رواية دواء الروح الفصل الخامس عشر 15 - بقلم اماني السيد
البارت الخامس عشر
أتصل طه على عمه وحدد معاه معاد وقاله إنه هيسافرله
وبالفعل مر يومين و اخد طه اجازه من الشغل وسافر لعمه واستقبله عمه فى بيه
ـ ازيك يا طه مش بنشوفك خالص خلاص نسيت أهلك
ـ حقك عليا يا عمى انت عارف الدنيا مشاغل
ـ الله يعينك يا بنى انت عامل ايه وامك عامله ايه
ـ الحمد لله بخير انا متجوز دلوقتي وقريب هتجوز التانيه
ـ ومتخبرناش برضوا
ـ والله جت بسرعه بس إحنا فيها اول ما احدد معاد الفرح هعزمكم
ـ ربنا يتمملك على خير يابنى
ـ بصراحه يا عمى كده انا كنت عايز ابيع حتت الأرض بتاعتى
ـ بس إحنا مابنبعش أرضنا للغريب
ـ مش مهم اشتريها انت او حد من اعمامى لو عايزها ياخدها
ـ خلاص انت تبات معانا انهارده وانا هبلغهم واقولك هتكون من نصيب مين
بس انت عايز تبعها ليه
ـ محتاج فلوسها فى جوازى وعايز اعمل مشروع ازود دخلى بيه بس يا عمى حاول تخلص الموضوع ده انهارده عشان عايز اسافر بكره انا واخد اجازه من شغلى ٢٤ ساعه يعنى لازم ارجع بكره وانا مخلص كل حاجه
ـ حاضر يا ابنى هتكلم معاهم يجوا وربنا يسهل
أتصل عمه بإخواته وجمعهم وعرض عليهم بيع نصيب طه من الارض
اجتمع الاخوات وقرروا إن اخوهم الكبير اللى هيشترى الأرض وكان حاضر طه ووافق على كلام أعمامه
ـ تمام يا عمى حضرتك هتدفه كام فى الارض
ـ هدفع ٤٠٠ الف
ـ ازاى يا عمى ده كده نص تمنها
ـ الارض ميته ومحتاجة شغل كتير فيها عشان
ـ ياعمى الله يرضى عليك قول سعر يرضى ربنا ارض تمنها ٨٠٠ الف ابعها ب ٤٠٠ إزاى انل كان ممكن ابعها لحد غريب بس قدرتك وكبرتك انا لولا الظروف مكنتش بعتها أصلا بس الحوجه تحكم
ـ بس يا بن اخوى زود عليهم ١٠٠ يبقى ٥٠٠ الف
ـ بص يا عمى عشان الزنقه وعشان القريب اولى هبعها ب ٦٠٠ انت عارف المبلغ ده لا هعرف اجيب بيه ارض ولا حتى شقه احافظ بيها على فلوسى بعد ما اسدد اللى عليا من ديون عشان كده ٦٠٠ مش هقبل بأقل ولو مش موافق يبقى هبيعها للغريب والداين يتسنى عليا هو كده كده مش مستعجل
ـ بص يا طه انا اللى معايا ٥٥٠ خدهم والباقى بعدين
ـ يا عمى الله يباركلك انا محتاجهم مش هينفع انزل السعر ده
ـ خلاص بكره نروح نخلص وتاخد فلوسك
قضا طخ اليوم فى بيت عمه وتانى يوم راح عمه سحب الفلوس وادهاله وطه باعله نصيبه ومضى ورق وسجله فى الشهر العقارى وخد الفلوس وراح البنك بعد كده لكن خصم منها ال ١٥٠ الف بتوع نداء وراح لها المستشفى وسأل عليها مكنتش وصلت
خرج انتظرها بره لحد ما وصلت وقرب منها واتكلم معاها
ـ دكتوره نداء استنى
ـ خير
ـ طيب ممكن نقعد فى مكان .
ـ لا طبعا
ـ طيب نروح عند المحامى مش هعطلك اكتر من نص ساعه بس ارجوكى يا دكتوره
ـ خير عايز ايه اتكلم هنا
ـ دى الفلوس اللى انا اخدتها منك جمعتهالك كلها وموجوده فى الشنطه دى
ـ بصتله نداء بريبه وأنها ممكن تكون مزوره
ـ وأنا ايه اللى يضمنلى أنها مش مزوره
ـ نروح بكره البنك وخديها هناك
بصى يا دكتوره انا آسف على كل حاجه عملتها معاكى العيب أبدا مكنش منك الغلط كان منى انا ، انا اللى كانت شخصيتى ضعيفه وكلمه تجبنى وتودينى انا وماما ورنا اتفقنا عليكى وأى حد كان وقع فى المصيده دى لاننا رسمناها صح ماما لعبت فى دماغى وكلامها جه على هوايا ولما قزلت لرنا شجعتنى وساعدتنى فى كل حاجة لما كنت احس بتأنيب ضمير كانوا يقولولى انك دكتوره والفلوس دى سهل تجيبى زيها وايه المشكله لز اخدت منك كام الف هتعرفى تجيبى غيرهم
انا عارف إن كلامى مش مبرر بس كلامهم كان على هوايا ومسهلى الدنيا عشان كده كنت بمشى وراهم زى الحم*ار وانفذ كلامهم
عارفه يوم ما عملت الحادثه ده كان احلى يوم فى عمرى كنت حاسس انى بملك الدنيا وما فيها عندى زوجه وبيت وابن بحلم بيه من يوم ماعرفت إن رنا حامل وفى لحظه كل ده ضاع منى ابنى ما*ت العربية اتد*مرت كل حاجه راحت بقيت شايفك انتى السبب شايف الذنب اللى عملته معاكى السبب زى ما ضيعت فرحتك فى اجمل ايام حياتك ربنا اخد حقك فى احلى يوم فى حياتى كنت شايف انك السبب في اللى حصلى وعايز ادمر*ك انتى كمان لكن للأسف فوقت وفوقت متأخر اوى
