رواية صوت من المجهول الفصل السادس و الاربعون 46 - بقلم زينب ماجد
كمت اصرخ : شنو مات سرى احجي منووووو مات ايوب ويييينه
– ايوب مات ولج ماااااااات
سمعت الخبر مثل الصخرة ونزلت على راسي اريد حيل لرجليه اكوم بيهن بادن رجليه ونسيت شلون اكوم عليهن كمت اردد لا اله الا الله لا اله الا الله
وعيت وكمت اصرخ بكل صوتي .. يمه راااااح .. ايووووووب راااااااح
كال ميعرفني وعااااافني يمممممممه
تراكضن امي ونسرين على صوتي
امي كامت تصرخ ونسرين تبجي وتشيل بيه
فزيت فاقدة سحبت ربطتي شديتها وجريت عباتي وطلعت من البيت اركض بلا وعي .. بس التليفون بيدي وارجع اخابر بسرى كال احنا هسه بطريقنا للمستشفى حتى نستلمه هو وبلال
– شلون مااات كليلي شلووون ماااات والله كال ميعوفني
– متعرضين لمجموعة واطلاق نار ومكلوبة السيارة بيهم
كامت تبجي بقوة .. دنكت الزم بالكشن ودموعي تنزل على هدومي واردد انا لله وانا اليه راجعون ..
الطرق مقطعة والسايق ابتلى منين يطلع .. واتعاطف وياي كلش من شافني ابجي .. ردت انزل اخلصها مشي .. كال : لا خوية بعيدة المستشفى ابقي
وكام يمشي بالفروع واني كلبي يفور شيوصلني
واكل بروحي عفته يروح ..
للحظة مرت كل مواقفه وياي
واول موقف عرضلي يوم اللي طلبت منه ادرس وكتله اخواني منعوني ولزم ايدي كال اني ابوج واني اهلج ادرسي واصعدي واني بظهرج ما اعوفج .. انسى من ايام الاتمرض حتى لحذائي ينزل يلبسني ويدلي القيطان لو يبقى يلوب لو لكاني مصخنة لو انسى شكد كعد يقريني ويسهل عليه ايام امتحاناتي
اذكرهن ودموعي تكت بحرارة
بس ايوب اشد ظهري بيه وانكسر ظهري
وصلني لمكان يبعد عن المستشفى شارعين
ابتوع اريد فلوس انطي كالي : يا فلوس خوية توكلي واحتسبي ربج واجرج على الله
-الله ينطيك
نزلت امشي خطوة واركض خطوتين
ودموعي بحرارة ما تتوقف .. حطيت النقاب على وجهي واستمريت اركض لحد ما وصلت هناك لكيت سرى وخالتي ونادية يبجن ويصيحن .. عرفتني سرى فتحتلي اديها وهي تكلي : اخوي راح ولج راح ايووووب راح
حضنتها وكمت ابجي بقوة
وخالتي فاقده بحضن نجلاء .. وناديه عيونها مورمة وتكت دموع
مشيت كالت سرى : عمي كال لا تدخلن جوا ولا تجن خليجن برا
تركتها ورحت ابحث وادور لحد ما لكيت صلاح … كتله : عمي وين
اندار : منو
-غفران مرت ايوب عمي وين الله يخليك خليني اشوف ايوب ولو لاخر مرة
كاعد احجي مرت سديا من عدنا واحد رايح جزء من راسه اجزاء دماغه كلها مبينة انداريت اعصر بروحي .. حجه صلاح : عمي دخل يتعرف عليهم من بين الموتى حتى نستلمهم
– الله يخليك خليني افوت لا تحرمني اخر لحظاتي وياه
حاط غتره على اجتافه يجر بيها ويمسح بدموعه
كال : اصبري اشوفلج مجال
اجوا اخوة بلال وابوه .
