رواية صوت من المجهول الفصل السابع و الاربعون 47 - بقلم زينب ماجد
تلازمنا بيه وعلي ركض يصيح ع الدكتور .. شاله صلاح من جسمه واني رفعت رجليه من الكاع نقلناه للسديا .. انده بيه اكعد بيه ميكعد .. طلع صلاح ورا علي يجيب الدكتور ، اباوعله وابجي فقد مديحس ولا ديسمع
اجا الدكتور .. كام يفحص بيه كال : شصار وياه
– عرف بوفاة اخيه وكام لحيلا يصرخ ويريد يطلع
– وشلون تكلوله مثل هيج خبر وهو بهالوضع !؟ احنا شبلغنا شحذرنا هذا اهمال واسفاف بحق المريض طلع من الموت بأعجوبه والعملية براسه تجيبوله خبر موت ! والله الواحد ميعرف شيكول
التموا عليه الدكاترة وعلي يكول لصلاح : يا خوية لو ضال مراوغ وياه وعايفه بظنونه احس ما صادمه
– بعد طلعت يا خوية شسوي وعلي كلبي محترك لا حضرت دفنة بلال ولا وكفت بفاتحته صوابه يدوي
كام يبجي
طلب منهم الدكتور يطلعون ..
واني واكفة على صفحة اباوعلهم شلون يقيسون وينطوه العلاج ويحاولون يلكون استجابة من جسمه .. بس جسمه وعقله مكاعد يستوجب لأي ردة فعل ..
يرحون يجون .. كالوا : لازم ينقل للعناية المركزة
شالوا من السديا اللي هو عليها .. حطوه على سديا ثانية ومشوا بيه
واحنا وراهم لحد ما دخلوه مكان منعونا ندخل وراه .. كالوا : ميصير اتدخلون اترجاكم تبقون هنا لإن اكو مرضى غيره موجودين ممنوع الدخول
انتجيت ع الحايط ابجي بتعب ونحيب
وكف يمي علي كال : الله يصبرج خوية ادعيله يكوم بالسلامة ما يصلح بجيج هذا
– علي ما عولت كلت صحى ورجعلي وكام لحيلا رجع انتكس ..
سحب راسي اله وحضني حضنته باثنين اديه وكمت ابجي بحركة وتعب وقهر وحيل مهدود مدري لوضعه مدري لبلال وفقده الوضع يشل
بقى يمسح على راسي حسيته يبجي .. مسح عيونه وكال : ميخالف قوي نفسج ابو عرب سبع راح يكوم منها بس محتاجنا نوكفله .. قوي نفسج خوية
طبطب على راسي وكعدني ع الكراسي الحديد ..
كعدت مغمضه حيلي نهد من الهبطات .. بقينا ساعتين على نفس الكعدة .. اجت خالتي وابو نور سولفنالهم الصار حجه عمي : قصرت يا صلاح .. عليش تكله لو عايفه
كامت خالتي تبجي وتنوح … اجا الدكتور كال : اهل المريض ايوب
وكفنا كلنا كاله ابو نور : اني ابوه احجي
– المريض دخل مرحلة خطرة من الأصابة مكاعد يستحيب لأي فعل ولا ينطي ردة فعل وهنا العقل دخل بغيبوبة ما نعرف وضعه الحالي وما نكدر ننطيكم اي نتيجة الأمر كله يم الله .. يمكن يكوم منها ويمكن ما يقاوم ويموت او ينشل تماماً لا سامح الله .. ادعوله .
كامت خالتي ادك على راسه : يمه ابني انهجم بيتج يصبيحة راعي بيتييييي يمه انهجم بيتي على راسيييي وليدييي
الكل كام يبجي عمي ابو نور طلع ما تحمل ..
كعدت بزاوية المكان لفيت نفسي وابجي .. لا حول لا قوة .. بس تعب وقهر يحاوطك وضغوط من كل مكان ..
اجتني ماما .. بقت ويايا لليل ورجعت
والكل رجع بقينا بي اني وعلي اخوية و صلاح ..
لثاني يوم هم اجا ابو نور وخالتي ونادية .. طلبوا من الدكتور يشوفوه ممنوع الزيارة بالعناية المركزة ميصير احد يدخل كاللهم الدكتور : ماكو فايدة من وجودكم هنا افضل لو ترحون للبيت وتتركولنا ارقامكم لما يصير اي متغير بحالته لو صحى ان شاءالله راح نبلغكم تجون
كاموا يبجون وعمي كال : جا امشونا غفران شدي غراضج بويه وجيبيهن خاطر تمشين ويانا نمرله يومية نشوفه ونرد شنسوي بعد كلها يم الله
لميت غراضي بدمعة يا فرحة ما تمت بكعدته ..
اخذت جنطتي ورجعت ويا علي اخوية دخلت بيت اهلي
جان احمد موجود كال : ها شفتي الله شسوا بيكم تريدون تفصلوني تحجون بالفصول والعشاير دشوفوا الله شسوا بحالكم .
حجه ويا علي : يا اخي انت ما عندك ضمير غيرة بكلبك ماكو دا تشوف وضعنا شلونا والزلمة على فراش الموت تتشمت .. تتشمت باختك من امك وابوك .. شبيك احمد لخاطر الله شجرالك
حجت امه : غسل الله كلبه وصار حجار اعوذ بالله من قسوة الكلب ما مصيرها غير نار وقودها الناس والحجارة .. بيك خير اخيتك بهالحال تكلها خوية عظم الله اجرج الله يشافي رجلج مهما يصير تضلين اختي من غمامة تغمك وتغ بطني الحبلت بيك ونكلتك
تركت مجادلتهم ودخلت بغرفة امي
ضاك صدري كلش اخذت ابني بحضني .. ما مرتاحة روحي مفرفحة ما كاعد اكدر اكعد بمكان .. اخذت ابني وصعدت فوك جان بداية شهر ١١ الجو بعده ما بارد بس نسيمة عذب .. هلكد بجيت ودعيت وحجيت ويا ربي وطلبت منه يرجعلي ايوب
يمكن لو صاير هالموقف كبل صلحنا جان متأثرت هلكد
بس بعد ما انصلحت حياتنا واتعاهدنا نتفاهم ونتصافى وبدت حياتنا تمشي رجعت انكلبت فوك جوا وراح من ادينا
بقيت كاعدة لليل .. صعدتلي امي نزلتني ونومتني بفراشي
بهالفترة ابني انفطم كام ميدور صدري نساه لان ابتعد عني كم يوم امي كامت تعوضه بحليب بواكيت ابو الكصبة … انطي اول ميكعد وخلال اليوم
اتكلب بفراشي .. اريد ارتاح اريد اشوف النوم بعيني ما اكدر
ايوب على فراش الموت واني على فراش الهنا انام وارتاح واغط بنومتي ما اكدر ولا يرتاحلي بال
ما عولت الصبح يصير ..ب٧ الصبح بدلت وطلعت للمستشفى .. دخلت كعدت بالرسبشن الدكاترة بعدهم مجايين .. لحد التسعة يلا كدرت اشوف الدكتور .. كال نفس وصعه ما بيه تغيرات
ضليت ضايعة لا بودي ارجع ولا الي مكان ابقى
حطيت نقاب على وجهي حتى اخذ راحتي .. واني كاعدة ع الكراسي الحديد تجيت راسي ع الحايط كمت اغفي ..
