رواية صوت من المجهول الفصل الثامن و الاربعون 48 - بقلم زينب ماجد

      

رواية صوت من المجهول الفصل الثامن و الاربعون 48 - بقلم زينب ماجد

فزيت من مكاني نزلت ابني من حضني وكمت بلا وعي .. لزمتها من شعرها .. وجريتها بسرعة من عنده للكاع فزت تصرخ .. الغرفة ظلمة على ضوا التليفون لزمتها من راسها واسحل بيها وهي تصرخ : ااااااااااي يبووووووووووو

ما تدري ولا مستوعبة شديصير وياها

ايوب كام يصيح : هاي شكو شدسوين فتحي الضوا

– من تتقربلا والله اذبحج كومي اطلعييي منا

كامت لحيلها وهدت عليه : الساقطة الكح*** اني تجرينيييي

دفعتها مني حيل وهي تريد تهد عليه

ايوب يصيح وعلوش كام يصرخ .. واني لزمت بيها من راسها

دخلت سرى على الصوت شغلت الضوا وجرت نادية من عندي ونادية تتلاكفني تريد تلزمني كتلها : اطلعي برا ما اريد اشوف خلقتج هنااا اطلعي مناااا

– كاعدة ابيت الخلفج الساقطة الدايحة ام الشوارع

ايوب كام يصيح : اطلعن برا بنات ******

عفتها ومشيت شلت ابني ونادية فرفحت تصيح وتغلط وايوب يصيح عليها .. جرتها سرى من الغرفة وخالتي كعدت كعدت مخروعة ونادية كامت تبجي وتشكيلها : خالة نايمة والله وجرتني من راسي ملختني وطردتني

ايوب : طايحة الحظ شنو هالتصرفات شنو هالجسارة تمدين ايدج عليها وهي يمي

– يعني جنت تدري هي يمك ومستريح للسالفة اني حاطني يسرى وحاطها يمنى

– امشي اطلعي مني لا ابتلي بيج

– جنت تدري بيها هي ويايا بالغرفة وتركتني انام مفكررررت من راح اكعد والكاهاااا

– اطلعيييي مني

لزمتني خالتي من راسي كالت: ولج انت حاسبة روحج مالج رداد

دفعتها من عندي كام يصرخ ايوب : غفراااان استغليتي شلة حالييي اكوم اكفر بيييييج

تركت خالتي وراي وطلعت النادية تبجي وعايشة دور المسكينة من سمعت ايوب وخالتي صفوا ضدي كتلها : اذا باقيلج ذرة كرامة اطلعين من حياتنا .. وما تبقين مكابلتنا متستحين حاشرة روحج بعائلة واحد متزوج ما مشتريج ولا رايدج كافي تتلزكين برجلي واطلعي

– محد متلزك بيه غيرج ام الشوارع شهر خلصتيها بالشارع والمستشفى ام الدين ما تستحرم تنام بالشوارع .. رجلي وما اخليه الج والله ومثل ما طلكتج مرة الا اخلي يطلكج مرة اللخ ويخلص منج يا دايحة

– خليني اديح وانام بشارع ومستشفى بس ما بيهم زلمة الكدر يطخ عباتي لو يشوف وجهي مو كاعدة بالبيت بحجة مستورة واني اتلزك برجل حماتي واجر من عنده فلوس واعيش براس الزلم ..

لا تقارنين روحج بيه لإن لو تموتين ما تطولين

رجعتلي خالتي كالت : ولج انت ما تستحين ما تخجلين كببتي البيت بنص هالليل ولج كافي ولج كااافي

كامت تدفع بيه وتضرب

وخرتها من عندي واخذت ابني وطلعت للكراج اسكته .. رجعته لنومته .. شايلته بين اديه رجعت للغرفة خالتي وسرى ونادية يم ايوب ونادية تبجي وكاعدة بطرف الجرباية حجيت : سرى شوفيلي مفاتيح الغرفة الفوك

حجه : نزلي الطفل بفراشه

سرى : ما ادري والله عد امي.

خالتي : اطيها سم مو مفتاح خلي تولي منا ما اريدها ابيتي

حجه : دا اكولج نزلي الطفل بفراشه

– خل يطلع الكل حتى اكدر انومه .. ما اكدر انومه بالهوسه او انطوني مفاتيح الغرفة الفوك واذا كلش انطيني سويج السيارة اطلع لبيتي

صاح : غفرااااان احترمي نفسسسسج واكعدي

صاحت خالتي : طايحة حظ ما تستحي

باوعتله وكتله : معناها طلعهم

حجت نادية : يطلعنا حتى انت … قاطعها وهو يكللها

– اكلي خ*** وانجي وولي من خلقتي لا تكابليني كومي يما ارجعي لنومتج سرى اخذي امي .

كامن تلاثتهن وهن يخزرن بيه

اني كمت اباوعلهن لحد ما طلعن كلهن نزلت ابني بفراشه

حجه : انت شصايرلج شجاريلج

– لو حديد بمكاني جان فل وانت تكولي شصايرلج خليني محترمه وضعك وساكتة وما ضاربة الباب وعايفتك الهم ورايحة البيتي احط رجل على رجل وابن امه اليحاجيني لا اكابل مرتك ولا اكابل امك .. ولا أسمع اهاينك

– لأنج ما محترمة

– الكل محترمين بس اني ما محترمة من تجي تنام يمك وما تحترمني واني موجودة وما تكللها وخري ولا تبعدها منك هذا مو قلة احترام بس اني من انفجر وابعدها منك اطلع مو محترمة

– ما جنت ادري هي

– احجيهن لغيري

– اني جذاب وجنت ادري شنو المطلوب

– كولها مرتي ومن حقي وغصبا ما عليج احجيها ليش مستحي

– تعرفيها ما يحتاج

باوعتله … تنهدت وكعدت منمت ..

بس كعدت على كلبي حجايته كامت دموعي تجري وامسح بيها بهدوء

حجه : طفي الضوا

كمت من مكاني طفيت الضوا وردت اطلع صاح : وين

– للكراج

طلعت كعدت بالكراج

كتلت روحي عليه حتى يرجع وتالي من رجع يرزلني علمود نادية ويكول مرتي !! يجي باالي اعوف كلشي وامشي لبيتي واكو هاهية وسويت العليه وهو بعد بين اهله .. بس ما ادري شبية

غبية ما افتم ما ادري شبيه

هنوب ورطت روحي بطفل ثاني

يعني مجبورة ابقى وياه واتقبل زواج

اليوم ميريدها باجر يتصالح وياها ويا ريمة رجعتي لعادتج القديمة

تعبت واني افتر بنفس الدايرة

لا روحي الكارهته وباعدة روحي عنه ولا روحي متقبله موضوع زواجه واعيش وياه عادي زوجة اولى .. ابتليت بروحي بلوة لا تهد ولا ترضى

