رواية احفاد الطوبجي الجزء الثاني 2 الفصل التاسع و الثلاثون 39 - بقلم اميرة اسامة
🔥البارت التاسع و الثلاثون🔥
❣️لسه الحكايه ممكنه❣️
فضلت فريده وعاصم مستنين مليكه لحد ما تخلص وبعد وقت بسيط خبطت بنت من البنات وهي معاها مليكه بعد ما خلصت كانت حاطه روچ ومانيكير وحاطه تاتو على ايدها واستراس على خدها شكل الفراشه كله باللون البينك
شكلها كان عامل زي العرايس اللعبه😍
فريده....ايه الحلاوه والسكر ده كله
عاصم....اوباااا العروسه بتاعتي خلصت😍
جريت مليكه على فريده وحضنتها
فريده....عجبك يا لوكا
مليكه....اوي ميرسي😍
فريده....ياروحي العفو بس قوليلي ايه الحلاوه دي كلها بقيتي عروسه صغننه
مليكه....حلو المانيكير يا دادي😍
عاصم....يجنن يا قلب دادي بقولك ايه فريده وافقت تيجي معانا نتعشى مع بعض
مليكه....بجد😍
فريده....ايوه بس انا زعلانه الوقت🥺
مليكه....ليه؟
فريده....يعني لو كنت اعرف كنت لبست حاجه احلى ينفع اجي باللبس ده ولوكا قمر كده🤔
مليكه....ينفع كده جميل❣️
فريده....والله انتي اللي جميله.
عاصم....وماله بس اللبس ولا عايزه ترجعي في كلامك
قامت فريده وقفت وضحكت لا مش هرجع في كلامي بس يعني چينس وسويت شيرت شكلي خارجه من الشغل خالص😂
عاصم....ياستي احنا راضين المهم ناكل وبعدين ماله الچينس والسويت شيرت حلوين يلا بقى.
فريده....حاضر يلا بينا يلا لوكا
مليكه....يلا😍
خرجوا من السنتر وراحو على عربيه عاصم ركب مليكه وراء وحطلها الحزام وراح فتح الباب لفريده وركب واتحرك بالعربيه
بعد وقت بسيط وصلوا المطعم في فندق على النيل في اخر دور وكان بيتحرك بهدوء الجو كان حلو جداً
طلبوا الاكل وفضلت مليكه قاعده في وسطهم ومبسوطه
وكل شويه تقوم تتحرك في المكان ببراءه وتروح على الشباك تتفرج على المكان من فوق.
عاصم...لوكا ممكن تيجي تقعدي بقى عشان محدش يضايق
مليكه.....بشوف البحر يا دادي
عاصم....ده اسمه نيل مش بحر ويلا تعالي
مليكه....هشوف النيل
فريده....بإبتسامه جميله سيبها براحتها
عاصم....اصل انتي مش فاهمه مليكه لو انطلقت مش هنعرف نسيطر عليها
فريده.....لا هنعرف خليها بس هي واضح انها مبسوطه❣️
عاصم....دي حقيقه للاسف ظروف شغلي بتخليني اقصر معاها كتير لاني طول الوقت في الشغل وعلي معايا والباشا يعني محدش بيبقى معاها طول اليوم ولما بنروح يادوب بنتعشى مع بعض وتطلع اوضتها عشان معاد نومها
فريده....ايوه يا عاصم بس ده مش صح دي طفله ومن حقها تخرج وتشوفك اكتر من كده لان هي عمرها ما هتقدر تعذرك ولا هتعرف يعني ايه شغل اصلا
عاصم....والله يا فريده انا بحاول وكل فتره لما بحس ان هي جابت اخرها بفضل معاها لانها بتفضل مضايقه بحس ان سلوكها اوقات بيتغير بتبقى عنيفه مش عاجبها اي حاجه وحتى لو جبتلها اي لعبه هي عيزاها مش بتبقى مبسوطه
فريده....طبيعي يا عاصم اوعى تفكر ان الطفل تقدر تضحك عليه بلعبه يمكن اللعب بتفرح الاطفال بس كمان قربنا منهم وحضننا ليهم بيكون عندهم اهم من اي لعبه وجودنا بيفرق صدقني واوعى تقول ده طفل مش هيفكر بالطريقه دي او ده طفل مش هيحس
غلط طبعاً الاطفال بتحس اكتر من الكبار و بيفكروا بالطريقه دي حتى لو معرفوش يعبروا عن اللي جواهم الطفل نفسياً بيتأثر زيه زي الكبير ويمكن اكتر ولو دخلوا في اكتئاب تبقى كارثه انا عارفه يا عاصم انك بتتعب وتشتغل عشانها بس صدقني انك تعمل ميموري مع مليكه ويبقالك في رصيد عقلها ذكريات حلوه اهم بكتير من الفلوس والشغل وحجات كتير يمكن دي حجات مهمه لمستقبلها بس ممكن كمان يجي عليها يوم تتمنى ان ميبقاش عندها كل ده بس يبقى عندها ذكريات معاك خروجات متتنسيش هزار وضحك وقاعده حلوه لعب وجري شويه صور لكل ذكرى حلوه بينكم الماضي يا عاصم لما بيرتبط بكام صوره على كام موقف حلو و ذكريات متتنسيش افضل كتير من مستقبل مفيهوش غير فلوس وماديات
عاصم....بإبتسامه كلامك حلو يا فريده
فريده....صدقني اللي احلى من الكلام تنفيذه يمكن يكون صعب عليك بس مليكه ملهاش ذنب هي ملهاش غيرك وصعب على طفله في سنها تبقى عايشه مع 3 رجاله مفيش فيهم ست تهتم بيها مفيش طفل تلعب معاه هي ديماً شيفاكم بتشتغلوا واخر اليوم تاكلوا معاها وبس
عاصم ...بحاول يوم الاجازه اعوضها على قد ما اقدر بس اوقات مبقدرش لاني طول الاسبوع مطحون حرفياً في الشغل مابين الشركه والمواقع واوقات بسافر واوقات بسهر في الشغل لنص الليل عشان افصل على ايد المهندسين والعمال لحد ما نسلم الشغل والمشكله اني لما بعوضها بحس ان هي مش مبسوطه لاني باختصار انا معترف اني اب فاشل في حكايه الخروج مع الاطفال مببقاش عارف اوديها فين
بنروح نقعد في مكان اخليها تطلب الاكل اللي هي عيزاه واول ما تعرف اننا هنروح تزعل
فريده....بابتسامه طبيعي لان الخروجه دي بالنسبالها ممله جداً يعني ايه اخد طفله من البيت واروح اقعد بيها في مكان تاكل و ترجع ماكانت تقعد في البيت احسن السن بتاع مليكه ده كله حيويه ونشاط وطاقه عايزه تجري تلعب تتنطط تخرج الطاقه اللي جواها
عاصم....بضحك وانا قولت اني فاشل في الحته دي خالص
فريده....مفكرتش تخليها تلعب اي رياضه
عاصم....فكرت بس دي كمان صعبه عليا للاسف رياضه يعني التزام ومواعيد تمارين ودي حاجه مقدرش ألتزم بيها وبصراحه مقدرش اثق في اي حد ياخدها بدالي ويوديها الناني بتاعتها بصراحه مش مقصره معاها لكن صعب اثق فيها واخليها تعمل معاها الحجات دي اخاف تتوه منها يجرالها حاجه مقدرش بصراحه مجرد الفكره بترعبني
فريده....لو تقدر تثق فيا انا مستعده أتولى مسؤوليتها 3 ايام في الاسبوع ودول اللي ببقى فاضيه فيهم خالص طبعاً يادوب بروح ابص عليهم في السنتر واشوف باقي الفروع ماشيه ازاي وببقى قاعده مش ورايا حاجه فا لو مش هتخاف عليها معايا انا موجوده.