والنسوان برا محد منهن خلوها تدخل جوا لإن المستشفيات ازدحام ومقبطة بالجرحى والشهداء .. اني محد منهم لزمني لان حاطة نقاب ما عرفوني .. مشيت ورا صلاح .. وكفت اباب الثلاجة طلع عمي ابو نور يبجي بحركة صف ويا صلاح كاله : بلال لكيته بس ايوب ما جاي الكا ونص الوجوه ما تنعرف من الحوادث الجرت عليها
دا يحجي صد ابوجه اخوه ابو بلال صرخ : عظم الله اجرك خوية ابلال
كام يصرخ ابو بلال بحركة ويلط على راسه واخوانه خبصوا الدنيا بالبجي .. اخوانه صغار مو بكده اكبرهم عشرينات مو بكبر بلال نهاية الثلاثينات .. كامت دمعتي تجري ويا دمعتهم
عفتهم ومشيت لدكتور بنهاية الممر واناشغ كتله : فدوة رجلي ما لكاه عمي ما تعرف عليه بين الموتى
– شسمه رجلج
– ايوب محمد
– شفتي بين الجرحى
– ما ادري ما شفت احد
– اكو هواي جرحى نقلوهم النا وما نعرف هواياتهم لكثرة الحوادث ادخلي منا وروحي على ايدج اليمنى
كمت امشي لكيت صلاح وراي مشينا اني وياه
الجرحى كومة وكل اثنين بسدية حاطين واحد من اليمين والثاني من اليسار والمستشفى وضعها تعبان الى ادنى درجة
ادور بين الوجوه صاح صلاح : هذااا خووويه
ركضت على صلاح .. وادخل الكا ايوب مشمور ويا جريح بس وجه احمر من الدم والمستشفى عليها لود والدكتور جاي يفتر وياخذ حالات ويكسف وينقل صحنا الدكتور عليه كال .. لازم ينقل عمليات بسرعة
كام يقيس نبضه … اتلحكوله بسرعة انقلوه
طلع صلاح يركض واني لزمت التليفون وخابرت على طبابة الحشد كتلهم : الحجي ابو عرب بكذا مستشفى ويحتاج عملية والمستشفى الاحنه بيها ملودة … ونحتاج اسعاف بأسرع وقت
كال : هسه نطلعله اسعاف باسرع وقت ..
كمت اتفقد بيه الدم تارس وجه ملابسه كلها دم ما اعرف منين مجروح
هزيته حاجيته حطيت راسي على كلبه ماكو صوت .. كمت ابجي رجعوا اتصلوا بيه كالوا : الاسعاف توجهت راح نزلج رقم المسعف بمسج
رجع صلاح وابو نور يتراكضون واني لازمته واحجي كتله : الطبابة دزولنا اسعاف بالطريق ننقله الغير مستشفى هنا اذا ميموت من الاصابة يموت من الوضع
– بس خلي ننقله للاسعافات يسيطرون على وصعه بين ما يوصل الاسعاف حتى نعرف سبيه وشنهيه اصابته
شاله عمي وصلاح .. وحطوا على سديا ووياهم ممرض واحد كام صلاح اليدفع بالسديا .. نقلوه كال عمه : غفران المستشفى كلهم زلم اطلعي برا بويه حتى لو منكبة اطلعي وانتظري برا ويا النسوان
تركتهم وطلعت بعدها خالتي فاقده صرخت : عاااايش بعدها عايش
خالتي فزت وام بلال فزت
خالتي صرخت : ايوب عايييييش
وام بلال صاحت : وليدي عاااايش
كتللها : عظم الله اجرج ببلال خالة
كامت تدك على راسها يمممممه ابني راح يمممه
وخالتي صاحت احجيييي
وناديه دفعتني : منوووو العايش
– ايوب عايش بس اصابته براسه ومسمعت نبض بكلبه وضعه حيل صعب
كعدت بالكاع ابجي من كل قوتي
وخالتي تصرخ : يا رحمتك ربي وينك ابووووو فاضل وين ابو راس الخار اليفزع لابني
سرى لزمتني : شفتي يعني شفتي حاجاج
– ميحجي بس كالوا عايش شفته ولزمته بس مجان يتحرك ولا جان يتنفس بس ويا الجرحى عايش
