رواية صوت من المجهول الفصل الخامس و الثلاثون 35 - بقلم زينب ماجد

   

رواية صوت من المجهول الفصل الخامس و الثلاثون  35 - بقلم زينب ماجد

ادفع بيه من عندي وهو يسحبني

كلبي على وجهي وقيدني اريد اوخر من عنده واصرخ بكل صوتي ميتركني .. نادية كامت وكفة على صفحة … وهي تكله : ايوب كافي اتركها ايووووب

مجان يسمع ولا هامه شي غير اللي براسه

كرهت روحي وكرهته وكرهت بيته وكرهت كلشي واني جوا اديه ..

سوا اللي يريده وابتعد .. نادية طلعت من الغرفة بسرعة لزمني من شعري وهو يكلي : اسمعلج صوت بعد وكلما راح ينرفعلج حس بهالبيت لا اكسرج واعلمج قيمتج شنووو … خلك مرة جواي افتهمتي لو لااااا اعلمج شلون تكولييييين بوجهي اشوف غيييييرك

جريت روحي من عنده وغطيت نفسي وكمت ابچي بقوة وصوت مسموع

تركني وطلع … كمت الزم بالبطانية حيل واشهك من البجي جسمي كله يهتز واني ابجي تهسترت .

يكشفني كدامها ويقربني بهيج طريقة يذلني بيها

واني ابجي سمعت صوت صريخ جوا وصياح ونادية تبجي وتصرخ ..

سكتت وتعدلت من نومتي وكعدت .. مدا اسمع على شنو ديتعاركون بس صياحه بنص البيت مدا افهم منه شي

ضميت نفسي ودنكت راسي لرجليه ابجي

شنو الطريقة الأخلص بيها منا !؟ شسوي واطلع .. تعبت ما اكدر ااستمر وياه ولا بأي طريقة كشت روحي من روحي ومن ضعفي واني بهالحالة .

بقيت كاعدة بمكاني .. خابرتني ماما ما رديت عليها

نار تفور بيه ع السوا ويايا والم بجسمي .. اذاني كلش كمت اتحسب عليه وحاضنة نفسي .. مستحيل ابقى .. ما ابقاله هنا ابد .. مستحيل.

لساعة واكثر .. دخل وبيده علوش

كمت من مكاني بسرعة كمت اصيح : اطلع ما اريدك يمي اطلععععع ما اريد اشووووف وجهك اخذ ابنك واطلع مني عوووووفني

دفعني حيل من عنده ويكلي : بعدج ما تبتي موووو .. بعينيييي

مشى حط الطفل بكاروكه ورجع عليه : بعده صوتج اسمعه مووو

لزمني من ركبتي : يطلعلج صووووت وياييييي

اصيح واصرخ : ما اريد طلكني ما اااااريدك

دفعني للكاع حيل .. لطشتني كمت ارافس برجليه

جر رجلي وحط ركبة رجلة علية قيدني بيني اديه ولزمني من ركبتي : تريدين غيري مووو اطلكج حتى تروحين للشباب البجامعتج موووو تريديلج واحد بكدج

كمت اضرب بيه وادفعه مني خنكني روحي رادت تطلع من اديه

فلت ايده ولزم اديه كمت اكح بقوة وهو يصيح : يطلعلج صووووت وياااااي غفراااان

– نذل حقييييير الله لا ينطييييييك

كام متي وهو يكول : خرب بغيرته اليوم اذا ما اجلدج

توجه للكنتور يطلعله حزام واني ركضت لأبني نط بجي جريته وكعدت بزاوية الكنتور وحاضنة ابني حيل .. كام يصرخ : تغلطين عليه ولج

لزمني من راسي ويكلي: ذبي من ايدج لا تتحامين بيه .. اليوم اربيج والله

كمت ابجي بقوة وابني يصرخ جرني حيل اتزحلك ابني من ايد يبي

وه سحلني اني والفراش من راسي كمت ادفع بيه واضرب برجلييييه : واصرخ عووووفني

واحنا بهالحالة .. علوش من الخوف اجا يزحفلي صار ورا واتعثر بيه برجليه سحكه وخر من عنده بسرعة .. الطفل نط من البجي .. ركضتله زحف شلته من جوا رجليه وهو دنك يريد يشيله

اريد الطفل يسكت … مدا يسكت وايوب يصرخ : انطيني الطفل انطينيييي

اني اجر بيه واصرب على خده : علي ماما علوش حبيبي ماما

اختفى صوته وهو سكران من البجي

كلبن عيونه كمت اصرخ : ابني مااااات مموتتتت ابني الله لا ينطيك موتت ابني

صرخ دنطيني وخري منه انطيييني

جر من ايدي حيل .. وركض بيه للحمام حط راسه جوا المي وينكث بيه الطم على وجهي واضرب بيه واصرخ : ابني مات موتتت ابنييييي

صعدت خالتي ونادية وسرى واني اصرخ بالحمام وخالتي تجر بيه وتكله : اركض خل نشيله. للمستشفى

نكثه حيل شهك وصرخ يبجي .. حطه على كلبه وحضنه

اوخر بخالتي من الباب اريد اطب اخذه وهي تكله : الف الحمدلله والشكر من بجى ما بيه شي ما بيه شي

وخرته وجريته من عنده بعده يبجي

حضنته حيل ومشيت للغرفة كلهم اجو وراي ..كعدت ع الجرباية

رضعته سكت وكام يرضع وهم يحجون فوك راسي

الحمدلله من بجى

ما تستحون ما كافي مشاكل ولج ارحمي هالطفل هذا ارحمي راح تموتي وتموتين ابوه شتجنييين

ايوب : بدلي خلي ناخذه للدكتور

خالتي : ما عليه شي ما دام بجى وديرضع ما عليه شي بس غير ترحوه حريمة هالطفل بيناتكم

-كومي بدليله دا اكلج

-وخر من عندي

-شوخر الطفل انشمر مرة ثانية لا يصير بيه شي

-من وراك كل الصار بيه من وراك الله يخلصنا منك ومن ظلمك

صرخت خالتي : عزا براسج طايحة الحظ تدعين عليه من الله ياخذج ويخلصه منج يا عوبة يا خايبة يا طايحة حظ يعساج بسرطان ان شاءالله تدعين على ابني

ايوب : ميصيرلها حل هاي لا ما الزمها واكص السانها متوب

-تكص السانها شنو طلكها وذبها على اهلها واخذ ابنك شنو نقص نسوان شو المرة موجودة وتربي طلكها تدعين على ابني الله يوفقج ان شاءالله الله يخلصه منج ومن شكولج

-اطلعوا مني ما اريد احد بيكم اطلعووو

كام يصك على اسنونه ويدفع براسي :ولج اسكتي بعده صوتج يطلع ولج مو ما اريد اعوقج واذبج جلببببه

سرى : مدام الطفل زين اتركوها ترضعه اطلعوا من عدها هسه اعصابها تعبانة امشو

كمت ابجي واني حاضنة ابني ارضعه وامسح على راسه ..