عاصم....اكيد لا مش هخاف عليها معاكي بس هيبقى صعب عليكي مليكه متعبه جداً مش هتتحملي
فريده....والله دي بتاعتي انا بقى اطلع منها انت وبعدين متقلقش يعني انا متعوده او تقدر تقول اني كان عندي تجربه مع الاطفال🥺
عاصم.....يعني ايه؟
فريده....كان عندي ولد واتوفى
عاصم....ابنك؟
فريده....ايوه سليم كان عنده حوالي تسع سنين
وبدأت فريده تحكيله حكايتها بأختصار وهو بيسمع منها كأنه ميعرفش حاجه عنها.
فريده....بس وبعدها قررت اني انزل مصر وابدأ من جديد واهو بقالي سنتين ونص تقريباً
عاصم....انا اسف لو فكرتك بحجات تضايقك.
فريده....بالعكس انا عمري ما نسيت اصلاً ويمكن كمان لما حكيت تجربتك الشخصيه حسيت انك بتتكلم عني
عاصم.....من يوم ما اتعرفت عليكي يا فريده وانا بشوف فيكي كل حاجه اتنين بس مكنتش فاهم السبب
فريده....يعني ايه بتشوف فيا كل حاجه اتنين.
عاصم....يعني بتضحي وفي نفس الوقت حزينه قويه وفي نفس الوقت ضعيفه حواليكي ناس وعشريه ومحبوبه وفي نفس الوقت حاسس انك منعزله مستمعه كويسه جداً لأي حد بيحكيلك لكن في نفس الوقت مش بتتكلمي كتير باختصار فيكي كل حاجه وعكسها
فريده....بابتسامه انا فعلاً كل ده في بعضه اوقات بحس اني شخصيه سهله والناس بتفهمني بسهوله واوقات بكون شخصيه معقده مش اي حد يفهمني ويمكن اللي كون شخصيتي دي الظروف اللي عشتها انا زمان مكنتش كده كنت مختلفه خالص.
عاصم.....طبيعي الظروف اللي بنعيشها مع الوقت بتغير طباعنا وشخصيتنا بس يعني سؤال واعتبريه فضول بس لو مش حابه تجاوبي متجاوبيش
فريده......اتفضل
عاصم....ليه انفصلتي عن جوزك الاول
سرحت فريده وسكتت ثواني وافتكرت السبب اللي خلاها انفصلت عن حاتم.
عاصم....لو سؤال شخصي بلاش تجاوبي
فريده....لا خالص بس تقدر تقول متفقناش يمكن اتجوزنا بسرعه كان سننا صغير كل واحد عنده طموح بعيد عن التاني مفيش نقطه بنقدر نتلاقى فيها كان في اختلافات كتير
عاصم.....بس بيتهيألي مش شرط ان اي زوجين عشان جوازهم ينجح ويكمل ان طموحهم يكون واحد عادي ان كل واحد فيهم يبقى ليه طموح وحلم مختلف
فريده....اكيد بس انا مقصدتش طموح الشغل انا قصدت طموح العيله اللي انت حابب تعملها مكانش واحد هو كان بيفكر بطريقه و شايف انها صح وانا كنت بفكر بطريقه تانيه خالص.
عاصم.....طيب والتاني
فريده....التاني كان بعد عشر سنين من انفصالي يعني تقدر تقول بعد موت اهلي بسنه كنت لوحدي خالص وفكرت ان اسلم حل اتجوز وارجع اعمل عيله واهل واعوض اللي خسرته بس معرفتش مستحيل تقدر تعمل كل ده مع شخص بيغير من نجاحك وعايز يحطم كل حاجه فيك
والتالت كان ليه نزوات كتير ومفيش ست تقبل ده على كرامتها فا انفصلت باحترام وحافظت على كرامتي
عاصم.....بابتسامه بتبقى صعبه الخيانه على الست
فريده....اكيد مفيش ست تقبل انها تتخان وتتجرح وكرامتها تضيع حتى لو مش بتحب الراجل اللي متجوزاه بتبقى صعبه وعلى فكره مش صعبه على الست بس اكيد صعبه على الراجل
عاصم....اكيد الخيانه خيانه ملهاش علاقه بست وراجل بس قوليلي مفكرتيش تتجوزي تاني يا فريده
فريده....بضحكه سخريه تاني حرام عليك انا جربت حظي 3 مرات ومكانش حلو
عاصم....جربي ان شالله عشرين مره ايه المشكله.
فريده....الست ياعاصم بتبقى عايزه تتجوز مره واحده في حياتها مع راجل يحبها ويخاف عليها و يحتويها ويحميها ويبقى امانها وسندها وكل حاجه وعمرها ما بتفكر في غيره بس اوقات بتضطر تكرر التجربه على امل انها تظبط وتلاقي اللي كانت بتدور عليه وتقدر تعيش في استقرار وعيله هاديه وانا عمري ماتخيلت وانا لسه صغيره ان في المستقبل هكون اتجوزت وانفصلت اكتر من مره حاولت اني اخلي الحياه تستمر مع حد فيهم بس منجحتش ماهو صعب تنجح مع راجل انت وهو بعيد عن بعض في التفكير وصعب تنجح مع راجل اناني بيحقد على نجاحك وبيغير منك وصعب تعيش مع راجل كل اسبوع ليه نزوه جديده وكل نزوه اقذر من اللي قبلها وبدل ما تعيش حياتك في استقرار وهدوء هتعيشها في حرقه دم واعصاب فهمتني فا ركزت في شغلي ومستقبلي وشيلت الحكايه كلها من دماغي
عاصم.....بس عادي يا فريده انك تجربي وتفشلي المهم متستسلميش في انك تلاقي زوج بجد يكمل معاكي حياتك في استقرار.
