رواية صوت من المجهول الفصل الثالث و الاربعون 43 - بقلم زينب ماجد

     

رواية صوت من المجهول الفصل الثالث و الاربعون 43 - بقلم زينب ماجد

انفتح الباب وجان والكا ابو مهدي يدخل اللمر وديعبر كبالي ..

وكفت من حيلي بسرعة ووكفتله هو انتبه من شافني وكفت ابتسم ووكفلي : شلونهن بنياتنا ؟

ابتسمت لحجايته : زينة حجي

– وشلونه الحشد ويا بناتنا ؟

ضحكت بقهرة :- شلونه الحشد اخذ منا وانطانا ..

– شخذ منج

– ابويه

– شهيد ابوج وين ؟

– بجرف الصخر

– الله يرحمة بطلة بنت بطل انت موظفة ؟

– اي بالحشد

– الله يوفقج باباتي محتاجة شي ؟

– لا بس فرحت بشوفتك كأني شفت بابا كدامي

ابتسم ومسح على راسي وكال : الله يحفظج بنيتي بالخدمة

خلا ومشى .. جان وحده بملابس عادية مو عسكرية بس شوفته انطتني دافع وقوة ما اخاف حتى لو ما عندي اب .. هو موجود .

اجاني عسكري كال : ست غفران

– نعم

– تفضلي وياي

كمت وياه دخلت لمكتب فارغ ..

شوية واجا رجال يطلع بالاربعين على بداية الخمسين لابس عسكري ولوكو الحشد على جتفه .. كال السلام عليكم

– وعليكم السلام

بس كوة طلعت من الخوف

راد الموضف يسد الباب كاله : لا اتركه مفتوح

اندارلي ابتسم : شلونج يابه .. ليش خايفة

– ما اعرف من ساعة مكالو الامن طالبج واني خايفة

ضحك : لا شعدنا وياكم خو احنا بخدمتك ! بس والله نخاف عليكم وشغلنا لمصلحتكم .. انت وين تدرسين

– دا تكولي وين تدرسين يعني تعرف كلشي

ضحك : اعرف كلشي بس رايد اخليج تحجين وتاخذين راحتج متتوترين ولا تتشنجين اني اخوج ابوج شتريدين تعتبريني اعتبريني ولا تعتبرين وجودج هنا لمضرتج ابد احنا ما نضر ولا نأذي خصوصا مرة .. مو نبينا يكول رفقا بالقوارير

ابتسمت .. صاح : ابو سارة جاي اثنين

باوعلي .. تريدين جاي لو كهوة

– بكيفك

– لا شو بكيفج لا تتشنجين بابا احنا بخدمتكم

– كهوة

– كهوة لبنيتنا واستعجل

– اني من اسمع امن الحشد يلزمني كلبي احس بروحي ارهابية مدري ليش

ضحك : لا بنيتنا وعزيزتنا وشحده اليوصلج ويكربج احنا اخوتج بس وصلنا انو انت اتواجدتي بمكان تابع للكتائب وبعدها حضرتي بمقر للعصائب مما اثار تسؤلنا ونريد نعرف شنو الاسباب اللي خلت الاثنين يدزون عليج او تتواجدين عدهم تتاليا .. هسه انت دا تشتغلين برئاسة الوزراء .. وعدنا علم بمكانج وشغلج ونعرف جنت زوجة منو واخوانج منو والدج من السباقين بالحشد واهم شهدائة وهذا يخلينا بمسؤلية اكبر حتى نحميج ونحفظج .. مو

ابتسمت كال : شنو كان مضمون اللقاء

كمت اشرحله كلشي بدون زيادة ونقصان

كال : شوفي اختي احنا وان كان كل هالفصائل تنضم تحت راية الحشد سواء السرايا الكتائب العصائب كلهم الوية من ضمن الحشد الشعبي بيهم اللي يخالفنا وبيهم اللي مساندنا لكن يبقى شغلنا منفصل عنهم … احنا قوة للعراق فقط ما نشتغل لصالح ما وراء الحدود ولا نشتغل لمصلحة حزب فلان وفصيل فلان .. هسه نعم احنا نحب ايران وايران داعمتنا ومساندتنا بس خوما افضل ايران عليه لو على بلدي ؟ هذه ارضي وهذا بيتي اني لو صارلي شي وعندي عائلة واطفال .. وين اروح ايران تنطيني بيت لو يا دولة راح تستقبلني وتنطيني بيت مثل بيتي اللي بالعراق !؟ العراق مو شعارات ولا اغنية ندك ونركصلها .. لا هذا بيتك بيت اهلك الي يهدم بيت اهله فوك راسه خسران ولازم نتعلم ان مصلحة العراق فوك كل اعتبار لإنه بيتنا ارضنا امانا وكرامتنا .. صحيح تأذينا بس انت ابيتج ما يطلعلج اخ اخت تأذيج بالبيت مع هذا ما تكدرين تنطين بأختج اللي ابيت اهلج للغريب حتى لو جان هذا الغريب مساندك ويحبك .. البيت عزيز وعراقنا عزيز .. والحشد انطلق لاستعادة امن العراق وحفظ شعبه ومقدساته واعراضه .. ولازم نبقى هيج وما نفقد هويتنا حتى لا نضيع ويضيع البلد .. المطلوب منج ممنوع منعا باتا تشتغلين او تطلعين معلومة لاي فصيل او اي جهة .. انت محسوبة علينا برئاسة الوزراء اذا جان اكو موضوع او امر يخص الحشد او يضر الحشد خو هذا واجبج تبلغينا بس انو تطلعين اسرار عملج لأي جهة كانت ممنوع .. اضافة الى احنا نرفض نستخدم بناتنا بهيج امور احنا لأجل اعراضنا ولأجل محد يمس عبيجن انطينا زلم خشنة والله يا خوية كل زلمة بيهم يسواله دولة بس حتى نحفظجن واولهم ابوج .. مو ؟