اذن الاذان .. رجعت للمطبخ لكيت سرى كاعدة

: ها بعدج

– مدا اعرف انام الليل

– ليش شبيج

– غفران حيل متأذية

حجت وبجت بسرعة استغربت شبيها بسرعة بجت ما عولت بس احد كاللها شبيج انفجرت لزمتها : شبيج حبيبتي ليش هيج تبجين

– يمكن اني ظلمته يمكن مات بحسرته

– ظلمتي منو

– بلال

– كولي يا الله حبيبتي المشاعر مو بيد الإنسان انت ما كرهتي بس ما شفتي يناسبج وهذه قناعتج ما تنلامين عليها

– بس مات وهو متأذي من عندي

– ارتاح ليش تعتبرين الموت اذية بالعكس اذا جان متأذي لازم تفرحين لإن هو هسه ارتاح تتخيلين وياي المفردة انتقل الى رحمة الله .. تعرفين شنو معنى احد ينتقل لرحمة الله يعني الراحة يعني العيشة الهنية لتعتقدين الموت تعب واذية بالعكس الدنيا هي دار التعب يمكن الله عوضه عنج بحورية من الجنة وهسه مرتاح

كامت تمسح بدموعها وتشاهك

وكفت خالتي كالت : حتى هاي بجيتيها شمالج ويا الناس انت

سرى : ماما معلييج دنسولف

– وشبيح تبجين هذا اخوج كام بخير وسلامة

– هيج ماضايقة

– كومي حبيبتي كومي اتوضي والزمي سجادتج وصلي واقري قرأن ربج مو يكول الا بذكر الله تطمئن القلوب .. روحي ارتاحي

دخلت للغرفة .. اخذت سجاده

حجه : وين

– اصلي

– صلي هنا

مشيت اخذت التليفون وشغلت اللايت وحطيته ومديت اصلي الفجر كملت .. طلعت سورة الإنسان قريتها بصوت مسموع بعدها صدقت وكمت لفيت السجادة ومشيت قفلت الغرفة ونمت

كعدت الصبح انتبهت محد من ولد عمه بقى

زين يعرفوه هو رجليه ميوكف عليهن غير لازم يبقى رجال بالبيت يساعده !؟ احنا وحدنا وين نكدرله !؟ هسه اذا اريد اشيله من سرير للكرسي وين اكدر اشيله حتى لو اني ووحدة وويايا ما اكدر اجازف يمكن يزلك يوكع بالمستشفى الممرضين يشيلوه هنا شلون

ايوب نايم وعلوش نايم

خابرت علي رد كتله : عندك شي

– بالدوام كولي

– لا بس ايوب وحده

– محد من عمامه بات يمكم

– لا اني عبالي بالغرفة بس انتبهت محد اكو كلهم رايحين حتى ولد عمه

– هسه اخذ اجيكم لعد

سديته ايوب مفتح كتله : ارفع كتاب بعلي فرغة يمك ليش تبقى هيج او شوف احد من كرايبك تثق بيه لإن محتاج احد بدال …. يعني ما ادري

كمت بس شوف احد يناسبك

ما رد عليه عاقد حواجبه

تركته ورحت حتى اسويله ريوك لكيت نادية كاعدة ومسويه شوربة دجاج وعدس : المن ؟

– لرجلي

– مو رجلج .. وممنوع تتقربيلا

– لاااا خاف متقبلين

– عادي مستعدة اعيد هوسة البارحة بس مراح تتقربيلا

– حبيبتي مثل ما هو رجلج رجلي

– يوم اللي طلبت الطلاك كالي اطلكها والله بس ارجعيلي ..

– هه وتاليتج رجعتي وهو بعده ممطلكج

– عايفج شفقة مرجعتله الا بعد ما شفته ما مشتريج وما رايدج بس انت متلزكة زايد يطردج من الباب ترجعين من الشباك

– المهم رجلي وما اعوفه لوحده دايحة مثلج

– غاثتج دياحتي لأن ميثق بيج تطلعين وحابسج ؟

– المهم انت دايحة

– من ما تكدرين تصيرين مثلي حقج اتغلطين وتبردين كلبج بهالاوصاف لإن فاشلة

– محد فاشل غيرج وحدة دايحة وساقطة وما عندج كرامة لو عندج ما ترجعين وهو مطلكج

– بردي كلبج بألفاظج واستمري من توصلين لمستواي احجي

– يا فدوة اوصل مستواج شايفة روحها فد قندرة

– من تصيرين تخصصج مهندسة وعندج وظيفة مثلي وبيت باسمج وسيارة جوا ايدج ووولد تارس حضنج ورجال شاريج وصاينة نفسج ومحققة كل اللي يتمناه بشر بدون ما الون حلكي بلون لو اغري احد بعيوني لو احصر روحي بلبس .. بمصلاية وعباية حققت الما كدرتي تحققي بجمالج الشايفة روحج بيه وملابسج وتصرفاتج وملاعيبج والمربى مالتج شوفي روحج بيا مستنقع وشوفيني .. شفايتلج تتمنين روحج قندرة بلكت تطولين وتصيرين مثلي .. والغرور على امثالج دوا

– كلهن ذني اطاجياهن ايوب لو ما هو قندرة ما تسوين

ضحكت : وهاي انت حالج حالي عندج ايوب شنطاج !؟

ما تستوعبين عندي اللي اكبر من ايوب واللي مسخرلي ايوب وغير ايوب

( ومن يتق الله يجعل له مخرجا ويرزقه من حيث لا يحتسب)

عفتها ورحت للحمام ..

طلعت لكيتها جايبتله الريوك وكاعدة يمه تحجي وياه

مماكل الريوك ولا يحجي ويرد بس يستمع الها

حجيت : ايوب كل الخالتي تنطيني مفاتيح الغرفة الفوك

جان منتظر حجاية حتى ينفجر كب بوجهي : امشي مني طااااايحة الحظ انعل عشيرتج بت الاوادم ادب سززززز

– ليش دا تغلط مكتلك شي

جر الخاشوكة من الصينية وصوبني بيها وهو يصرخ : بتل بتل اكو انعل الجابج عليه

وكام يغلط ويصيح

كعد علوش على صوته شلت ابني وطلعت ما حجيت وياه

اجا علي اخوي خابرني طلعتله .. دخلته للاستقبال كال : شلونه الحجي

– نفسيته صفر وكاعد يطلع قهره بينا

– ميخالف اتحملي اذا انت ما تتحملي منو يتحمله خطيه وضعه كلش مو سهل يحتاج وكفتنا وياه ابو عرب يستاهل

– واني شمسوية غير ساكتة !؟ بس ما ادري ليمتى راح اكدر اصبر واسكت اخاف لحظة اللي انفجر بيها اضيع زيني بشيني

– لا تنفجرين ولا تحجين زلمة مريض

– المشكلة مو بيه عليه لو بس عليه اتحمل اهله مينجرعون مرته امه حتى عمه مدري شبيه وياي صاير