فريده.....بقيت اخاف من الفشل يا عاصم انا ضيعت من عمري عشرين سنه في محاولت وكلها فشلت تفتكر العمر في كام عشرين سنه تاني عشان اضيعهم في محاولات ويا تنجح يا تفشل مبقتش حمل فشل وقلبي مبقاش حمل وجع يمكن واحنا لسه اصغر شويه في العشرينات التجربه بتكون اسهل حتى لو فشلت بتحس ان لسه العمر قدامك عادي وقعت مره واتنين وتلاته هترجع تقف لكن لما بتكبر وتنضج بتحس انك لو وقعت ممكن تتكسر
عاصم.....ليه التشاؤم ده يا فريده
فريده....عشان لما الست بتفشل يا عاصم مفيش حد بيصدق ان الغلط او العيب كان على الراجل الناس مش بترحم اي ست وحتى لو هما اتأكدو ان الراجل هو اللي غلط بيقولوا العيب في اختيارك طيب اقنعني مين في الدنيا بتبقى ضامنه الشخص اللي قدامها صدقني حتى لو تعرف البني ادم وعشت اجمل سنين عمرك معاه مع اول موقف صعب تمروا فيه مع بعض بتكتشف انك متعرفهوش وبتتفاجئ برد فعله عشان كده مفيش حد مضمون
عاصم....وانتي ليه عامله حساب الناس كده؟
فريده....زمان كنت بعمل حساب الناس هتقول ايه عشان خاطر اهلي بس لما اهلي راحوا بقيت اعمل حساب اسمي انا الوقت لو فكرت في كلامك وجربت اني اتجوز وفشلت ورجعت جربت وفشلت مش هستفاد حاجه غير كلام وصورتي واسمي اللي حاولت اكبروا هيضيعوا زي ما حجات كتير ضاعت ودول مقدرش اجازف بيهم يا عاصم
عاصم....مش يمكن كلامك وخوفك ده عشان انتي لسه ملاقتيش راجل صح يعوضك يا فريده ويمكن نصيبك لسه ملاقتيهوش
فريده....يمكن بس صدقني حتى لو لاقيتهم مش هاخد بالي منهم لان خوفي من الفشل بقى مسيطر عليا
عاصم...بس قلبك لو دق لشخص صح مش هتفكري بالطريقه دي وهتسيبي نفسك
فريده.....طيب لو كلامك صح ليه مجربتش تتجوز بعد مراتك التانيه مش يمكن انا كلامي صح وانت خوفت من الفشل
عاصم....خالص بالعكس انا لما قررت انفصل عنها قولتلك السبب عشان مدت أيدها على مليكه و لانها كانت شخصيه غير مسؤوله كنت بالنسبالها بنك مش اكتر مع انها كانت بنت ناس على فكره بس هي كانت طماعه وكل همها نفسها وبس خروج ولبس وسفر مكانتش تعرف يعني ايه أمومه بس انا اللي خلاني مفكرش اني حقيقي ملاقتش حد مناسب بس لو لقيت هاخد الخطوه اكيد لكن انا لا خايف من التجربه ولا حتى الفشل احنا عايشين يا فريده في الدنيا عشان نجرب و ناخد دروس من الحياه و نكتشف معادن الناس ونعرف نختار ايه اللي يناسبنا وايه اللي مينسبناش
فريده....يعني مثلاً انت ايه اللي شايفه من وجهه نظرك يناسبك في الست
عاصم.....يمكن لو من غير وجود مليكه كنت هقولك المهم تحبني واحبها
لكن مع وجود مليكه الوضع متغير اكيد مش هتنازل عن اني احبها وتحبني لاني حابب اكمل حياتي مع شخص بطريقه صح لاني واثق ان الحب من الطرفين بيدوب اي مشكله او موقف صعب او ظروف الحياه الصعبه مش هنقدر نتخطى كل ده لو مفيش بينا حب وبخصوص مليكه لازم تحبها لاني مستحيل اتجوز واحده مضايقه من وجود بنتي انا مش لوحدي يا فريده انا ظروفي مختلفه يعني اللي هتجوزها لازم تبقى عارفه انها هتكون مسؤوله عن شخصين مش شخص واحد فهماني لازم تكون عارفه هي داخله على ايه ومش مضايقه بس في العموم انا مش حابب اتجوز واحده تكون ام لمليكه بس لا انا عايز اتجوز واحده وابني معاها عيله جميله.
فريده ...بصت لمليكه بإبتسامه هاديه بيتهيألي اي ست هتشوف مليكه هتبقى مبسوطه انها تدخل جوه عيلتكم وتبقى واحده منكم.
الاكل جه في الوقت ده وبدأ الويتر ينزل على التربيزه كل اللي طلبوا.
عاصم...اخيراً الاكل وصل يلا يا لوكاا بتعملي ايه كل ده
مليكه....بلعب مع المركب والنيل😍
عاصم....بحب طيب ممكن ناكل الاول
مليكه....حاضر
قعدت مليكه في وسطهم وبدأوا ياكلوا مع بعض
ابتسمت فريده وهي شايفه عاصم قد ايه مهتم بكل تفصيله لمليكه يحطلها الاكل ويقطعلها يأكلها يمسح ايديها يمكن هو حسس فريده بتقصيره مع مليكه بسبب شغله لكن هي شافت في حنيه وحب وخوف على مليكه غير عادي .
حاولت تشيل عنه شويه وساعدته في اكل مليكه
وقضوا الوقت مع بعض وهما مبسوطين جداً شويه يضحكوا من قلبهم على مليكه وشقاوتها وشويه يتكلموا بجد
مسكت مليكه كوبايه المايه عشان تشرب وكانت هتقع على هدومها في نفس اللحظه فريده وعاصم مدوا ايدهم يمسكوا منها الكوبايه
حطت فريده ايدها بسرعه في نفس اللحظه اللي حط عاصم ايده على ايد فريده
بصتلوا فريده بإحراج فضل عاصم باصصلها ثواني وبعدين سحب ايده بسرعه وبعد.
بصت فريده على مليكه وابتسمتلها وهي باين عليها اللغبطه بصت بطرف عينها لعاصم كان باصصلها وهو كمان متلغبط حاول يغير الموقف بسرعه
عاصم.....لوكا يا حبييتي كنتي هتغرقي نفسك
مليكه....هي اللي كبيره عليا.
عاصم...طيب يا ستي حقك عليا المره الجايه نخليهم يجيبوا كوبايه اصغر 🤨
خلصوا اكل راحت مليكه على عاصم تقولوا حاجه في ودنه.
عاصم....🤨🤨🤨🤨
فريده.....في اسرار يا لوكا😉
عاصم....بضحك لا ده في ورطه مبحبش اخرج بسببها😂
فريده.....ايه التويلت😂😂
عاصم...اكيد وبتبقى مشكله لاني بضطر اخدها تويلت الرجاله😂😂
فريده.....لا لوكا كبرت خلاص ندخل التويلت بتاع البنات ايه رأيك نروح سوا وبعدين نظبط الروچ بتاعنا في المرايه😍
مليكه.....اوك😍
فريده....ممكن يا دادي نروح ومش هنتأخر عليك.
بصلها عاصم وابتسم ابتسامه جميله ممكن .
خدتها فريده وراحوا مع بعض وبعد شويه خرجوا كان عاصم طلب قهوه ليهم وعصير لمليكه.
سابت مليكه العصير وراحت تتفرج على النيل تاني
طلع سيجاره وبص لفريده.
ومدلها ايده بسيجاره بصتلوا فريده 🙄باستغراب واحراج وكانت هتموت وتاخد سيجاره.
