا بموت هو انتي ممكن تكلملي الإسعاف!
البنت ضحكت وهيا بتبص لحالته وقالت برفض:انا هشوف اي حد من اللي في المكان يساعدك خليك هنا وحاول متتحركش !
حمزه حرك راسه بالموافقه والبنت اتحركت من قدامه وقربت من شاب من اللي شغالين في السوبر ماركت وشاورت علي حمزه وقالت:تقريبا كده الشاب دا مش قادر يتحرك ممكن تساعده لو سمحت؟
الشاب بص لحمزه وهز راسه بالايجاب وهيا شكرته ومشيت والشاب قرب من حمزه وقال:هات ايدك يا استاذ ايه اللي حصلك بس!
حمزه حرك راسه بالرفض وقال: لا ايدي ايه انا مش قادر اتحرك هو انا ممكن اطلب منك طلب وارجوك متستغربش؟
الشاب هز راسه بالموافقه وقال:اتفضل يا فندم!
حمزه قال بتعب:ممكن تشيلني !
الشاب اتصدم من كلامه وردد كلام حمزه بعدم إستيعاب وقال :اشيلك؟
حمزه طلع من جيبه مبلغ كبير وقال:خد دول حلال عليك بس ارجوك شيلني لحد العربيه اللي واقفه برا؟
الشاب بص للفلوس بدهشه ورجع بص لحمزه وقال:انت بتتكلم بجد يعني انا لو شيلتك هاخد كل الفلوس دي؟
حمزه مسك ايد الشاب وحط فيها الفلوس وقال:امسك كده حطهم في جيبك بس والنبي خرجني بسرعه ؟
الشاب ابتسم وحرك راسه بالموافقه وقرب من حمزه اللي نايم علي الارض وشاله علي ضهره .
_________
كانت احلام اخدت باقي طلباتها واتجهت للكاشير وحاسبت عليهم وخرجت من المكان وهيا في طريقها للجراچ علشان تاخد عربيتها شافت ماهر وهو واقف قدام عربيته الفخمه وبيتكلم في التيلفون بصوت عالي وغاضب وكان بيقول:يعني ايه مش عارفين تتصرفوا امال انتوا شغلتكوا ايه في الشركه مدراء علي ايه بق مهيا بقت سايبه ،اسمعوني كويس المشكله دي لو مخلصتش خلال ساعه اعتبروا انكم مطرودين !
احلام اتخضت من طريقته في الكلام ومكنتش متوقعه انها تقابله تاني بعد كل السنين دي ..وقفت تبص عليه من بعيد وهيا مش مستوعبه انه مش فاكرها فابتسمت علي سذاجته لانهم كانوا قريبين من بعض وقت الاعداديه ..كانت بتبص علي شكل عروقه اللي بتظهر بسبب عصبيته واللي كانت متفجأه منه هيا شخصيته اللي اتغيرت تماما عكس الاول لانه كان معروف بطبعه الهادي !
ماهر قفل التيلفون بضيق ولف بجسمه علشان يشوف حمزه اتاخر ليه لقي احلام واقفه تبص عليه وساكته!
بصلها بصه سريعه وركب عربيته واتحرك للخارج بسرعه وهيا اول ما انتبهت انه اخد باله من وجودها قربت من عربيتها بخجل وحطت فيها الاكياس اللي كانت شايلاهل واتجهت لكرسي القياده وشغلت المحرك واتحركت بعد ثواني للخارج؟
بعد دقايق وصل الشاب وهو شايل حمزه للجراش وكان بيصدر اصوات بتدل علي ثقل جسم حمزه.