– فترة وتعدي ادخلي وكليله علي هنا اذا محتاج شي

.. رحتله كتله : علي موجود محتاجه

– خلي يجي يساعدني

اجا علي شاله للحمام واني وياه

طلع علي وسديت الباب شغلت البوري المي الحار دفيت الحمام وكمت اخذ مي بالطاسة واذب على جتفه هو عصبي وتضايق من حالته هاي اخذت صابونة ركي ودهنت جسمه كمت اعسله بدون ليفة لإن الجلد مال ظهره ملتهب منع الدكتور يغسل بليفة .. كمت بس افركله بيدي سبحته ونشفته وبقيت رحت جبتله المرهب دهنت ظهره .. كتله: علاجك ما اخذته ومتريكت

– كملي وانلصمييي لا تسمعيني صوتج

سكتت وطلعت صحت على علي ساعده وكملناه وشاله طلعناه .. .. رجعنا ع الكرسي ايوب طالعة روحه من حالته مقعد وينشال روحه صايرة بخشمة كاله : طلعني برا خلصني من هالمهجوم لتخليني مكابل هالادبسزيات

كام يضحك علي واخذه بالعربانة وطلعه بالباب ع الشمس

علوش ابني لحكهم .. كام يلعب كدامهم بالباب كمت اسمع ايوب يبجي وعلي يواسي بيه على بلال .

صفت سيارة عمه ابو نور سلم عليه ونزل هو وصلاح

اني عدلت حجابي وكعدت .. طلعت خالتي حجت : شعدج بعد هم اطلعي بالباب واكعدي ويا الزلم

– خالة انت شبيج وياي ترا ابني بالباب يلعب وكاعدتله ورا الباب بيش ضارتج

طب ابو نور هي ترزل سلم وكال شكو

دخل علي وايوب واني اصيح على علوش عافوه وراهم ركض علي اخوي جابه وسد الباب حجه : عمي رايد اروح للمكبرة ما اتحمل بعد

– تصير زين وتروح عمي وين طايرة المكبرة

– عمي انتم ليش جاي تعاملوني جني طفل انعل ابو حالتي انتم جاي اتذلووووني اكلكم رايد اشوف كبر اخوي جاي امووووت

– يا عمي غير لمصلحتك احنا ونخاف عليك

حجيت : بس هيج هم ديأذي نفسه لا دياكل ولا يقبل ياخذ علاجه .. وحالته النفسية كلش تعبانة الحالة النفسية نصف العلاج

علي : ليش ما ناخذه و ع العلاج ؟

ابو نور : احنا اعرف بحاله ما يتحمل .. عوفوها هسه

كام ايوب ينافخ ويغلط تعبت نفسيته حيل علي كام يباوعلي عرف عمه كاعد يكللنا معليكم لا تدخلون ..

رجع حجه عمي ويا علي : شني ما مداوم اليوم مو خفارة

حجه ايوب : خابرت ورفعت بيه كتاب محتاجه يمي

ضل يباوع عمه كال : ها اي خير ان شاءلله بكيفك بعد

عافنا ودخل ابو نور حجيت : اذا اخذت علاجك والمهدأ مالتك وتلزم نفسك ما تصرخ وتنفعل روح وريح كلبك افضل مباقي هيج تحترك بمكانك

حجه علي : نخابر الدكتور نبلغه ؟ حتى اذا ماكو مانع ليش نعرفه هيج محترك خلي يطفي ناره بالمكبرة بعد هذا قدر ما يكدر يهرب

– ما عندي رقمه بس موجود بالراجيته

– امشي جيبي

مشيت عمي وخالتي كاعد بالهول يحجون من فتت سكتوا

اتعديتهم كملوا .. اخذت الراجيته مال العلاج .. ومشيت منهم هم سكتوا طلعت للحوش .. انطيته لعلي .. اخذه وخابر

اني رجعت للمطبخ صابني الفضول

وكفت يم الثلاجة وانطيتهم اذني حتى اذا اسمي بالحجي انصتله ..

يبسبسون يكللها : هسه اني مالي غرض عمي اهلها ما يرضولها تطلع بس ما يكدرون يحجون ولا يندكون بيها من ورا ايوب شوفت عينج مخليته مكوم عمامه وعشيرته على اخوها بعد شيكدرون عمي يحجون يفكون حلكهم هو الراضيلها واحنا ما نكدر نحجي لان اهلها ساكتين وبلوة

– خوية هو ايوب جان يدري يحس شو عمت عيني هو والميت

– من الاخير خوية كله صوج ابنج هو الما كادرلها

– جا اني شكلك هذا الكاتلني يا خوية كبل لا يوكع هجر البيت وكابلها ابسمايا خوية ساحرته عاميته مدري شمسويتله ومسيطرة عليه هيج يخاف ها خاف يضغط عليها شوية وتعوفه غير احط ظهرها واكسره

– شيحط يا صبيحة شيحط شو دكرها ورجعناها غصبا عنها وكعدناها وياه عكب زعلتها من راحت الكربلاء شو هاي ما نحس الا مصعدته محكمة ردنا نسيطر عليها ونكعدها من الدوام حتى تخضعله شو هاي تجيب كتاب النقل وتحطه بوجوهنا ووين لرئاسة الوزراء بس كله صوجه عمي من البداية كناله عمي المرة ما تنطي عين عافها تدرس وانوب وظفها والله يتيمة

– جا مرته الثانية هاي وياها باب الحوش ما يرضى توصل

– عود زوجته صغيرة كلت شني ياخذ نادية الجبيرة تلعب بحاله خل اخذله الصغيرة يربيها على ايده وعلى طبعه شو تاليتها هي ربته زلم اني وابوه جزعنا وما كدرنا نحكم ايوب ولا يمشي بشورنا تالييها يصيرلها محبس ليلة ليلة وحدة عفتها كعدت الصبح لكيتها حاطة اخوها لايوب .. شتحجين شتكولين اذا ابنج الراضي

هزيت ايدي : خرب حظي شايفيني مسيطرة على ايوب واني مفاتيح غرفة من البارحة لليوم ادك اريد احد ينطينياه ماكو عايفيني اني وابني بغرفة جانت سابقا غرفته هو وضرتي وكاعدة ومنجبة

شكد باطلين دكرها يحط ظهرها ويكسره الا هيج يلا يرضوله ويكولون والله زلمة بس من متفاهمين وواثق بيه وتصافينا فترة لا هنا طلع ما كادرلي واني مسيطرة عليه ..

