رواية صوت من المجهول الفصل الحادي و الثلاثون 31 - بقلم زينب ماجد
طلع ايوب .. صرخ : نزلي ولج ابوج يريدج
– ايوب بس على كيفك وياها
– اشششش ما اسمع نفس من اي احد .. امشي لا اخلص منج ومن امج طايحات الحظ .. انزلي
نبأ تصرخ وتكله : خالو اروح ويا امي عليك الله
– امج لو تريديج ما سوت سوايتها ونزلت راسي .. امشي كدااامي اصعد بلال جيبها .. صعد بلال شالها من الدرج ونزل بيها حطها ع الكاع وهي فرفحت ونجلاء سرى وخالتي يجرون بيها .. كمت ارجف ما ادري شسوي جريتها وخليتها وراي : كل لابوها يروح ما تروح
دفعني ايوب : صيري على صفحة ولا ادخلين روحج لا ومحد اسحلج وياهم وخريييي
– ايوب الطفلة ما لازم تروح هناك .. تخاف
-اكلج معلييييج انت
جرني ودفعني منها وجراها رجعت اتلاوى وياه: كتلك متروح
-وخررررري مني لج
ولزمني من راسي كام بلال يفاكك بينا
دفعته من عندي وكتله : كاااافي هجمت البيت على روسنا البنية شذنبها بذنب امها تعاقبها لييييش هاي امها كدامك سوي اللي يعجبك بيها البنية مالها علاقة
– ترد لابوهاااااا اني ياهو مالتي اتحملهااااا
– ما كاعدة عندك كاعدة ابيت جدها وهاي جدتها
بلال : يمعودين جا هسه وكتكم .. دكولو يا الله
دفعت نبا ع الدرج وكتلها اركضي للغرفة .. ركضت وهو راد يتلزمها جريته .. سطرني راشدي دفعته مني وصعدت ع الدرج وراها .. لحكنه .. دخلت الغرفة وقفلتها وكفت بالباب كتله : بيت جدها اهل ابوها كلهم ولد ودا يتحرشون بيها ايوب خاف الله بالبنية
– طلعيها
– لا تدفر ع الباب علوش جوا لا تفزز الطفل ايوب افهمممم
– دقيقتين اذا ما جبتيها هنا اكسرج والله
– نزل وعمه يصيح من جوا : شنهو عمي شبيكم جا كلبت على مرتك
كام يصيح : دقيقتين والله اذا ما جابتها اصعد اشمرها من فووووك
نزلت ع الدرج واحجي : ترا حرام عليك البنية ما كاعدة ابيتك ولا ماكلة من زادك بيت جدها هذا وراتب جدها موجود .. وما دام بيبيتها موجودة تبقى يم بيبيتها واحنا ما عدنا ولد بالبيت كلنا بنات ليش تريد تشمرها بنص بيت كله ولد وهي صغيرة
– انت ياهووو مالتج بت الاودم عم وليد خال بنية انزززززلي
– اني مالي علاقة بس البنية صارلها ساعة تبجي يمه .. خالة احجي شبيج .. البنية كاعد يتحرشون بيها ابيت جدها شلون ترضين تطيها
حجت خالتي : وابوها اذا ما حواها وحماها انا شكدر باجر عكبة يصيرلها شي نبتلي
حجه عمه : ياهو المتحارش ببالبنية وياهو الكال هالكلام صحيح
– هي البنية بذاتها كاعد دا تحجي وتبجي وتخاف تروح لبيت جدها اهل ابوها
كام يصيح ايوب : انت اذا ما طلعتي روحج من السالفة اصعدلج والعباس اخبزج
عمه : ايوب بس اهدأ خلي نفهم السالفة شني
– عمي ما اتحمل بت نجلاء انا .. امها ما حويتها احوي هاي الملسونة وهي بعدها بكد القندرة
– وتشمرها ابيت جدها يمكن يغتصبوها يسوولها شي بذمتمن عمو
– لزم الدرج ايوب راد يصعد .. لزمه عمي : بس اهدأ بلال اخذ ايوب برا .. وخلي اتفاهم ويا امها
راح على نجلاء كالتله : عمي عمامها وبيت جدها مو خوش اوادم فساد اكثر من مرة البنية كلتلي يتحرشون بيها لهالسبب ما اخليها تروح لابوها ابوها مهمل ما يدري عنها عمو مستعدة اتحمل كلشي بس لا تنطوها
كاعد استمع لنجلاء واسمع صوت علوش .. كام يبجي بقوة
صعدتله اخذته وكتلها : انزلي وياي
نزلتها ودخلتها لغرفة خالتي نجلاء وخالتي وسرى وكعدت نبأ
كام عمي يسولف وياها كل دمعة تبجيها وهي تشكي لعمي تكول شلال
واكفة اني بالباب واهز بعلوش اريد اسكته بس يبجي .. وكف ايوب
دفعته : عليك الله اهدأ البنية مالها ذنب خاف الله بيها ..
– دفعني من كدامه ووكف يسمتمع ويا عمي
وهي تحلف وتسولف وتباوع لأيوب .. علوش ما يسكت نط من البجي ..
صاح ايوب : سكتييي
فز الطفل وسكر من البجي ..
طلعت بيه اهز بيه ادك على ظهره .. ماما حبيبي شبيك ابني ..
شو هذا سكر وعيونه كلبت كمت اصيح : يممممه ابني .. ماما شبيييك ايووووووب ابنييييي
ركضلي سحبه من ايدي .. كام يدك على ظهره ينكث بيه تخشب الطفل
كمت اضرب بايوب ابني ماااات يمممممممممه .. ايووووب ابني
ركض بلال وعمي يجروه منه .. ينكثون بالطفل ..
عمي يضرب عليه ايوب تخبل كام يصرخ .. جره بلال وركض بيه وايوب يركض وراه .. اني كمت الطم على راسي واصيح ابني راح يممممه ابني مااااات
تراكضوا بيه وصعدوا السيارات
جريت عباية عمتي وركضت وراهم .. طلعوا السيارة يريدون يطلعون
كمت اصرخ اريدهم يوكفون .. وكفت السيارة وصعدت بيها ايوب لازمه ويدك عليه كمت اصرخ واجر بيه اكله : انطيني ابني من ورااااك فززته موتت ابني الله لاي نطييسيك
جريته من عنده ..
اهز بيه اريد ابني متخربط بيدي ما يحس
نزلنا على مضمد للسرعة جراه ايوب ونزلت اركض وراه ..
