رواية صوت من المجهول الفصل الثاني و الثلاثون 32 - بقلم زينب ماجد

    

رواية صوت من المجهول الفصل الثاني و الثلاثون 32 - بقلم زينب ماجد

 يضحك بوجهي مثل وجه الشيطان

انداريت محمد وراي .. كتله : معلوماتك انت واهلك وكلشي يخصك موجودة لو حاولت اطخ طرف من عبايتي تعرف زوجي وتعرف شنو يكدر يسوي بيك .. يحركك انت واهلك .. افتحوا الباب وانطوني البنية

– مستقوية حيل برجلج ؟

– لإنه مو مخنـ ث مثلك يدوس على راسك مثل ما سوا بالاولى

مشى خطوتين ..

انداريت لمحمد : ما بيكم زلمة ؟

فتحلي الباب زهراء كاعدة وحالتها حالة

انداريتله .. محمد كدامي وساري وراي .. خفت

الرجفة لزمت گلبي .. اتعديت محمد ودخلت الغرفة لزهراء

انسد الباب وراي وانقفل ..

دخيلك يا ربي .. ظليت اباوع ع الباب

زهراء تبجي بقوة .. اتصمنت بمكاني .. معرفت شسوي ادك ع الباب لو اباوع لزهراء .. شنو هذا الموقف اني وين حطيت روحي ..

كمت اردد بخوف همهمة (اعوذ بالرحمن من شر كل شيطان .. اعوف بالخالق من شر كل مخلوق .. اعوذ والوذ بإلهي وسيدي وجاهي من شر كل شيطان من الإنس والجان اعرف بالله من الشيطان الرجيم .. الهي دخيلك ) وصوت زهراء متهسترة تبجي

لزمت التليفون واتصلت بأيوب .. مشغول

اتصلت ببلال بسرعة .. يدك يدك وميجاوب …

دنكت لزهراء : انت شجابج هنا .. وشصاير وياج ؟

– غفران اهلي اليوم يكتلوني والله يكتلوني .

– شسوالج احجي

تشهك وتبجي : احجي لا تبجين ليش ساري ومحمد هنا وليش انت وياهم شسووولج

– محمد .. تشهك

كملت .. كالي بس نطلع والله اني مردت اطلع كالي بس نكعد ونسولف منسوي شي

– اعتدى عليج

شهكت بالبجي كمت اصيح : احجي كولي اعتدى عليج

– اي بس ..

كامت تبجي ..

– غبية انت شنو من بشر الف مرة حذرتج منه انت متفتهمين هسه اني جبتيني وورطيني وياج شكو .. اني شعليييه بيج وبغبائج

– والله ما عندي غيرج هم كالولي خلي غفران تجي تاخذج بسيارتها ومحد راح يعرف بالصار

– وهسه شنو حبسونا اني وياج ..

رجعت للتليفون .. اتصل بأيوب رن رن .. رد اول ما كتله

ايوب .. اني جايج بالطريق

ردت احجي ايوب اني مو .. قفله

– جايني وين شنو جايني شديصير

بس لا عباله اني بالجامعة .. وشنو جايني

كومتها كوة تگوم .. عدلت ملابسها واديه ترجف رجف مو طبيعي وكلبي يخفك .. واردد دخيلك يا الهي ..

– محمد افتح الباب ..

كمت ادك الباب هم يسولفون : وين تريدون توصلون وانتم حابسين نسوان .. افتحوووووو الباب

يا الله شلون ورطة هاي

رجعت خابرت على ايوب .. يرن وما يرد

هسه وكتك ايوووووب درررررد .. غير اكلك وين اني حتى تجي

رجعت خابرت على بلال هم ميرد شصابهم ذولة ..

ياربي شلون بلوة

رجعت لزهراء .. كامت تمسح بوجهه

وكتلها : هسه شلوووون كليلي بس جبتيني وورطيني ليش ما كتيلي ساري موجود ليش ما حجيتي حتى اخابر احد يجي وياي

-ما اريد احد يعرف

-ونبقى هيج محبووووسين سوولنا شي انت شكد غببببببية

لج خبلتيني اني جزعت من سوالفج حذرتج تالي اني وكعت وياج

هسه شيطلعنا منا كومي حاجي للكرن اللي الطلعة ويا خلي يطلعنا حابسنا هنا شيريد

كمنا ندك الباب وهي تتوسل محمد يفتحلها الباب

نصيح نريد ميردون … شوية وفتح الباب محمد .. كال : اطلعن

كتله : يا حريمة الزلمة الزينة تموت حتى انتم العارات تبقون

رجعت جريت جنطتي من الكاع ولزمت ايد زهراء تكلي : وين نروح غفران اهلي راح يكتلوووووني

دا اريد احجي انفتح الباب ويصير بوجهي ايوب

اتصنمت بمكاني .. ايوب شجابه لهنا .. بلال وياه ..

شدلاه شعرفه .. ساري واكف وفاتح الباب ومحمد مقابيلنا ..

حجه ايوب : امشو كدامي

– ايوب ذوله الحقر……

خزرني وكال : كداااامي

طلعت وزهراء وراي .. بلال اشرلنا ننزل

نزلنا وبلال ورانا وايوب بقى فوك .. حجيت : شدراكم احنا هنا

– بلغونا

– منو بلغكم

– غفران امشي وادعي بس كون تعدي على خير ترا ايوب ناويلج نية كشرة جاب الطريق كله يتحلفلج

– يتحلفلي ليش اني خابرتكم

– بعديش غفران من خابرتي احنا بالطريق جايينكم انت شلون تجين شقة مال شباب اثنين وبهالمنطقة غفراااان ؟

– خابرتني صديقتي تبجي اجيت اركض عليها والله مفكرت لحد ما وصلت شفت السالفة تخوف خابرت عليكم

– دصعدي بسيارة ايوب وانطيني اسويجج اخذ الاخت

غفران شيحجي لتجاوبينيغلط يسب ينعل اسكتي ترا والله راسج يطير .. بس جاوبي على اسألته .

– بلال دا تحسسني عندي شي شبيك

– دنزلي يا خوية طابة بشقة شباب لوحدجن .. دنزلي

– بلال صدگ تحجي

– اني شعلي انت ورجلج بس احسبي احسابج جنيتي على روحج والله .

باوعتله ونزل كدامنا .. زهراء لزمتني : هسه شسوي غفران كليلي والله اكتل روحي

-مخابر على اهلج هو لو بس على ايوب !؟

-ما ادري راح اموت من الخوف ولج عليج الله تعاي وياي

كاعد تحجي نزل ايوب ع الدرج

هي شافته وطلعت من باب العمارة بسرعة

لزمني من ايدي وسحبني ودفعني كدامي : امشي اصعدي بالسيارة

رحت صعدت وهو صعد داس بالسيارة بكل قوته

باوعتله : ايوب والله خابرتك بس انت مجاوبت

– غفران منين تعرفينه هذا الولد

– والله ما اعرفه !