تنهدت .. محد ديشوفه من ديغلط ويهين ويصيح واسكت رجال عادي

بس من اسوي اقل شي اطلع مو زينه وما يعرف يدكرني .. شهالعقليات شهالبشرية .. حتى الله ميعرفوه

رحت اخذت علاج ايوب طلعت لعلي حجه : خابرت الدكتور كال اكتبك ابرة خلي ياخذها ويروح بس حاولوا لا تخلونه يوصل مرحلة بالأنهيار .. حزن بجي اعتيادي ما يضر بالعكس خلوا ينفس عن اللي بداخله بس كون ما ينفعل وينطي ردات فعل قوية

انطيته علاجه وكتله

– الحمدلله لعد خلي نروح

– هسه !؟

ايوب : اي هسه

علي : بكيفكم اني ما عندي شي اخابر امي ابلغها ونمشي

– لعد خلي اروح ابدل لعلوش

دخلت جوا .. باوعت علوش مموجود بالغرفة كمت اصيح : علوووش

نبأ كبالي : وين علوش ماله حس بس لا مسويله مصيبة

مشيت للمطبخ لكيته فاتح الكاونتر وشاك علاكة العدس ويلعب .. شلته وكمت الم بالعدس ..

مريت كال : وين راح ترحون

– للنجف

– نجفيش منو اليروح

– اني وايوب وعلي

– انت بكيفج تتصرفين لج بابا عيب احترمي البشرية الكدامج

– عمي بكيفي شنو رجلي واخوية قرروا وحروح وياهم

– بكيفكم تاخذون زلمة مريض مممنوع اكعدي

– ممنوع ليش خابرنا الدكتور وكال عادي وهو ديتأذى

– اكعدددددي اكلج

– اني شعليه عمو ذاك ايوب وروح احجي وياه اذا تحب

صاح علي يا الله خالتي تعدلت وناديه صعدت .. ودخله للهول حجه ايوب : شكو

– وين رايح

– للمكبرة

– زلمة مريض انت ابني لا تمشي بحجي هاي الطايحة حظ اكعدددد

حجيت : عمو ليش تغلط

شو بس هاي كلتها ما احس الا الحف جابه ترس على وجهي

كاله علي : على اي اساس تضربها وتغلط عليها

اني لزمت خدي مصدومه وخالتي تصيح : حل نسوان ما تجي الا بالكتل والمهانة اكعدي وسكتي

وعمي صرخ على علي : وتحاسبني انت حيوووووان اضربها واضربك فوووووكها لك

حجه علي : اكبر مني ولو ما حرمة هالبيت جان عرفت شلون احاجيك

عافه علي وراد يطلع كام يصيح ايوب ورا علي

ومشى الكرسيى وراه حجيت : بصفتك منو وشنو دا تضربني وتهين اخوية ابيت زوجي

صرخ ايوب : امشي دخليييي جواااا طاااايحة الحظ

تقرب عليه عمه وكال : شنو ولج شنو انت اطرديني من بيت اخوي

– لا تسويها طاردتك مالك حق تضربني لا انت اخوية ولا ابويه ولا زوجي ولا حتى ابو زوجي .. اذا كاعدة هنا فبس لعين رجلي الا بخويطكم ما اشتريكم وما اسمحلك تضربني ابويه صاحبك لو عايش جان ما رفعت ايدك هاي

كام ايوب يصيح : لا تخليني انعل حتى عشيرتج طبي جوا طاااااايحة الحظ

مشيت للغرفة دخلت ..

اخذت التليفون خابرت امي انفجرت ابجي واحجي

وهي تكلي هدي هدي خل نفهم .. كمت احجي كالت : اجيج

اناشغ .. وجاوبت .. لا

– ولج يمه بديت اصدك هاي المفلوكة مسويتلهم سحورة شنهي معقولة لافة عقولهم كلها ومخليتهم اذياب عليج من عمت عينهم كون بيمن قصرتي شو كضى نصج وانت ويا ابنهم وهي مترهية وكاعدة بمكانها لو هذا هم حظ الكبايح

– تعبت ماما تعبت نفسيتي مدا ينطوني مفاتيح غرفتي الفوك اكعد بيها وغصبا ما عليه اكعد بهالغرفة الجان بيها هو وناديه غير صياحه وغلطه ونفسيته الديطلعها بيه تعبت

– عمت عيونهم دعوفيهم وتعاي شبيج ملزكة روحج

– ما ملزكة روحي بس ايوب مريض

– جا هو ايوب ما محترمج خلي لاهله دا اشوف شلون يعتنون بيه

– ما اكدر هو نفسيته تعبانة وضعه هذا وعوقه .. كلش متعبنه خصوصا جان بلال يشيله ويسنده هسه لا الحيل ولا الصاحب واجي اني هم اعوفه .. ما اكدر بطلعان روحي يلا صحى وكام يكعد ويحجي .. هو من صاحي يتأذى اذا نروح اني وعلوش من عنده مو مريض ما اكدر اجازف بصحته علمود مشكلة

– جا شلون اتضلين هيج

– ما اعرف كل الاعرفه تعبانة واجيت يمج انفجر ما بيدي حيلة

– اسبحي وارتاحي ومدي سجادتج وواحد واحد اطيهم لربج ما يقصر بيهم واتحسبي ربج ما ينساج ولا ينسى تعبج

دا تحجي امي

واسمع عمه وخالتي يحجون ويلومون بيه ويصحون

وانطيتها عين وما تنكدر وبعد ما تلزمها واستغلت كعدتك ومرضك وكاعد تطغى ويحرضون ويحجون ..

كمت اسولف لامي واكولها : اسمعي شلون يحرضوه عليه هسه هو ناقص ؟

– عمه خير شجاه غمامة الغمته

– يمه كثر الحجي باذنه مالي علاقة الرجال ضربني بس الحق خوش انسان بس حجي خالتي باذنه مطلعه نادية المسكينة واني الما انرد ومسيطرة على ايوب .

– الله لا يطي كل باطل معليج يمه يكيدون وربج يكيد وكليهم لربج وشوفي شيعمل بحالهم

نهيته ويا امي وبقيت اكلب بالايباد ..

فتحت الباب نبأ: علوش بلل نفسه بالحمام تعاي

فزيت رحت شلته واجيت بدلتله .. دخل ايوب .. كتله : احجي لخالتي تنطيني مفاتيح الغرفة الفوكة الى متى ابقى هنا خلي اصعد اسيطر على ابني

– ما انطيج وما اخليج اتصعدين والا اذلج طايحة الحظ

سكتت عنه وتنهدت واني اردد : لا حول ولا قوة الا بالله

حجه : شلون ولج تتحسبين عليه

– دا احوقل مدا اتحسب ليش اتحسب عليك

– امشي كدامي طلعيلي ملابسي خلي ابدل واطلع افتك منج ومن وجهج

كمت من مكاني اطلعله ملابسه واكوله : اذا هلكد مضايقتك اروح لبيتي وارتاح مني ما اسوى تقهر روحك بيه

– اكلي خ*** ولا تحجين صوتج ما اسممممعه باب الحوش من توصلين اكص رجلج والله

كمت ادور بملابسه حجيت : راح تروح للنجف لو طلعه

– معليييج

– حتى اعرف ازيدلك لو شطلع

-للكبووووور

طلعتله بلوز لبسه ولبسته جواريب وشحاطة حتى لا يتقيد بالحذاء

وانطيته الغترة .. وجبتله العطر عطرته .. لو روحي لعبت هم حبلت وهم رجعت هالسالفة التعبانة

مشيت للمطبخ بسرعة اخذت ليمونة وكمت اشم بيها ..