حجاها بأبتسامة

ابتسمت : صح

– لهذا الي اريده اكوله الج اي احد يتواصل وياج ويكولج احنا اندعمج احنا وياج كوليله لا عندي زلم الحشد يكفون ويوفون ما نقبل تحضرين عند اي مكتب حزب او فصيل .. وانت شتحتاجين خو احنا اخوتج

– الله يحفظك انت شلت مني هم من حيث لا تعلم اني ما بودي احضر عند اي مكتب بس انت اخوية .. اني اخاف اكون بعداء مع اي احد تعرف هذه الوجهات يمتقارش وياها .. واني بنية كلامك هذه حجة لأي احد يراسلني ويكلي نريد حضورج راح اعتذر واكوله عندي اوامر ما اكدر احضر بأي مكان

– عاشت ايدج وتبلغينا بأي جهة تتواصل وياج مو بس تعتذرين

– شكراً

– بقى شغلة لازم انبهج عليها

– اللي هي ؟

– تعرفين القادم تفتهمين بالسياسة لو شنو ؟

– حسب شغلي من غير هواية على اطلاع كامل بالاخبار السياسية

– شنو قرائتج للمرحلة القادمة

– مو قرائتي .. انما المتداول حاليا والخطة المرسومة للمرحلة القادمة هي صفقة القرن .. كل الاخبار تحجي عنها بلدان عربية عديدة وافقت على التطبيع مع اسرائيل والوضع بالعراق مختلف كون العراق منسوب ل٣ مكونات اساسية المكون الكردي بقيادة مسعود برزاني باتفاق مع امريكا واسرئيل وافق على التطبيع والمكون السني بزعامة محمد الحلبوسي باتفاق مع الامارات والسعودية اشترط التطبيع مقابل مشروعه بأقامة اقليم سني بالأنبار اما المكون الشيعي متذبذب بين الفعلا رافض لمشروع التطبيع وبين اللي مستفيد وديقايض لمصلحته وبين اللي متهمه هالامور اليهمه مكانته وهيمنته .. بس حسب المؤشرات كلمة المكون الشيعي مو لزعامة احزابه وسياسييينه انما الكلمة لمرجعية النجف .. ومرجعية النجف وضعها خاص ومربك كون المرجع بعيد عن السياسة لا يتفاوض ولا يقبل بأي ظهور اعلامي .. لكن اله كلمة مفروضة على جميع المكونات بالشارع العراقي يعني العقبة الحقيقة امام التطبيع العراقي مع اسرائيل هي مرجعية النجف وكون الحشد هم قوة وان كانت تابعة للعراق لكن تشكلوا بكلمة منا لهذا يعتبر قوى تابعة للمرجعية يكدرون يفشلون اي مشروع يرفضه المرجع مثل ما فشلوا مشروع د١عش وخطة احتلال العراق من قبل الجماعات الأرهابية .. لهذا المرحلة القادمة وبحسب كلام الجميع هي مرحلة صعبة ع الحشد الشعبي لحله ودمجه لحتى ينفسح المجال لمشروع صفقة القرن والتطبيع مع اسرائيل .

– بالضبط هم زين مثقفة ومدركة لخطورة المرحلة الجاية كل حشدي الأن هو بحلك ذيب وكلنا كاعد توصلنا رسائل تهديد وووعيد راح نخلص عليكم راح نكتلكم .. لهذا وانت ابنية اخذي حذرج الكامل .. اني حشدي واكولج لا تعلنين اي ولاء للحشد بمكان عملج حافظي على نفسج .. روحي بطريقج وتعالي بطريقج ولا تتواصلين مع اي جهة تكولج احنا نحب الحشد .. انتم بناتنا خاصة راح يفتحون حلوكهم عليكم بلكي وحدة منجن تزل وتغلط حتى يسووها مادة اعلامية لتسقيطنا لهذا ادركوا خطورة موقفنا وخلينا ايد وحدة نعبر هالمحنة نحفظكم وانتم هم بدورجن تحفظون كصصنا وظهورنا بسترجن ومحافظتجن على نفسجن .

– تأمر

– ما يدلل عليج عدو اخيتي العزيزة اني اتشرفت بحضرتج شتحتاجين ارقامنا موجودة بس كليلهم اسمي راح يوصلوج الي وبالخدمة

– الله يحفظك

طلعت من المكان كلش مرتاحة ..

جان نهاية الشهر التاسع تقريبا الجو كاسر .. طلعت رغم النعاس و التعب بس اتنفست الصعداء عبالي راح يعلكوني بس جانوا كلش مساندين ومتفهمين ..

طلعت من الاستعلامات .. رحت للكراج دا اخذ سيارتي ..

لمحت سيارة تشبه سيارة ايوب .. تركت سيارتي واتوجهت الها باوعت الرقم .. هي سيارته .. ابتسمت ما اهتم ولا خابر مكابرة بس حضر بدون علمي .. يعني لو جان شي ممكن يأذيني راح يتدخل فورا .. لهذا بقى من بعيد يراقب

صعدت سيارتي .. وباوعت للسما من جامت السيارة

ربي احبك حيل عرفت مراح تتركني ولا راح تقبل بأذيتي وجودك احلى شعور ممكن يعيشه الإنسان شكرا الك شكر بحجم عظمتك ورحمتك

شغلت سيارتي وشغلت .. يلا شكرا للحشد والأيدوه هو هو

صفيت السيارة .. جان عمي موجود واكف بالباب .. نزلت من السيارة يباوع كال : سيارتج

– السلام عليكم

شال عينه من السيارة : وعليكم السلام

تركته ودخلت واحد يحط عينه كبل ليسلم .. دخلت احمد وعلي موجودين كال علي : شو راجعة من وكت

– تعبانة واخذت زمنية

حجه احمد : شلونه الشغل بالرئاسة

حجه عمي : ليش هي وين تشتغل بالرئاسة لو بالحشد

حجه احمد : اخبارك قديمة عمي تشتغل برئاسة الوزراء

– ومنيلج هالشغل مو جنت حشد

– اعتذر تعبانة ولازم انام

حجه عمي : حضري روحج عشاكم اليوم يمنا عازمكم

– ان شاءالله عمو

مشيت اخذت ابني بسته ودا احجي ويا امي عليه اذن الظهر صليت ورحت لفراش امي .. علوش اجا يرضع مني .. تركتله صدري واني غطيت بنومتي بقى يروح ويرجع امي اخذته مني وكالت : عدلي روحج لا يدخل واحد من اخوتج

سحبته وسدت الباب ونمت ..