المضمد جرا وحط راسه جوا المي .. ولزم الطفل من رجله نكثه وهو يلزم براسه نكثة نكثتين شهك الطفل كاله : اركض بيه للمستشفى هذا عنده شمر
اخذه ايوبه حطه على كلبه وصعدنا السيارة ولازمه يحاجي
بابا علوش .. ابني بس افتح ابجي حبيبي .. كلبي فرفح راحت روحي كلت ابني راح من اديه .. يهز براسه ويضرب على خده .. بجى وطلع صوت
صاح : الحمدلله ما دام طلع صوت بخير بخير لا تخاف عليه
واني ابجي وياه واصيح :انطيني ابني
حطه على كلبه وبس مغمض عيونه جريته من ايده وكتله: انطينياه كله منك انطينييي
كام يبجي بقوة .. ابوس بيه واتفقده وامسح المي والعرك من وجهه
وهو زاد كام يبجي بقوة .. غطيت روحي وحطيته جوا العباية وطلعتله صدري وكمت ارضعه كام يرضع .. كمت ابجي واشهك واني اتلمسه واباوعله
ايوب دنك وهو حاط راسه بنص اديه وحيله انهد
وصلنا للمستشفى … هو شبعان ونايم .. شلته ونزلنا بلال كدامنا وايوب يمشي على مشيتي ويحط ايده وراي ازدحاااااام وهوسة مستشفى تلعب النفس وامراض واشكال الصاحي ميطيق يشوفها كتله : ما ادخل ابني بهالمستشفى اذا اجيبه مرض يصبح بعشرة اخذه لمستشفى اهلي ما اريد هذا
كال : بس خلي يفحصه دكتور
– على يا سديا يفحصه ذني النايم عليهن ياهو الجان باوع الوصخ باع الدم اطلع
كام يباوع هو هم لعبت نفسه
كاله : بلال خلي انشوفلنا مستشفى اهلي مال اطفال
رجعنا للسيارة وطلعنا لمستشفى ثانية اهليه
ع الرسبشن انطينا الحالة كصلنا الدكتور الفلاني .. صعدنا المصعد لكينا الدكتور كاعد ما عنده شي .. دياكل ويباوع من شافنا كام تلكى الطفل من عدنا وحطه على سديه نظيفة وعليها فراش ابو استخدام مرة وحدة
حجاله ايوب الحالة ودزه على بطل مغذي وادوية ينزل يجيبهم من جوا
امي كامت تدك ندسني : اطلعي احجي برا
رفضت امي وبقيت اجاوب الدكتور شبيه وشصار وياه ..
انطيته كل المعلومات .. واخذ الكانيولا .. ديريد يحطها بأيده
هو سمين مدببدب .. مد الكانيولا يدور وريد .. فز علوش يصرخ حجه الدكتور لأيوب : الزمه اليه
دنك ايوب يلزم بيه والدكتور يدور وريد ماكو طلعها والدم من ايد ابني كام يصب .. كمت امسح بوجهي واعصر بعيوني .. احس كاعد يدخل ابرته بكلبي مو بيده ..
حجه ايوب : اطلعي اذا ما تتحملين
– اني اللي ما اتحمل لو هو شو ايده شكدوتها مو مال كانيولا
حجه الدكتور : بس ياخذ المغذي نشيله من ايده
ما لكى وريد بأيده كلب ع الايد الثانية وعلوش من البجي
كمت الزم بأيد ايوب واعصر بيها : ابني ايوووب ابني
– بس اصبري يا بويه هسه الزمج لو الزم ابنج
الزم بكلبي واعصر بيه احس كلبي يريد يطلع من مكانه جمر واني اشوف ايد ابني كلها دم .
ثبتها بأيده وحطله المغذي .. وكتبله راجيتة علاج ووصانا نجنبه الاصوات العالية ولا نخلي يوصل مرحلة بالبجي لإن عنده شهكة من يشهكها ينشمر واكثر من مرة اذا انشمر تأثر على دماغه وينشل لا سامح الله
كمنا نتراجف اني وايوب من سمعنا هالحجي ..
خلصنا واخذنا تقريبا الساعة ب١١ وفوك .. شلت ابني ورجعنا بيه
لكينه عمي بعده مرايح خطية منتظرنا .. كاله : ايوب نجلاء وبتها الهن حوبة يم الله فرفح كلبها والله طلعها بيك وشوفك شكد الضنا عزيز وما ينطي .. خلي البنية عمي وجدتها موجودة اداريها .
اني اخذت ابني وصعدت .. كام يبجي دخلت بدلتله ملابسه وحفوظته
وكمطته .. وكعدت ارضعه .. خابرت امي كمت اسولفلها الصار وهي يا ويا وغير تخابرين وغير تكولين .. كتلها : بعد ما اتذكرت روحي حتى اخابر احد
كاعد احجي ويا امي .. دخل ايوب .. كتلها : ماما بعدين نحجي هسه كلش تعبانة
سديته منها واجا ايوب دنك عليه وباسه : انطنياه
– ديرضع
– لا تحطي بكاروكه .. نومي بيناتنا ورضعي .. حتى لا يفز ويبجي
كملت رضاعته دا اريد احطه بصفه كال : جيبيه على كلبي خلي انومه
حطه على صدره وكام يروح منا ويجي منا يهزه علمود لا يكعد .. غطيتهم اثنينهم وجريت المخدة خليتها قريبه من جافه حتى انام يمهم .. فتحلي ايده ونومني على صدره صرت بصف علوش حطيت ايدي عليه وايوب حضنا اثنينا ونمنا .
ما كعدنا غير للصبح .. حتى الشمس طالعة
علوش جاع .. نمت صفح وحطيته على ايدي .. ارضعه وايوب حضني من ظهري ونام .. لحد ما شبع كمت من بيناتهم .. رحت توضيت وصليت ..كعد ايوب راح غسل وصلى وبدل ردت انزل اسويله ريوك كال : لا ما اريد شي غير تبقين يمه لا تخلي يبجي ابد .
رجعت نمت بصف علوش لحد ما صارت ب١٠ كعدت
نزلت خالتي كاعدة خليت يمها علوش طاير كلبها عليه تناغيله وتكله : بيبي خذيت كلوبنا عليك ليش هيج سويت بينا بيبي
بقيت اشتغل لحد ما اجا ايوب اخذه ويكله : بابا حبيبي من عمري على عمرك باباتي هديت حيلي والله ..
وكام يسولف لامه يكللها الله يساعد كل ام واب كل شهيد اني شفته بهالحال وعلي اريد اوكف على رجليه كوه اجر بيهن من الكاع هلكد ما بادن
يحجيها وهو يرفع بعلاوي يلاعبه وعلاوي يضحك ويهز بروحه يريد يهوس بيه .. كام يهوسله ويرفع بيه .
وصارت صنطة على سالفة نجلاء
منطيهم مهلة اسبوعين بس يطيب ابنهم ويطيب وجه نجلاء يجون يخطبوها وياخذوها .. اما سالفة نبأ محد جاب سيرة روحتها لابوها .
من بعد ٣ اسابيع ..
جابوا مشية وخطبوها طلع الرجال متزوج .. ومن صارت المشكلة زعلت كامت ورفعت عليه دعوى تريده يطلكها … وفكر كاعد ويا اهله .. لا عنده وظيفة لا عنده بيت ملك عنده محل موبايلات براس الشارع .
اهل العريس جان ابالهم .. العقد وبعد اسبوعين العرس
ايوب رفض وكاللهم : لا اريده ولا اريد اشوف ركعة وجهه ياخذها ويطلع ..
اخذها على غرفة مرته القديمة ويا اهله .. لا ذهب لا نيشان لا مهر كلشي ماكو .
من بعد عرس نجلاء بيومين اجا يوسف عباله بته تنتقل ويا امها عد اهل العريس اتفق وياه ايوب تبقى عدنا لان بنته ما تقبل تروح عنده
يوسف كاله : والله ابو عرب انا امن عليها ابيتك اكثر من عدنا اقلها بيتك ما بيه ولد بس جدتها وخالاتها
كاله ايوب : بس هذا عمر وهي بنية يوم تغلط يوم تطلع عن الطريق اني ما مسؤل مو امها راحت اتزوجت وانت ما تتحول مسؤليتك ولو صار شي تحطوني وجه المدفع العلي بتكم اربيها واداريها واعتني بيها اي غلط يصدر منها انت وامهم السبب اليكلي خوية جا عدك اشك حلكه برجلي والله من ما صرتو خوش اوادم وتحملتوا لخاطر بتكم انا ما اصير مسؤل
ولا اصير شماعة لاغلاطكم
كاله : هاهية يوم التغلط لو صار شي منها خابرني اني اجي عليها اخذها .
رجع ايوب كل لخالتي الحجي كالتله : زين سويت .
خلصت المشكلة على خير ..