صاح : انطيني تليفونج اخذه وياي

– بس بالاول خلي اخابر علي يدزلي اسم الأبرة الوصفها الدكتور حتى تاخذها

خابرت عليه دزلياها برسالة

سحب التليفون مني بنتر سمعت عمه منتظرين صلاح وخالتي راح تروح وياهم سألت .. : راح ترجعون اليوم ؟

– باب الحوش اذا شفتج واصلته وطالعة الااعلكج والله

جبت علاجه وكلاص مي وكتلها لخالتي : حاولي تجبري على بسكت حتى ياخذ علاجه اذا ما اخذه

اخذه عمه ومشى .. ونادية واكفة مبتسمة وعود تتشمت

كتلها : لا تفرحين تهديده هذا معناها لا تخليني اطلع وتروحين ما اكدر بدونج ..

– ابقي فسري وقنعي روحج كافي الكتلة والاهانة الغسل ولبس حييل وابو زايد .

تنهدت ورحت لغرفة البنات كعدت سرى وخليتها اتدورلي المفاتيح

طلعتلياه صعدت صليت كوة راسي دا احسه ثكل صار هالكبره نزلت اوصي نبأ وسرى على علوش حتى انام ملكيت نادية سألت عليها كالت : راحت لامها

– خفة وراحة ديروا بالكم عليه فدوة

نمت للمغرب جابتلي سرى علوش نايم غطيته وكمت صليت ورجعت انام راسي ذابحني من الوجع .. ب٩ دخلت نبأ كالت : خالوا يريدج

كوة شلت روحي ونزلت كال : مو كالج ممنوع اتصعدين فوك انت ليش تعاندين

– ايوب والله راسي ديأذيني وانت تعرف راسي بالحمل شلون يركبني

-اصعدي ولي مني

باوعتله تعبان مبين مهدود حيله من البجي

كتله : علوش نايم فوك .. والغرفة دافية ليش متخلي صلاح يصعدك

-مالج علاقة بيا ولي انطمري

تركته وصعدت لهناك ما احس الا صوت صلاح فزيت جريت حجابي اندكت الباب الغرفة ظلمة .. فتحتلا الباب اخذه صلاح ومدده ع الجرباية .. وطلع عدلت نومته وحطيته ورا ظهره وتمددت انام

مد ايده على راسي حجه : بعده راسج يوجعج ابويه

-كلش مأذيني مدا اشوف من وراه

-اتقربيلي افركلج

دنيت روحي حشرتها بجسمه كام يفرك براسي .. غفيت

ثاني يوم .. احتاريت بيه شلون اخذه للحمام شلون اشيله ؟

هو يفكر بهالأمور وساكت لا يطلب ولا يشكي ضعفه ديدمره

كلت هسه اني الى متى ابقى معتمدة

هو شو لا اخ ولا احد عنده بيت بطرك نسوان ابقى اتنخى عمامه يجون منا لهناك علمود حمام حتى علي زعل وطلع من البيج

جريت الكرسي يمي وكتله : اني اساعدك كوم

-ما اكدر وخري

-راح تكدر اذا دنكتلك وثبتت اديك على اجتافي ورفعت نفسك حفز نفسك راح تكدر

-اذب حملي عليج وانت حامل مخبلة

-اني كايلتك دوس ببطني كتلك ثبت اديك على اجتافي وارفع نفسك واني راح اساعدك .. ساعدني واتجارئ الطفل ببطني مو باجتافي

من لا جار اضطر يمشي وياي

نزلتله رجليه وثبتتله الكرسي حط اديه على اجتافي وصاح (يا علي) رفع روحه من السرير انداريت ويا ذب نفسه بقوة ع الكرسي اهتز راد ينكلب الكرسي كتله : لازمتك لتخاف مرة مرتين راح تتعود شلون ترفع نفسك

اخذته للحمام وهم ساعدته ورجعته للغرفة

حطيته ع الكرسي وشغلتله تلفزيون ونزلت سويتله ريوك وصعدت اتريكت اني وياه وعلوش بحضني اوكل بيه .

اجو ناس عليه كال : شلون راح انزل

-ما مضطر تلتقي بأحد انسان مريض ونايم بفراشك

-عيب يمعودة ناس متعنية

-بس حالتك على كدك مو مال عيب وتضغط على روحك ارتاح بغرفتك هنا من الهوسة

خابر على عمه كاله : اني باجتماع بالمقر

خابر على صلاح نايم ..

خابر على ابن عم اله اجا كابل الناس

كتله : عمو اتضايق البارحة لإن انت فرغت علي اخويه

-لا تدخلين روحج بهالأمور

-اني ممدخلتها اني قاهرني وضعك هذا يا عيني منعتب على عمك والناس مشغولين مرة مرتين تطلب من تزيد تصير حمل زايد انت نفسك تكره روحك تكوم، انت حقك تفرغلك سايق وحمايه ولازم واحد عرف حتى يكدر يدخل بيتك يساعدك منو من اقاربك تثق بيه فرغه

-غير بلال محد اثق بيه ولا ادخله على اهلي ..

انكسر ظهري بفراكه ماكو احد يسد مكانه

-الله يرحمه اذا نبقى نصفك الادين ونتحسر منجني غير الهموم اني ردتلك علي لإن من زمان هو يشتغل عندك ومو لان اخوية بس يحبك وخدوم

-ليش نسيتي اخوج من حط عينه على اختي

-حتى بلال جان حاط عينه ورايدها بس هي الما رادته .. ما دامها بنية وصغيرة مو عيونهم نكسة بس رادوها بالحلال مو غلط وانت حجي ويتمنون يناسبوك وما صارت

-لا اوكفي بلال جان رايد سرى شوكت هاي

-اذا ترجع بذاكرتك لما علي خطب سرى وانت وافقت اتذكر شلون بلال راد يستقيل وراد يترك الشغل

صفن بوجهي : ليلة وفاة والدك من شفتني كاعدة برا اواسي جان ديبجي عليها بس هو نيته وياه جان صافية وحبها بسرفها لا اجا يمها ولا سوا سوالف مو زينة حاولت ويا سرى علها تقبل بيه تكول ما احبه معقد

-اني وين جنت عن هالامور

– اني من اول ما اتزوجتك كفشت الموضوع ومو غلط ولا بكيف الإنسان يحب بس بكيفه يلزم اخلاقه وتوكف انته بعينه واثنينهم وكفت بعينهم الفرق بلال ما حاول يخطب لإن يعرف سرى ما رايدته بينما علي اتقدم لخطبتها وعادي تكدر من يحي تطلب منها تكعد بغرفتها وهي اساسا كله بغرفتها انت محتاج احد يوكف وياك

-جنت اسأله شوكت تتزوج يكلي عوفني هيج الله ما كاتبلي شكد حاولت اخطبله ميقبل ويعصب ويتنرفز ويمعود شجلبت وعوف الموضوع يعني اني ما جنت فاهمه

-لو فهمته جان شصار ؟ تخرب العلاقة بيناتكم لإن مستحيل اختك تقبل بيه

ضرب صفنه كام يراجع الذكريات كلها

كمت انطيته علاجه كال : ليش ما كلتيلي وقتها ليش ما حجيتيلي

-لو ما ميت ما احجي بلال جان اكثر من اخ خبر زواجك اثر على علاقتي بيه لإن ضم عليه وابتعدت من عنده بس حان دائما معتبرني اخته ويشكيلي جان وحيد كلش ومحد فاهمه والله يعوضه بالجنة .

