رواية صوت من المجهول الفصل التاسع و الثلاثون 39 - بقلم زينب ماجد
شلت عيني باوعت بعينه : دا تتشمت
– ليش كارهج اني حتى اتشمت بيج ؟ انت ليش حاسبتني خصمج مو رجلج لج بابا كافي ارحمي نفسج وارحمي الطفل هذا وارحميني تعلعلت بيج وبيه كافي
– منو دز عليك احمد لو علي .. انطوك الأخبار وشسووا
– ولا واحد منهم ولا موصليلي اخبار .. الدزت عليه امج مخابرتني ما محصلتني اني بالحمام دارتلي بصمة
طلع من جيبه التليفون
مددت ابني صدري صاير طابوكة لإن علوش صارله يوم ما راضع معبيته كلينكس حتى ما اتبلل .. كوة طلعته احس روحي شاغت .. وزندي ثكيل من دفرات علي .. دنكت لابني شغل البصمة :
صوت امي ( شلونك ايوب خالة هسه تمر تاخذ مرتك سايم الله ومحمد وعلي عليك فكنا منها خلصني اخذها انعل ابوكم لابو اليحط روحه بنصكم لا انت تنرد لا مرتك تنرد عمي ما اريدها بتي انا متنازلة منها ما اريدها يطبها مرض عساك مو تكسر الغرفة فوكها لا لو تصلبها وتكطعها فلا الي غرض بيها هسه تجي تاخذ مرتك ولا تجيبها النا بعد وانعل عشيرتكم يا ولد جلاب يا ولد الجلاب )
دمعت عيني حجه : متعاركين ؟
مجاوبته لزم ركبة رجلي انتجى عليها وكعد بصفي ورجع ظهره للحايط حجه : البارحة علي مرلي انطاني جهازج والايباد وحتى فلوسج كتله : شسوي بيهن كالي حجي احسن احنا ما عدنا بنات يلزمن تليفون وفلوس اني اني اصرف عليها ..
– ليش دا تحجيلي ؟
درت وجهي اباوعله : تستحي تكول انت دازهم ياخذوهن مني ؟
– ليش اني فد مرة ردتي اطلعين وسحبت التليفون من عندج ؟
– ما ساحب تليفوني !؟ هذا اسلوبك اصلا
– ابيتي وبس مرة من غلطتي ذيج غلطتج بعد يمتى اني ساحب التليفون منج ؟ وبعدين ادز علي يجيبلي الفلوس البجيبج ٢٥٠ ؟ شسوي بيهن خو ادري عندج عشر اضعاف هالمبلغ هم فد يوم ساحب فلوسج ؟
بقيت مدنكة على ابني حجه : تأخرت على دوامي عندي اجتماع ب١١ لازم اطلع .. استعجلي حتى اوصلكم وامشي
دنكت لأبني بست كصته وشميتها هو يرضع ويباوعلي ..
حجه : دمرنا البارحة بالقران يومية انت فوك انزله منج جوا يلعب ما يهتم شبيه البارحة متخبل لزك بية لزكة الا شايله وواكف بيه .. لا لعب ولا كعد ومستغرب البيت كله ما يرضى بغيري يمعود هاي بيبي هاي سرى نبأ ما يرضى ويبجي يبجي خرب بيومه طعم النوم ما شفته من وراه زرف راسي زرف بعلي .
هو يحجي وعلوش يباوع بعيوني ومستمر يرضع واني اباوعله
ابتسمتله رغم القهر البكلبي وخر حلكه وضحكلي : مماه
ومدلي ايده كمت ابوس بجفوف اديناته الصغار كام يضحك ويرفع برجله عود بوسي رجلي هم .. كمت ابوس برجله وهو لازم بيه يرضع
حجه ايوب : سبحان الله بيئة الطفل امه عود البارحة هيج يضحك لو يلاشينا خلصها علينا بجي ..
– بجالك من تحاربني بيه على حساب كلبه وبجيته ودموعه مو مهم ابنك يرتاح المهم تسوي اللي تريده وماخذ هالطفل سلعة تحاربني بيها .
سكت ما نطق ولا كلمة
تنهد وانتجى وكام : يلا استعجلي هم يلا الحك اوصلكم واطلع
– انت خيرتني وقررت عني بدون ما تسمع جوابي ؟
التفت باوعلي : القصد ؟ مرايدة ترجعين
– لو تعزلي بيت لو ما اريدك
فتح عيونه : ولج انت شنو من بنية ليش كل هالراس اليابس ؟ ليش كل هالعناد ؟ امج اللي الوحيدة واكفة وياج ومكوية راسج هالطردتج وخابرتني اخذج وبعدج الج عين تطالبين
– ولهاسبب قررت عني واعتبرتني اختاريتك بدون جواب .. تدري مجبورة عليك ومستغل ضعفي حتى ترضي غرورك بمذلتي .. بس هيهات
اخذ نفس كلش قوي وتنهد بحسرة : لا حول ولا قوة الا بالله العلي العظيم .. المطلوب غفران
– انت خيرتني بين اختارك انت وابني وجامعتي ودوامي وبين اهلي .. راح اختار ابني وراح اتواجد بالمكان اللي راح يكون ابني مرتاح بيه .. بس مراح اكون لغير ابني
– يعني ؟ تريدين تمشيهن براسي ما راجعتلي علمود جامعتج وشغلج ؟
– مهم عندي الجامعة والشغل بس من تحطهن بميزان ابني ما يتعادلن وياه … اني اللي اريده من كل هالهوسة ابني غيرها اكدر استرجعهن سواء منك او من غيرك .
– اذا على هيج تمام كومي
– مو تمام ولا راح ارجع وياك على تمام بس للمعلومة ..
تنهد وطلع وهو يكول : بلوة مو مرة بلوووة
كمت على حيلي جسمي ثكيل حيل
عباتي مشمورة هناك .. وربطتي صحت على نسرين ساعدتني لمتلي غراضي وطلعت .. هو بالسيارة صعدت وياه وصلنا للبيت ونزل انطيته علوش مدا اكدر اشيله جسمي مأذيني اخذت بس الجنطة ودخلت دا اصعد الدرج طلعت نادية من الغرفة بوجهي : من صدك ماكو كرامة تيتي تيتي مثل ما رحتي جيتي
– من البداية كتلج ابني فوك نفسي وفوك كرامتي .. بس انت عذرج شنو ؟
انتجت ع الحايط وتكول : احبه احببببه اموت عليه موتي
-الميته عليه اني ميتة منه .. ياريت تملين عينه ويبطل يركض وراي لإن لعبها لنفسي .
حجيتها ومشيت لغرفتي افتح بيها مقفولة هو صعد نزلتله تركض : يا سودة علية شايل الطفل وانت صايم اتعذبت عمت عيني عليك هسه لو تستاهل ..
رادت تاخذ علوش من عنده ما قبل علوش جلب بركبة ايوب
عبرها وفات ما جاوبها تقرب يمي حط علي للكاع ووكف يفتح الباب.. حجيت : يعلوش يماما بعد ما جان هذا الباب ما يرضون نقفله كاموا بنفسهم يقفلوه يعرفون اكو بالبيت امهات سحورة
اندارلي وهو يفتح الباب : دفرتي فوتي يبلوة
حجيت : النعمة الما تقدرها تنكلب نقمة مو بس بلوة
– انت نعمة ؟
– مو هذا كلامك لو كلشي انسى حتى زيارتك لابو الفضل ودعائك مو جنت اني الدعوة المستجابة راجع نفسك وشوف شكد كفرت بهالنعمة ؟
حجيتها واخذت ابني ودخلت
دخل وراي يباوع .. تنهد : محتاجة شي ؟
ما جاوبته كمت انزع بملابسي .. ذب حسرة وطلع من الغرفة
رحت للحمام غسلت ورجعت تمددت ويا ابني ونمت ما عندي صلاة وجسمي مكسر ومن نمت ثكل حيل وطلع عليه الوجع كله .. وابني الظاهر منايم ابد بغيابي لان ذب روحه مثل الداخل غيبوبة وياي وياي ما كعد
المغرب دخل ايوب .. اني وابني مطشرين ع الجرباية وفاكين حلوكنا .. فتح الضوا انزعج علوش وكام يدفن راسه بجسمي يبعد عيونه من الضوا جريت الغطا وانداريت عليه التفيت وياه وجريت الغطا فوكانا
حجه : راح يصير الفطور كومي
علوووش .. علششش
علش كام يحط ايده بجسمي طلعتله صدري واحنا جوا البطانية
كشف الغطا صاح علوش مطنكر ما يقبل يكعد ويجر بالبطانية
ضل يضحك ايوب رجع الغطا فوك راسه .. حجه : هلكدك بكد الشبر تشمر عليه ولك .. كوووم
طلع رجله من البطانية وهو يرضع ومغطي راسه عود بوس رجلي
كشف البطانية وجره : تعال لك كلاوچي
كام يضحك علوش
عدلت نفسي وانداريت وجريت الغطا فوك راسي اكمل نومتي ..