ورجعت هدت حياتنا .. وروتين يومي عادي .. ما بين شغل وتنظيف بيت وابني ورجلي .. ايوب يطلع الصبح للشغل .. ويرجع الظهر .. ويرجع يطلع العصر ما يجيبه غير ١١ او ١٢ بالليل .. واني اخلص شغلي واكعد ابدل وارتب بنفسي واتنطره يتعشى ويلعب ويا علوشي شوية ونكعد ساعة النا نختلي بيها .. وهذا روتين كل يوم .
لحد ما اجا الدوام مالتي ..
احتاريت شلون اداوم وابني موجود .. لا اكدر اخذه ويايا عمره ٤ اشهر
وايوب عنده شغل .. وخالتي تنام الصبح .. ما تكعد لل١٠ ل١١ .. ومرات ويا صلاة الظهر تكعد .
اتفقت ويا امي كتلها : يوم يصير اجيبلج علوش الصبح كبل لا اروح للدوام ابقي يمج ومن ارجع اخذه منج
كالت : يا يمه احطه على كلبي شفايتلي ييمه اكابل ابنج واشوف طولج علي كل يوم جيبي
– فدوة الكلبج يمه الله يحفظج اليه
كعدت الصبح ..
بدلت لابني وجهزت جنطته وايوب ديبدل كال :- شدسويين ؟
– اخذ علوش لامي
– لأمج ؟
– اي لعد وين اعوفه !؟
– وبيش الساعة تجيبي
– اخلص واجي ..
– بس هاي مو حالة يومية قالقة راحة الطفل علمود جامعتج !
– ايوب لعد شسوي ابطل
– لا اجلي سنة خلي يكبر
– ولو اجلت سنة شنو راح يتغير يوكل روحه لو يعتني بنفسه بالعكس يصير اتعب لان يكوم يمشي ويتحرك ما ينكدر هسه ميتعب احد بس ع الممة
– هذا الوضع ما يعجب غفران
– ايوب يعني شبيدي
– البيدج تبطلين
– ابطل شنو هاي شبيك
طنكر وما حجه .. بدلت واخذت ابني ونزلت سويت ريوك ايوب كعد تريك وعلوش ع الطاول بالشيالة مالته .. اتريكت ويا ايوب مرت نبأ سويتلها لفة وخليتها بعلاكة وكتلها : اكليها بالمدرسة وايوب انطاها الف مصرف واحت تركض للخط مالها
وعلوش يناغي ويضحك لوحده .. حجه ايوب : ليش ما تبقى يم امي ؟
– ما اريد اكلفها وامي كيفت اوصله واطلع لجامعتي
ما عاجبه الحجي
والله ما ادري .. عاف الاكل وكام
رحت للجامعة دفعت اول قسط جامعي بالمرحلة الثانية وداومت .. جانت زهراء جاية خلصت الوقت كله وياها وسوالف عن العطلة وعن علوش ووجوده بحياتي .
كملت وطلعت لبيت اهلي امي مسبحه ابني ومكحلته ومسوية بيه فد اجواء كالت : شنو رأيج تعرفيلياه وتمشين بعد ما اريدج ولا اطالب بيه
-يمعودة علمود من الباب يطردوني هو منو الميت عليه بكده
-بهاي حقهم انت بيش الكيلو ولج هذا علش
– الله يحفظج ماما مشكورة تعبتج
– لا ييمه ما اتعب من بزركم ذولة لبة گلبي .. كعدي تغدي ييمه اكليلج الكيمة كبل لا تروحين
– يمه خل امشي اسوي الغدا كبل لا يجي ايوب خطية يرجع جوعان
– دكعدي اكلي وهسه اعزل غداه من عدنا مسوين سوب ابيض ودجاج وتمن برياني
– والله … ااا ما اكول لا حيل جوعانة
– سودة بوجهي يمه ..
ركضت صبتلي اكل كتلها : اني اصب يمه شنو انت تصبين
– لا ما عدي شي انت تعيبانة
حطتلي ع الطاولة كمت اكل وهي شايلة ابني وعزلتلي غدا ايوب
نسرين وجهالها جانت عد اهلها .
شبعت ردت اخذ علوش من ايدها ، كالت : كسر عليه الوحشة لو تعوفي عدي متونسة وياه
– غير يتخبل ايوب جيبي
كامت تشمشم بيه لحد ما انطتنياه هو والممة والحليب وغراضه
شلته خليته بالسيارة واخذت الغدا .. ورحت لبيتي هستوني صفيت سيارتي صف وراي ايوب نزلت شلت علوش نزل اخذه من ايدي دخل وهو يبوس بيه
-هسه يلا اجيتو الساعة ٢ ونص
-مو اتغديت يم امي ودزتلك غداك .. برياني ودجاج
-ااااااالله اموت على طبخ امج
-دخذ علوش لعد خلي احمي واصبلك
اخذه يلاعبه .. واني نزعت عباتي وحطيت الجدورة ع النار وحميت الأكل وسويت زلاطة واخذت الصينية خليتها كدامه هو وخالتي .. كالت : هذا انت طابخته
– لا امي
– وشوداج على امج
– بقيت علوش يمها ومن اجيت من دوامي جبته
-بقى اكل لو خلص
– لا خلص بس الاكل هواية خالة انت وايوب
– وشني الله وصى بينا بس انا ويايوب ماكو غيرنا بالبيت ياكل بت نجيلا ظالة على لحم بطنها من الصبح
– هسه اسويله لفة
– لفة شنو طبخ مال اوادم نكضيها لفات
– خالة هستوني اجيت من الدوام حتى بعدني ممصلية وانت وايوب اتغديتوا بعد المن اطبخ
– للبيت
– هو منو ضل ؟ انت وايوب دا تتغدون
– سرى ما تاكل نبأ ما تاكل
حجه ايوب : بعد خلصي عشاج من الليل واحمي من ترجعين
– صار
كاعد اخذ ابني ، حجت خالتي : ونظل احنا تنترس بطونا اكل محمى عيشتيش هاي
– خالة هذا اللي اكدر عليه دا اسوي بعد شنو بيدي
– بيدج تكابلين ابنج وتكعدين يا جامعة يا شغل
– خالة ليش عليا مو موظفة نجلاء مو موظفة وهن متزوجات وعدهن جهال اني شنو فرقي عنهن !؟
– مرتبات امورهن خوما اكل بايت
– هسه حطيت كدامج اكل بايت خالة النعمة كدامج سمي باسم الله واكلي
تكل لايوب : والله الوضع هذا ما يعجب
صعدت وعرف ايوب منين جت على بالك سالفة تبطيلتي .. والا شنو جديدة اني راح اداوم جامعة حتى لو عندي طفل من قبل لا احبل متفق وياي جيبيلي طفل .. وكملي مالج علاقة بيه
سكتت وغلست وكأنما ما سمعت شي سويت مرك من الليل ونظفت ثاني يوم .. ثاني يوم وديت ابني وبرجعتي جبته امي حطتلي غداي لإن جنت مستعجلة .. رجعت للبيت حطيت جدورة امي على صفحة ووكفت اسوي التمن وبعدا يتهدر .. ايوب دخل .. كال : ميت جوع
كتله : اصعد بدل وصلي وانزل اصبلك
كام يتفقد الاكل .. وشاف اكل امي
كال : هذا هم من امج
– اي
– صبيلي طبخ امج
حميته اله وصبيتله .. ونزل يتغدا يمي كالت : شو اليوم هنا تتغدا
كاللها : مستعجل عندي شغل يمه
حجت : صبيلي اكعد وياه
صبيتلها من جدورتنا كالت : شو اكل ايوب غير
كاللها : من خالتي موديته
-جا واحنا وحد ؟
-خالة اكل امي بارد حميته انت سويتلج اكل حار
دفعت الاكل من كدامها وطنكرت ايوب عاف الأكل وكام منزعج
صعدت ارضع ابني على صدري
اني حاسبة حسابي من اول ما جبت مقدار الممة باليوم ٣ مرات على ٣ ارقام وانطي صدري حتى لا ينفر الممة ميشربها ولا ينفر صدري ما اريد اشمره ع الممة واحرمه من فوائد حليبي ما اريد اقصر اتجاه ابني حتى لو جنت مشغولة .. ارضع بيه وهو يلعب بوجهي يلزم بخشمي ويناغي وهو يرضع واني داخلك فد جو يجنن وياه بالرضاعة
دخل ايوب .. عاكد حواجبه
ما سألته ولا حجيت .. اعرف علته .. بقيت اناغي لأبني والاعبه ..
