رواية جنون العشق الفصل التاسع عشر 19 - بقلم دينا عبدالله
خبط الباب بقوة... جريت مرفت وفتحت الباب وانصدمت لما لقيت العسكري علي الباب
مرفت وخوف: في ايه
العسكري: معايا امر بالقبض علي ياسين منصور
مرفت بصدمه: بس انا ابني معملش حاجه
العسكري: هيجي معانا بالذوق ولا هناخده بالعافيه
نزل ياسين بصتله مرفت بخوف وقلق بصلها وقال وهوا بيطمنها: متخافيش مفيش حاجه... شويه و هرجعلك
قرب باسل وقال للعسكري: وامشي انت واحنا هنيجي وراك بالعربيه
العسكري: طيب يلا اطلعو قدامي
خد باسل ياسين وركبو العربيه ومشيو ووراهم عربية الشرطه
في القسم
دخل ياسين ودخل معاه باسل... كان قاعد كريم و فوزي قدام الظابط... بصله كريم بغضب شديد
الظابط: الاستاذ كريم رافع عليك قضيه و بيقول انك خطفت خطيبته بعد ما هددته
ياسين: انا فعلا هددته و اتخانقنا بس مخطفتش حد
قام كريم وقال بانفعال: انت كداب يلا.... انا متأكد انت اللي خطفتها
ياسين: واي دليلك علي كلامك
الظابط: كنت فين وقت الحفله
ياسين: في حفلة مع صحابي ولو عايزين تتأكدو خدو تليفون و اتصلو عليهم واحد واحد او روحو علي بيوتهم لو انتو عايزين
كريم بغضب شديد: متصدقهوش دا كداب
فوزي: اهدى شويه يا كريم
الظابط: هات التلفون
طلع ياسين التلفون و عطاه للظابط... خده الظابط وفتحه وقال: مين هما اللي كانو معاك في الحفله
ياسين: اخر ارقام متصل بيها
شاف الظابط تواريخ المكالمات وكانت في نفس الوقت اللي اتعملت فيه الحفله.... رن علي رقم منهم
رد واحد وقال: ايه بترن ليه دلوقتي سبني انام يا اخي شويه مش كفايا سهرتوني في الحفله
بص الظابط علي ياسين بعدين قفل ورن علي رقم تاني والشخص رد برضو انه كان في حفله معاهم
كريم بغضب شديد: اكيد متفق معاهم عشان يقولو كدا.... انا متأكد نوا هوا اللي خطفها
الظابط: مفيش اي دليل يؤكد انه هوا اللي خطفها مش هقدر اسجنه من غير اي دليل
بص كريم علي ياسين اللي كان بيبصله بكل هدوء كان عامل كل احتياطاتو وواخد حذره كويس اوى
كريم: يعني ايه هتسبوه يمشي
الظابط: منقدرش نعمله حاجه من غير اثبات او دليل
قام فوزي وقال: متشكرين يا حضرت الظابط.... يلا كريم
بص كريم علي ياسين بغضب شديد وقال: مش هسيبك و جوري هلاقيها يعني هلاقيها
ياسين: قلبي معاك وهدعي لك ربي انك تلاقيها بسرعه
خد فوزي ابنه وطلع من القسم... بص باسل علي ياسين وهوا شايفه هادي وواثق من نفسه اوي
.................
رجع كريم و فوزي علي البيت.. قامت كريمه وقربت منهم وقالت بلهفه وخوف: عرفتو حاجه عن بنتي لقيتوها
فوزي بحزن وأسف: لا لسه
كريمه بدموع وخوف: يعني ايه لسه اومال هتكون راحت فين... انا عايزه بنتي... ارجوكم رجعولي بنتي
طبطبت غاده علي كتفها بحزن وقالت: اهدي صدقيني هيلاقوها وبإذن الله هترجعلك
بصلتها كريمه و دموعها بتنزل بغزاره و خوف علي بنتها
بصت غاده علي فوزي وقالت: خد كريم و روحو انتو انا هفضل هنا مع كريمه مش هقدر اسيبها لوحدها
هز فوزي راسو وخد كريم وطلعو..... فتح فوزي بابا العربيه بص علي كريم اللي سابه ومشي
فوزي بصوت عالي نسبيا: كريم انت رايح فين دلوقتي
كريم بحزن: هدور عليها مش هرجع الا وهيا معايا
فوزي: الله يهيدك يبني تعال ارجع معايا ومن بكرا ننزل ندور عليها تاني... دلوقتي الوقت اتأخر
بس كريم مسمعش كلامه وكمل طريقه ومسح دموعه اللي نزلت من فرط حزنه و خوفه علي جوري
................