عاصم....بضحك ايه مستغربه اني عارف انك بتدخني🤨😉
ضحكت فريده وبصت لبعيد وبعدين بصتلوا انت عرفت ازاي اني بدخن
عاصم....ليه هو سر😉
فريده....لا مش سر انا بشرب عادي قدام اي حد بس مشربتش قدامك
عاصم....اممم واضح ان ذاكرتك ذاكره سمكه شوفت السجاير يوم ما عربيتك عطلت وشوفتها في مكتبك انهارده😉
مش محتاجه ذكاء يعني
فريده....بتركز انت في التفاصيل🤨
عاصم....خالص والله بتيجي معايا صدفه😂 يلا خدي
فريده....بإبتسامه سحبت سيجاره وبعدين رجعت حطتها تاني
عاصم....ايه رجعتي في كلامك
فريده....بلاش عشان لوكا بتبص علينا يعني بلاش تشوفني بشربها افضل وبعدين بصراحه انا بحاول ابطل
عاصم....بابتسامه على فكره لوكا مش هتركز وعادي شافت ستات كتير وبنات معارف يعني بيشربوا
فريده....تمام بس خلاص انا مش عايزه كده هرتاح اكتر
عاصم....زي ما تحبي
قعدوا شويه وبعدين قاموا عشان يمشوا ركبوا العربيه واول ما مليكه شافت النيل من قريب فضلت تزن وتطلب من عاصم انهم يقفوا قريب منه عشان تشوفوا
عاصم....خليها وقت تاني يا لوكا عشان فريده تروح
مليكه.....بليز يا دادي 🥺
فريده....اقف شويه يا عاصم متزعلهاش وبعدين دي بقلها سنه واقفه تتفرج عليه من بعيد حرام عليك😂🙈
عاصم.....اتفقتوا عليا هااا🤨
ضحكت فريده واول ما ركن نزلت مسكت ايد مليكه وراحوا مع بعض نزل عاصم وبص عليهم وهما مبسوطين وماسكين في السور غمضت فريده عينها وخدت نفس طويل وهي بتبص للسما
عاصم....بضحك واضح ان مش مليكه بس هي اللي عايزه تقف على النيل🤨
ابتسمت فريده وبصتلوا
فريده....كان اكتر مكان بحبه وبجري عليه وقت ما احس اني مضايقه او حتى لو مبسوطه واتحرمت منه عشرين سنه لدرجه اني لما نزلت مصر كنت بعدي عليه كل يوم وانا رايحه شغلي بس مكنتش بنزل اقف وابص عليه موقفتش عليه غير مرتين تقريباً من فتره صغيره ودي تالت مره.
عاصم....بس كده نعوضلك يا ستي العشرين سنه المهم تكوني مبسوطه
ابتسمت فريده وبصت على النيل فضلوا واقفين شويه يتكلموا
حست فريده بمليكه بتسند على رجلها براسها وواضح انها عايزه تنام خلاص
فريده.....ياروحي لوكا انتي عايزه تنامي
مليكه....بتعب ايوه
عاصم....واضح الهواء نيمها على نفسها
فريده...طيب يلا عشان متبردش
عاصم....تمام يلا قرب عاصم من مليكه شالها وراحوا مع بعض على العربيه ركبها وراء وركبوا وطلع بالعربيه.
عاصم.....طريق البيت فين يا فريده
فريده....لا لو مش هتعبك معايا ترجعني على السنتر عشان عربيتي هناك كمان
عاصم....هتسوقي الوقت ازاي الوقت اتاخر
فريده....ماهو انا مضطره هنزل شغلي ازاي الصبح بكره لازم اروح بدري
عاصم....طيب ايه رأيك اوصلك البيت والصبح شوفي هتروحي امته السنتر وانا هاجي اخدك واوصلك موافقه
فريده....بابتسامه مش عايزه اتعبك يا عاصم
عاصم....ياستي انا راضي
فريده....تمام زي ما تحب.
كمل عاصم طريقه لحد ما وصلها قدام الڤيلا بتاعتها
فريده....ميرسي يا عاصم على اليوم الحلو ده وانك عرفتني على لوكا
عاصم....احنا اللي بنشكرك يا فريده بجد بقالنا فتره كبيره متبسطناش كده ولوكا كمان مبسوطه اوي
فريده....حبيبتي نامت على نفسها ابقى بوسهالي لما تصحى
عاصم....حاضر.
نزل عاصم فتحلها الباب نزلت فريده وسلمت عليه.
عاصم ...الصبح هتلاقيني واقف مستنيكي
فريده.....تمام يا عاصم تصبح على خير
عاصم....وانتي من اهل الخير
دخلت فريده وفضل عاصم واقف مبتسم وباصصلها لحد ما دخلت وبعدين مشي.
...........................
في صباح يوم جديد صحي قاسم ملقاش زهره جنبه بص حواليه لقاها واقفه قدام الشباك وفي دنيا تانيه
راح عليها وحضنها من ضهرها وباسها من خدها.
قاسم....صباح الخير يا حبيبي ايه اللي مصحيكي بدري كده
زهره....انام ليه
قاسم....عشان ترتاحي يازهره
زهره.....كده كده هرتاح على طول خليني صاحيه شويه
لفها قاسم وخلى وشها ليه كان وشها شاحب وحزينه
قاسم....زهره بلاش الكلام و الطريقه دي ارجوكي وبلاش التشاؤم ده انتي هتبقي كويسه وهنعدي كل ده مع بعض عادي يا زهره فتره صعبه في حياتنا بس هنتخطاها مع بعض وهنرجع نكمل حياتنا هنبدأ العلاج وناخد اول خطوه في المشوار وهنوصل
زهره....بس انا مش هعمل كده يا قاسم
بصلها قاسم باستفهام كده اللي هو ايه يا زهره🤨
زهره....مش هتعالج يا قاسم🥺
قاسم....نعممم زهره انتي اكيد بتهزري صح
زهره....لا مش بهزر انا منمتش طول الليل التفكير هيموتني بس انا خدت قرار يا قاسم ومش هرجع فيه
قاسم.....انتي اكيد اتجننتي انتي فاكره اني هوافقك على قرارك ده يعني ربنا ينور بصيرتنا لمرض عشان نتعالج وانتي ترفضي 🤨
زهره.....غصب عني يا قاسم
قاسم....هو ايه اللي غصب عنك يازهره ايه مبسوطه بالمرض وبتستسلمي طيب لو مش عشانك او عشاني عشان ولادنا يا زهره.