– وتنكرييين ما تكعدين وياه ما تطلعيييين وياه

– ما كاعدة ولا طالعة والله وراس ابني

– تنسين عدج ابن من عندي وانعل اليوم الشفتج بيه يا ساقطة

– ايوب ليش تحجي هيج اني بس خابرتني صديقتي واج…

دا احجي ما احس الا سطرني على وجهي وهوي كلي : انعل ابوج لابو صديقتج لابو المكح*** الانتن بيها

– والله حرام عليك هيج تكول .. ليش هيج تسوي

-بعدني مسوي اني بنت الكلب

-هسه انت تشوفني غلطانة ابويه شعليه ترا رجال ميت والله حرام عليك

– اشعل روحه الخلف مثلج طايحة الحظ

لزم راسي .. ركعه بالجامة حيل

هاي شبيك اتخبلت .. دا اكولك ما اعرفه والله

– الله لا تجيبي على السااااانج نگسسسسسة

فتح التليفون وشمره عليه التليفون .. باوعي اكو بنات شريفاااات يطلعن شقق

فتحت التليفون .. مقطع اباحي .. لزهراء بس مطالع وجهه بس حجابها من ورا وظهرها وجسمها من الخلف وهي تصيح ..

– اني ما ادري عن اللي مسويته صديقتي هي بس خابرتني تبجي وكالتلي تعاليلي بسرعة اني عبالي شوف شصاير وياها ابد ما اجا على بالي هيج موقف لو هيج وضع

-سهلة

ما حجه بعد .. بس بقى راسي مشوش ..

يعني جانو متفقين عليه لو على زهراء منين جابو رقم ايوب شلون هيج وقتوا جيتي وخابروه .. كلشي مشوش كدامي .. دخيلك ياربي ساعدني .. جان المفروض انطي علم لايوب من قبل لا اطلع بس .. اخذت نفس اني شمدريني راح الكاها بهالوضوع لو ساري بالموضوع

تايهة بين افكاري .. ما احس الا ايوب وكف بيه كدام بيت اهلي

عبالي ننزل نجيب علوش ونرجع نتفاهم ابيتنا .. بس المفاجئة الثانية الثانية جانت لما ايوب نزل وراي واحمد وعلي اخواني واكفين ..

علي اخوي يكله : دخلها جوا

ردت افوت للمطبخ

صاح احمد : هييي منا تعاي لج

مشيت ودخلت وياهم امي تلكتني وهي تكلي : هاااا ولج

دخلت للأستقبال .. كعد ايوب .. واخواني وهو يكللهم : حدي لهنا بتكم اخذتها واحترمتها وخليتها على راسي .. بس مال توصل بيه يخابرني شاب يكلي تعال اخذ مرتك من شقتي ما ارضاها وما تصيرلي مرة

علي : شنو اللي اخذج لهناك

حجه ايوب : الخذاها صاحبها علي .. من كبل واني اكلها تعرفين هذا الولد الكاعد يلحكج للدوام تكلي لا .. وامس هو وياها صاعدين بسيارة اني جبتها الها حتى لحد يصعد وياها ويتحرش بيها جاي تشوف شكد اختك طايحة حظ

حجيت : بس اني ممصعدته

كام من مكانه ولزمني : لا تنكريييين سااااقطة لا تنكرين

الجاي تنكريييينه بلسانج شفتتتتته بعيني

علي : شخذاج للشقة غفران

– صديقتي خابرتني كالتلي تعاي بسرعة

طلعله ايوب الفيديو كاله : هاي صديقتها بالشقة

من اكلكم اختكم ساقطة علييييي

حجاها ايوب وكاملي احمد لزمني من راسي تلازمت وياه امي .. وهي تصيح فهموا منها اختكم وتعرفونها مو مالت هاي السوالف .. دفعها احمد مني وجرني من راسي سحل كمت اصيح واوخره .. وعلي لزمني وياه دفرات .. وكعن عليه نسرين وامي يجرني من احمد وعلي تناوبوا عليه بانواع الضرب والغلط .. اللي يدفر واللي يجر بشعري واللي يغلط ويصيح وامي ونسرين يصيحن

ايوب اتفرج كأنما كدامه مسرحية

محد منهم حاول يسمع مني ولا احجيلهم شصار

امي صارت كدام احمد ونسرين تجر بعلي شفت ايوب اخذ علوش ابني

فزيت من مكاني اركض اتلزم بيه واكله : ابني ما تاخذه مني … انطيني ابني

سطرني راشدي ويكلي : امشي ساقطة اني اخليج ام الأبني

كمت الزم بملابسه وما اخلي يطلع

لزمني علي من راسي .. وركعني بالحايط

كمت اصرخ وابجي .. اريد ابني كلشي سوو بيه بس لتاخذون ابنيييي

جرتني امي ونسرين وعلي واحمد يريدوني ياكلوني وعلي يصرخ : تحجين شخذاج للشقة لا افرغ المسدس براسج اليوم … احجيييي

اني ونسرين يشاكفن عني واني فرفحت روحي على ابني ..

اندارتلي امي تصرخ : ليش ما تحجين احجي الصار وياج كتلتيناااا كلووووبنا راحت احسن الصارلج هذااااا احجي

علي : مالها عين تحجي بس كل الصوج بيها هو الكبر راسها حط بيدها سيارة وعينها وخلاها بجامعة لحد ما فلتت بس اني اعرف شلون اضبج والحسين ليوم فتي افنييييج واربيج من جديد

– ما اعرفه الولد والله ما اعرفه ورحت علمود صديقتي خابرتني تبجي هذا كل العندي

– صديقتج هاي الكح**** ال***** هاي صديقتججججج

– ما اعرف بيها هيج راح يصيرلي وياها سنتين والله ما شفت عدها هيج شي وخابرتني تبجي وملهوفة اني من حلاة روحي مفكرت ورحتلها كبل وخابرت ايوب هناك ومجاوبني وخابرت بلال وهم ما رد

احمد – وشلون مصعدته وياج جلببببه

– والإمام علي ممصعدته ..بالازدحام واكفة وهو صعد صيحت عليه ينزل مقبل كلت اوصل للمرور وابلغهم عليه بس هو نزل قبل لا اوصل للتقاطع

علي : – اذا تعرفينه ليش نكرتي من سألج ايوب ؟

– لإني والله ما اعرفه كل الاعرفه اللي انتو تعرفوه واحد وياي بالجامعة وبس لا بنفس كليتي الهندسة ولا قسمي ولا كاعدة وياه ولا واكفة وياه ابد وصارله سنتين والله وروح بابا ما فد مرة انطيته مجال

حجت امي : هو الكبل كتيلي عليه دزلج تهديد لو غيره

-اي هو

علي : ومن دازلج تهديد ما تبلغييييينا ليش احنا هنا شنو طواطييييير ما حاطتنا براسج ما تفكريييين

امي : اني كتلها لا تحجين وخلي يولي زلمة ملاحكها ولزموه الامن كتلوه ووكتها خلصت جامعة كتلها يمه خلي يولي اكعدي ابيتج بعد واسكتي اني ادري هالشيطان هذا يحطها اباله كل هالشهور هاي ويضمها الها

احمد : اني الكاتلني شقة بمكان مشبوه شلون تروحيلها ولج غفران شسويلج اكص منج واشرب دمج فهميني لو احد شايفج هناك شنكول .. ولو اذا هو رجلج شافج وعافج نضم روسنا منين

