رواية اميرة اخر الزمان الفصل الثالث عشر 13 - بقلم ملك ابراهيم
ـ أميرة عندها حق و الواد جمال ده كان من الاول مش نازلي من زور وانا كنت رافض الجوازه دي وانتو اللي اصريتو عليه واهو الايام لفت وانا طلعت عندي حق و عشان تبقوا تسمعوا كلامي بعد كده
ارتعد جسد أميرة من نظراته اليها، تتذكر محاولاته الكثيره في التحرش بها، تراجعت بخطواتها خائفة من اقترابه منها، وقفت والدتها وتحدثت الي زوجها بحزن قائلة له.
ـ يعني هنسيبها كده تخرب بيتها بإيديها!، ما البيوت ياما بيحصل فيها وهي لازم تستحمل، انا بقول تاخدها وتروح تتكلم معاه وتراضيهم على بعض وتخليه يردها لعصمته تاني
نظر الدسوقي الي أميرة وتحدث اليها بفضول.
ـ انتي عايزه ترجعيله تاني؟
نظرت اليه أميرة بخوف وحركت رأسها بـ لا..، ابتسم الدسوقي بارتياح وتحدث اليها مرة أخرى قائلا لها.
ـ هو رمى عليكي اليمين بس ولا هيطلقك رسمي؟
تحدثت أميرة بخوف.
ـ هو طلقني قدام امه واخواته وقال هيبعتلي قسيمة الطلاق
وسعت ابتسامته اكثر وتحدث برضا قائلاً لها.
ـ يغور في داهيه واد وش فقر وخسارة فيه النعمه و احسن حاجه عملتيها انك سبتيله عياله يقطعهم فوق دماغه
تقف أميرة تنظر اليه بخوف، تخشى العيش معه بهذا المنزل لكن لا باليد حيلة وهي مجبره ان تعيش معهم هنا وعليها حماية نفسها منه بقوة.
تحدثت والدة أميرة بقلة حيلة مع زوجها قائلة له.
ـ واحنا هنسيبه كده من غير ما ناخد حقوقها، القايمة والعفش اللي مكتوب فيها كله والمأخر والنفقه بتاعها؟
تحدثت أَميرة ببكاء قائلة لوالدتها.
ـ هو باع عفش الشقه واشترى غيره لمروة وجهازي كله عند حماتي هي بتستعمله
تحدثت والدتها بغضب.
ـ يجيبلك غيره او يدفع حقه زي ما مكتوب في القايمة
ثم نظرت الي زوجها وتحدثت اليه باصرار.
ـ احنا مش لازم نسيب حقها يا ابو ضياء ولازم نربيه ونجرجره في المحاكم
رد عليها زوجها وهو مازال ينظر إلى أميرة قائلا بتأكيد.
ـ كل ده هيحصل وهنعلمه الادب لحد ما يقول حقي برقبتي
تحدثت أميرة وهي تشعر ان نظرات زوج والدتها تحرق جسدها، قالت لهم.
ـ كل الحاجات دي هتحتاج محامي والمحامي هيحتاج فلوس كتير وانا مش هقدر علي التكاليف دي كلها، انا كل اللي يهمني دلوقتي اني اعمل العمليه لبنتي وتخف وبعد كده اخد حقي منهم
نظرت اليها والدتها وتحدثت بفضول.
ـ يعني ناويه على ايه أميرة؟
تحدثت أميرة باصرار.
ـ انا هروح الشغل مع راندا من بكره ان شاءالله وهشتغل ليل ونهار لحد ما اجمعلها فلوس العمليه دي
نظر اليها زوج والدتها وتحدث بمراوغة.
ـ بس هيبقى تعب عليكي يا اميرة وانتي اللي زيك متستهلش البهدله دي ابدا
نظرت اليه أميرة بغضب، تريد اقلاع عينيه كي لا ينظر اليها بهذه الطريقه، تحدثت اليه بقوة قائلة له.
ـ ربنا هيقويني ان شاء الله ومتقلقوش ان هدفع في مصاريف البيت هنا، انا مش محتاجه غير حيطه تداريني من ولاد الحرام لحد ما ربنا يكرمني
نظرت اليها والدتها بخجل، تعلم ان أميرة ذكرت مشاركتها في مصاريف المنزل كي لا يعترض زوج والدتها على جلوسها معهم بالمنزل، تحدث اليها زوج والدتها مدعيا الرجوله والكرم قائلاً لها.