حجه : غفران راح يضل الوضع هيج ؟
– شبيه الوضع
– عاجبج
– اي لعد ليش بيش دا اقصر ايوب !؟ والله دا اركض ليل ونهار من الطفل للبيت للدراسه الك شصير
– وشلج بهالمعمعة !؟ خو اكعدي
– ايوب جامعتي شنو اكعد وبعدين دفعت قسط اول دفعة
– اسحبيها واكعدي
– وليش اكعد اذا لا مقصرة عليك وعلى ابني ولا ع البيت
– ودصير مشاكل وسالفة روحتج يومية لاهلج وتعوفين الطفل هناك ومعلعلته صبحية هاي ما تدخل بعقلي
– ايوب انطيني حل غير امي !؟ اعوفه بحضانه وهو بهالعمر لو اتركه يم خالتي وهم راح تشكي
– غفران كفي المشاكل واكعدي .
– اي مشاكل ايوب هي وينها المشاكل شو دا اركض باديه ورجليه وما مقصرة بحق احد بعد شسوي
– لا تعليييين صوتج
– هسه ما اعلي صوتي يا حبيبي بس والله البيدي دا اسوي
ما رد ومطنكر ..
تركته .. خالتي ما تحجي وياي تكول كاتلة احد من اهلها
كمت امشي واعدي ويطنكر ونختلف ويرجع يسكت
وخالتي كالبة وجهه طول اليوم تعودت على كعدتي باللبيت ووتحت ايدها ما تريد اداوم جامعة ..
كمت يوم اداوم يومين ما اداوم والمحاضرات تنطينياهم زهراء ..
بس من ورا خالتي حتى تسكت وما تخرب عليه ايوب ..
ساري اشوفه بس ميباوعلي ولا كأنه يعرفني ابد
ارتاحيت من ناحيته هم زين جاز مني وتركني لحالي ..
كمت كوة امشي ايام .. اعدي واسكت واتحمل واضغط على روحي واكول تهون شدة كم سنة واكعد وارتاح بس اخذ شهاديتي هالأيام كلها تصير سوالف ..
دا اتعب تعب فوك طاقتي .. بين دراستي .. والبيت وايوب وخالتي ومشاكلها .. جانت ما تأثر عليه بس لإن كام يشوفها وحدها بالبيت وتشكيله غربتها .. يطلع ضوجتها براسي .. ويحجي ويغلط ويصيح واسكت من عنده اتركه يهدأ وعود نحجي
جان بيومها ليلة راس السنة ٢٠١٨ على ٢٠١٩
خواتي كلهم مجتمعين يم امي .. ونسرين يم اهلها كلت لايوب : خلي اروح لاهلي ابات بس هذا اليوم و باجر من الصبح تعال عليه
كال : لا اذا تروحين ب٩ اجيج
– ايوب خواتي كلهن مجتمعات يم امي
– اي وانت على كثر سوالفج لو حلاة سوالفج حتى تبقين وياهم شو بكل كعدة جنج صم بس تصفنين
– هسه خلي اصفن وياهم شصار
– ممنوع
ضجت .. لان نجلاء وعليا عدنا وهم مسويات البنات اجواء بالبيت على راس السنة مثل خواتي .. شمعنى اني .. خابرتني امي كالتلي : تجين ؟
– اي بس ميقبل ابات حدي لل٩ وارجع
– جا هسه ب٣ على ما تجين بيش الساعة ييمه شنو دازج اقساط شصار لو بقيتي ويا خواتج
– شسوي يمه بعد مطنكر مينحجي وياه كال ممنوع اذا زدت يعاند .. ميخالف هسه خلي اجي ساعة ساعتين وارجع مو مشكلة المهم اشوفكم
بدلت اني وابني وجهزت جنطتي ..
جان دخل كال : انت ليش تخلين امج تخابرني وتطلب مني وتحرجيني
– والله مطالبة منها هي خابرتك
– سوالفج هاي مو عليه طايحة الحظ
– ايوب دا احلفلك والله الماكو بدنيا احد احلف بيه جذب ليش تجذبني بعد .. وبعدين ليش تغلط تكدر تحجي بأحترام
طلع وطبك الباب وراه بقوة .. كام يبجي علوش شلته اسكته
رجع اخذ علوش من ايدي وكال : كملي وروحي ولي ما اريدج ركضي لاعلج طاير كلبج عليهم
شلت غراضي وطلعت ردت اروح بسيارتي كال : لا اني اوصلكم عوفي السيارة
صعدنا بسيارته وصلني لاهلي الطريق كله مطنكر وما عاجبه العجب
دخلت لاهلي .. نسيته ونسيت اهله بلمة خواتي وجهالهن وسوالفهن .. اني شايلة ابن اسيل الاعبه وخواتي طايرات بأبني .. وامي جايبتلنا كيكة عليها بابا نؤيل .. فرحانين وملتمين ومتونسين
اجتني بت هديل كالتلي : غفو هذا تليفونج بس يدك
اخذته وايوب خابص الدنيا
رديت عليه كال : مو ادك عليج ليش ما تجاوبين ؟
-ما ادري والله كاعدة ويا خواتي
-شوفي الصورة وجاوبيني بساع
سديته باوعت المحادثة داز شريط منع حمل كاتب : هذا شيسوي بخانتج غفران
– يعني المرة المتزوجة اللي تستخدم مانع تعتقد ليش ؟ وليش مستغرب ؟
– اعلمج
صفنت هذا شبيه !
اجت امي كالت : اكو شي ؟
– لا بس شوية عصبي هالايام
-ميخالف اتحملي خطية حمله ثكيل
-الله كريم
رجعت ويا لمة خواتي وبقينا لحد ما دكت الساعة ١٢ ودخلنا سنة ٢٠١٩
صفكنا وحضنا بعض ولزمت ابني وطلعنا فوك نباوع الصعادات واني حاطته على كلبي واغيله : هابي نيو يير
وهو خابص الدنيا بالصياح دا دا دا
كتله كلامك كله صحيح يروح امك
كاعد اضحك ويا ابني وهديل كالتلي : غفران هي السيارة السودة البابنا مو سيارة رجلج
– اي والله ايوب شعنده هنا
حجت اسراء / اي عيني اجا يعايدج ويا ميل الساعة شتردين
ضحكت ونزلت اله وفتحت الباب كاعد بالسيارة
اشرتله اجا .. هو اجا لو علاوي طار كلبه كام يفز من حضني ويصح : ببه ببه ..