زهره....بدموع ماهو عشان ولادنا انا هعمل كده🥺 احنا مخبين على جنه عشان متعرفش طيب ماهي اكيد هتعرف لما ابدا علاج والكيماوي يدمرني هتعرف لما تلاقيني واخده الجرعه ومش قادره اقوم من على السرير هتعرف لما اعراض الكيماوي تحرق فيا وتموتني بالبطئ🥺 هتعرف لما تلاقي شعري بيقع وحالتي بتدهور هتعرف لما تلاقيني مش قادره اركز معاها ولا مع عُدي💔
عشان خاطري يا قاسم بلاش تعترض خليني اقضي اطول فتره ممكنه مع ولادي خليني أفضل معاهم وانا بصحتي اشبع منهم ويشبعوا مني 🥺💔 خليهم يفضلوا فاكرني وانا بحالتي دي بلاش اخر صوره ليا في عينهم تكون كلها ضعف ومرض
قاسم....بحزن انتي عارفه ان كلامك ده بيوجع قلبي يا زهره الله يخليكي بلاش تقولي كده وبعدين بهدله ايه وتدهور ايه وشعرك ايه اللي هيقع زهره انتي اكيد الكيماوي اللي هتاخدي مش زي الكيماوي ده انتي حالتك لسه في البدايه يعني مستحيل الجرعه اللي هتاخديها هتعمل معاكي كده جرعتك هتبقى اخف
زهره....احنا منعرفش يا قاسم هتبقى ازاي بس انا معنديش استعداد اضيع الوقت اللي فاضلي في رحله علاج وانا بعيد عن ولادي الله يخليك ياقاسم سيبني معاهم سيبني اشبع منهم إنهارت زهره في حضن قاسم
حضنها قاسم ونزلت دموعه بوجع🥺
قاسم....انا لو مكانك يا زهره همسك في اي امل ممكن يخليني افضل مع ولادي ومعاكي هوافق اني اتعب شويه على امل اني ارتاح على طول واخف لو بتحبيهم بجد يا زهره مش هترضي انك تضحي بنفسك عشان تفضلي معاهم فتره وبعدين تسيبيهم بالعكس انا هضحي بفتره صغيره اتعالج فيها عشان اكمل معاهم اللي جاي هتبقي مبسوطه يا زهره لو متعالجتيش وحالتك اتدهورت اكتر انتي خايفه يشوفوكي وانتي تعبانه طيب ماهو لو متعالجتيش هتتعبي اكتر زهره انتي لسه مدخلتيش في مرحله تعب المرض نفسه بلاش يا زهره تودينا ليها عشان خاطري زهره ولا انا ولا ولادنا هنعرف نكمل من غيرك وانتي عارفه كده كويس💔
زهره.....خلي اخر صوره ليا في ذاكرتكم تكون حلوه ياقاسم💔🥺
قاسم....انتي في كل حالاتك حلوه يا زهره بس لو انا اللي مكانك هتوافقي على قراري ده
زهره....غصب عني يا قاسم🥺🥺 والله غصب عني💔
قاسم....زهره انا عمري ما شوفتك ضعيفه بالشكل ده عارف انك زعلانه وموجوعه وخايفه بس هنعتبرها فتره في حياتنا زي اي فتره عدت بلاش عشاني وعشان جنه يا ستي عشان عُدي اللي ملحقش يحس بيكي ويشبع منك استهدي بالله يا زهره وقولي الحمد لله ولازم نرضا باللي ربنا كتبه
زهره....انا راضيه والله مش معترضه
قاسم.....يبقى نكمل يا زهره المشوار اللي ربنا كتبه علينا❣️
خبطت روح في الوقت ده ودخلت عشان تطمن على زهره هي وراجح.
اول ما زهره شافت روح دخلت في حضنها وهي منهاره وفضلوا الاتنين يعيطوا بوجع.
روح....بس بس يا حبيبتي اهدي يا زهره الله يخليكي.
راجح....ايه يازهره وحدي الله يا بنتي كل اللي ربنا يجيبه خير عادي ابتلاء ربنا بعتهولنا وهنرضى بيه
قاسم.....كلموها زهره مش عايزه تكمل علاج خايفه تتعب وتتبهدل من الكيماوي عايزه تكمل من غير علاج عشان تفضل مع جنه وعدي
راجح....كلام ايه ده يا زهره وانتي لو بداتي علاج يا حبيبتي مش هتكملي مع ولادك وبعدين مال المرض بالموت ليه التشاؤم ده ما في ملايين مكملين بالمرض انتي لسه في الاول وهتخفي يا زهره.
روح....بلاش الكلام اللي يوجع القلب ده انتي ايه اللي جرالك انتي عمرك ما كنتي بالضعف ده.
زهره.....عشان خاطري يا روح خليني افضل مع ولادي بصحتي شويه الكيماوي هيدمرني وهيدمرهم معايا
راجح ...تعالي يا زهره اقعدي هنا يا بنتي
قعدت زهره وخدتها روح في حضنها وهي بتعيط🥺💔
راجح....قبل اي حاجه نحمد ربنا ونشكره على نعمته وابتلاءه تاني حاجه ليه عامله في نفسك كده عارف انك مضايقه وخايفه بس تفتكري يا زهره المرض هيروح منك لو فضلتي في حالتك دي بالعكس ده مش بعيد يزيد بسبب حالتك النفسيه بصي يا زهره هقولك نصيحه من راجل كبير
المرض اللي جالك صعب انا عارف بس هو جه خلاص في ايه في أيدنا نعمله غير العلاج عياطك وزعلك هيمشوه لا يبقى نرضى وادام جه يبقى يامرحب بيه نعالجه وننتصر عليه اي مرض في الدنيا يا زهره متعب حتى لو كان بسيط
دورنا بقى اننا لما نتعب منكتئبش منفضلش نعيط لان خلاص المرض جه نقف على رجلينا ومنخليش المرض يأثر علينا نتعالج ونكمل ومنستسلمش
زهره....بس ده مش اي مرض🥺
راجح....عارف بس هنعمل ايه ربنا بعتوا خلاص نبدأ علاج بقى ونبقى اقوى منه اتمسكي بالحياه عشان ولادك خليهم هدفك الاساسي خليكي اقوى من المرض المرض يازهره لو اتمكن من حالتك النفسيه هيجيبك الارض طول ما انتي اقوى منه هتتغلبي عليه وبسرعه
كام واحد اتعايش مع المرض سنين كام واحد كان اقوى من المرض وخف اللي مات بسبب المرض يا زهره اتنين اللي اكتشفوا المرض في درجاته الاخيره واللي استسلم وضعف واكتئب وانتي اكتشفتي المرض في الاول يبقى منضعفش منستسلمش ولادك عايزينك جوزك يازهره واحنا يا بنتي اتمسكي بالحياه عشانا احنا منستاهلش منك يا زهره انك تقاومي ومتوجعيناش فيكي يا بنتي🥺
بصتلوا زهره واترمت في حضنه وفضلت تعيط
راجح....بس بس يابنتي وحدي الله انتي قويه واحنا جنبك كلنا هنفضل معاكي وهنعدي الفتره دي على خير وهتبقى ذكرى في حياتنا ومش هقولك هتبقى ذكرى وحشه بالعكس هتبقى ذكرى كلها تحدي ونجاح
روح...يلا يازهره اغسلي وشك يا حبيبتي وقومي معايا متقعديش لوحدك خلينا نكمل حياتنا زي ما كانت انتي مش تعبانه انتي زي الفل قومي يا زهره قومي عشاني انا 🥺💔
زهره...بوجع حاضر يا ورح هقوم🥺
قاسم....يلا يا حبيبتي قومي ❣️
................
وصل عاصم قدام الڤيلا عند فريده
واتصل عليها ثواني و الخط اتفتح
عاصم....صباح الفل
فريده....صباح الخير يا عاصم وصلت
عاصم...اه انا بره
فريده....طيب انا جايه حالاً
عاصم....لا على مهلك
فريده.....انا خلصت خلاص
عاصم....اوك مستنيكي.
قفل معاها عاصم وفتح الباب ونزل سند على العربيه وولع سيجاره.
