رواية صوت من المجهول الفصل الاربعون 40 - بقلم زينب ماجد

    

رواية صوت من المجهول الفصل الاربعون 40 - بقلم زينب ماجد

عقج الورقة وشمرها بالكاع بنتر وجر ايدي حيل : انت شلاعبة وشدا تخرطين طالعة من وراي واني مذمم علييييج

– مطلعت وكلت امي طلعت بدالي

– انت شحاسبة روحج ورقتج هااااي شككيها واشربي ميها نزعي وصعدي يلا ماكو طلعة

– عصبيتك وصياحك مراح يغير من الموضوع شي .. وراح نتطلك

– غفران اتأدبي واحترمي نفسج صباح عيد لا تكفرينا

اجت امه تكله : اهل غفران بالباب اخوتها وامها

حجيت : انتهينا ايوب واني رايحة ويا اهلي

– ددخلي جوا ادخلي خوش شايفة روحها عبالها بمجرد بيت تكبر عليه اني الكبرتج اني الخليتج توكيفين على طولج هذا ومن كبررررتج ما تكبرييييين عليييه افتهمتييييي

دفع راسي بأصبعه وهو يحجي وطلع مشتاط غضب وخالتي تحجي : توه الزلمة معيد ومرتاح شكتيله وخليتي يفور

– ما كتله شي بس انطيته ورقة دعوى طلاق خلعي

– شلووووون شلوووون ولج انت تخلعين ابني خايبة العوبة الخايسة الجايفة ولج انت التتكبرين على ابني وتخلعينه ولج انت وين تطولين توصلين قندرته وتحجين واتخلعين يعمي لو يفتهم يطلكج ويتفل وراح على هالزواجة الما بيها خير تخلع ابني

تركتها ومشيت شلت ابني وهي تصيح : كله صوجه هو الكبر راسج كله صوج هو حطلج كدر وانت اللي مالج لا قيمة ولا كدر خلك وحدة متلفة سوالج صيت ولج وتكبريييين علييييه

يمه ويكولون اظفر بذات الدييييين خايبين تعالوا شوفوا ام الدين شسويت يمه تريد تخلع ابنيييي انا ابني شيخ الزلمة انت تخلعينه

عفتها وراي ودخلت للاستقبال امي واكفة ابابها

كتلها : اضمنيلي علوش بيدج لا تنطي لأي أحد

ايوب يصيح واحمد وعلي واكفين يحجون

دخلوا للاستقبال وايوب يكللهم : الزلمة البيكم يطلع مرتي وابني من هالبيت مالهم طلعة وسالفة ترفعون عليه دعوة خلع اعلممممكم ياهو الترفعون عليه دعوة خلع .. اني تتفقون علييييه ولك علي انييي

علي : حجي بالقران حجينا بس البنية ما راضية ما نريد نوصل مواصيل تهج وتروح وتنكسر عيونه خليها حجي تخلص على هيج احسن ما تسوء الامور اكثر

– مرتي وابني مالهم طلعة من البيت واذا تريدون اختكم هاي اختكم بس ابني لا تحلمون انطيكمياه

– حجي انت رجال تعرف الله وخوش زلمة الطفل لو ما يرضع على صدر امه نكلك حكك وابنك الك بس الجاهل يرضع وما يرهم بغير امه وانت تعرفه معلعل المسكين

كمت من مكاني ..

مديتله سويج السيارة وكتله : ما قصرت بشي وياي رغم المشاكل ابنك موجود يمتى ما تريد تشوفه هلا بيك

جرني ودفعني : انت حيل ماخذة بروحج زايد امشي اصعدي برا لا وحق هو الحسين هنا انحرج

لزمه احمد : حجي ما يصير تضربها واحنا موجودين

سطر احمد راشي وكاله : ولك انت توكف بوجهي وتحجي ويااااي انت تريد تاخذ مرتي من بيتييييي

صرخ احمد : ابيتك تضربني وانت ابن عشاير بس هينة

هو كاله هينة لو تلازم احمد وايوب يتعاركون

كام علي يفاكك وام ايوب تفاكم امي اشرتلي .. تبعت امي وطلعت .. ايوب طلع ورانا واحمد جره علي وطلع وايوب يصرخ ويهدد بأمي : تهدين جلابج عليه وتاخذين ابنيييي اعلمكم منو التاخذون بزره من بيته .. لا اندمكمممممم والله

غفراااااان طبي جوا

جريت ايدي امي وسرى لزمت بيه : عليج الله لتروحين والله خطية هو يحبج

– موجودة غيري تحبه مع السلامة

طلعت هو يصرخ .. راد يهجم على امي يجر الطفل

وكف علي كباله ولزمه : حجي نتفاهم رحمة الوالديك مو هيج كول يا الله واليوم عيد

– هسه ترجعون ابني.

– كلشي بالعقل راح يرجع بس خلي نفض مشكلة

حجت امي : الورقة التخليك تتحكم ابزري يا ايوب وتظلمها وتكسرها بيها شكها وجفينا شرك واستر ما شفت ونستر ما شفنا منك

كام يصيح واني ورا امي صايرة

صعدتني بسيارة احمد واطتني الطفل وصعدت وراي .. علي صعد ليكدام وطلعنا وهو يصيح ورانا مفرفح وامه تجر بيه .

طلعنا اني وامي و احمد وعلي لبسمايا كبل

جنت خايفة وفرحانة ومتوترة ومقهورة ومشاعر حيل متضاربة

ما اعرف اذا يستاهل الصار او ما يستاهله

غلط بحقي هواي وساعدني هواي

زيناته وشيناته كدامي بميزان .. زيناته اكثر من شيناته

بس كل شينة عنده ثكلها يهد جبال مو ميزان .

رغم جنت انتظر هاللحظة هواي وجنت اتمنى اشوفه هيج مفرفح جزاة فرفحتي وكسرتي بيوم اللي دخل عليه نادية .. بس لما اجت اللحظة ما كدرت اتشفى ولا اتشمت .. شي بداخلي انقهر رغم فرحانة حصلت الأريده ونلت خلاصي .. بس شعور چان متناقض بداخلي عجيب !

وصلنا لمجمع بسمايا ودخلنا البناية وصعدنا بالمصعد للطابق الخامس

المطعد يصعد واني احس بشي غريب بداخلي شعور حلو ومخيف وتوتر بنفس الوقت .. انفتح الباب مال المصعد احمد وعلي سسولنا مجال طلعت اني وهي شايلة ابني .. واني تبعتها وعلي مشى كدامنا واحمد صف ويا امي يحرضها على ايوب ومنفعل لان ايوب ضربه واسوي ما اسوي بيه وافعل ما افعل.

فتح علي باب الشقة ودخلنا .. جانت الكأبة مبينة بوجهي رغم لازم هذا اسعد يوم بحياتي اني حققت منجز وكدرت اشتري بيت لنفسي .. بس ادور بيه مثل المتفرج .. بس ما أعرف ليش فاقدة السعادة !

حجت امي : حلو عجبج ؟

– الشكر لله كلش حلو

– شو ما مبين على وجهج

احمد : هو شنو اليرضيها هاي البومة حتى تفرح ببيت شكول بيت انت .. خيمة هواي عليج .

حجيت : هم زين ما اشتريتلياها ..

رفع ايده : دا احترمي نفسج لا الخج على وجهج

حجت امي : ها خير تونا طبينا البيت كولوا يا الله

حجه علي : مشكلة ايوب مضايقتج

– مو ايوب .. ابني ما اعرف اذا هاي الخطوة بصالحة وبصالحي

– يعني شنو تراجعتي عن الطلاق

– لا بس اتمنين ما نوصل

احمد : خب دعوفوها هاي تخرط بكيفها هي الدكت ع الطلاك وخلتنا نتعارك وتاليتها تكول تمنيت ما نوصل .