حجيت : لازم نروح ع المدرب الفيزيائي كلش ضروري

مجاوبني بقيت كاعدة يمه اخذت تليفوني من ايده باوعت شكو ماكو منو دازلي لكيت كروب القسم دازين موعد امتحانات الفاينل مال نص السنة والطلاب كلها داخلة ازمة هو احنا وين داومنا وافتهمنا حتى نمتحن بالمواد !؟

انضربت على راسي بهالخبر

حجيت ويا ايوب كتله : شلون افتهم مواد مماخذيها ومشارحيها شلون مشكلة هاي

-هاي غير من وراكم ماكو وطن ماكو دوام اكلوها

-اني شعليه غير هم مدا يداومون

-بس المحاضر ديجي وينطي واجبه بس انتم متحضرون

-غير القسم كله متفق ماكو دوام وضارب الدوام

-انتم افشل جيل عرفه البشرية العالم ترتقي بالعلم علمود تعمر اوطانها وانتم ضاربين الدوام بحجة ماكو وطن

-لا جديات هسه شلون

-شلون ما طولني مكابلج وكاعد طلعيلي موادج اشرحلجياهن دارسهن كبلج ومفتهمهن

-حتى كتبي مو هنا يالله ببيت اهلي

-خابري احد يجيبهن الج واكعدي اقري

خابرت على امي كالت : امرلج اجيبهن الج بس ما اريد اطب اختنك من بيتهم اخذيهن مني

كملت اتصالي من امي هو يباوع كدامه واني يمه

رفعت ايدي لوحت .. ما انتبه رجعت شوية ليورا وكمت ارفع باديه مدا يستجيب حجيت : ايوب

دار ركبته ع الصوت يلا انتبه

كتله : سد عينك اليسرى

حجه : لتحاولين مدا اشوف بيها

-وراح نبقى هيج لا دكتور فيزيائي ولا عيون المن كاعدين ننتظر فلان وعلان بلكت يفرغلك وياخذك

– عوفيها غفران

– لا والله ما اعوفها احسب احسابك اليوم نحجز على دكتور العيون ونروح مدرب مناك نطلع

– وتبتلين بيه بالشارع واوكع ونثير فلم خب لو اموت

– ما راح توكع ولا راح تموت وراح تمشي بعد اني مو بكيفك اني ولي امرك افتهمت طيع واسكت حبيبي

ابتسم ضحكت : اي هيج اضحك يمعود مكدر نفسك ليش

– مالي خلك هدومي مو اضحك يا غفران الرايح مني اعز مني

– شتسوي عندك ولد والثاني بالطريق وحالتك صعبة والله من دخلت غيبوبة كالوا هو والله لو يعيش لو يموت ضربتك بالراس ايوب اقل ضغط منك على حالتك اني والجهال الكاعد تخلف بيهم نضيع بلياك لخاطرنا لا تضغط على نفسك

هز راسه ورفعه يفرك وجهه مدمع

لاحظت بيه شغله من نبقى اني وياه حتى لو مريض بس يكون هادئ ومرتاح، من ينزل جوا ويكون بينهم يتخبل يتهستر ميعرف بيمن يطلع حركة كلبه

بس المشكلة ما اكدر ابقى فوك كدرت اخذه للحمام

شلون راح اكدر انزله ؟ زين لازم يوميا ينزل حتى يروح للمدرب هاي صعب

نزلت ابن عمه اللي كعد ويا الخطار سلمت عليه وكتله : ولو اكلفك بس اتنزل ايوب

صعد شاله على اجتافه واني شلت العربانة ونزلت ..

كاله : ابو علي محتاج بعد شي

كاله : سلامتك خوية الله يحفظك كلفناك

كتله : ليش خليته يروح لو مخلي يصبر اقلها يصعدك السيارة

-متشوفي استأذن شكله لا اكعد مو زين احا وكابل خطارنا انت شبيج

بدلتله وكتله : نروح

كال : ما اروح وحدي وياج صار ما صار ابتلي بيج لو تبتلين بيه

-والله عاد واحد يبتلي بالثاني اذا نكعد ونتنطر اليفرغون ما نعيش وللامانة مفارغين عمك ميكدر يحك راسه من الاجتماعات والضغوطات اللي بالشغل حتى عيب نخابر ونضغط راح نروح

-لا تعاندين غفران

-راح اعاند وراح اروح

حجت نادية : انت بس رايدة تتصدرين وكع منج صار بيه شي برا شنو يروح من ادينا والله علمود انت تستعرضين

– انجبي انت محد طالب رأيح اني ورجلي

-لا تغلطين طايحة الحظ يا ما مرباية جان استحيتي اكبر منج وتغلطين

ايوب : زيدن عاشت اديجن استمرن

كام يصفك .. وهز ايده

-متشوفها تغلط عليه متكللها عيب بكدها اني

-كل وحدة بيجن تنجب وتسكت راسي دايخ مالي حيل مزعطتجن

رحت للمطبخ لكيت طابخين تمن ودجاج

صبيت بماعون وفوكاه مركه وفوكاه الدجاج وهي بعدها تشكي وتتمسكن

مشيت اكل بالماعون جريت الطاولة وكعدت مقابيله : افتح حلكك

-دوخري

حطيت الخاشوكة غصب كام ياكل

لزك علوش كمت اوكل بعلوش وبأيوب واحط بحلكي كال : الخاشوكة هسه كاعد تدعي عليج

-ديلا بقت عليها

ضحك : انت والله صايرة بربو*

ضحكت واخذت دجاج اوكله واحط بحلك ابني

خلصت غسلت اخذت كلينكس مبلل مسحتلا ومسحت لابنه ورحت بدلت الي ولأبنه لكيت خالتي متربعة وتحجي عليه وشلون تاخذك وشلون تروح ووكعدت هناك منو الك كتلها : بدل ما تحجين هالحجي كومي ويايا وروحي