دقايق بسيطه وخرجت فريده وهي مبتسمه
مد عاصم ايده واول ما مدت ايدها تسلم عليه بهدوء باس ايدها حست فريده انها ارتبكت
عاصم....صباح الفل
فريده....صباح النور اخرتك
عاصم....لا خالص يلا بينا
فريده.....يلا بينا
طول الطريق كانوا بيتكلموا سألته عن مليكه قالها انها سألت عليها لما صحيت
اندمجوا في الكلام مع بعض لحد ما وصلها قدام السنتر
فريده....تعبتك معايا يا عاصم
عاصم....مش هنبطل بقى الكلام بتاع تعبتك معايا وشكراً والحجات دي 🤨
فريده....طيب اقول ايه😂🙈
عاصم.....ولا اي حاجه وبعدين احنا متفقين اني صاحب الازمات اكيد مش هسيبك تيجي باوبر ولا ايه🤨
فريده.....خلاص لو شايف كده يا صديق الازمات انا موافقه وبعدين الصاحب ليه عند صاحبه ايه
عاصم....ايوه ايه بقى🤨
فريده....توصيله مساعده لو العربيه بايظه خروجه مع احلى لوكا
عاصم....بضحك اهو ده الكلام مش شكرا وتعبتك 😉
فريده....ماشي يا سيدي مش تنزل طيب تشرب قهوه
عاصم....خليها مره تانيه عندي شغل فوق راسي انهارده بس متقلقيش هبقى ازهقك مني ماهو الصحاب ليه عند صاحبه ايه🤨
فريده....ايوه ايه بقى😂😂
عاصم....قاعده حلوه فنجان قهوه كده يعني😂😂
فريده....خلاص اتفقنا ليك عندي فنجان قهوه
عاصم....ماشي يا ستي
فريده.....يلا باي يا عاصم
عاصم.....فريده
فريده....ايوه يا عاصم
عاصم.....بصلها عاصم شويه
ابتسمت فريده وهزت راسها بمعنى في ايه
عاصم....عايز اشوفك تاني ❣️
ابتسمت فريده بإحراج و اتلغبطت من نظراته.
فريده.....ااااا انا موجوده اي وقت تحب تعالى
عاصم....ماشي هكلمك اكيد
فريده....اوك
عاصم.....يلا خلي بالك من نفسك
فريده....وانت كمان باي
عاصم....بابتسامه باي❣️
..............
في القناه اللي شغاله فيها خلود
خلود....بجد يا احمد؟
احمد....اه والله العظيم انتي عارفه ان معاد الحفله اللي بتعملها القناه الاسبوع الجاي وعرفت في الخباثه كده ان من ضمن الجوايز اللي هتتقدم جايزه للبرنامج بتاعك
خلود....يعني ليا ولا للبرنامج
احمد....بضحكه في حد غيرك بيقدم البرنامج اكيد ليكي هتاخدي جايزه افضل شيف للسنه مين قدك😉
خلود....والله فرحتني يا احمد
احمد....وانا فرحت عشانك والله انتي تستاهلي كل خير يا خلود يلا هسيبك تجهزي انا قولت اجي افرحك عشان تطلعي الحلقه وانتي مبسوطه
خلود....ماشي يا احمد 😍
..............
جنه كانت حاسه ان في حاجه غريبه بتحصل كلهم مش مظبوطين شكلهم حزين حتى زهره وقاسم مش طبيعين وحست ان الكل مقرب من زهره بشكل مش طبيعي بيحاولوا يريحوها على قد ما يقدرو الحكايه مش حكايه تعب في المعده حتى نظراتهم ليها غريبه
فضلت تلف على كل اللي في القصر تسأله محدش قال أي حاجه تريحها قررت تروح لصبا اكتر حد بيتلخم وبيقول كل حاجه بصراحه.
جنه.....صبا صبا صبااا
صبا....في ايه 😒
جنه....بقولك ايه قوليلي الصراحه هو في حاجه بتحصل انا مش عرفاها
صبا....بتوتر حاجه حاجه ايه🙄
جنه....يعني شايفه الكل مضايق مهتمين بمامي زياده عن اللزوم حتى نظراتكم ليها بصراحه غريبه هو في حاجه
صبا....ايه لا مفيش هيكون في ايه🙄
جنه....يا صبااا عليا انت ده كفايه ارتباكك يأكدلي اني صح😒
صبا....بت ابعدي عني قوتلك مفيش هيبقى في يعني بالعافيه وبعدين مالها زهره ماهي زي القرده اهي 😒
جنه....بقى كده يا صبا بتخبي عني
صبا.....🙄هخبي ايه بس وبعدين طبيعي نهتم بيها مش تعبانه 😒
جنه....ماشي يا صبا بس لما اعرف حاجه مش هقولك 🤨
صبا....امشي يابت من هنا يلا😡
مشيت جنه وسابتها في الجنينه اتنفست صبا وحمدت ربنا انها مغلطتش🙈
...............
وصلت ميار عند فاطيما ونور
فتحتلها فاطيما سلمت عليها وبعدين دخلوا جوه مع بعض.
فاطيما.....تشربي ايه
ميار....لا ولا حاجه مش عايزه والله
فاطيما....اخلصي انا مش بعزم عليكي انا هعمل نسكافيه
ميار....خلاص هشرب معاكي
سابتها فاطيما وراحت على المطبخ خرج نور من اوضته وقرب منها
اول ماشافته قامت عشان تسلم عليه
نور....ازيك يا ميار
ميار....بارتباك بعدت عينها عنه الحمد لله يا نور انت اخبارك ايه
نور....بخير اتفضلي اقعدي
قعدت ميار وهي مرتبكه من اخر لقاء بينهم وهي بتعيط
نور....ايه محدش جه معاكي ليه هما في الشغل.
ميار.....مش عارفه بس اكيد راحو
نور.....بإبتسامه ايه انتي عايشه في وادي وهما في وادي ولا ايه انتو مش عايشين مع بعض بردوا
جات فاطيما في الوقت ده
فاطيما.....تشرب نسكافيه يا نور
نور...لا لا مش عايز
قعدت فاطيما جنب ميار.
فاطيما....صحيح محدش جه معاكي ليه
ميار.....اااا اصل انا جايه من بيتنا معرفش هما فين بس اكيد في الشغل
فاطيما.....انتي مشيتي من القصر ولا كنتي بتعملي حاجه؟
ميار....لا مشيت امبارح ويعني هفضل في البيت
فاطيما....باستغراب ايه ده ليه في حاجه
ميار....بتوتر لعبت في شعرها لا خالص بس انا حابه ارجع البيت مش اكتر
بصلها نور وحس ان في حاجه غريبه اخر مره شافها كانت بتعيط وبعدها مشيت كان مستغرب بس محبش يتدخل
فاطيما.....اممم ماشي بس هتعرفي تقعدي لوحدك بصراحه انا مقدرش افضل في مكان لوحدي
ميار....والله يا فاطيما هي اول مره اكون فيها لوحدي خصوصا بعد جواز ملك بس هتعود اكيد
فاطيما.....المهم تكوني مبسوطه
ميار.....يارب
فاطيما....ها قوليلي بقى مستعده تساعديني
ميار...انا هنا عشان كده اولا لاني محتاجه الشغل اكيد مش هفضل من غير شغل ثانيا انا قولتلك اني مستعده اكون معاكي لما منذر يرجع واهو رجع
فاطيما.....تمام يبقى دورك جه يا نور وتعرفنا هنبدأ منين عشان نحاول ننزل من بكره
نور....تمام جاهزين
فاطيما وميار .....جاهزين.
بدأ نور يتكلم معاهم عن الشغل ويفهم ميار طبيعه شغلهم وبدأ يقولهم على الخساير اللي حصلت وايه الخطه اللي هيبدأوا بيها عشان يعوضوا خسارتهم
جابت فاطيما ورق كتير وفضل نور يفهمهم ايه دور كل واحد فيهم حتى هو لحد ما ربنا يكرمه ويقوم بالسلامه وقرر انه هيشتغل من البيت ويساعدهم على قد ما يقدر ويحاولوا ينقذوا ما يمكن انقاذه.