لشوية دك تليفوني رديت امي : الو
-ها يمة وينج
ما حجيت بس بجيت
حجت : ولج بتي شينفع البجي يا امي ادعيله وانت مؤمنة ليش هيج تسوين بحالج
– دعائي ما نزل من الساني بس صدري مقبوض روحي تلوب احس بروحي المرض مو بيه
– ميخالف يمه اصبري واحتسبي ربج وحطي عينج بعينه ما يصيع يم ربج شي
-والنعم بالله بس ماما لو ما طاب
-ليش تفاولينه هيج يمه لا تحجين هيج راح يطيب وراح يكوم على حيله وربج
– الحمدلله
مسحت دموعي بحسرة
حجت : وين هسه انت
-بالمستشفى
-وشنهو فايدة كعدتج هناك يمه
-اقلها روحي من تكون قريبة منه تهدأ ما ارتاحيت بفراشي وايوب بهالحال ما اكدر مو بيدي احس روحي مسممة
– وشلون تضلين هيج
-الله يباوع لحالنا ويرجعه
سديته منها ضليت للعصر اجا ابو نور .. شفته بس ما شافني
سأل عن وضع ايوب وما شاف نتيجة ورجع طلع .. بقيت كاعدة بمكاني لليل ..اجت عاملة كالت : حبيبتي ليش هنا كاعدة المستشفى فرغت
-اكو مانع امني اذا بقيت ؟
-لا بس علمودج ليش متعلعلة انت عندج مريض هنا !؟
هزيت راسي كالت : منو شيصيرلج
-زوجي بالعناية المركزة
-يا عيني صارله شكد
-يومين
-الله يصبرج حبيبتي سودة عليه
راحت وبقيت بمكاني خاوية اليدفعني هيج اوكع لكمة محاطة بحلكي غير المي من البراد بين الحين والاخر اخذلي مي .. وكاعدة مهدودة وتعبانة ولا حول ولا قوة غير اردد : حسبنا الله ونعم الوكيل
رجعت عليه العاملة هي ووحدة ثانية وكفن يمي مقهورات ويباوعن عليه ويحجن ويايا : ليش متروحين للبيت اذا هو بغيبوبة مراح تفيدي بشي روحي ارتاحي ليش هيج معذبة روحج
-هنا مرتاحة اكثر
-شراح تسويله ؟ ما يحس باقي ع الأجهزة ما يدري عنج بشي
-مو هو المريض اني المريضة والمرض جاي احسه بروحي هو ميحس بس اني دا احس دا اموت مدا ارتاح هو ممحتاج احد يبقى يمه بس اني محتاجة ابقى ما اكدر
مسحت عيوني واخذت نفس
احس كاعد اختنك
حجت : انت متزوجين على حب
– لا
– يا عيني الله يحفظكم
حجت الثانية : ما نكدر نخليها تشوفه بلكي ترتاح خطية
– تشوفي ؟
باوعتلهن بلهفة : اكدر
– هسه خلي نشوفلج بلكي نكدر ندخلج للعناية بما انو الدكاترة طلعوا والدكتور الخفر نايم
مشن كمت وياهن وكفت ويا وحدة والثانية راحت تتأكد
اشرت النا كالت .. انزعي حذائج والبسي ذولة وحطي هاي الكمامة وادخلي : الله ينطيج العافية ربي يحققلج مرادج بحق أسمه الأعظم
– حبيبتي فوتي يلا
نزعت الباتة ولبست القدم الطبي .. وحطيت الكمامة ودخلت للعناية المركزة
جان بين الباب مال الدخول وبين صالة العناية المركزة حاجز المنيوم وشباك كزاز جبير يبين من عنده الصالة كلها واسرة المرضى .. دخلت الصالة اللي هو بيها باوعته بين الوجوه لكيته اتقربت من عنده بس جسمي يرجف ودمعتي جامدة على باب عيني وصلت عنده .. اباوع حاطيله صوندة بحلكة والاجهزة مشكليها بيه صوت جهاز القلب يصفر .. والجو هدوء الى ابعد حد
تقربت من عنده اختنكت اكو صرخة بداخلي اريد انده اكعده ارجعه
هذا ايوب .. هذا الجان ع الجان ع الكاع تحسبلا الف حساب
هذا السبع هذا الما ينكدر هذا اللي مر ب٣ سنين حرب انصاب وما طاح ولا استسلم .. حرب ما كدرتله تالي هيج يصير بحاله وهاي نهايته !؟
اديه ترجف لزمت ايده .. جرت دموعي .. بست اديه وكتله : الله يجعل يومي كبل يومك وياخذني وياك لو قدر ياخذك .. يمكن عذبتك وانت عذبتني ومبري الذمة بس والله اني احبك .. الحياة بدونك ما تنطاق .. مرة ما تنجرع .. اني اكبر جذابة لما كتلك اكرهك اني اجذب الحقيقة اني ما اكدر بدونك انت اول حلم مر عيوني وانت اول رجال انطيته كلبي وشعوري واول انسان يجيس كلبي
اخذت نفس قوي مسحت بيدي دموعي حتى اشوفه زين كمت اباوع لوجهه .. كمت اردد بحسرة وهمسة ابيات تمر بذاكرتي .. ((يا فكة عيون الگلب يا ميزتي البيها انغر))
كعدت ركبي للكاع وفتحت جف ايده وحطيتها بين اديه وخليت راسي على جفه .. غمضت عيوني واحاول اطمن روحي هو يمي
لشوية دخلت العاملة حطت ايدها على جتفي : يلا حبيبتي خاف يجي الدكتور
شلت راسي بست ايده شميتها بقوة ورجت بستها ( راح ارجعلك وما راح اعوفك بهالمحنة وعد راح تكوم )
تركته ومشيت اتشكرت من العاملات
كالوا : تعاي اكلي ويانا مدام خلصنا شغلنا يلا شكلج مماكلة ربج يحلها يمعودة تعاي
اخذوني يمهن بغرفتهن ..
حطن بورك وكباب عروك وروبة وزلاطة وجاي وحطن كبالي صمونة وانطني كوب الجاي اخذته من عدهن كمت اشربه حار ومهيل ارتاحيت بيه سوتلي لفة صغيرة وحطتها بأيدي : الله يرضى عليج مشكورة
– حبيبتي الله يكومه بالسلامة الج
– سؤال اللي يصير بغيبوبة هم يطيب
– طبعا يصحى ويطيب واكو حالات صعبة تطول واكو الله ما كاتبلهم انت زوجج شنو مرضه
– اعتداء بالرصاص والحارس لاف وكلب السيارة وشضايا ضاربة راسه ورصاصة بجتفه الرصاصة كدروا يطلعوها ووضع صدره زين بس عينه وراسه
– اي الله يكومه بالسلامة
باوعت لوجوهن ما يطمن خير عرفت حالته صعبة
حجت بنية اسمها لمياء عاملة : صومي لسلامته انوي صوم وادعي رب العالمين ما تفطرين لحد ما يستجيب دعائج بشفائه امي جانت بيبي مريضة وحالتها ميئوس منها ونذرت صوم لسلمتها وربج ذيج بيبي تسمعين حسها راح يصير عمرها ٩٠ سنة ومميتة
-الله يحفظها الكم .. شكرا الج يمكن الله خلاج تنطقين حتى يفتحلي باب من ابوابه الصوم ينقي الإنسان من ذنوبه بتالي يكون الدعاء مستجاب .. راح اصوم
– الله يقر عينج بيه ان شاءالله ويكومه بالسلامة
– امين شكرا ..
كمت احط كم لكمة بحلكي بلا مشتهى كوة الوك بيهم
اكتفيت بعدها بالحاي واجا على بالي اسأل : اكدر اخذ غرفة بالمستشفى هنا احجزها
ضحكت : مستشفى يمعودة مو فندق
– زوجي مريض وحاجزتها
كامن يباوعن : تريدين نحجيلج ويا الادارة ؟
– يا ريت
– باجر نحجيلج وتدللين
بقيت يمهم شوية وكمت توضيت واخذت منهم سجادة ونويت الصوم .. ونذرت صومي لشفاءه ودعيت ربي ما راح افطر لحد ما ايوب يكوملي بصحة وسلامة .. بقيت اناجي وادعي لحد صلاة الصبح لحد ما صليت وسجدت بعد اتمام الصلاة حطيت راسي وغفيت ع السجادة محتاجة ربي يحتضني ويحتويني كلش محتاجة يشملني اني وعائلتي برحمته ونرجع سويا مع بعض .. غفيت وذكرى ايوب من يحط علوش على صدره واني على ايده ويلمنا بحضنه حلم مرسوم بعيوني .