اول ماوصلوا حمزه بص للمكان باستغراب وهو بيقول: هي فين عربيه خالي؟
الشاب نزله وقال:كده خلاص يا أستاذ انا عملت اللي اتفقنا عليه استأذن انا بق ؟
حمزه كان بيبص حواليه وكانت عينيه علي شكل العربيات اللي موجوده و ولما اتاكد ان عربية ماهر مش موجوده وانه اتخلي عنه فعلا وسابه ومشي بص للشاب وقال برجاء:انا متشكر ليك جدا بس انا هطلب منك طلب اخير؟
الشاب بصله بابتسامه وقال:اكيد اتفضل يا استاذ انا تحت أمرك؟
حمزه بص لجيب الشاب اللي حطله فيه الفلوس وقال وهو بيشاور عليه :ممكن تجيب الفلوس اللي انا اديتهالك علشان اروح بيها؟
الشاب ضم حاجبه بضيق وقال:بس احنا يا استاذ متفقناش علي كده؟
حمزه غمض عينيه بتعب وقال:طيب هات ٥٠٠ جنيه بس اروح بيها؟
الشاب بص للارض بتفكير وقال بصوت واطي: كتير اوي ٥٠٠ جنيه عليه ..اخد نفس سريع ورجع بص لحمزه وقال: استني يا استاذ انا عندي حل وان شاء الله هيعجبك؟
حمزه ابتسم وهو بيبصله والشاب طلع من جيبه ٢٠ جنيه وقال:بص يا استاذ انت هتاخد العشرين جنيه دول وهتخرج من المكان دا خالص وهتمشي علي اليمين شويه لحدما توصل لاخر الطريق هتدخل شمال هتمشي شويه كمان هتلاقي موقف ميكروباصات جديد هناك تقدر تركب منه اي حاجه توصلك للمكان اللي انت عايز تروحه؟
حمزه بصله بصدمه وقال:انت اتجننت عشرين جنيه ايه اللي اروح بيها وبعدين ايه موقف دي انت متعرفش انا ابق مين؟
الشاب هز راسه باستغراب وقال:لا والله معرفش هو صحيح مين حضرتك؟
حمزه بلع ريقه وقال:انا حمزه؟
الشاب سلم عليه بعشم وقال:تشرفت بيك يا استاذ حمزه انا بق محمد اتفضل ادي العشرين جنيه وزي مقولتلك يمين في شمال هتلاقي موقف؟
حمزه بص للفلوس بدموع وقال: هيا بق فيها استاذ بعد الكلام دا هات دا انا مني لله؟
الشاب ابتسم وسابه ومشي وحمزه فضل يبص علي المكان اللي حواليه بصدمه وبعدما استوعب اللي بيحصل معاه اخد نفس طويل واتحرك لخارج الجراچ.
___________
في شركة الصياد كان جميع المدراء في غرفة الاجتماعات في انتظار قدوم صاحب الشركة ماهر الصياد وبعد مرور دقايق قربت السكرتيره الخاصه بمكتب ماهر من الغرفه وقالت:مستر ماهر وصل؟
جميع من في الغرفه وقفوا احتراما لقدوم ماهر الصياد ولاكن اول ما دخل ماهر بصلهم بغضب وقال:انا جيت بنفسي علشان اشوف المشكله بس صدقوني دي اخر مره هعمل فيها كده ولو اللي حصل دا اتكرر تاني مش هيحصلكم خير؟
السكرتيره قربت من الشاشه الكبيره اللي بيعرضوا عليها المشاريع وقامت بتشغيل مقطع فيديوا لرئيسة مجلس الاداره في الفرع الايطالي ؟
ماهر بص للفيديوا بتركيز وبدا الكل ينتبه ويركزوا مع كلامها ..
ماهر قدر يفهم المشكله ببساطه وبص للمدراء وقال:عرفتوا ايه حل المشكلة دي؟
واحد من المدراء بص لماهر وقال:اعتقد يا فندم ان اللي حصل دا بسبب منافس جديد دخل السوق بتاعنا فجأه وقدر يتواصل مع الوفد الايطالي الخاص بينا وقدر يقنعهم بعرض اكبر من عرضنا !
ماهر بصله بانتباه وقال:ايه اللي يخليك تقول الكلام دا وهل انت متاكد من كلامك دا ؟
المدير وقف وقال:ايوا يا فندم انا متاكد دي شركه اتأسست من اكتر من أربع سنين والرئيس التنفيذي ليها كان ظابط واستقال…،الشركه دي يا فندم كانت بتصدر حديد في مصر وخمس دول عربيه ولاكن الظاهر ان المدير بتاعها حاطت عينه علي العالميه ؟
ماهر بص للمدير وقال:اسمه ايه صاحب الشركه دي؟
المدير:اسمه ياسر غنيم يا فندم هوا ابن رجل الاعمال المتوفي فتحي غنيم واعتقد انه كمل مسيره والده بس بطريقته هو وقدر يثبت اسمه بسرعه في السوق؟
ماهر وقف وعدل جاكت البدلة بتاعته وقال بجديه: الشحنه دي مش هتروح من ايدينا احنا مش مبتدئين لسا علشان نخاف من شركة صغيره زي دي انا عاوزكم تكملوا شغلكوا زي منتوا وانتي يا همسه(همسه: السكرتيره الخاصه بماهر) ابعتي رساله للوفد الايطالي بلغيهم اني عاوز اقابلهم ضروري ؟
السكرتيره هزت راسها بالايجاب وهو بصلهم بضيق وخرج من الغرفه واتجه لمكتبه !
كل اللي في غرفة الاجتماعات اخدوا نفسهم براحه كبيره اول ما خرج ماهر بصوا لبعض بابتسامه كانهم اخدو براءه.
بدا كل واحد يرجع لمكتبه ونزل خبر في الشركه بإن الجميع يستمر في عمله لان المشكله اتحلت.
