رواية صوت من المجهول الفصل السادس و العشرون 26 - بقلم زينب ماجد

    

رواية صوت من المجهول الفصل السادس و العشرون 26 - بقلم زينب ماجد

جرني من شعري ويكلي : تكسرين موبايلي بوجهيييي لجن اتكسرييين موبايلييييي

دفعت : واذا عاجبك اكسررررك وياه اكلك باسنوني كاسرني تفكر بكسرة المووووووبايل كلي منو هااااي

– دتعاي من انعل اليوم

هو هجم عليه يرد يكتلني ويسبني واني ذبيت روحي عليه واكوله : تنعل منو تنعل منو

يجر بشعري ردت اعض ايده ما عضيت غير طرف اصبع بس صارت بقوة

نفرني من عنده وراح ينكث بيده : لج انت اتخبلتي شنو جلب

– تكلي هاي شيختهم منو اللي تحجي وياها !؟ احجيييي

احجي وادفع بيه

– لج بابا انت شنو واحجيلج اموري اتخصني انت خلك مرة بالبيت منطيج حقوقج وما مقصر وياج هاي تنلصمين مالج علاقة اني شريد ووين اروح

– شنو هي الأمور اللي تخصك احجي تعبتني احجييي لك شقصرت وياك بشنو اذيتك فد يوم غلطت عليك على امك على واحد من اهلك شو شايلتكم كلكم وما فد يوم فتحت حلكي على اسبوع تجازيني

– اجازيج ليش انت شعليج اني رجال صوتي براسي اسوي اللي يعجبني لا انت ولا غيرج يفرض لو يملي عليه شسوي وشتصرف

– اذا انت رجال اني شنو مالي احترام

– منو الما محترمج ومنو مقلل احترام

– ايوب منو هاي الكاعد تحجي وياها

– للمرة الأخيرة اكلج مالج علاقة التهي بامورج وابيتج ودراستج وما تدخلين بيه .

– ما ابقى وياك

– انت مفكرة الطلاك على كيفج !؟ ما الج طلاق غصبا ما عليج تتحملين وتكعدين وتنجبين هنا وصوتج ما اسمعه

– فوك غلطتك تهين وتغلط وتريدني اصبر غصبا على منو .. لا والله ما اكعدلك .. وانعل ابو اللي تكابل كوا*** ك

كمت اريد امشي سحبتي من شعري : اني *** اكو طايحة الحظظظظ تغليطين عليييييه

– دوخر مني فوك شينك كوات عينك وخر منيييي

هو يجر واني اجر .. فلت ايده من شعري .. اختل توازني وانردمت بالكاع وكعت

دنك يشيل بيه بسرعة ضربت ايده : وخررر منيييي اني الك وخر

– لح بابا ما اريد اذيج كافي .. اعقلي واركزي

– متريد تأذيني وانت مسيبها ويا شيختك

كمت ادفر برجليه وهو يحاول يكومني

: من خرب بيومها اذا صدك

لزم براسي حيل : لا تجاوزين عيب لا تجاااااوزين اني مو بكدج

– وخر مني لا تلزمني

– ماشي بس اهدي

– وخر

اتجى ع الجرباية وكمت من مكاني طلعت جنطة جبيرة

حجه : شدسوين لا تحلمين اخليج اتطلعين ما اتطلعين

– اضل لمنو حتى تجيبلي الثانية وتحطها فوكي

– ليش شنو حرام لو عيب اني لا هاينج ولا ذالج ومنطيج التحلمين بيه وازيد مالج كلمة عليه

– يعني حاطها براسك .. هاي اذا ممسويها اصلا انت متزوج عليه

دار وجهه : اعقلي واكعدي غفران نشفتي ريكي تعبتيني

– جاوب لا تتهرب انت متزووووج عليييه

– اتزوج ما انزوج يخصني بابا اني رجال يحقلي كلشي مثل ما منطيج كامل حقوقج وازيد عليهن

– انت شدا تحجي شدا تصفط .. اني تتوقع اخليك تتزوج عليه

– اخليك شنو .. ليش اني تمشيني انت وبعدين هاي اليوم اخوج خطب اختي زوجة ثانية على راسج ريشة انت لو شنو حلال الله ومحد متعدي على احد

– اي مبروك عليك الحلال .. اما اني فحتى الدين ما اريده متنازلة بيه الك ولاشكالك

– لج بابا انت مرة حامل ليش تخليني اكوم اكسرج ليش تتجاوووووزين

– ارتاح لا تكسرني ولا اكسرك

كمت اشيل بغراضي واحط بيهن بالجنطة

لزم عكازته وكام جر الجنطة كتله : انطيني

– لج ابويه اهدي لا تتخبلين وين تريدين

– لاي مكان ما بيه انت

– اي روحي انزلي جوا اهدي .. عمي اني اطلع منج بس اهدي طفل ببطنج لا تأذين روحج

– دجيييييب

جريت الجنطة من ايده غصب حطيت كتبي وغراضي

حجه : اذا طلعتي والله حتى من الجامعة احرمج وتعرفيني كلمتي طايلة عليج وعلى اهلج

انداريت له : جامعتي التذلني بيها اخذها الك اتهنى بيها انت وشيختك اني ما رايدة غير الفكة منك

– اي غير كون مقصر وياج شنو الردتي لو طلبتي وما كلت لبيه كافي مزعطة غفران واعقلي

– لا اريد العقل ولا اريد الدين ولا اريد الجامعة ولا اريدك

وخرته مني وجريت الجنطة وسحبت ربطتي وعباتي

كام يجر بيهم : لا تتوقعين اخليج اتطلعين والله ما اخليج

– ضالة عليك وعلى شيختك ..

احجي واني اشد بربطتي .. وخطر على بالي اتذكرت

شيختهم .. نادية !؟

– ذبي العباية واكعدي

– لك اني شكد غشيمة اقسم بالله غبية وغشيمة ومصدكتك تريد تنسى .. يا اخي اكرهك والله اكرهك .

– اي ميخالف اكرهيني بس رجعي لمكانج

– وخر من الباب

– لا تخلين صوتنا يطلع غفران عيب ما تسوى اكعدي

– منو الما تسوى اني

– المششششششكلة ما تسوى

– لا اني اللي ما اسوى من تهونها وتحسبها هينة اني اللي ما اسوى مو المشكلة ما اطيقك كوة هي يا اخي ارجعلها مبارك عليك تناسبك هو انت هيج ينرادلك وحدة بايعة .. اني مو ثوبك

– اكل **** واكعدي

– وخر

– دا اكولج اكعديييي

راد يجرني وخرته من عندي حيل وهو ع العكازة راد يوكع جريت ايده

هو لمني بحضنه بسرعة : ولج والله احبج لا تكبريها غفران اكعدي وشتريدين يجرالج .