دخل وهو سابح حجه : بدليله لتنومي خلي اخذه للطبيب

-خلي يكعد هسه غط بنومته ما اريد افززه

حطيته ع السرير واخذت هدوم ورحت للحمام

شريط اللحظات الللي مرت بهالساعات كله حضر كبالي واني اسبح

اذا جنت باقية هنا ومتحملة لخاطر ابني صار لازم اطلع من هالبيت لخاطره ابني ديروح ضحية خلافاتنا ومشاكلنا شيطلع وشلون يعيش وهو ديشوف كل صراعات امه وابوه وعصبيتهم وتقاتلهم كباله لازم اخلصه من هيج جو ما اكدر ابقي بعد .

طلعت من الحمام

لكيت ايوب مبدل ونايم بصفه مكعده ويبوس بيه ويلاعبه

بودي اكله اكطعه واخره من ابني واكوله لتتقرب منه ابتعد من عدنا هذا مالتي وانت دمرته ودمرتني ابتعد من عنده بس باتت الحروف ابلعومي وما طلعت ..

صار لازم اخذ قرار لخاطر ابني .

بدلت اني وياه هو شاله على جتفه واني شلت الجنطة وامشي وراه وكفت خالتي : نادية شبيك وياها ؟

-خلي تولي

-جا انت تضوج من هاي الما تستحي تذب حركتك بنادية شسوت ؟

تركها ومشى حجت : الله لا ينطيج ان شاءالله الله فكنا منج

تبعته وخليتها وراي مجاوبت .. صعدت بالسيارة هو صعد وعلوش بحضنه وكفه لازم الستيرن ويلاعبه من شغل انطانياه ومشى .. علوش بقى يبجي يريد الا يمه اخذه من عندي وخلاه على رجله ويسوق

حطيت راسي ع الجامة اخذت قرار بس بعد القرار !؟

اخواني حيخلوني اتطلك لو راح ارجع بدوامة مشاكل وتعنيف وياهم ويبقى ابني بنفس البيئة شسوي !؟ ما اعرف شتصرف وشأريد دايخة حيل وضايعة ومقهورة وكلش شعور سيء بالدنيا دا اشعر بيه بهاللحظة

وصلنا للمكان انطانياه ونزل كام يبجي يصرخ شلون عافه

نزلت سد السيارة واجا اخذه من ايدي ومشى كدامي واني ورا كوا اجر خطواتي حيلي بايد من القهر

دخلناه على دكتور كعدنا ننتظر خلاه بحضني .. وكعد يمي

كامت اللي كدامي مرة تطلع بثلاثين مدري اربعين تسولف عن ابنها هو حجالها عن وضع علوش .. حسيتها اخذت ميانة وياه هواي طول ما احنا كاعدين هي تسولف حتى لو ينهي الحديث هي تفتح موضوع وتسولف .. اندار عليه وهو يسولف لكاني اباوع عليه بنظرات حقد .. دنك ع التليفون وقاطعها وكاللها : من رخصتج

وكام طلع برا لما اجا دورنا اجا

فحصه الدكتور و ودانا على تحاليل واشعة ورنين ومفراس وهوسة

لما اطلع عليها كال :تحاليله سليمة ما بيه شي بس ديروا بالكم عليه من الصياح والهوسة والفزة .

اخذنا ورجعنا للبيت

لكينا نادية منتهية من البجي وتكله : رجعني للبيت ما اكدر ابقى هنا

كاللها : اذا طلعتي باب الحوش احسبي احسابج مطلكة مني بالثلاث

كامت تبجي وتحجي : ليش شسويتلك شقصرتك وياك تتقرب لمرتك كبالي شنو اني حيوان ما عندي احساس رايد تقهرها لو تقهرني

حجه :توخرين مني تعبان ومالي خلك نفسي

-واني شوكت يصيرلي خلك من يوم اللي جبتني لهنا حطيتني خدامة اخذم وانظف وغفران بحجة زعلانة متحاجيها وكل وكتك فوك تسمعك كلمتين تغثك ترجع عليه اتذب حرگتك بيه .

اني صعدت ووكفت من المحجر اباوعلهم ..

هو اتجاهلها وراد يصعد كالتله : رجعني للبيت يم امي

اندار عليها خزرها : دقيقة اذا ما رجعتي الا من صدگ ارجعج والله

رجعت للغرفة تبجي

مشيت لغرفتي نومت علوش بمكانه دخل هو للغرفة

وكفت كدامه : بدون صوت وهوسة انزللها واتركنا اني وابني لحالنا .

-ما اريدك يمي بالغرفة واذا راح تصر راح اخذ ابني واطلع وهالمرة ما ابقى

-اذا بت ابوج طلعي وسويها .

مشى من عندي .. يبدل

تركته ومشيت للحمام توضيت واجيت دا اريد اصلي لكيته مد سجادة شمر الملف مال الصلاة ووكف يصلي .. كعدت ع الجرباية انتظره لحد ما كمل تركها اخذت الملف البسه

مشى لكاروك علوش لزم الكاروك منا ومنا ووكف يباوع عليه

عدلت الملف ورجعت اباوعله : ابنك ديدفع ثمن غرورك وانانيتك اذا صار بيه شي خلي نزواتك وشهواتك تفيدك دمرته ودمرتني بس حتى انت ترتاح ..