-لا اتركيها ولد عمه يجونه وياخذونه شنو مو وحيد هو ووولد عمه موجودين

-لا وحيد وولد عمه زايد منهم ديجون يومية ويتعنون اذا نعتمد ع اليجي معناها هاي كعدته سنة وسنتين مقعد لحد ما يطك ويموت

-تفو عليج فال الله ولا فالج مفاولته بالموت يبومة طايحة الحظ

_ هسه خوش دكومي بدلي وروحي ويانا

-ما نروح خلي ولد عمه يجون

– لا تروحين

سحبته بالعربانة وصحت سرى

طلعتلي حجه ايوب : دوخري وخري

– راح نروح ايوب لتعاند ولتعتمد

– وسرى شتسوي دوووووخري ولا تدخلين

لبست عبايتي واخذت السويج وطلعت دخلت السيارة بالكراج هو مشى بعربانته لوحدة ليم باب المطبخ حجه : عوفيها خلي اخابر علي هو يجي

– ولا اخابر احد وراح نروح وحدنا وما راح نحتاج لاحد غير الله

– اروح اوكع لو ازلك منج تبتلين بيه

– يا محلاها من بلوة هسه خلي ابتلي بيك شعليك اني رايدة

دنكت بست خده : انت مو طلبتني من الإمام العباس ترا عطياته مو هينات اني زلمتك اذا ما عندك زلمة ولا تحتاج احد .. لتشيل هم حبيبي ربك يهونها

رحت ورا رجعت العربانة ليورا وعبرت العتبة مال الباب

صحت على سرى اجت كتلها راح ارجع العربانة انت شيليها من الكاع ونزليها اجت نادية كالتلها : اني انزله

تعاونن اثنينهن ونزلناه الدجة مال الكراج فتحت باب السيارة وقربت الكرسي ورفعناه وحطيناه بالسيارة كال : علي تاليتها تشيلني نسوان

كتله : مو فضل من عدنا كل هالنسوان عايشات بخيرك اذا ما نوكفلك اليوم المن كاسر ظهرك بينا لا تأزمها على روحك فكها

طلعت خالتي لابسة عبايتها يوم الكالت ما اروح

وصيت سرى بعلوش وفتحت باب الكراج وطبكت العربانة وحطيتها ورا بالسيارة واجيت طلعت من البيت ورجعت سديت الباب وطلعنا لمكان الدكتور الفيزيائي من وصلنا هناك جان اكو رجال واكف حطيت النقاب مالتي على وجهي وطلبت منه يساعدني انزل زوجي واحطه بالعربانة كال : خادم خوية

فتحت الكرسي ولزمتها وهو فتح الباب وسلم على ايوب

سحبه وحطه على اجتافه وكعده ع الكرسي شكره ايوب بس جانت كلش جبيرة عليه مشيت وكتله : افضل علمود تشد حيلك بالعلاج وتكوملنا

كام يغلط عليه كله من وراح صوجي اتبع وحدة جاهلة مثلج اني تاليتي الناس تشيلني وتحطني كتلج ما اروح ذليتيني هيج منج هيح من عشيرتج

صميت اذاني من الغلط كله فترة وراح تعدي وتصير سوالف

صعدنا المصعد وخالتي تسانده بالحجي لحد ما وصلنا للعيادة

اخذ اول كورس علاج فيزيائي والمعالج طمنه وكاله : اذا استمريت بالعلاج شهر انت توكف على رجليك وترجع تمشي هم لإن انت ما مشلول انت كاعد تستعيد جسمك شوية شوية من بعد ما مات بالغيبوبة .. وراح تكوم لوضعك الطبيعي اذا استمريت ويانا

شجعه وانطاه امل

اني طلعت خابرت على علي اخوية وكتله : ايوب محتاجك تعال خطية انقهر من طلبت من الناس يساعدوه ، ميخالف حتى لو عمه سوا هيج هو محتاجنا وكلش كاعد تتعب نفسيته

كال : لا الحجي اني احبه بس عمه كبحي .. دزيلي العنوان اجي

دزيتله اخذ تكسي واجا وايوب بالكورس سلم عليه فرح بيه ايوب واستقبله وكام يساعده بالكورس

والمدرب يعلمني شلون افركله رجليه واستمر بالتدليك والمحاولة وياه

من بعدها رحنا على دكتور العيون كاله : عينك تحتاج عملية

وحجز النا يوم وكال عمليتك ما تطول و ما تبات تسويها وتطلع بس ضروري

وكتب النا يوم الجمعة عمليته

واحنا اليوم ثلاثاء .. يوم الخميس جان يصادف شيلة ببيت اهلي امي وعلي لكوا بيت بس زراعي وجبير ونظيف بمنطقة بيت اهل ايوب .. ورغم زراعي بس مبلط الشارع والمنطقة مرتبة .. شافوا البيت من احنا جنا بالمستشفى وجانوا متفقين على هذا اليوم يشيلون من البيت

وضعي جان كلش صعب

ايوب ونفسيته وعقده اللي يطلعها بيه بسبب وضعه

وامتحاناتي اللي ابتليت بيها واني مفاهمة شي من الكتب وممداومين

وبيت بابا راح ينباع وراح تنباع وياه كل ذكريات الطفولة والموقف الصعب جان عدى امي شلون تطلع من بيتها

رغم امي انطت حصة علي بس علي راح يناقل وياها بالبيت الجديد علمود امي متبقى وحدها بعد ما ايوب سوالنا ريمونتادا بالطلاك ومكدرت اعيش وياها ورجعت ويا ايوب ومن باب علي ميريد يرجع لبيت بسمايا من ورا الطريق وشغله هنا وامي ونسرين تفاهمن ونسرين قدرت وضع علي واتفقوا ينتقلون ويا امي ابيتها الجديد

خواتي كلهن جانت حاضرات شيلة اهلي ..

الا اني ايوب ع س على راسي ما خلاني حتى اوصل رغم نادية واهله كلهم موجودين بس من ورا حالته النفسية حتى خباثة اشتغل مو بس تعقيد وغلط وامي قدرت كالت : رجلج مريض يمه ما يصير تعوفينه وهو باجر عمليته ميخالف

-تمنيت بس اشوف بيت بابا ولو اخر مرة

– شفتي ييمه شحصلتي ما بدينا شي هاي ما طولني صرت اقرب عليج ميخالف يبتي العوض بالله

يوم العملية عمه منعني اروح وياهم للعملية

يحسوني احب اتصدر واطلع روحي زينة بس اني مو قصدي هيج بس هو طبعي هشكل دائما احب اسعى واجهد واشتغل واساعد ما احب دور المتكتر والكاعد وماله علاقة بس بعد كل واحد يظن اللي يحلاله الله يعرفني ويجازيني بنيتي .

