رواية صوت من المجهول الفصل الثامن و الثلاثون 38 - بقلم زينب ماجد
طبكت الباب حيل بوجهه وطكيت القفل
كام يدفع بالباب ويصيح : تسدين الباب بوجهي كلببببببه طايحة الحظ
كعدت ورا الباب حطيت اديه وأبچي .. ربي ساعدني دخيلك صبرني والله تعبت منهم شكد ما احاول امشي حياتي وياه واضغط على روحي واكول اصبر واعدي بس مجاي اتعدي مجاي اتقبل الوضع واتعود عليه .. وكل ما جالهم يزيدون .. بداها ويايا حب قديم يريد ينساه انوب بس مراسلة وبعد المراسلة بس زواج وجوا مو كدامي .. هسه ديحطها كدامي يعني يشاركوني مكاني وحمامي واسمعهم واسمع كل وساختهم …
ادري انت ارحم بيه مني بس اعدني اتحمل والله ربي تعبت
بعدت شعري من وجهي وكمت ..
باوعت بالمرايا .. شعري مخربط الهالات السودا بوجهي زايدة وعيوني حمر
كاموا ينزلون ادموعي واني اباوع بمرايتي واشوف وجهي
ثبتت اديه ع الميز تواليت ودنكت ابجي بقوة
شنو تاليتي
شنو نهايتي
بداية عمري وهستوني دخلت العشرين وكل هذا جرى على راسي
شكد يحتاجلي اصبر .. ويمتى تنتهي ؟
مسحت دموعي واني اباوع المرايا ..
لكل بلاء سبب ولكل حزن سبب
اكيد ربي دا يمتحني ويختبر صبري
لا حول ولا قوة الا بالله
اللهي أسألك الصبر
مشيت للكاروك مال ابني .. اباوعه نايم
بقيت اباوع تفاصيله وملامحه .. حطيت ايدي ع الكاروك ونومت راسي على ايدي اباوعله .. لحد ما كعد .. لزم بالكاروك ويريد يكوملي شلته وخرت شعره من وجهه وبسته بكصته .. شميت كصته من كل كلبي وكأني اخذ بقوتي منه وحضنته لكلبي حيل : يبعد روح امك
هو كام يمد ايده بملابسي : ديدي ديدي
-عوف الديدي خل اكوم اوكلك
شلته من كاروكه ونزلت بيه للمطبخ طلعت مركة بالثلاجة بحافظة حميتها وثردتله .. وكعدت ع الكرسي كدام الطاولة وخليته على رجلي واوكل بيه وكف ايوب بصفي وهو يمد ايده لعلوش ينطي چكليته .. لزمها علوش اخذتها منه وشمرتها ع السنك صرخ علوش يريدها حجه : لا تطلعين حركتج بالطفل .. تعال بابا
جريت علوش وكمت حجه : انطيني الطفل مشتاقله
غسلتله ع السنك وعلوش يبجي نط من البجي يريد الجكليته ويوخر مني يذب بروحه على ايوب .. غسلته وانداريت رفعته لحضني دا امشي : انطيني الطفل دشوفي يبجي شبيج
جريته وصعدت فوك قفلت الباب وكعدت اسكته
صعد ورانا دك الباب ما فتحته .. عافه ومشى .. بقيت كاعدة لعلوش ..
طشرتله العابه واني حطيت ملازمي واحاول اقرأ مالي نفس .. كمت لزمت التليفون اكلب بيه .. اخذتني الساعات واني اكلب لحد ما صار الوقت قبل المغرب .. دزولنا بالكروب مال القسم مال المقر ( شباب اصعدوا اتأكدوا من رؤية الهلال اليشوفه يصوره ويدزلنياه )
لبست حجابي واخذت علوش وطلعت .. ايوب بالحمام اتعديته ومشيت للسطح صعد وراي : شعندج هنا انزلي الجيران منا
مكأني سمعت .. بقيت اباوع علوش كام يصيح عليه : ببا
-روح ابوك وگلبه
اجا يمد ايده ما انطيته
حجه : ابقي طنكري دشوف اسلوبج هذا وين راح يوصلج
حجيت ويا علوش وهو يحجي حتى ابيتله ما اريد اسمع صوتك
كتله : شوف ذيج الحمامة الله حلوووة
كام علوش يباوع صعدت سرى : ها الهلال مبين
-لهسه كلشي ماكو
ضلينا نباوع بالسما لحد ما صاحت سرى : هذا
وينه ؟
هذا شوي وين ذاك العمود اصعد بخط مستقيم فوكاه
اريد اباوعه ما اكدر وايوب حاط ايده ويكللها : زرقاء اليمامة يمعودة مينشاف
– ذاك شبيكم خل اطلعلكم التليفون
طلعت التليفون وكامت تزوم .. صدك موجود .. ابتسمت
واخذت التليفون صورته لكيت موظف وياي بالقسم مصور وداز قبلي دزيت
خابرت ماما كتلها : رمضان كريم حبيبتي شفنا الهلال
– اللهم صل على محمد وال محمد رمضان كريم عليج يبنيتي بجاه هذا الشهر وحرمته اليبرد كلبج ويزيل همج بجاه كلمن عنده جاه يم الله
-ادعيلي اتطلق وارجع يمج ونرجع مثل قبل نتسحر ونفطر اني وياج بس هلمرة زايدنا علوش
– ان شاءالله يمه اذا الطلاك خير الج ادعي الله يسهله الج واذا ما بيه خير الج ادعيلج يصبرج ويسعدج ويهدي عليج
صاح ايوب : يلا انزلوا كافي .. ناس جيران ع السطح عيب
نزلت اني وسرى لحكتني .. نزلنا التوجيهات الدينية على قناة كربلاء تصدح بالبيت فتحت الفيسبوك الصفحات عبارة عن مكتب سماحة المرجعية العليا يعلن غدا اول ايام شهر رمضان المبارك .
اخذت كاسة شوربة وصمونة ولبن وتمر ومي بصينية صغيرة
وهم ديصبون بالهول .. صعدت صاح : غفراااان
مجاوبته رجعت لغرفتي وقفلتها .. فطرت ٣ تمرات ولبن وشلت الصينية من ابني وكمت اصلي دك الباب فتحه مقفول دك ما فتحت .. ورجعت فطرت اني وابني وبعدها سويت اعمال اول ليلة من رمضان .. لحد ما صارت ب١١.. طلعت غسلتله ورجعت قفلت غرفتنا وطفيت كلشي وكعدت انوم بأبني .. لازم اخلص نفسي من هالوضع بعد مستحيل ابقى ..
خلي بيته اله وخلي يعز عليه بيت الله لا يعوزني
باجر ارجع احجي ويا رحمن بموضوع الشقة الاخوه عارضها للبيع
ماما كالت تساعدني .. وحتى لو ما ساعدتني .. ابيع ذهبي واشتري
وقتها غصبا ما عليه اعيش بيها والا اطلك من عنده مستحيل ابقى وياه .
ثاني يوم داومت بشغلي ..
دخلت الكل دايخ وصايم وتعبان ومنعس ومحد شابع نوم كاعدين من السحور نومهم مخربط .. دخل رحمن .. كال : رمضان كريم
باوع كوة يردون عليه حجه : همتكم شباب نريد نشاط الوضع يبقى هيج حتى لو صوم لازم نشتغل
كتله / كول شنو تريد
كال : اول عائلة لازم نتواصل وياهم عائلة السهيد حمزة وهاي قائمة العوائل نحتاج تنسيق لوجستي سيارات نحتاج تنسيق اعلامي نحتاج تنسيق مع المالية لصرف مكافئات لعوائل الشهداء ونحتاج تنسيق اداري غفران مهمتج وجهيهم حسب كل فرد واختصاصه وانت عليج التواصل مع العائلة للحضور بعد الفطور
– يعني نروح بعد الفطور
– اي عوائل شهدائنا كرماء اذا دخلنالهم راح نخليهم بحرج يلزمونا ع الفطور فبعد الفطور لكل عائلة تحلاية ومكافئة صغير ونشوف طلباتهم
مشاكلهم احتياجاتهم
-زين ليش مو الصبح ما اعرف اذا وضعنا يسمح النا نطلع بالليل ؟
– لا ست صباح رمضان منو يكعد الناس تكعد للصبح واحنا نروح الصبح زحمة بعد الفطور برنامج رمضاني
– كم عائلة بالأسبوع
– ٣ عوائل
حطيت قوائم عوائل الشهداء وبقيت اباوع بيهم ورحمن جر كرسية وكعد ع الحاسبه جريت الورقة باوعتله : رحمن صدك شخبار الشقة اخوك بعده ديريد يبيعها
-اي والله عارضها لهسه
– ب٢٥ مليون مو
– اي ويسدد اقساطها
– والله رحمن رايدتها
– ست تفوتج والله نظيفة وجديدة وحتى اثاثها جديد اذا يعجبج اشتريها مؤثثة احسن اثاث جابه بس طلك مرته وعاف الشقة يريد يشتري سيارة
– احجيلي وياه كوله اريدها
– غير بالاول تجين انت والحجي تشوفيها تقتنعون بيها حتى هو يتفق وياكم بعد
– نجي اني وماما نشوفها اليوم موجود
– ليش انت وماما ؟ غير رجال يتفق رياه هذا بيع وشرا مو لعب
– اي ماما تتفق وياه
– ليش والحجي ابو عرب اكو مشكلة
– لا بس مبدئيا اخلي ماما تتفق وبعدين هو يتفق
اندار باوعلي : يعني متردي يعرف بالبداية لو شنو ؟
– لا مو ماما تريد تشاركني بيها واذا عرف راح اشارك ماما ما يقبل ادخل هيج شراكات
– ها ما ادري بعد خل اشوف اخوي اذا صدك يريد يبيعها اذا بياع خو ما يلكى احسن من مرت الحجي يبيعلها
ابتسمت .. بس صفنت بيه !