ما باوعلي بقى لازم بالكاروك وصافن بيه

صليت وكملت وهو بعده على نفس الوگفة .. كمت ارتب بالغرفة حيل هوسة

حجه : مو وكتج اتركي التنظيف الباجر خلي ينام بهدوء

تركته وكعدت على طرف الجرباية

لعبانة نفسي من كلشي اريد مهرب من هالبيت ما أگدر ابقى بيه واشوفه كدامي احس اريد ازوع من اشوفه هلكد ما كرهته .. اتذكر كلماته من يكلي : اكو امور انت مو ثوبج تسويها

شكد مقرف ووضيع .. عبالي محترم وجنت ماخذته بعين جبيرة تالي دمرنا بس حتى يحقق نزواته واللي يريده .. مستحيل اكدر استمر وياه مستحيل .

علوش كام يبجي شاله بسرعة يبوس بيه ويناغيله

كتله : انت شدا تسوي شتناغي وخر منه كطعت نومته

اخذته من اديه بعده يبجي الطفل بعينه النوم بس ما ينام ردت ارضعه شبعان مقبل ياخذ صدري وبس يبجي اخذه من ايدي يريد يسكته ما يقبل بس يبجي ما مرتاح .. حجه : خاف مريض تعاي شوي

– لا متعارض الصوت والهوسة الصارت دا تجي مثل الكوابيس ومدا يكدر ينام بجالك ..

اخذته من ايده وكمت افتر بيه بالغرفة واحاول اهدي

راح جابله حلويات وحليب بس ميريد بس يبجي .. كال : انطيني ياه اخذه بالسيارة يسكت بالسيارة

– انت وخر من عدنا واحنا نصير بخير

سحبته ونزلت .. اخذته للمطبخ كمت اطلعله فاكهة ميريد شربته مي شرب شوية ورجع يبجي .. واهز بيه .. وگفتلي نادية : شوكت يصير عندج كرامة وتنكلعين من هالبيت حتى ابنج ديموت بسببج

– من تصير عندج كرامة انت وتبطلين تركضين ورايا

– والله لا ابقى وراج لحد ما اخلص منج وجه الفگر

– باوعي على روحج زين وشوفي من وجه الفكر اللي من دخل هالبيت ولهسه انهجم

– اهجمه فوك راسج يالماعندج ذرة كرامة

– خليني بلا كرامة ولا هجامة بيوت اكوش على رجال متزوج واهجم بيته وياريت محترمج

– لا ههه يحترمج الچ الدايحة ام الشوارع

– حلو الإنسان ينسى نفسه ويعيب غيره بعيبه

– الله ياخذج انت وابنج ان شالله بكبر واحد اطمكم بيدي واخلص منكم

انداريتلها اريد ارد بقوة جان الكا ايوب وراها كاللها : هاي الدعاوي على ابني !؟

لزمها من راسها كالتله : لا عليها كل الديصير بينا من وراه

سطرها راشدي وهو يكلله : تدعين على ابني طايحة الحظ

اخذت ابني وطلعت كعدته برا وسديت عليهم الباب حتى لا صوتهم يفزع علوش اكثر وكتله : شوف شوف ذيج حمامة نايمة خطية نعسانة

ضل يباوع يدور ع الحمام بالسما ظلمة

كعدت ع الدجة وكمت اغنيله

مرة في حيينا زارنا فيل ظريف برفق قال لنا ليس هنالك ما يخيف

نحن الخير بطبعنا لا نرضى ظلم الضعيف لا يحيى بيننا الا الإنسان الشريف.

احاجية واجيبه منا وارجع منا اركصه

التهى شوية من كعدنا برا .. الطفل مخنوك من جو البيت

طلع كال : طبي جوا البسي حجاب الناس منا يشوفوج

كمت اريد اشيل علوش اخذه من ايدي وطلع بيه برا

رحت وصعدت فوگ فتحت اللابتوب وطلعت سورة البقرة وعليتها وكمت ارتب بالغرفة .. اريد الطاقة السلبية والشياطين كلها تطلع من الغرفة وتتبدل بملائكة وطاقة ايجابية احس الغرفة انشحنت مشاكل وهوسة صارت تخنك من تنطب .

طلعت الفراش كله صفطته برا ورحت جبت وصلت المسح والسطل حطيت المنظفات ورحت مسحتها كلها وعطرتها .. ولزمة وصلة امسح بالغراض .. دخل ايوب وعلوش بيده نايم ولازم علاكة.. نومه ع الجرباية مالتنا وتمدد يمه … شغلت مروحة وطفيت الضوا ونصيت صوت القران .. اخذت لحاف من الكنتور وانداريت من الجهة الثانية نمت .. صار علوش بيني وبينه .. كمت اغفي .. وهو ضارب عكس ومتمدد ويطبطب عليه وينومة .

دخلت بنومتي بس ما فصلت بعدني بين النايم والكاعد

حسيت على ايوب باسني بخدني وباس علوش وعدل غطانا وكام

فتحت عيني شفته طلع من الغرفة وسد الباب .

كمت من مكاني وطلعت على كيف دا اريد اشوفه وين يروح

نزل نادية جوا كاعدة ع القنفة وتباوع ع التلفزيون مدلغمة

كرصها من خدها : يحلوة

– رحمة لاهلك خليني بحالي

– شبيج انت هم گبيتي يعني اني احاول اضبط الصغيرة احتار بيج انت الجبيرة العاقلة

– تضربني كدامها ايوب

– وتدعين على ابني بالموت .. ابنها هو لو ابني

-انت مدا تقدر مشاعري من تصيحلي وتتقربلها كبالي انت دا تقهرني لو تقهرها لو شنو اني شسويتلك ؟

– هسه عوفي هذا جان بساعة عصبية وكومي يلا خل اراضيج

– تراضيني لو تراضي نفسك كبل تكلي ما اريد طفل ثاني ابني بعده صغير وتالي متعارك ويا غفران لان تاخذ منع حمل اني شنو فرقي عنها مو من حقي اصير ام

– نادية اني ما جذبت عليج من اول ما اتزوجت اتفقت وياج هالزواج يبقى بعيد عن عائلتي ومنسوي اطفال وانت قبلتي وكتيلي المهم اكون يمك .. شنو اللي اتغير