وشمر روحه على ايوب .. اخذه باسه وكال : كملتي طركاعتة السنة لو بعدها
ضحكت ورفعت نفسي وبسته : كل عام وانت بخير حبيبي ابو علاوي الحلو
وكرصت خده وخر ايدي
: شكو
– يلا بدلي خلي نرجع
– لعد ما ابات ؟
– راس السنة وخلص بعد شمنتظرة
– ماشي بس ادخل باردة على علاوي خطية
– راح اخذه للسيارة استعجلي
دخلت لخواتي كلت الهم : بنات راح اروح
صاحن : اهووووو يا غفران ما اجتمعنا مرة وبتنا لا ما خربتيها ورحتي ترا والله مو حالة هاي
– متشوفو لازملي الباب شسوي
امي : مو كالي تأمرين وتدللين خالة
– اي وهو صادق .. رجلي كلمته ما تصير اثنين بدل ما يخليني ابات خلاني سنة عدكم من ٢٠١٨ وهاي احنا ب٢٠١٩ بعد شنو طالبي بطلابة
– سوالفج قديمة دولي ابقى ابقى اشوفج انت الكاتلة روحج حتى تركضين تنامين بحضنه
– والله مسكينة اني بس التهايم جايتني
كامن يضحكن وودعني ..
ورحت صعدت وياه بالسيارة مشغل هوسات حشدية لعلاوي وعلاوي يهز ويركص .. صعدت انطاني ابني وشغل السيارة .. واني اهوس لعلوش ..
كام يذب روحه على ايوب
كتله : كول ايووووب
يذب بروحه كمت اعلم بيه ينطق اسم ابوه ..
كام يلزم بملابسه ويصيح : بوووووووو
– انت بس ايمه الايوب شلون شلون تطلع من حلكه
كل هذا وايوب ساكت .. انداريتله : شبيك ؟
– ليش تشربين منع حمل غفران
– غير ما اريد جهال
– ومنو كالج اني ما اريد جهال ؟
– ايوب علوش بعده صغير
– اي يربى ويا اخوه شلج علاقة انت
– شلي علاقة شنو يا دوب كاعد اكدر الحك على وضعي اجيبلي طفل ثاني شبيك
– واني ماخذج حتى تدرسين براسي لو تجيبلي خلفة
-ايوب حتى لو مو دراستي ابني بعده صغير مو مال طفل ثاني ..
– هذا القرار مو انت تقرري
-لعد منو ؟ انت شعليك بس تلاعبه وتهوسله وكلت شربت غيرت حفظت سهرت تعبت داريت شسويت
– واني المن جايييييبج
– جايبني خدامة لخلفتك ايوب شبيك
– اذا شفتج ماخذة المانع بعد راااااسج اكسره
سكتت ما حجيت .. وحتى علوش خنس وسكت من هوسته من سمع صراخ ايوب .. بسته وضحكت بوجهه .. كام يوخر بعباتي يريد صدري ويدفن راسه بهدومي نومته جوا عباتي وغطيته وكمت ارضعه .
وصلنا للبيت خواته كاعدات باركتلهم السنة الجديدة
واخذن علوش يلاعبو ويضحكون وياه وهو هم افتره وياهم .. شوية وصاح ايوب علينا من فوك
اخذت علوش وصعدت .. حجه : نومي ابنج وتعاي
بدلت لنفسي ولعلوش وتمددنا .. ارضعه هو نام واني نمت وياه ..
ندسني قوي .. فزيت انجر صدري من حلك ابني .. فز يبجي .. رجعته واني احجي ويا ايوب : شبيك اليوم لخاطر الله
– رجعي الطفل بمكانه وتعاي اريدج
رجعته لنومته .. وشلته بفراشه ..
انداريت ايوب وراي .. جرني للجرباية ونومني على ظهري : اخر مرة ماخذة بيها مانع شوكت !؟
– البارحة !؟
– احلفي وروح ابوج البارحة
– وروح ابويه البارحة شبيك بس ايوب ما اريد طفل
– اني مو بكيفج انت كلج على بعضج بكيفي
كام يحاول ويايا لحد ما سوا اللي يرده وكام ..
كام راسي ياخذ وينطي .. بالله شسوي هسه اخاف صدك واحبل ولازم اداوم بشغل وجامعة وطفل وبيت وهم بيت ثاني .. اهلك
منمت الليل ولا عرفت النوم ..
كعدت ثاني يوم جانت عطلة رسمية والشوارع فارغة ومحد مفتح ..
انتظرت لليل طلع .. كتبتله : شوكت راح تجي ؟
– شتريدين ؟
– علوش عنده حرارة خفيفة اريدله انتبايرول
– من ارجع اجيب وياي
– بس خاف ترتفع حرارته اكثر
– سويله كمادات دبري امرج .. هسه اني طلعت من اجي بالليل اجيبلج وياي
لشوية وكتبتله : راح اروح اني وعلياء اختك لراس الشارع نجيبله
كال : ماشي
نزلت كتلها عليا تروحين لراس الشارع نشتري انتبايرول
كالت : لا والله بتي مريضة جيبلي وياج ازيونس بطريقج
– ماشي
فرحت من ما راحت بقيت علوش يمها واخذت السيارة ورحت دورت صيدلية بيها بنية لحد ما لكيت .. سولفتلها انو نسيت حباية المانع وصار تقارب واني ما اريد طفل شنو الحل
– شوكت اخر دورة !؟
– ما اتذكر من هواية
– شكد باقي من شريط المانع انت تنطي مجال تنزل
– اي كل ميخلص شريط اتوقف هي تنزل وحدها .. تقريبا باقي ٣ حبايات
– يعني نهاية ماكو بيوض ونسبة الحمل كلش ضئيلة بس مع هذا اذا تحبين اكو حباية مانع للحالات الطارئة هذه تموت الحيامن بالبويضة كبل لتتلقح يعني منقذة لهالحالات
– ما بيها قتل جنين
– لا لا مو جنين هي مجرد تخرب عملية التلقيح في حال ديصير حمل
– اي انطينياها
انطتنياها سعرها : ٤٠
كتلها بس جيبيها انعل ابو الفلوس ليلي ما نمته من التفكير ..
اخذتها وشربتها يمها واخذت الادوية مال الاطفال ورجعت .. لليل هو سأل علياء : رحتي انت وغفران للصيدلية
كالتله : لا والله مكدرت بسبب بنتي مريضة جابتلها علاج وياها
– ها .. بالشفاء ان شاءالله
صعدلي كال : شعندج رحتي للصيدلية جبتي مانع ؟
– ايوب شجايك هاليومين
– احجييييي
– لاااا
– لا جايبة
– اهوووو ترا كافي
– هاي ويامن الاهوووو تعاي هنا
– اكلك ترا لعبتها لأم نفسي انت من تشوفني امشي وياك عدل وشتكول اكولك صار وما احجي تركب فوك راسي اركووووب طفل ما ارييييد غصب لو زوووور هي يا اخي مااااريد حرام عليك بعدني ببداية عمري كاعد اركض ركض الجلب عدنا واحد كاااافي .. نكبره ندلله ننطي حقه شنو همج فوووووكه فووووكه
اني كلتها هيج لو جرني من راسي وكام يعت بيه
واتقرب مرة ثانية .. حتى يصير طفل .. كمت من عنده اخذت ابني وفرشت بالكاع .. ونمنا اني وياه .. وعزلت روحي عنه ..
يوم يومين كام كلبي يلعب خاف لا صار حمل ..
الرعب البكلبي لا طفل ثاني واستحرم اقتله وما بيه حيله
ولازمة وادعي .. ربي بجاهك ما اريد طفل .
ثالث يوم واني بالجامعة ..نزلت عندي
يا الله بودي احضن كل الجامعة كلها من الفرحة ..
خابرت امي حاجيتلها السالفة كتلها : ابشرج
بس كتلها ابشرج طكتها هلهولة
كالت : تخلصين العادة وبوجهج للدكتورة تضربج ابرة مال منع حمل سنة او ستة اشهر واخلصي .
