رواية صوت من المجهول الفصل التاسع و العشرون 29 - بقلم زينب ماجد
ساق السيارة واخذنا على مطعم يكون على شط نهر دجلة ..
الجو جان ربيع بيه نسمة هوى باردة .. كعدت اني وهو كبالي لطاولة صغيرة تكفي لنفرين .. اخذت نفس كلش عميق واني اباوعه كدامي .. ابتسملي .. ضحكت
كال : شنو ابالج نطلب !؟
– متغدية عد اهلي ..
وكف الويتر ، حجه : قوزي واحد .. وعصير
شتحبين عصير ؟
– ليمون ونعناع
– عصير برتقال وليمون ونعناع .
راح الويتر اندار كالي : اسمعج ؟
ضحكت كتله : صار تلث شهور اني احضر حجي لهاي الكعدة ووكت الكعدت طار الحجي الصارلي شهور احضره
ضحك وهو يكول : ايهاب يكول ياريت كل هذا الحجي من أكعد كبالك يحضر
والتهي بعينك بعد وتهمسلي حتى اتذكر
وياك اذا ما سولفت من الصمت لا تحذر
مرااااات مو كل الحچي يلم المشاعر يگدر
– الله .. ايي والله
ابتسم : اي .. شنو ابالج !؟
– ابالي هواية امور اسولفها ومنتظرة منك تسمعني حتى تفهمني
– اسمعج وكل اذان صاغية
– اول سؤال قبل كل الحچي حابة اعرفه .. انت تحبني لو اللي بيناتنا بس زواج وفروض وطاعة وواجبات والتزام ؟ وغيري مستوطنك واني مجرد صفحة بيضة تحاول تبدي بيها وتنسى مذكرتك القديمة !؟
– شنو هو الحب بنظرج !؟
– اني اشوف الحب تفاهم .. لإن اذا علاقة الحب افتقدت للتفاهم اصبح تعلق مو حب
– التفاهم .. اساس من اساسيات الحب بس مو الحب .. الحب لما اتمسك بيج وانطيج واصبر عليج واخاف افقدج رغم اذيتج وما جابرني احد اتحمل بس اني حاب اتحمل وحاب انطي وحاب ارضيج .. ليش ؟ لإن احبج كلمة احبج سهلة تنكال بس صعب تثبتها .. واني احب الصعب ما اكولها بس اثبتها .
-شفايدة تثبت بس اني محاسة !؟ ما انكر ابدا انت زين بس متتفاهم متبرر متحترم ما اشوف الحب مادة تقدمها ولا الحب تطبك الباب وتطلع وتعوفها زعلانة وتخليها لوحدها تواجه روحها بسبب اغلاطك الحب تفاهم تقدير المشاعر اللي كدامك احترام وجوده .. التحقير بالكلمات التحقير بالافعال من تشوفني احترك واتعب واتخربط بسبب موضوع اني متضايقة منه ومتكلف نفسك وتبرر لإن تشوفني اقل من انو تبررلي وتتكبر عليه واني زوجتك .. هذا اللي مجاي اتقبله نهائي
كل علاقة اذا فقدت التفاهم انهدمت واني وياك مو بس علاقة زواج وبيت وطفل جاي بالطريق .. اذا كل مشكلة تعديها وتريد تكعد الصبح وكأنماما صاير شي بهيج حالة انت ما عديت انت كاعد تهدم بيتك طابوكة طابوكة بهالأسلوب .. لإ المرة تعدي بس ما تنسى وراح تجمع تجمع تجمع لحد ما يجي يوم تحط كل المشاكل اللي عديتها وما حليتها وتكلك هذا حدي مع السلامة ..
انت مستعد لكلمة مع السلامة اذا جان بيناتنا طفل !؟
اني الكل لامني يكولي موكفتها على كلمة اني ما وكفتها على كلمة وجان سهل اعدي اني افكر اذا عديت شراح يصير راح تحترمني ؟ راح تقدرني راح تتفاهم ويايه ؟
يا اخي يمكن غيري تتقبل كلمة انجبي .. طايحة حظ .. ادب سز وغيرها
اني ما اتقبلها مثل ما انت ما تتقبلها .. ما اتقبل تشد شعري لو تضربني راشدي لو تستحقرني، يمكن راح تكلي انت شو جنتي ابيت اهلج مدكة ومحد يحترمج وجاية يمي ادورين احترام .. اخوتي اني ما اختاريتهم ولا اني اختاريت انولد ابيت اهلي .. علي اذا ما عجبني مجبورة اتحمله لإن مكتوب عليه اخوية مو بيدي اوقع ورقة وانهي الأخوة البيناتنا شي مكتوب عليك من الولادة سواء ردته او ما ردته، اما انت فلا .. انت اختيار هذا الاختيار تكدر تتنازل عنه لما تشوفه ما يناسبك .. اني راح اعيش وياك عمر مو يوم يومين ما اتقبل أهانة .. وراح اصبر على اهانتك من ما عندي حول وقوة بس راح اعيش وياك واني كارهتك والعيشة بيناتنا ضنكة ومشاكل انت اذا تريد ترسم حياتنا بهالصورة بحجة رجال واني مرة وتتركني اتحمل يجي اليوم الاوكف بيه على رجليه واهدم بيتك وامشي منك ساعتها التكبر والاستحقار والتجاهل بيش راح ينفعنا لما يكون بيناتنا طفل !
الكل باوعلي لإن وكفت على كلمة بس محد ولا حتى انت باوعت لنفسك وسألتها واكف على كلمة مع انو أنت الغلطان واغلاطك مو هينة بس باوع بعينك شكد ترتكتني واهملتني واتجاهلتني على كلمة !؟ بهيج حالة انت خليت المسؤلية قائمة على صبري لو اتحمل لو نتخارب .. مستعد نتفاهم لو راح تبقى بتكبرك وعنادك هذا ؟
اجا الويتر حط الأكل
هو اندار يباوع للنهر .. سأله : تحتاجون شي بعد استاذ
التفت : لا رحم الله والديك
حجه : اكلي واللي تريدي يصير
شربت من العصير وكتله
اللي اريده ما تتركني للزعل واليوم اللي نزعل بيه تدخل اخر اليوم تكعدني وتسمعني واني اكولك واحد اثنين تلاثة مضايقيني وانت تحجيلي اللي مضايقك نتفاهم ونبات بفراش واحد ونكعد الصبح فاتحين صفحة جديدة واحنا حالين مشكلة البارحة ما تاركيها للتتراكم .
اللي اريده لما اباوع الكدامي واحد زائد واحد واكولك ايوب النتيجة اثنين لتغالطني وتكولي النتيجة تلاثة واني اشوف كل المؤشرات كاعد تشير للنتيجة ٢ وتستبد بغلطك وتكول لا تلاثة وانت عنيدة وانت ما تفتهمين وانت تعبتيني .. وتخلي الغلط بيه ! دا تفتهمني شدا اكول ؟
هز راسه
كتله اكعد وفهمني ليش الواحد زائد واحد صار اثنين
احترم عقلي لا تستغبيني .