رجع باسل و ياسين البيت كان ياسين هيطلع بس وقف علي صوت باسل
باسل: ياسين
بصله ياسين قرب باسل منه وقال: لو تعرف حاجه عن جوري قولي ولو انت اللي خطفتها قولي برضو انا اخوك ومستحيل افكر في حاجه ممكن تأذيك
ياسين: انا قولت اللي عندي معرفش عنها حاجه
بعدين سابه وطلع بصله باسل بحيره و تفكير
مرفت: عرفتو حاجه عنها
بصلها باسل وقال: لا
مرفت: كانو عايزين ياسين عشان موضوع خطفها
باسل: اه بس قال ميعرفش عنها حاجه
هزت راسها بعدين قالت: الدكتور كلمني دلوقتي عن عملية اسيل ولازم نسافر هنعملها برا مصر
باسل: امتي المعاد
مرفت: الاسبوع الجاي
باسل: تمام هجهز كل حاجه عشان نسافر....
مرفت: خليك انت هنا مع اخوك هوا محتاجك جنبه ومتقلقش علينا
باسل: مش هسيبك تسافرو لوحدكم
مرفت: متقلقش اطمن علينا..... مش هينفع تسيب اخوك لوحده خصوصا في الوقت ده وانت عارف اخوك طايش و ميعرفش يفكر صح خليك جنبه وانا هبقا اتصل بيك علي طول
سكت شويه بعدين قال: ماشي بس خلي بالك من نفسكم كويس ولو حصل اي حاجه كلميني علي طول وهبعت حراسه معاكي ربما احتجتي اي حاجه من هناك
هزت راسها بعدين راحت دخلت اوضتها.... جهزت مرفت كل حاجه للسفر..... غيرت هدومها و جهزت اسيل.... قعد باسل علي ركبته عشان يبقا بمستواها وقال بابتسامة: مش عايزك تقلقي من اي حاجه تمام.... خلي بالك من نفسك
اسيل بابتسامة: تمام وانت خلي بالك من نفسك لحد ما ارجع
مرفت: ياسين فين
قام باسل وقال: في اوضته مطلعش
مرفت: ربنا يهديه ويصلح حاله
بعدين مشيت وزق باسل كرسي اسيل وراح معاهم يوصلهم المطار وهما في الطريق رن تلفون مرفت واستغربت لما لقيت رقم من ايطاليا
مرفت: الو يا يا خلود
خلود اختها: ازيك يا مرفت عامله ايه
مرفت: تمام الحمدلله خير في حاجه
خلود بقلق: ساره لحد دلوقتي موصلتش وكمان مش بترد علي اتصالي وواضح انها لسه عندك في مصر لحد دلوقتي... انتي متعرفيش هيا فين
مرفت بضيق: لا معرفش من ساعة ما طلعت من البيت ومنعرفش راحت فين
خلود بحزن: تمام وانا اسفه علي اللي عملته بنتي حقك عليا
مرفت: اللي حصل بقا.... مضطره اقفل دلوقتي
بعدين قفلت مرفت وقالت بتفكير: هتكون راحت فين دي
...................