– اني لو اعرف المكان ما اروحله بس ما ادري عبالي هيج عمارة وما ادري بيها احد يعني ما اجا على بالي اي تفكير مو زين بس الجان ابالي اروح واشوف زهراء شبيها

نسرين : مصارت اخوان انتم لو عدوان البنية دا تكولكم متعرفه ولا منطيته مجال ولا تدري هم بالشقة عبالها صديقتها بيها شي وراحت الها بعد ذبحتوا البنية وجرجرتوها وانطيتو ابنها شبيكم غلطت لو كفرت ؟ بدال ما انتم تفهمون السالفة وتوكفون كدام رجلها وتحاسبونا من شك بيها تاهمين اختكم !؟ هو بسببه مو انطاها سيارة مو كاللها وين ما تريدين تروحين روحي اني اثق بيج مو هو المنعكم تدخلون وكاللكم اختكم سباعية ما ينخاف عليها من غلطت صار عليها فاندام وانتم تكتلوها كباله بدال ما تحاسبوه

كام يصيح عليها علي حتى ما تدخل ..

خذت جهالها وطلعت واحمد كام يغلط وطلع وعلي كعد برا ..

كعدت يمي امي اخذتني بحضنها وتعدل بشعري السحلوني منه

وكامت تمسح على راسي كتلها : ادري بنفسي غلطت بس والله اني مجان عبالي هذا المكان هيج

– عساها ابحظه وابخته الذبج هالذبة هاي وتهمج بيها .. ناخية الحسين الشهيد اليفرفح الله كلبه وما يهني مثل ما فرفحنا

– ماما اريد أبني

– عود اني الاكول على رجلج زين امده حظج ييمه الما انطاج زلمة بيه خير ولا خوان عليهم الأعتماد بدال ما يكعد يفهم منج ذبج طعم لاخوتج الجلاب يتناوشوج وهو واكف يتنوع حساها بحظهم وابختهم ناخية الزهرة .

– عليج الله يمه بس جيبي ابني .. ممرضعته من الصبح عليج الله خلي يرجعلياه

خذت تليفونها وخابرت ..

اول مكالمة ما رد على امي ، رجعت خابرته مرة لخ رد كاللها : ها

– الجاهل رجعه خالة

– مالكم جاهل عدي واعتبري بتج مطلكة

– طلكها عساك لا رديتها ولا احنا الرايدين عيشتك بس الجاهل يرد

– زين خوش ما دام ما تريدون عيشتي جا ورقة طلاك بتج توصل ونخلص وابنها كليلها بالاحلام ما تشوفه

– اسمع شوف بتي انكتلت من وراك واذاوها والله وتراب الاندفن وخلاها يتيمة عكبة .. ساعتين يا ايوب مالهن ثالث لو ما رد الجاهل لانه لا اخابر عمامك وعشيرتك واصفطهن كلهن واشهركم شهيرة والعباس ما اخلي ثوب مغطى .. وانعل اليوم الاطيتك بيه مرة .

– اذا صارت بالتهديد جا خوش

– خوشين اذا مو تلاثه واتنطر الجاهل ع الساعتين لو ما رد افعل ما افعل .

– هاهية شدي رايتج .

سدته بوجهه كتلها : ميرجعه

– بكيفه ما يرجعه شنهي مهرمه لو لازم عليج سالفة مو زينة وياخذ الجاهل انعل عشايرهم والله .

– وشوكت يرجعه

– ما ادري

– ماما ايدي هايه حيل دا توجعني

– اشوف

– احمد دفرني عليها وكاعد دا تأذيني حيل

بجيت

– كومي خل اخذج للمستشفى خاف بيها كسر شو اشوفها ورمت وصارت زركة

كمت وياها بس مكسرة تكسر .. جسمي مأذيني حيل

لبستني الربطة وشدتلياها وحطتلي العباية وصاحت على علي ياخذنا كاللها : خل تولي عوفيها تتربى

كامت امي تتصيح عليه : ولك جلب اختك هاي لو عدوتكم اديتها كسرتوها وما ترضون اداويها شلزمتوا عليها فهمونا تتباوس ت**** فهمونا

– يممممممه لا تحجين هذا الحجي

– وغمة الغمتك وغمة بطني النكلتكم .. امشي

امشي واكو رضوض برجلي توجعني بس اكثر شي ايدي موتتني

اخذتلنا تكسي وراخذتني للمستشفى .. سوولي اشعة وكعدنا ننتظر الأشعة ساعة ونص يلا كملت .. اخذناها كال ماكو كسر بس رضوض قوية دزونا للصيدلية نجيب لوازم اخذناها ورحنا للتضميد لفوها اللي ببنادج هي وكف ايدي .. وكتبولي مسكن الم .. واكفين ع الصيدلية دناخذ ، اتصل علي .. كال : يمه وين انت

– بشيب اهلك

– يمه الحجي موجود وجايب الطفل ورايدج

– من الله يفكنا منك ومن الحجي مالك ناخية امير المؤمنين

سدته من عنده

– يا حجي ايوب ؟

– اي جاب الجاهل

– لعد خل نرجع بسرعة ماما الكي ناط من البچي

– اصبري بس تضربين ابرة المسكن ونرد

– بس بسرعة فدوة

اخذنا ورحت ضربت ابرة المسكن ورجعنا بتكسي لكينا ايوب واكف بعلوش يبجي ناط من البچي .. بسرعة شهكت على ابني وكتله : انطينياه

سحبه وكال : ما انطي غير بشروط

علوش لوحده ذب روحه ايوب يسحب بيه واني امد اديه نط من البجي كتله : راح يرجع ينشمر الطفل بس انطينياه واحجي وياهم اللي تريده ليش دا تعاقبل الطفل

حطه بيدي وهو يخزرني

بهالحجي امي دخلت وعافتنا برا ..

صاح على علي .. اخذت ابني ودخلت جوا بسرعة طلعت صدري وكعدت ارضعه .. حاطة ايدي المتوجعه جوا مثبته عليها وهو لازم بعدومي حيل ومغمض عيونه وبعدها الشهكة بصدره ويرضع بقوة .. دمعت عيوني … امداني شسويت بأبني .. كمت ابجي وابوس بكصته واكوله : اسفة ماما والله معبالي يصير هيج وتتأذه .. ما ادري حياخذوك مني ويكف كلبك من البجي عليه .. اسفة حبيبي

بعدها الشهكة بصدره ..حضنته لصدري حيل واني ارضعه

اطمئن وبدا يغفى .. صاحت عليه امي : كومي يريد يحجي ويتشرط العينتين

– بس ارضعه

– حطيلج شي على صدرج ربطتج وكومي هنا كملي رضاعته

سحبت نفسي منه فز كام يبجي بقوة

شلته ورحت للأستقبال بس جسمي مأذيني حيل ..

كعدت طرف وايوب مقابيلي مباوعته دنكت على ابني سكته واني ارضعه وبقيت مدنگة ..