– اللي اتغير اريد طفل حالي حال مرتك

– وانت متزوجج حتى اجيب منج طفل !؟ مكافي ذيج كل ما اجيها راسي يوجعني ظهري يوجعني ابني مسهرني واعذارها متخلص اجي وياج نفس الحالة

– بس من حقي لو مو من حقي

– حقج لو ما متفق وياج اني اتفقت وياج وكتلج هالزواج ماخذه حتى اني وانت ننجمع ونتونس مو حتى يصير طفل وانت قبلتي وين حجيج هذا قبل لنتزوج !؟

كامت تبجي ومتجاوبه حجه : يلا حبيبي كافي كومي مشتاقلج

– زين خلي ارجع ويا امي

– مالج رجعة ويا امج اني ما عولت اعلن زواجنا حتى اخلص من سوالف امج تريديني ارجعلها .. كافي سدي الموضوع نازل ارتاح لو راح تكعدين تتشكين براسي

– ايوب انت متحبني

– اهووو تعال استلم اخلص من ضيم ذيج وهوستها تجيني هاي لج عيني حبيبتي حياتي اذا ما احبج المن اتزوجتج

– قارن بيني وبين غفران اللي تطلبه متكدر تكللها لا جامعتها اللي حلفت مترجعها تالي اخذتها بيدك واني من اطلب منك حاجة صغيرة مثل الحمل ترفض ومترضى .. مصعدها سيارة وتشتغل وتطلع وتطب بكيفها واني شنو هنا حتى غرفة ماعندي مخليني بغرفة امك !

– من عيوني اشتريلج احلى غرفة واللي اتعجبج بس انطيني مجال هالفترة

– هي مو تريد الطلاك ليش متلطكها !؟

– وابني !؟

– اخذ ابنك اني اربيه وخليها هي متهتم غير لدراستها وشغلها لا تهتملك ولا تهتم لأبنك انطيني ابنها اني احسبه مثل ابني واخليه بعيوني وخلي تولي هي تروح لاهلها

– لتفكرين بهالموضوع ميصير كومي يلا

هم راح تكلبين وجهج مثل ذيج ؟ يحلوة ميلوكلج الزعل شو باوعيلي اروح فدوة لهالعيون التسطر .. كومي يلا

– رايدني لونستك ايوب ؟

– اهووو اني هم صوجي مكابلج دولي

راد يكوم لزمته وحضنته : اني كلشي ما اريد من الدنيا غيرك ايوب لتعوفني انت روحي

– اي غير تضوجيني يعني انهد حيلي بطيحة ابني وجاي يمج ارتاح وتتعززين عليّ

– روحي ترخصلك ما اتحمل اشوفك مقهور روحي من الدنيا انت ما ازعلك بس اني لإن احبك

اخذها ودخل للغرفة

احس النار اشتعلت براسي

راح اتحمل اشوف المشاهد كل يوم ! اسمعه شلون يراضيها ويتغزلها ويطب ياخذ راحته وياها واني غاصبني على عيشتي وياه فوك !

صعدت فوك روحي لعبانة وكاشة ونافرة من كلشي ومختنكة مختنكة حيل

هسه هو شديسوي وياها جوا !؟ ديحضنها يبوس لو شيسويلها

مشاهد وامور تجي براسي جننتني

ما اكدر ما اتحمل مستحيل

مزلت جوادخلت للغرفة طلعت جنطة ايد جبيرة لميت بيها هدومي وهدوم ابني وغراضنا .. وقفلتها ولبست واخذت البصمة مال السيارة مالتي من الكنتور وانداريت اخذت تليفوني وشاحنتي وشلت ابني

باوعت : اني شدا اسوي ؟ ووين اريد اروح ؟

ما اعرف المهم ما ابقى هنا مستحيل ابقاله وابقي ابني بهالبيئة

اخذت ابني ونزلت والجنطة بيدي البيت هدوء محد طالع بالهول ..

صوت ضحكها بالغرفة يعني راضاها وغير مزاجها وارتاحوا واني مشتعلة نار !

فتحت باب المطبخ وطلعت

خليت ابني بالسيارة غطيته نايم .. وانداريت صعدت وشغلت

مشيت الطريق ليل ودموعي تجري وعيوني كلها نار وحقد

واحجي ويا روحي .. لا ما خبلتك

لا ما خليتك تدور علينا مثل المخبل وما تلكانا

اني تكشف جسمي كدامها وتهيني وتعوفني وتنزل تريح نفسك

بسيطة يا ايوب اني وانت ولدنيا ونشووووف والله لا العب بحالك لعب وحيرتنا وضيعتنا هاي كلها اطلعها من عيونك .. صبرك عليه

كمت اسوق وامشي وما ادري وين اروح

خابرت امي كتلها : ماما حضريلي فلوس من اللي عندج

– شكو خير

– لا ما علمته وربيته والله ما اطلع بت ابويه

-شبيج تبجين وين انت

– بالشارع

– طردج غفراااان

– لا اني طلعت ماما مستحيل ارجعله وحتى بيتكم ما اريده اني ما اريد غير روحي اريد اخلص منه

– وين راااايحة بتي

– ما ادري المهم ما ابقى

– اذكري الله يمه لا تجنين على نفسج

– يمممه ما ابقى ما اااابقى تركني وعافني اني وابني بأسوء حال ونزل يمها يراضيها علمود تريحه يمه ما اكدر اطب بيته ما اريييده

– اي تعاليلنا

– راح يجيني وراح يرجعني غصبا عني ما اريد

– اي وين تروووووحين

– ما ادري ماما كل المحتاجته حاليا اروح لكبر ابويه مختنكة ماما والله مختنكة راح اموت من قهري

– تروحين لكربلاء بهالوكت عزا العزاج ولج غير تجنين على نفسج اعقلي غفران

– لا اريده ولا اريد العقل ولا اريد كلشي عوفوني بحالي مااااا اريده

– زين تعاي عليه اني اروح وياج

– راح ادخليني غصبا ما عليه ما اطب لبيتكم

– اروح وياج لكربلاء مو تريدين نروح اني اروح وياج

– بشرط ما تكولين لاحد احنا بكربلاء

– واذا سألوني ولدي وين رايحة

– مو مشكلتي ما اريد احد منهم يلحكني اريد ارتاح اريد عقلي يرتاح منهم كلهم ما اريد احمد ولا علي ولا ايوب ولا اي بشر