باوعتله درت وجهي منه ما جاوبته

مدا يفتهمون تناقضاتي الداخلية وحقهم .. دا افكر راح نعيش اني وأبني مرتاحين هنا بس راح يبقى ابني بعيد عن ابوه وراح يربى بعيد عنه .. ما افكر بالتراجع ابد بس ابد ما اتمنيت اجيب طفل بهيج بيئة وتالي اضطر ابعده واربي الوحدي بدون أب .. شعور الإنسان عنده أب وأب حنين شعور كلش حلو ما ادري اذا اللي دا اسوي .. هو خطوة بصالح ابني لو لا … ادعي ربي سبحانه وتعالى أن يخط طريقي بيده ويكتبلي اللي هو يشوفه بحكمته وارادته .

حجه علي : هسه شوكت تنتقلون منا ؟

حجت امي : خلي نكضي العيد هسه ونخلص وعود بعدين نشوف شلون ناخذ غراض غفران وابنها من بيت ايوب .. خاطر نجي بعد هنا .. ها غفران ؟

_ بكيفج ماما اللي تشوفي

– عاجبج البيت

– اي كلش حلو

– يا غرفة راح تاخذينها انت وابنج

– الاخيرة

حجيتها ومشيت اخذت علوش نام على ايدها ..

شلته بأثنين اديه وعلي يحجي النقوصات اللي بالبيت وشنحتاج وهو راح يأمن شيلة غراضنا من ذاك البيت لهنا .. وبهالسوالف كملنا وطلعنا سد الباب كال : جيبي عنج الطفل اني اشيله

اخذ علوش وشاله من عندي ونزلنا احمد كاله : انت بعد رجعهم اني راح ارجع اخذلي غفوة حتى نتشاوف العصر نروح على عمامنا نعايدهم

علي : ان شاءالله

صعدنا ويا علي بسيارته ورجعنا للبيت ..

جانوا خواتي كلهم ملتمين ابيت اهلي .. الجهال تراكضوا على امي واني اعايد بخواتي واسلم عليهن .. واخذت ابني ومشيت للغرفة .. ردت انومه كعد ويسمع صوت الجهال مقبل ينام زحف للباب ويدك عليه عود فتحيلياه دا اكوم اريد افتحه انفتح صحت : لا لا لحظة

شلته كالت اسيل : ها

شلته كالت : تعاي يمنا

– اجيت عبالي ينام

رحت يمهن .. كعدت وياهن .. ديسون دولمة للغدا .. كمت الف سلك هن يسولفن يضحكن ندستني هدولة : شنو شصار احجيلنا

انتبهن خواتي البقية .. حجت ماما بدالي وسولفتلهن الصار ..

حجت اسيل : بس تدرين غفران محد راح يخسر ايوب غيرج ايوب سند

– ماكو غير الله سند بهالدنيا هو اللي حط ايوب بطريقي وهو اذا شاء يزيحه .. الخسران الوحيد اللي يخسر توفيق ربه ورضاه .

نوره : اهيييي غفران بعدج تفلسفين بالدين يمعووودة

ابتسمت : هو انتو اذا ما تريدون تسمعون كلامي ليش تسألوني

– نريد نعرف وضعج ويا ايوب يعني هاهية ناوية ما ترجعيله ابد .

– اني قررت اطلك ودعيت ربي اذا قراري بصالحي يوفقني لتحقيقه واذا مو بصالحي يبعثره ويصفي الأمور بس كنفس مالي بأيوب .. كرهت العيشة ببيته وصلت مرحلة وياه اذا اشوفه احس شي من داخلي يغيم ويكتأب .. اتمنى الفكة منه رغم اذا سألتيني اكرهه ؟ لا .. أحبه ؟ راح اتحير بالجواب .. بس قرار ابتعادي عنه نهائي .

– تعتقدين راح يطلك ؟

– لا .. لا راح يطلك ولا راح يسكت .. بس ما راح اتنازل ولا راح ارجع

اسيل : والله الصراحة اني اشوف لا تتسرعين بالطلاك مهما يكن الطلاك كسران ركبة وانت بعدج صغيرة وهو صح اتزوج وسوا وياج امور ما تنحمل بس ترا خوش زلمة قليل تلكين منه بهالزمن ..

نوره : اي والله عمي ياهو مثله مو متزوجين رجولتنا لباب الحوش ما تخلينا نوصل .

– مثله مثل غيره صدكي .. ما يقبل نوصل باب الحوش هذا المندوب اذا اجا يتخبل اذا نطلعله .. بس الفرق انتم سكتوا وقبلتوا واتقبلتوا واقعكم .. اني يوم الكتله اريد اكمل امتحاناتي وكالي لا كتله اتطلك ما ابقى .. ورغم كالي لا بس كلمة لا ما وكفت بوجهي واستمريت اقرأ واقرأ ومستمرة اقنعه لحد ما قبل اكمل دراستي وكالي ماشي .. وصعوبة الموقف بس البداية مدام وافق اطلع ويشوفني يومية اطلع واطب بعدها الأمور تكون سهلة بعينه اذا اشتغل او اي شي ثاني والا نادية متزوجها ترا من سنة ونص شحدها توصل باب الحوش وهم يتيمة مثلي ويمكن اني عندي اهل هي حتى امها ما بيها خير حط اسمها على تعيين ؟ خلاها تشتغل ؟ رغم احجيلج واني ادري التعيينات حاليا موجودة وبأستطاعته بسهوله يحط اسمها .. خلاها؟ لا طبعا ميقبل تطلع لإن هي رضت بهالدور وسكتت ..

الإمام علي عليه السلام يگول ( ما ضاع حق وراءه مطالب)

ونفسه يگول ( الظلم يحيى بالسكوت ) فتشوفي خلاني لا لو اني ساكته مستحيل يخليني انما اني جاهدت بتقنيعه عباية مثل ميحب لا مكياج لا اتبرج لا يشوفني طايشة ولا خفيفة اني رسمت روحي بالطريقة اللي ترضي ربي فوفقني بقناعة ايوب .

اسيل : والله يا غفران ما ادري شجاي تسوين بروحج اني منج ما دام اشتريت شقة وصارلي بيت خاص ابعد الطلاك واقنعه يجي يعيش وياي ترا المرة بدون رجال هيج ما تسوى شي ..

– وليش اقنع انسان جان يكدر يعزلني بس شافني ما استحق وتركني عرضه لزوجته الثانية تقهرني وتغورني وتاخذ مني كلشي وعاش مستمتع بدور الحاج متولي ما شاف قهرتي دموعي اذيتي ما قدرهن اجي بعد ما كدرت اشتري نفس اقنعه فدوة تعال عيش وياي .. ليش ؟

حجت امي : الحجي ما يفيد .. هي بعد قررت وهذا قرارها لحد يضغط عليها .

حطينا جدر الدولمة ع النار وكعدت امي تفت بعجينة الكليجة

واحنا نحضر بموادها جيستها امي وكالت : بورا المغرب نشكلها خلنها ترتاح العجينة .

كلبنا جدر الدولة وسوالف خواتي وضحكهن غيرن جوي واندمجت وياهن .. للمغرب هستونا خلصنا الصلاة دنحط الكليجة نشكلها خابر علي كاللها : يمه عمام ايوب جايين شوفوا الاستقبال ونظفوا اذا بيها شي وكلي لغفران تتحضر احمد جاي بالطريق

-غفران تتحضر عليمن ؟

– يعني شتحجي شتكول كدام عمه لان اكيد جايين يرجعوها اني شفتها اليوم مقهورة بلكت هيج وتغير قرارها ويتفقون على حل يرضيهم .