حجه : ارجعلها ابنها بشرط واحد بس غيرها والله تحلم تشوف ابنها

حجت امي : خالة جاي تتشرط عليها وتاهمها وماخذ ابنها لزمت بتنا بسالفة شفتها تتمعشك من وراك لو لزمت عليها سالفة شوف العين لو لزمتها تخابر احد لو شايفها تغافلك وتطلع وحاطتلها عشيك جو اباطها لو هرمت .. انت تبيع الشرف بس براس بتي وبابك مكسور

حجت هالحجاية هو تخبل : كاللها انت كاعد تعيريني لو تسمعيني لو شنو كلامج هذا

– كلامي واضح وكت التلزم سالفة صدك على بتي ذاك الوكت اتهمها واخذ ابنها وعود تعال وحط شروطك

– بتج شريفة من تطب شقق مال ووووووولد ؟

– واشرف منك واشرف من اهلك لا انت ولا غيرك يحط باي يتهيمة ربيت واعرف شربيت لا عدي بت عشكت ولا عدي بت مشت بدرب اعوج ولا عدي بت الغافلتني وهرمت .. بتي غلطت صحيح من راحت بس راحت على صديقتها خابرتها ومشت على عمى عينها واني لو عدي اعاقبنها واعلمها غلطها شنهو .. مو مثلكم جلاب كبل لا تفتهمون غلطها شنهو التميتو عليها لمة الواوية ونهشتوها تكول لازمينها وفوكها واحد

كام من مكانه وكاللها : ما طول احنا المو شرفاء وكاعدة تعايريني باسرار بيوت ما صانتها بتج الشريفة خليها يمج شبعي شوف بيها وعليمها على راحتج بس ابني اخذه وغصبا ما عليكم

– البيه زود يمد ايده وياخذ الجاهل والحسين الشهيد لا اصرخ والم الناس عليك واشهرنكم شهرررر

– حجيي مو وياج حجي ويا ولدج اذا ما جابولي ابني هسه والعباس كربلة اسويها فوك روسكم

كام وطلع منا وكام يتصايح ويا علي ويعلي صوته وامي ترد وعلي صار عصبي ويا امي ويكللها : انت فوك ما ترديها تكوين راسها ختولي تريدين بتج يمج خل يتنطي ابنها وحطيها يمج كاااافي بزعتونا واجا دياخذ ابني من عندي ..

كمت اجر ابأبني واكله ما انطي

ابني ما انطي .. عوفه علي ابني ما انطييي

عليك الله عوفه فدوة الله يخليك

جره من ايدي بقوة فز من نومته نط من البجي وانطاه لايوب

كمت افرفح وراه وركضت على ايوب يدفع بيه ويكلي : وخري لا والعباس ادفرج ابعدي منا

: اسمع شروطك كلهم بس انطينياه راح ينشمر عوووفه

– وخررري منا اكلججج

كامت امي تصيح واني اصيح وعلي يجر ابأمي حتى لا يطلع صوتها بالمنطقة وتعاركوا امي وعلي كامت تغلط عليه وعلى ايوب وتسبهم واني اتلاوى ويا ايوب اريد اجر ابني .. وعلوش يذب بروحه عليه لزمته وكمت اجر بيه .. تركه ايوب .. اخذته وركضت جوا

ابني يبجي واني ابجي واهدي بيه .. الطفل تعلعل بمشاكلنا عمت عيني حطيت ابني بهيج وضع .. سديت غرفة امي وكمت احاول اخفي البجي واني اهدي والاعبه ..

سكت .. حطيت راسه على جتفي نومته واطبطبله ..

كاعد انومه فات علي وبعدها هوسة ايوب وامي ما خلصت اسمع صياحهم برا حجه : تطلكين وياخذ ابنه لو تسمعين شروطه وترجعين احجي مو احنا الينسمع صوتنا بالمنطقة من وراج دماغ سز

-لتصيح الطفل هستوا نام كافي والله خبلتوا اني ارضى بكلشي بس لتسوون هيييج

تفل عليه وطلع بقيت اطبطب عليه واهدي ..

والشهكة بصدري صارت مو بصدر علوش .. احس حيل غلطت من خلفت طفل من انسان اني ممتصافية وياه ابني صار ضحيتي .. كاعد دا يتعذب بسببي .. المن حبته والمن ورطته بهيج عائلة ..

اطبط على ظهره ودموعي تجري على ابني ..

دخلت نسرين : يردوج روحي اسمعي شروطه شنو .. لتخافين انت بس رجعي واتفاهموا وكلشي ينحل

– اني كتله راح اقبل بكل شروطه بس ليأذي ابني نسرين الطفل كلبه وكف من البجي لو انشمر وانشل منو يفيدني

– الله يساعدج دكومي روحي اسمعيلهم وان شاءالله خير بجاه فاطمة الزهراء .

: كليلهم هسه تجي بس تنوم الطفل

راحت واني نومت ابني بفراش امي وطبطبت عليه لحد ما غط بنومته .. غطيته بعباية ماما وطفيت الضوا وطلعت .

دخلت الأستقبال ايوب واكف ما كاعد

حجه : ترجعين بس ترجعين ماكو دوام جامعة ولا شغل وباب الحوش ما تطلعينه شغلج البيت وبس غير هالحجي اركعج بالنعال وابنج ما تلمحينه .

سكتت وكعدت ع القنفة

حجت امي : رايدلك حجه عليها فهمني شنو انت منصب روحك عليها

– مو اني اخذتها من بيتكم هيج لا جامعة ولا شغل مالج حجي يمي خالة ارجعها مثل ما جانت غير هيج ما اتقبلها والله .

كام علي يحجي : يمه مرة ورجال جاي يتفاهمون انت شنهو

– انا ام بتي من تبطل من شغلها ليا ايد تضل الك لو اله ولاهله

– انا الاطيتها كلشي واني اخذ منها كلشي وبكيفي … هذا العدي

حجت امي : ما اكول غير حسبنا الله ونعم الوكيل عبن ظلام ردتلك حجة تلزمها خاطر ترضي امك وتكعدها خدامة الك ولهلك .. خالة طلكها بتي انا اريدها طلكها ما تريدك كوة

– ابني اخذه

– اعلى يا حك تاخذ ابنك طفل يرضع على صدر امه الله من فوك ما يرضى ينوخذ من صدر امه انت فوك الله !؟ طلكها خالة وفكنا وجامعتها انا ادفعها لبتي وشغلها لو بيدك عمي هم اتوسط وافصلها بعد .. ما نريد منك شي عوفها .

علي : حجي مالك علاقة بأمي اخذ غفران وغصبا ما عليها ترجع وياك

– ولك جلب ياهي هاي المالك علاقة بيها ولك انت اخووو

كامتله

خزرني ايوب وعاف البيت وطلع ..

عفت امي ورحت كعدت بالهول .. ونسرين راحت تفاكم بين امي وعلي لحد ما طلع علي من البيت .. صعدت فوك واني تايهة بروحي ابطل من دوامي وجامعتي واكعد لخدمته وخدمة اهله لو ابقى بيهن واطلك بس اخاف ياخذ ابني ايوب ظالم بهالأمور ما يتفاهم واخوتي جلاب عنده وبأمرته لا يسمعولي ولا يسمعون لأمي

الخطوتين ما مستعدة الهن

غلطت يس ما اشوف استاهل اتعاقب هيج عقاب بحيث اترك شغلي ومكاني وحتى جامعتي اللي درست منها مرحلتين واكعد .. هو مفتهم غلط ساري ما اعرف شنو حاجيله بحيث ايوب واصل لهاي المرحلة اللي يريد ياخذ طفل من امه ويحجي بطلاك !