– ميخالف بس تعاي مريلي ونروح اني وياج

– احلفي وروح ابويه تروحين

– وعلي الاعز مني ومن ابوج اروح وياج يمه بس تعاي من الله لا ينطيج الخلاج بهالحال مفرفحة وهو مرتاح

درت السيارة ورجعت على بيت اهلي كتلها : ما ادخل اطلعي

طلعت كالت : صفي سيارتج هنا

– وشلون نروح

– وتسوقين محافظات طايحة الحظ دطبكيها

طبكتها كالتلي : انطيني الولد

– ما ترجعيني

– ما ارجعج والله انطيني

انطيتها ابني وكالت : امشي

مشيت وراها .. اخذت تكسي للكراج نزلنا بالكراج .. صعدنا كوستر لكربلاء كعدنا كالت : شبيج شصاير

هي كالتلي شبيج اني الدموع صارت عشرة عشرة

حجت : ولج انت ام دمعة العزيزة هيج يصير بحالج غفورة يمه .. شجاج

بقيت اسولفلها الصار كله كامت تدعي عليه وتبوس بعلاوي وتكول : الله لا ينطي هدمكم بس علمود لذته من امده روحي لو دمرت بيتي على مود شهوتي ما يستحي ما يخجل شجاريله وعلي لا ما اربيه ما اطلع امج يغفران يمه .. اقفلي تليفونج واني اقفل تليفوني .. هينة

اخذت تليفوني .. ردت اقفله ..

ترددت رجعت كتبتله رسالة : كتلي بنت ابوج اذا طلعتي .. هسه اتأكدت اني بنت ابويه ؟ خلي شهواتك تفيدك .

دزيتها ماكو ثواني وخابر .. رفضته وقفلت التليفون .

اتحركت السيارة وابني بيد امي

حطيت راسي على جتفها فتحتلي حضنها ملت راسي على صدرها ولمتني اني وابني بحضنها وباستنا اثنينة .. هدت روحي بحضنها بس داخلي مجروح احس بروحي مشوهة هلكد ما كارهة روحي .

صفنت مثل هيج يوم جان زواجنا وبهيج وقت عايفتي بالفندق ابجي لوحدي وهو داير عني ملتهي بحب حياته العافها واتزوجني … كل عمري وياه اذية من اول يوم اذية ؟ ليش اتزوجني اذا جان رايدها ليش ورطني وياه وورط طفل بريء وهو ناوي يرجع لحبيبته القديمة !؟ جنت ابالي ينسى وكلت اوكف وياه وانسي تالي احنا اللي انسيناه واتأذينا

اتذكرت كعدته وياي بالإمام الكاظم من كالي اني تعبان انت راحتي بس انت ارتاح يمج انت الله دزج الي .. شكد جذاب وشكد اني غبية بحيث بلحظة صدكته ونسيت كلشي ومشيت وياه على نيتي تالي يكللها اني اشرد منها اريد ارتاح يمج هي تشكي هواي .. اني يمتى شاكية ! شوكت طلب حقه وتمنعت ؟ شوكت قصرت بحقه ؟ يطلعني كدامها حارمته ومظلوم واني اللي جنت اركض واكرب طول النهار ومن يجي الليل اتسبح واتعطر وابدله واكعدله اضحك واسولف وما اشكي حتى لا يضوج ويتململ تاليته يشكيلها مني .. كارهته من نص روحي وما اعرف شلون راح اخلص روحي منه !

بنص افكاري وامي طبطبت عليه : لا تفكرين ييمه ربچ يحلها

-شلون راح اخلص منه

– قررتي خلاص ما تكدرين تعيشين وياه

– اي

-وابنچ ؟

-اخذه

-واذا ما رضى ينطي

-راح اخذه ما راح ابقي ابني يعيش وياي مأساتي ويتعقد ويتمرض

– ليش ما تطلبين بيت وحدج واخلصي منهم كلهم واكعدي على ابنج

– وهو ؟

– يجيكم جية الخطار

– لا ما اريده اني كارهته ما اريد وجوده بحياتي .

– ارتاحي وقرري مو هسه خلي نروح للامام نستراح هناك و نفكر بعدين

رجعت حطيت راسي ع الجامة الجو بيه خيط برودة وظلمة وليل

وعقلي ما بطل يعرضلي مشاهد من حياتي ..

ومشاهد دقيقة اتذكر من جبتله الصينية وهو مريض حتى اوكله وشمرها عليه وحركني بيها لما كتلت نادية بيوم الاجت يمه ..

المشاهد اللي كاعد يعرضها عقلي دا تطفيني

مشهد يخلي النار تصعد لراسي ومشهد يخلي العبرة تجرح ببلعومي

كل سوالفه تأذي روحي مجروحه منه حيل .

وصلنا لكربلاء ..

كلت الها : خلينا ننزل بقندق نرتاح ونستقر افضل منا نبقى ضايعين

– بكيفج شنهو اليريحج ويعجبج سوي اني وياج

تنهدت ومشيتا على فندق قريب من الإمام الحسين كتله على غرفة كال كم ليلة ؟

انداريت الها : اني امتحاني الاحد واليوم راح ندخل الخميس احجز ٤ ايام ؟

– لا احجي كل يوم بيومه لا تحجزين ايام

حجزت ليلة وكتله : اذا بقينا لباجر راح نجدد

انطانا كارت ورحنا صعدنا المصعد .. الطابق السادس

وصلنا لغرفة فتحناها ع الكارت الغرفة حيل نظيفة وحلوة فتحنا الشباك وجان المنظر مال كبة الإمام العباس كلها طلعت كبالي اثنينا گلنا : اللهم صل على محمد وال محمد

حجت امي : عليك يبو راس الحار التبرد كلبها وتسهل امرها .. ما اريد ترد من دارك مضيومة بجاه هي اختك العقيلة توكف لهاليتيمة وتساعدها والله با ابو الفضل كلبي لاجمني عليها وما بيدي شي عليها بشاربك يتيمتي يابو راس الحار

ابتسمت الها مدمعة وهي بجت رحت تقربت منها حضنتها

باستني وكالتلي : الله يريحج يايمة ويكيد كلمن بكلبه كيد عليج وناويلج الكسرة بجاه هو علي ابو الإيتام كون ما تردين منا الا وامورج محلولة ياربي دعوة والدة محروك كلبها على حال بتها لا تردني .

