رواية صوت من المجهول الفصل السادس و الثلاثون 36 - بقلم زينب ماجد

    

رواية صوت من المجهول الفصل السادس و الثلاثون 36 - بقلم زينب ماجد

اني سمعته يخابر اخواني ويكول تحضروا لكيتها

بادن رجلية من الخوف .. وكفت اريد احط علوش بالعربانة وهو يجر بيه : امشي كدامي بسرعة

– بس احط الطفل بعربانته

حطيته كتله : ماما بالفندق لازم ارجعلها ابلغها

– امج هي تبتلي بروحها كدامي

ويجر بيه

– ما اعوف امي اني اروح ويا امي

– كدامي اكلج

– زين اخابرها ابلغها ليظل بالها

جرني ومشى .. بس كلبي كام يدگ بخوف

وصلت للبوابة مال الحرم واكف بيها عسكري تابع للعتبة رغم تليفوني بجيبي بس اريد اجذب نظر الامن علمود يعرقل خروجنا حتى اخابر امي خفت اذا اروح وينطيني لاخوتي وامي ما موجودة شيسوون بيا !؟ وكفت وكتله : اخوية اكدر استخدم تليفونك بس اخابر امي

اندار ورجع خزرني وجرني حيل : امشييي اكلج

– ما اروح وياك بدون علم امي

وكف المنتسب كال : خير خوية شنو السالفة ؟

– مشاكل عائلية اخي

كتله : ما اروح وياك بدون امي تجي اروح ما تجي ما راح اطلع من الحرم

– تمشين لا ادفنج هنا والله

– خوية هذا التهديد مو يم الإمام الحسين صلى على محمد ما دام المرة بحرم الإمام الحسين معناها بحمايته وبمسؤليتنا .. انت شتعودلها ؟

– اخي بحمايتك شني زوجها اني تحميها مني

– لا عزيزي بس خل اخدمك انطيني عقد الزواج مالتكم اذا ما تصير زحمة

– اخي جاي اجذب عليك المرة مرتي

– اخي اذا ما تنطيني اني مضطر اخابر امن العتبة يتصرفون لإن الحرم كله بنطاق امني اي تعرض او مشكلة لازم يكون عدهم علم .

حجه : خو اسألها ابني شنو جاهل اني تجيب عليه الامن لان اريد اخذ مرتي … ما تحجين

هم اثناء مديحجون طلعت تليفوني من جنطتي وخابرت ..

جر ايدي المنتسب وكف : اخي هاي التصرفات ما مسموح بيها اذا تسمح اركف هنا

ووجه نداء اشتاط عيونه صارن بكصته كام يتحاجى وياه .. كتلها ماما احنا بالبوابة مال منطقة ما بين الحرمين ايوب يمي تعاي بسرعة

كالت: اجيتج

هو التهى .. كتله : اخوية هو زوجي مدا يكذب عليك بس اني جاية ويا امي مرا جبيرة ما اكدر اتركها هنا واروح وخابرتها وراح تنزل

حجه : ماكو اي مشكلة

– لا والله الله يحفظكم ان شاءالله بس منتظرة ماما تجي

صك ايوب اسنانه وحجه : جماعة العتبة نصهم معارف ويعرفوني امشي بدون مخازي لا اسحلج والعباس

مشيت وياه تعديت المنتسب وكتله : بس ننتظر ماما

كام يخزر اني وكفت

.. يحجي امشي لا تشهرينا

.. بس تجي

هو واكف على نار لا يكدر يجرني ويجذب نظر منطقة امنية كلها تابعة للعتبة ويلزموه علمود مشكلة عائلية وهو نص اللي يشتغلون هنا يعرفهم .. واني ارجف وعيوني تترقب انتظر امي ..

شوية وبينت امي اخذ عربانة علوش وكال : امشي

مشيت وهي اجت تمشي : امشي وين تريد تاخذها خالة

احاجيك اوكف

– اطلعي الشارع ونحجي لا تخزونا

مشينا طلعتا شارع الإمام جرت العربانة من عنده : اوكف شني ماخذنا كوترا انت وين ماخذ الجاهل

– لا ما اندمج وروح ابوي على طلعتكم هاي وسوايتكم الا افعل ما افعل سهلة

-سهلتين كون مو سهلة تهديد لا تهدد مو زغيرة انا ايوب وتكلي اندمج

-تاخذين مرتي من بيتي بدون علميييييي

-ما جاية البيتك البنية هي الهجت منك مرة ما تريدك وكالتلك وديني لاهلي طلكني ما جبتها النا البنية ما تريد تبقى ابيتك شنهي خالة غصب لو كوة ؟

– ما اطلك والله لو تطلع نخلة بروسكم طلاك ما اطلك واعلمكم

– لا تطلك بس ما اطيك بتي هذا ابنك اخذه وروح ..

– والله غصبا ما عليها تروح ورجليها فوك راسها

– اعلمك الغصبا هاي عليمن تمشيها .. امشي

جرت ايدي … وانطته عربانة علوش

لزمني وكاللها : ما دامها على ذمتي خطوة ما تمشي وياج

– خايب من امداني وامدا بطني ان جان ورقة تخليك تتحكم ببزري .. ربيت وتعبت وانكسر ظهري تالي تجي بوريقة تكول مرتي .. من تكض ايدها اكسرها الك والله اخذ ابنك وروح لا وحك هو العباس اشهرك شهيرة الله هنا .

جرتني من عنده وهو يكللها : سهلة

اخذ علوش ومشى علوش كام يبجي وراي

كتلها: ماما ابني شلون اعرفه

– يرجعلج

– شلون راح يرجع وحده ؟ بالطريق ايوب جاي وحده ميسيطر على طفل بطريق ساعتين

– كتلج ابنج يرجعلج امشي عفت غراضي بالفندق

اخذتني بس كلبي صار نار على ابني .. كامت دموعي تتجاره وحدها .. اندارت عليه : جاي اكلج يرجعلج اخابر عمه يجيبلنا الطفل ياهو الياخذ طفل يرضع من امه شبيج بتي

– بس كاعد يبجي وايوب ما يعرفله واخاف ينشمر

– ما ينشمر

-الدكتور كاللنا لا يبجي بقوة ماما خابري

– ولج بتي نرجع لبغداد ويجيبوه

دموعي كامت تجري بالزايد لإن رجع ابني يتحمل خلافاتنا وهو الضحية امي حتى تحميني انطت ابني وابالها نوصل لبغداد وتخلي عمه يجيبه بس شلون اذا ابني كام يبجي ونط من البجي وصار بي شي ! كلبي صار عليه نار ..

وصلنا الفندق خابر ايوب دست رد بسرعة علوش ناط من البجي بيده مدا يسكت وايوب يصيح : طايحة الحظ ابنج يبجي تجين لو اخذه والله احرمج منه العمر كله

كمت ابجي ازيد واكوله : الله يخليك جيبلياه

– تجين انت وياه ما تجين اندمج والله واعلمج شلون تخلين ابنج بهالحال هذا !

انداريت لأمي كتلها : راح ارجع

-ولج وين خلي نصفي كلشي ونطلع بس نوصل يجيبولجياه

-يمه كاعد يبجي ميسكت

– يسكته صعبة اكعدييييي

– عليج الله يمه ما اريد ابني يتحمل من وراي راح ارجع

وكفت تنهدت : واذا كتلوج

– راح ابقى وياج على اتصال

– واذا كتلج يمه

– راح اتصرف .. الفلوس يمج ادفعي حساب الفندق واني رايحة

ضلت تباوع بوجهي محتارة .. اندارت لمرقد للإمام العباس

كالتله : بكفالتك يخو زينب ان جان احد مسها لو اذاها يتيمتي بذمتك يبو راس الحار

عفتها ومشيت ع السريع رجعت خابرته كتله : اني جاية للمكان انت وين

– بعدني بالمكان اني كدرت امشيييي لازمه ما كاعد اندل الحليب والممة طرشني ابن الزفرة

رحت طلقة رجعت للمكان اللي هو بيه .. انطانياه كال : ابقي هنا اجيب السيارة واجي اذا اتحركتي خير خيركم اسمطه

شلته كمت اهز بيه .. وخليته جوا عباتي ورضعته وجريت النقاب على وجهي وطبكت العباية وغطيت نفسي ولازمته لحد ما وصل بالسيارة صعدت وياه ..