ايوب يلعب وينفخ ابطن علوش وذاك يضحك .. جر الغطا من عندي وحجه : ما تكعدين .. جريته وما جاوبت ..
شاله ونزل من عندي .. وخرت الغطا ..
باوعت غرفتي .. الميز تواليت المرايا مالته مكسورة .. الجامة مال الكنتور مفلشة الجرارات مكسورة الحدايد اللي تتثبت عليهن .. تنهدت ..
مر عليه شريط الذاكرة واني استرجع كلام ماما شلون دازتله بصمة وتكله اكتلها ولا تجيبها العبرة وكفت ببلعومي .. يعني حتى امي وصلت مرحلة اليأس مني .. وكرهتني من كد ما تعبتها … ما الومها الل بيه ما مجبورة تتحمله هي .. ولا غيري راح يتحمله .
جنت اكول اسايره واصير مثل ميريد واتفاهم وياه حتى امشي مركب حياتي بس طلعت لغة التفاهم ما تنفع ويا واحد مغرور ما يعرف غير لغة الذل والطاعة .. هينة يا ايوب هينة بعد ما تعرف شضامتلك من حيل .
سمعت صوت قناة كربلاء جوا : التوجيهات الدينية من العتبتين المقدستين
رفعت الغطا من عندي اريد اكوم جسمي كله مكسر .. اخذت المصحف مالتي ونزلت .. سرى تلاعب علوش حجت : ها اجيتي شلون صرتي
– جسمي مأذيني حيل
– اي مو هين الاسقاط سودة عليه
ايوب لازم الجكارة وما مشغلها منتظر الاذان والمنفضة كباله .. كعدت ع القنفة الكاعد عليه بس من الجهة الثانية ، ظل يباوع على ايدي .. لابسه بجامة وتيشيرت التيشيرت نص ردن وايدي علي ضاربني عليها الضربة صايرة سواد على زراك .. كمت ابوع لايدي وغلست واني اسأل سرى : وين وصلتوا بالختمة
– والله الجزء الثالث اليوم اقرا الرابع
– الجزء التاسع
– هو اليوم ٤ رمضان شلون ٩ بادية الختمة من قبل ؟
– لا دا اقرا يوميا تلث اجزاء اليوم مقارية لهالسبب دا اريد اكمل
-ياااا لعد الا اسبقج اليوم شنو اني متأخرة
ابتسمت الها طلعت خالتي : خير شو رجعتي ؟ جا مو خذتج امج وبتي وبتي وما اطيها شو الدرب الخذاج ردج
انداريتله : مالج علاقة
فتح عيونه ايوب : غفرااااان احترمي نفسج
باوعتله ودرت من عنده .. حجت : مو صوجج صوجه هو المكبر راسج المثلج ينسحك فوك راسها ويكسر هالخشم اللاويته من عابت هالشكول وبلا ..
وهي دا تحجي حجيت ويا سرى : جوعانة شمسوين اكل
حجت خالتي : تاكلين سم ان شاءالله
حجه ايوب : يمه كافي راح يأذن داعي الله كاااافي الدنيا مغررررب تشترون المشااااكل شرايا كاااافي
الكل سكت محد حجه
انداريتله حجيت : تليفوني وينه خلي اوصيلي اكل
– بالسيارة عوفي الفطور خير من الله طابخين
حجت نادية : هو شنو الخير من الله طابخين اني اشتغل عدها هي تشبع نوم واني اطبخ وهي ع الحاضر تاكل
حجه ايوب : بالقران ما ناوين تعدون هاليوم على خير اطك ابالي اهجم هالبيت فوك روسكم وانعل خيركم
دفر النفاضة بالحايط وكام طلع للكراج
كمت من مكاني طلعت وراه حجه : فوتي الامة كلها فوك طلعتي وراي حتى هنا ما اخلص منكم
– موبايلي وفلوسي يمك
– السويج فوك يالكائناااات خلي نفطر وانطيج
– لتصيح راسي يوجعني والله
– دفوتي فوتي
فتت للمطبخ وكعدت ع الطاولة نادية واكفة تخوط وهو مشى للثلاجة طلع بندول واخذ مي من البراد وحطه كبالي .. اخذت الحباية من ايده وشربتها بعدني دا ابلعها وحجه وهو عاكد حاجبه : شلون صرتي
شلت راسي بلعتها وكحيت نترت ايدي منه وضحكت : دخل ابلعها
هو عصبي ابتسم وهز راسه وكعد .. صاح صوت الاذان .. هم دينقلون الاكل ع السفرة حجه : كومي افطري يلا
– ما مشتهية هسه اكوم اسويلي اي شي من الثلاجة
– دكومي ام راس اليابس كووومي
جر ايدي ودفعني كدامه علوش طلع كبالنا يزحف راد يلزم بيه شبخته وطلع كبل كمل زحف لابوه .. كعدت اول وحدة ع السفرة اباوع وجه نادية وخالتي بودهن يلزمني يكطعني تكطع .. ايوب شال علوش وحطه بحضني وجر المخدة وكعد يمي .. وهم ينقلون راسي مأذيني حيل .. التموا كلهم حجت سرى : هاي شبيها ايدج سودة ؟
حجت خالتي وكأنما منتظرة الحجاية : تتباها كدام ضرتها شوفي عود ركبتي وايدي زركة ميت عليه ينادية سوالف برابيك وزعاطيط ما يستحن
باوعت لايوب مدنك يخوط وديحاول يخفي ابتسامته شال الخاشوكة وقرب راسه عليه : طلعت عضتي اللي بركبتج هم بيها فوائد ..
– تعددت انواع العض ما بين عضة شهوة والثانية عضة حقد بس الثابت بالموضوع ما يعض غير …. ما اكمل عيب
جان مبتسم تغيرت ملامحه انزعاج وهز راسه : عيب
تنهد وترك الاكل من ايده وكام .. حجت امه : وين يمه ما كملت فطورك توك كعدت
حجه : اكوم اصلي يمه انسدت نفسي
توضى ومشى للأستقبال يصلي ويقرا قرأن ..
كملوا الفطور وشالوا السفرة نادية كامت تشكي لخالتي على المواعين خالتي كامت تصيح علينا اني وسرى .. جان ابالي اتجاهلهم واصعد لان ما طايقتهم بس من شفت سرى مجادلت ومشت للمطبخ هبطت كلت خطية توكف لوحدها سرى احبها .. كمت وراها للمطبخ اني انظف بالمواعين حطيت الجاي ع النار ..
باوعت .. تنهدت
كمت حميت الاكل ورتبت صينية شوربة وتشريب دجاج وتمن برياني وزلاطة ولبن وحطيت عليه مكعبات ثلج وتمر .. كام ايوب يصيح ع الجاي بس عصبي وينتر .. اخذت الصينية ومشيت وحطيتها ع القنفة وجريت الطبلة كبالة رافع وجهه للتلفزيون ضايج ما باوع عليه .. حطيت الأكل كباله وهمستله : اسفة بس تعبانة ومقهورة اعذرني .