بالأول يرغبني واخوي ناوي على بيعتها
من عرف اني اريد اشتريها وايوب ما يوكف بالبيعة غير حجيه
وديكلي ما يلكى احسن من مرت الحجي .. يعني ديبينلي لو الحجي موجود لو ماكو بيعه .
طلعت روحي من جسمي احس النار شبت براسي ..
ميبيع معناها الا ايوب يعرف وايوب اذا عرف من دبش يخليني اشتري راح يحطلي بيها الف عرقلة ويمنعني من الطلعة اذا درى كاعد اشتريلي بيت من وراه
كملت شغلي .. وطلعت من المقر رجعت لأمي سولفتلها
كالت : هذا الواقع ييمه ليش مستغربة مجتمعنا ما يرحم المرة وما يتعامل وياها لا ما رجال فوك راسها الوحدها ييمه تنذل وتشبع ضيم من هالمجتمع الطايح حظه من يشوفون مرة وحدها لو يشتهونها ويريدون منها مقابل حتى يخلصولها شغل لو يخافون منها يكلك هاي تجيبلي مشاكل طلعت شاردة من ابوها واخوها اروح ابتلي .. شعبالج يمه ؟
لو مو راتب لو تحطيلج سبع قصور اذا مو زلمة وراح تشبعين مغمة بهالمجتمع هذا ييمه .
– زين الحل شلون يمه لا تكليلي اتحملي يمه جابها كبال غرفتي كدامي رب التنام بغرفتي ما راح تتعمد اسمعني صوتها بالليل مراح تتعمد تطلع كدامي فوك بوضع يخزي اني هذا كله شلون راح احمله !؟ ما اكدر يمه ما اكدر شوفيلي حل ويا ايوب ما اكدر استمر بعد
– جا هو مو اتفق ما يكرب منج وعمه اتفق واتكفل
– شبيج يمه عمه قابل ينطي بيه حط هذا الحل كال مرة ورجال بس حطهم ابيت هم ينخبطون لهذا ايوب وافق على كلام عمه لو بصالحي تعتقدين ايوب يوافق .. حجة رادوا يرجعوني بيها ويصمون حلكي ما ينفع ويا ايوب غير الطلاك
– تريديني احجي ويا ايوب على موضوع العزلة
– يمه مو حجيتو وما رضى ايوب ذبحي ولا تكعدي اطلبين وتفرضين عليه ما يوافق لو هسه السماوات تتطابك
– صحيح هذا طبعه بس يمه اني ملاحظته كل اللي تفرضه واتطلبه يرفضه بس بعدين يخلي شهر مدة تمر وينفذ اللي طلبتي .. دراسة من ردتي اول بداية رضى لو رفض وبعدين وافقلج وبيده وداج ونفس الحالة من طلبتي سيارة من وكفتيله وكتيله كالج ما عندي ورا كم شهر جاب السويج حطه بيدج .. وحتى شغلج يمه مو بطلج وكالج لا بس من شافج رايدة الشغل ومستقتله عليه بس رضختي لارادته وطعتي خو قدم اسمج وعينج بدون ما اتطلبين منه .. صدكي حتى سالفة العزال ما رافضها بس لان انت فارضتها وشارطة ميحب احد يتشرط تشوفين فترة وكالج هاج هذا اللي تردينه ..
– ماما اكولج جابها حطها كبالي تكليلي ما يحب احد يتشرط عليه هو متزوج عليه شنو ما اتشرط عليه مو من حقي بيت خاص مو هاي حقوقي ؟ ليش كله حقه الله حلل اربعه حقه يريد ابنه حقه لا تحجين حقه لا اشرطين اني حقي شنوووو ؟
-والله ما ادري يا يمه شكلج شبيدي عليج كلت راح ازوجها واحد جبير گومة والناس تحسبله حساب راح تعيش بجاله اني ادري يكبر عليج ويذلج ويلي من حظج
– ماما اريد ارجع راح ابقى هنا .. خابري كليله غفران تفطر هنا اليوم ما طايقة اشوفه ولا اشوف اهله
-ارتاحي نامي واني اخابره
اخذت التليفون ودكت عليه كاللها : هلا يمه رمضان كريم
-الله اكرم هلا بيك خالة شلونك شلون كيفك
-الحمدلله امريني
– والله خالة خابرتك اريد اكلك غفورة اليوم تفطر يمي ورا الفطور تجي
– والله خالة بعيني بس لان اول يوم رمضان والعائلة مجتمعه اريدها هي وعلاوي موجودين ع السفرة ان شاءالله غير يوم بحيل الله .. هي وين يمج ؟
– اي عبالي تصل يمي افطر وياها
– انطينياها
انطتني التليفون
حطيته على : الو
حجه : تركبين سيارتج نص ساعة انت بالبيت بدون كلمة زايدة وراح احسبلج اذا صارت نص ساعة ودقيقة اتصرف
– دا تهدد انت شتريد تتصرف بالله ها ؟
– صارت نص ساعة الا دقيقة .. منتظر
قفل الخط
باوعت لامي : هذا شحاسب روحه بالله امكانية تكبر وغرور مو بانصاف كل الناس صغار عنده بس هو الجبير ويتحكم على كيفه ..
– اي شتسوين يا يمه هاي بعد طبعه شبيدج
– ماما ما اريد اروح ما اريد تفتهمون يا عالم والله راح احرك روحي مدا اتحمل اشوفه
– عطي عينج بعين ربج يمه واكسري الشر وكومي واني غير يوم اخلي يجبيبج وبياته مو بس تجين
جريت عبايتي وربطتي بنتر لبستهم وكمت .. اخذت ابني ورجعت
لكيته كاعدلي منتظرني بالمطبخ .. دخلت كال : ليش تخلين امج تخابرني ؟ عود حتى تحرجني
تجاهلته ومشيت ما رديت حجه : مو احجي وياج
رجع صعد وراي فوك ردت اقفل الباب حط رجله : هذا الباب اذا انقفل اكسره والله احترمي نفسج غفران ترا وصلت وياج ليجاي
تركته ومشيت علوش يبجي عليه شاله وكعد ع التخم
كتله : اخذ الطفل واطلع اريد ابدل
– بدلي وياهو اللازمج جديدة هاي
– انت ليش ما تحس اني ما اريدك ومن اشوفك بودي ازوع
– اي هسه ليش تخليني اكوم واحنا صايمين
– صايمين عوووفني بحالي يا اخي اخذ ابنك واطلع مني ليش مكابلني ما اطييييقك
– غصبا ما عليج كاعد ابيتي مو ابيت الخلفوج مو طفل عدج اني يمتى ما عجبج طلعتيني من الغرفة وسديتي الباب لا شو انت اتطلعين اذا ما عاجبج
– اي تدلل اشبع بيها
جريت عباتي وطلع كام وراي : وين تعاي .. وين رايحة
جذب تعاي الغرفة الج .. غفراااان
نزلت ع الدرج تبعني .. وين طااااالعة يالكائناااات
مشيت للقنفة جريت مخدة من التخم وملتها .. واتمددت وتغطيت بعباتي
وكف اخذ نفس : طاح حظج ركضتيني
بالقرأن ابتليت بيج بلوة بالقران
… تعال بابا تعال خلي هالمتوحش ينام لا ننكتل اني وياك وتاليتها احنا الننطرد .. امشي بابا
طفى الضوا مال الهول وسد باب المطبخ وراح للاستقبال كعد علوش يم خالتي وبقى يلاعبه .. اني غفيت ع التخم .. شوية وندهتني نادية : كومي مسوية البيت فندق تطلعين وترجعين تمسحين اديج بالحايط كومي ساعديني نسوي الفطور
ضربت ايدها : لتلزميني افتهمتي
– سرطان لهالوجه شلون شكول .. كومي يلا ساعديني امشي
– مدام اجيتي لهنا وتريدين اتصيرين الكل بالكل اخذي دوري واخدمي بلا صوت .
– لا تخليني اسحلج والله كومي كدامي
– شو بالله اسحلي شو ياهو الكام صار يهدد .. بالله نفذي اشو
عافتني ومشت .. كمت فتحت الأستقبال لكيت ايوب نايم بالكاع ومنيم علوش على ايده وكدام المبردة .. رحت لغرفة البنات جبت بطانية واجيت غطيت بيها علوش .. ايوب بسرعة جر منها وتغطا وياه وحضن ابنه بأثنين اديه .