حجه : اني اتسوين بيه هيج غفران !؟ اتطلعين من بيتي بنص الليل ؟

اني تحطين راسج براسي واتدزيلي شفت اني بت ابوي طلعت غصبا ما عليك .. ولج اني السويتج من تكبرين ما تكبرين علي اذلج والله وتعرفين اكدرررر بس بعيني سهلة

بقى يحجي يغلط يصيح ما حجيت ولا اي كلمة

لحد ما دخل منطقة اهلي خابرت على امي ردت : بالطريق اني وراج جاية وخابرت عمه راح يتوجه لبيت ابوج

سحب التليفون مني وسده بوجه اهلي

حجيت : جنت تگلي لا تخافين مني واني خايف الله بيج .. اني اجيت وياك علمود ابني وانت تذبني لاخواني حتى يكتلوني كدامك ويبردون كلبك هذا خوف الله ؟

-صوتج ما اسممممعه .. ما اسمممممعه

وضك على زندي حيل .. ملت عنه بس كمت ارجف .. صف اباب بيت اهلي .. حجه : انزلي

نزل هو نزلت وراه ..

طلع علي خزرني بسرعة : تعاي ولج تعاي

راد يلزم عباتي وكفت ورا ايوب ولزمت قميصه من ظهره جريته اتحامى بيه

حجه : لا حول ولا قوة الا بالله … علي طب جوا مو بالشارع خلي تفوت

حجه – فوتي بسرعة

بقيت ورا ظهر ايوب طلع احمد كاللهم : الطفل بيده طبوا جوا بالشارع اختزينا الله لا ينطيج

فتح الباب احمد وكالي : فوتي فوتي اعلمج منو التطلع من بيت رجلها وتسد التليفون .

دمعت عيوني وهم يتحلفولي واحدهم تكول جلب جوعان يلهث على كتلتي

حجيت : ما افوت

وخر ايوب من كدامي وحطني كدامه وكال : فوتي كدامي دشوووف طايحة الحظ .. دفعني ادخل للبيت دك تليفونه .. اشر لعلي يوخر وهو يرد : ها عمي

شكد احتقرته واحتقرتهم تحسهم مو اخوتي جلابه يأشرلهم يوخرون حتى ما يحجي .. الذلة الحسيت بيها بهالدقايق ما منها ذلة من اتحامى بالهاجة منه .. من اخوتي اللي من امي وابوي !

قفل الخط كاللهم : الحجي ابو نور جاي بالطريق مخابره عليه الوالدة .. فوتي كدامي

فتت كدامه للأستقبال .. نسرين واكفة اباب الهول دخلوا هم وكفت اباب الأستقبال .. كعد ايوب ع القنفة اللي بطرف الاستقبال بحذائه ودنك يفرك بوجهه واحمد يكلي : وين جنتي ولج

مجاوبته

صاح بوجهي : امدج هسه اطلع مصارين بطنج من حلكج ؟ ولج تقفلين الجهاز وتلعبييين بيناااا

حجه : الطفل نايم ومريض مو مال صوت .. بختها بيه والا والله لو ما هو جان هسه ناحرها هنا بس سهلة جبتج واعلمج شلون تلعبين علينا وتخلينا وراج لو اللوم عالجبيرة الفاهمة الايدتج ومشت وياج بدون علمي .. بس سهلة بسيطة

حجت نسرين : ما طول ابو نور راح يجي كومي غفران نومي الطفل جوا

باوعتلها خزرتني وغمزتلي : كومي

كمت من مكاني ..

علي كاعد على اعصابه .. واحمد واكف ويرزل

وايوب مدنك يفرك بوجهه .. مشيت من عدهم طلعت نسرين حجت : اقفلي الباب عليج لحد ما تجي امج

دخلت للغرفة وقفلت الباب ونومت ابني على الفراش مال امي ..

وكعدت خابرت امي كالت : دخلت بغداد وصلت

سديت الخط من عدها اني متوضية لإن اصلا جنت كاعدة بالحرم منتظره صلاة الظهر بس الله كتب وصلاة الظهر صارت بطريق الرجعة

وكفت ع السجادة وصليت فرضين الظهر والعصر سمعت صوت عمه وصل دخل للاستقبال .. اطمئنيت جان ماكلني الخوف كلت راح اوصل ينطيني لاخوتي يكطعوني وذر بس محد اذاني وماما جاية بالطريق

كعدت اقرأ القرأن بنية حل الشماكل لحد ما ماما وصلت .. دكت الباب صدقت وكمت .. فتحتلها كالت : كون احد اذاج

– لا محد .. بس ماما ما اريد ارجع وياه

حجيتها ودمعت

حجت : حطي عباتج على اجتافج وطبي سلمي على عمج وخلي نكعد نشوف حجيهم ونحجي .. امشي

لفيت ربطتي وحطيت عبايتي على اجتافي اتسترت بيها ومشيت لكيت ابو نور وصلاح جايين وكاعدين يسولفون هو واحمد وايوب مدنك وحاط ايده على كصته مختنگ .. سلمنا اني وامي على ابو نور وصلاح وكعدنا

حجه ابو نور : ام احمد تحجين لو نحجي ؟

– لا البركة بيك حجي احچي

– الله يبارك بيج يا طيبة .. ام احمد يصير تاخذين مرة من بيت رجلها حتى لو هي جاية بدون علم زوجها !؟ شنهو القصر وياكم ايوب خاطر تحطوه ورا ظهوركم وتمشون ثلث تيام محد يدري عنكم وانتم قافلين التليفونات ولاعبين باعصابهم لو ما علي يعرف من اخته انتم بكربلاء جان محد درى عنكم .. يصير يا ام احمد ؟

– كملت خوية ؟

رد .. احجي

كالتله : مرته ياخذ عليها رجلها ويهينها ويذلها ويكتلها وتكله وديني لبيت اهلي ما اريدك وما يوديها ويدوس ابنها ويتمرض الطفل من وراه وينقلونه دكتور ويرجع يذبهم بالغرفة وينزل يتوسل لمرته الثانية يلا حبيبتي ارضي خلي نتونس !؟ وضع هذا ابو نور تتحملة مرة ؟ كل ما كام وهددها باخوتها جيف يشتغلون عده شنو خوية فصلية البنية عده ؟ مرة اتزوج عليها كالتله بعد ما اريدك طلكها ليش حاطها ابيتك وادك عليها شنو معناتها من تهج وتريد تخابرني يا خوية وتبجي وتصيح ما اريدكم حتى انتم اهلي ما اريدكم اريد اهج ما اريد ارجع لايوب اخلي البنية خوية بالشارع لو اسايسها واخذها تهدأ

-وبدون علم الكل

– لا بتي هديل وصلتلكم خبر غفران ويا امها وين مالكم غرض بنية تريد ترتاح كودن ايوب لو اخوتها دروا راح يجون ياخذونها والبنية مختنكة واخذتها شنو خوية اني لو صار ابتي شي منهو يفيدني ايوب لو مرته الجديدة بنية ما تريده مثل ما دخلنا بالمعروف نطلع بالمعروف

– الحجي بالطلاك ما يجوز وحرام يا ام احمد

– لا يشهد عليه الله بسابع سماع ان جان طريت الطلاك على بالها انا كتلها تعاي عدي ارتاحي وما خلاها ترتاح لحد ما وصلاها لهالحال البنية سألتها يمه شنهو قرارج كالت يمه الطلاك وخوية ما دامك انت السبب بهالزواجة يرحم والديك انهيها

-انتم صدك تحجون تجذبون هو الطلاك هين وتسولفون بيه عمي بيناتكم طفل كولوا يا الله

حجيت : عمو لو هالزواج بيه مصلحة لأبني اتجرعه بس ابني ديروح ضحية هالمشاكل شنو ذنبه يشوف امه تنضرب ويجي يزحفلها ينداس ببطنه تالي ننقله للدكتور واشعة وجيب وودي الطفل ديموت بسبب خلافاتنا