باوع بوجهي تنهد وهز راسه .. خليت الأكل حجيت : تاكل لو اجيبلك الجاي
– لا حطي الأكل جوعان
علوش لازم برجله وواكف ويريد يمد ايده ع الاكل اخذت علوش .. وكتله : من تكمل جيبلي تليفوني
هز راسه
حجت نادية : والله قهر كاعدة تعزب بطبخي
ما جاوبتها
باوعت ع التلفزيون طالع رامز في الشلال
ما احب هالبرامج ولا ذوقي هالسوالف والسخافات ما تروقلي .. كمت جبت المصحف وكعدت اقرأ .. قران حجه ايوب : ما عندج شغل اليوم مو عدكم زيارة
صدقت :- اي بس مو يومي .. اني يومين بالأسبوع عليه زيارة عكب باجر اطلع
– ها امتحاناتج شوكت
– الاسبوع الجاي فاينل
حجت سرى : حتى احنا وهذا الخميس عدنا حفلة تخرج .. والله حايرة اكو واحد يسوي حفلة برمضان حتى مكياج واحد ميكدر يحط
حجه ايوب : وانت مكياجج تخافين بيه من رمضان ما تخافين من الله
– هسه مو دنحاف برمضان
ضحك : وباقي الايام
– اي رب العالمين رؤوف رحيم
ضحكتلها حجت : انوب كاعد تقرا قران دصبري واحد يصلي حتى يسبقج رايحة لله تزحلك
– يا والله لعد انتظرج وراي اكمل ٣ اجزاء
– والله الا اكعد هسه
راحت جابت القران وكعدت كبالي تتسابق وياي ع الختمة
كام يضحك ايوب على سوالفنا
استمريت اقرأ ايوب كمل اكل وشال الصينية حطها بالمطبخ ورجع تمدد ع قنفة الاني كاعدة عليها .. وحط راسه على رجلي وجاب ايدي اللي لازمة بيها القران حطها على راسه وحجه : كملي تلاوي خلي اغفالي شوية ثبتتها واستمريت اقرا قرأن بصوت ناصي وهو يغفي لحد ما نام .. تنهد وباوعتله ..
رجعت اقرا ساعتين يلا كملت ال٣ اجزاء راحن عيوني وعلوش لعب جولة كمت وحطيت مخدة جوا راسه واخذت مفاتيح الجنان وسويت الاعمال اللي خاصة بهاي الليلة من غير الصلاة .. بس ادعية واستغفار ومناجاة مع مصارعة خفيفة وركيضان ع الخفيف ويا علوش .
لشوية ايوب جابلي التليفون .. اخذته وصعدت لغرفتي
طلعت ملابس ابني المو نظيفة وكعدت اريد اكوم ما بيه حيل افتر واشتغل جسمي مكسر بس ملابس ابني هواية وملابس اليه هم لازم اغسلهن .. طشرت العابه ومشيت .. للحمام باوعت .. ملابس ستن ع الغسالة ردت اشيلهن لزجات وملابس نوم .. كشت روحي كمت وشمرتهن بالزبالة وتفلت .. الصبح غسلت مجانت موجودات هيج ملابس يعني شنو متقربلها وهو صايم !؟ حتى من فطر ما صعد ضل مكابلني شوكت .. لعبت روحي كمت اتفل ..
كمت اصيح على نادية كتلها : هالملابس الج ؟
– يا ليش شامرتهن بالزباااالة عزا
– وليش تغسلين بغسالتي اكو غسالة جوا واغسلي
– يا فدوة مسجلة بأسمج
– شنو هاللزوجة شنو هاللعبان نفس انت شنو من بشر متستحين
-على كيفج عيني هي مربى وكعت على ملابسي شصار
– ملابس نوم هاي يا مرررررربى
– مربى مال متزوجين عيني يالفهيمة
سكتت : همه المتزوجين الهم مربى ؟
اني اعرف بس الريوك اله مربى .. هاي شدا تحجي
كمت اصيح على ايوب صعد : كتله هاللعبان نفس راح يستمر بحمامي ملابس طفل اريد اغسلهم الغسالة كلها ملوثة شوفلك حل .. ترا وصلت لهناااا
شمرت الملابس وطلعت
كام يحجي عليها تغسل الغسالة ومتترك ملابسها
واجا كال : غسلتها كومي
-غسلتها شنوووو هالوضعية هااااي متخلص الغسالة الية اني وعلوش ملابسك انت وهي متغسلوووهن وياي وبعدين تعاااال ملابس متروسة مربى تكولي مربى مال متزوجين اني اخلص من قذارتكم تطلعلي مربى مال متزوووووجين
– صوتج يمعووودة فضحتينا نبهتها بعد متترك ملابسها كافي خبصتي الدنيا
– واني راح اكعد اتحمل هالمنظر كل يوم ؟ انوب عليه مربة المتزوجين اني موبايلي ما محدثته انتو هالسوالف الخايسة منين تستحدثوها
ضحك : هي بعد سوالفها
كام يضحك واني مستقرفه منه وبودي ازوع عليه حجه : بدل متباوعين هيج اتعلمي
عقدت حاجبي ووجهي كاش : شتعلم ع المربى ؟
اذا جايبلك وحدة كل عمرها حاطة راسها بالكروبات الاباحية وتتراس دماغها بهالسوالف الخايسة اني راسي حاطته بكتبي وما براسي غير شكال محمد بن يعقوب الكليني وشحجه محمد باقر المجلسي وشسولف بن اسماعيل البخاري ومكابلة اجناتس جولدتسهير ووليم جونز ما بعمري سامعة ولا داخلة كروبات مرتك والمربى مالتها .. اذا تستمر هاللعبان نفس بحمامي كل ملابس الكم اشككها واشمرها وااااااالله
اتعلمي ماخذني من البتاوين ابن صبيحة
هو خربان ضحك بس بسكوت مو بصوت وحجه مخنوك بضحكته : مطورة كايمة تعرفين البتاوين ؟
– اكلك كوم اطلع مني ترا لعبت نفسي والله
كام طلع برا بس احس روحي كامت تلعب يعني شكد ما اكول اتحمل .. تزيد عليه بأمور تخليني افور من اللعبان نفس ..
حطيت ايدي على وجهي يربي وين اولي وين اروح
لا هذا مكاني ولا هاي بيئتي شلون بنفسي وين اهج ما اتحمل ..
لزمت التليفون وشرط صوت امي يعيد بذاكرتي دمعت عيوني لزمت تليفوني وسجلت بصمة وتزيتلها بخنكة كتلها : هاهية ما دام طردتيني لبيته وما ردتيني راح اتحمل وراح اصبر بس كلشي يصير ويايه ذمة بركبتكم ويوم اللي راح اشوف ابويه بالجنة راح اشكيله شكد انت ما جنت كد المسؤلية وحميتيني اذا متكدرين تتحملني وتحميني ليش جبتيني ليش ذليتني .. بس هاهية انسي غفران واني هم انساج مدام بعد مترديني ومشكورة على تعبج وياي يا امي بس راح اعيش مذولة بجالج .
شافت الرسالة وسمعتها وما ردت
سديته وكعدت ابجي
وقررت بعد ما اروح لاهلي ولا اوصلهم ابد ..
ما طول حتى امي مخابرته ياخذني رغم ذلتي وضعف موقفي بعد يا اهلي لا اوصلكم ولا اريدكم خليني اتجرع لعبان النفس والقهر ويا ايوب ولا ذلة اهلي .
تمددت ويا ابني واني اكلب بالتليفون .. طلع كبالي منشور ممول غرف نوم .. دخلت البيج اكلب الغرف مالته تركية وحدة تكول للخ اني احلى
شفت غرفة حيل حلوة عجبتني راسلت البيج كتبتله : شكد سعرها
دقيقة ورد : بمليون ونص شامل الشد والتنصيب
– بالحقيقة نفس التصوير ؟
– تصوير حقيقي مو فوتشوب واذا وصلتج غيرها تكدرين ترفضين الطلب حتى لو منصوبة
-خشبها شلونه
كام يمدحلي بيها
كمت ادور بالغرف افتر بس بقت ابالي الغرفة العاملت عليها رجعت كتله : تمام ثبتلي انطيته رقم ايوب والعنوان
كتله شكد وتوصل كال يوم الى يومين
-بلغني بيوم الي تطلع اذا باجر الصبح او عكب باجر الصبح حتى اتحضر والم الغراض
-تمام
غفيت شوية ويا ابني وكعدت وقت السحور تفحصت بعدني مو طاهرة ما اكدر اصوم .. تركت ونزلت سرى دا تريد تسوي ريوك وكفت اساعدها ايوب كاعد بالاستقبال يقرأ دعاء السحر
كملنا حطيت الريوك هستوه بدا يتسحر وكلنا كاعدين حجه : راح تصومين
-لا بس عاجبني اكل عندك اعتراض ؟
ابتسم ودنك حجيت : شبيك تضحك
ما جاوبني حجيت : اي زين مدام تضحك ومرتاح حضر مليون ونص
عقد حاجبه : ماليش ؟
-وصيت على غرفة وثبتت الحجز وحطيت رقمك وعنوانك
ذب الاكل : يا رقم يا غرفة يا حجز منين اجيب
حجت خالتي : انت ما تستحين توصين غرفة نو بدون ما تكليله .. منين يجيبلج ذاك اليوم جابلج ايباد بمليونين و٧٠٠ وهسه تريدين غرفة رواتبج وين
تجاهلتها ورديت عليه حجيت : من كسرت غرفتي مفكرت راح تخسرها !؟ مو مشكلتي اتثبت الحجز بعد
– انطني اسم البيج الحجزتي منه اني احجي وياهم
– ما انطي
– بكيفج ما تنطينه البجيبي مليونين وجايتني بضاعة بالمحل راح اتداين عليهن انت انطي مليون ونص شيبقالي للمصرف خمسمية وهذا رمضان يحتاج صرررف منين اجيب
مجاوبته وهو شايل ايده من الاكل ويباوعلي : تليفونج وين
– تلغي احجز على غيره
– لتتعاندين وياي غفران ما عندي
– وليش تكسر غرفتي اذا ما عندك فوك ما نزلت ابني من وراك كسرت غرفتي وهسه تكولي ما عندي ..