للعصر كعدتني امي كالتلي : اكعدي انباع البيت

كعدت : صدك

– اي والله انباع .. اجا هسه الرجال واتفقوا وباجر رايحين لكاتب عدل انت مسويتلي وكالة بعد بس خواتج ما مسوياتلي .. لازم يحضرن باجر

– لعد عمي شنو جيته اليوم شعنده

– ما تعرفين عمج بعد اذا ما يحط روحه ما يرتاح بلكي ينوشه كم فلس

– يروح يبلط الشط ماله شي يمنا

كفيت غطاي وكمت لابني غسلتله وكعدت اوكله والعب وياه كال علي : يلا غفران بدلي حتى نروح

– روحو انتم اني شعندي رايحة

– عمي حلفنا تجين ويانا

– تعبانة وما بيه حيل والله

– هسه دگومي خل نفضها

كمت بدلت اني وابني وطلعنا اني وامي بسيارتي وعلي وعائلته بسيارتنا .. وصلنا هناك اسيل طاريت بينا من الفرح اخذت ابني بحضنها تبوس بيه .. وكاعدة اني بسد امي .. عمي ومرت عمي كاعدين طب ابن عمي .. عدلت عباتي ورفعتها على اجتافي نزلتها .. وعدلتها بكعدتي .. اتقيدت من نظراته حسيته يتفحصني من فوك ليجوا يباوعلي .. لحد ما سألني : شلونج بالشغل غفران

باوعتله .. باوعت على امي مجاوبته

كالتله : زينة مضل اسبوع الجاي ترجع لجامعتها وبعد ما تنشاف

حجه : ليش اتداومين جامعة ؟ يعني هو اليدرس شيريد غير الوظيفة وانت موظفة بالرئاسة بعد شتردين اكثر من هيج

رادت تجاوب امي حجه : هي شو ما ترد شنو تستحي لو تستنكف

امي : لا غفران تستحي وين تحجي

حجه : هي التشتغل بالحشد وبنص زلم تستحي بعد

اشرت لاسيل اريد اكوم

حجت : غفورة تروحين وياي لغرفتي

– يلا

لزمت عباتي ولفيتها على جسمي وكمت وياها ..

كتلها : شنو هالشخصية الجربوعية شعنده بهالاسئلة هو اني عمري مكاعدة وياه ولا اعرفه اسمه ابن عمي شنو هالفصول

حجت : الله يستر لا يكون حاط عينه عليج امس عمي يكلي غفران قبطت عدتها مو هي من السادس اتطلكت .. يعني كضت كتله والله عمي محاسبيلها ولا ابالنا هالموضوع

– هو ابنه مو متزوج

– بس مجاي بدبرها عمالة كوة يحط الفلس ع الفلس حاله حال رجلي

– اي واني شنو ان شاءالله ديشوفني البنك المركزي الراح يحقق احلامه ؟

ضحكت : عمي نذل ديحسب انت مطلكة وراح تجيج حصة الورث وعندج بيت وسيارة على حصتي يحصل خوش هبدة لولده

– يا فدوة ان شاءالله اباله اوافق بأبنه ؟

– كولي ان شاءالله ميفكر هيج

– وشحده يفكر تايهتله

– هلوو صايرة دولة وعلم وين ذيج غفران الميطلع صوتها

– السكتة ويا هالبشرية متنفع ..

صاحتنا مرت عمي مشينا صخرت اسيل على شعل ردت اروح اساعدها كالتلي : تعاي هنا غفورة خلي نشوفج

كعدت بقت تسولف وياي ابني يلعب : خالة راح تكسرين بختج واتكعدين على بزر الحجي تربي

– احلى كسرة بخت على كلبي غير ابني خالة

– حتى لو خو ما تظلين خالية خالة ما يصير المرة العزبة مو خوش تصير مرتع للزلم

– مو كل مرة خالة .. هاي امي صارلها ارملة كومة اسنين وعزبة هم صارت

– يا خالة امج حبيرة

– الموضوع ماله علاقة بعمر انما بتربية .. واني امي ربتني وعلمتني ضناي وسمعته اهم من اي شي بهالدنيا .

– لا سمعتيش ما بيها شي لو الوحدة اتزوجت على سنة الله ورسوله

– ما مستعدة اخسر ابني علمود رجال .. واني مكتفية بنفسي وسعيدة بحياتي ومرتاحة ما ابالي حاليا غير ابني واكمل دراستي واجتهد بشغلي .

بقت تحجي اجت امي سكتت ..

رجعت حجت : شراح اتسوين بحصتج حليمة

– والله يا خية ما مفكرة

– بس عدج خوش بدال الحصة حصتين حصتج وحصة غفران

امي : واخذ حصة بتي شبية ما شايفة

حجيت : اني وحصتي فدوة لرجلين امي .. هو لو ما هي اني ارتاح واعيش حياتي هيج جان هسه الله يعلم بحالي مكابلة فلانة والمربى مالتها واتمحرگ وانقهر واكل بروحي.

ابتسمتلي امي : فداج الفلوس واهله ييمه كون اشوفج مرتاحة وسعيدة

سكتت مرت عمي .. رجع ابن عمي طلع جر كرسي وكابلنا

مرته تفوت تخزر بيه ترجع تخزر بيه وهو منطلق يضحك ويسولف ويا امي وامه .. وابنه يجر برجله ولا منتبه ..