لما صارت ب٧ وشوية كعدتني البنية
امي خواتي علي متصلين بس تليفوني ما ادري عنه ناصي محاطته صامت من وحده صاير ناصي .. كمت من مكاني رحت للبيت لل٩ ونص يلا وصلت سبحت واخذت ابني وكلته وسبحته وبدلتله خلصت صلاة الظهر اخذت ابني ورجعت للمستشفى .. لكيت العاملات ما هم طالعات ب١٢ خلصانة الخفارة مالتهم .. رحت حجيت ويا الرسبشن على موضوع حجز غرفة بأسم زوجي .. الموضوع تعقد بس بعدين قدروا الحالة وسهلولي الموضوع وفتحولي غرفة مريض لايوب ارقد بيها لحد ميطلع من العناية المركزة .. الغرفة بيها سرير طبي وقننفة تنسحب وتصير سرير وثلاجة وكنتور صغير بيه بطانية وبلازما وستلايت .. والحمام غربي من ضمن الغرفة متكون من قاعدة غربية ودوش ومغسلة .. قررت استقر هنا وابقى يم ايوب اني وابني لحد ميطيب .
خابرت على ماما بلغتها ما رضت تريدني ارجع وعليمن المصاريف وهو ما يحس وما يشعر ووجودج ما يسوي شي .. كتلها : مو هو المحتاجني اني المحتاجة قربه رايدة ابقى حواليه بس، ما اريد اشمره بالمستشفى واعيش حياتي ما اكدر راح ابقى يمه وما راح اطلع الا وهو ويايا حي جان او شما يصير على اي حال مراح اعوفه وحده اني وابني راح نبقى حواليه لحد ما يرجع النا.
ما بيدها على حالنا شي رضت وكالت : اذا هالشي يريحج ويطمن روحج سوي .
استقريت بالغرفة وابني يمي ..
بسبب المظاهرات ماكو دوام لا جامعة و ولا دوام وظيفي
.. الجو برا مكلوب بين ساحات دك ورقص واغاني وبين الاسعاف اللي اتجر وتشيل جرحى ومصابين وشهداء .. ناس دا تروح ضحية لعبة سياسية متأملين انو يصيرلهم تغيير نسوا انو امريكا اللي جلبت الاحتلال واللي جلبت د١عش مراح تشوفهم خير مجرد تستخدمهم لمصالحها والثمن دم اولادنا واعز ناسنا .. محد ديستوعب الكاعد يصير ما راح يجري وراه خير ولا اي تغيير .. الشعب بوادي والسلطة بوادي ثاني ..
ويمر الأسبوع كم يوم بس مظاهرات وبدون احداث من يقترب يوم الجمعة تنكلب الدنيا فوك جوا ما قبل خطبة الجمعة مال المرجعية اللي خلا الاوضاع مربكة وضغط زايد على المرجعية اللي فسقت الأحزاب وادانت قتل المتظاهرين العزل وطالبت من المتظاهرين ان يوحدون صفوفهم ويغربلوا امرهم خوفا من اتباع المندس والعميل ومحد يسمع لا الشعب يسمع ولا الحكومة تسمع ونادت وصاحت لحد ما كالت ( لقد بح صوتنا أمام أذان صماء ) مع هذا كل جمعة ياخذون خطبة المرجعية مادة للسخرية ويصيحون لو خاطب مرة ولا هالخطبة .. وهذا كانت حرب ناعمة على المرجعية حتى يتم الضغط عليه للتدخل بالسياسة حتى يتم تسقيطه بس المرجعية بقت ملتزمة النصيحة والأرشاد ورفضت التدخل بالسياسة .
امي وعلي يتاوبون عليه بين يوم ويوم يمرولي يجيبولي اللي احتاجه اني وابني .. التلفزيون حاطته على قناة طه واني ملتزمة صيامي وسجادتي .. بالنهار انام واكعد وبالليل من يطلعون الدكاترة اروح اشوف ايوب لمدة عشر دقايق واطلع ارجع امد سجادتي واناجي ربي لحد صلاة الفجر .
عمو ابو نور يوميا يمر المستشفى يسأل عن وضعه ويطلع فورا ميبقى لما عرف اني هنا اجاني دك باب الغرفة ودخل كال : ليش متعبة روحج روحي يا بنتي وارتاحي
– ارتاح وايوب بهالحال
-وشراح تكدرين تطيبينه لو تكومينه
– خليني بهالحال عمو
– والله يا عمي نخاف عليج امه مناك وانت منا
-لا تشغل بالك بيه امي واخوية مكاطعين ديجون بالتناوب ومعايفيني
-الله يكسف عنا هالازمة ويريحنا ويريحج يا عمي بعد شنسوي .. اه يلا شتحتاجين خابرينا
عافني ومشى ..
خالتي من درت اني هنا كامت تجي يمي تبقى بلكت تشوف ايوب بقت يمي يوم واحد بالليل راحت ابدالي دخلتها العاملة تشوف ايوب بس طلعت منتهية واتخربطت .. شالوها ع السديا وعلكولها المغذي ثاني يوم اجا صلاح وعمي ابو نور ما رضولها تبقى ببعد رجعوها وياهم .
مر ٢٠ يوم وايوب ما كعد .. ولا صحى
نزل وزني بشكل رهيب خلال عشرين يوم ب٩ كيلوات
بحيث عضام وجهي بينت والسواد الجوا عيني غتر .. وعيوني صغرن من كثر السهر والبجي والتعب ..
صرت عرف ويا كل الممرضات والعاملات اللي بالمستشفى
حتى الدكاترة كاموا يعرفوني ويجون يطمنوني .. بالليل العاملات يساعدني ياخذن علوش يمهن واني ادخل اشوف ايوب دقايق واطلع
طبابة الحشد متواصلين ويايا ومستمرين يدزولي اللي المستشفى تطلبه وتحتاجه لإن بسبب شغلي ويا عوائل الشهداء والجرحى طبابة الحشد صاروا معارف واصدقاء .
برد الجو ودخلنا فصل الشتا وايوب لا حس ولا خبر ..
من بعد ما مر ٢٧ يوم على حالته بالعناية
قررت ادخل هالمرة وادخل علوش ويايا .. قنعت الممرضة كالت بس كون ميسوي صوت .. كتلها لا اذا سوا اطلع بس هو هادئ اريده يشوف ابوه ما اريد ينساه ..
شلت ابني ودخلت للعناية واني حاطة الكمامة على وجهي واكوله : اشش بابا اواه اش
وهو يسويلي : اشش اشش
دخلت الاعبه ونمشي على كيفي هو حاسبها لعبة دنمشي على كيف
وكفت كدام ايوب همست : هذا منو
كام يباوع بوجه ميحجي يرجع يباوع بوجهي
همست : هذا باباه .. يحبك باباه هواية .. باباه بطل قوي سوبر مان بباه .. دشوفه .. يباوع عليه صارله شهر مشايفه مثل النساه او ما عرفه ..
كمت اهمس : صيحله صيحله ايووب .. ايوووب
من كلت ايوب عرفه مد ايده : باباه .. دييي باباه
كام يذب روحه يريد يلزمه اخذت ايده حطيته بأيد ايوب .. يريد ذب نفسه يريد يتقربله خفت يأذي لو يسوي اي شي سحبته كام يبجي طلعته من المكان بسرعة
تخبل كام يبجي من كل كلبه عود رجعيني .. دموعه تجري وهو يأشر ورا ويصيح .. نزلت دموعي واخذت للغرفة ما سكت بس يبجي كمت افتر بيه والوليله واهزه بحضني وامشي بالغرفة
علي اميري ونعم الأمير
نصير النبي وخير ونصير
ابو الحسنين وزوج البتول
ووارث طه واعلى وزير
انشد وعيوني مدمعة باوعته غفى بس عركان من البجي والحر اللي بالغرفة .. شميت كصته وبسته ونومته ع السديا ونزعته البلوزة مالته وغطيته بعباتي وخففت التدفئة .. كمت اباوعله : الله يباوعلنا يا ماما ويرجعلنا بابا تعبنا كلش تعبنا .. اللهي لا اسألك رد القضاء ولكن اسألك الطف بنا .. يا رحيم يا ارحم الراحمين
فرشت سجادتي وطولت بدعائي هذيج الليل
حيل قهرني ابني من شاف ايوب واتذكرى وبجى رغم صغره بس رايده ويشتاقله .. كمت ادعي جبار السماء وعيوني تجري لحد ما اختنكت بعبرتي انكص بلعومي كص .. دنكت اسجد بين ادية كالعادة يلما يخلص الدعاء والكلام وما الكو غير ساحة ربي اسجد واهرب الها وابجي بيها بدون توقف او كلام .. اني ابجي وهو يشعر ويحس ويسمع يشوف .. استمريت بالربع ساعة ..