صعدت فوگ كملت نومتي .. ب٥ اجتني نبأ
تكولي : تكول بيبي انزلي عاوني بالمطبخ
-علوش وينه ؟
– ديلعب جوا وخالو طلع
-من يبجي صعديلياه وكولي لبيبي ان شاءالله
-ماشي
سحبت تليفوني ورجعت راسي للمخدة
طلعت مطعم خاص بالبيتزا طلبت بيزا صغيرة اليه ع الفطور كال يجيج وياها تمر ولبن ضيافة رمضان .. كاله مشكور سديته وكمت توضيت ورجعت فرشت سجادتي خالتي تصيح عليه من فوك
لحد ما گبل الفطور بنص ساعة خابر عليه المندوب
طلعت فلوس ونزلت حتى انتظره خالتي استلمتني رزايل وتكلي اذا مديتي ايدج ع الاكل واكلتي ويانا الا احطج واكتلج
كتلها : بالعافية
ومشيت للكراج لابسه حجابي وانتظر
دخل ايوب عقد حاجبه : شدسوين هنا ؟
مجاوبته .. حجه فوتي جوا
بقيت ساكنة
دفعني : دا اكلج فوووتي جوا لججج
-هسه شعليك كاعدة بالحوش قابل كاعد بالشارع
– وشعندج
– طالبتلي اكل
-اكليش وهذا المسواك اللي اتسوكته والخير الجبنه وطابخينه المن
مجاوبته دك التليفون ردت ارد جره من ايدي وطلع جابلي الأكل كال : ممنوع تصعدين تفطرين فوك
-انطيني
اخذ البيتزا ودخل جوا حطها فوك الكاونتر
انطينياها ما اريد اكعد
عافني ومشى يفتح الجدورة ونادية تشرحله شطابخه
حجيت : باجر عندي برنامج زيارة عوائل الشهداء ورا الفطور
اندار
– انت تروحين
-كادر كامل
-ممنوع
-شنو ممنوع شغلي هذا
-واني كلت ممنوع
– ليش يعني
– ابنج وين تخلي
-اخذه ويايا عادي ميضر
-غفران جامعة ورضينا شغل ورضينا كافي ترا والعباس جزعت
– اني شعليه نظام شغلنا صار بعد الفطور
– معناها غيبي رمضان وخلي يكطعون راتبج شهر مو فد مشكلة
– اترك شغلي واكعد اكابل منو ؟ اقلها زيارة العوائل احصل منها اجر يم ربي برمضان مكابلة الوجوه البالي شحصل منها ؟
– كعدي بغرفتج لا تحصلين
– هم زين كتلي تمام بأمرك تدلل
جريت الكرسي وصعدت جبت البيتزا مالتي واخذت ابني وكعدت بغرفتي دز عليه سرى ما نزلت كام يصيح ما نزلت صعد هو كال : اول يوم رمضان لا تسويلنا عركة خلينا نخلص هاليوم على خير
-هسه اني متعاركة حاجية متقربة يم احد منكم يا اخي مو اتفقنا نبقى مطلكين كل واحد بحاله ونبقى علمود الطفل هاهية اعتبرها هيج
-مطلكين شنو مرتي وتصالحنا وخلص الموضوع كومي انزلي
– لا هاي قبل ما تغدر بيه اني اخذت منك كلمة كتلك ما اتصالح قبل ما احجي طلباتي كتلي شتريدين يجرالج ووين الجرالي ؟ دا مشيني مثل متريد كأني لعبة مو بشر
– اي صدك انت اللي امشيج لعبة مو بشر مظلومة عمت عيني اكعدج بكتلة وانومج بكتلة وحارمج وربع ما انطيج وحسرة عليج اللكمة والهدمة
– لو بيدك تسويها لو سويتها مو تكولي غيبي وخلي يولي راتبج
– على اساس اني معيشج براتبج بس انت دكيتي لان كتلج ماكو شغل ولج ما فاطر ليش تفحطيني كومي
– هسه ليش افحطك انت مفحط روحك عوفني وانزل كابل مرتك اني نفسبتي تعبانة ما اريد انزل حتى احترام لنفسيتي ماكو ترا ماكو هيج والله كافي صغطتني من كل مكان فك ياختي خنكتني
– ما اخنكج اريدج ع الفطور كومي
لزم ايدي كمت اجر ما عافها طلعني برا واخذ البيتزا وقفل الغرفة ونزل
حجت خالتي : هسه انت صايم وتفتر وراها دخل تولي
جريت ايدي من عنده : استلم اكعد من شغلي وما اشوف عوائل الشهداء حتى اكعد اسمع هالكلام هذا واكابله
-غصبا ما عليج
-غصبا ما على الخلفوني راضية بس اتركني بغرفتي ليش دا تخنكني
– بكيفي اكعدي هنا
نصبوا السفرة وروحي طالعة جزعانة ما طايقة اشوف احد كبالي
هسه ما اريد منهم يخدموني اني ادز فطوري لروحي كل الاريده انعزل اعيش قهري براحتي بدون ما انضغط منه .. ميرضى
دمعت عيني حجه : هسه دا تبجين على شنو اريد افتهم
مجاوبته
كمت للحمام توضيت اذن مشيت اخذت التمر واللبن فطرت بيهم ومشيت حطيت البيتزا بالمايكرو ورحت لغرفة البنات مديت السجادة ووكفت اصلي وهم ديصبون كملت فرض المغرب والعشا وايوب يصيح كرهني بام روحي فوك عمايله كلها مكاعد يتركني حتى ويا الله مديخليني براحتي
صاح : ابنج تعاي راح يحترك بالمرك استعجلي
كمت لفيت ومشيت جبت البيتزا سوالي مجال كعدت يمه واخذت ابني بحضني .. حجه : بيش الساعة برنامجكم
باوعتله : ليش ؟
مد ايده ع البيتزا اخذ قطعة وكال : هيج دا اسأل
-ب٨ ويخلص بـ ١٠
-للعشرة بالليل انت وأبنج برا ترضيها ؟
سكتت محجيت ، حجت امه : هذا مو شغل كو***
بسرعة نتر :- لا تفشرين كدام الطفل يمه استغفري ربج زيارة لعوائل الشهداء شلون تنطقين عليها هيج كلام
حجت : دخيل بختهم بس خوما بالليل
– يمه سهمج الراحة اني موجود واني اقرر انت لا تشغلين بالج بهالأمور افطري وارتاحي
مدنكة اوكل ابأبني واكل حجه: راح افرغلج بلال ما محتاجه ياخذج ويجيبج بسيارتج .. كم يوم بالاسبوع ؟
– هن ٣ ايام بس اني يشملني بس يومين
– خير ان شاءالله .
حجيت : وبعد عندي موضوع افاتحك بيه بعدين
-ان شاءالله افطري هسه
كام يفلس سمج ويحط بحلك علوش كمل الفطور كالت خالتي : السفرة والمواعين على غفران كومي غفران لميها
حجيت : عندي شغل لازم اكمله
كامت ترزل واصيح بايوب عليه بالحمام ديغسل طلع صاح : غفران
انداريتله عاكدة حواجبي : ها
-سويلي جاي وصعدي مو تريدين نحجي بموضوع
هبطت : ماشي
حجت خالتي : جاي شنو خلي تحرك روحها ويا هالمسكينة الضالة تفتر مصل المصرع انت ليش تصير ظالم
حجه : يمه احد طالب منج تشيلين ؟ احد شاكيلج سنين اكلج سويلج نظام شغل بيناتهن عايفة كلشي على غفران هسه من اتزوجت جاية تريدين تنظمين بين نسواني .. حدج بناتج ولا تدخلين الج الصافي
– انت مكوي راسها وميسبه على يا مال ليش تخليها تركبك كلشي تريده تكلها حاضر
-لو كلشي رايدته كايللها حاضر ما جان شفتيها مطنگرة وكالبك وجهه اني اعرف شنو الانطي الها وشنو الامنعه .. كتلج لا تدخلين بيناتهن اني احل .. صاح : ناااادية لمي السفرة
كومي خالو نبأ وياها .. سرى اذا كملتي بابا كومي ساعديها
خالتي ما رضت ونادية دلغمت حيل بس متكدر تحجي
واني واكفة يم الجاي احط بيه هيل .. حجت : شوكت الله يفكني منج ومن ابنج يا بومة
-ليش تخليني اروح واصيلحله واكوله تدعي على ابني ؟ اذا لزمج وكتلج هم تصيحين بسببج وانت ظالمة ليش متولين خلقتج من وجهي؟
-والله كاعدة ابيت وجلي معاجبج انت الولي منا
كاعد تحجي واندارت لكاها وراها : كملتن مناگر ؟
سكتت هي .. حجيت : كول لمرتك مرة لخ لا تدعي على ابني
نادية : يا جذابة شوكت مدعية على ابنج اني طفل بريئ شوكت اني داعية عليه
حجتها والدموع تجمعت وتكله : والله وروح ابويه ما داعية ولا جايبة سيرة الطفل
حجيت : صح اني دا اجذب
حجه : اسمعي لچ بهذا البيت كله خطي الأحمر بس ابني … غفران ما موجودة وانت واكفة وهو يبجي اكسر راسج اذا بجى مو تدعين عليه من تجيبي على السانج اطلع لسانج واكصه واشمرج للجلاب
-يا حرام ما حاجية وروح ابويه اني ادعي على طفل
عافها ومشى اندارت تدعي عليه عفتها وصعدت الجاي فوك
ايوب لحكني .. دخلت للغرفة صبيتله استكان حجه : شنو الموضوع التريدين نحجي بيه
-اكو واحد اعرفه بالجامعة عنده اخوه ديريد يبيع شقة
-اي ؟
-الشقة سعرها ٢٥ مليون وندفع اقساطها كل شهر
– ندفع !؟ شجاي تخرطين
-ليش شبيها اذا خذينا شقة وابسمايا الوضع هناك حتى احسن منا كلشي مرتب وامان
– ما عندي فلوس سديدالموضوع
-اني عندي
-عندج ٢٥ مليون؟
-لا بس اكمل عليهم من ذهبي واشتري ولا تدفع اقساطها خاف تكول مصرف زايد عليك اني ادفع
-واني تالي عمري اكعد ابيت مرتي مشتريته
-هسه بس اشتري لا نكعد بيه احسن ما فلوسي ضايعة منا ومنا اريد استثمر راتبي بشي مفيد
-سدي الموضوع ولا تجيبي على بالج كلش
-شنو السبب
-حطي رجليج بالكاع غفران واكعدي حطيتلج شغل تريدين تشترين بيوت وتركبين راسج عليه
-هسه اني دا اركب راسي لو دا اخذ رأيك
-ورأيي يكلج ممنوع ابد انسخا لا تفتحيها
-شنو يضر اذا اشتريت مراح تخسر اي شي بس تروح ويايه ما اريد امشي بدونك
-بدوني شنو غير لو شفتج رايحة من دوني لو مسوية ادفنج مو جذب ادفنج ادخلين داوئر دولة وكاتب عدل وانت بهالعمر من ورااااي بالحسين افنيج
– يعني لو اريد اسوي من وراك اجيك هاي اجيتك دا اريدك تساعدني
-ابد ما اساعد ولا اقبل وما تشترين عندج فلوز زايدة انطينياها افتح مشروع ونستفاد اني وانت اكثر من هالمشاريع الطايح حظها مالتج .. تريد تشتريلها بيت ناقص والله ..