– اي اخذهن منج
– والله لو ما مكسرها جان بعيني انطيكياهن واني الممنونة بس مال تضوج مني واجي ادفع خسايرك لا يا حلو .. هذا زرعك احصده .
كام من الاكل طالعة روحه كام يصيح ويعيط
وكام صعد لتليفوني جابه يريد يفتحه .. ما انفتح وياه كام يصيحلي : افتحي الجهاز ..
– تكسر غرفتي وتاخذ غسالتي وتاخذ الغرفة اللي قررت اسويها مطبخ الي وترفض تنطني اي حق من حقوقي لو جانت حقوقك ما تكعد تعض بيه وتكولي الدين كال والله حجه، بس يم حقوقي لااااا تسوي للدين كتم والشرع تنطي سايلنت ..
فتحتله تليفوني وسحبت ايده وصفكت التليفون بيده وكتله : الغي
بس ما اكول غير حسبي الله ونعم الوكيل .
عفته وصعدت .. طلعت روحي من القهر
دفنت راسي واني احاول انام واشرد من واقعي
الحمدلله اللي خلق النوم لو ما الواحد ينام وينفصل من هالواقع المر وياخذ استراحة شلون راح يكون العالم !؟
للصبح دك المنبه مال ايوب .. طفاه اني حسيت دافني راسي بظهر ايوب ومكعورة روحي وراه وحاصرته كعد من مكانه كال : ترا بالقران ماكو هيج مو نومة كفران ادري حاصرتني حصرة الجلب اريد عمي بس اريد امدد ظهري ما اريد اكثر
شلت راسي : شبيك ؟
– ادني شوية
باوعت وراي المكان كله عايفته وحاصرة روحي بظهره
جريت روحي بثكل واني اكوله : انت شجايبك يمنا وبعدين ابني مو جان يمي ليش شايله
طفى المنبه ورجع تمدد جريت نفسي وكمت كتله : عندك دوام
حجه : ب١٢ اروح وافطر بالوحدة ما انزل
– اي زين لعد اجلها ١ روح بقي علوش يمك
– شيمي تعاي اريد انام
-الطفل نايم مراح يكعد اذا هدوء
– ب١٢ اروح
-ما راح اخذه لماما بعد اتحمله ويايا بس هالفترة اخلص الفاينل واكعد
– شنو صاير متحاجية انت وامج
ردت اكوم .. تنهدت حجيت : الله ما بقالي غيرك بهالدنيا .. مثل ما دا اتحملك اتحملني
سكت كمت غسلت وبدلت وكتله ع السيارة كالي : اخذي الجمسي السبورتج يحتاجلها سمكرة لا تطلعين بيها
اخذت سويجه وكتله : بطاقة الراتب مالتي وين ؟
– بمحفظتي
اخذت البطاقة ومشيت للدوام حضرت اول محاضرة اثناء المحاضرة دست تسجيل للمحاضرة وكعدت اكلب بتليفوني .. لكيته داخل البيج دازلي رسالة : تمام تم الالغاء
دست ع المحادثة طلع ايوب متواصل وياهم وحاجي على الغاء الطلبية
حيل انقهرت الضعف الأني بيه ديهدني ومدا اتقبل ولا تعايش واتأقل بعدني وكأنما اكو باب مفتوح وراح اخلص ووقتي مؤقت مدا اقتنع انو هاي عيشتي وايوب قدري ولازم اتحمل واصبر على كل سوالفه وقذارة مرته
طلعت من الجامعة .. خابرني ما رديت عليه كارهته وكارهة روحي وكارهة وضعي حيل والدمعة بطرف عيني ..
صفيت السيارة ونزلت على منفذ سحبت راتبي .. ودا ارجع للسيارة
شفت مرة لابسه جبة بس تعبانة وحجابها مفولل والرجال مدهن وملابسة مو نظيفة وشكله مو حلو بس ديضحكون من كل كلبهم لما راد يعبر الشارع حطها وراه ولزم ايدها وعبرها وعبروا وهم يضحكون .. تنهدت
ما شاء الله الله يسعدهم
ركبت بسيارتي شمرت المليون من ايدي بقهر تشمرت الفلوس ما بيهن تچة تطشرن حمر ع الكرسي ع الكاعية يم الكير حطيت السويح بالسيارة وتنهدت ما شغلت .. باوعت الفلوس باوعت السيارة
منظر الرجال والمرة بقى ابالي ..
لا المال ولا الجمال تشتري السعادة
هاي سيارتي هاي فلوس مطشرة
راحتي وين ؟ صحتي كاعد تنزل ونفسي باهته وروحي مشوهة
وين اليريح بالي ؟ وين حنية اهلي ؟ وين حب رجلي ؟
ذني بيا مال اشتريهن ؟
هواي بنات حوالية بنات خال وخالة وخوات
اللي حالتها فقيرة تصيح هنيالها عدها فلوس
والمحبوسة تصيح هنيالها تطلع وتطب
واللي رجلها مبهذل تصيح هنيالها رجلها مهندم ومهيوب
والعدها رجال شخصيته على كدة تصيح هنيالها رجلها حجي والناس تحسبله حساب .. ومن اشكي يكولون بطرانة شناقصها وتشكي
منو عايش شعوري منو الديعرف شدا احس .. احد منهم ينطيني راحة بالي .. يطيب شعوري .. اتمنى هالفلوس تنطق وتحضني واتواسيني لو سيارتي تلمني وتطبطبلي .. انطوني رجال فقير وحالته على كده الم الفلس وياه ع الفلس ونعيش على حب الله يحترمني ويقدر شعوري .. ما يتكبر عليه ما الكاه هو ومرة غيري على فراشي .. اتمنى اشتري بهالفلوس اليمسح ذاكرتي وميخلي هالمشاهد تدور بعقلي .
اتمنى اشتري بهالفلوس محنة لاخوتي .. واخليهم يحنون عليه وما يخلون جسمي مزورك كدام رجلي يكسر عيني بنظراته … منو اليعرف شعوري منو الحاس بيه ؟
اخذت التليفون باوعت .. امي لحد هسه ما دازتلي حرف ولا ذكرتني ولا سألت اذا جنت بخير بعد وكعتي بين اجلابها .. كل شي هين الا امي من تحطني وراها معناها انتهي .. روحي ما تحيى غير بيها بدونها اموت واني عايشة
اني حاطة صورة الغلافة صورة ابويه بملابس عسكرية بجرف النصر قبل استشهاده حيل استعز بهالصورة لان ملامحه تضحك وكلها حنية من اباوعها اسمع كلمة هلا بصوته بدون ما تنطق الصورة .
كلهم عافوني بعدك بابا .. حتى ماما عافتني
اني وحيدة بابا اني كلش وحيدة
ما بقالي احد بعدك
محد
شغلت السيارة وطلعت قرص باسم حطيته وشغلت قصيدة اسمعها من اشتاق لأبويه ( لا ترد مات الورد )
وصلت لمقطع يكول
يالعفتني املي دربك بس خواطر
ياما ياما كتلك ارجع لا تسافر
كامت عيوني تفيض واني اسوق لحد ما وصلت
عيوني مورمة من البجي ايوب واكف حجه : مو تعرفين عندي دوام وهالبلوة ما كاعد يرضى بغيري ترا ابتليييييت
اخذته من عنده بدون صوت
باوع بوجهي حجه : صاير شي
تركته وصعدت .. بدلت لابني وغيرتله وبدلت اني
ردت اوكله شبعان .. راد بس رضاعة حطيته بحضني وسحبت تليفوني امي بعدها ما دزتلي ويلا رسالة .. شمرت التليفون ذبيته بعيد
كامت عيوني تصب فوك ابني .. وغفى على دموعي ..