رفعت راسي واني بعقلي تتردد اية انغرزت بفكري ( ( واصبر لحكم ربك فإنك بأعيننا )
لزمت السبحة وصرت اردد الحوقلة .. مية ميتين تلاثمية
اندكت الباب .. كمت من مكاني عباتي لابستها اصلي بيها .. فتحت الباب الدكتور الخفر كال : اسف قطعت عليكم صلاتكم
– لا عادي ما جنت اصلي فقط اذكار
الدكتور يطلع عمره بداية الثلاثينيات شاب كلش حباب واسلوبه لطيف ويا الناس ابتسم وكال : ام علي داخلة غرفة الإنعاش من ورانا
– اسفة جدا دكتور بس شفته
– جان الطفل وياج ؟
– بلي ردته يشوف ابوه حتى ما ينساه لان مر شهر هو مشايفه ولا سامع صوته
– تدرين المريض ومن بعد ٢٧ يوم استجاب وانطى ردة فعل وفتح عيونه !
حجيت بلهفة وفرحة شاهكة عيوني: عليك الله دكتووور يعني كعد !!!؟
– لا لا مو بمعنى كعد بس استجابة عظيمة من عقل المريض .. الغيبوبة مو نوم الغيبوبة هي عدم استجابة العقل للمحيط الخارجي هو مو نايم كاعد ويسمع بس مثل الميت على قيد الحياة لا يستحيب للأصوات ولا للمحفزات المؤلمة ولا لأي فعل ..
استمرار الحالة تأدي الشلل .. واستمرارها اكثر لا سامح الله يؤدي للوفاة لأن العقل هو المدير الكامل للجسد اذا اعتاد الوضع راح الجسد ينشل بتالي يموت .. بس وبفضل الله تعالى اليوم عقله استجاب وانطى ردة فعل وفتح عيونه وهذا تطور ممتاز بالحالة وبشارة خير ان شاءالله
– الله يبشرك بالخير دكتور الف الحمدلله والشكر الف الحمدلله الك ربي ما قصرت سمعت واستجابيت الف الحمدلله .. اكدر اشوفه ؟
– لا بعد مبكر هالموضوع .. بعده ما تعدا الخطر لازم يبقى تحت العناية بدون ما نضغط عليه بس ردت ابشرج
– شكرا الك دكتور .. الله يحفظك ويخليك الله يوفقك
الف الحمدلله ربي الف الحمدلله والشكر .
– الحمدلله اتركج تكملين صلاتج الله يتقبل ان شاءالله
طلع من عندي خابرت على خالتي بسرعة جانت نايمة كعدتها على صوت الاتصال اول ما ردت صحت : خالة ايوب فتح عيونه ايوب فتح فتح
– عليج الزهرة صدك يمه اللهم صل على محمد وال محمد دخيلك ربي جبرني بهالفجر هسه كاعد
– بعده بالانعاش بس كالولي فتح الحمدلله
سديته منها خابرت امي بشرتها .. كامت تصلي عن النبي وفرحت ويايا حيل وكالت بس يطلع الصبح اجيج .. رحت كملت صلاتي وشكرت ربي هواي هواي لإن ما ناسيني واحنا بعنايته ولطفه
للصبح اجا عمي ابو نور وخالتي وعلي اخوبة كلهم التموا بس الدكاترة رفضوا يخلونهم يدخلون علهي بس بلغوهم انو هو بس فتح عيونه ما دا ينطي استجابة ثانية ولا اي ردة فعل ..
بقوا يمي بالغرفة للعصر
اني اخذت غفوة لحد ما صار المغرب لإن كلش تعبت من السهر
كعدوني ويا اذان المغرب وكالوا : احنا راح نروح اي شي جديد خابرينا حتى لو نص الليل
– ان شاءالله
قررت اليوم هم اخذ علي ابني واروحله ..
لما صار الليل .. اتفقت ويا العاملة ولبست ودخلت اني وعلوش للأنعاش واني اكوله : اش اشششش
لحد ما وصلنا يم ايوب باوعنا مغمض .. تقربت من السديا كتله : هذا باباه
اباوع لوجه علوش كوله كوله باباه
انداريت لكيت ايوب يفتح عيونه .. ييمه طار كلبي من الفرحة
– ايوب تسمعني هذا علوش احنا كلش مشتاقيلك لخاطرنا ارجعلنا .. الله يخليك حبيبي كلش محتاجيك ..
ميحجي بس يباوع بالسكف ..
اخذت ايد علوش بعدوء حطيتها على عينه غمض
علوش لزم بخشمه همستله : كوله باباه
كام علوش يعت بخشم ايوب ويكول : ون تو
ضحكت يتعلمهن من اناشيد الارقام الانكليزية اليسمعها جريت ايده من خشمه .. رجعت حطيتها بأيد بأيد ايوب .. حسيته كام يباوعلنا .. يعني مو بس فتح وديباوع للسكف ديباوع النا ..
خلص الوقت وصار لازم نمشي
كتله : علوش كول لبابا باااي ؟ بيباااااي
علوش كام يلوحله ويكوله : بااااي باااي
سمعت ايوب طلع صوت مثل الونين .. ممممم
ابتسمتله ومشيت لأيوب بسته بخده وكتله علوش : بوسه
لزمت اديه علمود ليجر شي من عنده وعلشو باس ايوب بخده ..
دا اريد اطلع دخل الدكتور لصالة العناية كال : وطفل يا ام علي
– بس ردته يخلي ابوه يستجيباه بس والله استجابله
– صدك شصار
– حسيته ديباوع النا ويغمض ويفتح ولما لوحله علوش حسيت طلع من عنده ونين
– تعاي ما دام الطفل ساكت ..
تقرب الدكتور من ايوب .. ضغل ضوا بعيونه غمض عيونه
كال ممتاز .. شال ايده .. وكعت .. شال ايده وثبتها ايوب ديباوعله ..
حجيت : ديستوعب وجودنا
– استيعاب بطي بس ديعرفكم
– دكتور ليش ما تنقله يمنا بالغرفة يمكن يستجيب اكثر
– اذا نسبة الأستيعاب ارتفعت ويكدر يحرك ايد او يلزم راح ننقله يمكم بالغرفة
كمت احاول الزم ايده بس عبس مديكدر يلزم شي ..
كمت احط ايد علوش بأيده .. علوش كام يجرها كال : بس تطور ملحوظ بالحالة .
شكرته ورجعنا للغرفة .. نومت علوش وبقيت على سجادتي لحد الفجر صليت ونمت .. لل٩ الصبح اندكت الباب كعدت خالتي وابو نور سولفتلهم وراحوا حجوا ويا الدكتور ..
للعصر الدكتور قرر ينقل ايوب للغرفة يمنا
طرت من الفرح حطيت ابني بيد خالتي تسيطر عليه ورحت حضرتله فراشه والعاملة تساعدني نظفت الغرفة وعقمتها ونقلوا الجهاز وجابوه .. خالتي حضنته ونطت من البجي وهي تشوفه لا يحرك ايد ولا يحرك رجل ..
الدكتور حذر من وحود الطفل بالغرفة ويا المريض لأي راح يببله ضغط وازعاج .. خابرت على ماما تجي تاخذ علوش .. اجت امي وابو نور وخالتي واني كلنا بالغرفة كال الدكتور : نقلناه من العناية مو معناه تشافى او صار زين لازم اله عناية خاصة وهدوء اي ضغط او فعل ممكن يأثر عليه سلبا
خالتي كالتلي : روحي اني ابقى وياه خليني الليه احضننه وانام
كاللها ابو نور : خاطر تطيحين وبدال ما يبتلون بيه يبتلون بيج دمشي وخلي المرة تكابل رجلها
خذاها وبقيت بس اني وايوب بالغرفة
مفتح عينه طول الوقت .. اخذت ايده بست حرحارة جفه وبقيت الزم بأيده واضمها .. اعوفها توكع بس مو بسرعة على كيف ارجع الزمها وادخل اصابيعي بيت اصابيعه والزمهن .. باوعتله يباوع على ايده .. بسته بنص عيونه : راح ترجع وراح تكوم بخير وسلامة ومراح اعوفك ابد .