كامن يبجي ويدعن وام بلال و اخته خبصن الدنيا بصريخهن وبجيهن
حضروا كل عمام ايوب وحضرت سيارة النعش التموا عمامه وطلعوا بلال مغطا بجرجف شالوه من السديا كبال عيونا وحطوه بتابوته
كمنا نتصارخ بلا وعي .. حطيت اديه على راسي وكمت اصرخ
وعمامه يتصارخون .. اباوعلهم رجعوا القبق مال التابوت
مبري الذمة خوية مبري الذمة
وابرينا الذمة بحقك .. ابد ما اتخيلت اشوفك ينسد عليك التابوت بيوم
مودع بالله خوية بلال .. سلملي على بابا بطريقك .. تلكاه بساحة الحسين تلتقون هناك يم سيد الشهداء .. ما قصرت كفيت ووفيت مودع بالله خوية
باوعت لسرى تصرخ بلا وعي ومفتحة عيونها حيل وحاطة اديها على اذانها
كمت الها اخذتها بحضني تكلي : قبل سبوع يكلي راح اموت بعلتي منج شوكت تحسين ولج ما حسيت بيه راح يموت ما حسيت غفراااان ما حسيت
كمت ابجي بقوة واني احضنها واريد اسيطر عليها
دك تليفوني .. كالوا : الاسعاف قريبة منكم طلعوا الحجي من المستشفى بسرعة
مسحت عيوني وسديت الخط واتصلت بصلاح بسرعة
ما رد خابرت على ابو نور .. رن شوية ورد كتله : عمي الاسعاف مال الحشد وصلت طلعوا ايوب ووياه ممرض
– يلا
عمام ايوب واهله كلهم ملتهين بالصريخ على التابوت اللي بيه بلال ..
اني طلعت للأمنية بلغتهم بالاسعاف وانتظرتها وصلت .. فتحولها الباب بسرعة وركض كدامها ابو الأمن .. تعارضت ويا سيارة النعش ..
وابو نور طلع يركض وصلاح والمنرض شايلين السديا اللي عليها ايوب
المسعفين من طبابة الحشد بنية ورجال .. فتحو الباب بسرعة واني اتلزم بالسديا ودموعي تكت ركضت خالتي وسرى ونادية ونجلاء يتصارخون على ايوب حجت وياي البنية : انت الخابرتي
– اي زوجتي
– اصعدي ويانا حتى تنطينا المعلومات الكافيا
صعدت بالأسعاف وصعدت البنية وراي ووراها الولد .. وقبطت
صلاح صعد ليكدام بالاسعاف وابو نور كال : نلحككم توكلوا
سدوا باب الأسعاف والممرضة تسألني على دمه اذا عنده تحسس شنو اصابته .. اسمه الكامل معلوماته .. ملفه الصحي .. كم عملية مسوي بحياته .. كل هذا يسألوني وهم يحطوله دم .. ومغذيات ويعالجون بيه .. وهو فاقد ..
اباوع لوجهه اسود اغبر .. وحلكه مفتوح قليل ما يشعر بأي ابرة ولا بأي حركة .. كتلها : فدوة كليلي هو بخير
– ان شاءالله يصير بخير ادعيله لا تفاوليه بالبجي ميصير
– والله جاي ادعي بس دموعي عليه مو بالكيف
وصلنا لمستشفى اهليه نزلناه .. اتلكوه من الباب ونزلوه من الاسعاف وركضوا بيه .. ركضنا اني وصلاح وراه .. دخلوه واحنا واكفين يفحص بيه الدكتور كال لازم يدخل العمليات فورا
انتم اهله
كاله صلاح : اي الرجل حجي قائد بلواء كذا ضمن قطاعات الحشد الشعبي
كاله : راح نسوي كل اللي نكدر عليه والامر يم ربك
اخذ من عدنا المعلومات الكاملة ودخلوه للعمليات .. وعمي والبنات لهسه ما وصلوا .. جانت الدنيا ليل .. وهدوء والحركة قليلة والاتصالات ما وكفت ما ارد على اي احد غير امي و عمي ابو نور بعدهم بالطريق .. الطرق مقطعة ومدا يلكون طريق يوصلون النا احنا عبرنا كل السيطرات والقطع لإن اسعاف .