-الله كريم

كالتلي كتلها .. القرار نفسه يطلگني ومراده منه اي شي حتى الذهب مال المهر العندي اذا رايده خلي ياخذه اني مبحاجة شي غير راحة بالي البعيدة عن ايوب .

– دكومي حضري الجاي والاستكاين كبل لا يجون

كمت حضرت وهدولة اجتني تحضر وياي : غفورة حبيبتي اذا بيها مجال تفكير فكري لخاطر علوش خطية هو يحب ابوه وابوه يحبه وصعب تبعدين ابن عن حضن ابوه

– هدولة هالموضوع بالذات كلش مأذيني بس ما اكدر ايوب اذاني واني وابني واشوف اني وابني راح نرتاح اكثر بهالقرار

– وهو ؟

– الزرعه يحصده مو بصدد افكر بيه لو بمشاعره واذيته هو الصنع مني انسان اناني يريد يرتاح منه .

– ميخالف حبيبتي الطلاك مو سهل وانت بنية صغيرة بعدج ببداية عمرج وهو خوش ولد والله اذا قدم حلول تنفعج لو تفيدج اكول تفكرين اكثر

– ان شاءالله

اجوا عمامه اثنين وولد عمه

كعد احمد و وعلي .. احمد تحاجى وياهم على سالفة ايوب ضربه ابيته وعمه كام يتعذر منه وكاله : تعرف حجي ابو عرب وخوش ازلمه وهو يقدركم ويحبكم ولو ما رايدكم ما دزنا نراضي بتكم

بس ما ترفعون عليه دعوة خلع بالمحاكم عيب وزحمة بحقه

خو تعالوا وكلوله احنا نريد نطلك

حجت امي : جديدة يا ابو نور طلع اعلى السانه شعر واحنا نكله نريد يطلك اخرها اخذ ابنها وخلاها تفرفح هنا وحتى اخوتها تعاركوا وياها حتى يطلكونها ورجعت علمود الجاهل

– اي شنو المشكلة الصايرة

– مشاكل ويا ضرتها وما تحمل البنية بعد جزت روحها من الزواجة وتريد الطلاك

– زين شنو سالفة البيت كال مذممها ما تطلع وتشتري بيت وطالعة من ورا علمة

– لا والله ما طالعة اليوم يلا شافت البيت الله وكيل ومحمد كفيل سوتلي وكالة واني الاشتريتلها البيت جيف طلبت منه اكثر من مرة يعزللها وما رضى اتحملت لحد ما اشترت البيت وهاي حدها ومثل ما دخلنا بالعمروف نطلع بالمعروف

-خوية لا تحجون بالطلاك انتم ناس طيبين واحنا نحبكم ونقدركم ونحب بنيتكم وجيتنا هاي مثال حي احنا ناس مشترينكم وما نريد الطلاك

– والله يا خوية على راسي بس هي ما تريد تصرخ وتصيح الزلمة التزوج علي ما اريده

– جا خوية هو لا اول ولا اخر واحد يتزوج وهذا حلال الله

– خوية مثل ما الله حلل الزواج بثانية حلل الطلاك ما تحمل بعد مو بالكيف وجاريلها من ايده مرة مستورة وحبابة وتحبه وماشيه على مايا تكبر عليها وخذاله وحدة خله ينول جزاة افعاله

– زين عزللها فوك الطابق الثاني هي مو طالبته منه ؟ يفرغلها الطابق الثاني وتعيش بيه

اهلي ما اعترضوا كالوا .. صيحولها وخيروها

سلمت وكعدت وطرح عليه الموضوع .. ابتسمت وكتله : هالطلب طلبته سابقا ورفضه وجاب غرفتها عناد بيه وخلاها تشاركني المكان !

– بس هسه قبل

– بعديش !؟ بعد ما شافني ما استحقه وتركني انقهر واتأذى وما غير قراره بعديش بعد ما صارلي بيت !؟ ما منتظره قبولة

– بس عمو هو شاريج ورايدج ورايد ابنج ويحبج والله

– كل افعاله متدل على اللي انت تكوله .. اليحب ميأذي ايوب اذانا اني وابني هواية

– ما يصير هيج عمي الواحد اذا ما يتنازل ما تمشي الحياة ورجلج هذا ولا تتكبرين على رجلج ومثل ما هو تنازل اتنازلي وبارك الله بالمرة التخضع وتتنازل لرجلها عمي

– تنازلت من قبل ؟ اتقبلت وخضعت ومشيت الحياة شنو صار ؟ الكاه هو وزوجته الثانية بغرفتي !؟ عمو هي مو بالتنازل بس اكو هواية امور صارت اذت الى قتل الرغبة بالإستمرار بهذا الزواج .. وقتل الرغبة مو بالشيء الهين اني لما اريد اتقبله لو احاول اكسب لو احبه لابد تكون الي رغبة بس الرغبة بداخلي اختفت وما عاد الي نفس بيه .. صار دخوله للغرفة يخنكني اهتمامه يخنكني وجوده يخنكني وكلما احاول افتح مساحة للحوار ما اشوف الا واحنا متخاصمين بدل ما متصالحين

لهذا قراري عمو بدون رجعة افضل اتركه للزوجته الثانية وحبه الأول وهذا القرار جان متأخر جان المفروض من يوم العرس من لما دخلت غرفة الفندق وحدي وانت عصبي وتسألون ايوب وينه وهو عايفني ورايح يطمن عليها .. جان من ذاك الوكت ارجع ويا اهلي بس قدر الله وما شاء فعل .

ضلوا يحاولن منا منا ..

نهيت كل محاولاتهم بالرفض والإستأذان منهم بحجة ابني كام يبجي وطلعت … رجعت لخواتي ها شصار .. سولفت الهم .. خواتي ما قبلوا كالو : لو كايلتلهم : خلو هو يجي يعيش ويايا بالشقة

– انتو تحجون صدگ ؟ اني اكولكم مال رغبة بيه تكلولي خلي يجي يعيش وياج بالشقة .. ليش ؟ حتى يوم اللي يبات برا الشقة اكعد احترك للصبح ها يمها ها حضنها ها غازلها ها شسوا ؟ واكعد اتسابق وياها علمود احصله ليلة ؟ ليش اعيش هالعيشة واني اكدر اعيش افضل منها ؟

وحدة منكم خلي تتخيل وتحط نفسها بمكاني وزوجها يتزوج عليها وهي عدها بيت تكدر تعيش بيه سعيدة وبعيدة راح تبقى النصايح نفسها ؟

نوره : بس الطلاك مو هين غفرااان

– ولا شعوري من يدخل عليه وبيده زوجة ثانية هين .. ولا شعور الذلة هين ولا شعور الغيرة هين .. ليش تعظمون كلشي وتهونون شعوري ؟ لا تصيرون مثله .. علتي مو جرح ينشاف .. علتي بكلبي لا تحجون وانتم معايشين اللي عشته وشفته .

عفتهم واخذت ابني ودخلت بغرفة امي ..

عمامه بعد ما ايسوا مني كالوا .. نحاجي ونرجعلكم جواب على موضوع الطلاك .. اجت امي كعدت كبالي شافتني صافنة حجت : ما دام قررتي حطي حجيهم كلهم ورا ظهرج ولا تفكرين ولا تحملين روحج هم اكثر من الحملتي ؟

تنهدت وباوعتلها : ماما الدا اسوي صح ؟

– ما ادري دعيت الله يكتبلج اللي بصالحج اذا صح يثبتج واذا مو بصالحج يخبطها ويغير حالج ويجمعكم بخير .