-لحد ما عرفت شنو العيب لو الحرام اذا اشتريت بيه هسه دا اتفاهم وياك غير تفهمني
-ما اقبل وذمة بركبتج لو رحتي من وراي ولو اشتريتي .. صلاتج وصومج ما مقبول اذا سويتي شي من وراي ذمة ما افكها ليوم الدين بعد ؟
-انت ليش تحب تظلمني ؟ اني ما اتحمل اعيش ويا اهلك ومرتك انت شوكت تحس بشعوري شوكت تكول هاي تعبت
-تعبت منين بت الاوادم ام ونادية حاط عظم بحلوكهن حتى ما يصخرونج ومخليج مسوية البيت فندق شنرديييين بعد
-ومنو كالك اني ما رايدة اشتغل لو متعاجزة من شغل اني ما اريد اكابلهم انت يمتى تفهمني
-اكعدي بغرفتج
-شكعد وانت تزن وراي وتجرجر بيه الا انزل واكابلهم ايوب كافي مثل ما الشرع حللك الزواج حللي بيت خاص هذا حقي مو تذممني وتشكل الذمة عليه انت هم مذممتك ولا بريئ الذمة على كعدتي هنا انت سالب حقي من حقي اعيش ابيت وحدي .
– لا اني اعرف بوضعج مو حرام اعرف انت مو مال بيت وحدج
-ليش ساقطة اني شنو سوالفي مكسرة وبس تطلع تخاف ادخله من ورااااك
كاعد احجي ما احس الا سطرني براشدي : هذا الحجي عيب ينحجي كبالي يا مرباية يا طايحة الحظ
-كوم اطلع من عندي
-لا تطردين احترمي نفسج لا اهينج والله
-ما اريد اشوفك يا اخي ما اتحملك كووووه عوفني اتركنييييي
– ما ترديني يطبج مرض بس اني رايد حقوقي منج المن دا تصومين وتصلين وانت مانعتني منج بحجة زعلانة
كمت عليه كمت ادفع : هذا الهامك بس هذا الهاممممممك اني كاعد احترك وانت تكليييييي حق امشي كوم اطلع مني ما متحملتك كووووم
ادفع بيه ما يندفع
-وخري لا اتدفعين لا تخليني اذيج
– دكومة لزكة انت لازك بيه خلي عندك احساس وكول هالمرة ما تريدني كووووم
كاملي جرني من هدومي ورفع ايده الثانية اني حطيت اديه فوك راسي بسرعة صرخ بقوة : منو اللزكة على منو تتتجاوزييييين انت
ليش تخليني صدك اذيج ؟
شمرني من عنده وطلع
كعدت ابجي انوب حتى ميقبل اشتري شي وذممني ما اخطي اي خطوة من وراه شلون ربي والله تعبت .. شلون اخلص من وضعي هذا ؟
شلون اخلص منه كل ما اكول خلي اتقبل خلي اتعايش مدا اكدر مو بيدي ما اكدر وميفهم
نزلت جبت ابني وكعدته يمي وفرشت سجادتي اسوي اعمال ليالي رمضان واكمل ختمة القران الخاصة .. بس روحي باهتة حيل باهتة شما احاول اداويها واطمنها احس فقدت كل ارادتها واملها.. وحايرة بيا طريقة اداري وضعي ليرضى يعزل ليرضى يحطني ابيت وميقبل اني اشتري .. ظالم .
لليل ب٩ ردت امشي انوم ابني
بس جانت حارة والوطنية ماكو .. اني لابسة برمودة وتيشيرت ربع ردن بس حسيته القماش حار رحت طلعتلي شلحة زبدة باردة وقصيرة فوك الركبة وبدون ردن .. طفيت الضوا ومشيت تمددت ويا علوش انومه وما طايقة روحي حارة وخنكة واريد بس اطلع منا واخلص منهم كلش كارهه عيشتي مكاعد اقتنع واتقبل .
انفتح الباب ..انداريت فتح الضوا اني متكشفة بسرعة جريت الثوب : طفي الطفل نايم روح
-طفاه بسرعة
وشغل اللايت ومشى بدل ملابسه .. كمت اباوعله همست : شرايد
همس : انام
-وين تنام مو حطيتلك غرفة كبالي روح كابلها
-بكيفي وين ما يعجبني انام
حجاها واجا للجرباية انداريت بسرعة وانكلبت من الجهة الثانية وجريت ابني وياي وانزل بثوبي .. تمدد ع الجرباية عكدن حواجبني ما فكن كارهتم وما طايقته وغصب عني يكابلني شنو من لزكة هذا .
نام علوش مد ايده يريد يشله لزمته : وين ماخذ ابني
-وخري راح يكعد
-عوفه
سحبه وشاله بكاروكه كمت من مكاني : انت شتريد مني
-رايدج يابويه غير مرتي
-ما اريد اصير مرتك روح للي اختاريتها وجبتها اطلع مني
-رجعت اطرديني الطفل نايم اهدي
-لعد عوفني ما اريدك
-بس اني رايدج طار عقلي من مكانه من شفت بياض رجليج
– اييييع انت شدا تحجي حتخليني ازووووع وخر
-تزوعين شنو مرتي انت لو جايبج عرضة غير حلالي
-ذيج حلالك مو حلوة وتخبل احلى مني روحلها
-بس انت انعم واصغر منها تموتين
-لتكشش روحي بسوالفك روح مني
-وين اروح
– وخر لا الم الدنيا كلها عليك انت مو اتفقت ويا عمي نبقى لخاطر الطفل ليش متعوفني لحالي
– حجي هو اني من اشوفج اكدر
حجاها ولزمني باثنين اديه كمت ادفع بيه واكوله : حارررك والدنيا تخنك وانت فوك الحر راح اطك وخررر
لزمني من ركبتي يعض
كمت اصرخ : ركبتي ااااخ وخر كاعد تأذيني
حط ايده على حلكي : من انعل ابو شهيرتج صووووتج
-وخر مني
-ما اوخر
كمت ادفع بيه ما اطيق بودي اتقيئ من عنده ..
ميروح لزك والدنيا حارة احس معدتي وصلت لحلكي ..
دفعته من عندي حيل ومشيت للحاوية اتقيئت معدتي كلها ..
كعدت واني اخذت الحاوية وفتحت الباب لكيت نادية واكفة بالباب مالتها وتتسمع شافتني طبت .. غسلت ورجعت
حجه : تكش روحج مني ؟
– ما اريدك افهم لعبت نفسي منك مو كوة هيج منظرك مديروح من بالي
كاملي وسحبني للسرير : مو على كيفج ما ترديني لو مو تتقيئين لو تذبين بطنج كلها غصبا ما عليج اني رجلج وغصبا ما عليج يمشي الحال كل يوم .. يوم هناك ويوم هنا يعجبج يعجبج ما يعجبج طبج مررررض
كام يحاول وياي لحد ما اخذ الرادة بكوة ..