– اي ما طول تكولين خلافات حلووووها

– اني انطيته الحل يا يطلكها يا يطلكني

اندارله : ابو عرب ساكت ابني شنو سالفتك

حجه : والله يا عمي انجوم السما اكربلها من الطلاك .. ما اطلك احد

صلاح : زين هسه ليش تحطون الطلاك على اطراف السانكم ترا والله الطلاك مو هين وبيناتكم طفل اعزلي خوية واكعدي ابيت بوحدج ومالج علاقة بمرته الثانية مو تكولين ابني كاعد يتحمل خلافاتنا اكعدي ابيت واتحملي وسكتي

ابو نور : واني بصراحة اسوف هذا الحل المرة الزينة عمي تتحمل وخلي يرلي يم مرته الثانية وانت وابنج ابيتج

علي : ما بيها شي افضل من الطلاك والطفل بيناتهم

حجت امي : خلي ياجرلها بيت قريب من عدنا ويعزللها ما بيها شي

حجه ابو نور : ها ايوب

– ما اكدر عمي

– شنهو الما تكدرله اذا فلوس ايجار نساعدك

يحجي بتكبر ولاوي خشمه ويكول – لا مو فلوس بس ما اعرف امي واطلع علمود احد

– مرتك الثانية اتضل يم امك

– لا ترجع غفران لبيت اهلي .. والثانية اطلعها

حجيت : ليش بالله حتى ارجع اخدم ابيت محد محترمني بيه لا والله ما ارجع .. اني جنت رايدة الطلاك ومن لا جارة سكتت على حلكم ابيت وحدي بس مال ارجع لبيت اهلك وغيري ابيت وحدها ومرتاحة لا والله ما ارجع طلكني .

حجه ابو نور : اصبري بتي … انت ليش ما تطلع غفران وتبقي الثانية يم امك الثانية لا عدها ولد ولا تلد بس هاي مشغولة شغل وجامعة وطفل خو تعزللها احسن

يحجي من ورا خشمه : لا غفران صغيرة ما امن اخليها بيت وحدها

حجت امي : قريب علينا شنهو الصغيرة

– لا اني اذا انتقلت ابيت وحدها معناها لازم اخذ حالي ومالي وانتقل وياها وابات يمها يومية ما امن اتركها وحدها واني ما اكدر ابات بغير بيت اهلي امي ما اكدر اعوفها تتأذى

شفت حجيه شي ما يربط شي كلها حجج

كتله : عمو ثق بالله العلي العظيم لا عنده مشكلة ولا علمود امه ولا ابد كل القضية هو يريد يذلني مفاد كلامه طلاك ما اطلك وغصبا ما عليج ترجعين خدامة لبيت اهلي .

باوع لعمه وكاله : افتهمتني .. هاهية

– وشلون نظل انت معاند وهي تريد الطلاك يا ايوب يا ام علي هذا مو حل

حجه : اسمع عمي يشهد الله الفوكاي لا فد يوم فكرت اذلها ولا اظلمها ولا احرمها اتزوجتها خو تعرفون الكل كالي مبطله واجت كالتلي اخوتي بطلوني واريد اكمل امتحاناتي كتلها بعيني كملي واني مو بس رجلج بحسبك ابوج كالت اريد جامعة كتلها على راسي رحت واني مسوي عمليه دفعتلها فلوس اقساطها ودخلتها احسن جامعة وكلت يتيمة خليها توكف على حيلها.. كالت اريد سيارتك كتلها هاج بويه اخذيها وكلكم لمتوني كتولي بت ١٩ شنهو وتنطيها سيارة عالية وكلت خلي تتباها بنفسها بجامعتها ما اهلي بنفسها رجعت كالت انت مرات ما تنطيني سيارتك اني اريد سيارة لوحدي كتلها تأمرين اخذتلها سيارة وانطلبت عليها ١٢ مليون واوافي وراها بس كون هي ترتاح كالو ايوب طحت بالساتر جزاتك درجات وظيفية حط اسم التريده والعباس اول وحدة اجت ابالي هي وكلت هاي باجر عكبة اذا متت وهي مالها سند من بعدي وين تروح خليني احط اسمها حتى لو شغل وزلم وصغيرة اتحمل وهي بت اصول المهم تسند روحها وعينتها وشغلتها ويشهد الله وهاي هي تسمع تستلم راتبها واني انطيها مصرف من راتبي حتى لا تحس اني عينتها حتى اخلص من مصرفها وما طلبت واتمنت شي بخاطرها لا صلبت روحي خاطر اصيرلها مصباح علاء الدين واحققلها التريده بس مال توصل تحط راسها براسي وتطلع من بيتي غصبا عني وتجي وتحطكم كبالي وتملي شروطها عليه لا وحق هو العباس ابو فاضل لا الها ولا اهلها .. طلاك ما اطلك وغصبا ما عليها وعلى … لا تخليني اكمل واخربها عمي ترجع وياي وراسها فوك رجليها وكل شرط منها مرفوض .

حجت امي : شني خالة من دللتها اشتريتها ؟ عمي بطلها وسيارتها اخذها واقصاد جامعتها اني ادفعه .. ورجعلي بتي متزوج عليها ورايد ترجعها بذلة لا والله ما ارجعها

حجه : عمي اني ما اطلك وهم معاندين والحل بعد يمك .. اني هذا العدي .

ضل يباوع ابو نور علينا .. وحجه : والله بلوة بالعباس بلوة

اللهم صل على محمد وال محمد .. زين

ايوب تطلك لا ما اطلك

ام علي ترجعين لايوب لا ما ارجع

بهالحالة ترضون بحلي واذا حجيتو بعد هالحل والعباس لا ازعل منكم اثنيكم وانعل خيركم .. لإن حيرتوني ..

ايوب يريدها ترجع وابنه عدها ومن حقه ابنه يريد ابنه يعيش عنده وما يريد يطلك .. وام علي ما تريده و ما ترضى ترجع ويا اهله وتخدمه وتخدمهم .. ترجعين عمي بس بشروطي اني .. مو تريدين الطلاك احسبي روحج امطلكه ابيته واني اكفل ايوب ما يدخل بيج لا بطلعة ولا بطبة ولا جامعة ولا شغل ولا تخدمين اهله ولا تخدمينه .. ما طول اليجمعكم ابنكم تعيشون ابيت واحد لخاطر ابنكم بس لا هو اله علاقة بيج ولا انت الج علاقة بيج لا تحاسبينه على مرته ولا يحسبج وين رحتي ووين اجيتي .. هذا حلي ترضون ترضون ما ترضون بعد تضل المشاكل وبكيفكم .

باوع لايوب ساكت

باوعلي .. كتله : عمو اني من يوم اللي شفته داخل وزوجك ثانية بيده مو بيدي اني كشت روحي منه مدا اتحمل ابقى وياه بس الحاب ني ابني ومريض ما اكدر اجازف بيه وادخل بمشاكل تأذي .. اني موافقة بكلامك اذا تضمنلي ما يتقرب لغرفتي ويتنازل عن حقوقه الشرعية عليه امام الله .. ونبقى عايشين متحملين بعضنا لخاطر ابنا .

حجه : اني اضمنه الج بس رجعي .. موافق ابو عرب ؟

– هاهية عمي التشوفه

– الله يكتب اللي بيه الخير

ضل يحجي ويا امي واخوتي اخر شي كال : هاي بعد انت روح ابو عرب اني اوصلها الك للبيت

كاله : لا عمي ترجع وياي .

– دروح هسه المرة تعبانة منك اني اوصلها

– لا .. اني اخذها راح انتظرها برا اودعناكم

كام من مكانه و عمي كام يوصي بيه ويحجي واتحملي عمي ومن هالحجي .. خليت عباتي وانطوني ابني واخذت غراضي ..

وردت اروح لسيارتي صاح : هناااااااا

حجه عمي : سيارتج احنا نوصلها للبيت عمي اتوكلي وروحي ويا رجلج وما وصيج بالهداوة وشتحتاجين اني خادم بحسبة ابوج .