ـ ليه بس كده يا أميرة، انتي هنا هتعيشي في بيتك يعني تكلي لقمة وترمي عشرة وانا عنيا ليكي
نظرت اليه أميرة بشمئزاز ثم تحدثت إليه بغضب.
ـ عارفة يا عمي وانا مش بعتبرك جوز امي انا بعتبرك ابويا
نظر اليها بغضب مردداً كلمتها بعدم رضا قائلاً.
ـ ابوكي!!!! وماله يا أميرة بكره تعرفي ان ان انتي ملكيش الا انا
ثم خرج من الغرفة وتركها مع والدتها، ربتت والدتها على ظهرها وتحدثت اليها بهدوء.
ـ تعالي بقى يا حبيبتي نامي في الاوضه مع اخواتك، انا هخلي ضياء وفاطمة يناموا جمب بعض علي السرير وانتي تنامي على السرير التاني
حركت أميرة رأسها بالايجاب وذهبت مع والدتها إلى غرفة اشقائها.
__________
في شقة جمال ومروة..
استيقظت مروة باكرا وقامت بتجهيز وجبة الافطار لزوجها بشقتهم وقامت بارتداء ثوب قصير كي ترضي غرورها بانها الاجمل من أميرة وتجعل جمال يشتاق اليها مجددا وينسى أميرة نهائياً.
جلست بجواره فوق الفراش وهي تدلله وتقبله بحرارة، فتح جمال عينيه ونظر اليها بلهفة وقام باحتضانها.. استسلمت له كي تعوضه عن رفض أميرة له بالامس..
بعد وقت خرج جمال من الحمام وهو يجفف شعره بالمنشفه، وجد مروة تقف امام السفرة تنتظره لتناول الافطار معا، اقترب منها وقبلها بسعادة وجلس بجوارها وهي تدلل له وتعامله مثل الطفل الصغير..
تحدثت اليه مروة وهي تطعمه بيدها قائلة له بدلع.
ـ انت هتروح للمأذون النهاردة؟
عقد حاجبيه بدهشة قائلاً لها.
ـ اشمعنا يعني!!
اقتربت منه اكثر بطريقه مغرية قائلة له.
ـ عشان تطلق أميرة ونخلص بقى من النكد بتاع كل يوم والتاني ده
زفر جمال بغضب قائلاً لها.
ـ انا مش عايز اطلقها بالساهل كده، انا عايز اربيها الاول لحد ما تقول حقي برقبتي وتجيلي هنا راكعه تبوس ايدي
غضبت مروة كثيرا وابتعدت عنه بعنف قائلة له بصراخ.
ـ ااااه قول كده بقى ، انت مش هاين عليك تطلقها رسمي عشان تقدر ترجعها برحتك وكل اللي انت قولته امبارح كان كلام ليل ومدهون بزبده واول ما طلع عليه النهار ساح
نظر اليها جمال بستغراب، انفعلت مروة اكثر وارادت اهانته في رجولته كي تستفزه ويطلق أميرة حقا، قائلة له بمكر.
ـ يبقى أميرة كان عندها حق امبارح لما مرضتش تخليك تقرب منها، عارفه انها كل ما هترفضك انت هتتجنن عليها اكتر ومش بعيد تروح تبوس ايديها ورجليها عشان ترضى عليك
نظر اليها جمال بغضب شديد، احمر وجهه بشدة وبرزت عروقه من شدة الغضب، لتضغط مروة اكثر على جرحه قائلة بسخرية.
ـ تقدر تقولي انا هشوفك ازاي بعد اللي أميرة عملته فيك، هنام في حضنك ازاي وانا عارفه ان اللي قبلي قرفت منك ومرضتش تخليك تقرب منها
وقف جمال بغضب وقام بتحطيم جميع الاطباق الموضوعه فوق السفرة، وقفت مروة بفزع تضع يديها فوق بطنها بحماية، اقترب منها جمال وجذبها من ذراعها قائلاً لها بصرامة.
ـ انا مفيش مرا ترفضني وتقرف مني، انا اللي قرفت منها وسبتها وعشان كده اتجوزتك ولما نزلتلها امبارح كان عشان خايف من ربنا، قولت هي برضه مراتي ومن حقها ابات معاه ليله
نظرت اليه مروة بتحدي، تظهر نظراتها انها غير مقتنعه بحديثه وتعلم جيدا ان أميرة حلت في عينيه مرة أخرى ونزوله اليها ما كان الا اشتياق لها.. رأى جمال نظرات مروة الغير مصدقه لحديثه، شعر بالاهانه، تحدث الي مروة بغضب قائلاً لها.