بقيت كاعدة بحضنها وهي تمسح على شعري وتدعيلي لحد ما كعد علوش

كالتلي : كومي رضعي ابنج يمه كبل لا يأذن خلي نروح للامام نصلي جماعة غاد بلكي يرتاح كلبج

كعدت رضعت علوش وغيرتله وكمنا لبست شي خفيف ومريح ولبس العباية ورحنا نزلنا نتمشى للإمام الحسين .. التوجيهات الدينية نسمعها واحنا بالتفتيش ناس كومة ازدحام ضيم وامي اريد اخذ منها علوش متقبل تكلي : ارتاحي انت معليج بابنج

اتذكرت باج الحشد عندي بكفر التليفون

كتلها صدك عليمن واكفين تفتيش ومختنكين بنص هالإزدحام امشي .. مشينا طلعنا من الهوسة رحت ع الامانات اخذت التليفون فتحته سحبت الباج ورجعته .. ورحنا ع الباب انطيتهم الباج كال : فوتي

فوتت امي ودخلنا كوة لكينا مجال نكعد بيه

ايام الزيارة الشعبانية وكربلاء ما بيها محط رجل

كوة تلاحكنا ولكينا مكان ويا المصلين وكفنا مأذن والإمام يريد يبدي الصلاة .. وكفنا صلينا الجماعة .. اصلي ومغمضة عيوني اريد اطلع من هذا العالم واختلي ويا ربي اريد ارجع لروحي لقديمة لايماني القديم ومشاعر الإيمان اللي جانت محاوطتني .

كملنا صلاة كعدنا نسبح ونقرا قرأن لحد ما خفت الناس شوية كالتلي ماما : عوفي ابنج يمي وروحي زوري الإمام براحتج وتعاي

كمت من يمها واباوع على اسم الباب اللي احنا قريبين منه

ورحت دخلت الضريح اخذتني الروجة والإزدحام وتدافع لحد ما صرت وجه بوجه ويا قبر الإمام الحسين واندفعت ع الشباك حيل .. شميت ريحة القبر كإنما عطر من الجنة حجيت : ما خاب من تمسك بكم سادتي .. جدك الرسول صلى الله عليه واله وسلم يكول الحسين مصباح الهدى وسفينة النجاج .. سيدي غركت بهمي واجيت لسفينتك مكسورة خاطر لا تنزلني من سفينتك مخذولة برايتك اني يا حسين

دموعي واني اكوله : مولاي

وكمت ابجي بقوة واني لازمة الشباك

لحد ما حسيت على نفسي وسويت مجال لغيري يزور وطلعت وكفت كدام الضريح احاجي ودموعي تجري .. لحد ما حسيت فرغت البكلبي طلعت صليت الزيارة وقريت الزيارة وطلعت

كعدت يم امي وهي دخلت تزور ورجعت كمنا طلعنا فجر

وشوية ما بين الحرمين خاف الازدحام والطيور تحوم كمنا نتمشى ما بين الحرمين اجواء من الجنة .

دخلنا زرنا الإمام العباس ماما انهارت يم الإمام العباس وهي تكفله بيه

زرنا وطلعنا … كعدنا مطعم طلبت شوربة الي ولأبني وامي طلبت اكل الها .. بقيت اوكل ابني وكتلها : شوكت نروح نزور بابا

– ترجعين للفندق تنامين ترتاحين ونروح على راحتنا

– لا اريد اروحله هسه طاك كلبي عليه اريده

– هاهية براحتج هسه هسه

كملت اكل ابني .. حجيت : التليفونات لا نفتحها ما اريده يعرف احنا وين خلي يعرف قيمتنا ويعرف شهواته ونزواته شسوت بينا وبيه وليا حال وصلتنا .

– خلي يولن ارتاحي وعلى راحتج يمتى ما تريدين افتحيهن

– ماشي

كملنا واخذنا تكسي وطلعنا للمقبرة نزلنا من السيارة قريب من گبر ابويه امي كالتلي : انطيني ابنج وروحي لابوج

انطيتها ابني ورحت ملهوفة ادور كبر ابويه

وصلت شفت صورته باوعته مبتسم صرخت وحضنت كبره

بابا ليش عفتيني باااابا

بابا اخواني ذلوني بعدك بابا

احمد وعلي ما رحموني بغيابك

حيل اذوني بعدك اطلع من كبرك بابا وارجعلي

حيل احتاجك بابا

كمت اصرخ وابجي على كبره بلا شعور

بالنص ساعة امي لازمة ابني وكاعدة تباوعني وتبجي

حجيتله بجيتله شكيتله كل البگلبي وبقيت راسي على كبره ومنهارة ما بيه اشيل روحي منه .. هنا روح ابويه هنا جسمه هنا عيونه وحضنه هنا مكاني واماني اتمنى افتح كبره وانام بصفه … ما اريد اكوم ولا اريد اروح واتمنى ادفن روحي يمه وما ارجع لحياتي .

كامت امي مسحت على راسي وكالت : كومي اقريله قران ريحي وجرتي كلب ابوج عليج يا يمة .. كومي اقريله وادعيله خلي يرتاح بگبره .