دا اشوف كل القضية تحتاج تفاهم مجرد كعدة يسمعني بيها ويفهم مني كلشي .. بس الغلط غلطي جان من زمان اني ما اضم عليه .. اني ما مسوية شي مجرد واحد يلاحكني وحاطني بباله ليش جنت اضم عليه وما اكوله .. بس اني هم شمدريني هو ناويلي هيج نية ومنين يخطر ابالي يتفقون هيج اتفاقية ويجيبوني للشقة بسبب زهراء .. لو اعرف راح يصير هيج ما جنت ضميت عليه اتوقعت مجرد واحد تافه يلاحكني ما يحتاج انطي اكبر من حجمه واوصله لايوب .. شراح اسوي !

بقيت كاعدة بالسطح

كلت ابقى زعلانة ابيت اهلي بدون حل

الوقت هو كفيل يحل المشاكل والما فاهم يفهم ويستوعب الموضوع

هسه بهالوضع لا احد راح يتقبل ولا راح يتحمل بعدها المشكلة حارة

ما كدامي انطي فرصة للزمن هو يحل الموضوع مو احد ثاني.

كاعدة وصافنة لحد ما صعدتلي نسرين وبيدها علوش : وينج يمعودة ادور عليج ابنج كعد

اخذته : امي كاعدة ؟

– اي وعلي طلع اذا تريدين نزلي

اخذت ابني ردت اشيله ع الايد اللافتها بس كاعد توجعني .. شلته ع الثانية ونزلت يمها .. حجت : شنهو قرارج غفران !

– ما عندي قرار اتركي الامور تهدأ افضل

– واذا اجا على ابنه نوبة اللخ ؟ واخيج هذا جلب ياخذه منج وينطي ساعتها شنسوي ندك البيبان

– ما اعرف ما عندي قرار بهالوقت ..

– زين بتي شبيج شلون تطلعين هالطلعة هاي

– يمه اني لو اعرف الوضع هيج راح يكون تتوقعين امشي !؟ خابرتني تبجي وهي صديقتي المقربة غلطت ورحت بدون ما افكر ..

– وياهي صديقتج هاي التطب شقق زلم تلعب وياهم شلون تصادقين هيج وحدة انا هيج مربيتج غفران !؟ لو الجامعة لعبت بعقلج

– ماما والله حبابة وما عدها اي شي وهم تلبس عباية واهلها حيل محافظين مجرد تحب واحد اسمه محمد واعدها يتزوجها ما اعرف شلون غلطت هيج غلطة وثقت بيه وطلعت وياه .. ما اتصور صاعدة وياه للشقة بارادتها ما اعرف شنو مسويلها لان اني شفتها معتدي عليها مو هي منطية نفسها برضاتها

– شنو معتدي عليها شنو تحبلها واحد غفران يمه شلج بهالسوالف هاي ؟

– ماما الجامعة كله جوها هيج حب وكبلات وهيج سوالف زهراء شفتها احسنهم لان متطلع وياه ولا يتمشون بالجامعة بكيفهم تخاف وتتختل من تريد توكف وتحجي

– والتحب من ورا اهلها شريفة لا والله مو شريفة

– ماما اني ما فد يوم سويتها بس هالشي صار عادي خاصة بالجامعة متكدرين تحكمين على شرف بنية بس لإن تحب واحد .. حتى اذا حجيتي وكلتي حرام الناس تكرهج ومتتقبلج

– امدا هيج الدنيا التغرب الشرف وتسهل الحرام بحجة حب .

مالج غرض انت بالعالم اني ليش ما جنت اطيج تليفون يلوموني هالخرب عقلج .. من اسمعج نوبة اللخ تكولين حب واعتدى عليها وهيج حجي يا غفران والله بعطاب اجوي السانج

– يمه اني ابني بيدي مو صغيرة واعرف الصح من الغلط ومتجنبة الحرام وصاينة نفسي بس اني اعترف غلطت من رحت وصعدت عمارة ما اعرفها ودخلت شقة ولد اني لو اعرفها شقة ولد ما ادخلها بس غلطت

– من ثولج بت انت شنهي تفرين الدروب والله اروح انقذ صديقتي باتمان مسوية روحج اركدي بمكانج واكعدي جلبة .. طايحة الحظ من اسمعج نوبة اللخ طالعة ومفرفرة على كيفج والله يا غفران لا احط ظهرج واكسره لو مو عدج جاهل لو عدج عشرة .. حدج جامعتج غيرها ما تطلعين

– ماما هو عادي يقبل خو بالشغل عمه يوديني اورد ع الطبابة افتر ع الجرحى .. ميحجي اطلع ويا صديقتي نتغدا باي مكان ميكول يكلي اني واثق بيج

– وشفتي الواثق بيج شسوا اول واحد ذبج للجلاب تنهشج لو واثق بيج شلون يصدك كلام الغريب عنج بس هو صوجه كل الصوج من ومو منج الغلط لا والله بت حمرة خضرة انطيها سيارة واكلها روحي وين ما تردين هو السوفلج وفوكها يعيبج.. كون الزمة يا يابه الا من لوزته وحق الحسين

-اني شسوفلت ماما و…

قاطعتني وهي تكلي : اسكتي مني لا اركعج بالدولكة وحق هو امير المؤمنين ابرد گلبي بيج هسه .

سكتت

بقت ترزل بيه وتحجي واني ساكتة أستمع الها ..

شكد ما احس بروحي كبرت واعرف ادير امري اجي يم امي احس اني شكد صغيرة وبعدلي يحتاجلي تعلوم .. بس هي التعرف توجهني وما اعرف اجادلها لو اعاندها لو اخالفها .. وهي الوحيدة التعرفلي وتعرف شلون تصحيني وتوعيني وتنبهني.

للمغرب اجا بلال دازه ايوب طلعتله امي كالتله : خالة مالها رجعة بتي لبيته .. خليها عندي

بلال : خالة لا تكبريها ترا غفران غلطانة وتعرفين ايوب شكد يحبها ما يظلمها

– شلون ما يظلمها وهو يريد يبطلها !؟ هذا مو ظلم من يجي يحط شروطه

– زلمه وشاف مرته بشقة ويا اثنين ولد شتريدينه يسوي رحمة لدينج لا تهونيها خليها ترجع احسن ما تكبر ويتركب الغلط كله براسها والله اني غفران مثل اخيتي واحبها ترجع تتفاهم ويا رجلها وتقنعه افضل ما تكبر

– وتضمن ما يبطلها

– هسه بطلها صدك وما ادخلنا واتوسطنالها !؟ بس خلي يهدا انت تعرفينه ما يتحمل مرته تطلع من بيته زعلانه ترجع تزعل بغرفتها لحد ما يتفاهمون .

بقى يحجي وياها .. قنعها اجت وكالتلي : البسي عباتج يمه واطلعي ويا بلال واسكتي يصيح يغلط يسب اسكتي لا تجادلين ولا تعاندين ولا توكفين بوجهه ويكثر عليج .