انداريت من عنده ابجي .. وهو كام للحمام سبح ورجع .. اجت الوطنية كام يسدسد بالشبابين اني احس دم نزل من عندي .. كلت اجتني العادة .. كمت للحمام سبحت شو الالم زاد بظهري وباسفل بطني كصني كص .. لبست ملابسي .. وكمت افتر اريد اكعد مدا اكدر من الوجع ابطني
انوب كمت احس بشعور مصاريني كاعد تتكطع هو كاعد ع التلفزيون ومتمدد ع الجرباية .. شافي الزم باميز تواليت واعصر .. تعدل : شبيج
-بطني دا تأذيني
كاملي : شبيها ؟
-نزلت عندي العادة ودا تأذيني حيل
-صارلها شكد ما جايتج
-ما ادري هي تخربط بسبب الابرة تغيب شهر وشهرين وتجي .. بس هسه اذتني
ضل يباوع عليه كالي : كومي بدلي خلي اخذج
-ما اريد علوش نايم
-اصعد سرى يمه كومي
من الالم مكدرت الا ابدل واطاوعه صعدنا اني وياه بسرعة واخذني على مستسفى اهلي نسائي .. دخلتني اخذتلي سونار كالت : شوكت اخر عادة
-ما انذكر من شهر ونص دكتورة اني ماخذة ابرة منع حمل
-ابرتيش ماما هذا الطفل موجود
-قصدج اني حامل
-اي هذا باعي بس النزيف ما اعرف شنو سببه كومي ع الفحص الداخلي
كرهت روحي من كالتلي فحص نسائي
كمت وياها والدمعة بعيني كالتلي : عندج توسع والطفل يسقط اذا بقى النزيف مستمر وعنق الرحم ما انسد
كتبتلي راجيتة علاج
وانطتنياه .. تركتها يمها وطلعت كال : ها ؟ شنو
-حامل
حجه بفرحة : صدك ؟
– بس دا اسقط دا تكولي عنق الرحم مفتوح و عندي توسع والنزيف مستمر
– وما انطتج علاج
– اني رايدتك حتى اريد طفل من عندك حتى اخذ علاج الحطه ابطني ياخذه ويخلصني
عفته ومشيت اندار رجع للدكتورة جاب الراچيته واجا وراي : غفران لتصيرين مخبلة ابنا هذا
– ابنا وعلى هالوضع ؟ اني مبتلية بواحد ابتلي بأثنين
– ميخالف اني اساعدج
-انت تساعدني من تعرفني طلكني ما طايقتك
-شطلكج ابني ابطنج
عفته ومشيت للسيارة صعدني فرحان طاير كل علامات الفرح باينه بوجهه
وصلنا يساعدني انزل دفعت ايده ونزلت : جيبلي مسكن الم بدل ما فرحان بروحك
– هسه اجيبلج علاجج كله اتأمريني امر
دخلنا علوش يبجي بيد سرى وخالتي ونادية ونبأ كاعدات
صاح : لك علوش بابا راح يجيك ااااخ
ضحكت سرى : صدك حااامل
كام يشيل بعلوش ويشمر بيه للهوى ..
وخالتي تكله : دحجي صدك حامل
حجيت : بس عندي نزيف راح يسقط
حجه : لتصعدين فوك ابقي جوا ارتاحي خلي اجيبلج علاجج
نادية كامت تكله : من اكلك اريد طفل تكلي ابني صغير وهسه طاير بيها لإن حامل لعد اني ليش متقبل احبل
– وكتح هسه
نزل علوش وطلع يجيب العلاج
ونادية خبصت الدنيا بالبجي وخالتي تهدي بيها تكللها من يكربني ما يخلني احبل وماخذ حذره وياي ويكلي ما مستعد لطفل هسه وطلع ما ياخذ حذره وياه وطاير لان حبلت مو ميريد طفل مو يكول ابني صغير حارمني من ابسط حقوقي ما اكدر اتحمله بعد والله ..
هي تحجي واني مشيت صعدت للغرفة اتمدد
اجا جايبلي العلاج : ليش صعدتي غفران مو الجاهل مهدد
– مهدد بسببك لو ما مسوي عملتك قبل شوية جان كل هذا ما صار .. اكول وخر مني لا طايقتك ولا طايقة ابنك ولا رايدة خلفة منك
– ميخالف بس ديري بالج عليه وعد والله اشيل الغرفة اللي حطيتها وابنيلج الطابق مثل ما ردتي وحتى الدرج البينج وبين اهلي اسده .. بعد
بس حافظي على نفسج ولا تتحركين ويوكع
– يعني تكدر وما عندك مانع تعزلني بس تشوفني ما استحق
وبس علمود اللي ابطني رضيت
– هسه ارتاحي ونحجي بالموضوع وشتريدين خادم
– لا اوكف .. خادم المن اليه لو للي ابطني صارلي شهر اذوب كبالك مثل الشمعة ما كتلي اعزلج وهسه علمود الطفل تكولي خادم .. انت رايدني لخلفتك ؟ انت شنو
– عوفي الحجي هذا هسه انت مو تريدين اتعزلين .. ثبتي الطفل ببطنج وشتريدين تأمرين
عافني ونزل
تخبلت .. يعني علمود الطفل
يعني يكدر بس اني ما استحق .. لكن علمود ابنه لا يستحق
يعني اني مالي قيمة كل قيمتي مرة تخلفله !؟
كاعدة دا افكر اسمع صياح نادية فوك
كمت من مكاني فتحت الباب بغرفتها تتعارك وياه
عافها وطلع سد الباب ونزل
تلكته خالتي : حرام عليك والله حرام ليش ظالمها
– يمه مو انت هم فوكاي كافي علي هن خلصيني رحمة لوالديج
– وشنهو ذنب المرة تريد جاهل حالها حال ضرتها لا اخير غفران صغيرة والعمر كدامها تجيب وتخلف نادية عمرها ٣٥ سنة شضللها من العمر تخلف بيه حرام عليك تظلمها
– اني من البداية اتفقت وياها كتلها هذا الزواج لا ينعلن ولا يصير بيه جهال هي وافقت وكالتلي موافقة بس كون يمك .. من تالي تكلب عليه كافي اعلنت هالزواج وما خليتها بالسر من تعلي سقف طموحاتها الباب ينتظرها .. مو جسر الطموحاتهن اني
– شطمحت مثل ذيج ام الخشم اللاويته ٢٤ ساعة حتى بالليل كامت تشتغل وبدال ما تمنعها تفرغلها المعاون مالتك يشتغللها سايق وحماية وفوكاها ما راضية عليك سااعة وكت تصيح ما اريدك وطلكني فكر ابني .. شوف منو المشتريتك وتحبك ومنو الرايدتك جسر من صدك الها .
– يمه خليني وياهن لا تدخلين واعيد سهمج الراحة
– لا ما ارتاح نادية خطية كاعد تتعب وتحبك وتخدمك بمي عيونها ما تستاهلك بكثر غفران الشايفة روحها عليك
– خرب غيرته اليكابلج ويكعد وياج اخلص منهن تكمليها انت وياهن
خل وطلع من البيت هج .
رجعت لغرفتي حتى الألم خف بجسمي من الهوسة
اخذت علوش دا اريد ارضعه .. شلون حامل وشلون ابني بعده يرضع شصير البقرة الحلوبة يربي والله جزعت فوك الضيم تعلاوة
صفنت بروحي .. استغفر الله ربي واتوب اليه
رزق ربي وارادته غيري يتمناه واني اتبطر عليه
ربي اسالك الصبر وتسهيل اموري ..
ديشوفون ايوب منطيني كلشي ومدللني
عكس شعوري تماما احس سالب مني روحي .. ما منطيني ابسط حقوقي وهو بيت اعيش ببيع بعيد عن زوجته الاولى .. ما طايقته ولا اريده ولا اريد كلشي منه خلي ينطيني طلاكي وكلشي ما اريد ..
يا طلاك وهالطفل ببطني منين طلعلي اني ماخذة ابرة ٦ اشهر
بعده مصار ٥ اشهر شهالابرة الفاشلة
ماكو شي ديضبط ويايا ابد
وما اعرف شلون راح اسير اموري
نمت بفراشي .. كعدت ايوب نايم وراي ومنطيني ظهره
ممكعدني ع السحور
وما اعرف هذا النزيف يبطل الصوم لو لا .. كعدت صمت ما اكلت اي شي ورحت ابحث النزيف اثناء الحمل يبطل الصوم والصلاة .. كاتب اذا مستمر ولو قطرات يعتبر حيض الصلاة والصوم بيه باطلة واذا صار وانقطع نهائي اعتبرت استحاضة وجبت بيه الصلاة والصوم ..
كمت للحمام دم مستمر ما انقطع
بعدني بالحمام دا اريد اسبح وما احس الا ينزل من عندي شي مثل كبدة الدجاج بس مملطخة دم وبيها مثل الشبك ومدري شلون شكلها .. باوعتها جريت كلينكس مال حمام وحطيتها عليه ..
شكيت انو هو هذا الجنين لإن شكله غريب ..
سبحت وطلعت من الحمام رحت لأيوب كعدته
فز : ها
– كوم اخذني للمستشفى اعتقد سقطت
فز من مكانه : منو كال
– ما اعرف حسيت
شاف اللي عندي فز بدل بسرعة ونزل كعد سرى علمود تدير بالها على علوش واخذني للمستشفى .. فحصتني الدكتورة كالتلي : ماكو اي جنين سقط
ما بيني وبين نفسي فرحت لإن ابد ما مستعدة لطفل ثاني
اعرف رزق ربي بس بسن دوامي ووظيفتي وابني ووضعي هذا مو مال اجيب طفل هو اني هذا ومتحملة الذل والقهر علموده الثاني اجيبه بنص هالهوسة ماكدر ما متهيئة
انطتني علاج كالت : اخذي علمود تنزل وصاخة الطفل كلها
كتلها : ست عادي اداوم وامشي لو لا لإن عندي شغل
– طبيعي ما عليج شي اذا ما عندج الم اعتبريها دورة شهرية ومارسي حياتج طبيعية
– بس البارحة جان عندي الم اليوم ماكو
– اي البارحة اتقطعت اوصال الطفل لهذه تألمتي واليوم نزل والحمدلله الله يعوضج حبيبتي
– شكرا دكتورة
كمت وطلعت كتله : سقط
ما حجه بس تنهد وعيونه صارن بكصته
ساق للبيت وبس ينفخ ومقهور .. وصلنا للبيت .. بعده الكل نايم
صعد وراي للغرفة دخل الغرفة بحذائه وكعد ع التخم منزل راسه .. اني بدلت وكعدت باوع علاكة العلاج كاملها ما لازمة ولا حباية من عنده كال : يعني اتعمدتي تنزلي جبتلج علاج بكومة فلوووووس ومماخذه من عنده حبة حتى الذفل ينزل
دفر العلاج بالكاع وهجم عليه : عدج غيرييييي احجي حاطة عينج علىىىىىى غيري وما تريديييييني ما تريدين تخلفين مني ليييييييش
لزم راسي ودفع للدوشك حيل
كمت اوخره من عندي كام يلزمني ويعت بيه ويصيح لزم مراية الميز تراليت فلشها .. دفر القنفات كام يصيح .. واني مكتفية بس ابجي وحاطة ادية على اذاني
كمت لعلوش يبجي اخذته بحضني وكعدت بالكاع اخلي اديه على اذاناته واحضن بيه لكلبي حتى ما يخاف تركنا وطلع جريت التليفون خابرت امي كتلها : هسه تجين تاخذيني
صاحت : خير شصاير شبيج ابنج شبي احجي
– ما اريد ابقى خلصيني منه ما ارييييد والله اذا ما تجين تاخذين هسه اسوي بروحي شي كافي اشتروني مرة بحياتكم تعبت منه ليش بس بايعيني اله ما اريده
-غير افتهم شصاير وياااج
سولفتلها وابجي
كالت : جايتج
كمت من مكاني لميت غراضي وغراض ابني
وبدلت ولبست ابني وكعدت انتظر مكالمة من ماما
اتصلت كالت اني وصلت ..