بعد فتره
قعد باسل علي مكتبه في الشركه وباله مشغول بحاجات كتيرر اخته اللي سافرة وهل العملية هتنجح ولا لا... اخوه اللي مش عارف بيفكر في ايه ولا ناوي علي اي... اختفاء جوري وهل اخو ليه علاقه بيها ولا لا.... ومش ناسي رقيه ولا اللي عملته فيه ولا قتله ليها كل دا كوم والظابط اللي لحد دلوقتي بيراقبه عشان يلاقي دليل عليه
فاق من شروده علي خبط الباب... مسح وشه بتعب وقال: ادخل
دخلت رهف وحطت كوباية القهوه قدامه وقالت: القهوه بتاعت حضرتك
باسل: احمد عامل ايه دلوقتي
رهف: الحمدلله كويس... بيسأل عنك كتير وعايز يشوفك
ابتسم باسل وقال: سلميلي عليه وانا ابقا اجي اشوفه قريب
هزت راسها بعدين قالت: انت كويس.... يعني انا قصدي شكلك مهموم او في حاجه
بصلها من اهتمامها بيه اتوترت وقالت: انا بس يعني بسأل.... انا هروح اشوف شغلي
كانت لسه هتمشي وقفت لما قال بتعب: حياتي كلها بتلخبطه وفي حاجات كتيره بتحصل مش فاهمه
بصتله بابتسامة انه بيحكيلها عن اللي شاغله وقالت: طبيعي اننا نواجه مرحلة من حياتنا كل حاجه فيها تتلخبط ومنبقاش فهمين اللي بيحصل ايه ولا نتيجته اي بس واحد بس اللي يعرف
بصلها فقالت وهيا بتشاور باصبعها لفوق وقالت: رب العباد هوا اللي عالم بكل حاجه.... جرب تقرب من ربنا اكتر اشكيله هوا قوله علي اللي في قلبك ادعي كتير...... يمكن كل حاجه في حياتك تتحل ربنا مش بيسيب حد لو غلطان ادعي انه يغفرلك ربنا غفور رحيم.... لو مخنوق مدايق حاسس بضيق من كل حاجه.... الجأ ليه هوا ادعي من قلبك وانت خاشع ليه ربنا قال "اذا سألك عبادي عني فإني قريب اجيب دعوة الداعي اذا دعاني فاليستجيبو لي و ليؤمنو بي لعلهم يرشدون "صدق الله العظيم
خلصت كلامها وطلعت بصلها وحس بكل كلمه قالتها.... كان محتاج حد فعلا يقوله ينصحه يعمل ايه...... قام خد تليفونه وطلع من الشركه ركب عربيته ومشي
...............
فتح ياسين الباب ودخل وقفله وراه... بص لجوري اللي قامت اول ما شافته و دموعها منشفتش من عنيها
ياسين: فكرتي
جوري: ومفيش حاجه هتتغير هفضل علي قراري
ياسين بسخرية: حبتيه اوي كدا وبالسرعه دي
جوري: عرف يخليني احبه احترمني قدرني حافظ على علاقتنا وحاول بكل الطرق انه يخليني مبسوطه... عملي كل حاجه كنت اتمناها...... اما انت عملت ايه.... كسرتني جرحتني حاولت تقرب مني في الحرام.... عملت علاقات مع غيري
ياسين بانفعال: قولتلك اتغيرت كل اللي قولتي عليه مبقتش اعمله صدقيني انا اتغيرت ياسين اللي فات مش هتشوفيه تاني.... هتشوفي من حب اهتام تقدير احترام هعملك كل اللي انتي عايزاه بس اديني فرصه اثبتلك حبي ليكي
جوري: وانا مش محتجاك ولا محتاجه لحبك
مسح علي وشه بضيق وغضب وقال: مفيش فايده فيكي.... واسمعي بقا سواء كنتي راضيه ولا حتي غصب عنك هتبقي ليا
خلص كلامه وطلع وقفل الباب بقوة صرخت وقالت بغضب ودموع: مش هتقدر تغصبني علي حاجه انت سامع
..............
كان كريم في عربيته بعد ما كان بيراقب ياسين.... بس ياسين قدر يهرب منه... ضرب دركسيون العربيه بغضب شديد.... شويه و وصلت رساله علي تليفونه.... طلع تليفونه من جيبه وفتح الرساله وانصدم كان مكتوب فيها
"عايز تعرف مكان جوري فين.... هقولك بس تروح لوحدك من غير شرطه ومن غير ما تقول لحد عشان حيات جوري متبقاش في خطر انا حذرتك "
شويه ووصلت رساله تانيه مكتوب فيها عنوان المكان اللي جوري فيه وفي الاخر مكتوب "لو خايف عليها روح لوحدك "
مفكرش كريم لحظه واحده وشغل العربيه ومشي بسرعه علي العنوان المكتوب
قفلت ساره تليفونها بعد ما بعتت الرسايل لـ كريم وعلي وشها ابتسامه خبيثه.... من لما طلعت من بيت خالتها وهيا بتراقب ياسين و شافته وهوا بيخطف جوري و عرفت مكانها فين
ساره بخبث: هستني بس اشوف النتيجه
بعدين ضحكت بخبث وشر كبير
................