كمت بس جسمي احسه حيل مأذيني وثكيل

مدا اكدر اوكف على حيلي .. لبست وطلعت وياه .. هم كعد ينصحني ما احجي وما اسكت لو شما يسوي .

وصلت البيت .. دخلت سلمت على خالتي كالت : شصاير بينج وبين ايوب ليش جاب الطفل الظهر وحده ؟

– ما اعرف اسألي

– اخو اسألج الج ما تجاوبين

– تعاركنا بالطريق لإن طالعة ويا صديقتي وصار عصبي

– تستاهلين حتى تبطلين تخامة ما مكفيج شغل وجامعة انوب تطلعين على حل شعرج .

– من رخصتج اصعد علوش انومه بكاروكه

كاعد اريد اصعد سمعت باب البيت انجرت عرفت ايوب اجا وديدخل سيارته .. صعدت لغرفتي بسرعة حطيت علوش بالمهد وكاعد دا اهز بيه.. دخل للغرفة وحجه : تعاي لج اتطلعين شقق غفران

دا اريد اكوم لزم شعري .. حجيت : والله ما اد… دا اريد اكملها

سطرني راشدي اذني كامت تصفر

ورجع عتني من راسي : اكلج تعرفينه تكليلي لا ما اعرفه مو ؟ تالي مصعدته وياج بسيارتج ولج شادتلي كرررررون واني على عمه عيووووني

كمت الزم بأيده واكله : والله ..

رجع سطرني الثاني وكال : اذا اهلج ما مربيج اليوم اني اعرف شلون اربيج

ذبني للكاع ودنك عليه لازم بشعري حيل ويفرك راسي بالكاع ويصيح : اني التستغفليني ولجججججج ولج اني اطلعين ويا ولد من وراااااااي

كمت ادفع بروحي اريد اوخر راسي من الكاع

دفعني على ظهري ولزمني من ركبتي وهو يكلي : اليوم اكتلج خلااااص والله اريح كلبيييييي منج

كمت اجر باديه وارافس اختكت احس روحي تريد تطلع من جسمي

كمت اخرمش بأديه فك اديه من ركبتي وتولاني راشديات كمت اصرخ وابجي بس اريده يوخر مني كعد علوش ع الصوت يصرخ .

وخر من عندي كمت وخرت شعري من وجهي واشهك من البجي واخذت ابني من كاروكه ولميته بحضني وكعدت .. وهو يصيح ويضرب بالكنتور ويغلط واني احط ايدي على اذن ابني واحاضنته بقوة واشهك من البجي .. وصايرة ورا الجرباية بزاوية الكاروك .

حجه : تحرم عليج الجامعة ويحرم عليج الشغل ولج عبالي ادمية وشريفة تالي اطلعج من نص الولد من الشقق اطلعججججج غفرااااااان

اجا عليه يريد يجرني كمت اصرخ وابجي واكوله : كافي عليك الله كافي والله الطفل راح يتخبل عوفني الله يخليك والله بعد ما اسويها

رجع شالني من شعري : شما تسوين وانت سويتيها ولج عقلي راح يتخبل اذبحج لو ادفنج شسوي بيييييييج

كام الطفل يصرخ بيدي ..

دفعني .. رجعت كعدت بالزاوية وطلعت صدري لأبني وحطيت ايدي على اذنه حتى ميسمع ويخترع .. وحاصرة روحي واشهك من البجي وشعري كله واكع منا ومنا مغطي ابني ..

كعدت ع الخم يحجي ويكوم يحجي ويضرب واني حاطة ايدي على اذن علوش ولابده وبقى يحجي يحجي يحجي لحد ما داخ الطفل ونام واني هدأت .. ودخت واحس بروحي حيل ثكلت وراسي صار هالكبره من الوجع .

كام من مكانه .. اجا عليه حجيت : عليك الله كافي والله الطفل ديتأذى

مد اديه واخذ الطفل من حضني وخلاه بمكانه وغطاه ووكف يطبطب عليه

اني لميت شعري واكعد ارجعه ليورا .. اندار عليه ولزمني من ايدي واخذني يم الجرباية من كدام ونزلني بالكاع وحجه :

– اني السويتج واني الكبرتج وما رجعتج حبا بيج بس والله الا اذلج ومثل ما كبرتج ارجعج صفر ..

دفعني للكاع وكام داس على راسي وحجه وهو يصك على سنونه ويحاول ما يعلي بصوته ويحجي : هذا مكانج تفتهميييين وين جوا رجلي خدامة الي ولابني والله لا اشوفج انجوم الله بعز النهار … هذاااا مكانج تفتهمين خدااااامة وكل احترام ما الج .

وخر رجله مني ورجع دنك عليه وجرني من ايدي ويحجي : ممنوع تنامين على فراشي وتنكسينه هنا مكانج بدون فراش تنامين ويا ويلج لو شفتج على التخم نايمة لو على فراشي وغصبا ما عليج تخدمين امي وتخدمين خواتي وحتى رجليهن تبوسيهن …. افتهمتيييي

– اي بس عليك الله عوفني والله راسي كام يأذيني

حجيته وبجيت

– عساج بالموت ان شاءالله

دفع ايدي منه وشمرني للكاع .. التفيت بروحي وكمت ابجي بهدوء

راسي ذبحني كمت ما اشوف من الألم .. بقيت بمكاني ابجي لما ادري شكد لحد ما هديت وكأنما سكرت من الوجع صرت احس بروحي بعالم ثاني .. جسمي صخن حيل وحرارتي ارتفعت .. كمت ارجف واني اقوقع بنفسي .

بعدها مدري شلون غفيت على وضعي .. واني بالكاع وشعري مفلول ومصخنة .. وفاقدة من الألم مو بس نايمة .

ما ادري ليا وقت بقيت كعدت على رفسه منه وهو يكلي : كومي لابني اتحركي بساع .

فزيت اباوعله واكف على طوله واني بالكاع حتى بدون مخدة ..

اريد اشيل بروحي من الكاع جسمي حيل مأذيني وراسي راح ينفجر .

لزمت بالجرباية كوة واتجيت وكمت اجر بروحي جر واني امشي

اريد امد ايدي اشيل وجع ايدي ذبحني ما كاعد اكدر اتناوشه .. شلته بأيد وحده وتجيته بجسمي .. اخذته ونومته بالكاع يمي اريد اتمدد احتاريت بأيدي وين اخليها وشلون ارضع ابني .. دا تأذيني حيل .. وهو يصرخ جوعان .. ما اعرف شلون مددت روحي بالكاع وقربته مني ارضعه .

حطيت راسي ع الكاع اباوع الغرفة كلها تفتر بيه .. حواليا

غمضت عيوني واني اردد ربي ساعدني مدا اتحمل الم جسمي .. ساعدني .. كمت ابجي بصوت مسموع من الألم .. لحد ما سكتت وحدي .