– طلكني

– وج شطلكج ابني ببطنج يا طلاك دهدي يا ابويه

– وخر من عندي ترا مو طايقتك كلش

– ميخالف هاي وخرت بس اهدي انت شنو اللي تريدي

– الله اريده تكولي شعندك وياها

– ما عندي شي

– تمام استمر بجذبك وبالعافية عليك شيختك

جريت روحي من عنده راد يلزمني قبل لا اطلع من الغرفة

فتحت الباب كام يصيح ويغلط : وانعل وافعل اذا اتطلعين غفرااااان لا تخليني اذيييج ارجعي لهنااا

عفته جر عكازته واجا

اني نزلت خالتي تلكتني : شكو يمعودين شصارلكم صعدتوا حبايب نزلتوا متمالخين غير نفتهم الصاير

– خلي ابنج يفهمج على شيخته اليريد يتزوجها مدري المتزوجها ما ادري عنه

– يا شيخة انت وين رايحة

– عوفيني خالة ما ابقى هنا والله

– دهدي يا بنتي اهدي هالمشاكل تصير دنزعي نزعي

– خالة الله يخليج وخري من عندي

نزل هو صاح : امشي كدامي اصعدي لا تخليني بهالعكاز اكسرج والله

صاحت امه : تايهتلك تكسرها وخر منها اني اصعدها

– ما اصعد اني ما اريده .. خلي يطلكني خلي يعتقني لا اريد جامعتي ولا اريد خير من عنده اريد روحيي انطووووني روحه الحركتوها انطونيااااها

– يا منو اليحرك روحج اسم الله بتي شصارلكم طب الشيطان بيناتكم سلام قولا من رب رحيم

هو يصيح واني واكفة بالمطبخ اريد اطلع

وخالتي واكفة بيناتنا ما تخلي يطخني .. سرى ونجلاء ونبأ كلهن اجن

سرى تجر بيه واني اوخرها وهو يصيح ويكل لامه : اذبحها اذا طلعت منا

– وشلون نظل هيج هي معاندة تطلع وانت ما تخليها ..

– ما اوديها وغصبا ما عليها تكعد فوك وتنجب

– انت تريد تذلني عود ما ارجع

– لا تخليني اشوفج المذلة على اصولها … رجعي

حجت امه : كوم وديها لاهلها خليها ترتاح مرة محترك كلبها .. وديها واني باجر اروحلها بنفسي اجيبها

بقى يحاول يصيح يردني ارجع ..

كارهته وكارهه صوته وبودي ازوع من اباوع وجهه ..

حجه : امشي من انعل الساعة السودة الشفتج بيها امشي

طلعت كدامه هو دز سرى ع السويج جابته واجتي

طلع وياي صعدني بالسيارة كعدت ورا حجه : كومي اكعدي ليكدام المنطقة منا لا اتطلعين صوتي

-امشي

-مو سايق اهلج اني كومي كعدي يمي لا والخلق محمد انزل وتحرم عليج طلعتج كووومي .

كمت نزلت وحولت بالصدر شغل السيارة

لا اني ولا هو حجينا بس نار تغلي براسي

اتذكره قبل ساعتين من فتحلي اديه وماخذني بحضنه ويمس على شعري كل هذا تمثيل !!! كل حبه وحنيته حتمثيل .. لعبت نفسي بودي العصمة بيدي واطلك روحي منه هسه ما طايقته .

وصلني لبيت اهلي وما نزل طلع كبل

فتت امي وعلي كاعدين عقدوا حواجبهم : ها شو رجعتي

ذبيت جنطي وكتبي وعباتي وربطتي كلهن على فراش امي ورفعت رجلي افتح بقيطان حذائي .. حجت ؛ شصاير ولج وجهج ما يبشر بخير متعاركة شصاير

– كل الخير بنص الخيييير

شمرت حذائي ولبست نعال امي رحت للحمام سديته ورفعت ارداني غسلت اديه وكمت اتوضى احس روحي كاعد تشب نار لو بودي احرك روحي

كملت الوضوء ومسحت وجهي بالخاولي واباوع لروحي

انكسر خاطري على روحي مصدكة يحبني وساندني وهو طلع متزوج مدري يريد يتزوج ومحاطني بباله اصلا شكد غشيمة

كمت ارجع اذب المي على وجهي رشك اريد ارتاح

دكت امي الباب : هسه غير اتطلعين نفتهم شبيج يا يمة

فتحت الباب واني اجر الخاولي حجت

-منكعة روحج يا بتي والدنيا شتا صدك تحجين تجذبين

جرتني ودنتني يم الصوبة كتلها : اريد اتطلك

صاحت : اسم الله الرحمن من هالطاري شصايرلج بتي

– الصايرلي رجلي عنده شيخة وحاطها جوا ايدي ويكلي تاكلين خ*** وما تدخلين اني زلمة وبكيفي

علي : وعلى هاي جاية

-انت سهمك الراحة خوية فدوة لعينك لا تدخل بيه ولا الك علاقة بيا

– دكلي **** طايحة الحظ اذا اني المالي علاقة ياهو الاله علاقة شنو سايبة

– اني هلا بيك طلكني

– واطلكج شسوا

– ما اريده

– لعب هي ما تريده رجال الاحسن منج والاجمل منج يركضن وراه وهي تصيح ما اريده

– بالعافية عليهن .. اني ما اريد الاحسن والاجمل مني عووووفووني

– عوفوني شنو يعني انت هسه جاية تريدين طلاك

– اني اتطلك ما اظل اقلاها اكعد اباري امي اتعبلها اكسب بيها الجنة غيرها شمحصلة منهم غير مطلعيني من ديني بافعالهم

– دخابري رجلج خل يرجعج واعقلي

– علي حبيبي تريد عائلتك وتريد بيتك هاهية بعد لا تفكر بامي انسى كلام ايوم وارجع لمرتك وامي اني اتكفلها

– غفران احترمي نفسج لا ادوس ابطنج والله

– ما اريده زوجتني منه غصب عيشيتي وياه هم غصب كافي حل مني والله دمرتني عووووفني

كتله هيج لو هذا اتخبل صياح عليه كاملي ودفرني بزري احس رجلي اشتعلت نار .. ولزمني من شعري يجر بيه ويضرب واني تصرخ وتلطم على وجهه وتريد تجرني منه

سحبت روحي منه وكمت اصيح وابجي : ما اريده ما ارجعله والله لو مو تكطعني لو تشرب من دمي ما ارجعله ماااا اريده

راح جاب الصونده واجا يكلي : عندي وحدة تطلك غير ادفنهااا

وكام عليه بالصوندة جلدني جلد وامي تصرخ وتجرني بيه

واني اصرخ ويا كل ضربة

كامت امي تلطم وادك على وجهه وتكله ولك حامل البت لو سقطت شتكوووول عوفها ، عافني وطلع من الغرفة وهي تصيح : الله لا ينطيكم عوفني وعوفوا بنيتي الله لا ينطييييكم