– ما استغبيج بس انت صعبة غفران صعب تتفاهمين صعب يرضيج شي اطباعج صعبة وبسبب ردود افعالج الواحد يبقى حذر وياج ويتجنبج .
– صعبة ع الما يفتهمني .. اني مو مثل باقي البنات ترضيني بكلمتين حلوات ولا بجيس حلويات ولا حتى بسيارة .. اني براسي عقل هذا العقل لما تقنعه راح يرضى .. كم مشكلة مرت بينا من اول وحدة قبل الخطوبة لما دزيتلك رسالة وكتلك تعال افسخ وكت اللي اجيت وكعدت وفهمتني وقنعتني رضيت .. من يومها جان لازم تفهم اني ما يغريني عقد ذهب ولا ديوان زلم ولا تليفون ايفون اخر موديل اني بسسسس احتاج تقنع عقلي باللي جاي اتسوي حتى ارضى .. اني مو صعبة وكاعد انطيك مفاتيحي ودا اكولك حلي تسمعلي وتتفاهم ويايا .. صعب .
– هاهية تأمرين
– اني اعرف انت غلطت .. وامور هواية ما اتأكدت منها بس اطلعت عليها مو هين اعديها بس راح اعديها وراح افتح صفحة جديدة … بس بعد هاي الصفحة شنو الرايده !؟
وهو ياكل واني كاعدة احجي وسألته ما جاوبني رفع نفسه طلع تليفونه من جيبه و شمره كدامي : افتحي الرمز تعرفي
فتحت الرمز كال : ما عندي شي اضمه وما خابف من شي بس مثل ما تطلبين الاحترام اني هم اطلب موبايلي ممنوع ينفتح ليش شنو السبب يخصني اني رجال وضعي حساس شغلي حساس .. وانت تخافين الله وبالدين حرام تسطين على تليفوني وتفتشي اني مو طفل ولا صغير … قاطعته
– بسببك انت لو مفهمني مجان اضطريت اتابعك واحفظ رمز وافتش
– غفران تأكدي اني احبج واخاف عليج واطمح وياج مثل ما تطمحين لنفسج .. اطمح اشوفج خريجة وانسانة ناجحة ومنطيج كل المقومات حتى تصيرين ومشتريج حتى اذا انت بايعتني بس الرجال يغلط ويرجع يصحى بس اهم شي غلطه ما يأثر على بيته وحبه لزوجته .. كلتيلي ما بررت لان اني غلطان وادري بروحي غلطان والغلط ما اله تبرير حتى اغلط شفت اتركج تهدين واراضيج بس انت جنت اصعب من انو اراضيج افتهمت كتيلي حل هذا الصعب بالتفاهم وان شاءالله اللي تريدي يجرالج .. وشتريدين اني بخدمتج .
ابتسمت وكتله : اريد ماعونك جعت
– اي هي هاي المتعودين عليها من ايام الكص .. كله كدامج الف عافية
ضحكت واخذت الخاشوكة منه واكلت وهو طلب خاشوكة ثانية وكام ياكل ويايه .. كمل طلب جاي واني بعدني اكل .. كعد يشرب جاي ويباوعلي .. رفعت وجهي : ها
– زعلج تعبني حيل احس هسه اتنفست وارتاحيت وخلقنا لكم انفسكم ازواجا لتسكنوا اليها سبحان اللي حط راحتنا بديجن يا طايحات الحظ
كاعد احط الخاشوكة بحلكي اكل .. وكفت
طليحات الحظ شنو جا شحجينا !؟
– غزل هذا بابا غزل هذا يسموه غزل عراقي دروحي انت شفهمج
– ما تصيرلكم جارة
– بلانا بيكم وبلاكم بينا بعد اذا ما نتخابط ما نتراهم
– ههههههه
كملنا اكل ورحن للسيارة نفتر كال : حاب اخلص هالليلة وياج بس مشتاقلج حيل .. وين تريدين نروح
– للبيت .. مرايدة اي مكان ثاني مشتاقة اعيش اجواء بيتوتية وياك .. نجيب حلويات واكل ونحضر فلم ونسهر مع بعض ونكضي ليلة دافية نعوض بيها الايام الفاتت
– يلا
لف ودار للبيت .. جاب عشا لاهله حتى متصيحني خالتي على عشا وصف يا السوبر ماركت نزلتي وكال : جيبي الحلويات اللي تريدها للسهرة
لميت كلشي ابالي وحطيته على مكان الدفع اخذناه ومشينا اني صعدت كبل فوك .. وهو راح لأمه .. مشيت غسلت وتوضيت وصليت المغرب والعشا وكمت بدلت لبست ثوب نوم ابيض مال عرسي ورفعت شعري ذيل حصان يوصل جوا خصري بس خف مو مثل قبل ثخين جان عباية بس بالحمل ديتساقط بس هم بعده حلو .. حطيت كحل فوك جفت عيني وسحبته بايدي ليبره وحطيت خدود وحمرة حمرة .. حسيت صرت حلوة ..
صفطت الحلويات ع الطبلة وكاعد ارتب بيهم ..
دخل هو .. ابتسم .. ويا ما طب دك تليفونه .. باوع عليه .. سده وقفله وشمره وفتحلي اديه يضحك وهو يكلي بطنج صارت تبين باعيها حلوة
حضنتها .. شكد مشتاقتله شكد مشتاقة اعبرله عن اللي البداخلي ..
التفينا بفراشنا واني حاطة راسي على صدره وهو حاضني بيه ويلعب بشعري ويسولف ويايه ع الفلم ويشرحلي ومطفين الضوا وبس ضوا التلفيزيون نباوع بطني صايرة على جسمه وذابة نفس عليه وكاعد دا اباوع ومركزة ولحظة هدوء ما احس الا حركة ببطني فزيت وكعدت من مكاني .. فتح ايده من حضني وهو يباوعلي : شكو
– حسيت بالحركة !؟
– اي شنوهاي ؟
– الطفل تحرك
– لا تتوهمين
– والله حسيته تحرك
– يعني هسه هاي الحسيت بيه من بطنج حركته
– اي والله تحرك
كعد من حيله : منين تحرك ويلزم ببطني
لزم ماكو شي : خاف متوهمة
– والله شبيك !؟
ضحك : اروحله فدوة عود هو هم نفر ويريد يثبت وجوده بيناتنا
– هههههههههه
نمت على ظهري وهو ما بطل كل شوية يتحسس بطني بلكي يحس بيه ..
حيل متشوق للطفل وحيل فرحان بالحمل ..
جانت ليلة من الليالي الحلوة بحياتي ما انساها
يومها فتحت عيني بالليل ايوب غاط بنومه التلفزيون مفتوح الجو هدوء وشعور حيل دافي ومريح بداخلي . سحبت شعري من عنده وصرت اباوعله .. قبل سنة مثل هيج يوم شكد جنت مرعوبة منه !؟ وخايفة وما اعرفه ليش عصبي … وهسه اني احس بروحي اسعد وحدة بحضنه وابنا مالي بطني بيناتنا .. بعد سنة شراح نكون !؟
راح يكون بيناتنا ابنا يمكن يوكف ويوكع ويمكن يكول ماما وبابا ويمكن نكون سعداء اكثر من اليوم .. إن شاءالله .