جانت ليلة صعبة بكل معنى الكلمة من اخواني ما انذليت هيج ولا صار بيه هيج .. اقلها يم اخواني عندي ام تشكف عندي وتحضني بعد كل اذيه وتلمني بحنانها تداويني .. موقفي هذا كلش صعب بخاطري من مطلوب مني اكون ام وانطي ابني الرعاية الاني محتاجتها هسه .. ما تمنيت من ربي بهاللحظة بس امي تاخذني بحضنها مثل ما ماخذة ابني بحضني .

ثاني يوم ..

فزيت على صوت طك بالكاع باوعت علوش كاعد يلعب بالغراض مال الجرارة ويطكطك بيهن .. لزمت بالجرباية وجريت نفسي حتى اكعد .. ايوب ما موجود بالغرفة .

اريد اكوم مالي حيل اكوم .. جسمي كله مكسر

راسي وجع الدنيا كلها بيه حيل ثكيل وبعدها الصخونه بجسمي الزم عيوني خدودي نار ..

تجيت نفسي وكمت ..

فتحت الباب وطلعت صحت على سرى ما موجودة

على نبأ ما موجودة … شلون اغسل ابني واغيرله ؟ شلون اشيله وانزله واوكله .. احتاريت بروحي

رجعت كوة اجر بروحي نزعته بأيد وحده وتركته بالحفاظة ومشيت للحمام فتحتله الحفاظة وتركتها على صفحة وكمت اغسله بأيد وحدة .. رجعت طلعته برا الحمام كعدته .. ورجعت للحمام اخذت الصابونة بأيد وحدة .. وفتحت الباندج .. اتوضيت بس بأيد وحدة لإن الثانية كلش مأذيتني .

طلعت لكيت ابني زاحف للدرج صاير ع الحافة

ركضت ركضة ما كأن الم بجسمي اتلاكفته من الحافة ورفعته بأيد وحده واخذته للغرفة .. يتحرك اريد اسيطر عليه البسه بالساعة يلا دبرتها .. اريد انزل جوا اوكله بس جسمي ميساعد الصخونة مأذيتني حيل طلعتله من الثلاجة طلعتله صمونة حطيتها بيده وتفاحة يعضعض بيها ..صليت ورجعت تمددت بالكاع .. اغفي من الوجع

اجا يزحف يريد يرضع ويتبجبج .. طلعتله صدري واني نايمة على ظهري كام يرضع الطفل وهو كاعد .

دخل ايوب صاح : طايحة الحظ خايسة الحمام وصخ ما تعرفين تشيلين حفاظة ابنج كوووووومي

– بس خل يكمل رضاعة

شاله من عندي ودفرني برجلي : كومي اتحركي بسرعة يلاااااا

علوش كام يبجي بقوة يريد يرجع يرضع .. ردت اكوم رجعه عليه رجعت نمت صفح كملت رضاعته لحد ما شبع كمت اتجي بروحي .. وشلتها ذبيتها بالزبالة ورشيت المغسلة .

حجه : بدلي يلا بسرعة

– وين

– متجاوبين صوتج هذا لا تسمعينياه ما اريييييد اسمعه بدلي

– والله جسمي مأذيني ما اكدر البس

– يطبج مرض تلبسين وتكومين .

مشيت بدلت كوة بأيد وحده وهو اخذ علوش حطه يم امه كاللها : ساعة واجي

اخذني للمقر .. نزلت كوة اجر بروحي وهو يمشي ويغلط بصوت ناصي حتى محد يسمع لحد ما وصلنا لغرفة المدير العام .. فتحلي الباب وكال : اكعدي هسه عمي يجي

كعدت ع التخم وحطيت راسي ع التخم اغفي ..

ربع ساعة واجا عمه ابو نور كال : صباح الخير ها ابو عرب شو اليوم هنا

– والله عمي جبتها حتى توقع استقالة

– استقالتيش

– عمي خلي تبطل وتكابل ابنها

– شبيها هي مريضة

– كلشي ما يصيبها

كاملي عمه : شبيج بابا بالله ارفعي راسج

تعدلت لزم كصتي : مرتك شبيها وشنو هذا الزراك البخدها !؟

– اخوتها كتلوها

– ليش

– طايحة حظ .. اكتبلها استقالة عمي خلي تبصم ووقعها حتى ارفعها

– كوم اخذها بالاول للمستشفى شوف شبيها

– عمي رحمة لوالديك بس انطيني ورقة استقالتها

– مالك علاقة انت باستقالتها تطيب وتجي تبصم ما طايرة روح اخذ مرتك مستشفى

– اخذها اجفنها

– شصاير غير افتهم

كام من مكانه .. وطلع وتركني وحدي بغرفة عمه

حجه : عمي صايرلج شي ؟

– مشكلة صارتلي بالجامعة وديريد يبطلني

– مشكلة جبيرة شنو هي المشكلة غير نعرف

– اذا يريد هو يحجيلك اني اذا احجي يمكن ميقبل ويأذيني

– اخذج لبيتي عمو وضعج تعبان

– لا ابني بالبيت اذا تأخرت يبجي

– زين ماخذة علاج ؟

– لا والله

– شيوجعج ؟

– جسمي وراسي

– من الصخونة عمي حرارتج نار

رجع ايوب رجع مسوي كتاب استقالة ..

اخذ الحبر من يم المكتب مال عمه وكالي : ابصمي

غمزلي عمه واشرلي ابصم .. بصمت

مشى حطها كدام عمي كاله : وقع عمي

– اي تأمر حجي ايوب اشتغل عدك

– حشاك عمي بس وقع

– خليها اني اوقعها بعدين

– عمي جاي اكلك ابصم

– ايوب احترم نفسك عمي واطلع برا .. وعوف البنية اني اخذها للطبيب

– عمي احلفك بروح ابوي وقع

– الله يرحمه .. صار .. خليها يمي واني اوقعها بس ولي

– عمي ليش تعقدها

– ايوووووووب احنا بمكان عمل مو بالبيت وتطلع مشاكلنا اخذ مرتك عمي وارجع للبيت واني اكمل شغلي وامرلكم

قفل عمه ما يوقع اخذ ايوب الأستقاله وكاله : اصعدها للهيئة مناك تتوقع وتنفصل .

– شد حيلك

اخذ الورقة بجيبه وكالي : كومي

كمت من مكاني ومشيت كدامه وطلعنا من المقر ..

رجعنا للبيت دخلنا كال : نص ساعة والغدا الكاه جاهز اذا تأخر دقيقة المطبخ هذا كله يتكسر فوك راسج .

دفعني ع الكاونتر ومشى ..

احتاريت بروحي شلون اطبخ بأيد وحدة ..

فتحت الثلاجة اخذت قبقين من المسكن الم وخافض حرارة مال علوش بلكت تنزل حرارتي ويسكن وجهي لإن احس بروحي على ساعة اوكع .