لزمت القرأن اقرأ
بس واني اقرا اتخيل شكله هو وبلال
وين ما التفت صاح بلال حتى لو عاش شلون راح يكمل حياته وهو كل حياته بلال .. اقرب انسانه اله .. اقرب مني ومن امه .. مو بس سايق يشتغل عنده حتى من يكملون شغل بلال ما يتونس غير ويا ايوب وايوب ما يطلع غير ويا بلال لعبات الرياضة .. عركاتهم على برشلونة وريال مدريد مداهرهم وسوالفهم نركيلتهم ودخانهم كله سوا ما يتفاركون تكول روحين بفد جسد .. م .. يأمنه على اصغر اسراره ما يكول بلال ابن عمي يصيح بلال اخوي الما جابته امي .
مدا استوعب بلال مات
هاهية بعد مموجود منصيح بلال ميشاقينا ميضحكنا ميداهرنا ميحشش علينا .. انتهى بلال وصار الله يرحمه .. كمت اتذكر مواقفه وياي شلون من درى ايوب متزوج واني زعلانة كام يداريني رغم ضام موضوع زواج ايوب بس يباوعلي خوية شتريدين وخوية شتحتاجين ويجبرني اكل وارتاح ما اتعب روحي .. هلكد ما جان طيب ويهتم حتى ايوب غار من اهتمامه .. ورغم مشكلته ويا ايوب وتكاتل وياه رجع بالليل يدافع عن ايوب ويحجيلي شكد هو ما يقصد يشك بينا بس غلط بالتعبير .
ل١١ بالليل طلعوا ايوب من العمليات
حطوه بالغرفة .. سمعته يون فزيتله اتلمسه احاجي والدكتور يحجي : الشضايا اللي براسه طلعناها وطلعنا الرصاصة اللي بجتفه وان شاءالله اتعدى مرحلة الخطر ..
باسه صلاح وكاله : الحمدلله على سلامتك خوية
ما يحجي فاقد بس يون .. كام يهذي ويصيح ..
علوش بابا عليييي حبيب ابوك بابا .. كمت ابجي والزم بأيده ابوس بيها
والدكتور يوصي بصلاح .. اجا عمي والبنات دخلوا التموا عليه كال الدكتور : العملية براسه اذا تريدونه يتعافى امنعوا منه كل ضوضاء وهوسة .. كلش مو بصالحة يدخل ازمة ما نسيطر عليها حاولوا تشوفوه واتطلعون رجاءا
كامت تبوس بيه خالتي من راسه
الممرض صاح عليه : حجيه عمليته براسه يمعووودة
حجت نادية : اني اضل يمه روحوا انتو
خالتي : يا اني اهد ابني عليه العباس ما اعوف وليدي
صلاح : عمي نصبوا الجادر مال بلال
ابو نور : انصب جادره وطلعوا عمامك ويا اهله للنجف يدفنون .. ورانا تعب وركض مو مال نضل ملتمين هنا عدنا ايوب عملية براسه وجادرنا منصوب ابيت عمك رجع لازم واحد من عدنا يرد ويا النسوان غفران ضلي ويا ايوب .. ابنج كون يفقدج
– يم امي خابرتها مقطوع الطرق ميكدرون وابني يمها راح تجيني الصبح
– زين لعد
حجت خالتي : ابو نور ما اهد ابني
– صبيحة مو وكتج ولا وكت معاينجن و مداهرجن ولد من ولدي اثنين واحد ميت والاخر لا حس ولا نفس والحيل على كد الحال امشن كبالي وخلن غفران خفيفة وتعرف ادير امرها .. امشن خل اوصلجن ما طول اطمنتن عليه
كامن يبجن ويبوسن باديه ورجليه وراحن
راحوا كلهم حتى صلاح ما ادري وين مشى .. رجع ايوب يهذي
علوش حبيبي تعال بعد ابوك وحيله .. دمعت عيوني
كمت الزم بايده واحاجي : علوش محتاجة ايوب لتيتمه الله يخليك ارجعلنا على حيلك .. ولا تيتم ابني مثل ما اني تيتمت .. ابنك بحاجتك اكثر من الكل لتعوفه ايوب .
كام يهذي : يممممه يمه ..