قفلت الباب ودنيت الكرسي من السرير وفتحته .. وتجيت راسي على بطن ايوب .. بس ما ذابه كل حيلي عليه .. وفتحت التلفزيون على قناة مصرية مطلعة فلم حاولت اندمج مكدرت رحت درتها على قناة الشرقية نيوز طلعت كبالي كاعد تنقل بث مباشر من ساحة التحرير
تركت التلفزيون مفتوح ولزمت تليفوني
كروباتنا مخبوصة بأستشهاد الاعلامي أحمد مهنا .. من مديرية اعلام الحشد .. صوره فيديوهاته فتحت وصيته .. كمت من ايوب وكعدت عدي وسمعت الوصية كمت اناشغ من البجي على وصيته شلون شاب يا ربي يكتل قهر
خابرت على باقر كتله : شنو شفت احمد مهنا
كام يبجي باقر يكلي : صاحبي هذا غفران صاحبي اعرفه والله ولد طيب وخلوق ماله اذية على احد
– شلون مات
– باعي هم الاعلام من قبل اسبوع بلغوهم كالولهم جماعة الحشد انسحبوا من المظاهرات ما نريدكم
– هي المظاهرات تابعة لاحد غير للكل منو الكاله هيج
– مجموعة نعرفهم المن تابعين المهم الكادر الاعلامي انسحب بس احمد اصر ينقل المظاهرات ويبقى بنصها من صاير اعتداء على ساحة الخلاني ضاربينه طلقة وواكعين عليه بالسجين طعن
– عزا يعني متقصدينه
– قهر بالله من البارحة ما نايم .. والله وردة احمد ما يستاهل الصار وياه صاحبي كلش ما عنده اذية على احد وشاغول ومهني خسارة احمد خسارة
كمت ابجي ونهيته من باقر ورجعت اباوع صوره
نطيت من البجي .. واني ابجي باوعت ايوب ديحرك ايده .. باوعتله يباوع ع التلفزيون
اخذت الأيباد وكتله : شوف تعرفه هذا الاعلامي خطية استشهد البارحة
حيل يقهر ايوب لو تسمع وصيته يكول لا تعوفون السيستاني وحده يقهر حيل يقهر .
ضل يباوع ينتبه حطيت ايدي على عينه اليمنى ما انطى اي ردة فعل
رجعت حطيت ايدي على عينه اليسرى غطيته حرك راسه .. عرفت مدا يشوف باليمنى بس باليسرى
فتحت اتصال ويا امي وضليت اسولف وياها وفتحت كاميرا احجي ويا علوش بس ملتهي ويا جهال علي اخوية ميريدني ولا مشتريني كوة لزمته ع الكاميرا حطيته كبال وجه ايوب واكوله : هذا بابا كوله هلو بابا هلو ببباه
سد الكاميرا بوجهنا باوعتله .. عادي هو هذا ابنك متعودين
يلا شنسوي مو زين عبرنا وباوع علينا واخذ من وقته ثواني المفروض نشكره ..
مصوب عينه عليه يباوعلي
اخذت ايده وكمت احجيله شكد عانيت وتعبت هالفترة وشكد مشتاقة اشوفه بطوله كدامي : احجي صيح رزل شتريد تسوي سوي بس ارجعلنا واملي عيني بطولك واذني بصوتك وكلبي بحنيتك راضية كلشي منك بس ارجع وكوملنا على حيلك .
بس ساكت ما يستجيب
رجعت راسي وغفيت شوية واندكت الباب .. اجا الممرض دخل كشف عليه وعدله المغذي وباوع حالته وتفقد جسمه كال : عنده حمار بجسمه طفح جلدي من النوم سمعتي يون ؟
– لا
– اذا سمعتي يون بلغينا .. بعده ما عنده احساس كامل بالالم ..
طلع رجعت غفيت شوية لليل ايوب كام يأن الممرض دهنه بمرهم مسكن ومعالج وانطاه دواه بالمغذي ..
طلع حسيت بروحي جوعانة
بالثلاجة موجود لفات كباب ودجاج مشوي ومقبلات ومن ضمن المقبلات اكو كاستر عليه لبغراش .. اخذتها وكمت اكل بيها بالخاشوكة باوعت لأيوب كمت يمه .. اخذت بطرف الخاشوك وحطيت على شفايفه .. استجاب وكام يبلع شفته .. ابتسمت له .. ورجعت مسحت شفايفه هم بلع ريكه واخذه .
اخذت بالقبق مي وقطرت بحلكه .. شرب
كمت ازيد وانطي بالقبق .. يستجيب ويشرب
ما كثرت خاف ازيد عليه ..
من اجا الدكتور كتله : انت تجدهدين اجتهادات منج وتسوين مصايب بس مصايبج دا تجيب نتيجة زينه
ضحكت : دا احاول ويا دكتور وما دا ازيد بشي يضره بس على طرف شفايفه ردت يستعمل حاسة التذوق بعد السمع والنظر ..
-لا عاشت ايدج بس مو كل مرة تسلم الجرة يا ريت تاخذين حذرج لإن وضعه حرج
– راح يرجع دكتور
– لا الحمدلله ديتطور واموره بخير كاعد ينطي ردات فعل متسلسلة يعني مديوكف وهاي تنم عن ارادة عنده لحتى يرجع .. وان شاءالله يرحع بمساعدتج
كشف عليه وطلع .. رجعت تمددت وخليت ايدي على جفه .. ونمت .. حسيته يحرك اصبيعه جوا راسي ..
