رواية اللقاء الثاني الفصل الحادي عشر 11 - بقلم منة محمد
خالد بصلها ونظره كلها عتاب: ليه عملتي كده ليه خلتيه يشوفك في الوضع ده وبالشكل ده وقلت له كلام مؤذي
زينب بدموع: امال كنت عايزني اعمل ايه بس انا طبعا اسفه اني دخلتك في المشاكل الي بينا واسف انك فهمتني غلط واسفه اني فقدت عقلي وطلعت اوضه مع راجل غريب عني بس عادي انا عارفه هواجهه مشاكل قد دماغي بس كده احسن هو لازم يعاني كتير لازم ينجرح ويكون مدمر ويعاني بشكل اكبر زي ما سابني اعاني ايوه يعاني ع الاقل نصي الي انا عانيته ومريت بيه
خالد اتنهد: طيب يله عشان اوصلك
زينب مسحت دموعها وقالت: مفيش داعي هروح لوحدي
خالد اصر واخدها وصلها لحد باب البيت وزينب نزلت من العربيه ووقفت تاخد شويه هواء
خالد: انا عارف ان الوقت مش مناسب للكلام الي هقوله بس بجد شكرا ع اليوم كنت مبسوط وممتن لاني اول شخص فكرتي فيه يقف جنبك وبجد لو حسيتي انك مضايقه اتصلي بيا
زينب بأحراج : بس انت شوفت الجانب الاسوء الي فيا بس ده مش هيحصل تاني
مؤمن كان بيجيب عيش من الفرن وراجع شافهم واقفين مع بعض اتجنن وافتكر خالد وعارف انه لعبي وبتاع ستات استني لما دخلت البيت ودخل وراها و كل الشياطين بتتنطط فوق راسه
مؤمن خبط ع باب غرفتها وبصريخ هز البيت : زينب افتحي
زينب بصوت عالي مسحوب بشخط: عايز ايه بغير هدومي
مؤمن: اطلعي لحظه عايز اسأل عن حاجه
زينب: اسال بعدين انا تعبانه
مؤمن خبط اكتر: بقولك عايزك ضروري اطلعي
زينب فتحت الباب ومسكته بأيدها: نعم عايز ايه
مؤمن مسك منها الباب وبنرفزه : الراجل ده كان خالد المندور مش كده هو انتي مجنونه ولا غبيه ولا اتجننتي في دماغك قوليلي هيحصل ايه لو جوزك عرف
زينب نزلت ايده وقفلت الباب في وشه
مؤمن صرخ وهو بيخبط: زينب
خليل كان راجع من بره : في ايه بتخبط عليها بالشكل ده ليه هي دي طريقه احترامك لـ اختك الكبيره
مؤمن: منا لازم اتكلم معاها
خليل: كلمها بعدين لو هي مش عايزه تتكلم دلوقت مش تصحي حي كامل بصوتك العالي
مؤمن بنرفزه: يابابا انت مش عارف حاجه
خليل: ايه الي معرفوش فهمني
مؤمن خبط اكتر: زينب افتحي
خليا مسكه وزقه: امشي روح اوضتك امشي
………………………………….