مسحت دموعي .. وبعده يون ااااه .. اااه
باوعت عينه مضمديها ولافين راسه واصل اللف لحد حواجبه .. كمامة الاوكسجين على حلكه وخشمه وصوت الجهاز مال القلب بصفر نبضاته طبيعية ..
مرت ساعة اجا صلاح جايب لفة وعصير كال : اكلي خوية ترا وراج هواي وينراد حيل لا تستهيني بروحج
جرت دموعي : اصابته اذيج جان بلال واكف وياي وكفتك هاي .. ما تركه للصبح شراح نكله لو كعد وصاح بلال وهو راسه عملية وما يصير يتعرض لأي ضغط شراح نكله
– الله كريم كولي يالله الله موجود الطلعه من حلك الموت هو يحفظه انا وانت بس نباوع كلها بيد ربج هو الرحمن الرحيم
– والنعم بالله
– اخذي راحتج خوية هنا اني راح اتمدد يم الكرسي اللي بصالة المصعد رقم اثنين اذا احتاجيتيني بس رمشيلي تلكين يمج .. وانت سدي الباب واخذي راحتج هم تعبتي ووراج تعب هواي
– تسلم
طلع وسد باب الغرفة ..
كمت اباوع لايوب دنكت بسته بخده ..
كتلي اليوم ما انام غير بحضنج وهياتك ايوب كدام يعيوني وبين اديه بس انت ما حاس بيه ولا صاحيلي .. ارجعلي الله يخليك ما اريد منك شي بس طولك ساترني وساتر ابني كافي عليه .. الله يخليك افتح عيونك وحاجيني .. كام يون لزمت ايده ..
ون ورجع سكت ويرجع يأن .. وهم يسكت
تركته ومشيت للحمام غسلت وجهي وميت شعري واتوضيت وعدلت ربطتي وعباتي وطلعت .. فتحت الخانة اكو سجادة وتربة طلعت كاعد امد سجادتي .. صاح ( غفراااان غفرااان) بتعب وونين .. مشيت لزمت اديه وكتله : عمر غفران وكلبها
ما يحجي بس يون ويذكر اسامي تمر اباله ..
رجع حجه ( بلال جيب غفران ) سكت
رد حجه (لا تعوفها جيبها)
تنهدت وكمت اباوعله .. بقهر بحسرة راحت ايام بلال جيب بلال تعال
يا ايوب بلال الليل مو يمنا ولا بعالمنا بلال راح
رجع هدا تركته
ووكفت صليت وكعدت اقرأ قران .. دخل الممرض
كال : العفو
كتله : لا العفو منك تفضل
حجه كال : كعد حجه وياج
– لا بس يهذي باسامينا اني ابنه امه اخوه
– كلش زين اذا يستجيب ويذكر اسامي
– شوكت يخلص تأثير البنج
– مو تأثير البنج تأثير الضربة الشضايا طلعوهن من راسه مو سهل وضعه ربه باوعله من فوك
– الحمدلله رب العالمين
شكل مغذي وكام يحط بيها ابر وكال : راقبي المغذي اذا خلص لو تصيحيني واذا تعرفين بس سدي تعرفين
– اي اعرف عندي تجربة بهالموضوع سابقا
-كلش زين سلامته ان شاءالله
– الله يسلمك
بقيت اصلي وادعيله لحد ما كمل مغذي وصارت صلاة الفجر
والجوء هدوء وراسي ذابحين من الصريخ والبجي والهبطة الاكلناها والقهرة اللي على بلال ..
هو ما بلسانه غير علوش
يذكر الباقين شوية ويرجع يصيح بأسم ابنه
تمددت ع القنفة وتغطيت بالعباية وغفيت شوية ..
وعيا على حركة فتحت عيني ممرضة كاعد تشتغله .. رجعت غفيت
لحد ما صارت ب٨ ..اجا صلاح يتثاوب كال : ما كعد
كتله لا ..
لل١٠ اجت امي وعلي ووياها ابني كامت تبجي وتواسيني وتصبر بيه
واني ماخذه ابني بحضني كتلها : اذا تعبج عوفي يمي
كالت : لا بره اعوف عليوي بالمستشفيات بنص الامراض شبيه يمه ..