كمت من مكاني رحت لاسيل للمطبخ واني متلفلة بعباتي كالتلي : انزعيها شو بنطرونج وقميصج عراض ما بيهن شي .. ليش بعد مقيدة

– ما اريد

طبت مرته تبارعلي بطرف عينها ..

كمت اساعد بالزلاطة اجت وكفت يمي تلكط خضرة وكالت : اطلكتي على شريجة مو ؟

– اي

– هي هاي النسوان تطلك من رجلها لإن يتزوج عليها وتاخذ رجال متزوج خوش موديل

– اني لا ارضى يتزوج ولا بمتزوج ما اتقسم على اثنين ولا بحاجة الرجال بحياتي من اساسه .. مرتاحة لو اريد اشتغل بمكان وين الثكيل وجيبه ثكيل وما بيهم واحد عجبني عاد على حور العندج حتى اريده فلا تلمحين وتنفخين .

– يا طلعتي اتدورين ثكال

– ما احتاج الثكيل .. اني ثكيلة اصلا .

وضحكت ويا اسيل حجت : يمه اروح فدوة لاختي الثكيلة

كوة خلصنا العشا عدهم لحد ما طلعنا مينبلعون

حجيت ويا امي صلت صافنة : ينخاف منهم ييمة

– وينخاف ليش من كل عقلج اوافق بعمي وابنه ؟

سكتت وخلتني احجي واشوف روحي

ثاني يوم راحن خواتي وسون وكالة لامي .. ومن بعدها باعت البيت واتفقت واستلمت الفلوس حطتهن بحساب بالبنك ..

وهنا جانت المصيبة احمد وعمي جانوا منتظرين البيت ينباع ويضمنون بيعة البيت واستلام الفلوس ..

اجا احمد كاللها : يمه لا تكعدين ويا غفران ولا شي فلوسج اتحطيهن وياي وابيع شقتي ونشتريلنا بيت اني وياج

كالتله : انت من الاول ما ردتني لا انت ولا مرتك وعفتني بهالبيت بطرك روحي خلف الله على اخيك اجا وكابلني هسه تريدني

كاللها : لا اني ما طلعت منج اني بس ردت بيت الي .. مو بيت ابويه ولا تنكرين حتى بوكتها كتلج يمه تعاي عيشي وياي ما رضيتي الا تبقين وبقيت فوك الشهرين مشتري ومنتظرج تنتقلين وياي وما قبلتي صح لو لا

– انت الصح يمه بس اني لا اريد اكابل احد ولا احد يشيل حملي من البداية كتلكم ما اريد غير غفران وابنها يكابلوني

– لا غفران هم شابة وما تضل عزبة انت ابالج سهلة عليه اختي تداوم بالرئاسة وتطلع وتطب بس غير بالع موس ببلعومي وساكت جيف بعدها ما مخلصة عدة .. بس اني ما ارضى غفران تضل عزبة رايحة وجاية كدام الناس والله شني حتى تربي ابن هالعار اليسمونه حجي وهو مرتاح ومتونس ويا مرته الثانية واحنا مبتلين

– مبتلين بايش باكلها بشربها لو ابنها

– مبتلين بيها تطب وتطلع شنو مكرنين ما عدنا غيرة اختنا مسوية الدرب كوترة اتطب وتطلع بكيفها الناس اكلت وجهنا كل واحد يصفط عليها اشكال والوان

– محد مصفط عليها واحلف محد حاجي ولا كايل بس تقاسمتوها انت وعمك تزوج غفران وتطيها لابن عمك خاطر عمك ياكل حصتها وتبعدها مني وتغصبني اكعد وياك واحط حصتي وياك لا تحلم يا حميد اكعدلك واواطيك والله لا انا امك ولا اريدك وبتي مالك غرض بيها هذا وعدي وياكم من البداية

– اتعيشين وياي ما تعيشين بعد راجعلج رغم انت امي واني اولى واحد بيج ما مسموح لاي واحد لا علي ولا خواتي .. هاي اهانة بحقي اني ابنج الجبير وتكعدين عد غيري

تعاركت وياه امي

بس هو انسحب من العركة ما طولني اني موجودة ميكدر يكوش على حصة امي من الورث لازم يبعدني حتى تبقى امي وحيدة ما عدها بيت تنجبر تكعد عنده ..

خابر على عمي .. واجو بالليل صاح : غفراااان

رحتله : ابن عمج يونس طالبج على سنة الله ورسولة

– بس اني ما اريد اتزوج ..

– واحنا بكيفج تريدين لو ما تريدين شعدج مكابلتنا

– ممكابلة احد ولا كاعدة عند احد وبيتي موجود منتظرة ماما تكمل امور البيت حتى ننتقل

– هاي ما بيتي وسيارتي وتتبخترين كبالنا وشايفة روحج والعباس ابو فاضل هنا الزمج اكسر ظهرج ما عدنا بنية تكعد ابيت وحدها

– مكاعدة وحدي ماما راح تكعد ويايا

– ما تكعد وياج امي ما تكعد غير يمي

– ايباااه شنو هالمحنة النزلت فجأة منو العافها مكسورة ومشى وما كابلها

كاعد احجي ما احس الا سطرني راشدي ويكلي : هاي منو الكاعد يطلعلها صوت ولج لا عبالج اشتغلتي بالرئاسة تكبرين بالنعاااال اهينج والله

دفعته مني : انت معليك بيه ومو بكيفج تزوجني افتهمت لو لا كسرتني مرة لا تحلم تعيدها مرة الثانيييية اني مو لعبتج ولا عبدة بيدك

شلون كتله هيج هد عليه ..

اتطابخت وياه هو يجر براسي واني بقميصه واصرخ اتراكضت نسرين وامي عليه .. علي ما جان موجود .. امي كامت اتدك عليه ونسرين تجر بيه شكت قميصه امي وخر مني

كمت اصيح : مو عبدتك ولا ابقالك افتهمت لو لا .. عبالك الله خالقك اخوية تتسلط عليه ولا باحلامك ما تحكمني مكاعدة عد احد ولا مكلفة احد بعيشتي والله اليتقرب متي اكله بسنوني افتهمت غصبتوني مرة وورطتوني بطلف ورجعتلكم مطلكة الثانية ما تنعاد والله ..