اجت اخذتني بحضنها اني اشهك من البجي بحضنها وحاضنتها حيل وهي تكلي : ليا ضيم ترجعين ولج اني امهم ما خلصانة من نذالتهم تريدين لضيمهم من خر* بهيج خلفة ساعة السودة الخلفتهم وجبتهم يا ريتني متت كبل لا اجيب واربي هالجلاب هاي

هو مخابر على ايوب كايله : حجي اذا جايبها تريد اتطلكها احنا ما عدنا مرة تطلك ويا ريت ترجع تاخذها لان اذا بقت هنا ما اخليها والله

ايوب فار السيارة وراجع

اني بعدني بحضن امي اشهك وهي تمسح على راسي

جان ما نحس الا الباب ما غرفة امي تندك وصوت ايوب يكول : ياااا الله

وفات للغرفة باوعني امي كامت من حيلها جرت ربطتها

حجه : شصاير

خالتي : ماكو شي خالة خوان وتعاركوا

– وينه علي ؟

– ما لكيته ؟

– كاتلها شنو !؟

-تعاركوا

تقرب مني وكمبص كبالي وولزم حنجي يريد يباوعلي

جريت روحي من عنده : عوفني ما اريدك عوووووفوني والله احرك روحي عوووفوني

-خالة شمسويلها وينه هو وينها

-خالة اتجاوزت عليه وهو ما تحمل وتمالخو

-صارلها ساعة تتجاوز راشدي ما طخيتها يكتل مرتي وهي حامل لو واكع ابني ابالج اعوفه والقرأن ادفنه

دفعته من عندي وكتله : لو واكع ابنك المرجعك عليه ابنك اني بفلس ما تشتريني طلكني انت ما عندك احساااااس جاي اكلك طلكني

-كومي امشي وياي

– من كل عقلك اكولك اني ما اريدك طلكنيييي

-اي اطلكج هناك كومي

حجت امي : عوفها ترتاح الليلة

صرخ : شترتاح مجنزها شوفي حاله بلغي لابنج والله وين ما اشوفه لا املص راسه واعلمه شلون يمد ايده على مرتي

كام وجرني كمت اجر بروحي منه : مالك علاقة بيه البكلبي منك مأذيني اكثر منهم كلهم عووووفني

كام يسحب بيه بقوا واني اجر بروحي

كامت امي تصيح : بس اوكفو خالة راح توكع انت

-جيبي عبايتها

-ميخالف بس خلي اقنعها

صرخت : ما اريده عوفوني اكلكم ما ارررريده

امي كام تتوسل بيه بس يعوفني علمود يقنعني

عافني وطلع وهو يكللها انتظرها بالسيارة

حجت امي : وين تريدين تظلين لمدكتهم هالكفار ولج يا اقلها رجلج بيه خير ويخاف الله بيج وما يأذيج جرعي المر واوكفي على حيلج ولا تخلين اخوتج الغمان يكسرونج

-ما اريده يمه ما اجرع روحي وياه كلشي منه كارهته كل حنيته هاي تمثيل والله تمثيل ميحبني ما اريده

-مثلي جا مثلي انت وياه ومشي امرج يا يمه تضلين هاي حالتج شتجنين غير دموعج والله يا يمه يبطلونج ويذلونج

-فترة اتحملها وتعدي بس ايوب ما اتحمله ما اريده

-وربج مو فترة اخوتج كل ما ضاجو مني ومن حملي يذبون حركتهم بيج واني ما اتحمل والله اطك واموت لو صار بيج شي

– ما اكدر خليني اتحمل كلشي بس ايوب ما اريده

– ييييه ترا جزعت منج كافي اني امج ما اريدج ولي لزكة لازكة بينا خوما لزكة حسي على روحج وولي احير بروحي لو احير بيج ما صايرة هاي

راحت جابت غراضي وشمرتهم عليه وهي تكلي : ولي الرجلج ما اريدج

كمت اباوع عليه : حتى انت اتطرديني

-اي اطرج ما اريدج زور لو كوة زوجتج وخلصت منج ترديلي مطلكة لا والله ما احملج اطلعي يلا وروحي ويا رجلج رلا تجيني بعد

ضليت اباوع على امي ودموعي تجري

كمت من حيلي لبست الربطة والعباية واخذت غراضي وصعدت

ضل يباوع بوجهي ، حجه : لا حول ولا قوة الا بالله

حرك السيارة وصف اشترالي عشا لفات وبيبسي وحلويات

انطانياهم ما انتبهتله ولا درتله

حطهم ورا وصعد وصلني للبيت ودخل وياي

ردت ادخل من باب المطبخ جرني : منا

ما اريد اشوف خالتي واعيش الفشلة بوجهه استحي طلعت زعلان وكتلوني اهلي ورجعوني اله صعبه جريت ايدي منه : شنو تريد تذلني انت وخر مني

-اذلج شنو دمشي لج

دفعني على باب الاستقبال لو بودي اذبحه

دخلت للاستقبال حجت خالتي : ها رجعتوا

حجه هو : جا وين نروح فررتها شوية لحد هدت طناكيرها ورديتها .. اصعدي

تركتهم وصعدت

مديت سجادتي وصلتين ركعتين لرب العالمين وكعدت اتحسب عليهم كلهم وابجي لربي واكوله يتيمة ومالي غيرك خلصني اني تعبت منهم ملهم خلصني والله تأذيت ربي ساعدني لتعوفني ارجوك

سجدت بين ادين ربي ومثل عادتي ما انفجر بقهري وبواجيي غير بين اديه بجيت بدون ما انطق ولا حرف بس ساجدة وابجي وجسمي كله يهتز بواجيي

سمعت الباب انفتحت .. كطعت بسرعة

وشلت راسي ايوب يباوع بوجهي ، حجه : تسوى كل هذا البجي والاذية اللي اتأذيتيها علمود رسالة !؟

كمت من سجادتي لميتها ووكفت بوجها : اذا بنظرك هاي مجرد رسالة بنظري كسران شعور خذلان ذل يعني كل تعبي وشعوري الك فراغ انت مو وياي وكلبك مو وياي وعقلك مو وياي

– غلطانة بافكارج حيل بابا ترا غلطة ما تسوى تتكبر

-من انعاف يوم عرسي وانهجر وتالي تاخذني بطريقة وحشية بظلمة حتى ما تشوف وجهي وتتذكر انت ماخذ غيرها اني اللي غلطة مو هي

وكت اللي ردت امشي حياتي وياك ونطلع اول طلعة لوحدنا وتشوفها ويطير عقلك وساعات تفتر وما تدري اني يمك يعني اني اللي غلطة مو هي

من اموت على بابك بالانعاش ويخلص حيلي ويوكع اللي ابطني وما اكعد اعوف الم روحي وانسى روحي حتى اجي اسهر على راسك واداريك وتلهج بأسم غيري يعني اني اللي غلطة ايوب مو هي .. مو هي

عفته ومشيت حطيت وجهي بين اديه وكمت ابجي

اندار هو وطلع من الغرفة ..