قدام الفندق ركنت عربيتها وعطت المفتاح للسايس ودخلت سلمت وقعدت وطلبوا اكل خفيف
اسراء: شوفتي وقعت ع نفسي تاني
بسمله ابتمست: طول عمرك فوضويه كده
اسراء: طبعا بتقولي دي لسه هبله زي ما كانت من ايام المدرسه في ثانوي
بسمله: اظن انا قلت فوضويه ليه عايزه تبدئي
اسراء: ازاي متسمعيش كلام دكتورتك ده كل الموضوع 30 دقيقه كشف دي حياتك يا بسمله فيه الف فندق تقدريه تشتريه لكن جسمك واحد معقول مش لاقيه وقت فاضي تهتمي بيه
بسمله: خلاص هكون عندك اليوم بعد الساعه تسعه حلو
اسراء: تمام ع تسعه هستناكي ع فكره الشاب الي كان معجب بيكي لسه بيسأل جوزي عنك
بسمله بستفهام : مين ده ( ضيقت عيونها) اه افتكرت صاحب الارض الي كان في امريكا
اسراء:هو بس صاحب ارض ده انتي محتاجه خمس ساعات عشان تلفي في كل مزرعته
بسمله: وانا مالي حتي لو كان عنده مزارع العالم بس كان هيموت عليا مش هنكر
اسراء: تحبي تقابليه تاني لو قلتي ايوه هيكون هنا فورا بطيارته الخاصه ولو ع الاطفال هو مش مستعجل انا متأكده انه هيتفهم وضعك
بسمله: بس انا عندي حبيب
اسراء اتفاجئت وبعدها سألتها بصدمه: نعم عندك ايه حبيب
بسمله: ايوه الراجل الي لا يمكن اتجوز غيره
اسراء: قوليلي الصراحه انك رافضه تقابليه مش تألفي قصه سخيفه ولا بتتكلمي بجد
بسمله: ايوه بتكلم بجد وقلت له اني بحبه وصارحته بمشاعري واني مقدرش اتجوزه راجل غيره وتخيلي بعد ده كله رفضني
اسراء وسعت عيونها بدهشه: ايه انتي تترفضي
بسمله: وكان معايا جامد وجاف
اسراء: اتجنن ده ولا ايه معقول انتي تترفضي ده انتي زي الالماس الغالي ازاي يتجرء ويرفضك قوليلي وضعه الاجتماعي والمادي استني هو مليونير يعني اغلي من بتاع امريكا
بسمله: لاء ع قده بس عنده ثروه كبيره كرامته وعزه نفسه
اسراء: اه يعني وقعتي في وسامته وجاذبيته
بسمله: رغم هو فعلا وسيم وجذاب بس مش للدرجه
اسراء بتهكم : وده بيشتغل ايه الي ع قده
بسمله: هو كان موظف في شركه وحصلتله ظروف وحاليا شغال في شركتي
اسراء: شغال هنا في شركتك موظف لا واحده واحده كدا عشان بس افهم يعني هو مش غني ومش مؤهل وفوق ده بيشتغل عندك ازاي يتجرء ويرفضك
بسمله: لانه متجوز وبيحب مراته عشان كدا مش هيقدر يتجوزني شوفتي حظي
اسراء: انتي اتجننتي تاخدي واحد ويبقالك دره ليه انتي مش ناقصك حاجه
بسمله : انا كنت موافقه افضل معاه ع اي وضع وبأي شكل بس هتصدقيني لو قلت لك اني ارتحت
اسراء بصلها بدهشه: : انتي ناويه تجننيني
بسمله عيونها لمعت بالدموع : عشان بحبه مش عايزه ادمر حياته
اسراء : كويس انه رفض بسمله ابعدي عنه ولا حتي تحلمي انتي كده هتدمري عايله وتخربي بيت اكيد ده مش حب حقيقي
بسمله: اسراء افهميني
اسراء ربعت ايدها وبعصبيه : لا مش هفهم
بسمله: ده اسامه اول حب في حياتي
……….