كام يصيح : ولج انت تشكين قميصي يا غفران اليوم محد يخلصج مني اليوم ادفنج

– ادفن روحك مو انت التحكمني بس لان انت رجال معتبر روحك عليه ولي امر .. لا والله لا الك ولا لجبيرك .. وبس تتعدا حدودك ويايا لا اطلعلك زلم تشك حلكك والله

– انت تهددين ولج طلعلج ظهر وكمتي تهددين اني اهددك

– اذا ما رايد تخسر وظفيتك وينهجم بيتك لا تتقرب مني انت بحشد واني بحشد دعوة وحدة مني لامن الحشد اكولهم اعتدى عليه اخليهم يشيلوك ويعلكووووك والله

– تشتكين عليمن ولج اني تشتكين عليه وتهدديني بالأمن

– واسوي كلشي لو اقتربت مني .. كتلك سويتها مرة لا تحلم تسويها مرة ثانية

ابني جان كوة يمشي بالكاع واني وياه نتعارك

والزم ابني ببجلاق اندفع الطفل ليغاد وانچبح على وجهه والدم كام يجري منه .. ركضت لابني ناط من البجي .. كلت ابني راح ينشمر ما فكرت بالدم اكثر ما فكرت بسكرته كمت ادك على ظهره واصرخ وامي واحمد اتطابخو ونسرين اتجر بيه

واني اهز براسه اريده بس يطلع صرخته من يبجي

واتوسله ماما حبيبي علوووش ماما احجي وياي ابنييييي

صرخ وكام يبجي بصوت عالي .. حضنت ابني وكعدت وكمت ابجي ونسرين تجره مني وتكلي : ولج الدم ترس هدومه وهدومج كومي

كمت ابوس بيه بدمه وعيوني تجري

رحت للحمام .. اغسله وهو يصرخ .. نزعته هدومه وسبحته حتى يهدأ وبعده يصرخ شلته بالخارلي لكلبي هدأ .. اخذته ورحت للغرفة طفيت التبريد وكعدت مرجعته لحضني : كلت خلصنا ماما وراحت ايام التعب والقهر والعرك والصياح بس شكلنا اني وياك حصتنا القهر والتعب يماما كلفتك بظروفي وكاموا يأذوك حتى يأذوني .. والله يا ماما تعبت منهم والله تعبت هلكد ما احارب حتى امنعهم مني ومنك .. منعت ابوك من اذيتنا وضلوا اخواني شراح يخلصها وشكد بعد اني وياك نتحمل

احجي وهو هادئ وساكت بحضني جوا الخاولي

بسته وحضنته وطلعتله صدري ارضعه كام يباوع بوجهي بستنه بكصته .. خشمه مزلغ من الوكعه .. لزمته حتى اتأكد ما بيه شي يوخرني ميخليني الزمه بس ميبجي يعني ما بيه شي بس متأذي شوية

حضنته حيل وهو يرضع مني ..

وبقيت افكر جديا ارفع باحمد كتاب وهو حشد حاله من حالي .. اكولهم اعتدى عليه وعلى ابني يشيلونه تحقيق اذا عادها يحولوه محكمة اسرية ويفصلوه .

دخلت امي .. كالت : انت ليش طايحة حظ ومتستحين شلون تهددين اخوج

– والله عاد ابنج بستاهل كافي لهنا وحدها مطالبة منهم غير يتركوني بحالي بس لا طالبة منهم يعيشوني بييوتهم ولا يصرفون عليه يوم الاغلط لو شافوني ويا واحد خلي يجون يكصون ركبتي بس ما اسمحلهم يجيرون بحياتي بكيفهم مو اني الامشي بكيفهم

– وتهددين

– واسويها مو بس اهدد

– شتسووووين ولج تالي همرنا بيت عصام مشاكلهم توصل للامن ويشلون اخوج

– وانت راضية باللي سواه ببني

– لو راضية ما اتطابخ وياه واكتله واطرده بس من اسمعج مرة الثانية اتهددين اخوج لا الزم السانج واكصه

– لا ما اهدد اني مو فارغه اني من باجر ارفع بيه كتاب واعلمه منو اللي يمد ايده على ابني ويكتلني اني مو غفران ذيج الجان حاطها خدامة لمرته تكنس وتغسل اولاده .. اني اليوم اكبر منه ومن الولاه .. خلي يحترم نفسه ويعرف اوادمه

– ولج شو تكبرتي حيل طايحة الحظ

– ما كبرت على احد اتكبرت على اليتسلط عليه وهذا حقي لا تعتقدين راح اكعد لا حول ولا قوة اتنطر رضاهم عليه ما بحاجة رضا احد غير الله ..

– دخلي اسمعج رافع بيه كتاب ومخزيته لا الزمج والله واتبرى منج

– وترضين يتسلط عليه

– ما راضية وراح نحلها

– لو تكدرين تحليها ما جان هذا وضعي بيدي طفل واني هالعمر مطلكة .. كافي ايدج لوحدها متصفك سانديني اوكف بوجهه كافي تتنازليلهم واتبيعين البيت بس حتى يرضون هاي كدامج وعدج يخليج مسؤلة عني وهاي خلف بوعده وهسه يريد ينطيني لابن عمي حتى يجبرج تبقين عنده شضل عندج وتتنازلين لاحمد واطماعه .. ما راح اسكت

– مثل ما انت بتي هو بجري وابني يا ففران لو اشتكيتي عليه وضريتي برزقة جهاله والله يا غفران ما ارضى عليج وغصبي يصعد لسابع سما وشوفي توفيق الله شلون ينعدم عنج ساعتها اتبختري بروحج زين