وكعدت بالبيت وشفت انو سالفة ايوب يصعد فوك صعبة وايوب من يشوفنا احنا فوك ما يرضى ينام جوا ما يرتاح اذا مو اني وعلوش يمه نفسيته ما ترتاح .. واني الغرفة الجوا اكرهه لإن نادية جانت بيها من اول مجابها .. فكمت طلعت فراش الجرباية اني وسرى وصعدته وجبت فراش جربايتي وفرشت فراش جديد ونظفت الغرفة ودرناها الاخشاب وفرشت زوالي جدد ونقلت الاحتاجة والاريده هنا .. لإن اني اصلا وضعي هنا مؤقت مستحيل اقبل ابقى ويا اهله بس وضعه جابرني وما بيدي حيلة

لليل طلعوه وجابوه من المستشفى وشالوه للغرفة الجوا ..

جان تعبان حيل .. اخذ علاجه ونام ما حس بعد .. اني كعدت اقرا واتناطح ويا كتابي لا فاهمني ولا فاهمته

كعد ثاني يوم هم عينه وهم راسه و هم وضع رجليه وهم خطار ما يكطع تروح جوكة تجي جوكة

ويا سلام ايوب لعبني حبل هلكد ما صيح غلط هان حتى فشار فشر

واني اسكت اسكت اسكت .. ما ارد اخاف تزيد حالته

بس الإنسان طاقة الضغوط اللي دا اعيشها من وضعه وامتحاناتي ووضع البيت ولعبان النفس والدوخة مال الحمل دا تكبر وتصير اكبر من طاقتي

مع هذا دا اجاهد حتى اصبر وتعدي ويكوم على حيله بسلامة

بالليل اجتني خالتي كالتلي : اصعدي نامي فوك خلي نادية هي تنام يم ايوب اليوم

-تنام يمه شنو هذا فراشي نزلته وحتى الزوالي مال غرفتي وفرشتها علمود ايوب لإن ميرتاح اذا مو يمنا

كالت : معليج انت امشي اخذي ابنج واصعدي وخلي مرته تنام يمه

-خاله ترا هو مريض يعني حتى مو مال تدور حقوق وهو بهالحال

-شعليج حقوق مو حقوق مرة تريد تنام بصف رجالها انت شعليج

-شعليه شنو غير رجلي ؟

-وهم رجلها

-لا والله ما حزرتي خالة ما اطلع وشتريدين تسوين سوي

-تتعاندين وياي

-لا جايتج ولا كاربتج حتى اتعاند وياج شو انت التجين عليه وتكولين اتعاند واذا تسميها عناده بكيفج اعتبريها مثل متردين لا اخليها تجي للغرفة ولا توصل يم رجلي ما اقبل

-اعلمج التتعاندين وياها منهي

عفتها ..شتريد تسوي خل تسوي

حجت ويا ايوب ايوب كام يصيح ويفشر ويغلط وبحال عدالة اني بيا حال هيج منكم هيج من اللي مكابلكم هيج من اللي جابكم

مو عيشة وياهم قهر

يوم الأحد .. جان لازم اداوم جامعة لإن عندي امتحان

وهو يعرف عندي امتحان وبدلت وطلعت ورحت زفتت خوش تزفيت بامتحاني ورجعت بأمان الله دا اصف سيارتي اريد انزل .. طلع عمي شافني دخل ..

اول ما فتت للبيت حجه عمي : وين جنتي ولج

باوعتله : هاي الولج عليه !؟

-جاوووبي لج

وزمخ

حجيت : لا حول ولا قوة الا بالله

عفتهم ودا امشي صاح ايوب: مكانج طايحة الحظ لتتجاهلين عمي

-هاي كلتها عمك لا عمي ولا ابويه وبعدين ما ملزمة انطي تقرير بطلعتي وجيتي لاحد وهذا اتفاقي وياك من اول مرجعتلك كتلي مبريه الذمة لا احاسبج على طلعة ولا على حق واذا انطيتك حق فمني واذا استرخصت منك بطلعة فمني بس مال اجي انطي تقرير العمك لا والله محد اله عليه

جان يلزمني عمي من راسي كال : انت ابالج ما اكدرلج امشي طلعي برا ساعة متكعدين هنا

حجه ايوب : فوتي لغرفتج وصووووتج ما اسمعه

صرخ عمي : لا شو ما تبقى وهالمرة ايوب تسكت وما تدخل محد كوه راسها غيرك الزمها بالقران ابتلي بيها امشي اطلعي برااااا لج

دفعني للباب كتله : البيت بيتي وبيت رجلي مو بيتك حتى تطردني منه وحتى اذا جان ابالي اطلع فما اريح كلب احد واطلع بكيفه وكاعدة ابيت رجلي الما يعجبه الله وياه

حجيتها لو تخبل كام يصيح ويغلط ووولح اليوم اليووم

وايوب يغلط وخالتي تضرب وتدفع .. اخذت ابني دا اريد ادخل للغرفة اللي جوا .. لكيتها مقفولة

عفتها وصعدت فوك خابر علي عليه كاله تعال اخذ اختك

علي كاله : مع احترامي الك عمي بس اختي يم رجلها مريض اذا ما يريدها هي تخابرني او هو يخابرني ويكلي اخذها ويدلل .. بيتها وبيت اهلي موجودين ما بحاجة بيت احد ..

علي مخبلة بالزايد

انهد على ايوب ويكله: لو عندك ذرة ناموس وحمية ما تخلي هالعايقة ابيتك واتطلكها

ايوب ما رد على كل صياح عمه وتجاوزه وغلطه .. بس روحه فارت من هالوضع لا يكدر يكوم لحيلا ويدير امره .. ولا يكدر يصبر ويسكت

طلع عمهم مغتاض من البيت

نزلت ورا شوية .. نادية مبتسمة فرحانة هيجت كل ذوله عليه

تكلي : بعد اشايفة مني لا ما هججتج بليلة ظلمة فلا اتسمى بأسمي

تجاهلها بس قهر

كدرت تهيج كل ذولة وتخليهم يدافعولها بتمسكنها وبواجيها واني بطرك روحي اشاكف هذا واشاعف ذاك ومحد جابرني اسكت غير وضع ايوب

اخ لو اعرف اتلوك واتمسكن جان مو هذا حالي.

دخلت للغرفة هو بيها

كال : ارتاحيتي من خليتيني بمواجهة ويا عمي ارتاحيتي من ذليتني وصغرتيني كبااااااله بتصرفج

اجاوبه هسه يكول تجادل اسكت هسه يكول تتجاهلني

فضلت اسكت افضل مما انطق وازيدها على روحي وعليه ..

كام يصيح شلون اتجاهله

مشي الكرسي وراي والزمني جرني ليجوا لزم براسي كال : انت ابالج ما اكدرلج ولج كعدت واستغليتني

-ايوب دكافي وخرررر

حجيتها وما احس الا يركع راسي بحافة الجرباية

كامت كصتي تجري دم وخرت من عنده ورحت للحمام نادية تباوع وتضحك متشمتة .

يتبع…. 

• يتبع الفصل التالي اضغط على (رواية صوت من المجهول) اسم الرواية