– اني هم هيج دا ادعي بس خواتي حسسوني اني دا اتكبر .. ماما اني مدا اتكبر اني بس تعبت .

– فاهمتج من دون ما تحجين يبنيتي ليش اكلج حطي حجيهم ورا ظهرج ولا تحملين روحج اكثر ما دامج قررتي عيشي وامرج بيد الله هو الكافلج وهو اليدبرها بحكمته .

نزلت ابني من حضني ورحت لحضنها فتحتلي اديها واني خليت راسي بحضنها محتارة وهي تمسحلي على شعري : الله يريحج ييمه ويزيح الهم من گلبج

– نعمة وجودج ماما ما ادري شلون اشكر ربي عليها اني ما ادري شسوي بروحي لو انت مو ويايا .. قوتي وحيلي كله اخذه منج .. يوم العفتيني وحسيت بعد متريديني كل الدنيا هانت بعين ووكتها صدك انكسرت

– ما عاش اليكسرج ييمه واني موجودة .. ارتاحي احبيبة

كاعد تحجي وياي زحف علوش كام يملخ بيه حتى اوخر من حضنها ضربته خفيف : دوخررر هاااي امي

شو ما احس الا امي ضاربة ايدي وناكثتني من حضنها وكالت : يعابيج الله ولج اطكين عليوي

وخذته بحضنها

– هلووو وعليوي اعز مني ست حليمة ؟

– يا كلاب الدنيا انت شنو ولج هذا ابو حسين لبة كلبي

وكامت تبوس بيه وهو يضحك

جريت شعره ضربت ايدي وهو يصيح : دا دا اددع

عود يشكيلها مني .. : وخري منه ولج تروحلك فدوة يبيبي

ضليت اضحك دخلت هدولة : ها يمه شو عايفتنا بالهول ومعتزلة هنا

– جا اخيتجن معزولة ييمه

– طبت ترضع ابنها

– لا هاي حجة خاطر تشرد من الكل لا تعوفنها التفكير ياكل مخها ولحد تنصحها لو يفيد النصح جا ما قصرت بنصحها اخيتجن متعوبة گلب محتاجة الكلمة الطيبة التطيب جروحها لا تشوفنها ساكتة وما مهتمة تراه التفكير ماكل كلبها ومخها .

ابتسمت الها ..

وهن التمن حوالين امي و اسيل جابت سلة الكليجة كملنها تشوفها لامي ضاكتها كالتلهن : عاشت اديجن حيل طيبة ، باجر رايحة الكربلا ازور ابوجن هذا عيد ياهي التروح وياهي التضل ؟

اسيل : رجلي ما يقبل جذب

هديل : جهالي وين اعوفهم

نوره : عيالي باجر عازمين عمامهم على عشى وما عدهم احد بالكوات اليوم اجيتكم ابات عدكم من الصبح اروح

باوعتلي : من زغرج انت ارفيجتي وين ما اروح جنطتي من دون اخوتج وخواتج

– اني من البداية كتلج حليمة تتزوجيني بس انت ما قبلتي بيه

– لا لا هم زين زوجتج جا لو ضالة عليوي منين اجيبنه

وكامت تبوس بيه بوسه ام الصوت

غميته : على حوره

– يعابيج العباس كون ولج لا تغمينه خايبة

تحضن بيه وهو يرفعلي برجله عود بوسيها .. جرتها امي وباستها وطلعتله من جنطتها جكليته كتلها : لا ماما لا تنطي حلويات بعده صغيرررر

– مالج غرض هاك بيبي

فتحته اله كام يمص بيها لوص روحه تلوص

كمت جريتها من حلكه وشلته غسلتله نط من البجي لان اخذتها من عنده اجا ابن نوره بيده تليفوني يدك … اخذته ايوب ديتصل

نزلت علوش من ايدي وتنهدت .. مديت

كتبلي واتساب ( طايحة الحظ شتريدين اكثر مو رضيت باللي تردي وراح اكملج الفوك حضري نفسج راح اجيج واذا ما تجين تنطيني ابني ما يبقى عندج)

باوعت الرسالة .. ما رديت

كتب ( تتجاهليني بسيطة )

مجاوبت ..

رحت كعدت بالمرجوحة اتمرجح لوحدي وافكر ..

شكد ما احاول اقنع نفسي بيه اشوف الخلاص منه فرصة ولا سبيل للتراجع .. اخذت السماعات وحطيتها بأذني .. كمت اطلع قصائد ايهاب المالكي .. وكفت عند قصيدة ( بعد ما اجيب جرحي )

وبقيت ارجع واعيد بيها

وكف بيه الشعور يم البيت ( منو الياخذ حلم؟ منو الينطي زايد بي ؟ حلم كلش جديد وما استعملته )

صفنت وكمت اروح بذاكرتي وين

لايام اول ما خطبني وشفته وانعجبت بشكله وهيبته والناس تصيحله حجي وحجي وصرت ابني احلام فوك احلام عليه .. ما جانت احلامي صعبة بكد ما هي رجال يعوض مكان ابويه بحياتي .. جنت احلم بيت صغير يلمنا وعدنا اطفال ومتصافين ويحبني ويسمعني ويحتويني ..

ليش مكلي يحب غيري ؟ وغيري ساكنة كلبه وعقله

ليش استغلني للخلفة والخدمة وراح يقضي مشاعره ويا غيري !

احلامي وين .. اني وين ؟

اجت نوره كالت : غفورة ماما تريدج

كمت رحت يمها كالت : ليش عازلة روحج يمه

– لا هيج يس كعدت ع المرجوحة

– تعاي ويا خواتج يمه لا تكعدين وحدج

كعدت وياهم .. وتليفوني بيدي اكلب بالصور

كلها صوره هو وعلوش .. اكلبهن صورة صورة .. ما اجا .. ولا سوا مشاكل وراح تمر الليل بهدوء .. شنو اللي ديفكر بيه ايوب ؟ ليش شاغلة نفسي .. ما افكر راح اتطلك وراح ابتعد واعيش سعيدة ببيتي .. احلامي البنيتها عليه راح ابنيها بيدي … ما احط احلامي على احد وراح احقق لروحي الاريده بتوفيق ربي

حطيت ع الواتساب حالة لايهاب المالكي

وهو يكول ( مثل سچينتك راح انسحب بهداي حتى اترك حياتك واطلع بسكتة ) نشرت وحطيت راسي .. غمضت عيوني بس دا احاول اشرد من التفكير اريد انام .. اهلي عبالهم نمت هدولة حجت ( مقهورة بس ما تبين )

حجت امي ( غير رجلها وفتحت عينها الا غفران كبله تعرف احد لو حابة احد بس ما قدر نعمته وهو الخلاها تنفر منه عباله من راح يترس جيبها راح ينترس كلبها ما يدري خلاها جثة مزينة بلا روح )

هديل : والله اني مكسور گلبي عليها اشافت من عمرها .. البعمرها ٢٠ سنة همها امتحاناتها ودراستها مو رجال وعيال وضرة تقهر بيها بسوالف سخيفة

– ربج يشوف يبتي ويجازي

صاحت : غفورة يمه افرشيلج انت وابنج ليش امدده ع الحصيرة

فتحت عيني باوعتلها وما تحركت

كامت اسي فرشت وكالتلي : كومي سيطري على ابنج

اخذت ابني وتمددت واني اباوع الواتساب ما ادري شنتظر

مشيت للحالة .. شفت المشاهدات هو من ضمن المشاهدات تنهدت وقفلت التليفون وشمرته .