انطيته البصمة لعمي ومشيت لسيارة ايوب صعدت وياه داس بيها وساق للبيت بدون ولا ننطق ولا حرف بس اتجرعت كل معاني الذلة واني راجعة بالطريق .. استنكف يعزلني وغصبا ما عليه ارجع حتى لو متزوج عليه وهايني وذالني ! اشتدت بكلبي حيل وصعبت عليه نفسي ..

دخلت البيت صعدت لغرفتي گبل

اول ما دخلت اختنكت حيل يعني رجعت بدون حل ! وغصبا ما عليه وبذلة

رجعت لهالسجن !؟ العبرة ابلعومي كامت تفور احس بروحي اريد اطك .. صابتني خيبة امل جنت متأملة دعواتي راح تستحاب وراح اطلك من ايوب بس ما اعرف شنو الحكمة اللي ربي يداور بيه ويرجعني لطريقه شنا ردت اخلص .. ما يعجز ربي يخلصني بس ليش دعيته وما استجابلي ؟ شيريد مني اعرف ربي احكم مني بأموري وادري يحس بكل شعور جاي احسه وادري موكلته روحي وامري بيده بس اختنكت مدا اكدر اتحمل اختباره حيل صعب كاعد اجرع السم بهالذلة هاي ارجع واتحمل اشوفه كدامي ويا ضرة وغصبا ما عليه لا ازعل ولا اروح لاهل ولا يحقلي ازعل ولا يحقلي كلشي !!! وين نهايتي !؟ ووين ديريد بيه ربي !؟

ربي مو اعتراض على امرك انت وكيلي ونعم الوكيل بس ارحم ضعيفي وقلة حيلتي ربي ارحمني اني والله تعبت .

انفتح الباب دخل ايوب .. فركت وجهي وانداريت سويت نفسي واكفة اعدل ابطانية ابني .. تقرب من عندي وحجه : ولج انت الما تريديني .. انت تحطين راسج براسي وتكليلي اني بت ابوي وطلعت .. غفران وياي تتعاندين

– اي ما اريدك من تشكيني لضرتي وتطلعني كدامها اني مقصرة بحقك وراحتك يمه ليش اريدك مو اني مو زينة مو اني المقصرة مو اني اشكي ظهري وراسي وابني واتمنع وبس هي الزينة ليش اريدك وانت تنكر تعبي وياك وتذمني كدام ضرتي ؟ ما اريدك بس هاهية انت ربحت عاشت ايدك هسه اني تحت ايدك وتكدر على راحتك تهين وتغلط وتذلني بكيفك صدكني كل الحجو بالكعدة محد راح يلومك لإن رجال .. واني مرة .

لزمني من وجهي وحجه : ما تريديني ؟

مستعدة اهملج واتجاهلج ؟ مستعدة صدك اصير مثل ما تردين وما اريدج ؟

وخرت ايده : سوي كلشي تريده بس ابتعد مني ولتتقربلي .

– بعيني .

تركني ومشى بدل ولبس ملابس خفيفة وراح حط عطر ورتب نفسه وطلع وترك الباب مفتوح وهو ع الدرج بنزل صاح : ناديييية

حجت : ها حياتي

-سويلي عشا حبيبي وجيبي للغرفة تعبان حيل اريدج يمي

حجت : سودة عليه بعيني هسه اسويلك احلى عشا واجيك.

مشيت سديت الباب وراه

احس دمي فار .. اريد الهوى يفوت لريتي اختنك ..

شعليه بيه يطبه طوب ما اهتم ليش اختنك وليش دمي يفور ..

ما اهتم ما بحاجته ولا بحاجة يهتم بيه ويحبني ما اريده .. اني روحي احب روحي ما اريد احد .. ما ادري ليش دموعي كاعد تلتم .. وكلبي كاعد ينعصر .. وادية كاعد ترجف .. اني ما اهتم

اي ما اهتم

ما اريده خلي يولي

وشنو يحني اذا نامت بحضنه

وشنو يعني اذا دللها وغازلها وضحك وياها واني لوحدي فوك مذلولة

عادي ما اهتم اني ما اهتم

بس هي عيوني ما ادري شبيها وكلبي لوحده يعصر روحه يطبه مرض ما اهتم .. اني ما اهتم

انزويت يم كاروك ابني وكعدت

ودنكت راسي بين رجلية ولميت روحي ابجي من كل گلبي

اخ يا ضعفي وقلة حيلتي .. ومذلتي .. مو بيت سجن ومو باب غرفة قضبان ومو زوجي .. سجان ..

لا حول ولا قوة الا بالله العلي العظيم

ربي ديشوفني .. وديسمعني ومراح تهون عليه دموعي اني ادري

مراح يترك بنية يتيمة وكلت امرها بين اديه مراح يعوفني وراح ينتهي هالليل وراح يطلع صبح بس باليوم اللي هو يحكم بيه مو اني .. ربي راح يدبر امري ادري وراح يخليني فوكهم كلهم

تمددت وحطي راسي ع الكاع واني لامة روحي ومنهارة

واردد حسبي الله ونعم الوكيل حسبي الله ونعم الوكيل

ربي ميعوفيني مراح يتركني ديباوعلي

اهذي ابجي احجي ادعي واني اتمرجح بين كل ذول ربي حاوطني بنعمة النوم ونزل النعاس لعيوني ونومني .

فزيت وجه الصبح على بجي علوش

شلت جسمي من الكاع عظامي مكسرة تكسر

كمت اخذت ابني وحطيته على جربايتي ورجعته لنومته .

باوعت لغرفتي ..

شيفيد ضعفي ؟ وشيفيد اذا بجيت واتكسرت وانكسرت ! مراح ازيد بوضعي شي .. الدنيا تريدلها حيل اليضعف وياخذه البجي ما يخسر غير صحته .

اتوكلت على ربي وكمت دخلت للحمام غسلت

وذكرت الله وصليت ورجعت طلعت كتبي وكعدت اقرأ بلا واهس

اجبر روحي ع القراية حتى التهي عن قهره بشي ينفعني .

لحد ما صارت بـ ب٧ كمت دا ابدل .. دخل للغرفة هو

ما كأني شفته ولا هو كأنو شافني اخذت ملابسي وانداريت ليغاد بدلت ولبست ملابسي وطلعت الشيالة مال ابني .. حطيته بيها وهو نايم .. ونزلت سرى واكفة تريد تطلع كتلها : بس اصعد كليله ع السويج

– بعدكم متحجون

– لا اصعدي

صعدت انطاها كتلها : اوصلج بطريقي

كالت : اذا تكدرين لمكان قريب ياريت

انطيتها علوش شالته وصعدنا وصلتها لمكان قريب تصعد منا ولفيت واخذت ابني على بيت اهلي .. انطيت ابني لأمي كالت : كون ضربج لو اذاج ؟

– ضربني لا .. اذاني .. ما قصر ادعيلي ربي يقويني ويصبرني لإن اذا بقيت بهالحال اكثر يمكن اتخبل

– داعيتلج بليا ما تكولين اصبري يمه وداعتج ربج ما ينساج .

تركتها ومشيت

رغم ما حيل مؤمنة بربي ما يعوفني بس كمت اكره كلمات المواسات

اكره اليكلي صبري واتحملي واسكتي .. محد ديحس هذا الصبر والسكوت شكد كاعد ياخذ من حيلي وصحتي .. ميعرفون شكد جسمي بايد وحيلي مهدود ادري ما بيدها شي وسوت كل اللي تكدر عليه بس جزعت المواسات وكلمة اتحملي .

مشيت للجامعة .. دخلت امتحاني .. جاوبت الاكدر عليه ..