بعد حوالي ساعتين
نور.....بس كده انا خلصت في حد عنده سؤال
فاطيما....انا لا فهمت خلاص
ميار....وانا كمان تمام
نور.....لازم تعرفوا اننا يعتبر هنبدأ من الصفر يمكن الشركه هنا موجوده و شغاله بس مش عايزين ننسى انها اتأثرت باللي حصل عشان كده عايزين نعتبر اننا لسه بنبدأ
ميار....متقلقش ان شاء الله هنقدر
فاطيما.....لو فضلنا مركزين على الخطه دي يا نور يعني. ممكن ست شهور بالظبط ونقدر نقول اننا نجحنا في اول خطوه والدنيا بدأت تستقر صح
نور....صح بس عشان نحس بالاستقرار ده يا فاطيما محتاجين سنه كامله مش ست شهور بس يمكن اول ست شهور هنحس بالفرق لكن امته هنحس اننا رجعنا نقف على رجلنا بعد سنه
ميار....هنقدر ان اشاء الله وانا عن نفسي هعمل كل حاجه اقدر عليها
نور....انا واثق فيكم ولحد ما اقدر اقوم من تاني على رجلي هتابع معاكم على قد ما اقدر ومش هسيبكم
ميار....طيب ممكن سؤال
نور....اكيد
ميار....هو انت مش المفروض تعمل جلسات علاج طبيعي
نور....المفروض كنت بدأت من يومين بس لسه مبدأتش
فاطيما.....لا ماهو انت لازم تبدأ بقى خلينا نرتاح وترجع تقف معايا يا نور
نور....هعمل كده متقلقيش المهم اي حاجه تقف قدامكم تعرفوني وهنظبطها مع بعض انا هعتمد عليكم وعارف انكم هتقدروا
فاطيما.....متقلقش احنا قدها صح يا ميار
ميار....صح يا فاطيما.
فاطيما....طيب انا هقوم بقى اظبط الاكل عشان هموت من الجوع
بص نور لميار وبعدين وجه كلامه لفاطيما.
نور....ما تكلمي العيال كده لو فاضين او قربوا يخلصوا شغل يجوا ونستناهم نتغدى سوا.
ارتبكت ميار اوي وبقت مش على بعضها.
فاطيما....طيب تمام اتصلت فاطيما بامير وفضلت تتكلم معاه وبعدين كلمت فرح وقفلت.
ميار.....ااا طيب انا هقوم بقى اروح انا يا فاطيما.
فاطيما....لا تروحي ايه احنا متفقين امبارح هتفضلي معانا ونتغدى سوا
متبقيش رخمه
ميار....معلش خليها مره تانيه
فاطيما....والله هزعل منك وبعدين مش كفايه العيال الرخمه دي مش جايين
سكتت ميار وخدت نفسها.
نور كان مراقب كل تصرفاتها.
نور....مش جايين ليه؟
فاطيما....بيقولوا لسه عندهم شغل كتير وكمان صوتهم مش طبيعي حاسه ان فيهم حاجه.
نور....انا هبقى اكلمهم اشوف ايه يلا حضري الاكل
ميار....طيب هاجي اساعدك
فاطيما....لا خليكي كل حاجه جاهزه هظبط بس انا الدنيا
ميار....اوك
قامت فاطيما وسابت ميار ونور فضلت باصه بعيد وبتلعب في ايدها ومش راضيه تبصله.
ضحك نور ضحكه هاديه.
بصت ميار عليه باستغراب 🙄 في ايه
نور.....اقولك ولا هتزعلي
ميار...بإبتسامه لا قول هزعل ليه؟
نور....بصراحه حاسس انك مش طبيعيه😂🙈🙈
ميار....مجنونه يعني😂
نور....يعني🙄
ميار....طيب ليه
نور.....يعني شويه احس انك بتحبي الضحك والهزار وشويه احس انك دراما كوين🙄
ميار.....انا دراما كوين خالص والله😂
نور.....امال كنتي بتعيطي ليه؟
بصتلوا وسكتت
نور.....مشيتي ليه يا ميار من القصر حد زعلك؟
ميار....بارتباك ااا لا انا قولت اني مشيت عادي
نور....لا يا شيخه🤨 ده باماره ما ارتبكتي وكنتي عايزه تمشي لما قولت لفاطيما تتصل بالعيال يجو
ابتسمت ميار بلغبطه وبصتلوا
ميار....اه انت كنت قاصد بقى وبتفوق عليا صح🙈
نور....بضحك يعني حاجه زي كده قولت اتسلى بدل ما انا مش لاقي حاجه اعملها😂
ميار....ويوم ما تتسلى متلاقيش غيري😂
نور....طيب بجد قوليلي على فكره انا رخم وهفضل ازن
ميار....لا ماهو واضح😂 بس عادي كنت مخنوقه شويه مش اكتر
نور....العياط ده كله مخنوقه شويه امال لو حد مات هتعملي ايه🤨
ميار....عادي بقى بس صدقني مفيش حاجه
نور....وانا مش مصدقك بس هعديها اصل اللي يسمعك وانتي بتعيطي بالشكل ده بعد ما كنا بنضحك ومبسوطين وبعدها تمشي من القصر وبعدها تتلغبطي لما تعرفي ان العيال ممكن يجوا مش هيقول غير حاجتين لا حد ضايقك بكلمه منهم ودي استبعدها لانها محصلتش قدامي أو.....
ميار.....او ايه؟؟
نور....لا بلاش 😂😂
ميار.....لا قول
نور....طيب ولو طلعت صح هتقولي ان معايا حق ولا هتكدبي
ميار...لا هقول الصراحه.
نور....مش هتزعلي🤨
ميار....بضحك مش هزعل عشان ميتهيأليش انك هتعرف السبب😂
نور....امممم بتاخديني على قد عقلي يعني
ميار....حاجه زي كده😂🙄
نور....ماشي طيب جاوبي بقى
ميار....اتفضل أسأل😂
نور.....بتحبي مين فيهم يا ميار جلال ولا امير🤨
بصتلوا ميار وبدأت ضحكتها تختفي بهدوء وسكتت💔
نور....ايه عرفت السبب مش كده؟
ميار....اااا اكيد بحبهم هما الاتنين
نور....احنا اتفقنا على الصراحه وانتي عارفه ان ده مش قصدي🤨
ميار.....ااا مفيش حاجه من اللي في بالك دي يا نور امير وجلال زي اخواتي💔
نور....لو حابه تخبي حقك بس عياطك ده و بالطريقه دي تقول ان في حد فجأه بعد ضحك وهزار موقف معين يحصل تقومي بعدها و تنهاري بالشكل ده غريبه
ميار....موقف ايه؟
نور....نفس الموقف اللي انتي شوفتيه و قومتي بعديه انا شوفتوا يا ميار جلال ورهف مش كده؟
بصتلوا ميار بحزن💔 وسكتت.