عمري ما مارة بهيج شعور

وكت اللي مات بابا انقهرت واتأذيت ما اكسرت بهالشكل

ووكت البطلوني وكسروني ما انقهرت هالشكل

كل المر بحياتي وكل شعور صعب عشته اهون من شعور تحط ثقتك بإنسان وتحبه وتالي تكتشف انت اصلا مالك قيمة عنده ومالي رأي ومو من حقي ازعل ولا حتى اعترض .. مجردة مرة

حيل يكسر هالشعور كاعد يكسر اضلاعي من جوا حيل

كسرني .

بقيت بفراشي منين ما اصفن اكره روحي

اخوتي .. لو خواتي المجرد ما شافوني وكفت على رجليه كامو يصيحولي متكبرة ويحبطوني لو امي الهجرت كلشي على مودها تالي تطردني لو رجلي اليكلي انت خلك مرة !

بقيت لامة نفسي .. وصافنة بدنياي بس كأني جثة هامدة

ننولد كلنا حب وكلنا طاقة ومحبة والفة وتسامح

ننصدم ننهان ننكسر ننهزم .. نتحول غير اشخاص

القهر يغير يحولك من انسان الى جثة بلا شعور

وعقل ما يصيح غير نفسي

تتجرد من كل مشاعرك

وتباوع لروحك فد غبي لأنك صرت طيب ويا ناس ما ينفع الطيبة وياهم

وتكره بروحك اجمل صفة حطها بيك ربك .. طيبتك

وانت بحالة عصبيتك وهوستك متحس بالم جسمك

بس من هديت حسيت بكل الاوجاع اللي بجسمي

دورت روحي اصبعي الوسطاني ورم وما دا اكدر اطخه

ما اتذكر شصارله لو شلون نضرب ..

كمت من مكاني نزعت ملابسي جسمي مشوه من الصوندات مال علي

مشطب واثار ضرب زرك مدري سود .. كلت : حسبي الله ونعم الوكيل

ومشيت اخذت دشداشة ولبستها ورحت لفراشي

اخذت تليفوني

رسايل من خواتي كلهن ضال بالهن عليه

وهديل كاتبتلي : امي ارتفع ضغطها عليج وعلي هسه اخذها للمضمد فرفحت عليج والله تكول طردتها وهذا حالها بس ردتها تخلص من ضيمهم

رجعت فتحت رسالة اسيل كاتبتلي : شبيج غفران شو امي مفرفحة عليج

متصلة خمس مرات ممجاوبتها كاتبتلي من تشوفين الرسايل ردي بالي يمج

نوره متصلة هواية

رجعت اتصلت بامي فتحت الخط تناشغ كتلها : اسوى نشغتج هاي خلي اولي ليش تهتميلي

-ولج بنيتي انت قطعة من روحي والله يا يمه ما طردتج ضايجة منج طرتج حتى اغصبج ترجعين وياه ناره ولا جنة هلج ولج يمه رجلج يرحم اخوتج اجلاب ما امن بيج يمهم

– اي هاهية ما دام امنتيني يم ايوب بعد عليمن قاهرة روحج اطمني عليه وريحي بالج

طمنتها عليه ورجعت

بقيت صافنة افكاري تاخذني وتوديني

راسي صار يأذيني حيل .. اخذت علاج ورجعت اريد انام بس وجع راسي ما فكني .. لحد ما ادري شلون غفيت وشون نمت وسط كل هالافكار والوجع اللي براسي وروحي .

صوت الأذان من التليفون صدع بالغرفة

حسيت بس جسمي ثكيييل .. باوعت نفسي .. هو نايم يمي صفح ووجهه عليه .. واني غاطسة راسي ويا جتفة .. كعدت من مكاني وهو تحرك ورجع على ظهره .. يريد يطفي التليفون .. الشاشة عطلانة مكسرة .. داس دكمة القفل وطفاه ..

ركبتي راسي جسمي كله مكسر تكسير .. ووجع اصبعي ذابحني ما اكدر احركه مورم اريد اكوم باردة تكتل الغرفة .. ومتأذية .. شمنومة يمي .. شوكت اجا ضوا الغرفة خفيف ع التيبل لام .. باوعتله .. شلون يكدر ؟ يحب غيري ويمثل عليه ! ؟

جنت اكول يريد ينسى بس طلعت غلطانة هو مو يريد ينسى هو يريد يقهرها بيه مثل ما قهرته واتزوجت .. وتعالوا ورجعوا .. وعادي مكمل ويايا ولا كأنه مسوي شي …

كمت من مكاني .. رحت صليت

دا الم السجادة كال : اتركيها اريد اصلي ..

كام من مكانه .. اني كعدت على طرف الجرباية

ذبحني الالم مال جسمي .. دخل فتح الضوا : صباح الخير

مجاوبته ..

وكف صلى وكمل كعد ديسبح تسبيح الزهراء كتله : الوضع ميبقى هيج لو اني لو انت يطلع من الغرفة

مجاوب كمل شمر السبحة وحجه : الليل كله جنتي تونين جسمج مأذيج ؟

– المأذيني وجودك كافي تمثل عليه .. وسويلنا حل

– الناس تكعد تكول يا فتاح يا عليم تكعدين تسولفين بالمشاكل ما كافي ترا انت المتأذية

-الجرح ما يوجع غير صاحبه لو اني الغلطانة جان كلت كافي مشاكل ؟

ما جاوبني طفى الضوا رجع لفراشه ينام

تركته وطلعت من الغرفة .. عندي امتحان محافظة منه شي

واذا غبت صفر .. ما ادري افكر بروحي لو بأمتحاني الضغوط اللي ابداخلي والافكار مخليتني تايهة ما اعرف لمنو اصد

بقيت بالساعة كاعدة .. جوا

صعدت اخذت كتاب مالي نفس اقرا ولا بيه حيل

اكلب بالصفحات .. نزل هو .. سوا جاي وريوك وكال : ما متغدية ولا متعشية البارحة مو زين ع الجاهل كومي اتريكي وياي

مجاوبته ولا باوعتله

حجه : من احد يحجي وياج ليش تتجاهلين جاي احاجيج يعني هم تريدين تموتينه ابطنج !؟

كمت من مكاني وصعدت

بقيت اجهز نفسي للدوام .. بدلت ونزلت كال : الساعة بعدها بالسبعة وين رايحة هسه !؟

اخذت السيارة وطلعت للدوام ب٧ ونص اخذت كهوة

بس كوة دا اوكف على حيلي خابرتني زهراء : ها وينج

-بالسنتر

-جايتج

اجتني باوعتلي ؛ اسم الله شبيج

تنهدت مجاوبتها كالت : صاير شي ؟

-تعبانة ومتأذية حيل ومقارية ولا حرف من الامتحان ومدا اعرف اضل لو ارجع

اتصل ايوب مجاوبته

دز رسالة : ماخذة السيارة غير اتكليلي عندي مؤتمر مهم برئاسة الوزراء بيمن اروح بت الاوادم