دنكت عليه بسته بوسة اشمه بيها
جر نفس ومط نفسه وفتح : ها
رجعت راسي لصدره وكتله : اني أحبك حيل
ضحك ولمني بحضنه يدللني
رحنا سبحنا ورجعنا صلينا .. ردنا نحاول ننام بس اخذتنا السوالف لحد ما طلعت الشمس .. كال : جوعان خلي ننزل نسويلنا فد شي ناكله
– يلا
كمنا بدلنا ملابس مال بيت ونزلنا جوا طلع يجيب ريوك واني رحت للهول شغلت التلفزيون على قناة كربلاء طالع قارئ العتبة يقرأ قرأن سورة البقرة واجواء الاصوات بضريح الإمام الحسين .. رفعت الصوت شوية .
وكعدت اباوع لحد ما اجا كال : اليوم اني الأسوي الريوك راح اسويلج اطيب ريوك تضوكي بحياتج
– يلا خلي نتعلم منك
وكف يطبخ واني اطلع المربى والأجبان احطهم وسألته : صدك ايوب اتذكرت .. ذاك اليوم انت وبلال حجيت على تعيين
– شبي !؟
– صدگ يعني
– اي والله بعد ما خلصت الحرب انطونا امتيازات جرحى وشهداء بدرجات وظيفية ع الدولة حطيت اسمج وأسم نجلاء ..
انداريت فرحانة : عليك الله !؟
– قابل اجذب عليج يا ابويه
– لا مو انت المنعتني من الشغل وكتلي ما تلحكين
– اي حبيبي اني ما منعتج حتى اكسرج بس شفت هواي صار عليج دوام وجامعة وراتبها قليل ٣٥٠ ميسون روحتج وجيتج بس مو تعيين وراتب فوك المليون وع الدولة وامنعج خو اني افرح من اشوفج تكبرين وتقوين ..
انت اكثر وحدة وكفت واتحملت وياي من اتصوبت بالساتر جنت اطلع ضيم الوجع بيج اغلط واضرب وابعدج واصيح وانت ترجعين تداويلي الجرح وتوقتيلي علاجي وتكعدين تسولفين وياي حتى لا اضوج .. من انطوني درجات وظيفية على جرحي بالحرب شفت انت اول وحدة تستاهلين هذا الجزاء .. وحطيتج
مشيت من مكاني وحظنته : الله ليحرمني منك .. بس اني ما سويت السويته حتى احصل جزاء انت زوجي وهذا واجبي
لزم وجهي وباسني وهو يكلي :اني يوم الدعيت الله ملهوف اريد ارتاح دزج الي وحط راحتي بيدج رغم المشاكل البيناتنا بس وحق هو العلي العظيم ما ارتاح وما يصفى بالي غير من انت يمي .. حتى من تروحين لاهلج والله اضوج احس البيت ما ينطب وما ارتاح الا اجيبج .. حتى لو زعلانة ودايرة عني بس ما طولج يمي وتفترين حواليه اني مرتاح ..
لا تخافين مني بيوم اظلمج واني خايف الله بيج.
رفعت نفسي على اطراف اصابيع رجليه ولزمت وجهه بسته بحلكه
باسني وهو يكلي : وخري لا يكعد احد زحمة
رجعت اكمل الريوك .. ونرتب ونحط ع الطاولة كعدت خالتي
وحچت : خير يا طير شو صباحيات الله اليوم شكو
ايوب : جوعانين يمه شلون ما ناكل
– الله يصفي لبنكم يمه شريد منكم
كاعد تحجي خالتي طلعت نجلاء : روائح مال اكل جاي تمر من خشمي جوعتوني شدا تسوون
حجيت : تعاي انت عندي الج خبر اطيب من الأكل
ايوب : خو ما تضميلج سالفة
– ميصير اكول !؟
ضحك .. لا كولي
نجلا: شكو ؟
– ايوب حط اسمج على وظيفة ع الدولة ويكول الراتب فوك المليون
شهكت : چذب دكول والحسين
ايوب : كبل لا احلف تلبسين عباية نجلاء
– لا عليك الله صدك حطيت اسمي
– اي والله حطيت اساميكم اثنينكم انت وغفران وان شاءالله تطلع الاسامي باقرب وقت .
كامت تصفك : اااااالله هاي الأخبار الحلوة شنو هالصببببباح
– بس نجلاء اذا طلع اسمج وانت بت ابوي محسوبة علي خوية ما اريد تسودين وجهي
ركضتله تحضنه وهي تكله : والله ما اسود وجهك … شكد احبك
باس راسها وكاللها : الله يحفظج خوية ديلا ما طول كعدتوا لعد طلعوا صينية جبيرة وخلي نتريك كل احنا
جرين الصينية الجبيرة من ورا الباب مال المطبخ
ونقلناها وكعدنا نسولف ونضحك .. ندستني خالتي : شني اليوم تحجون تصالحتو
– اي
– اي شلون ما تتصالحين اذا مشتريلج سيارة وين شايفتها عد اهلج عد اخوتج
– خالة ما قبلت السيارة اني ردته يعتذر بس
-اي واعتذر واطاج السيارة بلكت ترضين زمو ما ترتاحين اذا ما تحطين الزلمة محبس بيدج
ضحكت : اي وشيضر اذا حطيته محبس بيدي لا بيوم راح احرضه عليج ولا ارضى يقصر وياج بالعكس اني اللي اذكره بيج وبالبنات وما رايدة غير هالبيت يصفى ونعيش على حب الله بدون صياح واهاين مو احسن !؟
– اي جا اذا تعرفين هيج من الاول اشبعييي وخلي الزلمة يضحك هيج ويرتاح البيت من طلايبكم
– هاي بعد جانت يمه مو يمي ما رحتي كتيله يمه اكسر الشر وصالحها واتفاهم وياها شو بس يمي اكسري واكسري
– يزمو يزمو ربعج التمو
ضحكت وانداريتله اباوعله يسولف ويا نبأ بت نجلاء ..
جان مرتاح ويسولف ويضحك وخلص اليوم ويانا حتى ما طلع .
ثاني يوم .. جان اني وياه دوام كاعد ابدل وهو يبدل كتله : توصلني لو اروح بالسيارة
– لا بعد اخذي سيارتج شعليه بيج غير جبتها الج
– شكد انطلبت عليها
– والله شدة من صلاح ابن عمي اخذتها محتاج فلوس ورايد يبيع السيارة اتذكرتج كتله انطيك الجوا ايدي وتضل عليه الشدة اناوشك بيهن لحد ما اكملهن اله كالي ما نختلف
– اتكاتبت عليها يعني ؟
– اي اتكاتبت بأسمي بعد بس اسويلج بيها رخصة قيادة واكمل معاملتها .. اليسألج كولي فلوس ذهبي بعتهن واطيتهن لايوب زادلي عليها واخذلياها ..