وقف باسل قدام مسجد وكان وقت صلاة العشاء.... نزل وقف قدام الجامع بتردد... بس جمد قلبه قلع الجذمه ودخل... اتوضى وصلي العشاء مع باقي المصليين
بعد ما الكل مشي فضل هوا قاعد.... بص لفوق و دموعه بتنزل واول حاجه طلب من ربه يسامحه علي الجريمه اللي عملها وهوا بيدعي ويطلب المغفره ودموعه بتنزل بغزاره وهوا ندمان علي اللي عمله مكنش في وعيه ولا حاسس باللي عمله.. فضل يدعي من اعماق قلبه ان ربنا يغفر له و يسامحه ويصلح حاله وينسي وجعه و ألمه و يعيش حياته براحه من غير قلق ولا خوف يعيش وهوا مطمن...... طلع كل اللي في قلبه من وجع وحزن و هموم
بعد فتره
طلع من المسجد وكان حاسس براحه اول مره في حياته يحس بيها.... كان فرحان من جوه اوي كوم الهموم اللي كان في قلبه انزاح..... ركب عربيته ومشي في اتجاه بيت رهف
............
وصل كريم علي المكان نزل وقرب من البيت اللي قدامه بهدوء اتخبي لما شاف واحد بيمشي قدام البيت كأنه بيحرس المكان.... بص كريم حوليه شاف عرق خشب خده وبدأ يقرب من الراجل ببطئ بعدين ضربه علي راسه بقوة... اتأوه الراجل بألم ووقع علي الارض
راح كريم بسرعه علي باب البيت ولقاه مقفول بمفتاح.... رجع للراجل فتش في جيوبه علي المفتاح لقاه وراح بسرعه فتح الباب
مسحت جوري دموعها وبصت علي كريم اللي دخل بصدمه... بصلها كريم بدموع وجري عليها خدها في حضنه جامد وهوا بيتنفس ريحتها باشتياق.... حضنته جامد وقالت بدموع: كريم... انت بجد هنا ولا انا اللي بتخيل
بعد عنها ومسح دموعها بحنان وقال بحب: انا فعلا موجود... متخافيش هخرجك من هنا
"اهلا اهلا بالغالي "
بص كريم وراه لقاه ياسين وهوا بيدخل البيت وقال: مش كنت تقول انك جاي عشان اعرف استقبلك كويس
خد كريم جوري خباها ورا ضهره وقال بغضب: زي ما قولت انت اللي خطفتها
ياسين: اه انا...... ابعد عنها احسن لك
كريم بغضب: هخليك تندم علي اللي انت عملته
شقهت جوري بصدمه لما شافت ياسين طلع مسدس و رفع علي كريم وقال بتحذير: ابعد عنها بدل ما تخسر حياتك
كريم: مش هبعد يا ياسين واللي عندك اعمله
جوري بخوف شديد: ياسين... ياسين ارجوك بلاش جنان ونزل المسدس من ايدك
بصلها ياسين وقال بسخرية: خايفه عليه مش كده
استغل كريم انشغال ياسين مع جوري وسحب المسدس من ياسين وضربه جامد.... رد له ياسين الضربه في وقتها وقع المسدس من كريم و شبكو مع بعض في خناقه جامد وكل واحد بيضرب التاني بكل قوتها
جوري بصراخ ودموع وخوف: خلاص كفايا..... حرام عليكم ارحموني
ضرب ياسين كريم وقعه علي الارض وراح مسك المسدس وكان هيضرب نار علي كريم بس مسكت جوري ايده وقالت برجاء ودموعها بتنزل: ارجوك يا ياسين بلاش.... ارجوك سيبه عشان خاطري سيبه
ياسين بعين حمرا من فرط غضبه: مش هسيبه غير لما اقتله
قام كريم بسرعه ومسك ايد ياسين اللي فيها المسدس وقال: مش قبل ما انا اخلص عليك
كانو هما الاتنين مسكين المسدس وكل واحد بيحاول ياخده و يصوبه علي التاني و جوري ما بينهم وبتحاول توقفهم بكل قوتها
خرجت طلقه من المسدس بصو التلاته لبعض مين اللي اتصاب...... اتفاجأو بجوري وهيا بتقع علي الارض وطلقة الرصاص جات في قلبها ودمها كان بيتصفي من جسمها.......
- يتبع الفصل التالي اضغط على (رواية جنون العشق) اسم الرواية