علي اخوي ويا صلاح .. وعلوش بيدي نزل من حضني واني اسولف لأمي الموقف .. وراح على ايوب شاف بيده كانيولا .. جذبته عباله لعبه .. خلا وجرها فزيت اصيح : يا يمه
جريت علي بسرعة ولزم ايد ايوب كامت تنفض دم
طلعت بسرعة اصيح كتلهم : صيحوا الممرض بسرعة صيحون انكسرت الكانيولا بيده
رجعت امي شايله علوش خابص الدنيا بجي شلون شلناه
كتلها ماما طلعي الصوت يأذي طلعي .. دا احجي فتح ايوب صاح غفران
رحتله : عيون غفران .. ايوب تسمعني
-اني وين
-انت بالمستشفى
كام يغمض ويفتح بعينه حجه : ليش يبجي جيبي
– يبجي عليك غفلنا عنا وجر الكانيولا من ايدك و اذاك
-لا تخلي يبجي جيبي
طب الممرض واني طلعت لامي تريد تسكت بيه نط من البجي
اخذته ومشيت لايوب كتله : اش اش بابا اواااه دم باوع شون دم خطية
كام يباوعله ايوب بتك عين مصوبها عليه ..
كام يذب روحه على ايوب واجره كتله يلا بوسه بس على كيف
مديت راسه يم خد ايوب وعلوش باسه ترس خده سلاچ
ابتسم ايوب
وصلاح يحجي : غير تنتبهين يا خوية هسه لو صايرلا شي
حجه ايوب : وين بلال ؟
كمنا واحد يباوع بوجه الأخر حجه بسرعة بديهية صلاح : وينه المسكين حاله من حالك بس انت صحيت هو بعده
– زين ؟
– هو زين بس هم فاقد ان شاءالله تكومولنا بالسلامة
غمض كال علي : يلا يمه نرجع الحجي متأذي مو مال نبقي الطفل يمه
سلموا عليه وراحوا والممرض عالج ايده .. وامي جايبتلي جنطة تليفوني وايبادي وشاحنات وملابس اليه وفلوسي وكلينكس ناشف ومبلل
طلع الممرض لزمت ايد ايوب فتح عينه حجه : شصار ؟
– ما ندري شصار وياكم بس خابرونا كالوا مسوين حادث
– مو حادث من الرصاص فرها بلال وكلبنا
– الحمدلله على كل حال المهم انت بخير ..
– بلال شلونه
– زين
رجع غمض .. ردت اترك ايده لزمها وفتح
حجه : متأذي لا تتركيني ..
بسته بوجه : روحي ترخصلك مو بس تبقى يمك
رجع غمض
دخل صلاح كال : غفران اطلعي بسرعة حجاج جايين من الهيئة عليه
طبكت النقاب مالتي بسرعة .. وطلعت بسرعة .. دخلوا هم للغرفة ترسوها .. صار صوت يمه وهم يشجعونا ويشدون عليه علمود يكوملهم بسلامه
دخل الممرض منع الزيارة كال : كلش مو بصالحه العملية براسه لا تأذوا
تعذروا وطلعوا
رجعوا شوية وهم اجو صحبانه بالوحدة
ما طولوا خمس دقايق وطلعوا وكل اليجي يبلغهم صلاح كبل لا يدخلون ما يجفصون باستشهاد بلال لان مو زين عليه اي ضغط
للظهر اجت امه ونادية .. هم حذرناهن يحجن
كامن يبوسن بيه ويبجن هم طلعهن صلاح .. كالت امه : ارجعي غفران ويا نادية وخليني ويا ابني
نادية : خالة انت مريضة اني ابقى وياه ما عندي شي
– ما اكدر اعوفه ابد مراح اكدر امشي لأي مكان الا هو وياي .. بغيرها ما اتحرك من عنده.
نادية : انطي مجال لغيرج مو بس انت مرته ولا بس انت المحروك كلبج تحبين تعرضين بروحج و تتصدين اني هم مرته .