مالي غيرك بهالدنيا اتحمل لخاطرك واعيش لخاطرك
نمت وياه راسي ذابحني من الوجع والقهر
كعدت الاذان مأذن وهم فاطرين محد مكعدني ايوب مموجود ..
كمت بدلت ابني وبدلت لنفسي ونزلت خالتي كالت : وين
عفتها وطلعت .. لكيت بلال كاعد بسيارتي السبورتج
صعدت اني وابني ورا وكلت : السلام عليكم
– يا هلا وعليكم السلام .. شلونج
– معليك .. حرك السيارة
شغل ومشى حجه : بعدج حاقدة عليه لإن ضميت عليج سالفة زواج ايوب
– هو اخوك قابل اني اختك حتى اهمك
– والله لو اعرف ايوب ما يحبج اني اول واحد احرضج عليه بس….. قاطعته
– ارجوك تعبانة وراسي دايخ اعرف كلكم تعرفون مصلحتي اكثر مني يا ريت تسوق بدون صوت
– اسف
ساق وصلني للمقر صعدت بالسيارة وطلعنا لبيت عائلة شهيد
حجه رحمن : اكو شي ست مو على بعضج
– مريضة
– جان اخذتي اجازة ونعذرج
– لا هيج تمام .. رحمن ناقصنا مصور فوتغراف اعرف مصور بالحشد اذا تحب يخدمنا بعملنا
– دزيلي رقمه اتواصل وياه
سحبت تليفوني ودزيت رقم باقر المصور
وكتله : دزيت من يجي النت يوصلك
زرنا العائلة والكادر وياي ساعدني بأبني وفرحانين بيه ويلاعبوه وكملنا رجعت بلال منتظرني .. ركبت وياه ورجعت ايوب بالبيت كاعد بالهول منتظرني كلت : السلام عليكم
وصعدت صاح : غفران تعاي
احاجيج .. طلعت لغرفتي بدلت لأبني دخل : شبيج
مجاوبته ؟
– هذا كله علمود غرفة والقران ما عندي ومداين ومحمد علمود بضاعة رمضان بس هالاسبوع اشتريلج غيرها .. واذا تريدين اصلحها ..
مجاوبته حجه : ليش هلكد محملة اليوم ؟
جريت دوشك وفرشته بالكاع حجه : هاي كله على غرفة ليش دا تعزلين فراشج
رفعت راسي وحجيت : من تحجي بالدين بعد لا تبيعه على اهله روح بيع سوالف الدين يم وحدة ما تعرفله لا تجي تدور حقوق يمي وانت سالب حقي .. وغرفتك اللي مان عليه بيها وتريد تشتريلها ما اريدها اني كلش راح اعتز بغرفتي المكسورة تشبهني .. وانتظر بيها اليوم اللي تطلعني منا وتخلصني من الوجوه اللي ما احب اشوفها بغير هيج لا تفكر الوضع بيني وبينك يمشي تمام
– براحتج ما اجبرج اللي تريدي سوي
– بس اكولك شغلة اتذكرها كل جبير الله اكبر منه ولا تستقوي على الما عنده غير الله يتقوى بيه عليك وما اكول بيك غير حسبي الله ونعم الوكيل اليقويني عليك واكدر اخلص روحي منك .
تركني ومشى
بقيت اني وابني وحدنا بالغرفة اتكلى مثل الطير المذبوح بفراشي
ليلتها ما اجا وخلص الليل يم مرته الثانية .. ما نزلت السحور ولا حبيت يمرني بالسحور ويدك بابي واشوف وجهه قفلت باب غرفتي .. دك الباب صاح وكت السحر ما رديت ولا جاوبته
قبل الصلاة بربع ساعة رحت للحمام لكيت ملابسهم موجودة
تنهدت وسبحت ونويت الصوم وصمت بلا سحور واصلا مماكلة غير الكعك والجاي ابيت الشهيد .
صبحت الصبح بدلت كملت ..
دكيت تليفون عليه رد : ها وين انت
– بالغرفة تعال نام يم ابنك اريد اطلع لجامعتي
– عندي شغل ب١١
– مع السلامة
تركت علوش ونزلت حتى ما اشوفه وطلعت للدوام
حضرت محاضرة وحدة وما قاومت التعب هد حيلي واصلا الطلاب نصها غايبة لإن رمضان والاسبوع الجاي فاينل .. اخذت سيارتي ورجعت للبيت لكيت ايوب مبدل وديريد يطلع وحاير شلون يترك علوش .. دخلت الغرفة كال : هم زين ربج اجيتي
ما باوعته ولا بودي اباوعه
بدلت وكعدت صليت الظهر وكعدت اقرا دراستي لحد ما قبل الفطور بساعة ونص .. قلية لحم وشوربة خضروات وطلبت لبن .. من اتصل المندوب خابرت على سرى كتلها : صعديلي نبأ
صعدت انطيتها الفلوس كتلها : استلملي الطلب وصعديلياه
استلمته وصعدته .. دازين خضرة وبيبسي ولبن وخبز سجادتي ممدودة كعدت اوكل ابني شوربة على ما يأذن .. دخل ايوب باوع حاطة فطوري وما باوعتله .. هز راسه ومدري شخذ من الكنتور وطلع
لليل خابرتني ماما ..
تنهدت وكتبتلها : لا تعتبرين رفضي الج عقوق ما دا اصدج بس اعرف تعبتج بهمي عادي عوفيني وارتاحي مني الخلقني ما ينساني وابريني الذمة اذا حسيتي جاي اقصر بحقج وادعيلي الله يصبرني اذا بعدني اهمج .
باوعت وما جاوبت ..
كمت ابجي .. دخل ايوب مسحت دموعي علوش ركضله حجه : ليش حابسة نفسج وحابسة الطفل وياج ؟
مجاوبته
.. براحتج
اخذ علوش ونزل جوا .. سمعت صوته هو وبلال يلاعبون علوش ويهوسوله .. تركت دراستي وكمت فرشت الدوشك ولفيت راسي ونمت .. ما نمت بس امثل .
اجا بالليل شافني بالكاع
تمدد هو وعلوش ع الجرباية وكام ينوم بيه بس علوش سحب روحه ونزل من الجرباية وزحفلي ووخر البطانية من وجهي وكام يمد ايده بجسمي .. تعدلت ونومته يمي وايوب شغل التلفزيون وبقى ع السرير وخلص ليلته بالغرفة .
ثاني يوم كعد لدوامه لكاني كاعدة على مكتبي اقرا
محجه بدل وطلع .. رجع الظهر واني اقرأ كال : اهلج ملتمين وخابرتني امج تكلي جيبها اذا تريدين علمود اخذج
– شكرا
– متريدين تروحين
– عندي دراسة الاحد اول امتحان بالفاينل
– بكيفج
خابرها كاللها : خالة ما تجي عدها امتحان الأحد
لف راسه ونام ع الجرباية .. واني بعدني اقرا وعلوش يلعب بالغرفة ومشغلتله قناة طه صافن بيها … صارت ب٥ اخذت ابني ونزلت جوا وطلعت مواد دا احاول الهي نفسي واسويلي اكله .. ايوب نزل بالهول علوش يمه يلاعبه شاله وطلعه برا كعده بالشارع .. شوية ودخل للمطبخ اني دا اثرم حجه : اجت امج
رفعت راسي بسرعة : وينها
– اتلكيها بالاستقبال
باوعت من الشباج هي وعلي جاية
ما رضت امي تطب للبيت كالتله : مستعجلة منتظريني ع الفطور
طلعتلها شفتها دمعت عيوني كتلها : ها يمه
– بدلي وكومي وياي
– مشكورة بس …. خزرتني شلعتني من الكاع
بلعت ريكي وانداريت لغرفتي بدلت ونزلت جايبة ملابس لابني لكيتها ماخذة ابني وكاعدة بالسيارة .. صعدت بسيارة علي كاللها ايوب : هي تعبانة حيل هالفترة احتمال من ضغط الامتحانات اخذوها واني امرلها بالليل ان شاءالله
– ان شاءلله
اذختني بالسيارة
لا حجيت وياها ولا ويا علي
وصلت بيت اهلي خواتي واخواني وجهالهم كلهم .. تلكوني واخذوا علوش يبوسون بيه سلمت من غير راحة بال ولا لهفة حطيت مخدة وكعدت بالهول ما دخلت غرفة امي ولا تقربتلها .. اجتني هدولة : شبيج انت وامي متزاعلات
– لا
– لعد شبيجن هي ما تحجي وانت ما تحجين
– لان ماكو شي ينحجي مخابرة ايوب يوم اللي كتلوني ولدها وكايلتله اخذها اكتلها اصلخها مالي غرض بيها لا ترجعها عليه
– يا وتصدكين امي تحجي هيج
– بصمة بصوتها مو احد كالي
– والله لو اسمع اجذب اذني وما اصدك امي تكول هيج متعرفين امي
– هدولة بس كالتها
– وجابتج
– وشفايدت اللزكة بعد ما جرحي انطعن ؟
هي تحجي واسي ونورة كعدن يستمعن : ميخالف حبيبتي متعرفين امي خصوصا وياج متعرفين امي كلها تهون عدها الا انت .