شكد حاولت انام مكدرت انام كمت طلعت توضيت وكعدت اقرأ قران التهي بيه وبتدبيره افضل ما افكر واتعب روحي بتفكير لا يجيب ولا يودي بقيت اقرأ لحد اذان الفجر صليت وكملت دا اسبح تسبيح الزهراء حجت امي : صدك تروحين وياي لكربلاء لو لا خاطر نطلع فد شوية

– بنفسي ازور بابا بس ما راح اطلع لحد ميكمل موضوع الطلاك

– واذا ما طلك

– راح ابقى احاول لحد ميطلك

– بكيفج بس شلون تضلين بالبيت وحدج خاف خواتج يروحن ومرت اخوج عد اهلها

– مو مشكلة اقفل الباب علينا ..

كمت رحت حضنت ابني ونمت .. قبل صلاة الظهر كعدتني هدولة امي وخواتي طالعات كالت : خلي نكف البيت ونتغدا حتى اروح اني بعد مناك رجلي لازم ارجع .

خلصنا الشغل اني وياها وراحت

بقيت بس اني وأبني بالبيت قفلت الباب وكعدنا كام يتنحس من الضوجة لا العابه لا احد وياه شغلتله طه وكعد واني كاعده على تليفوني ..

اندكت الباب فزيت ..

كمت اشوف منو طلع ايوب .. دك الباب دك .. ما كلت منو ولا حجيت

حسسته محد بالبيت .. طلع علوش يزحف صاح : دداه

وكف ايوب حجه : افتحي الباب منا الناس

دكته : احجي وياج ما اسويلج شي بس افتحي الباب نتفاهم

– ما بيناتنا شي نتفاهم عليه ايوب .. روح

– افتحي الباب اكلج

– مراح افتح

– بس اشوف ابني

– بحضور اخواني تشوفه

– وحدج بالبيت

– لا مرت اخوية موجودة

– افتحي الباب

غفران منين كاعد تشردين انت .. مني ؟

افتحي الباب ..

اخذت ابني وقفلت الباب مال الكليدور و المطبخ ودخلت بغرفة امي هم قفلتها .. ما طلعت لحد المغرب ردت اروح اصلي .. لكيته ماكو ..

لليل ب١١ اجا علي فتحتله

سألني اذا احد اجا .. كتله على ايوب كال : زين سويتي اخذي ابنج ودخلوا بغرفة امي .. واني راح اروح لغرفتي اذا تحتاجين شي صيحيلي

– تمام

مشيت وبقينا بغرفة امي لثاني يوم

هم خابر ابو نور على علي .. كاله : اني وصلاح اليوم يمك

اجت امي وعلي بلغها .. لليل اجا ابو نور .. كاله : يكول ايوب مستعد اجرلها بيت قريب على اهلها تكعد بيه هي وابنها …

رجعوا سألني وجاوبتهم بنفس الجواب

ليش اكعد ابيت واني عندي بيت .. ما اريد حل منه انتهى وقت الحلول حاليا ما رايدة غير الطلاك .

حاولوا رادوا .. مقبلت

حجه عمه ع الطفل كال : ما دام هي تريد الطلاك خلي تنطي ابنه

حجه علي : حجي الجاهل يرضع ومحد يعرف للطفل غير امه حتى الله بقرانه اقر الطفل بهيج عمر لأمه ترضعه وتمم رضاعته

– اي امه امنا بالله بس الزلمة يريد ابنه

– بعد هذا قدرهم يا حجي حاولنا نصلح من قبل والحجي رفض كل بوادر الصلح ورادها تمشي بغير ما تحب لحد ما وصل الموضوع لهالمواصيل شبدينا خو تعرفني اني حجي ابو عرب شكثر اعزه واحترمه .

– وهو يكول طلاك ما اطلك شلون بهالحالة تضل مشاكلنا معرة جدام الناس بالمحاكم

– حجي اذا ما يطلك شبدينا

– بديكم ترجعوها

– كم مرة غصبناها ورجعناها بس ما جان هذا الحل البنية ما تريده بعد نحلها حجي وننهيها والله كريم

حاول عمه جابها منا ردها منا الموضوع قافل ..

من طلع عمه رجعوا يحجون وياي .. بلكت الين بس اني قراري جان نهائي بلا رجعة .

ثاني يوم من الصبح بدلت وطلعت ويا علي وصلني للدوام وراح للوحدة مالته قريبة من مكان دوامي .. داومت .. بس من فوك شفت ايوب دخل للمقر عرفته جاي عليه .. خابرت مدير الادارة وطلبت زمنية بسرعة اتحججت بابني كال : اطلعي اني راح اوقعها وادزها للاستعلامات

التفيت من الباب الثاني وطلعت رجعت للبيت وخابرت علي بلغته برجعتي وكتله السبب كال : شردتي منه اليوم باجر شراح يصير ؟ هم تاخذين زمنية وتشردين من الباب الثاني .. عمه المدير العام مالج داري رزقج ورزقي واتفاهمي وياه وكوليله ما نتراهم لا تبقين تشردين منه .

صفنت بروحي صدك ليش جاي اشرد من شنو خايفة ؟

ليش خايفة اشوفه واكعد وياه ..

ثاني يوم داومت رحت للقسم مالتي كعدت اشتغل ..

اجا رحمن كال : ست طالبيج

– وين

– بغرفة المدير العام روحي

– تمام

كمت طلعت من القسم .. تنهدت

ياربي .. ساعدني وقويني

مشيت صعدت لغرفة المدير العام السكرتير كاعد كتله : الحجي موجود

– بإنتظارج ست فوتي

دخلت : السلام عليكم

كاعد يوقع اوراق حجه : وعليكم السلام

بدون ما يباوعلي بقيت واكفه اندار واشر .. كعدت

بقى مستمر يوقع اندكت الباب دخل السكرتير يحجيله عن ملف وهو يحاجي كمله كاله : اخذ هاي الاوراق وياك كملته واطلب النا كهوة سادة ولا تخلي احد يدخل

– تأمر حجي

اندار : اي بويه شلونج

– هلا بيك حجي الحمدلله

ضل يباوع عليه : شوكت موعد المحكمة مالتج

– باجر حجي

– اذا ما انطيتج اجازة تحضرين شراح تسوين

ابتسمت .. حجه : مستعدة توگفين رجلج محكمة كدام الناس

– ما اتمنيت الامور توصل هالمواصيل واتمنيت تنهون الموضوع بينكم مثل ما بدا .. بس تجري الرياح بما لا تشتهي السفن

– مرتاحة بالكاعد تسوي

ابتسمت وبسرعة عيوني تلامعن

: اكذب عليك اذا اكولك مرتاحة لو ما مهتمة لو فرحانة ايوب اول انسان يدخل حياتي جنت بانية عليه كومة احلام الي ولأبني بس هد احلامي فوك راسي وراس ابنا بأفعاله .. العفو منك عمو بس ايوب استهتر بمشاعري هواية لحد ما مات له كل شعور بداخلي

– استهتر !!