حجت زهراء : متعاركة انت وزوجج

هزيت راسي .. اي

اخذتني : كومي خل نروح للنادي نكعد كومي

كمنا اخذت كوب قهوة وكعدت احجيلها الموقف الصار

حجت : تدرين بيه من البداية يحب غيرج وسكتي ؟ شلون اتحملتي

-كلت يريد ينسى وخلي اسنده واعوضه واساعده يتخطى الصار وياه

-وتاليتج انت الرحتي بيها سودة عليه الخيانة صعبة ما اعرف شكلج بس اخوج شكد نذل يربي مثل العندي والله هم هيج جلاب

كعدت تسولفلي امورها ويا اهلها وشلون اخوها يكتل بيها وابوها ساكت وشكد متشددين لحد ما صار وكت المحاضرة كمنا رحنا اني وياها الورقة كدامي وصافنة بيها مكاتبة غير اسمي وزهراء يمي دا تكتب .. خلصت شافتني صافنة ظلت تراقب بالاستاذ يندار جرت ورقتي وبدلتها بورقتها وكعدت تحل بمكاني خلصت وهم بدلت الاوراق وسلمناها وطلعنا.

كالت : متريكة

– لا

-امشي نطلع نتريك

-مالي خلك ولا الي نفس

-غفو هيج راح توكعين احسج دايخة حيل

-ممشتهية شي وجسمي متذيني وايدي هايه دا تصل عليه

طلعتلي كرواسون من جنطتها : اكلي هاي

-ممشتهية والله

-ميخالف اجبري نفسج بداعتي والله تتمرضين وخطية طفل ببطنج

فتحتها وكامت تغصبني ع الاكل …

بقينا كاعدين بالسنتر ما دخلنا محاضرة ثانية بقت تسولف وياي وتحاول تطلعني من المود .. اجاها اتصال .. ردت تحجي ويا حبيبها وطولت بالسوالف وياه وكامت تروح وتحجي كدامي

اجا ساري .. صباح الخير

باوعتله .. مجاوبته

كال : اسف بس احسج اليوم مو على بعضج دا اراقبج من لما اجيت الصبح ولحد هسه ..

-اخي انت شرايد مني ؟

-ما رايد شي نتعارف نصير اصدقاء عادي

– متزوجة وزوجي مخبل اذا شافك حواليه يعدمك

-اعرف متزوجة وكاعد اشوف بعيونج حزن يذبح واعتقد هو سببه

– وانت منو وشنو وكاعد تحلل بعيوني اخوي ابوي رجلي اخي عيب اني لا احب اكعد ويا ولد ولا احب اصادق ولد فاحترم وكوم من عندي

-اعتذر اذا سببتلج ازعاج اني بس ردت اطمن عليه

-مالك علاقة بيه حتى تطمن .. كافي

كام من عندي ومشى وبعدها زهراء تحجي ويا حبيبها

اتصلت اسيل : ها غفورة شنو شصاير وياج غير نفتهم امي خلت بالنا يمج

– شصاير كل الخير

-منو هاي الكاعد يحجي وياها ايوب

-منو يعني

-عليج الله نادية !

سكتت : وعلي شبيه وياج شنو تخبل

-لا ما اتخبل بس يخاف لا تخرب سالفته الاخ مدسترها يريد ياخذ اخت ايوب وحس موضوعي يعرقل موضوعه بس وروحه لبابا ما راح اخلي هالموضوع يمر .. واعلمك يا علي

– شراح تسوين دعوفي يمعودة هسه رب ضارة نافعة ياخذله وحدة تكابل امي

– اكولكم انتم تريدون تحلون مواضيعكم براسي علي ياخذ اخت ايوب زوجة ثانية علمود ثاني يوم ايوب يحط نادية على راسي ..

– يعني ايوب لو راد ياخذ نادية راح يوكف بعينه شي

– اسيل بعدين احجي وياج ..

سديت الخط منهز صفنت .. اجت زهراء : ها غفو نمشي

– لا لازم ارجع للبيت

– هسه تروحين

– كلش تعبانة .. نلتقي

كمت منها ورحت للسيارة اتصلت بنسرين ردت : الو

– هلو نسرين

– هلو غفران خير شو صوتج مو على بعضه

-رجعتي لو بعدج !؟

-وين للشقة اي هسه اخويه وصلني

– علي يمج

-لا لحد هسه ما اجا كال عدهم مؤتمر بالخضراء مدري وين

– يعني انتم تحجون عادي !؟

-اي لعد شكو قابل غير رجلي تريديني ما احجي وياه

– مسافة الطريق واني يمج

-شصاير

– اجي ونحجي

دست بالسيارة ووكفت عند جنبر مال جاي واكف حجي كتله : اذا اريد اطلع لبسمايا منين الطريق

دلاني مشيت وكمت اسال واكمل لحد ما وصلت بساعتين

وكفت بالبوابة كالولي : الا احد من بسمايا

خابرت نسرين نزلتلي دخلت السيارة وهي تستفسر

صفيتها وكتلها : نصعد ونحجي

صعدت بوست الجهال وكعدت كالت : خير

-تصالحتي انت وعلي

– اي خابرني البارحة واليوم وما بيناتنا شي

-مجالج شي

-شي مثل شنو

-مثل انو هو خطب حماتي وايوب وافق والبنية وافقت

-منو الخطب !؟

ضليت اباوع بوجهه جانت واكفة وكعدت كبالي : غفران شجاي تحجين

-جاي احجيلج الديصير من ورا ظهرج

: مستحيل غفران احنا متزوجين على حب ولحد البارحة هو يغازلني واشونه ويايا

– ما اهم اشطر شي فالحين بيه التمثيل

ضلت تباوع بوجهي مصدومة : ما اصدك غفران عليج الله صدك

– تشوفين وجهي مال شقة !؟

-والله لحظة ما اضل على ذمته والله

-شنسوين !؟ تطلكين واتطلعين منها معلكة باثنين جهال وهو يطلع منها عريس جديد وعروس جديد وممنوع عليج تصيرين مثله وتتزوجين لان اطفالج يسحبهم بحجة ما اخلي جهالي يربون عد غيري .. ها الحل !؟