ـ وايه السبب إنك تفوق
ـ حبيت واحده شوفت معاها يعنى ايه الاخلاص والأخلاق والضمير بقيت أراجع نفسى فى حياتى القديمه وكنتى انتى اكتر واحده انا غلطت فى حقها عشان كده جيت ارجعلك حقك وبتمنى تسامحينى
ـ بص يا طه أنى اسامحك دى لا مستحيل ادبسببكم انا اتغيرت وكر*هت حياتى بدون الدخول فى تفاصيل ماتهمش دلوقتي
بالنسبة للفلوس انا هقبلها عشان دى حقى وتعبى وهنروح بكره البنك عشان اتأكد من انها مش مزوره ولو كلعت سليمه وقتها هخلى المحامى يسلمك الورق اللى انت ماضى عليه
إنما اسامحك دى لا انت معملتش حاجه عشان اسامحك انت كل اللى عملته رجعتلى حقى اللى انت وامك اخدتوه
ـ حقك يا نداء وانا مش هضغط عليكى وبكره الصبح هقابلك فى البنك بس انا هدعى كل يوم ربنا يغفرلى ذنبى ويمكن مع الايام انتى كمان تسامحينى
رجع طه لبيته وحاول يتكلم مع راضيه لكن هى لسه على موقفها قابل ابنها بيلعب فى الشارع مع اصحابه اخده وجابله حلويات ووقف يلعب معاه وشافته راضيه لكن مش عارفه تثق فيه
********&******&*******
عند نداء اتصلت بسليمان وحكتله اللى حصل بينها وبين طه وشك سليمان فى طه
ـ بقولك ايه انا هاجى معاكى بكره
ـ ليه تعطل نفسك كده كده هنتقابل فى مكان عام مره فى البنك ومره فى المكتب عند المحامى
ـ اغرضى عملك كمين وغير كلامه او كان بيستدرجك عشان مفكر إنك قت*لتى ابنه
ـ تفتكر
ـ طبعاً انا هاجى معاكى بكره خليه يتفاجئ بينا فى البنك
ـ خلاص ماشى
ـ هقابلك انهارده
ـ لا صعب انهارده عندى عمليات مهمه وعايزه اخلصها ماتنساش انى الشهر الجاى واخده اجازه طويله
ـ خلاص هعدى عليكى نتعشا سوا واوصلك للبيت اتفقنا
ـ اتفقنا
عدى اليوم وفى اليوم التانى راح طه معاده مع نداء وفعلا رجعلها كل فلوسها وراح للمحامى و اخد الورق وبعدها راح الشغل وحاول يتصل كتير براضيه لكن نفس التجاهل ليه ولرسايله
لكن قرر انه مش هيسيبها انهارده غير لما يتكلم معاها
خرج من الشغل ووصل لبيت راضيه ولما رفضت تقابله هددها لو مخرجتش تتكلم معاه هيدخلها هو
خرجت راضيه على مضض عشان تنهى كل رابط بينهم
ـ خير يا طه مش قولنا خلاص فضناها سيره
ـ لا يا راضيه انا مش موافق انا بحبك وعايزك جمبى انتى طاقه النور اللى بتخلينى امشى صح
ـ وانا اضمن منين مانت اكيد قولت الكلام ده لميت واحده عشان تقنعها بيك
ـ لا يا راضيه مقولتش ولا عملت اللى عملته ده لأى حد غيرك
ـ وانت عملت ايه
ـ سافرت بلدى وبعت الارض اللى مكنش أبدا هفرط فيها بنص تمنها عشان ارجع الحقوق لصحابها والباقى هجيب بيه عربيه اشغلها بعد الضهر عشان ازود دخلى واقدر اعيشك عيشه كويسه واغيرلك الفرش ده كله
ساعدينى يا راضيه ابوس ايدك انا مش عايز ابقى وحش
وقرب من راضيه ومسك ايديها عشان يبوسها وهى شدتها منه وفضلت تفكر هل تديله فرصه تانيه و تقف جمبه ولا تسيبه يعمل اللى هو عايزه
*****&****&*****&*****
فى الشقه تحت عند زينب كانت قاعده ورنا قدامها بتشرب نسكافيه
ـ صحيح يا حماتى هى الفلوس اللى كانت مع طه دى فلوس ايه
ـ فلوس ايه اللى كانت معاه
ـ كان معاه شنطه فيها فلوس ونزل بيها الصبح
ـ ممكن تكون فلوس حد شايلها معاه
ـ ومين اللى هيشيل مبلغ زى ده مع ابنك وهيشيله فى يوم وياخده تانى يوم
ـ قصدك ايه
ـ منا بسألك
ـ وانتى مسألتهوش ايه
ـ وهو بيكلمنى ولا عايز يبص فى وشى كله بسببك منك لله روحى
ـ عارفه لو ملمتيش لسانك يا بت انتى هعمل فيكى ايه هقوم اض*ربك واسلط عليكى طه انا لحد دلوقتي صابره عليكى
ـ طيب انتوا عندكم حاجه بعتوها ودى فلوسها
بصتلها زينب بشك وخافت إن يكون طه عمل اللى فى دماغها
ـ رد فعل زينب ايه لما تعرف ببيع الارض ؟
ـ وراضيه هتسامح طه ؟
•تابع الفصل التالي "رواية دواء الروح" اضغط على اسم الرواية