– لا تعتبرها اساءة بكد ما تعتبره تعبير مجازي عن انسان اصرخ وابجي كدامه واكوله راح اموت راح اجن من القهر يكولي مو مشكلة كلها اسبوعين تلاثة وتتعودين

ايوب تعود يربح كلشي عمره ما جرب شعور الخسارة

عاش وبحلكة خاشوكة ذهب كونه الجبير والوحيد كل اوامره لازم تسمع وكل طلباته لازم تنفذ وهو فوك الكل .. كلشي يريده لازم يصير .. حتى موضوع زوجته الثانية من اتزوجت ما جانت خسارة بالنسبة اله جان غدر ورجعت تتوسله حتى يسامحها عاش وهو يربح وينتصر بكل معاركه العسكرية والحياتية وصل مرحلة هو فوك الكل ومهم شعور الكل .. المهم هو شيريد هو شيحس هو شيشعر .. ما جرب شعور الخسارة لهالسبب طغى بتكبره حتى علينا اني وابنه .. صار يتجاهل شعوري يحاربني بأبني حتى لو ابني بيده ينط من البجي المهم يحقق بيه اليريده .. هيج انسان العيشة وياه صعبة

– وتحرمي من ابنه

– ابنه جان بين اديه هو اللي ما فكر بهذا اليوم واستغل ضعفي وقدرة اخوتي .. ما توقع فد يوم اخوتي يوكفون وياي ضده بس اني نبهته هواي كتله اختار لو اني لو هي وجان يتجاهل لحد ما انجبرت اني اختار بمكانه.. واختاريت .

– ايوب اجاني البارحة كالي مستعد يخليج تعيشين ابيتج اللي اشتريتي .. بس اتركي موضوع الطلاك

– اعتذر

– تعتذرين !؟ شنو بقى بعد بيتج وراح تعيشين بيه يعني لا يكدر يظلمج ولا يكدر ياخذه منج باسمج ومعززة مكرمة

– زوجة اولى !

– اي وزوجته الثانية ويا اهله

– لو طالب مني هالطلب قبل شهر يمكن راح انجبر اعيش دور الزوجة الاولى واقبل اما الأن فأرفض .

– شنو اللي تريدينه بنتي

– رايدته يحس بقيمتنا .. مرات الإنسان ما يحس بقيمة الشياء لحد ما يفقدها واني كتلك ايوب ما جرب شعور الخسارة وهالشعور يأدب عمو الله فرض شهر رمضان حتى الإنسان يجوع ويحس بمعاناة الجوعان .. وكذلك ايوب اتركه يعيش الخسارة ويحس بشعور الخسران .

ضل يباوع عليه اندك تليفونه : هاج هاي امه شيخلصني من مشاكلكم بعد ما تخلص .. رد : ها صبيحة

– شلونك خوية ماكو خبر عن الموضوع

– ما ترضى

– من عياها بحظها وابختها الزلمة راح يتخبل يريد ابنه توه تعارك ويا مرته الثانية وطردها ما كالتله شي بس زمخ بيها وكالتله ليش جاي تطلع حركة غفران بيه يخوية لزمها وين اليوجعج كوم واطردها لامها حجيت ردت ان جان ينزد متخبل خوية اخلاف ابنه بالضيم .

– خلي هو لجابها لروحه مرة صاينته وشريفة ومؤدبة وبت اوادم وتحبه ترجع لسوالفك القديمة ليش الظاهر صدك ايوب يحتاجله تربيه .. الما كدرنا انا وابوه نسوي خلي غفران تسوي

– يا خوية وتعوفه هذا حاله ؟

– شكثر منعناه من هالحية شكثر نهرناه يا صبيحة زوجته بيدي وكتله عمي ما تفيدك وابدي حياة جديدة وانسى ولك يا عمي هاي تهدك ما تبنيك شسوا جاب بت العالم كبالنا وراح بالسر ياخذ ذيج شحصل ؟ ارتكي يجني حصاد زرعه بيده العلينا سويناه .. وهو بيده هدم بيته

– ووليده

– لا تخافين ايوب ذيب راح يداور حول غزالته لحد ما يرجع يصيدها بس بالاول خل يجوع حيل خاطر يعرف قيمة هالغزالة .

من عساها بحظج وابختج غفران ..

سد الخط بوجها .. حجه : هاهية .. بعد هذا قرارج مالي دخل بيكم .

– شكرا عمو

كمت من عنده .. نزلت شفت باقر شايل كاميرته ويمشي .. لحظني

حجه : احوال كله يم المدير العام بوييييه

ابتسمت : متأخر

– وعلي فاتتني نومة يدك المنبه وما كاعد لحد ما فزيت ما دريت بروحي شلبست اجيت ركض

– اصعد لمدير الأدارة حطه بالصورة ترا يصعدك غياب

– يا بويه بس اخذي الكاميرا هاي خليها يمج فدوة

انطانياها وراح واني كمت اصور بيها .. عجبني الوضع كمت اصور بالحديقة مال المدير العام .. كمت اخذ لقطات .. التصوير بالكاميرا كلش احلى من التليفون .. والشعور حلو من شايل كاميرا وتصور

بقيتب النص ساعة لحد ما اجا

هو تنسب صار ويانا بنفس القسم .. اجا واني بعدني اصور

كتله : حيل تستهويني فكرة التصور حابة ادخل دورة تعليمية ادرب

– هو اني اعلمج بعد عليمن دورات وفلوس

انطيته الكاميرا كام يكلب بيها : بس تصويرج حلو الزوايا التاخذين بيهن يموتن ..

– هو اعرف اختار زاوية بس ما ادري شكلي راح اشتري كاميرا حبيت التصوير بيها اكعد اصور ابني

– خو هاي وصوري بيها

نصه صوته .. اكلج رحمن موجود

– اي بالقسم ليش ؟

– رايد انام بعلي بعدني نعسان

– ما عندك اوردر

– لا بس حضور

– امشي انتظرني اباب القسم … وهسه اجيك

رحت اخذت من معاون مدير الادارة غرفة صغيرة تكفي ٤ اشخاص مخليها مسجد بالمقر ما تنفتح غير بوقت الصلاة .. اخذت المفاتيح ومشيت .. لكيته واكف اباب القسم .. حجه : ها دبريتيها

ابتسمتله ولوحتله بالمفاتيح .. صار ايوب كبالي .. طلع من القسم

وكفت بمكاني وانداريت على باقر لزمتله المفاتيح من المدالية جره من جوا وكتب : تسوين نص نسوان الحشد والله

ابتسمت .. اخذ المفاتيح ومشى ايوب واكف يباوع اباب القسم .. من شافه مشى تقرب مني : واني اكول ليش مصرة على الطلاك

– مو غريبة تتهم بختي بافكارك

– صديق بالجامعة شعنده هنا وياج

– تنسب وصار وياي بالمقر والقسم والشعبة

– عال بس تره بعمرج مو ؟

– ما ادري ما اعرف عمره

تركته ودا اريد اروح لقسمي لزمني من ايدي : احنا بمقر ايوب نزل ايدك مني مو الكل يعرف شتعودلي

– ليش خايفة يعرفون شعودلج ؟

جريت ايدي من عنده حجه : اذا ما رايدتني الزمج اوكفي مثل الاوادم احاجيج

– وشنو اللي بقى بيناتنا حتى نحجي بيه

– اني تعبان كافي تضغطين عليه

– ياما كتلك تعبت اهتميت ؟ حسيت بتعبي لا ليش جاي تنتظر مني اقدر تعبك

-مو مكان نحجي بيه امشي نحجي بمكان ثاني

– ما عندي حجي وياك حتى نحجي

– راح تجبريني اسويلج سالفة اخليج على كل السان بالمقر والله

– تعرف نفسك ما تكدر

– وشنو الراح يمنعني ؟

– شتريد ايوب

– نحجي

– تمام امشي لحديقة عمو نكعد بيها ونحجي

– لا خارج المقر

– ليش ؟

– افضل

ضليت اباوعله ..