– ان شاءالله
سديت الخط منها .. صار بوجهي ساري ابتسملي بعفوية ومشى
الله يهدي .. رحت لزهراء كعدت وياها .. وفرحانة ومرتاحة .. وهي تشكي سوالف محمد كتلها : اشكي اشكي اني مستعدة اسمع اليوم اتحمل كلشي
رجعت اخذت ابني وللبيت ..
دخلت هو موجود .. ذبيت عباتي بسرعة ووكفت اسوي التمن
وكعدت حطيت حافظة مال اكل ماما مسويتلي فسنجون .. ولأبني مسويتله هريس خضروات .. حطيتهن وكعدت بالهول اكل اني واوكل بأبني .. طلع ايوب : شنو الله موصي بس بيج متكومين تصبين
– بس يتهدر التمن
حجيتها ودايره عنه كعد بصفي اخذ خاشوكتي ويباوع بالأكل ويضوك بيه : شو ما صعدتي بدلتي
-اكمل شغلي واصعد
-وصلاة ما تصلين
ما جاوبته
حجه : عود ليش شايلة خشمج وما تحجين وياي
-لعد منو صارله ساعة ديجاوبك
-بس من ورا خشمج
مجاوبته حجه : شوكت تنعدلين
– ايوب شمسوية
– تحترمين
– واني بيمن مجاوزة
– متجاوبين
– كل انسان وحريته يجاوب ع اليهجبه ويترك الأسئلة المتعجبه ترا زواج هو مو سجن ومحكوم بكلشي وكافي متحملة عصبيتك وطنكرتك صارلك ايام .. وبالعتها وساكتة
– غصبا ما عليج
– وع الخلفوني .. بعد مطالبني بطالبة
بقى ياكل بأكلي .. واني اوكل بعلوش .. عجبه الأكل كمله كله كال : لا تصبيلي بعد اكلت صبي انت وامي
وعافني وراد يصعد كتله : اخذ علوش وياك وغسله بطريقك
– ومتريديني احفظه
– اي افحصه اذا موصخ نفسه ليش لا لو بس تريد خلفه ساعدني
احا شاله وصعد غسلت وصبيت لخالتي وصعدت بدلت وكعدت
حجه : شو متصلين
مجاوبته .. كعدت ارضع علوش ..
كام وهو يكلي : بسيطة
اخذ سويج سيارته وطلع
اني نومت ابني ونمت .. ما كعدت لليل على طبته للغرفة
كال : ما تحسبين بشر بهذا البيت نايمة
وكام يصيح ويهوس ويغلط
ما جاوبته وما نزلت .. صاحبك حلو لا تاكله كله سرى موجودة جوا ما بيها شي لو كالولها سويلنا عشى .. والبنية متكول بس ما تكوم الا احد ينبهه وخالتي تتخبل لو كامت كله تصيح تعبانة عدها دروس .. اي لعد اني شنو مترهية .. والله كلت فلا انزل وشيريد يسوي خل يسوي وما دام باجر جمعة لا اكابل غرفتي ما اطلع والله شنو بشر لو ماخذني فصلية .
ضل عصبي وعافلي الجرباية ونام ع التخم
خفة وراحة بقينا اني وابني ماخذين الجرباية طول بعرض نلعب
وعلوش يصيح بووووو بوووو .. … بو مطنكر مو يمنا .
سهرت للفجر ثاني يوم الجمعة لل١٠ الصبح ندهني كومي سويلي ريوك
-شباك الخدمة مقفول اليوم عطلة معزلين ما اكوم
– دكومي لا اسحلج
كمت من مكاني : الناس تكول صباح الخير الناس تكول جمعة مباركة وانت مكعدنا من صباحات الله ع السحل شبيك
-كومي
-ماكوم
-احترمي روحج غفران
-مو بالاول تتعلم تحترمني اني زوجتك مو خدامتك اطلب باحترام حتى اكوم اسويلك باحترام
– ما احترمج وغصبا ما عليج تكومين
ضليت اباوع الشر متربع بعيونه ومناوي على خير
كعدت وكتله : تأمر ابو علاوي الوردة اصيرلك ريوك
بس كمت علوش كعد جلب وياي
كتله شيله كال : ما اشيله انت حيري بيه
مديت ايدي اكرص خده كتله : اليوم هم مطنكر حبيبي
دفع ايدي : امشي سوي ريوك
– صار
اخذت نفس ونومت علوش ع الجرباية وطلعت للحمام لكيته شايله ونازل
وكاعد بالمطبخ شغلت الصوبة .. ومشيت هو مكعد علوش كدامه ولازمه بسته : شبيك هالأيام علينا
– دكملي كملي ؟
– اي غير اعرف شبيك
– من تصيرين ادمين وتنزلين تسوين العليج ذاك الوكت كولي شبيك
– شنو اللي عليه ؟ عشا مسويت ترا مطارت الدنيا .. مو بس اني بالبيت
– اني اشوف بس انت عقلي يكولي بس انت .. هيج بكيفي عندج اعتراض ؟
– لا
– هاهية اشتغلي لعد
سويتله ريوك واخذت ابني اريد اصعد .. صاح : تعاي ريكي الطفل
– معاجبني عندك اعترااااض
شمر الكلاص كسره واندارلي : شو نزلي شنو
-معاجبني انزل
كملت لغرفتي وهو صعد وراية دفع الباب ريكلي : شنو كلتي شنو
لزمني من راسي وكتله / شوف مثل ما عندك شر عدنا شر ومثل ما عندك السان عندي السان وصلت وياك لهناااااا .. روحي طلعت من عندك شنو ماخذني فصلية عندك خدامتك خدامة اهلك تغلط وتنتر عليه .. محترمتكم وما بيكم احد محترم خليني جارعتك وجارعة عمايلك وساكتة
– غصبا ما عليج اسحكج والله
– اذا منتظرني امسحلك وهم اكلك ع الخلفووووني لا انت غلطان عديت هواي وسكتت هواي والظاهر اخذ عين .. اشبع بالبيت واني رايحة
– بكيفج تروحييييين
جريت جنطتي وكمت الم بيها كام يصيح ويغلط شافتي ما نرديت من صياحه وبعدني الم وابدل لعلوش .. كام يكول : لا تكبريها اكعدي وانجبي طلعتي صوتنا من الصبح
– محد طلعه غيرك وما دامك طلعته خلي يطلع للاخير اني ما اتحمل بعد اروح لبيت اهلي اخلص يا وجه مكابله بس تهين وتغلط
كام يجر بالجنطة ويكلي ما اخليج اكسر رجلج
– اكسرها
اخذت ابني وردت اطلع كام يدافع وياي ميقبل اطلع .. طلع هو قفل الباب علينا .. وعافنا بحالنا .. اني كعدت سويت سيليلاك لابني وكلته ولعبته من نعس .. حطيته ونمت ..
عاد هنا يلا مشا عدل ودخل بدون ما يزعجنا ودخل مثل الورد وكعد مثل الحباب على تليفونه بدون صوت .
بقيت شايلة خشمي ما نزلته وما طول اني زعلانة هو ما يتقرب يخاف لا هم اطنكر والم جنطة الزعلانة .. بقينا متزاعلين
من خلصت العادة ..
دورت بالانترنت بفتاوي السيد اذا يجوزلي اخذ حبوب منع حمل بدون علم الزوج في حال هو رايد الأنجاب .. كتبلي الموقع يجوز .. يعلي بختك سيد
الله يحفظك ويديمك
ثاني يوم من الجامعة كتبتله : راح اروح ابقى لاهلي لليل .. خواتي موجودات .. كتبلي : ولي ؟
كتبتله : زين يعني بعد ما ارجع ؟
– لا تخليني اجيج اكسر راسج
زين هو ليش ميكتبلي لا ارجعي اني ما اكدر بدونج واريدج يمي بالبيت شينقص منه لو حجاها بدال ما اكسر واجعص .. ليش يعبر عن حبه بطريقة مكررررروهة ولازم احنا نفتهم ورا قلة الاحترام هاي عود هو رايدني .. عوق فكري اقسم بالله .