ـ طيب يا مروة، انا هعرفكم كلكم اني مش بتاع كلام وبس وصحبتك هتطلق النهاردة ورسمي
ظهرت ابتسامه ماكره على محياها، ابتعد عنها جمال وذهب الي غرفة النوم لارتداء ثيابه، ابتسمت مروة وهي تضع يديها على بطنها بغرور، ثم نظرت الي الاطباق المحطمه ومتناثرة حولها وهمست برضا قائلة..
ـ مش مهم فداكي يا أميرة انتي مهما كان صحبتي الوحيدة
رواية أميرة اخر الزمان بقلمي ملك إبراهيم
في شقة حماة أميرة..
زفرت شاهندا بغضب بعد فشلها في اطعام بنات شقيقها واصرارهم على البكاء والمطالبه بالذهاب الي والدتهم..
اقتربت منها والدتها وتحدثت بغضب قائلة لها.
ـ اطلعي نادي للمحروس اخوكي هو والزفته مراته اللي فوق يجي يشوف عياله احنا مش ناقصين قرف مش مهو يعمل المصيبه واحنا نشيلها، ينزل يشوف هيتصرف مع بناته ازاي
زفرت شاهندا بغيظ قائلة بغضب.
ـ انا اصلا زهقت من العيشه في البيت ده امتى اخلص السنه دي واتجوز بقي
نظرت اليها والدتها بغضب، خرجت شاهندا من الشقه وصعدت الي شقة شقيقها بالاعلي.. وقفت تطرق على الباب بعنف، فتحت لها مروة وتحدثت اليها ببرود قائلة لها.
ـ عايزة ايه يا شاهندا؟
نظرت اليها شاهندا بغيظ وتحدثت بغضب.
ـ قولي لـ جمال ينزل يكلم ماما
خرج جمال من غرفته على صوت شقيقته، اقترب من الباب وتحدث إليها بجمود قائلاً لها.
ـ عايزه ايه يا شاهندا؟
تحدثت شاهندا ببرود وهي تنظر الي مروة بغضب قائلة له.
ـ انزل كلم ماما عشان بناتك عمالين يعيطوا تحت واحنا تعبنا ومش عارفين نسكتهم
تحدث جمال بغضب قائلاً لشقيقته.
ـ وانا هنزل اعملهم ايه يعني ما تتصرفوا معاهم
نظرت شاهندا الي مروة وتحدثت بمكر.
ـ والله انا مش فاضيه وعندي مذاكره وماما تعبانه
نظر جمال الي مروة وتحدث بجمود.
ـ طب انزلي انتي يا شاهندا وانا جاي وراكي
نظرت شاهندا الي مروة بغيظ ونزلت الي شقة والدتها بالاسفل، نظر جمال الي مروة وتحدث اليها بجمود.
ـ انزلي معلش يا مروة شوفي البنات
نظرت اليه مروة وتحدثت بدلال قائلة له.
ـ من عينيا يا قلب مروة
اراد ان يثبت لها رجولته وتحدث بجمود قائلاً لها.
ـ انا هنزل الورشة وهكلم الدسوقي جوز ام الزفته دي يجي عشان اطلقها واخلص من قرفها
ابتسمت مروة بسعادة قائلة له.
ـ وانا هنزل للبنات واحطهم في عيني متشلش همهم دول مهما كان اخوات ابني
نظر الي بطنها بسعاده وتحدث بحماس.
ـ طب انا هنزل اعرف امي انك نازله ورايا على ما انتي تلبسي وتنزلي
تحدثت اليه بدلال قائلة له.
ـ ماشي يا حبيبي
نزل جمال ووقفت مروة تنظر امامها بغرور وهي تشعر بالانتصار.
رواية أميرة اخر الزمان بقلمي ملك إبراهيم
___________
في شقة والدة جمال..
دخل جمال الشقه وهو ينظر الي بناته بجمود، تحدثت اليه والدته بصرامه قائلة له.
ـ ناوي تعمل ايه يا جمال مع بناتك، انا مفيش عندي صحه اربي واشيل واختك عندها امتحانات...
قاطعها جمال قائلاً لها بتأكيد.
ـ مروة نازله ورايا اهي يا امي وهتاخد بالها من العيال
ثم سأل والدته بجمود قائلاً لها.
ـ هي فين قسيمة الجواز بتاعتي على الزفته اللي اسمها اميرة
نظروا اليه الطفلتين بلهفه عند استماعهم لـ اسم والدتهم، نظرت اليه والدته قائلة له بغضب.