مشيت وياه كتله : خلي اخذ زمنية

– اتركيها ختولي خايفة على راتبها ينكطع ما خايفة على بيته

جرني ودفعني كدامه محد اكو نزلت ودا اطلع من الاستعلامات راد يوكفني ابو الاستعلامات من شاف ايوب وراي دخل كاله : العفو حجي توكل

طلعت من المكان رحت لسيارته موكفها على صفحة داس الدكمة انفتحت السيارة صعدت .. بس خايفة ما اعرف ليش ما كأنه زوجي العاشرته بغرفة لوحدنا سنتين .. احس خايفة منه ومتوترة ما اعرف وين يريد ياخذني عيوني تترقب

نزلني كدام مطعم اللي نكعد بيه دائما ومتعودين عليه بس حارة تصلخ ما كعدنا ع الشط كعدنا جوا بس يم الجامة المكان فارغ والسبلت موجه علينا هو عركان حيل شمر التليفون والسويج واخذ الجداحة والباكيت طلع جكارة وشمرهن وكام يورث حجه : اسمعج

اباوع تفاصيله متعوب حيل مقهور .. مبين الحزن بعيونه

حجيت : ما عندي شي أحجي

– تغدريني !؟

تخليني على عماي وتمشين تخلصين كلشي

شسويتلج وتجازيني بغدر

ما جاوبت .. كمل : اني عدوج ؟ ليش رايدك اذيتي جاي اعذب بذونكم والقرأن جاي اتعذب ما اريدها انعل ابوها والله طردتها بس جيبي ابني ورجعيلي جاي اموت

– بعديش ؟

– هسه بعديش ما بعديش اني جاي اوافق على كل اللي تريدينه اكثر من هيج شسوي ترا جلطتيني بالقران

نصه صوته وصك على اسنانه ولزم قميصه : روحي طلعتيها من جسمي والله

– بهذا المكان اجينا يوم وكتلك ايوب اني ما رايدة منك شي غير تحترمني وتقدرني بررلي قنعتي لا تتركني لظنوني وقهري واذيتي احتويني .. شصار باتفاقنا الاول حتى اعيد الكرة وياك ؟

من البداية ما فهمتني من البداية ما سمعتني

تحسبني ماخذتك لغاية واني وربي عمري ما دورت وياك غاية

حتى جامعتي اللي تعتقد كملتها بفضلك واهلي مبطليني اني ما جنت مبطلة اني يوم الاخوتي كتلوني وحركوا كتبي بجيت ودعيت لربي وثاني يوم توكلت عليه واخذت امي ورحت لمدرستي واتفقت ويا مدرساتي امتحن بكلوريا بس ربي حطك بطريقي .. ما خذيتك حتى انفذ احلامي اخذتك حتى احتمي بيك .. كتولي مهرج كذا مليون كتلكم اريد مهري قران كتولي اشتري ذهب اختاريت قطعة صغيرة لسيف الإمام ورزلتوني غركتني بهداياك بالخطوبة ويوم اللي شفتك قررت الزواج بدون ما تلتقيني او تشوفني بذلتهن كلهن اني ما بحاجة فلوس ولا بحاجة ترجعني لجامعتي بحاجة احترام ايوب من ذاك اليوم ولحد هذا اللحظة احترامي ما حصلته .. دخلت عليه بزوجه ثانية ومن اكولك جاي من القهر تكلي مو منطيح سيارة اكولك اني جاي امور من الغيرة تكلي مو مخليج تشتغلين .. من تضوج تحضن مرتك كبالي حتى تقهرني لو تكسر خشمي وتحطها كبالي من اول يوم بهالزواج ما احترمتني وتركتني ومشيتلها اكمل هالزواج مع قلة هالاحتراااام ليش ؟

مو مشكلتي تحطلي بيت .. ولا مشكلتي تطردها لو تبقيها

مشكلتي انت شايفني بالعين الصغيرة وما محترمني وتشوف ابسط حقوقي ما استحقها وهسه وكت اللي حسيت روحك راح تخسر .. بذلتهن لا .. حتى تصرفك هذا قلة احترام لإن لو تحبني صدك جان همك شعوري من تدخل وتلكى دموعي بعيني من قهرك وتغشم روحك تسوي نفسك ما شفت ومنعتني من ابسط حقوقي وشفتني ما استاهل حتى غرفة نوم انت كسرتها لإن بسببك سقطت اللي ابطني وعاقبتني عليه هسه جاي ترجعني علمود ابني ! ابني ما بحاجة ام واب ما متفاهمين ابني تمرض من هذا الجو ورايده اخلصه واخلص روحي من هالأذية

– شنو المأذيج نادية اطلكها والله خلينا نفتح صفحة جديدة

– يا صفحة جديدة ايوب من كثر ما فتحت وياك صفحات خلصت كتبي .. ارضى اليوم حتى تستغفلني باجر وارجع لدور الغشيمة التصدكك وتالي انت بايعها بظهرها .. مو انت الكتلي اكو امور انت متكدرين تسويها ومو ثوبج شنو راح تتغير مراح تطلب هالامور لو فقط راح ترجعها بالسر وتخليني بدور الغبية !؟

انت اذا رايد موصفات وحدة مثل نادية اتزوجتني ليش ؟

جان من البداية روحلها تجرحني ليش ؟ تاخذ وحدة عرفتها من اول يوم التقيتها لا لازمة تليفون ولا تتابع مسلسلات حب ولا مبين عليها سوالف غوا .. تاخذني وتظلمني ليش اذا انت رايد امور اني ما اعرف اسويها ومن ما اعرف ما حاولت تعلمني يمكن بساعة رغبة وانت زوجي تعلمني راح اتعلم وياك تركتني واجهة بيضة لناسك وبخفاياك تدور غيري وتقهرني!

من البداية نادية جانت مستحلة كلبك وعقلك اني اجيت بمكان غلط وادركت قيمتي مالي مكان .. اتركني اروح وابنك بامان ويايا .. لا تخاف عليه اربي واكسر ظهري بتربيته لا راح اتزوج ولا اريد طاري الزواج بس اتركني

– الحل شنو فهمني اني دخت منج .. اريد حل يرجعكم

– وارجع اعيد بنفس هذا المكان قبل سنة وشوية كتلك هذا وهذا الحل وياي ايوب واذا ما سويتهن واتفاهمت وياي راح اصبر وباول فرصة يفتحها الي ربي راح اتركك مستعد اتركك واحنا بينا طفل وانت وافقت وكتلي هاي واتفاهمنا وانتهينا ومات الحجي بمكانه هنا ورجعت وطلعت بوكتها انت اصلا متزوج عليه واني الغشيمة وهسه جاي تدور حل .. ما الك كل حل يمي ويا ريت متطولها وتحضر باجر ونخلصها

– احضر الشنو ؟

– القصية

– احضر لقضية خلع اني تخلعيني

– وما تجزون الا ما كنتم تعلمون

حجيتها وكمت كام ولزمني من ايدي حيل وحجه : الظاهر انت ما ينفع وياج الطيب والاحترام قدرتج زايد وانطيتج اكبر من قيمتج امشي وياي

– وين تريد تاخذني

جرني اخذني ليسارته ساق وعيونه تجدح شر

سكتت وخفت يسوي شي .. رجعني لبيته .. دخلني دفع للبيت كتله : ما اريد ادخل خليني اروح

سطرني راشي : ادخلي لح على كيفج اني اطلك حاسبة روحج انت الرجاااال علييييه

دفعني جوا .. وكام يجر بيه ما قبلت اصعد طلعت سرى وخالتي يوكفن بيناتنا وهو يصرخ : خبلتيني شتريدين مني بعد خبلتينيييييي

شنو الردتي وما انطيتجيااااه رضيت بكلشي تريدينه بعد شتريديييييييين

ابني صارلي اربعة ايام ما شايفة بس انت اممممممم بس انت اتحسيييين ما تكولين هذا شنو شعوررررررره من يدخل وما يلكى ابنه اريد ابني حارمتني من ابنيييييي لييييش تصيحين تحاربني بابني الجاي اسووووووينه وياي شنووو

كام يحجي ويدفر ويصرخ جر البلازمة من الحايط لشها بنصنا بالكاع .. كل احنا ارتعبنا واطشرنا بمكان .. اجا عليه كمت ارفع ايدي فوك راسي كام يصرخ بوجهي : شفتيني احبج استغليييييتيني بكتي ابني مني موتينيييييي هذا البيت ما بيه غيرج شترديييين مني بعد حارمتني من ابنيييييي حارمته منيييييي لييييييش

كام يخنك بيه ويكلي : المهم نفسج ما نهمج اني وابنييييييي

كمت اوخر بروحي منه وخالتي وسرى يصيحون يريدون يوخروه ..