كلت خاف تضايق ابتعدت من عنده واتغطيت ونمت
نايمة الفجر واسمع غفران غفران
فتحت عيوني
ايوب حجه لو كاعد اتحلم
شلت راسي باوعتله مفتح
حجه غفران
كفيت الغطا وفزيت من حيلي: ايوب دا تحجي انت دا تنطق اسمي
حجه : غفران
دمعن عيوني واني اكوله : عيون غفران وحيلها اروح فدوة الصوتك اشتاقيتله حيل حيل اشتاقيتله
دنكت عليه ابجي حجه : اني وين
-انت يمي وهذا يكفي لا تفكر بغير شي
– امي
-هسه اخابرلكياها
رفعت التليفون وخابرت خالتي ردت بعز نومتها كتلها خالة : افتحي كاميرا ايوب يحجي وياج
شهكت : يا رحمتك ربي وليدي يحجي وياي
حطيت الكاميرا تريد تحجي من البجي ما تكدر هو بس يكللها : يمه شلونج
-شلون حالي بدونك يمة لا ضل حيل ولا عيون ولك والله يا يمه خويت عمدان بيتي طاحن بطيحتك يا يمة
-خواتي
مسحت دموعها وهي تكله :كلهن بخير ويدعلك وقرحن وهلهلن من عرفن بيك صحيت وفتحت ووعدتهن هن ونادية اجيبهن الك اليوم
-ابني
حجيت : علوش يم ماما زين مو خابرته قبل شوية وحجيت وياه
-شلون تحس يبعد امك وكلبها من حيلي اعلى حيلك ومن عمري اعلى عمرك كون
حجه : الحمدلله
كامت تبجي وتباوع عليه كتلها : ما نكدر نأذي اكثر روحي ارتاحي
سديته منه وكمت احجي وياه وكتله : تتذكر كلشي
حجه : الساني
-شبيه
-ثكيل
كوة ينطق الكلمة
-اروح فدوة للسانك بعده شوية شوية راح ترجع بحيلك وترجع لبيت وبنص اهلك وناسك ويفرحون بيك ويذبحولك ذبايح
حجه : علوش
– علوش بخير باجر ماما تجيبه
-بلال
كمت اباوعله : تصير زين ونروحله
ضل يباوع بوجهي رجع حجه : بلال
لا تتعب نفسك انت مريض واحنا محتاجيك والله كلنا متنا بعدك والله ما عشت جثة امشي بعدك من يوم الوكعت لهاليوم اني صايمة وراح اكمل صومي لحد ما تكوملنا بالسلامة وتوكف على حيلك
-يوجعني
-شنو هو
-جسمي
-عندك طفح بسبب النوم كل هالفترة جنت تحس شنو جنت تشوف بهالفترة
ما جاوب كمت من عنده رحت توضيت اندكت الباب لبست عباتي وفتحت الباب دخل الممرض .. انطاه دواه والمغذي .. وكام يحرك بيده رفعها ما وكعت ايد ايوب ابتسمتله .. هو عينه بعيني ما شالها مني
كال : ممتاز كاعد يتشافى الحمدلله استمري تحفزي يحجي ينطق يلمس يتذوق التحفيز كلش مهم بهالفترة حتى يرجع يستعيد عافيتة
-ان شاءالله
طلع واني مديت سجادتي وصليت الصبح وبعديت اخذت المصحف وكعدت يم راسه ارتل بصوت مسموع وبطيء حتى يفتهم وينصت كملت سورة الحديد والعنكبوت وسديته
ورجعتله انطقه احجي وياه ميحجي
كتله ليش متحجي نطق : بلال
عرفته اتذكر موضوع بلال واتذكر هو متوفي
سكتت يباوعلي .. كامت دموعة تجري منا ومنا وهو صافن بوجهي
مسحت دموعه وكتله : اختار طريق الإمام الحسين وكمل بيه هنياله احنا الخطية هو نال اللي يريده
رجع يطلع من عنده نحيب ودموعه تجري
بقيت لازمه ايده وكاعدة رجعت جبتله مي ردت اقطر على شفايفه
حرك راسه وابتعد عرفته ميريد
بقيت كاعده مكابلته
للصبح اجت خالتي ونادية ونجلاء وسرى ونبأ وعمي ابو نور وصلاح
كلهم التموا حواليه كالتلهم : ميصير هشكل الدكتور ميقبل واحد واحد يحجي وياه دماغه بعده ميتحمل ضغط
حجت نادية : انت تعلمينه شلون نتصرف وياه شنو انت احن عليه من عدنا
ما جاوبتها كالت : اني الابقى يمه اليوم ما اروح
– روحي بلطي الشط
– كاعد تستهزئين حضرتج ترا وصلت وياي لهنا منج
حجه ابو نور : ها وكتجن الزلمة ممطول ما له حيل يوكف وانت تتعاركن
– اني ممتعاركة عمو ولا مستواي اتعارك وياها بس البية مكفيني اذا مراح تبعدوها عني وعنا راح تخلوني اضطر اعارك من صدك وابعدها
نادية : تبعديني منين من رجلي تميلين من وجهي لا اكفخج والله اطلع حركة كلبي بيج
– راح تطلعين
عفتها ومشيت كعدت خالتي ونجلاء و سرى يباوعن ويحجن ويا ايوب وعمي واكف برا يباوع الهم ويباوع النا
شوية واجت علياء ورجلها ..
حجه ايوب كام يستجيب ويسولف بس ماله نفس بالسوالف قهرته بكلبه بس جسمه ما يساعده يوكف ويعيش حزنه .
وهم موجودين اجت امي وعلي وابني وياهم
اول ما دخل صرخ : باباه
ضحكوا على صرخته عافته امي واجا يركض يريد يصعدله شلته ايوب ابتسمله وكاله : بعد حيل ابوك
راد يذب روحه .. منعته ودنكته يبوسه ..
رفع ايده ايوب .. ومدها اله .. كتله ؛ لا بأذيك
وكفت امي تسلم علي وعلي .. رد عليهم السلام
واني كعدت علوش يم كام يلزم براسه وشعره
تقربت من عنده نادية باسته براسه وكالتله : الحمدلله على السلامة يروح الروح كون اني بمكانك يعمر عمري
حجه : الله يسلمج
كام علي يسأل هو وعمي ويستفسرون واسولفلهم على تطور استجابته لردات الفعل وعمي يثني عليه .. دخل الدكتور صاح : هاي شنو كلكم فوك المريض .. لا لا لا انتم اكيد دا تتشاقون معقولة تصرفكم هذا مريض فاق من الغيبوبة تلتمون عليه هيج ؟ لو تتشاقون لو ناوين ترجعوه لغيبوبته
الكل طلع من الغرفة
بقيت اني وعلوش وهو يسألني عن تطور حالته كمت اسولفله كال : ممتاز ممتاز يا ايوب عظيم .. شكاعد تشعر هسه
ما جاوبه حجيت : دكتور هو اتذكر تفاصيل الحادث واتذكر وفاة اخوه .. لهذا مو ميكدر يسولف بس ميريد
وكف عمي ابو نور كال : ذكرتي يعني
حجه الدكتور : لا ذاكرته سليمة الحمدلله
المشكلة عنده باستجابة الجسم لوعي الدماغ يحتاج فترة يلا يكدر يتحسن التوتر العصبية الضغط كل هاي تبعدوها من عنده اصوات عالية مجادلات مناقشات كلها مو زينة وتأثر على دماغه سلبا لازم نوفرله بيئة سليمة حتى يتشافى ما ممكن يتسافى ببيئة مريضة ومتوترة
الدكتور ديحجي نادية دخلت كعدت ع التخم
خلص الدكتور كلامه وطلع وحجى ويا الواكفين برا انو اكو مرضى ووكفتهم غلط
حجه عمي : يلا غفران بدلي وروحي ويا اهلج خلي نادية تداري انت تعبتي
– ما تعبت عمو مثل ما بقيت شهر هنا راح ابقى اليوم
-امشي عمو بدون مشاكل
-دخول المستشفى والغرفة بأسمي واني دا ادفع كل تكاليف معالجته وبقاءه وبقائي ما اريد احجي بلغة الماديات بس محد اله عليه ويأمرني لو يكولي شأسوي مع احترامي عمو بس اترجاك تتركوني يم زوجي لإن اني انطيت وعد ما اطلع من هاي المستشفى الا وهو وياي .
-كاعد تعايرينا جيف كاعد تدفعين فلوس المستشفى هو ياهو العينج
-فلوس الدنيا وقتدرته اني مدا اعاير احد اني دا اوصلك فكرة ما راح اترك مكاني بصف زوجي وراح ابقى وياه وفداه حالي ومالي
مشيت من مكاني واني لازمة ابني رحت وكفت يم ايوب نادية الدموع عشرة عشرة تكله : هي الخلته يهجرني هي الحكمت عليه ما ترجعله اذا ما يطلكني ويعوفني هاي التحجي بالدين شوفها شلون تعاملكم وتعاملني كل خوف من الله ما عدها كل اعمالها رياء بس شوفوني اني شكاعد اسوي .
-اعتبريني رياء وكلامج صحيح وتوكلي
حجه ايوب : اطلعوا من عندي كلكم
حجيت : راح اروح اجيبلك العلاج الكتبه الدكتور قبل ليجي الممرض
طلعت من الغرفة .. نزلت جوا اخذت العلاج من صيدلية المستشفى وصعدت بعدهم موجودين دخلت الغرفة عمي ابو نور موجود .. حطيت العلاج كال : شكد فلوس العلاج لا هم تعايرينه بيهن
ما جاوبته طلعت لأمي كتلها : بقي علوش يمي
كالت : لا ما جايبة غراض عقدتي الجاهل هنا خلي هناك ويا جهال خاله منطلق وينام بحضني .
اخذته وراحت وعلياء ورجلها راحو رجعوا خوات ايوب ونادية يحجون وياه
ما يحجي .. باوعلي عاقدة حواجبي ومتضايقة حجه : راح علوش
باوعتله : اخذته ماما
حجه : اخذهم عمي دخت كلش
سلموا عليه واخذهم عمي وراحو
ورا شوية اجا صلاح وناس من الحشد زاروه .. ما طولوا دقايق وراحوا
رجعت دخلت كعدت يباوعلي حجه : ضعفانة
باوعتله : من الخير
– تعبتج
-من اول يوم اخذتك واني عيشتي وياك جهاد وحركان دم وقهر ..