في غرفه الاجتماع
بسمله قاعده بتتكلم مع ابراهيم واسامه مرفعش عينه من عليها وهي بصتله بطرف عينها ورجعت لشغلها
بسمله للجميع بجديه :المنافسين الي داخلين قصدنا مش سهلين والجزء الاسوء احنا منعرفش حاجه عن العروض الي هتتحط عشان كده علينا نتحصن بكل اسلحتنا
ابراهيم :احنا استعدينا لـ اي نوع مفاوضات محتمله
بسمله :وانا عايزه بجد اشوف النتائج لشغلكم الجاد وعايزكم ع افضل حاله في اجتماع بكره عمل موفق ليكم كلكم
ابراهيم قام بيلم ورقه: شكرا لحضرتك
بسمله قامت والموظفين كلهم خرجوا ووقفت لما اسامه فضل واقف مكانه
اسامه: بسمله هانم اتفضلي
بسمله اخدت منه الظرف وفتحته: انت اشتغلت فتره مؤقته كتعاون معانا بس ليه استقالتك رسميه جدا
اسامه : انا بحاول ااطبق كل الي قلتيه بالنسبه ان الشركه ليها قواعد وثوابت وقلت ادهالك وبكره هسلم الشغل لـ ابراهيم
بسمله: اه يعني بتدهالي مقدما لانك خايف تغير رآيك بس انا هتكلم معاك بصدق انا حزينه شويه كنت بفكر اعينك في منصب يليق بيك بعد الاجتماع وكنت ناويه اعرض عليك تكون مدير عام للاداره
اسامه : وانا مش مبسوط للعرض لاني مش مؤهل بما فيه الكفايه لمواجهه توقعاتك
بسمله : المسأله مش متعلقه اطلاقا بكفائتك هو بس الشغل حواليا بيضايقك كتير ومش مريح مش ده السبب الحقيقي وراه استقالتك
اسامه : الموضوع ملوش علاقه ابدا بيكي انا جيت هنا عشان اشاركك حلمك وتحققيه وعشان اثبت لزينب اني مش راجل خاين بس واضح اني ورطت نفسي في متاعب كتير ولازم اطلع نفسي وامنعها قبل ما يبقي الوضع اسوء بكتير
بسمله : وانا مش همنعك مع السلامه
اسامه راح في اتجاه الباب هي ندهت عليه : اسامه هو انت بتلومني
اسامه : بصراحه كنت بس حاليا لاء واظن قولت لك انا لسه بحبك
بسمله ابتسمتله: والحب بدايه للطموح بس انا هحترم قرارك يا اسامه وربنا يوفقك
………………….
في كافيه الفندق
كادي قربت عليه : مالك وشك شبه سوق الاربعاء
مؤمن بحيره : هو المفروض اسال اختي ولا ابلغ جوزها لاء انا اقابل الراجل التاني واشوطه بالشلوط اطيره للسماء
كادي : بخصوص تكلم اختك غلط وبانك تبلغ جوزها كمان غلط وكونك تروح للراجل التاني اكبر غلط
مؤمن : امال ايه الصح لما كله غلط
كادي : متعودتش نفسك تدخل في حياتهم
مؤمن بنرفزه: انتي مجنونه دي اختي هي واحده غريبه
كادي: واختك كبيره واكيد فاهمه انت اطلع منها هديلك مثل افرض مثلا اختك دخلت دلوقت علينا وشافتنا وانت مواعدني وفضلت تسالك هتكون مبسوط بالوضع لمجرد انها اختك
مؤمن : الوضع هنا مختلف وبعدين مين ده الي مواعدك
كادي ابتسمت اوي: انا وانت مش متوعدين
مؤمن بتريقه: انا هديكي نصيحه من دهب روحي اكشفي ع دماغك انتي مش طبيعيه
كادي: انا متاكده الكشف هيكون ايجابي انا مدمنه ع الفحوصات
مؤمن : يقطع خلفه البنات خلفه مؤرفه انتي اثبت لي ان كلهم مجانين
كادي: انت كده غلط
مؤمن : في ايه تاني
كادي : قلتلي ان زينب متعرفش ان جوزها مسافر لبلد تانيه صح
مؤمن :ايوه صح ويعني
كادي : يعني هي مرفضتش تكون معاه برغبتها وواضح ان اختك وجوزها منفصلين عن بعض قبل ما يحصل كل ده وانت مش داري
مؤمن كرمش وشه : منفصلين
كادي : انا شايفه كدا
مؤمن من غير اي كلام طلع موبيله واتصل ع طول بأسامه
اسامه: خير يا مؤمن
مؤمن: اسامه هو انت وزينب انفصلتوا عن بعض للسبب ده سيبت البيت
اسامه : مين الي قالك ده وجبت الكلام الفارغ ده منين
مؤمن: انا بس شايف اموركم غريبه
اسامه : مفيش حاجه غريبه بينا , اظن عرفنا انا واختك ناقر ونقير عادي يعني
مؤمن : ده الي كنت مفكره نقار عادي المهم جاي ع اخر الاسبوع
اسامه ضم حواجبه: ليه
مؤمن: لما تيجي تاخد زينب واتعشوا سوي بره هي شكلها مرهقه في الشغل اظن عرفت انها بتشتغل في عياده
اسامه: اه عارف اشوفك يوم الاجازه سلام
مؤمن قفل وبصلها بغيظ :انتي يا مجنونه عدتيني وخلتيني زيك مجنون
كادي : قولت لك متدخلش نفسك في حياه غيرك مش مفيد يله قوم الفيلم هيبدء
مؤمن : اه يله بسرعه ( وقف مكانه) بس فيلم ايه
كادي نفخت بغيظ وشدته من ايده وجريت بيه بسرعه
…………………………………………..