– اخذ الذهب بيعه صدك ووفي الدين ليش تخلي عليك
– لا لا عوفي ذهبج .. صلاح خويي ما يكول لو بالشهر مليون ما يحجي الرجال اني وياه .. وعود كولي يتحرشون بيااااا ما اركب تكسيييي
ضحكت بصوت عالي : – والله العظيم تعمدت اكولك يتحرشون بيه اعرفك راح تنام على كلبك الحجاية وتشتريلي
– اي بالقران نامت على گلبي
ضحك .. يلا المهم صارت عندج المهم تخلصين من هوسة التكاسي والفورتات وتريحيني .
اخذت الجنطة من الميز لبستها ورحتله بسته بخده وكتله : شكرا ابو علي
– يا بووووويه
ضحكت واخذت السويج
يووووو طايرة من الفرح واخيرا صارت عندي سيارة
طلعت وشفتها بالباب بودي احظنها وانام عليها .. صعدت بيها
شي جديد شعور مختلف وحيل حلو من صارتلي سيارة خاصة .. الحمدلله رب العالمين .
خابرت ماما من الصبح شوفتها السيارة
كالت : بالعافية وبالخير مهناية بيها يمة لا تكولين ولا تحجين لاحد ولا تفتحين عيون الناس عليكم اليحجي كولي سيارة ايوب ووكاعد يخليني اروح واجي بيها من تكولين اشترالي سيارة ييمه يطكوج بعين والله يخلوج اتراب .. وهالشفتي بعينج اول ما الله وفقكم وداومتي جامعة وخلاج تروحين بسيارته الوادم حطت عيونها عليكم خلتكم شهور محد طايق الاخر .. احفظي بيتج يمه ولا تحجين اسرارج حتى لاخياتج ترا عين الناس تكتل وما يحبون يشوفون اثنين متصافين والله موفقهم ومعليهم .
صدك التزمت بوصية امي ما حجيت لاي بشر
حتى لخواتي ما جبت طاري السيارة ومن اريد اروح لاهلي وهن موجودات كمت اخلي ايوب يوصلني او بلال .
جانت هاي اهدأ فترة تمر .. اني وايوب متصافين
ووضعي ويا خالتي وحمواتي مرتاحين وماكو اي مشاكل
غير يوم عن يوم ثكل الحمل كاعد يزيد .. وكاعد اتعب اكثر ..
بين الجامعة وشغل البيت .. والحمل .
من بعد فترة تقريبا شهر .. طلعت اول وجبة بالتعيينات واسمي طلع بس اسم نجلاء ما جان موجود .. طنكرت وعبالها ايوب كاعد يضحك عليها وحاط بس اسمي ، حجت لخالتي وخالتي حجت ويا ايوب كاللها : يمه اني شبيدي رئيس وزراء غير وجبات خلي تنتظر ع الوجبة الجاية يجوز تطلع .
– جا شلون طلع اسم غفران
– يمه اسم غفران صار بالوجبة الاولى انا ياهو مالتي ؟
ما رضت خالتي وما اقتنعت عافها وصعد ضايج
كتله : ميخالف خالتي متعرف بهالأمور ان شاءالله اسمها يطلع باقرب وقت وتنحل المشكلة .
– باجر كون عندج شي بالجامعة !؟
– لا ليش
– حتى اخذج للهيئة .. يكملون معلوماتج واولوياتج
– لا ما عندي
نمنا من وكت ثاني يوم الصبح بدلنا .. كالي : من نوصل نزلي هاي الوصلة ما ادري النقاب .. لا تخلين وجهج يبين .. ولا تمشين وياي لإن يعرفوني .. راح اخلي علي يفوت وياج .
كتله : تمام
وصلنا بالسيارة والسيارة الثانية الحوثية بيها علي وبلال .. صفها ايوب واجا علي وبلال وكفوا كاله : علي اخذ غفران وفوت جوا .. واني راح ابقى وياك على اتصال
– تأمر حجي .
اشرلي علي ورحت وياه اخذني سجلوا معلوماتي واخذوا الهويات وبصمات اديه وطلعنا .. خابرني ايوب : ها بشري بصمتي ؟
– اي بس شنو راح اداوم
– لا يتثبت اسمج غير
-ها تمام .. بعد ماكو شي نطلع !؟
– اي اطلعي اذا تريدين خلي علي يوصلج للجامعة
تمام
اخذني علي وصلني الجامعة
دخلت لكيت زهراء ومحمد واكفين بالسنتر من شافتني اجت يمي : هلو غفو وينج اليوم
-صارلتلي معاملة ورحت خلصتها شلونج
– زينة
-شو واكفة انت ومحمد وحدكم
– اي شسوي من انت موجودة وين اروح من الضوجة اجا وكف يمي بقينا نسولف .
-خايفة هالوكفة تتطور وتصير غير امور
– لا بس شسوي خوما ايبسها ونضل بس مراسلات هم يطفر من عندي
– ما اعرف انت احكم بأمرج بس اخذي حذرج ترا انت وكل اللي تلبس عباية يحسبونا غير بشر كل فعل هم يسوو وعادي من تسوي انت يكلك شوف هاي ام العباية مو متدينة وشريفة شلون تسوي هيج .. لو تستحي ما سوت .. فانطي حق العباية اللي لابستها حتى لو مجبورة عليها لا تجيبيلج الكلمة لنفسج .
ابتسمت : اي والله صحيح اذا احد شافني وكال لاخواني يبطلوني .
– لعد ديري بالج على نفسج
بقينا نمشي ونفتر ومنتظرين المحاضرة ب١١ ندخل
مر من كدامنا ساري .. كال : سلااااام
ما رديت عليه
زهراء كالتله : هلو
وكف واحنا اتعديناه صاح : حتى السلام ما ينرد عليييه !؟
اندارينا نباوعله ، كال : اي وياج السلام لله
– يكون لله لما تكوله باحترام
تقرب من عدنا : واني بشنو ما احترمت حتى تكولين هيج بس سلمت
– ينكال السلام عليكم يلا يوجب علينا رد السلام والا احنا لا نعرفك ولا بيناتنا حتى اي شي حتى نرد عليج هيج سلام ع الماشي
– السلام عليكم
– وعليكم السلام ورحمة الله وبركاته
ابتسم : هسه صرتي توب
– شكرا
انداريت حتى امشي كال : لحظة
– اليوم ما اجيتي بالسبورتج الجديدة شعجب
– اني اريد افتهم انت ليش مدقق وياي يا اخي اني لا اعرفك ولا تعرفني ولا اني بنية حتى اكول تتبعني وتريد مني شي اني متزوجة ترا والله عيب احنا بحرم جامعي المفروض التصرفات تكون ارقى من هيج وانت طالب جامعة .
– اي يعني الا بنية واريد منج شي يلا تصادقين الصداقة لله
– ومن يمتى صارت صداقة بين بنية وولد حتى تكون لله ؟
ضحك وكال : انت مرت واحد بالبرلمان مو ؟
– شي ميخصك وعيب التدخل بشي ميخصك
ردت افوت كال : حماية وسيارات عسكرية وهالله هالله .. الصايدته وين يشتغل عليج الله .