مجايبة قرأن ويايا

طلعت التليفون فتحته حتى ادخل حقيبة المؤمن اول ما فتحت التليفون اجت كومة اشاعارات ع الخط حتى ما بيه نت .. ايوب اخواني خواتي سرى بلال كلهم مخابرين .. ودازين كومة رسايل .. مقريت ولا وحدة منهن رفعتهن .. اتصل ايوب .. رفضته وسويت طيران

دخلت حقيبة المؤمن وطلعت سورة يس قريتها وقريت الادعية الخاصة

كملنا غسلت كبره وماما راحت تزور قبور اهلها وحطت ابني بحضني .. دخلت للرسائل

ايوب كاتبلي

وين انت

ولج جلبه وين رايحة

الزمج غفران يابويه لا ما كتلناج ودفناج ولج اتشردين سااااقطة

احمد كاتبلي

امي وياج انتو وين حيوانة وين انت

قندرة ردي

علي كاتبلي : ولج انت ما تخافين ما تنردين الزمج لو ما الزمج بسيطة

خواتي هديل دازتلي : غفورة بس طمنينا عليج عليج الله والله خايفة عليج اخوتي متحلفيلج امي وياج

اسيل كاتبتلي : غفران وين انت ولج كلبي نار عليج يمعودة ردي

نورة كاتبة : غفران عليج الله ردي ولج لا كتلونج يمعزاية شسويتي بروحج

فتحت الطيران .. اتصلت بهديل

كالت : وينج انت ولج

– اني وماما طالعين بس لا تحجين ولا تكولين لاي احد وطمني خواتي البقية احنا زينين

– بس كليلي وين انتم

– هسه يم كبر بابا بس لتحجين لاي بشر ولا تكولين

– يمعودة اخاف ليسوولج شي

– ماما ويايا لتخافين بس لتحجين

– غفران رجلج صاير نار حتى لعيالي اجا ولج يهدد يكول كل واحد مشترك بشردتها لا اندمكم خلاني ادك والطم كدام عيالي

– خلي يتربى

– يمعزاية شيتربى متخبل

– من ايده بعد ما خبلنا ولعب بحالنا خلي هو يتخبل شوية لتخافين مراح يصير عليه شي

– دين هسه طلعتي وبعدين

– بس اريد ارتاح هديل تعبت كلش تعبت ابيته وادري اذا رحت لبيت اهلي لا يرضى ابات ولا ازعل واني اختنكت منه مكاعد اتحمل اشوفه اريد ابتعد شوية بس اعرف شتصرف شسوي

– والله يا غفورة كلبي نار عليج بس كون الله يعديها على خير وما يأذيج

– اطمني حبيبتي وطمني البنات احنا بخير

– الله يسهل امرج ويبعد عنج كل مكروه بجاه ام البنين والله كلبي طاير عليج والعباس

– حبيبتي ليضل بالج اني بخير

قفلته منها اتصل ايوب بسرعة .. فتحت الإتصال عجبني بس اسمع صوته وهو ملهوف ومتخبل .. رد الوووو ولج الزمج لو ما الزمج اطييييييرين مني لا والله … سديته بوجهه بسرعة وقفلت التليفون .

رجعت امي سولفتلها كالت : يطبهم مرض نارهم تاكل حطبهم من اديهم

كومي خلي نرجع للفندق تنامين وترتاحين وعود ربج يحلها

رجعنا بالتكسي وصلنا لشارع الامام مشينا للفندق وصلنا سبحت وامي حاطة ابني على رجلها تهز بيه نايم .. اجيت شلت ابني منها وحطيته ع السرير وتمددت بحضنها كالت : شعرج مبلل كومي خلي امشطلج

رحت للحمام جبتلها مشط واجيت يمها لكيتها مغطية ابني ببطانيته وجارة اللحاف والمخدة بالكاع كعدت وكالت تعاي .. كعدتني كبالها وخلت راسي على ركبة رجلها وكعدت تمشطلي وتظفرلي كصيبة ..واني اسولف وياها

– اذا عرفوا مكانه شراح يسوون بينا

– شيسوون انعل ابهاتهم لابو عشايرهم بايكين ناهبين بتي تعبانة وخذتها للامام

– واذا كالولج ليش ما كتيلنا

– ياهو منهم ولي امري حتى اكله ما عجبني امشي بكيفهم اني

– وايوب راح يكلج اخذتي مرتي بدون علمي

– هذا اذا يصير كدامي من لوزه اعضه مو اطي بتي

حسيت بأمان كلش رهيب واني مرجعة راسي تظفرلي وتطمني حسيت روحي طفلة بين اديها ما اخاف شي وهي يمي .. كملت ظفر بس احس عيوني صارت يابانية هلكد ما ظفيرتها قوية ومسحوبة

طبطبتلي ع المخدة : تعاي ييمه ارتاحي من امس ما نايمة

حطيت المخدة بحضنها وكامت تغطيني وتطبطب عليه لحد ما نمت ..

كعدت على اذان الظهر من العتبة كمت صليت الظهر وهي كاعدة على سجادةتها وبعبايتها تقرا قرأن .. صليت ورجعت نمت ما كعدت غير هم على صوت اذان المغرب صلت امي ورجعت تمددت يم ابني ونامت .. غطيتها بلحافي ووكفت ع البلكون واكفة واباوع لقبة الإمام العباس ..

يمكن بالساعة اني واكفة وضايعة واريد طريقة كون اخواني ميمنعوني من الطلاق .. واطلع من سطوة ايوب وسيطرته .

باوعت ابني كعد وامي نايمة

بدلتله ونزلنا اني وياه … شفت ديأذيني بشيلته ومحل العاب طفال هواية سالته اذا عنده عربانة اطفال طلعلي عربانة كالي ب٣٥ انطيته الفلوس ومشيت مواكب هواية دا توزع .. واني امشي رجال جبير حطلي بيدي تمن وفوكاه تبسي ولحم .. ابتسمتله وكتله : شكرا حجي

حجه : بالعافية بنيتي

اتنهدت شكد مشتاقة اسمع هالكلمة من حلك بابا

كعدت ع الرصيف وثبتت العربانة وكعدت اوكل علوش البتيتة اللي بالمركة وشوية من اللحم واني اكل بالتمن .. بعدين وزعوا موز .. غسلت الموزة زين وكصيتها بنص وانطيت لعلوش نص كام يمص وياكل بيها والتهى بيها واني امشي ..