– بچرج كاعد يلمني يمه اللي تكولين عليه ابنج شوفي اشسوا بأبني مثل ما انت ام اني ام شلون ارضاله يسوي بأبني هيج

– ابنج ما طوله اله اب محد يكربه .. اكعدي واسكتي اني احلها

سكتت ما حجيت بس النار تفور براسي ومصممة اذا بقى مخلي راسة براسي وغصبني .. راح ارفع بيه كتاب .. لشوية اجا علي متخبل

كاللها : يمه كاتلاته ومشككات هدومة ومهدداته بامن

امي كالتله : اني الكتلته واني الشكيت هدومه طك ابنها الجاهل لو صار بيه شي شنگل لابوه غير يهجم بيوتنا فوكانا والله

اندارلي يباوع على ابني .. شافه ما بيه شي نايم بحضني حجه : غفران شنو هالحجي الجديد انت مهددة احمد بالامن

حجت امي : حجيت وياها ما تشتكي

– ولج انت شنو وتهددين .. تشتكين على منو على اخوووج

– ليش تعتبره اخ اللي يسوي بيه وبأبني هيج

– وتنطش بالحشد اولاد الشهيد عصام اشتكت عليه اخته بالامن وينفصل بسببج واني اتخزى بسببج غفران لا عبالج الامن يخلصج منا نحط طلقة براسج ونفتك منج لو فكرتي تسويها وتفضحينا

– علي الطلقة والموت هدد بيه غيري تعرف الموت امنيتي الاخلص بيها منكم واروح يم ابويه بس خليها ابالك لو احمد اتجاوز حد…. كاعد احجي

رفسني : بعدج بعدج اتهدييييييين اطكج والله

جرته امي مني وبقيت كاعدة بمكاني افور ..

بس لإن اسمهم زلم يتحكمون بمصيري شلون ميحبون ويحللون لنفسهم حتى القنل في سبيل ميتخدون اي اتركوني شطالبة اني غير اعيش اني وابني حياة كريمة وشريفة لا عندي سوالف مكسرة ولا اني صاحبة حمرة وكحلة حتى اجيب الحجاية الهم شو اطلع بعباتي وارجع بعباتي ومحد اله عليه حاجة .. زلم ثكال عبالها تحصل تالي مكدرو وانسحبوا بكرامتهم ومتقربوا مني .. بشنو غلطت واذيت منو ؟ كل اللي اريده اريد اعيش بكرامة ما أحتاج احد ولا ركبتي احطها بيد احد .. شضارتهم !

ردت اداوم ثاني يوم .. جان الكى جامات السيارة مالتي كلها مكسرة ..

يا ربي فرفحت من الصباحيات وكمت ادك على راسي .. شكسرها .. ماكو غير احمد عباله يكسرني بجامة سيارة .. اتحسبت ربي ودعيت عليه من كل گلبي .. وطلعت

اخذت تكسي وبالباج دخلت الخضراء … وصلني لمكان دوامي

بالطلعة ماكو تكسي يمر بالخضراء طلعت من المبنى .. ودكيتها مشي وكفت سيارة تاهو .. انداريت نلت الجامة لكيته بشار .. كال : سيارتج وين

– صارلي بيها حادث

– لا اصعدي اصعدي

– لا تسلم اكملها مشي

– دصعدي يا عيني حتى لو مو كدام اصعدي ورا احسبيني تكسي

ابتسمت وصعدت ليورا .. وكلت : السلام عليكم

– وعليكم السلام شنو صدك مسوية حادث

– شسوي بعد الحمدلله على كل حال

– وين بيتكم انت

– لا انزل بس اعبر الخضراء

– شنو القصة يمعودة خوماكو شي هسه ما حصلنا مطعم .. نحصل توصيله

– العفو منك بس اني مو رخيصة ولا صيدة لاحد حتى تدور ويايا توصيله لو طلعة اذا متعود تحجي بهيج لغة ويا البنات التعرفهم اني ما متعودة وما اتقبل اترجاك تركن السيارة حتى انزل

– لا والله اسف بالقران ما بنيتي شي اني احترمج والله وانت اخت عزيزة عليه .. لا تزعلين مو بقصدي شي يشهد الله

– الله يسلمك بس اذا تكدر نزلني

– اذا نزلتي راح اعتبرها زعلتي مني اني والله مو بقصدي احجي هيج كلش اعتذر منج اسف

– لا عادي .. تصير شكرا

تركته وكال : اذا تريدين افرغلج احد يوصلج ويجيبج هاي الفترة

– لا شكرا اني اتكفل الموضوع لحد ما اصلح سيارتي

سكت طول الطريق محجه .. لحد ما وصلني للشارع كتله : يمك

كال : انت ما واثقة بيه ترا والله اني مو بنيتي اذيج

– لا بس وصلت

– لا ما راح ارتاح اذا ما اوصلج لباب بيتكم

وصلني لباب بيتنا .. جان احمد وعمي واكفين بالباب نزلت احمد تخبل

اجاني ركض : تعاي بت القنادر منو هذا الصاعدة وياه

نزل بشار بسرعة من السيارة وركض باتجاهي جراه مني بسرعة

بشار طول ومعضل كل عضلة بأيده متر لابس قميص سمائي وبنطرون اسود قماش .. احمد اخوي ضعيف وهلكده وراد يدافع ويا بشار .. بشار لزمه وشاله ع البنيد مال التاهو كاله : انت تعرف ويامن كاعد تحط راااااسك

اني ركضت للباب .. وعمي كام يفازع بيناتهم ويصيح

دخلت للبيت بسرعة وكتلها لامي : اركضي مصيبة

كالت : خير ولج شكوو

– احمد تعارك ويا الحماية مال رئيس

لطمت وجهه : اصخام الصخمني حماية الرئيس اجابه على ابني يمممممه

طلعت امي تركض .. اني قفلت الباب عليه وعلى ابني .. دخلوا عمي واحمد يريدون يكسرون الباب عليه ويهددون ويتحلفون .. وامي ونسرين وكفن كدام الباب ودكوا رجل اباب الهول اليوم نا يطلعون اذا ميفتهمون شكو وشصاير

وهم ديصيحون خابرني بشار .. اني دا ابجي كال : اذا البيت خطر عليج بأمكاني امنلج مكان بالخضراء تستقرين بيه مؤقت اني قريب من البيت

– شكراً. الك تسلم اني كتلك نزلني بالباب لإن اعرف الوضع بالبيت صعب

– العفو ع التدخل بس شديصير وياج وشلون يعتدي عليج بالشارع بهالطريقة

– هو اخوية وهالفترة بيناتنا مشاكل

– اعتذر عن التدخل بس شتحتاجين امانة الله لا تترددين تخابريني

– شكرا الك .