باوعت بوجه زهراء: عجييييب
عفناه ومشينا .. هذا شنو بشر ؟ شراح يستفاد اذا عرف زوجي وين يشتغل .. مدا افتهمه شيريد ؟
– هو قبل فترة سالني كال: مكايلتلج شيشتغل كتله عسكري .. يكلي انت غشيمة وين اكو عسكري يركب مرته جيمسي وسبورتج
– والله عسكري بس عنده محل ابوه بالشورجة وجايب الاسبورتج بالدين حتى ما موفي فلوسها .. شهالبشر هاية اللي حاطة عيونها بشي ميخصها يعني والله دا اتعجب ماكو هيج قابلية
-هو فضولي وعايش دور اليفتهم كلشي ويعرف كلشي بالجامعة واي واحد ينطي عنه cv وعود يفتهم كلشي ومحد يكدرله فد شخصية تعبانة .
-ومحمد ما زال صديقه معناها اتعب منه واذا متوبين منه والله لا يوكعج بمشكلة ويا اهلج عود صيحي وكتها الحكوني .
ضلت تضحك ومشينا للمحاضرة.
من بعد ايام نزلت الوجبات واسم نجلاء طلع بالتعيين
كاللها ايوب : جهزي نفسج اخذج باجر تدخلين ويا بلال بس البسي عباية
هي سمعت العباية ونفرت كالتله : شنو البس عباية اني ما احبها ما البس عباية
كاللها : لعد اكعدي انعل ابو التعيين لابو اهله .. استري روحج بالبيت خوية واكعدي ما طول العباية ما تعجبج
طنكرت وكامت تصيح وتنتر على بتها وتصكع على راسها
اخذت نبأ منها وكعدتها يمي بالمطبخ وامه تكله : يمه انت بس فهمنا هي العباية لازم بالشغل لو انت تريدها
كاللها : لا اني اريدها … الناس يعرفوني تروح اختي تفتر كدامهم ببنطرون وقميص
– اي تلبس عراض وتروح
– ابد والله اذا ما تلبس العباية عتبة الباب هذا ما تطلعله واني من البداية كلت نجلاء حطيت اسمج وتلبسين عبايييية كالت ما اسود وجهك
– زين تلبس اسود
– والله لو تتبوش وهي ما لابسة العباية وحق هو العباس ابو فاضل ما تداوم ولا تطلع .. هي مو راااااادت شغل مو رادتني اشوفلها شغل مناسب هذا الاني اشوفه مناسب وظيفة ومحترمة وراتبها زين ومكان محترم بعد مقصررررر وياها طالبتني بطلااااابة ولكم ترا احتاريت وياكم بالقرأن ناس يعرفوني ويقدروني تروح اختي شادة رجليها كدامهم ببنطرون يا عمي والحسين الغيها وابدل اسمها بثاني وما اخليها تداوم
وتصيحون تخلي اسم غفران طلع اسم غفراااان ايوب بس لمرته
غفران مو عباية نقاب لبستها والعباس حرف ما كالت ولا اعترضت وهاي ما عاجبها .. موديج خوية تشتغلين لو تعرضين زرورج كدام وادم تعرفني ؟ اذا تريدين رجل خوية ما تريدن شغل كليلي من عين باجر ازوجج ولج كافي كولي هذا اخوي تعبببببببب يا بشررررررر تعبببببب .
دفر سندانة مال زرعة ظل برجله وصعد ع الدرج يصيح
طبك باب الغرفة حيل هز البيت هز ..
اني كاعد اسوي بالعشا .. واغسل مواعين .. والجالي مال معدتي ذابحني كوة اتنفس من عنده .
اجتني نجلاء للمطبخ : انت مو تعرفين تقنعينه قنعي اني ما البس العباية
– ما يقنع اني من دخلت لبسني نقاب والله لإن يعرفوه وحتى ما مشى وياي خلا علي يطب وياي خاف يشوفوني وياه
– والله تكدرين بس انت جلبة وطايحة حظ انت خليتي اباله سالفة العباية عبالج ما اعرف سوالفج ام الديييين
– نجلاء هسه اني شعليه تريدين تتفاهمين وياه ذاك هو اخوج وروحي اتفاهمي اني ام الدين مو زينه طلعيني من عدها ..
غمتني ومشت وهي تكلي : الحية ام السممممم الله يخلصني منج
اخذت نفس وتركتها ما رديت عليها
هي تريدلها احد تتكافش وياه اذا ارد اقل رد راح تكافشني وينزل يذب حركته بيه مو بيها .
كملت العشا .. حطيتلهم عشاهم بالهول
واخذت عشا ايوب ليفوك .. لكيته كاعد ورا المكتب كدامه الابتوب ديشتغل عليه ، كتله : كوم اتعشى
-زقنبتني ما اريد
مشيت يمه حطيت ايدي على جتفه : ميخالف حبيبي لتقهر بروحك هاي انت كلتلها البسي وانتهت بعد هي يمها تريد تشتغل او لا يعني الصيحت او ما صيحت راح يفيد بشي ؟
– لج تعبتني بسوالفها جلطتني بلعت منها ومن عمايلها الما يبلعه بشر واكول اختي وامانة ابوي وخليني زين وياها بس طايحة حظظظظ ما تصيرلها كل جارة لا وعلي الاعوج اعوج مثل ذيل جلب لو تحط روحك ويا ما ينعدل
– ميخالف اذكر ربك وصلي على محمد وكوم اتعشى حبيبي
– ما رد عليه
ضل صافن بالحاسبة ضيع شيريد يشتغل
الطفل البطني افتر .. اخذت ايده بسرعة حطيتها على بطني باوعلي : شكو
حجاها والطفل ضرب ايده ابتسم
الله يحفظه
– هم زين عدنا اللي يجيب ضحكتك لو بعز عصبيتك اروح فدوة لابني معدل على امه
– وابوه اعوج مو
– حشاك شفايتلي يطلع على ابوه زلمة بطل وقوي وحباب وحنون
كمت احاجي واحك بلحيته الاعبه اخفف عليه
اخذ نفس وكال : والله تعبوني والقرأن تعبوني هيج الستر معيوب بحيث ما تريد تشتغل بسبب العباية
– تلبسها وعيونك الحلوة تلبسها انت بس اهدأ وكوم اتعشى .. وكلشي ينحل .
كام من مكانه وراح كعد ع التخم كال : ما تتعشين
– ايوب والله الجالي ذبحني معدتي تفور من الحموضة
– وهاي هيج تضلين مالها حل
– شمدريني كل شوية دا اكل خيارة خالتي تكول شعر الطفل يصير ع المعدة
– يا خالتج امي تحجي بكيفها هو كامل حتى شعره غطى على معدتج كلاوات العجايز ولا يبطلنها .. لازم نروح دكتورة تكتبلج علاج اتضلين هيج شيبقى بيج من غير شي صايرة مسلعمة ووجهج اصفر
– هسه هذا جبر خواطر لو ذم مسلعمة شنو
ضحك ودنك ياكل ..
ثاني يوم كاعد ابدل للجامعة .. اندكت الباب فتحتها نجلا : غفران اطيني عباتج عباة امي تكول مال عجايز ما احبها
رحت طلعتلها عباية وانطيتها الها ..