ـ انت هتطلقها بجد ولا ايه؟
تحدث جمال بالايجاب قائلا لها باصرار.
ـ انا طلقتها خلاص وهروح اطلقها رسمي
تحدثت اليه والدته بغضب قائلة له.
ـ طلاق ايه يا جمال انت اتجننت وبناتك دول هتعمل معاهم ايه؟
تحدث جمال بغضب قائلاً لها.
ـ البنات كده كده هيتربوا يا امي ومروة هي اللي هتربيهم
تحدثت اليه والدته بصوت مرتفع.
ـ مروة مين اللي هتربي بناتك، مروة بكره تولد ومش هتشوف غير عيالها وبناتك هما اللي هيتبهدلوا
ثم إضافة بهدوء.
ـ استهدى بالله يا حبيبي و رد مراتك ورجعها تعيش هنا وسط عيالها وتاخد بالها منهم وتراعيهم
نزلت مروة شقة حماتها ودخلت الشقه واستمعت إلى حديث حماتها مع جمال، اقتربت منهم ووقفت تنظر إلى جمال ورفعت حاجبيها تنتظر رده على والدته، نظر جمال الي زوجته بتوتر، تابعت والدة جمال نظرات مروة لـ جمال وانخفاض وجه جمال بتوتر من مروة ثم رفع وجه وتحدث الي والدته بصرامة قائلاً لها.
ـ انا خلاص طلقتها وهروح اطلقها رسمي دلوقتي وبناتي مروة هتربيهم وهتاخد بالها منهم واسم أميرة ده مش عايزه اسمعه هنا تاني
أبتسمت مروة بغرور وهي تنظر الي حماتها بتحدي، وقفت حماتها مصدومه بعد ان رأت بعينيها قوة سيطرت مروة على جمال، ترك جمال والدته واتجه الي غرفتها وبحث في الاوراق عن عقد زواجه من اميرة واخذه وذهب من المنزل، جلست مروة براحه وهي تنظر الي حماتها بتحدي قائلة لها.
ـ متتعبيش نفسك مع جمال يا ماما، انا طول الليل بتكلم معاه عشان يرد أميرة ليه تاني بس هو خلاص قرف منها ومش عايز واحده تانيه تشيل اسمه غيري هنعمل ايه مفيش في ايدينا حاجه
ردت عليها حماتها بغيظ قائلة لها.
ـ معلش هو جمال ابني طول عمره كده حتى وهو صغير كان يسيب المايه النضيفه ويحب يشرب من ماية المجاري
ضحكت شاهندا بشدة على حديث والدتها، نظرت اليهم مروة قائلة لحماتها بغيظ.
ـ تقصدي مين بماية المجاري؟!
تحدثت شاهندا باستفزاز قائلة لها.
ـ شمي نفسك وانتي تعرفي
جن جنون مروة ووقفت من مكانها وقامت بصفع شاهندا على وجهها بغضب، قامت شاهندا بضربها في بطنها بقوة، صرخت مروة ووقفت بينهم والدة جمال تحاول ابعادهم عن بعض، وقف الطفلتين حور وجنه يتابعون المشاجرة وهم يبكون.
وقف جمال امام ورشته اسفل المنزل وهو يستمع الي صوت صريخ والدته وشقيقته وزوجته، تجمع اهل المنطقه حوله يسألون ماذا يحدث، ركض جمال سريعا ليرى ماذا يحدث بالأعلى، دخل شقة والدته ورآى مروة وشاهندا يتشاجرون وقامت مروة بالصراخ بقوة عند رؤيتها لجمال ثم سقطت على الارض مدعيه فقدان الوعي، ركض جمال اليها سريعا كي يطمئن عليها، وقفت شقيقته شاهندا تأخذ انفاسها بصعوبه، اقترب جمال من زوجته مروة وحاول افاقتها، استجابت له و فتحت مروة عينيها وبكت بطريقة دراميه واخبرته ان شقيقته شاهندا ارادت ان تجهضها وقامت بضربها فوق بطنها لقتل ابنه، جن جنون جمال واقترب من شقيقته وجذبها من شعرها، حاولت والدته تخليص ابنتها من يده لكنه لم يترك شقيقته وقام بضربها بقوة حتى نزفت شفاه الدماء وتورمت عينيها وظل يضرب بها بقسوة وعنف، دفعته والدته بعيدا عن ابنتها واخذت ابنتها الي حضنها بحماية، وقف جمال يلتقط انفسه ثم تحدث الي امه وشقيقته بصوت مرتفع استمع اليه الجميع اسفل المنزل..