سديت الخط منه ..

واحمد وعمي ناصبيلي سيطرة بالباب .. واني كاعدتلي بالباب خاف احد يتقرب ع الباب ويكسرها ويأذيني ..

لحد ما اجا علي .. يكلوله جاية هي وصاحبها مركبها تاهو وجايبها للبيت ولك هاي اختك عاااار عار اذا ما ينطم عارها نطم روسنا .. هاي تريدوها تشتغل وتروح وهي كايدتلها واحد معضل شطوله وجايتبته حتى يسوك على عمها واخوها ..

هاي اذا تضل عزبة مطلكة تجيبلنا العار .. اكطع راس الحية وامنعها لا تخليها تشتغل ولا توصل شغل .. خل تولي

كام علي يحجي وهم يتصايحون كاللها : يمه افتحي الباب

كالتله : ولو كتلوها

كاللها : بحمايتي محد يطخها بس افتحي الباب نفتهم منو هذا الجايبته

فتح الباب كال : تعاي ولج منو هذا غفران

– ولد يشتغل ويانا برئاسة الوزراء ولإن شافني بدون سيارة سيارتي كعدت الصبح سيارتي مكسرة وامشي بالخضراء ما بيها تكسي كالي اركبي حارة اني اوصلج رفضت بس الولد اصر لإن الطريق لحد ما اطلع الخضراء طويل .. ومن طلعنا وكتله نزلني ما رضى كال صدك جذب اوصلج بطريقي وهاي اتحداهم ينكرون كعدت ورا ما كعدت يمه ولا صديقي ولا يربطني بيه اي شي مجرد معرفة كونه هو وياي بمبنى رئاسة الوزراء

حجه : غفران شلون ما راح نخلص من مشاكلج

– اني اي مشاكل جايبتها منو المكسرلي سيارتي منو اللي اتعدا على ابني اني واصلة احد مأذية احد شو هم الديأذوني وتكلولي مشاكلج

كب عمي وهو يكول : تالي وكت زلم من الرئاسة توصل بناتنا متت يعصام وما شفت بناتك شيهرمن كله زلم وحماية وتاهوات توصلهنننننن

تعاركت وياه امي وصارت هوسة

كمت اخذت ابني ودخلت جوا .. رجع طب احمد كاللهم : هاي طايحة الحظ بعد مالها طلعة من الليت لا شغل ولا دراسة ولا توصل باب البيت .. من توصل عتبة الباب والله لا ادفنها

كام علي يحجي ويتفاهم وياه

احمد قفل وعمي مسانده ومصايح وهوسة ..

واني كاعدة كاتلني القهر ..

اجتني امي كالت : باجر لا تداومين اخذي اجازة

– ليش حتى احمد يرضى

– لا حتى نتجفى المشاكل عوفيها بس باجر

– اي اخذت اجازة باجر شراح يصير عكبه راح يسمحلي

– هسه اخذي اجازة واكعدي باجر والله كريم لعكبه

– والنعم بالله بس الاجازة متغير شي هم رايدين يبطلوني كعدت يوم اي وتالي اواجه ثاني يوم .. اذا كعدت يوم يحسبها اتنازلت طلعتي تصعب ثاني يوم .. ماله حق عليه هو لا ولي امري ولا كفيل بعيشتي .. شدي غراضج خلي نطلع لبسمايا هناك لا يكدر يتقربلي ولا يكدر يغصبني

– انت بكيفج عبالج ما يكدر يغصبج ويكدرلج شنهي بعيدة بسمايا هو شو بيها .. ولج لزموج وكسروا رجلج شتسوين لزموج وعوقوج شتجنين ولج انت ليش ما تفكرين ليش ما تخاااافين مو كله زود وقوة يمه ذولة جلاب ..

– وعندي ذياب التردهم بس مو انت الما ترضين اتصرف

– هم عادتها ولج شنو من بنية انت ولج عيب سمعة ابوج هاي يمة مات رايته بيضة تالي حجاية ولده على كل السان بين اصدقائه ومعارفه ابوج ما يستاهل تجبيلا السمعة الناس ما تكول اخوتها مو زينين اول تهمة يكولون لكوها متعة ويا واحد واشتكت عليهم الناس باطلة تتهم وتطعن بلا شوف ولا خوف من ربج سالفة الامن لا تجيبيها على السانج

– وشلون اضل عبدة بيدهم يحكموني

– ما يحكومج بس عقل

– يا عقل وهم ديمنعوني من دوامي وانت اتكليلي اكعدي لا تداومين

– مو احين ما يحطوج ويخلون بيج عاهة وانت بهالعمر هم رايديج كاتلين روحهم عليج رايدين حصتج يعوقوج ويذبوك ويتلاغفون حصتج صعبة

– اي صعبة اذا خليتيني اتصرف

– انت طايشة وماخذة الدنيا بحيل صدر حسبالج شغلج ورئاستج توكف بوجوهم ولج

– ما اصير لعبة باديهم ماما اموت ولا اخليهم يتحكمون بمصيري ومصير ابني .. ايوب ما رضيتله وخلعته واني روحي بيه .. ارضى لولدج يلعبون بمصيري اني مو مثل باقي بناتج يكتفون بدمعة ودمعتين اني ما اسكت ولازبد ينحطلهم حد .. ما رايدة منهم غير يخلوني اعيييش بس

بقت تحجي وترزل وكلامها كلام اليريد يتجفى المشاكل ويطلع باقل الخساير .. واني منطقها ما يقنعني ولا يرضيني .. ما ارضى احط ركبتي بديهم لو هسه اموت .