هو كاعد يبدل ويدخل القميص بالبنطرون ويهز براسه : لا حول ولا قوة الا بالله
– ميخالف اتحمل حبيبي دا تشوفها قبلت مشي ولا تصير عصبي وياها تأذي نفسك والله .
نزلت كبله حتى اطلع .. ضايجة وتبجي عبايتي كصيرة عليها طافرة
تكول : شنو جني وهابية هسه هاي وضعيييية
– زين البسي مال خالتي بس اليوم ترا بس تروحين تبصمين وترجعين يعني شغلة نص ساعة متطولين وعود بعدين اشتري عباية شبابية وحلوة تناسبج
– دروحييي مني
تركتها وطلعت ..
داومت ورجعت لكيتها كاعدة ومادة البوز وما تتحاجى رحت لخالتي كتلها : بشري شصار ؟ راحت لو لا
-اي ماخذها بلال ومرجعها بس ما رايدة تلبس العباية
-خالة ترا هم حقه يعرفوه وهو ميتحمل حجي خو تتحمل على كد الشغل وترجع
– غير حجيت ان جان ترد مدري شتريد حار وياها هالولد والله واني احترت ما بينهم لا هي ترضى ولا هو يقنع ، دمشي بدلي وسويلنا لكمة بطني طبكت على ظهري من الجوع ورجلية ما يعينني اكوم لحيلي هدوني الله لا ينطيهم
– لا تدعين خالة ادعيلهم الله يهديهم .. هسه اكوم اسويلج اكل من عيوني .
صعدت بدلت ونزلت سويت مقليات ع السريع وحطيته كدامها وكعدت اكل وياها .. دخل ايوب تمدد ع التخم من التعب .. حجت وياه خالتي ما يرد مطنگر .. عفناه .. شوية وكعد على حيله كال : منو سوا الأكل
-اني ليش
-شوكت اجيتي
-كبل شوية
-بقى
– لا والله رجعت تعبانة وخالتي جوعانة سويته ع السريع بس عادي كول شتريد اسويلك
حجه : لحد الظهر باقية جوعانة يمه !؟
– جا شسوي يا ابني محد منهن موجودة واني رجلية والله ما يعينني اكوم جسمي ماذيني
– ويظل الحال هيج يمه
– جا كلهن راح يشتغلن شبدينا واني مو صحتي الاولية
– يمه اني كايل عليج بس ما طول كل وحدة عدها دوام بعد لازم يترتب الوضع بالبيت مو يرجع يلفن راسهن وينامن وواحد مبتلي
– عيرتني بلكمة مرتك يمه هم اريدها
دفعت الصينية من كدامها
– يمه رحمة للعباس بطلي سوالفج هاي اني كاعد احجي على وضع اللبيت ارجع تعبان ما الكى غدا وانت جوعانة .. وضعية هااااي
– اي غير مرتك تكوم
– غصبا ما عليها تكوم بس يمه بس هي بالبيت؟ مره تشوفين بطنها لخشمها تصير الي لو للجامعة لو للبيت لو المن
اشرتله يهدا : هسه ارتاح وكلي شسويلك
– يمه ما طول انت صاحبة البيت .. شغل البيت يتقسم على ٣ سرى وغفران ونجلاء .
وكفت نجلا : اي كول اريد مرتي ترتاح بروسجن منصبها فوكانا غفران يا غفران شحده اليصخر غفرررران
– تعاي هنا بتل
ونزع البرجله وكاملها وخالتي فزت من مكانها تلزمه وهو يصيح : طايحة الحظ اني كوة على روحي جارعج كاعدة هنا لا فايدة لا زايدة بس دخانج عامي عيوووونه
كام يصيح .. وصعد
خالتي طنكرت تكلي : شاكيتله
– خاله والله والعباس ما شاكية هو من وحده سال كدامج وحجه شوكت خليت بيه حتى تتهميني شاكيتله ترا والقران مو وضعية هاي كافي كلبتوا البيت صارلكم يومين بس عرك وصياح متكلولي شنو اللذة
اخذت الصينية وطلعت كبة سراي مجمدة سويتله مركة صفرة ع السريع على ما خلصت المواعين وصعدتله .. شو هذا طنكر عليه وهاي مو وضعية واني ارجع تعبان ما الكى غداي
اكله : هذا غداك اكل
ما يسمعلي مطنكر وما لكى كدامي غيري يصيح ويغلط واندار عليه ..
تركته بالغرفة يهدا لوحده ومشيت سبحت وارتاحيت جوا الدوش ..
ورجعت هادئ .. دنكت بسته وكتله : حقك والله بعد من الليل اخلص عشاك حتى لترجع جوعان .
– لج بابا اني مو ع الاكل جوعي ما شايف اكل شو الشارع متروس اكل بس مو وضعية هاي .. انت باجر شغل وجامعة وطفل شلون !؟ اقلها تتساعدون مو امي ضالة على لحم بطنها من الصبح للظهر غير تقسم الشغل بيناتجن وترتب وضعجن غير هاي مسؤليتها هم اني اكعد اقسملجن شغل .
-تترتب بس كول يا الله.
حجه بس ما كأنه حجه .. نجلاء تكول لو تموتن عود ما اطخ بالبيت وسرى تجي تكول والله تعبانة وتلف راسها وتنام وتضل خالتي وايوب لازم اني اكوم الهم .. كمت احاول انظف واطبخ المرك من الليل حتى من ارجع ما يبقى عندي بس التمن اسوي واغديهم ويسكتون .
من بعد فترة طلع الكي كارد مالتنا ولازم مباشرة
اول يوم دوام انطوني المقر اللي اداوم بيه
اخذني ايوب ورحنا .. دخلنا ع المدير مال المقر سلم عليه وعرف نفسه رحب بيه وحطلنا ضيافة .. تقارير ايوب الطبية لحد الأن مو سليمة والدكتور كايله اذا تبقى على الوضع هذا رجلك تحتاجلها عملية .. فايوب شرح الوضع للمدير باعتباره جريح حرب واني زوجته يحتاج رعاية
كاله : تأمر حجي وتدلل افرغها من الشغل وخليها لخدمتك انتم خو بدمكم وبجروحكم احنا اليوم موجودين صدگ جذب
ايوب كاله : الله يسلمك لا والله اني ما اريد تفرغها ما ارضى تستلم راتب وما تشتغل .. حالها حال الموظفين بس اللي اريده من عندك تكون حالة استثائية بسبب وضعي بالاجازات والاوفات ..
كاله : تأمر وتدلل حجينا على راسنا .