-مجاي اصدك راح اتخبل والله اذا صدك اكلب الدنيا عليه

-انطيتي الفرصة على طبق من ذهب حتى يزعل ويسوي اللي يريده بحجة بعنادج

-انت شرايدة مني شنريديني اسوي اسكتتتتت ما اسكت والله

-منو طالب منج تسكتين بس لو حجيتي محد راح يسمعلح كلها راح تكلج حقه انت كطعية ما تريدين امه وهو الحنين يريد اللي اتكابل امه واني احلفلج جذاب مرايد امي رايد مصلحته وحاط امي حجه

– وشسوي !؟

– السبب اللي يريد يتزوج شنو !؟ امه وحدها .. اذا راح السبب شبقاله !؟ وشنو حجته

– واترك بيتي واتهجول حتى يرضى

-شنو مفهوم البيت برأيج غرفة اخشاب ومطبخ وكاونتر لو اولادج وابوهم على راسهم يصرف عليهم ويكوم بواجبهم وواجبج .. اذا معتزة باثاثج وبينج اكثر من عائلتج حقج بس انت الخسران الوحيد من هالموضوع كله

كامت تبجي وتكول ما اصدك والله تعرفين شنو حب ولج ماخذين على حب وياخذ غيري

– انت اللي انطيتي المجال بهالحياة منحصل كلشي نريده

-ولهاسبب يتزوج

-سببج زين احجيلي اني السبب هجرته اسبوع

-انت شنو

– ما جايتج حبا بيج بس ايوب وعلي اثنينهم على نية وحدة واني وياج ضحيتهم

-ايوب اتزوج !!!!!؟

-الينطي اخته زوجة ثانية تعتقدين ما كاعد يفتحله باب حتى يمهد الدرب الروحه ..

-وشراح تسوين

-اجيتج حتى اشوف حل

-شحل .. اني شعر راسي وكف

– خربي الموضوع بالاول وبعدها يجي الحل

-وشلون اخرب

– تتنازلين وتروحين لبيت اهلي .. كاعد احجيلج رأيي وانت الج القرار لان ما اشوف ما كدامج غير هالخيار تخربين عليه وما تضله حجه يتزوج من بعدها سويها هوسة وتوبي وجري من هالطريق ولمي بيتج احس ما يروح جاهز لغيرج وانت تبقين بالمحاكم تركضين على نفقة لاولادج بلكي تحصليها منه

ما جاوبت كامت تبجي وتحجي وتصيح

وتكول انتو حطيتوها براسه وانتم السبب. كتلها : رجلي حطها براسه مو احنا .. والكل رحب بالفكرة .. احجيلج الصراحة لإن كلنا دندور حل لامي بس الظاهر شافوا الحل براسي وبراسج

بقت تبجي وتصيح وتحجي ومثل حالي البارحة

كتلها : وضعج هذا وضعي لبارحة الهالسبب اني يمج .. اني اللي عليه اجيت بلغتج وبعد انت حرة شتتصرفين .. اني لازم ارجع ما اكدر اتأخر

ردت اكوم كالت : انت رايحة وين لاهلج

– ليش

– اذا رايحة اخذيني وياج والله اكلب الدنيا عليه اني اخلي المي تجري من جواي ونايمة والله لا العب بيه جولة

– كومي

كامت لبست جهالها وبدلت وقفلت شقتها وطلعنا

اخذتها ورجعت وصلتها لباب بيت اهلي نزلت هي .. واني طلعت بطريقي

احس دخت .. طفيت السيارة ووكفت رجعت راسي للستيرن ما اعرف الجاي اسوي صح لو لا .. بس اكو نار بروحي مجاي تطفى ..

سيارات زفة وشايلة علم واغنية : يلا شكراً للحشد والايدوه هو هو هوهو

والشوارع محتفلة بأعلان بيان النصر اللي صدر من رئاسة الوزراء بتحرير كل اجزاء العراق من فلول د١عش

مبارك ع العراق انتصر واحنه الخسرنا

خسرت ابويه المحد يسد مكانه واللي لو ما د١عش وهو بخير جان كل هذا ما صار بيه .. لا اخوتي يغصبوني ولا اتزوج ولا اشوف الزواج والمسؤلية بهالعمر جان هسه اني اميرة زماني لو بابا موجود .

باوعت التليفون يلمض ..

ايوب متصل ٩ مرات وكومة رسايل ما فتحتها .. الساعة ب٥ المغرب

اخذت كيكة وعصير من الطريق حتى اوازن ضغطي واكدر اكمل سياقة

وصلت للبيت الساعة تريد تصير ب٦ .. والدنيا ليل وايوب واكف بالباب ومبين مشتاط نار

شافني .. صفيت السيارة

دخل قبلي .. اول ما فتت البيت لزمني من راسي : طايحة الحظ ترجعين بنصاص الليالي وما ترديييين

اول ما طبيت .. خالتي كامت تجر بيه منه

كام يصيح ويكللهم : اليتقربلها اكصبه وياها والله

رجع جر راسي ودفعني للدرج امشي كدامي وهو بعكازته يصعد ويغلط : انعل عشيرتج واليوم ادفنج .. خالتي لحكتنا وصعدتله

سد الباب بوجهه .. واندار عليه لزم براسي : ولج اني الحاطتني هنا وما تردين عليه .. اني مرتي ترجع بنصصصصص الليل

– اذا مرجعني لبيتك حتى تكمل اللي بداه علي محد راح يمنع ويا ريت تجر اسلاحك وتخلي براسي وتخلصني منك ومنهم ومنكم كلكم

– اني الاخلصج جلبه اليوم اني اعلمج شلون تتجاهليني

اخذ براسي ويضك بيه ويا الحايط ويكلي : وين جنتي احجي وين جنتي

جر راسي يريد يدير وجهي يصيح بوجهي اختل توازني

رجعت للكاع .. هدني من ايده وكام يصيح ويكلي : انت تريدين تموتيني ولج راح تجلطينيييي ولج بنص الليل راجعة وييين جنتي

هو يحجي ويصرخ واني حاطة اديه على راسي وكاعدة يم الميز اللي يم الباب .. وخالتي ادك الباب وتكله : ايوب لا تروح تسوي بروحة شي ايوووب افتح الباب انت مريض يمه

كام يدفر بالكنتور .. بالميز يصيح

رجع لزمني من وجهي : انت ليش اتريدين اتجلطيني بسكوتج وييين جنتي

– ابيت علي

– ابسمايا … شخذاج البسمايا ولج شوصلج لهناك

كمت من مكاني وكتله : مجرد ما عرفت اني وين جنت شوف حالك تريد تنجلط .. ليش ما تحس بيا راح انجلط من وراك متلك ريحني وافتحلي جهازك مرضيت اكولك منو هاي التراسلها متريحني .. انت ماخذني تعذبني ليش مرايدني من الاول ليش خذيتني .. متخاف الله ابنات الناس

– كاتلج اني .. ولج بت اللل ليش تخليني اسب اني مااااااذيج لو مخلي امة لا اله الا الله تتحسدج على عيشتج بيش قصرت وياج انيييي

– الايد ما تأذي بكد الفعل .. لو انت لاكيني اراسل واحد وما… بعدني ممكملة

ما احس الا الراشدي ترس اجا على وجهي وجرني من شعري ويكلي : هالكلام ما تنطقييي ما تجيبي على السااااانج طايحة الحظظظظظظ

– ما تنحمل انطقه وانت محملنياه واتريدني اتحمله وتكلي مدددددددللة ؟ مرضتني كسرتني وتكلي مسويلج انت ما رايدة شي منك عوفني الله يخليك اني تعبت عوووفني

جريت روحي منه .. وفتحت الباب وطلعت من الغرفة ..