في الحفله بسمله واقفه لوحدها في مكان هادي وفي ايدها كاس عصير
خالد راح عليها: المديره بسمله رؤف هنا
بسمله ابتسمتله : اهلا يا خالد
خالد : احنا عارفين انه راجل غني ليه الاستعراض الضخم ده بالفلوس دي هتحضري لـ اخر الحفله دي لزوم الصفقات
بسمله: ليه مش عايزني اكون هنا رغم انت للسبب نفسه
خالد: عايزه تقولي ايه ادخلي في المفيد
بسمله: ابدا شركتنا هتعمل اجتماع مع مايكل صاحب فندق الجوهوه مش انت هتموت وتعرف العرض الي عندنا
خالد : مش متاكد بس الي متاكد منه اني جيت هنا عشان اشوفك ومش شاغل دماغي بالفندق وبقولك وقفي لحد هنا يا بسمله
بسمله وهي بتعلب بالكاس : انا مش عارفه ايه الي بتتكلم عنه ولا اوقف ايه بالظبط
خالد: توقفي لعب في الخباثه انا بكلمك عن زينب واسامه الناس عايشين حياتهم في متتهي البساطه وعندهم وش واحد
بسمله : يعني تقصد انا بلعب في حياتهم وهما اتنين اغبياء
خالد : ولا دي ولا دي , انا مش مهتم بالي هو صح والي هو غلط انا مش مهتم اصلا بمشاعرك وبقولك اقفي هنا
بسمله : انا عايزه افهم الاول انت تعرف زينب منين
خالد : اتقابلنا صدفة في اليونان واهتمت بهادي لما رجعنا القاهره
بسمله: اه فهمت يبقي ملكش حق تديني النوع ده من النصايح وانت الي توقف نزواتك الاول
خالد ضم حواجبه بعدم فهم : تقصدي ايه
بسمله: قصدي خالد الي وقع في حب ست متجوزه وهو راجل متجوز ومش بس كده عنده 3 اطفال ايه الي بتعمله مش عيب عليك
خالد بهجوم عليها : ع الاقل مش بشتري الناس بالفلوس وخلتهم ينفصلوا عن بعض وجبتي الراجل يشتغل عندك مش حاسه انك اسوء ست
بسمله استغربت بتعجب : هما مين دول الي انفصلوا
خالد: متمثليش واحسن لك تقفي لحد هنا لان الراجل ده هو ومراته وصلوا لنهايه الطريق بسببك انتي
………………………..