اندكت الباب اخذت ابني ونزلت ..
هو طلع فتح الباب علي وامي بالباب
اجا للاستقبال يركض يكعد امه طلعت خالتي وامي وعلي دخلوا
كاللهم : ها خالة اكو شي
– لا سلامتك بس ابني ميت ابنها ابطنها من ضيم وفعايلك وفوك شينك كاتلها لإن موكعة الطفل هو ياهو الغصبها وياها الخلاها تنزف وتذب حركتك بيها وتطعنها وتكللها عدج غيري خالة كافي والعباس جزعنا شنهي مطيتك وحدة من الشارع لو فصلية كلما كمت وتهمتها شايف عليها شي لازم عليها شي اريد افتهم من تكللها عدج غيري شلون تهمت بختها بهالكلمة هاي
– خالة مرتي هي ما اتهمها الكلمة ما طلعت بداعي الطعن بس ساعة عصبية وكتلها ليش ما تريدين تخلفين منك
– شتخلف من عزا العزاك ابنك بعده يرضع شتخلف تفطمه وهو صغير حتى تجيبلك ثاني ارحمها خالة كافي عوفها من انعل الساعة التورطت بيها واطيتها الك
– ليش كاتلها ضاربها شسويت لبتج اخذتها من بيتج معززة مكرمة حتى جاي تكليلي كاتلها اني ما سويت بيها السويتو انتم ما يصير بعيونكم شي جتني مبطلة وجناحها مكسور خليت الف واحد يتمنى مكانها شنو القصرته ويا بتج شنهو الطلبته بتج وما كتلها لبييييه
كام علي يحجي : حجي الكلام مو وكته امي تعبانة وغفران تعبانة وانت هم تعبان خلي غفران تجي ترتاح يمنه كم يوم ونحلها ان شاءالله
حجه : ترتاح بغرفتها ما الها مكان غير بيتي تبات بيه ما اقبل
صرخت امي : يا غرفة المكسرها فوكها وفوك ابنها يا غرفة الترتاح بيها ولك ابني كااافي
دخلت خالتي كالتلها: على كيفج عيني ام احمد زلمة فكد ضناه وكسر الغرفة شنو ضربها بحاجة كسر على راسها حاجة جاية وهادة علينا بهالظهرية خالة عليمن شو بتج اكثر بناتج مدللة عد ابني ياهي من بناتج راكبة سيارة وياهي تداوم وتطلع ومخليها رجلها على حل شعرها حطو ملح بعيونكم وكولو يا الله
– نعرف الله هية وما نريد شي غير بتنا ومشكورين وجزاكم الله الف خير على عطيتكم بس اخذوا كلشي واطوني بتي ما نريد زور لو كوا هي
علي : يمه مو هيج اهدي
– لا هيج ما تريده الزلمة ما تيرده يا ناس هي لا بالفلوس ولا بالسيارات .. شفايدة اديها متروس وكلبها ينزفها البنية ادمرت من تجاهله من جبروته عليها حاسبها مالها ظهر وسايك عليها وحاط ضرتها كبالها ويجيبها على فراشها يا مرة تحمل الحملته غفراااان كافي مانين علينا بفلوسكم انعل الو فلوسكم اخذوا كلشي واطوني بتي
كام ايوب يصيح وامي تصيح وخالتي
اخر شي علي جر ايوب وعاف امي وخاليت يتراطنن وصاح عليه من باب المطبخ كالي : امشي وياي
ايوب ساكت وعلي كام يصيح لامي وكومها وجرها كاللها : بتج بالسيارة بعد تعاركين علموديش امشي
جرها علي كوة وهي تصيح وطلعنا من بيت ايوب ورحنا لبيت اهلي ..
اخذت ابني من عندي ودخلنا للبيت كالت النسرين : ساعديها بنيتي الله يرضى عليج فوك ما مسكطه من ضيمه ما عاجبه مكسر الغرفة فوكاها
اخذتني نسرين وفرشتلي كتلها : لا اريد انام بفراش امي
اخذتني لفراشها السبلت مشتغل وبيت اهلي هدوء وامي ماخذة علوش من ارتاحيت كلش حاولت انام بس منمت شبعانة نوم من الليل كمت اكلب بتليفوني واتصفح لحد ما سمعت نسرين كاعد تشتغل بالمطبخ كمت رحت يمها حجت : شدسوين مو مسقطة انت روحي ارتاحي
-مدا احس بوجع وفاطرة اصلا خليني اساعدج اتلهى
كعدت بالماع اثرملها وهي واكفة تطبخ اجت امي : يا كاعدة مو مريضة
حجيتلها .. كعدت يمي وعلوش خابص الدنيا بصياحه وعلي اخوي شايله ويلاعبه ويكركر ببطنه وذاك ميت من الضحك
كتله : علي تكدر تاخذني للدوام اليوم عندي واجب بالليل
– الحجي يدري
تنهدت : اي يدري وكال خلي بلال ياخذج اخذني بدال بلال
حجت امي : يمه ارتاحي ليش تضغطين على نفسج
– يمه صفنتي مو راحة حتى اكعدلها شما اصفن اتعب اكثر خليني اشتغل ولا اصفن واكره روحي
– براحتج بنيتي اني علمودج
حجه علي : مو مشكلة اخذج بس منو يرجعج سيارتج بقت ابيت الحجي
– تكسي يرجعني
– تكسي بالليل غفران شنو كواو*** احنا
– اخلي احد من المقر يتكفل رجعتي للبيت
– هسه الله كريم خلي نفطر واخذج اذا هاي انتظري بالمقر ارجعلج من اخلص من جماعتي
– ان شاءلله
كعدت امي تخابر بخواتي منو تكدر تجي
بس هديل كالت : هو اني متعاركة ويا رجلي وصارله ساعة يكلي انكلعي لاهلج خلي اسويها صدك واجيج
صاح علي بضحكة : اي عود ما اوصيج هم زعلانة افتحلجن ملجئ هنا مال مطلقات
ضحكت وكالتله : برد شرك لا بس اجي ارتاح شوية من ضيمه طكت روحي
– اذا ترتاحين هلا بيج عين غطا وعين فراش بغيرها تعذريني
– لا لا ابو حسين احبه بس يدوس بالبطن شوية وضيمه ما يخلص اريد اخلي فكة شوية يا خوية
كاللها : هلا بيج لا ما وسع البيت توسعج العين
– سالمة عينك اروحلك فدوة يلا جايتكم اني وعويلي حضرلي اكل زين
– يا بويه خلي نشيل
ضحكوا واني مدنكة اثرم ..
رجعت خابرت على اسيل .. كالت ما اكدر كاعد اسوي فطور
خابرت على نورة كالتلها : بيت عيالي محد عدهم خوما اخليهم بلايا فطور ما يصير عود نفتح كاميرا ونسولف
قفلت منهن .. واني كمت سويت كاستر بالبسكت ووكفت اخوط
ونسرين وامي طبخن اشكال والوان .. لحد قبل الاذان بشوية هجمت علينا هديل وجهالها الـ ٣ كلبوا البيت ملاب البيت صار بيه روح .. بسوالف هديل ونسرين احس روحي بدت تهدأ كلش تعبت من جو ايوب وبيته واهله .