– راح يرجع وراح تشوفي بس لازم يطيب
خالتي : ارجعي غفران وخلينا اني ونادية نضل وياه
تركتهم ومشيت كلت لصلاح يحجي وياهم
كام يحجي المكان مو مناسب تداهرن زلم جاي تجي وتوصل مو مال تبقن امشن
ضلن يداهرن وياه لحد ما عصب عليهن وكام يتلاغى وياهن
اني دخلت لايوب فتح عينه كال : ساعديني للحمام
لزمت ايده وسندته شال راسه حجه : الكاع كاعد تتحرك لو اتخيل
– بعدك ما مستقر ارتاح وكوم
ضل لازم ايدي شوية
ونزل رجله دخلت خالتي شافته حضنته صرخ : ااااااه
ابتعدت من عنده بسرعة
كتلها : خالة رصاصة مطلعيها من جتفه وشضايا من راسه خطية متأذي
وكفت ناديه باوعتله وبجت و اني ساندته وامشي خطوة خطوة دخلت وياه للحمام .. ورجعته خطوة خطوة لحد ما كعد واستقر كال دخت حيل راح اوكع
-ميخالف رجع ظهرك وتام حتى تستقر وترتاح
رجعته ينام ورفعت رجليه وعدلته واخذت كلينكس مبلل نظفت شوية من وجهه ونظفت اديه بين اصابيعه وووكف امسح برجليه ، حجه : يمه اخذي نادية ورجعوا
-شلون يطيني كلبي اعرفنك يوليدي
-اذا ضليتي تأذيني ما تنفعيني بس رجعي
-لا والله يا يمة ما اكدر اهدك
-يمه لا تعصبيني اخذي نادية وامشي مو بحيل اتحادل رحمة لوالديج
سلمن عليه وطلعن .. اجا عمه ابو نور كاله : ها يا بطل عرفتك تطلع منها مو انت التنكتل على ادين الصغار الله ضامك لطريق القدس ان شاءالله يلا يلا ابو علي السبع گوملنا گوملنا
– عمي بس بلال شلونه
– زين بلال هم بطل مثلك لا تخاف عليه
– طمنوني عليه بالي يمه
– لا يضل بالك موملنا بخير وهاهية يلا شد حيلك
سكت ايوب واندارلي : لو رايحة عمي عليش ضليتي وانت من امس منكوبة خلي صلاح ياخذج ارتاحي واسبحي وتعاي
– ولا يا عمي مالي راحة بغير شوفته ما اكدر خليني يمه
-جا عمي تعبتي خلوني يمه وامشوا ارتاحو حللو من امس واكفين
صلاح : امشي خوية اوصلج ارتاحي وبالليل اجيبج
– مشكور الله يحفظك ما اكدر اعوفه
ابو نور : اصيلة يبت عصام الله يرضى عليج بنيتي جا روح انت صلاح وخلي واحد من ولد عمك يجي بمكانك يلا وليدي
-ان شاءالله يابه
مشى صلاح واني بقيت واكفة يم راس ايوب لحد الساعة ٩ بالليل منعوا الزيارات بعد وابو نور راح ومحد اجا بمكان صلاح .. بقيت وحدي وياه خفت انام واسهى عنه وما اسمعه جريت القنفة يم السديا مالته وكعدت صفة ولافك رجليه وحطيت راسي على ايده الما بيها كانيولا ونمت حتى اذا صحى وراد شي يندهني .. غطيت روحي بالعباية ووخدي على جف ايده وغفيت .
حسيت ع الممرض اجا ايوب كاعد يتجاوب وياه ..