في العياده النسائيه
اسراء: حالا اعملك شويه فحصوصات واشعه فوق الصوتيه
بسمله: بس ياريت بسرعه عندي اجتماع مهم 3 العصير
اسراء : ياتري فيه حاجه جديد حصلت مع حبيبك
بسمله : فكرتك بس دكتوره نساء ولا بقيتي وكيل نيابه
اسراء بنظرات كلها غيظ: انا غلطانه كنت قلقانه عليكي
اثناء كلامهم الباب خبط اسراء بصوت عالي: ادخل
زينب دخلت مبتسمه : اتفضلي اخدك ع غرفه الاشعه
بسمله لفت وبصتلها بهدوء وزينب الابتسامه اختفت من ع وشها
اسراء: زينب دي مش مريضه عاديه دي صاحبتي واكتر من اختي رجاء اهتمي بيها
زينب مكشره بضيق : اكيد
بسمله قامت وطلعت بكل غرور وري زينب وماشيه بكل هيبتها
زينب فتحت لها الباب: اتفضلي غيري هدومك
بسمله سألتها بفضول : انا مش فاكره اني شوفتك هنا من اخر كشف ليا
زينب من غير ما تبصلها: لسه شغاله جديد عشان كدا انتي مشفتنيش
بسمله : بصراحه مكنتش بهتم اجي لدكتوره نساء قبل كده
زينب فتحتلها الباب تدخل وبسرعه فتحت الملف الخاص بيها واتصدمت
اسراء دخلت وعملت الاشعه وقالت لها : شايفه الكيس ع الرحم بقي كبير اه بينمو ببطيء لكن لايمكن نسيبه نحدد معاد العمليه الاسبوع الجاي وعارفه انك مدمنه شغل وهو اهم حاجه في حياتك لكن كفايه صحتك اهم
بسمله: المساله مش الشغل ابدا قلتيلي احتمال بعد العمليه مخلفش اطفال وكنت مسلمه امري لله بس دلوقت عايزه اتجوز واخلف اطفال وده الي ماخرني
اسراء: بس اتخلصي منه وبالعلاج كل حاجه تتصلح بسمله لازم تخافي ع نفسك وتقدري صحتك مش تضيعيهم ع الشخص الغلط هتندمي لو مفضلكيش حاجه
بسمله : وانا هيبقي ليا الشرف لو ندمت ع ده
اسراء : انت بجد هتجننيني
بسمله ابتسمت وقامت : انا هقوم قبل ما اجننك
بسمله لبست هدومها وعدلت هيئتها وخرجت بره غرفه الكشف
بسمله راحت عليها : مدام زينب ممكن اتكلم معاكي تحت في الجنينه
زينب هزت لها دنماغها ونزلت معاها: خير عايزه ايه
بسمله قعدت :شوفتي حالتي في الملف
زينب : ده جزء من شغلي
بسمله: متقوليش اني استاهل ومتفرحيش فيا كتير
زينب نظراتها قدام: انتي واحده عيانه مفيش اي مشاعر تانيه ناحيتك
بسمله: شكلك جميل في اليونيفورم
زينب بصتلها بحده وكره: وانا بجد مش مستحمله اهزر معاكي لو معندكيش حاجه تانيه تقوليها سلام
بسمله: اسامه قدم لي استقالته رغم قلت له مهاراته تخليه انسان ناجح وانا هساعده يوصل لمكانته بس هو ولا اهتم
زينب رجعت وبصتلها: ايوه وبعدين
بسمله : هو اتخلي عن كل حاجه عشان يرجعلك انتي وكان نفسي اخاليه معايا بس معرفش المفروض اعمل ايه
زينب بغضب: انتي ازاي قابله ع نفسك تاخدي راجل من مراته هو انتي معندكيش كرامه ولا تربيه انتي وقحه جدا وبجحه جدا جدا بتعبرلي عن مشاعرك لجوزي وتجرحيني وعايزني اشفق عليكي وعايزه جوزي معاكي عشان بتحبيه وعايزني اعملك ايه اتعاطف معاكي مثلا
بسمله : مدام زينب
زينب قطعتها بحده : اسكتي واسمعي انا مش مهتمه ابدا بأمور الحب والعشق الي بينكم لكن خرجيني بره الصوره انا فعلا بشمئز منكم
بسمله وقفت ورفعت حواجبها بستفزاز : اوكيه هقولك بس حاجه اخيره بما اني وقحه وبجحه ومش متربيه انا مش هسيب اسامه وانتي اقعدي واستني رجوعه ليكي
زينب بصتلها بحدة : عارفه انا كل يوم بدعي عليكي ومش هسامحك ابدا
بسمله بكل هدوء: وانا مش طالبه منك تدعيلي ومش محتاجه حتي تسامحيني عشان حياتي تبقي اقل شفقه
استوب ورايكم ياتري زينب هتكمل مع اسامه ولا خلاص النهايه وياتري خالد ناوي يعمل ايه في بسمله انتظروني واحداث حرب جايه
- يتبع الفصل التالي اضغط على ( رواية اللقاء الثاني) اسم الرواية