دخلت الحمام كمت ابجي لوحدي .. لشوية وطلعت

فتحت باب الغرفة .. هو ما موجود .. اخذت كتبي و قرطاسيتي ووديتهم بالغرفة الثانية واخذت فراش وهيتر .. ورجعت جبت سجاديتي وقفلت الغرفة عليه .. هوسة وكلها هدوم سويتلي مكان وكعدت

صليت .. وبقيت كاعدة على سجادتي

احس بروحي ضايعة وهاي مو اني .. شلون اتجرأت طلعت لبسمايا وبقيت برا البيت لليل .. رايدة ابتعد من اللي اني بنصهم كلهم امنيتي صحراء .. غابة مكان ما بيه ناس اتيه بكاع ربي ومحد يلكاني .. كارهه نفسي كارهة وجودي ونار بداخلي تفور ..

ليش دا اهتم ليش دا اغار ليش ما انسى .. ليش ما اتجاهل

اني اعرف اتجاهل كلشي ليش ما كاعد اكدر اتجاهل الشعور حيل صعب وثكيل ومؤذي يطفي كلشي بيك لا يخليلك نفس تاكل ولا حيل تكوم ولا عقل يقرا لو يفكر ..

لميت سجاديتي وشغلت الهيتر كعدت كدامه ع الفراش ادفى وصافنة

كمت اسمعهم يدورون عليه .. هو يسال وسرى تصيح .. غفراااان

صعدت فوك ورجعت وهي تكله : ماكو فوك ونزلت جوا

رجع هو صعد .. فتح باب الحمام وسده وهو يكول : هاي شلون مصيبة ابتليتيها خاف جنت عايز

يحجي ووصل لباب الغرفة كام يفتح بالقفل ميفتح

كاللها : يمه الغرفة الفوك قافلتها

– والله ما ادري مسدودة غير

– دجيبلي مفاتيحها خل اشوفها

جابوله فتح الباب لكاني كاعدة وادفي اديه ع الهيتر وما اباوعله ..

همهم : استغفر الله ربي واتوب اليه

اذا انت هنا متكولين ها ؟

مجاوبته

تركني وطلع يهز ايده

بقيت احس صخونة بجسمي وخمول كلش قوية

وجع راسي مفارگني ..

بقيت بفراشي لثاني يوم الظهر محد صعد ولا احد شاف وايوب جان بالشغل رجع تقريبا ب١٢ ونص اسمعه يسولف بس حرارتي نار ..جسمي كله ميت

كاللها : يمه شفتوها الفوك اكلت شربت

-بعدها نايمة عفناها

يصعد ع الدرج وهو يكللها : خاف صايرلها شي

فتح الباب فتح الضوا ..لكاني بغراشي وشعري منثور بكل مكان

تقرب مني وكمبص مد ايده على وجهي صاح : جمرة لو مو جمرة دكومي غسلي كووومي

كمت اسحب بروحي من اديه وهو يشيل بيا

نطقت : وخر

– ولج انت حتى روحج تعاندين كومي حرارتج نار

جريت روحي منه وانداريت ع الجهة الثانية

فتح الغطا وكام يجر بيه .. ما كمت نزل لامه يكللها ..

صعدت خالتي كتلها : ما بيه اكوم عوفوني جسمي كله مكسر

– اي مكسر من النوم دكومي

– يوجعني عوفوني

حاولت ويايا كومتني .. كمت اروح حتى اتوضى ..

رجعت كوة صليت كالت : انزلي اكلي راح تموتين اللي ابطنج بهاي تصرفاتج

– خالة ما مشتهية نفسي لعبانة

– لعبانة من الجوع لإن بطنج فارغة

– ما مشتهية

– وهسه شني هالغمامة البيج علمود والله مراسل وحدة كتلتي روحج يولي يراسل التعجبه عليمن مهتمة شو تاليته يسد تليفونه ويرد البيته ويرجع لاصله وينام بسدج .

– خالة اني مو غرفة اخشاب يرجعلها ينام بيها اني بشر

– كل الزلم هيج مو بس انت لو كل وحدة رجلها يدور غيرها سوت اسوايتج ما ظلت عيشة

– كل انسان ومقدرته اني ما اكدر

– لا ما تكدرين شنو صيري قوية مو لخاطرج خاطر اللي ابطنج

– هو اني متقبله ابوه حتى اتقبل اللي ابطني

– لا حرام هذا الحجي ما يصير .. معناها جاي تكتلينه حتى تخلصين من ابوه

– الله اللي حطه ابطني وربه اللي يتولاه اني لا منزلته ولا مسويتله اي شي

_ لا شني ما مسويتله شي كاطعة الزاد ووجهج اصفر وتكولين ما مسويتله شي يبس الجاهل ومات

– من ادين ابنج لو ما مسوي بيا هيج ما يسد نفسي عن كلشي ويخليني اكره روحي

– لا من اديج اكلي لكمة واكوم على حيلي شني مضعضعه ونايمة وتبجين والله شفته يراسل وحدة وراسلها شصار قصر وياج عافج شو ماكو وحدة بكدج مدللها رجلها

– ما اريد الدلال خلي ينطيني راحة بالي ينطيني صحتي

– صحتج وراحة بالج بديج بس انت الغبية وما تعرفين تتصرفين

– الوجع خالة ما يوجع غير صاحبه البيه لو بيج ما كلتيلي هالكلام

– يا وجع يا بطيخ جاهل ابطني وحارمة روحي من الاكل شني عود جاي تعاقبين ايوب ابزره ؟

– خالة انتم مهامتكم اني ولا مهتمين للي جاي يصير بيه بكد ما مهتمين بالطفل .. اني شحس شتوجع طز المهم الطفل

– جا شنو غير يردله بزر رجال كبر يرديله ولد يشيل اسمه اذا كل مرة تيبسين روحج لحد ما تموتينه ازوجه غيرج والله واخليها تخلفله ترا مصخت

– اذا ع المرتين اللي يبست الطفل فبالمرتين بسببه من قهري عليه ومنه واذا تريدين تزوجي زوجي اني لازمتج بس فكوني .