وطلعت كعدت بالنادي اخذت كوب گهوة وبقيت اراجع محاضراتي

واني كاعدة جنطتي رياضية صفح لونها زيتوني وبيها لوكو الحشد ومعلكتها ع الكرسي وكاعد دا شارب بكهوتي شوية شوية فاصلة عن المحيط .. ما احس الا احد دنك ومال راسة كبالي : حشدية ؟؟؟

فزيت فزة الكوب طفر من ايدي وكع : سلاما قولا من رب رحيم

ضل يضحك : اسف اسف اعتذر والله مجان قصدي اكمزج بس جذبني لوكو الحشد على جنطتج

– يمعود صدك جذب شبيك والله كلبي راح

اخذت كلينكس وكمت امسح الكهوة من عباتي ..

وهو وكف مبتسم منحرج ويكلب بشعره ويكول : اسف والله كلش اعتذر منج اختي اني اتعديت على خصوصيتج حيل اعتذر

– لا عادي

– بس سؤال ؟

يحجي ويميل براسه هيج

باوعتله الشاب شكله جامعي مرتب وشعره نوعا ما طويل ويكلبه وابيضاني ولحيته خفيفه وحاط الكاميرا على جتفه ووجهه بيها قبول لطيف .. كتله : تفضل اخوية

– هاي الجنطة اكدر اشتريها منج

– ليش ؟

سوا حركات بوجهه بينن غمازاته من لحيته وكال : اني حشدي وجذبتني الجنطة واريدها

ضحكت من منظره وحركاته

كتله : حيا الله الحشد واهله ترخصلك اخوية اذا تحب دبرلي علاكة واخذها

– لا لا لا .. اني اشتريها

– بس اني هدولياها ما مشتريتها حتى ابيعها

– ميخالف بيعيها

– تريد ادبرلك وحدة جديدة مثلها

– تكدرين

– اي عادي يوفروها عدنا

كام يباوع منا ومنا وهمس : تشتغلين بالحشد ؟

– اي موظفة

– يا حيا الله اني هم موظف بس طالب اعلام انت وين

– اني هندسة نفط

– لا قصدي بالحشد

-اعتذر ما اكدر انطي مكاني تعرف الوضع

-صح صح اني اسف فرصة جدا سعيدة بالتعرف على حضرتج وانتظر الجنطة منج

-شكرا الك اخي على راسي وان شاءالله بس احصلها راح اكولك

– وين تكوليلي ؟

صفنت : ها والله ما ادري

– زين عادي انطيج اليوزر مالتي مال الانستا اذا ما بيها اي تكلف اذا بيها حرج اعتذر عن الكلام

– لا عادي اكتبلي اليوزر واني اذا لكيت الجنطة راح اراسلك وابلغك

– اشكرج واسف اسف جدا ع الكهوة الللي اچبت وع الهوسة اللي سببتها بس عجبتني الجنطة

ابتسمت : لا عادي اخوية مصار شي

كتبلي اليوزر وانطانياه ومشى

مبين هيته وستايله وشعره مال مصور اعلامي من الكاميرا اللي شايلها وياه … بس حتى معرفت هو شسمه ؟

– يلا عود اذا حصلت جنطة من هاي راح ابلغه

رحت للمحاضرة كملتها وطلعت بوجهي للمقر اخذت الاوراق اللي احتاجها ونقلت على التلي مالتي فاتحته بالحاسبة اللي بالبيت ملفات .. وطلعت لاهلي جبت ابني وامي حطتلي غداي ورجعت تقريبا الساعة ب٣ ونص الظهر .

دخلت للهول ايوب كاعد ونادية منتجية عليه ودا تباوع ع التلفزيون

تعديتهم وصعدت حطيت ابني بالكاع يزحف ويلعب واني بدلت بس ممرتاحة وكاشة روحي وما ادري شسوي لروحي وترضى تعبت ويا روحي حيل لا رايدته ولا عايفته بلوة بلوة روحي الما تقنع .

مشتهيت الاكل ولا حطيت شي بحلكي

كعدت اقرا … انتبهت اللابتوب مالتي ماكو .. تركته وبقيت اقرا بالملازم

اندكت الباب وفتحتها نبأ : خالو يريد علوش

-اخذي بس ديري بالج عليه ليوكع

-تمام

اخذته ونزلت واني بقيت بين التليفون والاوراق اقرا ..

فتحت جنطتي دا اطلع من عدها اقلام الظل .. طلعت ورقة اليوزر كدامي .. جريت تليفوني وحطيت اليوزر طلعتلي صوره .. اسمه باقر ومصور اعلامي بالاعلام الحربي .. نزلت بصفحته صوره كلها مرتبة والتصوير بيرفكت دقة واضاءة وزوم .. تفاصيل الصور مبهرة .. متابعيه يطلعون ١٢ الف .. دست متابعة لحسابه .

سمعت صوت علوش صرخ

كمت من مكاني ونزلت بسرعة شايلته سرى وتهز بيه : شبيك

– وكع خطية

اخذتها من ايده

لاحظت ايوب شال ايده وحطها على جتف نادية وحجه بأذنها ..

كمت اسكت بيه وصعدت كام يبجي يريد ينزل .. اخذت غراضي ونزلت حطيته بالهول ومشيت للمطبخ حطيت غراضي وكعدت اقرا .. اريد اركز ما ادري احس حرارة تطلع من اذني ومدري شنو بالراس من نار تفور بيه .. كطع عليه اللحظة رحمن وهو يتصل جاوبته وفتحت سبيكر حجه : ها يابه شلونهم

– هلا رحمن شلونك

– نسأل عنج مختفية شنو

– موجودة اجيت للمقر اخذت الملفات بس بعدني ما مشتغلتهم الحاسبة مدا الكاها

-سهلة ان شاءالله بس باجر ترا ضروري تجين نكمل كل الامور لإن عكب باچر المهرجان واكو شخصيات كبار راح تحضر

– تمام بحيل الله امتحن واتوجه ع المقر

-على راحتج .. انت شلونج زينة خابرتج الخميس والجمعة ماكو جهازج مغلق سألت ماكو خبر عنج

دخل ايوب للمطبخ حجيت : لا طلعت اخذتلي عزلة عن العالم بجوار امامنا الحسين

– عشتي والله نحتاج هيج عزلة الواحد يحس روحه صار الة من الشغل هلكثر ما نركض ونتعب وما ملحكين

– شنسوي

– يلا هاهية الحمدلله على كل حال اخذي راحتج يابه واسف اذا اتصلت بوقت مو مناسب

– يمعود .. يلا مع السلامة

لميت غراضي واخذت ابني وصعدت فوك … طشرتله الالعاب وكعدت

ثاني يوم من الكلية للمقر لاهلي على ما رجعت الساعة ب٥ وشوية ايوب بسيارته كاعد ومبدل كأنه يريد يطلع من شافني اجيت توجه وطلع.

لل٩ بالليل نزلت حتى افور المميات مال علوش

لان من يروح يم ماما تنطي ممه .. نزلت ع الدرج لكيت نادية لابسة ستريج اسود لحد ركبها .. وسترابلس دلع وكاعد تمسح الستريج مبين تفاصيل جسمها وحتى لون ملابسها الجوا مبين ومدنكة تمسح وايوب كاعد ع القنفة ..