وكفت بأيد وحدة احاول ادبر روحي واحط

رجع للمطبخ بعدني بس بالتمن حجه : لهسه ممكمله تعاندين لو شنو

– ايوب والله ايدي دا تأذيني وراسي وجسمي راح اوكع والله

دفع راسي : يكمل الغدا بسرعة افتهمتيييي يكمل بسرعة

كاعد تحجي طبت سرى من برا .. وكفت : شكو

خزرها : مالج علاقة امشي بدلي

حجاها ومشى .. وكفت : شبيج

بجيت وحطيت ايدي على عيوني بسرعة اجتني : شبيج شمسويلج

– ايدي مأذيتني مدا اكدر احركها وراسي وجسمي ومدا اكدر اسويله غدا

– اني اسوي روحي

– ميقبل

– شنو ميقبل دتعاي كعدي

كعدتني ع الكرسي وسوت هي المركة وكعدت يمي : شصاير

– طويلة ششرح بس شوفي علوش ترا مناكل وكليه عليج الله

كامت جابت علوش .. سوتله روبة وتمن وكعدت توكل بيه واني يمها حاطة راسي على الطاولة ومدنكة .. دخلت خالتي : سالفة ايوب وياج مو مالت طلعة ويا صديقتج شصاير وياج وهيج مخلية گلب ايوب مشتعل نار

مجاوبتها حجت سرى : يمه لو يريد هو يحجيلج مدام ما حاجي راح يقبل تحجي اتركيهم بيناتهم

-مو هي طايحة حظ علت كلب الزلمة من امس واليوم مفرفح غير اعرف شمسوية

-يا يمه هسه هو ما شاكي احنا شكو مرة ورجال ينجازون بيناتهم

اندارتلي : اصعدي وخلي علوش يمي من يريد ينام اجيبلجياه

-مشكورة

صعدت لغرفتي هو كاعد حجه : الغدا وين ؟

-جوا كمل

حجيتهز ومشيت كعدت ورا الجرباية بزاوية الكاروك مال علوش

للعصر اجا عمه جايبلي علاج مال التهابات وخافض حرارة ومسكنات ..

انطانياهم ومحاول يعرف شصاير لان لا اني ولا ايوب حجه بس كالي : اي شي تحتاجين خابريني عمو واذا اذاج بس كليلي انعل عشيرته .

شكرته وراح ..

وبقيت بغرفتي ونفس السالفة بالليل حقر الا اكوم اسويله اكل

كمت ونبأ وسرى كاموا يساعدوني صعدت بالليل كعدت بنفس المكان يم الكاروك ارضع بأبني .. اجا باوعلي كالي : هذا مستواج خدامة الي ولأبني .. عرفتي شنو قيمتح خداااامة

مجاوبته .. بقيت ساكتة وهو كاعد ع الجرباية يباوع تلفزيون لحد ما شبع كمت كوة حطيته بكاروكه ورجعت للكاع حطيت راسي وكمت اغفي ..

فزيت بالليل لكيت التلفزيون مفتوح وايوب داير ظهره النا ونايم ع الجرباية

اخذت نفس .. غلطة سويت بروحي هيج !؟ فترة وراح يهدأ وراح يفتهمني وراح ترجع حياتنا مثل گبل .. لازم اصبر واتحمله .. ربي ساعدني اتحمل طاقتي احس كاعد تخلص ..

كمت من مكاني وكعدت ع السرير .. وتقربت من عنه .. لابس فانيله داخلية .. وداير وجه للكنتور ونايم ومنطيني ظهره .. اخذت من غطاه وانحشكت بظهره .. حس عليه بس ما اتحرك ولا بعدني ..

كمت حطي راسي على زنده وكمت ابجي بسكوت .. كتله : اني ادري غلطانة والله ما اعرفه كل الاعرفه عنه اسمه ساري بس لا ويايا بالكلية ولا بقسمي ولا بدفعتي اصلا ممجذبة عليك من كتلك ما اعرفه لإن والله ما اعرفه ولا عندي تواصل وياه ولا اي شي وتليفوني دوم مفتوح كدامك فد يوم شفت عندي شي بس واحد سخيف يلاحكني والله وراس علوش ما انطيته مجال ولا مرة .. بس الصار صديقتي خابرتني تكولي الحكيلي اني والله عبالي صاير وياها حادث او ما اعرف شنو بيها رحتلها بدون تفكير ما اعرف هي بشقتهم ولا اعرف هاي الشقة وحتى من دخلت محد مس طرف عبايتي والله وخابرتك كومة حتى تجي وتوكفهم عد حدهم ويخلوني اطلع بس انت اجيت هو كل الراد يسوي يخلق مشكلة بيني وبينك ما اعرف شنو غايته ولا شنو يريد والله ..

احجي ودموعي تجري على خدي .. وتنزل على جسمه

بست زنده وكتله : اسفة والله معبالي يصير هيج اني لو ادري والله ما اسويها وروح ابويه وتراب گبره والله .

وخرني من عنده وكام طلع من الغرفة

بقيت بالغرفة ما اجا بعد نمت .. الفجر صليت هو ما موجود

كعدت الصبح هو هم ما موجود .. علوش بعده نايم

وجع ايدي افضل اكدر احركها وراسي احسن خف الوجع بجسمي ع العلاج .

بقيت كاعدة بفراشي صافنة بالتلفزيون رغم ما منتبه وياه

صوت يمي اذني من المجهول ( ما يفيد الحجي ) فزيت من مكاني انداريت ماكو احد .. اتعوذت من الشيطان وسميت بأسم الله

الكلام كأنما احد كاعد يمي وينطقه ميفيد الحجي بيش !؟

وشنو هالصوت !؟

اندار راسي ..

صفنت ويا روحي هالصوت شنو وشيريد مني ؟

كل ما يجيني لازم يصير شي .. ما اسمعه ويعدي عليه اليوم سلامات ..

اجاني بوفاة بابا .. واجاني بيوم اللي رحت ويا امي لبيت اهل هيفاء

واجاني بيوم اللي ردت انحرك بالتيزاب وهو الكومني ..

وهاي رابع مرة يجيني شيريد مني

لا اجاني .. بيوم اللي شفت ساري من اول ما كسرت عليه وعرضلي كالي (اتعوذي الشيطان ) .. جان ديحذرني لو شنو !؟

صفنت بروحي ورجعت لذاك اليوم

لو متعوذة وما نازلة لساري وما حاجيه ويا وما غالطة عليه يمكن كل هذا مصار ! جان ساري ما عرفني ولا حطني براسه ولا لحكني بس ..

ما ادري شنو ميفيد الحجي هسه ديريد مني اني والله راح اتخبل من هاي الاصوات اللي ما اعرف منين تجي .

بعز تفكيري .. كعد علوش

كمت من مكاني اخذته غسلتله وجبته بدلتله وكلت ما ارضعه خلي انزل اوكله .. نزلت سويتله بيضة سلك وجعصتها وكعدت بالهول احاول اوكله .. وهو يروح منا ويجي منا عذبني

انطبك الباب .. باوعت الساعة ب١٠

خالتي نايمة وسرى و نبأ بالدوام معناها ايوب اجا … كاعدة مقابيل الباب مال المطبخ بالهول

طلع كدامي ايوب ووراه نادية ولابسه عباية

شهكت نظراتي واني اباوعلهم شنو ايوب شنو نادية شجايبها شدا تسوي ؟ شديصير ؟

حجه وياها : فوتي سلمي على امي وبوسي راسها

وهي حجت : تأمر حبيبي …

__________

يتبع…. 

• يتبع الفصل التالي اضغط على (رواية صوت من المجهول) اسم الرواية