الممرض يكله كلش زين شلت راسي انتبهلي حجه : رجعي لنومتح ابويه ما محتاجح
حجه الممرض : لا ما عنده شي اني راح اوقت العداد للمغذي ابقي نايمة
كام يلمس خدي بيده ويريد يرجعني لزمت جف ايده .. ناشف ودافي حيل .. اشتميتها رغم مريض بس مدري ليش احس جسمه معطر وعطر منيز اميزه من الف عطر وما موجود بقائمة العطور المركبة .. عطر من جسمه هيج روحي تحسه بست جف ايده ورجعت خدي عليه
حجه : ليش ما تنامين عدل وترتاحين بنومتح ليش مكسرة
-اخاف اغفى وما اسمعك من تصيحني
كام يداعب حنجي بأصابعه ما رد .. بقيت نايمة بمكاني لصلاة الفجر .. سحبت القنفة ورحت توضيت ووكفت اصلي .. خلصت لكيته فاتح عينه يستمع لصلاتي كتله : محتاج شي
-راسي مأذيني راح دريل كاعد يزرف بيه
اخذت ايدي وحطيتها على كصته على كيف وكمت ادعي
يا الله يا من اسمه دواء وذكره شفاء وطاعته غنى ارحم من رأس ماله الرجاء وسلاحه البكاء يا سابغ النعم يا دافع النقم يا نور المستوحشين في الظلم يا عالم لا يعلم صلي على محمد وال محمد وارحم بهذا الجسد الضعيف وانزل سكينتك وشفائك ورحمتك يا ارحم الراحمين وخير المطلوبين
وكمت اردد الفاتحة على راسه سبع مرات ..
عمض ووغفى .. بقيت كاعدة يمه ما اكوم منه .
ثاني يوم للظهر هو ما صاحي راسه ماذيه
اجا الدكتور فحصه هز راسه .. لزمت گلبي ..
كتله : شلونه دكتور
– راح يتعبكم الحجي شوية اتحملوه
فتح عينه وغطا عينه الثانية كاله تشوف
سكت ايوب
رد : كاعد تشوف
حجه : لا
-شكاعد تشوف بيها
-ضباب اسود ما اشوف شي
حجه : يحتاج دكتور عيون ضروري
-يطلع اليوم
-لا بعدها عملية راسه ما مستقرة ممنوع تفكرون بطلعة قبل اسبوع لحد ما نتأكد من راسه الراس مثل الكونترول مصدر التحكم بكل انحاء الجسم منه يتحرك ويمشي ويوكف ويركز ويسمع .. اقل ضغطة على الدماغ احتمال تسببله شلل كلش تحاذروا بصحته ترا بعده بعده ديروا بالكم زين
ترس كلبي قهر بحجيه ثكلت هدومي العلية من كالي اقل ضغطة شلون لو سأل على بلال شلون لو عرف بلال ميت شراح يصير بيه ؟
بقيت يمه مكابلته ما غفلت عيني عنه ، جان بس صلاح وعلي اخوية موجودين سألني على بلال موجود هنا بالمستشفى هاي كتله : لا بالمستشفى الحكومي بقى اهله يمه
كال : ليش تركتوه بالحكومي ليش ما جبتوا بهاي يمي
-بعد غير اهله شسوي
دخل صلاح وعلي كالولها : ها ابو علي شلون تحس
جاوبهم بسؤال : بلال وينه بيا مستشفى
حجه صلاح : دكول يالله خوية هذا جوا بالطابق الجواك وزين واحسن منك
حجه : شلون لعد تكول ……
خزرت صلاح ايوب لمحني سكت … رد حجه : بلال شصاير وياه احجولي
– خوية ما بيه شي بس اهدا
علي : حجي مو زين على صحتك عندك عملية بالراس تتأذى والله
كام من مكانه بسرعة اتلزموا بيه كام يصرخ : احجولي بلال اشبببيه جاوبوني وينه ليش كاعد تصمون عليه
-زين وراح تشوفه بس تكوم
-مو جوا هو اخذني اله
-خوية عليك العباس اكعد جرحك اخصر
-صلاااااح اخووووي شصاير ويااااه انطقها كلي
كام يبجي صلاح ويثغب وكاله : عظم الله اجرك بأخييك يا خووووية
راح خوينا رااااح
فز ايوب من مكانه ونزل بهمة من السديا تراكضنا انلزمه وكلنا كمنا نبجي كام يدفع بينا ويصرخ : بلااااال ما يعوفني اتعهادنا نستشهد سواااا بلاااااال
كمنا نلزم بيه ونحاول نهدي ونبجي على صريخه ما نحس الا وكع من طوله بنصنا
يتبع….
- يتبع الفصل التالي اضغط على (رواية صوت من المجهول) اسم الرواية