اتعديتهم بس القهرة تاكل بالروح

شوكت اتأقلم شوكت ابدي ما اهتم شوكت تطيب روحي منه صدگ ؟

فورتهم وثردت حليب وصمون وصعدت لعلوش كعدت اوكله وتليفوني بيدي .. تقريبا ب١٠ ونص .. طب ايوب للغرفة وكالي : منو باقر غفران

شلت راسي عقدت حاجبي : يا باقر

– لا تغشمين روحج باقر منو بنفس جامعتج وحشدي منو

– ها هذا الولد .. ما اعرفه

– شنو هذا الولد شنو ما اعرفه !؟ كاعد تلعبين عليه انت منطيته متابعة على حسابج

– وشبيها اذا تابعته ؟

– انطيني تليفونج بسرعة

– ليش

سحبه من ايدي بسرعة حجه : افتحي الرمز

فتحتله الرمز دور بالمحادثات الولد ما عندي وياه محادثة بس منطيته متابعة دور اسمه ودخل ع الحساب وع المحادثة لكاها فارغة .. حجه : منين عرفتي ؟

– بالجامعة

-واني دازج اتدرسين لو تتعرفين واتخمين ؟

– انت مو اتفقت ويا عمو ما تدخل بيا ونحسب احنا مطلكين ابيت واحد

دنك وجر قميصي : اسمعي لج لا تجاوبين سؤالي بسؤال وجاوبي لا والزهراء اندمج

– ايوب والله ما اعرفه بس التقينا وراد مثل جنطتي وكتله ادبرلك وانطاني اليوزر مالته كال من تلكين راسليني علمود اخذها منج

-يا حنطة

-مالتي هاي

-وهو ياهو ماته بجنطتج

– بعد عجبته بيها لوكو الحشد

نتر قميصي من ايده – مرة ثانية من اسمعج حاجية ويا ولد الا اطيح حظج

– ايوب ترا قسمي نصه ولد و دوامي كله شغلي ويا ولد يعني اذا كل ولد احجي وياه عندي شي وتشك هاي مو عيشة اذا متتحملني المن بقيني

– عيديها صيحي طلكني .. اتوبين والله ما اتوبين

– لا ما اتوب اذا ناري تحاسبني بالصغيرة والجبيرة وانت تتعمد تتصرف كدامي وتحرك كلبي واتجاهلك ما اتوب والواحد اله حد بالصبر لا تختبر صبري اذا مرايد الشماكل بيناتنا ترجع .

عافني ومشى ..

طفيت ونومت ابني بس من وين يجي النوم لعيوني واني بنص هالضيم

احس بروحي شمعة ودا تذبل يوم يوم بهالبيت وما ادري الله يمتى كاتبلي الفرج.

ثاني يوم كملت امتحاني ودزيت رسالة لأيوب كتبتله : عندي مهرجان بالجادرية راح يتأخر لحد ما اكمل .. ابني يم ماما اكمل مهرجان واطلع لاهلي ابات

كتبلي : ممنوع

صفنت شنو الممنوع احنا مو اتفقنا ما يدخل بيه اروح اجي يتنازل عن حقوقه مثل ما اني متنازله وهو وافق !؟ زايد مني دا انطي علم حتى لتصير مشكلة .. دزيتله علامة استفهام

كتب : اني امر اجيب علاوي وانت كملي المهرجان وارجعي للبيت من وكت.

ما جاوبته مشيت حضرت المهرجان وكملنا

ووصيت رحمن على جنطة مثل جنطتي كال : باجر يمج تدللين

كملنا المهرجان الساعة ٧ تقريبا ديريد يأذن

لحد ما وصلت الأذان مأذن والساعة ٨ الا ربع ايوب عاقد حاجبه ونادية ماكو وكفلي : انت حاسبة البيت فندق

– ليش ؟

– اني اجيب ابنج ب٢ الظهر نبتلي بيه حتى حضرتج تجين بنصاااااص الليالي

– بس اني انطيتك علم وكتلي كملي ورجعي

– وين اكو مهرجان بهالووووووكت

-اني جذابة دك على عمك واسأله جان حاضر !

خزرني : اخذي ابنج واصعدي بسرعة

اخذت الطفل وصعدت ..

غمزتلي سرى عود لتهتمين اشرتلها : شكو

صعدت لحكتني

كالت : اتطابخوا هو وياها وكتلها كتلة دفرات والله كوة خلصتها امي من ايده

– ايوب هم يعرف يدفر ! شعجب شسوت

– هو مو جاب علوش الظهر علوش متنحس ميرضى ينام سوتله ممة ميقبل بيها جان تصرخ بالطفل امك اديح واحنا نبتلي بييييك علوش كام يبجي لو ايوب تخبل عليها خبال جابلياه اسكته ورجع عليها سكطها يكللها ابتي مريض تفززينه وهي تكله امه مسوية البيت فندق واني كله عليه انوب اتحمل ابنها اتطابخوا صاروا دماية ورجع اخذ علوش وكابله لحد ما رجعتي .

– حيلهم بينهم .. المهم حبيبي اتونس لو لا

– يا ما تونس غير ايوب راحن اركبه حاطة على ظهره ويمشي بيه حتى يسكت

– من ايده كتله ابقي يم امي وابات دك الا ارجع وراح جاب علوش قبلي علمود يجبرني ارجع وما اروح لاهلي مدري شمستفاد بيه هنا لا مكابلني لا كاعدة يمه شفرقه اروح لو ابقى !؟

– ميقبل بعد

عافتني ومشت .. بدلت لعلوش وبقيت وياه لحد ما نام ..

نزلت جوا ايوب بالأستقبال دخلت كاعد هو وخالتي حجيت : ايوب

صاح : خييييير

– شبيك ليش تصيح بوجهي ؟

– شراييييييده

– لا ترا اذا تبقى تتعامل بهالأسلوب خو مو حالة اني هم دا اعاندك ؟ هم دا اتجاهلك ؟ هم مقللة احترام ؟ ليش دا تصيح

– شتريدين فضيني

– اللابتوب مالتي وينه عندي ملفات مهمات دا اريد اشتغل عليها

– ومن شوكت صار مالتج بلا زحمة ؟ انت ماخذتني فلاحة ملاچة وابالج كلشي املكه الج

– تمام شكرا

عفته ومشيت ..

صعدت لغرفتي …

اصلا صوجي نزلت نفسه اله وحجيت انسان اسلوب سز حاسب كل البشر يشتغلون عنده .. عاب شكله وووجه طلعت روحي منه ومن تصرفاته واسلوبه وبيته وكلشي منه ..

كاعد احجي ويا روحي .. فات للغرفة سويت روحي ما اهتميتله

مد ايده فوك الكنتور وسحبه وحطه كبالي كالي : فرغي كلشي الج واسحبي ملفاتج لان اريده وياي بالدوام احتاجه .

– وين اسحبهم !؟

– ما اعرف غير تريدين حسابج

– وعندي لابتوب حتى انقل .. مو مهم اخذه اني ادبر نفسي

ما كال لا رجعه فوك الكنتور .

لثاني يوم كاعد دا انزل الصبح اريد اروح للشغل ما عندي امتحان

واني ع الدرج سمعت نادية تضحك وتكوله : عليك الله مدام اليوم ما عندك دوام خلي نطلع اني وياك نتونس

حجيت ويا روحي : هاي شبسرعة نست دفرات البارحة والطبخة الانطبخوا بيها !؟

كاللها : وين تريدين تروحين

– لاي مكان يعجبك المهم نطلع نتونس اني وياك نغير جو

فتت عليهم كتله : ايوب عندك شي ؟

– شكو شتريدين ؟

حجت هي بداله : اي عنده ليش

جاوبت : خلي علوش يمك اني لازم اروح للدوام بسرعة عندي شغل مهم

– تعاي اني شمعرفني بيه وين اكدرله

– اذا متتحمله ذبه على امي وودي الها هي تتحمله واخذ راحتك اذا يزعجك اني مستعجلة باي

عفت علوش ع الطاولة وهم اثنينهم كاموا يصيحون وراي ركبتي سيارتي والله .. للدوام دخلت من وكت .. الساعة ٨ وثلث دخلت القسم بس موظفات اثنين موجودات .. طلعت الغلاية وكتلهم : وين الجاي

دلوني ع الديلاب البيه احتياجات القسم

خابرني ايوب مجاوبت عليه سويت جاي دخل رحمان جايب ريوك كال : هالله هالله اليوم صباحي

ضحكت : اي شفت ربك جبت ريوك حيل جوعان ومسوية جاي

-ديلا صفوا الميوزه خلي نتريك

سحبنا الكراسي وكعدنا ٣ موظفات و٤ موظفين نتريك ونسولف على امور الشغل .. وجبناها على القطع الاراضي والمنح وهالامور .. كتله : احنا شوكت يوصلنا السرا وتلوحنا قطعة ارض صخام عزا

حجه رحمن : شتصخمين بقطعة الارض ما تشترين

– اي على اساس فلوسي متلتله واشتريلي قطعة

– والله عمي اكبر فايخة بالحشد انت والله سيارة وعندج ورجال خير من الله يزق فلوس متكليلي رواتبج وين دا توديها