ـ من اللحظة دي اللي هيقرب من مروة انا اللي هقفله، ومروة وابني اللي في بطنها لو جرالهم حاجه انا هولع في البيت ده بلي فيه انتوا فاهمين
نظرت اليه والدته بغضب وتحدثت اليه بصوت مرتفع هي الاخرى قائلة له.
ـ لا بقولك ايه مروة بتاعتك دي لو عايز تعملها ست تبقي تعملها ست عليك انت انما في بيتي هنا صوتك ميعلاش عشانه وتقف تنفش ريشك وتهددنا، وقسما بالله يا جمال لو ايدك اتمدت على اختك تاني لاهكون طرداك من البيت هنا انت والست مروة بتاعك
اقترب مروة من زوجها جمال وهي تدعي التعب وتحدثت الي حماتها بمكر قائلة لها.
ـ وجمال ملوش الا انتوا يا ماما وشاهندا دي اخته ومن واجبه لما تغلط يعلمها الادب ودي حاجه متزعلكيش
نظرت اليها شاهندا بحقد وكره شديد، وضعت مروة يديها فوق بطنها تتباهى بحملها وتحتمي به، نظرت شاهندا الي بطنها هامسة بحقد.
ـ والله لخليكي تنزلي اللي في بطنك ده بجد واحرق قلبك عليه
ربتت والدة جمال علي ابنتها شاهندا واخذتها الي غرفتها، وقف جمال يزفر بغضب، لكد طفح الكيل من مشاكله التي لم تنتهي وتزداد يوما بعد يوم، ربتت مروة على كتفه قائلة له بهدوء وهي تدعي التعب.
ـ معلش يا جمال دي مهما كان عيله ومتعرفش حاجه هي بس زعلانه عشان أميرة وفاكره ان بعمايلها دي هتخليك هترد أميرة ليكي تاني
زفر جمال بغضب قائلا بصوت مرتفع.
ـ يحرق أميرة واللي جاب أميرة انا كل المصايب اللي في حياتي هي السبب فيها
تحدثت اليه مروة بمكر هامسة له بجوار اذنيه مثل الشيطان.
ـ مهو انت اللي مش عايز تخلص نفسك وتخلص منها
نظر اليها بطرف عينيه ثم اخرج هاتفه وخرج من المنزل متجها الي الاسفل.
ركضت مروة الي خارج باب شقة حماتها ووقفت فوق الدرج تستمع اليه وجدته يتحدث بصوت غاضب وهو ينزل من فوق الدرج قائلا.
ـ ايوه يا عم الدسوقي انا هستناكم كمان ساعه عند المأذون عشان اطلق بنت مراتك
وقفت مروة تبتسم بسعادة ثم عادت الي شقة حماتها مرة اخري لتجد حماتها واقفه امام غرفة ابنتها شاهندا وتنظر الي مروة بغضب، اقتربت منها مروة وتحدثت اليها بمكر قائلة لها.
ـ هي شاهندا عاملة ايه دلوقتي يا ماما، الحمدلله ان انتي كنتي واقفه وشايفه من الاول مين اللي غلطان
نظرت اليها حماتها بغيظ هامسة بغضب.
ـ انا اللي غلطانه واستاهل اكتر من كده
رواية أميرة اخر الزمان بقلمي ملك إبراهيم
في شقة والدة أميرة..
دخلت والدة أميرة عليها الغرفة وجدتها نائمة فوق الفراش لكن عينيها مثبته الي الاعلى والدموع تنسال منها بصمت ، ربتت والدتها علي ذراعها وتحدثت اليها بحزن قائلة لها.
ـ أميرة قومي
جففت أميرة دموعها وجلست فوق الفراش تنظر الي والدتها قائلة لها.
ـ نعم يا أمي
تنهدت والدتها بحزن قائلة لها.
ـ جمال كلم عمك الدسوقي دلوقتي
نظرت اليها أميرة باهتمام، خفضت والدتها رأسها بحزن قائلة لها.
ـ عايز عمك الدسوقي يروحله بعد ساعه عند المأذون عشان يطلقك وبيقول ان انتي كمان لازم تروحي عشان تمضي
تساقطت دموعها بجمود، يرتعد جسدها من رهبة كلمة الطلاق، لكنها تعلم جيدا ان الطلاق اهون بكثير من العيشه معه. .. بقلمي ملك إبراهيم
... يتبع
تفاعل جامد علي البارت عشان تشجعوني انشر باقي الرواية 🥺❤️
•تابع الفصل التالي "رواية اميرة اخر الزمان" اضغط على اسم الرواية