وخرت منه فتحت الربطة الدنبوس جلب ببلعومي جريته وكمت اكح واجر الهوى كوة وابجي ..

وخالتي تصيح وتكله : ولك عليمن حركة كلبك هاي وبحة صوتك على هالعايقة هاي ختولي هي وابنها ولك راح تموووت ياهي التفيدني هي لو بزرها اروحلك فدرة يمه اهدأ

مستمر يصيح ويغلط ويهوس ..

سحبت نفسي واخذتني سرى للاستقبال بس شفت باب الحوش مفتوح جريت نفسي وطلعت من البيت وهو بعده يصيح .. سديت الباب وطلعت اركض دموعي تجري وكفت تكسي واني اباوع وراي بعده ما طلع .. ركبت وطلعت لبيت اهلي ..

دخلت لامي ناطة بجي صرخت : يمه بتي شمالج ولج شصاير وياج ؟

كمت اسولفلها احتارت مدري تنقهر عليه مدري تنقهر عليه

انزوية بزاوية البيت ابجي .. احتاريت ما بين ارجع واخلص منه وارجع

بس اذا ارجع شراح يتغير ؟ بس تممشي الامور راح يرجع نادية ويركبني مرة لخ ومراح تخلص المشاكل اليوم كدرت اكسب اخوتي اذا رجعت مستحيل مرة ثانية يرضون ويمكن لو رجعتله يجبرني ابيع الشقة ويرجع يفلسني من كلشي .. ايوب ميتأمن ما دام يريدني جواه وتحت طوعه مراح يتوانى عن اي شي حتى يرجعني ضغيفة بين اديه ومالي لا حول ولا قوة

ما اكدر انسى السواه وياي واعدي ما اكدر

بس كاسرني صورته وبحة صوته وهو يصيح ويريدني ارجع

ككمت بليل من حيرتي صليت صلاة الإستخارة ودعيت ربي يدليني للطريق الصح ودعيته اذا الطلاق بصالحي خليني اصمم على قراري واغبش للمحكمة الصبح .. واذا مو بصالحي حنن كلبي عليه ونسيني السواه وياي واهدينا لبعض

نمت وكعدت الصبح .. روحي بخشمي

ما مرتاحة ما مستعدة ارجع لاستغفال ايوب واهانته

مشهد لما حط راسي جوا رجله ويكلي هذا مكانج وعاقبني على شي يعرفني ما متقصدته وذلني وعاقبني باعلان زواجه كدامي وجابها كدام عيوني يغازلها ويعاشرها كبالي .. ما اكدر لا .. ما اكدر استمر ويا

فرصة جديدة يعني يخسرني كلشي هالمرة .. الغدر مرة يغدر عشرة واليخون مرة يخون الف مرة ومراح يبطل ..

هاهية استخاريت والله حطني بهالقرار ..

بدلت ورحت اني وامي واحمد للمحكمة ..

حطيت النقاب على وجهي ودخلت ورا امي امشي بالمحكمة

المحامي جان هناك .. من ٨ احنه هناك انتظرناه ساعة ساعتين تلاثة .. ايسنا يجي والمحامي راد يبلغ القاضي بعدم جية المدعي عليه .

ما احس الا ايوب وبلال وراه دخلوا صالة المحكمة

لابس زي عسكري صحرواوي سلم علينا .. انداروا سلموا عليه ..

حجه ايوب للمحامي : في حال رفضت شنو الراح يترتب !؟

– العصمة بيدك راح تنرفض الدعوى بس راح نضطر نرفع دعوى اخرى تفريق عن ضرر ونستخدم زواجك الغير شرعي بالدعوى

-احترم نفسك الغير شرعي شنو

-القصد غير قانوني وراح نثبت بالصور والفيديوهات من داخل بيتك طبعا حاليا ما مطلع على اي شي بس الاخت تملك كل الملفات في حال رفضت دعوى الخلع واح نتوجه للدعوى الاخرى

تنهد ايوب باوعلي وهز راسه

واندار حجه ويا بلال .. حجه المحامي

يلا .. دخلت بس اني وايوب والمحامي .. ردت اوكف بجهة المحامي .. خزرني وكفت وراه ردد اسمائنا القاضي جاوبنا سأله وين تداوم حجاله رحب بيه القاضي وردد الدعوى

كاله : موافق تطلق زوجتك خلعياً

سكت وتحسر حجه : في حال رفضك راح تنرفض الدعوى انت صاحب القرار

– حضرة القاضي زوجتي عرضي والعرض عزيز واني حسدي وانطيت دم كلبي. في سبيل عرضي محد يشوفه ويوصل اطراف عبايته ووكفتي كدام حضرتك ما تعرف شكد صعبة بحقي بس .. لله المشتكى … اذا جان الخلع بكص رجلها من المحاكم وما يخليها توكف هالوكفة هاي .. اشفي غليلها وخليها تخلعني وتستر روحها وما توصل بعد لهنا .

– موافق

سكت ذب حسرة قوية فرك وجه .. هز راسه وبصوت مخنوك وبحة ترجف كوة نطق كلمة : موافق

حجاها ورجع ليورا .. اتصنمت بمكاني بس احس كلبي صار حجرة من الوجع ضاق صدري حيل واني ثابته رجع وكف بصفي .. يفرك بوجهه ويرجع اديه ليورا ويوكف ويحاول يثبت نفسه بس حسراته اللي كامت تطلع من صدره شرحت صعوبة الموقف اللي هو بيه .

بصمونا ووقعنا واشرلي براسه اطلع كباله ..

طلعت وكال لاحمد : اي شي يصير على ابني انت وامك المسؤلين كدامي

حجت خالتي : يمتى ما ردت هلا بيك تشوفه مو بعيد عنك

هز راسه مختك ما يكدر يسولف حجه : اكدر احجي وياج ما اطول من رخصتكم

اشرتلي امي اروح وياه طلعنا برا

وكفت هو يحاول يداري براسه ومختنك حيل : ادري ضيعتكم وبدلتكم بتراب رجليكم وهالذنب راح اشيله وياي تذكار

باوعلي جرن دموعة بحرارة : بس يشهد الله حبيتج

اخذ نفس قوي وكام يفرك بوجهه اني الدموع كامت تجري حجه : طلعت من هالدنيا بيكم واليوم خسرتج انت وابنج يمكن استاهل ما راعيتكم

حجاها وخانته نبرة صوت اختنك

وكام يبجي ويفرك بوجهه تقرب مني سحب راسي وباسني بكصتي ووكالي : ديري بالج على نفسج وعلى ابنج زين ..

اخذ اديه وحط سويج السيارة مالتي بين اديه وحجه : وشتحتاجين الركبة سدادة اضل رجالج .. مودعة بالله .

حجاها بعبرة وهد ايده من اديه ومشى ….

يتبع….

 

• يتبع الفصل التالي اضغط على (رواية صوت من المجهول) اسم الرواية