– ضحكت : حاط عينك عليه

– لا صدك والله خو استغلي فلوسج واشتريلج شقة وادفعي اقساط شو راتبج موجود مو احسن ما يضيعن منا ومنا اقلها تضمنيلج بيت بأسمج

– وشكد يحتاج حتى اشتري شقة

– هسه عندج اخوي عارض شقته بيسمايا للبيع رايدها ب٢٥ مليون الياخذها يكمل اقساطها

– ليش ديريد يبيعها

– طلك هو ومرته ويريد يشتريله سيارة شيسوي بالشقة معلك يدفعلها

– شكد اقساطها

– ٥٠٠ وكسور بالشهر

– وين عندي ٢٥ مليون

– دكومي غير سيارتج اغلى منها

– رحمن سيارتي مو مالتي مال زوجي اروح ابيعها اشتريلي شقة غير يركص چوبي هسه يكلي اشتريتلجياه تسوفين بيها لو تبيعها وتخلصيها تكاسي وتشترين شقة براسي

– شكد عندج ؟

ضحكت وحجيت بصوت ناصي : والله اللي عندي اقل ال١٢ مليون تجيبلي كاشيتين بمنطقتنا

ضحك : متكدرين تديديهن ذهب منا منا واشتريلج شقة ودفعي اقساطها

صفنت بوجه : والله ما ادري عندي ذهب بس ابيع ذهبي يعني

-هسه منو الاحسن ذهب لو شقة تمليك سند الج باجر عكبة تريدين تبيعيها فلوسها ورواتبج ما ضايعة بيها اطكيلج بيت صغير افضل ما باقية هيج وتضيعين فلوسج طلعات وونسات

– اني اقل واحد بهالكوكب يطلع اصلا والله ما اصرف لان لا اني اشتري مكياج لا ملابس لا عندي صرفيات وايوب ينطيني مصرفي ومصرف ابني كل شهر ٢٥٠ يكفني اني وياه عن الحذب بس فلوس البنازين مال سيارتي عليه .. الا حتى غسل تشحيم تصيلح دهن وهالسوالف كلها ايوب متكفلها اني ما ادري عنها .

– اي لعد داستغلي للحجي وطكيلج شقة

– تدري رحمن خليتها براسي

– دفكري بيها اذا دبرتي حتى احجيلج ويا اخوي ولتخافين بضمانتي

– الله كريم

صفنت .. اني وين جانت عن بالي سالفة اشتري شقة !؟

خو بدال ما رواتبي اجيب واجمع بيهم اشتريلي شقة بيسمايا بأسمي وهم قريبة من اخواني ..

رجعت ظهري للكرسي اذا اشتريت شقة صدك ويصيرلي بيت

راح اكعد بيه .. بس منو يقبل !؟

واني انتظر من منو يقبل ؟

اذا اشتريتلي بيت اطلع من بيت ايوب وغصبا ما عليه يريد يجيني ميريد الف سلامة مو استحسف بيه بيت وراد يذلني حتى ميعزلني لا والله اني احط لروحي بيت وبأسمي

بس اذا عرف اني اريد اشتري راح يخربها

شلون !؟ اكدر اشتري واتفق وامشي وحدي اخاف

لا اخلي ماما ويايا .. لازم اشوف ذهبي شكد يجيب اني بس تخم عرسي ب١٥ مليون من غير الملاوي والمحابس والعقد الجابته ماما هدية عرسي وليرات الذهب الوصلتني بعلوش ما ادري شهالفكرة الدخلت براسي ؟

احسها خطوة جبيرة عليه

بس اكدرلها .. بس يحتاجلها جرأة

ما ادري ايوب اذا حس اني دا اريد اشتري شقة يخربها عليه اكيد

بقيت افكر بالسالفة لنهاية الدوام رحت لاهلي كتلها : لعد علوش وين شو ماله صوت ؟

-ما جبتي اليوم

-ما جابلجياه ايوب ؟

– لا ما جابه ليش وين عايفته

– يم ايوب .. عوفيني من هالسالفة اكلج اريد احجيلج بشغلة

– شنو

سولفتلها كالت امشي بكل خطوة اني وياج واذا شي يصعب علينا نخلي خالج يساعدنا ولا تبيعين ذهبج اني عندي عشرة ضامتهن حجة وعمرة اليه بس يدبرن ما يعزن عليج وادبرلج ٥ منا ومنا واشتري

– صدگ تحجين ؟

-والله يييمه يمك ربج حطلج هالرحمن رزقة بطريقج احجي وياه وكليله اني اجملج فوك فلوسج واشتري واخلصي من ضيمج يمه

-تتوقعين ايوب يقبل

-لا تورجي واني وكليني امشيلج بكلشي

-والله دخلت مزاجي يوم

-لا هو هذا الصح احسن ما رواتبج يمه تروح منا ومنا اشتريلج شقة حالج حال اخوتج وكليله يعجبك تجي هلا بيك ما يعجبك بكيفك

– بس اخاف من ايوب ذيب مينكدر هذا

– دشوفي رحمن بالاول ودانشي الوضع ومعليج دامني بريتي الهوى ييمه ما اكسرلج ضلع امشي واني بظهرج

– لعد خل اروح وعود اخابر رحمن واتفق وياه يلا بيباي

– اوكفي احطلج غداج

اخذت مطبگ سمچ تمن احمر وكشمش وكرفس وبطل وفلفل طبخ امي ميتقاوم كتلها : نبع الحنان شلون ويا طبخاتج اني حتى ما ادبرهن واطبخ مثلهن ميصيرن مثلج

باستني وكالت : الف عافية يعزيزتي

سلمت عليها ومشيت دخلت للبيت حطيت الاكل مالتي ع الطاولة ومشيت للهول لكيت ايوب عيونه بگصته

كال : هم اكو مهرجان راجعة ب٤ الا شوية

– لا رحت لاهلي عبالي مودي علوش الهم طلعت ممودي

– لا بله ؟ دخذي ابنج وكومي مني لا ارفسج والعباس كلت اخذ اجازة اليوم ارتاح اشتغلت مربية ارضع مميات

ابتسمت حجه : اتضحكين شعلى گلبج انت بس اني مبتلي

صعدت .. بدلت ونزلت .. لكيت نادية بالمطبخ وهو يسألها : هالأكل منو دازه

حجيت :- ماما حاطتلي غدايه

حجت نادية : وشوكت ان شاءالله تخلص زعلتج وتكومين حالج حالي تساعديني بالبيت ؟

– محتخلص

جريت الكرسي وكعدت دا اريد اكل حسيت ايوب شاتهى الاكل بس طلع .. كمت صبيته ببلم كزاز وحطيت روبة وزلاطة ومشيت للهول .. هو كاعد ع القنفة كتله : متغدي ؟

باوعلي مجاوبتي حجت نادية : لا ينتظر حضرتج لحد متخلصين اشغالج ومهامج حتى ياكل .. غديته عيوني واحسبي احسابج تكومين وياي نغسل المطبخ نطلع غراضه مو باجر عطلة بعد شنو حجتج ؟

مجاوبتها كعدت ابني وكمت اوكله ..