وفي مكتب ماهر كان نايم علي الكنبه وهو حاطت ايديه علي دماغه بتعب … اخد نفس طويل وقال بصوت شبيه بالهمس:اه منك يا حمزه مش هتعقل ابدا نفسي تتعلم تكون عاقل ليوم واحد؟
_________
حمزه كان وصل لموقف الميكروباصات بعد وقت كبير واول ما وصل لقي المكان زحمه واكتر من شخص بينده علي نفس المكان في نفس الوقت.
حمزه بص للفلوس بغيظ وقال:طيب انا المفروض اروح فين دلوقت!
واحد من السواقين مسك ايد حمزه وقال:اتفضل يا استاذ انت رايح فين؟
حمزه بصله بخوف من هيئته وقال:القصر؟
السواق بصله من فوق لتحت وقال بسخريه:قصر ايه لمؤاخذة ؟
حمزه قال بابتسامه :القصر بتاعنا؟
السواق قال بتساؤل وهو بيغمز بعين واحده :ايوا انتوا مين برضوا معلش؟
حمزه لاول مره يحس بخوف بجد لان المره دي ماهر مش معاه فبص للسواق وقال:انت تعرف ماهر الصياد؟
السواق ضحك علي كلامه وقال:انت قصدك بق الصياد ماهر وكده شغل ابتدائي يعني ؟
حمزه ابتسم وقال:اي حاجه المهم نوصله؟
السواق قال وهو بيهز راسه بالرفض :لا انا رايح مدينة نصر هتيجي؟
حمزه هز راسه بالموافقه وقال:ايوا هاجي اهي اي حاجه المهم ابعد عن المكان دا بسرعه؟
السواق بصله من فوق لتحت بشك وقال:الا صحيح يا اخينا هو انت لابس كمامه ليه ومكتف نفسك هو انت تعبان ولا تكون عامل مصيبه كده وعايز تهرب ؟
حمزه اتخض من كلامه فقال برفض:لا ابدا انا لابسها بس علشان ..سكت وهو بيفكر يقوله ايه والسواق كان مركز معاه وفجأه حمزه عطس بطريقه قويه لدرجه ان اكتر من شخص انتبهه ليه ..
السواق بعد عنه بسرعه وقال بخضه :اي دا انت شكلك تعبان بجد ولا ايه ..
حمزه هز راسه بالرفض وقال:لا والله انا كويس.
عطس تاني فالسواق بعد عنه اكتر وقال:ابعد انا مش ناقص انا عندي عيال بصرف عليهم؟
واحد من السواقين التانيين قرب من السواق اللي كان بيتكلم مع حمزه وقال بتساؤل :في ايه يا شوقي ماله الاستاذ؟
السواق بص لحمزه بحزن وقال:شكله كده عنده تعب وحش وال يعوذ بالله اوعي تركبه معاك ليعديك يابني انت مش ناقص؟
حمزه اتصدم من كلامهم عليه فقال برفض:انا كويس انت بتقوله ايه يا حج انت ؟
السواق بص لحمزه بشك وبعد عنهم وقال بصوت عالي علشان يسمع بقيت السواقين:الاستاذ دا شكله تعبان يا رجاله وممكن يعديكم اوعي حد يركبه معاه؟
حمزه اتصدم لما سمع كلامهم فبص حواليه بفقدان أمل وقال:انت فين يا خالي تعالي الحقني والنبي بق؟
____________
في منزل احلام !
دخلت وهيا شايله الاكياس وبتفتكر اللي حصلها النهارده من اول خناقتها مع مديرها السابق لتعينها في شركة ياسر ومقابلتها الغريبه لماهر الصياد وقريبه..
قعدت علي الكنبه وهيا بترجع ضهرها لورا وبتاخد نفس طويل وبتقول:هو ازاي ماهر الصياد زي مبيقولوا عليه يعني رجل اعمال وصاحب مركز كبير نازل كده عادي السوبر ماركت يجيب طلبات البيت وكأنه معندوش خدم او مساعدين؟
احلام قالت كلامها باستغراب وتساؤل ولاكنها فجأه افتكرت صديقتها مروه وانها لازم تكلمها فقامت علشان تجيب تيلفونها من الشنطه واول ما طلعته لقت أكتر من مكالمة فائته من خطيبها السابق فاستغربت ورفعت حاجبها وهيا بتقول:هو انا نسيت اعمله بلوك ولا ايه؟
رجعت قعدت علي الكنبه تاني وهي بتبص لرقم خطيبها السابق وبتفتكر ذكري بينهم لما قالها:(يعني انتي مش هتعيشي مع امي في نفس الشقه دي بتحبك يا احلام وبتعتبرك زي بنتها .