نور....كنت متأكد
ميار....أرجوك يا نور بلاش تقولوا حاجه جلال ميعرفش🥺 ولازم تعرف اني مشيت مش عشان زعلانه منه خالص انا مشيت عشان ده الصح مش هقدر افضل هناك على الاقل الفتره دي لحد ما ابقى افضل ده مش ذنبه دي غلطتي انا مش هو🥺
نور....اكيد مش هقول يا ميار بس ليه بتقولي انها غلطتك عادي بتحصل والحب مش عيب وجلال طيب وجدع ويتحب يمكن الظروف هي اللي مجمعتش بينكم بس ده لا عيب فيه ولا غلط منك فا ليه بتقولي كده؟
ميار....لما بتخرج من تجربه حب فاشله مينفعش ابدا تدخل غيرها بسرعه لانك مش بتبقى لسه عارف انت عايز ايه وده اللي حصل مني مع جلال للاسف يا نور انا اللي غلط لاني تقريبا بحب بطريقه غلط ومش بعرف اسيطر على مشاعري عشان كده لازم ابعد واعرف انا عايزه ايه لاني اكتشفت اني فاشله في قصص الحب دي خالص.
ضحك نور وانا ياستي مستعد اساعدك وابقى المدرس بتاعك في ماده الحب
ضحكت ميار وبصتلوا🙄
نور....لا ميغركيش اصل انا كنت زمان استاذ وليا سوابق كتير بس قبل ما يحصل اللي حصل في رجلي خلاص بقى راحت عليا بس ممكن اديكي دروس واول ما تقعي في شاب كده من الاخر اقولك تعملي ايه عشان ميطفش منك😂😂
ميار....ماشي اتفقنا بس على فكره انت هتخف بردو وترجع تاني بلاش تشاؤم
نور....سيبك مني خلينا فيكي الوقت وبقول ايه لازم تعرفي انا مادتي فيها نجاح وسقوط😂😂
ميار....يبقى هاخد صفر ربنا يستر😂🙈
ضحكوا الاتنين واتفقوا يبقوا صحاب ونور يكون الاستشاري العاطفي ليها❣️
......................
مر حوالي ثلاث ايام
في خلال الثلاث ايام دول
ميار نزلت هي وفاطيما وبدأوا شغل ونور كان بيشتغل من البيت وهو كمان بدأ جلسات العلاج الطبيعي وعرفروا اللي حصل لزهره وزعلوا جداً وعرفهم امير انهم ميقولوش قدام جنه.
الشباب كلهم بدأوا تنفيذ خطتهم مع علي وعاصم و بدأ رجالتهم تراقب كل تحركات هاني اخو طارق.
زهره حاولت تاخد من الحب اللي هي شيفاه طاقه ايجابيه عشان تبدأ رحله العلاج بس مقدرتش ويوم عن يوم حالتها النفسيه كانت بتسوء مكانتش بتخرج من اوضتها خرجت مره واحده بالغصب من قاسم عشان يكملوا باقي التحاليل وياخدو عينه من الورم واللي زود حالتها سوء انهم اكتشفوا ان في بؤرتين من السرطان حجمهم مش كبير لكن اتصدمت مره تانيه ورفضت انها تبدأ جنه كانت هتتجنن وتعرف في ايه وليه زهره نفسيتها بتسوء لكن محدش كان بيقول اي حاجه💔
عاصم كان بيحاول ميسبش فرصه غير وهو بيقرب من فريده يكلمها يخلي مليكه تسلم عليها وطول الثلاث ايام كان تقريباً بيهتم بيها بشكل ملحوظ
ومع كل يوم تخرج فيه الصبح فريده لشغلها او ترجع تلاقي على بوابه الڤيلا ورده متعلقه وملزوق فيها ورقه مكتوب عليها لوكا بتبصح عليكي لوكا بتقول تصبحي على خير.
ومع كل ورده ورساله تبتسم وتفرح❣️
كانت حاسه بلغبطه ومستغربه الاهتمام لكن مكانتش مضايقه ولا معترضه.
خلود رغم فرحتها بالتكريم لكن قررت متروحش عشان الظروف اللي هما فيها
لكن راجح وروح صمموا انها تروح لما عرفوا حتى قاسم طلب منها تروح وتحضر الحفله اللي كانت هتتعرض على التلفزيون يمكن زهره تفرح وتتفائل شويه وعشان كده وافقت.
اما عن منذر و مريم وشمس
طلبيات الشغل مره واحده مكانوش ملاحقين عليها وفكرت مريم في فكره جديده عجبت منذر جداً وقرر ينفذها على امل انها تنجح.
جنه وهشام قربوا من بعض بدون مقدمات والسبب اللي كان حاصل لزهره واحساسها ان الكل مخبي عنها حاجه ومكانش في حد قدامها غيره تتكلم معاه رباب عرفت اللي حصل لكن هشام معرفش بسبب انشغاله في شغله ومحصلش اي فرصه انه يعرف منها او من صحابه لكن كان بيحاول يطمنها على قد ما يقدر لانها كانت مضايقه وقرر يعملها مفجأه ويروحلها المعهد
اما عن زيد فا قرر ينزل الشغل بعد تحسن حالته وبالفعل نزل.
ملك بدأت تهدأ شويه وتقتنع ان اللي ميار عملتوا هو ده الصح راحتلها هي وياسين يطمنوا عليها واتبسطت جدا انها اشتغلت مع فاطيما ونور❣️
فشل قاسم انه يقنع زهره وحالتها النفسيه كانت مأثره عليه بشكل مش طبيعي طول الوقت ساكت وحزين خصوصاً لما الدكتور قاله لازم تبدأ علاج وهي نفسياً مستعده مينفعش توافق على العلاج وهي بالضعف ده النتيجه مش هتبقى في صالحها مكانش عارف يعمل ايه ومحسش بنفسه غير وهو قدام السنتر بتاع فريده💔
اتصل عليها وخرجت اول ما عرفت انه بره.
فريده....ازيك يا قاسم
قاسم....بخير يا فريده اسف لو عطلتك
فريده....انت كويس يا قاسم؟
قاسم....لا يا فريده مش كويس
فريده...في ايه يا قاسم لسه انت وزهره محلتوش اللي بينكم بردوا قاسم زهره بتحبك وانت عارف ده كويس
قاطعها قاسم وبصلها بحزن
قاسم....فريده انا لو قولتلك ان زهره في امس الحاجه ليكي هتقفي جنبها ولا مش هتقدري💔
فريده....بصتلوا بصدمه وقلق زهره في امس الحاجه ليا انا؟ مالها زهره يا قاسم فيها ايه؟
قاسم....زهره عندها كانسر💔 ورافضه العلاج
بصتلوا فريده بصدمه وحطت ايدها على بوئها
قاسم.....محدش هيقنع زهره غيرك يا فريده يمكن مش من حقي اطلب منك الطلب ده ويمكن كمان لو رفضتي بسبب زعلك مني او منها مش هقدر الومك💔 بس لو زهره جرالها حاجه يا فريده انا وولادي هنضيع من غيرها.
فريده....بوجع ودموع وديني ليها ياقاسم 🥺💔
ابتسم قاسم براحه وهز راسه لفريده.
وللحديث بقيه...
أنتظروني في اخر بارت 🔥🔥🔥🔥🔥
•تابع الفصل التالي "رواية احفاد الطوبجي الجزء الثاني 2" اضغط على اسم الرواية