من الجامعة طلعت للدكتورة عدل وكبل كتبتلي ابرة منع حمل كالت ما انصحج بام السنة اخذي ام الستة اشهر احسنلح انت بعدج صغيرة ورحمج ترف ميصير تيبسي بهيج امور .. اخذي مال فترة قليلة وجددي بعد ٦ اشهر
صدك اخذت مانع حمل ٦ اشهر ابرة
ورجعت لاهلي .. كعدت ويا امي لكيتها مجزتلي غداي وابني مسبح ونظيف ومدفى مشبعته ومنومته على فراشها كتلها : هاي مو خوش سالفة ابني دياخذ دلالي منج حتى مكاني اخذه
– ضلت تضحك : غفورة العزيزة هو اني عليمن احبه غير على معزتج يا يمه
حضنتها واخذت حصتي من الدلال ورحت شكد حلوة الحياة يم امي لا ايوب ولا صياحه ولا طناكيره .. بس دلال امي .
كعدنا نتغدا اني وياها ونسرين .. خواتي جايات الجمعة بس الاخ جان مطنكر ما كدرنا نجي .. خابروا عليه من الدوام كالوا : لازم تداومين بعد خلصت اجازة الأمومة .. كلت اي هسه كملت اجت ويايا فيت .
لليل مر عليه هو وبلال ..
كالي : انطي لسويج لبلال واصعدي بسيارتي
انطيت وصعدت .. اخذني وكفني يم مطعم كال : تنزلين تاكلين لو اجيبلج شي
– شكرا ما اريد
– لا تقفليها كولي شتريدين
– ما مشتهية شي وما اكدر انزل باردة على علوش
– زين شجيبلج بيتزا ؟
انداريت وباوعتله : اذا تعتقد راح يعدي الموضوع وياي ببيتزا .. انت غلطان اصعد
صعد وكال : تمام عمي اني اسف واعتذر وكافي يلا رضيتي ؟
ضحكت : وكول بعد ما اعيدها
– دكووومي لج
– ها شوف
– تريدين بيتزا
-اريد احجي وياك خابروني باجر لازم اداوم
-تمام خل اجيب واجي نحجي
راح جاب بيتزا عائلي وكتله على دوامي كال : اي شنسوي يعني قابل تبطلين من دوامج
– وما ابطل من جامعتي هالحجي خلي يكون ببالك وبال خالتي .
– امي شعليها
– ايوب اني مو غشيمة واعرف انت شنو اللي مضوجك خالتي دا تكولك غفران مو اتوظفت مو كاعد تسلم راتب فوك المليووون شتسوي بالدراسة بعد .. وتدك تريدني ابطل
– اي وكلامها صحيح غيرج متخرجين وما متعينين وانت اتعينيت ومكانج خير من الله بعد الشهادة شراح تسويلج
– راح تسويني مهندسة راح تحقق حلمي وحلم ابويه بأن اكون منهدسة ما مقصرة ويا احد منكم ومحد منكم اله كلمة عليه ابطل لو لا ما دام اني مأدية واجبي اتجاه الكل .. مقصرة وياك ؟ طبيت مرة لكيت غرفتك وصخة لو هدومك ممغسولة لو ابنك وصخ ومدايرتله بال لو هدوم امك لو البيت اركض بادية ورجليه فما الكم حق
– وراح تكدرين شغل وبيت وجامعة ؟
– اني ما اقصر بس اني بتالي بشر هم اتعب واضوج وانضغط لو عندي امتحان واقصر خوما توكفولي ع الزلة وها قصرتي اذا تريدون بس اني اشيلكم ومتتحملوني اتعب .. اني نفر منكم وبيكم لو خدامكم حتى افهم لإن اذا مو تعاون وواحد يتحمل الاخر مراح تكون عيشة .. مبيها شي خالتي لو قسمت الشغل بيني وبين سرى الغدا ومواعينه عليه والعشا ومواعينه على سرى هي فارغة ومتكول شيصير
-متقبل
-معناها خالتي باطلة
-لتتجاوزين مو محترمين وكاعدين نحجي
-لا مو تجاوز بس جديات هاي الحقيقة انطيني الها مسمى ثاني وعدله ؟
سكت ما حجه .. كمنا ناكل كملنا اكلنا ورجعنا ابيتنا حبابين نومنا ابنا وااتحاببنا واتحاضنا وصبحنا على خير .
داومت بدوامي ..
اول اسبوع .. وعمي ابو نور كالي : غفران ليش ما تحين يمي اخليج على ملف السهداء والجرحى انت نشطة ودؤبة بالشغل ما تسختين
كتله :عمو الله وايدك
صدك سوالي طلب نقل ونقلني بالمقر مالته ..
حطني بقسم تابع لمتابعة عوائل الشهداء والجرحى
حيل حبيت الشغل .. وشغلي صار ما مرتبط. بالمقر بكد ما مرتبط ع التليفون .. نتابع بيه عوائل الشهداء نتواصل وياهم نشوف ايتام الشهداء اذا محتاجين المريض البيهم الجريح حالهم احوالهم اللي عنده عرقله براتبه .. نرفعله طلب للهيئة والجريح اللي مو بالمستشفى و راتبه ما يغطي تكاليف جرحه ومعيشته نتواصل مع الطبابة حتى يأمنون حالته
عدنا ملفات صور لشهداء الحشد الشعبي
وحالتهم وشكد عدهم .. بس الملف جبير وواكفة من باب الأطلاع
انقهرت كلهم شباب بالعشرينات والثلاثينات ..
عرض بعيني شهيد ضحكته جذبتني ..
ضليت اباوع بيه .. دمعت عيني ..
سديت الملف وكعدت اتابع ويا الافراد شغلهم
كملت شغلي كله .. تركت المقر وطلعت للجامعة
حضرت محاضرة وحدة ورجعت على اهلي اخذت ابني ورجعت
لليل واني نايمة ..
جان ولد شاب بالحلم كأنما اعرفه اجا بصيغة يوصيني لابس ابيض يكلي : معصومة وزهراء
كتله : منو معصومة وزهراء ؟
-معصومة وزهراء لا تنسيهم
بس هالحلم وفزيت
بس كعدت فحطانة عركانة ايوب نايم
الجامع يمجد كمت توضيت وكعدت اقرا قرأن
وافكر منو معصومة منو زهراء !؟
كعدت الصبح حجيت لحلم الايوب كال تعرفي ؟
كتله : بالحلم كأنما اعرفه بس الولد ما اتذكر وين شايفته
-والله ما ادري
رحت للجامعة وبالي مشغول بالحلم
بالمحاضرة والاستاذ يشرح اتذكرت صورة الشهيد الشفته بالمجلد
بسرعة فزيت من مكاني اعتذرت من الاستاذ كانما عندي شي ورحت ركض اخذت السيارة ورحت المقر .
عدنا موظف اسمه رحمن هذا موسوعة مال شهداء يعرفهم كلهم كتله رحمن : البارحة شفت صورة شهيد باوعته واجاني بالحلم يوصيني على معصومة وزهراء
-شسمه الشهيد
-ما اتذكر اسمه ما قريته
-شلون شكله مملوح وحليو ووضحكته تقهر
– يا ست اغلب شهدائنا هاي مواصفاتهم .. يعني شعر ميزة اسم محافظة بغداد وين مستشهد
– ما ادير طلعلي مجلد الشهداء ..