– سالم راسك يا طيب الله يحفظك وشغلة ثانية ما اريد احد يعرف هي زوجتي او مرت الحجي وهيج امور .. يعني تعرف انت وضعنا حرج شوية
كاله : لا لا بالعكس هذا من صالحنا لان اذا يعرفون احنا ننذم على ابو زوجة فلان يتساهلون وياها وتعرف الحجي انت بعد ما حاج اشرحلك
– عاشت ايدك ، يلا ابويه بعد انت روحي واني اتوكل
-الله يحفظك حجي تكوم بالسلامة ان شاءالله
كمت طلعت من غرفة المدير العام
موظف واكف كال : بلا زحمة اختي منا
مشيت كدامه ورحت لغرفة مدير الأدارة
جان ما موجود .. دخل كال : غفران عصام
– نعم استاذ
– اهلا وسهلا بيج
– خريجة دارسة شنو وضعج
– دا ادرس هندسة نفط
– تعرفين للحاسبة ؟
– اي اعرف
– جيد اللغة العربية عندج شلونها ؟ تجيدين النحو
-اني قارئة كتب وكتب يعني مو اي كتب كتب دين وبلاغة وفلسفة ودين وعربيتي اكدر اكول ممتازة يعني في حال احتاجيتو مصحح لغة عربية او تتدقيق لغوي راح اكدر افيدكم
– عاااااشت ايدج ممتاز .. شوفي ست احنا نظرا للوضع الخاص بحضرتج راح انخليج اتداومين يومين حضور .. و٣ايام شغل من داخل البيت يعني بالأيام اللي ما تجين بيها للشغل انت مطالبة بشغل على الانترنت متابعة وتدقيق لغوي من والى ساعات تتحدد من قبل المدير الخاص بعملج
– تمام
رفع السماعة مال تليفون ارضي .. اجا ولد دخل .. كال : تاخذ الست غفران تدليها بمكان عملها
– تأمر استاذ
اخذوني ودخلني بقسم متابعة وتدقيق
اكو اثنين بنات كاعدات ورا الحاسبة .. كعدت بمكان اجت بنية طلعت مسؤلة القسم .. كعدتني على حاسبة وانطتني تجربة عملية عن التدقيق .. اشتغلت كالت : جيد
راح يترتب وضعج ويانا ..
تداومين اثنين واربعاء وباقي الأيام راح يكون شغلج على التليكرام عن طريق الحاسوب نبعثلج ملف بمواد تدققيها وتصحصيها وتبعثيها ملف .. اي ساعة يناسبج العمل الالكتروني ؟
كتلها : ما بعد العصر يا ريت
كالت تمام من ٤ العصر لل٩ بالليل راح يكون شغلج على الحاسبة لازم تكونين متابعة على اي وقت يندز ملف يتصحح بنفس الوقت … وان شالله انت اختنا واي شي تحتاجي احنا بالخدمة .
– الله يخليج حبيبتي تسلمين
كعدت بمكاني فد شعور غريب خوف على رهبة على فرح
اني صرت موظفة وعندي راتب .. صفنت .. ربي ديحققلي اكثر من احلامي وطموحاتي .. ذاكرتي عصفت للأيام الاحمد يكتلني بيها ويريد يزوجني لاخو هيفاء .. شلون ربي بعثر الفكرة وعرضلي ايوب وسهل طريقي بهالشكل ما اعرف .. ديرتبلي حياتي بأفضل من اللي اني راسمتها .. دمعت عيني .. وثقت بيه وسلمت امري اله ونقلني من حال لحال ، من بنية يتيمة لا حول ولا قوة اخوها ميتغل ضعفها وما عدها غير ربها تستنجد بيه .. الى انسانة بيت ورجال يحبني ويخاف الله بيه وحامل منه بولد وجامعة ووظيفة وامور افضل مني اللي اني اختاريتها لنفسي .. لا شك رب العالمين ديعرضلي ذاكرتي حتى يكولي ومن يتوكل عليه فهو حسبه ان الله بالغ امره … الف الحمدلله والشكر .
طلعت يومها من الدوام واني الدنيا ما واسعتني
امشي حتى بيطني محاسة بثكلها هلكد ما طايرة من الفرح .
واني امشي .. عرضتلي افكاري ..
سياسة الحياة الله ما يرفع احد فوك ويحطه ع القمة ويوفقه
اذا ما يحط كدامه منحدر يمتحنه بيه حتى يشوفه ويختبر عبده يبقى عابد شاكر اله لو يتكبر ويتخلف عن ربه !
اسلك ربي وسيدي ومولاي لا تكلني لنفسي
اجعلني ما تحب لا ما انا احب ووفقني لما تحب لا ما لأنا احب
اشكرك ربي واحمدك على نعمتك .
رجعت للبيت صليت صلاة شكر طويلة
وكعدت دعاء عريض ادعي بيه ربي واشكره على توفيق وتسهيله لأموري
اني جنت مطمئنة ما راح يضرني شي وانت موجود لا خبث البشر ولا كيد ساحر ولا اي شي راح يضرني ويوكفني عن طريقي وانت موجود بجانبي .. شعور كلش كلش حلو من تحس اكو طاقة ربانية تحيطك وتحاوطك وتحميك وانت ممسوي شي مجرد تؤمن بملب صافي انو الله راح يوفقني الله راح ينصفني .. ربي ما يترك عبد رجاه ابد .
رتبت امور شغلي .. يومين دوام وجامعتي ٣ ايام وبلغت العميد بوضعي ومسهلي لإن يعرفني حامل وقدر الأمكان جاي اركض باديه ورجليه علمود اوفق ما بين دراستي وشغلي والبيت حملي وايوب .
ما جان الموضوع سهل ابد
اكعد من الصبح اروح للدوام .. ارجع اصلي واسوي غدا وارجع اغسل مواعين واصعد احط الحاسبة واشتغل لحد ماصير صلاة المغرب اصلي والحاسبة كبالي .. وانزلها وياي اسوي العشا .. واراقب خاف مادة تنزل .. واكمل تنظيف وطبخ باجر واصعد ب١٠ اسبح وابدل وارتب نفسي حتى ليكول ايوب هاملتني او او اقصر بحقه يبقى رجال واله حق عليه حتى لو جنت تعبانة .. مرات يقدر من يشوفني تعبانة ميطلب مني شي يكولي نامي ارتاحي ومرات كأي رجل يريد حقوقه ويريد مرة تغازل وتدلع وتسولف وتضحك ..
جنت من التعب اوصل مرحلة اريد ابجي
بس اكول الطموح اله ثمن وهذا ثمن طموحي ولازم اتحمل واجري عند ربي ما يروح تعبي بأحد .. لا اريد اتعاين ولا اكول غيري كاعد واني اشتغل ولا اشكي ما طول ربي انطاني اللي اريده تعبي محسوب ويزيد بدرجتي عنده على كد تعبي .. يوفقني .
مرات جان ايوب اذا ما يطلع يشيل عني شغل الحاسبة هو هم قوي باللغة العربية ويمكن بعد اقوى مني بالنحو .. يحط الحاسبة يمه واي مادة تنزل هو يشتغلها ويحاول يخفف عني بهالطريقة بما انو ما يكدر ينظف لو يطبخ بدالي .
مرت الايام واجت ايام نهاية السنة الدراسية
اخذ زمنية من دوامي بيوم الدوام واروح امتحن واطلع بوجهي للمقر ..
اجاني تبليغ كالوا : طالبيج بالأدارة
كلت : راح ينطوني انذار لان اخذ زمنية واني اداوم يومين وغيري ديدارم اسبوع كامل ..