خلصنا الفطور وكالي علي يلا غفران كومي
كمت بدلت وطلعت وصلت لهناك .. السيارة تنتظر صعدت وياهم فوراً
مشينا لعائلة الشهيد رحنا كعدنا شربنا جاي وسمعنا اخبارهم واحوالهم واخذنا اسم ابنهم نحط اسمه في حال نزلت درجات وظيفية نعين ولدهم .. وطلعنا منهم ب٩ ونص .. جان بس تصوير فيديو ما جان اي صورة فوتغراف .. خلصنا منهم وطلعنا للمقر
كلت خلي اروح لغرفة المدير العام مال عمي اكعد بيها أمن الي
تفاجئت المعارن مال المدير العام موجود كتله : الحجي ابو نور هنا ؟
– اي موجود
دخلت كتله : شلونك عمو
– غفران هلا عمر شو هنا مو كالولي ابيت اهلج ومسقطة جاهل
– بسرعة وصلتك الاخبار
– اي والله خابرتني خالتج ام ايوب شكتلي عن ايوب واسلوبه ويا مرته الثانية وهل دزيت على ايوب على ما اكمل شغلي كلت افتهم شصاير ابيتكم
– عمو هو وياها متفقين زواج بالسر وبدون اطفال البارحة من عرفت بيه حامل كامت تبجي شلون اني حامل وهي لا ربك للصبح الطفل وكع
– قل اعوذ برب الفلق شكد عينها نگسة هاي حريمة ايوب سواها وخذاها ايوب وين وهالزبايل وين شبي متكاولي مو عافته واتزوجته ورجعلها شنو من عقل اتزوجت والله وفقه شيريد بعد
– هو كالك اني هسه عد اهلي لو لا
– ما حجيتا بس كتله تعال اريد احجي وياك
– المهم عمو اتمنى تحجي وياه انو يكف هالمشاكل ويعزلني ابيت او يطلكني مال الوضع يمشي هيج مستحيل
– يا عمو يا غفورة انت بتي ايوب صعب بالتعامل وربج حتى لو حاط اباله يعزلج من اطلب منه ويعرف انت موصيتني والله ما يسويها ايوب مثل ابني واعرفه خوش ولد ويحبج بس اصبريله عمي وعيونج وحك شيباتي هاي يعزلج ما يخليج اذا مو بيت فوك اهله لوحدج ما يخلي الوضع هيج بس هو هذا طبعه هيج ميحب احد يفرض عليه يريد كلشي يسوي من كيفه
– واني تعبت عمو واني امشي على كيفه بسببه سقط الطفل واجا كسر الغرفة تكسر ذاب اللوم بيه
– ليش سقط
– عمو ماكدر احجيلك تفاصيل وامور اسراره تخصه بس والله عمو دا اتحمل امور ميتحملها بشر يعني تخيل الى اي حالك وصلت بحيث الطفل يتكطع ابطني وينزل من كثر ما دا احرك بروحي واشيغ واصعد لسماي وانزل لسابع كاع من قهري بسبب سوالفه طاقة ما بقت عندي
دنحجي اندكت الباب دخل ايوب
باوع : شعندج هنا ؟ انت مو ابيت اهلج
حجه عمي : جان عدهم واجب اكعد ..
– عمو اترخص اني راح اروح للقسم انتظر علي
– لا عمو لا تنزلين للقسم وحدج خاف شباب دوامهم مسائي اكعدي بغرفة السكرتير وكليله الحجي يريدك
حجه ايوب : يا غرفة سكرتير يا قسم الساعة راح تصير ب١٠
حجه عمي : اخوها راح يجيها
اخذ التليفون خابر على علي كاله : علي بيش تكمل
كاله حجي ب١١ ونص ب١٢
كاله : حلو وعايفها بالمقر وحدها عاشت ايدك
حجه عمو : عايفها شنو لك اني موجود اذا طلعت واخوها ما جاي اني اوصلها بطريقي
– لا عمي رحمة الله والديك خل اكوم اوصلها
– اكعد اريد احجي وياك
– نحجي بعدين
– ايوب
– مع السلامة .. امشي
ابتسم عمه وكاله : بالسلامة دير بالك عليها
لزمني من معصم ايدي ومشى نزلنا من الادارة
اخذني للسيارة صعدني ساق بدون كلام ولا حرف وصلني لبيت اهلي : كالي انزلي جيبي ابنج وتعاي يلا
– اني ما اريد اجي وياك تعزلي ابيت اجي ما تعزل ما ارجع
– اي ماشي احجيلج وياها انزلي جيبي الطفل
– انت ليش تستهزا ترا عيب الكدامك بشر والله مو حشرات ولا ما عدنا احساس
– غفران نزلي جيبي الطفل واطلعي
– واني كتلك ما اجيب وما ارجع الا تعزلي عاجبك عاجبك معاجبك طلكني افتهمت
حجيتها ونزلت طبكت الباب دخلت للبيت هديل رايحة ..
دخلت للبيت هستوني كعدت خابر علي على امي كاللها : رجل غفران بالباب منتظرها خلي تطلعله
حجت امي : شتطلعله المرة جاية عدنا ترتاح خلي روح كله
– يمه من تروح شغل ما تكول اريد ارتاح بس من رجلها يريدها تصيح اريد ارتاح
– تريد ترتاح منه مو من شغل ولا من تعب ترتاح من بيته وسوالفه ما تريد ترجع
كاللها : الرجال بالباب يمممه
– اي الرجال يروح قابل شنسويله
كام يصيح علي سدت التليفون امي
وعلي مخابر على ايوب كاله حجي : بس ارجع احلها واحيبها الك
اجا للبيت فورا كال : لمي غرضج يلا خوية خل اخذج لبيت رجلج
حجيت : ما اريد ارجع
– هو الما ترجعين شنو شرايدة انت
– لو يعزلي بيت وحدي لو يطلكني
– رجال شكبره نفرض عليه شيسوي ما يسوي ارجعي خوية وانت اتفقي وياه
– ما ارجع علي خل يفتهم ما ارجع الا يطلكني
كامت امي تحجي ويا علي وتصايحت علمود البيت
خابر علي على ايوب كاله: حجي الأهل قافلين لو تعزللها ابيت وحدها لو تطلك
ايوب : اسمع علي .. وسمعها لأختك وحق علي وحق من سماك وسمى ابني علي .. لو ابوي يطلع من كبره ما اعزللها ابيت ولا حتى فوك ونجوم الله فوك اكربلها من الطلاك عاجبها تبقى معلكة .. يطبعا مرض اتركها عندك بس خوية ابني اريده منك انت تجيبلياه ابني ما يبات بغير بيتي
سده من عنده ..كاللها : سمعتي يمه
– اعلى ما بخيله يركبه بنيتنا عده وابنه يرضع ما ننطي
– يمه هو شنو الاعلى ما بخيله ايوب الامر مال الوحدة مالتي .. ما تفكرون بيه بس تفكرون بارواحكم اني شنو موقفي وياه من يفوت الصبح واني مانع عنه عائلته
– وانت اطلب نقل ليش كاتل روحك عليه وضال تحت ايده انقل
– انقل وين مكاني ومرتاح بيه وكلها تحترمني وحاطتلي قدر وقيمة كون نسيب الحجي اروح اترك مكاني وانبهذل علمود غفران هي غفران شناقصها ؟ شمنقص عليها الحجي والله جايب عليها مرة شنو اول وحدة لو اخر وحدة جزعت ترا .. عقلي بتج ورجعيها لا وحق هو محمد تكوم براسي اوذرها توذر
– وعلى حساب اختك ادورلك قدو وقيمة ولكم استحوا اختكم تصيح الويل منه ومن فعايله ما تريدها كوة هي
– ما تريدها يطبها مرض خلي تنطي ابنه وترجع تكعد يمج
– عليمن تطي ابنها جاهل يرضع من صدر امه الله اكبر على روسكم ان شاءلله يا دين ويا ملة ترضى تاخذ جاهل من حضن امه ان ما رضى ينطي بالرضى نروح بالقانون وناخذه منه
– شنو هالسوالف التحطيها بعقل بتج يممممه تالي عمرنا خواتنا يطبن محاكم غير اكصبها والله لا تفكريها ولا تحجين بيها هي من عقدت ما دخلنالها محكمة وصدقنا العقد بوكيل تجي هسه من تالي اتطبلي محاكم وترفع دعاوي وعليكن ع الامر مالتي .. غير بعلي اوذرها بس توصل باب المحكمة ادفنها بكاعها
هله هله عود انت العاقلة .. تالي عمرنا ببنات عصام يدخلن محاكم ويتشكن على ارجولتهن والله يا يمه اذا سويتيها لو شجعتي وحدة من بناتج على هيج افكار خايسة بالقرأن بتج اذبحها وضلة ما اظلج بالبيت وانعل ابو اليبقالكم ..
– مرة ما تريده لا بيكم خير تاخذون الجاهل من ابوه ولا ترضون تاخذه بحكمة شلوووون تموووت
– اي اليشوف حال غفران خطية مو ميته اسكتي يمه حطن رجليجن بالكاع واسكتن اني الزلمة ما عندي مثل سيارة غفران .. وهاي مشغلنا خدم الها احمدن ربجن واسكتن تريدلجن واحد على كد اديجن شتريدن يكللجن حاضر
– مرة ماخذ عليه ولك نذل مرتك يوم الدرت ناوي تخطب عليها مو تكاتلت وياك وحتى خراميش طلعتلي مخرمش وكاتلتك اختك شسوت شو فوك ضيمها وبزر بطنها الطاح يدمغ ويكتل انتم ليش ما تصيرون اوادم هي الراااااحة بالفلوس اختك جاي تموت بين اديه وانت تكلي سيارة وخدممممم
– من الاخير يمه تريد الطلاك خاف تكول اخوي ظالمني وما يخليني اطلك اطلكي ورجعي هنا بس تنطين ابنج اني اتحملج وحدج تجيج قسمتج وتنكلعين بس مال تتشنگلين بطفل واطيحين بركبتي حرام والله ما ابقي الطفل ولا اتحمله
حجاها وكام
طول الحجي اني لامة روحي واسمع وكل كلمة مثل خيط النار بوسطي مثل شمعة تذوب بيه شوية شوية
حجت امي : وهسه شلون كليلي ؟
– ابقى هنا وابني ما انطي وشيدون يسوون يسوون
– واذا اجا وراد ابنه
-ما انطي خلي يروح يبلط الشط مو على كيفه لو يعزلي لو ما ارجع وخلي لا يطلك
كمت من مكاني علي كاعد ع المرجوحة ويحجي ويا احمد يكله : ابتليت بغفران بلوه والله كلشي شلون
احمد : انت الى متى تبقى غبي اكسر رجلها وامنعها من الجامعة والشغل وبطلها وكعدها بالبيت شوف شلون ما تخابر رجلها بنص ساعة وتولي منك .