رحت دخلت ما بين الحرمين عرضتلي مكتبة مقابيلي

مشيت لابو المكتبة كتله : اكدر استعير كتاب ؟

كال : طبعا بس هويتج

انطيته جنسيتي .. كال : اختاري اي كتاب حتى اسجل اسمج واسم الكتاب

اختاريت ( ماذا قال الإمام علي عن اخر الزمان )

اخذته ورحت كعدت على صفحة اقرأ .. وابني يمي .. دخلت بجو من القراءة لحد ما علوش نعس .. خليته جوا عباتي يرضع ونزلت النقاب على وجهي ومخلية العربانة كدامي واقرا .. لحد ما باوعت الساعة الجبيرة كدامي ب١٢ … بس عبالك نهار هلكد ما ازدحام والناس هوسة

علوش نايم رجعت العربانة سويتها مال نوم

نومته وغطيته .. وكمت ادفع بيه للمكتبة كتله : يصير هذا الكتاب اخذه وياي للفندق اقرا

كال : اعتذر منج ممنوع

انطيته وكتله شكرا

اخذت جنسيتي ومشيت اخذت لأمي عشا .. وحطيت العربانة مال علوش بالامانات وصعدت لكيت امي بعدها نايمة كعدت على طبتي كالت : ها وين جنتي ؟

– نزلت اتعشى اني وعلوش وكعدت بين الحرمين اقرأ .. جبتلج عشاج

كعدت ونزلت بالكاع .. كالت : ها ما قررتي شي ؟

– اني مقرر اطلك نهائي وقرار ما بيه رجعة .. بس اريد الطريقة ولدج ما راح يخلوني

– وتالي هاي طلعتنا تسوي حل

– متسوي حل بس ارتاح ماما صار اسبوع اني عايشة حرب نفسي وضغوط الله يعلم شلون تجرعتها لو ما حرام والله اكتل روحي اني كل الرايدته ابتعد منه

– وضمتج عنه من ما يدري انت وين راح تريحج

– اذا عرف اني وين احسب ساعة هو هنا وغصبا ما علينا نرجع ..

– والله يا يمة ما ادري .. جاي اماشيج خاطر يرتاح بالج بس ما ادري حلج شنهو الكاض ايدي هالطفل هاذ اخاف اطلكنج غصب ويشيلونه اخوتج ويطونه لابوه وتعال جيب ليل واخذ عتابه من المشاكل

– الله كريم الله موجود نحير والحل يمه هو حلال العقد والمشاكل

– والنعم بالله ، اني فتحت تليفوني خاف يصير ما يصير خاطر خواتج يبلغني ما يصير نظل سادين وما ندري بظهرنا شيصير ..

– واذا خابروج ايوب واحمد وعلي

– ما ارد عليهم بس على خواتج ارد .. وما اطيهم مكانه بس خاطر يصير عدنا علم باليصير خاف منا منا

– تمام

حطيت ابني ونومته وياي ارضعه لحد ما غفيت ..

كعدت وجه الصبح على اذان الفجر امي ماكو اكيد نازلة تصلي جماعة بالحرم كمت توضيت وصليت الفرض وكعدت اقرأ قرأن .

هدووووووووء ماكو صوت ابد

حتى بداخلي هدوء روح مطمئنة وجو ايماني يحف حوالين الحرم ماكو طاقة سلبية ماكو ضيق نفس وصوت القرأن اللي بحرم من بعيييييد يوصل اذنك خفيف .

طبكت المصحف وبسته وحطيته ع الميز ومشيت للشباك اباوع قبة الإمام العباس منين ما افكر مدا الكا حل .. اخاف اجازف واعاند وما ارجع وابني يكون الضحية ورجعة ما افكر ارجع وشلون الحل ما ادري

كمت ادعي رب العالمين

انتظرت يكعد علوش .. ونزلت زرت ورحت اخذت كتاب من مكتبة العتبة وكعدت بين الحرمين اقرأ وحاطة ابني كدامي بالعربانة وجنطتي بصفي بيها كل احتياجاته وغراضي موبايل وبصمة سيارتي وفلوسي .

بس جان حيل ازداحام

يوم جمعة وتحس ماكو احد ضال ابيته الحرم ما بيه محط رجل كلها تدورلها مكان تكعد من الازدحام .. اني اتخيرتلي اول الناس وكعدت كدام مبردة تبخ مي ومرتاحة حيل بمكاني رغم الهوسة والازدحام

وهاي كل اليجي يوزع يحط بعربانة علوش

كيك عصير كعك جكليت مصقول موز برتقال حليب بواكيت ..

لليل يلا رجعت للفندق .. نمت وثاني يوم الصبح نفس الحالة كعدنا اني وعلوش ونلزت اخذت كتبي مال الجامعة ونزلت وكعدت اقرأ وماما عايفتنا على راحتنا تنزل بس وقت الصلاة تصلي جماعة بالحرم وترجع للغرفة ..

جان يوم سبت .. صبح

والزيارة اخف بهواية من البارحة الاماكن فارغة .. وهدوء رغم اكو هواية ناس تروح وتجي وصوت القرأن بالحرم .. واني كاعدة بداية المسقفات وعلوش يمي وكتبي بالكاع ومدنكة اقرأ ومركزة بكتبي رفعت راسي كاعد اشنط ظهري ..

جان الكا وجه ايوب من بعيد ..

تجمدت رجلية بمكانهم من الخوف والوجع صاب بطني فجأة كامت تلويني .. اريد ادنك احط النقاب على وجهي واندار بس لكفتي وعرفني واجا عيونه نار وشرار يتطاير منهن من العصبية كال : كومي

– مراح اكوم وياك

– كومي لا وحق هو هذا الحسين اسحلج سحل والله

– اني بضيافة الإمام الحسين وجرب تطخني بحضرته

– سهلة

شال الطفل من العربانة كمت : وين ماخذ الطفل

– اعلمج يا طايحة الحظ بسيطة

اخذه ومشى دنكت على كتبي الهم وغراض علوش لميت الجنطة اشيل راسي هو ماكو حطيت الجنطة بالعربانة وكمت افتر .. ادور منا ومنا ماكو كلت خلي ارجع لامي اكولها

بس كلبي طار على ابني كلت خذاه وراح يكسرني بيه

ادفع بالعربانة اريد اطلع من الحرم ..

اجا من وراي لزم زندي حيل ويصك على سنونه ويكلي امشي لا ما اخليهم يدفنوج اليوم فلا اتسمى بأسمي ..

جرني ومشى حيل واخذ التليفون وانطاني علوش .. وخابر كاله : علي لكيتها خابر على احمد خلي يجي ساعة واني جايبها انتظروني 

• يتبع الفصل التالي اضغط على (رواية صوت من المجهول) اسم الرواية