احلام بصتله بصدمه وقالت:انت بتقول ايه يا اكرم انت عايزني اعيش مع امك أُمال شقتك دي هتعمل فيها ايه؟
اكرم قال بتوتر:م ما انتي عارفه يا احلام ان اخويا زينهم هيخطب الشهر الجاي وهو عرف اهل العروسه خلاص ان دي هتبق شقته؟
احلام قالت بعدم إستيعاب كلام أكرم: يعني ايه واحنا يا أكرم احنا ذنبنا ايه ليه عازيني ادخل علي عفش امك انت ليه محسسني انك هتتجوزني علشان تصلح غلطة.
اكرم قرب منها وقال بدهشه:ايه الكلام دا يا احلام انتي عارفه اني بحبك وشاريكي؟
احلام قالت بضيق:امسك يا أكرم دبلتك اهي لما يبق ليك كلمه علي اخوك يبق نتكلم .. انا هبلغ عمي يجيلكوا وهيكون معاه باقي شبكتك ؟
اكرم فضل باصص للدبله وساكت وبعدما استوعب كلامها قال :هو انتي بتسيبيني يا احلام انتي ناسيه اننا بنحب بعض من ايام الكليه؟
احلام بصتله بلوم وقالت:انا اسفه يا اكرم بس انا مش هقبل بالكلام اللي بتقوله دا انا استاهل شقه عفشها يكون جديد وانا اول واحده استخدمه انا مش من الشارع علشان اقبل بالوضع دا.
اكرم بغضب:ماشي يا احلام انتي حره انا كنت فاكر انك بتحبيني ومستعده تحطي ايدك في ايدي بس انتي طلعتي انانيه ومبتحبيش غير نفسك.)
فاقت احلام من ذكرايتها علي صوت رنه تيلفونها وكانت مروه اللي بتتصل؟
ردت احلام بسرعه وقالت:بنت حلال والله يا مروه انا كنت لسا هتصل عليكي؟
مروه ابتسمت وقالت:حبيبتي طمنيني عليكي عملتي ايه؟
اتنهدت احلام وهيا بتقول:كل خير استني بس اقوم اجيب اي حاجه اكلها وانا بحكيلك لاني جعانه اوي؟
مروه ضحكت علي كلامها وقالت:دا شكل الموضوع كبير اوي علي كدا؟
احلام هزت راسها وقالت بابتسامه :دا فيه سهر للصبح دا…
مروه ضحكت واحلام دخلت لللمطبخ ورجعت بعد دقايق وهيا شايله طبق فاكهه كبير وحطته قدامها علي الكنبه وبدات تاكل وهيا بتحكي لمروه تفاصيل يومها وانهت كلامها بذكرها لخطيبها السابق وقالت:أكرم اتصل عليا النهارده اكتر من مره بس انا ماخدتش باللي مش عارفه ازاي؟
مروه اتصدمت لما سمعت كلامها وقالت باستغراب:اكرم وهو بيتصل عليكي ليه هو مش خلاص خطب من يومين.
احلام اتصدمت اول ما سمعت كلامها وقالت:هو اكرم خطب.
مروه قالت بحزن:ايوا من يومين انا عرفت الموضع بالصدفه من واحده جارتنا بس مرضتش اقولك علشان عارفه انك هتضايقي.
احلام سكتت وهيا بتفكر في كلامها وقالت:لا مكنتش هتضايق ولا حاجه ربنا يسعده!
مروه هزت راسها بحزن وقالت:احلام انتي لسا بتفكري فيه!
احلام هزت راسها بالنفي وقالت:لا يا مروه اكرم كان خطيبي بس دلوقت مفيش بينا حاجه ؟
مروه هزت راسها بتفهم وقالت:طيب انا مضطره اقفل علشان ابويا صحي وانتي عارفه بق لو مجهزتش الاكل ممكن يعمل ايه؟
احلام هزت راسها بالموافقه وقالت:طيب يا حبيبتي مع السلامه .
مروه قفلت المكالمه واحلام فضلت تبص لرقم اكرم وكان باين علي ملامحها الحزن فقربت من الاكياس اللي جابتها وشالتهاودخلت بيها للمطبخ وبدأت تحط كل حاجه في ماكنها لحدما فجأة لقت تيلفون غريب في كيس من الاكياس فطلعته باستغراب وهيا بتبصله بتساؤل واول ما فتحته لقت صوره لماهر وجمبه حمزه وكانوا الاتنين لابسين بدل رسميه ومن الواضح ان في حد فيهن واخد جايزه ..شهقت بخضه وهيا بتقول:ايه اللي جاب التيلفون دا هنا !يتبع
تفتكروا التيلفون وصل لحلام ازاي 🤔 حبايب قلبي لو وصلتوا الفصل ٢٠٠٠ تعليق خلال ساعه هنزل بارت هديه للسهرة😘❣️يلا بسرعة 🏃♀️👇👇❤️🔥
•تابع الفصل التالي "رواية حبيبي المدير" اضغط على اسم الرواية