نزلن دموعي على خدي : هنت هدولة هنت
مرت هي شافت دموعي صاحت : شنو كعدتجن هنا ونسوان اخوتجن يشتغلن اتحركن اشتغلن خطار انت لو بيت ابوجن كاعدات يبسبسن كووومن
كمنا رحنا للمطبخ بس مختنكة طلعت للمرجوحة
اجتني اسيل : غفورة لتبقين وحدج كومي ويانا
– ما اكدر اسيل مختنكة
– شبيج
– ما بيه .. بس طفيت وروحي طفت ومالي روح اكابل بيها الناس
– ترا والله امي تحبج ويمكن حجت هيج بداعي العصبية
هزيت راسي .. دخل احمد كال : لا تكعدن هنا الناس بيوتها مسلطة دخلن .. كمنا دخلت للهول كعدت بالزاوية وعازلة نفسي منهم وتليفوني بيدي .. اذن الاذان كلهم كامو يفطرون بالمطبخ اني ما كمت .. مديت سجادة ووكفت اصلي ..
مدوا السفرة بالهول والكل التم وهدولة اخذتني يمها ونورة كعدت ابني بحضنها توكله .. ما اشتهيت اكل غير اللبن والتمر حجت هديل : ما كلتي حبيبتي
– مالي نفس اريد اخلص فطور اخابر ايوب يجي عندي قواية لازم ارجع
حجت امي : رايدتكم بعد الفطور كلكم بالاستقبال
حجه : احمد خير يمه ؟
– خير .. كول خير ويجيك الخير
كملنا فطور ومواعين اخذنا الجاي وكعدنا القهرة اللي بعيوني بعيونها
والدمعة اللي بعيني .. نفسها مبللة رموشها .. مبينه مقهورة حيل كعدت شوية عنها واحمد وعلي وخواتي كعدوا .. حجت :
– ملتمين انتم وخواتكم ونسوانكم بلمتكم هاي جاية ورايدة اكلكم سالفة
كلنا هدوء وكاعدين نستمعلها : قررت ابيع بيت ابوكم
اخواني ضلوا واحد يباوع بوجه اللاخ
كملت : ابيعه وانطيكم حصصكم تشترون بيوت تفتحون مشاريع بعد انتم احرار اني جزت روحي منكم وحتى من بيت ابوكم بس بيعته بشرط
علي باوع لاحمد احمد باوعله وكاللها : شنهو الشرط ؟
– ترجعولي غفران لحضني وتطوني طلاكها وابنها بيدي وتشيلون اديكم من مسؤليتها محد يدخل بيها ولحد منكم يحكمها .. متنازلة عنكم كلكم ومتنازلة حتى عن بيتي بس انطوني زغيرتي .
اخواني وخواتي كاموا واحد يباوع بوجه اللاخ
اني دنكت حطيت ايدي على وجهي وكمت ابجي بقوة
حجه احمد : زين واذا ما رضى رجلها يطلك
– من راح توكفون بوجه راح يطلك متقوي عليها بيكم .. اذا ما تخافون الله اني اشتري بتي منكم جرتوا عليها هواي كل مرة تكتلونها وتاخذون بزرها وتلوعوها وتذلوها وترجعوها لهالظالم مكسورة ومذلولة ..
تمشون ويا اختكم وترفعولها دعوة طلاك ودعوة حضانة لابنها ولو ما رد بالقانون تحطون زلم وتتفقون الطفل يبقى عدها ما طولها ما متزوجة .. وتطوني طلاكها بيدي
وتشيلون اديكم عنها غفران تداوم غفران تشتغل وين تروح غفران محد اله حكم عليها غيري ..
اكو واحد وياها بالشغل رايد يبيع شقة وبنفسها تشتريها بس كل بمن عرف تشتريها بدون علم رجال تروحون ويا اختكم وتاخذون رقمه وتشوفون الشقة وتتفقون وتاخذون الفلوس مني وتحطون الشقة باسمها مو انتم ابسمايا اني رايده اعيش اني وبتي جريبة منكم ومن بزركم بس ما اريد احد منكم يعيش وياي .. اريد اطلع من الدنيا بيها وابنها
امي تحجي ودموعي تجري
كامت تكمل : رحت لموسى ابن جعفر وواحد واحد دعيت عليكم هناك ورايدتها بعزيز كلبكم مثل ما لجمتوا كلبي بيها الله يلچم كلوبكم باعزازكم خاصة ايوب هالظالم التقوى عليها جيف شافكم جلاب ما نصفتوها
حجه علي : يمه احنا غير المصلحتها ما نريدها تخرب بيتها
– اسكت يمه اسكت ابني واعرفك واعرف البكلبك ماهو العلى السانك اطني بتي وشيل ايدك منها
باوعلي احمد واني ابجي كال : يعني انت مقررة نهائي تريدين تطلكين
باوعتله ردت اتفل بوجهه بس العيب لزمني
هسه تذكر وعرف اني رايدة اتطلك عمر ظلمني وغصبني وجبرني هسه جاي يسألني وياخذ رأي من صارت مصلحته وسمع بيها بيعة بيت وفلوس !