الكاع ما بيه حصير بس نمسح جر المخدة وكابلنا اني وأبني …

سحب الخاشوكة من ايدي .. باوعتله اخذ وحط بحلك علوش .. كمت كال : وين ما مشتهي بس على واهسكم

حجت نادية : انت مو متغدي

– انت شدخل امج واكفتلي رقيب بت القندرة

جبت خاشوكة ورجعت .. كعدت ع القنفة مكابلتنا وتنفخ حجيت : باجر خواتي ملتمين اريد اروح لبيت اهلي

– اهلج دا تشوفيهم اكثر من عدنا ويوم العطلة تخلصيها عدهم ما طلعت !؟

– شيفرق البقيت والرحت بشنو دا تستفاد مني ؟

غير الموضوع بسؤال: دبرتي جنطة للولد اللي وصاج

– لا والله رحمن كالي ادبرلج بس لحد هسه موصلتني .. ذكرتني اكوله يدزلياها باجر توصيل

-عوفي ختولي كوليله ما لكيت

-لا خطية

رفع راسه خزرني : دا تفتهمين شدا احاجيج

-مرايدة افتهم

-انت يعني متعودة الا ارزلج

– ترزلني ليش وبصفتك شنو ابو ابني لو شنو

– غفراااان

– ما الك صفة غير ابو ابني وميحقلك تحاسبني ما دامك معتبرني خدامة لأبنك بهالبيت

– مو هذا قرارج من كلتي كدام الكل ما اريدك مو انت اليبستي رحمج واخذتي ابره منع حمل حتى متحبلين مني مو انت التتشردين مني مو هذا اللي تريدي بعد شنو الرايدته

– ولا تنسى قرارك هم لما ما قبلت تطلكني وتخليني بهالموقف اللي اني كاعدة بيه هسه اخذت ابني وكمت صعدت غسلتله وكعدت بغرفتي

اجا وراي دخل الغرفة سحبني ووكف : تستحين تكولين اشتاقيتلك

– رايح باوهامك زايد كاشة روحي منك ومن كلشي يخصك تثق حتى ابنك مرات اكرهه لإن بيه شبه منك

– كابري دا اشوف كابري وبسيطة اعلمج اوهامي شتسوي

نزل وصاح : ناااادية حضري نفسج باجر نروح اني وياج ليلتين باربيل ونرجع … نتصيف ونتونس

صاحت : صدك عليك الله

– والله

قفلت الباب وراهم اشتاط گلبي احس النار دخنت براسي

كمت اتنفس قوي اريد اتنفس اختنكت من عنده .. شوكت اتعود وضعهم شكوت ما اهتم شوكت يقنع كلبي ما ينقهر ويغار .. احس عاشعور كاعد يكر اضلاعي هلكد ما يضغطني ويطلع روحي

كعدت صافنة بنفسي ابني نايم ..

كلت لا .. عزلتي وكعدتي بغرفتي ضعف اني دا اشرد من منهم حتى ما اشوف .. لهسبب باقية اتمناه اني محتاجة ادوس على كلبي وانزل واباوعهم حتى يحترك حيل لحد ما يورث ويصير رماد وينسى ويبعد ميدك ويخلصني اني محتاجة اواجه مو انهزم .. اذا مكدرت اواجهه راح ابقى ضعيف ومكسورة طول عمري ..

خليت ونزلت جوا .. محد بلهول كعدت ع القنفة اللي يم غرفتهم

البيت هدوء كلش .. كاعدين بالغرفة دا تكوله : ايوب عليك الله شوكت تشتريلي مال نوم يعني حنبقى بغرفة خالتي اريد اخذ راحتي ادللك صوتنا بعيد عن غرفة خواتك وامك هنا احس متقيدين

كاللها : بحيل الله هاليومين اشتري غرفة وانصبها فوك

صحت نبأ بصوت عالي

طلعت نبأ : ها ؟

– عفية شوفيلي علوش دا احسه يبجي

ما ادري ليش هيج سويت بس احس النار تغلي براسي وبكلبي ومتنكة حيل مختنكة .. راحت واجت كالتلي : ماكو

صعدت فتحت الكنتور مال فلوسه : عنده ٣ ملايين وكسور .

كمت افور هم حاطهن بغرفتي وهم راح يشتريلها غرفة وينقلها هنا حتى خاف ممكفيني اشكالهم اشوفها جوا هنوب اصواتهم اسمعها بالليل ويشاركوني حمامي !؟

كمت اروح واجي

فتحت التليفون طلعت كدامي منشور مال كروب مال ايفونات العراق ..

ومحل بالربيعي .. كمت اكلب بالصور .. شفت التابلت اخر اصدار من آبل سعره يطلع مليونين وسبعمية الف .. كمت نسخت الرقم واتصلت ..

رد كتله مرحبا

محتاجة تابلت ابل .. بس يوصلني اليوم اذا ما تكدر على توصيله اليوم راح اتصل بغير شركة لإن كلش محتاجته

كال : العفو ست بس اي تابلت منهم يا اصدار

كتله : عارضه بالقيس اخر صادار سعره مليونين و٧٠٠ الف تقريبا

كال : ثبتي برقم وعنوان

– اذا اثبت شوكت يوصلني ؟

– هسه اطلعه الج اذا رصافة

– اي رصافة سجل يمك

انطيته العنوان ورقم ايوب .. وسديته

ما اعرف شدا اسوي وشدا اتصرف ما ادري احس راسي ملخبط

ماكو ساعة وسمعت ايوب يصيح : هذا منو طالب تابلت ابل بمليونين و٧٠٠

حجت امه : اسم الله يمه ياهو اليطلب هيج

هذا واحد خابرني وكالي طالبين وجاي بالطريق ومنطينه العنوان ورقمييي

نزلت كتله : اي اني طلبته انت مو محتاج اللابتوب احتاج تالبت للسغل والدراسة

صفن بوجهي : ولج بت الاوادم شطالبة انت ؟

– تابلت ابل

– شكد سعره

– ما اعرف شوف شكد

– واني نايم على بنگ الخلفج ادفعلج تابلت بمليونين و٧٠٠ ذني كل العندييي ما تشترين انت

– تمام ثكلت عليك عادي كولها اخذت اللابتوب وهسه دا تصيح عليه لمجرد تابلت لتشتري انطيني رقم ابو التوصيل اغير العنوان لبيت اهلي ماما تشتريلياه

حجيتها واختنكت

اختنكت مو من تابلت ولا فلوس ولا لإن مدفع

بس اختنكت .. وحيل لدرجة الدموع اتجمعت بعيني

كام يصيح : الله ما يخلصني منج وطلباااااتج الما تخلص

-لتمن عليا ما اريده لتستلمه عوفه

حجيته وبجيت .. ومشيت للمطبخ هو صعد جاب فلوس

امه اتخبلت كالتله : وراح تشتريلها ايباد بمليونين و٧٠٠

حجت نادية : ذني مو فلوس غرفتي اذا اشتريته بيمن نشتري

تركهن وطلع استلمه من ابو التوصيل ودخل اني كاعدة بالمطبخ دموعي بعيني مو من تابلت بس مقهورة من الوضع كله ومدا اعرف شدا اسوي وبيش دا احط روحي ومدا افهم نفسي ومن صيح انطاني فرصة اطلع البكلبي وابجي

حطه كبالي وكالي : دا تبجين على ايباد شبيج طفلة بابا انت

-ما اريده

خالتي : عساج لا ردتي يمعزاية بمليوووووونين و٧٠٠ ااااااااالف

حجه : يمه هسه دكافي اشتريته بعد

نادية : فلوس الغرفة هاي مو ؟

– دوخرييي

مشى ومن لا جارة اشتراه

تبعته نادية للهول تصيح : سفرتنا الصارلي ساعة اتحضرلها انلغت وغرفتي الواعدتني بيها راحت ..

كاللها : اصبرلي فترة واني اشتريلج بس لتدوخيني كافي

كامت تصيح : شكاااافي ايوب انت الكافي مزاعلها وصايرلها خادم الها ولابنها .. تنطي فلووووس غرفتي الها

كاللها : غرفتج اللي ابيت امج ننقلها هنا وخلصت فضت

– انقل غرفة قديمة وانت مواعدني وتكسر وعدك وياي حتى تشتريلها لهالساقطة ايبااااد

كاعد تحجي متحس الا راشدي رن البيت

كاللها : منو الساقطة انت كاعد تفشرين على منو على عرضي ولج

دفعته وكالتله : وانت تكتلني علموووودها

جراها من شعرها : تدافعين منو تعاي هناااا

لزمها وتطابخوا بنص الهول وخالتي وكعت بنص تفاككهم

اني فتحت الايباد شغلته جان يكتبلي مرحبا

حطيته على گلبي وطفرت لا انكتل وياها ع العملة الما ادري منين تربعت براسي وطلعت وفلست جيوبه بيهن…..

يتبع…. 

• يتبع الفصل التالي اضغط على (رواية صوت من المجهول) اسم الرواية