صار ثاني يوم .. اترددت اداوم

بس كلت ما داومت اليوم قابل باجر راح يكلولي هاهية يلا اتوكلي خلصت المشكلة .. المشكلة يحتاجلها حل مو اكعد اتجفى واسكت واطمطم واخذ اجايز .. بدلت ورحت لدوامي ..

انطتني الدكتورة نجوى ملف كعدت عليه للساعة ٣ وربع يلا كملته وشلت راسي حتى فقرات ركبتي كامت تأذيني .. والكل طالع باقين بس اني وياها .. كالتلي : حياج عاشت ايدج هم زين كملتي يلا نطلع

ردت اطلع من المبنى وكفت بسيارتها .. كالت : سيارتج وين

– ست صار حادث واتفلشت وبالتصليح مضطرة هالفترة اخلصها هيج لحد متكمل

– اصعدي

– لا ست شكرا ما اكلفج

– اصعدي ماماتي بطريقي

صعدت وياها بالصدر .. وصلتني بطريقها لمكان قريب على بيتنا ركبت كيا نزلت براس الشارع مالتنا .. ماما دازتلي رسالة : لا ترجعين للبيت روحي لبيت خالج .. بس اني مشايفة الرسالة ولا فاتحتها لإن جنت اشتغل على ملف مهم ومباوعت تليفوني لحد ما ردت اوصل لباب البيت قريتها اهتزيت : دخيلك ربي ليش امي كاتبتلي هيج

رفعت راسي احمد طلع يباوع اذا اني اجيت شافني

عرفت ناصب محكمة اعدامي التفيت وردت امشي ركض ولزمني وكال : فوتي جوا

– وخر من عندي

– هششش فوتي جوا بدون صوت

دخلني جوا ورفسني من الباب صرخت امي ركضت وتلزمني عمي .. عمي يكتل من صفحة واحمد يرفس من صفحة وعلي اخوي يفاكم ويصيح وامي تصيح ونسرين .. لزمني احمد سحلني من شعري دخلني جوا وامي تجر بيده وعمي بقندرته يضرب على طهري ويكله : اي ولك ربيها هاي الما مترباية اكتلها

رفسني احمد وعلي دفعه وحطني وراه جرني عمي من وراه ولزمني من راسي تلزمت وياه امي .. لزمتني نسرين دفعتني بغرفتها وقفلت الباب ابجي بكل قوتي واصرخ ..

كام احمد يرفس بالباب يريديني اطلعني اتطابخ هو وعلي لزم علي كتله هو وعمي ويكله : هسه تنطينياها اختي واني الحبير انت ما تفك حلكك

علي يكله : والله ما انطيكياها ولا الك حكم عليها

كام عمي على علي ويتعارك وياه وكتله واحمد وعمي انداروا على عليي .. كامت امي تصيح انبص البيت كاللها عمي : اذا ما تطونا غفران اليوم نهجم البيت بأهله والله

كاعد يحجون اندكت الباب صاحت نسرين : ابو عرب اجا هو وبلال

حجه احمد : اني خابرته خل ياخذ ابنه اليوم مالها ابن عندي

اني بالغرفة سمعت يريد ينطي ابني ومخابر على ايوب فتحت الباب وطلعت اريد الزم ابني جره احمد من الغرفة نايم .. وطلع كمت اصيح واعيط واكوله : ابني ما تنطي لاحد

مجلبه بيه وامي تجر بيه واعلي يصيح عليه يكلي : فوتي جوا

– ما افوت انطوني ابنييييي

دفعني علي وكام يغلط عليه : اني اصير الج لو لابنج شوفي شصار بحالي من وراح ومن ورا عناااادح طبي جوا فضينيييي

– ما طاب اريد ابني ما تنطوووون ابني والله ما تنطوووون ابني

دفعني علي جوا واشر لنسرين كامت تجر بيه وهو سد باب الهول

وكفت يم باب الهول اريد اسمع اذا انطوه لايوب حتى اطلعله من باب المطبخ اخذه منه

دخل ايوب للاستقبال كاله احمد : حجي هذا ابنك اخذه ولا تجيبه بعد

ايوب : شنو الصاير ليش حتى تخابرني اخذه الطفل بحضن امه يرضع

– ماله ام عدنا امه راح تتزوج وابنك الك حجي ويا دار ما دخلج شر

– منو الرايد يتزوج ؟

– اختنا وبكيفنا هذا مو شغلك حجي

– اسمع لك .. احجي وياي عدل ولا تشمر منو هاي التزوجها والمن رايد تزوجها

– لا اشمر عليك ولا تشمر علينا اختي واريد ازوجها لابن عمها .. اليربط بينا وبينك هالطفل اخذه وروح

– تزوج مرتي وهي على ذمتي !؟ انت شدا تلعب شحاسب روحك ويامن كاعد تلعب انت بابا

عمي واحمد انصدموا حجه عمي : يا ذمة ويا مرة المرة طلكتها وخلصت عدتها

– وانت سامع مرة اطلك رجال بخلع ؟ طلكنا محكمة بس شرعا هي مرتي .. لا رميت عليها يمن الطلاك ولا اتنازل عنها لا هي ولا ابنها كل ما بالموضوع مرتي صغيرة وطايشة وتعبتها وردت اماشيها واخليها على مايها لحد ما تصحى لروحها وتردلي بس مال تجون اتزوجوها وهي اعلى ذمتي لا والله لا الكم ولا لهلكم واليرش عبايتها بماي ارشه بدم اليگربها والعباس …..

 

• يتبع الفصل التالي اضغط على (رواية صوت من المجهول) اسم الرواية