اندارلي علي كال : منو هذا اللي يريد يبيع شقته ببسمايا بيا بناية بيا طابق
– رحمن وياي بالدوام شقة مؤثثة والفلوس موجودة يم ماما
– انطيني رقمه
انطيت رقمه خابره انطاه رقم اخو اللي يريد يبيع الشقة
خابر كاله باجر الصبح موجود تجي وتشوفها وتدلل
حجه : هاهية خابرته باجر اني امرله ونتفق
حجه احمد : سويلي وكالة عامة حتى اوكلج محامي يرفع دعوى الطلاك بدون ما تروحين واتدخلين محكمة لا عشاير ولا هوسة نكله حجي بعد ما ترهم المرة ما تريد مثل ما دخلنا بالمعروف نطلع بالمعروف و الطفل احنا نتكفله يمتى ما امه قررت تتزوج عود ذاك الوقت نرجعلك الطفل
حجت امي : الوكالة ما تسويها لغيري وانت تروح وياي
احمد : سهلة .. بس يمه يعني اعرض البيت من هسه عند الدلالين لا نستعجل على بيعته نبيعه على راحتنا بالسعر اللي نريده
– هاي التفاصيل اتكفلها اليهمني حق خواتكم يوصلهن كامل بعد البيع
– سهلة سهلة .. وحصتج
باوعتله : بعدني ما متت خاطر تورثني !؟
– لا يمه اسم الله عليج قصدي شراح تسوين بيها
– احطها على حصة غفران وافتحلي بيها مشروع نشتريلنا بيت اخر بكيفنا سهمك الراحة بيع واخذ حصتك والله يوفقك يمه
– مشكورة حجية ان شاءالله سهلة وسالفة غفران لا تشيلين همها
كاموا وهي التفتتلي ما بطلت دموعي ابد بوري ومفتوح
كالتلي : ها يم دمعت العزيزة ما نشفن دمعاتج يمن كون دموعج غسلني ولا شفتهن ينزلن كبالي
حجتها ذبيت روحي بحضنها ابجي مثل الطفل وهي تلمني بحضنها وتحضني حيل وتشمني بالضبط مثلي من احضن ابني واشمه واجمع قوتي منه .. حجت : جرحج بكلبي يبتي بكلبي مو بكلبح ومن هجيت ردتلج حل ما هديت اديتج ييمه ولا عفتج وراي بس خابرت رجلج ياخذج اخير ما تظلين مدكة لهالجلاب .. كلت احطها عد ظالم يسجنها ولا جلب يعضها ويكتلها .. ولج والله دموعج ادك بكلبي يا يمة
هي تحجي ودموعي تجري بحضنها
شالت راسي ومسحت عيوني بيدها وكالتلي : لا تبجين بعد وربج ما طول هالنفس بيه ما اخليج يا يمه ولا ارضى بدمعة منج
حجت هدولة ودموعها بعينها : اكوم احضرلجن الفطور اثنينجن ما اكلتن تفطرن سوا
حجت : اطني ابنها هالدور ابنها اعز منها شلون بيه
اخذت علاوي بحضنها تشم بي وتبوسه وتكله : جبتلك تراكسود يخبل يبيب وجبتلك العاب
ودزت بت هدولة تجيبهن من بوفيتها لبسته بيدها وكالتلي شلونه
ضحكت : يخبل
اطته العابه .. كام يلعب وهي بقت حاضنتني
حجت اسيل : زين يمه حالنا شلون لو نباع البيت !؟
-كل وحدة تاخذ حصتها وتشوف اليناسب نشترن بيت تفتحلجن مشروع بكيفجن
نوره : وبين ابونا ينباع
– هو راعيه راح البيت شضلي بيه غير دموع وين ما اصد من ذكرياته خلني ارتاح من طاري ابوجن واطلع باخيتجن
دنحجي خابر ايوب حجت امي : لا تحجين بسالفة الطلاك ولا تجيبيله طاري بيت نكضي كلشي يلا تحجين ترا ايوب ذيب ويلوفها على اخوتج .. خليهم يتغدون بيه كبل لا يدرى ويتعشى بيهم
– لا ما اكوله .. اصلا ذممني ما اروح اشتري بيت من ورا علمة
– سويلي وكالة واني اسويلجياهن كلهن واطلع بدالج واحط باسمج
كمت رديت عليه :
كال : نص ساعة واني يمكم حضري نفسج
كتله : ماشي
رحت حضرت نفسي وامي وصت اخوتي ما يوصلون اي خبر لأيوب
اجا اخذنا اني راسي مصدع على كثر ما بجيت صعدت للغرفة كبل .. وهو راح لنادية مسويله جدول يوم بغرفتي يوم يروح لنادية ..
ثاني يوم الصبح اخذت ابني لامي وهي كالتلي راح اخذ الطفل واروح لبسمايا اشوف البيت اني وعلي كتلها : ماشي
رحت لجامعتي وهي اخذت ابني وراحت
ابني يقنع بيها ما يستغربها ابد .. اكثر تلاثا يقنع عدهم اني وابوه وامي
لان تعود من هو بالكماط هاكده اخلي عدها واروح للجامعة تعتني بيه وتلاشي .
حضرت المحاضرة الثانية
خابرتني امي كالتلي : رحنا وشفنا الشقة ونظيفة واثاثها يخبل وعلي اتفق وياه ياخذها بأثاثها لإن اثاثها حيل جديد ونظيف احسن ما نتعذب ونشتري غيره
– يعني اتفقتوا ؟
– اي باجر الصبح نروح اني وياج تسويلي وكالة خاطر اني امشي بعد بيها
– ماشي
سديت الخط كمت ابوس بالتليفون هلكد ما فرحانة
سبحانك ربي انكسرت وانقهرت وانعصرت حتى ايوب يعزلني ابيت تاليتك كاتبلي البيت بس مو منه .. منك وبتوفيقك تسجله باسمي وتعوضني بيه .. احبك ربي جنت اعرف انت مراح تتركني والله جنت اعرف وكلي ثقة … باوعت للسما احسها مبتسمتلي وتكلي ها شفتي اليوكل امره لله الله شيعوضه ؟ .. احبك يا الله احبك حيييل
فريت السيارة ورجعت لبيت اهلي
علي يسولف وياي لا كانه كاتلي ولا معاركني يكلي : الاثاث يخبل غفران سبالت فراشات بلازمة غرف نوم من كلشي جاهز كالي تاخذه كله ب٤ ملايين كتله غير المليون ونص ما انطي هذن كلهن اذا تبيعهن هيه منو يشتري مستخدم ما يجيبلك ٨٠٠ مو ٤٠٠ ملايين كام يصيح لا والله جديد والبلازما جديدة كتله خوية هو المستعمل تاخذة مثل سعر الجديد اني انطي مليون ونص بالاثاث يعجبك يعجبك ما يعجبك براحتك كالي لا هاهية بعد شينقلني وششيل بالعافية
المليون ونص اتفقت ويا احمد علينا اني وياه نشيلها
حجت امي : لا اني اطيكمياهن بس يصير عدي
كاللها: لا يمه صدك جذب تشيلين ابيت فارغ ما بيه اثاثه علينا
– يطيك العافية
– يعني اتفقتوا تشتروه هاهية
– اي هاهية بس تسوين وكالة لامي اني وياها بعد نخلص السالفة
واحمد شافلج محامي شاطر على موضوع الطلاك
– التبليغ اريده بيدي لحد يدزه لايوب
– غير المحكمة تودي للبيته
– لا كوله احنا نوصله
– بعد احجي ويا احمد يتكفل هالسالفة
– تمام اني راح ارجع اتأخرت
اخذت ابني وطلعت لكيت احمد داك قطعة ع البيت الدار للبيع وحاط رقمه
اتنهدت بيت ابويه .. شوكت لحك شوكت حط شوكت دك .. ولو هو شمعته راح يضل ع البيت شلي ابيت ابويه ما بيه
اخذت ابني ورجعت طايرة من الفرح
دخلت ايوب موجود كل معالم الفرح بوجهي
تلكاني مبتسمة كال : خير شكو
رفعت اكتافي وابتسامة كتله : ماكو شي
– شو تضحكين ؟
– فرحانة
– شنو السبب ؟
– هيج جان يوم حلو بالجامعة وفرحانة
– وشنو الجان حلو بالجامعة
– كلشي
طخيت خده باصبعي وغمزتله ومشيت
ضل يباوع وراي .. صعدت واني انشد
احنا ولد الصدر ويعرفونا تروج بينا الكاع لو عادونا
ما يهمتا ارهاب وعلي داح الباااااب .. واهوس بأبني
صاح : عفتي الحشد وحولتي ع التيار بووويه
صحت من فوك بضحكة : كلهم بيهم ريحة علي
ضل يضحك : البركة بالجميع ان شاءالله
دخلت لغرفتي اخذ ابني طول بعرض اركص بيه .. دخل
حجه : اليوم تركصين شنو الموضوع
– لو طابت النفوس ركصت
– ركصت لو غنت
– كلشي سوت
– وشلون طابت نفسج
– جاوبت بامتحاني
– ها خير ان شاءالله
بقيت طول اليوم فرحانة ضل بقلق يباوعلي ممرتاح
ثاني يوم كملت امتحاني ومشيت ويا ماما سويتلها وكالة …
رجعت للبيت ب٢ ونص
ايوب كاعد حجه : وين جنتي ؟
– جامعة من بيت اهلي