ابتسمت : بس جهاد يحبه گلبي
رفع ايده مشيت يمه .. لزمت ايده وكعدت على طرف السرير كام يضك على ايدي حجيت : رجعت اقوى مني
ضكها حيل سحبتها انكث بيها : هسه تأكدت انت اتشافيت
حجه :ما صليتي الظهر اليوم
-يا صدك ما صليت
كمت من يمه بسرعه حجه : عبالي عندج عذر
صفنت بوجهه عقدت حاجبي ، حجه : شبيج
-ماكو شي
كمت صليت وطلعت كلت للممرضة اريد اسوي تحليل دم كشف حمل
-نزلي للمختبر
نزلت سويت تحليل كال : نص ساعة ونزلي اخذي
صعدت لايوب لكيته غافي .. بقيت افكر ويا روحي التهيت بمصيبتي هاي وولا فكرت ابد بموضوع العادة ابد ما اجتني من قبل الحادث مال ايوب وراحت من بالي كلش ولا انتهت الها
نص ساعة ونزلت اخذت نتيجة التحليل كالتلي : حامل
ضليت اباوع : افرح هسه لو اضوج !؟
ابني بعده صغير وبنص كل هالهوسة كلش مو مال طفل ثاني
بس يلا الحمدلله على كل حال اقلها ايوب راح يفرح
صعدت فتحت الباب ما الغرفة فتح عينه حطيت التحليل على صدرة ودنكت لكيس الادرار .. حجه : شنو هذا
-البشارة ربك ياخذ وينطي
-شنو يعني
رحت للحمام ورجعت كتله : علوش راح يصير عنده اخ
باوعلي : صدك
-اي والله حامل
-وما فرحانة
-لا الحمدلله بس لتحجي بالموضوع هسه ولا تكول لاي احد
-ليش ناهبته
-لا بس مو وكته
تكدرين تعديلين السرير تكعديني
-تكدر تكعد
رفع السرير لاعلى شي
صار عنده صعوبة بالتوازن رجعت السرير شوية بقى مثل الكاعد
كال : شصار بعد الحادث
– سيارتك مثل حالك وتليفونك ما ادري عنه محد سلمنياه
-محد سلمجياه لو ما لكو
-ما اعرف بس سيارتك بكراج المقر مالتنا ساحبيها ومكتوب عليها الجوكر
وبلال
-بيك حيل تسمع
-بردي گلبي وخففي عليه وضعي
– مثل ما وعدك ووفى بوعده افتداك بروحه حتى ما يخليهم يكتلونك بالرصاص كلب السيارة وراح هو بدالك
سكت رد حجه -صار شكد على موته
-شهر بعد ايام الاربعين مالته
حجيتها وكمت حطيت راسي على صدره حجه : شوكت اطلع منا
-لحد ما تكدر توكف على حيلك
حجه : شمسويلي ما اكدر اصرخ ولا اكدر ابجي احس جسمي متبند
-مسكنات ومهدئات حتى لا تأذي نفسك
حرك رجليك تكدر
ما جاوب لان مديكدر يحركهن
حجه : اذا صايمة افطري انت حامل كلش ضعفانة
-ما راح افطر لحد ما تطلع منا سالم هذا نذري
-بقيتي هنا شهر
– ومستعدك لبعد سنه
رفعت راسي اباوعله : المهم ترجعلي بخير ما مستعدة اخسرك ولا مستعدة انطيك لأي بشر انت مالتي ومالت ابني وبس افتهمت والا
عقد حاجبه ، حجيت : اتراجع عن دعواتي وارجعك للوبي
-رجعت بفضل دعواتج
بقيت حاطة راسي على صدره حجيت : هم تحس بوجع العملية مال صدرك
-لا بس ظهري
حجيت : اهو سيارتك اتجرقعت وتعال بعد لازم تاخذ سيارتي واني ابقى بدون سيارة
رفعت راسي مبتسمه ما انطى ردة فعل حجيت : تصدك من قبل الحادث لهسه مراكبتها نايمة اباب بيت اهلي
ميجاوب بقيت راسي وادندن : لو سرقت منا الأيام قلب معطاء بسام
لن نستسلم للألام .. لن نستسلم للألاممممم
– لتغنين
-مو اغاني هاي مال سبيستون حافظتهن من اني وصغيرة جنت طول الوقت اباوع كارتون … مجانت اغاني بكد ما هي اناشيد بيها دروس وعبر
حلمنا نهار نهارنا عمل
نملك الخيار وخيارنا الأمل
وتهدينا الحياة اضواء في اخر النفق
تدعونا كي ننسى الم عشناااااه
نستسلم لكن لا ما زلنا احياء نرزق
ما دام الأمل طريقا فسنحيا
رفعت وجهي باوعت دموعه بعينه
مسح وكال : رجعيني انام دا تموتوني بهالمهدئات والمسكنات
رجعته وبقيت يمه
لثاني يوم الدكتور كتبلنا خروج بس على كرسي متحرك
وكتبلنا مدرب فيزيائي يوميا … وكتبلنا لسة ادوية وعلاج
ووصانا ناخذه دكتور عيون
خابرت علي كال : جايكم
وصيته يجيب سيارتي ويجينا ويشتري كرسي متحرك بطريقه
كاله : تمام
خابرت خالتي وبلغتها انو الدكتور كتبلنا طلعت حتى تحضرله البيت .. فرحت حيل ورجعت خابرت عمو ابو نور ما جاوبني .. ساعة ووصل علي ووياه امي وابني سلموا عليه وشاله هو و اللمرض حطوه بالكرسي
وصلنا للشارع حطيت نقابي من لكيت عمامه كلهم جايين واهل المنطقة
كاموا يدبجون ويسووله هوسات واهازيج جنوبية ع الحشد بمناسبة طلعته
اني اخذت ابني ودخلت وامي وراي
طلعت خالتي تدبج وتهوس بطلعته سالم
بس هو رفض هوساتهم واهازيجهم وطلب يدخلوه جوا
دفعوه ودخلوه جوا .. وكعدوه بالاستقبال وانرج البيت رج بالزلم
ونسوان والدنيا انكلبت على طلعته .. خواتي اجن هم بنفس اليوم باركلي طلعته الدنيا انكلبت بالبيت
اني كاعدة ولازمة ابني بيدي ونادية تباوعلي بحقد لو بودها تاكلني
مر ابو نور حجا : غفران ليش ما خابرتي عليه من الدكتور كتبلكم على طلعة
-عمو خابرتك بس مرديت شوف تليفونك
– وتخابرين اخوج يجيبه
– وشبيها اذا اخويه جابنا علي من زمان يشتغل وياه
-رايدة تحطين اخوج بدال المرحوم !؟
-حط اللي يعجبك مدا احاول اسوي شي كل اللي ابالي ايوب يكوم على حيله
عرفت خالتي ونادية تارسات اذانه عليه تجاهلت
بس كتله : عمو اذا تكدر اسحب ايوب مريض وميتحمل هالهوسة هاي كلها ترا يتأذى
-انت مو احرص على ابنا من عدنا
-عمو انت ليش ضايج من عندي مدا افتهم !