بس من وصلت للمدير كالي : ست غفران متعرضة لحادث او احد معترض طريقج !؟
– لا استاذ ليش !؟
– عرضلي ع الشاشة كال : تعرفين صاحب السيارة
وكام يقرب بالصورة بكاميرات المراقبة مال المقر .. باوعت سيارة النترا ..
قرب الشكل كأنه ساري .. هو مو هو معقولة ! ساري شعنده لاحكني للمقر
حجه : تعرفي ؟
– لا استاذ ما اعرفه
خفت انطق اي شي وادخل سي وجيم وتحقيق وابتلي نكرته
كال : وضعج ست مو مثل وضع اي موظف انت زوجج حجي ومكان حساس و وصار اكثر من مرة هذه السيارة الالنترا كاعد تتبعج لحد ما توصلين المقر .. وتطلع بوجها .. وهذا ينظرنا استهداف امني فاذا ما تعرفي راح ارفع كتاب للمقر العام بلغهم بالموضوع .
– تمام استاذ سوي اللي تشوفه مناسب
رجعت ارجف من الخوف .. ساري شعنده ديتبعني هالولد مخبل ديتبعني لمقر امني حتى يحجي للناس اني شنو ووين اشتغل وعود هو الخارق اليفتهم كلشي ذوله مينلعب وياهم وهيج حالة يعتبروها لربما استهداف ارهابي لزوجة حجي بالحشد .
يومها لا نزلت ولا شفت احد ولا كلشي ماكو
بقيت بغرفتي حتى عقلي ما ياخذ قراية .. سألني ايوب شبيج صاير شي
كتله لا بس الحمل مأذيني
ثاني يوم اجا ايوب كال : غفران منو هذا الكاعد يتبعج ؟
-ما اعرف بلغني المدير بس ما اعرفه
– شلون ما تعرفي الولد شالوه امن الحشد وطلعت معلوماته طالب بجامعتج
ارتبكت والخوف سيطر على كلبي كتله : بجامعتي منين ما ادري ما شايفته
– يعني ما شايفته
– جامعتي جبيرة يعني خوما اعرف كل الوجوه ما ادري
ضل يباوع بوجهي : متأكدة ؟
– اي
– ها ، زين
سكت بس ما اعتقد صدكني من جوابه .. يمكن حس اني ارتبكت
رغم كمت اسوي بنفسي متألمة من بطني وصدك بطني احس الطفل حس بيه كام يلوف لوف ببطني تصير عندي دفعات جوا ع الحوض يأذيني .. كمت امشي وافتر
كال بيج شي ؟
– لا بس الجاهل كاعد يدفع ليجوا اني نهاية الثامن معقولة الوحدة تطلك بهيج وكت
– طلوكيش يمعودة بعدلج هواي
– ما ادري شو ديأذيني حيل
كام نزل لامه كالت : خل اخذها للقابلة تكشف عليها
كاللها : يمه مرتي ما اوديها لقابلة اخذها لمستشفى
كالتله : هسه بس خل تكشف عليها خاطر اذا عدها طلوكة نطلع بيها للمستشفى
اخذني هو وياها وودوني للقابلة كالتلي الطفل كلش نازل خطية لازم ترتاح الطفل ما كامل .. اقلها تاخذلها ١٠ ايام من التاسع وتجيب اذا اتجيب هسه يمكن الطفل يجي ما كامل .. خلي ترتاح لحد ما بعد العاشر بس الطفل يكمل
ايوب سمع هيج اتخبل كال بعد ممنوع تشتغلين وممنوع تكومين وكل لشة بهاي البيت تتعلك من كراعها
اني مهامني الشغل ولا هامني اللي ابطني
اللي هامني سالفة هذا الشيطان اللي اسمه ساري اخاف يورطني
هسه يورطني بيش .. اني شمسوية ياربي .. ايوب اذا عرف اني اعرفه وهذا يتبعني حرام لا شغل ولا جامعة يخليني هسه يكول هذا مستهدفج وهذا مدسوس وهذا عنده شي ويصنعله افلام ما اكدر احجي .. ربي ساعدني دخيلك .. بس كون تخلص امتحاناتي على خير واكعد ما بقالي ٤ امتحانات
داومت ثاني يوم .. اديت امتحاني
جان زهراء تكلي : ساري تعرفي
– اي شبي
– مفقود صارله يومين محد يعرف عنه شي
– ليش شمسوي
– ما اعرف حتى اهله للجامعة اجو وسألو عليه ماكو احتارو وين يلكوه حتى محمد خطية محترك حرك عليه .
– مالي علاقة هسه نحتار بساري لو نحتار بامتحانه الله يرجعه بالسلامة يمعودة امشي
ثاني ثالث يوم هم داومت .. ساري مفقود .
كلبي كام ياكلني من الخوف .. متمددة يم ايوب سألته من ضمن السوالف : اكلك صدك ما عرفوا منو هذا الكاعد يتبعني من الجامعة
– ما عندي خبر عن التحقيق
– يعني هم راح يرفعوه تحقيق
– لا راح يرفعوه فلقه ويزوعوه حليب امه حتى يعترف شعنده يتبع موظفة تابعة الهم ووضعها حساس .. منو دازه شنو نيته المن ينتمي .. اذا ما طلع عنده شي يعوفوه .
– هاه
– ليش
– ما ادري ضل بالي منو هذا اليتبعني لدوامي من جامعتي
– انت كون حاجية بالدوام انت وين تشتغلين ؟
– لا والله محاجية حتى زهراء صديقتي متعرف
عدا الموضوع محسيته شك بشي مدري شاك وميبين ايوب يخوف ما تنحزر ردات فعله .
داومت جامعة جان اخر يوم زهراء كالت : لكو ساري
– كتلها صدك وين لكوه
كالت : ما ادري محمد كال جماعة ماخذي لاعبين بيه جولة بس من شايفين ما عنده شي عايفي
– الحمدلله
كملت امتحاني وكاعد دا اطلع ..
جان توصلني رسالة مكتوب بيها ( سهلة )
انقبض گلبي كتلها : زهراء تعرفين هذا الرقم
بس بدون ما اشوفها الرسالة .. درجته عدها جان تكول : اي رقم ساري
يا ربي اني كالت هيج لو جسمي كله اهتز من الخوف
بطني لزمن مغص مدري طلوك ما ادري ..
ردت اطلع بالسيارة ما كدرت احس الوجع اللي عندي بعد ما اتحمله ولا اشوف منه كمت اصيح وزهراء يمي بالسيارة تحجي وياي كتلها : اخذي تليفوني خابري على ايوب يجيني بسرعة مدا اتحمل بسرررعة
اخذت التليفون .. وهي تكلي الرمز فتحيلياه
فتحتلها واني لازمة خصري واتلوى من الوجع
رفعت عيني واني واصيح : ااااااخ
وجان يطلع ساري بالكراج شاد راسه وجهج مزورك وبسيارته يباوعلي بنظرات تخوف .. هنا كلبي وكع من الخوف وانوب ايوب جاي وهو موجود دخيلك يا ربي رحت بيها …..
يتبع….
- يتبع الفصل التالي اضغط على (رواية صوت من المجهول) اسم الرواية