– اني مريتلج للجامعة اليوم ودورتج ما موجودة
– يعني وين راح اطير غير مداومة
– حتى سيارتج ما موجودة بالكراج شنو كاعد تثوليها ؟
– لا بس جنت بالجامعة
– وسيارتج
– موجودة
– يعني اني اعمى دا اكلج ما لكيتها بالكراج مال الجامعة
– اكو كراجين انت يا كراج رحتله
– غفران لا تثوليها عليه وين جنتي ؟
– هم شك وهم اتهمني وهم حط بيه علة تعودت
عفته وصعدت اتوتر من وضعي .. ثاني يوم كال : لا تروحين بسيارتج محتاجة سمكرة اني اوديج واني اجيبج
كتله : يلا هلا بيك
وصلنا علوش وطلعت لجامعتي
خابرتني ماما سولفتلي ع المحامي احمد اتكفل اتعابه ومن يصير عندج تنطينه كتلها : ع الراتب الجاي فلوسه موجودة
طلعت من الجامعة وجهي يضحك
لكيته منتظرني .. كال : خير اليوم هم مجاوبه
– اي وحيل حيل فرحانة
– ها خير ان شاءالله الله يديمها
جبنا علاوي ومشينا
العصر هو كاعد يمي بالغرفة .. كابلني عاف سالفة يوم يمها ويوم يمي كام كل وكته وياي بالغرفة يريد يعرف اني فرحانة ليش …
نزلت جوا اجيب مي صعدت لكيته لازم الايباد مالتي ويكلب البرامج مالتي .. ما لكى اي شي ولا محادثة ريحة گلبه ترك ونزل جوا اني نزلت اقرا القران وبني يلعب
حجت نادية : يعني حركي روحج ترا حتى الله ما يقبلها اني اشتغل وانت تقرين قران هو الدين هيج
صدقت وكتلها : مو تأمريني امر اذا تحبين اكعدي ارتاحي واني اكمل الطبخ عنج
خالتي وايوب و نادية على فرد صفنة من الجواب
كمت كبل رحت للمطبخ .. واغني هاااي مو سيارة تسوى ابو الطيارة نفس الكعدة والجو .. بس دبل قمارة
علوش يلزم بالغراض ويمشي .. ويجي يلزم برجليه واني اشيله وصيح : جهالي يا جهالي افرحوا يا جهالي
وعلوش يضحك ويهوس
كمت ابوس بيه .. اجت سرى كالت : ربي دوم هيج سعيدة
شكد حلوة وانت فرحانة
– لانج حلوة وكلبج طيب تشوفيني حلوة
ضحكت وكامت هي ونبأ يكملن وياي الفطور ونسولف ونضحك وضحكنا واصل الاخر البيت نادية وايوب و خالتي ماكلين مقالب
كتلهم : نسوي شربت لو ندز برتقال طبيعي اطيب نعصره
حجت خالتي : شنهي نازل عليج الوحي
– يجوز هسه شلون بالله الاشتغلت ما رضيتي الكعدت مرضيتي شيرضيج خالة
– ما ادري الله يهديج وضعج ما مرتاحتله
– بكيفج
خلصنا فطور واسولف واضحك ومنطلقة
ورا الفطور جبت الاستكان جاي كتله : وهذا لاحلى ابو علاوي
حجه : غفران كعدي اريد احجي وياج
– كول
– محتاج فلوس شكد عندج اتدايني
– يعني مثل شكد
– عشر ملايين
– ما عندي والله
– شلون ما عندج ورواتبج ؟ حتى مصرفج اني دا انطيج رواتبج وين
– ماما مداينتهم لخالو ديشتغل بيهن
– ومن ورا علمي ليش ما ادري بهالموضوع
– صار لما جنت ابيت اهلي وراح من بالي اكولك وانت مسألتني وهسه سألت وجاوبتك
– لعد مضطر ابيع سيارتج لإن بصراحة اني محتاج فلوس .. اذا ما تكدرين تخابرين خالج يرجعلي الفلوس اني اضطر ابيع السيارة
-بكيفك بيعها
-وانت شلون راح تروحين ؟
– عادي تكسي وفوتات ترهم مو احسن من غيرنا
– ها
باوع .. خو خابري خالج كليله الفلوس محتاجتهن
-ماما وعدته سنة ما تطالبه بيهن لإن كتلها ما محتاجتهن
-من وراي تتفقين
– هسه مو تريد تبيع السيارة بيعها اني مو بحاجتها
– غفران فلوسج وين
– تكدر تروح تسأل ماما هذا كل اللي اكدر اخدم شكك وضنونك بيه
عفته ومشيت صعد وراي كبل خاف اخابر اني واسولف الها .. كالي انطيني تليفونج .. فتحته وانطيته دخل على واتساب دخل محادثة امي عادية خواتي .. كتله : من خنتني ما رضيت اقتحم خصوصيتك هسه دا تدور بمحادثات خواتي شنو ساخلتلي واحد بنصهن ؟
– اتأدبي واحترمي نفسج
– اسفة حبيبي اخذ راحتك
– حبيبي
– ليش شفتني بحياتك عندي غيرك ؟ مو ايهاب المالكي يكول يا فكة عيون الگلب يا ميزتي البيها انغر
حجه : مو رايدك واتنفسك
رديت وهو يكمل وياي : لا يا نفس شي اكبر
حجه : كمتي تسمعين ايهاب المالكي ؟
– اسألك نفسك منو علمني على اشعاره وخلاني ادوره بيه
– غفران ما مرتاح
– ترتاح بقهري ضحكتي فخ بالنسبة الك انت انسان متكبر تعتاش على كيران وقهر الكل .. تحس بارتياح
– تشوفيني هيج ؟
– بصراحة اي
– تمام
راح كعد ع القنفة ..
دكت الباب نادية وفتحتها كالتله : ايوب اريدك عندي حجاية وياك
كاللها : بعدين
– بعدين شوكت .. لشوكت راح تبقى كاعد هنا واهاجرني بغرفتي مو اليوم يومي
– اني مو ملك احد حتى يموج اني ملك روحي مو انت تملكييييني
خزرها ودفعها وراح .. حجت : ام السحورة اشتغلتي شفتي ميت عليه وطيرتي كلبه وخليتي يهجرنييييي ويكابلج
ضحكت واني اكوله : وييييي سحورتي بكل مكان امشي واطش سحورة حسورة .. على طاري السحورة ليش اتصورتي هيج لما هجرج شنو السبب
سدت الباب حيل بوجهي
وطلعت تصيح بالبيت وتبجي يم خالتي وخابصة الدنيا
نزل ايوب يتصايح وياها واني بغرفيت اهز ركبتي على نغمة اصواتهم ..
مشت ايام واجت ايام ..
وايوب ما فاركني ولا يوم .. ما مرتاح لوضعي شلون مدا اغار شلون مدا اعاند مدا اجادل كلشي يكولون تامرون كلشي يحجون فدوة شلون تغيرت فجأة!
علي اشترى البيت واني مشايفته ولا طابته .. واحمد مشى بالدعوى ويا المحامي ودزلي الورقة مال الطلاك سلمها علي بيدي ابيت اهلي
اخذتها جان موعد الدعوى ورا عيد الفطر بأسبوع ..
فرحت .. ايوب
لحد ما خلص الشهر الكريم وصار يوم العيد
جنت حافة وجهي حفافة تخبل .. وحاطة كحل ومضللته فوك عيني ومسكارة وحمرة وردية خفيفة واحمر خدود وحجاب فضي ستن باوعت لروحي مكن حتى احلى من يوم العرس
اتفقت ويا ماما يجون عليه يوم العيد يعايدون ايوب واروح وياه شرط احمد وعلي اثنينهم يجون وكالت : سهلة
خابرتني كالت : وصلنا
اخذت ابني ونزلت ايوب ونادية متعاركين عركة قوية علمود نادية مسوية فلر لشفايفها ومنفوخ حيل وايوب متخبل ومتعارك وياها ..
نزلت هو بالهول صاح هلا
مو الي .. لعلي ..
ابتسمتله .. واخذ علي من ايدي
حجه وغمزلي : شو طالع حلو اليوم جايب العيد
مديت ايدي مبتسمة وكتله : عيدك مبارك وايامك سعيدة كل عام وانت بخير
عايدني حطيت الظرف بيده : هاي عيديتك
ابتسم : هلوووو احوال بووويه صايرة انت التنطين عيديات
– شلون لعد شعبالك
عندي خبرين حلوين راح يعجبوك ما اعرف ما يعجبوك
ديفتح بالظرف كتله الاول : اني اشتريت بيت وكملته وجاهز
عقد حاجبه : بيتيش ؟
يحجي ويطلع بالظرف شافه ورقة
– والخبر الثاني بيدك
فتحه وقراه دعوى طلاق .. بأسمي
رفع وجهي مستغرب : شنو هذا غفران
– كتلك لا تستقوي على وحدة ما عدها غير الله تتقوى بيه عليك
البيت اللي اتكبرت عليه وما اشتريته ولا عزلتني وكرمتني وشفتني ما استحقه ربي من عليه بيه واشتريته وصارلي بيت باسمي ومو بحاجة بيتك اعيش بيه .. واخوتي اللي سميتهم اجلاب تاكلني بعدك اطمن جلاب اهلي اشتريتهم وهسه اني مو بحاجتك طلكني ..
- يتبع الفصل التالي اضغط على (رواية صوت من المجهول) اسم الرواية