جريت روحي منها وانداريت ارجع انام

كالت : وشلون نضل هيج والله زعلانة لا تحركين روحج وياي لا تكومين ترا طكت روحي منج

– جيبلج جنة جديدة وعوفيني

– اجيب ليش ما اجيب شني

عافتني وكامت طلعت من عندي .. مطلعت ولا وصلت خارج الغرفة

سرى جابتلي لفة وعصير جايبهم ايوب خلتهم يم راسي وطلعت .

لثاني يوم كعدت للدوام ..

لكيت بلال منتظرني بالباب كال : اني اوصلج صعدي

صعدت وياه جان تعبان حيل ومقهور .. حسيت عرف بسالفة سرى

دخلت للجامعة .. كعدت اقرا شوية بالنادي .. اجت زهراء سلمت وكعدت يمي نقرا سوية ودخلنا المحاضرة سوا ..

لما كملت المحاضرة الاولى .. طلعنا نمشي خابرتني امي كال : ها شلونج

– زينة

– تحاجيتي انت ورجلج لو بعدكم

– لا

– لا تطوليها يمه … قاطعتها

– ماما ما بيه حيل نصايح اتحملي ودوسي واصبري وكل رجال هيج وكل رجال ما اعرف شنو .. حفظته للكلام كافي دا تأذوني مدا تصبروني لان اني مجاي اسوي شي غير متحملة وساكتة فخلوني بس خلوني ووفروا عليه نصايحكم لان والله مليتها

– بعدها اعصابج تعبانة حقج .. ردت اكلج اول البارحة اجت مرت علي

حجيت : اي ؟

– دارية بموضوع زواجه واتعاركت وياه وخبصت البيت فوكاه

– وشسوا

– راح تنتقل هنا بشرط يجيبلها غرفة جديدة وما يشيل اثاثها من البيت يعني تريد تخرب عليه سالفة زواجه من حماتج

– وهذا الاحسن شنو ضايجة

– لا اضوج عليمن بس يمه انا هم ما اريدلي ضيجة خلك المخلوقة مكابلتني ومتنكة عليه حاسبتني رايدة ازوجه مرة عليها

– وانتم صدك ردتوا تزوجوه جذب

– يمه اني رايدة حاجية ساعية خاطبة شو هو حجه ورجلج واهله وافق انا ياهو مالتي

– هي كلها اصلها رجلي .. اصيل الله يچرم

– ديلا انت بالدوام

– اي بعدين نحجي

– اي اخذي راحتج مع السلامة

كملت محاضراتي وطلعت لكيت بلال هم منتظرني : شعجب مو ويا ايوب بالهيئة

سكت ما جاوبني وتعبان حيل

ساق بدون ما يحجي .. وكف بازدحام اني صافنة بزماني

حجه : انت الوحيدة الافتهمتيني من عيوني وعرفتي شبية وشرايد ما توقعت تسوين اللي سويتي

– شسويت

– تخطبين سرى لعلي وانت تعرفين اني رايدها ؟

-ومنو كالك اني خاطبتها

– ما متوسطة بالموضوع

– الله يخليك بلال اذا متعرف شي اسكت لان بروحي المرض وما بيه حيل عتب

– اذا ما متوسطة ليش خليتيها تمشي !؟

– ما متوسطة وما خليتها تمشي وخربتها

باوعلي بالمرايا : خربت ؟!

– علي شاف وضع امي حجه وخطب اخته وايوب واهله كلهم وافقوا بس اني ما وافقت رحت لمرت علي وكلتلها واجت لبيت اهلي تعاركت ويا علي وخربت السالفة

ضل يباوع بوجهي : يعني انلغت !؟

– بلال انت اخوية البنية والله يشهد اعزك اكثر من اخواني بس نصيحة اعتبرها من اختك السن اليتگلگل يوگع لا تحطلك عليه خبزة ولا تبني عليه امالك .

– هي رايدته ؟

هزيت راسي

تنهد بحركه ودنك يفرك بوجهه ولزم الستيرن .. احس شعواط كلبه ليمي وصل وهو يتحسر .. حجه : ما تلعب نفسج اذا اخذت جكارة

– افتح الجام واخذ راحتك

اخذ جكارة وكعد يدخن ويحرك بروحه ..

لحد ما وصلني .. للبيت دخلت ايوب بعده مجاي صعدت صليت وكعدت اقرا .. اندزت رسالة ع الواتساب .. بلال كاتبلي : موجودة ؟

بسرعة شفت الرسالة

جاي اكتبله .. اتصل .. حجه

انت الوحيدة اليعرف بهذا السر البگلبي محد يدري بيه

غفران جاي اموت .. راح اتخبل معقولة هي تحبه

يتنهد ومحترك حجيت : مو كلشي نريده نحصله ولا بكيفنا ندخل ارواحنا بكلوب اللي انحبهم بلال مكتوب النا نوكف ع الاطلال ونحترك

حجه : بالقران كاعد احترك ما ادري وين اودي روحي .. لو شسوي فهميني انت اصغر مني بس انت اختي واني ما عندي اخت ولا احد افتحله كلبي واحجيله .. ساعديني

– بلال اني روحي ما جاي اعرف احويها واساعدها مثلي مثلك جاي احترك ومحد يدري عني كلها تصيحلي بطرانة ومحد يحس بالجاي احسه

– ابالي اترك الشغل واعوف كلشي وابتعد احس جاي اختنك

– ايوب يحتاجك وميثق بغير بيك وانت مرتاح وياه ما جاي يكلفك اني اشوف تطلب منه استراحة كم يوم اطلع لايران لاي مكان .. المهم تغير جو .. بتالي الشعور هذا مؤقت وبعدين تتأقلم

تنهدت … امنيتي اسوي اللي تكول وابتعد .. احس روحي مثل الشمعة المشتعلة بهذا البيت يوم يوم جاي اذوب واخلص وانتهي .. طاقتي خلصت

– شنو صايرلكم

– الصاير هواية

– اني اخوج اذا محتاجك شي كولي

– الله يحفظك بس ماكو مشاكل تعاركت ويا ايوب ورحت لاهلي حتى ازعل لزمني علي بالصوندا كتلني وخابر ايوب ياخذني خاف زعلي يعرقل سالفة زواجه من سرى

– شكد ناقص طلع هذا !؟ مو كلتي خربت

– من بعدها رحت لمرت علي خربتها .. بس … الله كريم

انفتح الباب فات ايوب حجيت : روح هسه خلي اروح

– اخذي راحتج يابه

سديت الخط وكف كبالي : ويا منو جاي تحجين !؟

قفلت التليفون جره مني بسرعة وكال : منو هذا اللي تكليله روووح بس شفتيني وعازلة روحج بغرفة عني … افتحييييي التليفووووون ….  

 

• يتبع الفصل التالي اضغط على (رواية صوت من المجهول) اسم الرواية