كمنا طلعنا المجلد وندور وندور وصارت ب٢ وانتهى الدوام وهو بعده وياي يدور كال : ست بس اتذكري اسمه
– والله ما اتذكر اسمه
– عوفي بعد نرجع باجر ونكمل بحث
تنهدت ومن لا جارة كمت اكلب الصور الاخيرة واريد اطلع راح ينسد المقر .. حجه : استعجلي ست
– اي يلا كملت
دا احجيها وطلع كدامي صحت : رحمن هذا … والله هذا
انوب طلع اسمه علي مثل اسم ابني
قريته ونطيت من البجي ..
كال : الحمدلله لكيناه .. الشهيد من الناصرية وين نلكا عنوانه وين نلكى رقم اهله ..
– بعد انت الموسوعة
– بس هذا من اول الفتوى مستشهد يعني حتى مجانت اكو باجات لا رواتب لا اسماء هيج مكاعد اعرف اهله ولا عندي توصل وياهم
– ضروري رحمن هذا الشيهد يكون ملفنا تنبشلي الكاع بأبرة وتطلعلي اهله .. ما اعرف مهمتك هاي بعد
– الله كريم بس خلي نطلع
– لحظه اخذله صورة
صورت الشهيد واخذت معلوماته ..
وطلعت دزيت صورته لأيوب كتله : ايوب لكيته
باوع الصورة كتب : لا اله الا الله
طلعت للبيت كتله : ايوب تعمم صورته على كل اللي تعرفهم معلومات هذا الشهيد اريدها
خطية هم كام يدزها ..
كمت صليت ودعيت رب العالمين يوصلني لاهله
اريد اعرف زهراء ومعصومة الاجاني عليهم بالحلم شبيهم وليش اجاني
اسبوع واحنا ندور حتى عمي كام يدور معلومات هذا الشهيد عند معارفه لحد ما لكولي معلوماته بالناصرية
ايوب تكفل كال اني اخذج ونروح ع العنوان نبحثه
طلعنا من الفجر وعلوش ويانا وندور على حلم !
وناس تدلي ناس دلونا لبيت اهله .. وصلنا دكينا الباب
بيت فقرة ناس على كد حالهم منطقة تعبانة حييييل
دخلنا .. رجال جبير .. وعجوز رحبوا بينا وكنالهم : احنا من هيئة الحشد الشعبي وجايي نشوف وضعكم نتفقدكم
فرحوا بينا وشالونا بالصلاوات من عروفوا بينا حشد
استقبلونا .. طلع البيت ما بيه غير حجي وحجية ..واثنين بنات بس مو صاحيات .. باوعت البنات كلبي يرجف .. لزمت ابني والدمعة بعيني ايوب يباوع بوجهي
جابتلنا الحجية الجاي وايوب يحجي ويا الحجي كاله : ابنك وين استشهد حجي
كام يسولفله .. ابنه اول ما سمع فتوى السيد علي السيستاني هب ولبنى النداء شكد ردنا نمنعة كناله بويه بنياتك محد الهن ما رضى .. كال اني رايح انصر الحسين ..
التفتت للحجية تبجي كتلها خالة : شبيهم البنات ذولة
كالت : خالهم حركهم بماي حار وغصب امهن تتزوج وذبهم علينا وهالتشوفين البنيات حال الضيم حالهن وما عدنا والله يا خالة ينداويهن وكاعد ادهنهن بدهن عرب
الدمعة بعيونا اني وايوب كتلها خالة اسمائهن : معصومة وزهراء
كالتلي : اي منين تعرفين
قبل لا ابجي ايوب صرخ ودنك يبجي بكل حيله
دنكت ابجي من كل گلبي .. نريد نسكت جابولنا مي لا اني ولا ايوب سكتنا لحد ما علوش كام يبجي اخذت مي شربته وايوب كاللها : خالة ابنج هو الاجانا ودلانا ابناته وصار اسبوع ندور عليكم
امه سمعت لو كامت اتدك على راسها
ناس بابة عرب فقرة كلش .. سألناهم على راتب اذا عدهم يكلولنا ليش هو الحشد يستلمون راتب !؟
ايوب : شنوفيكم يا خالة شننطيكم حتى نوفي
يحجي وياها ودموعة تجري .. خابر على عمه وحجاله الوضع
كاله : البنات انقلهم لبغداد فورا واني راح اصعد اسمهم لرئيس الهيئة بنفسي .. وبحيل الله شاربي مو علي اذا ما يوصلهم حكهم ..
اخذنا البنات وسلمناهم للطبابة .. هم اتكفلوهن ..
والحجي والحجية اتواصلوا ويا نواب من الناصرية يرفعولهم طلب رعاية اجتماعية باسرع وقت
هذا الموقف ما انساه بحياتي
من بعدها واني نايم حلمت بأبويه يضحكلي ولوحلي ويسلم عليه
فسرته في ما بيني وبين نفس راضي عليه بسبب هالفعل
من بعد هالحادثة ..
سلموني ادارة شعبة المتابعة ..
جان الشهر الرابع تقريبا ..
واني بشغلي وجامعتي وبيتي وحياتي حيل متروسة احس عندي عشر ادين .. ساري كل هالمدة لا تعرضلي لا سلم عليه لا اجا يمي ابد نسيته وشلته من بالي نهائي
هستوني دخلت الأزدحام دا اريد ارجع لبيت اهلي
ما احس الا باب سيارتي انفتحت وصعد ..
فزيت بسرعة وكتله : شنو هالحرأة انت ماستحي انزل
-بس عبريني التقاطع بلا زحمة
-تكدر تنزل وتصعد اي كية راح تعبرك
-بس التقاطع
-ساري انزل
-اندارلي :شو عيدي
—انزل لا اصيح الناس عليك والله
-صيحي
-يا اخي عيب عليك انزل
-ما اذيج والله وعيونج بس اوصل التقاطع
ياربي سيارات كدامي وسيارت وراي كلت اوصله للتقاطع وابلغ عليه اهل المرور
اتحملته على كلبي كوة ..
لحد ما ردت اوصل لنهاية التقاطع سلم ونزل
ضليت اباوع .. هذا مخبل صاحي
عديت الموقف ومشيت لان هو تاب مني وما اذاني ولا هددتي بس سخيف خل يولي ما احطه ببالي
جبت ابني ورجعت الوضع عادي
ثاني يوم … زهراء مجانت مداومة رغم هي راسلتني وكالت تداوم !
شعجب خابرتها مرة مرتين ما ردت
دخلت المحاضرة بنص المحاضرة وكامت تخابرني
لغيته وسويته صامت لما كملت المحاضرة
خابرتني ناطة من البجي صاحت : عليج الله اذا تحبين علاوي ابنج تعاي عليه
-شبيج يمعودة شصاير وياج
-تعاليلي فدوة استريني واخذيني
تحجي وكوة تشهك من البجي
كتلها : شصاير ويااااج
-بس تعاي وانت تعرفين
انطتني عنوان لزمت سيارتي وساعة يلا وصلت كتلها وصلت العمارة انت وين بي طابق كالت ٣
صعدت راحت روحي لحد ما وصلت الطابق الثالث
خابرتها يا شقة ؟
-١٢ . اي ١٢
دكيت الباب انفتح الباب سمعت صوت زهراء تبجي غفرااااان
دخلت ادور صوتها ما احس الا ساري يسد الباب وراي فزيت : انت شنو الك شغل هنا وشعندك وياها
-جاي اوفي ديني
وقفل الباب …..
- يتبع الفصل التالي اضغط على (رواية صوت من المجهول) اسم الرواية