هذه صحته مو مال تهاون
-اذا خلصتي روحي لاهلج وخلي اخوج يرجعج لبيتج ابسمايا
عقدت حاجبي
عفته حجت امي : شبيه وياج
-متأثر بحجي النسوان
-جا فوكاها ما يشوف صارلج سهر حالج حال ما عفتي المستشفى
-ما مسويتها لحد حتى انتظر منه يشوف ويقدر خلي الله يوكفلي ايوب على حيله وكلشي ما اريد
-وراح تضلين مكابلتهن !؟
-لعد اعوفه !؟
-شتكدرين تسوين بعد اهله يداروه
– ما اكدر ما امن يضبطون علاجه وبعده راسه ما مستقر ما مستعده اخسر الوصلتله من صحته وارجع للصفر طلعته هاي بطلعان روحي وصلتلها
-جا اذا زلمهم معادينج نسوانهم شراح يسون بيج
– يولون زلمهم فوك نسوانهم اني اكولج ايوب تكليلي زلم ونسوان
دا احجي
اجا طفل صاح : غفران غفران
وهو كدامي حجيت : يا غفران عليه
-عمو ايوب يصيحج
كمت من مكاني رحت الاستقبال كله زلم طلع عمه زمخ بيه كال : شعندج واكفة ما تشوفين الديوان متروس زلم
-بس اسحبلي ايوب ديصيحني
-امشي منا وخلي احد يوصلج لبيتج
تركته وردت احد يسحبلي ايوب
دزيت احد على صلاح ما اجاني
عازتك عازة يبلال بهالايام جان هسه اجيت تركض كبل لا احجي الف رحمة ونور على كبرك
خابرت على علي كتله علي اسحبلي ايوب
راح يم ايوب كاله : طلعني راح اموت
سحبه وطلعه من الاستقبال التمن عليه النسوان
سحبته للغرفة كامت خالتي تحجي : وين ماخذة الزلمة عماته رايدات يسلمن عليه
خزرها ايوب سكتت : يا يمكن تعبان
سديت الباب كال : رجعيني للمستشفى ما اتحمل هنا اموت رجعيني راسي راح ينفجر ولج رجعيني
-هو من الاستقبال ما خلوني اطلعك تريدهم يخلوني ارجعك
-ولج راسي راح اموت طلعينييي
-راح تهدأ هنا
باوع للفراش .. كال : هذا شلون انام عليه اني ما اكدر اكعد رجعيني
-سريرك الطبي من بعد عمي انطيناه لمريض اصبر بس اليوم باجر اشوفلي احد يجيبلك
كام يصرخ : يا بلال يا خوية ولك ااااخ يا جرحك يا خوية
ولك ليش هديت اخيك وحده بلال تعادنا نموت سوا تعوف ايدي ليش
كام يصرخ دخلوا على صوته
كامت عمتي تصيح : رايدة تموتي مخليته يبجي واتذكري ببلال
حضنته لزم امه وكام يصرخ من كل حيله
ويكللها : يمه دفنيني وياه مالي حياة بعده
ولج يمه دفنيني ليش خليتوني اعيش ليش ما تركتوني الحكه
ولك يا خوية
التموا عليه يهدون بيه اخذت علاجه وانطيته دف الكلاص من ايدي وهو يصرخ : لا تبنديني لا تموتيني عوفوني اموووت عوفييييني
التموا كلهم عليه يهدوه
رحت اخذت ابني واجيت ذبيته عليه : اذا مستعد تيتمه بس حتى انت ما تتأذى لا تشرب علاجك ولا تطيب وارجع انتك ومرت واتبع بلال روووح … موت روحك واتركنا اني وحالي وابني ومووووت اكتل رووووحك موت
درت عنه امسح بدموعي وعلوش يلزم برجليه وهم يهدون بيه ويقنعونه يواسونه رجعت اخذت العلاج وانطيته الحباية .. محني الظهر
اخذت ايده حطيت بيها الكلاص وفعت وجه انطيته العلاج اخذه وشرب مي
كتلهم : اذا ما بيها زحمة كل هوستكم هاي ووكفتكم تأذي ما تساعده دماغه بعده تعبان ومو بعيده ينتكس ويرجع بغيبوبة اذا تعرض لضغط فاترجاكم اطلعوا خلي انومه
طلعوا كلهم بقت خالتي ونادية صحت على علي اخوي .. دخل كال : يا الله
سحب ايوب للفراش واشاله وحطه على فراشه ومدد رجليه وحطينه ورا مخاد كبار مال قنفات حتى لا يرجع ظهره كلش وينام ميرتاح
رحت للمطبخ دا اصبله .. شفت نادية مشت كبالي .. اخذت الصينية ورحت لكيتها كاعدة يمه هو مرجع راسه ، حجيت : كومي انكلعي
-انكلعي بعينج احترمي روحج لا ابتلي بيج والله
-والله اني اللي واصلة بيا لهنا ما عندي مانع هسه اجرج واسويلي سالفة بنص هالهوسة
حجه ايوب : طلعن مني اثنينجن لا هسه انعل والديجن .. كوووومن
فزت نادية طلعت حطيت السوب وكرصت خده : مرة لخ لا تجيب ابويه افتهمت واني ما اطلع على كيفك يلا اكل
-ولي مني
-لا اولي ولا هم يحزنون تاكل بالعين واغاني تاكل ما تاكل الزم حلكك واشربك السوب غصبا ما عليك يلا
اندار اخذ الكاسة وشربها كلها
كال : فكيني وولي مني
– عفية هيج صير اسمع الكلام لتعاند ترا انت بعد ما تكدرلي
-غفران
-اذا تكدرلي حرك رجليك انطي ارادة لنفسك مثل ما قويت ارادتك وحركت اديك وكدرت ترجع حاول
-اتركيني وولي
-صارلي شهر شاب راسي وما تركتك ووليت هسه اولي اغلط وفرغ همك واحجي شكد ما تكدر وطلع حركتك بيه اني قبل اسبوع ادعي الله وجانت هاي امنيتي ترجعلي سالم ومستعدة اتحمل مزاجك وعصبيتك طول عمري
-تعبان غفران اريد اروح للنجف ما رايد غير ازور كبره
-وعد راح اخذك وباقرب وقت بس انت ارتاح لا تضغط على نفسك وضعك ميتحمل
فتحلي حضنه : تعاي يمي
-زين مني متحملة ادخل هالغرفة لخاطرك وتريدني اكعد ع السرير هم
تركته ورحت جبت علوش من نص الجهال وحطيته بحضنه
كام يشمشم بيه ويبوس : راح يجيك اخ يا بويه وراح نكبر ونصير اربع نفرات بس كون امك تعقل وتحافظ على اللي ابطنها
-راح احافظ عليه شرط تحافظ على روحك
-ما مرتاح
-ولا اني بس شسوي
نزل علوش وطلع عاف الباب مفتوحه كام يحجي ببلال ويبجي بهدوء كال : خدرتيني وبندتي جسمي
-هذا المطلوب تبجي بهدوه عوف حركات المشوهين تأذيك
ضل يباوعلي دخلت امه باست راسه وكعدت يمه تسولف وياه
اني كعدت بالكاع
كاللها : يمه احد يجيبلها فراش ترا هي تعبانة
ميريد يكلهم حامل
كالتله : خلي تروح ويا امها مو امها راح تروح
حجه : انت من كل عقلج تحجين تروح لاهلها وتعوفني بهالحال
-نادية موجودة
– لا ممنوع تروح
اجت امي دخلت سلمت عليه كالت امي : اخذ ابنج يمه خاطر ترتاحين
حجه ايوب : لا خالة عوفيه احنا هم تعبانج بيه
-لا يخالة اني الما اكدر بدونه مو هو اتعودت عليه عليوي لبة كلبي هذا
سلمت عليه ووصلتها للباب كال علي : باجر اني من الصبح راح اجي
-تسلم
رجعت طلبت من سرى فراش .. فرشت بصف الجرباية وحطيت مخدتي
وطفيت كال : انطيني تليفونج اذا تنامين
انطيته تليفوني وكعدت اهز واوم بأبني .. نومته و حطيته بصفي
حجه : شيلي مخدة من طهري ورجعيني نعست
سحبت وسندت ظهره رجع على كيفه نام مدلي ايده
شبكت ايدي بأيده ونمت .. الغرفة ظلمة ودافية
فزيت بالليل على صوت ابني علي فز بالليل يبجي كعدت اطبطلله وكمت اتلمس الموبايل فتحته واخذت ابني بحضني اطبطب على ظهر ايوب بعده منزل ايده .. وجهت التليفون عليه
واشوفه نايم ونادية حاضنته ولافة ايدها على بطنه ونايمة …..
يتبع….
- يتبع الفصل التالي اضغط على (رواية صوت من المجهول) اسم الرواية