تنهدت لو مو يمنعني ما انطي ابني ولا ارجع
مشيت لغرفة امي فرشت اني وابني ونمت وهو يمي بالفراش
ما كعدوني ع السحور لإن فاطرة بسبب الأسقاط .. وجه الصبح كعدت الضوا طالع انداريت اريد احضن ابني .. مكانه فارغ مديت ايدي اتلمس مكانه .. فتحت فراشي علوش ماكو
كفيت الغطا وكمت امي نايمة صحت : ماما علوش وينه ؟
فزت : اسم الله الرحمن بتي شبيج غير عندج خاف زاحف طالع
الباب مسدود فتحته دورت الهول دورت المطبخ ردت ماكو
كمت اصرخ : ابنييييي وين ماما جان نايم يميييي وين خذيتوووووه
امي : يمه بالسحور الحاهل بحضنج من نمت ياهو الماخذه منج
– ابني ماكو وييييينه
كمت اصعد للسطح ادور طلعت نسرين صرخت : علي وين
– راح لدوامه من الصبح
-خابري وين ابني احجي وياه
دنحجي وطب احمد اخوي : شبيكم مخبوصين شصاير
حجت امي : الجاهل ماكو وين موووودينه
– اجا عليه ابوه من الصبح واطيناه شنو المشكلة
صفكت وجهه امي : واطيت جاهل يرضع لابووووووه ولك انت ما تخاف الله ما عندك ررررررحمة
– بيا عصر انت يمه الجاهل ياخذ ممه وبناتهم هناك هواي يهتمن بيه بتج مو تريد طلاك اي هاهية ترجع تكابلج وتكعد
– اكابلها شنو شلون تنطوووون ابني بدووون علمي ترضى احد ياخذ منك بزررررك ابني هذاااا يا ظااااالم
لزمني من شعري وكال : اسمعي لج اني مو علي وامسحلج واقدر مشاعرج اسحلج هنا سحل والله من يطلعلج صوووت
امي جرتني من عنده وتكله : ولكم فرخ يرضع شلون تاخذوه
-هذا قرار بتج هي التريد الطلاك
-رادت عزال ما رادت طلاك يالظلام بدال ما تكعدوه وتكلوله اعزللها
-زلمة بكيفه نكعد نفرض عليه مشاكل مرة ورجال احنا ما ندخل بيها تريد خلي تطلك بس ابنها مننوع يرجعلها وجامعة ممنوع
كمت ابجي واصرخ واصيح هد عليه لزمني من راسي يجر بيه كامن امي ونسرين يخلصني من اديه كمت ودخلت للغرفة خابرت على ايوب .. رد علوش يبجي حجيت : يا ظالم يا ما تخاف الله تاخذ ابني مني انت شنو من بشر الله لا ينطيك العافية الله يحرك كلبك مثل ما جاي تحرك كلبي
– احرك كلبج ليش هذا ابنج وهذا بيتج تريدين تجين هلا بيج ما تريدين يطبج مرض لازم نسيتي علوش عنده غيرج ام بالبيت اتداريه وتعتني بيه
– يا ام هاي اللي كل ما تكوم تدعي عليه بالموت .. رجعلي ابني ايوب لا تحاربني بأبني حرام عليك
– حرام اللي جاي تسوي بنفسج لا خنتج ولا سويت الحرام وانت مؤمنة وتعرفين شرع الله اتزوجت ما ظلمتك ومنطيج حقج على كامل حق .. انت اللي متعافية وكا دامج متعافية عليه خلي بيت اهلج يفيدج
وشغلة لخ لا تفكرين بسوالف الفيس وتتأثرين بيهن واخذي ابنج بمحكمة
لو خطيتي باب المحكمة تجنين على نفسج والله .. وما تحصلين وتعرفين اني شقصد ..
سده بوجهي كمت ادك والطم اريد ابني
كمت اصيح : جيبلي ابني كومي روحي جيبي ما اكدر ابقى بدون ابني
– اصبري هسه وهو يجيبه والله ولج يمه ياهو اليحمل جاهل عمره سنة
– ايوب يحمل عناد يمه عليج الله كومي جيبلي ابني ما اكدر ابقى بدونه
– وربج ما يحمل اسمعي مني .. ايوب مو ظالم لا يظلمج ولا يظلم ابنج يرجعلجياه وربج بس جاي يستخدمه عليج ورقة ضغط يعرفه نقطة ضعفج ولو ما رجعه اخابر عمه يجيب الجاهل
فرفحت روحي من القهر الساعة التمر عليه بسنة
افتر بالبيت اريد التهي اريد ما افكر مشاهد البجي مال ابني كلها تعرض براسي وتصير عندي ضيق بصدري كأنما واحد واكعد يدوس على كلبي من اتخيله يبجي ما اكدر ..
ردت ابدل اروح للجامعة ما ذام الساعة ١٠
اذا اكعد بالليت اجن امي ما قبلت كالت : عوفي الجامعة اليوم لا تعمين على نفسج اخوتج يكومون يشدون وياج اكثر اذا اجو وما لكوج خليها لباجر
ما اعرف شلون الوكت ديمر
احس كاعد اجن اريد ابني .. اريده بحضني احس مثل ادية مكطعة
لو شالعين عيوني جزء من عندي ناقص من ابني ما موجود مكاعد ارتاح ولا كاعد استريح
اجا علي كالي علي : غفران الموبايل وين انطينياه هو والايباد
مجاوبته
اجا ودفرني برجله : من احاجيج لا تتجاهلين وين موبايلج
– شتريييد من عنده
– انطينياه
حجاها وراح لجنطتي كام يفردش بيها طلع فلوس تطلع ب٢٥٠ حطها بجيبه كتله : فلوسي انت شدا تسوي
حجه : اكلي خ*** هو انت ينحط بيدج فلوس انت مال واحد يسحك على راسج ويهينج مو مال يقدرج وينطيج
– منو منطيني هاي فلوس راتبي
– لا تحلمين براتب بعد مو تريدين طلاك هاي يجرالج .. بس لا جامعة ولا شغل ولا موبايل عايزين فضايح اختنا مطلكة تطلع وتطب اكسر رجلج والله انطيني التليفون
اخذ من عندي التليفون والايباد والفلوس
وتركني ابجي لوحدي وامي تواسيني كرهت روحي اكثر ديسوون كل هذا علمود يجبروني ارجع لايوب ويغصبوني ..
خابرت ايوب حتى اكوله يجيبلي ابني واترجاه
اخابر وميرد اكثر من ١٠ مرات اخابر ويتجاهل خلاني اتخبل من صدك ..
ما اعرف شلون مر يوم كامل واني مشايفة ابني
ليل ما شفت النوم بيه .. روحي كامت تفور من قهرها
صبح الصبح اني فاقدة .. كمت من مكاني مثل الجثة كلت اروح للشغل اذا ابقى هنا اجن من القهر ..
بدلت ولبست بس روحي حيل بايدة من قهرها
طلع علي كال : غفران وين
– خابرني ابو نور لازم اروح للشغل
– يا شغل يا ابو نور لا تخليني اكفر بيج ادخلي اكعدي لا اسحك راسج والله
– ابني واخذتو مني شرايد مني بعد اتركني بحالي بيش مأثرة عليك اذا داومت كافي لخاطر روح ابويه كافي الدا تسوووه بيه حرام والله حرام وبابا ما يرضى عليكم بكبره
حجيتها وطلع هو مدبل عليه جان رايد من عندي كلمة علمود ينهد عليه
لزمني من راسي ورشكني بالكاع ونزل عليه دفرات امي ونسرين فزن متخبلات يفازعن وهو لازم براسي ويصرخ واني اصرخ وكل صرخه منه يدفر من بينهن ما يدري تجي ببطني برجلي …
سحل بيه البيت سحل لحد ما امي فقدت كامت تصيح بكل علو صوتها ..
عافني وكاللها : خلي تفكر بتج تطلع باب الحوش وتشوف شلووون ما ادفنها
لمتني امي بحضنها وكامت تصيح : امداني وامدا بطني الشالتج والجابتج المن جبتجن ليا ضيييم ولجن ليا قهر كتلتني شبيدي عليجن ولجن كتلتني بقهرجن كتلتنيييي
كامت تدك على راسها
اني بالكاع واكعة بس انوح لا اشيل ايد ولا رجل من االكتلة الكتلنياها علي
كامت لبست عبايتها و هجت من البيت وطلعت وعافتني وحدي .. بقيت بمكاني فوك الساعة انوح وان من الم جسمي
اندكت الباب مال الهول طلعت نسرين ..
كالتله : تفضل خوية محد موجود هاي هي بالهول
فات ايوب .. اني امددة بالكاع دنك عليه حط علاوي على ايدي
اخذت ابني وكعدت شبكته على كلبي وكمت ابجي من كلبي
حجه : شفتي بابا ؟
شفتي يا حبيبي من بعدي شلون حالج ؟
شفتي من انطيج ظهري شلون تاكلج الجلاب بعدي ..
الخير الج باباتي .. لو اني وابني وسيارتج وجامعتج ودوامج وخيرج ودلالج .. لو ضلي ضلتج هاي عد اهلج … اختاري …
يتبع….
- يتبع الفصل التالي اضغط على (رواية صوت من المجهول) اسم الرواية